▌台中火車頭

全台灣唯一三代同齊的火車頭

建議停留時間：30分鐘

簡介

　　台中火車頭是台灣鐵路發展史真重要的地標，彼當陣台灣縱貫鐵路正式通車，就佮台中火車頭有真深的連結，嘛留下真濟趣味的歷史故事通。這座車頭毋但佇交通扮演真重要的角色，閣較是記錄台灣對日治時期、戰後到這馬，超過百冬的歷史發展。到今，台中火車頭嘛成做台灣唯一「三代同齊」的車頭，繼續保存歷史、建築佮文化價值，嘛促進台中的經濟發展，創造新的故事。

早期設立的第一代火車頭

台中火車頭的故事愛對1905年5月15號開始講，彼工火車頭正式啟用，號做「臺中停車場」，伊是一棟L型的木造建築，頭一任站長是塚澤力太郎。1908年10月24號，佇台中公園舉辦奢颺的通車典禮，日本的閑苑宮載仁親王親身來到台中公園主持「臺灣縱貫鐵道全通式」，嘛有真濟日本的官員來參加，台中站tsua̋nn成做臺灣鐵路西部縱貫線的中心。

　第一代火車頭的規模較樸實後代，干焦有短短12冬的使用歷史。毋過這間老建築，是按怎有法度保存到今咧？趣味的是，佇台中鐵路高架化動工的期間，發現第一代車站「機關車庫」的遺跡。毋但按呢，第一代火車頭的「事務室」嘛因為去予後來新起的設施埋牢咧，才意外無去予人拆掉，一直到2018年，才佇第二代火車頭的西爿重新發現，予台中車頭成做全台灣唯一「三代同齊」的鐵路車站。

1905年完工的第一代臺中停車場

(相片來源：台中市政府文化局)

第二代火車頭：日本時代「辰野式」風格的代表

　　綴時代演變，交通的需求是愈來愈濟，第二代台中火車頭佇1917年3月主體建築完成，仝彼年11月舉行盛大的落成典禮。第二代車頭有西洋式木構造銅板瓦屋頂和紅磚做車站主體。這个設計和東京火車頭閣有台灣這馬的總統府，風格和手法是真倚，原來就是仝一位建築師辰野金吾來設計的，展現出彼當陣當時行的「後期文藝復興式建築風格」。在建造的過程中，車站採用對日本引進的工法—開模印花，當地的師傅共叫做「番仔花」，這種技術是共石膏抑是紅毛塗灌入去模仔內底，減少施工的時間。另外，會當看著建築外觀的鐘塔和牆圍出現用台灣水果做主題的古典式雕刻，共在地文化結合佇建築的細節內底。

　　第二代火車頭毋但建築的手法有特色，閣會當講著真濟歷史故事。伊捌佇1923年4月迎接日本皇太子裕仁的巡視，接紲佇1925年6月日本秩父宮雍仁親王嘛來到台中，台中火車頭成做彼當陣台灣重要的交通中樞。

經過1935年4月21的關刀山地動，車站雖然受著嚴重的破壞，毋過結構猶佇咧。閣來，1945年2月二戰期間，台中受著空襲，車站閣一擺受影響。上嚴重是1999年的九二一大地動，車站的結構嚴重受損。後來因為車站的歷史和建築的價值真值得保留，第二代火車頭佇1995年成做國定古蹟嘛共遮的故事流傳落來。

第三代新站火車頭的啟用

　為著欲解決交通問題而且提升鐵路的效率，台中市推動「台中都會區鐵路高架捷運化計畫」，就按呢，第三代台中火車頭高架化的工程佇2012年9月動工。2016年10月，第三代車站第一階段啟用通車，列車開始駛佇高架化的軌道，後來第二階段的栗林、頭家厝、松竹、精武、五權遮的站點啟用，台中車站的大平台和第二階段部份設施嘛投入使用。