caiwsex pangx

 (ID)

Go qnxix jaw, juer amwnguar. Kuanlamm Cirdniuu ex-ex-din-din, bersux gnokii qa qxab.

Cing dngtangw hxiax ee asangw, qylecair qapp qngxsimvec jit langw jit langw qih qui’ ciax iong qorr li’aka ciax, en’ lo huah “jiycquer, jiycquer”. Dangquex, koxquex qapp ciwquex-aw vaii vaii qui’ let, itvnuadig, qrunn tngx kacc je. Hingr sunw-lo :ee, ligdiksunw, losunw iacc kavehsunw, iong juw :ee, caw :ee iacc jyr lingxvnuaa, cinwcaiw dy’ hyw kauxbi, jiac diyc jiokk cnixcuir. Ci-aw-lai liyc aw qex qniaa .nng .vo, beh air qniubuw, suanwtauu iacc huan’axcangx kenwpangx :ee, dagg hxang iarr ingwhur liw qaur qaur.

Jit vew ensuix huah jap kox. Tangx vixping sensnilangg decc liac vnerbuw, bagjiux jinn knuar sikjuiw qamxx u entauu; pni-aw pnri knuar pangkuir sniaw ngiu; qycc diyhh iong ciuw bongx bai, knuar si iuwjniw iacc quasaux. It’au, jiacc laii mng tauqex, knuar cangcair dyc’ui aw laii :ee.

“Vakdauw.”

“Jionghuar ee Vakdauw?”

“Hner m :ee! Jionghuar bac’uann qaiwdyw juann Daiuann. Kiamr jit bi ensuix, qamjiw huanxvan.”

Tauqelangg u cuiwsuiw qycc hyw ciywsinn. Sowluw :a an’ havaux-aw zimm jit xee dangsenw .cud .laii, jit kunr qingw go vew, duxduxx go-jap kox, benw jau.

Jurlenxciax sanxkniux qycc vyhvniw, jin kyr nng qix kax lab. Dniudaur dirr ciaciuw taujingg ee naa-aw byy dua xee, beh junw caiwnaa-aw ing, kuanw ee caiwsex diyhh tiap hro siapdiap jiacc drew e lyc. Juansig iaxcair, byy qaxx jiaujiyw aw cycair. Kacc hordiong u dangrsniax :ee jerdew, kacc kinsngw :ee, piwlun ensuix jiaxee be kamx did decdang :ee, siongrr auwbuew kngr dirr dingxtauu. Beh dirr vadd xee sihau, qewdingciax cniuw beh jair kxeh, qongciax rair uaw jam, odobai qnuaw siqanx, lacvah-sniax dirr kajiah-au vuvux qiyr, jit xee simqnuax q.-qniahniaa-h., byy sii dikdnia. Tauwjaw ee kongkir cingjing dngrdiamxdinn. Jit diauu lo kuah ~ ~, jiangwsii cingcingx jit jiah ticbew decc pauw.

“Cialo uirr guaw kuix, kongkir uirr guaw suiw.” Nng qix kaqud kixlyc siy’ dauwtuir, brangg suahsuac, Sowluw :a jit xee taukag qor lecc samxsniu, longxx benw cud lat.

“Qinaxzit ee vakquex quewhunx, ingwcair qruax qruax, hanjii u jit liap cauwhniux.”

Dna’aw qaur cur, tauduxjiah dirr dua caiwci kuanw :ee, sui’ hxang aw ho’ngg tec cud laii quer srunn, bersux decc diamw qnia. Viw langg' kacc jaw snax nii cutsir, vaiwsux-hagge ban langg’ go dxangx dah dah, lun vuer byy lun huer, Sowluw :a iarr diyhh cxingx langg' juer “sujew”. Sinsnex kanx sai’aw, jairlaii byy decc qa’ngg vysniuw. U ngiu tranr ngiu, sujew iarr jyr qaxx jiokk kiw, qra sumue duxdag iacc jikjue si jin’ sowsiongg.

“Cair singx qingw qingw ced ceh lehh, qinaxzit jaidngg qapp jauwkax longxx rair cingxsaur. Seaxtangx diyhh lur, kiartangx diyhh iong vywjuaw crid hro qngx. Hongtangx ing’iax qau dutdud, diyhh qra vrag lyc laii sexdng.” Zi-sujew Sowbinw pair kangkuer. Sowluw :a singbing, it’id unxdunr.

Sittauu jit dua quaw, dingxvox iurqycc kir beh jidvnuar, Sowluw :a m qnaw qikkyy, jit vo dy’ byy tuasuax. Decc qingw cair, qaix ad :ee ad, qaix lauu :ee lauu, ganw .jit .xe dyrr jaix hunhiauw, viw did vnuax dxangx jingg cimxx laii hitt jun, Sowluw :a jinw qex jiokk liabjiap, jiokk quanwciuw.

“Binxdau-aw byy sxix, jiac diyc zun vror vror, tunx be lyc .kir!” Sowluw :a bad hro sensnix anxnix qra liam.

“Jitt liap vxuu-aw dyrr jiacc iur, byy-dair.-byy-jir liw puee qra kausiah hiacc qau .kiw .laii. Jectuah langg' ee mic, m kiamwjer!” Sensniniuu bad dngbin qra ix piwper qiyr.

“Quxcair jiacc quajuaa, dingw:a iarr byy ced hniwsag. Dyrr m si guu decc jiac cauw qyc, qui’ jangg unn aw mauh.” Dua sujew Sowkingx bad anxnix qra piwsniur.

Kyxnauw ee qiwdii vuh ngiw snex qinx, leh berdid li. Vixdongsii, Sowluw :a sivutsii dyrr ho’ngg luexme, texziok, cinwcaiw langg dy’ tangx hro ix jit dxngr qawsi

Tendiongjed quer liauw, dagg qangx dy’ jiokk vikzuac. Dinxdang diyc, qnua lrauu jiab dih, byhqongxqiyh decc jycsid. Sowluw :a dirr jaidngg vniawdng, tniax diyc jauwkax u langg decc drang dniaxjaur, duxjiah cinciuw quer qingw quer sew ee cair, henrvo sui’ xee aw lyc iudniaw.

“Qongxx siongrqaiww byy iarr diyhh tua lecc vnuar dxangx, jensii jiacc u tangx diyc qaur lanw giaa.” Kunr dingxe pox, bad u jit amr, sumue Sowlann duiww Sowluw :a qongw kiw.

Urngiaw lacsab dyrr driyc. Sew hyxser ee tauxkiwtangx qycc qra draur .dngw .kir, hun’iuu qapp tohunw byy vnuar sud, suacc diyc qaur Sowluw :a sinkux-dingw juann qauxquecsenx.

Beh uaw diongdauwsimx, guarkauw sna' jiyccuir decc qiyr jiahvng. Zuac m zuac dagdak, ciac’iac qaxx, vitow be kuix, byy uirkauw. Jit zit snax dxngr, jongw :a qiong :a jit nguaw muee qapp nng nguaxtauu vng, byy tangx jiac kacc qex. Narr qniax duarkox iacc si jit~vnuar dxngr aw be iaux, vng beh qiamw quaw kiw .laii qongxx marr bering tihh. Amjamx ee ciuw iong qorr dekox lur lur syx syx lehh, Sowluw :a kir qaur jiahvngrtniax, diamrjing dngrr sniasueh, jingwlangg danw ix jit xee.

“Huah jiahvng, qaqi diyhh kacc sirsua lehh. Dy’ byy decc jnriu sinniuqiy, qycc rair langg' snax cniaw sir cniaw. Qnidngr lingw .kir si jin’ pnaiw jiac.” Buerjingr iong di, dua sujew Sowkingx singx jit dxngr qawsi.

Go luw id lxamm jre dniardiyc. Ngii dyh binrdingw sir cud cair, qiamdna diyhh sxaix :ee singx cir bai.

“Jiaxee sunxqnuax jyr qiamduaa, jaxkiw puer amwmuee-aw kacc dikdiongx.” Jiac jit cuir nia, sxaix :ee lunrduanr.

“Dyrr driyc m. Iamm he hiacc je, qiamm siw siw.” Sensniniuu suar angsair ee uerbuew.

“Guaw liaurqiyr jitt cud si mirhunw-jnir, byy diwir vro, m jaix lairdew qycc u vaux muajii dilehh.” Sxaix :ee qycc qongw.

“Guaw u qra tecniw, qongxx mirhunw m tangx draux sniu' qau.” Sowkingx sueh qinw qinw. Sowbinw bin too too, byy vuexhue.

Jiac vng vaw, sensnix qapp sensniniuu kir hiycdaur. Jiauww kauhunx, nguaxdi jitt guehzit diyc Sowlann sew. Sowluw :a iarr byy tangx ingg srinx, snaaxkor qapp puerdnuax jit dua tong dirr sexiqix, dniudanw langg qra inx hniah cud kir pak zit.

“Guaw beh laii kir ginhangg .jit .jua. Sxaix :ee narr u mng kiw, jiacc qra qongw jipiyr u qra longx .zip .kir .ar, benw qniax e vutdo. Sowbinw dirr jaivangg liam qimqongqingx. Tingwhau ix liam suah cud .laii, qiyr ix qinw qra cecdew sangr inwvanxdiamr. Liw dyrr qra qongw si sxaix :ee huanhur :ee." Sowluw :a dirr dniadauw decc pix snxax, dua sujew Sowkingx uaw laii qiawue.

Jit tong snxax quaww puednuax, cngqinx, snax qix dikqnuax byy qraur pix. Zit dng’ qia, iam jngwjngr. Siongrr buew aw niaw jiacc beh nee, taukixsingx jit niaw sensnix ee nailinggu dax jidvnuar.

Kangkuer bongx ingg, Sowlann dirr nijnii-kax siyw jerliangg, hiyctiamw, jit diab quw aw dyrr binn .kir, qycc suar kiw hnoo. Sowluw :a bagjiux marr siab qaxx. Juixjuan jun .kuix, siangx ciuw srinn jit pongw juiw, bin qra ciangg jit xe liangg. Sxaix :ee jarhngx qar :ee, tranr jitt xee langwqangx bongxx liu.

“Sowcair beh juw e hyw jiac, hagbun si cimx longlongx, byy dixjiw. Brew driyc mic, kixtauu vo u jairdew dyrr kacc unw :ar. M byy, iurkacc gauu ee jongxpowsaix laii decc vran huexsit marr vutjewsu.”

Qanghux beh yc erhiangw, sensnix ee qawsi diyhh it’ir sinwkyr, iacc si jiongsinr-jionggii kacc tongx? Sowluw :a simqnuadew q.-qunxjun. Saihu qyckacc vunxdingw dy’ vutviw vudqongx, qeqiamw e siabsux, ingxingw marr e sitcyr. Vutzirqyr, jit xee simqnuax narr vutsii daiwgii, itlorbuew venr vnuar tangw juiw vnuar cnisik qnaxx e?

Dua-sujew cutmngg jinwjingg u qiawcuir, Siuwluw :a jiokk qiwsimx. Zi-sujew qingx liam suah cud jaivangg, Sowluw :a jiksii uaw kir qra qongw.

“Dingxsix quanw ersix. Sxaix :ee qauqo ix, ix suacc laii cepair guaw.” Qongw suah, Sowbinw an' cecqing tec jit vunw ceh .lyc .laii giab dirr qyc’e, dee tinn jit vxuex, duartniax juiwong'iw jre .lyc qycc suar kiaux kax.

Sowluw :a cenxknuar, liaursngr siyxtingg aw jyr hongtaix be benw .did, dogdok qiubang jitt vaiw ix e tangx tuad srinx li dyrr jin’ banrhing.

Jiauww qu le, mngxvox sir diamw, sxaix :ee diyhh qra sai’aw tiutang. Sowkingx duer buexau qnuaw qauwui.

“Cecdew u sangr .kir .ar .bue?” Jiksii-jikkig, sensnix mng tauqnir-sai’aw.

“Guehcex, ginhangg langg je. Siangx vingg jauw qniax qnir qnuaw be hur. Guaw u iongtog Sowbinw kir cuxliw.”

“Inwvanxdiamr ee jursow qapp denruerhuanx, guaw byy qaxx jit hxang u. M jaix xui, mihqnia beh anwjnuaw sangr .kir?” Sowbinw sraiw dywtautuii.

“Liw suacc berhiauw mng :guaw?” Sowkingx duiwcuir dyrr qongw. “Ciuxqix-aw guaw longxx jah diauu diauu, jex liw iarr m si decc m jaix.”

“Jitt jann tauu jiww buew qeww liw decc qaujiab-ongxlaii. Limsii-limjun qiyr guaw kir qapp langg’ jicjiab, banrvutzi narr dyc’ui u dingdnaa, hex dyrr kax kacc dua srinx a!” Jit pnir pangg jingliw, Sowbinw qongw kiw jai viacviah.

“Jit qangx qongxx anxnix laur kangx cingr vehvec liauw .kir, u qraur uan’ongw!” Sowkingx uat hiongr Sowluw :a. “Sowbinw byy kir, liw tacc berhiauw qinw kar denrue qra guaw qongw?”

Jauw byy quer ciuw, Sowluw :a u kir saur diyc hongtaibuew.

Sai’aw caxcuir, sxaix :ee crinr tauu crinr bin, byy simjniaa vangr qanghux, loxkir .qaur .der, lenrr amr dxngr dy’ qiyr inx jiac qadi. “Guaw e qiyr siddngg hiax ing’amr paiwgiac benw cuann linw ee. Linw qokk langg jiac vaw jiacc quer .kir.”

Sai’aw jyr dairjir srid jiujir rair dnaxjingw, jitt vo jyr sxaix :ee qaiww jiap ing. Duxjiah decc vyccuir :ee, jinw cuiwpuew guanguann pongr saisaix, iauxee, jit xee iux tauu, jit xee qad bin.

“M jaix anwjnuaxngiu aw diyc, sowcair-quanw qniazit suacc byy kuix. Qajair vaux zunrvniaxqauh ee a’veh u cud laii bre.” Nng xee sujew jing’au kax cutmngg, Sowluw :a duer inx kacngx-au cud .kir, quer jit xe aw quw liammisii dngw .laii, siangx ciuw qaux qaux qnrua qnrua.

“Acc jitt dre lehh? Jit nng nguaw si sniaw?” Sowlann mng.

“Daurhuex a,” Sowluw :a rinr. “Bad tniax liw decc ylyw qongxx qebacvng qecviah hitt qingx ee daurhuex jiokk xmii, nua todau jiokk sangx. Qacc u qingquer, guaw dyrr qra inx vaux nng nguaw, lanw jit langg jit nguaw.”

“Habsngr knuar zuarr je, guaw jitt vrangx dngw Biaulik jiacc qra guanw a’buw jiyh hingg :liw.” Sowlann qongw diyc angr sniax angr sniax.

“Ciyr siw langg! Liw qapp guaw decc sngr jex?” Sowluw :a qexir qra gin'or. “Qinw tauw kiw laii jiac. Zunrvniaxqauh marr diyh’air tranr siyx jiacc hyw.”

Qra Sowluw Jew suecsia, zunrvniaxqauh gab .lyc, Sowlann kuix simhuex, jit cuir jriab jit cuir.

“Jitt dnar ee zunrvniaxqauh diksit itdingxid :ee, jiac qyckacc je qauh dy’ be sen.” Cuir naxx decc vro, Sowlann qongw qaxx cuir ciyr bak ciyr.

“Jitt bi, sxaix :ee uanaxx qaiww hruat. Vadd langg narr itddingw :ee, acc lanw sxaix :ee lehh? Liw anwsngr qra vaii dirr derr quiw xui?” Sowluw :a vnuar qra congwqingw.

“Sxaix :ee dyrr jit vo gauu venwsinx sringr quer :ix. Narr qo’ bi qoduiwkax dirr iarci-aw vaii dnar-aw, a’vxeh :a ee singliw viw lanw sxaix :ee vycdnia kacc hyw lecc je.”

