Sir-guec jap-cid, vaiwsir
Huanrjiaw, Janx Kaxlenn, zxic-go huer, luxsingr, Lamdaulangg. Jitgiap: hogburgiap.
Dingqir derr snax-jap-zi hy :ee jing jing jre dirr guaw vnix:a ee ixaxui. Guaw taukag damr damr, qui’ simqnuax qor decc tak ciuxtauu ee juliau, byy kuar kir jimjiog jitt xee sner Janx ee siyxjiaw si snex jyr ngii iacc vniw.
“Linw decc knuawjingr ee jinwjingg, narr erdangr dairliok aw singx liauxqaiw vnerlangg ee vuerqingw, duiww vnerjingr ee pnuawduanr qapp catliw qeqiamw e u vangjan.”
Jitt vo si guaw dirr ihagngi decc jyr hagsingx ee sijun, jit xui lak~cid-jap huer, qar vnerlixhak ee lau qauwsiu vangr hro guanw :ee. Ix jiaxee ue, guaw qaur dnaxx iauxx itdit qra kiyh dirr simlai, liam qaxx jin’ sunrliuu. Jitt xee ozisang, qawceh zinrjinx, knuawvne dingxjinx, isut dingxtenx janw, dirr guanw ihagqair sngr si itdingw ee zinbut. Mrqycc ix u jit hxang kiamwdiamw, dyrr si ix longxx qongw hitt hy Daiuann Qokgiw, qycc dauhdauc decc dakala dakala, uerbyw duer diauu diauu. Guaw iauxx e qir did hitt dangsii, ix venrnarr kuix cuir qongxue, dyrr u jit quaw guarsingw-aw ving’iuw amr amr aw decc qra ciyr. Jit quaw kacc get :ee, qycc e yc ix qongxue ee ngiu. Jitt hy viauxenw, poxpenwdig u siurr huangingg. Qiamxcaiw si tak ikyx :ee kywgiap kacc dang, jit quer vnuar quer narr u jitt jiongw :ee laii bongxx jyr texgue, aplik jiacc u der tangx siautauw.
Guaw ee vnerlangg sinkux siyxkuaw drang .jit .xe. Guaw ee tauu jurzendig giaa .kiw .laii.
Jitt xee sner Janx ee siyxjiaw, snax qix go qud, binrsig ng'uix ng'uix, quanwqud giaa giaa, erhaii jiamx jiamx, tauhiac qycc damrvyc aw kog kog. Qoxvuer ee langg longxx qongw jitt hy kuanw snijuer si kiapsir mia ee siongr, veczi kacc kinx :ee si e hro dair .diyc.
“Dyc’ui decc qankow?”
Guaw qra sinkux uad duiww guaw ee vnerlangg, erhaii liyc aw hiongr quann. Guaw ee vnerlangg qapp guaw siy' duiwsiongr, cuiwdunn dinxdang .jit .xe, qanxdanx quiw qxur dyrr qra jingwtauu qaudair hunbingg.
Guaw qra stethoskop, dyrr si tnia'imkir, draur dirr hni-aw, qo’ qix ciuw qra vnerlangg daurniaw ee liuxkaur dag .kuix, liauxau, dyrr qra qesix dah dirr ix ee hingkamw.
“Ingqaix si hequcuanw.” Guaw qra stethoskop vrag .lyc .laii ee sii, guaw ee vnerlangg qra liuw-aw liuw .kiw .laii. “Jitt jiongw vne jin’ yh rix, vitsux rair dngqii dirliauu jiacc erdangr kongwjer.”
Ix dimr tauu. Hex viauxjingg naxx cincniu si jit xee qauwsiu decc kyw ix ee hagsingx, knuar ix duanr liauw u junw iacc byy junw.
“Jitt jiongw vne jin' kauxkir, qaiww hyw u qowding ee isux decc idi kacc tywdongr. Liw qamxx byy cue vadd xee isingx knuar .quer?” Guaw naxx kuix iyhdnuax naxx qra mng.
“U," vnerlangg rinr. "Inx duiwtai guaw, byy singg jit xee jyr sensnilangg ee kuanw.”
Guaw decc quanx ix jitt qxur ue ee iwsur, naxx ing bagjiubuew qra ix ee binriongg siongser qycc knuar quer jit vaiw.
Jre dirr guaw sinkuvnix jitt xee, juadduir m si simxmih tensenx bixluw. Guaw anxnix qongw, ingwdongx u qongdy. Ix ee cuir sniu’ kuah, byy iuwsiur kuanw; bagjiux u dingsunn, mrqycc byy dua luiw; siongrr hai :ee si ix hitt nng jua bagbaii, suee suee, jid’err knuar, dyrr qamxqag suex bin suex bin; dogdok ix hitt qix pni e ylyw .did, lringg ~ ~.
“Narr huatjingr, jitt quanr iyhsngx erdangr qiur liw ee snewmia. Acc narr iyh’uann-aw, hex si beh dauc dauc aw driauu liw ee sintew :ee, diyhh jiauww snax dxngr jiac.”
Iyc-aw kuix hyxser, guaw qra qaudair qongxx au lexvair dikkag diyhh qycc dngw laii knuar, dyrr mng ix simxmih sijun u ingg.
“Guaw simxmih longxx byy, narr siqanx si qui’ vew.”
Ix qacc anxnix qongw, guaw dyrr jiurr guaw ee lirven qra anvaii dirr jaixsii. Ix rinr jit sniax “hyw”, suecsia liauxau, dyrr lirkuix guaw ee “vanrqongsig”.
Sir-guec jap-qauw, vaiwlak
“M dyrr m tangx qor vex vng, cair marr diyhh gneh kir puer, m hyw lunx ciuw neh! Laii lar, jitt vnuaa guaw ee ciuxcair, qex qra guaw pangdniuu .jit .xe.”
Birlaii ee cebyw jre dirr guaw ee duiwbin, jit niaw qoxjuix qoxjuix ee uisuqunn iaxx haa lehh, ciuxqud crunx dngg dngg beh gneh cair hro guaw. Guaw qra di kngr lehh, qnuaxqinw qra nguaw pangg uaw .kir.
Dyh-dingw u sir xee cair: holindau craw siongqox, qylecaiwngiw-aw caw ninzin, jit nguaw vxuu-aw cai diongngx, qycc u iuwsunw lamm maionez jyr lingxvnuaa. Tngx iaxx dirr gasloo decc qrunn, juw ee langg duxjiah u qra guanw toktaur, qongxx si “hniuqox diksunw qiamcair tngx”. Inx daux m si jiahcair :ee, cincniu linghee iacc hicir jitt jiongw hyw liau :ee, dagg guehzit jiac qaxx diyc. Mrqycc cur nirr qaqi decc liaurliw, longxx juw jitt hy byy iuu byy cyx :ee kacc je. Inx jnia’ gauu qor sintew.
“Duarlangg duarjingw :ar, air jiac sniaw ix qaqi erhiauw gneh. Liw mair qra cab lar.” Birlaii ee cehu u iwqenr :ar.
“Sanw qxauw siar juxlangg, jitt qxur liw m bad tniax .quer, si bor? Jiac qaxx anxnix puee vnrix qud. M jaix ee langg, e qiycsirr lanw longxx decc qra koxdok.”
Jitt quiw qxur sidjai jin’ qehhni. Mrqycc guaw iaxx si qinw jrngx jit xee ciywbin. Inx nng xee lau :ee si jiokk gauu qra guaw jimjiog.
“Mamix, liw hongwsimx lar, ix jin’ hyw cri, be qingwjiac. Driyc m driyc?”
Guaw ee fiancee, dyrr si birhuncex, qra guaw nih bak, cuir-aw ciyr bunxbunw. Guaw qinw dimr tauu, quixlyrr xee “driyc” liamm lecc qongw. Ix ee verbuw-aw dirr vnix:a knuar qaxx ciyr bibix, jin’ buanxir ee kuanw.
Qongw jit qxur jinx :ee, guaw byngiaw cincniu fiancee qongw :ee jiacc hyw cuiwdauw. Guaw kacc air jiac bah, samjann qah ensuix unr suanwiongg dauriuu derr id duawqax, jitt bi :ee, kacc je guaw marr jiac .kir. Acc narr cnecair, hex diyh’air knuar kuanw, cniurr ingwcair, eaxcair iacc si vuelingcair, jitt quaw guanw jngkax kacc u decc jingwjyh :ee, guaw in’ui ser hanr ee sii jin’ jiap decc jiac, jitmaw si knuar .diyc dy' qniax.
Zip langg' mngg, sun langg' ir. Jurr qapp fiancee decc qauongw, guaw dyrr ban ban aw decc diaujingw kir puewhap inx ee quanwsir. Quanhe jitt diamw, guaw byy zinruii u sniaw hyw qenwsiaur :ee. Erhiangw cunqiux, jex jiacc si j.-jinjniar-j. ee dairdiongrhux lamjuxhanr.
“Qycc drew .jit .nguaw, caiwbuew hro liw kingg.” Luxjuxlangg decc qra guaw qoxcuix.
“Vnuar nguaw dyrr hyw.” Guaw qongw.
“Beh dyrr drew jit nguaw, iarr u langg drew hitt hy vnuar nguaw :ee? Laii lar, jiax quewsin :ee jongw ow .kir.”
Ix qra guaw ee nguaw tec .kir, jniasit drew jit nguaw jiamx jiamx dngw laii hro :guaw.
Vaiwlak amwsii, guaw narr byy dongvanx, longxx e "hrong bing" laii jiax jiac amwdngr. Guaw birlaii ee dniurlangg si borigsiongx, surgiap jyr vutjiw aw dua. Ix qurdew si rair beh qra joboxqniaw jyr hro ix jit xee nguartiab siyxdi ee haursnex, sngr mngho qapp inx kacc u siy' duir. Guanw dniurmw qniax duiwhongx si liauxbuexaw puawqeqniaw, qehuexcinr qyckacc dangrdauw marr e hro kaix .kir, qamguan qra vyxvuer jaboxqniaw qer hro mnghongx poxtongx :ee, hyxgiahsanr lag jit vnix, u unxding ee taulo dyrr hyw. Dirr guanw jitt quaw “poxtongx :ee” lairdew, isingx hro ix qamxqag kacc qysiong, marr kacc unw tanr. Ix qapp guanw ngirdniuw huzinn si qyluw-sii ee dongcongx, kiarr lau qauvuee, dyrr vaiwtog ix draur jimjiog. Guanw ngirdniuw huzinn qixjenr guaw, qycc jin’ hyw simx, qar guaw diyh’air anwjnuaw “hongrtai” inx jit qehuew-aw. Guaw u tniax ix ee cuir. Qniaa dy' byy snax qywguec, langg’ dyrr qiyr guaw kir sangwdnia, qycc qongw u anwsngr beh jujan guaw kuix jinxsow, simrjiww sed isingquanw hing'ix.
Guaw ee dongsu, iacc si tak ihagngi ee dongyc, inx longxx crua vnivnii si jyr isingx :ee jiamr kacc je; byy, marr crua donghangg :ee, horsu iacc iyhjewsux longxx u. Guaw qapp langg’ kacc byy qangg, birlaii ee kanciuw si tak dethak :ee, qongxx si uirr beh zip Daiuann Dairhak, lenkyw ee hunsor kyr qaur hiax, qaqi air tak :ee byy diauu. Ix qurnii duxx cutgiap, iaxx m bad cud siarhue jiac taulo .quer. Inx daux huwhorqax, byy knuar qaxx hiaxee lansanjnii.
