tenqix
Bang .Diyc
Liulongg lirlorhenw, an' jap-zi lxauu lyhqe, u zip byy cud, kiyh kxeh qaur vxeh lxauu dyrr buanxuann :ar, dagg janr guanjai tingg qaxx diyc. Ec bicbih ee dua kax sniux-aw, id~zi-jap langg kia dit dit, ex-ex-kap-kap. Qaur qaxx id lxauu mngg kuix kuix .kuix, qyqyy jner jyr tauu, bersux jiauw-aw vangr cud lamx.
Kabang qorr pnai :ee kangx ciuw vec iyy, DM en' lo tec. Beh quer cialo kir jre denrciax, dirr lorkauw dniudanw cnidingx, jit jriw qongxqywjuaw tranr jitquw sui' dniux aw bongxx knuar.
Jiycknuaw banrcniaw hingg? Jex quatding decc vangr hnuaii jxer :ee. Sinx kuix ee siddngg, jitt qingx, sir xee langg jywhuew laii u qat'inw, hitt dnar, jiac cid nguaw benw jnii. Vachuer-qongsix ee decdexhuer, jit sniux jit langw, qongxx juanjuanx cinr qrinx decc bre. Voxsibvanx vuttairgenn, qyckacc si vacvah kuanw, simxmih samdingw-zirhy :ee dy' u. Knuar si beh yc jit xee tanwjiac qangge, iacc si virvan hur kyw qriuu jit xee qongbingg-jinwdiongr, dew dew jit diauu Lam'iongg Voxsip Qrex ingwhur liw qaur diyc.
U bang u hog. Binbang vnir jniaa jinx, qimdanx draur kansingg.
Poxqiliok B5 ee qongxqywjuaw, ervnuar bin u kranx hogbu-denrue, qongxqywsuu dna' jit jua byy kacc qex.
Jex simxmih nguaxqyquew? Tacc u langg siaw qaxx anxnisnix aw h.-hamhoo-h, byy-cing.-byy-cyw? Jinjniar hnowhenn. Huanx dngw tauu laii kir cue "surjuw" mng jit xee sewsiongg. Tagcecginxaxqangx, lanw qra mng jap hxang, ix qauw hxang qra lanw hnair tauu lig bagbaii. Bingqijaix singlixlangg ee vecvo qik je, dniudauh hnowsursiong :ee jiac diyr si qaiww poxpenr. Singwpiah dy' vnuar snesingg :ee. Junw kaksit si tutsenx, qaqi zin suex junxduxsuah.
"Uee, lanw jiycmng hnoh. Linw cniar singdongg dirr ciatauu vunx ee DM, guaw knuar longxx byy. Linw si decc jyr sniaw singlixlo?" Denrue jriab tongx, urvi ee ue naxx cux jiyhlux lux .cud .kir.
"Vunxqongsix qapp Dikqog jit qingx cutmiaa ee jewiyhcniuw habjog, taubuew jap dxangx, qurnii kaihuad cud jit jiongw iyhbi. Bylun imenn-lo iacc taulo, jit liap iyh'uann tunx lyc auu, bang-diongx ee bixqingw bxan hxang sxingg." Snia'imx qamdnix, siyxjiaxlangg rinr kiw jiokk sunrlauu, byy qaxx jit biyw aw jikdauw.
"A'ix! Jiacc hyw ing! Hex m naxx sen'iyc lehh? Acc byy, lanw qycc jiycmng lehh. Liw qaqi qamxx u cir .quer?"
"Byy."
"Liw qaqi dy' byy jiac, simxmih langg beh qra linw sinr?"
"Langkecqnuax, liw iuxsow-vutdix. Jitt hy mic jiacc quiwkir. Lanw jex jiahtaulorlangg, nng~snax-bxan kox ee guehqib, iarr diyhh jiac-cing-ing, iarr diyhh lap suewqimx, beh dyhh snex hiaxee jnii brew?"
"Si zuarr quiwkir? Jit liap si quiw ngii?"
"Go-bxan."
"Uaar! Jit liap rair qaxx go-bxan! Linw cunvan qra langkeh junw panxaw decc qongr m?"
"Go-bxan kox dyrr siok a, nacc u quir? Gunw sidjai dy' byy jaidiau. Narr u, qinw qinw marr brew jit liap aw laii jiac, singw did dagg qangx diyhh dirr jiax jyr qaxx beh siw."
"Go-bxan kox m si siyxkuaw. Jnipiyr cutmngg, jiac liauw suacc byy niuxsniuw lehh?"
"Jitt jann beh cniaw langkecqnuax hongwsimx. Vunxqongsix kaix dua jnii cnair u vaii ee ludsux jyr diqnir, sianghongx pah habdongg, langkeh singx lap jit snxiaa jyr dniarqimx, cunx :ee danw u haurgiam jiacc lap."
Hiangxsiu dairsingx, jnii siogziho jiacc cringx, go-cingx kox cir knuar mai, dyrr junw decc brew jiongxquanr.
Cing sejongx, qad niaxduar, qnrua jit kax 007 ee hinglixsniux, sngr sii sngr zit, ludsux jiauww iokding laii dirr cur nirr.
"Jit xee langg jit siwlangg qanda' erdangr qauquanx jit vaiw, jiac derr zi vaiw .kir dyrr byy qonghau. Jid'err tunx lyc vakdoxdew suisii kar denrue vywdix, vingrcniaw jiong' bang ee luerjingg sueh hunbingg. Iyh'uann cid qangx ixlai u qenwhau. Bangrqingw narr sxingg jinx, qongsix e pair langg laii cur nirr siux henrginn; vunxpiyr iacc ciuxhingg byy air dnic."
A4 ee qec'axjuaw siaw qaxx bat bat si, ludsulangg jit jua jit jua tak hro lanw tniax, bat liuw pangg, jiokk diamxdinn. Zirviw rah hueah qiamx qaiwinr, kewioksux jit langg jit hxun. Lanw ee, vyleaux siyw deh lehh; inx ee, ludsux qinxciuw qra sreh zip kir kabang lairdew.
"Juaw-tauu juaw-buew byy jairzi, u jit qnia dairjir jiokk iauwqinw, lanw jyr iokjniar diyhh toktaur qongw dairsingx. Iyh'uann u linggiam, u sidjai bang .diyc jiacc tangx qongw, marr jiacc u voxsow. U jit xee langkeh, amwtauu aw cid diamw ciamx iokzi, qeh jit mee, tauwjaw-tauwiau denrue dyrr kar .laii, qongxx ix bang diyc brew jiongxqngr diyc diyc jit-vah-bxan. Buexqed, jiongxqngr byy diyc, singlixdniuu ix liauw jit-vah-bxan."
"Hnaa! Jiacc lirhai or?"
Ludsux dimr tauu, jiapsuar qycc qongw. "Dingw guehzit u jit xee langkeh qyckacc bycaiw. Qra guanw sueh qongxx bang diyc qaqi jyr snezit hitt qangx, taumngg cuiwciux vec cangcangx jre dirr duartniax ee qau'iw, qniaxsunx-aw sui' xee aw laii qra ix vaiwsiu. Denrue qongw suah nia, qongxx huah vakdow siausngwtniar, derr snax qangx dirr vnerngi quewsinx, sensnix qaur ix quewkuir jinwjingg iauxx sax byy vnerqinx. Liw si u hokkir ee langg, iyh'uann jiacc u tangx qaur dirr liw ee ciuw. Hyw hyw caa narr suacc taii qaur kiaux, hex si dangwjinx jiokk m dat." Ludsulangg uerkuanw giamgaii, itvid-itdiongr.
"Ludsux, acc liw lehh? Liw qamxx iarr u jitt hy hok'un?" Lanw sun ix uerbuew mng kiw.
"Guaw ee hokkir jiokgiac :ar, beh qycc qriuu kacc je dyrr dua simqnuax .ar."
Laii-kir naxx jit jun hongx, ludsux qaudair liauxqed, vreh kiw srinx dyrr qywsii.
Juqad Liong qauwui, iarr diyhh Juxliongg Jiongr siy' suii. Qimmii dyrr m hyw jyr amwnguawjiauw. Kacc jaw kunr kacc u tangx unsenbang.
Quw nii tangr tnix, jap-id diamw kir kunr, cid diamw hitt kadaux-aw jurzendig e jingsinn. Luanrjingx-aw dagg qangx dniardiyc dirr cid diamw vnuar, u jun kacc tangx unxsimx aw kunr, hranw did kir lyhuann diyc ix. Siangx kax dac lyc devangx, bagjiux srur srur. Jit qangx kixqow, quanwsip singx kir venrsow, qangg jit xui, sew bin lrok cuir diyhh sunrsuar. Juixdyrjuiw iong qorr ciuxvanw srinn, kuaiwqinw puah hiongr bin, langg qui'ee cingcniw, aiwkunwsinn jiauu byy .kir. Dngw laii qaur vangqingx, jid'err dyrr knuar diyc qniawdyh-dingw ee jit liap iyc-aw qapp jit vuex qunxjuiw.
"Kow .siw! Jarhngx ee bang qaur jitt diap longxx bu sawsar venr juixenx kir ar. Byy-tauu-byy-sinn jnia' baixjaii. Aurciuw iauxx u lak qangx kacc byy iauwqinw. Binaxjair diyhh e qir did e qir did."
Go-bxan kox brew :ee, bering did qig tuad tuad. "Bang", iong denrnauw inr hro dua dua zri, snaaxduu, viacdow, mngsnir, xui xui dy' qra dah jit dniux, binaxjair jingsinn dingrquix knuar e diyc, be citcyr.
Jiokk hyw kunr, jitt amr kunr jiokk vaw binn. Huandngw zit bagjiux vreh qimx, langg jing'ingx, bang marr bingg ~~.
"Bang qaxx jitt hy bang, air ix venwsingg jinx :ee, diyhh duiww vadd langg sueh quwsit. Iauxx si mair kacc hyw. Qongw cud cuir hen qenwsiaur siw."
Zit-srux-xia-bang qyxvutzenn urngiaw. Jarhngx-ervox dirr vanrqongsig ee duxgu u huatdong diyc cunjingg, amwmii aw dirr bang nirr sui' qycc siy' drng. Ing'amr ee bang diyhh singx virvan. Narr u hitt hy :ee tangx bang, hex m jnia' hyw.
Jit liap iyh'uann, ciuw nirr tec si kinx bangxbangw. Go qnxix jaxtauu jingsinn, jre dirr bingcngg-qnii jujux sniu, jit xee simqnuax be cingcaiw.
"Jitt hy kuanw ee bang jiacc siyxqiok dyrr beh junw .quer, qamxx hyw? Aurzit aw dirr qniaxsunx-aw binrtaujingg beh ngiaxiongg qongw jit xe qoxjaw marr pnaixser kuix cuir."
Juxsimx u dnia, iyh'uann qycc qra he dngw kir dutuah.
Jiac amr vaw bongx ingg, qauw diamw gua iauxx bue jap diamw, kunwsnax ngua jit sux cingkir :ee. Dirr bincngw-dingw vingw laii vingw kir kunr be lyc binn, siongrr buew aw vaiw knuar sijingx ee qinxbanrjiamx, kikjiamx qiw snax, hunjiamx quer zi. Naurjingx-aw lecleh dann. Crunx ciuw qra cic hro diam, bagjiux iauxx kreh kreh, taukag cingcniw sui' diwqag diyc qaqi qui' srinx dang qnua.
"Qniax dyw langg! Jitt xee bang narr venr jinx :ee iarr suacc e dit?"
Jongw:a qiong:a cunx nng amr, byy tangx kacc qex. Qaur jiax laii, byy qinw sniu vo bersaiw. Suacqangx, singx uad kir seiyhvangg. Iyhjewsux jaiwsnax huanhur qongxx vnuar liap dyrr u :ar. Jit liap aiwkunwiyc vreh vingg puer qunxjuiw qut lyc auu. Urngiaw jiokk hyw kunr, jit cnew qaur zidtauu pak kacngx, suacc lenrr jit xee bang dy' byy.
"Jiac m jaix vaw sidjai jnia' hai. Dua jac .zit hitt xee bang dyrr be baiw."
Simx simx liam liam qinrqin jitt qnia, benxqiongw kir siongrvanx marr byy simjniaa. Iarr diyhh zxinn, iarr diyhh sinn. Samsingx-jiuxlew qapp hionghuax-dingqyw longxx cuann hro jiauu. E-be jin jitt amr, quw byy kir ee Joxsux Biy, qinaxzit diyhh vutjen kax bongxx qniaa .jit .jua.
"Jitt vaux iyhsanw jyr jit cuir tunx, vauquanw liw surgiap aiwjingg jit pnir pxangg, kax qnia ciuw qnia jiac vah dxangx."
"Jiacc janw! Jit vaux bre zuarr je?"
"Qatsixqer jap-bxan."
"Kangx vxag iacc vaw vxag ee sii jiac?"
"Kangx vxag iacc vaw vxag byy siongqanx, vutzirqyr, diyhh puer dee, puer vniaw qapp puer quexjiw jywhuew jiac."
"Cinwcaiw quexjiw longxx ersaiw?"
"Byy nor! Sniu' quer zedsingr :ee dyrr m tangx. Cniurr linggingw, snuai-aw iacc sikqiaqyw, jid'err jiac sui' pywqongx."
"Dee dyrr byy hanrdnia lar hnoh?"
"Sa'ngw qongw :ee? Dee jiacc si dua qiycsig. Oliongg qapp Dangwdingw byy duir lo, dogdok cruw jit bi Bagsax ee ticquan'imx."