“Liw junxdnia si iaux kir quewqix jiacc e jiacc huanxsiongr, knuar lanw sxaix :ee hiacc byy diyc." Sowluw :a ciyr ciyr aw qongw. Sowlann trow jit xe cuiwjic, ciuxtauu ee zunrvniaxqauh jyr jit cuir, suar qra hitt nguaw daurhuex ee quar henx .kuix.

“Jrahngx dirr jauwkax qingw daurcair, sxaix :ee u laii qra Sowbinw huanhur, qiyr ix diyhh cuann hingrzinn-daurhu jyr dnilo. Ehngx inx vnir jitt cud, hai lanw byy daurhu damrsamw, beh jiac jit nguaw daurhuex diyhh kauxbin jongg.” Sowlann naxx jiac naxx sueh kiw.

“Sowbinw jurdew dy’ kacc qiaux. Sowkingx pen’ pen’ aw qycc gauu owdor. Inx nng xee e kiyh .diyc dyrr ruanx iarr be benw .did.” Sowluw :a suecpuar.

“Lanw qongw jit qxur byy su’ngiaa :ee. Jitt jann kacc qongw dy’ Sowbinw kacc vutsi. Hiabser sxaix :ee kacc diksimx :ix, dagg hxang ix dy’ trex qaxx li ~ ~.”

“Langg’ ix dyrr kacc u jaijingg, iarr be quer did sxaix :ee ngaa qui’ vingg.” Sowluw :a dner cinwciyr, sniabuew u sngkuir.

Jnia’ jap dxangx ee caiwquanw, miasniax u tauw, singliw ciangjai qa’iac. Jyr sai’aw rair jauxdyh qapp diauliw nguaxdi, tingwhau qaur siux dnar, taubuew snax~sir diamxjingx byy tangx siyw jre .jit .xe si jin’ suwsiongg.

Vutviw qnuaa .langg, sew jit xe aw kaciuw, bin siyw zriuu jit xee dyrr ciaucik :ar, zuahtnix, tong’ sinkux qnuarsniuu byy sexdng, hen dy’ ciac’iac, kunr be lyc binn. Duiwtauu uanqexjuw mngxvox dngdew aw cutmngg, jap diamw aw quer, dngdew aw huedngw, suacc dirr igqingx mngkakauw siy’ vrong.

“Guaw kaciuw kacc qinw. Guaw singx sew.”

“Henrhen dyrr guaw singx laii :ee, si anwjnuaw guaw diyhh niu liw singx sew?”

“Guaw decc sew kuair kuair :a. Be cancniu liw, sew jit xee sinkux n.-nisnix-s.”

“Beh ngua ee snxax, guaw jiauu cuann hyw :ar. Liw ciuw nirr kangx lylyx.”

“Dnaxx liw marr decc qoxjuix! Kir vangqingx hniah jit xe aw lairsnakor rair zuarr quw?”

“Danw liw snxax hniah .laii, huanrser guaw sinkux longxx sew hyw :ar.”

“Acc narr byy lehh? Guaw m dyrr laii kar denrue, qiyr qingxcad qra liw cniaw .cud .laii.”

Dirr vangqingx-aw-lai tniax diyc nng xee sujew jit qxur laii jit qxur kir decc caxcuir, Sowluw :a qapp Sowlann qig hmc hmc, horsiongx decc sraiw bagbuew.

(ZI)

Jit lexvair beh cexbuew. Jiac langg’ taulo iacc tauqelangg, vaiwid jiww vaiwgo ciangjai kunr byy qraur binn, tranr hiyckunwzit beh qra binn vow hro vaw vaw, kixcngg sihau si tingwhau qaur zidtauu pak kacngx. Qapp inx duiwhuanw, Sowluw :a ping jaw jingsinn. Jyr sai’aw, dingw:a u suhu qapp subiyw rair hogsai, sir xee sujixmue qaulunn hiyckunr, kencew jit guehzit u jit xee vaiwlak-sii tangx huedngw sirduarlangg kadaux. Siqanx vyxvuer ninix, pacsngw jit biyxjingx dy’ e enwkir.

Jaxvangciax, Daiuann Qytih cid diamw iok’iog an’ Daivag kixqniaa, qauw diamw tongw dyrr qaur Dailamm. Jingquer qytih iauxx bue kaitongx, qnuaw-sii-qnuaw-kig jre huelingqix, diyhh jagiam vindnuax, iarr diyhh jaqiamw hingliw. Henrvo ngua jre qytih, pah piyr giam dnuax liauw dyrr tangx jnriu ciax.

“Qytih jauw jiacc qinw suacc jai viakviag, jre diyc longxx be bongbongg hinn. Beh narr si huehingqix, guaw jitquw vyh qnaxx iurqycc decc vingxvag, cni’auw.” Qecviah jxy ee siyxjiaxlangg ham' Sowluw :a lraiuu-ten.-lriauu-de. Jit daii jiokk sokqed ee notbuk dirr hingkamw-jingg ee dyh-aw cai lehh, ciuxjingxtauu dirr kixvnuaa binrdingg kiw kiw lyc lyc.

Mngsnir, ixaxui, qywsirvangx..., dua siwqer qeww knuar e diyc THSR, kiarr Ingbunn TAIWAN HIGH SPEED RAIL cruw tauu jit xee zirbyw qab jywhuew, sag jywduix.

“Nguardngw iong Daigiw, qnaxx diyhh siaw jyr DQT, Daiuann Qysog Ticlo.” An’ sexciuxqingx cud .laii, Sowluw :a qaqi decc toxsniu, hongwsangwtauu jitt sijun vyr qongxx Dailamm beh qaur ar.

“A’jew, guaw dirr jiax lar!” Dirr CIVIC jurqa’iong :ee lairdew et ciuw, siyxdi dua sniax huachiamr.

“Ciax-lai jiokk liangg. Guarkauw si byy tniliw zuac or.” Jre zip laii qawsuxjy vnix:a, Siuwluw :a naxx crid qnua naxx qongw.

“Guaw dyrr iyh qongxx ciax-lai byy lingxkir liw dikkag jre be diauu, mrjiacc byy zip kir lairdew cue :liw.” Siyxdi ciyr ciyr aw qongw.

“Qauw diamw aw nia, zidtauu qongxx dyrr jiacc iam, jniawdiongdaur knuar beh anwjnuaw?”

“Erqangw jurdew dy’ siyxzuac. Daivag pacsngr kacc be.”

“Marr si hib. Snax-jap-zi dxo rair kuix lingxkir, snax-jap dxo qamxx dyrr benw?”

Tnisii quiw qxur aw lriauu suah, ciax-lai diam jutjud. Laurbuw ee dairjir, jinwjingg sen’ dramm dy’ be diaudit, liac byy duiwdoo si e kiw siy’ ziongw.

“Dingw lexvair cua buw :a kir vnerngi ciamx huih, qiamxgiamrdnuax jyc .zit u qiar .laii .ar.” Siyxdi tehtauu qongw kiw.

“Siaw anwjnuaw?” Sowluw :a mng diyc jiokk cnijinx.

“Qongxx buw :a huec’iuu byy hiacc lyy ar, kolesterol qapp ziyrsngx ee jixsor longxx vutjiw suiw.”

“Urngiaw or!” Sowluw :a cuir ciyr bak ciyr. “Quatding si guaw ee liaurliw u qniakuir. Linw diyhh jiauww guaw qar :ee suar lyc kir kuanw hro buw :a jiac, cenban m tangx dngrjam.”

“Mraxqycc, buw :a jiacc quw aw dniardnia decc liam qongxx cuir jniaw vucvuh, byy cuiwdauw. Ix nng vingg cuiwpuexbah diddit moh .lyc .kir. Langg' narr liahjunw lanw longxx decc qra koxdok, hex dyrr jin' uanongw.”

“Linw ang’axbow ham' ix jiac byy qangg, ix jiac cair, bagjiux qimx qimx knuar linw jiac bah, lanquair ix decc huah vitow be kuix.” Sowluw :a ngiuqybinw sui’ vingw.

“Duawsinx :ee byy jiac quaw hicnix iacc cycair, ing’iongw byy qraur, angngex-aw kacc be dua, byy duxhyw dirr laurbuw ee vakdoxdew danx .kir si jiokk u vyh, m si decc qunxsngxciyr.”

“Liw huanlyw :ee marr sursit,” Sowluw :a dngw uerquanx. “Henrsii ee simvu byy air zip jauwkax, daqeqnuax ee vngrdngr longxx byy decc dnaxjah. Vixqauwdig laii qongw, a’buw sngr jin’ u hokkir :ar, si daur si amr, linw longxx jiauww kixqangx.”

“Jyr langg’ sirser, iuxhaur sirduarlangg dongqaizenn. A’buw inx ingxvaiw kacc qankow quer. A’vah jaw quewsinx, a’buw cid siauwlenn veh siauwlenn dyrr jiuxqnuaw. Lrik-drngg-lrik-do, diyhbuaa lygiap, jin’ byy qanxdanx, qniaxzii qinaxzit cnia’iongw dua, jiacc beh hiangxsiu jit xe aw cing’ingg hog, suacc jitt hxang rair lunw cuir, hitt hxang rair kirjiac, lanw sniu diyc dy’ simx sngx sngx.” Siyxdi qongw, ciuw hnua qawsuxvnuaa.

“Jiac hro diaudew dyrr hyw. Ix jin’ jaix lanw sunjuann si uirr ix qenrkongx decc setsiongw.”

“Lanw cuwvnix jit xee a’vyy :a, qongxx qapp buw :a qang jingwtauu. Cnicyx jiauww puer, jiac kacc jniaw dyrr urngiaw, langg’ ix sintew qor qaxx qinqix diaujongr iongxqnia-q.”

“Suacc m jaix sinmia sui’ langg qycc ngiu lar,” Sowluw :a kiw ue duw. “A’buw si be kamx did qycc jit vaiw lyxcuthed. Byy jyr kacc dingrdongr lehh, sii qaur kixjingr, byy iyc hyw rix qnaxx dy’ e or!”

Soxluw :a zuxx qongw zuxx angr sniax. Jyr siyxdi :ee byy inwcuir, bagbaii liapqingw.

Ciakor dirr aurdniaa. Qaur cur, Sowluw :a singx lyc .laii, siyxdi jiacc qra ciax sraiw kir tingg. Jid’err cutgip sui’ cud siarhue tanwjnii, quxnii-dngguec ee jiktiog, Siuwluw :a junn .nii crann crann qra tec kir lap jitt dongr nng janr kiw ee tauwtnicur. Ixjaw qa’ngg suer cur, buaxan, cuwtauqex narr beh tyw dywdngw, diyhh qycc cue qycc vnuasuaw, kacc qongw iarr qaqi ee cuwqingx laii kia kacc dngmngg. Laurbuw huewtauu u :ar qycc qau vnirtniar, siyxdi beh kiw qex rair virvan sinniuvangg. U jit xee kacc unxsun ee siu, simvu crua zip mngg hongrtai qongqox marr kacc qamguan. Dongqisii, Sowluw :a si anxnix decc hnuarsngr :ee.

“a’Luw :a, liw dngw .laii or,” a’buw dirr cur-lai tniax diyc sniax sui’ vniar laii kuix mngg. “Guaw jiacc decc sniu qongxx qamxx e linw nng xee jiaxdi-aw siy’ sutlo, duw byy diyc.”

“Liw marr decc gauu cauhuann. Guanw nng xee ciuxqix-aw longxx ven ven, cinwcaiw cue marr e diyc.” Sowluw :a naxx decc trngr ree-aw, bagjiux hiongr lairdew quanknuar. “Linw simvu byy dilehh?”

“Ix kir caiwci-aw,” a’buw rinr. “Liw jitt vrangx dngw .laii unxdangr beh qycc vanrcair hro guanw jiac hyw liau :ee. Ix qongw diyhh singx kir caiwci-aw kuanw quaw cingcair, kacc benw liw jit jua an’ Daivag jauxciax-liglo, dngw .laii qycc diyhh kir qapp langg’ ekeh.”

“Ix duarsinx-duarmia, nacc hyw?”

“Jiacc sir qycc gua guec nia, vakdow iauxx byy dua xee. Dongsii quii :liw, sunrguec :ar, cosiab kangkuer guaw jiauww jyr, sew snxax, juxvng, vniar cur-lai, byy qaxx jit hxang pah qalauc.”

Qenwnarr tee kiw diyc qoxjaw, a’buw dyrr qongw qaxx m jai’ngiaw tangx suah. Sowluw :a qinw qongw beh qra hingliw qnrua kir kngr, sunrsuar sew jit xe aw ciuxbin, ngua jit niaw cocing :ee. Vangqingx qig dirr lau'axdingw. Dnaxjingw uanvi lyc laii laukax, siyxdi inx nng xee ang’axbow longxx dirr cur :ar.

“Vakdow dua qaxx knuawqnir-q., aurzit aw m tangx qycc qnrua dang.” Sowluw :a laii qapp derhu-aw siy’ qiywinr.

“Sensnix u huanhur qongxx cing’ingg kax diyhh bongxx qniaa, qaur sii qaur jun, ginxaw e kacc hyw kiyh.” Huaitaix :ee ciyr ciyr aw qongw.

Beh uaw daur, Sowluw :a isiuqunn haa lehh, hingr cuccuh beh denw qanghux. Siyxdi uaw .laii, vnuar tuntor qongw ix beh jair qeau dngw aurtaucur.

“Linw jinw beh vniar kir Vindongx?” Sowluw :a qad bagtauu. “Linw anwsngr dangsii beh dngw .laii?”

“Binaxjair,” Siyxdi duiwcuir rinr. “Guanw dniurmw qongxx beh cua guanw kir vair Juwsneniumaw. Guanw dua-i’aw u jit quaw daurvakdoxsnax qongxx beh hro ix ursinx ee siyxmue.”

“Beh dngw guarqex marr diyhh danw jiac vng vaw. Qamxx diyhh qnuaw qaxx anxnix itsii-itkig?”

“Guanw dniurmw qongw diongdauwdngr u juw guanw ee gxiac.”

Qongg pniapniax, ang’axjiaw nng langg jit kax hingliw qnrua lehh jauw, ciax an’ ciakor sraiw .cud .laii, puc lehh dyrr kir.

“M jaix dangsii kuanw :ee? Hingliw jiacc tiabsit, duanwduanr m si cnex-qongg-vec-qongg tauduxjiah.” Sowluw :a simqnualai decc sniu.

Buxaxqniaw nng langg narnia, qycc longxx siyw jiac, sniu .diyc dy’ lanxtanw, Sowluw :a byy beh dua ciagiaa. Vingsniux liyc aw srunn .jit .xe, jit nguaxqongx cunx-vng cai diong’ngx iong, xe janr juandoo kngr socair, u hro ix ciaux diyc bongrniw, tosunw qapp bacdau. Caiwna’awciax lairdew u snax liap o-aw, derhuw-aw qimjaw kir brew :ee, kaux jit liap dyrr u :ar mrbenw je. Gas jun hro dyc, jit xe aw quw jit dniaw qiamm muee juw sik, dingxquann suah quaw kincaiwjux qex jiokk hyw jiac kuanw.

“Linw qniaw qongw liw jitt jam aw kacc byy cuiwdauw?” Qiamm muee naxx vex, Sowluw :a qexir cuir drang cuir mng kiw.

“Tacc urngiaw!” a’buw sniasaur u qnaa singwde. “Guaw itdit dy' hyxcauxhamm, m bad decc qingw jiac. Liw dyrr air juw. M byy, jit nguaw vehvng laii, di’iuu cam’ dauriuu qiauw qiauw lehh, guaw dyrr tangx junw jit dxngr.”

“Hex jiac lyc duiww sintew dyrr si baiw, liw cingcingx qongw be tniax.”

“Guaw si vixjai ue qongw lar,” a’buw qinw qexsueh. “Dnaxx lanw daux jinw longxx ing qanaxiuu, byy dyrr caiwjixiuu, beh dyhh snix di’iuu tangx qiauw vng?”