Qapp fiancee lun qaur qewcua jinwjingg, guaw lingrgua iauxx u jit xee cit'aw. Ix si vadd qingx vnerngi ee horsu, langg snex jyr jin’ suiw kuanw, liuxhiyhbaii, dairhicuir, qywsingr qycc unsunn. Guaw qapp ix bad kunr .quer, mrqycc iaxx sngr jin’ cenxqaux, guanw ee dairjir marr m bad qongkaix. Guaw duiww jex jin’ sewzi, byy air longriongg, be cincniu jit quaw javolangg air hongg air denxgee, anwjnuaw decc pna ee dairjir, jin' hingr beh qongw ho'ngg tniax.
Quatding beh jyr hyxgiahlangg ee qniaxsair ixau, guaw dyrr byy qycc jriab hitt xee horsu ee denrue. Ix cue guaw be diyc, liogsiok aw dyrr e liauxzenn ar. Guaw m si byy dnaw, m qnaw dngbin qapp ix cew. Guaw si kyxlu qongxx siyxjiaxlangg binrpuee kacc vyc, guaw anxnix cuxliw, kacc ngiaa bin duiww bin qongw puar hro ix srid lenxben. Guaw ingwqaix byy sngr jyr qra ix vangwsag. Guaw dyrr iarr m bad qongw quer beh crua ix. Zirviw-liongxguan, hyw laii aw hyw kir, horsiongx byy siy’ kiamr.
“Liw dingw vrangx qongw :ee hitt xee 265, lorbuew anwjnuaw?”
265 si guaw jit xee huanrjiaw ee venhy. Jiahvng vaw, dag’ee suaw laii huetniax decc kaiqangw. Guanw dniurlangg jin’ air qapp guaw damlun vnerngi ee dairjir, suibongxx ix si bunguerhanr.
“Beh junxvi qra ciuxsut :ar.” Guaw qanxdanx qra huedab.
“Acc hitt xee 307 :ee lehh?”
“Byy .kir .ar.”
Dyrr si ongxsingx, kiauwdnaiw ee iwsur. Guanw kacc byy air didjiab qongw “siw” jit zri, dyrr qaxnaxx venrngi lairdew byy sed sir lxauu. Qokk hangg qokk giap muixmuixx u jit quaw kirkig dilehh.
“Anxnix marr hyw. Inx daux iarr m si decc u a, suacc e kamx did ix anxnix decc siongdiong jnii. Beh si guaw, guaw jiacc byy beh qui’ nii tangr tnix dyw dirr hiax decc jiac liauw biw. Jaw siw jaw ciausingx, qniaxsunx-aw marr benw duer decc buaa simx buaa qnuax,” dniurlangg jyr jit xee qetlun.
“Linw hro guaw qojniaa .jit .xe. Mair qycc dirr guaw ee binrtaujingg qongw vnerngi ee dairjir, hyw bor? Tniax qaxx uahbeh jag .siw!” Fiancee bin-aw jiamjni jiamjni.
“Si dyrr driyc m,” jyr lauwbuw :ee qra janwsniax. “Laii lar, singx laii jiac juixqyw. Kacc danw beh qrangw jiacqycc qrangw.”
Jiacc qongw suah, ix sui’ ad jit gneh qingjiyx hro :guaw. Qingjiyx ee puee qimqud aw qimqud, siangx tauu kiaux, dingxqaunn longxx byy dingwdiamw.
“Jex qingjiyx jnia’ suiw!” Berjingrr jiac, guaw ylyw dairsingx.
“M na knuawtauu hyw nia, qycc jiokk kiu ne! Qewsiaur marr jin’ qongdy, hen ersaiw jiac, longxx benw runw.” Dniurmw qongw.
“Mamix qa’ngg brew mihqnia, dagg hxang longxx beh bauc qaur ngiaa!” Fiancee duiww guaw qongw.
“Anxnix si dyc’ui decc m hyw? Liw knuar, guaw dyrr qra liw qingw diyc jit xee binrdingxvah ee angsair.”
Fiancee qew jit xee dniungiu qapp dniurmw singrkenn. Inx nng xee buxaxqniaw snex jyr jin’ qangg bin, vnixvuac, jit liap aw qniaw, pni, bak, cuir iarr longxx ser ser xee aw. Guanw dniurmw-aw qycc gauu vyxiongw. Inx nng xee langg jre siy’ uaw, uanxzenn jit duir jixmue-aw qangrkuanw.
“Dadi, guaw si dangsii diyh’air kir Kanada?” Fiancee mng inx laurve.
“Liw narr u srinx, dyrr junxvi rair kir a. Ginxaw jid’err cutsir dyrr si Kanadalangg, dyrr benw cincniu lanw jiacc cenciuw, qycc diyhh kir jre hitt hy ibinn-qnax.” Dniurlangg qongw.
“Guaw qapp vnerngi u ciamx kewiog lip qamguanrzi, berdangr huah jauw dyrr jauw.” Guaw qongw.
“Liw nacc jiacc vutsaixtongx? Guanw iarr byy qongw sui’ dyrr beh vnuax,” dniurmw qongw. “A’qiong :a narr byy pah .laii, liw marr byy itding diyh’air duer lecc kir. Narr beh jyr isingx, liw dirr Daiuann e qex kacc hyw juanw. Si qongxx lanw liongrjaw qra vran hro hyxser, ixbenw sii qraur hur vutqip. Anxnix byy kacc hyw?”
Guaw qinw qycc dimr tauu.
Dniurlangg qongw ix au lexvair beh qapp jit quaw singlixdniuu ee ving’iuw kir pah golf, qiyr guaw kir derkangr qra qiucuee tec cud laii singx crid crid hro qimx. Dngw .laii ee sii, dniurmw qapp fiancee iuguann jre dauwdin, junxnaxx si decc jner qongxx dycc jit vaii ee huawjongpinw kacc hyw ing. M jaix si si’angw tehtauu qongw diyc qoxpiyr, nng duir javox jabow u cue diyc qiongrdongg ee uerdee.
Go-guec cezi, vaiwgo
“Kacc danw horlixsux e qra liw jur jit dxangg sria, liw jiacc qaqi luanw luanw lehh. Guaw iyc-aw kuix snax qangx ee gxiac. Liw narr byy kacc hyw, sii qaur jiacqycc laii. Lanw ngua vadd jiongw iyc-aw cir knuar mai.”
“Benw lar. Liw ee iyc-aw naxx sendanx lehh, jiac jit vaiw dyrr hyw li li :ar. Sensnix ar, qamxunx lar!”
Obasang itdit decc qra guaw suecsia, qycc qongw guaw hyw simx u hyw vywingr, jionglaii itding e inghuaa dua huwquir.
Tak qokdiongx ee sijun, guaw dyrr he quatjir beh jyr isingx. Qydiongx vitgiap camqax lenkyw, hunsor suacc kyw byy qraur, qanda’ erdangr tak kixkyx. Guaw byy kir tak, qra guanw vaa :a qongw guaw beh laii Daivag voxsip, junxvi menii qycc vniar jit vaiw. Guanw vaa :a jit sniax dyrr junw .guaw, qycc sui’ qiyr guanw buw :a kir ba kangx. Guanw buw :a hitt jun ciuxtauu u jit kax uac hue, qycc nng vaiw dyrr taur. Hitt nii suanwtauu jin’ hyw qrer, ix guandew si anwsngr beh siux buew hue tangx qycc kir vak jit kux cann qex jingr jit quaw suanr-aw. Uirdiyhh beh jaivuee dua-qniaw tagceh, ix dyrr qra hue-aw viyx .kiw .laii tangx lap guaw ee voxsibhuir, vangg-jox qapp jit quaw lilixkokkog ee kaiing.
Qecdngw nii, guaw in’ui qinxdniux quewtauu, suacc logde, byy qaxx jit qingx haghau tangx tak. Quer byy zuarr quw, cuix guaw zip ngiaa ee diauwdnuax dyrr qiar qauwui :ar. U tniax qongxx narr jnii qramx kaix, dyrr u der mng langg' anwjnuaw erdangr benw kir jyr vxingx jiac nriuu. Guaw dngw kir qra guanw laurve-aw tyw. Lorbuew jiacc jaix hex si venw .langg .ee, jnii liauw, avingqyx iuguann diyhh kir jyr.
Dirr qundiongx qux beh nng dxangx, dngw .laii, guaw sui’ qycjaiww kir kyw. Jitt vaiw, u hro guaw kyw diauu, suizenn si diaur ciabuew.
Guanw hitt jngx, jurr liauw iaxx m bad u langg tak jiacc quann. Guanw vaa :a jiokk iang jiokk hnuahiw, dyrr pacdyh vangr juixdingjiac, cniaw tong’ jngtauu ee langg laii laurzet. Henxjow-ingjongx, guaw byy hro ix lakdiamw, dagg nii jyr qiphuiwsingx tec jiongxhagqimx. Cuwvnix-taubuew longxx ylyw guanw buw :a gauu snex, qycc qongw ix cuttautnix :ar, aurzit aw danw jyr sensnimaw kir hyw mia.
Iarr m jaix si guanw buw :a kacc byy hokkir, iacc si tniqongveh :a tiauqangx decc congwdi, guaw kyw diauu isingvaii hitt zit, guanw buw :a suacc dirr candiongngx lyxcionghed, jurr anxnix byy huesingx.
“U qaixzet :ar.” Guaw qra qiamxunkir an’ ginxaw ee qyc'erkangx tec .lyc .laii. “Iaxqycc u decc lrauu pnxi bor?”
“Byy ar lar, jitmaw dyrr dna' kuckuh sraur narnia.” Ginxaw ee laurbuw qongw.
“Diyh’air qimwcuir. Vingx :ee, hiamx :ee, longxx m tangx hro jiac. Guaw kuix deh sraur ee iyhjuiw. Sir diamxjingx quw hro limx jit vaiw, diyhh jiauww-kix.-jiauww-qangx m tangx langr.” Guaw qra ginxaw ee laurbuw anxnix huanhur.
“Qra isingx a’jig qongw secseh.”
“Isingx a’jig, secseh.”
Guaw ylyw ix u quaix. Jyr laurbuw :ee marr kogkok qra guaw dimr tauu sueh dysia. Guaw knuar inx buxaxqniaw, qamxqag qongxx zinsingx ee qewdat dyrr dirr jiax.
Huanrjiaw cud .kir liauxau, tranr pang qnuaxqinw kir siauxqaiw .jit .xe. Guarkauw decc tingwhau ee langg jin’ je. An’ venrsow cud .laii, guaw byir aw byir cinwcaiw ngiaw .jit .xe, jid’err knuar diyc ix, bagjiuzinn dyrr byy qycc qniaa dinxdang.
Janx Kaxlenn. Jit qangx vnerlangg knuar beh jnia’ vah xee, nng~snax lexvair quer :ar, marr jin’ qiquair, ix ee miaa guaw iaxx e qir .did. Byy cyr, ix unw si qruar guaw ee mngjinw. Vnerlangg u junxsii laii vywdyr, jex duiww guanw jyr isingx :ee marr sngr si jit jiongw kingxding.
Dngw kir guaw ee qau’iw jre lehh, guaw an’ jit tac vnerligviyw qra ix ee tiux .cud .laii. Lauxsit qongw, guaw m si rair beh genxqiur ix ee vnerjingg, dogdok u jit jiongw sniu beh qra knuar hro taur ee iogbong. Guaw jitt jiongw simtair sidjai jin’ byy juangiap.
“Quanxtax ix. Huanjai, iarr byy langg e jaix.”
Guaw qra vnix:a ee horsu taux siamx .jit .xe, knuar ix decc byingg qaqi ee dairjir, dyrr hongwsimx aw decc tak ciuxtauu ee vnerlik.
“MISS Limm, jitt dniux si m si giap dingdnaa, si vadd langg ee jiacc driyc?”
Horsu uaw laii knuar. “Byy m driyc a.”
“Nacc e...!”
Quawhy vin' tauu vaii, horsu qiyr au jit xee langg zip .laii. Duxaxhyw si ix.
