▌台中公園

(相片來源：臺中市文化資產處)

望月亭起佇1889年，是台灣府城的遺跡「北門樓」。彼時清廷欲佇台灣設省，來台灣的劉銘傳共台中定做台灣省會，所以就佇遮起城，分做八門、四樓，其中望月亭就是北門所留落來的建築物，全台中八个城門就干焦賰這个門樓爾爾。  

(相片來源：臺中市文化資產處)

1908年的台中鐵路全線通車典禮，毋但起湖心亭，閣有兩座「島橋」，橋名分別號做「第一橋」、「第二橋」，到台灣光復了後，才改做這馬的「中山橋」和「中正橋」，後來經過改建，中正橋改做紅毛塗做，中山橋是維持木造的型式，較倚已早的舊橋。

(相片來源：台中觀光旅遊網)

更樓原底是吳鸞旂佇台中起城的時，為著欲招待貴賓和大官員，起一間公館來處理事務，更樓就是彼當陣公館建築的一部份。後來公館佇1980年代拆掉，台中市政府為著欲保存遺址，就共更樓徙對台中公園內底來保存，是目前全台灣唯一一間保存落來的更樓。

(相片來源：臺中市文化資產處)

放送頭是1935年台中放送局設的廣播擴音設施，是政府為著欲宣傳和教化的其中一个管道。台灣光復了後，中國廣播公司台中廣播電台接收，嘛綴收音機的普及，使用到1960年代就停止使用。這馬已經無播音的功能，成做台中公園的歷史建築。

(相片來源：臺中市文化資產處)

砲台山是台中市區上懸的山崙，懸度是89公尺。1895年，日本兵佔領台中的時，佇這个山崙頂面設砲台，來防抗日的民眾，所以遮才會變做「砲台山」。山頂閣有一个三等三角點，是1898年日本人執行台灣地籍調查所設置的基準點。另外，遮原底閣有兒玉源太郎的大理石雕像，民國36年已經拆掉，改做抗日紀念碑。

(相片來源：自由時報)

第一代臺中神社存在的時間為西元1912年至1940年，台灣光復了後，神社的鳥居佮石碑全予人捒倒，而且擲佇在邊仔，一直到2000年，台中市政府才共鳥居重新揣轉來，而且補二枝石柱囥踮原底的所在，煞無共伊𫞼起來，是咧講歷史無去予人放袂記得。另外，遮閣有一寡奉獻的紀念碑、表參道、石橋、銅馬佮狛獅，攏是台中神社的遺跡。