Kungress B. Ġaċinta

Kungress dwar Ġaċinta Marto

Minn”Bulletin of the Little Shepherds” Jan-Mar 2010

B’xorti tajba l-Papa se jżur Fatima matul is-sena li fiha qed ikun iċċelebrat iċ-ċentinarju mit-twelid ta’ Ġaċinta Marto, r-ragħajja ċ-ċkejkna li, iktar mill-oħrajn, tkellmet dwar id-devozzjoni lejn il-Papa u lejn il-Knisja. Fil-kuntrest tal-ġrajjiet ta’ Fatima, dan huwa element ta’ sinifikat speċjali, ladarba jaqbel ma’ waħda mill-aspetti rilevanti tal-mixja spiritwali li għaddew minnha t-tfal.

Biex jiċċelebra dawn it-tifkiriet, is-Santwarju ta’ Fatima qed jorganizza kungress dwar Ġaċinta Marto, mill-4 sas-6 ta’ Ġunju 2010 bit-tema “Ġaċinta Marto: Minn laqgħa għal mogħdrija”

Dan se joffri opportunità tajba biex naraw il-messaġġ ta’ Fatima mil-lenti tal-ispiritwalità ta’ Ġaċinta. Għalhekk, aħna se nippruvaw mhux biss li nsiru nafu aħjar il-personalità ta’ din it-tifla, iżda wkoll nidentifikaw xi fatturi rilevanti tal-attitudni ġewwinija tagħha li aħna nistgħu nużaw bħala gwida kemm biex naqraw il-messaġġ ta’ Fatima kif ukoll il-ħajja Nisranija.

Il-mogħdrija se tkun il-punt tat-tluq biex nifhmu l-personalità u l-ispiritwalità ta’ Ġaċinta. Din ir-riflessjoni se tgħinna wkoll biex niċċaraw il-ħsibiejiet teoloġiċi marbutin ma’ din id-dimnensjoni, bħalma huma t-tpattija, l-impenn għas-sagrifiċċju, t-tifsir tat-tbatija, Alla quddiem il-ħażen, ix-xirka tal-imgħammdin. Fl-istess waqt, dan se jgħinna nistħarrġu wkoll xi mplikazzjonijiet tal-mogħdrija fl-aspetti varji tal-ħajja bħalma huma l-edukazzjoni, l-kura tas-saħħa, l-ispiritwalità, l-moralità, l-involviment soċjali, u l-bqija. Se naraw kif din l-attitudni min-naħa taċ-ċkejkna Ġaċinta taqbel ma’ aspett fundamentali tal-Messaġġ ta’ Fatima, li jibqa’ jisfida l-Knisja u s-soċjetà fi żmienna.

Ġaċinta, l-Papa u Fatima

minn José Carlos Carvalho, Universidade Católica Portuguesa.

Disgħin’ sena wara l-mewt tal-Beata Ġaċinta, reġa’ ġie Papa ġewwa Fatima, għaxar snin wara l-Beatifikazzjoni tar-Ragħajja ż-żgħar u matul iċ-ċentinarju tat-twelid taċ-ċkejkna Ġaċinta.

Din hija koinċidenza sabiħa, u opprotunità tajba għalina sabiex nerġgħu nħarsu lejn ir-relazzjoni trijangolari bejn dawn it-tlett atturi: l-Beata ċ-ċkejkna, l-Papa kbir u l-figura ikbar ta’ Marija (ta’ Nazzaret, li hi, naturalment, l-istess Marija tal Cova da Iria). Iżda x’ rabta hemm bejn dawn it-tlieta?

Nibdew miċ-ċkejkna Ġaċinta li għaliha, kif nafu, l-“Missier Qaddis” (kif kienet issejjaħlu hi) kien wieħed mill-favoriti spiritwali tagħha, flimkien ma’ Ġesu moħbi fl-Ewkaristija u l-Qalb Bla Tebgħa ta’ Marija. Irridu niftakru li kull ma nafu dwar dan, minbarra r-riferenza għar-‘raġel liebes l-abjad’ fit-tielet parti tas-sigriet, ġej mill-memoirs tal-kuġina tagħha Luċija. Ġaċinta nnifisha qalet ftit li xejn matul id-diversi nterrogazzjonijiet li kellha toqgħod għalihom. Bażikament, hija ma għamlitx ħaġa oħra ħlief li kkonfermat dak li kienu qalu ħuha u l-kuġina tagħha.

