si'angw taii siw guanw jexhux?

1

Huexciax zuxx ngr vag decc pauw, jit kux jit kux cnicuir ee juixcann dyrr zuxx jiyw .kir. Danw huexciax sraiw zip kir Daivag Quan, txangx-gua ee qingxdir juanzenn venwqingw, byy cann, byy kex, u:ee, qannarr cunx ox jutjud ee junwqaux qapp b.-badjat-j. ee lau’axcur tangx knuar nardnia.

Ciasniux-lai ee lingxkir jun qaxx duxduxx hyw dua qangw, qycc in’ui qimwjiw langg’ jiac hrunx, kongkir jamxzenn aw cringx. Dir angg sig ngikohingg by-aw ee siyxjiaw laii laii kir kir, liamvnix sangr imxliau, liamvnix vunx vywjuaw, hogbu jiujir, taiwdo cinced.

Huexciax decbeh uaw jam :ar, sokdo u dauc dauc aw decc ban .lyc .laii. Hongwsangwtauu siyxjiaxlangg-aw dnix dnix iur iur ee snia’imx te’cnew beh lyc ciax ee luxkeh diyh’air junxvi :ar. Uree langg pacsngr si jre kacc quw, jit biyxjingx dy’ be kamx did qycc danw .lyc .kir, vauhok-aw lringg lehh qnuaw kir ciamngg-vnix jnxir jyr jingg. Vyxguat ee ixaxui sngr taujingg vaii :ee, ix knuar langg keh uaw .laii, guanjingg kngr dirr kadaux ee kabang, qnuaxqinw qra qnrua kiw laii kuawhe dirr dingxtuiw moh diauu diauu.

“Sniaci ee langg si jiokk qanhiongg :ee or, diyh’air dihongg banrid.” Abuw dniardniarr anxnix decc qongw.

Huexciax ixqingx dongwdim. Vyxguat siangx kax dac dirr guaddaii-dingw, sun jniwtauu ee hnghniur, zuxx qniaa uaw .kir, jit jiongw be snehun ee kiwbi dyrr zuxx dang.

“Guaw pueqiyr linw zuarr cingkiwsniur lehh, hxak-aw marr qangrkuanw caur hiamhiamx.” Vyxguat ing nng qix jingxtauu-aw qra pnirangr-aw dnec diauu lehh qimwkuir, simlai anxnix decc liam.

Tokax log jiuhjiuc, ix kowkax langw lehh, en’ qapjua ee soxjai sewsimx aw qniaa .zip .kir. Sexciuxdaii qapp tokax qangrkuanw, marr si damm jiucjiuh. Vyxguat qra kabang gnec dirr katauhux diongx:a, juixdyrjuiw jun .kuix, siangx ciuw srinn juiw ur bin.

“Vyxguat Siyxjiaw, liw qnaxx si Vyxguat :a Siyxjiaw hnoh?” Jit xee duar vec ciuxlongg, go-jap gua huer kuanw ee ozisang dirr ciajam mngkakauw decc hiamwhiux. “Liw vunxlangg qapp siongwpnir qycc vutjiw aw singg neh!”

Vyxguat ngr duiwhongx ciuw nirr ee siongwpnir giyw .jit .xe. Hex si ix go nii jingg dirr Maxjow Qingx taujingg ee duardniaa hib :ee. Siongwpnir lairdew ee jaboxginxaw qui' bin hosinsaixqir, taumngg den qaxx kiuu kiuu, sinkux dingw ee vowdersnax cing qaxx lamwsinx qycc huex loklog, qui’ senx langg knuar .kiw .laii songg viacviah. Ix jinw taujangx ixqingx lauu dngg :ar, sinjaii venr kacc sokqed, qniazit iurqycc u digvet sejngx dnaxvan .quer. Ix simlai jinjniar duawgii, dauwdew si dyc’ui decc singg lehh?

“Guaw si Vyxguat byy m driyc. Cniaxmng asangw liw si…?

“Guaw si Cuar .Qrax ee suqix lar.”

“Liw nacc jai’ngiaw beh laii jriab guaw? A, guaw jaix :ar, unxdangr si guanw a'buw kar dngdoo :ee qra guanw viauxjew qongw, driyc bor?”

Suqix ciyr gigix, dimr tauu qongw, “Linw laurbuw-aw qongw liw jarmee qapp linw laurve-aw qauxkee, krir qaxx qongw byy beh qycc druar jngkax jycsid, beh kiw laii Daivag jiac taulo. Ix qecdngw qangx vangwjaw kiw laii cri qxex, knuar byy liw ee langg, dyrr iyh liw pacsngr si tranr tnix iaxx bue qngx, jit xee langg taux taux aw jauw kir ciatauu beh qnuaw tauu jit vrangx ee huexciax laii Daivag. Ix qniax liw dertauu byy sik hro langg quaiw .kir, qycc qniax liw jnii jah byy qraur, dyrr qinw kar denrue hro guanw itair, vaiwtog ix qra liw jiauhux .jit .xe.”

“Jniasit beh qenwsiaur siw! Lenrr jex iarr qongw ho’ngg tniax, binrpuee iarr m jaix siyw qor lehh.”

“Laurve laurbuw tniar qniaw, tacc e kir qor sniaxmiw binrdexpuee byy binrdexpuee ee dairjir. Aurzit aw liw qaqi jyr langg ee laurbuw dyrr jaix lor.”

Vyxguat cingwqingx, byy ir byy ir.

“Liw ee hingliw dna’ jitt kax? Laii, guaw qra liw qnrua.”

“Anxnix nacc tangx?” Vyxguat qinw qra nuajow. “Guaw qaqi qnrua dyrr hyw.”

“Vyxguat :a Siyxjiaw, liw benw jiacc keckir lar. Vadd hxang guaw m qnaw hongvongr, narr beh lun diyc qnrua hingliw jitt jann, guaw qnaw qongw, tnikae byy langg viw guaw kacc sigkax :ee.”

Suqix qra hingliw sax lehh sui’ dyrr kixkax qniaa. Vyxguat duer dirr ix kajiah au, knuar ix qra hingliw sreh zip kir jit daii otau’axciax ee ciaaurdauxsniux lairdew.

“Pnaixser, lanw diyh’air zuarr quw jiacc e qauwui?” Ciax sraiw dinxdang liauxau, Vyxguat jre dirr aurviah hyxlew aw qra mng.

“Narr poxtongx sii, covnidit aw snax~sir-jap hunx lar. Qinaxzit in’ui u tuantew dirr ciatauu jiax decc kongwgi, langg qapp ciax longxx jrig diauu lehh. Jiauww ingxquer ee qinggiam, uan uan, marr diyhh qycc tad lecc vnuar diamxjingx quw, lo jiacc e tangx tauw.” Suqix naxx qongw, taukag naxx iyy.

“Inx decc kongwgi sniaw?” Vyxguat mng.

“Kacc huah marr hitt quaw u:ee byy:ee.”

Lorkauw ee sinwhyrdingx qycjaiww dngw angg. Suqix dac ciadongr, siangx ciuw kuar dirr handolu dingxquann.

“Sinsuiw sniu’ jiyw lar, hoklirqimx iacc vyxhiamxqimx cingxniaw be diyc lar, dy' jitt quaw lilixkokkog :ee. Huanjai longxx decc kinghunx jni’axtauu ee dairjir dy' driyc lar.”

Jre dirr aurjy ee langg qanxdanx “or” jit sniax, bagjiux tenw qaxx dua dua luiw jimjiog decc knuar hitt din kongwgi ee langg.

Sinwhyrdingx ixqingx cetngua. Suqix qra handolu kuair sokdo pangw jit lenr vnuar, ciasinx jniawuad liauxau, ix qewsiok qycc qongw.

“Lyhongx qapp juhongx ee jenwjingx.” Suqix sniaauu lanxsix lanxsix. “Jingwdi kaihongr liauxau, suacc dniardnia u langg decc vnir jitt cud :ee. Inx anxnix decc bruw, siarhue qinxjuahban e luan or.”

Vyxguat qanda’ tniax, byy inwue.

Ciax sraiw zip laii dua diauu lo liauxau, sokdo jiamrjiam u kacc qinw .laii.

“Guaw qangxx siwlangg longxx decc qra dua tauqex sraiw ciax, qaur jitmaw iaxqycc si jit kox liuwliur, byy bow byy qauu.”

Suqix hiyh .jit .kunr, beh danw knuar tniax ee langg u huanxingr iacc byy. Vyxguat byy hro ix sitbong, mng suqix qongxx uirjnuaxngiu ix itdit longxx byy qethunx.

“Kacjaw ixjingg, guaw bad qaux quer jit xee, langg’ marr u qongw beh qer guaw jyr bow. Duiwhongx sirduarlangg knuar jnii kacc dang, qongw pingwqimx narr jring byy zi-jap-bxan dyrr byy beh qra jaboxqniaw qer hro guaw. Guaw jitt siwlangg hranw did qra langg' vuah cud, hitt vaiw uirdiyhh beh cuarbow kixqex, binrpuee dnir qau qau qra gunw dangw:e kuicuir. Qongw diyc inx Cuar .Qrax ee qigiap, hex si qangxx ig :ee, m jiacc siyw siyw zi-jap-bxan kox nardnia, inx suacc m kingw qra guaw cud .jit .xe, sidjai jnia’ byy tangx.”

Qongw qaur jiax, suqix iurqycc tingg .lyc .laii. Jitt huee Vyxguat diamrcuir-diamrjic. Suqix an’ bakumi’a qra Vyxguat jimjiog .jit .xe jiacqycc kaisiw qongw.

“Lau :ee narr qniaa .kir, diyhh qycc jiapsuar hogsai jniw :ee. Langg’ inx hiaxee qniaxzii sirser longxx mrbenw cud kir tyxtanr, qanda’ kyr hitt quaw joxqong’axsaiw dyrr u qraur inx hiangxsiu :ar. Acc guanw jitt hy kyr ciuxbin tanwjiac :ee, zit iarr jyr, mii iarr diyhh jyr, qetqyw si jit sxenw go lii dy’ byy hyxkangx .diyc.”

Suqix u damrvyc aw qigdong, jit kunr aw byy juwsinn, hiamw hiamw qapp jit daii kec’un :ee siy’ longr.

“Liw nacc byy beh yc duxjiah hitt din langg iarr kir kongwjingx, kir jingcuw quanli lehh?” Vyxguat mng.

“Yc inx! Ho’ngg qaixjid kacc kuair.” Suqix qongw. “Inx hitt jiongw e hnaw siw langg, be hnaw siw qxuiw ee vorsor, byy hau lar. Guaw qongw lanw jywlangg m tangx sniu tamx, diyhh kacc zinrhun, kacc dingrvo aw jyr lehh, anxnix kacc sit.”

Vyxguat diam diam, byy cuwbi qycc qapp ix lenrsenx pah cuiwqow.

Sinwhyrdingx dui’ ngg juanw angg jiacc bak nih aw quw. Suqix dac qipdongr-aw, nng qxanx hnaiwtau’aw ee kangx qxanx-aw an’ qawsuxjy erdew lenr .cud .laii, kinrkongrkua.

“Hex guaw jiac qenruirsnuaw puer :ee. Jyr gaunw jitt dxoo :ee, jap xee u qauw xee uirdngg u movne.”

Suqix qinxmec qra qranx-aw sreh zip kir guanvunw ee soxjai.

Kaisiw jnriu snualo ee sii, Vyxguat qamxqag tauu hinn bongwbongr, do-lai vnaixvue itdit decc ig ciacsngx, cuir crinr qan'auw, beh tror beh tror. Ix pnaixser qra suqix qongw, dyrr anxnix qiongg vir lehh, jre qaxx be did qaur.

Lorbuew, ciax tingg dirr nng snir uanqongmngg taujingg. Ciax-dingw u jit liap rimokong, suqix siyw cic .jit .xe, duarmngg dyrr jurdong hiongr aurviah kuix .kuix. Ciax sraiw .zip .kir, enzin duxjiacc dnia .kir, Vyxguat sui’ jongg .cud .kir, huanxvag tror qaxx qui’ tokax, liauxau, suacc pinn duiww ciax-lai, jurr anxnix hrun hrun .kir.

“Unxdangr si sniu’ tiamw qycc hinsnuax. Juixong Syw, vaiwtog liw juw jit dniaw amxmuee-aw, sunrsuar cuann jit quaw jniuwcair, queaxsni. Ix duxx tror, diyhh jiac kacc jniaw lehh, m tangx hro jiac cyx :ee iacc iuu laplab :ee.”

Vyxguat bagjiupuee benxqiongw kuix .kuix. Jit xee sanw sanw ee hurzinlangg kia dirr ix binrtaujingg anxnix decc huadlyc dairjir.

“Laii, muee singx limx .quaw, kactingg aw beh kunr jiacqycc kunr.”

Bersux kir hro langg’ he hu’axlo, Vyxguat quaix quaix aw qra muetngx jyr jit cuir tunx .lyc .kir. Byy zuarr quw, aiwkunwsinn iurqycc laii :ar. Dirr bagjiupuee qui’ee hap .kiw .laii jinwjingg, Vyxguat naxx cincniu u tniax diyc jit xee snia’imx, qongw,

“Liw laii liauw jnia’ m driyc sii.”

2

Nngw simr simr ee pongwcngg u bagni ee pangbi, juixangg ee sipue kinniuxsniuw. Dirr snehun ee vangqingx-lai jingsinn, Vyxguat u damrvyc aw vut’anx, damrvyc aw huanlyw, jongw .si, qitai ee simjingg kacc je quer longxjongw.

Tang'axvor si vehsig ee sedniur, zidtauqngx tangx didtaur tangr zip laii vangqingx lairdew. Vyxguat knuar jit xe aw tnisig, iyh jitt jun qnaxx si cid diamw tongw.

“Sidjai u qraur huasiaux, cuex lingxkir qah dua niaw pue, u kangx langg jnia’ erhiauw sox.”

Vyxguat qra pue giuw qaur erdauw, anwsngr beh qycc bii .jit .sii .aw. Quer byy zuarr quw, ix bagjiupuee sui’ qycc vreh kuix.

“Narr beh dirr jngkax, jitt jun m jaix jyh zuarr je sittauu .kir .ar.”

Jitt qxur qaiww singg si jit xee bunrdee, qisit, beh qongw si dap’anr e kacc ngiaa. Vyxguat juxir hnua dnia dyrr byy qycc tuasuax. Ix tiaur lyc bincngg, qra mipue jih jih hro suiw, kaciuw jin’ sirsua.

Jitt qingx langkecvangg u qrig huloqingx. Vyxguat jit ciuw tec kixqyx, jit ciuw tec kixbinw, knuar qnir huloqingx lairdew ee setvi jejuann, sexdng ee iongrpinw marr jin’ jabjngg, sew-bin, sew-cuir, sew-sinkux, sew-taujangx :ee, dagg hxang longxx u, uree qycc m na jit jiongw.

“Beh jaix, jarhngx dyrr mrbenw cuann qaxx hiaxee, qex byingg :ee.”

Sew hyxser, Vyxguat qra hingliw tauw .kuix, lairdew ee mihqnia sui’ hxang aw tec .cud .laii, uree kngr qniawdaii, uree siux druar snaduu-aw-lai.

Jitt qingx vangqingx byy dua qingx, mrqycc jin’ gnaw, hinoki ee qaqu qanghux juer, dagg qnia longxx qaxnaxx si vah nii ixsiong ee qoxguanw. Ix qamxqag ix jah .laii .ee, vutquanw cing :ee iacc ing :ee, qapp jitt qingx vangqingx ee qapjyh longxx jnia’ byy suwpuer.

“Aurzid’aw danw narr u jnii, jitt quaw logqyr-sogqyr :ee, guaw longxx beh qra hed danwsag.”

Tauu jit vaiw laii langg’ daux jywkeh, cud vangqingmngg, huatqenr guarbin ee jonghongg jiokk vaiciangg, huapunr. Naxx qniaa naxx siongr, qaur lautuikauw, ix kavo dongwdiam.

