2011-11-01 隨緣消業

公關小姐繽紛筆, 珠珠

博士明 (郭兆明) 與四五友好結隊，漫遊斯里蘭卡及印度最南端的度假聖地，聖地音譯哥持。歸來茶敘，大談此行大豐收，盛讚哥持真似人間仙境。

哥持在海邊，四周無高樓大廈，一望平原大海，極目千里。此處的酒店，有原始風味，單層大樓金字頂，寬敞通風。園林式泳池，池水久經測試，超國際無污染標準，兩樹之間，每見繫上白色繩牀，讓客人臥於繩牀盪來盪去，逍遙快活。

一日三餐自助餐，晚餐食品種類最豐富，任君選擇，咖喱食品佔多數。

最特別者是薄餅，廚師走到堂前，將一隻中國式圓底鑊反轉，鑊底朝天，繼而燒鑊。工序至此，眾人不知廚師搞邊科。最後開估，廚師將麵粉漿酹在鑊底上，過些時反轉，不久薄餅大功告成。原來是鑊底煎薄餅也。

薄餅送到每個客人面前，任包食物，乾濕由人，鹹甜任選。

因為近海，海鮮供應充足，而且取價相宜，總覺抵食。

酒店內有醫療按摩服務。一團友患遠年肩痛，按摩師用滴水療法，做了半小時工夫，頓覺舒暢無比。

所謂滴水療法，就是吊起一個滴水器，幾秒鐘下墜一滴水，滴在眉心上。為何有療效，不知道，只知道印度醫療有此傳統方法耳。

旅行團又去參觀一間清真寺。寺內寺外，都美輪美奐。建寺在五百年前，二百年後重建，重建時特自廣東運去一批青花瓷磚鋪地。該寺文獻載明此事，以示珍貴隆重。現時瓷磚保持得很好，可以說，該寺是滿地古董矣。照算起來，那些瓷磚大約是清初產品，即在今日原產地，也是值錢的東西也。

佢哋又去參觀世界最大的禪修地，此為一座古色古香建築，宏偉莊嚴，任何人可以進去禪修。

相傳原址只有一個門樓，一位世外高人曾在此打坐三日，遂成名地。當地政府紀念高人，便在原址興建一座宏偉臺殿，以作禪修之地。今日更成旅遊點矣。

哥持人口不多，環境清靜，旅客以歐洲人為多。最可稱道者，一級酒店日租，相當於港幣六百元耳。

眼明手快撈世界

公關小姐繽紛筆, 珠珠

于師傳 (于燕平) 自從離開煲呔曾 (曾蔭權) 官邸，打了一場補水官司，頓成知名人士。後更著書立說，縷述三百零三日驚濤駭浪生活，亦打鐵趁熱之意也。

近來私房菜風起雲湧，于師傅心念一動，一聲我來也，私房菜立即開檔。出來撈世界，眼明手快，冇執輸也。

博士明 (郭兆明) 得風氣之先，搶閘捧場，約同一班老友，品嚐于師傅手勢。逑姐是當然座客，可惜佢成晚唔自在，因為成抽鎖匙不見了，歸家無門也。博士明替佢減壓，保證佢可以歸家，大不了請消防幫忙，一斧劈落，何門不能開？逑姐聽了也笑起來。

佢一把年紀，登台做花旦，居然好評潮湧，委實難得。佢屬稀有品種，座上諸君，對佢諸多鼓勵，希望佢多多登台，戲迷鍾意老戲骨也。

又見安烈打陳博士，看窈窕伊人，人未見聲先到，無他，夠氣耳。上次見佢是在廣州火車站。佢帶領一班人，大搖大攞從特別通道出來，此刻重提，佢曰：「你講大話，我腰骨唔妥已久，怎能大搖大擺？行特別通道則如事實。」佢又話，當日匆匆而過，唔記得叫你與我同行，因為我地去花都，好嘢食之不盡也。

何事去花都？因該處有個美麗風景點，個名靚到暈，叫甚麼？芙蓉帳是也。睇完風景，又去睇學校。立叔叔在花都辦了一間花都商業學院，既云商業，何妨在商言商，該學院其門如巿，收費昂貴，一樣咁多人幫襯。內地人求知欲旺盛，而且喜歡新事物，學院有推介新嘢，所以大受歡迎。安烈打陳博士每次去花都，都要去學院參觀，睇睇人家點解咁成功，辦學可以名利雙收。

安烈打近來，喜歡自求多福，周圍搵食，竟然搵到電氣道大利食筋腩麵，嘆為天下美味，時時叫司機去買。佢食慣高級食府，偶然光顧小食肆，新鮮感特強，樣樣都成珍品。

于師傅炮製的菜式，非南非北，不南不北，當淮揚菜食，卻有好多廣東味道；當廣東菜食，又有不少淮揚風味。佢除咗做私房菜外，又設帳授徒，收費不算貴。

大編輯叫珠珠報名，學識煮幾味，一藝傍身足以養老。啋，幾時到養老也。