Iazko ekainean ospatutako Zazpigarren Batzarrean hartutako erabakiak martxan jartzeko ikasturtea dugu aurtengoa. Euskal gizarteak dituen erronkei eta hezkuntzari egiten dizkion eskakizunei erantzuteko unea dugu. Ikastolen Ikasturte Hasierako Ekitaldian azaldu dira erronka horiek: pertsonen aniztasuna eta ekitatea, kulturen arteko harremanak, euskara eta euskal kulturaren transmisioa, denon lurraren geroa, lurraldeen arteko lotura eta sareak, garapen pertsonala eta elkarren zaintza, lan mundua eta gizarte onura...   

Ikastolok marka berria estreinatu dugu. Erronka berriak ditugu euskal gizartean eta ikastolek ilusioz heltzen diegu erronka berriei, ikuspegi berrietatik jardunez, egitasmo berriak sortuz, erantzun berriak eskainiz, eta orain marka berriarekin. IKASTOLAK da ikastolen mugimendua izendatzeko erabiliko dugun hitza, Ikastolen Elkartea ordezkatu duena. IKASTOLAK hitzak berak deskribatzen baitu ongien gure komunitatea, 115 ikastolak, 46.000 familiak, 55.500 ikaslek, 3.700 langilek eta milaka ikastola lagun eta ikastolazalek osaturikoa, “eta batez ere, zenbakiak baino askoz haratago iritsi nahi duen proiektu herritar bat”, ekitaldian azpimarratu denez: “Biharko euskal herritarrak gaurtik hezten dituen hezkuntza sare eraldatzailea osatzen dugu”. 

Mugikortasunaren Europako astea dela eta, auto bako eguna ospatu genuen irailean Mungiako beste hezkuntza zentroekin batera. Oinez Busa ekimenaren baitan, HH eta LHko ikasleak oinez joan ziren Mungiara.

Liburu Ibiltaria izeneko egitasmoa Ikastolen jaiek era bateratuan garatzen duten jarduera programatik abiatzen da. Aurreko edizioetan egin den modu berean, Ikastolen jaien antolatzaile diren Ikastolez gain beste askok ere parte hartu dute. Larramendi Ikastolan urri hasieran izan zen.

Informazio gehiago Larramendi Report aldizkari digitalean.

Aurreko ikasturtean Elhuyar Zientzia Azokan irabazitako sariari esker, Galiziako Open Science azokan izan ziren iraila amaieran, liztor asiatikoari buruzko proiektua aurkezten.
Esperientzia paregabea bizi izan dute, bizipenak beste herrialdeetako gazteekin partekatuz eta ikasitakoa zabalduz.

Zorionak, berriz ere! 

Larramendi Ikastolak STEM School Label Expert maila lortu berri du, maila gorena. Errekonozimendu honek STEM arloetan (zientzia, teknologia, ingeniaritza eta matematikak) eginiko lanari merezitako aitortza egiten dio.

Ikas-irakaskuntza praktika berritzaile eta eraginkorrak diagnostikatzen laguntzeko, aitortzeko eta bikaintasuna bultzatzeko ekimena da.

Zorionak lan talde osoari!

Larramendi ikastolako whatsapp kanalera batzeko eman beharreko pausuak gogorarazten dizkizuegu: kanalean sartzeko, erabili esteka hau  eta Jarraitu sakatu. Gainera, kanpaitxoa 🔔 aktibatuz gero, ez duzue ezer galduko eta jakinarazpen guztiak automatikoki jasoko dituzue. Kanal hau komunikazioa errazteko eta informazioa eskuragarriago egiteko sortu genuen.