Viauxjew qer laii inx Cuar .Qrax iarr beh nng~snax dxangx :ar. Itdit qaur jitt jun, Vyxguat jiacc jai’ngiaw guanlaii viauxjexhux snex jyr jitt kuanw. Uerqniar lairdew ee langg angqyx ciaccic, bin jin' iuzi, hnirjux dua dua der, cuiwpuexbah pongr saisaix qycc snex see, jin’ hoksiongr.

Vyxguat sniu diyc qowhiongx ee a'vaa, qui’ nii tangr tnix dirr canjngx jycsid, qui’ xee bin pag qaxx ox kedket, hiac-dingw liapqingw, jit jua tac quer jit jua.

“Hyxgiac iacc sanwciah, jniasit an’ binrsiongr dyrr knuar e cud .laii.”

Vyxguat qniaa lyc lautuix. Dairkair u tniax diyc ix ee kavo-sniax, jit xee zi~snax-jap huer ee hurzinn sui’ qniaa uaw laii qra quansimx. “Liw kiw .laii .ar! U kacc hyw bor? ”

“Qex hyw jin’ je :ar.” Vyxguat bin-aw pnaixser pnaixser. “Viauxjew, guaw sidjai jin’ sitlew, jarhngx suacc dirr linw dua mngkauw decc liac tor-aw. M hro liw jnia’ loklenw hnoh?”

Viauxjew bunxciyr, iyy tauu qongw, “Lanw jingwqingx sniu’ quw byy qniwbin :ar, sigsairlangg suacc decc qniaa snehunrlew. Laii, liw iw nirr siyw jre .jit .xe, guaw kir huanhur langg' cuann jaixkixdngr.”

Viauxjew huantauu qniaa hiongr jauwkax. Vyxguat knuar ix ee vuerngiaw, qamxqag viauxjew viw qewangx jinwjingg iauxx qyckacc sanw, qyckacc siauwlenn. Vyxguat guan'aw u juwir .diyc, viauxjew ee jngtna vutjiw aw sowpog, snxax ee vowliau jin’ riux, mrqycc vowbin jin’ sor; singkux-dingw byy puahlen iacc ciuxkuann jitt quaw linglongmic-aw, qanda’ dywciuw ee lauxaxjnaiw u qruar jit kax qimx ciuxjiw, ser ser aw xee, be ciauquer jit jnii.

Jit xee obasang qra jit dniaw siyx huthud ee muee pangg zip laii jiahvngrtniax. Viauxjew duer dirr ix kajiah au.

“Vyxguat :a, ix si Juixong Syw, qalairsu longxx ix decc lixlyc. Liw narr u dairjir m jai’ngiaw, vutquanw duarser hxang longxx tingwhyw mng :ix.”

Vyxguat qapp Juixong Syw horsiongx dimr tauu. Juixong Syw kaciuw jin’ jiap, snax~nng xee ciuw, nguaxdi, vngrcair longxx jiauu jnriu dyh :ar. Vyxguat ing bagjiubuew liyw .jit .xe. Iurqycc si amxmuee-aw puer jniuwcair!

“Dua tair kactingg aw e lyc laii dauwdin jiac. Ix jiac dngnijaix, lanw jaixkixsii diyhh qapp ix jywhuew jiahcair. Pnaixser, hro liw kacc uixkud .diyc.”

Vyxguat qinw qra rinr qongxx ix jiac mihqnia jin’ cinwcaiw, be qingxjiac, zen’au mng knuar inx jexhux qamxx iarr e qapp inx jywdin jiac.

“Be. Ix jnia’ jaw dyrr kir qongsix :ar.”

Laubuexdingw u quandac’ee kihkickogkok ee snia’imx.

“A'jew, liw gauu jaw,” viauxjew an’ iw nirr vreh kiw decc qa'ngg mngranx.

Laii jiarr srex pongwtauu, srinx cing puhueduan, juixhunw quad qau qau, enjix diamw angg angg, cuir-aw kiaur ducduh, qycc juanx ing bagjiubuew decc knuar .langg.

“A'jew, ix si guanw banx ii ee jaboxqniaw, jarhngx duxx an’ erqangw kiw laii Daivag cittyy. Jitt dnxua siqanx guaw sniu beh anvaii ix druar lanw daux, m jaix a'jew liw qamxx u dong’ir?”

“Liw qniazit nacc jiacc huanxsiongr? Si jiac m driyc iyc-aw, iacc si tiauqowir beh jyr hro linw aurtaucur ee langg knuar? Liw jionglaii dy’ byy siurr guaw qaiwquanw. Guaw narr qongw m jrunw, liw qamxx dyrr e jiongg .guaw?”

Dua-naixnaiw jid’err qongw suah, sui’ jyww ix drang nguaxdi jiac jaxdngr. Viauxjew qra Vyxguat sna' diamw sna' sud, viauxjixmue nng langg duer decc kaisiw jiac.

“Qniazit muee amw tongtongx, juw qaxx jiacc iyw jiacc qrar. Si byy tec jnii hro liw kir diac biw si .m?”

Dua-naixnaiw sniamngg jnia’ dua. Kia dirr penvnix decc suhau inx jiahvng ee Juixong Syw tauu ngar ~ ~, kuadkuat hue sitlew, ce m driyc.

Dua-naixnaiw jit bin liam, jit bin qiyr Juixong Syw qycc qra drew jit nguaw, tranr Juixong Syw decc qra drew muee ee langwpang, ix byy-dniu.-byy-dii mng jit qxur qongxx, “U qra qongw :ar bor?”

“Jyczit u huanhur langg' qra tongdix :ar.” Viauxjew huanxingr jin’ qinw, sui’ qra ix huedab.

“Ix qongw anwjnuaw?”

“Ix qongw hitt qangx duxhyw u dairjir, go diamw quer jiacc e qaur cur.”

“Qongw qaxx jitt xee hnoh, sidjai jnia’ iongpair, qycc diyhh langg kir qra cniaw jiacc jai’ngiaw tangx dngw .laii.”

Inx bersux decc jyr amwhy qongw inxgiw. Vyxguat m jaix sewhe, byy jit xee pnirpang tangx cue.

Dua-naixnaiw jiahvng vaw dyrr zip kir vuddngg. Ix jid’err jauw, Juixong Syw benw langg qiyr, jurdong qra qetngx pangg .cud .laii.

“Liw marr laii kad jit nguaw kir jiac. Jex suwbut-aw, lanw jaboxlangg laii jiac siongrr hyw.” Viauxjew duiww Vyxguat qongw.

“Guaw siongrr qniax limx jitt jiongw voxiyc-aw, kow decdeh.”

“Ix u kngr jiokk je ojyw qapp angjyw dauwdin lyc kir dim. Jnia’ dnix, be kow.”

Vyxguat iuguann qra hnair tauu. Viauxjew ciyr ciyr, dyrr jyww ix kad jit nguaw decc jiac.

“Au vaiw mair qra kimhingbah he lyc kir juw, guaw qanda’ air jiac qetuiw," Viauxjew duiww Juixong Syw qongw. "Iaxqycc jit hxang, liw m tangx hiamm kauwkir, iarr diyh’air baiw baiw aw huew knuax knuax aw dim, bah jiacc e hyw jiac.”

Juixong Syw iurqycc decc hue sitlew, liauxau, qycc qnuaxqinw dngw kir jauwkax byingg ix ee sittauu. Vyxguat am'axqunw crunx dngg dngg ngr jauwkax knuar, lairdew ee langg ciuw dnec jit der caiwquevor, taukag lee lee decc lur dniaxquar.

“Ix qa’ngg jyr quanwsir :ar. Benw qra huanlyw lar.” Viauxjew qongw.

“Ix qamxx byy qadingg? Knuar ix ee hxingg, qnaxx u go-jap :ar hnoh?”

“Sir-jap tongw nardnia.” Viauxjew tiux jit dniux binrjuaw, duiwauw qycc duiwauw, kanx juaw-vnix qra cuiwdunn siyw crid .jit .xe. “Snax-jap huer dyrr siw angx. Inx angx beh siw jinwjingg, qycc vangr jit dxuix jewbu decc hro tuax; qo’ jit xee haursnex suacc decc jyr pnaixqniaw. Ar! M bad knuar quer jit xee jaboxlangg jiacc lylok mia :ee.”

Viauxjew jiac suah, Vyxguat tyw beh knuar guersingx. Viauxjew qongw ix marr cavutdyx diyh’air kir cri lingx :ar. Inx dangjee kir qaur angngex-aw ee kunwvangg. Angngex-aw byy caw, byy kaur, qaqi quaix quaix dyw dirr iynaa lairdew decc sngw. Viauxjew qra ngex-aw py .kiw .laii, qra duiwkimx ee liuw-aw diak .kuix, lingtauu dux duiww ix ee cuir. “Iausaii or, anxnix jiac qinw qinw.”

Vyxguat qniaa uaw kir knuar ginxaw, qongw, “Nacc ham’ liw qapp jexhux longxx byy singg? Byy jxingw diyc laurve, iarr byy jxingw diyc laurbuw. Oox, qamxx e si taux snex :ee?”

Vyxguat ciyr girgi qapp viauxjew decc pah ciywkuex. Bygigo, viauxjew vnir cnix bin, ing lingxdam ee kauxkir qongw,

“Ginxaw jxingw inx a'qongx lar.”

Angngex-aw suh .jit .kunr .aw, tingg .jit .kunr .aw, danw ix suh u qauwgiac, bagjiupuee qui’ee hap .kiw .laii, cuir dyrr byy qycc dinxdang :ar.

Viuaxjew sewzi aw qra kngr lyc kir iynaa-aw lai, ser aw sniax duiww Vyxguat qongw,

“Jitt xee ginxaw jnia’ hyw riyx, longxx be air kaur. Narr jitt hxang, ix qapp inx laurve si qangrkuanw aw qangrkuanw.”

3

Go daii liulongg sru laii sru kir. Tingg dirr siongrr suacbuew lxauu jitt daii ee mngg jid’err kuix .kuix, duarlangg kanx ginxaw, duarjew cua siyxmue, jxig jxig qui' dxuix dirr mngkauw siy’ jnex beh zip .kir.

“Liangxxx! Liangxxx! Liangxxx!”

Dew iurqycc qib ee liang'aw-sniax liangx liangx hauw. Jit xee kacc vuisinx :ee taukag cih cih qnuaxqinw trer .cud .laii. Vyxguat jin’ hyw kaciuw, dirr nng snir mngg qnuaix uaw .laii ixjingg, ix tranr qihue nngr .zip .kir. Jitt kuir jxingx-aw diam diam byy cud sniax, mngg sunrli qnuaix .kiw .laii, liulongg kaisiw dinxdang.

“Dangkux ee vachuer-qongsix decc nguarquir, huewdew beh hiaur hniwsag. Jitt go-cingx kox liw tec kir hag sincing, iacc si u kiamwing sniaw huehunxqniar, jyww liw brew, benw sewzi.”

Jarhng'amr viauxjew kir qaur Vyxguat ee vangqingx, gne dux jit vew jnii hro ix, qongw qniazit u langkeh beh laii, qiyr ix cud laii guarkauw sec sec knuar knuar lehh, amwtauu aw jiacc dngw .kir. Viauxjew qycc hyxir jiyh ix jit duir hnirqaux, qongw jitt duir hnirqaux jnia’ u lingqamw, e vyxvir langg u hyw unrdoo.

Vyxguat jiahdaur vaw dyrr cutmngg. Diongdaur-sii aw, jre qongciax benw vnuar diamxjingx quw dyrr qauwui :ar. Ix jurr laukax jit janr qniaa quer jit janr, knuar qac’ir ee mihqnia si jin’ je, mrqycc itdit longxx brew be lyc ciuw. Jit siangx ree qongxx diyh’air nng~snax-cingx kox, dirr inx jngkax, ix tingwhyw brew jap siangx sandalu iauxx u tangx jau. Jit sxux snxax kap jit diyc dyrr jnriu bxan, pacjed liauxau, viauxjew hro ix ee jnii duxhyw pah pah .siw. Sec beh nng diamxjingx quw, lakde-aw ee jnii iuguann vaw vaw, jit sxenw jnii dy’ iauxx bue kaix .diyc.

Liulongg ee mngg kuix .kuix, Vyxguat qniaa lirkuix vachuer-qongsix. Knuar jit xe aw siviyw, siqanx iauxx sniu’ jaw. Lorcauw byy sik, u kax marr qniaa byy lo. Ix soksinr cue jit dah kacc ciucinr ee soxjai jre lyc laii hiyctiamw, labliangg, knuar pauxjauw ee cialiongw, knuar gorhuex-jabsig, cenvnuax-banrvnuax ee quewlorlangg.

Tauqaur ee sibzirlorkauw u jit din langg, uree giaa qii-aw, uree giaa vxaii-aw, dag’ee taukag-dingw longxx qad jit diauu qam’axsig ee duar-aw.

Jitt xee qxingw m jaix dirr dyc’ui bad knuar .quer? Vyxguat sniu qui’ vnuar vox iaxx sniu be kiw .laii.

“Aixiyr, guaw ee qiwdii tacc e jiacc baiw. Hex m jit lexvair jingg jiacc dirr huexciatauu duw .quer.” Vyxguat qaqi simlai decc liam, ing quntaubuw qra taukag kok snax xee.

“Siyxjiaw, liw nacc iauxx bue qad duar-aw! Laii, guaw qra liw qad.”

Jit xee zi~snax-jap huer ee cinglenlangg byy-dniu.-byy-dii jongg uaw .laii.

“Guaw m si beh….”

Vyxguat jiacc beh qaixsueh. Duiwhongx dongrjog jin’ saliac, duar-aw jiacc qra qad hyxser, sunrsii qycc qra Vyxguat giuw zip kir duirgnow lairdew.

“Liw qapp guaw jit jxox, lanw hylat giuw jitt der vehvowliauu.”

Cinglenlangg qongxue ee kauxkir jin’ kaxmiau, bingrling jiamr cid hunx, cunx :ee snax hunx si qojniaa. Vyxguat jit siqanx srid juxdniux, gang gang cai lehh m jaix beh jnuaxngiu si hyw. Cinglenlangg qra jit vingg ee vowtauu qaux druar Vyxguat ee ciuw nirr, qaqi jiacc qra vor kanx hng .kir.

QANGLANGG QIKBING BANRSUER

Ox bagbak ee duarzi duiwdiongx siaw dirr vec suatsuad naxx seh ee vowsinx. Vyxguat paccniqniax, qnuaxqinw beh suanx. Vutliau taujingg u langg huah jit sniax “Cuthuad”, iuhingg ee duirgnow junxvi beh kixqniaa.

“Kongwgi Qangdniuu Oksingr Dyxdiamr!”

“Vyxjiongx Guanjurbinn Jiac Taulo ee Quanli!”

Dag’ee jit bin qniaa, jit bin huah kauxhy. Vyxguat suizenn byy cud sniax, m jaix anwjnuaxngiu driyc, dingxe pnir cuiwdunn suacc e duer decc kuix lehh hap lehh.

Qapp ix qang jxox hitt xee cinglenlangg jin’ vniawser decc huah, bersux liamrr ix ee gxiac marr beh qra huah camx .lyc .kir. Vyxguat tauu qaux qaux, bagjiuzinn liac ix siamx .jit .xe.

“Hiauhing or, amrqunxaxqinx longxx jiauu puu .cud .laii .ar!”

Iuhingg ee duirgnow qniaa quer sniaa-lai siongrr ciahuax ee derkux, jidlo qingxcat-aw itdit duer diauu diauu. Buexau, inx laii qaur Jongxtongw Huw taujingg. Jixhuiciax qra duirgnow inxcua zip kir vnix:a ee qiwliam qonghngg lairdew. Vyxguat knuar jit xe aw ciuxkuanviyw.

“Beh lak diamw :ar! Acc m dyrr qniaa snax diamxjingx quw dah dah!”

Zidtauu ho’ngg jac .diyc. Vyxguat giac tauu, jit xee sanxsinx sanxsinx ee javolangg kia dirr ix ee binrtaujingg. Javolangg ee bin hnuaxamr, nng vaii cuiwkiw dendyww vec ~ ~. Vyxguat lensiongw diyc jit jiongw lauxvaii ee kixqyx, simlai decc kiw air ciyr, cuir jurzendig kiaur quann uanxzenn jit xee lingqag.

