▌九號磅空

• 簡介

九號磅空是舊山線鐵枝路沿線保存落來的重要設施之一，是上尾完工的磅空，嘛是舊山線九座磅空內底上長的一條，磅空全部差不多1.2公里長。1998年舊山線停止使用了後，原本的鐵枝路路線漸漸仔轉型做觀光使用的跤踏車道，九號磅空也重新整理開放予民眾騎跤踏車通行。

• 特色

一入去磅空內底，因為長年曝無日頭，內底的溫度會明顯比外口低，就算是熱天嘛會連鞭感覺開天然冷氣仝款，足秋凊、誠四序！磅空內面的壁堵保留紅磚仔結構佮部份舊鐵枝路遺跡，予人會當想像早期火車穿過磅空的情景。

磅空北口佮南口也保留日本時代石刻題字。北口：民政長官後藤新平題字「潛行不窒」；南口：第五任總督佐久間左馬太題字「氣象雄深」，遮的題字到今猶看會著佇磅空口，斑駁的石碑嘛留落來百年前鐵枝路建設的歷史痕跡。

九號磅空內底呈現曲線形線形。因為工程著愛配合山崙的地形加上避開大甲溪河岸，所以磅空毋是筆直的，是形成少看著的「大彎曲」，佇台灣鐵道磅空當中不止仔特殊。

• 1935年新竹-台中大地動

九號磅空頭起先是採用紅磚仔造的結構，長度是1026公尺。1935年中部大地動造成磅空受損，地動了後磅空損害區域佮磅空口重新改建做鋼筋 khōng-ku-lí 結構，磅空長度嘛增加到1269.5公尺，成做今仔日的規模。

• 騎入去百年磅空的感受

因為九號磅空的闊度較狹，假日遊客佮跤踏車流量增加的時陣，磅空內容易出現相𤲍的情形，需要注意減速騎車，佮頭前的跤踏車保持安全距離。

沿壁閣會當看著較早留落來的避車空，大約隔30公尺設一个避車空，是過去火車經過的時陣，予工作人員暫時閃避用的空間，這馬顛倒變遊客翕相、歇睏的小角，有的人會停落來翕幾張仔誠有歷史感的相片，嘛予人會當想像較早鐵枝路運作的款。斟酌觀察避車空攏是𫞼佇倒爿，獨獨有一座設佇正爿。避車空有懸有低、有闊有瘦誠趣味喔！

磅空內底的環境較澹又閣烏暗，有當時仔閣會看著夜婆的影，雖然有淡薄神祕甚至予人小可仔緊張，毋過嘛予這條百年磅空增加一種特別的氣氛。