▌社口林宅

• 簡介

社口林宅又閣號做「神岡大夫第」、「社口大夫第」，是一座傳統閩南風格的古厝，嘛是地方世族林家早起發展的重要據點。佮摘星山莊、筱雲山莊號做葫蘆墩地區三大宅第。

社口林宅大約起佇清朝光緒元年（1875）， 是林振芳人生上蓋奢颺的時期完成的，是伊對文職官員一路晉升做地方官員了後，佇光緒元年（1875）買吳張舊厝閣加重修，佇光緒四年（1878）左右完成。

• 歷史背景

社口林家的故事，會當追溯到清朝康熙年間。彼當陣林氏祖先對中國廣東渡海來台灣，佇今仔日的神岡一帶開墾、做農，沓沓仔建立基礎。

到甲19世紀，家族關鍵人物「林振芳」撠起。伊本底是做田的，落尾轉做生理致富，積極參與地方事務。上重要的一項代誌，是佇戴潮春事件（1862）中協助清廷平亂，所以得著官職佮榮譽，比如講「中書科中書」佮「同知」，地位佮地方官員差不多。

• 建築特色

相比較其他大型古厝較樸實，毋過猶是會當看著基本妝娗工藝如木雕、石材結構佮一寡簡單的彩繪。

使用紅磚牆、木構造、石基礎等在地捷看建材，兼顧耐用佮氣候適應，較重視通風佮採光，空間配置符合長幼有序的倫理。

• 開放時間

早起九點 ~ 下晡五點，戶外空間開放參觀。

• 補充

捌佇2000年8月14日透早，院內的匾佮祖先牌位予賊仔偷。2002年，囝孫因為清明節無神主牌會當拜，煞因為著限制《文資法》袂使囥新刻的神主牌，引起台中縣文化局長表示會會用研議。2004年，由鹿港鎮木雕薪傳獎得主替伊製作新的牌匾。