1. Vanrqonghuexaw
Cuann quaw qesix
dag'ee laii sngw vanrqonghuexaw
Javox :ee jyr isingx
ciuw tec vongrjiamx
jabow :ee jyr horsu
juwsiardangg duiww kacngpuew
Cuann quaw qesix
dag'ee laii sngw vanrqonghuexaw
Jitt xee si suqix
vro ciurlingtngg
limx vesvi
cuir nirr hnaix quasix
Hitt xee si iulamciax siyxjiaw
cing jewhog
vunn vi'aw
yc qingxcad jyr qautongx jixhuix
Cuann quaw qesix
dag'ee laii sngw vanrqonghuexaw
Liw cniuw beh jyr vavax
jiac hrunx
knuar vywjuaw
hax siyx dee
Guaw air beh jyr mamax
buah hunw
diamw enjix
cing quandac'ee
2. Envid qapp Citvor
Envid qapp citvor
qui' siwlangg jyr duiwtauu
Envid duiww citvor qongw,
"Liw jiacc jit der aw qniaw
Guaw qui' qix dngg ~ ~"
Citvor duiww envid qongw,
"Guaw byy qniax vnuar langg
Liw snex ee zri
diyhh li guaw hng ~ ~"
3. Deqow qapp Deaux
Deqow mamax u sir xee haursnix
kinkinx-kiangkiangx tyw beh jiac nix
Mamax vakdow dua dua xee
jit langg jit vxuex longxx benw siy' jnix(jnex)
Qniazit dangwdingw binaxjair vaujingw
deaux uaix cuir qxex iarr tangx jiac hyw biw
4. Qauxquair Ginxaw
Hitt xee qauxquair ginxaw
jiac muee qiauw tngx
limx kola puer loxnng
denrhuew m kuix diamw larjig
crux tatami beh qycc air bincngg
Ho laii
cing hormuax qycc giac horsnuar
Hyw tnix
kax dac sandalu
buec-aw m qramx trngr
5. Giangjingx-aw
Cikjiauw-aw si giangjingx-aw
cid jaw veh jaw dyrr decc cirbuxcirca
Lanw camsiongg .jit .xe
Binaxjair hiyckunwzit
qiyr jingsinn ban .jit .diamxjingx
dauwdew tangx iacc m tangx
6. Ginxaw qapp Ngix-aw
Diyh'air jimjiog
didix cuiwkiw dngdecc huad
guaw suacc dendyww lag
Diyh'air juwir
guaw qnialo qorr kaqud nng qix
didix pag dirr tokax siwqer syy
kax quaww ciuw longxjongw sir qix
Diyh'air sewzi
guaw cuarziy
jingwlangg qra guaw ciyr
didix taux cuarziy
mamax qra ngua ziyrju-aw qycc qra siyh siyh
7. Denrjuxpuex
U jit jiongw puex qiyr E-MAIL
beh qiar benw dah iupiyr
Daiuann Aujiux Bixqog
qiar .cud .kir sui' siux e diyc
Beh quawhy
Jin' pnaixser
jitt jiongw hogbu byy decc juer
Puex knuar .diyc .be
Qnaxx diyhh kar denrue mng hro siongser
8. Hongx qapp Ginxaw
Qnuaa .langg ee hongx qaiww pnaiw siw
tang'axmngg hro longr qaxx beh lag .kir
Cur-lai kacc siyly
ix iarr sniu beh zip laii hiycmii
Javoginxaw ciyr haihaix
duiww hongx dua sniax huah qongxx
"Ingwqaix ingwqaix
gunw jiacc be kuix mngg hro liw zip .laii
Liw jiokk iaxbew
qui' zit dirr guarkauw luarlua syy
Mamax byy air gunw qapp liw qauvuee
mair qycc diamr jiax qapp gunw lilyx"
9. Di qapp Nguaxvnuaa
Pet'aw jiac cair
nguaw jiac vng
guaw ee di
dagg hxang beh damx
jnuaxngiu sen' jiac dy' sanw vivax
10. Ngiujongx
Snaduu-aw lai ee ngiujongx
dagg qangx caw beh cud kir cittyy
Ix ee juxlangg qongw,
"Liw qui' sxux lacsab lixlyy
Diyhh singx kir sew pongrpongg"
Sexsnaqix mngg henx .kuix
ngiujongx sui' tiaur .zip .kir
Amrniaw ciuxngw sna'axqix
qui' sinkux sapbunpyx
11. Hrunx qapp Huanaxhuexqix
Vavax diyc hiwvni
Mamax jiokk sniurkir
qongxx an' qinaxzit kiw
hrunx qapp huanaxhuexqix
berdangr dirr guanw daux kiarkiw
Huanaxhuexqix huah uan'ongw
qongxx hiongsiuw si hrunx m si ix
Qycc qongw an' qinaxzit kiw
beh qapp hrunx jitt xee ving'iuw dng qaxx li ~ ~
Jimjiog qycc sniu .quer
Mamax pnuar huanaxhuexqix byy jue
12. Ciaurkyxliw qapp Debixdee
Debixdee
kow decdeh
jnuaxngiu tauwjaw tauwamr tauwdiongdaur
a'qongx liw longxx air limx .jit .vxuex
Gunw u ciaurkyxliw gulingx dnix butbud
vunx liw limx
qamxx beh
13. Pni Bak Cuir Hni
Gunw ee bagjiux uac dirr zuahtnix
qngx sicsih
u zedjingg
Gunw ee pni-aw uac dirr cuntnix
kacc anwjnuaw pnri
dy' pangx pangx ee bi
Gunw ee hni-aw uac dirr amwmii
laudingw laukax
qeww diamrjing aw diamrjing