“Isingx ee iyhbi iarr diyhh tunx, m hyw vangr hniwsag, puewqah u quer liaurliw ee jiahsit, vnerjingr qycc laii dakdnii guaw jiacc m sinr. Guanw buxii qapp buxqu longxx buerjingrr go-jap dyrr diongwhongx, vuanwsui. Hiangwsor inx sintew narr siyxkuaw jai’ngiaw rair qor, vnirtew dyrr be huanxjingr, drir qaur jitt jun be qniaa be jauw tuasaixlenn.” Jaboxqniaw dyww qra laurbuw suatqaur. Laurbuw tauu lee lee, cuiwqag suee suee.

Sui’ langg jit nguaxqongx muee qred vaw, Sowluw :a qra nguaxdii tec kir juixjy-aw suawciuw sew sew lehh. Dngw laii kectniax, denrsi u ngiaw u sniax, lairbin jit xee suiw jaboxqnuax dngdecc qar langg' juxjiac.

“Liw kir doci tua ciuxge diyhh liauw hagjux. Langg’ jex denrsi decc qar, jit sxenw longxx benw, qycc si dagg qangx u :ee.” A’buw qongw.

“Inx hex decc bre dniaw lar," Sowluw :a naxx qongw naxx hnair tauu. "Pingdiaux diyhh kir jiu hitt kax dniaw, junw juw e hyw jiac, tangx juw ee mihhang marr buqix.” 

“Guaw qycc jiac u tangx quiw nii? Qamxx diyhh uirr guaw jit xee laurhuexaw anxnisnix aw decc ciavuahlinwdauw?”

“A’buw liw tangx qew jyr guaw tauu jit xee juxqowkeh. Tingwhau vadd zit aw linw jaboxqniaw cutsaix, u hokkir :ee e naxx laii naxx je.”

“Liw qui’ simx qor bruw jex, qamxx hyw? Liw marr snax-jap gua :ar ne! Byy angx byy qniaw, tiokjig qycc cunx byy je. Byy liongrjaw pacsngr, jiac lau byy langg tangx uaxkyr.”

“Pacsngr qamxx dyrr e tangx jiauww sowguan?” Sowluw :a cinwciyr. “Guaw hiaxee qoviauw qapp iviauxjew, inx juann qer qaxx jit quaw liongxqongx angx. Beh cincniu inx siongsiongg qapp inx qaqi ee angsair decc krir-srinx-lrow-mia, guaw siuw qosinx, qriuu jit xee cingkyr, qamxx byy kacc ngiaa :inx?” Sowluw :a lixlo gauu vaii, qongw kiw vutjiw aw u quanced. Jyr laurbuw :ee trow jit xee kuir jiamrcniaw junw .quer.

Diongdaur jiac muee, amr dxngr, jit der caiwtauquew, Sowluw :a qra ced jyr dngliaux :ee, camx quaw suanxaxvec qapp dangqox juw quexaxtngx. A’buw jin’ qra jaboxqniaw pangdniuu, viw jingxtaubuxqongx ylyw birsi, nguaw dni qaur nguaw kangx, longxqiong kacc benw jap hunjingx.

“Jnir :ee kacc syr. Juw cringx tngx kacc hyw tunx.” Sowluw :a qongw, nguaw-drew :ee jyr jit cuir.

Byy cincniu Daivag, cur kiw qaxx bat siamxsiamw, be tauxkir, erqangw soxjai kacc kuackngr, zit lyc srinx liauw benw kuix lingxkir, ursii lenrr hongsnir iarr tangx hiyctiamw benw pangw. Bangw-aw u kacc qau. Bangxaxdingx cactauu cah .lyc, viak viak viak, d.-dngdew-d. u bangw-aw laii hur siw.

Vaiwlak lensiogqiok byy jyr, veh diamw kir kunr sniu’ jaw, vangqingx marr iauxx utzuac. Cuwvnix a’Qiaux Ii :a syy quewqex laii lenrsenx, ciuw giac jit qix jiauxmngsnir naxx et. Knuar diyc snisenbin, a’Qiaux Ii :a bagjiux l.-liuciux-c., dingw quanx xe tamr, dairsuwqix decc jinn.

“Jex guanw jaboxqniaw lar, jinw dirr Daivag decc yc juxjiac.” Jyr laurbuw :ee nng qxur ue junw .quer. Ervuer qra dingxvuer qiywcuir, Sowluw :a jiawgenn beh kir qaw daurlingx. Nng xee lau dangsai dirr hordingrkax paclax.

“Qewangx :ar bue?”

“Iauxx bue lehh.”

“Qamxx jyr .langg :ar?”

“Marr byy.”

“Guanw jit xee jiongdongg siyxdi, qurnii dna’aw siw bow. Inx snax xee ginxaw longxx uansingg :ar. Linw jaboxqniaw qer .kir, jyr ven laurbuw, kax dax ciuw dax.”

“Quiw huer langg?”

“Kacc limw lak-jap.”

“Jiacc je huer!”

“Beh nacc e lar? Javolangg, go-jap iauxx jinx dangg.”

“Cax zi-jap gua huer. Lau angx jniw vyy, nacc hyw?”

“Acc narr sir-jap tongw :ee lehh? Linw jaboxqniaw u cuwbi kir qapp langg’ duiwknuar .jit .xe bor? Guanw jaboxsunx inx qokhau-aw ee laursux jin' dairduan, gensuu qycc dew, jit vo kiccuir kacc byy jaboxlang’enn. Qongqax :ee, liw dyrr jaix, jiac-kunr unw.”

Hordingrkax ee qongxue-sniax pow pow aw tuann laii qaur jauwkax. Daurlingpyh qy qaxx qui’ siangx ciuw, Sowluw :a siangx vingg hnirkangx cringx ~ ~, lxingg ~ ~.

(SNAX)

“Pu’iongg daurhu, go dyh :ee. Moqox losunw craw, snax dyh :ee.” Dirr jauwqingx, zirciuw sxaix Sowkingx huah qinw qinw. Rinr sniax si, Sowluw :a jit ciuw jit vnuaa, caiwcud pangg lehh jauw, jit biyxjingx dy’ m qnaw tuasuax.

Sensniniuu langg qankow, sintew kiamwanx, Sowbinw qniazit siuw siauwquirdyh dingxter. Langkeh juwbunn cair jurdew si zi-sujew Sowbinw ee kangkuer, Sowluw :a jitquw rair draur ingwjiab, jit quaw lancuir sittauu, sumue Sowlann diyhh kiyh kir jyr. Jniawvingg dyh beh qycc air dee, dywvingg dyh beh tyw jit der dauriudic-aw. Amjamx ee jiahvngrdyh siux iauxx bue li, langkeh iurqycc rig .zip .laii. Cingkir nguaxdi jit xui cai jit hur, qnuaw huwhur longr puar jit der nguaw, duarbuw sniax “kiangx” jit xe, lenrr jongxpor dy’ an’ jauwkax jauw cud laii knuar.

Langkecqnuax jiac qaxx dng’ jubuix, sauwciuw qapp vunwdauw m hyw cutdong, ing’iax si jin’ sitlew. Sowluw :a qinxmew sax jit der nguaxped uaw .kir, kuu lyc srinx, tokax nguaxpuer jit der aw jit der kiyh kiw. Vutviw sauwsex, ciuxqud bah jyr :ee, quah .diyc si e diyhsiongx lrauu huih, qyckacc anwjnuaw qinw ciuw marr iuxhan. Jiacc bruw suah, jauwkax hitt vingg huah cud cair, cantniax jitt vingg beh diah cair.

“Angcor vaiqutsox? Linw kuix sowcaiwquanw, caiwdnuax dingxquann tacc u cyx :ee?” Javox langkecqnuax mng.

“Liw u qraur songg ne!” jabow langkecqnuax cniuw lecc rinr. “Langg’ inx pinxliau guanjai iong sor :ee, jingcax qongxx jiac diyc cuiwbuew u bah-bi hro liw quewgenr.”

“Hner lar. Penr cuir penr cuir narnia.” Sowluw :a tnijur.

“Acc m dyrr qexvauu :ee byy jue?” javolangg giaksiag. “Lanw narr hingr baclo, tauqaur kacc uaw cialo jit qingx vaiqutvng dng’ cutmiaa, iarr suacc diyhh laii jiax jiac hongw :ee?”

“Langg’ inx kuix cantniax, diamwkeh samvutdingw. U langg laii beh jiac qenrkongx :ee, uree si omidohut m satsingx :ee, nguarcuir jiac simsig aw jiamr siongrqaiww je iarquxqnaw.”

Habsenx pah laliangg .jit .kunr, vng iarr diyhh sap. Jiauvaicair sox daurhu diamw dairsingx; suar .lyc, craw jit xee vnuawtnisunw qapp snax-vxuex dangqox puewqah; Iucangquew qapp oquew qeww diamw jit hxun; vng vnuar nguaw dyrr u :ar; itbueciuw, sui’ langg jit xee angdau-hunxquew jiac dnix dnix.

“Beh air simxmih tngx?” Sowluw :a mng.

“Linw dyrr u beh'axdee ho’ngg limx. Tngx benw.” Jaboxqnuax juxir dniardiyc, menu hingg Sowluw :a.

Liaurliw rair liauw sii, siyxcair dyrr ven ven benw dniudanw. Vng drew .laii, imwsni-aw koxquex qapp caiwtaulongx, nng siyw vnuaa singx cud singx diriaux.

“Langkeh, lairdew jre.”

Cantniax buanxuann, jurdongrmngg kuix .kuix, Sowbinw jiauwguann kiw langg kiw kxeh, hunx hunx aw diuduu dy’ byy. Qui’ amr, guardniuu nng langg jongg cud jongg zip, dirr jauwqingx-kauw siy’ siamw srinx ee sii sud bak cud amr qiwhy benw uersueh.

“Iap Huwliw? Lanw qamxx si Iap Sowluw Huwliw?”

Siyxkuaw driau .kir, Sowluw :a ee simqnuax vorvinn ciak .jit .xe. Jit xee sir~go dxangx jingg jiabjiap e tniax diyc ee hamtauu, jitt diap iurqycc ho’ngg hiamr kiw. Beh uat tauu siy’ zin bor, hamtauu ee juxlangg u digii.

“Qycc jniasit si liw dyrr driyc! Guaw jiacc decc sniu qongxx, qamxx e qaqi puw bak knuar dna .kir.”Jrngx kiw vutsiongg diaudad, laii jiarr qongw diyc jiokk cingwingw. Zutauu-samwquer, Sowluw :a sniu jinr sniu trer, ciywiongg qex jin’ nawnngx.

“Linw u sigsai?” Sowbinw uaw .laii, jiokk hnowhenn ee kuanw.

“Guanw jaxjingg dirr qangg jit qingx vngrdiamr jiac taulo.” Sowluw :a qnuaxqinw inwdab.

“Guaw dingw nii aw ngua kir vadd qingx :ar.” Laii jiarr voxtnix jit qxur.

Jauwqingx iurqycc rair kaciuw cud cair. Sowluw :a bin iux iux, beh kir iarr m did, m kir iarr m did. Sowbinw knuar cud cud, qongw langkeh beh ter ix jiauhox, hitt vingg sittauu kacc iauwqinw.

“Jin' pnaixser, gaw liammix dngw .laii.” Sowluw :a duiww qowqaux qongw.

“Byy ingg jyww liw. Guaw byy decc qnuaxqinw.”

Sowluw :a qycjaiww hue sitlew liauw dyrr qniaa duiww jauwqingx .kir. Derr sir dyh :ee laii beh qetsiaur. Sowbinw qewsngwqix cic cic lehh, jnii qinw jau jau hro :langg, muaw vxag ee gibun soksog hiongr Sowluw :a ee qowqaux mng kiw.

“Guaw qapp ix vnevnee jyr huwliw, ix hnua jauwkangx, guaw quanw langkecvangg. U jit amr ix diyhmii, inx cur nirr dngdoo :ee kar laii decc cue, qongxx inx laurbuw diongwhongx zibngi. Ix vnuar mii snax qnxix vniar lyc kir Dailamm, jurr anxnix byy qycc dngw laii siongrvanx.”

“Si anwjnuaw lehh?” Sowbinw qinw qycc mng.

“Qongxx si qniax kanwho dnaxjah byy jiujir, iarr diyhh qaqi kir qowvne jiacc e diamw diamw qimx.”

“Ix qycc jiacc iuxhaur or.”

“Hner m :ee. Hitt jun, qongsix jiacc anwsngr beh sringx ix jyr qingliw qongxx.”

“Jniasit :ee or! Bycaiw.”

“Dyrr si anxnix m si sniaw? Si qongxx, qokk langg ee jiwhiongr beh anwjnuaw vixjiw? Langg’ ix jitmaw cud laii kuix cantniax byy laksuix. Jyr langg’ sinlyy diyhh vah hxang tunlunw. Jyr tauqex, kaerlangg jairr ix cepair.”

“Jitt qingx cantniax suacc si ix kuix :ee?” Sowbinw dner cinwciyr. “Ix laii jiax yc juw sowsit, sai’axqangx diyhh an’ jauxdyh qapp sew nguaxvnuaa jyr kiw.”

“Hnaa! Si urngiaw iacc byy? Ix anxnix druar e diauu?”

"Iarr jaix?" Sowbinw rinr diyc byy ir byy ir, jniqui ee juaxpiyr kingg kingg kiyh kiyh lehh, go-vah :ee jit jriw, jit vah :ee jit jriw. Jit-cingx :ee ing’amr iurqycc siongrr duarkovew, jongxgiac viw go-vah :ee kacc diongg beh snax vxue je.

“Zi-sujew, guaw hitt xee ving’iuw lehh?” Sxid dna’aw diauliw suah, Sowluw :a laii decc hyxlew aw mng.

“Jauw :ar.” Sowbinw rinr, tauu ngar ngar decc vnuasiaur.

“Jauw :ar! Ix qamxx u qiawue beh hro :guaw?”

“Byy lehh,” Sowbinw guanguann tauu cih cih. “Ix u lauu jit dniux miatiab dirr guaw jiax dyrr urngiaw.”

Sowluw :a qinw qra sujew jiyh penwhongg laii knuar, penwhongg ee juxlangg an’ snax qix tngsii ee vngrdiamr tiaur kir qaur go qix tngsii :ee, dui’ huwliw liongr qaur qingliw.

“Lun jinx, vngrdiamr marr sngr qapp lanw jyr qangg dxoo :ee. Byy dniardiyc ix jitt jua si laii decc tamr lorquanx. Liw diyhh kacc qongganw lehh, m hyw hro viah .kir.” Sujew diamxdnaw sumue byy hyw sniasaur.

Derr zi dyh ee siyjiuxtnuax limx suah, vecdiamxdongr ee lensiogqiok marr duxhyw jyr suah. Tanr je tanr jiyw, ing’amr qaur jiax suah. Diauwzid’aw sngr diamxjingx :ee, sew nguaw sew dniaw, qaur-sii-qaur-kig, huah jauw dyrr jauw. Guardniuu kangkuer qaur jit xee kamxjam, Sowluw :a qapp Sowlann diyhh kir lairdniuu draur lamxbuew. Jauwhiac quer crid, hriax-aw, juisiac, nguaxdihdi, sui’ hxang aw kngr qui’ui.

“Dyrr u qra liw qaudair .quer, qongxx hitt cud vehcair qimjiamqox diyhh kanqnix jiacc tangx pangg .cud .kir. Liw tacc e qongw be tniax lehh?” Jongxpowsaix sraiw kia bak, kiw luiqongx-singwde. Zirciuw :ee Sowkingx qapp ix sna’ duiwhiongr, tauu qaux qaux, jit dingw vehsig ee quann by-aw iauxx dir dirr taukag-dingw.

“Bogquair langkeh bagtauu decc kiycqingw,” jongxpowsaix me iauxx byy qauwkuir. “Ing’amr ee bixqyx nuarhec ~, bixsimx iarr byy taur, hnauc hnauc. Beh narr cuir tuann cuir hongsniax .cud .kir, qongw lanw cantniax lenrr judbixqyx dy’ cringr be hyxser, hex m ciywkuex qaxx.”

