▌宮原眼科

　　宮原眼科佇日本時代是台中州廳規模上大的眼科診所，號做「宮原武雄氏眼科病院」，是日本的眼科博士宮原武熊佇1927年所起的。二戰結束了後，宮原武雄轉去日本，宮原眼科就去予政府收做政府的資產，改做「台中市衛生院」，因為業務量增加，宮原眼科的空間是愈來愈無夠，所以佇1956年的時陣，政府為著欲起新的衛生院，就佮彼當陣的大雅望族張瑞禎交換條件，起新衛生院的費用全部予張瑞楨來擔，啊若宮原眼科就直接轉讓予張瑞楨。

      1959年，宮原眼科已經毋是政府的所有權，毋過佇彼當陣因為產權辦理的問題，煞出現足濟問題，後來是改做台中第一性病病院，提供歹囝症檢查和治療，另外閣有開補習班，電頭毛店，閣做計程車行等等，是非常熱鬧的所在。毋過彼當陣宮原眼科的產權其實已經是張瑞楨的，嘛因為予一寡人占去，上尾是採取法律的行動，嘛佇1964年年初，強制蹛佇遐的人搬離開，後來台中第一性病病院嘛徙走，毋過張瑞楨並無好好仔使用這个所在，後來都市重心漸漸仔轉移，中區沓沓仔稀微，這棟捌真奢颺的建築物慢慢仔荒廢，九二一大地動佮卡玫基風颱閣較是予伊厝頂塌落來，成做一棟危險建築，嘛是差一點去予逐家放袂記得。

行入去宮原眼科，就會當發現大廳起了誠挑俍，內底囥足濟冊架仔，厝頂使用強化玻璃做天窗，予外口的日頭光會當對透入來，展現出舊厝的性命力，內部的天井使用鉸紙來設計，頂懸設計喜慶的圖樣，嘛代表「攑頭見喜」的好吉兆。店中央有一座無法度使用的古井，嘛重新改做玻璃的募款箱仔，頂懸寫「宮原眼科1927」，嘛說明建築的起源。

宮原眼科毋但是遊客買伴手的好所在，閣較是一个用心設計，延續歷史記持的所在，對宮原武熊的醫療理想，到建築的重生，遮完整記錄台中舊城區的興衰，予伊成做一間毋干焦是「眼科」的觀光商店。