日南車站佇臺中大甲。車站起造佇日治時期，1922年正式啟用，到今已經超過一百冬，嘛佇2002年登錄做臺中市市定古蹟，是臺灣少數保存完整的古蹟車站之一。

  「日南」這个地名，原本是平埔族道卡斯族「日南社」的所在，名號一直沿用到今，紀錄地方早期的族群歷史。

  海線鐵路對竹南經過大甲到彰化，1919年動工、1922年完工。早期大甲是中部重要的米倉，日南車站負責農產運送佮交通往來，地位真重要。現此時海線猶原留落幾个日式木造小站，包含日南、談文、大山、新埔、追分，這幾个車站建築的模式相接近，日南是其中保存狀況上好的一个，予人號做「海線五寶」之一。

  日南車站的特色就是木造「和洋折衷」式建築，平面是三段式配置（候車空間、辦公空間、服務空間），順著鐵道排列。外面構造有環繞的簷廊，特色的「Y」字形木柱是海線車站的共通記號；屋頂是懸山頂形式，面向鐵枝路的破風造型真醒目。側壁的牛眼窗、雨淋板牆面佮西式木架屋簷，展現出日本時代融合東西風格的建築特色。

  車站空間真有古早的懷舊風格，好天時佇候車室，就會當看著鐵砧山，視野真開闊。雖罔今仔日已經改做簡易站，逐日出入的人無濟，毋過站內猶有鐵道紀念章佮舊式車票，是旅客收集記持的所在。

  騎鐵馬行過海線，若停落來看這座百年木造車站，會感受著時間的痕跡佮土地的溫度。日南車站毋但是交通設施，更甲是一段歷史、一種文化的記憶。