Gunw ee cuir uac dirr diongdaur
venrdong'ap-aw henx .kuix
byy qaxx jit sii tingg
14. Hosqongw
Cuntnix
horjuiw naxx liamtix
juixkor qiongbeh kecmuaw
ix dagg qangx dy' laii qyqyy dnii
Go~Lak-guec aw iauxx bue hiyczuac
horjuiw dyrr jauw kir dorqaw
Canjngx hniaqyx beh vror cann
siwqer cue byy ix ee langg
Beh cniaw jit xee tojuixsaix
An' tnidingw kanx jitt diauu hosqongw lyc .laii
Kyxngua
juixdyrtauu dyrr qra jun .kuix
jyr duarjuiw
juixdyrtauu dyrr qimr hro ann
15. Huelingqix qapp Hunxjiauw
Jit jiah hunxjiauw-aw
mng tnidingw ee jit daii huelingqix qongxx
"Liw ee sxit longxx byy decc dinxdang
qamxx si puawvne ar qaax"
Huelingqix ciyr qaxx qirqa qunw, rinr qongxx,
"Hunxjiauw-aw liw jiokk hauwdaix
guaw tih jyr :ee liw qamxx m jaix
Diyhh siamw kacc kuix lehh
Byy duxhyw longr diyc
si byy guaw ee dai"
Tnix kuah bongxbongw
iuguann huatsingx qautongx surqor
Jit din hunxjiauw-aw decc camsiongg
sniu qongxx
tnidingw
qnaxx diyhh sed cni'angdingx
sed sibzirlo
16. Qewdingciax
Hongx
lingw sicsih
Tnix
amr sysyx
Jit din ginxaw qniaa m jaix lo
vakdow iausyr-s.
Ginxaxtau'ongg qongw,
"Dag'ee benw diyhqniax
lanw daux dirr dyhh
sraiw qewdingciax ee a'veh longxx jai'ngiaw"
Jitt xee druar dirr qonghngg ee vnix:a
Hitt xee inx daux uaw biyrdniaa
sraiw qewdingciax ee a'veh
handolu narr pangw hyxser
taksi suisii dy' tangx kixqniaa
17. Niaux iacc Cat
Bih bih cih cih
qnialo byy sniax
bagjiux qngx lrai lrai
kaciuw jiokk mexliac
a'dok'aw qongw dikkag si niaux(CAT)
gunw beh qongw si cat
18. Jngkax qapp Doci
Jngkax ee guehniuu
giac tauu dyrr knuar e diyc
be cincniu doci ee
ciangjai bih dirr lau'axcur aurviah
jiokk viwsur
hai gunw dniardnia decc cue byy
Druar dirr jngkax ee cnxix
dagg liap dy' qngx sicsih
be cincniu doci ee
amwdam byy guankir
Gunw decc iyh
inx byy jiac vng qnaxx si
19. Unrdongrhue
Bangxtangg ee unrdongrhue
cuwkia si unrdongrdniaa
Jit din qauxhia qrngx jit der vniaw
cunr cunr aw jinr
unliauu aw qniaa
qrngx e dngw .kir dyrr sngr inx ngiaa
Naxx jenwdauwqix
bangw-aw ee cuir u draur buxkir
Liammix cringr quann quann
liammix vuex qe qe
knuar si'angw suh .diyc ee hueh kacc je
Qajauw siwqer tiaur
an' jitt dingw pongwcngg
qaur hitt dingw pongwcngg
iarr tangx viw quann
iarr tangx viw hng
20. Sauwciuw qapp Vunwdauw
Langkectniax jauw jit lenr dngw
sauwciuw huah qongxx,
"Dag'ee qinw laii knuar
cur-lai cingkir damdamx"
Vunwdauw byy-sniax-byy-sueh
vunwsyr jyr jit cuir tunx lyc vxag
21. Pnaiw Mic-Aw
Tuacduu-aw m tangx kuix .kuix
denrsi denrngiaw u decc vnuax
qongxx hitt lairdew u qxuiw
Denrhuew m tangx qimr .srid
mosinn-aw amwtauu aw vakdow iaux
e liac gunw ginxaw jyr diamxsimx
A'maw qongw qxow mair u mngwsngr :ee
amwsii ngox ngox kunr
tangx jit cnew qaur tnix qngx
22. Quaix Ginxaw
Mamax qongw
"Ang'axmic siux siux kir kngr"
Javoginxaw qongw
"Jin' huiwkir
binaxjair dyrr beh qycc sngw"
Mamax qongw
"Mijiycpue jih jih lehh"
Javoginxaw qongw
"Ing'amr dyrr beh qycc qah
qamxx diyhh jiacc qanghux"
Qimjux-aw lag dirr dyhh
javoginxaw siwqer decc cue byy
a'maw dirr langkectniax vuac jit dyw
Buec-aw jauw kir dyhh
Dangsi'aw dirr bincngg dingw
jit kax caur buec-aw iauxx bue jingsinn
23. Liwvairdaiw Envid
Qniazit guaw jin' m qramx
beh sangr jit xee ving'iuw cutsnuax
Jit qix Liwvairdaiw envid
Gunw siaw zri diyc quanqunx
kyxcir kyw jit-vah hunx
dagg hxang vixsair ix dy' u hxun
Cutsir ee sii lyr siangrsiang
beh dngw .kir
suacc cunx jit quec aw qniaw
Liwvairdaiw envid
liw ee qonglyy
gunw e siaw dirr zidqiwpo
i.-ingxuanw-u. qra liw siauwliam
24. Qi'axvingx
Qi'axvingx
lingw qiqix
qnuix dirr lingxdongwkor
qui' sinkux ding kokkog
