台中市的第五市仔創佇1937年，一開始號做「旭町消費市場」，到今已經過80冬，佇日本時代因為彼當陣拄咧發展，市中心主要是佇火車頭、台中公園、台中火車頭附近，其他的所在猶閣是農田，遮的農民為著欲創造大頭菜等等菜蔬的經濟價值，就用醃缸來豉大頭菜，開始共樂群街和自立街公有宿舍邊仔當做是醃菜製作佮儲存的場所。

到民國50年代，政府因為考慮著食品衛生安全，閣有市民採買民生用品的利便性，就開始鬥相共來搭棚仔，提供交易的場所，嘛引導商人、擔仔入來市場營業，底這時，第五市仔就沓沓仔發展起來矣。

作家劉克襄佇台中出世，嘛對第五市仔寫一篇散文，會當看出第五市仔對真濟老台中人的重要性。第五市仔是上會當代表作者心中的舊市區的一座市仔，因為伊細細一个仔，內底煞是藏足濟寶藏，不管是好食的、抑是鬧熱滾滾的人情味，攏真值得紀錄。佇文章內底閣有講著是仔內底的好食物，若有機會來到第五市仔，就來揣看覓！ 

第五市場的歷史已經過80冬，這幾年來第五市仔周邊環境經過改善了後，已經變身，附近的臺中文學館佮美化的柳川綠帶，予第五市場形成一个有生態藝文和傳統市集特色的場所，形成都市中真有特色的生活圈。

第五市場佇113年度得著3星優良市集的肯定，另外，市場內有真濟指標性的擔仔，親像丸東商號、Aboku 88、聯發麵條、番仔火冬瓜茶、大吉利服飾等攤商長年予經濟部評核三星等名攤。