Lorbuew ee Pacsngr
Guaw jitt kuanw huanxingr qaxnaxx u qapp langg' kacc byy qangg. Isingx qongw guaw cunx jit qywguec tangx hyw uac. Guaw byy cneqniax, byy hauxhuah, dogdok jit xee vakdow tniar qaxx qui' senx langg qiongqiongg beh runx .lyc .kir, iyjiacqud sen' crunx dy' crunx be dit.
Dnaxx hai :ar. Ciuxtauu jit quaw kangkuer juer vnuawlamhnaa diyhh qra vangr lehh, diogsit u qraur bycaiw. Qongxx narr dna'aw jiacc kixtauu nia, marr kacc be jiacc utjud .diyc. Beh jaix, dingw guec dyrr byh'ingr dagg amr jiuw dirr denrsi taujingg. Jurr hiaxee siqanx hyxlew aw laii qra unriong, hitt quaw sittauu m jaw jaw dyrr kuanw .kiw .laii .ar.
Air liam bongxx liam. Marr qajair guaw si dir diyc jitt jiongw vne, langg' tangx jinwjingg dyrr qra guaw tongdix. Becnarr cincniu hitt quaw uirdiyhh surqor ongxsingx :ee, dairjir byy-cing.-byy-cyw, hiyrsu be hur qaudair dyrr dngw .kir .ee, siw liauw narr jinjniar u lxingg, hex m jaix beh zuarr cauhuann, zuarr auwnauw lehh!
Guaw dyrr iarr m si jin' air sehqex, air kaix jnii :ee. Dycqui-lai qapp bincngtuah hitt quaw u :ee byy :ee ee ingg mic uanaxx qui' duitauu naxx jit lxun snuax lehh. Beh cringx qaur laii, m dyrr kir kingg qaxx gongrbin .kir. Benw qongw sniaw, qanda' hiaxee ceh beh cuxliw, siongrqaiww byy, marr diyhh qui' lexvair langwtangr.
U jit~vnuar vunw aw decc tamwtyw snewmia iwgi ee ceh, sniu beh sangr hro TT, qycc qniax ix e hiamm hiax-jiax d.-dinwder-d., knuar lanw ee byy qaur dang. Ix tak dethak :ee. Jiaxx ceh hro ix laii knuar, m jaix e sniu' cenw .be?
Cecqer-aw-dingw hex qui' vaii ee qangqurceh, si beh sangr hro B iacc si P? Jitt xee bunrdee, qaxnaxx marr diyhh qycc jnia' suniuu lehh. P jiokk u simx, B tingdo quann; P cur nirr kacc erdid quer, B ginxaw tong' duarhanr :ar. Jingwqingx jiokk taukag tniar :ee. Byy, dyrr quikir anxnix. Sii qaur, jiacc hro inx kir giangken duiwvnuar vunx.
Qiar dirr ginhangg lairdew hiaxee jnii, binaxjair dyrr qeww qra qruanx qruanx .cud .kir. Byy ve be buw :ee, sibvutjuann :ee iacc guanjurbinn dingxdingw jiaxee kacc ziogser :ee, inx jairlaii longxx u viw langg' kacc kiamwhang. Acc narr vyxqednuax dingxbin ee siurikzinn, hex snevunw dy' siaw buw :a ee miaa. Cur nirr hniadi jixmue tagceh, guaw sngr siongrr byy hro ix kaix diyc jnii :ee. Liyc aw qra sngw sngw diag diag lehh, qanda' juwcechuir, an' qokhau-aw tak qaur dairhak, iarr diyhh jap gua bxan lehh. Kacc jaw ee jnii viw did jiangwsii, hex qex zuarr aw dua ngii lehh! Byhqiycc iauxx u hitt quaw lilixkokkog ee zidhuir.
Dingw:a jiaxee kiarr iuxhingg :ee, kacc u qrer :ee. Acc narr buhingg :ee lehh? Ving'iuw qiar .laii .ee hitt quaw puejad, danw guaw siw liauxau, qnaxx diyhh vaiwtog cur nirr ee langg qra junw jyr qimjuaw ginjuaw siyx siyx hro :guaw. Qycc u, hitt vunw u qah sryw ee zidjiwpo, jinw dyrr tingww qra tiah tiah lir lir lehh sangr hro kiyh poaxjuaw :ee. Zirjuaw huesiux, marr tangx qongw si qongdig jit jann.
Liogliok longxx cavutdyx :ar. Henrjingg diyhh laii pacdad sin'au jit quaw dabdabdicdih ee dairjir.
Inx dyrr cenban m tangx cniar saiqongx laii qra guaw giangx. Dnaxx guaw dyrr siongrr qniax caw :ee. Siurvanw marr saixbenw hag. Duarcur si qur caa jyr :ee. Langg siw dy' siw cingjai :ar, byy-dair.-byy-jir qycc kir hai siw jit jangg ciu-aw si beh nii? Snax qangx lai dyrr hyw qra guaw siyx siyx .kir. Hongqim'angr-aw marr tingwhyw singw .kiw .laii. Dyrr knuar dycc jit xee kacc hyw simx kacc qutlat kax :ee, Qelangg guarhaiw hiax jiacc vaiwtog kir qra guaw jauw .jit .jua.
Jitt siwlangg beh qniaa qaur buexqingw :ar. Jiokk hibang erdangr uirr Daiuann binjok kir jyr jit qnia qniax tnix drang de ee dairjir. Kacc sux hiaxee vywjuaw qapp sinbunn dniardnia dy' ovec siaw, lamrsuw vyr. Banrvutzi narr hro inx qongw si sinqingx siauw :ee, guaw langg siw m jaix liauw liauw, hai diyc guanw daux ee langg suacc diyhh lysinn kir hunhue, guaw marr jin' m quewsimx. Iauxx si suah suah .kir hyw lar.
U dac'ingr jit din ving'iuw muanii qniaa cunling beh jywhuew kir Kioto knuar SAKURA, qaur hitt xee sijun, guaw dy' jyr senx .kir .ar. Kacc danw sui' dyrr laii kar denrue, qiyr inx qinw kir cue vadd langg laii tapter. Iauxqycc, qa'ngg jiyh :ee jit quaw CD qapp jabjir, marr rair qnuaxqinw tec kir hnaii :langg. Diyhh e qir did e qir .did.
2001.12
a'Huaa ee Simlairsu
Iurqycc si hiyckunwzit.
Denrlingg-sniax l.-liogsiok-s., duarmngg kuix lehh cnuar lehh kuix lehh cnuar lehh beh jnia' jap vaiw. a'Huaa qra tang'axmngg sag .kuix. Gimjnikax ee hixjiauw jiauxsit pet lehh pet lehh, bersux decc qra ix et ciuw, jiyx ix laii guarbin hnah zidhuex.
A'buw dirr jauwkax dua sniax decc hiux, rair ix kir qamxaxdiamr qra qnrua jit quanr dauriuu dngw .laii. Banx jig :a dirr venrsow ee mngkakauw decc jah kor tuah ziaku. a'Huaa taukag ngar ngar an' vangqingx cud .laii, hiamw jit diamw aw qapp ix siy' vrong .diyc.
"a'Huaa, byy cud .kir or?" Banx jig :a larhix ~, ser qix jingxtau'aw naxx decc tog ix ee cuiwkixpang, erhamx u jit liap juseqir.
Dua tnxiax qirqa qunw, duarser hanr ginxaw jit siwquer decc jauw, decc hua. A'maw jre dirr jit jiah ixqow-aw dingw, siangx ciuw kanx jit xee cing doxqnuarkor ee angngex-aw beh rair ix kia .kiw .laii.
"Qycc jit vaiw. Itqorjiangr."
A'maw jitt jun decc draur qew cuiwkiw, suacc qapp cutsir ginxaw jidvnuax, cuiwkixhnua vnevnee longxx byy gee.
A'Huaa liambah tac lehh sui' dyrr cutmngg. Jiacc uad zip laii jit diauu tonghang, aurviah bin qaxnaxx u langg decc qra qrinx. a'Huaa uat tauu ngiaw .jit .xe. Si jit xee naxx pulongrjiaw ee ozisang! Ix simjong pigpok cnaiw, m qnaw dua sniax cuanxkuir, qycc iarr m qnaw iong jauw :ee. Itdit qaur qniaa cud laii duarlo jiax, jit liap simjong jiacc liyc aw u kacc dniardiyc.