“Guaw jyr quetauu-unrdong jiacc je nii :ar, tauu jit vaiw knuar langg qniaa qaxx jiacnirr aw hnuahiw :ee.”

Cinglenlangg qra vehvowliauu jih uaw .laii, bagjiux buix buix liac Vyxguat decc siongr. Vyxguat qamxqag jin' lanuijingg, kacc camw ix dyrr ingwvenr be e. Cinglenlangg dyrr jin’ quixjnix, qinxjiap qra mewsih tec .cud .laii, siangx ciuw sangr qaur siyxjiaw ee binrtaujingg.

“Guaw sner Dann, cniaw dydyx jixqaur.”

“Galan!” Vyxguat qra mewsih dingxquann ee miazi tak .cud .laii. “Guarqoklangg ee miaa?”

“Hex si lanw kacjaw Vnevojok ee miaa.”

Vnevojok? Tauwsiwlangg tauu jit vaiw tniax .diyc. Vyxguat jinjniar hnowhenn, danrsi qycc m guan kuix cuir qra mng.

Viix, viix, viix, viix, viix. Galan ee B.B. Kox decc dann. Hitt xee hyrbew ix dairkair jin’ sik ee kuanw, siyw ngiaw jit xe ix sui’ dyrr jaix si si’angw decc cue ix. Galan bagtauu qad qad, cuir nirr naxx decc jiuwcamr, me qaqi hiacc byy tausinn, zen’au pnaixser pnaixser duiww Vyxguat qongw,

“Jin’ sitlew, guaw diyh’air singx jauw. Liw qamxx erdangr qra jursow qapp denrue lauu hro guaw, aurzid’aw gunw vran uahdang kiamr kaciuw, sniu beh qycc vaiwtog liw laii dauwsiyqang.”

Qamxx tangx hro ix? Vyxguat simlai jinjniar diuduu. Suliongg jaiww suliongg, lorbuexciuw, iaxx si u siaw hro ix.

“Liw dangxjinx druar jiax?”

Galan bagbaii diaur quann quann decc mng. Vyxguat damrvyc aw u singwde, iyh duiwhongx unxdangr decc giauu qongxx, cniurr ix jitt jiongw cingrcah cinwcaiw ee bongrsongwkeh, toxvalauw, jnuaxngiu e tangx dirr hitt jiongw dingxsiklangg kiarkiw ee derkux druar?

“M si.” Vyxguat kauxkir lingxdam qra qaixsueh qongxx, “Guaw jit xee viauxcinx qer laii Daivag, guaw an’ lamvo kiw laii cue :ix.”

Galan dimr tauu, nng luiw bagjiux qimx kogkok liac Vyxguat decc knuar.

Viix, viix, viix, viix, viix. Galan ee qi’ax iurqycc decc hiangw. Ix qapp Vyxguat sivet, viauxjingg jamxzenn aw byy daruaa ee kuanw. Beh lirkuix jinwjingg, ix vyxjingr qongxx inx nng langg dikkag e qycjaiww qniwbin.

Langg zuxx laii zuxx je, daii-aw-dingw ee langg zuxx qongw zuxx sakpah, maiku hnua lehh dyrr m guan vangr. Vyxguat qamxqag zuxx tniax zuxx byy cuwbi, mng vnix:a ee langg qongciajam dirr dycc jit hiongr. Langg’ jin’ zedsimx decc qra vyr, qycc rue doo hro knuar. Vyxguat qa’ngg sueh jit sniax dysia liauxau dyrr qniaa lirkuix enxqangxdniuu.

Jnriu snuax ee qongciax jin’ yh danw, vnuar diamxjingx quw jiacc u jit vrangx. Ciajam ee langg jin’ je, kangx ciax sraiw .laii iarr jnrix qaxx be did lyc. Suqix beh qiyr jit~vnuar xee aw lyc ciax danw au vrangx, mngg-vnix u jit xee tak qokdiongx ee hagsingx gnersingr beh keh .zip .laii. Suqix byy ix hxuad, ciamngg ee kaiquanx kuix lehh qnuaix lehh. Buew:a, hagsingginxaw singkux kia tanxkix, qongciamngg jiacc sunrsi qnuaix .kiw .laii.

Snualo dyrr decc qia a, langkeh iurqycc jair sniu’ quewtauu je. Qongciax u kacc qu, bexlat byy qraur, qui’ daii ciax kongrkong qiyr, bersux lau guu decc tuax ciax.

Jit jangg dua dua jangg ee hongrhongciu dirr ciatangx-gua pauw .quer. Vyxguat qnuaxqinw cic ling’aw. Jitt jam qanda’ ix jit xee langg lyhciax. Qongciax-buew ee endangg vangr jit jun ox enx .cud .laii. Vyxguat jit ciuw omx pnirkangx, jit ciuw naxx qra enbu ngia jauw.

Ngqimsig ee lordingx jiax jit pax, hiax jit pax, siokjing ee snualo u lomantic ee kiwhunx. U jit xee langg an’ taujingbin ee dngxqag qniaa .cud .laii. Vyxguat knuar cingcyw ix ee binriongg, simjong diuh .jit .xe, m jaix qaqi si qniahniaa iacc si qniahiw.

“Sniu be qaur jiacc qinw dyrr qycc duw .diyc. Lanw nng xee sidjai jin’ u enn.”

Galan jin’ dairhongx, dairsingx laii qapp ix siy’ zin. Vyxguat qra ix vin' tauu ngiaw .quer. Vowee, gu’axkor, Y-siaju, ix iuguann si duxjiah ee cingrcah.

“Liw qamxx iarr druar dirr jiax?” Vyxguat qongw, beh qra congwqingw vnuar tiauqangx decc mng.

“Cavutdyx ersaih anxnix qongw.”

Jex si dycc jit qog ee ue? Vyxguat simlai sniu aiwciyr, mrqycc iaxx byy anwsngr beh giacpuar ix ee qequix-aw. Tauu qniwbin dyrr ziog laii qaur cur taujingg, dairjir ee jinsiongr dyrr naxx cnincniu jit qxur sioggixue decc qongw :ee, “Ing katauux sniu marr jaix.”

Vyxguat dngdecc dik’ir, iyh duiwhongx suar .lyc .laii beh denw sniaw kuanw ee vorsor. Byy pacsngr, Galan qapp ix et jit xe ciuw, huantauu suacc jyww ix jauw .kir.

“Ix si decc vnir sniaw kenkunx? Guaw knuar longxx byy.” Vyxguat cuir nirr decc liam, simlai u damrvyc aw sitbong.

Cur-lai dinghuew tongbingg, an’ cur-gua knuar .zip .kir, langkectniax u quixlyrr xee langngiaw. Vyxguat tiauqangx an’ aurviacmngg zip .kir, knuar diyc suqix qapp Juixong Syw inx nng xee langg dirr jauwkax.

“Dua-siauwiaa lehh?” Juixong Syw mng.

“Duxjiacc jauw.” Suqix qongw.

“Liw qamxx jai’ngiaw inx veaxqniaw decc qongw sniaxmic? Ziangw qaxx jiacc dua sniax .diyc.”

“Qaxnaxx si beh qaiw jioksux ee kuanw.” Suqix snia’imx rah qe qe.

“Qaiw jioksux!” Juixong Syw bin iux qatqad. “Dnaxx siw ar, jitt huee unxdangr e viakkangx!”

“Benw ciausimx lar, liw dirr jiax druar jiacc quw, inx qamxx jniasit e jiacnirr byy jxingg, uirdiyhh jit qix hueqanx dyrr qra liw srii taulo? Qycjaiww qongw, hex vunxdew dyrr si beh lauu hro liw :ee.”

“Dongcuesii sidjai byy ingwqaix anxnix jyr jiacc driyc. Guaw jiokk hiyrhuew :ee.” Juixong Syw tror jit kauw duarsimkuir.

“Jitt qekauw-aw ee langg decc qongxue, tacc e longxx jiacc pnaiw lixqaiw. Dyrr m si decc cud zircaix ho’ngg iyh qyc!”

Vyxguat kinx sniax qniaa kir laudingw ix ee vangqingx-lai. Cuar .Qrax jit qekauw-aw taucuir go~lak xee, byy langg juwir diyc qongxx viauxsiyxjiaw jaw ixqingx huedngw qaur cur :ar.

4

Honghun'amr go~lak diamw aw, tnidingw ee hunn anggee aw anggee. Jiyhcnisig ee snuamec qra zidtau’ngii jiac beh liauw .kir. Iaxx cunx jit diamw aw kuiwsix ee zidtauu sria cud lamxziok ee qngsnuar, bersux decc huad SOS ee sinwhy, rair sewqanlangg giaa tauu qra jimjiog .jit .xe.

Cuar .Qrax ee cur jre lamm ngr vag, jauwkax ee tang’axmngg kuix dirr sex vingg. Vyxguat an’ laudingw qniaa lautuix lyc .laii, knuar diyc tokax u jit xee dngg dngg ee o'ngiaw, ix tamx tauu knuar kacc jinx lehh, hex hunbingg si jit xee jaboxlangg ee langngiaw. Jaboxlangg dnec jit qix dua qix caiwdyx, ciuw giac quann dua lat qra jam .lyc .kir. Jit dyx, nng dyx, jit buew lohii ho’ngg jnaw jyr nng quec, hibuexliux iaxdecc pet lehh pet lehh, dydiamx hueh saisaix.

“Vyxguat aw Siyxjiaw, liw jarhngx qui’ qangx kir dyhh logdyy?” Juixong Syw ciyr ciyr aw decc qra mng, naxx decc qra hii ee vaklai danr zip kir vunwsywlangw.

“Kir sanwvo qniaa qeaxlo.” Vyxguat kuix vingsniux tinn jit aux liuxdingjiab.

“Qapp si’angw? Javoving’iuw?”

“Qapp jit din javolangg.”

Juixong Syw nng luiw bagjiuw denw dua dua luiw qra knuar. Vyxguat qamxqag hyw ciyr, qinw qra sueh qongxx, “Guaw kir iuhingg lar.”

“Liw u cuwbi hex or?”

“Acc dyrr dirr lorvnix hro langg qiongdyrbeh tuax .zip .kir .ee.” Vyxguat qongw.

“Guanw dua-siauwiaa marr longxx decc vnir hex. Ix hranw did quiw sii jiacc dngw laii jit vaiw. Lauriaa in’ui u dairjir beh qapp ix camsiongg, jarhngx juanling qiyr ix dngw .laii, qetqyw jre dy’ byy vnuar diamxjingx quw, ix sui’ dyrr jauw :ar.”

“Dua-siauwiaa?” Vyxguat mng qongxx, “Liw qamxx si decc qongw dua-naixnaiw ee haursnex?”

“Si a. Mrqycc ix m si jniawvag :ee, si guanw dua-naixnaiw siauwlenn ee sijun kir iogsingdongg kid laii riyx :ee.”

“Linw dua-siauwiaa qamxx jai’ngiaw qaqi ee sinser?” Vyxguat qamxqag jin’ hiqii, qnuaxqinw beh jaix.

“Guanw dua-siauwiaa quewqud kiauw, jnix qanxnaxx bangw lehh, iarr u hitt hy m jaix. Ix jitmaw duiww gua longxx qongw qaqi sner Dann, m si sner Cuar.”

“Dann!” Vyxguat huah cud sniax. “Ix qamxx u cue diyc ix ee cinlangg?”

“Jiurr guaw soxx jaix si byy.” Juixong Syw qongw. “Guaw bad tniax guanw dua-siauwiaa anxnix qongw. Ix qongw Dann si duarsner, huanrser ix ee sneve iacc snebyw qidiongx u jit xee jniasit sner Dann marr byy dikkag. Sngr qongxx qilut kacc dua dy' driyc lar.”

Vyxguat tniax liauw iurqycc beh kiw aiwciyr, mrqycc qiongqiongg zimw diauu lehh. Vitqingr jex si langg’ ee vuthing, suiir pah ciauwdamm qnaxx e sitlew.

Viauxjew dirr lautuitauu huah Vyxguat ee miaa. Vyxguat rinr jit xe sniax sui’ qniaa uaw .kir.

“Kacc mair qapp hitt quaw kaaxciuw decc capjap, liw ee sinhun qapp inx byy qangg.”

Ix cua Vyxguat kir qaur tniatauu. Jit xee druar bagqniar, cing snaniaxtyr ee javolangg dirr hiax jre. Ix knuar nng xui luxsu qauwui, jikkig an’ iw nirr vreh kiw qycc naxx decc liuw vaiaxliuw.

“Vyxguat :a, guaw qra liw qaiwsiau. Ix si Maw Qingliw, Cuar .Qrax ee quanxqui, druar qongsix beh id~zi-jap nii :ar. Maw Qingliw, ix dyrr si Vyxguat :a, qapp guaw siongrqaiww dacliap ee viauxsiyxmue.”

Viauxjew jin’ zedsimx qra inx nng xee siaurqair hro duiwhongx sigsai. Vyxguat qapp ix sna' gimrciuw, huatqag ix cuiwerhaii ee hxingg jinjniar digvet, m jaix dirr dyhh bad knuar .quer. Tak juankyx ee sijun, Vyxguat bad duer langg decc hxongx liap jiyhqyang’aw, duiww langg ee gnoxhingg puewdah, ix bad he jiokk dua ee jingsinn kir genxqiur .quer.

“Ginxaw pacsngr beh jingsinn :ar. Guaw kiw laii qra knuar .jit .xe, kacc danw jiacqycc lyc .laii. Linw nng xee bongxx kaiqangw pywdau .jit .xe.”

Viauxjew tiauqangx beh lauu inx nng xee dauwdin. Vyxguat qamxqag jiokk gairgiyc, jre iarr jre be dnia, beh jauw qycc qniax srid lexsor. Maw Qingliw qex jin’ lauxlen, ix mng kiw diyc Vyxguat ee qadingg, qangjog dingxdingw ee dairjir, taiwdo jinjniar cinced.

“Tniax liw decc qongxue, qamxqag liw jiokk bungnaw, jiokk u kiwjid, sidjai byy singg jit xee jngkax ee qoniuu.”

Maw Qingliw qongxue ee sniadiau jin’ unziuu. Vyxguat hro ix anxnix vylysyx suacc kiw pnaixser, jidsidig m jaix beh anwjnuaxngiu ingwdab, lingkyw qra uerdee suaw kiw vadd xui aw kacc tywdongr. Ix dramm kiw diyc viauxjew ee hun’inx, qongw jitt duir ang’axbow ee im’enn si hydingw qibiau.

“Urngiaw jin' miau dy' driyc.” Maw Qingliw jiapcuir. “Kingjinx qongw .kiw .laii, dua-siauwiaa sngr si inx nng xee ee hmlangg.”

Vyxguat bagjiux buix buix, Maw Qingliw suawjiab qycc qongw. “Sinniuu-aw guanjai, sinlongg suacc hro laurve cuanr kir jyr. Beh si guaw, unxdangr e hongtamm-vewsimx beh liahqongg.”

“Liw si qongw guanw viauxjew qapp Cuar .Qrax ee siauwiaa, inx si…”

“Jin’ sitlew, guaw pueqiyh liw jaix lehh.” Maw Qingliw knuar diyc Vyxguat ee viauxjingg liauxau, marr si jit jun ee gonggniac. “Guaw sidjai jin’ qau ue, dnaxx jitt sniax zi-naixnaiw dniardiyc be vangr guaw qanhiux :ee.”

Vyxguat itjair hiongr ix vyxniaw qongxx be hro viauxjew jaix, qojniaa ix qinw qycc qongw suar .lyc .kir.

“Qongw .kiw .laii uertauu dngg.” Maw Qingliw tror jit kauw kuir. “Inx nng xee sigsai hitt jun, gunw dua-siauwiaa duxx ui’ qundiongx tewgnow dngw .laii. Acc gunw zi-naixnaiw, iarr dyrr si linw viauxjew, ix haghau duxx cutgiap, suiw qaxx jniawdngsii. Nng xee siauwlenqex siy’ duw, itqenr-jiongjingg, qniaa byy zuarr quw, dyrr lun qaur qewcua ee dairjir :ar.”

