▌九二一地動園區
▌九二一地動園區
逐家攏袂生份的921大地動,就佇遮真實來呈現
建議停留時間:10分鐘
若講著台灣的自然災害,逐家應該攏聽過發生佇1999年的921大地動,彼工會當講是袂少人的惡夢,嘛𤆬走真濟人的性命。佇台中霧峰的光復國中,就保存彼年地動倒落來的建築,成做一个地動教育園區,希望逐家認捌而且重視地動的危險性。
921大地動的震央佇南投集集,規模7.3,而且震源深度干焦8公里,起因是車籠埔斷層的徙位,佇1999年9月21日半暝1點47分,總共搖102秒鐘,超過十萬棟厝受著破壞,兩千外个人過身,超過一萬人受傷,甚至引起真大的崩山、塗壤液化,是台灣百年來損失上大的災害。
運動埕裂做一半
(相片來源:921地震教育園區官網)
校舍崩去
(相片來源:921地震教育園區官網)
921大地動造成的災害,霧峰的光復國中因為拄好就佇車籠埔斷層頂面。地動發生彼陣,校園受著真大的破壞,運動埕裂做一半、一爿塗跤直接懸起來,這个畫面看著予人真驚惶。因為遮完整保留斷層徙位、校舍崩去、河床升起來遮的地動遺址,真有代表性,教育部後來就決定共遮規畫做「921地動教育園區」,為著展現斷層通過所造成的特殊地景佮校舍,園區共展示館和原底的建築做結合,予民眾會當直接感受著地層徙位的力量,希望透過保存和研究,予民眾一个好的資源,來了解地動發生的原因,而且體會地動的嚴重性。遮毋但是一間博物館,閣較是台灣人共同的記憶。
對地球科學的角度來了解斷層、保存車籠埔斷層的模樣。
了解建築物應該愛按怎來補強,認捌耐震建築。
記錄921大地動的相片,和相關的影音,希望予民眾感受著地震的危險和重新建造家園的希望。