Dirr jiokk jaw ixjingg, ix dyrr jai'ngiaw qongxx angngex-aw si anwjnuaw laii cutsir :ee. Jiacc qokhau-aw snax nii, vywjuaw dingxquann ee siarhue sinbunn ix dyrr longxx knuar u. Dirr dycc jit zit ee dycc jit sii, dyc'ui ee jaboxginxaw kir hro dycc jit xee javolangg cauxdac. Venrnarr tak diyc jitt kuanw sinbunn, ix hitt amr unxdangr e bang diyc pnaiw bang. Kacc duarhanr, kacc bad dairjir liauxau, ix qycc jinr jit vo qaqi singx pacsngr dniardiyc: narr vuthing dycc jit qangx jniasit kir hro duw .diyc, kir hro javolangg anwjnuaw .diyc, ix dyrr anwsngr beh anxnix qycc anxnix.
"Liw qycc jiacc diamwkangx, lexvair-sii aw iarr byy cud kir guarkauw hongsyx." Qamxaxdiamr ee a'sangw jin' hyw kecjingg, naxx decc jau jnii, qycc naxx qapp a'Huaa qongw lialiangg.
Huedngw qaur cur, sewhanr a'qox inx marr duxhyw qauwui. a'Huaa kir pycciyh inx ang'axbow, uad lehh dyrr qinw zip kir aurviah jauwkax.
Qenww vaiw narr knuar diyc qodniu, a'Huaa ee simqnuatauu dyrr e kiw akjag. Cavutdyx dirr vnuar dxangx jingg, a'qox snex derr zi txex dngw laii guarqex jyr guehlai. Qodniu hitt dangjun marr u duer lecc laii jiax na id~zi-jap qangx. A'qox qniax qamw diyc guehlairhongx, vutsii dyrr qiux dirr vangqingx-aw lai. a'Huaa narr qaqi jit xee langg dirr langkectniax knuar denrsi, byy-dang-byy-diyc, qodniu dy' e syy .laii, liamvnix ciuxqud qra hrux .jit .xe, liamvnix kapew qra syx .jit .xe.
Jiaxee dairjir, a'Huaa m qnaw cyxsud qongw hro cur nirr ee langg jaix. A'qox-aw qapp ix qamxjingg be baiw. Ix qniax dairjir narr qongw puar, dag'ee simlai horsiongx u qequai dilehh, horzit e pnaiw siy' knuar. Qycc marr qniax langg' e qongw sunzenn si ix qaqi liac qxuiw liac quair decc luanrjuw sniu :ee. Sinkux vutbingg-vutvik ho'ngg siaumoo .kir dyrr decc cnicamw liauw :ar, narr suacc dendyww kir ho'ngg ciyr samvad, hex m jnia' uan'ongw.
"a'Huaa, cair laii pangg .kir."
A'buw byy ingg ciccih dirr jauwkax decc juw liaurliw. a'Huaa jyr ix ee erciuw junw sangwdyh :ee jongg cud jongg zip. Qingquer venrsow, snax-jig dirr lairdew vangwziy mngg byy qnuaix kir hro ngiaw .diyc. Ix tauu sui' uat duiww vnix:a, qnuaxqinw jauw zip kir vangqingx lairdew bih .kiw .laii.
Jyr ginxaw ee sii, dirr inx qu cur ee hang'axkauw hiax, samvutgorsii aw, a'Huaa dyrr e kir dng diyc jit xee a'vxeh :a, cuir-aw hix hix, guarkor ee ziaku kuix kuix. a'Huaa zuxx beh siamxvi :ix, hitt xee a'vxeh :a dyrr zuxx ziog uaw .laii. a'Huaa hro ix hneh quer quixlyrr vaiw. Au .laii, ix jingguan kaux jit dua linr, kacc anwjnuaw marr m qnaw qycc qniaa duiww hitt jua tonghang quer.
Sewqanx tacc e u jiacc je vutsuxquiw iacc taixqyquiw ee javolangg?
Ix bad knuar quer jit cud Aujiux ee denrngiaw, si decc vnuax jit din siuluw ee qowsu. Inx hex siudyrngi lairdew, cing'itsig longxx luw :ee, byy qaxx vnuar xee javox. Ix jai'ngiaw inx jiax dyc'ui u ambiy. Acc narr siudyrngi, dyrr qaxnaxx kacc byy tniax langg' decc tesueh.
Qongw diyc cutqex. Jiahcair ix si erdangr. Qui' py taumngg beh qra kunx qaxx kut ~ ~, hex dyrr bersux beh quah ix ee bah. Ix byy vadd hxang cuwbi, be air jrngx, be hingr cing suiw snxax, dyrr qanda' jit vo air vnir taujangx. Ix dagg qangx longxx e kaix beh jnia' diamxjingx decc seto qaqi ee taujangx-hxingg.
"a'Huaa, cud laii jiahvng or."
"Guaw be iaux, guaw m jaic."
"Iurqycc m jiac! Si beh jyr senx niih? Jitt xee ginxaw hnoh, zuxx duarhanr suacc zuxx quaiwpiah, jnia' air imr dirr vangqingx-aw-lai."
"Marr beh zi-jap :ar ne. Qycc .quiw .nii .aw, marr hyw qer :ar."
Nng xee dangsai-aw decc sueh lensenn, qongw suah, qycc qra a'Huaa qiyr jit vaiw.
Bagjiux kreh kreh pag dirr tagcecdyh-dingw. Sniu diyc cur nirr hitt quaw javolangg an' venrsow cud .laii, inx hitt siangx ciuxqud bongx .quer ee soxjai, a'Huaa dyrr jiokk yjyx, jiokk ciac'iac, qycc qiongqiongg beh vingxvag.
Ix be genr ham' inx jywhuew jiac. Ix quatding qinaxzit beh gy .jit .dxngr!
2002.1
Vywsiuu
Dirr jit dongr snax-janr-kiw ee tauwtnicur mngcuir, u jit qix qimx sicsich ee liamlik-aw cai dirr hiax, dymee lrai ~ ~, qaxnaxx iauxx m bad ing .quer.
Kiwser dng' bingw ee hongx exqauw. Mrqycc ix jin' jaix kangtauu, vecvo jin' je, erhiauw siwqer cue langg jyr ix ee dairgenzinn. Dua jangg ciu-aw ee snia'imx si sihsic suhsuc; mngsniwvanw draur byy ba :ee, qongw diyc ue si ngi'ngix nguairnguai. Qycc hongx ix byy kax byy ciuw, byy srinx byy tew. Ix cinwcaiw pah jit xee kacniur. Quewlorlangg uree kacc lamw sinmia :ee, uat jit linr dngw, dyrr venr qaxx naxx qalew, sinkux suijai hongx decc qra vaiviw.
Z qra amrniaw giuw kacc quann, sinkux qiux qiux, siangx ciuw cah dirr kowdeaw ping uaw viah kia lehh. Hang-aw-tauu u jit dnar decc bre cig'axmi :ee, qnuaa .langg ee amwmii, singliw dng' huathuex. Z ing bagbuew qra jimjiog, cuiwkixnua qiongbeh dinx .lyc .laii. Vakdow iaux qaxx beh nair qajiah, mrqycc sinkux dngrr dangsenx, lenrr jit bunn jni'axpiw dy' byy. Ervox qra jnii jongw kingg kingg lehh kir brew jit vaux MARLBORO, jitmaw marr suh liauw :ar, qanda' cunx qui' tokax ee hunsaiw qapp hunquec-aw, bersux decc ter ix jyr qanjingr.
"Liw jitt jam aw cud ee hxuer longxx cox viangwviangr. An' au qywguec kiw, guanw beh qra vadd qingx cniuxsiongx juwbunn. Inx ee m na huewcauw janw, huewqer qycc beh dac jiokk nngw hro :guanw."
Beh jauw jitt xee si ix ee dua juxqor, ham' ix singliw ongxlaii beh jnia' jap dxangx :ar. Ix dirr singlixdniuu, jairlaii qanda' dniardnuax be genr jriab u nia, byy pacsngr, jitt vaiw kixdyww ho'ngg vangwjiauw.