“Jitt jann marr berdangr juann jiauu quair guaw. Langsngg lauxjaux, kaciuw qycc byy qraur.” Sowkingx sraiw ue duw. Jongxpowsaix bagjiux cnex ginwginr, amrqunw kanx angg qinx, qaxnaxx qiongbeh viag dng.

“Langsngg qu bongxx qu, guaw si qra knuar jyr naxx dinvyw. Liw jitt jam aw qaxnaxx u kacc tiamxtauu, lairdniuu ee sittauu marr sidjai gnerdauw. Kacc danw, guaw e qra sxaix :ee kar denrue qongw sewsiongg. Binaxjair kiw, liw qapp Sowbinw siy’ ngua qangx. Dniaxenlyx diyc ix laii bak, langg laii kxeh kir jiacc hro liw kir anwnai.” Jongxpor qongw suah, uisuqunn vrag .lyc .laii cud .kir. Kacc quer, guartauu u javox qapp jabow ee qongxue-sniax hihihuarhua, dibuxdidangx.

Quewhunho lyc jit tingg, tnix iuguann ap ap, beh brang jit xee valangx iauxx jin’ u tangx danw. Juxqag jauw jit xee kir, jit xee iauxx dirr hiwdaii-dingw. Sowluw :a qapp Sowlann dirr vniqag kia, qui’ cud hxir tauu knuar qaur buew.

“Iong taux jiac vo :ee, byy gauu lar. Diksii byy sitsii quw. Guaw jiacc laii knuar ix kacngx dangsii beh hro bingg .qyx knuar .qnir.” Sowkingx naxx decc kuanw qesitauu, cuir nirr kauhkauc liam.

“Dua-sujew, liw si decc qongw si’angw?” Sowlann mng.

“Suhniax kir duer diyc Sowbinw, jex linw knuar be cud .laii?” Sowkingx dyww mng nng xee sumue.

“Tacc u kyxlingg?" Sowlann dua qniax siyw quair. "Bunbingg suhniax inx ang’axbow qamxjingg jiokk hyw!” 

Sowkingx “hngc” jit sniax, byy cuwbi qycc qapp ix dapcuiwqow.

“Dua-sujew, qewdnuax u qaiw .quer, jitt hxun si siongrr sinx :ee." Sowluw :a siangx ciuw tingsiong. 

“Benw hro :guaw," Sowkingx qra iyy ciu. "Cantniax beh cud simxmih cair, qewqeh beh qe beh quann, aurquer, jiaxee longxx ham' guaw byy dirdai.”

“Liw byy beh qycc laii siddngg draur siongvangx?” Sowluw :a sewzi aw mng.

“Qanghux dy’ be genr yc :ar, qycc laii jyr jitt hy byy-jnii-qangx beh siw?” Sowkingx rinr.

“Sniaw? Liw lenrr yhdngg dy’ beh hongwkir?” Sowluw :a bagjiux ngii linlinx.

“Qanghux yc be jiaujngg, vnuar-tangw-sxaix cud siarhue cunvan beh jiac qxox?”

“Liw si qongxx, sxaix :ee e qra lanw kngr vo?” Sowluw :a qycjaiww mng.

“Qamxx e? Ingqaix si be lar hnoh?” Sowlann mng qaxx jiokk cnijinx.

“Beh narr u langg su'ngx-su'iab qanda' qor qaqi beh qinw did diyc jintuann, sraiw qxuiw long juaa qiyr sxaix :ee qanghux mair jinrvong vniar hro :lanw, hex dyrr pnaiw qongw :ar.” Sowkingx dab.

“Dua-sujew, liw qamxx be huanlyw liauw quewquar .kir? Sxaix :ee sewbin knuar hiacc je, simtauu vitdnia u juxgnow.” Sowluw :a qongw.

“Dyrr driyc m.” Sowlann janwcuir.

“Tniax qongxx sxaix :ee qapp langg' u dngdew, dagg guehzit longxx decc ziog jnii.” Sowkingx unn unn aw qongw kiw.

“Hnaa! Jniasit iacc qew :ee? Lanw qamxx e hro ix tualui .diyc?” Bin-aw liab liab, Sowlann mng.

“E qniax :ee sui’ langg diyhh siamw vnix:a kir, suacc berhiauw?” Sowkingx crinr crinr aw qongw.

Qecviah qingx kuix qamxaxdiamr, zxic-sir siyxsii byy hiyh, qui’ nii tangr tnix :ee. Duiwbin jit qingx bre caixqngr :ee, veh diamw aw quer dyrr cnriu diamwtangvangx. Rimokong cic .jit .xe, ticqngxmngg unn unn aw decc qangr .lyc .laii. Qui’ qnua syxsii qaux hro Sowluw :a, id genn vnuar suu dy’ byy, Sowkingx uat tauu jyww ix jauw.

(SIR)

Ho sab sab, tokax buerjingrr damm iurqycc cud zit. Quer cialo quer, ding’axkax qui’ jua quanwcuanr. Jiahtaulorlangg jap-zi diamw quer cud laii jiac daur, benw qniax zit pak iacc ho lramm.

Jit dxangx jingg ter langg' pah tni’ui, qongxqywdnuax duarbuw tac en’ lo vunx. Diyc qaur qaqi ee dxiamr beh kuix, danglyy byy qongr, hiwqow byy pah, dna' nijnii-kauw qad jit xee caiw, qycc si qecviah hipsiongwquanw diamwjuxlangg kir janwqingx ciaux diyc jit liap qu :ee tec laii jiyh .ix .ee.

“Iarr m si qomngg-dogci, sowcaiwquanw jitt kouii-aw iarr byy jiyxkueh. Kixsingx quiw qangx aw, damrvyc aw quac’inw iwsur ~, qamxx mrbenw?” Dode Itqyx :a u iwqenr.

“Dngg laujuiw kacc ngiaa jit qangw hongx. Lanw siddngg ser bongxx ser, singliw m si jyr dexvaiw :ee. Liaurliw qaccuir, qewsiaur sidjai, langkeh be kir qewqaur hex go kox jap kox lar.” Sowluw :a kaiqaiw, lixlo dngg.

Stainless ee dyh-bin dngqyhingg, dingxquann ee caiwsig jap gua jiongw jairr langg qingw. Cinwdang :ee, tongqiong zuarr je dangrsniax, vong’aw ee sowzi knuawqnir-q., horsiongx byy siy’ pnix. Kacc qac’ir jiac :ee tangx qex gneh .quaw. Beh singx cir jit xe aw kiwbi :ee, benw gneh sniu’ je, jit cog aw dyrr qauwgiac :ar.

“Linw iusoqiauw si bre liauw ar, iacc si qinaxzit byy jyr?” Jit xee jabow langkeh mng kia quirtauu ee Itmue :a.

“Duxx jiacc siux dngw jauwqingx .kir .ar.” Itmue :a dab.

“Vaiwtog liw kir tec .laii, hyw bor?”

“Beh congr sniaw?”

“Beh jiac a!”

“M hyw lar.” Itmue :a tauu iyy qaxx beh lag .kir. “Guanw sxaix :ee cxenx dinglingg bxan qaudair, qongxx caiwcud quer vnuar diamxjingx, bylun srin je srin jiyw, longxx diyhh siux siux .kiw .laii, m hyw qycc hro langkeh gneh.”

“Inmic enqor?”

“Ix qongw lingw .kir pnaiw jiac, hongsniax .cud .kir e pacpnaiw miasniax.”

Jiacc qongw suah narnia, jit cud kenwlow cauxqox sunw ho'ngg pangg .cud .laii, pangx qongwqongr, siyx tngwtngr. Jingwlangg bagjiux liammisii qimx qimx knuar, taukag dangjee uat hiongr cingwenx hitt xui.

“U sor ee hamu .byy?” Jit xee javox langkeh mng cud cair ee Itqyx :a.

“Byy lehh.” Itqyx :a rinr.

“Acc angsiyx-hii lehh, qamxx u?”

“Marr byy.”

“Linw tacc e dagg hxang byy lar?" langkeh pnaiw sniasaur. "Langg’ vadd qingx sowcaiwquanw, simxmih snuaqex haixhii :ee dy’ erhiauw jyr.”

“Guanw duiwdiong :ee si iaxcair vunxguann ee kauxbi, lenrr craw jit xee vuelingcair guanw dy’ jiokk qingsimx decc liaurliw. Mrbenw hiaxee hii hii bah bah :ee, laii sowcaiquanw iarr tangx jiac qaxx vitow kuix.” U singg decc liam juquax, Itqyx :a rinr qaxx jiokk sunrlauu.

Diamw vnuar, jauwhiahtauu ee huew jiacc huax, amwhunx diamxdinghuexiuw jinwjingg iurqycjaiww cnia’ngia, itdit qaur veh diamw, jit qangx ee sittauu jiacc sngr suah. An’ jauwqingx cud .laii, jongxpor-snxax iauxx cing lehh, Sowluw :a laii decc qapp Itmue :a diamxsiaur.

“Iacc si, lanw laii duarci quah quaw sor-qxex sor-bac’uann laii qah lecc bre knuar mai? U langg jit dxngr aw byy bacbi dyrr jiac be lyc.” Siauwbin byy qaiww suiw, Itmue :a sui’ u juxdniux.

“Lanw siddngg si beh qniaa jinjongx sowcaiw-bi :ee," Sowluw :a huanxvog. "Liw qongw :ee hitt quaw hiaxee, guaw longxx erhiauw jyr, qycc guaw diamriamm be cincniu inx he hiacc je.” 

“Lanw qiyr jyr brak :ee laii dingg cniaqig, qewsiaur dring kacc quann. Linw knuar sniaw kuanw?” Itqyx :a kangkuer bongx ingg laii draur cud iwqenr.

“Qaur hitt sii, singliw narr byy kixkuir, jonghongg ee jnii m dyrr qex kaix :ee?” Itmue :a qra duc qutpang.

“Singliw byy hitt hy unw tanr :ee. Qoxlanggenn, ‘Jit sii hongx sraiw jit sii pxangg’”. Itqyx :a vyc'ue.

“Sinx diamwbin, lanw singx qor jit xee tangx pacdit byy cimvunw dyrr hyw. Sowcair je langg jiac, e siqniaa .kiw .laii kacc iauwqinw.” Ad dairjir, Sowluw :a cud cuir. Nng xee dode-aw jurr anxnex diam .kir.

Caiwbuew-nguaxjnuaa, Itqyx :a qapp Itmue :a jin’ byy hingr, jiac gueh’aw ee Huad Syw :a dagg amr kiyh, bylun dax :ee iacc damm :ee. Vngrvau'ac jit kunr jah sir xee, Huad Syw :a singx kir vngrknax drew quaw cywbixvng, caiwsig sui’ xee aw qacpuer. Duarhanr haursnex qniax quxcair-bi, derr zi :ee dendyww kacc je dy’ sud .kir, jaboxqniaw kacc be qingw jiac, banx qniaw simxmih kuanw sunw-aw dy’ hingr ciccih.

“Inx jiac e quanwsir?” Sowluw :a mng.

“Dua sxaix :ee juw :ee, nacc u hitt hy jiac be quanwsir?” Huad Syw :a hyw cuiwhuex.

“Liw byy sunrsuar qra linw tauu:ee jah .jit .xe?”

“Sowsit ix jiac be hac lar,” Huad Syw :a hnair tauu. “Ix hitt xee langg, jit qangx aw byy iucyx dy’ be quewzit tihh.”

“Hro jiac knuar mai maar.”

“Benw lar. Cid lau veh duh :ar, yh qaiw.”

Ticqut’axsnix, kacc byy go ciyh quann, vnuawtangxhiax trngr .lyc .laii ngua jit siangx cinglin'ee, Huad Syw :a qapp Sowluw :a qongw jaiwhue, vngrvau'ac tinrdang siangx ciuw qnrua hit lehh hit lehh.

Itmue :a druar Qingxbuew, javox-ving’iuw dagg amr kiaa odobai laii qra jair, kacc amr dy’ m qniax guihiamw. Itqyx :a cur suer dirr siddngg ee aurviah hang, dagg qangx tangx kunr qaxx vaw binn. Trua sai'aw, jyr sxaix :ee dagg guehzit u hro inx soxhuir, kyxviw decc huad sinlyjnii.

Jurlenxciax hiyh dirr diamwkauw ee denrhuextiau-aw-vnix, jiaplenn Ingxhyy qapp Qongquanw ee Ingxhog Qiyy, vaiwid qaur vaiwgo, Sowluw :a jit qangx ongxhue nng jua juann kyr jitt jiah. Air beh qodnuaqingx u qaqi ee mngho, tywvangg-gxiac ee qong’uxcur, sniaa-lai :ee quir qaxx be bongx .did, Daivag Quan :ee kad kad aw iauxx suer e kiw. Benw juwceh ee pujaii kanx .jit .jiah, m qniax jikciax, benw danw qongciax, cuehongx hyzit be benw did kacc baixjaii. Amwsii kacc byy ciax, auxbann aw zi-jap hunjingx kiaa e qaur cur. Qimjaw cutmngg ee sii hionghiongg-huwhur, jit siangx etuax qra tad .kir, jit kax tanxkix, jit kax qatanxpag. Ehngx dngw .laii, cenxtuax ee juser guanguann jiauwqu.

Zip mngg, CD imhiongw singx hro cud sniax, jazz ee siyxcuex iacc piano longxx hyw, kacc be qui’ qingx jing jiaucjiauh. Tauu sew sew lehh, ciangg jit xe aw sinkux. Qacc si qodnuakia, cing kacc bacqangw byy qangai. Giac tauu knuar jit xe aw diauwjingx, jap-id diamw beh beh :ar. Mngkax damm damm iauxx bue tong’ jiauu dax. Jit ciuw iong binrvor naxx crid, jit ciuw naxx decc cic denrue.

“A’buw, liw decc kunr :ar?” Sowluw :a mng.

“Byy lar, denrsi knuar iauxx bue liauw lehh.” A’buw rinr.

“Dingw zit aw ee sinbunn decc bre qongxx, Vatvyxsanw u iyhdok, angngex-aw jiac je, duiww sintew u vairhai.”

“Beh u tangx zuarr je? Hex si jit~vnuar vaiw aw penr be diam jiacc qra cri .jit .cuir .aw narnia.”

“Iur ngex-aw mia cer cer. Lanw juewbirsi vangr hro ix kaur, marr kacc ngiaa qra dok sangr zip kir ix vakdoxdew.”

“Guaw longxx pniax pniax hniwsag :ar,” a’buw qongw. “Linw siyxdi marr jnia’ qau ue, qycc juanqangx kar dngdoo :ee kir qra liw dauu.”

“Liw m hyw luanrsuw sniu lar,” Sowluw :a ter siyxdi-aw vuexhue. “Ix jitt vrangx si decc mng guaw derqewsuer ee dairjir, uertauu kanx kir ginxaw vyr cutsir, ix cuir drang cuir qongw kiw :ee.”

“Cuiwkiw tniar, Gorhunjux; vakdow tniar, Jingloruann, byy dyrr Banrqim’iuu truix truix lehh. Jiaxee venrtywiyc guanw jurr ginxaw-sii iong qaur lau, ix suacc hiamm lanw m bad zri qiamx byy uersingx. Jniawqangw hrunx-dee-tnuar ngua pnxi-tamm-nxua. U jaidiau, ngex :a inx m dyrr cniar lingbyw riyx, kacc benw lik siw guaw jitt xee lau :ee.” A’buw lenjupaur jit dua qnrua. 

Denrue qongw suah, Sowluw :a ciuxjingxtauu nng~snax bak be lingkiaur, ciuxqud liyc aw dinxdang diyc, ciuxlunn qniqniqnuairqnuai. Qniaa kir igqingx-aw, kixvuex drew quaw juiw, kixbinw qyy quaw kixqyx, kinx lat decc lur cuiwkiw, Sowluw aw jit duir bagjiux qapp qniar-lai ee jurqiw diauduir.

