林獻堂出世佇台灣的阿罩霧(台中市霧峰區)，是霧峰林家頂厝系，佇𪜶彼輩排行第三，所以人嘛叫伊「三少爺」抑是「三老爺」。

林獻堂佇七歲的就進入霧峰林家的家塾「蓉鏡齋」，受著傳統的漢學教育，致使伊成做溫柔文雅，閣重視民族文化的性格。伊的阿爸林文欽先生佇伊13歲的時高中文舉人，下厝系的林朝棟嘛共兵力增加，成做霧峰林家佇清朝真繁盛的時期。

1895年，清朝佇甲午戰爭失利，將台灣割予日本，霧峰林家面對這个情勢，下厝系林朝棟決定內渡，頂厝系佇林獻堂的阿媽羅太夫人的安排，決定親身留踮台灣堅守祖業，其他厝內的四十外人由林獻堂帶領，暫時前往泉州避難，林獻堂嘛擔起延續家族的責任。1897年林獻堂𤆬規家伙仔轉來台灣，1899年林文欽破病過身，林獻堂就正式繼承家業，展開伊對台灣的貢獻。林獻堂對台灣的貢獻：

1. 文化教育方面：1910年加入櫟社，1914年募款順利成立「台中中學校」，1921年成立「台灣文化協會」，後來閣做《台灣民報》社長，佇1949年開辦「萊園中學」，嘛就是咱這馬所佇的位置「明台高中」。

2. 政治運動方面：1914年成立「同化會」，1918年籌辦「六三法撤廢期成同盟會」，佇1921年𤆬領15年的「臺灣議會設置請願運動」，參與真濟政治文化運動，為台灣人爭取真濟權利，嘛呼籲台灣人增加民族知覺，莫受著日本政府的控制。

3. 女權和女性教育：主張男女平等，鼓勵女性受教育，認為查某人若有智識，家庭佮社會才會進步，伊支持共纏跤的惡習廢掉，支持厝內的女性出國深造，閣透過「台灣文化協會」舉辦演講，提供女性吸收專業智識的機會，對台灣女性地位的提升有真大的貢獻。