Kiamr go hunx cid diamw, bagjiupuee tiw kuix hitt diap. Sew bin, sew cuir, ngua snaaxkor, beh cutmngg jinwjingg, dyh-dingw ee iyh'uann suawciuw qra pniax hniwsag.
Ciurling'ee
Byy decc kueckiamr sniaw, jit qangx aw byy kir banglo-dingw ee pacbe-dxiamr srunn srunn knuar knuar lehh, qan' qan' aw dy' gairgiyc. Iuwliabmic iacc cosiogmic, vnuawsaur :ee iacc sinx diamw diamw :ee, qniwnarr kacc hihanw kacc qenwqii :ee, kaciuw diyhh saxliur. Qaix crann qaix satciuw, qaqi simqnuax diyhh cuanvan decc danw; diuduu, dunwdnex, bak nih aw quw damqyh dy' be kamx .did.
Bxan hxang beh viw langg' jaw jit vo, jit siangx ciurling'ee ter liw kuix unrdoo. Siok siok hiaur, cunsimx laii beh qet'enn. Tong' sewqair dna' jitt siangx, jniawjniar u jit byy nng.
Sunzenn singliw-qiycsiaur, huewbut viyx .diyc, qinw beh quer jit ciuw tanr qewkax :ee dyrr benw lun kiw, itvnualangg brew ree-aw, kacc duiwdiong :ee dyrr sosongw qapp suiw kuanw jitt nng hxang. Kax-drew ngua jit siangx ree-aw dyrr e kixkuir zib'un, qongxqywsuu siaw qaxx jitt hy kuiwkauw, marr sidjai u kacc hohamr. Qycjaiww qongw, ree diyhh cunwciyh u hac jiacc e cing .did, vutviw sna'axkor tangx vangr voo iacc auw kacc dew. Jongw byy qongxx zirun hyw-baiw qycc diyhh viw kavee duarser?
Jitt kxamw dxiamr ee zirhy vutjiaw aw tauw, sinwiong sngr itdingw :ee. Quaixqunr beh laii jitt xee bangrjam sraiw liuxaxvo qnaxx be quewciuw, dicdangrqex laii decc congwqingw dyrr kacc duarmngg. Hnowhenn taii siw niaux. Sniu beh jaix ree-aw snex jyr ngii iacc vniw, lunw be diauu, niauxciw-aw soksog kok nng xe.
Toxsongg-kuanw junw duxhyw, vitqingr, suiw-baiw jairr langg knuar. Jit siangx ree-aw puar hiuxhiuw, qu sniuwsniur. Jitt hy huewvan, lyc jyhzit an' jit-bxan kox pah kiw, jiauww lruiw, jit qangx u go~lak jruw decc ciangwqer, jinw huah qaur beh snax-bxan kiw .kir!
Taukag-lai juann gibun. Hyw did qajair, u qamxqag giquair :ee m na lanw. Jerje bangriuw jaw lanw jit vo qra bunrdee danr danr .cud .laii.
Mng: Ree-aw zuarr dua siangx? Guaw cing zi-jap-cid hy vnuar.
Dab: Duarser tingwhyw ciauu, bukirdan.
Mng: Langg' hex sinx cakcag :ee, kuanxsig qycc si jiangwsii siongrr siqniaa :ee, jit siangx snax~sir-cingx dyrr e diyc. Liw ee quraur-qurcaur, qewqeh dring qaxx jnriu bxan. Qamxx be sniu' lirqingx?
Dab: Sniar vut byy lun duarser srinx. Diyhh knuar vaklai, m hyw knuar hinghaii.
Mng: Guaw si jauw vacbiw ee suanxciuw. Liw ee ree-aw qamxx tangx jo guaw bxan hxang vixsair jauw tauu miaa?
Dab: Ue m hyw qongw tauwqix. Simlai u sinr dyrr e ling'ingr.
Diamwdew jin' qauxked, langg' sit sit aw mng, ix puee puee aw dab. "Quiw xee langg cing .quer?" "Byy ingwgiam qamxx erdangr tewhuee?" Cincniu jitt quaw bunrdee, ix soksinr junw .quer, lenrr qa'ngg sna' jiycmng iacc junwbun .jit .xe dy' byy. Kia quann snuax knuar langg' decc vniar qewsiaur, simqnuax uanaxx e gniaux. Ciuw jen, tac jit-vah kox aw iwsur iwsur, qapp langg' huah jit xe aw kimoji. Bangrlo m jaix si tutcuee iacc jnaixngiu, tauduxjiah iauxx siy' jnecniuw, jamwqer jamr qaxx zet huthud. Lanw jid'err kuix qxunn, qewsiaur jurr anxnix byy qycc kiw, qui'ee diamwtauu byy-dongr.-byy-jing.
Denrnauw qnuaiqix qycc kuiqix, laikiwdyr quixnarr hunjingx. Qycjaiww zip laii dxiamr-aw, langg' vadd jruw qa'iac qaxx, sowzi diddit tnrix; lanw jitt jruw, $34,500, be-dinx.-be-dang naxx jit kud sixjuiw.
Kir ATM juanxsiaur, jnii zip kauxjy, huewqnia jiacc u qiar cutmngg. Diamwdew marr jin' kyy. Snax~sir-bxan kox ix decc juanw, jit siangx ree-aw unrqimx jiacc zuarr je kox-sniax, iarr diyhh lanw qaqi cud! Jiauww sinwiog hinggii. Nng~snax qangx quer, ree-aw qiar qauwui. Viw did siongwpnir, u kacc qursniur byy kacc suiw.
Bogquair qongxx duarser tangx qaqi ciauu, cing jitt siangx ree-aw naxx cincniu decc giuw bueh'angr, erdangr qringx kacc dua; qycc iarr u qiuwduar, tangx sog kacc ser kax. Juaxsniux-aw suawciuw beh tec kir vniawsag, jiacc huatqenr diyc lairdew u jit juaw puebunn, iong qorr vid siaw :ee, zirqud uaix uaix juai juai, naxx decc rue toxsuachuu-aw.
Ree-aw e zin langg, m hyw lamrsamw sna' hing. Diyhh qniaa, diyhh jauw, brew laii knuar suiw :ee byy qonghau. Qongw cingx qongw bxan bycaiw qangx, jriog liw bxan su jiog simguan.
How quer jiacc vangr cingr. Jnii dua vah qiar kir hro ix, huanrser jinw kaix qaxx longenx-sanwbu :ar. Ree cing dirr kax-drew, singx dirr cur nirr qniaa kahuex. Liaurqiyr e tinghunn e qawbu, iacc si jaw naxx decc vuex, quibuew, iarr si kunr bongxx kunr.
Jit jun cauwhuexly bi, siwqer qinw kir pnircue. Buerjingrbue, tniax diyc decc huah huew siyx cur ee sniax. Qinxmew beh dysingx, qaijair, snakor jingxjee, ree iarr cing hyxser. Mngg jid'err kuix .kuix, oenx-vinrvong, qiongbeh knuar be diyc lo.
Liulongg iauxx u lorsaiw, dirr jitt hy sihau dy' m tangx dac zip kir hitt xee "lrongg-aw-lai", beh air mia :ee, lautuix qyckacc je ked iarr diyhh qniaa. Jidlo an' lak lxauu vniar qaur id lxauu byy hiyh, dirr mngcuir jiacc tingg vo, duarkuir iauxx be hur cuanw, veh lxauu qodnuax kia ee asangw suacc ham' langg' jauw byy qangg hiongr, gnirpnir beh ciongx duiww laudingw .kir.
"Guanw daux ee Neko dirr lairdew. Byy kir qra py .cud .laii, ix e hro huew siyx .siw!" Taujangx vehpuw, asangw bin iux bin qad.
Byy sigsai junw duxhyw, druar dirr laudingw :ee samvutgorhau dy' siy' duw e diyc. Jitt cud byy bixzinn kacc kyxsiongx, niauniuu si juxqiyh iarr diyhh pacqiur.
"Neko! Neko!" Jyr jit kuir vniar laii qaur xui, cuir qor decc krox niaux, simqnuax qycc kuawlu huexciux siyx qaur der.
"Ngiaux! Ngiaux!"
Tniax diyc niaux-aw decc hnix, hex qiyr-sniax dyrr bersux langg decc hiamr qongxx, "Dirr jiax! Guaw dirr jiax!"
Qongqyw buanxjai, juixlingciax iarr duxx qnuaw qauwui laii beh pachuew. Jap-zi lxauu kiarqex ee inxdenrsnuar siy' pah den, siyw siyw huexcnix tnuar qaxx venr iam huew jit pxenr. Hyw did qajair, druar duiwbin dongr :ee jid'err huatqenr, jiksii qongr denrue tyw qiuwvingx, qui' dongr lau'axcur byy langg diyhsiongx, huew iarr byy siyx quer qingx.
Quer liauw sii, suah liauw dai. Huandngw lexvair, asangw laii longr mngg, ciuw nirr py niaubii, jit xui siyxjiaw qinduer dirr ix aurviah.
"Jitt xee guaw ser hanr jaboxqniaw, jitt jua juanqangx an' Bixqog laii beh jriab guaw kir hiax iongw laursuee, Neko iarr beh jywhuew cua .kir. Guaw beh qra guaw hitt dongr cur hing :liw. Beh suer, beh bre iacc qaqi kia, longxx jairr liw cuxdir."
M si suatciongr qongw tentyc, laurbuw buew qxur suah, jaboxqniaw qra suewdnuax qapp soxiuxquanjng dingxdingw jiaxee jongw jah .laii, sui' beh jiyx lanw kir quewmiaa.
Liyc aw cutpunx tanr diyc jit qingx cur! Boghuix, ciurling'ee sniar sniar e imr juxlangg! Cauwduxkamw iarr si jit sueh. Hix-sit ding-pnar diyhh anwjnuaw jai'ngiaw kiw?
"Qig taukag samxsniu qex siongx nauxqinx. Jiac tenliongg, kax dac sit de dyrr benw huanlyw."
Sniu qaur jiax, ciurling'ee qycc qra cing lehh, ingg kax qniaa, siwqer bongxx gryy. Jit diauu qrex-aw qniaa iauxx bue taur, vorvinn, tniax diyc siyxjiaxlangg huachiamr ee sniax jiokk cnijinx.
"Cniuxqiab or!"
Qiongqiapcat dirr dngxtauu-uatqag qapp lanw siy' prongr, duxx cniuw .diyc ee ginvaux-aw lag dirr tokax, tuatsinx iauwqinw m qnaw kiyh. An' lanw ciuw nirr qra ginvaux-aw jrih .quer hitt diap, qoniuu-aw bin liksig, qui' senx langg gihgic junr. Dairjir quer kacc byy vnuar dxangx, guaw qapp ix sianglangg sewiog qau'ngua ciuxjiw. Aiwqiaux ee sinniuu crua zip mngg. Jre huelingqix vuex kir Bixqog iongxsiam ee asangw lauu hro lanw ee cuwqingx iarr ngua jit sux sinx snxax, u dingg dniux qingqeh. Qiap'anr, diyc huew siyx, dew dew siqanx lai jongw hro lanw duw .diyc. Ree-aw ee qonglyy duw tnix, m hyw tickiw. Tauu laii buew kir, jyr jit kunr duiww kanciuw sueh hunbingg.
"U vundniux :ee u hokkir. Ree-aw qacc e henxingr, lanw diyhh qinw quewvnuaa, hyw xe did .diyc .ee jiacc siuw e diauu."
Tniax bow cuir, dua huwquir, hongwqiamx, aiwcex ee ue jamxzenn aw u dyrliw.
"Ree-aw e zin langg, m hyw lamrsamw hing :langg."
Dingw ciuw dinglingg ee ue u dirr simqnuadew lauu .kngr lehh. Dngdecc suniuu diyhh anwjnuaw vaiviw, puekax laii decc cic denrlingg. Iuqnia qaux :lanw, jauw puex :ee autobaik puc lehh jauw .kir, lanw jiacc huatqenr diyc qongxx cok si vnuar dxangx jingg dngr :ee, puex itdit qaur henrsii jiacc qauwui.
Puelog liah kuix, lairbin u jit dniux qozi'ngi kuix ee vindnuax, qimgiac snax-bxan sir-cingx-go, qiawhur ee langmiaa qapp lanw qui' siwlangg decc ing :ee jit zri dy' byy jingcax.
U ngiu tranr ngiu, duewkuanw si siaur, denrnauw kuiqix diyhh kacc qinw. Sesnix-enn, juxlangg-hog, ree-aw ee herlyc u jur dniardiyc iarr qnaxx si.
Diqiw
Sinniusnax quaww sinniubang-aw iong qorr snaqingx-aw qringx lehh quir dirr viacdow, qui' sux vec suatsuad. Imenlo d.-dakkap-k., ngwbang hongho jaw jit kxig suacjni. Qriuu qriuu kap kap dniudanw diyc jit xee tnix kacc lrang, sinqewniuu qinaxzit diyc qaur lanw jyr. Omidohut!
"Sensnix" jingg guec lyhjongr. Kensimx-ken'ir uirr songqax koxsiongvix. Simqnuadew ser aw sniax decc uirr qaqi huah "hyw did qajair" marr si sidjingg. Langg siw bak kreh, jiauww gxiac, cuir qapp jic iarr diyhh dnia .kir, byy jaidiau qycc cud uersueh. Vir bat bat ee sulo dnaxx jaikiyh :ee, poxtenha jriw cunx hitt xee, byy derr zi xee.