Aħna nafu li fit-tmiem tar-Rużarju hija dejjem kienet tirreċita tlett Ave Marijiet għall-bżonnijiet tal-Papa u kienet tixtieq tarah: “Kemm nixtieq nara lill-Papa”. Ġaċinta u Franġisku kienu joffru d-dmugħ tagħhom għall-konverżjoni tal-midinbin, għall-Papa u bi tpattija għad-dnubiet magħmulin kontra l-Qalb Bla Tebgħa ta’ Marija.

Fid-dehra tal-infern, l-ewwel parti rrivelatilhom il-persekuzzjoni tal-Papa, “l-Papa jkollu jbati ħafna” fil-qalba tat-turment. Minn dan il-lat, bis-saħħa tad-dehra ta’ Ġaċinta, r-ragħajja ż-żgħira, Fatima tbassar il-mixja iebsa li kellu jagħaddi ninnha l-Papat matul is-seklu 20, li hu meqjus li kien l-iktar seklu vjolenti fl-istorja. Għal Ġaċinta l-missjoni tal-Papa hi waħda ta’ taħbil il-moħħ, tassew waħda ta’ tbatija, bħal dik tal-kbir appostlu Pawlu fit-tilqigħ tagħha ma’ qagħdiet differenti iebsa iżda dejjem meħtieġa u li jitlobu l-attenzjoni, biex jerġa’ jwassal l-Evanġelju fil-kulturi differenti (ara 1 Tess. 2, 2).

Id-Dehra tal-Papa

Darba meta t-tfal kienu maġenb il-bir tal-ġenituri ta’ Luċija, Ġaċinta kellha dehra tal-Papa: “Jiena rajt lill-Missier Qaddis ġo dar kbira hafna, għarkuptejh ma’ mejda, b’rasu mgħaddsa ġo jdejh, u jibki. Barra mid-dar kien hemm ħafna nies. Xi wħud minnhom kienu jitfgħulu l-ġebel, oħrajn kienu jisħtuh u jużaw kliem ħażin. Imsejken Missier Qaddis, aħna għandna nitolbu għalih”. Dan hu diskors affezzjonat u mhux li jċekken, magħmul min-naħa ta’ xi ħadd li jaf li l-Papa jgħix fid-dar kbira li hi l-Knisja. Għaliha, l-Papa jistħoqqlu mħabba u rispett. L-istess dehra seħħet f’ Lapa do Cabeço, fejn Ġaċinta qalet li kienet rat lill-Papa jitlob ġo knisja quddiem il-Qlab Bla Tebgħa ta’ Marija. Dawn huma oġġetti bażiċi ta’ informazzjoni li nsibu fid-dokumentazzjoni kritika u, fuq kollox, fil-Memoirs ta’ Swor Luċija.

Fil-Fatt, Ġaċinta kellha mħabba speċjali għall-Papa li kienet issejjaħlu bħala “Missier Qaddis”, għamla paternali u mill-iktar intima tal-mod kif tirreferi għalih b’fidi Nisranija.

L-iżgħar waħda fost ir-ragħajja ż-żgħar diġa kienet għamlet għażla bejn id-diskors tal-fidi u d-diskors ta’ xi tradizzjoni partikulari, bil-konnotazzjonijiet tagħha ta’ setgħa. Imħabba bħal din lejn il-Papa kienet normali fil-Portugal fil-bidu tas-seklu 20, meta l-Papa kien meqjus eżattament kif ratu Ġaċinta: bħala figura ta’ missier u familjari (iktar milli trijunfalista kif mistħajjel dommatikament fi żmien tal-Konċiju Vatikan I), u bħala figura ta’ qdusija bl-influwenza simbolika u morali kollha li din tissuġġerixxi. Għal dik it-tifla, figura meqjuma bħal dik ma setgħetx tbati, jew tkun suġġetta għall-insulti, umiljazzjonijiet, jew għal xi għamla ta’ tmaqdir, għaliex, permezz ta’ din il-figura, dan kollu kien indirizzat lejn il-familja ekkleżjali li hu kien jagħmel minnha u li Ġaċinta wkoll kienet membru tagħha.

