對宮原眼科行出來，就會當看著這條河溪，這馬嘛不時有人佇岸邊散步，毋過你敢知影遮藏著歷史的痕跡。咱趕緊來熟似這條河川-綠川。 綠川原底佇日本時代號做「無名溪」，伊的源頭是對台中北屯開始流，上尾會流入去早渓。為啥物這个所在遮爾重要咧？佇1896年，為著欲改善環境衛生，就重新規畫台北和台中的下水道：包括台中市區的街頭設計，後來後藤新平採納這个方案，台中市就成做這馬這款棋盤式的城市！莫看這馬的綠川是直直直，上早伊是彎彎曲曲的天然河川，為著整治河川，政府就用「截彎取直」的方式，共「綠川」和「柳川」整合做人工的河溪，仝彼時建立自來水、下水道等系統。

  佇1912年的時陣，台灣第五任總督佐久間左馬太來參觀，感覺講哪會有遮爾媠的所在，兩爿的樹仔生甲誠密，所以就共號做「綠川」，這个名嘛一直用到今。這个美景加上模盤式的街景，甚至予台中有「小京都」的稱號。

  有溪水流過就一定愛有橋才會當行嘛，横跨綠川的橋對北到南，分別是成功綠橋、中正綠橋、中山綠橋、民族綠橋、民權綠橋，這馬新盛橋保存了上完整。櫻橋干焦是有一寡舊橋的結構。若按呢，新盛橋就是阮這馬所徛的所在，也就是中山綠橋，遮是台中現存上老的一座橋。這座橋的誕生，就愛對台中的一个大事件講起。1908年台灣縦貫鐵路全面通車，為著欲慶祝，日本政府就佇台中公園舉辦開幕式，這座橋嘛佇彼當陣起起來。