Qniax ix qnuaa
qycc iarr qniax ix zuac
Sidjai qaiww huiwkir
kacc qinw jiac jiac lehh kacc quikir
25. Tnix ee Sikcaiw
Hunn
kuix dirr tnidingw ee huex
King
jy dirr tnidingw ee qiyy
Sicnar
sed dirr tnidingw ee neon-dingx
jitt kxamw dxiamr
qandna' bre horjuiw
26. Si'angw Taux Jiac :ee
Cur nirr qandna' guaw
mrqycc
guaw byy taux jiac
Gasloo dingxquann dngdecc qrunn ee ligdaurtngx
jnuaxngiu e sitjuiw cunx vnuar dniaw
Mamax mng :guaw
guaw beh mng si'angw
27. Petsivaii-aw
Jit vanx go-jap-zi xee
jit langg jit qix vaii
nii-buew sngr diamxsor
jit lexvair ngua jit vaiw
Rinw .jit .qix
Angg Asii
kyxcir byy jit-vah marr qauw-jap-zi
Rinw .jit .qix
Dauw diyc ox veh aw jin' suebuew
siongrr je marr jiacc nng hunx qigqex
Qycc rinw .jit .qix
Knuar diyc ang'aw
simlai benw tiongr decc danw
langg jiac siangx angg
lanw bin-aw dyrr iux qatqad
28. Qajair Guaw U Siyxdi
Jin' qajair
qajair guaw u siyxdi
Guaw ee qu snxax qu kor
ix tangx longxjongw kiyh kir cing
Jin' qajair
qajair guaw u siyxdi
Jyr pnaiw dairjir
tangx quisu lua hro :ix
Jin' qajair
qajair guaw u siyxdi
Simjingg narr decc byy songxkuair
qra liamr hni-aw liamr cuiwpuew liamr pni-aw
qeqiamw iarr tangx tauw jit xe kuir
29. Snezit Lexbut
Tnidingw ee hunn
nngw simwsimr
iur mimix
iarr tangx jyr bincngg
iarr tangx jyr huelingqix
Vavax mamax
muanii guaw snezit
linw mrbenw kaix jnii
Tnidingw ee hunn muaw muaw si
cinwcaiw banw .jit .pnir
dy' tangx junw gunw ee lexmic
30. Lag Taumox
Ciutnix narr qaur
dua ciu dyrr lag taumox
danw qaur qecdngw nii cuntnix e qycc snix
byy cniurr gunw a'vax
tuchiac qui' nii tangr tnix
31. Dongrbudhngg
Dongrbudhngg lairdew
siongrqaiww lyr :ee
amrqunw qapp kax vnee hiacc dngg
Siongrr u dang :ee
pni-aw naxx hosqongw
Siongrr cauxqauu :ee
dirr ciu-dingw decc hnair laii hnair kir
Siongrr qoxjuix :ee
mamax qiw guaw
32. Lingbuw Ginxaxjaix
Ngix-aw quaix quiax
m tangx ovec hnaix
nenex
jiujiu
linglongqow
beh air dycc jit hxang
liw m dyrr qongw knuar mai
Guaw ziyrper-aw cing L
beh ngc ngc jai'ngiaw diyhh singx qongw
Liw cing S :ee
caur qnoqnox
saixziy lam lam jyr jit qoo
33. Tako qapp Didux
Tako qapp didux
kaqud vnii je qix
beh siy' pah
horsiongx byy siy' pnix
Jenwdniuu sed dirr dyhh
diyhh singx qongw hyxser
knuar si beh haiw nirr iacc liogde
34. Denrhongx
Zuac .langg ee denrhongx
taukag byy ingg ciccih
liammix bin hiongr guaw
kacdingg aw uat hiongr liw
Derr snax vong ee hongx
bii bii aw cuex
unliauu aw si
Poaxjuaw vyc sisix
hongli'aw nngw simwsimr iarr tangx qra congwdi
Pangw qaur id srog
denrhongx qnuaw huwhur
hiongg qaiwqair
hongx decc qiyr siuh siuh siuh
snia'imx dirr hnirangr-aw vnix
35. Qauxhia
Liw qamxx dyrr si jahngx jyzit aw hitt jiah qauxhia
Jiacc iauquiw
quer dy' byy nng qangx
jiacc qinw iurqycc laii beh tyw jiac
Dyh-dingw ee pudyqnuax m hyw siauwsniu
tokax ee vniaxiur-aw tangx bongxx vnuax
Banrvutzi qajuac laii
liw dyrr bagjiux qimx qimx qandna' knuar
36. Ciongx Den
Ciuxden ee dinghuew sicsih junr
Ginxaxlangg bagjiux cabcap nih
Denrdaii ee qua'cnix
snia'imx pihpic cuah
Dauwdew si anwjnuaw
Dangsi'aw si byy den lar
37. Utdauw
Utdauw
u snex sxit
an' vavax siajuh binrdingw liux .quer
amrniaw tringg ~ ~
an' gunw puerdnuax binrdingw hruee .quer
amwsii decc kunr hyw lyc binn
M na anxnix
a'maw ee hiahhunn qongxx beh deh hro vnii
qnuaa .langg ee ciuxqud beh hro tewvingx
Utdauw
liw qamxx be sniu' qevysingr
38. Hongsiaa
Hyw tnix venr oimx
zuac .langg dngw lianglingw
hongsiaa dirr jitt xee sii uahdang
Laii qaur qokhau-aw
jaboxginxaw muevng m jiac air jiac siwsiur-aw
hongsiaa zip kir ix ee hiwqngw druar snax qangx
Laii qaur iyjien