“Liw qongw hex or. Hex guaw quah hro vadd langg .kir .ar.” Janx Kaxlenn ciyr ciyr aw qongw.
“Liw qra jit liap iyjiw quah hro langg’!”
Ix dimr tauu.
“Liw si quah hro jiaa?”
“Jit xee snax-jap tongw huer ee hurzinlangg, guaw jingg:a dirr vnerngi sigsai :ee.” Ix hiyh .jit .xe .aw jiapsuar qycc qongw. “Ix qongw ix sew iyjiw sew beh jit dxangx :ar. Inx angx nng nii jingg qnuavne siw .kir, vangr snax xee iuwqniaw decc hro cniaa. Ix dingw:a qycc u jit xee daqex, bagjiux cnemee, be qniaa be jauw. Jit qekauw-aw kyr ix decc qa’ngg saur lautuix, jit qix saur quer jit qix, bongxx ex bongxx quer. Guaw knuar ix sidjai jin’ kyxlenn, dyrr qra qongw beh quah jit liap iyjiw hro ix.”
Ix decc qongw ee sii, bagsinn jin' uac. Guaw si tniax qaxx simjingg jiokk dimdang, simqnuatauu u jiokk ue, jingcax m jaix diyhh anwjnuaxngiu aw qongw kiw.
Go-guec cego, vaiwid
Derhu jre sir~go diamxjingx quw ee kec’un :ee an’ Hunlimm jngkax laii vnerngi cue :guaw. Ix cua nng xee ginxaw, jit xee ngai, jit xee kanx, lingrgua hitt ciuw qnrua jit xee vauhok-aw, jin’ dimwdauw ee kuanw.
“Qiyr a’vxeh, liw berhiauw qiyr a’vxeh?”
“A’vxeh.” Ginxaw ciyr gix gix, dngdecc tngwkiw, jingg kxiw lag liauw liauw.
“Quaix.” Guaw qra syx taukag, miaa guaw suacc qiyr be cud .laii. Dnaxx m jaix si a’Kunx :a iacc a’Qunx :a, hnuaidit si inx a’qongx qra hy :ee.
“A’hniax, jex enciangg qaqi quanr :ee lar. Acc byy, jiacc vaiwtog a’hniax liw tec hro guanw cinqex qapp cnemw, knuar inx jiac e hahcuir .be.”
Guaw knuar hex enciangg, vuii :ee viw ciah :ee kacc je. Fiancee inx daux lenrr sanxbah dyrr hranw did brew laii juw, iarr suacc e kir jiac jitt hy vuii jutjud :ee. Guanw dniurmw narr knuar .diyc, huanrser e qniax qaxx hun .dyw dy’ e or.
Jiaxee ue guaw byy qongw hro ix jaix, qanda’ qaqi decc sniu nardnia. Guaw an’ ix ciuw nirr qra danxlo jrih .quer .laii. Qycc vutjiw aw dang dyrr driyc!
“Nacc anxnix byy-dniu.-byy-dii jauw .laii. Iarr byy singx kar jit xe aw denrue?” Guaw ee kauxkir byy qaiww hyw, jex guaw simlai iuxsor.
“Acc dyrr limsii-lim’ia quatding :ee. Ginxaw ee laurve qongw diyh’air dngbin qra a’hniax liw qexsueh jiacc qongw e cingcyw.”
Guaw qongw guaw u snax~sir-jap xee huanrjiaw ixqingx quawhy danw beh knuawvne, qiyr ix cua ginxaw singx kir vadd xui laux laux lehh, siqanx qaur jiacqycc laii. Horsu nng luiw bagjiux qimx howhor liac guanw decc siongr. Guaw qinw qexjniar, qiyr ix qaur sii singx dirr mngkakauw danw, m tangx qycc cnex-vrong-vec-vrong longr .zip .laii.
Jitt xe aw in’ui kiwhau decc venwhuar, diyc sikiwjingr ee langg je, laii vnerngi knuawvne :ee viw vingsor-sii qex beh dingvue. Jit qrex lairdew narr u jit xee langg, kyxviw qongxx si hordniuw, kir qamw .diyc, angx e uer hro bow, bow jiacqycc uer hro qniaw, benw zuarr quw, juanqex longxx u kyxlingg drir .diyc. Drir .diyc ee langg, siongrr dairsingx e taukag gongg, amrqngw tniar, pnirjuiw cringr be li, uree qycc e lrauu bag’iuu; qycc laii e kiw qasaur, sraur quw langg e sen, kaciuw nngw siysiyy, qanda’ sniu beh kunr. Qangrkuanw ee jingwtauu, guaw jit jaixkiw knuar zi-jap gua xee, dyrr sngr longxx kuix qangrkuanw ee iyhhngx, marr e hro langg' tiamw qaxx beh gongg .kir.
“MISS Dniux, qra guaw qiyr venrdongx. Guaw jiokk tiamw, byy sniu beh cud kir jiac.” Siongrr buew xee knuar suah cud .kir, guaw qra horsu anxnix huanhur.
“Beh qiyr quiw xee?” Horsu mng.
“Jit xee a! Qycc u quiw xee?” Guaw tex dirr iw nirr, bagjiux vangr kreh kreh, sniu beh siyw bii .jit .xe.
“Linw cur nirr ee langg lehh? Qamxx mrbenw huadlyc?”
Bersux kir hro den den .diyc, guaw an’ iw nirr vreh .kiw .laii, vehsig ee sensnipaur trngr .lyc .laii cinwcaiw pniax lehh dyrr qinw jongg .cud .kir.
Go-guec ee tnisii iaxx jin’ byy unxding, qniazit dyrr vutjiw aw lianglingw. Guaw qnuaw qaur der, knuar diyc inx buxaxqniaw kia dirr duarmngg ee dywciuxvingg vnix. Derhu-aw qra dua hanr :ee lamw diauu lehh. Ginxaw ee sinkux qiux qiux, naxx jit jiah hevix.
Guaw qniaa uaw .kir, mng inx qongxx qamxx danw jiokk quw :ar. Derhu rinr qongxx inx jap-id diamw quer dyrr laii jiax decc kia :ar.
“Acc dyrr byy der kir, cua nng xee ginxaw dindinx-dongrdong qycc jiokk byy lirven :ee, dyrr quikir kacc jaw laii jiax danw.” Derhu qongw.
“Mngcuiwkauw jiahhongx. M dyrr kir vadd xui danw kacc driyc.”
“Acc dyrr qniax a’hniax liw cue guanw byy, banrvutli narr siycutlo dyrr jiahlat a.”
Guaw cua inx kir linqin ee jurjorcanx jiac diongdauwdngr. Jiahvng siqanx decbeh quer :ar, lairdew langx langx, byy simxmih langkeh. Guaw qiyr inx cue jit xee xui jre, qaqi jiacc kir ter dag’ee juwbunn vngrcair.
Caiwsig byy je, qanda’ cunx quiw hxang aw punr punr, uree qycc caw qaxx juiw juiw, jnia’ pnaixjiahkuanw, quixlyrr jiongw cair ciok ciok juewjidhuew, jniur jniur sniuu sniuu, u singg pun'amw. Guaw diamw qidiongx kacc cringx, kacc e knuawkauw :ee, kiyh kacc byy nng vnuaa.
“Lanw tauqeniuu jnia’ cinced. Guaw tec gulingqanx-aw qra tyw siyx qunxjuiw, ix sui’ kir jauwkax drew jit qranx dni dni dngw laii hro :guaw.”
Guaw qra cair pangg .laii ee sii, derhu ixqingx qra ngairqinx tauw .lyc .laii decc cri ser hanr :ee. Guaw qiyr dua hanr :ee singx jiac. Knuar diyc inx laurbuw qra dimr tauu, ix jiacc qnaw drang nguaxdi. Qnaxx si iaux liauw quewqix, jit xee ginxaxpiw, jit kunr hamxsamm nng nguaw vng .lyc .kir, jiac qaxx kihkap qiyr. Ix qra jit qix qetuiw lauu dirr siongrr buexaxau jiacc knuax knuax aw iong qakkiw decc ger decc cngw, nng vingg ee cuiwpuew bag qaxx iuu laplab.
Guaw cinwcaiw vex vex lehh, kogkok juwir viyxaxjiamx qniaa qaur dyhh.
“A’hniax, jin’ pnaixser, tong diyc liw ee siqanx.”
Derhu qycc jai’ngiaw knuar langg' ee bagsig. Si qongxx, guaw jingrr jaixsii qaur dnaxx itdit longxx qig jit xee pnaiw bin, qyckacc gong :ee marr ingwqaix knuar e cud .laii jiacc driyc. Guaw qongw ervox iaxx u vanx. Derhu dyrr qinw qongw kiw ix jitt jua laii ee bogdig. Guanlaii inx sniu beh venwbe joxcur hitt der de, mrqycc guanw ser :ee decc dongr, byy beh hro inx bre. Hitt qingx joxcur si guanw jow :a hitt dangjun kiw :ee. Guanw qongx :a siuw u diauu, dyrr lauu hro guanw vaa :a. Guanw vaa :a dingxnii dngw .kir, de quaww cur dyrr venr jyr guanw snax hniadi qongqex ee. Derhu ix jitt vaiw laii, jit hongbin beh rair guaw ee ciamzi, qyckacc diongriaur :ee, si beh vaiwtog guaw jyr sueckeh kir krngr guanw ser :ee.
“Guanw a'jig-aw qongw lanw hitt qingx joxcur si vyxvuer, qongxx si simxmih qoxdongw, simxmih jaisanw. Siongser guaw marr m si jin’ liauxqaiw. Hnuaidit dyrr si vutjunw langg kir qra tiah dyrr driyc lar.” Derhu qongw, yc lauxue.
“Narr byy jin’ hyw qrer, jiamrcniaw singx hauhe lehh nacc u iauwqinw? Huanrser jniasit u qewdat marr byy dikkag.”
“A’hniax liw anxnix kyxlu si byy m driyc. Mrqycc u tniax qongxx lanw hitt der de, ody :ee u beh bakciuw, jitmaw m bre marr be dit :ar.”
“Ody :ee!”
Derhu dimr tauu, trow jit kauw duarsimkuir liauxau, suawjiab qycc qongw.
“A’hniax, jitt qnia dairjir, cniaw liw diyh’air liongrjingg :guaw. M si guanw jyr langg’ simvu :ee vuthaur, qnuaw beh qra joxgiap bre .kir. Ginxaw ee laurve decc sraiw tolaku, qui’ nii tangr tnix dirr qysog :ee decc vniar snesiw, narr u simxmih snax dngg nng dew, guanw buxaxqniaw zid’au beh ngr sniaw langg lehh? A’hniax liw dirr Daivag jyr isingx, byy kueckiamr jiaxee jnii. Guanw jitt vangg :ee qaxsuw u jit vid kacc liongrsing :ee, ginxaw ee laurve narr beh qaixdoo-igiap ngua jyr singliw, marr kacc hyw dngw jnikangx.”
Qongw suah, ix iurqycc trow kuir. Ix qapp guanw lauxzi :ee qethunx beh jnia’ jap nii :ar. Lauxzi :ee ceh tak byy quann, qyjid tak byy cutgiap dyrr decc jyr ociuw :ee tanr qankoxjnii; zi-jap-snax huer hitt nii, taujniu aw qniaw dyrr cutsir :ar.
Diongdaur ee sinbunn ixqingx decc vyr kiwsiong. Guaw qnuaw beh dngw kir siongrvanx, dyrr zimm jit dniux jit-cingx kox :ee .cud .laii, qongxx beh hro inx jyr lorhuir.
“A’hniax, guaw piyr tiah onghuee :ee. Mrbenw lar!”