Ġaċinta ma riditx tara xi membru tal-famijlja tagħha (inkluż il-Papa) jkun ittratat ħażin. Hija kienet iddispjaċuta ħafna bit-trattament inuman li hi rat lill-Papa jkun suġġett għalih fit-tielet parti tas-sigriet. Hu jiġbor flimkien il-messaġġ ta’ Fatima kollu. B’hekk Fatima intrabtet mal-Papa. Hi Fatima li ġabet tlett papiet lejn il-Cova da Iria, u mhux il-Papiet li holqu lil Fatima.

Fatima ssir Santwarju

Fl-istil bibliku, Fatima bdiet titwemmen bl-istess mod kif Alla ħadem fil-loġħika tal-Inkarnazzjoni - minn isfel għal fuq – u mhux b’digriet tal-Papa – min fuq għal isfel. Skond l-interpretazzjoni ssuġġerita minn Swor Luċija u mill-Knisja, fid-dehra tal-infern u fit-tielet parti tas-sigriet, il-figura liebsa l-abjad tiġbor fiha, f’termini apokalittiċi, lil dawk l-Insara kollha li d-dija tal-fidi tagħhom iddawwal in-naħa mdallma tas-sitwazzjonijiet ta’ mewt u vjolenza li jattakkaw il-komunità ekkleżjali. Ix-xandir mill-ġdid tal-profezija li sseħħ ġo Fatima tinkludi kelma dwar il-figura liebsa l-abjad. Din il-kelma toħroġ mill-fomm ta’ tifla żgħira li għaliha l-Papa għandu jkun imħares u megħjun. Dan mhux kliem normali jew fil-vojt dwar il-figura tas-suċċessur ta’ San Pietru, li normalment hu ppreżentat mil-lat tal-missjoni tiegħu ta’ għalliem.

Mela x’kien li tifla setgħet tgħid li hu daqstant fundamentali dwar figura li hu daqstant importanti fil-ħajja tal-komunità ekkleżjali? Kif inhi din li tifla komuni u, fuq kollox, bint Alla li ma jafha ħadd iġġiegħel lill-Papa jiġi jżur lilha lil ħuha u lil kuġina tagħha? Fatima tat sehemha biex iseħħ dan. Kull tifel jista’ jitkellem dwar il-Papa b’mod normali u anke fil-vojt. Iżda x’inhu li jagħmel id-diskors li wżat Ġaċinta u dak li qalet dwar il-Papa daqshekk speċjali?

F’dan il-post imbierek, imbierek għaliex hawn fejn Alla xtaq li n-nies ifaħħruh, hawn f’dan is-santwarju, l-Knisja tas-seklu 20 reġgħet semgħet ix-xandir tal-profezija li Alla se jkompli jżur il-poplu tiegħu fiż-żminijiet ta’ vjolenza mwettqa b’idejn il-bnedmin, żjara din id-darba magħmula bl-interċessjoni ta’ Marija. Issa, ma hemm l-ebda santwarju jekk xi ħadd ma jkunx warrbu għalih, jekk xi ħadd ma jibdilx dan l-ispazju f’wieħed li hu differenti mill-oħrajn għal għan partikulari (li fil-lingwaġġ bibliku jissejjaħ “konsagrazzjoni”). Fatima għalhekk issir santwarju għaliex issir post ipprivileġġjat u ddedikat minn Ġaċinta nnifisha. Hija dejjem riedet terġa tmur lejn il-Cova da Iria għax hi riedet issib l-għera u l-kwiet meħtieġa fejn tista’ titlob, biex terġa’ ssib, fir-Rużarju, s-Sinjura tal-Qalb Bla Tebgħa (devozzjoni oħra favorita tar-ragħajja ż-żgħira.) Minħabba f’hekk, din it-tifla ma titkellimx fil-vojt dwar il-Papa. Ibda biex, Ġaċinta titkellem dwar il-Missier Qaddis u mhux dwar il-Papa, li fih innifsu juri xi ħaġa.