javoginxaw caiwsex byy air tyw beh jiac bah
hongsiaa kir qra vaiwhongw
dnii jnia' lexvair langwtangr
Jiacc knuar dycc jit zit
hongsiaa cue byy soxjai tangx kir
qeqex-horho vangr paur-aw benw danw quewnii
39. Quexjiw
Linggingw linggingw
sinkux dax pixpiw
srinx cing sejongx dua dua sux
naxx decc vunn qequix
Iu-aw iu-aw siongrr qniax lingw
Diongciux iauxx bue qaur
mihiuu muax qinw qinw
Qam'axbit
ser liap jiw
puebah liamm jywhuew
beh jiac diyhh jyr jit cuir
40. Cngkor
Vavax ee cngkor lairdew
u snax-jap-snax juanw ee kikvnuaa
Dann Hunlann ee log'imduar
jit tong CD
bin quah qaxx nriaux viwvar
Jejex ee cngkor lairdew
u jit tac jingpuex
jit liap BB kox
jit qix ciuxqix-aw
u kacc trer liuhingg :ar
Guaw ee cngkor lairdew
u jit qix qoxaxdingx
dangqongw-aw dingr :ee
jit daii vuxvuxciax
draur denrdii :ee
jit jxox video gem
qurnii ee snezit lexmic
Mamax byy cngkor
qandna' u jit kax qu puesniux
lairdew u nng siangx ginxaw-ree
snax niaw amrsuee
qycc u guaw ee jit kxiw lingkiw
lag ee sii lak huer
41. Ciaurkyxliw
Ciaurkyxliw
jiac je e lag cuiwkiw
duarlangg longxx anxnix qongw
marr m jaix qamxxx u jniasit
Denrsi decc vnuax Dolaemong
langkectniax qandna' guaw qapp a'qongx
A'qongx hro guaw nng der ciaurkyxliw
ix qongw jitt jiongw tng'aw qiyr jyr ciokoleto
A'jew dirr vangqingx-aw lai
Ingbunn kyxcir dirr binaxjair
Ix hro guaw nng der CHOCOLATE
qiyr guaw diam diam mair qra caw jiacc u quaix
Mamax dirr jauwkax sew nguaxdi
guaw uaw kir qra tyw ciaurkyxliw
Ix qongw jit qangx qigqex nng der
jiac liauw sew cuir diyhh qnuaxqinw si
Qinaxzit
ciaurkyxliw longxjongw jiac lak der
cuiwkiw dy' iauxx hyxser hyxser
Sidjai jin' hnuahiw
42. Tanr Jnii
Vavax mamax cud kir tanr jnii
tanr jnii tangx brew biw
brew biw tangx juw vng
juw vng hro guaw jiac
jiac liauw duarhanr tangx cud kir tanr jnii
43. Dedang
Bincngg u sir qix kax
dedang laii dyrr picpih cuah
Iyy ar iyy
Qinw qycc ngox ngox kunr
jit xe aw quw dyrr dnia :a
Kiangx!
Hex simxmih sniax
Benw qniax benw qniax
Puar jit qix jiuxqanx-aw nia
44. Denrciax
Guaw duarhanr
beh kiw jit diauu denrcialo
An' guanw daux kixqniaa
jit jam tangx kir brew tng'aw vniaw-aw
jit jam tongx ang'axmic ee dxiamr
jit jam qaur a'maw daux
benw qnialo
marr longxx benw vnuaa qongciax
Tong' sewqair
jueww derr id lirven ee denrcialo
dyrr si jitt diauu
Mrqycc
diyhh tingwhau guaw duarhanr
45. Horsnuar
A'maw ee horsnuar
vinxaxqud lag jit qix
Lyhhortnix cutmngg
kacc giaa dy' jitt qix
Mamax ee horsnuar
i.-iuwsiur-s. suiw dangdangx
iarr beh ziax ho
iarr beh jac zit
Vavax ee horsnuar
ox japjab
duarbuw qix
Ho dua puah
iauxx si diyhh uaw ix ee kacc si
46. Diqongx
Ix cri jit jiah diqongx
cuanww jiac dy' ginqak'aw jit kox jit kox
Mng ix dangsii beh taii
Qongxx,
"Tingwhau guaw aurzit aw snex qniaw crua bow"
47. Denrhuew
Jitt kuanw sinlyy qaiww hyw mia
Gunw kunr
ix marr kunr
gunw kir tagceh
ix iauxx m kixcngg
Denrhuew pnaiw cuiwdauw
vadd hxang longxx m air
qandna' beh jiac den
Den quir somsomx
cniar ix qui' qangx sidjai be hryy
tangx jyr amwsii :ee dyrr hyw
48. Vnerdok
Denrnauw cutsir byy jingr jxux
vnerdok laii dyrr beh siw narhnai
Jingwtauu siyxkuaw tangx qaqi knuar
Narr jiahlat
diyhh sangr isingquanw
Jit jua kir
byy jit zit iacc vnuar vox be suah
49. Piano
Piano jiokk taixqyquiw
tauwjaw tauwamr byy decc sew cuir
qui' vaii cuiwkiw ox japjab
cuanww jiur dy' dingxquann kxiw
Dauwdew dirsii beh kir laudingw jyr vaiwhongw
Sensnix qongw,
"Benw qnuaxqinw
Laukax :ee singx qor hro iongxjongr"
50. Pudyjangg
Vakdow diuh diuh aw tniar
Jit liap pudyjiw dirr vakdow lai
vuh ngiw
dingr qinx
duarjangg
Pudyjangg duiww guaw qongw,
