qiawir qowsu

Buexiac-aw qapp Pxangx

Cud lat qra sinkux-dingw ee kok'aw lingr .kuix, bersux binn jit cnew kiw .laii, cunqinx-banxam. Jaxkiw-sii ee zidciux jiyr diyc gnoxcaiw ee sxit-aw, jiokk ngiaxbak. Buexiac-aw giaa tauu hiongr tnix. Ix jitt siwlangg pacsngr longxx beh jiacnirr suiw.

Hueluiw decc pac'mm, cauw-aw decc huad ngiw. Dirr kongwkuah ee juixvix-aw-vnix, cinwcaiw dy' tangx pni diyc jniurcunx ee kiwbi.

Buexiac-aw jit siwquer kir cittyy. Siddow iaux, dyrr jiac quaw huehunw; cuir dax cuir kruah, dyrr limx quaw huebit. Hueluiw knuar diyc ix laii marr hnuahiw qaxx diyy putpud, dua mngg kuix kuix laii qra huangingg.

U jit zit, jit jiah ser jiah pxangx vuex laii qaur jiax. Buexiac-aw jiyx ix jywhuew sngw, jywhuew tiauwbuw. Pxangx qra hnair tauu, qanda' qor jamx huex decc jycsid.

"Guanw pangsiu lairdew jit din siyxmue-aw dna'aw jiacc cutsir. Guaw diyhh qinw qra bit jah .dngw .kir, inx jiacc be gy dow."

"Liw ee sing'uac sidjai jiokk byy sing'ir. Cuntnix ee qongqingw jiacnirr belangg. Jit qangx narr byy cud laii cittyy, guaw unxdangr e utjud .siw."

Pxangx bagjiux tenw qaxx dua dua luiw, knuar buexiac-aw qaxnaxx jit xee siauw :ee.

Haixqux

Haiw-vnix ee suavox, jit vu haixqux jit jiah jit jiah decc decjiur, an' nngrkag lairdew jngr .cud .laii, jit vo jit vo hiongr haiw hitt vingg syy .quer .kir.

"Bylun anwjnuaw, kavo dy' cenban m tangx tingg, marr byh'ingr uat tauu knuar. Narr byy, mia si e byy .kir."

Srinx uaw srinx, jingg kax duer au kax, haixqux-aw horsiongx u anxnix decc siy' diamw siy' sud.

Tnidingw u haixjiauw zuxx vuex zuxx qe, naxx jenwdauwqix, sokdo jiokk qinw. Jiacc cutsir ee haixqux jit sii siamw be li, uree suacc venr jyr haixjiauw ee buanxcanx .kir.

Haixqux qinw qycc vniar sniwmia vee.

Hngrdaux u jit jiah siwkajuaa, kaciuw jiokk liamjiab, dua cuir kuix .kuix. Jnia' jap jiah ee haixqux, ix jyr jit cuir dyrr qra gab .lyc .kir.

"Guarkauw ee sewqair sidjai taiww guihiamw lar. Lanw diyhh dngw laii kir dong-lai kacc sit."

Jit jiah haixqux jiacc decc qongw nia, qrinx dirr ix aurviah jit jiah jimm-aw siongr crenx crenx, jimqongxkax cngx .cud .laii dyrr qra gnueh lecc jauw.

Jit vuu haixqux-aw qui' vah jiah dangjee qniaa. Lorbuexciuw, duxduxx go jiah qangx :ee go jiah buw :ee sunrsi lyc kir qaur duarhaiw. Inx dirr haiw nirr siuu laii siuu kir, uirr uac .lyc .laii .ee hnuahiw kingwjiog, marr uirr siw .kir ee hniadi jixmue, amr amr aw decc visiongx.

Huex ee Ensiac

Vychnua-vnix ee kangwvox ox kamkamm, langg dyrr si langg. Buexiac-aw iarr laii decc draur laurzet, siwqer ngiarngia vuex, byy ingg hniwhnir.

Hueknax jiauww penhy vaii qui' let, vaii qui' vaii, jin' u digsuu. Hueluiw kuix qaxx jiokk ciyr, byy qaxx jit luiw si lenvow .kir .ee. Huehiyc-aw marr huad qaxx jiokk om, dagg hiyc dy' cnix qaxx, be liapvow-v.

Vixsair decbeh kaisiw. Qui' din langg diamr dirr daii-aw-kax. Qapp sennii aw qangrkuanw, jitt vaiw iguann beh kiyh snax miaa narnia.

Tauu jit xee ho'ngg qiyr .diyc .ee si boxdanx. Dongqunx cuir ciyr bak ciyr, huejiw qui' vaux sax lecc snuaxia. Boxdanx ee hueluiw haidai, iamrsig, jiokk huwquir-kuanw. Dag'ee siy' jnex beh air tangx tec dngw kir driam, u singg decc cniuxqox.

Quiwhuex ee guarhingg byy hniaw, kyr ix ee pangbi, diamxsor ciongx qaur derr zi kxamw. Dag'ee pacciuxjniuw hatcaiw. Qapp boxdanx siy' vixping, quiwhuex decc dua u kacc yh.

Vixsair qaur qaxx siongrqaiww qinxdniux, siongrqaiww ciwqig ee sijun. Lanhuex pnaiw jiauwqor, jingr ee langg u kacc jiyw, mrqycc hueqii dngg, jit jangg tangx dongr did snax jangg. Caixpnuar siy' camgi, qinnii ee quanqunx, inx quatding beh hro lanhuex did.

Zidtauu dngdecc lyc snuax. Snuaw huad ee juxvngrhuex kuix qaxx muaw muaw si.

Iarr m qniax kowdew koo diyc too e apsab, dag'ee jre jre .lyc .laii, diam diam aw decc himsiongw bagjiux-jingg ee bixqingw

Qimhii

Qonghngg ee lenhuex-dii kuah longsaix, qycc jiokk cing'iux. Druar dirr hitt lairdew ee hii-aw, jiax siuu, hiax iuu, dagg qangx dy' jiokk kuaiwlok.

U jit qangx, jit buew ciaccix an' tnidingw dimm .lyc .laii, dirr juiw nirr decc bogbok siuu. Jit buew qimhii-aw bagsig hyw naxx quixaxbak, kaciuw horliamm, cuir kuix .kuix dyrr qra hab .lyc .kir. Ix jid'err qa, hii-cuir suacc hro qaux-aw qaux .diyc. Jit sijun, ix ee sinkux naxx cniurr u snex sxit, pisenx vuex lirkuix juixbin, vuex lirkuix ix cutsir duarhanr ee lenhuex-vix.

Qimhii-aw ee sinx cur si jit kax juixsniux-aw. Hitt lairdew jonghongg qaxx jiokk suiw, jiokk huale. U gnoxcaiw ee jiyc-aw, u cnisig ee juixcauw. Juixsniux ee juiw be siyx marr be lingw, qui' nii tangr tnix longxx qangrkuanw hitt xee undo. Dagg jaxkiw, dy' u jiahmic an' dingw:a lag .lyc .laii, benw qniax e iaux .diyc. Zit .sii, ix qapp juixsniux-aw ee hii-aw sngw qui' qangx, amr .laii dy' qex jiokk hyw kunr. Qimhii-aw duiww jitt qingx sinx cur jamxzenn aw buanxir. Dyrr qanda' soxjai ec, dinxdang diyc dyrr vongrviah jitt hxang hro ix kacc be quanwsir.

U jit amr, qimhii-aw kunr qaxx dng' lyc binn ee sii, denrhuew suacc kuix .kuix. Jit din ginxaw-tunn uaw dirr juixsniux-aw decc hihix-huahhuc.

"Linw jiaxee ginxaw mair jiacc get. Guaw air kunr qaxx. Qinw qra denrue qimr .srid."

