Litanija tal-Qalb ta' Ġesù

Qalb ta´ Ġesù bin il-Għoli li ssawwart f´Marija mill-Ispirtu.

Minsuġa bil-Kelma t´Alla, wild is-Sid, saltnatek ma tgħib qatt, ma tmutx.

Qalb ta´ Ġesù id-dar t'Alla it-tinda tal-laqgħa tagħna mal-Maħbub,

Int il-bieb li jwassal ġewwa, minnek ngħaddu biex naslu għand il-Missier.

Ħuġġieġa li tikwi, mixgħula bl-imħabba,

maħżen tal-ġustizzja mimli tjieba w karità.

Ġewwa fil-qiegħan ta´ Qalb Sidi, is-Sultan

tal-qlub kollha, jgħammru l-virtujiet.

Jixraq li nfaħħruh.

Qalb ta´ Ġesù it-teżori tad-dehen u tal-għerf jinsabu ġewwa fik.

Int l-għaxqa ta' Alla, u fik tinsab tgħix il-milja tad-divinità.

Qalb ta´ Ġesù tnixxi l-ħniena u it-tjieba, bik aħna stagħnejna lkoll,

Xewqa ta´ għoljiet smewwija, għajn ta´ kull qdusija għal min jitma´ fik.

B´debħa għal dnubietna ta ħajtu min fdiena,

laqa´ it-tagħjir u obda f´kollox lill-Missier.

Ġismu kien miġruh, u l-Qalb tiegħu sfat minfuda

sabiex jinħafru id-dnubiet:

ħajr u sebħ nagħtuh!

Qalb ta´ Ġesù inti faraġ, inti l-għajn tal-ħajja, il-qawmien mill-mewt.

Mill-ġdid ridt tħabbibna miegħek, u ġibtilna s-sliem, u il-ħelsien u l-ferħ.

Qalb ta´ Ġesù fik it-tama għax tixtieq tkenninna tul l-eternità.

Meta jingħalqu għajnejna, nilmħu ´l wiċċek: x´hena, xi trankwilità.

Glorja nagħtu lill-Missier u lil dak Ibnu

li fih Alla ħabbna w berraħ Qalbu fuq salib.

Glorja lill-Ispirtu li ssawwab fit-tnehida

ta´ Kristu xħin radd Ruħu.

Fina jinsab fil-qrib.