“Au .laii inx nacc byy qethap lehh? Acc guanw viauxjew suacc dendyww kir jyr langg’ ee sewii?” Vyxguat mng.

“Hex si jit qnia qenwsiauwdai, sidjai jin’ pnaiw kuix cuir.” Maw Qingliw bin-aw iux iux.

“Liw jyww liw qongw, guaw qra liw vyxjingr, juadduir be luan qni'ue.”

Maw Qingliw tniax diyc jitt qxur ue u qex kacc ansimx. Ix suawlenn qycc qongw.

“Dua-siauwiaa qra linw viauxjew cua dngw laii cur nirr, suacc hro lauriaa knuar qac’ir, qiongg beh qra crua dngw laii jyr siyxqequanr. Linw viauxjew jurzenn si m kingw. Lauriaa itding be crua qaxx diyc, ciangr qongxx beh qapp dua-siauwiaa duanrjuat verqniaw ee quanhe. Liw viauxjew surliw tongdat, jin' bad juewlangdai. Ix m qramx knuar gunw dua-siauwiaa ho’ngg qnuaw .cud .kir, dyrr qamguan hisingx qadi ee hingrhog, benxqiongw dac’ingr jitt jann ee cinsu.”

“Danrsi dua-siauwiaa lehh? Qamxx qongxx ix byy jinsimx decc air guanw viauxjew? Narr byy, suacc e cinwcaiw qra sinniuu-aw niu hro vadd langg?” Vyxguat mng.

“Liw diyh’air jai’ngiaw, gunw dua-siauwiaa hitt dangjun iauxx jin’ siauwlenn, iarr byy jnii, iarr byy kxuann, sursu-hangrhang iaxx diyhh kyr laurve. Soxiw iarr sidjai be qruer did ix.”

Maw Qingliw ter dua-siauwiaa venrho. Vyxguat sniu diyc Juixong Syw ee ue, dauc dauc aw beh liac jit xee mec .cud .laii.

“In’ui jitt vaiw ee dnaxqig, dua-siauwiaa dyrr lirkuix Cuar .Qrax, jurr anxix juanjingsinn decc jyr qetauu-unrdong ee dairjir.”

“Jex liw iarr jaix or!” Maw qingwliw jabhunx ee qniagii. “Dua-siauwiaa jitt quiw nii longxx qapp guarkauw hitt quaw langg decc dauwdin, jinw taukag-lai longxx jit quaw siarhuerjuxgi ee susiongw. Cuar .Qrax jitt jiongw vuwhorlangg ee sing’uac, ix kyxlingg quer be quanwsir :ar.”

Inx qycc kaiqangw .jit .quw .ar. Maw Qingliw sueh qongxx diyh’air singx qywsii, in’ui qongsix iauxx u dairjir beh cuxliw. Ix jid’err lirkuix, viauxjew sui’ an’ laudingw lyc .laii.

“Liw qamxqag ix langg sniaw kuanw?”

Vyxguat bin-aw angg angg, simlai decc sniu qongxx viauxjew nacc jiacc pnaixsimx, tiauqangx qongw jitt jiongw ue beh qra congwdi. Langg’ si dua qingx qongsix ee qingliw, beh nacc knuar ix e jniurbak lehh!

Viauxjew knuar ix byy qongxue, qaqi qewsiok qycc qongw.

“Guaw qamxqag ix si jit xee jnia’ erdangr uaxkyr ee langg.”

“Liw mair mng guaw jex lar. Guaw jit xee cauxdersongg, knuar langg be junw lar.” Vyxguat qongw, tauu ngar ~ ~.

“Duiww qaqi diyh’air u sinwsimx, m tangx knuar qaqi byy diamw. Liw liahjunw guaw jniasit longxx juann prongr jyrhuar jiacc kxangr kiw laii jitt xee xui :ee?”

5

“U langg kar denrue hro guaw bor?” Vyxguat an’ guarkauw dngw .laii, mng dngdecc sew ciax ee suqix.

“Byy lehh. Viauxsiyxjiaw liw decc danw denrue or?”

“Marr byy lar. Cinwcaiw mng .jit .xe nardnia.” Vyxguat hiongr ix suecsia, qingqactauu suee suee qniaa zip kir cur-lai.

Jurjiongg hitt qangx iuhingg dngw .laii, Vyxguat ee simlai dyrr u jit jiongw bogbingg ee qitai, hibang knuar u dycc jit huee denrue narr hiangw, langg’ e huah ix ee miaa bor. Jit qangx danw quer jit qangx, jit vaiw danw quer jit vaiw, ix quatding beh hongwkir danxtai, byy beh qycc jyr jit xee qui’ zit jriuw dirr cur-lai tingwhau denrue ee haixlamgong. Si’angw jaix u jit zit, Juixong Syw laii longr ix ee vangqingmngg, qongw u jit xee javox :ee kar denrue laii beh cue :ix.

“Ar, si liw or.” Vyxguat qra denrue dah dirr hnirkangx, simjong vniawmia decc cnaiw, ciuxqud decc sih.

“Lexvair ervox? Ersaih a. Uatqag ee qonghngg? Hyw.”

Denrue ced driau, Vyxguat cuir naxx liamrquax, naxx beh qniaa dngw kir vangqingx.

“Vyxguat aw Siyxjiaw, duxjiah hitt xee si si’angw?” Juixong Syw mng, qui lehh, ciuw tec jit der baixvor dngdecc crid lautuix.

“Hitt qangx kir sniaa-lai, dirr qeaxlo byiwdiongx siy’ bad :ee.” Vyxguat qra qongw, byy amx byy kamr.

“Qamxx e guaw laurduarlanghni, tniax liauw dingdnaa .kir. Hitt xee sniax tacc e sigsairkuanw aw sigsairkuaw.” Juixong Syw ngingix-ngorngo qaqi decc liam.

Lexvair ervox, snax lxauu ee kecvangg duiwduu gua, Cuar .Qrax qui’ dongr lau’axcur si jing jiaucjiauh, byy jit sxix aw sniax. Druar dirr kecvangg ee langg byingg ciccih. Snaaxqer dingxquann ee snxax longxx ho’ngg vrag lyc laii hed druar bincngg-dingw, qaxnaxx lordnar-aw decc huah siogbe :ee.

Vyxguat dirr vangqingx-lai decc qig sincing, vnrix texben. Jitt niaw qunn qah hitt niaw siaju; jitt diauu dngkor puer hitt niaw unrdongrsnax. Bruw beh qui’ diamxjingx quw, benxqiongw hro ix jrngx qaxx jit sxux kacc e knuawkauw :ee, pen’ pen’ aw qycc kiamr jit siangx suwpuer ee ree-aw tangx cing. Ix decc kyxlu beh cing ngiuhogjongx, qycc qniax e sniu’ jiahbak, bersux beh kir jiac jiuxhundyh.

Vyxguat tnewsaix jre dirr bincngg dingw, duiww kangx lylyx ee snaduu-aw trow duarkuir.

“Cue byy snxax tangx cing? Laii, jitt sxux tec kir cir knuar mai lehh, ingwqaix u hac liw cing jiacc driyc.”

Viauxjew tec jit sxux zirlamm, vowbin punr vec huex-aw ee ngiujongx laii qaur Vyxguat ee vangqingx.

“Bering did lar, lanw nng xee sinjaii byy qangg.” Vyxguat qongw.

“Liw hongwsimx lar, hex si guaw jyr siyxjiaw ee sijun decc cing :ee. Hitt dangjun guaw kacc pangr, byy jitt jun jiacc sanw.”

Viauxjew qycc qra snxax dux hro ix. Vyxguat snxax ngua hyw, qniaa kir qniawdaii taujingg.

Qyxjinx jin’ qacsinx!

Vyxguat qra viauxjew suecsia, quatding beh cing jitt sxux kir hur iokhue.

Viauxjixmue nng langg siy’ kanx lyc lautuix. Duartniax u baciokziw-aw ee sniax. Inx horsiongx duiwknuar, cuiwjic tongw .jit .xe.

Jingg quer, Vyxguat lyc snuax byy singx vywvi, tniax viauxjew decc qongw, dua-naixnaiw jin’ byy hnuahiw, hitt zit, viauxjew qui’ qangx hro ix liam be suah.

“Jin’ sitlew. Guaw qapp langg’ iog hyw :ar, ing’amr byy huatdo vruee liw jiah’amr.” Vyxguat qniaa uaw .kir hiongr ix vywqyr.

Lingrgua snax xee iarr dua-naixnaiw ee huer. Sir xee obasang, dangx, lamm, saix, vag, jit langg jre jit hiongr, qimqongx siamxsiamw, qimpuahlen, qimciuxjiw, qimciuxsyh, iauxx u suanrjiyc, bexlyw, gxik-aw, qimginn juvyw jin cud.

“Hnaax, hnaax, liw qongw sniaw. Aiior, guaw tacc e kir pah hitt qix.” Dua-naixnaiw qra inx nng xee viauxjixmue ror. “Byy-dair.-byy-jir laii jiax decc caxvanx, hai guaw tiah m driyc duir.”

Vyxguat qra hue sitlew, qinw qycc qongw jit vaiw.

“Linw daux ee jaboxginxaw longxx jnia’ kiangr, dertauu iauxx bue jiauu sik, dyrr u jaidiau dirr guarkauw qapp langg' decc qauvuee.”

Dua-naixnaiw qra sngx. Jitt sii, duiwbin kax huah qaur.

“Qaur hitt qix.” Dua-naixnaiw dua sniax huah. “Qniazit sidjai u qraur pnaiw i, juanx guaw decc vangwcingr. M jaix si’angw decc qra guaw daiwsuex. Quiw daii lar?”

Vyxguat knuar viauxjew. Viauxjew gniauccuir jriw hiongr duarmngg, sraiw jit xe aw bagbuew rair ix qinw cutmngg.

“Vyxguat aw Siyxjiaw, liw beh cud kir iokhue or?” Vyxguat dirr mngkakauw qapp suqix siy’ drng.

“Kir sniaa-lai .jit .jua, kacc nguar jiacc e dngw .laii.”

“Driyc lar, liw iauxx siauwlenn-l., diyhh kacc jiap cud kir cittyy lehh.” Suqix qongw. “Cuar .Qrax longxx jit quaw laurhuexaw, liw unxdangr qamxqag jiokk byy pnua :ee.”

Cur-gua iamrtnix ciaczit, vutjiw aw siyzuac. Vyxguat qniax pagzit, tiauqangx qingw u ngw jitt vingg qniaa. Laii qaur nng langg iog beh siy’ danw ee liangdingg-aw-kax, lairdew byy vnuar langg. Ix krir sui’ jyh .kiw .laii, bin-aw caur caur uat dngw srinx, suacc knuar diyc Galan dyrr kia dirr ix kajiah-au.

“Liw si tiauqowir beh qa’ngg hnecqniax, si .m? Byy-dniu.-byy-dii jauw .cud .laii, dyrr m si hitt hy mngwsngr :ee qyc.”

“Liw jiacc byy dnaw, beh anwjnuaw jyr guaw ee jaboxving’iuw?”

“Liw decc suiw bin lar. Si’angw air jyr liw ee jaboxving’iuw!”

Vyxguat qra grinn, jiacc huathen duiwhongx ee nng luiw ang'axzinn jiokk be dniardiyc.

“Liw cing jitt sxux snxax jin’ hyw knuar.” Galan qra ylyw, snia’auu qe qe.

“Dysia.”

Galan cuiwciux byy kaux, taumngg qycc jin’ quw byy tir ee kuanw, snakor iaxx sngr u jingxjee, mrqycc ix hitt siangx ree-aw dyrr knuar be cud laii qongxx guandew qamxx dyrr si tosig :ee.

“Iarr byy cing kacc vicjah lehh. Bycaiw guaw decc jrngx.” Vyxguat simlai decc liam.

Lorvnix u tingg jit daii huatjai’aw. Vyxguat tauduxjiah beh laii ee sijun dyrr u knuar .diyc .ar. Hitt jun ix iauxx decc sniu qongxx, dirr jitt kuanw qyqib siarkux, nacc u langg sraiw jitt jiongw qoxloxsogqow ee ciax lehh? Survutliau, Galan suacc qra huatjai’aw ee ciamngg kuix .kuix, ngawiyx hiongr ix jyr jit xee iaucniaw ee juser.

“Jex ciax liw ee?” Vyxguat mng, kauxkir jin’ sitbong ee kuanw.

“M si. Jex si guaw jyr toxcat-aw kir qa’ngg taux kanx .laii .ee.”

Vyxguat tniax .jit .xe suacc ciyr .cud .laii. Ix tiaur jnriu ciax, simqnuax qui’ee cingcaiw .kiw .laii.

Beh lyc snuax ee lo u quixarr diauu, sraiw byy quiw lxiw hng, dyrr u jit xee qaplo. Galan lorcauw jin’ sik, dagg diauu dy’ zin qaxx jiokk jinx :ee.

“Qamxx qongxx, ix jniasit druar dirr jiax?” Vyxguat amwsniu.

Sniaa-lai ee undo viw did snuax-dingw, siongrr byy qex lecc nng dxo. Huatjai’aw byy anx lingxkir, snuahongx liangg liangg aw, ciatangx qaw .lyc .laii, qycc iaxx jin’ suwsi. Snuax-kax dyrr byy qangg :ar. Bexlo longxx jiauu ciax, lau’axcur qycc kiw ping quann :ee, hongx beh qniaa, siwquer longxx e kir gai diyc viah. Vyxguat tec ciuxqinx-aw crid qnua, liauxau, qycc qra jyr kuesnir decc edhongx.

“Guaw qiycsirr lamvorlangg kacc e dongr zuac.” Galan qongw.

“Guanw lamvo zuac bongxx zuac, dy' iarr byy cincniu linw vakvo jiacc hib .diyc, kap be diyc dyrr e lrauu qui’ sinkux qnua, uahbeh ciac’iac .siw.”

Galan dimr tauu, binriongg jin’ giamsiok, qaxnaxx venr jitt xee kuanw, byy siongsii hitt jiongw diwduh ee viauxjingg.

“Jiax qanxnaxx berdangr tingg neh.”

Vyxguat lyc ciax, knuar diyc tokax ee ngg snuar qra vyr qinw qinw.

“Cab cab .ix. Dangqongxaxciax, inx beh tuax, dyrr quikir hro inx.”

Galan qniaa jywtauu, Vyxguat vnuar qniaa vnuar jauw duer dirr ix aurviah. Qaur jit dongr snax janr lxauu-aw ee vnuar qu cur taujingg, Galan cic denrlingg. Lingxxx---. Lingxlingx. Lingxxx----. Jit xee dngg sniax, nng xee dew sniax, suar .lyc, qycjaiww jit xee dngg sniax. Vyxguat decc iyh, hex qiamxcaiw si inx ee amwhy.

Duarmngg kuix .kuix, inx vreh kir laubuexdingw hitt janr. Viah-dingw u jit der vehtic’axvangx, dingxquann u kig zri, siaw qongxx:

Qanglangg Jojid Vunxngiaa.

Jnia’ jap pnee ee vangqingx-lai longxx jiauu langg, lenrr beh qniasuaw jit vo dy’ kunwlann. Galan siaurqair Vyxguat hro dag’ee sigsai. Pacsngr jitt xee soxjai byw :ee jairlaii kacc jiyw, jingwlangg duiww ix jin’ hyxlew, cniaw ix jiac dee iw nirr jre, qapp ix kaiqangw, rair ix kacc jiap laii.

Langg liamm kax jrih kax qaur. Jap diamw quer, inx kaisiw tyxlun dairjir. Vyxguat qanda’ tniax, byy jaidiau capcuir. Cimxtauu aw ix si tniax qaxx decc sec saibuxlee, kacc quer, jiacc jai’ngiaw qongxx dangsi’aw qnuatniax qapp kiwgiabjuw qauqed, habciuw decc kikvag lyqangx ee hokli. Inx vutbuanw jingwhuw, anwsngr beh kiw langg jyr jit vaiw dua quimoo ee kongwjingx.