Derhu qra jnii sag dywdngw .laii, m qra guaw siux. Guaw ter inx jac jit daii qewdingg :ee tangx sangr inx kir ciajam jre kec’un :ee dngw .kir.
“A’hniax, byy, a'jig-aw hitt vingg jiacc vaiwtog :liw.”
Guaw dimr tauu rinw .ix. Ginxaw dirr ciax-lai qra guaw et ciuw. Guaw cinwcaiw qra et .nng .xe .aw, ciax jid’err sraiw .cud .kir, guaw qinw huantauu, snax kax jyr nng vo, huexsog qnuaw dngw kir vnerngi.
Go-guec snax-jap, vaiwgo
Ix iurqycc laii tec iyc-aw :ar. Dingw huee, qangrkuanw si diongdaur-sii aw, guaw dirr vnerngi ee siddngg qapp ix siy’ duw, knuar ix duiwbin ee ixaxui kangx kangx byy langg jre, tangxvnuaa pangg lehh dyrr qniaa uaw .kir. Ix jitt vaiw laii, hyw hongbin u hur diyc siongrgnow ee buew vrangx ciax. Guaw qra ix knuar suah, dyrr mng ix u sniu beh dauwdin kir jiahvng bor. Ix liac guaw bybingjnaiw ee ciuxjiw giyw .jit .xee. Guaw ee jingxtauu-aw jurzendig qiux .zip .laii. Ix ciyr ciyr, qra guaw dimr tauu.
Vnerngi ee aurviacmngg hiax u jit qingx qavitniax u decc bre diongdauwdngr, jiahsit si poxtongx poxtongx, kiwhunx be baiw dyrr urngiaw. Guaw cua ix kir hiax. Ix qiyr jit vnuaa hezinn caxvng, guaw diamw gubacpa.
Guanw naxx jiac naxx kaiqangw. Guaw qongw guanw hitt qingx vnerngi ee huanrjiaw, longxx jairde :ee kacc je. Cincniu ix jitt jiongw juanqangx an’ sniaa-lai laii :ee, jit-vah xee kiongxqniax dy’ kiyh byy jit xee. Ix qongw ix m si jairderlangg, mrqycc dirr jiax jit xee langg suer cur decc druar; qycc qongw ix dirr vnerngi soxx lauu ee juliau, hex dingxbin ee jurjiw si qew :ee.
“Guaw qapp jit xee u bow :ee decc dauwdin, qniax oksangr laii liac qauu.”
Guaw cuah jit diyy, hro ix ee ue qniax .diyc.
“Bogquair ix e siaw qongxx si jyr hogburgiap. Dongzenn lor! Singr ee hogbu.” Guaw qaqi simlai decc setsiongw.
“Liw jitmaw m dyrr longxx uaw ix decc jiahcing?” Jitt qxur duiww ix u kacc sitlew, jex guaw jaix, jiwjiyw, guaw byy ing “vauci” jitt xee zirganw qra piwsniur.
“Guaw hyw kangx hyw ciuw, si anwjnuaw diyhh kyr javolangg quewzit?”
Ix ee binriongg jin’ giamsiog, nng luiw bagjiux tenw qaxx dua dua luiw, hyw cincniu decc hiongr guaw ha jenwsux. Guaw ee simqnuax decc cid uanx veh uad. Binrduir ix cnelingw ee bagsinn qapp lrai qiamwqiamr ee uerdiau, jidsidik, m jaix si beh kir srinn, iacc si jiamrsii aw kiarsiamw kacc driyc.
Boi laii decc qra qavix sangr jnriu dyh. Guaw tranr jitt xee qihue, qinw an’ jenwdniuu dunwjauw.
“Guaw decc qa'ngg rue hingdoo.”
Boi jauw liauxau, ix kinx sniax aw qongw kiw.
“Uerdoo nacc si hogburgiap lehh?” Liac ix ee jihqinx, guaw pah uersngx.
“Byy, jyr langg' ee dactauu :ee qamxx sngr hogburgiap?”
Bersux decc jiyr denrqongx, guaw ee dngdo jit xe dyrr hro ix knuar tangr .quer. Guaw qamxqag cuiwpuew zet hychyh, m jaix u huanw angg .byy.
Ix kad jit kog vehtngg camx zip kir ix ee qavix, suar .lyc, dyrr naxx la naxx sueh qongxx, “Guaw ter ongxsingx ee langg hogbu. Guaw decc kiyh inx ee siauxingw.”
“Hex qamxx tanr u jiac? Jitmaw ee langg m si longxx qruar siongwpnir kacc je?”
Ix dimr tauu, qongw, “Langkeh jiyw byy dnaxqinw, narr dyxun kir duw diyc hitt hy qauvnix .langg, kiw byy kangx :ee, hex jiacc si dua huex lor. Guaw bad rue quer jit xee obasang. M jaix si ix hunw qruad sniu’ qau, iacc si siongwpnir sew liauw byy hyxser, ix qui’ xee bin vehsiw vehsiw qycc longxx byy likhunn. Hitt jam aw in’ui singliw kacc baiw, siqanx kacc u, guaw dyrr unn unn aw diamw, liauu liauu aw rue, qycc qra biyy siage. Qetqyw, suacc hro ix ee qasiok vokhuee. Inx hiamm guaw rue byy singg, qongw guaw rue jit xee sixlangbin .cud .laii. Hitt qnia guaw bruw beh vnuar qywguec, lensiysuar jit lexvair longxx jiac pauwmi, bongxx ex bongxx quer.”
Jiac pauwmi ee zidjiw guaw marr bad quer .quer. Guaw qongw beh draur jiyx langkeh, qycc qongw beh jyr ix ee modelu, hro ix singx rue jit dniux aw jyr qenwvunw.
Ix denw ciauwiongg, ciyr qaxx jin’ qoxjuix, qongw, “Guaw qniax kir qa’ngg pah ciksuex, m qnaw qra iaxx uac lehh ee langg hogbu.”
Guaw qongw guaw jyr isingx :ee byy decc sinr hex. Ix iuguann tekuix-k., qra ix ee qavix tec kiw laii jrip .jit .xe.
Ix taukag qenwnarr damr damr ee sii, taujingg ee jit jog taumngg dyrr e liux .lyc .laii, qiongbeh kamr diyc bagjiux. Guaw jiokk sniu beh crunx ciuw qra ix ee taumngg vuew duiww vnix:a kir. Dairkair si soxx liabjig ee dongrlat iaxx byy qraur, taunauw soxx sangr .cud .kir ee bingrling, suacc byy jaidiau qniaa qaur ciuxqud hiax kir jiphingg.
“Cuanww rue dy’ hitt quaw ixx byy dirr sewqanx ee langg, anxnix qamxx u cuwbi?” Guaw mng.
“Knuar inx ee bin, kir iyh inx ee itsingx, jex si jitt hxang kangkuer siongrqaiww belangg ee soxjai.”
Qongw suah, ix qra qavix pangg .kiw .laii, jit cuir limx hro dax, tauhiac-dingw ee taumngg sunrser liux dngw kir vunw xui.
Jit xee uac linglingx ee jaboxginxaw jre dirr guaw ee binrtaujingg, guaw knuar be diyc ix ee quewkir, iyh be cud ix ee birlaii, henrvo ee ix, marr qaxnaxx dingcaix lehh. Dap’anr si sniaw? Dna' ix vunxlangg jiacc jai'ngiaw.
Lak-guec cesnax, vaiwzi
Ervox, lauxser :ee laii vnerngi cue guaw, qongxx beh qapp guaw sotongx huanx joxcur ee jit quaw dairjir. Guaw jitt jun aw jiacc sniu kiw derhu iongx .guaw hitt jann. M beh qui’ qywguec u :ar.
“Guaw u vaiwtog quixlyrr xee juanqax qamwding .quer. Lanw hitt qingx cur jinjniar si qoxjig, si bunhuar-jujaii. Narr qra congr kacc hyxser lehh, jin’ u kyxlingg e venr jyr jit xee quanqongdiamw, lanw ee jngtauu marr erdangr duer lecc ong .kiw .laii!”
Lauxser :ee hnuatauu-hixbin, qongw qaxx cuir ciyr bak ciyr. Guaw mng ix duiwhongx beh cud zuarr je jnii.
“Inx byy qinghuir, qenwgi lanw hiongr lanw jngx nirr ee langg kiyh qongjnii, inx jyr qowbun cud taunauw jan lanw.”
Lauxser :ee dyrr byy gong, jitt vaiw tacc e jiacc kingsinr, cinwcaiw quiw qxur aw dyrr hro langg' senwdong .kir? Guaw iaxx byy anwsngr qra duc qra tuccaur. Ix vutjiw aw qniurpiah, qongxue jin' gnirqag.
“Lauxzi :ee inx daux kacc kiab. De narr bre driau, inx ee sing’uac e kacc knuiwuac.”
“Jex guaw jaix. Guaw pacsngr beh vaiwtog zi-hniax qra soxiuxquann ee ingwhunrgiac trngr hro .guaw.”
“Liw beh dyhh snex hiacc je jnii?”
Lauxser :ee itdit u iaxsimx sniu beh congr jit xee dua surgiap .cud .laii, mrqycc jap-zi snesiur venr taur taur, jyr jit hxang, vai jit hxang. Jiurr guaw soxx jaix, ix ingwqaix byy sniaw cunx jnii jiacc driyc.
“Guaw e sniu vanrhuad kir jiyh. Liw narr byy cincniu zi-hniax qnuaxqinw rair beh ing jnii, dyrr hro guaw uan .jit .xe. Iacc si liw beh drauw vunw, qra guaw janwlat?”
Guaw knuar ix jiacnirr aw jipsixquad, bann catauu qongw m tniax, jai’ngiaw jitt diauu lo unw qniaa be tongx, dyrr qinw qra ody :ee cniaw .cud .laii.
“Liw m tangx qanda’ qor qaqi ee cuwbi, byy-dnax.-byy-sngr, suacc hro vadd langg ter liw decc jerdnar.”
Jitt qxur he liauw u kacc qiamm :ar. Guaw qongw suah, ix ee bagsinn venr qaxx hiongg qaiwqair, gnersimx beh ciangg qaur drew ee kuanw.
“Kamw kamw! Dy' byy hitt hy hingkamxqud, iarr qnaw cud laii siawsiwjingr. Urngiaw si m jaix tnide quiw qxinx dang.” Guaw amr amr decc qra cyh.
“A’hniax, guaw qamxqag liw venr qaxx jiokk byy dnaw.”
Ix sniaauu jin’ qe, hutzenqanx qra guaw tuh jitt qxur. Guaw tniax liauw qaurec, kimoji jiokk baiw, duiwcuir dyrr qra duc qongxx, “Liw qanda’ jit kox langg, qongxue erdangr jiacc piauped. Aurzit aw danw liw cuarbow snex qniaw, liw dyrr e texhue lauxzi :ee inx ee qanlann. Byy, liw marr singx kir cue jit xee kacc qowding ee taulo, m tangx l.-liuwpiur-p., qui' zit druar lecc circiux, siwqer logkok.”
“Liauw, iarr liauw guaw ee vunxdingw. Anding ee zidjiw narr suacc hro langg venr jyr nngxjniaw, byy damdngx, guaw qamguan jit siwlangg kir piauliuu.”
Ix ee kauxkir byy singg decc qra guaw jikvi, kacc cincniu si jurgnow ee qakgno. Jex hro guaw dendyww utbun, simqnuax qyckacc akjag.
********************************************************
Ing’amr, guaw qapp snax xee dairhak ee dongcongx siy’ jiyx kir Cauxsnuax sew unjnuaa, sew samunluanw. Jex si jit lexvair jingg dyrr ioksog hyxser :ee. Inx qidiongx u jit xee beh zip cimsnuax kir hogbu guanjurbinn, jit xee qongw beh dngw kir jngkax ee qowhiongx kuix jinxsow. Dirr inx lirkuix Daivag jinwjingg, dag’ee u iwhiongr snaqab qycc jurhue jit vaiw. Lingrgua iauxx u jit xee siongrqaiww zedsimx, lenlok, qingw soxjai, lilixkokkog jitt quaw kangkuer, an' tauu jiww buew ix jongw vauvan.