"Liw m pacsngr iauxx decc qnghbinn ee kuanw. Langg' hro lanw jiac hyw, druar hyw, dyrr si rair lanw ho'ngg knuar suiw :ee. Liw qaur jinw iauxx m jaix qaax?" Jit buew angg sig ee duartaukog-aw anxnix qra mng.

Hunxjiauw

Jit jiah Ausex ee hunxjiauw vnuaa snuax quer haiw vuex qaur Daiuann, beh laii crua Ajiux ee hunxjiauw jyr kanciuw.

Angbow nng xee u siy' tniar, snex nng liap nxng. Jit liap byy hxingg. U vu .cud .laii hitt liap si qangx :ee. Ang'axbow longxx qra siyh mia mia.

Ser jiah hunxjiauw-aw jit zit jit zit dua. Hongx kacc taur, laurve qniax ix hniachongx qnuaa .diyc, dyrr ing sxit-aw qra ix lamw lehh. Zidtauu kacc mew, laurbuw qniax ix zuac .diyc, qycc ing sxit-aw qra ix et hongx. Dag'ee longxx decc himsen, qongxx ix si tnikae jueww derr id hyw mia ee hunxjiauxaxqniaw.

Ser jiah hunxjiauw-aw sidqow dax, tauu jit vaiw beh vangr vuex. Jit jiah hunxjiauxbuw vuex jyr jingg jyr daurtaulauw. An' Aujiux laii ee hunxjiauw tranr qihue, iarr taux taux aw duer inx kacngx au vuex .cud .kir.

Dirr vnuawdiongdngg, qui' din hunxjiauw-aw longxx hiongr dangx vuex. An' Aujiux laii ee hunxjiauw qra qniaw dongr lehh, suacc beh cua ix hiongr saivingg .kir.

"Vavax, lanw daux ingwqaix dirr jitt vingg jiacc driyc."

"Quaix qniaw. Liw duer vavax dngw laii kir Aujiux. Hiax u jnia' je hyw tittyy ee soxjai. Liw junw junw e jiokk qac'ir hiax."

"Bersaiw .did lar. Byy dngw .kir, mamax e huanlyw."

Qongw suah, ser jiah hunxjiauw-aw sui' qycc kir cue ix ee pnua. Aujiux laii ee hunxjiauw dirr jit dongr sir-janr-kiw ee cuwbuexdingw kia lehh, bagjiux qimx qimx knuar diksimx qniaw zuxx vuex zuxx hng .kir.

Ngir-aw

Qnuaa qnuaa crinr crinr ee dangtnix dna'aw jiacc jauw nia, nngxluanw ee cuntnix sui' dyrr qnuaw qauwui :ar.

Jit duir ngir-aw laii dirr jit hxo zinqecur ee gimjnii-vnix jyr siu. Byy ingg qui' lexvair duxjiacc u jit xee hxingg, cuwjuw hiamm ngir-aw sniu' caw, dyrr ing sauwsegimw-aw qra jiauxaxsiu putsag.

Cur byy .kir, ngir-aw bagjiux qimx qimx, simqnualai m qramx diucdiuh, mrqycc marr byy ix ee hxuad.

Cuwvnidaux u jit xee kangx siu, cauw-aw vnrix :ee, hongx jid'err cuex dyrr hnair lyrsyr, mrqycc qaxnaxx iauxx qabjiac ~.

Ven ven ee siu qacc byy langg kia, ngir-aw h.-hnuahiw-h. vnuax zip kir druar. Qaur qaxx vnuawmee kunr qaxx dng' lyc binn ee sii, jiauxaxsiu lorlinwhnir. Ngir-aw liaurqiyr si dedang. Jingsinn. Jit qix gnow ziauw ee ciuxqud hiongr inx vig uaw .laii.

Ngir-aw qniax jit xe qiongbeh puar dnaw. Hyw did inx jiokk lingxli, siongr diyc jit xee diongpang, dyrr qinw vuex .cud .kir.

Jit din cuwjiauw-aw dirr jit qingx bixdiamr ee dxiamr-aw-kax decc tongw biw. Bixde-aw puawkangx, biw lag qaxx muaw tokax, diamwdongx jairlaii longxx byy decc saur.

Ngir-aw knuar jitt dah jinjniar hyw soxjai, jit cuir jit cuir qycc qra siu kiw .kiw .laii.

Quer byy zuarr quw, inx snex snax liap nxng. Vu .cud .laii ee jiauxaxqniaw unxsimx aw dirr jiauxaxsiu druar.

Ngir-aw knuar jiauxaxqniaw jit qangx jit qangx decc dua, simlai jiokk buanxir, pacsngr muanii cuntnix beh qycc laii jiax snetnuar.

Suanwtauu Vxeh :a qapp Qimquex Qoniuu

U jit xee jyccann ee a'vxeh :a jin' quair piah, diu-aw byy air vror, caiwjiw byy air ia, qui' nii tangr tnix, kacc jingr dy' suanwtauu, qniubuw, byy dyrr cangx-aw, huanqniux-aw jitt quaw jiaxee. Suanr-aw siongrqaiww je, jid'err jingr dy' lenpenr :ee. Jngx-tauu jngx-buew, byy langg vniar ix e quer. Jurr anxnix, dag'ee longxx qiyr ix Suanwtauu Vxeh :a.

Druar dirr qecviah jngx u jit xee jaboxginxaw, laurve laurbuw quewsinx, u vangr snax hunx de hro :ix. Jitt der de byy viw langg' kacc sanw, marr byy viw langg' kacc vuii. Qongw marr decc qrii, huanrnarr quer ix ee ciuw jingr .cud .laii ee qimquex, dagg liap dy' jiokk sangx, jiokk dnix, guarpuee qimqut aw qimqut, jiokk hyw knuawtauu. Jurr anxnix, langlangg longxx qiyr ix Qimquex Qoniuu.

Qoniuu-aw jin' hyw ciywsinn, byy-cnuax-byy-cir, qongxue kinx sniax ser sueh, m bad qapp langg' decc uanqex. U jit zit, Qimquex Qoniuu qniaa quer Suanwtauu Vxeh :a ee cann, pah jit xee kacniur, bagsaiw ciamciamm lrauu.

"Suanwtauu Vxeh :a, liw marr hro guaw qojniaa .jit .xe. Aurzit aw, liw suanwtauu mair jingr jiacc je, hyw bor?"

"Iarr suacc ersaiw .did." Suanwtauu Vxeh :a qra rinr. "Narr beh juxjiac, knuar si caw :ee, jenx :ee iacc low :ee, kiamr guaw jitt bi, hex cair dyrr be hauwqox .did."

Suanwtauu Vxeh :a kacc cocuir, sniatauu iurqycc puu. Qongw diyc ue, longxx bersux qapp langg' decc siy' ziongw.

"Qyckacc hyw bi, marr si ho'ngg kenwpangx :ee nia. Guaw jiax duxhyw u qimquex ee jiw. Guaw vunx quaw hro liw jingr, beh bor?"

"Guaw jiacc m lehh. Hex qimquex jiac je e uir."

Byir aw byir, Qimquex Qoniuu qra qimquejiw siux dywdngw .kir, uat jit xee srinx dyrr jyww ix jauw ar. Suanwtauu Vxeh :a bin-aw sim ~ ~. Quer u jit quw aw, iurqycc ngar lyc srinx kir kaux ix ee suanwtauu.

Ngiumex-aw qapp Qausanx :a

Jit taur ho lyc liauw, navoo ee ciu-aw sinkux duxx ciangg .quer, ciurhiyc-aw cnex langlangx, binrdingw longxx byy ing'iax. Tokax damsib aw damsib. Rair beh qinw puu tauu huatcnix :ee, jin tranr diyhh tranr jitt sii.

Langr hunn, tnix cingliang, zidtauu iurqycc ciyr bibix. Jit jiah ngiumex-aw kaqud cunlunn .jit .xe, dirr cauxvox-aw-dingw, jiax jauw quer laii, hiax jongg quer kir. Ix giaa tauu, dua sniax huah qongxx, "Dairqex qinw knuar tnidingw hitt vingg. U king ne!"

