若講著台中市文化城的稱號，是對彼當陣的智識份子巫永福、陳千武等等的人，為台中號的名。日本時代因為台中市的交通真利便，各地的智識份子投入，所以成做台灣文化活動真重要的區域，尤其是縱貫路全面通車了後，不管是南部北部的智識份子攏定來到台中來聚會。後來，中部地區的林獻堂、辜顯榮等等的中部仕紳，嘛向總督府爭取，佇台中成立「台中中學校」，嘛表示學校的教育功能沓沓仔來體現。

鹿港弟子莊垂勝對日本留學轉來了後，1925年成立「株式會社中央俱樂部」，就是中央冊局出現的起源，一開始這个俱樂部當然無干焦是冊局，包含食堂、講堂、娛樂室的構想，成做文化推廣的據點。

佇1927年中央冊局總算創立，開業佇原址市府路，這馬中正路的冊店是彼當陣的倉庫兼員工宿舍，二戰結束了後，冊店才徙來遮營業，而且改做這馬咱所看著三層樓的紅毛塗，雖然講後來佇1998年結束營業，毋過佇地方人士的推捒之下，2015年閣一擺恢復營業。到這陣，猶原是一間充滿歷史的冊店，嘛定定舉辦講座，歡迎愛看冊、佮意歷史的你，做伙來看覓。