L-imħabba ta’ Fatima għas-suċċessur ta’ Pietru

Ġaċinta tkompli titkellem dwar il-Missier Qaddis ġo santwarju, mhux sempliċement post hu x’inhu, lanqas ma titkellem dwaru kif ġie ġie. Hija tagħmel hekk billi titkellem dwar post li hu tassew tagħha, u mhux xi post “imsoffi” mhux magħruf u li jissemma fl-aħbarijiet jew fit-termini astratti tad-domma. Hija titkellem dwaru kif wieħed jitkellem dwar membru tal-familja tiegħu. Hija ma tibdlux f’xi idolu (sal-punt li tagħraf il-ħtieġa li titlob għalih u skond il-fehma tiegħu), iżda hi tgħid dwaru dak li l-fidi normalment tipprova twarrab jew ma tieħux gost tisma’ dwaru: li l-kliem tiegħu ma jagħtux każhom u li hu ppersegwitat, li jbati, tagħmlu xempju tal-komunità ekkleżjali nnifisha.

Għal Ġaċinta l-Papa huwa figura għalkollox umana, mhux xi alla. Għaliha, l-Papa lanqas ma hu xi figura msoffija minħabba l-età tenera tagħha, iżda hi tarah biss fl-umanità tiegħu u bi qbil max-xhieda tal-fidi tagħha, bħala xempju mill-aqwa tal-ulied ewlenin tal-Knisja. Għalhekk Ġaċinta tħares lejh bħala missier u bħala qaddis, karatteristiċi li l-katekiżmu ta’ dak iż-żmien kien jiġborhom fuq kollox fil-missjoni tal-Papa bħala l-Vigarju ta’ Kristu. B’dan il-mod Ġaċinta għexet f’rabta spiritwali u missjunarja qawwija mas-suċċessur ta’ Pietru. Hija għexet u tixtieq tibqa’ tgħix ix-xewqa tal-Papa bil-laqta teoloġika tal-qawwa li tgħaqqad tal-Knisja. Fatima għalheklk tagħtina Beata li tgħix magħquda mall-Knisja għax hi magħquda mas-suċċessur ta’ Pietru.

L-imħabba ta’ Fatima għas-suċċessur ta’ Pietru jiġi mill-imħabba u l-interess li kellha l-Beata ċ-ċkejkna għall-Missier Qaddis, li fih hi rat irrapreżentata il-komunità ekkleżjali kollha. Għalhekk hi tifla li, fl-età li għadha se tikseb l-użu tar-raġuni, tagħraf b’mod profetiku d-diffikultajiet tal-missjoni tal-Papa. Din hi tifla li kapaċi tgħid lill-għola uffiċjal tal-Knisja x’inhi l-missjoni tiegħu fit-taqlib tal-istorja. Dan jista’ jsir biss fil-kuntest tal-esperjenza mistika li kienet laħqet Ġaċinta bis-saħħa tal-interċessjoni Marjana tas-“Sinjura bajda iktar mix-xemx”. Din il-profezjia dwar il-Knisja u l-Papa tidwi matul is-seklu 20. Iżda bl-iktar missjoni leġġittima ta’ evanġellizzazzjoni tagħha, l-Knisja tfissirhom it-tnejn mill-ġdid, kemm dwar dak li ġara kif ukoll dak li se jiġri.

Ġaċinta tgħin il-missjoni tal-Papa

Minn dan il-lat u f’dan il-kunest, Ġaċinta tgħin il-missjoni tal-Papa biex iżżomm ma’ l-għanijiet u l-identità tagħha, billi tagħtiha l-qawwa tal-perseveranza Nisranija li tiġi mill-interpretazzjoni mill-ġdid tal-profezija.