Inx laii vnerngi danw guaw harvanx. Guanw anwsngr sir xee langg sraiw jit daii sir lenw :ee kir. Guanw sir xee, jit xee si aursnuax Hualenn ee juxderlangg, jit xee si Daivag ginxaw, qycc u jit xee si an’ diauwuanw ee Vindongx laii :ee. Guaw Hunlimlangg, sngr sevo :ee. Jitt daii ciax lairdew, duxhyw Daiuann dangx, lamm, saix, vag, sir qaksir ee langg longxx jiauu :ar. Dongcox guanw e qed qui’ dongw, qeqiamw marr u jitt jann ee enqor.
Jex m si guaw tauu jit vaiw laii jitt jiongw dniusow. Guaw ee jit quaw dongsu qapp ving’iuw, inx samvutgorsii dyrr e jiyx guaw jywhuew kir sew. Jitt qingx ee hongjuiw jamxzenn aw cringx, jitt kud siyx :ee, hitt kud lingw :ee, beh lalunn aw :ee marr u, sed qaxx jabjee-gorjngg. Inx qniax langkeh sew quw byy girniu, qycc u denrsi decc vnuax dua vuii siy’ enw. Sir xee javolangg longxx vrag qngx qngx, jit langg jiamr jit hngx, qui’ sinkux trngr qaxx qngx ~ ~.
“Au vaiw m diyhh cinghox liw jyr Daiuann ee SCHWEITZER.” Vindonglangg qongxue.
“Lanw narr m si jiacc sigsai, guaw e liahjunw liw si decc qra guaw lauwqingw, qra guaw pixtag.” Hualenlangg qongw.
“Guaw iarr byy decc kacc sux :liw a, tacc diyh’air anxnesnix lehh! Langg’ guanw jngtauu aurzit aw e cai guaw ee dangsiong.” Vindonglangg qongw.
“Hex huanrser or!" Daivaklangg qongw. "Mrqycc ue qongw dywdngw .laii, e hro langg' kia danglangg :ee, m si longxx jyr senx .kir .ee kacc je?”
Daivaklangg qongw ciywkuex. Inx snax xee longxx ciyr qaxx qiqiqarqa.
“Liw qamxx byy sniu beh dngw kir qowhiongx huatdenw?” Vindonglangg mng guaw.
“Langg’ ix isut hyw, diyh’air lauu dirr dua doci qiur kacc je diauu sniwmia. Dngw kir cauxde soxjai, hex zuarr bycaiw lehh!”
Daivaklangg cuir uaix hiongr jit vingg, bagbaii diaur quann quann dairter guaw huedab. Guaw tniax liauw simqnuax ciwcak, suizenn ix qongxue itdit si jitt xee ngiursniur.
“Dingw vaiw guaw tee ee dairjir, liw kyxlu liauw sniaw kuanw?”
Dingw zit aw kir jiahhue ee sii siy’ duw, Daivaklangg dyrr decc qra guaw qongw kiw beh jxox jit xee lenbingg, (iacc si qonghue?) qycc diddit beh joklong guaw qazip. Ix jitt xee langg jin’ qokvih, vutqed vutqed, dnairdnia isingx ee sittauu vangr lehh, jauw kir decc qa’ngg jyr jit quaw byy jnii ee kangkuer.
“Jniginn, guaw e qra liw qiawhur. Narr beh qiyr guaw lenmiaa draur kax, jex guaw kyxlingg kacc byy huatdo.”
“Si anwjnuaw lehh?" Vindonglangg mng .guaw. "Guaw e qir did liw kacc jaw ixjingg u decc sag jex.”
“Si m si linw siongrsix hiax kacc pnaiw liuxlag?”
Buew:a jitt qxur si Hualenlangg mng :guaw :ee. Ix jitt xee langg cenw pakdngg, dit laii aw dit kir. Jitt vaiw suacc hro iyh qaxx duiwdangg aw duiwdangg. Mrqycc guaw si juadduir be singzin. Guaw narr zin, dikkag e hro inx knuar byy diyc.
Guaw dyrr trex qongxx vnerngi jitt jam aw kacc byy ingg, byy jaidiau draur sna' jan.
“Byy jyr dairjir, vehvec did miasniax, anxnix zuarr pnaixser lehh!” Guaw qongw.
“Jnia’ pacsngw. Guanw ee jiphingdniuw marr lanw ee huer nia. Ix qycc si linw dongg :ee. Guaw guandew beh siaurqair linw sigsai qongxx.” Daivaklangg qongw.
“Linw jitt xee jiphingdniuw guaw jaix. Ix dirr hagsingx-sidai dyrr jin’ cnia’ngia, hyw-pnaiw dai longxx cab qaxx diyc. U tniax qongxx ix qaxnaxx hiamw hiamw tak byy vitgiap.” Guaw qongw.
“Liw hyw cincniu knuar ix jiokk byy :ee.” Hualenlangg qongw. “Guaw qamxqag ix vutjiw aw u zedjingg.”
“Qanda’ kyr zedjingg, hex jyr m jniaa dairjir.” Guaw vrag uerqud. “Narr jniasit beh jyr, diyh’air u uanxbong' ji' qxingw. Narr dandanx decc bruw dix bruw qxauw, si e liauw qangx qycc srit jiac, quikir mair jyr kacc ngiaa.”
Guaw qongw uann, jitt xee uerdee jiamrsii qaur jiax suah .kir. Inx ngua qrangw jit quaw u suix byy qnrua :ee, qra bagjiux vangr kreh kreh, sinkux jimr kacc cimx .lyc .kir jyww inx decc hiangxsiu. Guaw bagjiux tenw qimx qimx knuar inx, qamxqag qaqi naxx cincniu jit jiah qojiauw, qapp inx zuxx li zuxx hng .kir. Ving’iuw jyr jiacc quw, guaw tauu jit vaiw duiww inx decc kiw uanwdor. Qyckacc hai :ee, guaw suacc naxx cincniu jit xee cauwsimx-doghing :ee, amwdiongx hibang inx qokk langg beh kir jinwhingg :ee, byy qaxx jit hxang jyr e sxingg.
Lak-guec cesir, vaiwsnax
Dng' ix dirr vnerngi ee jniawtniax cuthen hro guaw knuar .diyc ee sii, guaw ee simjong hionghiongg ciak jit xe jiokk dua xe. Jingsii-aurzit jiacc laii tec iyc-aw .quer, qeh dy’ byy jit lexvair, jnuaxngiu jiacc qinw iurqycc vniar .laii? Huanrjiaw ee miadnuax, qinaxzit marr byy dingqir ix ee miaa. Boghuix, ix si juanqangx laii cue guaw?
Jitt xee sniurhuad jurr cutsir qaur siw .kir, taubuew uac kacc byy jap biyxjingx. Guaw knuar diyc ix ee dywciuxqud u jrad vowdiauu, jai’ngiaw ix kaksit si laii beh qiu'ix :ee byy cyr, jingcax jitt vaiw m si laii beh cue guaw jitt xee sensnix. Guaw knuar hitt der iyhjuixvor dnii qaxx holabsap, dingxquann ee huecziah qycc knuar hen hen, iyh hex unxdangr si ix dirr cur nirr qaqi vnir :ee.
“Nacc e anxnix dua kangx ser lic?” Guaw dac uaw .kir, huathen kangcuir m na jit dah.
“Acc dyrr dingw zit aw qu jxingr iurqycc huatjyh, beh tinn qunxjuiw jiac iyc-aw, hiongqongg .qaur .der, vxuex-aw suacc qalauc .kir, puar qaxx cruir iam’iamm. Guaw kuu lyc kir decc kiyh hitt quaw kicper, qamxqag qaqi jiokk byy pa, jiokk qygaii, lenrr jit der vxuex-aw dyrr tec be jai, krir .diyc, ciuw giac quann dyrr anww hitt cog vylee dua lat qra dngr .lyc .kir.”
Ix sun sun aw qongw, viauxjingg qycc jin’ diamrdi, jin’ vinghyy, naxx cincniu jitt jann juanzenn qapp ix byy qauknaa. Danw ix qongw suah, guaw qinw qra vehvowliauu tauw .kuix.
“Sraiw linw niaa lehh! Jiacc dua kangx qycc jiacc je lec iarr m jaix tangx qniax.” Jitt qxur guaw vingrr byy qongw cud cuir, qanda’ dirr simlai decc cyh.
“Jex m nng~snax qangx u :ar. Liw nacc byy sui’ laii?” Guaw mng.
“Vunxdew qiycsirr byy giamdiong, dyrr kir seiyhvangg brew jit quanr tewhongg :ee qaqi vaux vaux lehh. Qinaxzit jaixkiw suacc huanxjingr, ciuxqud tniar qaxx giac be kiw .laii, dyrr sniu qongxx byy laii be suah .did. Qetqyw marr be hur ci. Linw vnerngi jaixsii :ee siux dnar :ar.”
“Nacc byy kir qipjinw lehh?”
“Hex diyhh qex kaix lecc quixlyrr vah. Dyrr m si decc hyxgiac qyc.”
Guaw qongw ix ee kangcuir dikkag e lauu jit srunn jin’ pnaiw knuar ee kii, huad hongg iauxx siyc siyc aw dai, narr ziamw diyc jauxbexhongx, hex dyrr pnaiw kangx a.
“Ervox hitt xee isingx hongpingg byy hyw, jiauxsaixbin, tniax qongxx e duiww luxhuanrjiaw kax laii ciuw laii.” Guaw ser aw sniax qongw. “Guaw bad jit xee isux, nihuer u :ar, mrqycc jin’ gauu knuar. Kacc hng dyrr urngiaw.”
Ix mng guaw dirr dyc’ui. Guaw qongw ehngx byy vanx, ersaih cua ix kir.
“Qamxx be sniu’ qra liw lyhuann?”
Guaw iyy tauu, mng ix jursow dirr dyhh tangx kir jriab .ix. Ix qongw ix druar dirr ser diauu hang-aw-lai, jin’ yh cue. Guanw dyrr lingrgua iog soxjai, qongxx beh dirr inx hang’axkauw ee jabhuexaxdiamr siy’ danw.
Ervox ee huanrjiaw knuar suah, guaw jiksii vniar dngw kir cur nirr. Jangjuiw sew jit xe aw sinkux, snxax duxx cing hyxser, suacc jriab diyc fiancee ee denrue. Ix qiyr guaw kir inx daux jair ix, qongxx beh kir qingw hixtiab.
“Liw jarhngx nacc byy qongw?” Guaw mng.
“Si anwjnuaw, si .m? Liw ing’amr m si byy vaii vanx?”
Fiancee pah jit qix angg qunx hro lanw qaur. Denrue ced dng liauxau, guaw kaisiw decc pacdad. Duiww inx nng langg guaw longxx rair vutdig-vutsid, singx vruee fiancee kir qra tiab-aw qingw qingw lehh, suar .lyc, jiacc qnuaw kir hur aurviah tnuax ee iokhue. Vnuar diamxjingx quw hro ix siyw danw .jit .xe ingwqaix be sitlew, qaur sii jiacc laii tog surqor, qongxx lo nirr jikciax, iacc si vnerngi limsii cud jongrhongw, mic’arvar dingxdingw longxx tingww tee cud laii qongw.