Jit jiah qausanx :a naxx decc vejniu, qongw, "Dnaxx hex king u simxmih hyw knuar? Kacc knuar marr hitt quiw sig, iarr be kacc qex a."

"Liw pacsngr kacc air knuar guec-aw hnoh?" ngiumex-aw qongw. "Hex guehniuu, dagg amr longxx sner jyr byy qangg. Ursii packih, ursii ngihuan ~; jyczit dyw vnuar ciaa tanxciyr, binaxjair qig kab kab."

Qausanx :a cinwciyr, qongw, "Qongw qaur hex guehniuu, guaw siongrqaiww knuar be kiw. Zidtauu jid'err cud .laii, ix diyh'air jauw kir bih."

Ngiumex-aw qongw, "Marr urngiaw. Qongw laii qongw kir, iauxx si lanw zidtauu vxeh :ee siongrr lirhai, siongrr uixdai. Driyc bor?"

"Dagg qangx longxx u :ee, beh nacc u hihanw?" Qausanx :a iurqycc qra lauwkuir, naxx qongw, sinkux naxx decc ziaur.

Zidtauu decbeh lyc snuax. Ngiumex-aw beh duer qui' din dngw .kir. Qausanx :a ciyr ngiumex-aw byy dnaw kasiaur, qanda' beh duer langg' kacngx au.

"Guaw iauxx bue duarhanr, e qniaa m jaix lo. Liw qui' qangx papax jauw, qamxx m qniax linw mamax cue liw byy e huanlyw?"

"Guaw aurzit aw beh jyr ongg :ee, suacc ersaiw qra mamax liamm diauu diauu."

Tnix amr bongbongx, qui' din ngiuu-aw jingg qniaa au duer, sunrsi dngw kir qaur inx daux. Qausanx :a suh kiw suh lyc, an' jitt jangg ciu-aw qaur hitt jangg ciu-aw, byy ingg ciccih, byy sii dikdnia

Sinn qapp Langg

Dirr jit qingx biyrsi qapp jit qingx lexvaiwdngg ee diongx:a u jit qingx qe cur-aw. Hitt lairdew druar jit xee siauwlenn :ee, qinnii zxic-go huer.

Jaxsii qxex tii zi lyc, siauwlenn :ee dyrr jingsinn. Jit nii snax-vah-lak-jap gua zit, dagg qangx dy' junxsii, lenrr lexvair-sii aw, ix iarr jaw jaw kir kunr, jaw jaw dyrr vreh kiw cngg.

Sew cuir sew bin, sna'axkor ngua hyxser, siauwlenn :ee duxx qniaa cud laii duarlo-vnix. Jit xee quewlorlangg cnex-vrong-vec-vrong ciangwciangr qniaa. Nng xee longr jit xe, sui' langg taukag sui' vucpa pog jit pog.

Quewlorlangg bin-aw og kiagkiak, kiw cuir dyrr qra cyh. Siauwlenn :ee jiokk qenwsiaur. Ix jitt siwlangg, iauxx m bad hro jit xee snihunrlangg cincniu jitmaw anxnix qra pnaiw .quer.

"Dingw zit aw qapp a'buw rinr cuir rinr jic, qycc jniasit u vywingr :ar."

Ix taukag ngar ngar, siangx ciuw habsip qra tnidingw ee sinn viauxsi huexsimx.

Kir qaur kangkuewdniuu, qui' jaxkiw, sittauu decc jyr jin' lauwcec, kogkok tutcuee, hro tauqex dingr qaxx qiongbeh jauw byy lo.

"Jarhngx jyhzit aw jraur langg ee pnaiw ue, qniazit sui' be dit :ar."

Siauwlenn :ee jamxzenn aw hiyrhuew, siangx kax qui lyc de hiongr sinbinn hue sitlew.

Bec'amxaw-sii, kangkuer jyr suah huedngw qaur cur. Mngg sag .kuix, cur lairdew ho'ngg hiaux qaxx zuu qawqar, huex huex hnir hnir, bersux dix-diauu.

"Guaw vnisniuu duiww langg' qatqik qycc gauu kinghunx, qniaizt mrjiacc e laii diyc cat taux."

Guarkauw u kitjiac laii beh qa'ngg vunx. Siauwlenn :ee qra lakdeaw ee jniginn jongw kingg hro :ix. Juai linwdngw jid'err sitsuanr, vuac jit dyw, kaqud ciuxqud siag qaxx dua kangx ser lic.

"Jitmaw iurqycc jnuaxngiu? Guaw sinkux-dingw longxx vrag qaxx byy vnuar sxenw :ar."

An' tokax vreh .kiw .laii, katau'ux naxx syx, siauwlenn :ee naxx decc sehsec liam.

Sam'axkox

Dirr cimsnuax ee ciurnaa-aw-lai, u jit zit, tnidingw byy-dniu.-byy-dii lag jit der sam'axkox .lyc .laii. Bidvyy jin' diyhqniax, jit cuir tuann jit hni decc hanw qongxx, jitt der sam'axkox si sinn, qiyr dairqex diyh'air qra qingwvair, diyhh qra hogsai.

Vnuar sinwgii aw, inx ter sam'axkox kiw jit qingx siyw biy jiamrsii qra cai dirr lairbin. Zidguat venwcenx, sinr :ee naxx laii naxx je, biy marr zuxx kiw zuxx dua qingx.

U jit vaiw, ciurnaa-aw jyr duarjuiw. Sam'axkox jimr diyc juiw suacc diyc tangg, jiax iarr jiuwcngx, hiax iarr jiuwcngx, nriaux vawvar, sidjai be qniwjingr .did.

Gauu sniu kangx sniu pang ee dikqex-aw jitt jun decc jyr taulingw. Ix pacsngr beh qra hitt quaw jiuwkangx kamr .kiw .laii, dyrr bing vehtaukog-aw kiyh quaw huex dngw laii junw jyr vor, qycc huanhur dngg-buew-snuaniuu jyr caihongg. Inx beh qra sam'axkox jyr jit niaw snxax.

Jit din jiauw-aw byy mee byy zit decc qnuaw sittauu. Qingquer snax qywguec, sam'axkox ee sinkux dingxquann u qex muax jit niaw ngiujongsnax, byy qycc ciacsinx lortew.

Jiap'ingr dikqex-aw jyr taubagjiauw :ee si qaling. Ix knuar hex sam'axkox cing qunn sidjai taiww m si kuanw, dyrr huanhur huebii siwqer kir kiyh byy qangrkuanw ee ciurhiyc-aw dngw .laii. Inx jitt vaiw beh ter ix jyr jit niaw kor.

Jitt xee beh jyr u niaw :ee, hitt xee beh u ciuxngw :ee. Venrnarr ngua jit xee jyr ongg, sam'axkox dyrr ngua jit sux sinx snxax.

"Lanw ciurnaa-aw-lai, dua jangg ciu-aw muaw muaw si, qui' cingx dxangx ixsiong :ee marr be jiyxkueh. Lanw qamxx berdangr cinwcaiw qingw .jit .jangg .aw jyr lanw ee sinn? Dagg nii longxx diyhh qra hitt der sam'axkox jyr sinx snxax, huiwkir-huiwdag. Lik siw guanw jitt quaw lojai'axpuex u nia."

Jiacc qongw suah, cud iwqenr ee vehtaukog-aw sui' ho'ngg ing jiyhtauu qra dimr. Vehtaukog-aw bih qaxx jauw byy lo, qui' sinkux diyc dang siongx suacc venr exqauw .kir. Jurr anxnix, ix byy huatdo qongxue, iarr byy jaidiau qycc liamrquax.