Vyxguat simqnuax-lai qniax qniax, kiokk marr qamxqag jin’ ciwqig. Huergi suacqow, qokk langg longxx u sittauu diyhh kir jinwhingg. Vyxguat suibongxx tauu jit vaiw laii, langg’ marr u pacpair kangkuer hro jyr. Ix qapp Galan jit jxox, dauwdin hurjig bunsuanx ee jewjog. Nng xee langg an’ jaixsii bruw qaur duw ehngx, qaidongx jyr :ee jiacc jiamrsii qaur jit xee kamxjam.

“E iaux .be?” Galan mng.

“Iaux qaxx decbeh byy mia :ar.” Vyxguat siangx ciuw dah dirr vakdow-dingw.

Galan jin’ cewpuee, sui’ qongw beh uiwlyy .ix. Vyxguat liahjunw langg’ e cua ix kir cantniax jiac jit xe aw kiwhunx lehh, qetqiok, suacc si dirr hex lorvnidnar-aw jiac covaw :ee. Vyxguat knuar jit xe, qui’ee langg siauhongx sitdang leh .lyc .kir.

“Jitt qingx ee venxsidmi be hamrban juw. Nga sidjai, tngtauu qycc janw, qewsiaur marr jin’ qongdy. Guaw qenww vaiw laii jiax, longxx e laii qra qauquanx .jit .nguaw jiacc qamguan dngw .kir. Narr byy, hitt amr unxdangr e genr qaxx kunr be kir.”

Iarr byy cunn jit xe aw Vyxguat ee iwsur, Galan dua-jux.-dua-ir qra tauqex qiyr nng nguaw venxsidmi.

“Guaw byy air jiac dibah neh!” Vyxguat qongw.

“Jitt qingx ee venxsit qapp langg’ byy qangg. Liw kacc danw cir knuar mai dyrr jaix. Byy-dniar.-byy-diyc liw e qapp guaw qangrkuanw, jiac jit vaiw nia dyrr diauu .diauu, aurzit aw suacc dniardniarr vniar laii jiax jiac marr byy dikkag.”

Jauxdyh :ee qra nng der dua nguaxtauu ee mi sangr qaur inx binrtaujingg. Sianglangg dangjee drang di. Byy snax xee ciuw, javox :ee hitt nguaw mi sui’ ho’ngg hud qaxx qngx damdamx, nguaw-drew qapp dngtnix ee vehzit siy’ duiwsiongr.

Galan qra nguaw dux duiww vnix:a kir, nng luiw bagjiux liuliux ciuciux knuar Vyxguat jit tngsii jit tngsii, unliauu aw sangr zip kir cuir nirr decc vro.

“Liw si decc qa’ngg knuar sniaw?”

“Knuar liw jiac mihqnia jnia’ iuwsiur kuanw.” Galan ciqyx-sinn, siakir siakir.

“Guaw jiahvng snesingr viw langg’ kacc ban lar. Liw narr be danw .did, ersaih jyww liw singx jauw a.”

“Liw sniu juac .kir .ar lar. Guaw jinjniar decc qra liw ylyw neh! Hyw simx kir hro luii jimx. Sidjai jnia’ m dat.”

Vyxguat cuiwkixqinx qa ann ann, satsimx byy beh ciyr .cud .laii. Si’angw jaix ix kuir cuanw jit xe byy duxhyw, jak .diyc suacc kiw qasaur.

“M dyrr m tangx jiac jiacc hiongg .diyc. Knuax knuax aw jiac, lanw dyrr iarr byy decc qnuaw siqanx.” Galan qew hyw ir, cuir-aw ciyr birsi.

“Guanw guersingx iaxx jiokk ser hanr, guaw diyhh qnuaw dngw kir qra guanw viauxjew draur cua, byy ingqangx qapp liw dirr jiax decc ciavnuaa!”

“Liw qapp linw viauxjew jin’ cinx?” Galan mng.

“Acc dyrr nihuer uaw uaw, kacc u ue qongw.”

“Lanw nng xee nihuer marr jin’ uaw.”

Vyxguat tniax jit xe, qui’ sinkux siyzuac .kiw .laii.

“Liw qamxx u qapp langg decc qniaa?”

Langg’ dac diyc qihue, dniardiyc be jiacc qanxdanx dyrr vangwsuah. Vyxguat simqnuatauu bangg bangg luan luan, huanlyw beh jnaixaxngiu qra jitt xee bunrdee nuaa lehh. Hyxdid ix iauxx sngr linglai u simkiaur, taukag-lai sniu diyc jit xee langg, dyrr qra denw qongxx,

“Guanw viauxjexhux ee qongsix u jit xee qingliw, sner Maw, jiokk u bingsu-kuir. Ix qenww vaiw kir guanw viauxjexhux inx daux, longxx e cue guaw kaiqangw. Guaw qapp ix tangx qrangw :ee qycc vutjiw aw je.”

“Jyr qaur qingliw! Ix huewtauu m dyrr u .jit .quaw .ar?”

Tniax ix qongxue anxnix sngx qiucqiuh, Vyxguat qamxqag jinjniar cuwbi. Ix iyh duiwhongx unw si enw dyw cowtongw, dyrr tiauqangx beh qra congwdi. “Niqiw kacc dua, kacc e uaxkyr .did. Liw byy tniax langg decc qongw, laurlangg lau vo dnia.”

“Liw duiww ix qamxx u liauxqaiw? Nacc e jit xee javolangg jiac qaxx jiacc lau :ar iaxx byy cuarbow. Guaw knuar ix unxdangr u bunrdee.”

“Langg’ si surgiabsimx kacc dang lar. Liw marr mair jiacc pnaiw simhing, longxx qa'ngg sniu duiww baiw :ee .kir.”

Vyxguat qamxqag ix hitt qxur ue u kacc byy hongdo, be lunw did krir, dyrr sniu beh ter Maw Qingliw cuttauu. Galan binrsig jin’ amwdam, sixsngx sixsngx. Vyxguat iyh ix dairkair iurr decc sniu sniaw kangtauu, narr byy, ix hitt qix cuir tacc u kyxlingg jiacc dniardiyc, dongr hiacc quw longxx byy qongxue.

Mi jiac suah. Galan jnii lap hyxser, knuar jit xe aw ciuxviyw, dyrr duiww Vyxguat qongw,

“Jnia’ sitlew, guaw qapp langg’ iog hyw :ar, diyh’air singx jauw, jitt huee, beh qycc vangr liw jit xee langg qaqi dngw .kir. Lingrqangx guaw cua liw kir jiac hyw liau :ee, sngr si qra liw vuelew. Anxnix hyw bor?”

Ix et jit xe ciuw dyrr jyww ix singx lirkuix. Vyxguat qui’ vakdow huew, krir qaxx cid kxiaur qiongbeh cingwenx.

“Iarr u jitt jxingw :ee, diyhqausngw mrjiacc anxnix. Qew hyxsuex qongw sniaxmic byy decc qnuaw siqanx, uaddngxsinx qycc jyww ix langwliauu. Qxuiw jiacc beh qycc qapp ix cud .laii.”

Lexvair-sii aw, dua hanr ser hanr benw jniurhak, benw siongrvanx, jitt jua dngw .kir, ciax-dingw u quixlyrr xee xui longxx byy langg jre. Vyxguat ee simjingg byy huadlok, zuxx sniu, simqnuax zuxx gingg, kogkok decc qra lrew, uansiuu cunrvan beh qapp langg’ qed dauwdew.

Jit jua nawqngx dngg ~ ~ qra tnix puar jyr nng vingg. Danw .u .jit .quw .ar, luii-sniax knihknic-knehknec jiacc duer lecc cud .laii. Hunn ox ox, qe qe. Vyxguat knuar jitt xee vanrser, jai’ngiaw hongho beh qaur, jid’err lyc ciax, sui’ iong ciongx :ee. Qaur cur taujingg, knuar diyc nng~snax daii qingxcatciax hiyh druar mngkakauw. Ix u jit jiongw pnaiw qetdiau, qui’ sinkux cnecinr .kiw .laii.

“Laur..., lauriaa si… siw :ar.” Suqix bin-aw lig lig, qongxue dingg jic, hiongr cimxx zibmngg ee Vyxguat anxnix vyr.

6

Cur lairdew qngx iamriam, denrhuew dagg pax dy’ dyc :ee. Jit-vah jxig ee denrqiuu-aw decc ciy, iapqag beh narr u didusix, marr tingwhyw knuar qnir qnir.

Cuar .Qrax ee langkectniax bulongrsongr kuah, narr beh dirr jiax vanrjiuw enwkeh, erdangr vaii lecc sir~go der. Cur-lai ee snax xee jaboxlangg snruar dirr snax xui, qokk langg kia li duiwhongx hng hng.

Cur nirr huatsingx miaranr, siw :ee iurqycc si qaqi ee javolangg, dua-naixnaiw dirr ix hitt jiah taiwsuqau’iw cai lecc jre, bin crinr crinr, byy aisiongx ee viauxjingg, bersux jit senx duarvut cai dirr hiax.

Sewii-aw duxhyw qapp duarbow duiwvingw. Ix kaur qaxx qiqitiux, ciuw nirr ee jit diauu hueqinr damm cihcic. M jaix diyc cniqniax, iacc si sniu’ quewtauu siongsimx, ix qui’ sinkux girgi junx, bagsaiw cincniu juixdyrjuiw, lrauu longxx be li.

Cur lairdew iauxx u jit xee jaboxlangg. Juixong Syw tauu qaux qaux, kanx ciuxngw decc crid bagsaiw. Ix qo’ qo’ jit xee kia dirr uaw jiahvngrtniax ee penqag. Vyxguat suixzenn li ix u nng~snax siamm hiacc hng, iuguann tniax e diyc ix decc ceckuir ee sniax.

Vyxguat byy duer inx kaur camx .lyc .kir. Ix vingrr m si tih pah ee simqnuax, qongxx jiacnirr aw byy qamxjingg. Ix duxx qaur soxjai, m jaix jit xee taubuew, jniasit beh kaur, marr kaur byy lo laii. Ix mng suqix jit xee dairkair. Suqix hingr cuccuh, qnuaw beh sueh hro ix jaiqix.

“Beh jiac amr hitt jun aw, itair kir suhenx beh cniaw lauriaa lyc laii jiahvng, suacc dirr laudingw qrix qaxx jit sniax jiokk cnijinx. Guaw ing jongg :ee qnuaw .kir, knuar diyc lauriaa taukag packix, siangx ciuw suee suee jre dirr iw-aw. Guaw qniaa uaw kir, huathen ix cuir-aw kuix kuix, ixqingx byy decc cuanxkuir :ar.” Suqix qongw.

“Inx qamxx u qongw guanw jexhux si anwjnuaw siw :ee?” Vyxguat mng.

“Hingsu qongw, covo qamwding si ho’ngg ing syh-aw cuix .siw .ee. Sixtew ixqingx sangr kir jyr jinr jit vo ee huawgiam. Danw qetqyw cud .laii, dyrr erdangr kakding sixbongg ee siqanx.”

Vyxguat sniu beh qaqi kir laudingw knuar jit xe siongser, vutliau suacc dirr lautuix hro jit xee qingxuann qra ix dongwdauw.

“Inx dirr juvangg dngdecc siujip jingwbut. Lanw jitmaw bersaih kir hiax. Inx qycc qiyr dag’ee longxx diyh’air dirr langkectniax tingwhau, bersaih lirkuix duarmngg jit kax vo.” Suqix ing ciuw qra cuir jac lehh, ser aw sniax duiww Vyxguat qongw. “Inx qongw lanw longxx u kyxlingg si hiongsiuw.”

Laubuexdingw u qongxue ee sniax tuann .lyc .laii. Si nng xee javolangg ee sniax.

“Hiongsiuw ingwqaix u druar ciuxlongg jiacc driyc. Byy, jitt jiogw syh-aw jiacc cox, dikkag e liuwpuee.”

“Guaw knuar si sigsairlangg jyr :ee. Duxjiah guaw u qiamxjax .quer, inx ee vyxjuann jyr qaxx jin’ jairunw.”

Nng xee hingsu naxx qniaa lyc lautuix, naxx decc genxqiur anwjingg. Qidiongx jit xee nihuer kacc dua, taumngg tud tud, dxo pongr pongr, bagjiux ser aw luiw, mrqycc qngx lrai lrai. Lingrgua hitt xee qex jin’ siauwlenn, lywkax, sanxqauu sanxqauu, sinkux-dingw hitt sxux sebily kuaclongsaix. Inx nng langg draur jywhuew, Vyxguat jin’ jurzenn dyrr kir sniu diyc derngiaw lairdew hitt duir Ongg .Qyx qapp Liuw .Qyx.

Jingwlangg dirr kectniax cuxjee. ‘Ongg .Qyx’ langg jin' cer, byy danw juxlangg cniaw, qingw jit der hyw xui dyrr jre .lyc .laii. Ix qra ciuxjicpo henx .kuix, an’ kowde-aw zimm jit vaux hrunx .cud .laii. Luah huexcaa qra hrunx diamw dyc, ix dua dua cuir vog nng xe aw liauxau dyrr qra imr .srid, zen’au an’ nihuer siongrr je :ee mng kiw.

“Lak diamw qaur cid diamw jitt dnxua siqanx, liw e qir did liw decc congr sniaw?”

“Linw decc gii guaw? Hex gunw angx neh! Dnaxx linw marr kacc cavutdyx lehh.” Dua-naixnaiw jin’ pnaiw siausaur.

“Gunw jex si lerhingg-surbu, cniaw liw kacc habjog lehh.” ‘Liuw .Qyx’ hiongwjenn qaixsueh.

“Guaw narr byy beh habjog, linw si beh anwjnuaw? Beh qra guaw liac kir longxaw-lai qnuaix m?”

Dua-naixnaiw krir cuaccuah. ‘Ongg .Qyx’ qinw qra ‘Liuw .Qyx’ sraiw jit xe bak, qiyr ix tewha, ngar srinx uaw duiww dua-naixnaiw ee hnirkangx-vnix qongw, “Siauwlenn :ee kacc byy tongsu, qongxue byy dausaux, liw dyrr mair qapp ix qewqaur.” ‘Ongg .Qyx’ lahix lahix. “Si qongxx, dua-naixnaiw ar, miaranr huatsingx ee sijun, liw langg dirr dyc’ui?”

“Beh amr aw jitt dangjun, guaw guanjai e dirr jaivangg decc jyr qongkyr.” Dua-naixnaiw qongw. “Guaw si decc liamrvut :ee, siuhing dyrr be hur :ar, tacc e kir taii langg lehh? Guaw qongw linw marr jnia’ vutdongw. Linw m dyrr kir mng hitt hy bixle iauqiaux :ee jiacc driyc. Sunrsuar mng knuar qongxx, ix guarkauw kechniaqongx dauwdew u quiw xee!” Dua-naixnaiw bagjiuzinn hiongr viauxjew giyw .jit .xe.

“A'jew, liw qongxue diyh’air u tenliongg, m tangx anxnix beh ut'auw .langg!” Viauxjew bagkox angg ~ ~, naxx qongw bagsaiw naxx lrauu. Ix qniazit byy pah hunw, marr byy diamw enjix, bin vec sicsuad, binriongg vutjiw aw jiaujui.

“Guaw dangsii decc uan’ongw :liw! Liw guanvunw dyrr si rid diyc Cuar .Qrax hyw qasu jiacc qer .zip .laii .ee. Dnaxx liw kywser liw qniaw snex :ar m, dyrr rair ix qinw siw tangx did giabsanw. Hingsu dairzinn ar, guaw knuar anxnix byy m driyc lar. Guanw tauu:e dikkag si hro jitt jiah holibaa hai .siw .ee!”

Dua-naixnaiw ciuxqud crunx dit dit, jingxtauu-aw qiw duiww viauxjew.

Qaur jiax, Vyxguat sidjai knuar be jyr .did, jiacc sniu beh ter viauxjew venrvik, qiogdiongzinn suacc jaw ix jit vo cud sniax.

“Guaw jit xee nngxkax ee jaboxlangg, beh dyhh snex hitt hy kuiwlat qra langg cuix .siw lehh? Byy-jingw.-byy-qur, a’jew, liw si bersaih qamm hueh bu tnix, cinwcaiw beh lua .langg!”