"Linw mamax qamxx m si u qaudair
qongxx jiac pudyy
pudyjiw rair pruir .cud .laii"
Pudyjangg suanx dinn
Jit lo kiw .laii
uirdngg
hiwqngw
na'aukangx
Qniax .jit .xe
jingsinn
Pudyjangg byy-ngiaw-byy-jiah
51. Snxax
Kaqud ee snxax si buec-aw
Jingxtauu-aw ee snxax si ciuxlongg
Bin ee snxax si enjix qapp pongwhunw
Qui' qehuew-aw
dy' mamax decc cing narnia
52. Cenxtuax
Gunw ee cenxtuax duxjiacc muaw guec
dyr kax qiyr qangx :ee
jniar kax qiyr buw :ee
Cimxtauu aw
qangx :ee qniaa jyr jingg
kacc danw
ix suacc dirr aurbin
Vnuawdiongdoo
tokax jit kud juiw
Buw :ee huah qongxx,
"Byy qniaa be cutmiaa
lanw diyhh dramx su'ngiaa"
Dyr kax u tniax jniar kax ee cuir
53. Cingg-aw
Lo-vnix ee cingg-aw tyw beh limx juiw
Benw keckir
horjuiw dydyx benw qniax byy
Lo-vnix ee cingg-aw tyw beh jiac zit
Zidtauu qongqex ee
benw jnii :ee jinrliong gneh kir puer
Lo-vnix ee cingg-aw tyw beh suh kongkir
Sinsenw ee kongkir guanw kacc kueh
Zit .sii suh :ee
amwsii suacc qra tror .cud .laii
Cingg-aw
liw qaxnaxx u kacc tyxjer
54. Snuax I
Jniawciuw vingg ee snuax iauxx decc dua
dedang quer
iurqycc quann quixnarr cunr
Dywciuw vingg ee snuax jin' pnaiw knuawsniur
jurnii huew siyx snuax
kangcuir qaur jinw iauxx bue qenpiw
Aurviah ee snuax li gunw u kacc hng
ursii cnix linglingx
ursii dar bongbu
Taujingg ee lau'axcur quann duw tnix
jac diyc gunw ee Quan'imx
suacc qongw,
"Hex linw daux ee dairjir"
55. Snuax II
Jitt liap snuax cnix linglingx
sinkux dingw ciurjangg muaw siwqer
Hitt liap snuax vec siaksiag
guartac-aw si sngseh
Jitt liap snuax qngx lutlud
byy cing snxax tngwvakteh
Hitt liap snuax huevalixniaux
binrdingw juann kiarqex
56. Siauwsniu
Qinaxzit ee denrsi
hihix-huarhua
Qinaxzit ee vingsniux
kangx kangx byy vnuar hxang
Qinaxzit ee taukag rair kacc vniawsir
Hyw jiac
hyw sngw
hyw cittyy :ee
beh snix .cud .laii diyhh jyr jit sii
57. Dorunw
Jitt jiah dorunw
be qniaa be jauw
sinkux pacqatqiuu
dyw druar mngkakauw
Dorunw dorunw
liw diyhh qinw suaw xui
Mamax hiamm liw lacsab lixlyy
byy air liw dirr guanw daux luarlua syy
58. E.T.
Liw qongw
linw qowhiongx ee mihqnia oisi
mrqycc qaiww hyw
gunw diyhh qaqi cuann jiahsit
Liw qongw
linw qowhiongx ee kongkir jiokk sinsenw
mrqycc qaiww hyw
gunw diyhh qaqi cuann oxsyjen (OXYGEN)
Qongw diyc jiac
gunw jin' cinwcaiw
Dniardnia kir cangwjuixbi
vutsii draur sngsor marr ersaiw
Jit jua lo jre UFO kir qaur linw daux
ongxhuee ee ciadnuax
jiyh mng diyh'air kaix quiw ngii
Zidjiw narr qongw dnia
sinjniax-sii aw
gunw diyhh kaisiw kiam saikiax
59. Model
Hitt xee a'ii jin' hyw kangx
dagg qangx cing qaxx suiw dangdangx
Mng inx daux dirr dyhh
Qongxx
qenwvunxduu beh druar jit siwlangg
60. Ciurjaix
Tokax ee ciurjaix
limx juiw dyrr beh dua
suh kongkir dyrr beh uac
too banw diauu lehh dyrr kia e jniar
jiac diyc zit dyrr e ciyr haihaix
61. Doo
Kiw jit qingx cur dirr uerdowjuaw
qinaxzit
vavax mamax singx vnuax zip kir druar
binaxjair
cai pongwiw qapp qongmaw
Bangxtangg qapp niauxciw
cniaw dongr lehh
byy soxjai hro linw kia
Qauxhia qapp qajuac
sidjai gunw dy' byy inx ee hxuad
62. Ginxaxlangg
Guaw si jit jiah ingqyx
duarlangg qongw jit qxur
guaw dyrr yc jit qxur
Guaw si jit jiah qausan'aw
liammix dimr tauu
liammix hnair tauu
kacdanw qycc diyhh pah pog'aw
Guaw si jit xee haursuanxzinn
beh jiac
beh limx
beh cittyy
longxx diyhh
vaiwtog vaiwtog vaiwtog
63. Binrcniux
Pni qiur qiur
vavax qongw guaw decc sniurkir
Cuiwqag suee suee
mamax jai'ngiaw guaw byy hnuahiw
Bagtauu qad qad
a'maw qongw guaw u giaugii
M na cuir
dangsi'aw bagjiux qapp pni
inx iarr e laursiap viwbit
64. Iw-aw
Vavax ee qau'iw s.-siwjniar-j.
