▌中央冊局

• 重新恢復光彩的中央冊局

2015年開始，地方人士拍拚推捒，佇2020年中央冊局總算閣一擺重新開幕，嘛延續彼當陣俱樂部的理想，空間的分配仝款是採用複合式的規畫，一樓到三樓的空間，除了會舉辦書展，閣有文創商品、餐廳、閱讀空間，嘛定定舉辦講座，真符合當初時創辦的理念。一樓特別規畫「台中作家」專區，特別的是，遮所講的台中並毋是咱這馬所認知的台中市，顛倒是沿用過去「台中州」的標準，包含台中、彰化、南投三个地區，包括賴和、巫永福、廖玉蕙遮的作家，攏有可能佇遮看著。

中央冊局的副總監沈貞慧嘛捌講：「阮共中央冊局的定位囥佇『毋干焦是一間冊店的冊店』。過去的中央冊局，是文人交流的場所，阮嘛期待遮是一个交流的平台，予人佮人、人佮書、人佮知識的交流，攏佇遮發生。」到這陣，中央冊局猶原是一間多元又閣充滿活力的冊店，歡迎愛看冊、佮意歷史的你，做伙來看覓。