Byy-drang-byy-diyc, vinwvnix iurqycc vuh quixnarr qix vec taujangx .cud .laii. Jitt jam aw sew tauu, taumngsix-aw jit cog jit cog decc lag, jiokk qniax e liuwhiac, qnir diyc vec :ee m qnaw qycc l.-lamrsamw-s. banw. E qir did jyr ginxaw ee sii, haghau ee aurviacmngg duiwbin u jit qingx diamwtauu juandoo decc bre vor-ang’aw. Qenwnarr qniaa quer hiax, Sowluw :a dy’ e tingkax. Qenwvunwduu lairdew ee olinggio vnii dua senx, jingcax taumox u ox :ee, angg :ee, ladjiw-sig :ee dingxdingw. Sowluw :a knuar qimsix :ee siongrr suiw.

Kia qui’ zit, jyr qui’ zit, qingqactauu gnerjnia ~, iyqud sngnngxtniar. Salongpas iyhvor dah .jit .der, jiamrsii ee tiautiongr kacc qniu byy. Tniqngbauw, jingwtauu vau’unw e qycc laii siy’ cue be kiamwsik.

Vreh jnriu dogsuircngg, cic denrtauu qra denrhuew qimr huax, taukag jiacc jximw lyc jximw, u denrue laii, oamr diongx, kyxviw vunlee hiacc dua sniax, dyctaudingx qinxmew qycc qra jun .kuix.

“Sowluw Jew, guaw Sowlann lar.”

“Sowlann? Sowlann!” Sowluw :a huah cud sniax, kunwsinn jauw liauw liauw. “Liw tacc jai’ngiaw kar laii jiax?”

“Liw sidjai pnaiw cue dy’ driyc,” Sowlann rinr. “Liw ngua ciuxqix-aw, iarr byy qra guanw qongw .jit .sniax. Qajair, linw erqangw ee denrue guaw iauxx lauu lehh, u der tangx mng.”

Sigsai ee snia’imx qaxjiar denrue tuann zip kir Sowluw :a ee hnirkangx. Siongrr buew aw vaiw ee qiwdii dirr jit dxangx jingg, Sowluw :a ciuw qnrua dua kax hingliw nng qnia, Sowlann sangr ix qaur ciajam.

“U ingg diyhh kacc jiap dngw .laii.”

“Zuarr jiap? Tranr Sowkingx ee ngiu, dagg lexvair laii, hyw bor?”

“Ix si laii beh jiyx vyxhiamw :ee, byy qangg a!”

Qanghux yc bue muaxvnuaa, snax dxangx druar bue buanxan, hagjux lap .kir junxduxhyw, Sowluw :a qra sxaix :ee vaiwvet, cunx :ee, siy’ srii byy it’id.

“Rmuaa jiarr rmuaa vutsig. Qinw qongw, liw jitquw u quiw xee sumue tangx ceqah?” Sowluw :a mng, vnuar sngxciyr.

“Jit xee dy’ byy,” Sowlann rinr. “Sxaix :ee qui’ vnuar dxangx byy kanx sai’aw :ar.”

“Si or? Acc cantniax hitt vingg lehh?”

“Siux .kiw .laii .ar.”

“Tacc e anxnix? Dua suhniax lehh?”

“Ix qapp sxaix :ee tiacqow :ar.”

“Tiacqow?! Dode byy siux, cantniax byy jyr, sing’uahqer dng liauw liauw, inx snax dxngr beh anwjnuaw dro?”

“Kyr vaux vngrvaux a!” Sowlann qongw. “Langg’ inx lensyxdiamr kuix qaxx viangwviangr qiyr. Dingw guehzit dirr dangkux sinx kuix jit qingx, au jit qingx diamwbin jarhngx marr qapp langg' padnia :ar, dirr Ingxhyy, sxaix :ee beh hro guaw kir jyr diamwjuw.”

Naxx cincniu decc knuar jit cud ngiaxhir, jit qxingw ngua quer jit qxingw qinw sucsuh, hai Sowluw :a huanxingr mrdiyhdid. Sinn sinn :a, u tniax diyc Sowbinw ee miaa, simxmih Tosniaa kuix jit qingx, dyc’ui marr jit qingx. Qycc sxaix :ee inx qaqi quiw qingx duw quiw qingx, longxx dirr Daivag Ci.

“Liw jaix bor? Lenrr Sowkingx dy’ sniu beh dywhuanx qycc dngw laii jyr jitt dxoo.” Sowlann qongw.

“Urngiaw or!”

“Hner a,” Sowlann qongw. “Diamwbin qra lanw dniuqeh hyw hyw, jyliau, puewtauu, vec juaw ox zri siaw qaxx bingg duw bingg. Beh cniar lau :ee, iur :ee, lxamm :ee iacc luw :ee, qeww lanw qaqi juxquad. Muixx guehzit, sxaix :ee tiuhunx qowding. Tanr je tanr jiyw, jairr langg ee vunxdingw.”

“Liw ee iwsur si qongxx, dagg qingx diamwtauu liaurliw sixquad, berdangr qaqi venwkuanw?”

“Hex snesingg :ee nor!” Sowlann sui' dab. “Qongw jit qxur kacc tywdit :ee. Sxaix :ee sxor jap dxangx ee qanghux cinwcaiw marr kacc ngiaa lanw jitt hy vnuawtangxsaix. Liw narr u simhiongr beh jyr knuar mai, guaw tangx ter liw kir suecjingg. Sxaix :ee jitt jam aw dagg qangx dy’ ciyr tauu ciyr bin.”

Quw quw aw jit tongx denrue, jit tongx denrue qongw quw quw. Qycjaiww dyw lyc kir bincngg, jitt vaiw, jit tac simsu deh dirr simtauu, jabmoc, jauluan, simqnuax be dikdnia. Qim’ia ee mii dngg lyxlyw.

(GO)

Qaviquanw ee tang’axmngg draur ox vylee, an' guarbin knuar lairdew si ox miwmar. Jre dirr lairbin :ee knuar hiongr gua, quewlorlangg qui’ senx sikdir jauxjuac, hingtew qapp binrtew dyrr knuawqnir-q. Hro langg' haurdanw jin’ sitlew, hyhongr jitt huee si qaqi kar denrue iog langg cud laii qongxue. Ioksog sir diamw limx ervodee, Sowluw :a snax diamw vnuar kacc qex dyrr qauwui :ar. Diavag Ingxkongx Qrex ee hang-aw-lai, cing’iux, hyw cue, dee qapp qavix longxx u bre.

Siauwlenlangg qihux qngqut, gu’axkor qapp T-SHIRT longx lehh dyrr jin' pna. Siyxkuaw u huer ee jaboxlangg dy’ byy hiacc hyw kangx, qeqiamw iarr diyhh quaw jihunw zia'iamw qapp jongtna. Cuiwdunn huee quaw enjix, jit sxux cenxgiogsig ee ngiuhogjongx, sidiuu :ee, tauu jit vaiw beh cing cutmngg. Qurnii dirr vachuer-qongsix cir cing ee sii iaxx jin’ hahsinx, jinw suacc liyc liyc aw diaur diaur, sivutsii diyhh jiax giuw .jit .xe, hiax kiuw .jit .xe.

Simqnuax ciak ciak diyy. Hitt xee langg liammisii dyrr beh qaur.

Qokhau-aw id nii qaur lak nii ee dongcongx, sringx kir qaur qokdiongx, Sowluw :a qapp ix qycc qangg jit vanx. Jit hagqii tak iauxx byy jidvnuar, ix hro laurve sangr kir Bixqog jyr siyw liuhagsingx. Sowluw :a bad uirr ix amr amr aw lrauu bagsaiw .quer. Hnuaw .jit .xe, zi-jap dxangx quer :ar.

Dingw dingw guehzit ee dongconghue, jin’ byy gii, ix suacc laii cuthen. Dag’ee horsiongx duiwngua bingpenr. Sowluw :a jurr cutgiap dyrr diwsimx dirr jiahsit jitt dxoo. Ix dngw laii Daiuann kacc byy jitt nii, jitt quw dirr jit qingx cutvanxsia qriuu huatdenw, langlangg qiyr ix Hugo.

“Sitlew, ciax cue byy xui hyw tingg kir didong .diyc.” Laii jiarr buerjingrbue singx vuexhue. Dimwcniw ee sejongkor, dingxbin-snax vec lecseh, dywvingg hxingx-jingg jit qix siyw horsnuar ee sikjuiw druu jairgua.

“Liw qinrsirbak?” Sowluw :a mng, qiw duiwhongx ee bagqniar.

“Lens jarhngx duxhyw byy :ar, iauxx bue kir brew.” Hugo inwue qycc quaww nih bak. Henrhen qapp ix dy’ qangg nii, jidsidig, Sowluw :a suacc qamxqag qaqi viw ix kacc je huer je, qaxnaxx ix ee duarjew.

Ser der ngii dyh dingxbin cai nng vxuex qavix, uerdee beh kanx qex jiokk jurjai. Qongxx espresso kyxviw wuiski, si javolangg ee imxliau. Qycc qongxx, latte bersux quexjixjiuw, dnix butbud, qavix-bi kacc jniaw, vixqauwdig, jaboxlangg kacc e air limx.

“Guaw hyw cincniu dirr Quanx Lyxiaa binrjingg decc lang duardyx.” Ue jiauu sraiw .cud .kir .ar, Hugo liamdongsii dac dongxaw.

“Byngiaw, byngiaw!” Sowluw :a iyy ciuw. “Guaw si vnir jiac :ee erhiauw narnia. Jiuw iacc qavix jiaxee, guaw jiokk guarhangg.”

Dramm kiw diyc cuiwjiahmic, Hugo qyckacc e qongw. An’ Bixqog ee hanwvauu la kiw, ketciapu qapp ciz ix kiokk jiac e hahvii, vutsii iarr e siauwliam diyc siyx quacvaux ee jubi.

“Dirr Bixqog tagceh ee sii, jid’err sniu diyc qauh dirr hitt lairbin ee vnuawjniabah, qiamcair qapp todaurhux, cuiwnua dy’ qiongbeh sue .lyc .laii.”

Tniax diyc decc kiw air ciyr, jitt xee sidiamw, Sowluw :a huanxdngw qamxqag viw ix kacc jiyw huer, bersux ix ee siyxmue-aw.

“Dingw zit aw guaw u qapp dongsu kir linw siddngg jiac daur.” Hugo tee kiw, byy-drang-byy-diyc.

“Dangsii ee dairjir? Liw beh laii iarr byy singx dihue, guaw tangx qex cuann quaw cair qongxx!” Sowluw :a iarr krir iarr hnuahiw.

“Qacc si beh kir qra liw caixdiamw, snesingg diyhh pah liw byy gii. Narr sursenx vywjaix dy’ byy junxsngr :ar.”

Hugo qongw diyc lahix ~. Sowluw :a tniax jit xe simx qniax qniax, kaciuxbah liyc liyc aw e cuah. “Guaw diyc quiw hunx?”, jitt qxur qewqiong marr jiacc sir zri, Sowluw :a m qnaw mng kiw.

“Hitt zit an’ linw siddngg jiac vaw vaw dngw qongsix, u decc sniu qongxx, au jua diyhh jiyx qyckacc je langg laii kir.”

Javolangg ee ylyw byy bingg qongw, si qanwjiapdig :ee, Sowluw :a iauxx kacc hnuahiw, ciywsinn bingg ~ ~.

“Hyw jiac pnaiw jiac jairr langg cuiwlo. Sowcair duiww lanw kenrkongx u voxsow, jitt hongbin e kamx did giamrjingr. Lanw jit quaw juxqor longxx jiokk hyw kxeh, jiac hyw qycc e draur siy’ vyr. Kacc sux dyrr diamwbin ec bicbih, qycc m si dirr jiahci ee soxjai, qyckacc vniar sniwmia, jit qangx tangx jyr ee singliw jin' iuxhan.”

“Liw pacsngr qycc kuix jit qingx?”

“Guaw simqnuax iauxx byy hiacc dua lar,” Sowluw :a bunxciyr. “Sinx singliw, qor jit xe be cimx vunw dyrr omidohut :ar. Dxiamr nirr ee siauwlenn :ee si u decc diucig inr ceh, knuar iong jitt vo si m si sag kacc e qniaa.”

“Liw beh rair guanw ter liw cutvanw ceh?”

Hugo jit sniax qongw puar. Sowluw :a marr sui’ qra dimr tauu.

“Guanw sunzenn jit xee simx beh qapp langg' qet’enn. Ceh narr bre u jnii, lirsunn jiauu qruix linw, guanw jit qakginn dy’ byy beh tec.” Sowluw :a qongw kiw iong’iongg dik’ir, hongg ciakciag. Jing jing tniax :ee cuir qig uaix jit vingg, simsu muaw vxag ee kuanxser.

“Qar juxjiac ee ceh trad dyw qrex. Linw ee beh anwjnuaw qapp langg’ vniciuxbuew?”

“Kyr ceh vunxsinx ee lairiongg a! Jongw byy, diyhh laii qig guarpuee, qewsiaur dring hro quir quir tangx laii snriaa hitt hy jinjukeh?” Sowluw :a sniabuew qnaa pikir.

“Liw honghuew ban aw si dyc,” Hugo qinw beh pah huew. “Dniurmw :a qingw luxsair, lairjaii qapp guarjaii longxx diyh’air. Ceh si lanw jiax decc je. Daiuann-bi ee sowcair, dirr qokgua, cirdniuu iauxx bue dua kaidenw.”

Buxbak sax longxx byy, Sowluw :a bagtauu kiycqingw. 

Hauu .jit .xe danw byy inwsniax, Hugo siongsiok qaqi ee uerbuew. “Guaw laii qra liw ee duwjog duiwik jyr Ingbunn. Bydnia dokpni :ee kacc u bagsig, benw zuarr quw dyrr siqniaa .kiw .laii.”

“Acc jairtauu ee vanxvunw lehh? Vniar hetqak byy beh cab?” Sowluw :a mng, jiokk iauwqinw.

“Liw tacc e jiacc diaudit?” Hugo qra suanciyr. “Guarqokbunn :ee narr hyw ci u siaulo, lanw jiacc dngw laii sag jairderue :ee. Guarsiaux juanw lairsiaux, liw ee ceh venr duarsikhuer, sii qaur, inr be hur dy’ e or!” Hugo rue jit xee dua vniaw. 

Sowluw :a tniax liauw u dongrsimx, mng ix cocox beh jnuaxngiu jinwhuad.

“Qinw pangw byy hyw sxex. Qacc u pyrdnia simjir, lanw sniu hro jimjiog, unn aw diuvi. Liw singx siaw jit xee qewigsux, siaw hyw EMAIL hro :guaw. Guaw tangx tec laii qapp guanw tauqex sionggi.”

“Imeilu? Liw si qongxx, iong denrnauw qiar puex or?” Sowluw :a iurqycc decc lig bagbaii.

“Hner a. Liw cur nirr qamxx byy bangrlo?”

“Byy.” Sowluw :a pnaixser ~, taux qaux qaux.

“Acc denrnauw lehh, qamxx u hag?” Hugo suar lyc mng. 

Sowluw :a cuir bih bih, byy rinr qaxx vnuar sniax, qoqo' hnair tauu.

“Qapp guanw cutvanxsia qaucamx, byy EMAIL jyr byy dairjir. Jitmaw kanx bangrlorsnuar dy’ iarr kuair kuair :a. Qinaxzit cingxdnuax kir, qecdngw qangx denrsinr-qongsix :ee suisii pair langg laii. Guaw u jit daii ciuw qnrua ee denrnauw, binaxjair iacc au .zit, guaw jiacc duar laii hro :liw.”

“Anxnix nacc hyw? Danw au lexvair hiyckunr, guaw jiacc laii denrnauw-ci-aw moh jit daii dngw .laii.”

“Guaw hitt daii, jitquw byy decc ing, quansiok vangr kngr dirr cur nirr ingg marr decc ingg. Qycjaiww qongw, lanw liongrjaw tongx denrjuxpuex, sui’ qiar sui’ qaur, longxx be kir drong .diyc. Guaw anxnix qex zuarr cingsimx, zuarr singw qangx lehh!”