Sa mill-bidu, l-Evanġelu ma kienx dejjem aċċettat; għal kuntrarju, ħafna drabi kien miċħud b’konsegwenzi diżastrużi. L-evanġelisti nfushom jidwu din iċ-ċaħda. Tassew, dan imur lura sa minn żmien il-profeti li ċanfru lil-poplu ta’ Iżrael li sikwit kien jinsa l-kelma ta’ Alla. Ġesù wkoll jiltaqa’ man-nuqqas ta’ ftehim fil-qlub ta’ dawk li kienu tiegħu (Mk 9, 30-35). Wara Għid il-Kbir, il-Knisja kellha tħabbat wiċċha mal-ħajt tal-indifferenza li Pawlu iltaqa’ miegħu f’Ateni (Atti 17), filwaqt li Ġesù nnifsu ħabbat wiċċu mal-aggressjoni fil-Galilija, pajjiżu (Mk. 1, 14 – 3, 6a).

Ħadd li jagħti ħajtu għall-imħabba tal-verità u x-xandir tagħha ma jistħoqqlu trattament bħal dan. Dan hu ta’ tbatija, qtigħ il-qalb u, fuq kollox, jifnik. Iċ-ċkejkna Ġaċinta, wkoll ma rnexxilhiex tilqa’ għall-vjolenza kontra l-verità ta’ Alla imħabbra fl-Evanġelju. In-niket tagħha quddiem l-iżventura li l-figura tal-Missier Qaddis għaddiet minnha juri r-reazzjoni normali tal-profeti, tan-nies ta’ Alla. Għalhekk, aħna ninsabu quddiem tifla li diġà hi matura fil-fidi tagħha, tifla li hi profeta.

Tidher li hi paradoss! Iżda fl-istess ħin mhix, għax it-tifħir perfett joħroġ minn fomm it-tfal u dawk ta’ qalbhom safja, saħansitra qalb il-biki u n-niket, kif naqraw fis-Salm 8, 3a: “Int, li s-sebħ tiegħek igħannih fomm it-tfal u t-trabi tal-ħalib; int, li bnejt sur kontra l-egħdewwa, ....”. Alla jkellem lill-qlub umli, b’fomm iċ-ċkejknin, u Hu jkellimhom bi lsienhom (I Kor. 1, 27-28). Waħda ċkejkna tirfed il-missjoni ta’ wieħed li hu daqshekk kbir. B’hekk il-Beata ċ-ċkejkna għamlet lil Fatima post tal-Papa, ġegħlet lil Fatima turi lill-papat it-triq iebsa li kellu jgħaddi minnha f’isem il-fedeltà għall-Evanġelju.

Dan hu messaġġ realistiku, mhux illużorju. Iżda mingħajr ma jinqara b’mod negattiv jew reattiv, fl-aħħar mill-aħħar juri t-tama, għax ir-raġel liebes l-abjad jirnexxielu jkompli fil-mixja tiegħu qalb t-tfixkil ta’ ħafna ġrajjiet u ideat.

Ġaċinta Marto - Mudell ta’ Ħajja

Swor Angela de Fatima Coelho

Skond it-teologu Hans Urs von Balthasar “Hemm qaddisin magħmulin mill-Knisja li Alla jilqa’, iżda hemm ukoll qaddisin magħmulin minn Alla u imposti fuq il-Knisja tiegħu”.

Fi kliem ieħor, hemm qaddisin li l-kanonizzazzjoni tagħhom tassew hi mistoqsija minn Alla lill-Knisja u lis-soċjetà ta’ kull żmien. Iktar milli inizjattiva tal-Knisja, l-qdusija ta’ xi Nsara hi fuq kollox sfida magħmula lill-Knisja, li tħossha mġiegħla twieġeb u mqanqla fit-tfittxija tagħha għall-qdusija. Forsi nistgħu ninkludu l-proċess għall-għarfien tal-qdusija tar-Ragħajja ż-żgħar ta’ Fatima f’dan it-tieni mudell.

Fil-fatt, għalkemm il-Konċilju Vatikan II saħaq li kulħadd hu msejjaħ għall-qdusija, sal-1981 ma kenitx tissemma l-kanonizzazzjoni ta’ żagħżagħ taħt is-sittax il-sena, jekk mhux martri.

Kien minħabba l-qdusija ta’ Franġisku u Ġaċinta li l-Papa Ġwanni Pawlu II ħass il-ħtieġa li jibdel din id-dixxiplina tal-Knisja.