Qesitauu virvan jiaujngg, juaxdyx, huexked-aw qapp suatiyx, cinwcaiw qalauc jit qnia dyrr u kiamwdiamw, be jniurjniar. Qex jit vaiw si qex dapdaiw.
Vorvinn byy jit xee kacc dniardiyc ee jursow, qycc iarr byy ciuxqix-aw, quw byy siy' cue, dng' jitt jeh ix qiawkax dirr dycc jit der, limsii-lim'iau bongx byy snuasu.
Kacc jaw ixjingg qik dacliap hitt jun, snax~nng qangx aw dyrr duiww ix tauxvangr jit quaw simlairue si jiokk suwsiongg. Bylun amwiu iacc tniqngjaw, urpa iacc oimqnuaa, vixqauwdig, jabmoc iacc jybun ee sii kir cue ix qaxnaxx u kacc siongg. Siongrr suacbuew vaiw siy' qnir, pow pow aw e qir did hitt zit ciuhongx qnuacinr. Uermngg jid'err kuix, busoxvutjir, byy-qimr-byy-qi. Qapp ingxsiongquer byy juac, tauu jiww buew, lanw qongw byy suah, ix diam diam tniax.
Ix dauwdew bih kir dyc'ui? Cur-lai lenpenr ciaux lenpenr hiaux, uat tauu, suacc knuar qnir diyc ix kia dirr lanw kajiah-au.
"Quewkir jex sxor jap dxangx, liw sitluann, sitjir, simrjiww sitlyc jiwqaux qapp dongquthik, guaw dycc jitt vaiw byy dirr liw sinkuvnix vueduer liw qaur qaur? Qinaxzit, liw simqnuax jiacc longdok, jit qix dyx qapp jit cog aw huew beh jiong' jitt dnxua jxingg cuxquad. Hiongsimx jyww liw. Guaw narr jyr qxuiw, itding e dngw laii cue liw tyw mia!" Muaw vxag ee uanwhun jyr jit kunr, aurciuw ix qycc quaww hangxhig.
Kavo hairjai, unn aw qniaa uaw .kir. Duiww ix qongw simvag-lai ee ue dyrr kyxviw suh kongkir hiacc jurzenn. Jitt diap qapp ix bin duir bin, simqnuax dur lehh be cinglongw, lenrr cuanw jit xee kuir dy' m si srer.
"Pinn pinn uad uad jidlo vecqia, quer vunjuiw, taujingg knuiwuac qniaa, zidtauu qngx ngiarngia. Bagsaiw dih dax, huicjuiw qendangr, qimzit, 'voghing' si gunw ee miaa. Vniawdng vangr jinrvong, junw u ohunn dah tnix; kuiwlat jin vniar, dinr lo ee jiyhtauu isuaw. Qycc kir, siong'iyc benw cuann, quaiw-aw hniwqak. Bylun tendongg iacc dergak, diqiw ar, sunrqniaa, viwbit jit tong qapp liw jywpnua."
Ue qaudair liauxqed, ciuxtauu ee qesix gniauc gniauc drang. Byy jaidiau duxciuw, ix quwjai lanw taii, iujai lanw quah. Sinsix huesihetqaiw kiyh kiyh jyr jidhuew, huew diamw dyc, juaxinw jiurser danr .cud .kir u sxingg jit qix huexjnir. Iam pongrpong ee huexciux uadd zuxx siyx uadd zuxx dew .kir, buexciuw qiux qaxx byy jit xee ngiaxjiah, huar jyr hux jit renn dyw dirr tokax.
Gag'imx byy-ngiaw-byy-jiah
Jit der hiyczuac jinwjingg cutsngg ee CD, Beetoven Derr Go Qauhiongxgak, siogmiaa Miarun, dui' Taiwvingg Xngiuu hitt vingg jre huexenjunn laii :ee. Zidvyr qapp jabjir binrdingw ee hongpingg hyw-baiw camcab samvutdingw, uree si ylyw birsi, mraxqycc, qra hiamm qnuax hiamm qen pruex qaxx byy jit der hyw :ee iarr muaw siwsnuax.
Dngdongx Beetoven duw diyc Pactic'axkor
Viaudee jin' ngiaxbak, mrqycc m si congwsinx ee siaxhuad, siaw ee langg si ingxjaw imgak-hagngi ee jit xee dongcongx. Qyckacc byy, iarr diyhh vuah nng~snax hunjingx qra jitt pnix ngiaw .quer.
"....., byy Aujiux hitt kuanw iuwzi, iarr byy Rusia ee crenx. Samu Jig :a qamxliam dingw dingw sewqiw jitt xui cauwhnirlangg imgagqax, jitt vrangx, inx jiong' hongsinn-kuir iamxsinx siukngr, juansimx-it'ir beh uirr Miarun jyr nng-vah huer ee snezit."
Vnivnii Derr Go Qauhiongxgak, cur nirr u Vienna qapp Berlin nng dui gagtuann ee CD, lingrgua qycc u jit der si siyxmue qurnii kir Aujiux jah .dngw .laii ee duawciuw. Sinx cud jitt der Bixqoklangg enxjaur :ee byy brew .diyc be jiac be kunr. Junw baiw liau, sir~go-vah kox quewgenr marr simx guan.
Miarun hunx sir xee gagjiongx, si koxceh qapp siongvix, iarr u gigaii, cutbuew iarr beh qniaa hiongr qongbingg. Cur nirr guandew hitt snax der narr qra cniaw .cud .laii, jit xe ciuw sui' cic duiww derr sir .kir kacc je, hranw did vintauu tniax kiw. Sinx brew jitt der, snesingg rair taubuew tniax ix jraur jit vxenr jiacc qongw erdid quer.
Dirr kectniax ee pongwiw vnuar tnedyw. Bagsarsi, sinx brew ee CD juah'imx jauxjingx. Liaurqiyr qaqi decc hambinn, bagjiux vreh qimx juwsinn tniax. Miarun dangsii u jitt dnxua?
Qu :ee hitt snax der qinw qra ciaux .cud .laii, jingg tniax au tniax, langg' inx dagg der dy' jingwsiongg, ham' qaqi ee qiwdii byy juac. CD ee qanxqair longxqiong snax bin, tong' pnxix u congwjokjiaw ee vingsingx, iarr u jit xui juandoo decc qaiwsiaur gagtuann qapp jixhuix, gagkig ee kaiqaiw taubuew beh nng bin siaw qaxx bat bat si, suacc cue byy jit zri vnuar qxur kyxiw siauduu lanw muaw vxag ee gigaii.
Qnuaxqinw laii kir banglo-dingw jacaa knuar, ciaucue ee zirbin hat dniardiyc dirr 'Beetoven sinx cue .diyc ee ciuxqyw'. Jnia' bxan diauu ee snuawsyh, byy qaxx jit diauu ham' Derr Go Qauhiongxkig u quanlenn.
Qamxx e si CD decc siyx ee sii cywdyx, cid :ee qa'ngg draur duiww veh :ee .kir?
Cur nirr jre be diauu, ciax sraiw lehh kir qaur jit xee jiwqaux inx daux. Qongw marr decc qrii, qangg jit der CD, jinwjingg dirr cur nirr tniax diyc hitt dnxua suacc qui'ee byy .kir!
Mngqngxkangx kiw pongr, crinr qnua amr amr aw decc qig. Cello byy jah .laii, langg' daux ee dangsnuawkimm quewkiaur. Qiwjaii jairlaii byy hyw, imgagpow siyxkuaw kacc dngg dyrr qir be diauu. Duxjiah dirr cur nirr tniax diyc ee gag'imx, jiyh piano dirr jiwqaux ee langkectniax qycjaiww hiangw kiw. Jap hunjingx kacc quw, jurr tauu jiww buew itliusuiw, byy jikdauw, be kee kee.
"Kaksit u Beetoven ee kiwbi," jiwqaux naxx qongw naxx dimr tauu. "Vyh si dairsux tokbang, jairsnix be hur jyr ee qauhiongxkig, rair liw ter ix uansingg."
Dner kenn ciyr, byy inwue, qex qongw, pacsngw cuir u nia.
Hna cud jiwqaux inx daux ee hordingrtauu, simsinn viw did laii ee sii iauxx kacc zuu. Vniar kir cniuwpniwhangg, qangg kikbak qangg qongsix cutpinw ee CD qycc qra qauquanx jit der. Vniar dngw qaur cur sui' tniax, jit vaiw qycc jit vaiw, byy dyrr si byy.
Suanlut jinx ~ ~, beh qongw si huanwqingw iacc binbang, jex ue hen dyrr be tongx. Zit srux xia sniu bersux decc vnersniusix, dna' tniax quer jit vxenr ee imjad an' CD lairdew siausid .kir, suacc dirr taukag-lai snix qinx dingr diauu, uadd zuxx sniu, uadd zuxx bingg. Henn-aw jnriu ciuw bongxx vaiqaiw utbun, ursii qra jraur kuair vxanw, ursii si legado, tiau'iwqor venr ban ban. Jit~vnuar vaiw aw ciuw jen, jitt xee imjad qex jit imx jngtna, hitt xee imjad qangr jit kxiw, qiboo jairdew, kacc anwjnuaw venxvnir, iujai simjniaa kansingg :ee guanjai si gag'imx.
U mii byy zit ee 'sniusikig' an' lautangx vuex .cud .kir, cuwvnidaux dagg hxo longxx tangx tniax .diyc, quewlorkeh diyhh unrkir ~. Ah-aw tniax luii :ee ingxingw u, hang-aw-lai :ee laii decc longr mngg jiacc si hihanw.
"Liw u cuwbi cud CD .byy? Guanw qongsix sniu beh qapp liw ciamx kewiog."
Jit xee lexvair jaxkiw, cniuwpnir-qongsix laii decc cic denrlingg. Ex beh jnia' qywguec ee kikdiau, bagjiux vangr kreh kreh dy' tingwhyw jraur. Lirsunn ee sniasor qongw dnia, beh lok'imx ee sizit sui' ciauu. Qongsix jin' jiujir, qniax beh log'imx :ee dirr lo nirr sitqakcad, gagkir u simxmih banrvutzi, juanling pair jit daii limosin laii jair.
Suqix naxx jit junx vuii Bilik, hyw ciywsinn qycc kunxtauu ~, cello jrih quer ciuw, jiksii qra andah dirr aurviah jxy. Ciax kixqniaa, imgak iarr hiangxliang. Jid'err tniax, jidsii byy sinn .kir.
"Jex imgak dyc'ui laii :ee, CD iacc radio?"
"CD a." Suqix dab.
"Jitt der qauwhiongxgak, liw ee?"
"Dangsi'aw jitt hy kuanw imgak dyrr qiyr jyr qauhiongxgak or? Marr m jaix mih langg ee. Ciax-dingw qanda' kngr jitt der, iarr byy vadd der tangx qingw."
Vaiwtog suqix duarhniax qinw qra CD tec .cud .laii. Sir luiw bagjiux jingg knuar au knuar, sowbin cringx cringx, byy doo iarr byy zri.
Jitt tangr byy qaur buexjam, vnuar diongdngg dyrr lyc ciax. Tnix srad srad. Tanwjiac-qesix qnrua lehh, huantauu dngw cur jiacc si lo. Qimx siux, lxauu tiah, byy jiauww iog qniaa diyhh vuesiongw. Qamguan jnii liauw, tanr jit xee unxsimx kunr kacc quxdngg.
Gagpow crig hro jejingw hyxlew hyxlew qra sreh zip kir ticqui, qnir qongbingg ee zidjiw simxmih sihau? Danxtai imgagpow ee juxqongx dywjow vacnii au.
Hiwcud
Qavix-xoo u kacc qurlyc, duxx juw hyw ee qavix, daixpangx jiauwguann. Danr nng liap qaktngg zip kir qavix-vxuex, giaa jit qix tngsii-aw unliauu aw la dinxdang, siyxkuaw kacc lianglingw, jit cuir byy tingkuir limx hro sihsunn.
Vywjuaw henx .kuix, derhngx qapp siarhue-sinbunn darsingx tak. Suar .lyc, ham' qoxci kacc u kangai ee siausid iarr diyhh ngiaw .jit .xe. Qewdat sxor jap bxan ee qoxpiyr sunwsig venr qoxjuaw si u jinsit ee qowsu tangx jyr qingxqair, m si decc qongw bangwgah. Acc narr ngiaxcnix, quacnix qapp jingwdirqair :ee, inx dirr sinbunjuaw soxx jiamr ee vanxbin, siqanx liongrsing jiacc bongxx knuar. Langg-simx qeh dorvag qiamsir decc yh liau, qex dir jit xee qaquanbin :ee zuxx kacc benw qongw.
Qavix byy qycc cud enx, vxuex-aw iauxx siyxkuaw unsiyx. Dnitngg jerdew byy rngiuu. Tngsii naxx la, vywjuaw naxx knuar. Iurqycc u ginhangg diyc cadtaux! Jit-cingx-qauw-vah-sir-jap-cid-bxan, jit xia byy .kir!
Mngsyw hyw hyw byy sunxhai, vyxjuann sised qaujiamdingr, u puer syxsii sner Goo ee siongliw sitjongx .kir byy-siau.-byy-sid. Qingxvo cud huexvaii, ginhangg iarr quatding beh cud sniuxqib, vaiwcniaw jingwlangg draur cue Goo Siongliw.