Jiauww qewue jinwhingg, qra fiancee sangr dngw kir cur nirr liauxau, guaw jiawsuu qongxx ing’amr diyh’air ter jit xee dongsu jiuxqor. Ix qiyr guaw qinw kir, qycc cuann jit xee sanuici, qongxx beh hro guaw dri iaux :ee. Guaw dirr ix ee cuiwpuew jimx .jit .xe, dyrr qra ix qongw baibai.
Kacc danw guanw beh kir :ee hitt qingx vnerngi, inx hiax jin’ pnaiw hiycciax. Guaw dyrr singx qra guaw ee jurqa’iong :ee sraiw dngw kir kngr, zen’au jiacc jre qewdingciax vaiwtog unwjiangr vniar kuair sokdo qnuaw .kir.
Siqanx ciauu qaxx ba ~ ~, jin' sun. Dirr nng xee jaboxlangg diongqanx decc jongg laii jongg kir, jingwqingx qongw, e tiamw, danrsi qycc iarr be sen.
“Liw qamxx danw jin’ quw :ar?” Qauwui ee sii, guaw qra mng. “Jin’ pnaixser, acc dyrr lo nirr ciax…”
“Byy iauwqinw,” ix pacjic guaw ee uervnir. “Guaw jin’ quanwsir danxtai.”
Guaw amwjni decc quancad ix ee viauxjingg, knuar be cud ix jitt qxur ee ham'ir qamxx u jikvi.
Guaw kir duarlo-vnix beh jac qewdingg :ee. Ix suacc qongw ix jitt jun tniar u kacc jre ar, mrbenw kir ar. Guaw iyh ix si decc sairtaiw, decc dnriaw, beh kiaudiaur langg.
“Anxnix marr hyw. Liw narr qycc huatjog, jiacc qiyr liw hitt xee cua liw kir.” Guaw jin’ be songw, diaudii qongw jex qra ciwqig.
“Ix jitmaw langg dirr guarqog,” ix qongw. “Dyrr sngr qongxx ix dirr Daiuann, ix marr byy huatdo vruee guaw kir.”
“Anwjnuaxngiu qongw lehh?”
Ix dnir kenciyr, qongw, “Inx qniaw dorjer, inx bow sunrguec, inx vxeh :a cutsnuax, inx qim :a zibcur. Ix si jiokk byy ingg or, beh jnuaw u liongrsing ee siqanx hunvuah hro guaw?”
Guaw tniax e cud ix simlai ee ai’uanr, jurzendig duiww ix u quaw textiapsimx.
“Inx bow qamxx jai’ngiaw linw ee dairjir?” Guaw hyxlew aw qra mng.
“Inx bow narr jaix, guaw dyrr si juerzinn :ar.”
Guaw sniu beh jinr jit vo mng ix jit quaw dairjir. Ix suacc qra tauu uat .quer, byy air qycc qrangw .lyc .kir ee kuanw. Guaw m si m bad sewjingg. Mraxqycc, ix jitt jann qan' qan' aw hro langg' jiokk hnowhenn.
“Ix si kir dycc jit qog?” Guaw qycjaiww mng.
“Kanada.”
“Kanada! Jiacc duxhyw, guanw xe nii beh ibinn kir hiax.”
“Linw beh ibinn! Si anwjnuaw lehh?” Ngua ix decc mng .guaw.
“Guanw dniurlangg qniax Daiuann beh u jenwjingx, e dongrluan, qiyr guanw siauwlenn :ee, uergiw kacc e tongx :ee singx kir. Inx nng xee lau :ee aurzit aw kir, beh sik’ingr e kacc qinw.”
“Linw daux ee langg lehh? Inx qamxx marr beh jywhuew kir?” Ix qycjaiww mng.
“Jywhuew kir ibinn? Dongzenn bersaih .did!” Guaw qongw. “Beh vran ibinn diyhh kaix jiokk je jnii. Hex si guanw dniurlangg-aw inx daux u, mrjiacc e kamx .did.”
Ix qig diam diam. M jaix anwjnuaw diyc, guaw suacc u damrvyc aw simx hix.
“Daiuann ee qiogser jiacc byy unxding, u jaidiau :ee longxx marr e sniu vanrhuad kir tec jit vunw aw vadd qog ee horjiaur. Narr jitt jun guaw ciuxtauu u jit vunw Kanada ee horjiaur vehvec beh hro :liw, qamxx qongxx liw e byy rair dic?”
“Jyr Kanada ee qokbinn? Dairkair si be ee kuanw.” Ix tingg jit kunr, suawjiab qycc qongw. “A'qiong :a narr jinjniar laii kenx jawdann, guaw jit xee langg dirr haixgua, vangr guanw buw :a, guanw jew :a, qycc guaw jit quaw ving’iuw jiwcinx dirr Daiuann decc bih kongsip, beh jnuaxngiu qaudair e quer? Duhuix inx marr longxx kir. Iaxqycc u, guanw daux hitt jiah toxqauw-aw marr diyhh qra cua .kir.”
Guaw simqnuax iurqycc decc kiw akjag, jinjniar hiyrhuew qex mng ix hitt qxur. Qongw sit :ee, guaw jingrr qaur dnaxx m bad sniu quer jitt jann. Si guaw ee simsux kacc byy jiujir, byy kir kyxlu diyc jex, iacc si guaw hariwsikdig decc jauxvi, m guan kir binrduir jitt xee bunrdee?
Lak-guec zxic-id, vaiwlak
"Inx hiax ee cur tacc e longxx kiw qaxx jiacc suiw! U dniadauw, u aurqair, qycc u ciakor, bersux vedjongx lehh!”
“Dyrr driyc m. Liw knuar, inx hex lo jiacc cingkir, ciu-aw qycc jingr jiacc je, cing’iux-i. Guaw qapp linw vaxvah qniax caw, druar jitt kuanw soxjai siongrr hac.”
“Byy, lanw dyrr qra quad .lyc .kir. Guaw binaxjair sui’ qaudair quewqer junxvi huerpiyr.”
“Cuwqer qamxx benw singx mng knuar lehh? Narr sniu’ quir, guanw si lap be kiw or!” Fiancee qra guaw nih bak.
“Liw si ikban huwongx ee jaboxqniaw ne, decc qniax byy jnii?”
Dniurlangg jitt qxur ue qongw suah, qui’ cuwqingx longxx si ciyr-sniax.
Iurqycc si vaiwlak-sii. Jiac amr vaw, jiauwle, guanw qycc laii dirr langkectniax decc vaii vatsenx. Ing’amr ee juxdee si “druar” jitt qnia dairqor. Inx daux jniginn hen qycc ven, qniax kngr quw e vyc .kir, qnuaxqinw beh dirr Kanada hag .jit .qingx .aw. Guanw dniurmw ee siyxmue quixlyrr nii jingg dyrr quer .kir .ar. Ix u hib jit quaw siongwpnir qiar .dngw .laii, qongxx jiaxee cur longxx beh bre :ee.
“Daiuann dyrr be druar .did. Byy, jex cur cniaqig qaxx jiacc suwsi, marr jin’ hyw kiarkiw.” Dniurmw qiw jit dniux qongxqywjuaw hro guanw knuar.
“Daivag jitmaw sinx kiw ee cur, vutquanw ci-lai iacc ci-gua, poxpenr longxx u jitt jiongw juixjunw.” Dniurlangg qongw.
“Qaxnaxx si ee kuanw. Linw knuar, jitt xee marr be baiw,” dniurmw qycc tec lingrgua jit dniux hro guanw knuar. "U huehngg, u tingciadniuu, u iu'ingxdii, u unrdongrdniaa, qycc u vyxjuann zi-sir siyxsii decc srunn, decc qor.”
“Ciauqib-cirdniuu, vachuer-qongsix, inx hiax hurqin qycc longxx u ne!” Fiancee qongw.
“Jex siongrqaiww iauwqinw,” dniurmw sun jaboxqniaw ee uerbuew. “Kanada ee toxde kuah, cud mngg longxx diyh’air sraiw ciax, beh air jit quanr aw kiwjuiw, diyhh jauw qaxx jiokk hng jiacc brew u. Sidjai jnia’ byy lirven.”
Inx snax xee langg jit qxur laii, jit qxur kir. Guaw hiongr dyh-dingw hitt jih DM giyw .jit .xe, luerdiongx jit dniux hunxangg aw sig :ee jin' cnixbak.
Dnuasinx qong’uw, jit xee vangqingx, jauwkax, kectniax, sexigvangg siwtangxjee. Cid-jap-bxan jurvirkuanw, dairkuanw jit guehzit veh-cingx.
“Javolangg narr beh taux jiac, brew jit qingx aw tywvangg, huanrser viw dirr luxquanw kuix vangqingx kacc e hryy.”
Sngwvnuaa dirr simlai naxx diak, guaw taukag naxx decc bongrsiongw.
“Vangqingx-lai diyhh kngr jit dingw nngw simwsimr ee pongxaxziok, dingxquann crux hitt jiongw dua angg sig ee cngqinx. Dikkag diyh’air u jit xee jauwkax, benw dua qingx, erdangr sa mi qapp hniaa qunxjuiw paur dee dyrr hyw. Tangnii diyhh qingw amr sig ee vor qra jyr hro qau qau, vutquanw sii diyhh qra giuw uaw .laii. Huloqingx qra qrig kacc dua qingx lehh, sexigjyy dring hitt jiongw siongrr cimx, siongrr kuah :ee, nng xee langg jnrix erdid lyc...”
Sniu qaur jiax, guaw qui’ sinkux kiw qalunxsunw.
“E qnuaa niih?” Fiancee decc qra guaw quansimx. “Guaw kir qra lingxkir qimr kacc ser qangw lehh.”
Guaw qinw iyy ciuw qra dongr, qongw beh kir venrsow. Zip .kir liauxau, guaw qra ziaku tuah .lyc .laii, jiksii qra guaw ee iogbong jnua zip kir bextangw lairdew.
Lak-guec zxic-zi, lexvair
“Guanw ngirdniuw limsii beh pair guaw kir Daidiongx kuihue.”
“Dirsii dngw .laii?”
“Jiac amr vaw quer, kyxlingg diyhh hud qaur vnuamii jiacc e dngw laii qaur Daivag.”
“Lanw bin’axamr beh kir knuar ciuxjiw, liw m tangx be qir .did.”
“Liw huanhur ee daijir, guaw dycc jit vaiw dingdnaa .quer?”
Tauwquer denrue, guaw qra fiancee jimx jit sniax dua dua sniax, danw ix hitt vingg singx qra denrue ced dng, guaw jiacqycc cic cid xee hyrbew.
“Guaw ee kectniax kiamr jit vxag doo, sniu beh vaiwtog liw jyr guaw ee qunsux draur qingw.” Denrue jiaptongx liauxau, guaw hiongr duiwhongx suecbingg kar jitt tongx denrue ee bogdig. Guaw ee simqnuax pogpok dnua, ciuxqud kehkec cuah, sniadiau iaxx jai jai a, mrqycc, marr byy sniaw tangx jurzenn ee kuanw.
“Linw taiwtair lehh?" Janx Kaxlenn mng. "M dyrr qapp ix dauwdin kir jiacc driyc.”
“Ix hitt xee langg, uervor dingxbin ee sig suiw iacc baiw ix berhiauw knuar, acc narr rue dirr bin :ee, jex ix dyrr jnia’ kiangr. Sniu sniu lehh, iaxx si cue liw kacc tongx, liw jiacc si juanqax. Iaxqycc jit hxang, guanw dingrhunx nardnia, iaxx m si ang’axbow.”
Ix dac’ingr guaw.
Guaw sraiw ciax kir siy’ iog ee soxjai jair ix. Guaw qra ix kuix ciamngg. Ix jid’err jre .zip .laii, dyrr liam qongxx ixjy u jit xee bi.
“Jex jniawqangw gupuee jyr :ee, diyhh jinwkauw-ciax jiacc u jitt dringw qxib :ee!” Guaw qra qaixsueh.