Ingxnii, ix ee hxuer dng' u siautauu ee sii, langg' snax qojniaa sir vaiwtog, beh jiyx ix pah kewiog, qongxx beh jyr ix ee jongxdairliw. Ix sniu qongxx qaqi ee mihqnia si duarsikhuer, jitt sniax narr qapp ix ciamx .lyc .kir, singliw m jaix beh qiamw jyr zuarr je tnuax .kir. Dyrr dirr qurnii, u jit xee qokhau-aw ee dongcongx laii siy' cue, suacc qra cua cua kir huanwsauqingx, kir jamr jiuxqax. Jurr hitt sii kiw, ix dagg amr dy' juir tentenx, tentenx juir.
Dniardnuax ho'ngg cuxsiaux .kir jitt juw ee hxuer liong qaiww dua, singsanxsnuar vnuar dxangx jingg dyrr anwsngr dniardiyc. Huewbin byy sriaux, m na qangdniuu rair siux .kiw .laii, ix qycc huanrser rair jauxlo.
"Liw longsimx-qauxhing, simqnuax jiacc cox, dyrr mair quair guaw duiww liw jiacc sad."
Ix qra liamlik-aw giaa .kiw .laii lrak lehh.
"Qamxx tangx? Anxnix jyr qamxx e hryy qaax?"
Qycjaiww jimjiog sniu .quer, ix qra liamlik-aw qycc kngr .dngw .kir.
"Guaw dyrr hro liw cutmngg ee sii qaqi vuahdyw. Liw dyrr narr byy siw, marr diyh'air diyc dang siongx."
Dywhuansinx, ix ciuw cah dirr kowdeaw, naxx qniaa qycc naxx decc krox si'aw.
2002.1
Tuisiau'uann
Caiwdesig ee pue'ee binw qaxx qimx nawsnar. Zidtauqngx ciy .lyc, qycc liyc aw e huanxqngx. Dingw jua dngw kir Biaulik, ix ham' a'buw dauwdin kir sec iarci-aw. Jit siangx pue'ee sir-vah kox qongxx si sixdi'axqer, a'buw gne qa'ngg cud qaxx cunx zi-aw-go. Dingw srinx hitt niaw dau'axhuex ee siajuh si a'jew sangr :ee, iarr siog'axhuer. Beh cing jinwjingg, ix longxx e qra ud qaxx tringg ~ ~, u zip sinw ee niaw qycc ciyx ~ ~.
"Lanw si rair langg brew lanw ee sanxpinw, m si beh qa'ngg vunx. U hingtoo, hyw hingjow. Diyhh cing kacc vicjah lehh. M tangx jit sinkux siausab iacc puawlamwsamr jauw cud kir decc ho'ngg knuar suex." Tauu jit qangx siongrvanx, juxquanw dyrr anxnix qra inx kanqar.
"Tauqex, nng hunjingx siyw jiyh .jit .xe. Sniu beh qra liw qaiwsiau guanw qongsix..."
"Byy-ingg-byy-qangx, mair laii decc dakdnii."
Jit qxur ue qongw iauxx bue jiaujngg, sels dyrr ho'ngg hor .cud .laii.
"Snaw? Diyh'air qaur snax qywguec? Guaw bad dirr jabjir dingxquann knuar quer lingrgua jit jiongw vaijuw, qongxx jit guehzit lai dyrr e qnir diyc qonghau."
"Inx hex ing quw, duiww lanw sintew u vairhai. Iauxx si guanw jex kacc sidjai."
"Linw jitt quaw sels ee cuir longxx marr hoo luiwluir. Qaqi vyx iarr m qniax cauwcyx." Dairhagsingx bagbaii diaur quann quann, uad tauu beh jauw jinwjingg qycc qra hngc .jit .xe.
"Linw jex simxmih alixvutdat ee vaijuw? Snex hnirkangx m bad tniax .quer."
"Guanw jex si jueww sinx kyqix kaihuad ee sanxpinw. Duxjiacc jniurci nia."
"Duxjiacc jniurci! Hex guaw jiacc si m qnaw ing. Iarr jaix linw si himm iacc si how?" Oksang qongxue cuir-aw kiaur ducduh, qycc jin' pnaiw binrcniux.
Jaxkiw cid diamw tongw dyrr cutmngg, beh uaw daur :ar, kabang lairdew ee dniardnuax qniazit iauxx byy qihue qnir diyc zit.
"Linw diyhh kacc hyw ciywsinn, kacc minua kir cir, kir tamr dongrjing. Luixjee, APPROACH jap xee jiacc u tangx jyr jit vaiw PRESENTATION; jyr u go vaiw uanjingw ee sanxpinw qaiwsiau, linw dyrr erdangr sunrli ciamx diyc jit dniux ORDER." Juxquanw qra inx jyr hunwlen ee sii bad anxnix decc hunsig.
Ciutnix, ciurhiyc-aw qex jin' gauu jrngx. Cnix :ee lam ngg :ee; ngg :ee camx angg :ee. U jit hyw dyrr byy nng hyw. Suiw bongxx suiw, gauu lag hiyc dyrr kacc bycaiw. Dirr qonghngg lairdew, jit xee dngg taumngg ee siyxjiaw, qo' jit langg jre dirr jit jangg vng'axciu-kax ee ixliauu-aw-dingw decc knuar ceh. Ix kir qra APPROACH. Qoniuu-aw byy qra qurjuat. Ix qra katalog an' kabang lairdew tec .cud .laii, simqnuax pigpok cnaiw, ciuxqud qycc damrvyc aw e cuah. PRESENTATION jyr kacc byy jidvnuar, jit xee cing pactic'axkor ee javox jauw .laii, qnuaw huwhur, bersux decc pachuew. Siyxjiaw qra ix qongw jit qxur sitlew, pnai'aw pnai lehh dyrr qapp javox :ee dauwdin jauw :ar.
Ix jamxzenn aw byy iwsinn, lranw lranw sen sen. Jit xee srex haixqat'axtauu ee sensnix, duarvan aw duarvan dirr ix duiwbin ee iw nirr jre .lyc .laii. Dangsi'aw jitt xui sensnix duiww ix ee sanxpinw jin' u cuwbi, mrqycc, qewsiaur qongxx diyhh cikqiamw snax snxiaa .kiw .laii jiacc beh qra brew.
"Jinglamm-jauxvag, qniaa dangx, kir sair, Daiuann guaw guan'aw siwqer jauw taur taur. Jyr jitt dxoo u zuarr je lirsunn, jex liw .jaix .jaix, guaw .jaix .jaiw, lanw dag'ee benw qycc siy' amkamr."
"M hyw uirdiyhh jit sii siauxtamx, qewsiaur suijai langkeh ovec juii. Aurzit aw venr qaxx u hangg byy ci .kir, singliw e dyww pnaiw jyr." Duxjiacc decc dniuduu, kyxlu qongxx qamxx tangx qapp ix ciamx ORDER, sniu diyc qongsix juxquanw itjair anxnix decc qra inx diamxduh. Ix jurr anxnix junw suah.
Jit xee odasanw ee obasang taumngg vehpuxsig, jin' hyw cuir laii decc vaiwtog ix qra qauquanx jit diauu ciurlingtngg. Inx jex jit qangx rair qa'ngg lexha quiw vaiw, jiacc e kixked sriaux jit vaux .cud .kir? Qonghngg jit qangx qaix diyhh sec quiw linr, jiacc u tangx duw diyc jit xee hyw kxeh? Jap koginn. Amr dxngr, daurqnuax qiamw ced .nng .der .aw dyrr u :ar.
Ue qongw sniu' je, siyxkuaw u decc cuiwdax. Ix kir qamxaxdiamr qnrua jit quanr kola, limx liauw, sui' dyrr virvan beh qycc cuthuad.
"Siauwlenn :ee, liw jex jit jxox beh bre quiw ngii?"
Qamxaxdiamr ee tauqex juxdong decc qra mng kiw.
2002.1
Liauxbuexqniaw
Jiacc jaxsii jap diamw gua nia, tnix srad srad, tnisig bersux ervox zidtuu beh lyc snuax hitt sii. Cii Taiwtair an' caiwci-aw dngw .laii. Cur nirr ee iuvenrsniux u jit dniux kuaiwsinr, si beh qiar hro inx tauqex :ee.
Jairlaii, cur nirr duarser hanr ee puex, inx angx longxx e qa'ngg tiah laii knuar. Hordniuw ee puex, dyrr byy langg qnaw kir qra bongx. Mrqycc narr si ginxaw ee haghau qiar .laii .ee, jyr laurbuw :ee m na tiah qinw qinw, urdangsii aw qycc e qra cangr .kiw .laii.