Crenx duxcenx, ciang duxciang, jniawqangw hiwvnii-dingw u hitt kuanw langg, hiwvnii-kax iarr u hitt hy qiycsiaur. Siarhue jiongwsingx dngdecc vnuaenw ee qxow uac lingwlingr, siaw kacc byy sir hxun id ee siyxsuad kaidenw qaur jiax sngr byy hohamr. Tanwjiac-nguaw qra qiyr jingsinn, zi-jap-lak kxiw jap-jee-go-jngg ceiong qaur diyc. Hiwbunn vaiviw suacpah m jniursngr, kauxvec iarr diyhh suixkuir jiacc e qnir did langjingr.
"Inx jit xee qinx qinx, jit xee kacc buxtunw, longxx hogbin qycc qruar ox zinn bagqniar, pni bak cuir snex jyr sniaw kuanw hro langg' knuar be diyc." Kakaur qapp ciuxsyw jiacc tauw .kuix, jongxvan bin cnex sunxsunw, qui' sinkux kehkec junr.
Qowsu derr snax jniux siusiah dniardiyc, erdauwvox jin buexsaux. Cnriu diamwtangvangx, jit qangx ee sittauu qauwgiac. Sec bangrlo jyr girniu tuiwngua simjniaa, denrnauw ee sexjixtangx qra diamw .kuix.
Goo Siongliw cue .diyc .ar!!!
Uree bangrjam siaw qaxx dua dua zri kngr dirr tauu iac, uree bangrjam iong jauxbexdingx, kacc je langg tak ee qipvyr, jiangwsii vaii tauu kxamw :ee dy' dingxquann jitt diauu.
Bixniuu dngrr sud, dirr cauxvox-aw-lai ee kangx cuwqingx qux jit mee, virr cuwjuw huathen .diyc ee sii, ix tong' sinkux ho'ngg driaux linghee. Qongw diyc pnaixdoo, Goo Siongliw bin liksig, qniax qaxx gihgih cuah, bagsaiw damm bagqnii.
Cuir dax naauu kuah, cur-lai byy qnuaa byy lingw, langg suacc itdit paccinr. Jex taubuew anwjnuaxngiu diyc? Qowsu dnaaw venx qaur hiax, taixtyw anwjingg jiauww lanw ee qiogjingg decc qniaa? Siyxsuad hen dy' iauxx bue huatviauw, cutvanxsiongx marr m bad knuar .quer, jex sewqanx duliauw qaqi, byy langg jai'ngiaw luerdiongx qiycsiaur simxmih kuanw xee.
Suacqangx .kir .ee qycc qra qiyr dngw laii jycsid. Vuic diamwtangx rair siqanx, jap qix jingxtauu-aw danw denrnauw kuiqix danw qaxx qiongbeh byy nairsingr. Narr jiauww guancox ee anwsngr, jiapsuar .lyc .laii, jongxvan e ...!
"Linw nng xee duarsewsen :ee?!"
"Vnuar sngr si. Guanw kanx:ee jaw jyr sniawlangg .kir .ar."
"Jnaixaw liw byy kacc jaw qongw hunbingg?"
"Lanw jit diauu mia hiamw hiamw ho'ngg siux .kir, diyhh siag iambiw qycc cue saiqongx siuqniax cniuw hxunn, iarr suacc u jaidiau qor qaxx hiax kir?"
Huandiamw :ar, sinbunn diyhh tniqngbauw jiacc u cud. Giga muaw vxag vreh jnriu bincngg, iarr qniax iarr qitai. Je kuanw simjniaa capjab, ing'amr beh songxsimx kunr ingxx byy brang.
Anwjingg juan linwdngw? Goo Siongliw qapp cuwjuw si dongcongx!
Erhiauw sew bin benw je juiw, viaudee nng qxur dyrr jaix itcer. Bad tniax quer u hitt hy hiwdix, ngiaxhir lairdew anwjnuaw decc taii .langg qiab .langg, ngiaxhir guarkauw, ix dagg cud yc qaur diyc. Mrqycc, lanw ee dy' iauxx byy singjiu iauxx bue kanvanw a! Qamxx e inx cniar mosinn-aw laii decc taux knuar qaax?
"Guaw jnii tec quer ciuw byy laii kir hiangxsiu, suacc tec syh-aw sog qaqi. Jex jingliw kacc anwjnuaw vaii dy' be tongx."
"Dit liauliauu :ee snejniaa sniu be crunx. Siyw dngxuanx dngxuad .jit .xe dyrr tongx ~ ~ :ar."
"Liw decc hue dycc jit diauu dai? Guaw tniax longxx byy!"
"Rmuaa jiarr rmuaa vutsig, liw dyrr mair qycc qexsenx :ar. Au vnuar siwlangg diyhh qapp hingsu jauw siy' ziog, lakde-aw vaw vaw iarr byy tangx zuarr knuiwuac. Amwdiongx sniu qewsut, jitt vo qanda' puar puee, iarr benw lrauu hueh. Ginhangg cutsinx :ee, liw sngwvnuaa urngiaw gauu diak dyrr driyc."
Amwiu sisinn simlai qunxqiong, qarqinx qra snix .cud .laii. Byy jaw byy amr, qecdngw qangx ee zidvyr sui' cud siangsnix.
Si sriu ongxkud iacc dua cadqow? Siongliw qapp cuwjuw dirr qingxcatgee dng' bin duiwjiw! Taux giaa qoxjniw ee juermiaa, guan siw, m guan jiahzin?
Vywjuaw qapp denrsi naxx siangvakcingr, dagg qangx longwlongr qiyr, zuxx vyr qycc zuxx dua pnix.
Qapp cutvanxsiongx ciamx ee iokzi u duiwqii, guehdew jinwjingg siyxsuad byy jit xee buexqiok byy tangx denxan, qycc diyhh quixnarr jap bxan vuevow .inx. Ginpiyr liauw .quaw buhongg, jiac vitbuew :ee u qodak piah. Inx zuxx tiauqangx, lanw qan' qan' aw byy beh hro inx cingwir.
Uiwsiauxlew, be kamx did qonglun qiw qiw duc duc, Goo Siongliw qniaa dexlo, sniwmia limqib!
Vutbiau! Hiyh vid nng qangx byy siaw, siangsnix-aw didix suacc qra lanw ziog .quer byy decc siy' danw!
Sinbunn sui' zri aw qra tak hro jinx. Brew mia! Anwjingg huatdenw jidlo qaur jiax, ham' lanw guandew ee vowqiok byy juac. Boghuix, inx e tangx liac lanw ee cun'ir, jairjaw dy' jaix lanw taukag decc sniu sniaw?!
Sinkux kiw qalunxsunw, tauwsiwlangg m bad jiacc damxhann. Jitt kuanw tongtenhiauw, dauwdew si'angw decc tiux au snuar? Iurqycc, inx ee bogdig si sniaw?
Denrue giaa .kiw .laii, diyhh qinw laii vyr qingxcad.
Banrcniaw lehh! Byy-sinw.-byy-vinn, jin kyr jit qix cuir, qxuiw jiacc beh sinr. Qyckacc banrvuthing, dua juxqongx sniar sniar dyrr si qnuahuw vunxsinx!
Simsinn zuu cangxcangw. Vangr lecc hro kir sidjai be quer simx, criuu qinguann, lanw iarr u jikzim. Langg jiac jit diamw kuir. Surser qniaa qaur jiax, byy pacvyh qamxx e suah .did?
"Qimkor ee mngg kuix .kuix, guaw bagjiux sui' hro langg' iong vowdiauu ngx lehh. Inx dirr lairdew decc congr sniaw, lanw bersux cnimii :ee, qanda' tniax sniax, iong qorr iyh :ee narnia." Diaur duardangg :ee, jongxvan dirr vnercngg dyw tanxvnii, dingw kuir jriab be diyc xe kuir, ue kiokzenn kacc je quer niaumox. "Sinwjiyh byy quer, bydangr pasax inx dyrr laii bruw jitt cud! Sidjai u qraur uanongw."
Siyxsuad suacqiok, v.-vingsun-s. qra liauxqed. E-be jin jitt xe, qniwjindniux diyhh dniudanw bingjaw.
Jnipiyr suaw xui, tauu qaur buew dirr qimkor byy lirkuix. Byy cniuw, byy qiab, byy tautec, qoxboo snax dxangx, inx liac Goo Siongliw cutjuiw suah. Langg vingww jauw kir qaur haixqag-tnivnix. Jing'iuu-kixdir, dogdok vowde lairdew ee jit dniux zirjuaw qongw tauwqix.
Ciauhuann qui' amr, simqnuax jniu iac'iah, byy kunr qaxx jit diamw binn. Siyxvnuawvox, vywjuaw knuar liauw vangwhed, jinw laii vow binn jniawdngsii. Beh ansui, jit tongx dernue byy kar be dit.
"Jin' sitlew, jitt pnix siyxsuad rair sit'iog. Jnii, guaw qamguan cerdauu."
Diwsimx-diwhuih ing'uii, qui' vnuar dxangx ee qangjingg vangr juiw lrauu. Jnia' vah iac ee siyxsuad qui' jriw danr zip kir zirjuaxlangw. Sniu sen, dirr sngqui qux beh jit nii ee luan'air-qxow, kacdingg aw dyrr qra tec cud laii tewvingx.
Ongjuw Mi
Ziddaur-au cuir saii, qniaa kir qaur junkngr cuiwjiahmic ee "huewcngx", jiax ciaux, hiax hiaux, huatqenr diyc lairdew iauxx jit vaux "qiuwsimx" byy ho'ngg jiac .kir. Kax mew ciuw mew sui' tauw. Iong vro :ee, longxx benw puer qunxjuiw.
Daiuann jairde m bad cud quer hongder. Ongjuw Mi jyr siwsiur-aw, sxor jap dxangx quer byy tewsii. Ciu dua jiac hongx. Byy qangg vaijuw :ee e laii vunx qongvniaw, quiw nii aw quer, sinx ee kauxbi jerjiyw iarr diyhh sag, kecmngg jiacc e qejingx. Jingg:a byy zuarr quw, haixcair :ee jiacc jniurci, qinnii qycc cud uasabi :ee. Qycc m na anxnix. Uirdiyhh beh qex sna' snriaa quaw kectauu laii qauquanx, mi lairdew uree qycc diamr jiongxqimx. Bylun snax-vah go-vah iacc snax-jap go-jap, qamxaxdiamr tingww hen duirngua. Tauu jiongw qongxx u jit-vah-bxan, jingcax jitt diauu jnii, dandanx u hokkir m sngr si, iarr diyhh u qraur jingqongx jiacc did e diyc.
Itdingw id ee hyw jiahmic jyr jit cuir gab .lyc .kir, siangx ciuw hit lehh hit lehh, srid jimjiog, suacc dac diyc ngqimx.
(buxbak sna' liamr ciuw: siangx qruar bew, e liauw be li)
Jyhzid'amr tauw jit vaux haixcair :ee hro cuir e dinxdang, vnuar koginn dy' byy diyc, dogdok qah jit dniux naxx ciamsix ee zirjuaw hro langg' decc huir simjniaa.
WHEN THEY KNEW THE SEX OF THE BABY, THEY DIG A HOLE. SIX DAYS LATER, THE QUEEN WAS SHOT. THE KING HEARD THE ZIP OF A BULLET.
(buxbak sna' liamr ciuw: qangbuxduir, ongg qenr hen)
Pizza kauxbi :ee, ciamsix cuann Inggiw :ee. Jid'err jaikiyh angngex-aw javox iacc jabow, inx dyrr kir ow kangx. Lak qangx au, onghiy ho'ngg ciwkig. Qok'ongg u tniax diyc cingr-sniax. Zircaix cud qaxx bersux cuiliw siyxsuad, lanw liaursngw si singlixlangg ee cuttauu. Dongsu Siongg .Qyx gauu iyh bxi, hingr ciccih.
"Hex junxdnia si kangx kag vniaw, uso, byy ngiaw byy jit jiah :ee. Mair qycc qig taukag sniu, bycaiw qangx lar!" Dongsu Mermee gedsed qongw sanw ue.
"Uso qaax?" Siongg .Qyx :a dner cinwciyr. "Kacc sitlew hnoh. Jitt diauu zircaix u amr kngr jit jxox huan'axbexzi. Siyw .langg vutjaii, it'id qra knuar tangr .quer .ar."
Naxx qongw, Siongg .Qyx naxx qra ciamsix tec cud laii dangdiyh.
Duiwtauu gro! Qxauw kir dix laii, dah puar nxng, vreh jnriu jaur, bagsaiw crid be li.
(buxbak sna' liamr ciuw: Lymaw cniaw jit vnix, Arabik qonglyy kacc dua tnix)
"U ngiaw .qnir .byy? Jitt lairdew ee 'gro, qxauw, nxng, vreh, crid', jitt quiw zri ngua jyr siyxbew kiarr '59287'. Guaw decc iyh, jitt jxox hyrbew vycdnia tangx jo guaw kuix vyxhiamxqui, byy dyrr dycc jit daii u cangr jnii ee qekir. Qinsiok, jit-vah-bxan si ham' guaw zuxx laii zuxx qinruaw, be dingdnaa."
Siongg .Qyx vo vo aw kaiqaiw, jamxzenn aw kuiwtauu.
Qxauw sniu qnir diyc qauw, nxng kanx kir qaur nng, tenliongg qongw, sidjai u gauu. Huantauu sniu, 59287 junw jniawqangw hro ix iyh qaxx duir ~, cue diyc syxsii, syxsikangx m jaix dirr dyhh marr byy kacc juac.
Qongsix dirr Dikdangx, vingsor vaiwid qaur vaiwgo siongrvanx. Jitt guehzit duarguec, dongqangx, lexvair rair vaiwtog Mermee qavanx. Ix druar Diklamm, lanw druar Dikvag.