Nng Jiah Qxauw

U jit jiah qxauw-aw qiyr Mali. Ix vehsig ee mox kiuu kiuu, bagjiukox dua dua liuw, snex jyr jiokk kiauxjongx, jiokk did langg tniar. Cri ix :ee si jit duir siauwlenn ang'axbow, dirr doci decc suer cur kia. Luxjuxlangg dagg qangx dy' qra jrngx qaxx suiw suiw, liammix qra cing snxax, kacc danw qra dir by-aw, bersux ginxaxlangg decc sngw ang'axmngc.

Dirr vychnua-vnix u jit qingx iong meliaxvangx dah ee lxiauu-aw, lairdew druar jit xee lau a'vxeh :a qapp jit jiah toxqauw-aw Hali. Bylun iam tnix ciah zit, lyc ho taur dua hongx, lau a'vxeh :a longxx diyhh cud kir guarkauw siux qu denrsi, qu vingsniux iacc qu vywjuaw. Jit daii snax-lenw-ciax, an' tnix qngx lab qaur duw ehngx, sidjai byy siqanx tangx qra Hali sew sinkux. Qajair Hali qui' sinkux ox bagbak, mox iurqycc dew, narr lacsab, marr knuar be cud .laii.

Mali m na qoxjuix, qycc gauu sainaix, gauu qa'ngg duer jingg duer au. Juxlangg knuar ix marr naxx simqnuax aw qniaw, vutsii air qra py, qra lamw. Vixqauwdig, Hali jitt vo dyrr u kacc hanrbuat, hnuahiw ee sijun, dyrr qanda' jai'ngiaw trow cuiwjic, iyy buew narnia.

Mali jitmaw ee juxlangg sngr derr zi zim :ee. Jingg:a Mali ho'ngg cua kir qonghngg sanwvo, horsiongx suacc sitsnuar. Mali cue byy lo dngw .kir, dyrr pag dirr tokax decc qnaix. Jitmaw ee juxlangg knuar Mali jiokk kyxlendai, dyrr qra kiyh dngw kir cri. Mali iarr m qniax snihun, kir qaur langg' daux, sui' dyrr qapp langg' cinx daucdauh.

Hali jid'err cutsir dyrr hro langg' vangwsag. Hyw did hro siux poaxjuaw ee a'vxeh kiyh .diyc, ix jiacc tangx uac qaur jitt jun. Hali jiokk gauu zin lo. Ix qapp a'vxeh :a cud .kir narr qniaa prangw .kir, li cur qyckacc hng, ix longxx cue e diyc lo dngw .laii.

M jaix anwjnuaw diyc, Mali ee juxlangg byy-qongw-byy-dnar iqux, qra Mali vangr lehh jyww inx jauw .kir. Mali cue diyc pang nngr kir qaur qecviah beh tyw jiac. Cuwvnix knuar ix jiokk qoxjuix, dyrr qra dingr jit qingx qauxaxcur. Dyrr anxnix, Mali qycc cue diyc sinx juxlangg qra tniawsiyh.

Qangg hitt jun, kiyh baiw juaw ee lau a'vxeh :a kiaa snax-lenw-ciax cud .kir hro ciax jringx .siw. Cuwvnix jai'ngiaw, qniax Hali iaux .diyc, dyrr qiauw quaw vng beh hro jiac. Hali jit cuir dy' m jiac, qanda' pag dirr tokax, bagjiux ngr zidtauu lyc snuax ee honghiongr. A'vxeh :a vangvangx dngw .laii, vitsi an' jitt hiongr byy vadd xui.

Bre Quexjiw :ee

Tauwjaw zit diongqia, bre quexjiw :ee jit daii rearkar tuax laii qaur dangx jngx ee hudniuu, quexjiw sui' hxang aw qra vaii .cud .laii, dogdok ongrlaii, iuguann drew dirr langw-aw-lai.

"Ongrlaii cnilai, qycc e quah cuiwjic. Liw jex quexjixdnar narr u decc bre ongrlaii, guaw hng hng pnri diyc hex bi dyrr m qnaw uaw .laii."

"Jyww liw songxsimx. Guaw jairlaii m bad decc bre ongrlaii."

Ciuw naxx decc sngr jnii, bre quexjiw :ee naxx qapp dangx jngx ee langg kaiqangw pah laliangg.

Taur diongdaur, rearkar tuax laii qaur lamm jngx ee ci-aw. Jitt vaiw, ngua nairjix diyhh bih .kiw .laii.

"Dagg hxang quexjiw dy' hyw, dyrr qanda' hex nairjix, syr viagviak. Zuxx jiac zuxx cuir syr u nia." Druar dirr lamm jngx ee jit xee langkeh anxnix qongw.

"Hex urngiaw or," bre quexjiw :ee qra janwsniax. "Tniax qongxx narr jiac sniu' je, uree langg qycc e lrauu pnirhueh."

Bec'amr aw, bre quexjiw :ee beh dirr saix jngx ee ci-aw vaii dnar-aw jyr singliw. Qui' sniux snuai-aw pangx qongwqongr, suacc ho'ngg siux kiw laii kamwkngr dirr dexe.

"Hex snuai-aw pnaiw quexjiw. Jiac dirr cuir-lai si tngg qamx bit dnix, jiac lyc vakdoxdew si naxx dog'iyhjuiw."

Jit xee oksangr anxnix decc vixlun. Bre quexjiw :ee qra ix viw duartaubuw, qongw, "Oksangr qongxue jiokk u lixkir. Jiaxee quexjiw, guaw beh siok siok aw bre hro :liw."

Zidtauu lyc snuax, diyc qaur guehniuu ee cuttauu. Bre quexjiw :ee kir vag jngx ee mici. Zit .sii bre byy cud .kir ee siquex, u puawvingg :ee iacc byy puawvingg :ee, longxx berdangr jnriu daii-aw-dingw.

"Zuac .langg, siquex siongrqaiww tewliangg. Mrqycc quer amwtauu aw dyrr berdangr jiac, jitt vo kacc baixjaii." Jit xee laii sec iarci-aw ee langkeh anxnix qongw.

"Hex snesingg :ee lor. Liw byy tniax langg' decc qongw, qongxx amwsii jiac siquex, vnuawmii aw huanxjingr."

Bre quexjiw :ee jnia' vniawsir, an' jaxkiw qaur mihngx byy decc hiyckunr. Vnivnii quexjixdnar, dyrr ix jueww derr id gauu tanr, muixmuiw dy' ix siongrr hyw jua.

U jit qangx, bre quexjiw :ee rearkar tuax laii qaur jit xee siangcelo-kauw, cokjongx u sir xee langg an' dangx lamm saix vag sir xee hiongr qniaa uaw .laii, qangg sijun beh laii qra ix qauquanx. Bre quexjiw :ee qui' sinkux lrauu cinwqnua, rearkar vangr lehh, pudludsut jauw qaxx dit buexliux.

Kyxngua

Druar dirr tnidingw, qingquanw tnikae hyw tnix pnaiw tnix ee sinn snax nii qnruax muaw, kia dirr mngbaii-kax qapp jiongww sinsenx siy' srii. Jit sii simx sngx, bagsaiw jyr jit kunr vniar. Dih lyc huanrqanx, venr jyr jit jun ho. Diu-aw srinn diyc qamlo, duarjangg qycc vaw sui. Jyccann :ee, qxex qxex hxo hxo hongsiux, hyw nihongg.

Laii beh dingxkueh :ee jin' siauwlenn, be air kaur, qycc iarr byy ciywsinn; qau singwde, honghuew narr decc qig, qongw diyc ue pihpic-piagpiak, bersux decc vangr paur-aw. Lensuar snax qywguec dngrr vnuar diamw ho, byy qaxx jit dih juiw an' tnidingw dih .lyc .laii.

Kex-tauu kex-buew dax kiauckiauh, kex-drew vitlec, vithunn knuar hen hen. Qokk soxjai ee taulangg jip jip jywhuew laii decc camsiongg, knuar beh anwjnuaw cuicig, tangx dro quer jitt vaiw ee kyxngua.

