"Беларусачка" А.Бадак
БЕЛАРУСАЧКА
Алесь Бадак
Твар румяненькі,
Белая хустачка.
Я ўжо ведаю,
Я — беларусачка!
I хачу
Так, як тата і мама,
Родны край свой любіць
Я таксама!
"Мышка" А.Бадак
МЫШКА
Алесь Бадак
Уцякала мышка
Ад коціка,
Пагубляла мышка
Боцікі.
Ой, памерзлі ў бедненькай
Ножкі,
Хворая ляжыць яна
Ў ложку.
Дактары прыходзяць к ёй
Часта.
Горкія даюць ёй
Лякарствы.
Гладзіць мама
Мышку-малышку:
— Можа, пачытаць табе
Кніжку?
Не сумуй, мая ты
Малютка.
Станеш ты здароваю
Хутка.
Новыя куплю табе
Боцікі.
Толькі ж сцеражыся ты
Коціка!
"Цешкі - пацешкі" Віссарыён Гарбук
Цешкі,
цешачкі,
пацешкі,
Дайце роціку ўсмешкі!
Дайце вочкам весялосці!
Пойдзем мы
да смеху ў госці!
Смех рассыплецца
званочкам:
— Колькі дзіцятку
дзянёчкаў?
— Два гадочкі,
адзін дзень!
Падлік
сонейка вядзе!
"Буславы боты" Віктар Гардзей
"Пралеска" А.Дзеружынскі
Прыгрэла сонейка.
На ўзлеску
Птушыны спеў
Чуваць здаля...
Стаіць і слухае пралеска,
Як ціха
Дыхае зямля.
"За адвагу" А.Прохараў
На птушыны шумны двор
Завітаў нахабны тхор,
Трапіў у дзіцячы сад —
Да пухнатых куранят.
— Ку-ка-рэ-ку!
На падмогу! —
Певень наш
Забіў трывогу.
I пайшоў рашуча ў бой
Храбры воін і герой.
За рашучасць і адвагу
Уручылі пеўню шпагу.
"Бабуліны казкі" В.Вітка
У бабулі маёй
Рукі лоўкія,
У бабулі маёй
Песні доўгія.
Разматае клубок
З новай казкаю,
Прыйдзе хітры каток,
Трэцца з ласкаю.
Хоча лапкі пагрэць,
Завуркоча ён,
Ні гуляць, ні дурэць
Нам не хочацца.
Вось і дзень праляцеў,
І не спіцца нам.
Бабка казкі пляце
Чараўніцаю.
"Вяселка" В.Лукша
Дзеці летам ранкам золкім
Селі маляваць вясёлку.
Малявалі-малявалі —
Спрэчкі тут завіравалі:
З колераў якіх яна
Так прыгожа складзена?
Ўсе спрачаліся дасужа,
Пальцы загіналі дружна:
— Фіялетавы!
— Жоўты!
— Аранжавы!
— Чырвоны!
— Зялёны!
— Адзін прапусцілі!
— Які?
— Нібыта...
— Блакітны!..
Дзеці зноўку ранкам золкім
Селі маляваць вясёлку.
Малявалі-малявалі,
Спрэчкі тут завіравалі:
Колер кожны вельмі важны,
Што ён значыць, хто адкажа?
— Жоўты, ўскрылены цяплом,
Ласку дорыць і святло.
— А блакітны разам з сінім —
Гэта мір усім краінам!
— Фіялетавы... А гэты
Знак павагі і прывету.
— А зялёны — сын вясны,
Хай ім поўны будуць сны.
— Як матуліны далоні
Грэе колер нас чырвоны.
— I аранжавы нам любы —
Апельсіны вельмі любім!..
Колераў сем — вось суполка! —
Дружна склаліся вясёлкай.
Кожны колер блізкі сэрцу.
Чорнаму няма тут месца!
Чорны колер — то вайна!
Не патрэбна нам яна!
Малявалі ранкам золкім
Дзеці чыстую вясёлку.
Малявалі-малявалі,
Песні шчасныя спявалі!
"Едзе восень" В.Рабкевіч
Змоўкла наваколле,
Лес адгаманіў.
Едзе восень полем
На рабым кані.
Лісце сыпле ў ногі —
Высцілае шлях.
Гушкае дарога.
Мулкая зямля.
А за сінім борам —
Я разгледзеў сам —
Сядзе ў санкі скора
Белая зіма.
"Мае забавы" Змітрок Бядуля
Па даліне, па лужочку
Ездзіць я люблю,
Я з дубовага кіёчка
Коніка зраблю.