Quiwjuxde singjig baiw, hing'uii vutduanx. Haghau kuihue, anwsngr au hagqii beh qra kaiduu. Cniaw qedniuw soksog laii haghau cue qauwbu juxzim camgi.
Mngg kuix .kuix, cur-lai ee hoxvanx qxauw hnauw hnauw nng sniax, sui' uaw laii dirr ix ee kadaux, cuiwjic trow dngg dngg, buexliux iyy qaxx beh lag .kir. Zit .sii, siqanx dngg lyxlyw, dyrr qanda' jitt jiah pomi dirr cur-lai qapp luxjuxlangg jywpnua. Narr poxtongx-sii, Cii Taiwtair jitt jun unw e kuu lyc laii qra qxauw ee taukag syx syx lehh. Qniazit ee jinghingg u kacc byy qangg. Qxauw-aw ix qyckacc gauu naix, kiongxqniax marr si qex liauw jit dniuu qangx.
Cii Taiwtair iutauu-qatbin, qui'ee simqnuax zuu cangxcangw. Ix kacc anwjnuaw dy' sniu be crunx. Ginxaw sewhanr ee sii dyrr hiacc zinziaw, hiacc did langg' tniar, jnuaxngiu duanrhanr .laii e jiauu venwkuanw .kir?
"Cii Jiwuiw taujauxceh, dirr qeaxlo uai'unn kir ho'ngg jangx .diyc. Ix langg jitmaw dirr paiwcutsow."
"Dnaxx guanw Jiwuiw dyrr siongrr siuw quiqiw :ee, tacc u kyxlingg taujauxceh? Linw hit m driyc .kir .ar."
Haghau tauu jit vaiw kar denrue laii, ix qapp langg' vawvar ziongw. Vnuar sinwgii aw kir qaur der. Ginxaw tauu lee lee, cicix cnghcngc. Vnix:a u jit xee qingxcad, dngdecc qra jyr vitlok.
"Unxdangr si hro inx haghau hitt quaw m jniaa ginxaw trua pnaiw .kir .ee. Langg ix vunxjniaa zuarr quaix lehh!"
Ginxaw dirr jingwlangg binrtaujingg camxhuew, huexqywsix jit dniux siaw qaxx bat bat si.
Survutliau kacc quer, Cii Taiwtair qniaa haghau suacc qaxnaxx decc qniaa jauwkax. Jiac hrunx, siy' pah, tautec jnii, mic'arvar dingxdingw, busow vutjir.
Jiaxee dairjir, jyr laurve :ee snactauu m kiw. Javolangg huexsingr cenw dordngg. Cii Taiwtair jin' qniax inx angx singwde giaa .kiw .laii, cywciuw e qra inx qniaw pah pah .siw. Mrqycc jitt vaiw ee jiacc dua diauu, ix qamxx tangx qycc amkamr lehh?
"Jitt kuanw dairjir, jnuaxngiu liw mrbenw kacc jaw qra guaw qongw? Siar-siw.-siar-jingr. Qacc air jyr pnaiw qniaw dyrr jueww ix kir hyw lar. Linw ve byy beh quanw .ix .ar."
Cii .Sensnix lyc amwtauu aw dngw .laii, inx bow buerjingg qongw suah, ix dyrr krir qaxx pudput tiaur, daurlangg ginxaw longxx me camx .lyc .kir.
"Tak byy vidgiap, aurzit aw cud siarhue, qapp langg' beh anwjnuaw e vixping .did?"
"Cab cab ix hiacc je!"
"Lanw dyrr qanda' jitt xee cinsniqniaw, jiac lau jin ngr marr ngr ix nia. Siauwlenlangg, qeqiamw longxx marr e qniaa cuac .kir. Hyw did ix iauxx jiyw huer, iauxx ciauu e dngw .laii."
Jyr laubuw :ee misnii-minua ter haursnex qongw hyw ue. Jyr laurve :ee crinr tauu crinr bin. Lorbuexciuw, simqnuax iauxx si huanw nngw. Inx ang'axbow horsiongx dnaxhap, pacsngr binaxjair kir haghau vaiwhongw qauwbu juxzim ee sii diyhh sunrsuar jah quaw pnuarciuw.
Jaxsii ox tnix amr de, byy sniaw knuar diyc zit. Bec'amr aw, vnuawtnix ee hunbuew jiauu snruar kuix, kixdyww u qnir diyc guec, jit baii aw niaa dyrr urngiaw.
"A'vaa, a'buw, guaw qra linw jiuwjua. An' qinaxzit kiw, guaw itding e zinrjinx tagceh, be qycc hro linw uirr guaw cauhuann." Ginxaw naxx qongw, bagsaiw, pnirqyy lrauu qaxx qui' bin.
Zit .sii kir caiwci-aw brew ee cair, luxjuxlangg qra vnir qaxx jit dyh pangx qongwqongr .cud .laii. Jit qekauw-aw jre siy' uaw, naxx jiahvng, naxx decc knuar denrsi sinbunn.
"Jitt quaw langg m taukag pnaiw .kir. Jitt kiw Songwpanr :ee henrhen dyrr uaiqysenx. Inx iauxqycc qongw piyr beh dngr hro :ix!"
Be qor did jiac, Cii Taiwtair qongw qaxx krir putpud.
2002.1
Pah Iaxqiuu
Caixpnuar ee ciuxqud jiacc giaa .kiw .laii, jairderqog ee qauwtauu dirr vnix:a huah banrcniaw si. Qiuvox lairdew qngx ngiawngiar. Dna'aw jiacc putauu ee guehniuu, jit sii suacc byy der knuar.
Iaxqiuu, jingwsiongg qauw qiok diyh'air qetsog. Jitt dniuu qaur qaxx siongrr suacbuew qiok, sianghongx iuguann pah vnee quer, diyh'air jiapsiysuar qycjaiww jenr. Dingw vnuar qiok, Cina Dxui tranr siuw :ee hitt vingg snax lxuiw :ee liuwciuw, jongg quaww vee, gne hro kiyh diyc jit hunx. Au vnuar qiok qrongx :ee narr byy kacc vniawsir qra hunsor cniuw huee, vixsair dyrr beh uanliauw.
"Knuar jitt xee vanrser, qnaxx si beh qra Dua Paur cniaw .cud .laii ee kuanw."
"Jitt jun ngua ix kiw .laii u tongx lar. Jit hunx narnia. Jit qix homran dyrr u :ar."
"Qongw :ee kacc kuair. Qongr homran ix si jiokk u vunxdingw, kacc qniax si iurqycc kir ho'ngg sansin."
"Tenliongg qongw. Langg' guandew hitt xee jauw qaiww qinw, hyw qiuu pnaiw qiuu marr gauu qingw. Qauwlen ngua junw guaw laii jyr, guaw beh rair kacc jairunw :ee."
"Liw jex ue si qex qongw :ee. Dnaxx siw nng xee .kir .ar, su'ngiaa tangx qongw si jin jitt xee. Narr m si ixqingx qniaa qaur qik vo, nacsaiw diyhh kir ing qaur jitt hy qik jiaux."
Qongr lxyy kar duarqow, langsniax hanxhuah, siwkolingwdngw, qii-aw ngiarngia vuex.
"Linw jit vingg huah Daiuann Dui qa'iuu, jit vingg decc huah Dionghuaa Dui qa'iuu. Huah dy' huah byy qangg sniax, kacqex marr lilixlaklag."
Jit xee adok'aw anxnix jiacc qongw suah, sui' dyrr u langg decc mng ix kacc air dycc jit dui ngiaa.
"Jex iarr suacc diyhh qycc mng? Guaw marr druar jiax, snesingg air linw ngiaa." A'dok'aw qongw liauw, HOT DOG dua cuir gnauh.
"Jitt xee vacbinvah si Bixqog aw."
"Guaw marr anxnix iyh."
"Dairliok qniazit narr pah ngiaa, Bixqog Dui pni-aw bongx lehh diyh'air dngw kir jiac qaqi. Qongw qaxx jiacc hyw tniax .diyc. Penr langg' decc m jaix."
Nng xee guarsingw :ee gnihgnic gniaucgniauh decc girlun, qongxue longxx an' pnirkangx cud .laii.