Għalhekk, għandna quddiemna figuri li jistħoqqilhom l-attenzjoni sħiħa tagħna ladarba huma mudelli tal-ħajja Nisranija u “eżempji ta’ ħajja evanġelika” (Ġwanni Pawlu II, Messaġġ lill-Udjenza Ġenerali fis-17.05.2000), b’sejħa magħrufa għan-nies tal-lum u qawwa ta’ espressjoni impressjonanti.

Għalhekk, jixraq wisq li niċċelebraw il-mitt anniversarju mit-twelid ta’ Ġaċinta Marto, la din hi okkazzjoni tajba biex naħsbu fuq il-ħajja u l-personalità ta’ din it-tifla, li dehritilha l-Madonna fl-1917.

Il-Qalb Kbira ta’ Ġaċinta

Biex nifhmu l-personalità taċ-ċkejkna Ġaċinta, l-aħjar li nibdew nistaqsu lilna nfusna mistoqsijiet dwar il-qdusija tagħha.

Irridu niftakru li biex nitkellmu dwar il-karattru jew niddeskrivu l-personalità ta’ xi persuna hu dejjem biċċa xogħol diffiċli. Il-personalità taċ-ċkejkna Ġaċinta wkoll hi komplikata u mifruxa ħafna, anke meta mqabbla ma’ dik ta’ ħuha Franġisku. Eżempju tal-għana b’ħafna faċċati ta’ persunitha jidher fir-reazzjoni tagħha, waqt li t-tfal kienu fil-ħabs, meta Luċija staqsietha biex tagħżel intenzjoni li għaliha joffru s-sagrifiċċji tagħhom: jew għall-midinbin, jew għall-Papa, jew bi tpattija lejn il-Qalb Bla Tebgħa ta’ Marija. Ġaċinta wieġbet: “Jien qed noffrihom għall intenzjonijiet kollha, għaliex inħobbhom ilkoll” (FATIMA In Lucia’s Own Words, vol. I, p.53.). Hawnhekk naraw mhux biss ix-xewqa tagħha li tinkludi fi ħsiebha il-ħwejjeġ kollha li hi tagħraf bħala mportanti, iżda wkoll li tiddedika lilha nfisha b’qalbha kollha għal kull ħaġa li setgħet tlaħħaq magħha.

Biex insibu xbieha li tesprimi l-essenza ta’ Ġaċinta, tiġina f’moħħna qalb, għaliex l-esseri kollu tagħha kien immarkat b’ħeġġa li mexxietha għall-għażliet tagħha u għall-mod tal-ħajja tagħha. Jidher ċar li qed nitkellmu minn qalb bil-lingwaġġ bibliku, “tfisser iċ-ċentru tal-ħajja umana, l-post fejn ir-raġuni, r-rieda, t-temperament u s-sensitività jiltaqgħu, fejn il-persuna ssib l-unità u l-orjentament ġewwieni tagħha” (J. Ratzinger, Theological commentary on the third part of the secret, f’ FATIMA in Lucia’s own words, p. 228.). Il-qalb tkellimna dwar għamla profonda ta’ kif inħarsu lejn il-ħajja u kif naħsbu dwar l-affarijiet li jiġru.

F’Ġaċinta insibu karatteristika li hi rari fit-tfal tal-età tagħha, u hi sikwit nieqsa fis-soċjetà tal-lum, jiġifieri t-tendenza tagħha li tinterjorizza l-esperjenzi li tgħaddi minnhom sabiex timmedita fuq it-tifsir tagħhom, u ssib ir-raġuni għall-imġieba tagħha. F’din it-tifla tispikka interiorità u profondità kbira. Din l-atitudni tagħha tidher b’mod ċar f’mumenti varji ta’ ħajjitha. Darba waħda, meta Luċija staqsietha għaliex ma kenitx qed tilgħab, hi wieġbet: “Għaliex qed naħseb” (J. Ratzinger, Theological commentary on the third part of the secret, f’ FATIMA in Lucia’s own words, p. 45).

