100 Ден во училиште

Интеграција на проектот со наставната програма

• Претворање на идеите од учениците во акција, развивање способност за планирање и управување со проекти за да се постигнат целите, како и иновативно размислување.

• Планирање постигнување на зададени цели, како и иновативно размислување и преземање ризици.

• Користење компјутери презентирање и размена на информации како и безбедно користење на информатичко- комуникациската технологији.

• Користење на учење, знаење и вештини во различни контексти, како што се работа во парови, групна работа, учење преку игра.

• Интеграција со наставните содржини: Предмет МАТЕМАТИКА: Множење и делење цел и децимален број со декадна единица, Одредување на делители, Работа со податоци, креирање табела и цртање на столбест дијаграм, Собирање и одземање со природни броеви, Запознавање со различни валути и решавање текстуални задачи со валути. Предмет ЖИВОТНИ ВЕШТИНИ: Безбедно користење на интернет, заштита на личните податоци.

Активност 1: Bitmoji - изработка на аватари

Безбедноста на интернет и заштита на личните податоци, особено кога се работи за ученици е една од најважните лекции кои учениците треба да ја совладаат. Затоа на почетокот од проектот учениците беа запознаени со опасностите на интернет, беа искажани правилата за етичкото однесување на интернет, а за заштита на нивниот личен идентитет учениците изработија свои аватари 100 во алатката Bitmoji со помош на кои се претставија во проектот.

Активност 2: Bookwidgets

Во алатката Bookwidgets решававме задачи со множење и делење природни и децимални броеви со бројот 100. Активноста се реализира на редовен час по математика, наставна содржина Вежби за множење и делење цели и децимални броеви со декадна единица 100.

Активност 3: PearDeck

Најпрво проследивме презентација на тема Низ историјата на банкнотите од 100 денари во која се запознавме како банкнотата со вредност 100 се менувала од осамостојувањето на Р.Македонија до денес, а потоа решававме задачи: Што можеш да купиш за 100 денари? Работа во групи, а потоа секоја група изврши презентација што тие купиле за 100 денари.

Активност 4: PhotoFunia

Во оваа активност од забавен карактер која се надоврза со активноста 3, учениците изработија банкнота од 100 долари со нивни лик. Ево како изгледаат нашите долари.

Активност 5: Работа со податоци

Оваа активност ја реализиравме на часот по математика, при што повторивме за работа со податоци - броење и сортирање на податоци, креирање табела со фрекфенција и цртање на столбест дијаграм. Бројот на податоци во оваа активност беше 100.

Активност 6: Wordart

Во алатката Wordart ги запишавме сите математички поими кои ги изучувавме оваа и претходните години на часот по математика. Од 100 математички поими креиравме слики кои можете да ги погледнете тука.

Активност 7: Тимска работа

На часот по математика преку тимска работа и со метод на пајак одредувавме парови делители на бројот 100! Така настанаа пет прекрасни пајаци кои ја украсуваат нашата училница. Материјалите кои ги употребувавме се за реупотреба и за рециклирање.

Активност 8: Играње игра икс - точка

Како осма активност имавме логичка игра икс-точка со која го развивавме логичкото размислување и натпреварувачкиот дух. Победникот од секој дуел се натпреваруваше со другите победници и на крајот го добивме и победникот.

Активност 9: Изработка на фото рамка 100 Ден во училиште

На одделенски час изработивме рамка за сликање која ја креиравме и украсивме со материјали за рециклирање и реупотреба, како еко активност во рамките на проектот. Потоа со рамката се сликавме за спомен на овој прекрасен проект .

National Quality Label