▌台中文學館

台中文學館起佇1932年，原底是日本時代的警察宿舍，後來漸漸仔荒廢，嘛捌面對去予人拆掉的命運，經過各界的搶救才保存落來。一直到2009年台中市政府共伊登錄做歷史建築，嘛以「台中文學館」來定位，隔冬就開始進行修復工程，嘛佇2016年正式開放，予文學館結合歷史價值和當代文化，發展文學閣較濟的可能。

台中文學館園區有六棟日本式宿舍，規畫做無仝的展區，包含常設展、特展區、囡仔文學區、研習講堂、主題餐廳和行政區六个區域。

常設一館以早是警察署長的宿舍，所以嘛是上蓋氣派的建築物，內底用年代來寫出「文學大事紀」，共台中文學史分做四个階段，分別是：清朝到乙未割臺、日治時期、戰後到戒嚴時期、解嚴到今，整理無仝年代重要的文學家、社團佮據點，內底嘛有一寡互動式的設施，用趣味的方式，予文學閣較接近生活。

常設二館就是以人物做主題，收集和台中有關係的文學作家，不管是佇台中出世、捌蹛佇台中，攏會當看著𪜶的影跡，台中以早是文化城，當然對遮出來的作家是不止仔濟，做伙來認捌台中的作家。遮嘛有互動式的設施，予遊客家己來共詩組合起來。

園區內底閣有咖啡館和亭仔的空間提供民眾歇睏，閣有一欉珍貴的老榕仔，嘛是一定愛來看覓，參觀者會當佇日本建築之間感受著文學佮生活的融合。 

常設展二館展示的台中文學作家 (相片來源：台中文學館官網)