Ġaċinta tgħid li kienet tħobb timmedita

F’okkażjoni oħra, bi tweġiba għall-mistoqsija ta’ ommha, li kienet inkwetata mill-attitudni mħassba tagħha, u li riedet tkun taf għaliex baqgħet ma ċċaqalqitx għal żmien daqshekk twil, hi sempliċement qalet: “Inħobb naħseb” (J. Ratzinger, Theological commentary on the third part of the secret, f’ FATIMA in Lucia’s own words, p. 61).

Din l-attitudni ta’ Ġaċinta tfakkarna fl-attitudni ta’ Marija li, kif jgħidilna san Luqa fl-Evanġelju tiegħu, “baqgħet tgħożż f’qalbha dawn il-ħwejjeġ kollha u taħseb fuqhom bejnha u bejn ruħha.” (Lq. 2, 19). Hi kwistjoni li tara l-affarijiet fil-fond, tiskopri t-tifsir profond tagħhom u tfittex biex issib fihom raġuni għat-tama. Mill-banda l-oħra, hija wkoll tħalli ġrajjiet li jaffettwawha profondament, tħalli lilha nfisha titbiddel minnhom, imissulha qalbha.

Din hi attitudni differenti għal kollox mill-kultura tal-lum, li hi mmarkata minn superfiċjalità u ferħ li hu biss fil-qoxra. In-nies isibuha bi tqila biex jaħsbu dwar ħwejjeġ li huma tassew fundamentali u deċiżivi fil-ħajja, huma ġeneralment jistkennu fi ħwejjeġ li huma biss tanġenzjali għall-eżistenza umana.

Ġaċinta tara lil hemm mill-qoxra u l-mument, hija tara fil-fond u fil-bogħod, tinqata’ mis-superfiċjalità u mhux tgħix sempliċement fil-mument ta’ issa. F’dan, ukoll, din it-tifla hija mudell għal dawk li jemmnu ta’ kull żmien.

Ir-Ragħajja ż-Żgħar huma Għeżież għall-Papa

Swor Angela de Fatima Coelho

Il-Papa, Benedittu XVI kien fil-Portugal mill-11 sal-14 ta’ Mejju 2010. Huwa ġie bħala “Pellegrin tal-Madonna ta’ Fatima”, fl-għaxar anniversarju tal-beatifikazzjoni tar-Ragħajja ż-Żgħar u fiċ-ċentinarju tat-twelid ta’ Ġaċinta Marto, it-tifla ż-żgħira li kellha lill-Papa f’qalbha.

Fil-Kappella tad-Dehriet, fit-12 ta’ Mejju, quddiem ix-xbieha tal-Madonna ta’ Fatima, Benedittu XVI fir-talba tiegħu espliċitament radd ħajr għad-dedikazzjoni tat-tfal: “Niżżik Ħajr, Omm maħbuba, għat-talb u s-sagrifiċċji li r-ragħajja-tfal ta’ Fatima offrew għall-Papa, imqanqlin mis-sentimenti li inti nebbaħt fihom fid-dehriet”. F’dan l-ispirtu ta’ gratitudni, huwa kompla jitkellem dwar ir-ragħajja ż-żgħar, jesprimi l-fiduċja tiegħu li huma “kienu magħqudin miegħu f’din is-siegħa ta’ talb u ferħ”.

Il-preżenza tas-suċċessur ta’ Pietru ġewwa s-Santwaju ta’ Fatima fil-fatt issarfet f’mumenti intensi ta’ talb u ferħ. Ġemgħa ta’ madwar 500,000 ruħ minn ħafna pajjiżi ħadu sehem fiċ-ċelebrazzjonijiet fit-13 ta’ Mejju f’atmosfera ta’ fidi u ferħ. Il-Papa reġa’ tkellem dwar ir-Ragħajja ż-żgħar: “Fi żmien seba’ snin oħra intom se terġgħu tiġu hawn biex tiċċelebraw iċ-ċentinarju tal-ewwel żjara mis-Sinjura li “ġiet mis-sema”, l-għalliema li introduċiet lill-viżjonarji ż-żgħar għall-għarfien profond tal-Imħabba tat-Trinità Qaddisa u mexxiethom biex iduqu lil Alla nnifsu bħala ir-realtà l-iżjed sabiħa tal-eżistenza umana. Din l-esperjenza ta’ grazzja ġagħliethom iħobbu lil Alla f’Ġesù, tant hu hekk li Ġaċinta kienet tgħajjat: “kemm nieħu gost li ngħid lil Ġesù li nħobbu! Meta ngħidlu dan sikwit, inħoss bħallikieku għandi nar ġo sidri, iżda hu ma jaħraqnix”. U Franġisku seta’ jgħid: “ L-iktar li kont nieħu gost kien li nara lil Mulej Tagħna f’dak id-dawl li l-Madonna qiegħdet ġo qalbna. Inħobbu ħafna lil Alla!”