Zit lyc srinx, sittauu bongx suah, jitt jun beh jiac amr be hiamm jaw. Jit qingx hy qiyr Dig-Sex ee kecqax-cantniax siongrdingxguec sinx kuix :ee, vorlenw jap lyc hunx aw dyrr e qaur. Qinaxzit laii kir qra qauquanx, an'iongw Mermee jniawdngsii.
"Liw aurviah hitt vxag doo, m jaix sriok dycc jit liupair? King byy qra rue kiauqux, suacc kia qaxx dit ~ ~." Mermee cuir qongw, qycc iong ciuw viw.
"Qok'ongg dirr dyhh? Iarr byy knuar .diyc." Guaw uat tauu siwqer siongr.
"Qok'ongg?" Mermee lig bagbaii.
"Liw duxjiah m si qongw KING?"
"Suacc si! Guaw qongw king, RAINBOW."
Jit qxur ue jiacc qongw suah, Mermee cuir-aw kuix kuix, hionghiongg "ar" jit sniax. Liauxau, ser aw sniax qaqi kauhkauc liam, u singg decc qongw Inggiw.
"Bogquair qongxx ongg qenr hen, urngiaw dy' king ee imx siongrqaiww bingg."
"Liw si decc qongw dycc jit diauu dai?" Bongx byy snuasu, duiwcuir mng jre dirr siy' duiwbin :ee.
"Ongjuw Mi a!" Mermee rinr qaxx jiokk hyxser.
Jaxjingg bad quer huanx quer qiamm juiw, Inggiw ee ciamsix, Mermee uadliam jit vaiw hro lanw tniax qycc sinrsuar huntiah. "'SEX, DIG, SIX, KING', jitt sir zri Ingbunzi duxhyw ham' lanw Daigiw 'sex, dig, six, king' sner jyr qangg jit ngiu. Guaw jiacc decc sniu qongxx tacc e hiacc qrii, bicaix qycc cud Inggiw :ee? Dangsii aw qiquanx jinjniar cangr dirr cngkor!"
Sianglangg dangjee qra hiaxee zri johap-vaivet jit kunr. "Dig-sex king zip six", jiyh Mermee ee cuir jiacc snix cutsir, lanw jiksii uat tauu, qra doo siongr hro jinx.
Qexsag Dionghuaa, huedngw Daiuann, qyqyy jiongxjinr cuttautnix.
"King binrdingw u kig zri!" Mermee uaw laii decc draur knuar, hnuahiw diyhvuac.
Qinxqib-siiaur, ciuxqix-aw ciongx dairsingx. Kacc byy jap hunjingx, Siongg .Qyx kiaa odobai qnuaw laii qauwui.
"Dionghuaa qapp Daiuann qeww ginhangg ee miaa. Diyhh Daiuann :ee jiacc u vnuaa. Dionghuaa :ee NO sud." Duarkuir be hur cuanw, Siongg .Qyx qongw qaxx syr simx syr qnuax qongg pniapniax, jit xee bin angg qongwqongr.
"Liw si qongxx, hex jit-vah-bxan qiar dirr Daiuann Ginhangg?" Mermee mng qinw qinw beh tniax sewsiongg.
"Acc byy, iauxx u simxmih kuanw qaixsueh qyckacc zip jingliw?" Siongg .Qyx qongw diyc hairjai hairjai.
Cair iauxx bue juw sik, jauxdyh :ee qra sir-siyw-nguaw sangr .laii, sinrsuar qra jit hur nguaxdi kngr druar Siongg .Qyx binrtaujingg.
"Inx jitt qingx u decc duiwdiong kuanvyw oox, qycc erhiauw iong tih-di." Siongg .Qyx qongw, jit siangx di giaa decc lang. Jitt dxauw, diyc lanw decc dua cuir kuix kuix.
Qinxmew qra jauxdyh :ee qiyr .laii. Jauxdyh :ee tniax lanw qongw liauw, bagtauu qag qad, uad lehh qniaa ngr jauwkax. Jairjy nng xui dongsu bagtauu uanaxx kiycqingw. Byy encenn, indnuax-kixliw, lanw sui' duiww inx sueh hunbingg.
"'Siangx qruar bew' si zirganw, qangg hiaxee zirbyw, an' jniawvingg tak iacc dywvingg longxx u zirir. 'tih-di bag cad' an' jniawvingg knuar dywdngw duxduxx si 'dac, gab, id, hit' jitt sir zri. Jin' kikiaux, guaw jaw dyrr qra knuar cud cud. Kiamr jit xee kacc uanjingw ee kingkag, lanw m qnaw ox dnar vec dnar luan qongw jit vxii." Qongw qaxx cuir dax auu kuah, inx jit qxur vnuar qxur ylyw ee ue dy' byy, huandngw hiamm lanw qumosinn dair sniu' dang, hiamw hiamw gro dairjir.
Danw .u .hiacc .quw, jauxdyh :ee zibuexciuw byy laii. Ciuw giaa jit kax di, tauqelangg cinsinx cutdong laii decc vruee kxeh hongrgingg.
"Jitt kax di, cantniax jyrjog ee sii kir qyy diyc iucad, jurr anxnix byy tec cud laii hro langkeh ing. Marr m jaix anwjnuaxngiu diyc, jitt kuir aw vutsii u langg laii decc mng kiw bag diyc cad ee di. Jingcax qongxx inx longxx danzinn-dogmaw, byy cincniu linw, jit kunr laii snax xee."
Qaudair suah, tih-di jiyh gunw dauc dauc aw genxqiur, tauqex rair dngw kir byy ingg ix ee sittauu. Mermee hyxlew aw qra ix qongw jit sniax "anwjuwsex".
Bag diyc cad ee vorhun benw lun kiw, byy itvnuax tih-di ee qimqut, jitt kax bongx .kiw .laii cox vecveh. Snax langg lak luiw bak sewcad jaiww sewcad, siongr vnuar vox, sniu longxx byy zri, naxx cniurr jongg zip kir byy-buew-hang .kir.
"Diyhh laii jiyh jit qix hamwqniar knuar kacc u." Guaw tegi.
"Hamwqniar? Guaw u a!" Siongg .Qyx qongw.
"Liw u?! Liw jah hamwqniar beh congr sniaw?" Guaw mng.
"Jasimm vyxmic, byy jah qesix, byy singg jit xee kuanw." Siongg .Qyx dab.
"Jai'ngiaw rair jah, berhiauw tangx ing, si beh nii?" Mermee jin' qra lauwkuir.
"Acc dyrr jidsidig byy kir sniu .diyc." Siongg .Qyx pnaixser ~, qesix qinw qra cniaw .cud .laii.
Iauxsiu aw, qyxzenn byy cyr, di dingxquann jit qnrua zri hen ~ ~.
"U singg ginhangg ee siauwhy!" Mermee bagjiux lililutlud.
"Ginahngg siauwhy beh tacc u camx Ingbunzi?" Guaw jit sniax qra vog .dyw.
"Ar! Guaw sniu .diyc .ar. Hex huanrser si moxmih langg ee sinhunrjingr hyrbew." Mermee taukag uac, bak jit xe suac, iurqycc u juxir.
"ID? U singg dyrr driyc," Siongg .Qyx janwsniax. "Qamxx si qiyr lanw kir bangrlo ee ATM niaw jnii?"
"Si m si, iong ciuxqix-aw laii kir Daiuann Ginhangg ee bangriac, liammisii dyrr jaix su'ngiaa." Mermee naxx qongw naxx decc zic ciuxqix ee ziw.
"Hex qamxx m si rair amwbew?" Guaw qongw, siy' diamw siy' sud.
"PASSWORD dyrr dingw zit aw guaw vyr :ee hitt jxox a!"
Siongg .Qyx rinr diyc ingqaizenn. "Jex iarr diyhh qycc mng", buexau jitt qxur, ix zimw lehh byy qongw cud cuir iarquxqnaw.
Vutviw PC iacc vitqiwhingg ee kixvnuaa, ciuxqix-aw :ee qex jiokk ser kxiw, beh sangr zri zip .kir byy tangx hiacc kuair. Quaww zirbyw habqer jap zri ee ID sui' zri aw dirr binrvangx-dingw putauu. Jiapsuar, diyc qaur bidbew beh cutdniuu.
"Hnaa! Diyh'air lak zri!" Siongg .Qyx auw jingxtauu-aw. "59287, urngiaw kiamr jit brew."
Jitt jiongw gem pah sixvanw, cax jit vo, jit-vah-bxan dirr vuanwkongdiongx qan' qan' aw ba be diyc, simqnuahuew huanghuangg dyc, qiongbeh qib .siw.
"Aurviah qex jit xee go cir knuar mai aw." Mermee tegi.
"Simxmih kuanw lixiuu?" Guaw mng.
"Duiwtauu gro a! Qiamxcaiw lanw qa'ngg qiamw jit tauu .kir." Mermee jit qxur ue, taujingg ee lo iurqycc qnir diyc qngx.
"Guaw liahjunw liw byy air sinr." Siongg .Qyx vyr jit xe aw niauxcuxaxuanx.
"Sunzenn jyr girniu :ee qamxx bersaiw?" Mermee byy decc nngw. "Taukag u decc dinxdang, jiac lau kacc be laurte. Jex liw m bad tniax .quer?"
Beh dapcuiwqow tingwhau lingrzit, henrcuxsii diyhh singx cue diyc cutlo iauwqinw. Vixjai Arabik qowsu lairdew ee Alibaba huah "jimuaa kuix mngg", jitt jruw ee hyrtauu si "592875". Criah ree u hac kax, kauxjy lairdew duxduxhyw jit-vah-bxan.
"Lanw qamxx si Ongjuw Mi qongsix? Hitt xee jit-vah-bxan ee bicaix, guanw u iyh .cud .laii .ar." Hequx be lunw did sraur, Siongg .Qyx denrue suisii kar .kir.
Qnuatniax snesingg beh kiyh suewqimx, cunx :ee pac'unn jyr snax hxun vunx, qokk langg iauxx u zi-jap gua bxan tangx hyw did. Inx cniar huerqewsux jyr diqniwlangg, jiksii cud sinbunn, cud vngxbunn.
Ongjuw Mi Qongsix qiar dirr ginhangg ee jit-vah-bxan jiongxqimx virr snax xee langg ngaqab diyc .diyc. Bircaix taubuew ee itgo-itjap, dirr Ongjuw Mi ee bangriac longxx u tiacbingg.
Qecdngw zit ee sinbunn anxnix bre. Jit hxun vywjuaw, u lak luiw bagjiux dangjee decc knuar.
Qienn
Jyr ginxaw ee sii knuar quer jit cud ngiaxhir, qowsu si decc qongw jit xee an' vadd liap cniqiuu laii qaur derqiuu ee 'uahmngc', ix qapp jit xee javoginxaw an' siy' bad, siy' tniar, qaur vrag be li ee jit quaw lansanx cuiwluir :ee. Beh hunkuix hitt diap, nng xee juxqiyh kia sna' duir decc kaur. Dirr amwox ee hiwngi lairdew, pnirtauu sngx sngx m qnaw cngc u zuarr je? M jaix. Lanw u jairgiac dyrr si.
Hiwbunn si venx :ee, qyckacc qamxdong langg iarr qew :ee. Jiapsuar beh dramm :ee marr si jit xee derr snax lui ee siy' duw. Jitt xee qowsu, beh tanr langg ee bagsaiw qnaxx jnia' vniar lehh, jongw .si, hunlihyhud dy' j.-jinsit-s., m si haulak-haudag :ee.
"Liw... liw si langg iacc... iacc qxuiw?"
Co' qniwbin ee tauu jit qxur ue, guaw qongw diyc pihpic cuah. Byy cyr. Juxlang'ongx jniawjniar guaw vunxsinlangg, jitt jann quer beh jnia' jap dxangx :ar.
Dairjir huatsingx dirr Ulaix, jiwqaux snax~sir xee dirr jit xee hiyckunwzit siy' jiyx kir qad vowvnii, hiyh tnilo. Amwsii aw jingsinn kir cauxnaa-aw-lai beh siauxqaiw. Ziaku tuah hyxser dnax tauu, jit senx 'byy-singg-langg' suacc dirr lanw binrjingg kia.
"Ix' snex jyr sniaw kuanw hingjong?" Guaw jiangwsii junw qapp linw bin duiww bin, dingxbin hitt xee bunrdee vycdnia linw e mng qinw qinw. M jniaa ngii, m jniaa vniw, pni-bak-cuir jiaujngg, mrqycc byy knuar diyc hni. Siangx kax siangx ciuw, jit sxux qinxsinx-aw an' taukag vaux qaur kajingxtauu, qapp denrngiaw didulangg ee jngtna beh qangg aw beh qangg, dogdok ix tong' srinx cnikangvec, m si jabcyr hiongvalixlauw :ee.
Majolinsiham, inx cniqiuu ee miaa, li derqiuu qongxx u sir~-go-vah qngnii hiacc hng. Qodnuax xee sraiw huihingjunn laii lanw jiax cittyy, sngw suah beh dngw .kir, huihingjunn suacc vairbew be huad, hyxdnaw uaw laii beh qra lanw jiyh knuar u qesix siuliw tangx hyw dngxhuee.
Qongw qaur jiax, qiamxcaiw linw beh mng qongxx, "Uergiw qamxx e tongx?"