“Acc m sngr qongxx, guaw jiyh liw ee denrnauw laii ing, huanxdngw si decc qra liw dauwsnaqang?” Sowluw :a qongw diyc kiw air ciyr.

“Hex dauwsnaqang je lor!” Hugo duiwcuir rinr. “Lii vngx viah, viah vngx lii. Guaw viw liw qex jiokk jongwiongw, viah niu guaw jyr, liw mair qapp guaw siy' jnex.”

Barqapsar, sianglangg qunxciyr qongw tentyc, iuxlaii iuxongw.

Cuir-iog aurzit-amr beh qra denrnauw sangr .kir, Sowluw :a qra jursow siaw hro Hugo, cur nirr denrnue iarr sunrsuar hro :ix. Ngiaa bew qycc suar tanr diyc bexloo. Qankow dairsingx, cuxkir, beh qnia’un :ar qnaxx si? Bus sraiw qaur jam lyc ciax, naxx qniaa, quax naxx hnaix. Jit diauu liuhingquax-aw, dingw zit aw qapp dxiamr nirr ee siauwlenqex kir KTV dna’aw yc :ee. Quasuu cniur be qa’nngg, kikdiau marr qaxnaxx lilixlaklag, Sowluw :a sen’ hnaix dy’ jitt diauu, byy vadd diauu.

“Sowluw :a, u ingg .byy? Dramm .jit .xe, hyw bor?”

Ho’ngg mng :ee dngdecc zimm syxsii, mng :ee kia dirr ix kajiah-au cuir-qnir-bak-qnir, jit sex naxx tnitiau.

“Dua-suhniax, liw laii danw zuarr quw :ar?”

Dua-suhniax qig hmc hmc byy inwue. Sowluw :a qra syxsii-qnua siux dngw puevaux-aw. Aurviah dongr uaw te'hnua u jit xee qonghngg-aw, Sowluw tegi kir hiax jre. Dua-suhniax siangx vingg qingqah giaa .jit .xee.

Zit hnaa ox, qonghngg-lai nng xee ginxaxqniaw hyw cincniu byy-langg-ee, qokk langg jit xui iauxx decc hnair kanciux. Ixliauu-aw jnia’ jap xui longxx byy langg jre. Siwkadingg-lai jit xee ciackax lyhanr gaa gaa jre dirr hiax, limx siyjiuxjuir ee kuanw. Inx cue jit xui li ix siongrr hng :ee jre .lyc .laii.

“Guaw qapp sxaix :ee tiacqow :ar, cantniax pah hro vadd langg decc jyr.” Iw nirr jre dniardiyc narnia, suhniax hequx be lunw did sraur.

“Dingw zit aw u tniax langg' decc qongw.” Sowluw :a sewzi aw dab.

“Tniax si’angw qongw :ee? Sowlann? Iacc si Sowbinw?”

Sowluw :a taukag ngar ngar byy qra rinr.

“Sowbinw qikhing, Sowlann querjiyx, hnirkangx kinx. Iaxx si liw bagtauu kiauw kacc lingbinw, jai’ngiaw diyhh qinw jauxtuad.”

“Liw anxnix vixlun duiww inx byy qongdy oox! Langg’ inx jitmaw ee singliw jiokk tanwjnii ne. Lensyxdiamr jit qingx suawjiab jit qingx decc kuix. Qongxx lenrr Sowkingx dy’ jiac huetauu cauw ar.”

Tniax Sowluw :a qongw suah, suhniax jit qxur girlun ee ue dy’ byy, dogdok “hngc” jit sniax, cuiwqag kiaur qo’ vingg.

Duiwbinr snax lxauu ee tang’axmngg kuix .kuix, jit xee hurzinlangg dua sniax huachiamr qiyr jiahvng. Vunxjniaa decc hnair kanciux ee ginxaw, tokax ee centuax cingx lehh, qauu-kax-qauu-ciuw piux .dngw .kir.

Suhniax hyw ir beh cniaw sumue jiac amwdngr. Sowluw :a trex qongxx qapp siauwlenn :ee cid diamw iog dirr siddngg, anwsngr naxx jiahvng naxx camsiongg dairjir.

“Qamxx m si qongxx linw longxjongw jiacc snax~sir xee decc jyr? Byy qanxdanx.”

“Cimxtauu quiw guehzit kakkag liauw jnii decc juer. Jitmaw laii, singliw dikqidiongx aw marr longxx pah e quer.”

“Sowcaiwquanw narr u he koxsimx decc ing’uii, jiauww Daiuann bagqimx ee cirbin, lunrliw longxx e dikli jiacc driyc.” Suhniax qongw, uergiw u buexsniax. 

Gignaiw hut .jit .xe vuh vuh .cud .laii, Sowluw :a jit simx beh qra cingxmng, siqanx byy liongrsing decc byy da’uaa.

“Guanw ee dxiamr kuix dirr Qongquanw. Suhniax narr byy kiwhiamm, binaxjair laii hro guanw cniaw, sunrsuar qra guanw kanqar .jit .xe.”

Kixtauu jit xee bin hrngx hrngx, itdit qaur jinw jiacc dngw ciyr. Suhniax qra sumue mng derjiw, ioksog vaiwsnax beh qycc siy’ qnir.

Beh hur au jit tnuax, qnuaw jit xe qinw, vingw kadyx hiamw uaiw .diyc. Lautuix sxor jap gximm vreh qaur der, mngsyw jiacc jun .kuix, ciuxqix-aw jitt sii laii dauwlauu.

“Sowluw Jew, lanw qamxx erdangr iog kacc jaw lehh? Guanw a’buw qiyr guaw ing’amr diyhh dngw .kir .jit .jua.” Itqyx :a denrnue qongw qaxx jiokk cnihiongx.

Dairjir jrig jrig jyr jit jam. Jitt sniax, snxax be hur ngua :ar. Cing qunn kadahciax pnaixser lab. Vniar kir hang-aw-kauw et jit daii qewdingg :ee, cuanw pnirpne, pnirpne cuanw.

“U huer :ar dyrr driyc. Be kamx did sniu’ quewtauu caux.”

Jre dirr qewdingciax-lai, Sowluw :a qapp unwjiangr dua :ee bongxx uersenx.

(LAK)

Pangquex-aw kunx hyw duiwvnuar puar, giac jit qix tngsii uih jiw jiacqycc iong dyx-aw ced, liauxau, jit jiux jit jiux diamr ngii linlinx ee quexjixvnuaa binrdingw vaii jit linr. Taubuew quiw hunjingx-aw, Sowluw :a jiauu cuxliw kiw jin’ quanwlen. Vingsniux lairbin iauxx u nng der donat, jarhng’amr Hugo jah .laii byy jiac .kir .ee, ing’amr jit langg jit der duxhyw cringx cringx driau.

Vaiwid-amr, Hugo qra denrnauw sangr .laii ee sii jap diamw tongw, langg knuar .kiw .laii sen daucdauc qongxx iauxx bue jiac amwvng. Sowluw :a qinw qra ix juw jit nguaw hniuqox-mirsnuar anx do. Qecdngw amr laii beh qar Sowluw :a anwjnuaw ing, ciuw nirr lringg jit ap donat jyr pnuarciuw qongxx si daplew.

“Jex vniaw-dxiamr brew :ee. Guaw byy liw hiacc kiangr, simxmih nguaxqysyy dy’ erhiauw qaqi jyr.”

Jiqulat kauxbi ee donat, dingxbin suah iabacsix, Sowluw :a jit ciuw damrsamw, jit ciuw srinn vniaxcuir, qniaa ngr langkeh hiax kir, knuar qnir diyc jit vnuaa pangquex-aw ee ngiqingr kicqag .kir. Hugo jre dirr denrnauw taujingg, ciuw decc dinxdang, cuir marr decc dinxdang. Liammisii, lenrr inwviyxqix iarr kixqangx a.

“Guaw bad knuar sinbunvyr siaw qongxx, iubak e uewsuer, juaw saixpunw ing marr rair qex cyr caa.” Sowluw :a cuir drang cuir qongw.

“E qor did junn, be qor did jai. Qaidongx inr :ee marr diyhh inr, kacc siycliyc aw ing dyrr si.” Hugo inwue.

“Guaw sidjai jiokk m jaix pangcaur. An’ liw hiax vehvec kiyh qui’ jxox qekir laii cur nirr, suacc hue hiaxee d.-dangsaix-s. :ee.”

“Qowsiuw derqiuu-singtair, tong’ sewqair dy’ rair jergiac, jiksingg berdangr juann beh hro langg' damdair, m na dangsaix, lamvag vingg :ee iarr diyhh vunpnix camx lyc kir hue. Inwviyxqix, guanw huersia u LASER :ee tangx ing, punwbak :ee kngr cur nirr jin’ dinr der. Jitt daii vnuax laii liw jiax, liw byy qra guaw kiyh cngjanr-liau, dendyww si guaw rair qra liw qongw loxlat.” Hugo lixlo vaii kiw suixkuir.

“Guaw kiw jit xee kenwtauu, hai liw lensuar snax amr berdangr kir iokhue.”

“Qamjiar byy siangx tauu dnix lar. Liw jitt vingg ee nxng pachingg decc vu :ar, hitt vingg :ee, qebuw iauxx decc dua. Snesingg diyhh liw jitt juiw :ee qor dairsingx.”

Sowluw :a qig ciyr ciyr, simqnuadew amr suniuu uerqur aurviah bin ee iwbi.

Sittauu bongx suah, Hugo qra Sowluw :a tyw jit quanr liangg :ee. Sowluw :a vingsniux qnrua jit quanr vingqyw sida .cud .laii. Hugo bagbaitauu pah qad, mng qongxx qamxx u beh’axjiuw tangx qanvuex.

“Jin’ sitlew. Guaw bah qapp hrunx-jiuw longxx byy damx.”

“Acc javolangg, liw qamxx u damx?”

Byy dniudii, Hugo danr jit liap jawdann .cud .laii. Sowluw :a jin’ jairdnaw, rinr qongxx, “Guaw jiac cair qaur dorjaii uiqair.”

Tniax liauw, Hugo dngw ciyr bin, suar mng ix jiac cair jiac quiw nii :ar.

“Veh nii.”

“Liw si anwjnuaw beh jiac cair? Uirdiyhh qor uirdngg iacc qingr vudjow?” Hugo mng kiw jin’ kuehaii. Sowluw :a bunxciyr, qidiongx en’iuu dauc dauc aw sueh kiw.

Huewtauu snax-jap dyrr jniuxqnuaw, siauwlenn laurbuw iarr diyhh cnia’iongg ginxaw dua, iarr diyhh hongrtai daqeqnuax, qui’ nidangx lylik, siurkow-lagtangr. Qeqnuax vacnii, jyr simvu :ee sangr inx jnriu snuatauu. Jit duir jiaxdi-aw jaivuee uansingg, jyr laurbuw :ee kax dax ciuw dax, anhann jurjai hyw tentaix. Survutdix, lak-jap huer quer, samsiauvni kixjingr, a’buw ee vakdow naxx iyhduu, iyjiw iarr siurlui. Jyr jaboxqniaw :ee jiokk jnia’ m qramx. Sensnix, mng; ceh, vingw, jyr jaboxqniaw :ee u dingrdiog. Jewab jingwtauu beh u qenwhau, iyhliauu vutviw sidliauu, jiac cair kacc qniu jiac cyx.

“Diyhvni :ee si linw sirduarlangg iarr m si liw a!” Hugo liac uersad.

“Qangg jit qekauw, niucinx jiac cair, lanw jyr sirser :ee jiacc laii hii hii bah bah. Anxnix qamxx si kuanw?”

“Liw sidjai jnia’ iuxhaur, uirr laurbuw-aw hisingx hiacc dua.”

“Byy nor! Si guaw vngx diyc guanw buw :a ee hokkir, anxnix qongw mrjiacc sirersiaur.”

“Anwjnuaw qongw?” Hugo jin' hnowqii.

“Ingxvaiw aw, guaw vutsii dyrr qasaur, byy dyrr cringr pnxi, d.-dakkap-k. Jitt quiw nii aw ngua jiac sowsit, sindew qex jiokk iongw, lenrr hongsiaa dy’ hranw did uaw srinx.”

“Jniasit :ee iacc qew :ee?” Hugo bagjiux denw dua luiw.

Sowluw :a dimr tauu. “Kingsit qongw, lanw langg sidjai iauxx vnuar kimsiur. Uirdiyhh beh vow cuiwkangx, jrer jit xe aw gejyy-ongg, hiaxee tausnex-aw suacc diyhh lorjex, snewmia qausiaux.”

“Kaksit urngiaw,” jitt quer, diyc Hugo decc dimr tauu. “Denrsi qenwnarr decc vnuar cauxvox ee lok-aw kir hro how var sraix lxongg uac uac qa .siw, guaw knuar diyc dy’ jiokk m quewsimx.”

“Dyrr si anxnix m. Jiac cauw :ee kir hro jiac bah :ee lingdi, qamxx u qongdy?”

“Liw ee sowsit-liaurliw, hiaxee jiac bah :ee m jaix e qac’ir .be?”

“Hnaa?”

“Inx hex dua jiah jingsnex, tnix-snix-de-ngiuw, jingrr cutsir dyrr jiac cyx. Narr junw u jit zit inx byy huelok iacc ngiuu-aw jewqox, sor :ee qycc be hac cuiwlo, vakdow iaux quw marr si e sixkiaur-k.” Hugo qig jit xee qojiongx-bunai ee viauxjingg, cuir-vnx u ciywir. 

Dirr Sowluw :a ee qiwdii, jyr ginxaw ee sii, Hugo jin’ air qra jaboxginxaw congwdi. Bad tniax juanqax decc huntiah, qongxx javoginxaw ciuxcingr ee kixinx, air beh snriaa jaboxginxaw qra inx juwbak jiamr duartauu. Duiwbin kia :ee jitt xee javolangg ee simhing sniaw kuanw, jit vunw simlixhak ee ceh laii, qnaxx dyrr tangx jaix jit xe dairlixkair, Sowluw :a quatding binaxzit beh kir ceh-dxiamr qniaa .jit .jua.

Denrnauw, bangrlo, inwviyxqix, jap-jee-go-jngg. Hugo cniaw juxlangqax denw jit xe aw kaciuw. Sowluw :a ixaxui jre dnia, Hugo kia dirr ix kajiah-au, beh siaw, beh inr iacc beh jniurbang, niauxcuw-aw jyr cuartauu :ee. Jit jiah niauxcuw-aw, ursii nng langg siy’ jnex sraiw, ciuw ham’ ciuw siy’ ex siy’ kab ingxingw e. Qnuaw jit xe qinw, Hugo ciuw tac diamr Sowluw :a ee ciuxvnuaa binrdingw, jit jiah niauxcuw-aw siangx langg dangjee sraiw. Javoalngg ciuxbin qex jiokk dua xee. Sowluw :a jniar ciuw qui’ee hro Hugo ee jniar ciuw dar lehh, bersux decc ho’ngg vaux nga.

Vorvinn, cur-lai ee denrue giangx. Tac dirr dingxbin ee ciuw jurzendig suaw lirkuix. Did diyc juriuu ee ciuw kir jriab denrue, jxingg m guan, simx m qramx.

“Uee, liw u dirr cur nirr hnoh? Liw beh air ee sidpow guaw u cue .diyc .ar. Guaw jinw tec kir hro :liw.”

“Jitmaw!”

“Hner a. Anwjnuaw si bor?”

“Mraxqycc, amr :ar ne!”

“Liw mrbenw cutmngg a! Guaw kiaa odobai, jap-go hunjingx kacc benw dyrr e qauwui.”

“Mraxqycc, guaw u langkeh dilehh ne.”

“Simxmih kuanw langkeh jiacc m bad lexsor? Beh jap-id diamw :ar iauxx m jauw.”

“Jit xee ving’iuw laii decc qar guaw caujog denrnauw.”

“Denrnauw! Javox :ee?”

“Hmr.”