Mamax ee pongwiw bah ~ ~
Guaw ee ixqoxtauu-aw u kax byy ciuw
Langkectniax ee iyiw hiongr jingg hiongr au
a'qongx dirr hiax kunr diongdaur
65. Dorquaix
Binrtangw-aw lairdew
jit jiah dorquaix decc siuu juiw
u tauu u buexliux
qycc snex sir qix tuiw
Tnix qngx binaxjair
dorquaix-aw suacc byy .kir
Jit jiah canqab-aw kuu dirr binrtangw vnix
Canqab-aw
guaw mng :liw
dorquaix-aw qamxx liw qa'ngg jiac .kir
Diyhh qinw duiww gunw qongw jiauwsit
Narr byy
si beh qra liw liac kir jyr harsuiw
66. Ijniuu
Mamax ee lexhok angg pnawpnar
jiac sinniujiuw
siongrr air cing ix cud kir denw ho'ngg knuar
Vavax ee ziamwbah air beh jyr jenhongx
qnuaa .langg
ziax hongx jac ho jueww derr id iongw
Jejex ee kunwsnax qniax qenwsiaur
beh qnir :ix
diyhh dirr gunw cur nirr
Guaw ee buec-aw qor langg uanr
buerjingrr knuar .diyc
dag'ee pni-aw dnec lehh
siamw qaxx li ~ ~
67. Juaw-Junn
Jyr jit jiah juaw-junn
Igjyy junw kejunr
Byy hongx byy iyy
Jriw qniax
juixciangg an' tnidingw laii siyx huthud
68. Sniax
Ciuxqix-aw decc liangx liangx liangx
beh jriab m jriab
vavax diyhh knuar siongser
Denrlingg decc qiuh qiuh qiuh
jap xee qauw xee
mamax ee jixmuerpnua laii siy' cue
Qiywjingx decc giangx giangx giangx
beh kyw tauu miaa
jejex diyhh kacc zinrhun
Vakdow decc qiyr qilixqurlu
hyw jiac pnaiw jiac
gunw longxx beh valunx tunx
69. Siongwpo
Hitt xee angngex-aw
jiac lingcuir-aw
taukag byy mox
kacngx vaux ziyrju-aw
Hitt xee axvuii .qyx
nng luiw bagjiux ngii linwlinr
nng kxiw cuiwkiw viyx viyx
naxx ciyr qycc naxx decc lrauu nxua
Jitt xee javoginxaw
qui'ee bin ox sysyy
baixqauu baixqauu
lrauu pnirjuiw qycc lrauu pniryy
Lanw jiycmng .jit .xe
siongwpo dingxquann ee ginxaw si si'angw
Duarlangg qongw,
"Kir mng qniar"
70. Iauquiw Maw
A'maw qongw
gunw ee bin angg qongwqongr
jit xee naxx linggo
Kadow ciuxdow vuii lutlud
jit jad jit jad naxx lengnau
Lenxburpni
lingqakcuir
bagjiux naxx hingrzinn
Taumox qra gunw vak kaciadinn
qongxx qa .lyc .kir
qnaxx e knauc knauc knauc
71. Sowzi
Vong'aw qongw guaw zi-jap qxinx
Nngw ciyh qongw guaw snax ciyh zi
Mamax qongw guaw qinnii sir huer
Jingxtauu-aw qar guaw qongxx
muanii beh tak iyjien
72. Ciu
Jaiwhue
guaw ee ving'iuw
Lingrqangx qycjaiww qnir diyc liw
e dirr cecqeh-aw dingw
dirr bre bincngg dyh-aw ee diamwtauu
iacc si dirr snuax-dingw ee biyrsi
Bylun dirr dyc'ui
gunw pacsngr byy jaidiau qapp liw siy' zin
Jaiwhue
dua ciu
jex si siongrr buew vaiw ee siy' srii
73. Popai
Mamax air gunw yc Popai
jiac vng diyhh puer vueling'axcair
Gunw aurzit aw iarr byy beh qniajunn
byy jiac qamxx bersaih
Pluto dua pnaiw langg
Popai jiacc diyhh jiac voxcaiw
Siy' pah uanqex guanw byy air
byy jiac qamxx bersaih
Oliv sanw qycc vyc vxanw
jnuaxngiu benw jiac vueling'axcair
Gunw ee hunrgiac jongw hro ix
Pluto narr qra qrang
ix tangx benw qycc ngr Popai
74. Jingxtauu-aw
Go qix jingxtauu-aw
cutsir dyrr liamm jywhuew
jitt xee vuii
hitt xee sanw
jitt xee lyr siagsiak
hitt xee exaxdangquex
Duartaubuw kacc pnaiw mia
dagg hxang sittauu longxx u ix ee hunrgiac
Buexjingxjnaiw hniux hniux aw ladtauu byy
pacpair kangkuer rair kacc kinkyw