Kyqix dua huatdenw. Sinbunn u decc vyr qongxx, qehuew narr u, qycc iarr qamx kaix, vuex li derqiuu zip taiwkongx byy hanrdnia diyhh taiwkonglangg. Guaw hitt xui dirr cauxvox-aw-lai sigsai ee 'ving'iuw' uanaxx siauwlenqex, cur nirr vingg vingg aw, byy hyxgiac iarr byy sanwciah. Ix kir qa'ngg kanx jit jiah vnuarqurlyc ee huihingjunn dngw .laii dingg qycc huanx, siaumopinw cuann u qraur, uxdiu siwqer tangx iuu taur taur, mrqycc diyhh singx kaix quaw sukiajnii qiyr langg' qar ix anwjnuaw sraiw. Jitt kuanxngiu ee sngxhuad, qongxx inx hitt dah jitt jun vutjiw aw sing.
Uertauu kanx dngw laii qongw. Jit xee siauwlenn :ee qosinx-dogbew laii qaur derqiuu jyr langkeh, duw diyc langg beh anwjnuaw vixjiab, langg' ix jaw dyrr sniu ven ven. Sinkux-dingw vutquanxsii jah jit daii tangx hue'ue ee qesix, qenwnarr u qongxue-sniax, ix jingxtauu-aw zic zic lehh dyrr tangx jiksii duiwik, qongxx si tong' sewqair ee uergiw longxx e ing .did. Kyxviw qongxx ix narr dirr Huatqog landing, qekir dyrr qongw Huatgiw; ngua junw dirr Zidvunw, ix dyrr qra ciauu duiww Zidgiw.
"Liw beh dnic sniaw?"
Jinwjingg mng ix qamxx mosinn-aw si qorr Diongqok'ue qongw. Jit sniax vnuar qxur dy' danw byy, qanda' knuar ix ciuw nirr ee qesix lenlenn cic byy tingg. Pxuex sniu ix huanrser guarqog laii :ee, guaw dyrr qaiw iong Inggiw mng. Dnax tauu qra guaw junwbun .jit .xe dy' byy, ix iuguann qor vnir ix hitt daii marr m jaix simxmih kuanw ee cittymic.
"Kaur ve! Hyw-cuir-hyw-dauw, mng diyc exqauw."
"Guaw m si exqauw. Guaw an' vadd liap cniqiuu laii :ee."
Jinjniar hiqii, 'cittymic' suacc cud sniax qongw Daigiw! Diauw diauw u aukniux dyrr urngiaw.
Qacc Daigiw e tongx, guaw dyrr kacc hongwsimx, quanxtax ix dyclyc laii :ee. Jiar hitt daii qekir, ix taukag-lai sniu :ee, beh qra guaw qongw :ee, guaw jikkig dyrr jai'ngiaw, kiarr qekir ter ix inwdab dyrr driyc. Ix laii qaur lanw Daiuann, dyrr u qra setding dirr Daiuan'ue tong'ik. Si guaw qaqi qexgauu, taukixsingx narr qongw a'buw qar lanw ee ue, marr benw lecc duxjiah ciavnuavingw qui' vox quw. Guaw qniasimx, hai ix iarr qex byy ingg.
Dangpnua jitt diap dng' hyw kunr, pnaixser qra inx caw jingsinn. Snax qnxix mii vnuar, limsii-lim'iau beh dyhh cue qesitauu hro ix siuliw huihingjunn? Dongdudqanx, sniu diyc jitt jua laii jinwjingg, u juanqangx kir brew jit qix banriong-siyxdyx, tangx qrax, tangx qaw, tangx jngr, tangx jenw, iarr tangx ler, jiangwsii dyrr dre dirr lakde-aw-lai. Qesix giac jnriu ciuw, bylun jiamx :ee, vniw :ee, dngdux :ee iacc kiauser :ee, langg' ix lang diyc longxx jiokk quanwsik, lenrr qra lanw mng .jit .xe dy' benw.
Kangkuer suah, huihingjunn huatdong, diamrjing byy sniax, mrqycc qngx ngiawngiar. Duxjiacc sigsai nia, liammix beh siy' srii. Banriong-siyxdyx junw jyr qiwliam-lexmic, lanw byy qra tyw huee. Snax siangx laii, lak der kir, ix m si lanw derqiulangg, iarr bad jitt hy lexgii. Hitt daii duiwikqix, ix jurr anxnix dux hro :guaw beh hue zinjingg.
"Nacc hyw? Jitt daii sangr :guaw, liw qapp langg' beh anwjnuaw qongw e tongx?"
"Daiuann jinrbuew jam, qycc kir ee lo beh didtaur qaur cur. Au jua narr u qycc laii, beh air jitt jiongw qihaii, guanw hiax cinwcaiw diamwtauu qycc brew dyrr u."
Byy qycc qapp ix sewzi. Hyw hyw mic jrih quer ciuw, suisii venr qoxdongxmic. Ing be diyc laii qongw, juann derqiuu dna' jitt daii, hihanw ninix.
"Galu i dalan!"
Beh qongw jaiwhue hitt sii, jiacc decc suniuu qongxx diyhh et ciuw iacc ad ciuw, si siy' lamw iacc siy' jimx. Vorvinn ix suacc cud sniax qongxue, byy quer qihaii huan'ik, guaw jin' jaix, hex gnirvanw si jaiwqenr ee iwsur. Huihingjunn vangr dit cingwquann, dirr kongdiongx pacsec jit kunr, piux lehh vuex .cud .kir, limw limw aw u singg frisbi, derqiuu kixvuex, jiongdiamw dirr guartaiwkongx inx daux hitt vingg.
Quewongw vingw cud laii qongw, narr junw ue kacc pongwcniur, huanrser linw uanaxx sinr ~ ~. Kacc sux lanw jairlaii dy' pokdit, dangwjinx u duw .diyc, u knuar .diyc iacc u tniax .diyc .ee jiacc u qongw, marr jiacc qongw e cud cuir. Dycc jit zit linw simxmih langg narr ham' guaw qangrkuanw u jitt hy qienn, hitt daii duiwikqix iauxx siukngr dirr guaw ee ticqui-lai byy hed qak, tangx laii tec kir ing. Jiamrsii jiyh linw ing m si jingruw, iong liauw rair e qir did hingg.
Qik Cinx
Snix ix e kiw, nng langg siongrr byy cax lecc zi-jap huer, beh qongw qapp ix siangsnix-aw quatding byy vyh. Pni-bak-cuir ham' lanw longxx jiokk singg, byy qaxx jit xui pah qalauc. Qangg qongsix cutpinw ee qangvag hniadi dy' byy tangx jiacc qangg bin, byhqongxqiyh qang buw qycc ve iacc qang ve qycc buw :ee.
Bersux kir drng diyc qxuiw, dirr ix tagceh ee qokhau-aw hionghiongg knuar diyc ix. Ginxaw sewhanr kacc berhiauw zin langg, qycc ix iauxx m jaix qaqi duarhanr ee sindniux e venr sniaw kuanw. Junw jitt diap qapp ix dngtauu-duiwbin, qiamcaiw ix be u cnigii, how var sraix cnxiu iarr m jaix qniasimx.
Simwbuexau jit kunr, hongwdnaw kir qaur inx daux, suar .lyc .laii ee jacaa dingg liauw dingg. Ve-aw buw-aw jyr qiintew genxqiur sxor jap dxangx, hagsut-derui kia taubinrdingw. U jitt kuanw mnghongx, ginxaw e u simxmih kuanw joxqongx? Cuilun, liaursngr, samhuanx-gnoxhog, dauc dauc aw, lyy cexcew ee sewbin qiongbeh jercingx.
1996 nii, jit jiah ngiumee-aw snix cutsir jin kyr niulew ee qiinx, sinkudingw byy qaxx qix moo dih huih si laurve tngg hro ix :ee. Quiw nii aw quer, jit xee sniur ngiuu ee angngex-aw amwjni laii qaur sewqanx, ix ee sirduarlangg iarr qo' jit xee, byy cinsnix laurbuw, qanda' u laurve.
"Uirr beh pacqiur jit diauu sniwmia, unriong singbut kyqix, kopi sewvaux kansingg jit senx langg .cud .laii. Liw u janwsingg .byy?"
Jairjaw dirr dairhak tagceh, iokliok zi-jap huer hitt kadaux, bad u qnuahuw ee langg cue laii qaur haghau, diah miaa diah sner iongtog langg' siaw mngrqngr, qongxx si denrnauw kiyckaux, m si langqangx tiauqangx qingw :ee. Jit vunw jap tongw iac ee mngrqngr, mng liw hitt jam aw sindew qamxx u kongqnia, iarr beh cajaix liw taukag longxx drew drew sniaxhuer, qycc jamng qaur a'qongx a'maw inx hitt renn ee dairjir .kir, hmlangg beh qongw cinjniaa dy' byy mng qaxx jiacc dingxjinx jiacc diamxdinn. Sniu laii kiwdyr criuu qinguann, kacc anwjnuaw dy' hitt hxun mngrqngr laii kixdir siongrr duarbin.
Snedniux qangg ngiu. Acc snia'imx lehh? Qamxx uanaxx cancniu? Jit xee erqangxlangg qapp jit xee doci-ginxaw, imgiw iacc uerkniux dikkag u jingcax, hongwqiamx ix iauxx bue dngw duarlangg, unxdangr iauxx ginxaw-sniax. Bylun singwpiah iacc snejuer, jyr laurve :ee vycdnia jin' hnuahiw haursnix u jxingw diyc qaqi. Acc narr m si cinsniqniaw lehh? Dirr jitt xee sewqanx kiarkax dew dew jiacc quiw dxangx, dog'id byy duir, qokk langg qokk ngiu qamxx byy kacc hyw?
Acnng kacc bat marr u pang. Qacc nng langg longxx druar dirr Daiuann, jitt jann hro langg' jacad .diyc si qinxjuahban. Daiuann snuax quann, siwbin haiw dua, vnide jiacc zuarr kuah? Ix cinwcaiw jit xee ving'iuw iacc dongcongx ee sirdua, cokqingw ham' lanw ee vangtauu iacc pentiau lairdew dycc jit xee u siy' qewcua. Qycc kyxviw qongxx, huanrser inx haghau dycc jit xee sensnix ee angsair, cuicenx ham' jexdniu iacc muersair u sigsai. Rinx rinx daurdinn, siy' duw si erdangr diyc :ee.
Naxx cincniu jit liap vongriyc, dairjir vutquanxsii dy' e lauwvauh. Ix iauxx jiyw huer, kacc m jaix tauu dang. Qaqi duarbuxlangjingw, diyhh dairsingx sniu hro jinx, jitt jann bering did purcingr iacc vangr hongr hongr. M bad qra ngiuxci qapp cniadii, lanw m qnaw jurcingx si ix ee laurve. Ix lanw ee aurjinr, simrjiww dikcud :ee, jitt qxur dy' jinx duw jinx, sit duw sit, byy sniaw tangx jnewcuir.
Sniu u liauxted, sad sad, juxir hnua dnia dyrr beh kir jinwhingg.
Banrcniaw si lehh! Lingrzit aw, a'buw sniaw langg hongrsingg? Taulo qapp cuwkia liammix qra hetsag m dnic byy siongqanx. Jiac juiw jaix juixtauu, sirduarlangg unjingg kacc dua tnix, huah jauw dyrr jauw be quer did jingwlangg ee cuir. Acc qycc u lehh. A'jew qapp siyxmue-aw inx hiaxee ginxaw dna' jit xee a'qxu tangx qiyr. Hitt xee "sewhanr :ee" viw inx longxx kacc jiyw huer. Inx horsiongx jiqanx zirunn diyhh jnuaxngiu aw laii vaiviw jiacc e siwtin?
Byy air boxqniaw laii decc dnivnuar iacc qnuarquix, beh jnriu sxiab iauxx bue kixqex, byy-dang.-byy-diyc, hionghiongg vuh jit xee cinqutziok laii decc hro lanw sngxsinn! Tniqongx ciuxcingr, tiau'iwqor beh dri langg marr m tangx qaur jitt kuanw!
Jitt jann yh liuxlag, beh puewviw qaur u jit xee herhang m si cinwcaiw langg dy' tangx. Qaqi vangr, qaqi siux. Jiongqibuew, iarr diyhh laii ngr "Ix" cuiciauu kacc si.
Saikia'ue
(1) Hy Miaa Jnxiax-guec sxamx-id
Jixmueaxpnua jiyx lanw jywhuew kir yc denrnauw. Qanghux beh yc si byy dixjiw, dingw qywguec u he quatjir. Kywtingg qetsog jinwjingg, sensnix jaiwsnax dinglingg, qiyr dag'ee diyhh singx kir cringw jit qingx cuwkag, lingrzit aw tangx iong bunzi, siongwpnir iacc imgak knuax knuax aw jngtna, yc .diyc ee qirge kacc be snex sxenx iacc byy byy .kir.
Co' cud dongrmngg, u tniax saihu ee cuir, BLOG sincingw vaii taujingg. Bue snex qniaw, miaa diyhh hy dairsingx. Jiac qaxx jitt hy huer, hy miaa jitt kuanw kangkuer, tauwsiwlangg qycc si tauu jit vaiw. Haursnex lanw snex :ee, ix ee miaa iarr byy tangx diyc qaur lanw hy. Sniu qnir hitt jun iauxx dirr snuaxlai, ginxaw ee a'qongx jit dniux juaw binrdingw siaw quixnarr xee miaa qaudair hro ginxaw ee laurve, rair guanw ang'axbow qingw jit xee kir vyr cutsir. M qnaw qex qongxue, juntanr dyrr si. U tangx hro lanw qingxsuanw, viw did ixjaw ee sirduarlangg, daqnuax sngr u kaihuar.