Hitt vingg qui’ee byy sniax .kir.

“Uee, uee uee!”

“U lar, u tniax .diyc lar. Liw qacc u langkeh, lanw vadd zit aw jiacc qongw.”

“Kiak” jit sniax, hitt vingg denrue dua dua lat siux snuar. Sowluw :a simqnuax ciak .jit .xe, kiwsig si byy pah cneqniax ee kuanxhingg.

“Javoving’iuw kar :ee?” Jit tongx denrue jiacc suah, diyc cur-lai jitt vingg decc criuu ue.

“Suacc si,” Sowluw :a m zin. “Hex si guanw ingxquer ee suhniax lar. Ix dirr dua qingx cantniax jyr jongxpor, ciuxtauu u jit quaw sidpow beh hro guaw camkyw.”

“Ix jitt quw beh laii, m?”

“Jinw longxx quiw diamw ar? Beh tacc u langg jiacc amr qycc kir langg’ daux :ee?”

“Ix qamxx u qadingg ar?”

“Qaxnaxx si qongxx byy ginxaw.”

“U bow?”

“Bow qaxnaxx bow, byy druar jywhuew.”

Siy’ lensuar, bunrdee qui’ qnua jiamrsii qaur jiax dongwdiam. Jah .laii ee mihqnia kuanw kuanw lehh, Hugo qongw beh qywsii. Sowluw :a obah tac lehh sangr ix qaur laukax, beh jaix ix sraiw dycc jit kuanw ciax, qycc suar vruee ix qniaa qaur hang-aw-kauw. Buerjingg qaur, Hugo qra ciuw nirr ee rimokong cic .jit .xe, jiuc jiuc nng sniax, ciax-sryw qiux .dngw .kir, syxsii longxx benw cutdong.

“Handolu hyw pangw, ciadew marr vutjiw aw jai, qanda’ jit vo kacc jiac iuu decc baixjaii.” Hugo qongw, jre zip kir qawsuxjy. 

Tranr jitt xee langwpang, Sowluw :a qra ciax liyc aw siongr .jit .xe. Amr niauniaux, ciax-srinx cnix :ee iacc naa :ee knuar kacc byy. HONDA ACCORD, ox vylee, u tnitangx.

“Jitt daii byy cid-jap-bxan qnaxx be diyc.” Sowluw :a dirr simqnuadew decc anwvnuaa.

Ciax huatdong, ciatangx vangr .lyc .laii, Hugo jiyx Sowluw :a lexvair kir cantniax jiac hyw liau :ee.

“Hyw a. Beh laii dycc jit qingx?” Sowluw :a mng.

“Lanw laii kir linw suhniax hitt qingx jiac knuar mai.”

Hugo qra Sowluw :a nih bak, dyr ciuw crunx cud laii guarkauw et ciuw baiabi. Sowluw :a kiw air ciyr, qniaa dngw laii qaur cur nirr, ciywsinn iauxx trer byy liauw li.

“Dangsii beh hing guanw sinniuuvniaw jiac? Knuar liw ciyr qaxx jiacc cunhongx .diyc.”

Syxsii byy jah, mngg byy sryw, qodnuax kia ee cur hionghiongg qex jit xee langg .cud .laii, iurqycc si javox :ee, diyc cneqniax, Sowluw :a simjong banw ann.

“Liw... laii beh congr sniaw?” Simqnuax be dikdnia, cuiwjic iarr suar pacqad.

“Sidpow liw byy beh air :ar? Vaiwid kir liw dxiamr nirr, liw iauxx qra guaw tyw qinw qinw.”

“Liw u tec .laii .ar! Dirr dyhh?”

Vutsog ji’ kxeh iw nirr jre, ciuw qiw dyh-dingw ee jit jriw guanqyxjuaw. Sowluw :a jiksii uaw .kir, naxx henx, bagjiux naxx dua luiw.

“Longxjongw qamxx qanda’ jiaxee?” Sowluw :a mng.

Javox :ee hnair tauu.

“Liw ciuxtauu iauxx u?” Sowluw :a qycc mng.

Javox :ee dimr tauu.

“Au jua liw longxx jah laii jiyh .guaw, hyw bor?”

Jitt vaiw, taukag byy-dongr.-byy-jing, javox :ee dingw-tuiw tehpuu, ngar srinx qinruaw Sowluw :a.

“Vngrdiamr ee taulo, guaw e qra srii. Liw hitt qingx caiwquanw, guaw tangx kir draur qing’ingg. Qinw jiarr jit qruir, byy marr vnuar dxangx au, derr zi qingx diamwbin e tangx cutsir.”

“Acc narr byy lehh? Guaw m suacc hai liw byy taulo?”

“Lanw qanghux sidjai, qangjingg qycc he u qraur, byy hitt hy dyrliw jyr be kiw .laii.”

Sim .u .hiacc .quw .aw, Sowluw :a qongw ix rair qapp dxiamr nirr ee qoxkax camsiongg knuar.

“Inx nng xee qamxx m si jiacc zi-jap tongw huer? Guaw liaurqiyr inx si liw cniar laii draur kaciuw :ee?”

“Diamwbin guaw jringw vunw kuix :ee si byy cyr. U tanr beh vunx :inx, jairjaw dyrr u qapp inx bingg prinw :ee.”

Sitbong ee simjingg siaw dirr bin, javox :ee qra dyh-dingw ee guanqyxjuaw kiyh kiyh lehh beh qywsii.

“Liaurlixdiamr lanw banrcniaw si lun kiw. Guaw qapp liw dauwdin jit amr, liw hiaxee ciuxqyw jiyh guaw, tingww tyw tingww hingg. Beh bor?”

“Hnaa?” Javox :ee liyc aw driau .kir.

“Liw bow benw lii, taulo benw srii, guaw jyr liw ee huexqir hro liw kunr benw jnii. Boxqniaw, kangkuer, aiwzinn, snax lo jngg, zinsingx dua jiok’ir, qamxx m si lehh?”

Bin-aw cnex sunxsunw, bagjiux ngii linlinx, byy-genn-byy-giw, suhniax mihqnia sax lehh jauw, mngg “voong” jit sniax dua dua sniax, uanxzenn decc ter ix ciangwdur.

(CID)

Qauw-guec cex, hagsingginxaw nng guehzit dngg lyxlyw ee suxqaw hiyh suah. Qycc tak lecc nng lexvair gua, snax qangx ee Diongciux qawqii iurr beh qaur. Tanwjiahlangg byy tangx hiyh qnuaa hiyh zuac, Cid~veh-guec aw, lingxkir byy pangw e zuac siw langg. Tingwhau qaur ginxaw kaihak .kir, ciuhongx pupiyr amwjywjni qniakaqaur, diyc qaur lingxkir hiyh cxiux-dxangx. Dingxvnuar vox liangg liangg aw, jycsid qeqiamw diyhh cud lat, qnua marr si vniar. Denrhongx beh hiyh siongrqaiww byy iarr diyhh dniudanw zibdangx quer jiacc tangx hiyh jit xee kacc u.

Dagg hxang dy’ qau qangx, cauxcair dnaxjingw, buerjingrbue dyrr lik siw jit xee dionglenlangg qapp nng xee siauwlenlangg. Vylecair qapp qiamcair dog iur iur jin’ diyc lat, Itqyx :a jongw lamw vnuar sniax vnuar. Caiwtauu puee kex liauw jnaw buew, liauxau rair luah. Sxor jap dxangx quer liauw quer, jit xee kutser liac kiw e duiwdiamw, snax qix anglyvok, Huad Syw :a jit hunjingx-lai juanw .kiw .laii. Quewqaucair dre qui’ dre, muixx jit hiyc qeww diyhh sxix, diyhh qingw. Itmue :a duarvorbuw u lauu jingxqah, qesitauu snix dirr jingxtauu-aw ven ven.

Ciuw byy ingg jyr kangkuer, cuir iarr beh bongxx lenrsenx, byy ue qongw qalew marr hyw. Lxamm damjingg, luw suec’air, quxnii-vacjair qongw be sen.

“Linw javoving’iuw anwjnuaw qra liw ziog .diyc .ee?” Huad Syw :a kixkenr.

“Ix or, langg ew ew, kax dew dew, qajair u jit daii odobai draur vangbangg. Beh byy, ix beh ziog guaw e diyc, jitt siwlangg ingxx byy vyh.” Itmue :a qongw kiw jiokk iangkir.

“U tniax .diyc .byy?” Huad Syw :a bin hiongr Itqyx :a. “Odobai qinw kir kanx .jit .daii, cit’aw sui’ e uaw .laii.”

“Qiawqimpo-aw ginniuw u jiokgiac, simxmih jiacc odobai, sir lenw :ee guaw dy’ qramx kanx laii sraiw.” Itqyx :a byy ir aw byy ir.

“Guaw qapp Itmue :a qunxsngxciyr qongw :ee. Liw sniu qaxx hiacc cimx .kir.” Huad Syw :a qexir qra grinn. “Liw snex qaxx jiacc endauu .diyc, iarr suacc diyhh kanx simxmih ciax, kyr jap-id lo :ee dyrr tywdongr :ar.”

“Hner m :ee!” Itmue :a janwcuir. “Lanw dagg amr longxx jyr qaxx hiacc nguar, guaw mrjiacc diyhh cue jit xee u odobai :ee.”

“Kiarr, liw qingw javoving’iuw diwdiong dirr cialenw-aw.” Itqyx :a criuu qinguann.

“Anxnix qongw qaxnaxx byy qaiww duiwvan,” Itmue :a hnair tauu. “Narr guaw laii vixlun, hitt daii odobai si bersux hmlangvyy. Hmrlangg-cuir qyckacc gauu rue, lairjaii qapp guarjaii ee dingxde auxbann aw iarr diyhh siongdongx.”

“Soxdiw qongxx, narr byy hmlangg kanx angsisnuar, javolangg diauqnia qyckacc hyw, liw marr be hiur :ix?” Itqyx :a cunvan beh mng qaur drew.

“Lenrr odobai dy’ byy, diauqnia beh u tangx zuarr hyw?” Huad Syw :a cniuw lecc dab. Itmue :a sui’ cud juixsniax qra ix nih bak. Diwqag diyc u sitcuir, Huad Syw :a dngw uerquanx, qinw vow jit qxur qongxx, “Siongrqaiww byy :ee byy, iarr diyhh yc lanw Itqyx :a kiaa ticbew, benw juixiuu, qycc m qniax jikciax.”

Kauxbin u odobai decc vnax vnax. Dingxvox qauw diamw vnuar, jyr daurqnuax :ee muixx qangx junxsii-junxkig laii longr mngg. Qui’ ciuw caiwciamx vuew vuew hro cingkir, Huad Syw :a kangkuer vangr lehh kir jicjiab, unn unn aw si.

“Jaboxqnuax qinaxzit bin-aw kacc cxunx oox! Si uirdiyhh dycc jit diaudai hnaa?”

“Suacc m jaix gunw dyrr hiauu-drew :ee, lau ciu iausniu beh qycc kuix huex lar.”

Huad Syw :a qra nng dre daurqnuax jrih quer ciuw. Tranr jitt xee hyw xe, javolangg amwjni qra jaboxlangg ee ciuw hrux .jit .xe.

“Anxnix liw iarr hyw?” Huad Syw :a qongw.

“Hnaa?” Javolangg cuir-aw kuix kuix.

“Langg’ decc hongsniax qongxx liw siauxqongjuw jit xee, qycc urngiaw dyrr driyc.”

“Liw decc qongw sniaw? Guaw tniax longxx byy!”

“Benw decc dniwcnix lar! Qycc qew dyrr byy singg :ar.”

Cuiwpuew angg qiqix, jyr daurqnuax :ee tauu cih cih, odobai piux lehh suanx .kir.

Jit dre daurqnuax kacdingg aw beh juw, qniaa dngw laii jauwqingx, Huad Syw :a qra lingrgua jit dre sreh zip kir sngqui, mngg diyhh cud quaw lat jiacc qnuaix e uaw.

“Diqypiaux :ee iurqycc decc lytix sniaw?” Qui’ tangw hanjihiyc qingw hyw kngr duar juixdyrtauu erdew, Itmue :a naxx decc mng kiw.

“Javolangg cauwcysinn giaa .kiw .laii, lau lingvaux ix iarr qeqiamw.”

“Ix qra liw anwjnuaw?” Itqyx :a jiokk iauwqinw.

“Benw qniax lar! Jap xee diqyx, qauw xee byy dnaw. Linw Huad Syw :a guaw ciah kedket si dingxe qangw jiauu cutmiaa :ee. Lanw si daiwliam ix daurqnuax jinx biw jinx qnar. Narr byy, jaw jaw dyrr qra ix getaut ciax vunwdauw, iarr u tangx hro ix lamrsamw qra lanw jywunn.”

“Liw uirr lanw dag’ee hisingx jiacc dua. Sidjai rair qiyr tauqex qra liw vysniuw iacc vngvow .jit .quaw.”Itmue :a pah ciywkuex. Kiwhunx jyr jit xe lewdauw .kiw .laii.

Jap diamw quer, jongxpowsaix qauwui. Quann by-aw dir lehh, uisinqunn iarr haa hyxser.

“Dag’ee junxvi hyw .bue? Kiw jaur lor!” Sowluw :a cud hyrling. 

Dangdniaw jiyx juixsiac, tih-dxiy jiyx jensii, jauwhiahtauu qinrqong qunw.

(VEH)

Duardiaunii jiacc u :ee, jitt vaiw ee sowsit vixsair dirr nidauvnix. Unrdongruann jiamrsii niurdo, siklai ee unrdongrdniaa qinaxzit beh junw jauwkax. Bylun lxamm iacc luw, gnoxlo ee qiciuw jip jywhuew, vutquanw jniw qangrr lau, jnia’ vah miaa ee dyjisaix, vnuar vox dyrr tangx qniwdiamw jaix quanqe.

“Huanhy zxic-veh dirr jniawciuxvingg uaw mngcuiwkauw hitt dah. Rair vingx :ee tangx kngr druar sngqui. Beh sew, beh qingw, beh ced :ee tangx singx cuxdir. Dogdok cnrex :ee juw hro sik diyhh banrcniaw si. Gasloo qapp dimruex diyhh hauu qaur luidaii kixqow jiacc u diongwliongg. Jex miavaii-aw rair qruar lehh, aurviah u vinxjiamx, iarr tangx vinw dirr snxax-aw binrdingw.” Qoniuu-aw snia'imx dnix dnix, binrcniux unsunn. Sowluw :a qra ix suecsia, mihqnia jrih quer ciuw, jiksii qra qruar diamr amrqunw.

“Guaw jitt qix vinxjiamw buerjingrbue dyrr hai .kir .ar! Auwsenx.” Itmue :a cuiwdunn kiaur ducduh.

“Liw jnia’ qauxjer ne! Langg’ duxjiah beh vunx duar-aw hro :liw, liw qan’ aw byy beh tec.” Itqyx :a qra tagtig.

“Inx hex jyr qaxx bersux qauxlen-aw. Guaw dyrr m si qxauw, qruar dirr amrqunw beh tacc e knuawkauw .did?”

“Guaw ee vinxjiamx hyw :ee byy pnaiw. Laii, jitt qix hro :liw.” Sowluw :a qra qaqi ee vinxjiamx vrag .lyc .laii, jid’err dnax tauu, knuar qnir diyc Sowkingx qapp ix duiwbin kia.

“Sowluw :a, venr kacc suiw oox! U langg decc pna hnoh?”

“Dua-sujew, liw iarr laii camqax!” Sowluw :a dngw uerquanx.

“Byy, qamxx laii knuar laurzet :ee? Miaceh dingxbin u guaw ee miaa a!”

“Pnaixser, juliau duxjiacc tec .diyc, iauxx bue siongser knuar.”

Sowluw :a qra Itqyx :a qapp Itmue :a siaurqair hro Sowkingx. Liauxau, nng xee siauwlenn :ee qongw u juixnguaw qapp iuvann rair kir virvan beh singx sitelw.