“Liw jitt xee mrjniaa jabow ar, pah langg qycc huah qiur langg! Linw joxmaw qniazit itding beh….”

Duarbow qapp sewii dirr jingwlangg binrtaujingg ruanx be suah. ‘Ongg .Qyx’ knuar m si srer, ix tauu uat .quer, siongr diyc viacqag ee Juixong Syw, dyrr qinw qra qiyr laii taujingg mngranr.

“Hitt jun, guaw qapp zi-naixnaiw dirr vangqingx decc riyx ginxaw kunr. Qinaxzit lexvair, iyqniaxbuw byy laii, guaw diyhh draur cua ginxaw.” Juixong Syw qongxue kehkec cuah.

“Kaksit si anxnix byy m driyc. Jex guaw erdangr jywjingr.” Viauxjew juxdong juer suecbingg.

“Linw itdit longxx dauwdin?”

“Si a, qanda’…” Viauxjew bagtauu qad .laii.

“Qanda’ anwjnuaw?”

Viauxjew bagjiux knuar hiongr Juixong Syw, ue dirr cuir nirr jikdauw kiaa lehh, jin’ pnaiw vaiqaiw ee kuanw.

“Dauwdew anwjnuaw, liw m dyrr qinw qongw!” ‘Liuw .Qyx’ qra cuix.

“Iarr m jaix anwjnuaxngiu driyc, jitt quiw zit aw guaw digvet kuair iaux, jit zit qex jiacc lecc quixlyrr dxngr. Ehngx lak diamw tongw beh jiac amr jinwjingg, guaw ixqingx iaux qaxx dongr be diauu :ar, dyrr vaiwtog Juixong Syw kir jauwkax kad jit nguaw mua’iuxjiuw hro guaw singx tun vakdow jixqix .jit .xe.”

“Narr anxnix qongw, liw dyrr berdangr jyr ix byy jairdniuu ee jingwbingg.” ‘Liuw .Qyx’ qongw.

Viauxjew jin’ uilann, m jaix diyhh dimr tauu iacc iyy tauu. Juixong Syw qinw knuar duiww dua-naixnaiw hitt vingg kir, henxzenn si decc tyw qiuwvingx. Dua-naixnaiw cuiwerhamm giac quann quann, qig kyy kyy byy decc qra sinwdauw. Juixong Syw knuar jitt xee vanrser jiacc jaix kow. Ix qui’ sinkux kiw qa'imx, bin-aw liksig.

“Guanw duxjiah dirr laudingw, huatqenr henrdniuu byy singg u siy’ jringx, siy’ pah .quer ee kuanw. Jiokqenr, sixjiaw quewkuir jinwjingg vingrr byy qunxlingr jin’ quw, hiongsiuw si nng xee vnuar ciuw dyrr qra ix cuix .siw .ee.” Jnia’ quw longxx byy cud sniax ee ‘Ongg .Qyx’ jin’ lingxjing decc hunsig. “Jiauww anxnix laii cuilun, hiongsiuw vitding jin’ u ciuxlat jiacc driyc, ingwdongx si javox :ee kacc duarbin, jabow :ee marr m si byy kyxlingg.”

Jitt qxur jiacc qongw suah, jairdniuu jingwlangg longxx knuar hiongr suqix.

“Guaw byy! Lauriaa m si guaw taii :ee! Byy-in.-byy-dnuax, guaw taii ix si beh nii?”

Suqix dua sniax decc ziangw, qui’ee bin angg qongwqongr. ‘Ongg .Qyx’ qniaa uaw .kir, ciuw hnua ix ee qingqactauu, qongw jit quaw ue qra andah. Suqix ee jingsuu u kacc vinghyy .lyc .laii. ‘Ongg .Qyx’ tranr qihue, jin’ hyxcuir mng ix qongxx beh amr aw hitt jun, ix decc congr sniaw.

“Lexvair-sii aw, lauriaa kacc byy air cutmngg. Guaw longxx e tranr jitt xee sijun sew ciax, qycc sunrsuar pah lac.” Suqix tunx jit xe aw cuiwnua qycc qongw. “Jitt xee sittauu, vunxdew ersaih cniar vadd langg jyr. Mrqycc lauriaa knuar jitt daii ciax naxx simqnuabah lehh. Guaw qniax guarkauw ee langg jyr dairjir e kacc kingsinx, kacc be dingxjinx, narr u hunqimx aw jingcax marr si sngxhai. Tauqex duiww lanw dy’ iarr jiacc hyw, gunw jyr langg’ sinlyy :ee qex qra jyr .quaw marr si ingwqaix :ee. Soxdiw jitt qnia sittauu guaw dyrr qaqi qra kiyh laii jyr. Uirdiyhh jitt jann, lauriaa vutsii dyrr decc ylyw guaw, qongxx guaw kuningrqangx, ciax qor qaxx jnia’ qanghux. Ix dniardniarr dirr ciax-dingw decc liam hro guaw tniax, qongxx jingg:a hitt xee si vanrdnua qaxx siw byy langg, qycc qongw…”

“Liw ee iwsur si qongxx, miaranr huatsingx hitt dangjun, liw langg dirr guarkauw, byy zip laii cur-lai?” ‘Ongg .Qyx’ knuar ix kanx sniu’ hng .kir, qinw qra giuw dywdngw .laii.

“Driyc lar, dyrr si anxnix byy cyr.” Suqix qongw.

‘Ongg .Qyx’ qra ix ee ciuxjicpo-aw an’ tauu qaur buew liu quer jit vaiw, mng qongxx qinaxzit qui’ qangx u sniaxmih langg cutzip .quer bor.

Suqix jin’ u jursinr, jit sniax dyrr qra rinr byy. Danrsi uat jit linr dngw, sui’ qycc voxciongx qongxx, “Guanw viauxsiyxjiaw qniazit u lyc snuax kir hur iokhue. Guaw jaixkiw u qra kuix mngg. Ix tauduxjiah jiacc qaur cur.”

“Viauxsiyxjiaw?” ‘Ongg .Qyx’ bagjiuzinn siwquer decc saur. Jit xe aw quw, ix dyrr siongr duiww Vyxguat jiax laii. “Qnaxx dyrr si liw hnoh?”

Vyxguat dimr tauu.

‘Ongg .Qyx’ liac ix knuar .jit .xe, taukag sui’ qycc uat .dngw .kir, byy hingwcur beh jyr jinr jit vo liauxqaiw ee kuanw.

“Qamxx qanda’ sed jit xee mngg nia? U penmngg tangx cutzip bor?” Hingsurjox ee langg beh jauw jinwjingg, ‘Ongg .Qyx’ qycc vow mng jit qxur.

“U jit xee aurbuewmngg erdangr taur jauwkax.” Suqix huedab.

“Qamxx u syxsii tangx kuix?”

“U. Cur nirr ee langg sui’ langg longxx u jit qix.”

“Cur nirr ee langg? Dyrr si jairdniuu linw jitt quiw xee?”

“Dua-siauwiaa marr u jit qix. Mrqycc ix byy dirr cur nirr druar.” Suqix qongw.

“Dua-siauwiaa? Beh anwjnuaw qapp ix taci?”

Suqix vyr denrue hro :ix, ‘Ongg .Qyx’ qra ix hitt vunw ciuxjicpo-aw tec cud laii siaw, liauxau, ix huah ix ee vorha junxvi siuqangx. Danw inx qui’ jxox zinmaw ted lirkuix Cuar .Qrax, cur lairdew ee langg qokk langg dngw kir qaqi ee vangqingx. Denrhuew sui’ pax aw ho’ngg qimr huax .kir. Itdit qaur tnix qngx bin’axjair, qui’ qingx cur jiacc u qycc qnir diyc qngx.

7

“Guaw dangxsurdniuw huzinn neh! Dnaxx dangxsurdniuw dyrr gniauctanx .kir .ar, qongsix si anwjnuaw berdangr hro guaw hnua?”

“Liw anxnix qongw, jingliw-siong suizenn e tongx, mrqycc huatliw-siong henrvuthen dyrr kia be jai a!”

“Liw duer lauriaa hiacc quw :ar, ix knuar liw si naxx simvag lehh. Lanw Cuar .Qrax ee qangsanx qiongqiongg beh lyc dirr guarkauxlangg ee ciuxtauu, liw anxnix qamxx knuar e jyr .did?”

“Byy, liw beh qiyr guaw anwjnuaw lehh? Landau beh vig guaw kir jyr huanrhuad ee dairjir?”

“Guaw bad liw bad qaxx u cunx. Narr beh qongw diyc jngr huatlut ee amkangx, byy langg viw liw kacc kiangr. Guaw jai’ngiaw liw itding u huatdo, beh qapp m nardnia.”

“Sitlew. Laukax langg je .laii .ar. Guanw viauxjew qiyr guaw laii cniaw liw lyc .kir.”

Vyxguat kia dirr juvangg ee mngcuir, bin hiongr dua-naixnaiw decc qongw.

“Jai’ngiaw :ar. Liw erdangr lyc .kir .ar.”

Dua-naixnaiw qongxue qig jit xee kuiwkauw, hyw cincniu hongdewniuu decc cekenw qanxvi. Vyxguat hro langg anxnix decc saixpair, dongzenn jin’ be songxkuair. Ix jiokk sniu beh inwcuir, mrqycc qiongg lunw .lyc .laii. Ix sidjai m qramx knuar diyc viauxjew qycc giab dirr diongx:a decc pnaiw jywlangg. Ix qanda’ erdangr dirr simlai qra cyh. Beh qniaa lirkuix jinwjingg, Vyxguat knuar hiongr vangqingx-lai lingrgua hitt xee langg. Ix knuar diyc Maw Qingliw tauu damr damr, bersux tauu vaiw yc jyr cat kir ho’ngg jangx .diyc, qenwsiaur qaxx pnaixser giac tauu kiw laii qnir langg.

Miaranr huatsingx liauw derr snax qangx, hingsurjox ee langg dyrr kar denrue tongdix inx erdangr qra sinsix niaw .dngw .laii .ar. Huat’ix qaixpuar ee qetqyw, cam’ hingsu taukixsingx caicig :ee siy’ siang. Virhairjiaw sixbongg ee guan’inx byy vadd hxang, qyxhe si ho’ngg ing syh-aw cuix .siw .ee byy cyr.

Beh cutsnuax jingg jit qangx, ludsux quaww jit pxangg langg beh laii cur nirr suantok uijiokzi. Jitt jann sngr si inx Cuar .Qrax ee qalairsu, qapp Vyxguat byy dirdai. Ix tiauqowir qiux dirr vangqingx-lai byy beh jairdniuu, kacc benw qycc snex jit quaw ing’axue .cud .laii.

Laii bairsongx ee langg, cinjniaa go-jap, ving’iuw veh-jap, je qaxnaxx snuax lehh, diauwdik marr qiongbeh qruar byy lo. Saiqongx jit kunr cniar qaxx veh xee. Giang’aw qiyr byy tingg, qongdig jyr byy suah.

“Tniax qongxx jit qag ginn dy’ byy vangr hro ix. Dnaxx jitt sniax sewii-aw vnir byy lenw :ar.”

“Ginxaw diyhh qaur zi-jap huer jiacc erdangr qewsingg jaisanw. Lau :ee qycc jai’ngiaw cunn aurvo.”

“Ginxaw iauxx ser hanr, ginxaw ee laurbuw iurqycc jiacc siauwlenn, kacqex ix be hongwsimx.”

“Si qongxx jitt xee sewii-aw urngiaw lirhai dy' driyc, lau :ee, siauwlenn :ee, ix qui’ nguaw pangg!”

“Qaur dnaxx liw jiacc jaix!”

“Ueer! Kacc ser sniax lehh. Ix laii :ar.”

Vyxguat kia dirr jit qix cuwtiau ee aurviah, sun inx ciuw qiw hitt hngx knuar, simqnuax diuh jit xe, qnuaxqinw vniar .quer .kir, huah qongxx, “Galan, liw nacc jauw .laii?”

Ix qniazit cing jit sxux cimx sig ee snaaxkor, mngkax dngg liuciux, nng vingg cuiwpuew hoo lecleh. Vyxguat knuar diyc ix, snax hunx siurkir, cid hunx hnuahiw, simqnuatauu amwdiongx decc liam qongxx, “Jitt xee langg nacc jiacc duarbinrsinn, berhiauw tangx suex. Byy langg cniaw, qaqi laii.”

Viauxjew m jaix an’ dyhh jauw .cud .laii, ix kia dirr inx nng xee ee diongx:a, snia’imx vogziok mng qongxx,

“Linw nng xee u sigsai?”

“Dirr qetauu siy’ bad :ee.” Galan kauxkir jin’ lingxdam. “A’ii, jin’ sitlew, liw ee viauxsiyxmue jiyh .guaw .jit .xe.”

Qongw suah, ix qra Vyxguat ciuw giuw lehh qniaa duiww huehngg .kir. Galan sanw bongxx sanw, ciuxtauu qycc be kinx, vutjiw aw u lat. Vyxguat sniu beh dixkongr, mrqycc duiwhongx go qix jingxtauu-aw naxx syxlen lehh, vrag iarr vrag be did kuix.

Inx laii qaur jit xee kacc piacjing ee soxjai. Vyxguat simlai dairkair aw u iyh diyc ix ee sinhun. Ix jiokk siurkir, krir vadd langg marr krir qaqi. Ix siongsinr byy langg viw ix kacc kamxgong, hro langg hiwlang qaxx jiacc jiahlat qycc m jaix.

“Lanw laii dnaxhap .jit .xe. Guaw cuiwpuew quwjai liw senr, senr qaxx liw ciuw sngx, ciuw tniar, ciuw pongwpa, ciuw lrauw .diyc. Anxnix, lanw nng xee sngr pacduxdit. Liw mair qapp guaw ruanx, hyw bor?”

“Dyrr m si qra tniqongx jiyh dnaw qyc, qapp Cuar .Qrax ee dua-siauwiaa cyxcuir? Ho’ngg hor hor .cud .kir kacc kuair or!”

"Lun vuer, liw sngr dingw renn :ee, guaw iarr diyhh qiyr liw jit sniax a’ii.”

Galan ee bagsinn amwdam, viauxjingg jamxzenn aw sit’ir. Vyxguat knuar ix anxnix, simqnuax iurqycc beh lyhnngw .lyc .laii.

Banrcniaw lehh! Qamxx qongxx jex itcer si….!

Vyxguat ee mngqngw kiw pongr. Ix quair qaqi taukag jiacc baiw, hiamxhiamw dyrr be qir did jitt xee u Vnevomiaa ee javolangg qapp viauxjew ee quanhe. Inx nng langg jaxjingg si zuarr aw nirr aw sionghyw ee aiwzinn-aw, dnaxx, viauxjexhux siw, inx m dyrr erdangr…..!

“Jaboxving'iuw ho'ngg duat .kir, liw hunrkir be sriaux, amwdiongx hiongr linw iongxve he dogciuw!”

Vyxguat diaudidlangg, liac diyc qintauu, jit sniax dyrr beh qra duc puar.

“Liw ee siongxsiongrlik birbenw sniu’ qiongg :ar, luxjingtamr.” Galan qongw. “Ix jairsnix ee sijun, sinlyy longxx byy decc jiyhox, qanda’ qor qaqi tanwjnii. Qongw sit :ee, urdangsii aw guaw jinjniar e kow byy ix kacc jaw siw lehh. Mrqycc sniu huanrr sniu, ix vitqingr cnia’iongw guaw duarhanr. Guaw iarr suacc e hiacc crann, jingwqingx qra hai hai .siw?”

“Guaw iarr m si liw vakdow-lai ee binrtangg, beh nacc jai’ngiaw liw cuir qongw u tangr simqnuax iacc byy? Qycjaiww qongw, dyrr junw guaw siongsinr liw ee ue, vadd langg birvid beh sinr .liw. Linw veaxqniaw be hac, jex si tonglangg jaix :ee.” Vyxguat qongw.

“Liw qongw liauw byy m driyc. Soxiw guaw diyh’air tee cud byy jairdniuu ee jingwbingg.”

Huehngg-lai jin’ diamrjing, vutziqyr, Galan ee snia’imx suacc qe qaxx qiongbeh tniax byy.

