綴時代演變，交通的需求是愈來愈濟，第二代台中火車頭佇1917年3月主體建築完成，仝彼年11月舉行盛大的落成典禮 。第二代車頭有西洋式木構造銅板瓦屋頂和紅磚造的車站主體。這个設計和東京火車頭閣有台灣這馬的總統府，風格和手法是真倚，原來就是仝一位建築師辰野金吾來設計的，展現出彼當陣當時行的「後期文藝復興式建築風格」。車站的巴洛克式山牆、拱形橫梁和玄關梁柱頂面真幼路的雕刻，攏反映出誠懸的工藝水準 。在建造的過程中，車站採用對日本引進工法—開模印花，當地的師傅共叫做「番仔花」，這種技術共石膏或者是紅毛塗灌入去模仔內底，是明顯減少施工的時間。另外，會當看著建築外觀的鐘塔和屋牆出現以台灣水果做主題的古典式雕刻，將在地文化融合佇建築的細節內底。

　　第二代火車頭毋但是建築的手法真特別，閣會當講著真濟歷史故事。伊捌佇1923年4月迎接日本皇太子裕仁的巡視，接紲佇1925年6月嘛迎接日本秩父宮雍仁親王，台中火車頭成做彼當時台灣重要門戶的地位。