Dak id-dawl ġewwieni li kellhom ir-ragħajja-tfal, li jiġi minn Alla, huwa l-istess Dawl li deher fil-milja taż-żmien u li ġie għalina lkoll: l-Iben ta’ Alla magħmul bniedem. (...)

l-imħabba lejn il-Papa

L-Imħabba “kollox tagħder, kollox temmen, kollox tittama, kollox tissaporti.” (1 Kor. 13:7). Eżempju u inkorraġiment għal dan jinstab fir-ragħajja-tfal, li offrew ħajjithom kollha lil Alla u qasmuhom għalkollox ma’ l-oħrajn għall-imħabba ta’ Alla. Il-Madonna għenithom jiftħu qalbhom għall-imħabba universali. Il-Beata Ġaċinta, b’mod partikulari, ma kenitx tgħejja taqsam ma’ dawk fil-bżonn u tagħmel sagrifiċċji għall-konverżjoni tal-midinbin. B’din l-imħabba fraterna u ġeneruża biss jista’ jirnexxielna nibnu ċivilizzazzjoni ta’ mħabba u sliem.

Niżbaljaw jekk naħsbu li l-missjoni profetika ta’ Fatima hi lesta.

Fi żmien meta l-familja umana kienet lesta li tissagrifika kull ma hu l-iktar sagru fuq l-altar tal-interessi żgħar u egoistiċi tan-nazzjonijiet, razez, ideoloġiji, gruppi u individwi, l-Omm Imbierka tagħna ġiet mis-sema, toffri li tħawwel fil-qlub ta’ dawk kollha li jafdaw fiha l-Imħabba ta’ Alla li għanda taqbad f’qalbha stess. Dak iż-żmien lil tlett itfal biss, iżda l-eżempju ta’ ħajjithom xtered u mmultiplika, speċjalment minħabba l-vjaġġi tal-Verġni Pellegrina, fi gruppi bla għadd madwar id-dinja dedikati għall-kawża ta’ solidarjetà fraterna. Ħalli s-seba’ snin li jifirduna miċ-ċentinarju tad-dehriet jgħaġġlu t-temmija tal-profezija tar-rebħa tal-Qalb Bla Tebgħa ta’ Marija, għall-glorja tat-Trinità l-Iktar Qaddisa” (Omelija fit-13 ta’ Mejju 2010).

Lejn tmiem iż-żjara f’Fatima, il-Papa qal lill-Isqfijiet tal-Portugal li hu rringrazzja lil Alla talli tah din l-opportunità li jkun fis-Santwarju ta’ Fatima, il-qalb spiritwali tal-Portugal, fejn hu kien “miġbud minn dejn ta’ gratitudni lejn il-Verġni Marija, li hi stess ittrasmettiet lill-viżjonarji u lill-pellegrini mħabba kbira lejn il-Papa li tat il-frott f’kotra kbira li jitolbu”. (Laqgħa ma’ l-Isqfijiet tal-Portugal, 13 ta’ Mejju 2010).

Iva, fil-qalba tal-messaġġ ta’ Fatima nsibu din l-imħabba inkondizzjonata għall-“isqof liebes l-abjad”, imħabba li t-tfal ragħajja kienu dejjem fidili għaliha, kemm bit-talb kif ukoll bis-sagrifiċċju.

M’hemmx dubju li r-ragħajja ż-żgħar kellhom lill-Papa għall-qalbhom u ġo Fatima, aħna sibna li r-ragħajja ż-żgħar huma wkoll għall-qalb il-Papa.