Qauwlen jinjniar qra Dua Paur cniaw .cud .laii. Dua Paur bagjiux siongr junw junw, bexser kia jai, knuar narr u qacbak ee qiuu dua lat dyrr qra huix .cud .kir. Longxx qaiwgua :ee dyrr urngiaw.
Quanjiongr jre quw vakdow e iaux. Tuax zuxx nguar, hyw diyc siwquer decc huacbe damrsamw ee a'vxeh :a.
Derr jap-snax liap qiuu iuguann byy qetqiok. Jitt sii, iurqycc u langg decc vinglun, qongxx jex si dauciuw qapp Dua Paur iwjiwlat ee duiwquad.
"Air kunr qaxx. Guaw beh laii dngw :ar."
Adok'aw kia .kiw .laii, sinkux suar cun'unn .jit .xe.
"Jiuruaw beh suah :ar ne. M dyrr qra knuar hro liauw."
"M a. Binaxjair rair qycc siongrvanx lehh. Kacc jaw laii dngw kacc driyc."
Adok'aw et jit xee ciuw, giac tauu knuar tnidingw.
"Ing'amr tnicnix qycc jiacc je .diyc. Duxjiah jre lehh suacc longxx byy juwir .diyc."
2002.1
Nailong
Ho damm juiw dih. Jap lyc dxangx jingg, Nailong beh cutjongr hitt jit zit, tniax qongxx guan'aw jitt hy tnix.
Qui' cuwqingx juann hniupangx. Qapp Nailong byy-cin.-byy-qor, byy-sig.-byy-sai. Go~lak nii jingg dirr jit vunw jabjir binrdingw jai'ngiaw qongxx Daiuann bad cud quer jitt hy zinbut, dagg nii ix jywqi, dy' e sniu beh qra siyx snax jangg cinghniux.
Denrsi sinbunn zxic-sir siyxsii, qui' qangx caw caw qiyr. Amwtauu aw :ee guanjai lyc dang qiamm, he dang hiamx. Cniuw :ee, qiab :ee, taux :ee, jiaxee sngr suwsiongg :ee. Taii ve sad buw gik gnoxlunn :ee dyrr u qex kacc hihanw, ciangjai ho'ngg vaii dirr siongrr taujingg. Cnix :ee qongw angg :ee, vec :ee vyr ox :ee, zuu qawqar, huex sawsar. Sinbunn suacc qaxnaxx venr jyr decc ho'ngg jyr golok :ee.
Nailong dikkag jiokk m guan. Snewmia ix decc liauw, hyw kangx :ee, dendyww hitt vingg :ee kiyh .kir.
"Siser qniaa qaur jitt xee kamxjam. Nailong dyrr narr jaiww cutsir, vycdnia marr cue byy ix ee derdniuu :ar."
Jarhngx jyhzit aw u tniax langg anxnix decc huntiah. Jimjiog qycc quer sniu .quer, duiww Nailong suacc damrvyc aw decc kiw uanwdor.
Denrsi qimr .srid, denrhuew jongw qra ced huax. Sir-guec cecid ee amwmii jamxzenn aw jing.
"Nailong, liw an' dingxquann knuar Daiuann, qamxx marr ham' guanw qangrkuanw, iarr jiokk utjud :ee?"
"Huanrnarr laii qaur jiax :ee, dy' byy langg e uirr erdew ee dairjir qycc cauhuann :ar."
"Liw uirr ix jit diauu mia pacsngw .kir, qamxx qongxx duiww ix byy jit sxix aw ngwbang?"
"Guaw snesingg e qewsiok qra vyxvir. Suar .lyc .kir ee lo, diyh'air kyr linw qaqi."
"Nailong, liw siyw danw lehh. Guaw beh duer liw kir."
Nailong bagtauu qad qad, et jit xe ciuw dyrr jyww ix jauw .kir.
Bagjiux vreh qimx. Tnix qngx, cud dua zit.
Jimxtaulongg damsib aw damsib. Jitt sii jiacc hyw tnix. Qinw qra vrag lyc laii tec cud kir guarkauw vuerdax.
2002.2
Jiyx Si'angw Limx Qavix?
Nng luiw bagjiuzinn linwlinr sec, dyrr dna' uirdiyhh beh cue diyc hitt xee. Jex dingrquix m si hyw vorsor. Cud laii guarbin bongxx dngx, kacc anwjnuaw qongw, jongw u viw jriuw dirr cur nirr kacc qybingg.
Qecviah dyh ee sensnix laii beh jiyh tngg, jin' hyxlew, bunw bunw aw ciyr nia, nng vingg cuiwpuew ee jiuxkud-aw bingg ~ ~, knuar .kiw .laii jiokk sunrjingg. Javolangg u jiuxkud qaxnaxx u kacc hihanw. Jimmi byy jiuxkud-aw. Venrnarr decc qongxsngxciyr ee sii, ix qangrkuanw u jitt jiongw binrsinn.
Piauped ee qywsingr, gnerdit, byy uanx byy kiaux. Dirr jitt xee bxan hxang longxx senxtauu-aw decc jywlangg ee sniaci, Jimmi sngr jiokk hanxiuw. Jit hyw dniardiyc dy' qah jit baiw. Huewtauu jiac qaur snax~sir-jap :ar, ix iuguann l.-liuwpiur-p. jiokk byy dingrsingr. Qethunx si uirdiyhh beh prax dniar. Nng xee langg ee junn kixdyww cue byy honghiongr, sraiw qo' pxangg huanrser iauxx kacc ngiaa.
Qavix pangg kiw laii jrip .jit .xe. Cimxx qniaa .zip .laii jitt xee, binrboo-aw qapp Kenni jiokk cancniu. Bad tniax langg' anxnix qongw, qongxx huanrnarr langg longxx u jit xee hxingg, dirr jitt xee sewqanx, siongrr jiwjiyw u lingrgua jit xee qapp ix snex jyr jiokk singg.
Jyr unrdong-kiwjaii ee qingqiw, qui' nii tangr tnix decc bongx qihaii, Kenni jap qix jingxtauu-aw vutsii dy' cingkir damdamx, qycc qrax qapp jin' jingxjee. Qapp ix jyr javox jabow ving'iuw decc qniaa, zet, m zet putpud, byy qnir diyc bin qongxx e qankow; lingw ee sii, byy-siau.-byy-sid, lenrr jit tongx denrue dy' danw byy. Cue jit zit juanqangx iog ix cud .laii, juxdong tee cud qewcua ee dairjir. Ix bin-aw iux iux, qongxue tihtic tobtop. Dangsi'aw ix duiww hun'inx jitt jann iauxx u digii. Ix byy qongw jitt siwlangg byy beh crua, qanda' qongw siqanx rair qycc cenn .quaw. Jitt vaiw ee huwcud u kacc je. Hitt qangx dngw .kir, lensuar quixlyrr amr longxx qamm bagsaiw decc kunr. Jaboxlangg ee cingcunx si dew dew. Gong gong aw danw, dikkag m si taulo.
Jre dirr jniawduiwbin hitt xee, viw kax drang ciuw, qongw qaxx hnuatauu hixbin. An' tauu jiww buew, inx hitt dyh :ee qaxnaxx longxx juann ix ee sniax.
Jin' hranw did duw diyc cincniu Stanli jiacc hyw dauwdin :ee. Ue je, dy' iarr m bad tniax ix qongw quer jit qxur kacc dang :ee kir kikkuix .langg. Be limx, be vruac, u ingg, ix dyrr siwquer kir tniax enxqangw. U jit dxauw, ix kir tniax langg qongw miarliw. Suhu henrdniuu ter ix qra miarvnuaa vaii vaii lehh, veczi viw viw lehh, qongxx birlaii ee kanciuw diyh'air qaiw miazi, ang'axbow jiacc e tangx huwquir bxan nii. Ix sinr ~ ~, quat'ir beh jiauww suhu ee iwsur kir jyr. Duer angx sner dy' be genr :ar, byc qongw si qaiw miaa. Byy da'uaa, jitt jann im'enn jurr anxnix cexvaiw.
Hogbursingx laii decc tinn qunxjuiw. Taujingg aurviah dyh :ee iurqycc ngua jit pangg langg zip .laii, siauwlenn dindangx, uree qongxue qycc cauwlingdaix.
Inx snax xee langg ee denruehuanx guanjai siux dirr ciuxqix-aw ee qiwdii lairdew. Jiongsinx dairsu dyrr jiamrsii qra lag jit vnix. Tranr jitt xee ervox-sii zidtauqngx nngw nngw, jywhuew limx jit vxuex aw kofi, ingwqaix si kyxiw.