"Lanw tangx pair langg kir dingxquann, vaiwtog inx qnuaxqinw qangr quaw horjuiw .lyc .laii."

Jit xee jerhuewlangg anxnix tee kiw. Jingwlangg jin' qra janwsingg. Qingw ar qingw. Buexciuw, inx quatding beh pair jit xee hyw kauxbunw u kyqah-drew :ee kir.

"Jiauw-aw cuiwdax, byy jaidiau cniuwquax. Hueluiw quixlyrr qangx byy sexdng, qenwsiaur qaxx tauu m qnaw qycc dnax kiw laii knuar langg."

Tagceclangg decc qongw ee sii, bin-aw iux qad qad, bagkox angg ~ ~. Mrqycc ix ee koxsimx juanzenn bycaiw qangx. M na jit dih horjuiw dy' byy laii, tnikir qycc dyww siyzuac.

Taulangg qnuaxqinw qycc jurjip. Jitt vaiw, inx pacsngr beh pair jit xee tausnix-aw bad taur taur :ee kir cir knuar mai.

"Quw byy lyc ho, jit siwquer longxx decc diyh'unx. Qeaxqniaw qapp di'axqniaw siw qaxx cauwcnihngx. Qebuw siongsimx, byy beh qycc snex nxng. Dibuw siongsimx, byy air qycc jiac punx."

Naxx qongw, tausnex-aw juanqax bagsaiw naxx decc crid.

Jitt vaiw ee qetqiok qapp dingw huee byy juac. Horjuiw iuguann dih be lyc .laii.

Ho'ngg pair kir qaur binrdingw :ee jit xee ngua quer jit xee. Kyxngua marr jit qangx quer jit qangx naxx laii naxx jiahlat.

U jit zit, jit xee cnghanr h.-hiongqongg-q. jongg .laii, krir putpud, caw qongxx beh kir cue tnidingw ee sinn ter ix jyr qongcinx.

"Qinnii ee ho lyc kacc jiyw. Siquex dendyww sruax, snuai-aw kixdyww dnix. Bunwciw pnri diyc pangx qui' din jauw .laii. Qui' pxenr quexjiw-txec hro inx punw qaxx hiongvalixniaux. Qycc m na anxnix. Guanw cuwvnix ee ginxaw tamx diyc dnix, taux jiac iarr m jai'ngiaw diyhh jamrjad, jiac qaxx pnaiw vakdow jauxsiar be li. Inx sirduarlangg qra inx sangr kir hro sensnix knuar, qiyr guaw diyhh jergiac."

Qaiwquanw tnikae hyw tnix pnaiw tnix ee sinn tniax ix qongw liauw, ciyr qaxx suacc decc lrauu bag'iuu. Dangrdimm ee hunn jicjair be diauu, ho jurr anxnix puah lyc toxde binrdingw.

Qiongbeh ngbuew ee cauxaxqix damx diyc horjuiw, dnax tauu, iyjiacqud crunx qaxx tringg ~ ~. Kejunr qra jit dih jit dih ee horjuiw kiam .kiw .laii, jit sii aw quw quer, kejuiw iurqycc cuaclauu.

Dairdiongrhux

U nng xee javoalangg, jit xee sanw, jit xee vuii, jit xee lywkax, jit xee exqow. Inx nng xee cax dingxe huer, vnivnii decc hnua jit qingx qangdniuu, qycc boxqniaw marr longxx u qenwdir :ar.

U jit vaiw, inx dirr jit xee singlixdniuu duw .diyc. Nng langg tauu vaiw qniwbin dyrr jiokk u ue qongw. An' qangdniuu ee sittauu qaur qoklangg ee cuwbi, busow-vutjir, byy-qimw.-byy-qi. Qongw diyc qalai ee dairjir, axvuii :ee iang dewder, qongxx inx bow jin' henhue, dagg hxang dy' qra kuanw qaxx hyxser hyxser. Axsanw :ee qongw inx bow marr be hamban, mrqycc cur nirr ee kangkuer, ix dngw .kir qangrkuanw diyhh hunliw, draur jyr.

"Jaboxlangg saur tokax, javolangg lux. Jaboxlangg sew snxax, javolangg pix snxax. Guanw bow qongxx anxnix jiacc u qongdy." Axsanw :ee qongw.

"Iarr u jitt hy dai," axvuii :ee qongw. "Javolangg crua bow dyrr si rair inx qra lanw hongrtai. Lanw qui' zit dirr guarkauw pacvniar, tanr ee jnii marr longxx inx decc kaix kacc je."

"Mrqycc guanw bow marr bad qongw .quer, qongxx byy, ngua ix kir guarkauw jiac taulo. Brew cair, juw vng qapp cua ginxaw jiaxee kangkuer ngua guaw laii jyr."

"Javolangg dagg qangx kir caiwci-aw brew cair? Siar-siw-siar-jingr! Beh narr guanw bow anxnix qongw, guaw sui' qra vangr kir haixkauw jiac hanjii."

Axsanw :ee knuar langg' angsair jyr qaxx jiacc kiw, simlai jinjniar himsen. Dngw kir qaur cur nirr, qycc iarr m qnaw duiww bow qongw .anwjnuaw.

Pnaiw nisunn, qongqingw jit nii baiw quer jit nii. Qangdniuu qnuaix mngg :ee qnuaix mngg, diamwbin siux dnar :ee siux dnar. Jiac langg taulo :ee, jerje suacc diyhh dngw kir jiac qaqi. Jit qingx ser aw qingx ee vngrdiamr kranx qongxqyr, qongxx beh cniar jit xee diamwdniuw qiamx jiangxqui. Qeh dngw qangx, u jnia' vah xee langg vniar .kir. Axvuii :ee qapp axsanw :ee marr u hamm jairlai.

Tauqex qra langg jurjip, qiyr dairqex ciuxngw vrih .kiw .laii, ping knuar sniaw langg kacc gauu sew nguaw. Axsanw :ee jiokk liuxjangx, iuu laplab ee nguaxvnuaa quer ix ee ciuw, dagg der dy' cingkir damdamx. Axvuii :ee dyrr qaiww haurgiyy, sew byy snax der cenxvnuaa, dauriudic-aw qa'ngg siag puar quixlyrr der. Qetqiok, axsanw :ee diyc tauu jit miaa, axvuii :ee vaii auwbuew.

"Dnaxx linw kyw sew nguaw nacc driyc? M dyrr viw knuar si'angw sngwvnuaziw kacc gauu diak jiacc habliw."

Axvuii :ee jin' vuthok. Mrqycc langg' tauqex byy decc qra sinwdauw.

Nng~snax qywguec quer .kir, axsanw :ee dirr vngrdiamr kangkuer jyr jin' sigciuw :ar, axvuii :ee taulo iauxx rinw byy. U jit qangx, axvuii :ee an' jit qingx biy-aw taujingg qniaa .quer, hniuqongx qra cniaw .zip .kir, qongxx Maxjow decbeh cutsunn, Veh Iaa iauxx cue byy langg vran.

Siangwbuexau .jit .xe, axvuii :ee dyrr jngr zip kir hitt senx Veh Iaa lairdew. Ix nng qix ciuxqud hnair lehh hnair lehh, qycc jamxzenn aw u vran dy' driyc.

Qoxir :ee

Dirr lairsnuax u jit xee javoginxaw qiyr Qoxir :ee, jurr sewhanr qaur dnaxx m bad qongw vehcat .quer. Laurve laurbuw snex ix jit xee qoqniaw, duiww ix jin' tniawtangr, mrqycc be lig'air, be ovec tingxsing.

Snuax-kax cnihuii-aw-dxiamr beh cniar sai'axqangx. Laurve laurbuw pacsngr beh qra Qoxir :ee sangr kir hiax yc sai'aw, ngwbang ix yc kacc ladsniur, kacc vaqed, zid'au marr e tangx kacc jniaa langg.