“Guaw e qir did hitt qangx liw beh jauw ee sii, tnisig iauxx jnia’ qngx, ingwqaix jiacc go diamw tongw nardnia. Hitt jun liw narr beh qnuaw .dngw .laii, siqanx-siong iauxx hur ~ ~.”

“Dyrr si anxnix mrjiacc decc hai m.” Galan qongw, “Guaw qinaxzit laii, dyrr si beh vaiwtog liw kir hingsurqiok jauw .jit .jua.”

“Beh congr sniaw?”

“Ter guaw kir jywjingr.”

“Jywjingr?”

Galan dimr tauu, duiwcuir qra rinr qongxx, “Hingsurqiok hitt quaw kasiaur, qaqi byy jaidiau pywanr, suacc beh liac guaw kir dixtongw. Inx jitt jam aw dagg qangx longxx laii decc qra guaw dnaxcar, qycc u hitt hy venrix :ee vutli zit duer diauu diauu, hai guaw amwsii be kunr, zit .sii be jiac, langg qojiauu, vni vni byy guankir, taukag gongg, bagjiux bu, kaciuw ….”

“Liw decc sysuw guaw qapp liw tongx kauxqingx?”

Henrhen dyrr decc damlun jit qnia giamsiok ee dairjir, ix suacc decc dniwdenx-lagsiauw. Vyxguat byy nairsingr tniax ix decc lilyx, pacdng qoxvnir, jit qxur ue dyrr beh hro diam .kir. Galan cuir kuix kuix, liongrvid si beh hunsor. Vyxguat hni-aw vniar kangx kangx, jing jing decc tingwhau. Byy pacsngr, ix liyc aw diuduu .jit .xe, suacc dimr tauu rinr jit sniax ‘driyc’.

“Qaxsuw qongxx guaw m kir lehh?” Vyxguat mng.

“Liw hyw simhing, qycc u jingwgirqamw, itding m qramx knuar guaw hro langg' qabuu. Guaw jiokk liauxqaiw liw :ee, driyc m driyc?”

Hyw cuiwhuex, ix qra Vyxguat ee ciuw gim diauu lehh, bagjiuzinn uac linglingx, uanxzenn decc qongxue ee kuanw. Vyxguat simqnuax zuu cangxcangw be ansinn, iarr m jaix diyhh sinr ix iacc m.

Qiyc'axqangx laii decc huah dua-siauwiaa kir kniquanx. Galan jitt sii jiacc kingw vangr ciuw, rinr jit xe sniax dyrr duer langg' kir :ar.

Galan jauw liauxau, Vyxguat qo’ jit langg jre dirr liangdingg-aw lai. Ix jit qix cuixqud tuh cuiwerdauw, knuar air cittyy ee van'iac siwquer decc vuex, decc sngw. Huehngg-lai vah huex jiauu kuix, hyw cincniu horsiongx decc vixping, knuar si’angw ee hueluiw kacc suiw, kacc iam, u jaidiau qra iah’aw snriaa .laii.

Kajiah-au u kavo-sniax. Vyxguat uat tauu, knuar diyc Maw Qingwliw taukag lee lee qniaa duiww ix jiax laii.

“Guaw qiycsirr byy langg dirr jiax. Pnaixser, pnaixser.”

Maw Qingliw hiongr Vyxguat hue sitlew, uat dngw srinx dyrr beh lirkuix. Vyxguat huacsniax qra dongr, qongw jin’ huangingg ix laii ‘qiauxziauw’, qycc mng ix qongxx tacc e jauw laii jiax.

“Lairdew juanx decc girlun uijiog ee dairjir, guarkauw qex kacc cingjing.”

Vyxguat mng uijiog dairkair aw ee lueriongg. Maw Qingliw sueh hro ix tniax, qongw qongsix ee qoxhun, qapp jit quaw giabdew vutdongrsanw, dua vorhun longxx lauu hro zi-siauwiaa qewsingg.

“Mrqycc, guanw guersingx iaxx angngex-aw neh!” Vyxguat qongw.

“Lauriaa u huwjiok-juzi, rair guaw jyr ser hanr siauwiaa ee qamwhorzinn. Ser hanr siauwiaa bue singdingx jinwjingg, lauriaa lauu hro ix ee jaisanw, juanvo iu’ guaw laii dai ix qingquanw.”

“Dongcox viauxjew jiacnirr aw zedsimx siaurqair guaw qapp Maw Qingliw sigsai, boghuix u ix ee pacsngr dilehh?” Vyxguat simlai decc iyh.

“Lauriaa jairsnix ee sijun, singqewqniaw u sniu beh ngua langg, u iwhiongr beh qaiw uijiokzi.” Maw Qingliw dam dam aw qongw kiw.

“Qaiw uijiokzi! Qaiw anwjnuaw?”

Maw Qingliw bagtauu qad qad, u decc diuduu ee kuanw. Suangniau .jit .quw .aw, ix duiww Vyxguat sueh jiauwsit.

“Dua-siauwiaa kacc air qapp qe qaijann ee langg qauvuee, jex vunxjniaa si byy sniaw tangx hyw girlun :ee. Kacc hai :ee si qongxx, inx hitt quaw langg bingg ciangr decc huanw dua kiwgiabjuw, jex dyrr hro lauriaa jin’ be songxkuair.” Maw Qingliw hiyh .jit .kunr .aw qewsiok qycc qongw. “Ser hanr siauwiaa duxx cutsir byy zuarr quw, lauriaa dyrr qra guaw qiyr kir camsiongg beh siuqaiw uijiokzi ee dairjir. Ix qongw ix jit sxenw jnii dy’ byy beh lauu hro dua-siauwiaa, in’ui dua-siauwiaa cam’ guarkauwlangg dauwkangx, hyjee decc qapp ix jywduir.”

“Buew:a lehh, qamxx u qaiw?” Vyxguat duiwcuir qra mng.

“Byy.”

“Si anwjnuaw?”

“In’ui zi-naixnaiw decc dongr.”

Vyxguat qamxqag taukag qaxnaxx duxx hro langg ing quntaubuw dua dua lat bog jit xe, jiokk tniar, jiokk tniar, mrqycc langg suacc cingcnew .kiw .laii.

“Guanw viauxjew dauwdew anwjnuaw suechok guanw viauxjexhux :ee?” Vyxguat mng.

“Guanw zi-naixnaiw si decc huanlyw qongxx jitt sniax qaiw .lyc, qniax juer e lyc langg ee cuiwdunpuee. Inx e qongw lauriaa cinsniqniaw jid’err snix .qaur .der, iongxjuw sui’ beh qra vangwsnix danr hetqak .kir.”

Vyxguat binrsig iux iux. Maw Qingliw knuar ix byy sniasueh, sui’ qycc qongw suar .lyc .kir.

“Zi-naixnaiw liaurliw dairjir jnia’ u qinjad, erhiauw dairsingx kir qowlu diyc jitt hxang, iarr bogquair guanw lauriaa jairsnix ee sijun e qra tniar simsimx, siyh miarmia. Mrqycc lanw qongw jit qxur jinx :ee, junxnarr zi-naixnaiw iuxsow amkamr, ix simqnuax-lai sidjai si uirr dua-siauwiaa decc setsiongw jiacc cutbin laii joxjiw, jex lanw iarr erdangr liongrqaiw. Dngcuex langg’ inx nng langg ee qamxjingg si vruac jiokk cimx :ee. Zi-naixnaiw e ui ix, jex marr byy qiquair.”

Viauxjew qapp Galan ee luanjingg, kacc jaw ixjingg, Maw Qingliw bad cyxqidairliok duiww ix qongw .quer. Hitt dangsii, Vyxguat qaxnaxx decc tniax qongxqow lehh, tniax qaxx jin’ simsig, mrqycc simlai vingrr byy quawir, tniax .quer dyrr junw duxx suah. Qangrkuanw ee qowsu, jitt jun tniax .kiw .laii, suacc qex jiokk jinx, jiokk sit :ee.

Ix sniu kiw diyc ix hitt xee byy singg laurve marr byy singg laurbuw ee guersingx. Qamxx qongxx…..!

“Uirdiyhh uijiog ee dairjir, guanw zi-naixnaiw jinjniar si ingrsimx qewqaur. Ix kar denrue qra dua-siauwiaa qiyr .dngw .laii, rair ix qapp lauriaa hyqaiw. Qetqyw…”

“Qetqyw inx nng xee veaxqniaw iurqycc kiw uanqex. Dampnuar sitvai.” Vyxguat qra ue jriab .kir.

“Liw nacc e jaix?”

Vyxguat cinwciyr, vangr diam diam byy qra rinr. Mrqycc ix simlai amr amr aw decc liam qongxx, “Guaw tacc e m jaix? Hitt zit ix uirdiyhh beh qnuaw dngw laii jiamr qehuew, qra guaw jit xee langg vangr dirr qeaxlo, juwsuex suacc hro guaw dirr mngkauw jangx .diyc.”

“Vyxguat Siyxjiaw, liw decc sniu sniaw?”

Vyxguat byy huedab, dyww mng ix qongxx hingsu qamxx jai’ngiaw jitt hxang dairjir.

“Guaw nacc qnaw qongw! Jitt kuanw jingwsuu duiww guanw dua-siauwiaa si jiokk vutli :ee.”

Ue qongw qaur jiax, surjingg ee qinbyw, Vyxguat iokliok u liac diyc mec ar. Jitt duir qu jingzinn, uirr air, marr uirr jaii, habboo qra inx viauxjexhux hai .siw!

Ix ee simjingg jiokk dimdang, jiokk dimdang. Dirr juadbong-diongx, u jit xee liamrtauu hutzenqanx an’ ix taukag siamw .quer.

“Liw qamxx jai’ngiaw hueqanx ee dairjir?” Vyxguat mng, bagjiuzinn u qngx.

“Hueqanx? Sniaxmiw hueqanx?”

Vyxguat qnuaxqinw qra hitt amr dirr jauwkax tniax .diyc .ee qongw hro ix jaix, qycc duardnaw jyr jit xee cuiliw, qongxx inx viauxjexhux buerjingrr siw, Juixong Syw ixqingx qra hueqanx bre .kir .ar. In’ui u tniax diyc hongsniax qongxx uijiog beh qaiw, ix qniax dairjir e viakkangx, simqnuax kiw hiongg, suacc quikir qra langg taii .siw.

“Unxdangr si anxnix byy m driyc.” Vyxguat qycc voxciongx jit qxur.

Maw Qingliw tniax liauxau, qongw ix jitt xee cuilun u hac lixlo. Vyxguat simtauu amr hnuahiw, jit sniax dyrr beh kir qra hingsu vywqyr jitt diauu snuawsyh.

“Banrcniaxsi lehh. Cuar .Qrax longxjongw ee jaisanw, guaw u der tangx craa. Acc byy, danw guaw diaujax .quer liauxau, dairjir narr jingwqingx cniurr liw qongw :ee anxnix, lanw jiacc jywhuew laii kir hingsurqiok.”

Vyxguat u dong'ir, mng qongxx dangsii erdangr jai’ngiaw.

“Hex jin’ kuair, liw benw huanlyw. Qinsiok, lanw itding beh qra jax qaur juiw cringx hii henr uijiw.”

Maw Qingliw anxnix qra vyxjingr, qycc qaudair qongxx dirr hex jinwjingg diyhh kacc iapsiab, m tangx qra dairjir laursed .cud .kir.

QUEWJUIXAW

Quixlyrr nii longxx m bad anxnix :ar.

Jyr ginxaw ee sii, inx druar dirr gorqingkiw ee toqatcur. A'maw u snax xee haursnex, jit vangg vunx jit qingx, ix ham’ go~lak xee jikveh jixmue-aw qapp a'maw jnrix jnrix jyr jit qingx kunr jongxpox. Sringx qokdiongx hitt nii, amaw diwvne quewongw. Jurr hitt dangsii kiw, vnuawmee aw decc kunr, samvutsii aw dy’ e u jitt kuanw henrsiong huatsingx. Au .laii, inx qra qu cur tiah driau, huanx jyr snax janr lxauu aw ee tauwtnicur. Marr jin’ qiquair, jitt xee henrsiong jurr anxnix byy .kir. M jnia’ jap nii u :ar, ix liayhjunw ixqingx dngrqinx :ar qongxx.

Vnuar cnew vnuar kunr. Bincngg-buew hitt vingg u langngiaw hnuaw hnuaw. Sniu beh knuar kacc jinx lehh, bagjiupuee qaiww singg hro langg ing qoo-aw qoo lehh, kacc vreh dy’ vreh be kuix; sniu beh duiww hitt quaw langg huah qiuwmia, cuir dax auu kuah, sen’ qiyr dy’ qiyr be cud sniax. Sinkux naxx cincniu hro sniaxmih mihqnia deh diauu lehh. Jin’ sniu beh qra sag .kuix, danrsi kaqud qapp ciuxqud qan’ qan’ aw giac be kiw .laii.

Iaxx si vangr hro kunr kacc dit.

Ix anxnix quatding. Dng’ ix duxjiacc beh kunr lyc binn, hex snia’imx suacc cingcyw .kiw .laii.

Lxamm 1: Syh-aw u jah .kir bor?

Lxamm 2: Beh tacc e byy? Jitt hxang siongrr iauwqinw.

Lxamm 1: Ciuxlongg lehh? U duar .byy?

Lxamm 2: U lar, guaw ducjiah jiacc qra vrag .lyc .laii.

Lxamm 1: U hro langg knuar .diyc bor?

Lxamm 2: Byy lar. Guaw longxx vran hyxser :ar. Unw tywdongr :ee. Liw jyww liw hongwsimx lar.

Lxamm 1: Hongwsimx decc jnia’ quw lehh, hongwsimx. Qongxue iarr m jaix diyhh lunxcuir, qenww vaiw longxx diyhh duer dirr auviah decc qra liw crid kacngx.

Lxamm 2: Guaw tacc e jai’ngiaw ix e bih dirr lautuitauu decc taux tniax. Vnuar lo jauw jit xee Tniaa Qarqimx .cud .laii. Sidjai u qraur suesiauu :ee.

Luw: Lanw qamxx diyhh jyr qaur jiacc juat? Danw ix jingsinn, guaw laii qra andah .jit .xe, huanrser ix e tniax guaw ee cuir marr byy dikkag.

Lxamm 1: Jamw cauw narr byy dng qinx li, lau qinx si e qycc huad sinx qix. Byy dniardiyc jniasit si ix miarsor qaix jin. Jaw m laii, ban m laii, cauwkiauw qingw jitt jun laii hur siw.

Lxamm 2: Hneh m. Byy, iarr u jiacc qrii :ee. Tnide kuah liuliux, pen’ pen’ aw hro ix kir drng diyc hitt xee byy-langg-ee.

Luw: Beh jaix e venr qaxx jitt jxingw, dongqisii guaw dyrr byy ingwqaix dong’ir linw jinwhingg jitt hxang qewboo.

Lxamm 1: Dnaxx tauu dy' sew ar, byy tir qamxx e siusuah .did? Lanw haursnix ee jionglaii beh hyw beh baiw, jin knuar dy' knuar jitt vaiw. Liw simqnuax cenban dyrr m tangx lyhnngw .lyc .kir.

Lingxxx…., lingxxx…., lingxxx……

Denrue decc giangx.

Si anwjnuaw byy langg beh kir jriab lehh?

Giangx beh jnia’ jap sniax :ar ne!

Uahbeh jyy .siw .langg!

Dnia .kir .ar.

Hnirkangx tangx siyw hiyh .jit .xe.

Sniaxmic! Linw beh qycc qrangw!

Lxamm 2: Obasang hitt vingg lehh? Qamxx mrbenw liaurliw?

Lxamm 1: Ix kiamr jit xee byy jairdniuu ee jingwbingg, qniax dyrr qniax puawdnaw .kir .ar, qacc jiacc asex, qaqi kir qra iah iah .cud .laii.

Luw: Hueqanx ee dairjir narr viakpuar, hingsu dniardiyc e cue duiww lanw jiax laii. Sii qaur dyrr hai ar.

Lxamm 1: Mrjiacc qongxx diyhh qnuaxqinw bedkiyw.