2002.2
Dnuasinx Kulogvo
Klub ee duarjixtauu-aw dingw guehzit kir ho'ngg sangwdnia. Jixmueaxqunn jiyx jiyx qui' din laii decc camgi, knuar qongxx qycc suar .lyc .kir beh anwjnuaw cuiciauu.
Lun qisit, inx qokk langg simqnuadew jaw dyrr u diwqag .diyc .ar. Iog beh siy' dngrtauu, ix quixlyrr vaiw longxx byy qauwui. Dyrr narr laii, marr si qnuaw huwhur, unr jit xe aw dauriuu dyrr beh jauw. Ah'axvniaw qapp lexvniaw qui' xee hyw hyw kngr dirr inx bagjiux jingg. Dnaxx dyrr juiw cringx jiyc hen, hro inx be liahhoo .did .ar.
"Jap liap giyy kacc sux jit diauu qxiyy. Bycaiw ix qycc si lanw klub kaiqijow qidiongx ee jit xee."
"Dingw nii aw jit xee jixmue qewangx .kir. Duarjixtauu-aw duiww ix vutjiw aw uanwtanr. Venrnarr qongw .diyc, ix dy' vnuar kaux, vnuar siah, qongw suah, qycc e trow duarkuir."
Jiongww jixmue te te, liw knuar guaw, guaw knuar liw, byy-ue-byy-qxur, jamxzenn aw hibii. Srux dongcox klub dng' cnia'ngia ee sii, jiyx ee hueruann beh qaur jnia' cingx xee. Acc jitmaw, cunx kacc byy jit vah xee, langg jiokjiog jauw qauw snxiaa .kir.
"Qewangx snex qnaiw, jex guanvunw dyrr si tensingx jurzenn ee dairjir. Qacc narr jiyx byy langg, dyrr hyw qra siux siux .kiw .laii."
"Beh siux .kiw .laii m kacc qanxdanx. Si decc huanlyw qongxx aurzit aw jit quaw jixmue e byy der kir."
Qongw byy nng qxur, iurqycc diamrjing .lyc .laii.
"Ngua jit xee kangvang, linw knuar sniaw kuanw? Lanw ingxquer longxx sniu' quer vyxsiuw. Byy sniu venwvo, becnacc duer e diyc sidai?"
"Queaxtauu ee kangvang, jabhuex-gorsig, simxmih kuanw marr u, byy kueckiamr qaxx lanw jitt der."
Snax qongw sir qongw byy jit xee qetqyw, simhuew giac kiw laii, qongxue dyrr kacc byy junxjad. Ho'ngg qongw :ee bin-aw angg qiwqir. Puevaux-aw pnai lehh qongw beh singx sitlew.
Kiwser iurr qyckacc ce .lyc .laii. Guarkauw amr sysyx. U langg tegi qongxx qinaxzit dyrr qaur jiax suacqow.
"Linw anwsngr beh vaux zuarr je?"
"Dingw dingw qywguec m dna'aw jiacc vaux jit vaux .kir. Dyrr qangrkuanw cingx-zi a."
"Dnaxx hitt xee, laii byy snax vaiw, angg tiab-aw dyrr qra liw qiar .laii. Duarjixtauu-aw ter lanw jyc jingg jyc au v.-vunpyx-p. jiacc je nii. Qnialorqangx dy' m na hiaxee."
"Si dyrr driyc m."
Dag'ee qongw jit xee dit, singx tyr ven, anwsngr sii qaur zit qaur, inx dyrr lexsor qaur, langg byy beh qaur.
Beh siy' srii jinwjingg, inx horsiongx u ioksog, qongxx aurzit aw guanjai beh qycc qniwbin. Jingcax qongxx siqanx derdiamw, inx jitt vaiw byy jaidiau sui' dyrr quatding.
2002.2
Aursnuax
Ketagalan-ue, byy .kir; Taokas-ue, byy .kir; Pazeh-ue, byy .kir; Hoania-ue, byy .kir;…
Bad dirr jit qingx jupor vingw diyc jit vunw ceh, jit vunw decc qaiwsiau quewkir vnevojok ee ceh. Hex qui' vaii ee miaa dngg lywlyr naxx bacjangwqnua kngr dirr qangg jit iac, knuar lyc qaur der, e hro langg qui' sinkux lrauu cinwqnua, kaciuxbah laglak cuah. Dangsi'aw dirr jitt pxenr toxde dingxbin, bad u jiacc je jiongw gixgenn sitlyc .quer. Sitlyc ee ligsuw, sitlyc ee zinbinn.
Aursnuax tamwhongw, nng qangx jit mee. U beh camqax :ee, kaciuw rair qinw.
Beh kir Daidangx ee jingg jit amr decc kuanw lairsnakor kunw hingliw, a'buw guanjai dirr vangqingx decc knuar lensiogqiok. Qoxjaw hongder qapp ix hitt quaw duarbow sewii ee hiwcud, dagg amr ix dy' knuar qaxx bagsaiw lrauu bagsaiw dih. Langkectniax lingrgua u jit daii zxic-lak cunr :ee, longxx a'vaa decc knuar kacc je. Derr sir daii dngdecc qaiwsiau Dngsnuax ee qongqingw, si cniar kacjaw jit xee luxjuxvyr jyr suhue. A'vaa siongrr air knuar ix ee jetbok, dniardnia dy' ylyw ix m na sniax suiw, qarimx qycc jingwkag. A'vaa hagbun vutjiw aw vaw, vitbuew marr be baiw, ciangjai hro qniaxzii sirser ciyr qongxx qongw qokgiw e jauximx u hro ix kacc utjud.
Taur siwlangg tauu jit vaiw beh zip Aursnuax, simjingg hnuahiw qycc iarr qinxdniux. Qniax hur be diyc huexciavangx, tnix pacpuxqngx dyrr vreh vreh .kiw .laii. Uirdiyhh jitt vaiw ee luxhingg, qycc u juanqangx kir brew nng vunw ceh anwsngr dirr huexciax-dingw tak. Jit vunw si decc qaiwsiau Aursnuax ee zinbunn qingxdir, lingrgua jit vunw si siyxsuad, hy juer "Cutcauw".
Dangvo jiax e ho'ngg qiyr jyr Aursnuax iarr bogquair-qizenn. Huexciax quer Gilann, quer Lydangx, huexcialo qapp snuax tangx qongw vutsii dy' pnua siy' suii. Tickuiw ee jniawvingg si snuax, dywvingg si haiw, quanrr Taiwvingg Xngiuu. Huexjunn an' Hualenn Qangw diddit qniaa, ingwgiac, dyrr erdangr tangr qaur Bixqog .kir.
Lyc ciax, niaxdui giac jit qix qii-aw dirr ciautauu guarkauw dngdanw. Niaxdui puebah oqimx ~, bagjiux dua dua luiw, snex jyr vutjiw aw endauu. Dirr iulamxciax dingxquann, maiku giac lehh, dac uertauu dyrr qongw ix si Paiuan, Daigiw kacc hamban qongw, rair dag'ee dydyx vauhamm.
"Lanw longxx mair qongw Daigiw. Lanw longxx qongw qokgiw."
Niaxdui qongw suah, jit xee ozisang jriap ix ee uerbuew. Jitt xee ozisang si keclangg, Suhuan cutgiap dyrr dirr qokhau-aw qawceh, snax-sir~jap dxangx byy tingjam. Ix dingw nii aw jiacc ho'ngg sringx kiw laii jyr haurdniuw, siongrr krir langg' dirr haghau qongw Daigiw.
Tnix hniaw hniaw, en' lo iucaiwhuex ngg gimwgimr, snuax cnix linglingx. Qongw diyc snuax, jex Daivag guan'aw byy hihanw. Jingcax qongxx Daivag ee, binrdingw u biyruw, u kiarqex jit cog jit cog, hng hng knuar, jit xyx jit ux, bersux caur liab'axpiw. Aursnuax ee langg qex jiokk jiyw, snuax-kax dyrr u qraur kia, benw druar qaur snuax-dingw .kir. Jiax ee snuax quann quann qe qe, dagg liap dy' jiokk cnix, jiokk suiw, jiokk guansiw, qaiww singg qongxx jingrr u tnide, snuax-dingw hitt quaw soxjai dy' iauxx m bad u langg qniakax qaur.