“Jin’ sitlew, guaw ee pni-aw duiww puee ee mihqnia e quewbinw Lanw qamxx erdangr qra vyletangx vangr .lyc .laii. Guaw ee taukag jiokk hinn :ee.”
Guaw dongzenn qongw hyw. Guaw dyrr qra lingxkir qimr driau, hro jurzenhongx cuex .zip .laii.
Ix qongw dirr Qenwqog Vag Lo hiax u jit qingx gerlongg, iu'ue qapp juixcaixue jin' gersut, qenwgi qongxx singx kir hiax knuar mai. Qaur der, guaw qinw siamx jit xe aw dingxquann ee qewsor. Qniax dyw langg! Uree qingwzenn jnriu vah bxan. Guaw amwdiongx hibang ix m tangx kir qingw diyc hitt quaw cid xee sowzi :ee. Liau vutduir, ix dendyww singx kuix cuir mng guaw irsuanr zuarr je. Guaw cuir qongw benw kuawir qewsiaur ee dairjir, simlai si decc ciyr qaqi qig kuah siauwiaa kuanw, byy xmngg qxex qycc qew dua qeh.
“Brew gersudpinw ham’ brew cur cavutdyx, ciuxtauu narr m si jin’ ling, duxx kaisiw singx knuar kacc siok :ee byy iauwqinw. Qycjaiww qongw, gersut ee mihqnia yh gigliau. Van Gogh jairsnex ee sijun, byy langg decc qra junwbun; ix qra jokpinw sangr cuwvnix qapp ving’iuw, uree langg qycc hiamm hiajiax dinwder.”
Van Gogh jitt xee langg guaw jaix, dyrr si bad jiong’ qaqi jit vingg ee hni-aw quah .lyc .laii, zen’au qra dongwjyr lexbut sangr hro jit xee tanwjiahjabow hitt xee Holland ee uerqax. Qnaxx si inx uerdoo :ee snesingg kacc u jitt jiongw quair piah. Inx longxx air qra sintew ee bxow jit vorhun quah lyc laii sangr .langg'.
Guanw an’ tauu qaur buew sec jit linr. Naxx qniaa, ix naxx decc qra guaw jimjiog, qycc vutsii e mng guaw ee iwqenr. Ix traix .quer qycc traix, srunn .quer qycc srunn, buexciuw, qiw qidiongx snax vxag hro guaw qingw. Jiauww ix ee qongxhuad, longxx si siaxsidpair ee uerhongx.
Sir-jap-bxan :ee hitt vxag ee dingrqer sidjai u kacc lirqingx, guaw jit xe dyrr qra pah cud langw-gua, byy beh kyxlu; nng-bxan kox :ee u dingr guaw ee ir, danrsi qniax ix ciyr guaw qetjuw, dangwsngx. Guaw quatding dyrr brew derr snax vxag, jap-snax diamw go inci sringg jap-id inci ee cunwciyh. Be quir, jiacc cid-bxan kox nia.
Guaw qra sinwiongrkaw tec cud laii lur. Dongqex ylyw guaw jin’ u ganxqongx, erhiauw qra dxiamr-lai siongrr suiw :ee brew dngw kir siujongg.
“Jex rair dysia guaw jitt xui qongsinn. Jitt vxag doo si ix ter guaw qingw :ee.” Guaw qra vyx, ciuw qiw duiww sinvnix ee langg.
“M si guaw qingw :ee, si liw qaqi qingw :ee,” ix qongw. “Liw decc knuar hitt snax vxag doo ee sijun, guaw u juwir diyc liw ee binrbak qex jiokk ziuu. Gersudpinw, qaqi knuar qac’ir siongrr iauwqinw.”
Dairjir vran suah. Guaw qongw siqanx iaxx jin’ jaw, mng ix u beh kir dyc’ui cittyy bor.
Ix liyc aw quer suniuu, qongw, “Liw narr be hiamm sniu’ hng, byy, lanw laii Damrjuiw qniaa qniaa lehh. Tniax qongxx hiax honghunx ee qingxsig be baiw.”
Guaw sui’ qra rinr hyw.
Qinaxzit si hiyckunwzit, lo nirr byy sniaw e trad. Lirkuix gerlongg kacc byy vnuar diamxjingx, Qandau Qiyy dyrr cuthen dirr guanw ee bagjiux-jingg. Sraiw zip laii Damrjuiw liauxau, jin’ hyw zirun, hro guanw siongr diyc jit xee cia’ui. Ciax tingg hyxser, ix dyrr qongw beh kir vychnua-vnix sanwvo.
Jitt jun pacsngr si limxlauu, haixjuiw vutsii e rig jnriu hnua. Zuxx uaw haixkauxsir, hongx qycc zuxx taur.
“E qnuaa .be?”
Guaw knuar ix cing dew rngw :ee, ciuxqud crunx .cud .kir beh qra lamw .uaw .laii. Ix kinx lat qra guaw ee ciuw vuacsag, qongw ix be qnuaa, dyrr jyww ix qniaa jinwjingg. Guaw byy ziog uaw .kir, diam diam aw dniduer dirr ix ee aurviah.
Zidtauu dauc dauc aw decc dimm lyc haiw. Guaw qapp ix jre dirr vychnua ee jinrvong hiax decc himsiongw ganxjenn ee bixqingw. Ix taux taux aw decc crid bagsaiw hro guaw ngiaw .diyc. Guaw tec ciuxqinx-aw hro crid, ix knuar dairjir byy huatdo amkamr, dyrr sueh qongxx, “Guaw jitt siwlangg m bad knuar quer jiacnirr suiw ee borsig.”
Vnivnii decc knuar hongqingw, guaw dy' byy ix jitt jiongw ee qamxjiog. Dairkair inx jitt quaw decc vnir gersut :ee, inx ee qamxjingg longxx viw langg' kacc honghur.
“Ix qamxx e dniardnia cua liw cud laii cittyy?”
“Dniardnia! Jit vaiw dy’ byy,” ix qongw. “Ix qniax kir gu diyc sigsairlangg, byy air qapp guaw dangjee dirr banrniw-banrbak ee soxjai cuthen.”
“Acc byy, linw longxx kir dyhh?”
“Vinquanw, luxsia a!”
Ix ee kauxkir bersux qongxx guaw decc mng ix jit xee jin’ vehbak ee bunrdee.
“Qamxx byy kir liw druar ee soxjai?”
“U, mrqycc jin’ hranw .did,” ix qongw. “Anxnix marr hyw. Guaw ee vangqingx-lai narr juann ix ee ngiaw, ix ee bi, qiyr guaw jnuaxngiu vingjing quer zidjiw?”
Guaw hnirkangx naxx decc tniax ix qongw, simsinn ixqingx dimlik dirr jit xee hunxangg ee jingqingw lairdew.
“Ix longxx air jre dirr bincngg-vnix decc jixhuix, qiyr guaw snxax jit niaw aw jit niaw qaqi kuanx,” ix qycc qewsiok, naxx cincniu decc qra guaw ee taukag janwlat. “Itding si dingxbin ee snxax dairsingx trngr, qycc laii si lingper-aw, jinrsuacbuew jiacc si lairdexkor. Ix jit xee bingrling, guaw jit xee dongrjog.”
Ix ee uergiw zuxx laii zuxx duardnaw. Guaw qamxqag ix naxx cniurr venr jit xee kuanw. Ix ixjaw dy’ byy jiacc qau ue!
“Ix e an’ guaw ee tauhiac kaisiw, jidlo jimx .lyc .kir. Bagjiux, vinwqag, amrqunw, qingqah, cuiwdunn qaur dyhh, ciuxjingxtauu-aw sui’au dyrr duer .laii. Guaw iauxx decc simx bee ir luan, ix ixqingx dirr guaw ee sinkux lairdew :ar.”
Guaw qui’ee siyzuac .kiw .laii, qamxqag qiongbeh jicjair be diauu :ar.
“Liw qaxnaxx u jit hxang qongw lauwjam .kir. Hitt xee javox lehh? Liw byy suar qongw jit xe aw ix anwjnuaw decc trngr snxax?” Guaw jin’ qew gauu, marr jin’ gedsiauu, qex cah jitt qxur .zip .laii.
“Ix dy’ m bad trngr snxax a!” ix qig jit xee buqox-siurkud ee viauxjingg. “Ix e qra kowtauu tauw .kuix, qigqik qra kor giuw qaur kacngdauw erkax dyrr dongwdiam :ar.”
“Liw si qongw ix m bad trngr qngx qngx hro liw knuar .quer?” Guaw zinrding ix decc qra guaw jrngx siauw :ee, simlai jin’ be songxkuair.
“U a, dniardnia decc knuar a,” ix huedab. “Guaw ee iwsur si qongxx, guanw decc siy’ qanr ee sijun, ix snxax longxx cing diauu diauu.”
Guaw jidsii aw gang .kir, byy sniaw beh siongsinr qaqi ee hnirkangx soxx tniax .diyc ee ue. Guaw knuar ix dy' jin' kiauxsinn, vutjiw aw u vxanw ee kuanw, jnuaxngiu e quwjai hitt xee javox (qamxx jniasit u jitt xee langg?) anxnix decc qra jenjuanw, vaixvor? Ix qycc e qongw coloxue. Guaw qiycsirr ix zuarr qysiong lehh!
Tnivnix u anghee qngx qngx, suiw suiw, vutqyr, zidtauu si qui’ liap brit lyc haiw ar. Ix hutzenqanx huah beh jauw, qongxx ix diyhh qinw dngw kir cur nirr danw denrue, in’ui hitt xee javolangg ing’amr beh an’ guarqog dngw .laii. Guaw liaursiongw ix decc vehcadcid, ix byngiaw beh dngw kir danw denrue. Jaboxlangg ee vorsor, guaw knuar qaxx m :ar!
“Guaw hiamw hiamw dyrr be qir .did. Jaixkiw guanw kanx :ee u qaudair, qiyr guaw junxsii lak diamw kir jriab .ix. Jin’ sitlew, guaw byy huatdo sangr liw dngw .kir," qongw liauw, guaw zimm jit dniux cnex bin :ee .cud .laii. "Dar, ciahuir guaw qra liw cud. Knuar si beh jre denrciax, iacc si qiyr qewdingg :ee, liw jurliw.”
Ix byy qra jrih .quer .kir, marr byy qongw byy beh tec. Guaw qra jnii sreh zip kir ix ee ciuw, iarr byy qongw jit qxur jaiwhue ee ue, uat lehh dyrr jauw.
Vychnua ee hong'ingw jit jun jit jun, jid’err kiw, tohunw vun .kiw .laii, jit quaw kinx bangxbangw ee vunwsyr ngiarngia vuex, tringg jin' quann. Sokqalog-aw, sucqongw, ginpiyr….
Ginpiyr!
Kavo dongr lehh, guaw dywhuantauu, knuar diyc ix iuguann kia dirr hiax, siangx ciuw kangx lylyx.
“Siauw jabow!”
Lirkuix Damrjuiw, guaw ing siongrr qinw ee sokdo qnuaw dngw kir Daivag. Qim’ia ee guaw, byy jaidiau zimxsiu qodnuax.
“M si qongw vnuawmii aw jiacc e qauwui?” Guaw kir cic inx daux ee denrlingg, fiancee knuar diyc guaw ee sii anxnix mng.
“Huergi tejaw qetsog.”
Guaw jid’err dac zip mngg sui’ beh ngaxcuir.
“Mair lar! Maxmah u dilehh.” Fiancee vingw vec bak, qexngiaw decc qra guaw grinn.
“Lanw laii jyr, hyw bor?”