"Diyhh minua jyr, m tangx kingvok yc vindnuarqud. Jywlangg diongho lauxsit jueww derr id iauwqinw. Dairjir decc jyr narr u srid qakcad, diyh'air cerdew u damdngx, m tangx amkamr." Beh lyc snuax jinwjingg, verbuw itjair qra Qoxir :ee dinglingg.

Qoxir :ee jinjniar toxdit. Huii-aw jarhngx siyx pnaiw quiw xee, qniazit longr puar quiw xee, dagg qangx dy' qra tauqex sueh jiauwsit. Tauqex dua siurkir, dirr jingwlangg ee binrtaujingg me ix hai'aw, vuanwvni kasiaur, qycc qongw beh kraur ix ee qangjnii dixgiac.

"Guaw jyr iauxx bue lyhciuw, dniardiyc kacc e tutcuee. An' binaxjair kiw, guaw diyhh qyckacc jimjiog, qyckacc dingxjinx jiacc si." Qoxir :ee duiww qaqi anxnix qongw.

Jit guehzit quer, nng guehzit quer, qaur qaxx derr snax qywguec, Qoxir :ee iuguann jyr be hur vuee, dagg qangx dy' jiac tauqex ee pongwvniaw.

Ix zuxx laii zuxx jurvix, sniu qongxx vnevnee longxx jap-go~lak huer ee ginxaxqangx, langg' dy' longxx sunrsi aw sunrsi, jnuaxngiu ix jiacnirr aw hamhnex, sen' jyr dy' jyr be jiujir?

"Lanw jiycmng .jit .xe. Diyh'air anwjnuaw, sittauu decc jyr jiacc be u cacog? Guaw dagg qywguec tanr :ee, quibuew, jongw hro tauqex kraur liauw liauw .kir." Qoxir :ee hyxlew aw qra langg' cingxqaur.

"Langg iarr m si qekir, jit quer vnuar quer vairciuw ingxingw longxx marr e. Liw suacc berhiauw yc .guanw. Huanrnarr u harsax iacc kicqag :ee, liw dyrr taux taux aw qra cangr .kiw .laii mair qongw. Sii qaur, qui' sniux qui' ciax bre bre .cud .kir, tauqex becnacc jai'ngiaw si lanw dycc jit xee jyr :ee."

"Anxnix nacc tangx? Guanw sirduarlangg qongxx jywlangg rair lauxsit."

Suhniadi longxx decc ciyr ix kongkiwbin, qycc texhy ix 'Lairsnuasongg'.

U jit qangx, tauqex qra dag'ee jib'uaw, qongxx qniazit ee sittauu si jit xee pacdngqah ee langkeh juwbunn :ee, rair sewzi aw jyr, qycc qongw amwtauu aw beh sui' xee aw qiamxjax.

Byy huanhur byy dnaxqinw, Qoxir :ee zuxx sniu beh qra jyr hro hyw, baiw :ee suacc dendyww je.

Taujingg aurviah :ee u langg decc vniwkangx jyr kaciuw. Qoxir :ee u ngiu knuar ngiu. Hitt qangx, tauqex dua dua qra ylyw, qycc huad jiongxhuir hro :ix.

Huii-aw sangr cutmngg, ciangjai u langkeh decc hiamm qongxx puacpah :ee sniu' je. Quer kacc byy vnuar dxangx, byy langg beh qycc qra inx juwbunn. Huii-aw-dxiamr jurr anxnix qnuaix mngg siux .kiw .laii.

Qoxir :ee vauhok-aw pnai lehh. Beh dngw .kir ee simjingg, iarr m jaix si beh hnuahiw iacc siongvix.

Qebuw qapp Qeqangx

Snax jiah qebuw cua jit din qeaxqniaw cutmngg. Dirr lo nirr, gu diyc jit jiah qeqangx, taixqyx haupuee, niaucqniauh ~, qemox lag qaxx beh byy .kir.

"Guaw vakdow iaux qaxx qiongbeh siw :ar. Vaiwtog linw dycc jit xee kacc hyw simx lehh, damrvyc aw mihqnia vunx guaw jiac, hyw bor?"

Qeqangx qongxue byy-lenx.-byy-lex, qandn' cunx kuiwsix-aw nia. Qebuw knuar ix jinjniar kyxlenn, dyrr qra ix cua .dngw .kir.

Snax jiah qebuw duiww qeqangx jin' u tniawsimx, cuann cxig-aw hro jiac, qycc ing diurcauw qra pox jit dingw bincngg nngw simwsimr. Qeqangx naxx laii naxx u bah, sinkux ee xmngg jiokk iamrngiaw qycc jiokk vaxdni. Tnix ciauxciauw aw qngx, qeqangx dyrr e kia dirr mngkauxdniaa tii qaxx dua dua sniax. Qebuw qapp qeaxqniaw venrnarr tniax diyc quh ~ ~ ee sniax, dyrr jai'ngiaw tnix qngx :ar.

Qeqangx zidjiw quer qaxx jin' suwsi, suacc duarkox vindnua .kiw .laii, qanda' beh jiac, longxx m dinxdang. Qebuw qiyr ix kir caiwhngg liac dorqunw-aw, ix m; qiyr ix cua qeaxqniaw cud kir guarkauw cittyy, ix iarr byy air.

"Linw pacsngr m jai'ngiaw guaw si si'angw ee kuanw? Guaw si tnidingw ee sinn qangwser :ee. Linw diyhh suhau :guaw, sriu guaw qaiwquanw jiacc si, iarr suacc tangx pacpair kangkuer hro guaw jyr?"

Qeqangx qongw suah. Snax jiah qebuw suaw kir vniqag decc ca.

"Linw knuar ix hex qequer tringg ~ ~, duarvautauu, qnialo qycc jiokk u hing'uix. Ix qongw ee ue dikkag be dingdnaa jiacc driyc."

"Ix cig-aw qra lanw jiac jiacc je, sittauu qycc benw draur jyr. Anxnix nacc driyc?"

"Langg' ix jitmaw dagg qangx longxx e qra lanw qiyr kixcngg. Narr qra ix qnuaw jauw, aurzit aw, lanw qnaxx e kunr m jai'ngiaw tangx jingsinn or!"

Liw jit cuir guaw jit jic jner qui' vox quw. Itbuexau, snax jiah qebuw qongw dniardiyc. Inx pacsngr beh jiauww kauhunx hongrtai qeqangx.

Zidjiw jit qangx quer jit qangx, qeqangx duiww snax jiah qebuw suacc zuxx laii zuxx kokhingg. Singwde narr hro giac .kiw .laii, qycc e liac qeaxqniaw laii cuxdi. Qaur jiax laii, snax jiah qebuw zimw be diauu :ar. Inx quatding beh qra qeqangx pacqnuaw .cud .kir.

"Ix jiacc dua jiah. Lanw qamxx pah ix e ngiaa?"

"Id duiww id, hex snesingg pah be ngiaa. Mrqycc lanw narr habjee qapp ix ciavniar, hex dyrr jiokk u ngiaa bin."

Inx snax xee cuanwdongg. Tranr qeqangx decc kunwdionggnow, inx jit jiah singx kir cuah ix ee mox. Qeqangx bagjiux vreh qimx, siurkir, kia .kiw .laii. Ttanr jitt xee qihue, lingrgua jit jiah sui' kir tongw ix ee qekaziauw. Qeqangx ngar tauu decc jimjiog qaqi diyhsiongx ee soxjai. Jitt sii, siongrr buew aw jiah jongg uaw .kir, qeqangx ee bagjiux siongr junw junw dyrr qra dog .lyc .kir.

Qeqangx tniar jit xe aix aix qiyr, kuikax qinw nngwjauw.

Qediauu-lai iurqycc cunx qebuw qapp qeaxqniaw. Qeh dngw qangx jaxkiw byy qeqangx tii, inx iuguann junxsii jingsinn.

