▌積善樓

積善樓原底是北屯地方富紳賴長榮的厝宅「懷德堂」的門樓，佇1924年起造。頭起先賴家祖先對頭張搬來二分埔的時，用塗墼起一間正身護龍的厝宅。到1924年，賴長榮的後生聽一位地理師的建議，佇舊門樓的南爿起這座兩層樓的牌樓，目的是欲「辟邪鎮壓蛇穴」，嘛希望家業會當出頭天，而且共這座樓號做「積善樓」，就是向望囝兒序細愛會記得累積善行，不時共人幫贊。

綴時代變遷，1979年左右因為市地重新規畫，原本的「懷德堂」予人列做「抵費地」所以拆掉，好佳哉佇賴家後代參地方人士四界走傱，「積善樓」才有機會保留落來，佇1999年正式公告指定做市定古蹟。賴家後代賴明聰先生後來共積善樓捐予市政府，希望這座家族的歷史建築會當永遠傳承落去。遮這馬已經變做小小的公園，原底的「懷德堂」已經無佇咧，門樓後壁賰五欉老榕仔會當回憶過去，嘛展現出滿滿的性命力。