Lxamm 2: Beh dyrr kacc qinw. Tranr jinw Sex Taiwho qapp obasang kir quachniux byy dilehh. Anwjnuaw, lanw nng xee, si’angw laii?

Lxamm 1: Snesingg diyhh hro liw denw kaciuw. Liw hanwcauw kacc hyw, ciuxlat kacc u.

Lxamm 2: Mrqycc liw u qinggiam, guaw byy.

Dingxdong, dingxdong, dingxdong.

Dycc jit xee cni’axjangg, jitt jun laii caw langg' ee binn.

Eiw! Linw marr kacc hyw simx lehh, mair qanda’ qor kaiqangw, mngg m dyrr kir kuix .jit .xe.

Langngiaw u decc suaw dinxdang :ar.

Tacc jiacc quair. Linw m ngr vangqingmngg hitt vingg kir, suacc ngr bincngg guaw jitt hiongr uaw .laii.

Amrqunw-aw nacc gniaux gniaux?

Linw decc vnir sniaw bangw?

Jiokk qankow :ee!

Linw qinw vangr ciuw lar!

Jitt xee bang tacc e jiacc jinx!

Nacc m qinw cnew .kiw .laii?

Qinw jingsinn lar!

Qiongbeh be cuanxkuir :ar!

Prongr!

Vangqingmngg ho’ngg dua lat sag .kuix.

“Limm Vyxguat, Cuar .Qrax ee miaranr, hiongsiuw dyrr si liw!” Cuanr zip cur-lai ee qingxuann siangx ciuw dnec jit qix dexcingr qiw hiongr bincngg, dua sniax anxnix suanvor.

QETBUEW

Qnagak, ix jitt siwlangg tauu jit vaiw laii jitt kuanw soxjai.

Vyxguat ee tauu damr ~, vutziqyr, ix ee bagjiuzinn byy jit sii dniardiyc, liamvnix hiongr jingg, liamvnix hiongr xe, liamvnix knuar duiww dangx, liamvnix knuar duiww saix, bersux jit vaiw dyrr beh qra knuar hro qauwgiac.

Jit xee angwjangr ee qingxuann qniaa jywjingg. Vyxguat qapp jit din langg duer dirr ix aurviah. Jitt diauu hangrlo dngg lywlyr, hyw cincniu ingxuanw dy’ qniaa be taur.

Qingxuann qra inx cua zip kir jit qingx duartniax, hitt lairdew hro langg qeh jyr nng vingg. Zidqongdingx qngx pnawpnar, dag’ee ee bin knuar .kiw .laii longxx qaxnaxx sixlangg qangrkuanw, vec cangcangx, dngrr huecsig.

Qingxuann anvaii inx jit langg jre jit xui dirr jitt vingg siyw danxhau. Byy zuarr quw, hitt vingg ee ticmngg kuix .kuix, jit din cing qangrkuanw snaaxkor :ee sui’ xee aw qniaa .cud .laii.

Vyxguat knuar diyc vyletangx duiwbin ee langg ee sijun, ix ee bagjiux tenw dua luiw, cuir itdit decc dinxdang be suah. Duiwhongx iyy tauu quaww iyy ciuw, zen’au qiw vnix:a ee denrue, qiyr ix qra denrue giac kiw laii qongw.

“Liw nacc lauu qaxx jit xee hociux jiacc dngg .diyc, uahbeh qniax .siw .langg!” Vyxguat qongw.

“Liw sidjai m bad vyw neh! Jitt hy tauwvinwhoo, jitmaw guanw long'aw-lai zuarr siqniaa lehh! Liw byy qamxqag guaw anxnix qex jiokk singwqeh?” Galan naxx qongw, naxx decc syx hosamr-s. ee cuiwciux.

“Huad qaxx anxnex giangr sirsua, jit xee hociubin knuar diyc y.-yjyx-j., si dyc’ui decc singwqeh? Guaw knuar si liw vandnua kaux cuiwciux kacc urngiaw or!”

Galan tniax liauxau, tauu dywsiangwhniar, cuir-aw kuix ~ ~ ciyr qaxx qogqok qiyr. Ix siangvingg vnix:a criah lringg criah how nng xee dua :ee dangjee huah jit sniax “Kacc diam lehh!”, ix cuir qinw omx .kiw .laii, vixser qa’ngg ce m driyc.

“Guaw sinsiuu dnaxx jiacc laii, iaxx ser buew :ee, duiww langg diyhh kacc vaqed lehh.”

Galan trow cuiwjic, jyr jit xee siauxquixaxbin. Vyxguat hro ix lang qra ciyr haihaix. Danrsi jid’err sniu diyc qniazit jnuaxngiu e dirr jiax qapp ix qniwbin, Vuxguat ee ciywiongg sui’ dyrr byy .kir.

“Liw qamxx jniasit byy beh cud .laii?” Vyxguat mng.

Galan hnair tauu, qongw, “Iuhingg, jibhue, jex si langg tensingx ee quanli. Inx dring okhuad luan liac langg. Guaw jitt vaiw narr qapp inx tywhiap, bagde e ho’ngg knuar byy. Jex duxhyw driongr diyc inx ee qanqer.”

“Mrqycc qamgak ee zidjiw m jin’ qankow quer? Guaw u jxig jit quaw saikiax, u qraur lap liw ee kyliaurqimx.”

“Hex liw lauu lecc aurquer hag jngliamm.” Galan ciyr ciyr aw qongw. “Liw benw ter guaw huanlyw. Snax qywguec narnia, bak jit xe nih dyrr quer :ar. Qycjaiww qongw, dirr jiax jiahvng benw kaix jnii, qycc tanr diyc hiyckunr, nacc e baiw?”

Galan iurqycc decc qig gnoxzin’ue. Vyxguat knuar ix jiacnirr huadlok ee kuanw, dyrr qex kacc hongwsimx :ar.

“Qamxx jai’ngiaw inx jinwhingg qaur dyhh :ar?”

Ix byy-tauu-byy-buew cah jit qxur ue zip .laii. Vyxguat cocox sax byy jit xee tauqinleh, liyc aw digii, sui’au, dyrr huedab qongxx,

“Jyc .zit ee vywjuaw si bre qongxx Maw Qingliw ixqingx ho’ngg kixsor :ar, juermiaa si ‘ok’ir satzinn’. Suqix ter ix kiarhongx jyr knuawtauu :ee, sngr si qiongrhuan, diyhh jywhuew ho’ngg simw.”

“Acc linw viauxjew lehh?”

Vyxguat trow jit kauw kuir, rinr qongxx, “Ix jaix dai byy vyr, inx qangrkuanw beh qra vran.”

Galan tniax liauxau, binrsig venr qaxx jin’ pnaiw knuar.

“Liw decc m qramx ix?” Vyxguat sewzi aw decc cib knuar bai.

“Qongw ter ix decc bycaiw kacc uaw sidjingg.” Galan qongw. “Hyw hyw jit xee hiongcuanx ee qoniuu, jit sii rid diyc langg jnii dua vah, suacc qui’ xee langg venwkuanw .kir.”

“Liw jiacc cingkiwsniur, longxx be siauwsniu langg’ ee jaisanw? Langg’ jid’err qongw ciuxbuexzi beh qaiw, qehuew byy beh vuah hro liw did, liw jauw naxx vuex lehh, sui’ dyrr vniar .dngw .laii.”

Vyxguat liac diyc ix ee uerpang, jit xe dyrr qra cak kangx

“Si’angw qra liw anxnix qongw :ee? Maw Qingliw hnoh?”

Vyxguat dimr tauu.

“Ix ee ue qanda’ driyc jidvnuar.”

“Anwjnuaw qongw driyc jidvnuar?”

Vyxguat jinjniar hnowhenn, bin dux uaw .kir, rair ix qinw qycc qongw suar .lyc .kir.

“Guaw diyhh huan liw mng.” Galan tauu uat duiww vnix:a qig jit xee kuanxser.

“Byy air qongw dyrr tair. Guaw marr hyw laii dngw :ar.”

“Hyw lar hyw lar, guaw qongw, guaw qongw. Liw mair jauw lar!”

Galan jit qix ciuxqud hnua denrue, lingrgua jit qix ciuw dah dirr vyletangx decc qra qojniaa. Vyxguat uat dngw srinx, qra vyletangx hitt vingg ee langg grinn .jit .xee, jiacqycc jre dngw kir ixaxui dingxquann.

“Guanw iongxve u sniu beh qaiw uijiog, jitt diamw, Maw Qingliw byy hausiauu qongw. Mrqycc, guanw iongxve si pacsngr qra guaw hitt xee ser hanr siyxdi-aw ee gxiac qui’ xee beh quer hro guaw, byy beh lauu vnuar sxenw jnii hro ix.”

“Soxdir qongxx, guanw viauxjexhux simqnuadew decc pacdat, iaxx si qapp guanw guersingx-aw u kanlenn.”

Galan dimr tauu, qongw, “Guanw iongxve huaigii qongxx ginxaw m si ix ee jxingw, u anwsngr beh jyr DNA qamwding. Mrqycc ix buerjingrr jinwhingg dyrr ho’ngg knuawpuar kaciuw, suacc laii ohox aijair, jit mia qruix imsix .kir.”

Jitt vxenr, ngua Galan decc trow dua kuir.

“Si qongxx, dongqisii linw uirr jnuaxngiu qongw be hyxser lehh? Tniax langg' qongxx liw hitt amr dngw cur nirr, iurqycc qapp ix qikkamw, si bor?” Vyxguat mng.

“Ix rair guaw juansimx-juan'ir hnua Cuar .Qrax ee surgiap, mair qycc kir cab unrdong ee dairjir. Guaw byy beh jiongg ix, guanw nng xee dyrr kiw siy’ ziongw.”

“Dangsi’aw si anxnix or! Jnia’ iauxsiu, inx suacc qra ue dendywtauu qongw.” Vyxguat jiokk siurkir.

Jitt jann qaudair hunbingg liauxau, Vyxguat sniu beh jai’ngiaw qongxx Cuar .Qrax huatsingx miaranr hitt jun, ix langg dirr dyhh.

“Dirr qonghngg danw linw viauxjew.” Ix tingg .jit .xe qycc qongw. “Lexvaiwzit, guanw iongxve benw kir qongsix. Inx jai’ngiaw hitt qangx liw beh cud kir iokhue, dyrr quatding hitt lexvair herciuw. Linw viauxjew jingg jit amr kar denrue hro :guaw, qongw u iauwqinw ee dairjir beh qapp guaw camsiongg, iog guaw qecdngw zit ee go diamw vnuar dirr cur hurqin ee qonghngg qniwbin. Qetqyw, ix byy cuthen. Buexau guaw jiacc liauxqaiw, hex si inx setqer hyw hyw, tiauiwqor beh hro guaw kiamr byy jairdniuu ee jingwbingg.”

“Au .laii inx huathen guaw qapp liw u sigsai, hitt zit qycc si qapp liw dauwdin cud .kir. Inx qniax puawsu, dyrr tiauqangx qongw liw ee pnaiw ue, hro guaw duiww liw pnaiw inwsiongw.” Vyxguat qaqi voxciongx.

“Langg' decc qongw, ‘Cxenx sngr bxan sngr, m dat did duxdng, jitt qxur ue kaksit urngiaw dy' driyc.”

“Si qongxx nacc e jiacc qrii, qeaxlo langg hiacc je, liw hitt qangx pen’ pen’ aw e kir siongr diyc guaw?” Vyxguat mng.

“Jex qiyr jyr ten’ir, tniqongveh :a jur hyw hyw :ee.”

“Guaw m sinr jex. Liw mair qapp guaw qongw jitt quaw u kangx byy sunw :ee!”

Galan ciyr girgi, pnaixser ~ qongw, “Ingxsii guaw qapp linw viaujew decc qniaa ee sii, guaw bad sangr ix jit duir hnirqaux. Hitt qangx…”

“Hnirqaux! Hex guanw viauxjew jiyh guaw qruar :ee.” Vyxguat huah cud sniax.

“Ix narr jai’ngiaw lanw in’ui hitt duir hnirqaux laii sigsai, m jaix beh zuarr auwnauw.”

Nng xee langg jidsii longxx diamrjing .lyc .laii. U .hiacc .quw .ar, Vyxguat dairsingx qycc cud sniax.

“Lanw lauxsit qongw, inx jitt vaiw ee qewue kaksit jin’ jiujir. Inx ixjaw ter Juixong Syw bre hueqanx tanr kanqau’axliau, jitt jann, m qajair hro guaw tniax .diyc, byy, qiogser kiongxqniax dyrr m si qniazit anxnexsnex :ar.”

“Siyw mia hiamxhiamw dyrr byy .kir, qycc decc qongw qajair. Au huee hnirkangx m dyrr m tangx snix jiacc lrai .diyc.”

Qongw liauw, nng xee langg dangjee ciyr .cud .laii.

“Inx qra cuix siw guanw viauxjexhux ee syh-aw taux cangr dirr liw druar ee soxjai. Danw qaur guaw jid’err siw, byy langg ter liw jyr byy jairdniuu ee jingwbingg, inx dyrr tingwhyw vyr qingxcad kir liw hiax ciaux. Sii qaur, liw kacc vuew dy’ vuew be cringx.” Vyxguat qongw.

“Be baiw oox! Hunsig qaxx iuxdiauu-iuxdnua, u jinwvo.” Galan qra ylyw.

“U jit diamw guaw itdit sniu longxx byy. Liw tacc e jai’ngiaw tangx kir qiur .guaw lehh?”

“Jex or. Acc dyrr guaw binbang bang .diyc .ee.”

“Jniasit :ee!” Vyxguat bagbaii diaur quann quann. Knuar diyc duiwhongx bih cuir decc qansin’axciyr, ix sui’ jai’ngiaw qongxx qaqi iurqycc hro quaiw .kir .ar.

“Guaw beh laii jauw :ar.” Vyxguat qra kiongxhad.

“Liw sidjai jnia’ kokhingg neh, dagg vaiw dy' qra guaw ing jitt vo.” Galan qexngiaw siurkir, lorbuew, iaxx si qinw qra sueh jiauwsit.

“Dingw zit aw, qongsix qra guanqangx vran sintew qiamxjax, quiding soxu ee langg longxx diyhh jiamx huih knuar u drir diyc sniaw kuanw tuanziamxvni bor. Guaw tranr hitt vaiw qihue, u cruw diyc Maw Qingliw ee huih. Sangr kir vnirngi huawgiam liauxau, jingwbingg qongxx ginxaw qyxvitzenn si linw viauxjew qapp ix snix :ee.”

“Liw anwjnuaw e kir huaigii ix lehh?” Vyxguat mng.

“Hitt xee langg i.-imtimx-t., guaw duiww ix itdit longxx byy hyw inwsiongw. DNA qamwding qetqyw cud .laii ixau, guaw taukag-lai byy sniu vadd hxang, qanda’ sniu diyc qongxx liw kyxlingg u guihiamw. Kar denrue beh qiyr liw diyhh sewzi, denrue giangx quixlyrr sniax longxx byy langg jriab; jongg kir beh cue liw, denrlingg cic qui’ vnuar vox, longxx byy langg laii kuix mngg. Diyhqib .qaur .der, suacc hro guaw sniu diyc jit qrer. Guaw jauw kir qingxcatqiok penr inx qongxx liw diyrr si hiongsiuw, qiyr inx qnuaxqinw laii liac liw. Qisit guaw si beh qra liw qiur .cud .laii.”

Qrangw qaur jiax, knuawquanw :ee decc tecnew qongxx benrhue ee siqanx beh qaur :ar.

“Liw u air jiac sniaw bor? Au jua laii, guaw jah laii hro liw jiac.” Vyxguat mng.

“Hex je lor!" Galan duiwcuir riinr. "Guaw u sniu beh jiac jit vunw ‘Siarhuerjuxgi Unrdongrsuw’, jit vunw ‘Qinrdai Qokqax Huatdenxsuw’, lingrgua qycc qrax jit vunw MARX ee ‘Juvunxlun’.”

“Samvad aw !”

Denrue nng vingg ee langg longxx ciyr gix gix, ciywsniax ginxaxdiyh.