SEKAU es nânoinâ ma nahín uab Esperanto−ma matekâ nak Esperantis−musti nahín lekleok Zamenhof nane sekau ma in piöt nok Esperanto nane onmé. Fun kalu adesain uab in ka nbine fa he nanaob mepu ‘naek nèk neksimakat amâtanes ma mlilê ‘naek, uab mamoëk (lingvo artefarita) amasat i lof ka nmoin nit fa ma ka ntean fa tuaf namfafau nbi pah-pinan nfunamnatéf onlê munî i. Haef namfafau ben tuafe ntek kanaf i: Zamenhof. Me in sekau?
Dokter Ludovic Lazarus (Ludwik Lejzer) Zamenhof (15 Funboësamnuâ 1859-14 Funhâ 1917) nane atoni Pah Polandia nâko kaüf Yahudi (fun a-nbi tonnatun ahuntin atoin-Yahudi nasaitan sin pah [Ibrani: Eretz Israel; Metô: Pah Israel] ma nnaon nsasuna pah-pinan, ma natuanan msâ a-nbi Pah Polandia, eslê Amâ Santu Yohanes Paulus II in pah manekat). In es a-nmoê uab Esperanto, uab kanatural (artifisial) lê mapakê namfau ‘sekê a-nbi munî i.
Zamenhof nane in maneone dokter mataf (oftalmologis) kun ma in uab ainaf eslê uab Rusia ma Yidish (uab Yidish nane uab feü, npoi nâko uab Ibrani lê maselô lekleok nok uab Jerman ma mapakê a-nbi Eropa, talantea munî i uab Yidish fê a-nmoin nabala). Me Zamenhof a-msâ namolok a-nsai uab Polandia ma Jerman. Ma namuin ini msâ nânoinâ kun uab Prancis, Latin, Ibrani, Yunani ma Inglés. Okê ini msâ a-nsinmakan uab Italia, Spanyol ma Lituania. Es onnane, hit nabè' tak Zamenhof lo nsimkan uab humâ-humâ, lê a-nbi neno amunit a-ntulne he nmoê uab feü, uab Esperanto.
Zamenhof mahonis a-nbi Bialystok, Polandia nbi ton 1859. Nbi oras nane kota i ntam Pahkesel Rusia. Nbi kota i suku ‘naek kaämnesat teun natuan nabuan: suku Polandia, Belarus ma Yahudi lê namolok uab Yidish. Zamenhof a-nrasa susar ma nfrustrasi fun suku ‘naek teun nane feës-feës a-nmapaulkin (nmatufun aî nmabanan) ma in naneöp nak sin ka ndame nitan fa natuin sin ka namolok fa neu es nok es—sin ka nmuïn fa komunikasi alekot a-nbi sin monit neno-neno. Oke-te, masi fê an-anâ, in natenab nak kalu sin ok-okê namolok uab mesê lê namnés, sin lê neman nâko suku kaämnesat teun nane nabè'i nmeup nabuan nekaf mesê ma ansaof mesê ma rasa käsinmakat nane lof nabè' namneuk. Zamenhof naneöp nak uab feü es lê mamoëk ma ka susar fa he tânoinâ lof nabè'i njail nete alekot mesê neu sin he nmahinen es nok es ma baun-baun nmonin nok dame.
Oras fê naskól a-nbi SMA nbi Warsawa onnane, Zamenhof nesesbon (nmeup mâtanêsekê) he nmoê in uab palmelu (ahunut). Me uab nane mâneätâsekê, masi in namás ma in hanne nlum. Oke-te in natenab kun nak uab es-es, kalu nabè', musti sederhana (kaisâ mâneät) nèki npaek hanfuaf internasional sin lê mamnaitî nâko uab namfau (Esperanto nait namfau nâko uab Romawi sin). In naneöp onnane fun nâko un-unû uab Latín ma in “anhin”, onlê uab Italias, Prancis, Spanyol, ma Portugis (Portugés) mapakê ben a-nbi bale namfau nbi pah-pinan i. Es onnane, kalu Zamenhof in uab feü nane nait dasar nâko uabin i, hanfuafin a-nbi uab Esperanto lof mahinê ma mapakê, okemsâ ka mâneät fa neu amolok feûnin.
Nbi ton 1878, in proyek Lingwe uniwersala (Uab universal) alakleö he nmoten. Me Zamenhof in tone (umur) fêka ntea he npublikasi in mepu nane. Namuni-te in a-nkulia nbi Fakultas Meupdokter ini nbi Moskwa ma Warsawa. Nbi ton 1885, Zamenhof nasòp kulia ma npraktek on dokter mataf. Nbi oras nane msâ in nanaob piuta in proyek uab nane. Nbi ton nua in nanan in nasesbon he naim loibaen (dana) ma namuin in napèn loit nâko in calon babaf (in calon fé in amaf). Nbi ton 1887, in buku lê majudul "Lingvo internacia. Antaŭparolo kaj plena lernolibro" (Uab Internasional. Hantòpus ma Buku Teks Lengkap) mapublikasi nèk kanfulpen "Doktoro Esperanto" (Dokter Afnekan), lê a-njail in uabe kanan. Neu Zamenhof uab i ka ala fa alat komunikasi, me ini msâ alat he nabeon in tenabfuaf henait kanan bangsa nbi pah-pinan i nmonin nabuan nok dame.
Dokter Zamenhof nasaitan pah-pinan a-nbi Warsawa nbi tanggal 14 Funhâ 1917. Ma talantea neno i in kanne nmoin nabala. In neonmahonit, 15 Funboësamnuâ, matekâ nak Zamenhofa Tago (Esperanto: Zamenhof in Nenon), ma njail festa ‘naek neu Esperantis ok-okê a-nbi pah-pinan nfunamnatéf. Nbi ton 1910, Zamenhof a-njail calon he nsiom Hadia Nobel Dame ini me ka njail fa he nsimo. In napèn titel hormat Orden de Isabel la Católica nâko Usif Spanyol, Alfonso XIII. Zamenhof in kanne mapakê neu planet an-anâ 1462 ma hutasi humfes, kanne Zamenhofia rosei. Ka ala fa nane, tuaf namfau npaek in kanne he nakanab lalan, tamankota ma nete natun fauk nain, es pah Lituania, Inglés, Prancis, Hungária, Ceko, Spanyol, Italia, ma Brazíl.
He usòp tuis i, au ‘loim he ukeo abaca he naneöp a-ntomneu Zamenhof i mepu amasat he ntulun pah-pinan, he nèk dame neu mansion ok-okê. Kalu Zamenhof, a-nmes kun nabè'i nmoê uab feü lê munî i mapakê es bale namfafau, hit musti taneöp neu onmé he tpanat uab “asli” lê hit beï-naï sin nabalab nani neu kit he tamliab ma tatutan neu batan amunit.
Nâko: Yohanes Manhitu
Yogyakarta, 9 Funnê 2012