Гайда, гайда, буланенькі,
Аж у цёмны бор!
I ляціць кіёк мой ценькі
Проста як віхор.
Аж дрыжыць, шуміць зямліца,
А я скок ды скок!
А са мною весяліцца
Жучка — мой дружок.
Я на коніку ўсё далей
Еду без канца,
Гэй, хутчэй нясі, удалы,
Мяне, малайца.
"Коцікі" К.Цвірка
За вёскай, ля балоцінкі,
Ў галлі вярбы старой,
Маленечкія коцікі
Хаваліся зімой.
Мялі наўкол мяцеліцы,
Гулі ў кустах пустых,
Ды коцікі ў аселіцы
Не чулі нават іх.
Салодка спалі ў коўдрачках,
Чакаючы вясну.
Прыгрэла сонца шчодрае —
Збудзіліся ад сну.
Паскідвалі ўсе чысценька
Адзежыны з сябе
І, жоўтыя, пушыстыя,
Паселі на вярбе.
"Я хачу салдатам стаць" Л.Рашкоўскі
Як i мой калісьці тата,
Стаць i я хачу салдатам
I Айчыне даць прысягу
На адданасць i адвагу.
І ў салдацкім шынялі
Мір ахоўваць на зямлі.
"Свеціць як сонца ад самай калыскі..." М.Хведаровіч
Свеціць як сонца,
Ад самай калыскі
Вобраз любімы,
Родны і блізкі.
Маміна імя
Самае лепшае,
Маміна слова
Найдаражэйшае.
Мама! Матуля! -
Чароўнае слова
Песняй ласкавай
Гучыць на ўсіх мовах.
"Сонечная сцежка" С.Грахоўскі
Жоўты лісцік тапаліны
Ціха падае з галіны;
I лісты, лісты наўкол
Апускаюцца на дол.
Высцілае лістапад
Сцежку ў наш дзіцячы сад.
Спрытна ходзяць ножкі
Сонечнай дарожкай.
Кожнай раніцай з ахвотай
Мы прыходзім на работу.
Ляльку трэба расчасаць
I кружочкі напісаць,
Збудаваць пясчаны дом,
З’есці кашу з малаком
I кату пачысціць боты.
Ой, як шмат у нас работы!
"Сон" А.Грачанікаў
Прысніўся
Сон Алесі —
Аж войкнула
Яна, —
Што засталася
Ў лесе
Яна
Зусім адна.
Прачнулася
Раптоўна
Ад яркага
Святла:
— Як, мамачка,
Цудоўна,
Што ты мяне
Знайшла!
Я ў лесе
Не крычала,
Я не баюся,
Не!
Я толькі
Сумавала:
Як ты тут
Без мяне?
"Калыханка" У.Карызна
Зоркі ў небе ўжо мігаюць,Свецяць на палеткі,Ціха ў вокны заглядаюць - Як спіце вы, дзеткі.
Будуць слухаць хмаркі ўночы,Чуйныя, як вушкі,Што сняць любыя сыночкі,Мілыя дачушкі.
Спіце, дзеткі - мае краскі,Люлі - люлі - люлі.Хай жа вам прысняцца казкіРоднае бабулі.
"Ветлівыя словы" Т.Кляшторная
«Калі ласка», «дзякуй»,
«добры дзень» —
Ветлівыя словы
Чую ад людзей.
Ветлівымі словамі
Трэба даражыць,
З ветлівымі словамі
Лёгка жыць.
"Дожджык" Т.Кляшторная
Дожджык часты сыпаў, ліў —
Па двары ручай паплыў.
Пабягу хутчэй гуляць
I караблікі пускаць.
Парасон я распрастаў —
Дождж адразу перастаў.
Напужаўся, мабыць, ён,
Як убачыў парасон.
"Не сквапная" Т.Кляшторная
Я цукеркі несла ў садзік.
Папрасіў адну Уладзік,
За Уладзікам — Люцынка,
А за ёю — Стась, Янінка,
I яшчэ падбегла Міла:
— Мне цукеркі не хапіла!
— На, апошнюю трымай,
Я не сквапная, ты знай!
"Паўцякалі цацкі" Т.Кляшторная
Зноў без адпачынку
Завіхаўся Федзя:
Паламаў машынку,
Разарваў мядзведзя,
Паадкручваў вушы
Шэранькаму зайку,
Перамазаў тушшу
Штонікі і майку.
З гэтае прычыны
Цацкі паўцякалі:
Заяц да Яніны,
А мядзведзь да Валі.