Qiw jnaiw air hongsinn
hyxpnaiw dai longxx ciongx dirr taujingg
Cunx :ee hitt nng qix qaiww hihuax
suanrjiyc bexlyw
dagg jiongw ciuxjiw inx longxx hyw
75. Taumngg
Tauhiac dingw hitt niaw jangsuix
u langg kacc dngg
u langg kacc dew
uree jadjnix
uree kacc sxex
Qycc marr u langg trngr teh teh
taukak'nguaw knuar hen hen
Tauqaur hitt niaw u kacc byy qangg
qimx siaksiag
cing ee langg si Bixqog laii ee jejex
76. Ree
A'maw ee caqiac qaiww hiauvaix
kikixkogkok kikixkogkok
bersux qniax langg decc m jaix
Mamax ee quandac'ee jiokk jicjuh
taukag qig ngar ngar
kacngx kiaur ducduh
Guaw ee unrdongree siongrr byy kaihuar
vaux qaxx bat jiucjiuh
qycc diyhh vak eduar
77. Hunn
Nraa sig ee tnix si uervor
vec sig ee hunn si doo
Ngiuu-aw mexmex dirr diongx:a decc jiac cauw
niaumix dirr vnix:a kunr diongdaur
Hunn jin' byy dniardiyc
Hongx jid'err laii dyrr siwqer kir
Beh ing qoo-aw qra dah hro diauu
knuar ix beh anwjnuaw qycc ovec jauw
78. Qongw Qxow I
Jit din ginxaxjaix
siangx ciuw tuh erhaii
bagjiux tenw dua luiw
hni-aw iah lrai lrai
Qniazit beh qongw ee qxow
miaa qiyr jyr Hoxqovyy
Qoxjaw qoxjaw
u jit xee lau a'maw
cuiwkiw giangr giangr
siongrr air jiac ginxaw
Bak jit nih
qui' din ginxaxhniax
jauw qaxx byy knuar did ngiaw
Binaxjair ee qowsu guanjai jingcaiw
Byy dnaw :ee
cenban m tangx laii
79. Qongw Qxow II
Vavax naxx jit daii CD imhiongw
kaiquanx cic .lyc .kir
tyy-aw ginxaw ee qxow
qongw qycjaiww qongw
Mamax qongw qxow naxx sensnix decc kyxcir
debok vacvah jiongw
u surhuix
m si kox dyrr si cxex
marr u suanxdik
qingw jit nng snax sir
Naxx jit-cingx kxongr jit xia
a'maw ee qxow
ingxuanw qongw be suah
Jit mii lywlyr dngg
dirr bang-diongx
qowsu ee qetqiok
qiogvunw tangx u quixarr jiongw
80. Juaa
Gunw am'axqunw u jit buew juaa
ox sysyy
qnir diyc juiw dyrr suanx .kir
A'qongx iyjiacqud u jit buew juaa
e qa'ngg qa
qycc e qa'ngg gniaux dixdix
Snuax-dingw a'vyy cuiwpuew jit buew juaa
an' dngw duarlangg qaur lau
duer ix duer diauu diauu
Qauwdngg ee bogsux
qongw lanw simqnuax druar jit buew juaa
qanx qanx qxuiw qxuiw
quaqyw cnix viangwviangr
iarr saixsyx lanw kir banw
81. Jiwguan
Danw guaw duarhanr
beh siaw jit diauu quax
cincniu radio dngdecc hongwsangr :ee
venrnarr tniax
simjingg dyrr knuiwuac
Danw guaw duarhanr
beh venx jit xee qxow
cincniu ciuxtauu jitt vunw ceh
venrnarr tak
bagsaiw dyrr jimjimx lrauu
Danw guaw duarhanr
beh rue jit vxag doo
cincniu bixsudquanw ee Monet iacc Millet
venrnarr knuar
simtauu dyrr kuikuah
82. Qequix-aw
Qequix-aw hyw iyci
suh kongkir dyrr vuii ~ ~
Siauxtamx suh sniu' hiongg
vok jit sniax
vakdoxpuee puar .kir
Duarhanr sewhanr diyc cniqniax
kaur beh cue mamix
83. Juvaux
Sowhak, ligsuw qapp derliw
binaxjair beh cua linw kir qnir sensnix
qinw kir juvaux lairbin jiamr jit xee xui
Envit'ac-aw cutsir beh laii cittyy
bylun lyc ho iacc taur hongx
dagg qangx longxx tangx cud kir hongsyx
Jiaxtingg liennluowvuw
vutquanw sii diyhh jah diauu diauu
narr pah m qnir
dairjir dyrr hai liauw liauw
84. Malalia
Guaw ee simqnuax diyc Malalia
jit jun siyx
jit jun qnuaa
dngdongx
vavax binrcniux lingxvingx-v.
