柳川對大甲溪支流發源，最後到烏日而且流入去旱溪，差不多27.2公里長，是台中舊城區真重要的河川。清領時期，柳川有真濟名稱，水頭因為有邱厝莊的聚落，所以號做「邱厝溪」，水尾因為欲紀念反抗清朝的殉難者秋日覲來號做「秋老大圳」。後來，因為流經過舊名「大墩」的台中地區，規條攏共號做「大墩溪」。部落嘛開始佇兩岸形成，建設河岸水車佮碾米廠，影響著排水，所以柳川佇大雨時定定做大水。

日本時代，柳川的整治寫入都市計畫，1905年開始進行「截彎取直」和水利工程，確定河道穩固。1916年，官方對杭州西湖蘇堤徙栽垂柳，滿滿的柳樹種佇兩岸，自彼時正式號名做「柳川」，增加市區美麗的風情，致使台中得著「小京都」的稱號。

1949年國民政府來台灣了後，差不多六十萬的阿兵哥進入台灣，台中的人口雄雄增加，為著欲解決這个問題，「警民協會」共柳樹剉掉，佇柳川兩岸起臨時的厝，嘛叫做「吊跤樓」。這个建築雖解決空間無夠問題，煞破壞柳川、綠川原底「小京都」的景致。遮嘛因為各省移民紮來家鄉的技藝和飲食，呈現多元文化的融合，互相幫贊，成做真有人情味的社區，嘛提升台中舊市區的經濟。

後來，因為吊跤樓攏是用柴頭來起的，火災是不時出現，安全問題愈來愈嚴重，上尾佇民國67年開始拆吊跤樓，民國74年全面完成，柳川吊跤樓經過38冬，行入歷史，遮的畫面干焦會當透過舊相片來回憶。

柳川佇民國67年開始拆吊跤樓的時，政府就規畫「同心花園」的活動，希望政府和民眾做伙打造美麗的環境。民國77年，中日扶輪社種28欉柳樹，希望恢復柳川的媠。

到今，柳川總算是恢復美麗的市容，成做台中市區重要的觀光區。兩岸嘛設鐵馬道、步道，予市民會當來散步，聖誕節閣會規畫燈會活動，吸引遊客參觀，予柳川恢復以早的光彩。