Qxex tauu tii, simqnuatauu q.-qamdnix-d. iarr diyhh hiycqangx. "Sukia'ue" qinaxzit singx qongw qaur jiax, lauu quaw cuiwnuarjuiw hro vadd zit.
(2) Imensnuar Zi-guec cezi
Qaqi cuwkia iauxx bue cniaqig liauxli, u langwqangx dyrr sniu beh quewqex, vadd langg daux anwjnuaw jonghongg, cing'ingg kax bongxx kir qniadac. Knuar diyc simsig kacc u cuwbiw :ee dyrr qra jre kacc quw, beh byy, kixkax suaw laii kir vadd der. Qinsiok, bangrlo-zidjir je qaxnaxx sualeaxkag, qycc longxx benxhuir camquanx.
Langg si anwjnuaw sniu air qethunx?
Bangriac kuix .kuix knuar byy quiw jua zri, denrnauw sairhing m qniaa. Cuwjuw ee miaa byy qir dirr simx, bangrjiw lywlyr dngg qyckacc benw tee kiw. Qycjaiww kuiqix, sen' cue dy' cue byy. Siw qniaw quaix, jauw hii dua. Henrzit, simsimx-liamrliam, kacc sniu dy' hitt xee qapp lanw byy enn ee BLOG.
"Crua bow, snex qniaw; snex qniaw, crua bow. Lanw m si an' jiyhtaukangx vuh .cud .laii .ee."
"Acc hiaxee qui' siwlangg be snex, iacc byy air snex :ee, inx m dyrr benw vran qethunx?"
Jyr hniaqyx :ee hro lanw mng .jit .xe vniw cuir.
"Langg e qniax qodnuax, air jit xee pnua jywhuew quer sing'uac."
"Lanw daux hniadi-jixmue jiacc je xee, vutsii dy' laurzet qunxqunw. Qokk langg nihuer qaur, sui' xee aw kir qewcua."
"Hex byy qangg a!"
"Dyc'ui byy qangg?"
"Byy qangg dyrr si byy qangg. Lilyx."
A'jew tamluan, qruar lanw denrue.
"Kamxkyw-vnirtniar, huanrnarr langg, ingxingw dy' e. Zinsingx jidlo u langg siy' knuawqor, hongx cuex iacc ho lramm kacc be kukenx"
"Huwqaongx druar vedjongx, benw sriu hongho; hyxgiahlangg-daux tangx cniar suxiongrlangg, benw qniax byy langg jiauwqor."
"Hyxgiahsanr vutjai jniginn, dirr simlingg." Suhu :a dngw uerquanx.
"Langg si anwjnuaw beh qethunx?" Qangrkuanw ee bunrdee mng snax xee langg, inx longxx qongw byy qangg.
"U vair tnide .quer si ang'axbow, hingvangg qnia'imm si j.-jingwdongx-d., benw sriu jingwlangg qiw qiw duc duc."
Qaqi cenxsniu :ee dendyww kacc hac jingliw. Cuanvan qewcua diyhh kiw-qunx-drang-jiongr, byy jit xee kacc jairunw ee qun'iuu, hykow kir giaa dang qee?
Ue qongw dywdngw. Qethunx si uirdiyhh beh qapp siarhue ee qitai u amwhap, sniu jinx, marr vutjiw aw liauxzenn. Iauxx u qyckacc uan'ongw :ee. Quw quw byy sionghyw ee ang'axbow si trad dyw qrex, bylun jniw qangrr lau. Inx jitt diauu imensnuar qamxx iaxx u junxsngr, iacc si qongxx, beh anwjnuaw qycc vak jywhuew?
Dnaxx hai a, iurqycc dirr jiax langrhongx viag jit quaw saikiasu. Quanxtax ix hiacc je! Dirr Saikia'ue qongw simlairue, suwpuer.
(3) Obasang Snax-guec jap-snax
Lexvair jaxkixvox kir caiwcir-aw brew cair dngw .laii, lautuitauu nng~snax xee oksang decc pywdau. Druar lanw qecviah :ee cuir-bak-pni qed qui' qiuu, dngdecc liam qongxx inx haursnex m tagceh, qanda' air knuar jaboxginxaw trngr teh teh.
"Dnaxx hex nacc u sniaw? Linw qniaw byy hingr hunxbi :ee, liw mrjiacc rair huanlyw." Druar dirr laukax :ee qra andah.
"Liw m dyrr decc qongw kna'aw m?" druar dirr laudingw :ee duiwcuir mng. "Junw narr GAY marr byy siongqanx. Qex jit xee kna'axsenx .cud .laii, sewqanx dyrr qiamw jit xee jaboxlangg uac pnaiw mia."
Ue qongw diyc vutjiw aw kuehaii. Jairdniuu :ee, u langg dner cinwciyr, u langg suacc decc trow dua kuir .jit .cud. Henrjingg ee obasang urngiaw vutviw jairjaw, gauu qig qandenn decc vetsiah .langg', byy-ki-byy-krig, qycc cinwcaiw duw dyrr u diqiw.
Lililylyx siaw siaw jiaxee, ingg ingg vid bongxx qniaa. Jin' byy gii, suacc u togjiaw qiar denrjuxpuex laii jixqaur, dingw vrangx decc hue hunpuer hitt pnix, qongxx berimm viw qnia'imm e kacc dacba.
Samsiklangg qongw samsik'ue. Binjuw siarhue, si iwqenr dy' jundiong. Jiyh jitt der voxtnix.
(4) Jauxkaux Sir-guec jap-sir
Jyhzit-amr, siyxmue-aw dirr denrue hitt vingg beh kaur beh tii, jiuwkangr-luexme inx angx hiauhu, voghing. Me langg byy hyw cuir, buexau, lenrr lorvongsix qapp lau jaw siw iarr laur laur .cud .laii. Tauu laii buew kir qinw qra mng bai. Dangsi'aw dyrr bow kir taux knuar angx ee zidqir, dairjir jiacc cutjig.
"Simxmih decc 'qniaa duiww surbudyh-aw quer, dyrr sniu beh qra lamw lecc jimx.' U qraur vutsuxquiw! Siaw qaxx jex qamxx e knuawkauw .did?" Siyxmue-aw qongw qaxx cnitauu-cinwbin krir putpud.
"Ix si sniu songw :ee, siaw jit xee siautauw narnia, byy hiacc hyw dnaw jinjniar kir bag lar." Lanw hyw ir kuitiah hro tniax.
"Qanda' sniu marr bersaiw," siyxmue-aw qorr huah :ee. "Ix taukag-lai sniu vadd xee, lanw diyhh qapp ix kunr. Guaw jiacc byy hiacc cauwjen lehh!"
Be kamx did sriu kikkuix, siyxmue-aw vangr sniax qongw beh qapp muersair cew. Lanw u cuir qongw qaxx byy nxua, huexkir qig, jit qxur "liw iauxx m bad knuar quer dua junn vangr ziy" qut lehh cud .kir, qongcinlangg muaw bin juann daurhuex.
Javolangg jauxkaux, cri qimsibaa ee cuttauu, dagg qangx dy' u langg decc vnuax. Viah-tauu-hang-buew decc girlun, jap cuir go jic tixciyr jabow :ee gaigamrgong, jingwlangg knuar cud cud, dogdok ix iauxx jiac gnerpnir. Juxqag narr junw bruw jingwdi :ee, jyr langg' qeau :ee, qui' vah dxangx ee daisuu guanguann jiauww qu, kacc qongw dy' "duiwdik vangr hongsniax, byy-ngiaw-byy-jiah :ee", iacc si "aur vxiauw jyr kangx, laii beh pacciuhongx suanlenw." Byy, dyrr quikir qig diam diam, dner exqauw kacc diaudit.
Bixqog ee jongxtongw-huzinn, angsair taux jiac cyx ee dairjir huatvauh, jyr bow :ee qenwsiaur qaxx. Angsair sir nii jongxtongw muaw, quibuew iarr byy lirenn. Jyr qaur derr id huzinn, qycc si cutmiaa dairhak cutgiap :ee, jit zri "gong" beh junw .quer, sidjai u kacc cinwcaiw. Cincniu inx jitt jiongw u tauu u bin :ee, snevunw dyrr kacc pnaiw crunx kax cud ciuw. Daqnuax crua snax xee bow, cuwvnix-taubuew ylyw ix hyw mia. Dua-vxeh go-jap gua gua gua, qurnii huexqir zip qeqah, qinnii iurqycc jyr a'vax. Jit xee iviauxhniax, inx bow dna'aw ursinx, qongxx ix dyrr dirr guarkauw decc vniwbangw. Hnaix! Diksit si jit langg jit vxo qingx. lanw daux ee kiokqansi... Suah suah .kir. Mair qongw kacc cing'ingg.
(5) Sinx Cuwvnix Go-guec cego
Ciax bue qaur, sniax singx qaur. Mngxvox go diamw aw quer, Beetoven ee gag'imx dongrdann. Bersux hro luanrjingx-aw qiyr jingsinn, dikdnia ee lang'ngiaw isuaw xui, kongkir sriu kankiyh, jidsiqanx iarr venr kacc uah'ingw.
"Qongxx si lirenn :ee. Qojaboxqniaw duer laurbuw, sianghongx suhyy, byy qnir qongdngg."
"Ix qamxx u qycc qaux?"
"Jex lanw beh sniaw jaix? Jurliauw iauxx m bad knuar quer u jaboxlangg dirr inx daux cutzip dyrr urngiaw."
"Acc ix si decc jyr sniaw qingqiw?"
"Qongxx si dirr qongqiquanx jyr qaur kywdniuw-qxib :ee."
Vunwsywciax iauxx dirr hng hng, "Dua Jimxvyy" qapp "Vyxjniar Mw :a", liw jit cuir, guaw jit jic, siqanx jit diamw aw dy' byy pacsngw. Haurhiax qapp vngrlee dy' tangx qongw qui' tangwsuh :ee, vyrqizenn qex jit xee jab'itqyx :a laii decc jyr cuwvnix, inx iarr suacc u kyxlingg quer juax vangr ix suah?
"U huatdo .byy? Laii, guaw qra liw draur qnrua." Unsunn ee snia'imx, sinx cuwvnix jit xee haixqat'axtauu srex qaxx jiokk jejingw, vinwkax camx vec.
"Dysia lar. Guaw ersaiw." Simjong pigpok cringw, qongxue qycc liyc aw e junr, sniu diyc qaqi dy' pnaixser qaxx. Henrcuxsii ee jingqingw, tangx vixjai hiwhngg decc vnuax :ee hitt kuanw qiogjingg.
Vunwsyr dang hnuaichnuaih, qnrua si iauxx u hxuad tihh, beh qra hnair zip kir vunwsywciax dyrr jin' gnerdauw. Jiacc beh qig lat, sinx cuwvnix laii decc jan au ciuw, byy-dang.-byy-diyc.
"Jyc .zit cur nirr cniaw langkeh. Lexvair, vunwsywciax byy laii, vunwsyr jiacc e anxnix jit dua dre."
Tniax lanw qongw suah, sinx cuwvnix bunxciyr byy inwue. Hionghiongg, diwqag diyc qaqi jiokk qau ue, byy-dair.-byy-jir duiww jit xee snehunrlangg qongw qongw hiacc je. U huer :ar dyrr driyc, jimxvyy-qxib :ee, lanw iarr decbeh sngwjairlai.
(6) Qauvuee Lak-guec jap-lak
Denrsirap-aw lairbin, nng jiah ngiuqangw qoduiwcenw dngdecc siy' dag, ngiaa :ee tangx qapp ngiubyw qaubuew, pacjingw. Kimsiur iacc tausni'aw siy' kiaa siy' dac, juanqax qaixsuad qongxx inx ingxingw uirdiyhh singtuann. Vag Bixjiux ee anglenhii, an' ngiuhaiw jniwlauu beh siuu dngw kir qaur jniaw juiw ee onaa huicziacde, en' lo byy jiac byy hiyccuanw, qauwui, nxng vangr liauw dyrr siw kiaur kiaur.
Huantauu knuar qorr nng qix kaqud decc qniaa :ee. Jap vaiw u qauw vaiw, lamluw siy' qaux si uirdiyhh songxkuair, ginxaw erdangr mair dyrr mair. Langg viw did jingsnix kacc diongg kacc u jinwhuar, jitt hy kuanw ue beh qiyr lanw dua sniax qongw cud cuir, simqnuatauu sidjai e damw damw.
Beh jnia' qywguec byy siaw zidqir. Jitt xe aw daqex jiokk jiap laii qnia'unn. Diyhh qex hongrdair jit xee langg, snesingg kacc byy tangx ingg srinx. Sniu qnir diyc ginxaw tak iyjixenw hitt nii, ginxaw ee laurve qesitauu u qyc'ngiu, ciuxsut liauw, iuguann venr byy lenw. Susii, daqex cavutdyx dagg qangx laii sunlyy, qycc qiyr duarniuqox vnuax laii qapp guanw jyr cuwvnix, qongxx jiaxdi-aw druar siy' qecviah kacc hyw knuar tauu knuar buew. Kacc quer, daqex jiamrjiam byy laii, qanda' qorr denrue jamng. Qaur qaxx ginxaw duarhanr tagceh kir, ix lenrr denrue marr hranw did kar, itdit qaur jitmaw.
