Embedded Files
Սույն թվականի հունիսի 8-ից 22-ը ՀՊՄՀ դասախոսներ մ․ գ․ թ․, դոցենտ Աստղիկ Բալայանը, մ․ գ․ թ․, դոցենտ Մարգարիտա Ասատրյանը, Արևիկ Խուգեյանը և Անահիտ Ենոքյանը մասնակցել են Հանրային քաղաքականության ինստիտուտի (ՀՔԻ) կողմից կազմակերպած «Ակադեմիական բարեվարքություն և ակադեմիական ազատություն» դասընթացին:
Առաջին հանդիպման թեման էր՝ «Ակադեմիական ազատությունը բարձրագույն կրթության համակարգում» (դասախոսներ՝ Աննա Գևորգյան և Էդիթ Սողոմոնյան, Հայաստանում «Էրազմուս+» ծրագրի գրասենյակ)․ քննարկվեցին հետևյալ հարցերը՝ ի՞նչ է ակադեմիական ազատությունը, ինչու՞ է այն կարևոր բուհական համակարգում, ո՞վ է սահմանում ակադեմիական ազատությունը, ու՞մ է պատկանում ակադեմիական ազատությունը, ու՞մ կողմից է կիրառվում ակադեմիական ազատությունը, Ակադեմիական ազատությունն արտոնությու՞ն է, թե՞ պարտավորություն և այլն: Ակտիվ քննարկումների արդյունքում դասընթացի մասնակիցները դուրս բերեցին ակադեմիական ազնվության սահմանումը, ճշգրտեցին դրա սահմանները, խոսեցին կիրառության մակարդակների մասին: Առաջին դասընթացից հետո թեմայի վերաբերյալ ՀՊՄՀ թիմը իրականացրել է բուհի կանոնադրության և «Բարձրագույն կրթության մասին օրենքի» նախագծի ուսումնասիրություն և ներկայացրել իր վերլուծություններն ու առաջարկությունները:
Երկրորդ հանդիպումը նվիրված էր բուհական ինքնավարությանը (դասախոսներ՝ Աննա Գևորգյան և Քրիստինե Ծատուրյան)։ «Բուհական ինքնավարություն» հասկացության սահմանումը դուրս բերելուց, նրա սահմաններն ու բաղադրիչները ճշգրտելուց հետո դասընթացի մասնակիցները նախ՝ ներկայացրին իրենց բուհերում ինքնավարության կիրառման մոտեցումները, այնուհետև քննարկեցին բուհական ինքնավարության հարցերը 4 ուղղություններով՝ ակադեմիական, կադրային, ֆինանսական և կազմակերպական։ Հետաքրքիր գործնական աշխատանքները մասնակիցներին հնարավորություն տվեցին խորացնելու և ամբողջացնելու բուհական ինքնավարության վերաբերյալ պատկերացումները՝ քննարկելով նաև օրինակներ այն բուհերից, որոնք ներկայացված էին լսարանում։ Որպես ինքնուրույն աշխատանք՝ բուհերից բոլոր մասնակից դասախոսները պետք է ուսումնասիրեին «Բարձրագույն կրթության մասին օրենքի» նախագիծը և մշակեին ինքնավարության ապահովմանն ուղղված առաջարկություններ:
Դասընթացի երրորդ հանդիպման ժամանակ քննարկվեցին ակադեմիական անազնվության տեսակները, մասնավորապես՝ գրագողության հնարավոր դեպքերը, անազնիվ գործելակերպի դրդապատճառները, գործոնները, դրսևորման ձևերը և այլն (Անի Կոջոյան, Բաց հասարակության հիմնադրամ)։ Այնուհետև Բարձրագույն որակավորման կոմիտեի նախագահ Սմբատ Գոգյանը ներկայացրեց կոմիտեի գործունեությունը, գիտական աստիճանի, գիտական կոչման շնորհման գործընթացների ուղղությամբ իրականացվող բարեփոխումները, հանրապետության գիտական ոլորտում տիրող իրավիճակը և այն զարգացնելուն միտված ռազմավարությունները։
Դասընթացի ավարտին մասնակիցները ստացան մասնակցությունը հավաստող վկայականներ, ինչպես նաև տեղեկանք՝ մասնագիտական վերապատրաստման կրեդիտներ ստանալու հնարավորության վերաբերյալ, որի հիման վրա բուհում կարող են իրականացվել հատուկ դասընթացներ:
մ․ գ․ թ․, դոցենտ, Աստղիկ Բալայան
ՀՊՄՀ Մայրենիի և նրա դասավանդման մեթոդիկայի ամբիոն
Report abuse