Cimxtauu aw, ix qaxnaxx byy liac diyc guaw jitt qxur ue ee iwsur. Lixqaiw liauxau, ix ee bin-aw sui’ huanw angg. Ix tauu qaux qaux, ser aw sniax qongw, “Lanw u amr iog .quer, qamxx m si? Dnaxx dyrr decbeh qethunx :ar, liw siyw lunw .jit .xe maar!”
Guaw qongw guaw qui’ qangx longxx decc sniu ix, qycc qongw ing’amr narr byy qapp ix juewduix, si e zuarr tongwkow duw zuarr tongwkow.
“Vaiwtog lar!” Guaw hyw cuir itjair qra qojniaa. Fiancee bagtauu qad qad, simqnuax be sixsuah, lorbuexciuw, ix iaxx si u dimr tauu.
Guaw sui’ huatciax, ciasog vniar qaur cid~veh-jap. Jidlo, guaw ee taukag-lai itdit hro jit xee huanwqingw dnii diauu lehh: dirr jit xee ec bicbih ee amr qingx, jit xee snaaxkor jingxjee ee javolangg dirr binrcngg-dingw vnuawtedyw; dirr ix ee binrtaujingg u jit xee jaboxlangg dngdecc trngr snxax, siongrr tauu:a si guarsnax, suar .lyc si erdexsnax, qycc laii si….
Qrix...! Vrong!
Jit daii otau’aw hutzenqanx an’ hang-aw lai uad .cud .laii. Guaw ee dongxaw dac be hur, nng daii ciax jurr anxnix siy' longr.
Guaw qinw jongg .lyc .laii, huathen guaw ee ciadingx puar puar .kir, taujingg qui’ee mimixmaumaux. Duiwhongx ee sunxhai qex jin’ siyxkuaw, qanda’ banwbah liyc aw uaix .kir. Ciajuw ee bin hnuaii var var, jid’err lyc .laii dyrr kiw cyh, qra guaw ziongw jit kunr, jin' huelee. Guaw qra puevaux-aw-lai soxu ee dua dniux :ee longxjongw hro ix, jitt jann jiacc pacsuah. Vairhingr, guaw ee ioghuew huax .kir, cunbang lardauw.
“Guaw jair liw laii dngw.”
Handolu ced dywvingg pah hro siw, guaw qra ciax dywhuankox. Fiancee ee cuiwdunn kiaur quann quann, jin’ sitbong ee kuanw.
Jex ingqaix si guaw jitt siwlangg siongrr pnaiw un ee jit qangx.
Cid-guec ceid, vaiwzi
Sixjiaw, Janx Kaxlenn, 25 huer, jarhngx hro langg' huathen siw dirr qaqi ee bincngg-dingw. Ix ee hingkamw dingxquann u cah jit qix dyx, covo pnuawduanr, jex dyrr si diwmiarsiongx. Dirr bincngtauu ee dingxbin u dah jit dniux sixjiaw ee langtausiong, si ing envid rue :ee, zidjiw rah jarzit. Qingxhongx viauxbingg, sixjiaw sixbongg ee siqanx ingwqaix be ciauquer nng qangx.
Jitt diauu sinbunn iauxx bue juanvo tak liauw, horsu dyrr laii qra guaw longr mngg. Jit xee u jah cingr ee hingsu duer ix zip .laii. Guaw byy sniu vadd hxang, itsimx-it’ir qanda’ sniu beh suanx. Kacc sux guaw ee kaqud naxx cniurr hro langg' ing losidingx dingr lehh, jit vo dy’ suaw be dinxdang.
Hingsu byy encenn, jid’err zip .laii dyrr jinwhingg ix ee kangkuer. Ix iarr byy qiyr horsu huevi .jit .xe, qongw diyc ue qycc pnaiw qogqok, bersux guaw dyrr si satzinn hiongsiuw.
Bunrdee cincniu haixingw decc rig .laii, jingg jit xee dy’ vuew iauxx bue li lehh, au jit xee sui’ qycc laii. Si anwjnuaw jit xee jyr isingx :ee diyhh cua ix ee vnerlangg kir jiahvng? Guaw hamr lehh hoo lehh. Si anwjnuaw isingx diyhh ter vnerlangg kir quawhy, qycc dirr hiyckunwzit qapp ix cud kir hongsyx? Jitt nng xee bunrdee, guaw uanjuann byy jaidiau huedab.
“Guanw kyxlingg e hanrjer liw cutqingw.” Hingsu beh jauw ixjingg anxnix qra guaw qongw.
Ervox ee vanx guaw cingxqar, kar denrue vaiwtog dongsu ter .jit .xe. Guaw jiacc siyh binrpuee, tacc e kamx did ho'ngg tuanmiaa-suecsniax siurr qongdux, ho'ngg dirr aurviah decc qiw qiw duc duc!
Guaw byy dngw .kir, ciax sraiw lehh siwqer liur, naxx snua'iaxquiw, byy jit xee bogpiaux. Sniu diyc guaw itsingx ee pacvniar dyrr anxnix oiuw .kir, ciongsimhun, guaw jiokk m qamguan! Guaw qamxx e si hro sed .kir? Guaw dy' iarr byy duiww ix anwjnuaw! Uanongw-uandag, guaw lenrr ix ee ciuw dy’ m bad kanx .quer!
Fiancee jitquw m jaix decc congr sniaw? Ix qapp ix ee verbuw narr jaix, inx e sniu jnuaxngiu lehh? Iaxqycc, danw siausid narr tuann qaur qowhiongx .kir, guanw daux ee langg aurzit aw beh anwjnuaw dirr hiax kiarkiw? Siongrr hai :ee, guaw ee au vnuar siwlangg qnaxx dyrr dirr qnalyy lairdew ham'uanx pacsngw .kir. Sii qaur, byy langg beh cab .guaw, byy langg beh laii qra guaw tamwqnax; jiac lau, dyrr siw dirr hiax, qycc byy langg qra guaw ee sinsix kiyh dngw kir siubaii!
Ciuxqix-aw itdit qiyr be diam. Guaw m qnaw jriab. Narr si sigsairlangg kar laii decc mng, guaw rair anwjnuaw dab kacc hyw lehh?
Denrrue giangx beh jnia’ jap sniax jiacc dnia .kir. Guaw qra ciuxqix-aw giac .kiw .laii, denrue hyrbew cic hyxser, giangx quiw sniax aw, si jit xee ginxaw laii jriab.
“Guaw a’vxeh, qiyr linw buw :a laii tniax.”
Ginxaw dua sniax decc huah. Duarlangg tuax caqiac, kihkickogkok vniar .laii.
“Liw qra lauxsnax :ee qongw, qongxx joxcur ee dairjir, ix tangx quathingg, soxu ee huiwiong longxx guaw laii cud. Acc linw beh jyr singliw, vunxjnii guaw laii jringw, liw qiyr lauxzi :ee tolaku mair qycc sraiw :ar.”
Jitt hxang qaudair suah, guaw sniu diyc lingrgua jit jann, denrue sui' qycc kar.
“Uee, si guaw lar. Dingw vaiw lanw kir sew samunluanw, liw m si qongw beh jxox jit xee hue? Guaw quatding beh camx .jit .kax. Linw diyhh qra guaw sngr jairgiac ne!”
Ham' vangcinx qapp ving’iuw tongx quer denrue liauxau, u liyc aw kacc qaixud, mrqycc simqnuatauu ee ox hunn iuguann dilehh. Citguehtnix, lingxkir iarr m si qaiww dua qangw, guaw qui’ sinkux suacc decc kiw uiwqnuaa. Crunx ciuw beh qra lingxkir qimr srid, sitsinn, suacc kir jun diyc radio ee kaiquanx.
“Jarhngx hro langg huathen siw dirr qong’uw-lai ee siauwlenn luxjuw, qingx huat’ix giamrsix, kaksit si jurjin byy cyr; sixbongg ee siqanx, marr kakding si Lak-guec snax-jap. Qinqir ngirhongx ee juliau, sixjiaw dair u quxnii ee hequvne. Iuxquanx dan’ui pnuawduanr, sixjiaw dairkair si be kamx did vnertniar ee tuabuaa jiacc laii qniaa dexlo. In’ui si dansunn ee jursad surqnia, hingsu jxox tingjiw soxu diaujax ee kangkuer.”
Radio qewsiok decc vyr au jit diauu sinbunn, mrqycc guaw ixqingx byy cuwbi tniax :ar. Jimjiog knuar, jingtauu aurtauu longxx byy ciax, guaw qra ciax sec huanxtauu. An’ jiax kiw, taujingg ee lo dyrr u bogpiaux :ar. Guaw qra sokdo vniar jin’ qinw, handolu marr hnua jin’ ann, in’ui guaw ee snewmia qycjaiww vyxquir, guaw ee zinsingx qycjaiww u hibang.
Qaur der, hng hng dyrr knuar diyc hitt xee qoniuu-aw. Ix cing jit sux jin’ iamriaw ee ngiujongqunn kia dirr mngkakauw decc niaux niaux siongr. Dng' ix knuar diyc guaw ee sii, dyrr hiongr guaw dua lat et ciuw. Guaw jauw uaw .kir, ing nng qix ciuxqud qra ix qui’ senx langg moh diauu lehh.
“Liw si jauw kir dyhh?” fiancee dua lat qra guaw sag .kuix, og ciccih. “Guaw kar denrue kir vnerngi, inx qongw liw ervox cingxqar; guaw kar liw ee ciuxqix-aw, liw iurqycc m jriab! Anwjnuaw, liw taux jauw cud kir cue sionghyw :ee qniax guaw jaix m?”
Guaw qinw hiamwuanx, taukag siyw dngw .jit .xe, dyrr qongw guaw ervox byy kir siongrvanx, sidjai si uirdiyhh ix.
“Liw ee snezit decbeh qaur :ar. Guaw jin’ sniu beh sangr liw jit qnia kacc dedvet ee lexbut hro liw hnuahiw .jit .xe, mrjiacc juanqangx jauw cud kir cue.”
Acc ciuxqix-aw dann nacc byy beh jriab? Jitt hxang ee lixiuu qex jin’ hyw jong, venrtyr ee uersueh jin' je.
“Qi’aw sreh dirr kabang lairdew, byy tniax .diyc.”
Fiancee vnuar sinr vnuar gii, mng qongxx guaw brew simxmih snezit lexbut beh hro :ix.
“Liw cuir hro guaw jimx .jit .xe, guaw dyrr qra liw qongw.”
“Jyww liw longxx mair qongw. Guaw jiacc byy decc hihanw!”
Ix qra tauu uat hiongr jniawvingg decc dniudiyh, byy beh knuar :guaw. Guaw tranr jitt xee qihue, qra ix ee cuiwpuew taux jimx .jit .xe. Ix quntaubuw dnec lehh, qexngiaw beh pah :guaw. Guaw qinw qra hue sitlew, qongw ixau juadduir m qnaw :ar.
Sna' giyhsiyc .jit .kunr, fiancee qongw lauxser :ee duxjiah u kar denrue laii, qongxx si beh ham' guaw camsiongg joxcur ee dairjir.
“Ix qongw liw u cam' linw lauxzi :ee ee bow tongx quer denrue, qongxx liw beh...”
“Guaw simxmic longxx m bad qongw .quer,” guaw pacjic ix ee kikvnir “Au vaiw inx narr qycc kar, liw dyrr rinr jit sniax m jaix dyrr hyw. Iaxqycc u, guaw hitt quaw dongcongx :ee narr rair beh dic guaw ee juliau, cincniu sinhunrjingr ee hyrbew, cutsir ee zidjiw dingxdingw, liw cenban m tangx hro :inx.”
“Junbing.”
Ix tringg srinx hiongr guaw qniaa qixciuxlew. Guaw qycjaiww qra ix lamw dngw laii guaw ee hxingx-jingg, qamxqag qaqi jiokk hingrhog, jiokk buanxjiog.