“Duxjiah hitt nng xee duewsom :ee m? Longxx jiacc jniciyh, inx si erhiauw vnir iacc berhiauw?” Sowkingx knuar inx jiokk byy.

“Je juiw je daurhu, qeqiamw marr erdangr draur kaciuw lar.” Sowluw :a rinr.

“Guaw e qir did liw dyrr vutjiw aw saliac. Longxjongw marr jiacc sir cud cair, sir langgiac, cua cua hiacc je laii, dnii kax dnii ciuw u nia.”

“Ciuxsowliau narsaiw nng-cingx kox, siauwlenlangg qex jit vaiw qihue kaix ganxqair. Tniax qongxx, sxaix :ee inx dyrr jit qniaa go~lak miaa lehh.”

“Inx hitt kauw jaur juann juann tauu, sxaix :ee decc vunx be vnee, jex liw iarr knuar berhiangw!”Simqinghuew jiauu giaa .kiw .laii, Sowkingx bagbaii dyr kia, snia'imx draur dua sniax.

Siqanx beh uaw, langg zuxx jxig zuxx je. Giac tauu giac hni, siongr jitt hiongr, tniax hitt vingg. Nih nih cue :ee qaur der, Sowluw :a qniasuaw kax, quw byy knuar, qycc liyc liyc aw e kiapdnaw.

“Sowbinw, tacc e qanda’ liw?” Sowluw :a mng.

“Guaw singx laii knuar derdniuu. Erkaciuw :ee kir vnuax qesix.”

“Sowlann marr kir draur vnuax m?”

“Ix qamw .diyc, jarhngx qongxx qycc huatsiyx.”

“Si or. Acc... sxaix :ee lehh? Ix iarr byy laii?”

“Sxaix :ee jyr caixpnuar beh qra lanw pah diamxsor, kacc nguar jiacc e laii.”

Sowluw :a dnir hmc hmc. Sowbinw bagtauu kiauw, cuiwkauxue didtaur puar. “Caixpnuar jongxqiong jit dnraw jap-zi xee lehh. Sii qaur, liaurliw vaii qui’ let, qanda’ u huanhy, byy miasner. Qongdy inx e qor qaxx qauwqag, jitt jann liw mrbenw ciausimx.”

Tiah bingg :ee, byy lisix aw kavo tangx trer, Sowluw :a pnaiw iwsinn, duiwhongx ee sixduiwtauu Sowkingx qinw qra cniaw cud laii vnex dniubin.

“Ix guarkauw decc bre cyx :ee. Jitt hy viw sowcair :ee, ix iarr laii beh jiac quer hyy.” Sowbin qongw liauw, hngc jit sniax.

“Bre cyx :ee!” Sowluw :a bagjiux denw dua luiw. 

Sowbinw cinwciyr nng sniax, qycjaiww sueh kiw. “Ix snax-jap-bxan qra sxaix :ee brew kanpang yc liaurliw-vo, diamwtauu suacc qra liw quah bre cyx :ee. Lanw kanpang beh qra siux dywdngw .laii. Ix qig pii pii, byy beh qra lanw sinwdauw. Sxaix :ee hro gik .diyc, pacsngr beh qapp ix siy’ qryr.”

Sowluw :a jamxzenn aw gonggniac, qongxx bersux decc tniax senqow. 

Sowbinw kiw air ciyr. “Sioggixue qongw, ‘qnaw, jiacc e kuair jyr maw.’ Lanw hitt xee suhniax dagg hxang qniax, v.-vnaixtnai-t., simtauu be dnia. Lun kiwpig, Sowkingx si vnuaa ix jit qixb.”

Jiacc qongw suah, snax langg qnrua, nng langg qrngx, langsngg, sneuex, daurser hxang iongrqu longxx jiauu qaur. Qniaa jyr jingg ee ozisang, taumngg vec cangcangx. Acbuew :ee si jit xee siyxjiaxlangg, qapp Sowbinw qangg renn. Cunx :ee snax xee, u javox u jabow, u lyr kax u exqow :ee, jiauu zi-jap tongw tauu kuanw.

“Langsngg rair tec kir sew sew lehh, duardniaw singx kngr tokadaux.” Lun vuer byy lun huer, Sowbinw sui’ xee aw qra inx huah kiw huah dyw, byy qycngiu decc ceqiyr siauxsuw-aw.

Senx vniar senx, qniar duw qniar. Tauu miaa u sniuxqimx snax-jap-bxan, sniuxjng jit dniux qapp jerje sniuxpinw, qycc tangx kir Aujiux denw ciuxge quaww iulamw. Jit xee angqux ranr jit xee xui. Jiauww siogle, taulangg sui’ xee aw cniaw jniurdaii singx vanrsenx.

“Langg qor jit xee cuiwkangx beh jiac sandinx-haixbi, kikkuix tausnex-aw kud tniliw. Diau’iongw simhing qapp singwpiah, jiahcair pah kixsingx. Sewqair ee hyhaii qapp bixsen, kyr liw-guaw laii joksingg. Omidohut!” Suhu dah ciuw habsip hiongr jingwlangg aptauu iplew.

“Lanw diyhh draur siy’ vyr, cinjniaa, cuwvnix, longxx qra jiyx jiyx laii jiac sowsit. Liw kongqen, guaw kongqen, dai dai snetnuar soxdongzenn.” Vixciuw-lyhqiyh, tewhiux ee vnerngirdniuw sniatauu jiokk puu.

“Dah jitt vnee jenwvnee qangsu duw tnix. Siongdiong ginniuw siyxkuaw dai, lylok diyc jit quaw iuxjir jin' m quewsimx. Juann brang jairdniuu ee hurlyw hniadi jixmue longxx laii draur qing, hro lanw hiabhue iongxjongr, jit dxangx dua jit ciyh.”

Juxtauu jyr langw-drew qangxenw suah, huah sniax si, piak piak piak, zet putpud ee gas jiksii crunx kax cud ciuw.

Uisinqunn jit langg jit niaw, dingxquann u spongsor ee logo. By-aw marr sui' langg jit dingw, gulingvec, byy quann byy ew. Kacc jiahqangx ee caiwsex huadlyc dairsingx. Qachac-aw vrag liauw, Itmue :a kir juixjuan srinn jit dniaw juixjiab beh sac diksunw. Huanaxbexjii nng liap qeww jiokk dangrsinx, sinkux sew liauw, Itqyx :a qra inx sangr zip kir denruex cuex. Cniqniux, hiamjiyx-aw qapp huan’axcangx, caiwkax sui’ hxang aw virvan liauxqed, Sowluw :a qra ciuxngxtauu vrih quann, gas ked hro dyc, kad nng tngsii qanaxiuu singx pingx, quer u jit quw aw dniaw zet, suanwvan danr nng bran aw lyc kir kenwpangx. Danw pnri diyc pangkuir, vehcair qapp qimjiamqox cuartauu lyc dniaw, kacc kir, bogniw qapp qimjiamx iarr lyc kir camx .jit .kax. Sir Bixzinn siy’ puahqingx, kowtaudaur qad siy' liamm. Suah quaw iamhuex-aw, itbuew, taiwvehhunw kanqnix. Sowluw :a giac jit siangx di, gneh jit cuir cir knuar u qapbi bor. Sir Bixzinn kiw dniaw, Itmue :a dirr vnix:a hongrtai.

Hiahbaii u decc cud qnua, Sowluw :a qra hueaxvor ee ciuxqinx-aw tec cud laii crid. Ticdniaw iong qorr dniaxcer sew cingkir, Itqyx :a qycc qra kngr dngw kir gasloo binrdingw.

Dngg liuciux ee gubyw siah puee, quer cnuaw, tauu jiww buew, Itmue :a jongw bauc. Dua huew iam pongrpong, iudniaw zet qunxqunw, jimr juiw ee guvongg der dax, lyc dniaw iuguann picpicpiagpiak. Dauriuu nng tngsii lramm .lyc, tngsngx damrvyc aw dyrr hyw. Qangg ve qycc buw iacc qangg buw qycc ve ee huanqniux-aw, angg :ee, cnix :ee, ngg :ee, jidjee dirr iudniaw hiw-sionghongg.

U caulen .quer u cax. Sir cud cair cud jidvnuar, kacc benw vnuar diamxjingx, siqanx iauxx jin’ liongrsing. Sunw-aw qapp maxlingjuu pah tauu din, henrvo marr sik :ar, jit xee ho'ngg vrag hac, jit xee ho'ngg vrag puee. Jitt nng hxang sittauu, Itqyx :a dnax jiksingg, cuxdir liauw, didjiab kngr diamr caiwdiamx. Itmue :a hurjig qra inx ced qaxx vnii dua der aw vnii dua der.

Vow dniaw suar huew, iuu dryr .lyc suisii zet. Dauriuu, ciacsuax qapp sngcor lam lam jyr jit kud, buexciuw, hiang'iuu dih .nng .dih. Sowluw :a ee ciuw jiokk qutlat la. Tingwhau qaur qryx qryx, lyhlauw, diksunw qapp hylanjuu sangr lyc kir qyik. Jitt nng xee cair ee sikdir beh uaw aw beh uaw, duxjiah dirr caiwdiamx tong’ srinx teh sutsut, byy jimjiog, jit xe dyrr ho'ngg knuar dingdnaa, jinw qyy qaxx qui’ee naxx toang’aw qyckacc yh did zin. Qiamxcaiw diyhh qaur qaxx zip kir cuiwkangx jiacc jaix inx si qxunx iacc ongg.

“Jap-sir hy hitt jxox cuann qaxx jiokk pongpair. Bersux decc vanrdyh.”

“Hyw knuawtauu iauxx byy qraur, kiwbi hyw-baiw derr id diongriaur.”

“Vixsair vutviw dirr cur-lai. Cocair-venrvng pangg cud laii qniwjingr, birbenw sniu’ quer cinwcaiw.”

“Linghee qapp vaurhii juw e hyw jiac byy hihanw. Ohnuaii-caixaxbuew liaurliw qaxx hro langg' jiac e qaccuir, hex qanghux jiacc si vutdikliauw. Qycjaiww qongw, zinqedaux byy dagg qangx decc vanrdyh.”

Qiwjiaw liw jit cuir, guaw jit jic, dirr zxic-veh hy jitt kauw jaur taujingg qongw qaxx cuiwqag juann pyx. Enxlen quer jap quiw vaiw qycc quer jit vaiw, jyr jongxpor :ee simqnuax dikdnia, m qniax jyr hongtaix.

“Hitt xee qamxx m si Hugo Duarqyx?” Itmue :a vyr Itqyx :a knuar.

“Liw qongw dycc jit xee?” Itqyx :a siwqer siongr.

“Y-siaju kongw :ee hitt xee a!”

“Si ix dyrr driyc. Vnix:a hitt xee liap’ngiaxsux qaxnaxx si ham' ix dauwdin laii :ee.”

“Hugo Duarqyx dairviauw cutvanxsiongx, unxdangr si laii jiax beh hib quaw sxiong tangx kngr diamr ceh lairdew.”

“Sowluw Jew, liw ee kip’inxlat kacc byy qraur oox! Hugo Duarqyx byy laii hib liw, vingw cnrex ngua sik cue vadd langg kir :ar.” Itqyx :a pah ciywkuex byy-vxag-byy-dxngg.

Sowluw :a qig ciyr ciyr, utjud jairr simlai.

“Sowluw Jew, juiw cix cix qunw :ar!” Itmue :a hiamr sniax. 

Sowluw :a hniah .jit .xe, hniuqox lak luiw qinw danr lyc kir sa. Tong’ srinx nngw qylysyy hroo .kiw .laii, ngua Bixqog-caiwhuex kir jimr jit xe aw siyx juiw liauw diyhh tat dax.

Hongwsangwtauu cud sniax, qongxx li suacqiok kacc byy jit kig sii. Buew cud u kacc dnii qangx, e-be cunx jitt xe. Qniubuw go pniaw singx lyc kir viag iuu, snua’iyhjii dngliaux :ee duewau lyc dniaw. Camx quaw ocor sui’ u qiamsiamx, jniaw juiw vnuar nguaxtauu ag .lyc. Angjyw qapp lenjiw kyxviw saiqongx-aw sniurvuex, siongsiongg liw qniaa guaw duer.

Qui’ dniaw laurzet ciccih. Dirr vnix:a siamxliangg ee hniuqox qapp caiwhuex qycjaiww tiaur zip iudniaw qapp dag’ee kecsiyx, liyc aw u singg decc sew samunluanw. Gas beh qimr driau jinwjingg, Sowluw :a tec hiang’iuu qra dag’ee punr pangjuiw. U pangkuir qycc u sikdir, jit vnuaa jabcyr-craw, kiwbi qiamm-sngx-dnix.

Qaur cud :ar, sir vnuaa liaurliw pangg kir dyh-dingw qapp vadd jxox :ee vaii dauwdin. Itdiauliongg, pingsimw caixdiamw cir jubi kacc be lauwqaux iacc tiauwkamw.

Laurbuw :a sintew kiamwanx, dingw lexvair Sowluw :a sidjai taiww byy ingg, byy huatdo dngw kir iuxhaur. Snax qangx jingg pah ee huexciadnuax, jinw byy jauw e hur be diyc ciavangx. Jah .laii ee qesitauu, Sowluw :a iongtog nng xee siauwlenn :ee jre qewdingg :ee jair .dngw .kir.

“Lanw jitt xui vangr kangx ngiaa, byy danw jit xee qetqyw .cud .laii, qamxx hyw?” Itmue :a mng.

“Diyhdingw :ee si dycc quiw qingx, binaxjair inx e cud sinbunn, huad tongdix. Jiauww guaw knuar, jitt quer lanw iauxx byy bin.”

“Si anwjnuaw qongw?” Itqyx :a mng.

“Draur qinw, draur hng iacc draur quann, u bexviyw iacc dauxcinwciyh jyr vinjunw," Sowluw :a huntiah. "Jitt hy jairr langg' cuiwlo quatding :ee, lanw ee beh siqniaa, iauxx jin’ u tangx danw.”

Jit vingg vauhok-aw, jit vingg vunwsyr, Sowluw :a qra nng xee siauwlenn :ee qongw baibai, byy ciuw tangx et.

“Beh kir dyhh? Rair guaw jair liw kir bor?”

Vunwsyr jiacc pniax zip kir dua kax vunwsywlangw, Hugo dirr Sowluw :a kajiah-au snax ciyh gua decc huah.

“Ongxhuee rair qui’ qangx, Dailamm liw qnaxx byy jauw lar hnoh?”

“Dngdoo :ee Iauxx kacc hyw. Laii kir.”

“Banrcniaw lehh. Liw binaxjair qamxx benw siongrvanx?” Sowluw :a mng.

“Siong simxmih vanx? Guehqib sngr qaur qinaxzit, guaw jarhngx qa’ngg niaw .kir .ar.”

“Liw qra taulo srii driau?”

Hugo dimr tauu, “U tauu iarr diyhh u buew. Tauqex qiyr lanw qinaxzit cua liap’ngiaxsux laii, horsiongx byy siy' kiamr :ar.”

“Acc liw taulo m dyrr rair qycc cue?”

Hugo hnair tauu, “M a. Jitt huee, guaw qaqi beh laii jyr tauqex. Sowcair ee liaurlixceh, jairr guaw cuicig si e jyr .did, cirdniuu jairjuiw e kaidenw. Guaw jyr dyctauu, juann brang liw jitt xui dangqix cud jixsi.”

Qaur jiax laii, bu-vylee venr juixjnix. Sowluw :a simhuex kuix siaw dirr bin. Au ciadauw kuix .kuix, Hugo qra Sowluw :a ee hingliw hnair .zip .kir.

“Guaw berhiauw vyr lo ne.” Sowluw :a pnaixser ~.

“Benw qniax. Guaw ciax-dingw u anjngx uercnix-inxlo-hertongw.”

“Guanw daux hiax vutjiw aw iappiah ne!”

“Huande jyww liw vyr .laii. Cir knuar mai dyrr jaix.”

Sowluw :a vnuar sinr vnuar gii. Hugo laursinn jai jai.