Guan

U jit xee tyxhaixlangg, qenww vaiw cuthaiw tyxliac, qrox je qrox jiyw, hibang-aw dy' qanda' pax snax vaiw, be qex marr be qiamw. Haixbin tyxjiac, ix iarr byy hyxgiac, iarr be sanwciah, crua jit xee bow, qutlat, henhue. Qethunx snax dxangx, ang'axbow qamxjingg vutjiw aw dauhap. Dogdok itdit byy ginxaw jitt hxang, hro inx qamxqag u kacc kiamwkueh.

Nxiaw-tauu u jit qingx biy tniax qongxx jiokk u linghenw. Tyxhaixlangg byy siyh lortauu hng, vreh kir qaur hiax qriuu sinbinn juvix, jaw jit zit sur inx ang'axbow jit xee vnuar xee qniaxzii.

"Urngiaw dy' driyc! Liw mia-diongx juwqaix rair u jit xee jaboxqniaw. Si guaw srid qakcad qra linw lauwqaux .kir. Sitlew, sitlew."

An' nxiaw-dingw dngw .laii hitt amr, tyxhaixlangg bang diyc cngbyw laii cue :ix. Qecdngw qywguec, qeau jinjniar ursinx. Dirr sinx nii tauu, qu nii buew ee jit xee jaxkiw-sii, jit xee angg angg iur iur ee jaboxginxaxngix dyrr anxnix laii cutsir.

Ciuw py duxjiacc mejer ee haizii-aw, jyr laurve :ee simqnualai u decc pacsngr. Vnuaa snuax quer nxiaw, tyxhaixlangg iurqycc kir qaur hitt qingx kiw dirr cimsnuax-lai ee biyrsi.

"Guanw jaboxqniaw byy hniadi jixmue qapp ix cittyy, aurzit aw e jin' qodnuax. Liw diyhh qnuaxqinw sniuxsur guanw jit xee haursnix, duarhanr tangx qapp ix jywpnua."

Jitt vaiw dngw .kir, tyxhaixlangg byy qycc bang diyc vyjiaxbuw. Mrqycc qecdngw nii, ix iuguann u tnrix jit xee haursnix.

Cur nirr taucuir jid'err je, qanda' prax snax vaiw bxang sidjai u kacc byy qraur gxiac. Ix jimxmuaw dyrr qex bxang nng vaiw. Bxang-aw beh pax lyc haiw jinwjingg, qycc e qriuu sinbinn vyxvir, vyxvir ix hibang-aw dang hnuaiwhnuair, hihee qui' junjair.

Iarr m jaix tnidingw qamxx jingwqingx u jinzinn decc qra jorjan, tyxhaixlangg liac .diyc ee hii-aw, jit vaiw viw jit vaiw iauxx kacc je. Dyrr anxnix, inx daux knuax knuax aw hyxgiac .kiw .laii.

Siqanx decc quer jinjniar qinw. Bak jit xe suac, tyxhaixlangg ee jaboxqniaw qapp haursnix longxx duarhanr, qycc iarr sui' langg qewcua :ar. Tyxhaixlangg jiac lau, jnii u, mrqycc, suacc drir diyc jit jiongw quair vni, qui' sinkux nngw hnaiwhnair, qui' qangx kamrqasaur, sensnix sen' knuar dy' knuar be hyw.

Ix iurqycc sniu diyc nxiaw-tauu hitt qingx sniar biy, dyrr huanhur suxiongrlangg cuann quaw singlew, ngwbang sinbinn jitt vaiw erdangr vyxvir ix sintew kongqen jiac vah-zi.

"Guaw beh hro sewqanlangg :ee dyrr qowding hiaxee nia, beh dycc snix qyckacc je ee mihqnia .cud .laii?"

Hitt amr dirr biyrsi quer mee. Qxex tii tauu jit lyc, tyxhaixlangg hionghiongg jingsinn. Ix ee simqnuax pogpok cnaiw, mrqycc sintew iongxqnia-q.

Vauhok-aw kuanw hyxser. Tyxhaixlangg lyc laii qaur snua'iyx ee sii, cur nirr ee suxiongrlangg h.-hiongqongg-q. laii qra ix vyr, qongxx inx jaboxqniaw vuahdyw lauwtex, jitt siwlangg byy jaidiau qycc snex. Beh uaw daur ee sii laii qaur nxiaw-kax, tniax diyc jit siwquer decc hanw, qongxx inx qniaw ee hi'unx-aw dyw dii, hii-aw siw qaxx pulasax. Dngw laii qaur cur, knuar diyc isingquanw ee langg laii dirr inx daux. Tyxhaixlangg simqnuax banw ann, jidsii nngw kax, be qniaa be jauw.

Siangsnix-aw

Dirr juixqingw-buew u druar jit xee jyccann :ee. Jyccanlangg u sir xee haursnix qapp nng xee jaboxqniaw. Jabow :ee nng xee si siangsnix-aw, dingw:a nng xee hniaqyx, xe:a nng xee siyxdi.

Jixmue-aw snex jyr uanxzenn cancniu, bersux qangg jit xee bongiu inr .cud .laii .ee. Dirr vingxsingr dingxbin, nng langg dyrr u jingcax. Dua hanr :ee lingxli, ser hanr :ee kacc diaudit.

Tninii jyr baiw, diu-aw kiamwsiux. Qovutjiongx, jyccanlangg qra siangsnix-aw sangr kir gua jngx jyr qanxvi duer langg jiahcing. Jejex ho'ngg sangr kir suhau duarkanglangg daux ee cenqimx, jiac hyw, cing hyw, kangkuer jin' nngxkag. Qangg jit qangx cutsir ee siangsnix-aw memex dyrr byy jiacc hyw kangx. Sittauu je byy dnaxqinw, juxlangniuu singwde baiw, kap be diyc dyrr e giac cuee-aw qra sud.

Laii qaur tahiongx-guarliw, jixmue-aw horsiongx ioksog jit guehzit ee tauu jit xee lexvair beh siy' qniwbin. Hyw tnix, dyrr iog dirr kex-vnix; ho laii, dyrr dirr biy nirr siy' danw.

"Guaw jiokk sniu cur, jiokk simxbun a'vaa qapp a'buw. Liw e .be?" Memex mng.

"Qeqiamw marr e." Jejex qongw.

"Lanw taux jauw laii dngw, hyw bor?"

"Bering tihh lar. Narr hro langg' liac .diyc, lanw unxdangr diyhh jiac pacpniax."

"Iarr suacc u cax. Hnuaidit, guaw ho'ngg pah quanwsir :ar."

"Liw dyrr siy' lunw lehh maar. Snax nii kewiog jin' qinw dyrr quer :ar. Sii qaur, lanw dyrr erdangr dngw .kir .ar."

Jejex qra memex andah, simlai suacc decc huanlyw siyxmue-aw jinjniar e jauw .dngw .kir. Hitt amr, ix amwdiongx kir qra memex ee juxlangniuu vyr, rair inx qra memex qor kacc diauu lehh. Memex ee juxlangniuu jai'ngiaw, dyrr qra memex diap qra tiamw ~ ~, pacpair qyckacc je ee kangkuer hro jyr. Memex sidjai ho'ngg aclig qaxx be dongr did diauu :ar, dyrr taux jauw .cud .laii, beh jiyx jejex jywhuew dngw .kir.

"Dngw kir beh congr sniaw? Lanw daux dyrr si qingciah, a'vaa mrjiacc e qra lanw sangr laii jiax." Jejex duiww memex anxnix qongw.

"Narr erdangr qapp a'vaa qapp a'buw jywhuew, snax dxngr limx himuee guaw marr qamguan. Liw byy air dngw .kir dyrr tair. Liw snax koginn jiyh :guaw. Guaw dyrr tangx jre ciax laii dngw."

"Guaw byy jnii lar. Narr u, marr m jiyh :liw."

Qongw suah, jejex uat tauu dyrr jyww ix jauw .kir.