mamax decc huew dua
85. Hongtaix
Hongx qapp ho
naxx saiqongx-aw sinrvuex
qui' qywguec
dirr Taiwvingg Xngiuu decc longrlenliuxlenx
Hongx qongw,
"Taujingg hiax qiyr jyr Bixle Dxyw
Tranr jitt xee qihue
lanw jywhuew laii hiax cittyy"
Hongx cua ho
kaciuw mexliac qnuaw laii qaur der
Jit dow cniuuii quann duw tnix
dingxquann siaw qongxx
Byy ciamx VISA
berdangr zip laii jyr langkeh
Ho bin-aw angg qiwqir
krir cuaccuah duiww hongx qongw
"An' jitmaw kiw
guanw byy air qycc duer liw ovec sec"
86. Qyqyx
Qra niaux ee cirliau dryr hro qxauw
hro vavax pah kacngx
tniar qaxx beh siw
guaw qan' qan' aw m kaur
Qra siw niauxciw kngr dirr mngkakauw
hro mamax pah kacngx
tniar qaxx beh siw
guaw qan' qan' aw m kaur
Qra didix ee gulingx traur kiwjuiw
hro a'maw pah kacngx
tniar qaxx beh siw
guaw qan' qan' aw m kaur
Sewhanr ngex-aw siongrr air hauw
Guaw si qyqyx
jiacc be hiacnirr air hauw
87. Do Re Mi
Jitt kuanw bunzi qaiww hyw yc
Do Re Mi Fa So la Si
bad cid zri
dyrr tangx siaw quakig
Beh siaw benw ing vid
dongrsiaux
prinw-aw
piano
violin
Dy' narr longxx byy
kox si'aw marr kyxiw
88. Gnoxquanx
Nng luiw bagjiux
nng vingg hni
nng xee pnirkangx
jit qix cuir
Hyw jiac
hyw knuar
hyw sniax
hyw bi
jin' kyr dy' kyr jitt sir xee hniadi
Taukag si inx ee niulew
jairlaii dy' jyr jongxjixhuix
89. Vaiwvair
Ceid jap-go kir biysi
quexjiw vaii diongngx
singlew cai taujingg
qiog-aw cah hueqanx
jit sniux Quaixquaix kngr dirr aurviacbin
Diamw hniux
siyx qimx
kap tauu
siongrqingx
Mamax qriuu sinbingg
vyxvir ginxaw jit mii dua jit cunr
Vavax qriuu sinbingg
vyxvir ginxaw
aurzit aw tangx jyr sensnix iacc ludsux
Tiuciamx qiamx vuahvuex
ginxaxlangg beh he dua guan
Sinbingg liw narr u lingsniar
binaxjair kiw
dagg qangx benw tagceh
sinkux longxx benw sew
tng'aw vniaw-aw jiac be kir
cittymic-aw muaw muaw si
Uaa
ciywvuex
90. Senrang'aw
Senrang'aw hyw kaciuw
erqangw laii :ee qycc e qiuh qiuh qiuh
Vakdow iaux
bangw-aw qui' cuwqingx benw sewzi
Buexliux lag .kir
gunw u qoo-aw
liw qamxx iauxx u beh dic
91. Vaimiaa
Siongrr tniar .guaw ee langg
kacc qongw iarr si a'qongx
Taux taux aw iab tng'aw hro :guaw
qycc e cua guaw cud kir hongsyx
Guaw siongrqaiww gree :ee
dikkag si qyqyx
Ang'axmic m niu guaw junw duxsuah
air giac jauwvanw
jitt vo siongrr m hyw
92. Qongdig
Cuntnix ee jaixkiw
gimjnidniaa diyhh vyr quaw cxig
Cikjiauw-aw jiac jaxdngr
dagg jiah dy' jiokk junxsii
Zuac .langg ee ervox
tokax diyhh puah quaw juiw
Qxauw-aw kunr diongdaur
liangg liangg aw kacc hyw lyc binn
Ciutnix ee bec'amxaw
cuwbuexdingw m tangx u puar hia
Niaux-aw air quewqex
cak diyc kax e diucdiuh tniar
Qnuaa .langg ee amwmii
beh kunr jinwjingg diyhh lauu jit pax huew
Niauxciw-aw laii cur nirr cittyy
beh dngw .kir lo jiacc be cue byy
93. Qimqamm
A'hniax a'jew jin' byy tangx
qimqamm dirr dyh-dingw iarr m tec hro :guaw
Ciuw qycc crunx kacc dngg lehh
decbeh diyc .ar
Didix bagjiux qimx qimx knuar
kia dirr vnix:a lrauu cuiwnua
Benw siauwsniu
jitt quanr qimqamm longxx guaw ee
air beh jiac
danw liw duarhanr qaqi nih kabuew tec
94. Kiptih
Tokax erdew u kiptih
mihqnia danr jnriu tnix
sui' hro kib .lyc .laii
yhdngg ee sensnix anxnix qongw
Gunw qnaw ham' sensnix siysux
kiptih
tnidingw dikkag uana u
Jingcax jitt der
vadd hxang byy air
qandna' air gunw qequix-aw sangr ix jyr lexbut
95. He Guan
Knuar diyc lauwsaixcnix
diyhh qinw he guan
dirr qngx srid .kir jinwjingg
duarlangg anxnix qawsi
Vunn jit liap qequix-aw
benw danw amwmii
benw tingwhau hyw tnix
dirr ix vuex jnriu tnix viag puar jinwjingg
he guan vutquanw sii
96. Hanjimuee
Cuiwkixtangg huah vakdow iaux
dirr cuir-lai decc circa gniaux
Byy air PIZZA
byy air HAMBURGER
tyw beh jiac hanjimuee jiacc u kiauw
Tauwsiwlangg m bad jiac .quer
m jaix dyc'ui u decc bre
qnaxx diyhh laii vaiwtog mamax
dagg hxang liaurliw ix dy' e
97. Suanx Dinn
Qecviah ee caiwquejangg gauu nngwjngr
cue-kangx-cue-pang suanx dinn laii gunw daux
Tamwtauu siy' cue
gunw jin' huangingg
beh laii qiawkax
liw diyhh qinw uat tauu
Nng hxo zinqex siy' qecqair
ciauquer diongsnuar
uanqex siy' qryr knuar si'angw kacc gauu
98. WINDOW 2002
Beh kunr jinwjingg
taukag lai kuix jit xee dongxanr
Sensnix ylyw ee ue
diauqangx qra hongr qaxx dua ~ ~
Cutqog cittyy ee qiwdii
diyhh qinw kiam .kiw .laii
aurzit aw vutquanw sii
dy' tangx kuix kiw laii knuar
Pah puar vylee hitt jann
mrbenw siaw .zip .kir
Qu dongxanr knuar diyc jin' ciwcak :ee
jyr jit xee danr zip kir vunwsywlangw
99. Zidjir
Laii gunw daux hitt qangx
zidjir jit sinkux vunrciangg ~
Pacsngr kacc qniax zuac
guarkauw snxax
jit qangx trngr jit niaw
Qnuaa .langg
cing qaxx vyc lisix
qaur nii-buew
qycc suacc laur bacqamw