"Шпак" Т.Кляшторная
На бярозцы пад акном
Я шпаку прыладзіў дом.
Толькі адысці паспеў —
Шпак адразу прыляцеў.
Дом утульны аглядае,
Песню весела спявае.
У шпака ёсць у двары
Вельмі добрыя сябры.
"Ручаёк" В.Лаўрыновіч
"Жыў у сажалцы карась" У.Мазго
Жыў у сажалцы
Карась,
Што любіў
Зарыцца ў гразь.
І за гэта
Карася
Ўсе празвалі:
Парася.
Як зарыўся
Ён пад корч –
Дзень зрабіўся
Быццам ноч.
Думаў:
“Гэта чарвячок”,
А схапіў у рот –
Кручок.
Так злавілі
Карася.
І гісторыя –
Уся.
"Калыханка Юлі" У.Мазго
"Кот і бусел" У.Мазго
На ката
Найшла маркота:
Ён не мае
Добрых ботаў.
— Кля-кля-кля! —
Гаворыць бусел. —
Калі хочаш,
Падзялюся.
Жабак
Вылавім з балота.
-Дзякуй, дружа!
Неахвота, -
Кажа кот
Усё цішэй. -
Босым лепш
Лавіць мышэй...
"Мама" Эдзі Агняцвет
Калі б магла вясёлку з неба зняць,
Я падарыла б маме.
Каб з хмарак я магла дыван саткаць.
Я падарыла б маме!
Пралескі ўсіх лясоў і стужкі рэк
Я падарыла б маме.
І ласку, і цяпло на доўгі век
Я падарыла б маме!
Святло бяроз і песеньку малой
Сініцы сінякрылай –
Хачу паднесці ўсё, што мне самой
Матуля падарыла.
"Сонца грэе, прыпякае..." ( з верша "Вясна") Якуб Колас
…Сонца грэе, прыпякае,
Лёд на рэчцы затрашчаў.
Цёплы вецер павявае,
Хмар дажджлівых нам прыгнаў.
Вось і бусел паказаўся,
Гусі дзікія крычаць,
Шпак на дубе расспяваўся,
Жураўлі ужо ляцяць.
І зіма, як дым, прапала!
Зелянее луг, ралля.
Як ад болю, ачуняла
Наша родная зямля.
"Храбры певень" Якуб Колас
Па надворку певень ходзіць,
За сабою куры водзіць
І крычыць: — Сюды! сюды!
Як кіўне ён галавою,
Сыплюць куры чарадою —
Як адна бягуць туды.
А калі хто кур пужае,
Певень грозна загукае:
— Хто такі там? Хто такі?.
Вось на ток ён зачасаўся.
— Кыш! — адтуль хтось адазваўся.
— А які там чорт? Які?
Певень жытам кур частуе,
Гаспадара бы й не чуе,
Кліча кур: — Сюды! сюды!
Гаспадар мятлу хапае.
Гвалт наш певень падымае:
— Хто куды! ой, хто куды!
"Дзед Мароз" Янка Журба
У вопратцы белай,
Шырокай, даўгой,
З вялікай пушыстай
Мятлой-барадой
Прыйшоў к нам здалёку
Дзядуля Мароз,
Завеі і холад
З сабою прынёс.
У бель апранае
Ён дрэвы, кусты,
На рэчках, азёрах
Будуе масты.
"Першыя сняжынкі" Янка Журба
Лётаюць, сыплюцца
Зоркі-сняжынкі -
Белыя, лёгкія,
Быццам пушынкі.
Роўна так сцелюцца
Ў вёсцы і ў полі,
Кружацца, кружацца
Ціха, паволі.
Дзецям тут весела,
Хоць і марозна:
Цёпла за гульнямі,
Зімна не грозна.
Шумна забегаем
Тут удагонкі,
Гулка пакоціцца
Голас наш звонкі.
Жыва праложым тут
Новыя сцежкі,
Дружна наладзім мы
Гульні у снежкі.
Лётаюць, сыплюцца
Снежныя зоркі...
Будзем на саначках
Ездзіць мы з горкі.
"Лістапад" Янка Купала
З буйных ліп і бяроз
Лісты валяцца.
Між павалаў і лоз
Рассыпаюцца.
Шапацяць, шалясцяць
Залацістыя,
Ўвысь галінкі глядзяць
Пусталістыя.
А як прыйдзе вясна —
Ўсё адменіцца,
I галінкі ізноў
Зазяленяцца.