«Երկրորդ ինստիտուցիանալ հավատարմագրման գործընթացը բուհերում» խորագրով հանդիՊՈՒՄ
«Երկրորդ ինստիտուցիանալ հավատարմագրման գործընթացը բուհերում» խորագրով հանդիպումներ ՈԱԱԿ-ում
Մասնագիտական կրթության որակի ապահովման ազգային կենտրոն (ՈԱԱԿ) հիմնադրամը ՀՀ կառավարության 2008թ. նոյեմբերի 27-ի թիվ 1486-Ն որոշմամբ ստեղծված անկախ կառույց է, որն ինստիտուցիոնալ և ծրագրային հավատարմագրման միջոցով անց է կացնում որակի ապահովման գործընթացներ նախնական, միջին մասնագիտական և բարձրագույն ուսումնական հաստատություններում: Հիմնադրամը խթանում է մասնագիտական կրթության չափորոշիչների ապահովումը և որակի շարունակական բարելավումը՝ նպաստելով կրթական համակարգի ինքնավարությանն ու հաշվետվողականությանը:
ՈԱԱԿ-ը պարբերաբար իրականացնում է «Երկրորդ ինստիտուցիանալ հավատարմագրման գործընթացը բուհերում» խորագրով հանդիպումներ։ Սույն թվականի փետրվարի 12-15 ընկած ժամանակահատվածում ՀՊՄՀ Կրթության որակի ապահովման և կառավարման բաժնի պետ Ֆիզ.-մաթ. գիտ. թեկնածու, Մարիամ Գևորգյանը, Օտար լեզուների ֆակուլտետի դեկան, բան. գիտ. թեկ., դոցենտ Տիգրան Միքայելյանը, Օտար լեզուների ֆակուլտետի Գիտության և միջազգային համագործակցության հարցերով դեկանի տեղակալ, բան. գիտ. թեկ., դոցենտ Անի Սահակյանը և Օտար լեզուների ուսուցման ամբիոնի որակի պատասխանատու, դասախոս Լուսինե Միրզոյանը մասնակցել են անցկացվող հանդիպումներին: Վերջինիս նպատակն էր քննարկել հավատարմագրման ընթացքում ի հայտ եկող խնդիրները, պատրաստել փորձագետներ, որոնք անկախ և անկողմնակալ արտաքին գնահատում կիրականացնեն ուսումնական հաստատություններում։
Քառօրյա դասընթացի ընթացքում ՈԱԱԿ մասնագետներն անդրադարձան հետևյալ թեմաներին՝ «Հավատարմագրման գործընթաց, փորձագիտական աշխատանքի առանձնահատկությունները», «Ինստիտուցիոնալ ինքնավերլուծության նախնական գնահատում, «Փորձագիտական այց», «Փորձագիտական նախնական զեկույցի նախապատրաստում»։ Հանդիպումներն անցկացվում էին բավականին հետաքրքիր և արդյունավետ: Առաջին օրը դասընթացի մասնակիցները ստացան տեսական գիտելիքներ բուհերի կառավարման, ներքին ու արտաքին շահակիցների, բուհի աշխատանքի ինքնագնահատման չափանիշների և չափորոշիչների և այլնի մասին, այնուհետև հանձնարարվեց գործնական աշխատանք հաջորդ երեք օրերի համար: Վերապատրաստման երկրորդ օրվանից սկսած կազմվեցին ուսանող-փորձագետ, դասախոս-փորձագետ ֆոկուս խմբեր, որտեղ մասնակիցները միմյանց հարցեր ուղղեցին՝ հանդես գալով թե′ դասախոսի և թե′ փորձագետի դերում: Վերջին օրը վերապատրաստման մասնակիցները բաժանվեցին երկու խմբի և պատրաստեցին փորձագիտական զեկույցի իրենց մոդելները: Ավարտելուց հետո կարդացին ու վեր հանեցին զեկույցներում առկա թերություններն ու ստացան մասնագետների համապատասխան խորհուրդները:
Այսպիսով, վերապատրաստման արդյունքում ՀՊՄՀ մասնագետները ծանոթացան հավատարմագրման գործընթացին և փորձագիտական աշխատանքի առանձնահատկություններին, սովորեցին փորձագետի տեսանկյունից գնահատել բուհի համապատասխանությունը հավատարմագրման չափանիշներին, կարողացան իրականացնել փորձագիտական նախնական գնահատում, փորձագիտական այց և գրել փորձագիտական զեկույց:
Վերապատրաստման մասնակիցները նշեցին, որ այդ չորս օրվա ընթացքում ձեռք բերեցին բավականին շատ գործնական գիտելիքներ, որոնք անպայման կկիրառեն մասնագիտական ուսումնական հաստատության որակի ներքին ապահովման գործընթացում: Վերապատրաստման ավարտին ՀՊՄՀ մասնակիցներն իրենց խորին շնորհակալությունը հայտնեցին ՈԱԱԿ մասնագետներին ու կազմակերպիչներին արդյունավետ ու հետաքրքիր աշխատանքի համար:
Օտար լեզուների ուսուցման ամբիոնի
որակի պատասխանատու, դասախոս Լուսինե Միրզոյան