Sinkux byy vnuar sxenw, memex en' lo qra langg vunx. Crinr vng, hanjitngx, dagg hxang longxx marr hyw. Amwsii beh kunr, u biy tangx quer mee siongrqaiww hyw, narr byy, zinqecur ee gimjnii-kax bongxx qux, marr tangx quer jit mee.

Sinkux jit sux puar snaqee vyc liclih. Dirr vnuawlo, lamm diyc ho, cuex diyc hongx, ix qui' sinkux kiw uiwqnuaa.

Taukag zet hyhyx, bagjiupuee iurqycc dang qaxx. Binn binn aw, ix knuar diyc a'vaa qapp a'buw kia dirr ix ee binrtaujingg decc qapp ix qongxue.

"Me'aw, liw qauwui :ar. An' jitmaw kiw, liw be qycc sriu hongqnuaa :ar."

Qecdngw qangx jaxkiw, u langg decc huah qongxx, dirr jit qingx puar biy-aw lairdew, u jit xee jaboxginxaw siw dirr hiax, sinkux qiux qiux, bin-aw u ciywsinn.

Iarr m jaix jaboxginxaw qiyr simxmih miaa. Bongrvaii binrdingw, inx dyrr qra siaw qongxx, ix qiyr Hamsiauwhuex.

Qimx Ciuxjiw

Jit xee vaixkax :ee ciuw giac jit qix ditauu dirr caiwhngg decc tnuaw cauw ee sii, tokax sih lehh sih lehh, qaxnaxx u mihqnia draii dirr too nirr. Ngar iyx jimjiog qra knuar, dangsi'aw si jit kax qimx ciuxjiw. Ix qra kiyh .kiw .laii, ing sna'axqix qra crid hro qimx. Byy vanrpuex, ciuxjiw suacc cingwenx u jinghuatkir, suar .lyc, qycc e cud sniax qongxue.

"Liw narr sniu beh u qimginn-jaivyw qui' cuwqingx, an' jitmaw kaisiw, ciuxjiw narr huad qngx, liw dyrr qniaa; ciuxjiw ee qngx narr srid .kir, liw dyrr dongwdiam. Danw liw qniaa qauwui, diyhh liam jingenn jiuwgiw jit-vah vxenr, vyxbut dyrr e jauw .cud .laii."

Vaixkax :ee hnuahiw qaxx be qor .did, sui' qra ciuxjiw qruar dirr jingxtauu-aw, jit kxig dy' m qramx qra vrag .lyc .laii. Ciuxjiw venrnarr qngx ngiarngia, ix ee simjingg dyrr knuiwuac; narr amwdam, ix dyrr duer lecc akjag. Dingw jngx qaur xe jngx decc linlongx sec, vaixkax :ee dagg qangx dy' qniaa qaxx beh tniwtuiw. Beh qui' qywguec :ar, vnuar hxang vyxbut dy' iauxx byy hro cue .diyc.

U jit zit, ix dirr lo nirr duw diyc jit xee cauwhni :ee. Cauwhni :ee knuar diyc vaixkax :ee jingxtauu-aw qruar ee ciuxjiw jin' hihanw, dyrr qniaa uaw kir beh qra tamwtniax jaix.

Vaixkax :ee viw ciuw rue dyx qra ix sueh in'iuu, dogdok jingenn jiuwgiw jitt xee vorhun qra amkamr .kiw .laii. Qongw diyc jnii, cauwhni :ee bagjiux dyrr tenw dua luiw. Ix qiyr vaixkax :ee qra ciuxjiw bre hro :ix, qycc qongw cue .diyc e vunx :ix.

"Dyrr narr jinjniar u vyxbut, jingenn jiuwgiw byy liam, dikkag marr hro ix did be diyc."

Vaixkax :ee simlai amwdiongx decc juxvnuaa. Ix qewsiaur diaur quann quann. Cauwhni :ee sui' dyrr qra qongxqer. Sianghongx huah palaken. Lorbuew, cauwhni :ee liyc aw niurciuw, jitt jann singliw dyrr anxnix qongw dnia.

Cauwhni :ee duer ciuxjiw ee qngx, zit iarr qniaa, mii iarr qniaa. U jit amr, qniaa qaur kekamw jit xee iappiah ee soxjai, ciuxjiw sria cud jit jua qngmee jiokk cak bak. Jitt sijun, amwsii suacc naxx zit .sii.

Be qor did tniar, jingxtauu-aw junw jyr ticvee bersux decc ow qoxjnew, cauwhni :ee cud sinmia ow, he sniwmia iah. Qaur qaxx tnix qngx cud zit, qimginn benw lun, lenrr pnaiw dangg iacc pnaiw tih dy' iarr byy.

Cauwhni :ee krir cuaccuah, iyh qaqi unw si hro vaiwkax :ee dauw .kir .ar. Ciuxjiw pniax duiww tokax, naxx qniaa qycc naxx cyh.

Kex-vnix u jit qingx dikqongw-aw-cur, lairdew druar jit xee bagjiux puawsniur ee lau a'vyy. A'vyy :a bec'amr aw cud .kir, beh kiyh quaw caa banw quaw qnuajinx dngw laii hniaa jaur juw dxngr, kax-drew m jaix hro simxmih mihqnia diamx .diyc, kaqinx juac .diyc, hiamw hiamw vuac jit dyw.

"Uer, guaw dirr jiax lar."

"Si'angw a? Si simxmih langg decc qra guaw qiyr?"

"Liw taukag ngar .lyc .laii. U knuar .diyc bor? Jit kax dngdecc huad qngx ee ciuxjiw dyrr si guaw."

Lau a'vyy :a bagjiux knuar byy, mrqycc hnirang'aw jiokk lrai. Ix kuu .lyc .kir, jit sniax dyrr hro ix bongx .diyc.

"Guaw mng :liw lehh. Liw erhiauw liam jingenn jiuwgiw .be?" Ciuxjiw qongw.

"Iarr u jit xee berhiauw. Jurr jyr ginxaw ee sii liam qaur jinw."

"Liw sintew sniaw kuanw? Qniaa e dinxdang .be?"

"Guaw lau bongxx lau, iauxx jiokk iongw sinmia. Jingwqingx beh vixsair, siauwlenn :ee huanrser dy' qniaa sux :guaw."

"Anxnix jin' hyw. Guaw quatding qimginn-jaivyw beh hro liw did."

"Jiacc hyw kangx or. Acc hex jaivyw dirr dyhh?"

"Benw mng jiacc je. Duer guaw ee qngx qniaa dyrr driyc."

"Mrqycc, guaw bagjiux cnimii, knuar byy ne!"

Tniax lau a'vyy :a qongw liauw, qimx ciuxjiw sui' trow jit kauw kuir.

Cnimii a'vyy :a jin' senrliong, tniax diyc ciuxjiw decc trow duarkuir, dyrr qongw beh qra draur cue langg.

"Guanw jngx nirr u jitt xee sensnilangg, jiokk lingtongx, qycc jiokk hyw simx. Venrnarr u guanw jitt jiongw cnimii puawsniur :ee kir qaur ix hiax, ix longxx byy beh qra guanw siux jnii."

Dyrr anxnix, a'vyy :a qra qimx ciuxjiw cua kir sensnilangg hiax. Sensnilangg jiauww ciuxjiw ee jixsi, dirr qngx siongrr mew hitt xee soxjai ow kangx, suar liam jingenn jiuwgiw. Naxx cincniu decc venr mosut, bak jit xe aw, jit sniux jit sniux ee vyxbut dyrr anxnix jauw .cud .laii.

Sensnilangg qra qimginn-jaivyw jyr snax hxun vunx. Jit hxun vunx hro jngx nirr ee sanwhionglangg. Jit hxun ing dirr pox qiyy jy lo. Cunx ee hunsniax, ix cniar qyckacc je sensnix laii dirr ix isingquanw jyr girjinw. Bylun simxmih langg puawvne kir qaur hiax, inx jit sxenw jnii dy' byy beh qa'ngg siux.