Jarhngx sangr daqex kir jre qongciax, dngw .laii ee lo nirr, dirr jit qingx ree-aw-dxiamr duw diyc sinx cuwvnix. Ix knuar qac'ir jit siangx ding'ee, sixdi'axqer veh-vah. Jingg:a jiacc tniax haursnex huah qongxx ree-aw ann dongwdongr, kax iurqycc venr kacc dua. Sun jitt xee qihue, jit kunr qauquanx nng siangx, lanw qra tauqex cud cingx-go, kiarr jit siangx qex singw go-jap kox.
Qniaa cud laii qaur ding'axkax, qokk langg ciuw nirr qnrua jit siangx ree-aw. Ix uad kir qamxaxdiamr brew qi'axvingx, qongw beh hro lanw jiac dnix dnix, snix haursnix. Liaurqiyr jiac qongqax taulo :ee qongxue longxx kacc byy qiok. Byy pacsngr, ix qycc jiacc gauu qunxsngxciyr, qongw ciywkuex.
Hro javolangg cniaw, siongrr buew aw vaiw si zuarr quw ixjingg ee dairjir? Snex qniaw jingg? Qewangx ixau? Sniu sniu hiacc je bycaiw taukag, kacc anwjnuaw dy' qoxjaw qoxjaw.
(7) Qamxjingg-jrer Cid-guec cecid
Longxx cuxliw dniardiyc :ar. Ixongw ee qamxjingg-jrer, qinaxzit itjin, liauxqed.
Ix qamxx si uirdiyhh au cutsir decc pacsngr? Bagjiux liac lanw qimx qimx siongr, juann uirdiyhh beh qra lanw ee snedniux qapp siongwtew zin hro jinx?
Vyh qnaxx si qniaa be kuix kax, ciuxqud qra lanw ee gimm diauu diauu. Vnivnii hitt siangx ciuw, jaxjingg bad qra lanw sindangg bongx langwtangr.
Banrog imm jyr tauu. Hunsinx-siydo, dairser qniaa qaur jitt hy kamxjam, qyckacc m qramx iarr diyhh knuawpuar.
(8) Jaiwhue Veh-guec jap-go
Cutsiuw qangrkuanw u jue, jitt qxur lanw diyhh qongw dairsingx. Duiww qok'ui jiokk vutju. Binrpuee qig qau qau, dirr jiax beh cingxqiuu linw ee siawbenw. Guaw, jitt qingx cur ee cuwjuw, qinnii zi-lak, qodnuakia, jingrr qaur dnaxx, m bad qethunx snex qniaw.
M si junsimx beh hiwlang iacc muapenr. Jidsii simsikhingr jurjuan qowsu, ingg ingg bongxx siaukenw. Byy pacsngr, lanw jit xui togjiaw knuar qaxx sniu' zib'ir, qaqi cnix iyh vec iyh, liahqiyr BLOG liarbin ee oksang taii langg, suar jauw kir hunjursow dongrkangx.
Sun IP ziog laii qaur der, hingsu qnir diyc lanw vunxsinlangg, bingqijaix nihuer u jingcax, iuguann jap jap veh veh mng mng jit dua qnrua. Laurve quewsinx beh jnia' jap dxangx, laurbuw druar dirr snuatauu niaxbuew, dngg nii jiac sowjaix, ham' luxjingx byy juac. Lanw qywsingr u jxingw diyc sirduarlangg, byy air papax jauw. M si cur nirr dyrr kangkuewdniuu, jit daii denrnauw, tong' sewqair ee qingxdir knuar taur taur, diwsig bad taur taur.
Cue byy siyjua tangx cingxqongx, hingsu-dairzinn pni-aw bongx lehh jauw. Qaur jiax laii, jitt qingx cur m hyw qycc druar. Qnuahuad-bin :ee tangx siar srinx li, saikia'ue qycc qongw .lyc si e lakcad.
Dirr jiax rair qamxsia nguartiab hniadi Binxqunx draur cue draur byy ingg. Sinx ee BLOG hy qiyr "Niki Siauxliamrzuu" quatding miaczit beh zip cur. Sinx sigsai qapp qurqaux narr byy siy' kiwhiamm, qingwcniaw kacc jiap laii qniadac qapp lauue.
Tenqix
Amwsamr ee VCD, vangr gnoxhoxlai ee diamwbin, siongwmia :ee higjiaw cuisiaux nngxtew :ee dingxdingw, jit qangx vunwsywpuex quixlyrr jap dniux quer jit dniux rig .laii, qex knuar qex sngxsinn, vutqenr ruii cingjing. Setding dniardiyc, denrnauw qaqi e singx kiyh, puex laii didtaur zip vunwsywlangw.
Knuar jiax laii -- binaxjair ee sueong vyr liw jaix
Snitauu m bad hxun, dingw:a jitt dniux lyhmiaa M.S. qamxx uanaxx vunwsywpuex? Beh suawciuw qra pniax hniwqak, qaqi dy' liyc liyc aw m qramx, iarrr bogquair denrnauw m qnaw dua-jux.-dua-ir. Beh jaix ix himm iacc how, o-aw iacc hanjii, dogdok diyhh qra puex cic .kuix byy vadd vo. Sauwdok nngxtew jiauww sii jiauww zit decc huansinx, diyhdok ingwgiac si be jiacc driyc.
Qionghiw!
Qokha qnia'un, cingx-vah-bxan langg lairdew dnuadiah liw jit xee! An' binaxjair kiw, narr u jiauww puebunn binrdingw ee jixsi qniaa, vyxniaw liw sun hongx sraiw junn, hyw kangx :ee u cunx, pnaiw kangx :ee unxdun.
Habqaizenn, tenqix m hyw laursed. Cinwcaiw jit qxur, cuir qongw cud liammix sithau, bylun u-dniu.-u-dii iacc byy-dniu.-byy-dii. Tausingx beh vyr liw jit jann: binaxjaxkiw kir qongsix diyhh kiaa ticbew.
Qiamxcaiw liw qui' vakdow juann gignaiw, jongw .si, jiauww jyr dyrr si benw mng kiw. Dogdok liw narr byy beh siongsinr, jitt jun tingwhyw cic REPLY, jit zri dy' benw qex sueh. Aurquer, liw duanwduanr be qycc siux diyc puex.
Lexbut tnidingw lag .lyc .laii, duiww liw byy vairhai. Liw si tniqong'axqniaw, tnix pah tnix jniaa, m tangx hokkir qaur m jaix.
Urngiaw jiac vaw sniu' ingg. Jitt dniux puex beh siaw, vnuar diamxjingx qamxx benw? Qycjaiww qongw, beh qa'ngg congwqingw m dyrr qew kacc singg lehh. Jitt hy tnix, ticbew lab qaur der, qui' sinkux cauwqnuarsngx-bi, snxax iarr jnriu iamsnii, iarr suacc e dit? Byc sueh qongxx, henrjingg iarr byy kongxbingciax tangx kiaa. Huepuex? Bycaiw qangx. Siysuawciuw hit danwsag kacc qinw.
Ququxqur!
Cuwvnix taubuew byy langg cri qxex, sunzenn luanrjingx-aw ee qiyr-sniax be dingdnaa. Bagjiux vreh qimx qinw kixcngg, soksog cuanvan beh cutmngg.
Iaxlongg aw 125 puc lehh cud .kir, Iuu cuix jinrvong vreh kir qaur qiyy-dingw, odobai suacc vairbew, kacc anwjnuaw dy' be huad. Odobai kanx kir qaur qiyy-kax cue jit xui kngr lehh, vnuar qniajauw qnuaw qaur qongciajam, langg cah ~ ~, ciavangx jin' jiap, keh berdid kiw marr si ongxzenn, bagjiux qimx qimx kiarqauu genr. Satsimx jnii cunvan liauw. Vingsowsii, qewdingg :ee cinwcaiw et dy' u, henrvo dirr lo-vnix siongr qui' vox quw byy qaxx jit daii kangx :ee. Jit jiah dahciax an' binrtaujingg quer, suisii sniu diyc jarhng'amr hitt dniux puex. Qiuwjinx, si cauwduxkamw iacc sniar sniar?
Qautongx be sunrsi, nguar qaur qaizenn. Byy biw duw diyc zunrguec. Tauqex m bad hiacc jaw qaur, qinaxzit jaxkiw crinr-tauu-crinr-bin dirr mngkakauw diamxmiaa sngr langtauu.
Byy simjniaa jycsid. Denrnauw kuix .kuix, singx srunn knuar denrjuxpuex derr id iauwqinw.
Liw qamxx u tniacuir? Sniawked :ee jairlaii kacc je, liongrvid liw iarr luerdiongx jit xee. Beh sinr m sinr iujai liw. Qowsiuw singlok ingqaizenn, tenqix dagg zit jiauwguann e qiar hro :liw. Binaxjair diongdaur diyhh kir linw qongsix laukax ee ginhangg kuix jit xee hortauu, quer ziddaur dyrr byy hau.
Kuix jit xee siauwho m kacc qanxdanx. Qiawqimx jit-vah kogunn, ginhangpo-aw sui' u jit vunw. Jitt dxauw, ix beh anwjiaur jixsi jinwhingg. Sii qaur junw simxmih longxx byy, qiawkngr dirr ginhangg :ee iarr be kicqag .kir.
Qecdngw qangx diongdauwsimx, dongsu laii decc jiyx beh kir jiac daur. Jit dxngr vng, liautenx-liaude, byy qaur jit xee jamrtauu, hionghiongg beh qywsii jin' pnaiw singkir. Kiw jit xee nuatauu qongxx beh singx sitlew. Qnuaxqinxvaiw, angg dingx qra jongg .quer, qapp jit xee tagceh-ginxaw siy' vrong hai ix vuahdyw iarr qra junw .quer. Qinxiaur sivaiw, jit hunjingx dy' be tangx didong.
"Qionghiw liw jniaa jyr vunxginhangg derr jit-bxan xee kecmngg. Guanw beh jingrsangr liw ngqimx nng niuw, qycc beh sangr liw kir Okinaua quanqongx."
Tang'axkauw ee siyxjiaw ciyr tauu ciyr bin, huwliw, siongliw, qui' din cnii uaw .laii. Jingwlangg pah pog'aw, laurzet ciccih.
"Langg' ix kacc u hokkir. Guaw iarr laii beh kuiho :ee qongxx, suacc ban ix jit kavo." Kajiah-au ee oksangr tauu pongr bin pongr, jit qix cuir knauhknauc liam.
Beh queweh iacc jniurun, hyxpnaiw diaurtauu vyr qinw qinw, jiauww kixqangx srunn puex, tak puex, an' qinaxzit kiw, jitt qnia sittauu dagg qangx diyhh pah derr id.
Diyhh kir Bagsax Senqongbiy vaiwvair siyx hniux.
Jiauww jixsi qniaa byy uiqec, dirr hiax gu diyc qokhau ee dongcongx, ioksog lexvair beh jywhuew kir Cauxsnuax dac cauxcnix, luanjingg kaidenw jin' u vyc.
Snaqaktangx hitt dnar bre caixqngr :ee u hyw kangx :ee.
Bec'amr aw vangwqangx sui' vniar .kir, crann crann quaxquaxlyw jit kunr go-vah cutmngg, byy diyc qaxx jit koginn, suacc dirr mngkakauw kiyh diyc langtaupiyr jit-cingx. Puex qiar .laii jingrr qaur dnaxx, dagg jann dy' jiokk bibiau qongw qaxx duir duir.
Duartongx m si lo. Jitt jua cutdniux, hang-aw-hangrsud si jniawdoo.
Knuar liauw knuar, jinn qycc jinn. Qamxx si inx sitcyr siaw dywvingw? Luanrjingx-aw dingg qycc jun qycc setding. Binaxjair beh kir hitt xui, lo dna' nng diauu. Diamxaxqax-lo vnitnaw-t. m qniaa, qingw hitt diauu iur jiyc-aw lo snax jad kiaux, qex kaix lecc qui' diamxjingx, qamxx benw?
Iutangw vaw vaw hyw kixsinx. Cocox an' qa'iujam cud laii duarlorvnix, tauqaur jit daii ciax binrsik ~, dirr lorkauw dngdecc danw cnix dingx. Lo pnaiw jauw, vingsor mngxvox jinwjingg dyrr tangx qaur cur, qinaxzit cenn qaur zit lyc srinx jiacc huedngw, knuar diyc cur taujingg jit din langg siyduxcuir decc cru decc tang.
"Qongxx si jit kax jit ciuw. Jitt sniax, mia junw kiyh e dngw .laii marr kiycqak :ar."
"Urngiaw tnix beh venr, jit siqanx. Jaxkiw beh cutmngg ee sii iauxx jiokk ciydiyy qongxx."
"Jurjaw dyrr u langg decc hranw qongxx qiyy byy unw, qinaxzit qycc jniasit dng."
"Ix marr decc pnaiw un. Qongxx jit vaii ciax qanda' ix ee siag."
Q.-qniahniaa-h., simqnuax luan hunhunx. Syxsii jiax zimm hiax zimm, qui' vox quw jiacc cue .diyc, syxsixkangx iurqycc decc duir be junw. Jin' byy qanxdanx zip laii qaur cur-lai, jit xee simjong iuguann pigpok cnaiw. Zit .sii dirr cialo siy' siamxsinx, hitt daii caix ee juxlangg qamxx dyrr si...?!
Jiyh langg' ee dyx, Moquiw Satan taii langg dauc dauc aw liyy. Denrnauw kuiqix, suar kuix puetangw. Zidjiw hyw-pnaiw quer benw kir qiksngr, amwmii aw air beh unw kunr, u jit dniux puex quatduanr rair REPLY.