Amwsii, dag'ee kunr jongxpox, hunx javox jabow, byy hunx ving'iuw angbow.
"Guanw tauqex duxjiah u qra guaw qongw, qongxx muanii beh vnuax laii jiax iongxlyw."
Dag'ee crux pue virvan beh kunr, jit xui sir~go-jap huer kuanw ee luxsu anxnix decc qongw kiw. Inx angx qongxx si Snuadanglangg, jniurnii jiacc an' liogqunx tewhiux. Inx u jit duir haursnex jaboxqniaw, henrcuxsii longxx dirr guarqog.
Huandngw qangx ee kors si beh sec cirkux. Iulamxciax kaux jit linr, u langg decc huah cuiwdax, air beh jiac liangg :ee. Unjiang qra ciax sraiw qaur jiuqin jit qingx qamxaxdiamr taujingg dyrr dongwdiam.
Jit din langg lyc ciax ex ex sag sag. Mngkakauw u jit xee obasang jre dirr jit jiah ixqoxtauu-aw dingw, sinkux ngar lehh dngdecc qingw cair. Obasang si Bunun, zidgiw bad .quaw, Daigiw siyxkuaw e tongx, uirdiyhh sunx-aw, qycc bad kir yc quer vopomofo.
Langkeh qauwui, obasang ee simvu cud laii decc gniacniaw. Kiwjuiw naxx limx, u langg dyrr naxx decc mng knuar inx singliw sniaw kuanw.
"Huex huex tywtyr lar. Pnar siaur narr byy je, dngg siax dew kiamr :ee kacc jiyw .quaw, sax laii trad kir, limw limw aw iaxx pah e duxdit. Marr byy huatdo. Dy' longxx cuwvnidaux. Lanw roo erdid quer dyrr hyw." Siauwlenn tauqeniuu anxnix qongw.
Beh dngw .kir, sui' langg ciuxtauu qeqiamw longxx u jaw quaw omiiage. Ongrlaii-sikqiax jueww derr id cniuxci, qeww qui' sniux qui' naa decc kuanw :ee.
Kec'ue, byy .kir; Amis-ue, byy .kir; Bunun-ue, byy .kir; Paiuan-ue, byy .kir;…
"Daivag Ciatauu qaur :ar. Beh lyc ciax ee luxkeh, cniaw m tangx be qir did qaqi ee mihqnia."
Jit xee bang jyr iauxx bue suah qongxx dyrr qauwui :ar. Dirr Aursnuax jitt nng qangx quer qaxx sngr u jingcaiw, u suacpah. Qoxjaw guanjurbinn iongxsu cutcauw ee qowsu, an' tauu jiww buew byy tniax langg decc tesueh, dogdok jitt hxang u kacc bycaiw.
2002.2
Kang'axpang
"Qnualenn qapp suahienx qokk jit hxun; cewqngw, hunxqnuax qapp snidngg longxx ced nng hxun aw laii; eaxcair sac nng vnuaa, bacsyr qapp cangjux qra guanw kngr kacc je lehh. Qycc u hnoh, daurqnuajnir qapp haixduar beh air…"
"Hyw ar lar. Qiyr qiyr jiacc je, qamxx jiac e kir?"
"Jiac be kir nacc u iauwqinw. Hnuaidit iarr benw jnii a."
Bersux langg' qauwdngg decc jyr lexvair, siqanx narr qaur, dag'ee dy' e iog beh jywhuew jiahvng, jit lexvair qowding jit vaiw, soxjai dagg vaiw longxx byy qangg. Be qir did si dangsii kaisiw :ee, marr m jaix si si'angw singx cuartauu :ee. Jongw .si, jap xee jap si qaixgiamm liauxau jiacc kixqow :ee be dingdnaa. "Sanbinjuxgi tongxid Diongqog", jex si inx ee sinwgiongw. "Jit langg juxdniux, m dat did nng langg suniuu", jitt qxur si inx ee diongsimx susiongw. Kyr jitt nng hxang, qu :ee trua sinx :ee, qaxnaxx sxaix :ee decc kanx sai'aw, jap gua dxangx dyrr anxnix tngg .lyc .laii. Jitt vaiw beh qra dycc jit xee qrngx qiy, au vaiw beh qra si'angw sauciyr, huanrnarr jiaxee, inx longxx e singx qongw tongtyr.
"Guaw siongrr qniax kir caixhongw hitt xee cenqimx siyxjiaw. Dnuaxdnuaw qig qaxx jit xee bin aur giaa giaa, bersux langg' kiamr ix quixnarr bxan."
"Liw marr duiww langg' kacc liongrjingg lehh. Linw dingw vaiw qra inx vaa :a vyr qongxx kir Makau kaix jabow. Langg' byy giac jangsaur qra liw hor hor .cud .laii dyrr sngr jin' hro liw binrjuw :ar."
"Dyrr driyc m. Linw vywquanw qamxx jinjniar byy zinjaii :ar? M dyrr pair vadd langg kir jiacc driyc."
"Jex sinbunn dua cniuxci ne! Guaw jiacc byy beh niu hro vadd langg lehh."
"Guaw qra liw qar lar. Liw suacc berhiauw kir mng hitt xee qniaxsair. Hex caiwjiauw-aw. Cinwcaiw .snax~.nng .qxur .aw qra quaiw lehh, ix ue dyrr laur .cud .laii .ar."
"Inx hitt kauw jaur qacnarr longxx jiacc qiksaiw, qra linw joxmaw gik .diyc, sii qaur, guaw dyrr qaqi venx."
Dag'ee pacciuw ylyw ix jin' jairdnaw, siyjiuxvuex-aw tinn hro limm dyrr huah beh qanvuex.
"Sinbunn juriuu banrsuer. Hro dax lar!"
Kiangx, kiangx, kiangx. Diap aw quw, dagg vxuex longxx berdangr cri qimhii.
"Jiacc qinw, snax diamw :ar ne. Linw iauxx laursinn jai jai."
"Guaw si byy cax lar. Inx sinbunqyw longxx cuann ven ven dilehh. Kir hur jiac siyxdiamw dyrr ersaiw :ar."
"Jnia' hyw kangx. M jaix dangsii guaw jiacc erdangr ho'ngg driaur kir jauw cirhuw."
"Linw jauw singxhuw :ee, m si qongxx dniardnia ho'ngg jiautai cutqog kir cittyy?"
"Dnaxx hex zuarr quw ixjingg ee dairjir :ar! Venwtnix :ar, byy ingxquer aw jiacc hyw jiac kunr."
Limx jiuw, huacqunn, vxuex-aw cid kab veh ciyr. Jitt dxngr jiac qaxx jiokk lalex, inx qiyr tauqex laii sngr siaur, dag'ee puevaux-aw zimm .cud .laii, siy' jnex beh lap jnii ee kuanw.
"Guanw jyr qiwjiaw, lamvak zi lo jauw taur taur, m bad jiacc quer cincniu linw jitt dnar ee bixhunxtngx jiacc hyw jiac :ee. Lingrqangx, jiacc qiyr guanw dongsu laii qra linw caixhongw, hro linw tangx jit miaa taur qniasniaa."
"Urngiaw or! Jitt dxauw guaw cniaw. Caixhongw ee dairjir, jiacc brang linw kanx snuawsyh qra guanw suachuac."
Qniaa cud laii duarlo-vnix, inx jerje kox jit xee cauwsngx eh dua dua sniax, caur jiuxbi jyr jit kunr jauw jauw .cud .laii caur qnarqna. Quewlorlangg pnikangx dnec lehh, qinw siamw qaxx li ~ ~.
2002.2
Hamr Qxow
"Dag'ee kia kacc uaw lehh, jimjiog knuar jex lingtiau. Linw u knuar .diyc bor? Jitt buew lringg, tauu crunx cud kir hunbu binrdingw, buexliux dngg liuwsiur iauxx dirr zinsewqanx. Jitt xee iwsur dyrr si qongxx, tnikae, bylun e jauw :ee, e vuex :ee, e siuu :ee, e syy :ee, qewqer si ix ee quanxlai dyrr driyc."
Dyriuu decc jyr suecbingg ee sii, nuarciux qycc naxx punr. Siongrr buew aw zri u kacc cud lat. Ix binrtaujingg jit xee taiwtair siamw byy li, bin vuthing suacc hro ix ee nxua dnua .diyc.
"Linw dag'ee bagjiux tenw kacc dua luiw qycc knuar kacc siongser lehh. Linw knuar jitt buew lringg kig qaxx anxnix uac lingwlingr, kax dyrr si kax, kaziauw qycc huanrr kaziauw, lenrr hex jit pnir jit pnir ee hilann marr kig qaxx bingg duw bingg."
"Lanw jiycmng .jit .xe hnoh. Jiaxee tiau-aw tacc diyhh longxx uii .kiw .laii? Byy jiaxee lanqanx jac lehh, m qex knuar kacc u?"
"Jitmaw ee ginxaw get qaxx beh iauxsiu .siw. Lingtiau qra liw junw jyr dua ciu, vnicniuu-vecviah, bersux qausan'aw. M qajair u jiaxee lanqanx. Narr byy, linw jitt jun iarr u tangx… Hneh, hneh, hneh! M tangx lar! Jex si si'angw ee ginxaw anxnix. Qycc m qinw lyc .laii!" Dyriuu jit qxur ue buerjingg qongw suah, sui' dyrr u jit xee javoginxaw beh krangr .kiw .kir.
Lirkuix biyrsi. Suar .lyc .laii, anvaii beh camquanx derhngx jit xee gauu langg inx vangtiau-lai ee tiongxde.
"Inx jitt kud, derliw sxaix :ee qongxx si linghet. Laurve laurbuw dyrr longxx ciuxbin tanwjiac ee cnemeguu, suacc cud qaxx jit quaw qniaxzii sirser longxx jiokk jiongwjaii. M si decc jyr dua qnruax, byy, dyrr decc jyr biniwdaiwviauw."
Zidtauu iam jngwjngr. Duarkolangg kacc qniax zuac. Dyriuu dyr ciuw pnai jit xee hongwsangwtauu, jniar ciuw tec jit diauu ciuxper, naxx qongw naxx decc crid qnua.
"Dyriuu ar, lanw qycc jiycmng .jit .xe. U jit qxur sioggixue qongxx, 'lringg-srinx jiyh qauxvag cutsir.' Anxnix qongw .inx, qamxx u hac?"
"Simxmih jiacc u hac nia. Ba sngwsngr or."
Uaw draur, iulamxciax jair dag'ee kir jiac daur. Qauwui, cantniax jiuxenn u virvan hyxser decc danw :ar.
"Dyriuu ar, dnaxx inx cud qaxx jitt hy simxmih cair? Ox sysyy."
"Linw si m tangx knuar niaux-aw byy diamw. Jitt bi :ee, bersux lringg-qnuax hxong-cuew, jitt hy tnix laii jiac, dng' tewhuew :ee. Hex si guaw qapp inx dyjiw sxaix :ee u sik. Narr byy, linw u jnii dy' byy der tangx jiac."
Vunxjniaa qui' vnuaa hyw hyw byy langg junwbun, tniax dyriuu anxnix qongw, jingwlangg suacc siy' jnex gneh. U jiac u qniakir. Vngrcair tunx lyc auu, ue dyrr kaisiw je :ar.
"Linw ginxaw quiw huer? Jiacc dua-hanr-kuanw."
"Henrnii dnaaw jiacc zib'yc."
"Acc m qapp guanw duarhanr :ee qangrkuanw, vnevnee sniur lringg :ee."
"Jiacc duxaxhyw, guanw didix marr sniur lringg ne!"
Snax xui oksang, u quann u ew, u sanw u pangr, qongw diyc cinsniqniaw, dyrr longxx jit xee ngiu.
"Linw longxx gauu snex. Aurzit aw jiaxee longxx e si jit buew lringg." Dyriuu naxx qongw, snax xee ginxaw ee taukag sui' xee aw qra syx .quer.
"Mamax, jitt xee a'jig tacc e qongw guaw si jit buew lringg? Bixqog laursux bad qra guanw qongw, qongxx lringg si quaiwsiur, e punr huew, qycc e jiac langg!"
"Ovec qongw," laurbuw qra qniaw qawsi. "Inx hex adok'aw m bad lar!"
Taur diongdaur, tnikir dng' siyzuac. U jit xee ginxaw hiwqngw kacc lramw, an' guarkauw zip laii iulamxciax lairdew, jid'err cuex diyc lingxkir, sui' dyrr kuckuh sraur.
"Kyxlenn or, nacc e sraur qaxx anwnesnix. Lingqaksanw deh sraur siongrqaiww u hau. Guaw qinaxzit duxhyw u jah. Dnaxx qinw kad hro jiac. Benw sewzi. Ginxaw jit kog dyrr u :ar."
2002.2
Kenwsngw
"Siyxjiaw, guaw beh cringw jit qix denrue. Qamxx u hitt hy buew huanx si id sxamx id sxamx :ee?"
Vanrsu siyxjiaw giac tauu liac qongxue ee langg knuar .jit .xe, bersux decc qiamxjax knuar qongxx laii jiarr qamxx u snex mox dair qag.
Dngw laii qaur cur, jap-snax hxang jap-snax hy ee puetangw lairdew u puex. Giac syxsii qra kuix .kuix. Denrhuew, juixdy, sinwiongrkaw, qaxnaxx longxx jit quaw siauwdnuax kacc je.
"Goo Taiwtair, beh cud .kir .or?"
"Hngr." Druar siy' qecviah ee oksang bin-aw hrngx hrngx, qanxdanx rinr .jit .xe.
"E sniu' dang be? Guaw qra liw draur qnrua."
"Benw lar. Guanw tauu:ee sui' dyrr cud .laii .ar." Goo Taiwtair naxx qongw, ciuw qycc naxx et lehh et lehh.
An' qurnii Cid-guec-vnuar hitt qangx dag'ee kaisiw jyr cuwvnix, lo-tauu lo-buew siy' duw, Goo Taiwtair longxx m bad juxdong qapp ix hniwhnar.
"Hitt xee jinjniar si quair langg. Sinjniax-sii aw, dagg qangx dyrr decc saur de. Lanw hyw ir qiyr ix m tangx qycc saur, byy, jaisin'iaa e hro qnuaw qnuaw .cud .kir. Ix suacc dyww qra guaw qawsi, qongxx simxmih hiyckunwzit, qui' qangx dirr cur nirr, kiarqex qex kacc kuair lapsab, byy vniar, langg e puawvne. Jitt hy qongxx si haghau laursux. Guaw sidjai jnia' m sinr."
"Siauwlenn vuer :ee, sirduarlangg narr byy decc qar, dniardiyc kacc m bad dairjir."
Mngsyw kuix .kuix jiacc beh dac .zip .kir, u tniax diyc Goo Taiwtair qapp duiwbin sew-snxax-aw-dxiamr ee a'sangw anxnix decc hue.
Qui' senx langg siangr duiww pongwiw nirr vnuar tex lehh. Bagjiux kreh lehh sniu beh siyw bii .jit .xe, cur nirr ee denrue decc giangx.
"Tiab-aw? A, u lar, u lar, duxjiacc siux .diyc nia. Vaux zuarr je? Narr qewcua, hex snesingg diyh'air vaux siangx siangx :ee a."
Denrue jiacc qongw suah. Ngua denrlingg decc jiucjiuh qiyr. Druar dirr ciaa duiwmngg ee vangdangx decc qiyr jiahvng. Inx daux snax xee ginxaw dirr haghau tagceh duer langg' be diyc beh cniar qaqaur. Cuwjuw kiamr jit xee sensnix, cuwkax dagg amr uirdiyhh amr dxngr decc siongx nauxqinx. Dnaxx dyrr kih cuir :ee jiac la'axbah, anvaii qaxx jinjniar si ba ~ ~.
"Lanw jex hii-aw m tangx vingw, qra hiquttauu piyx .kiw .laii dyrr tangx."
"Si anwjnuaw beh jiacc huiwkir lehh?" Ginxaw mng cuwkax sensnix.
"Hii-aw narr qra vingw vingg, e hai diyc liac hii :ee vingw junn."
"Laursux, linw daux qamxx tyxhaiw :ee?"
"M si lehh. Guanw daux jycsnuax :ee."
2002.2
Iwjir
Langg vingww jingsinn :ar, dyrr qanda' m qramx qra bagjiupuee tiw kuix. Bagjiux kreh lehh, qeqiamw dyrr iauxx u bang tangx hyw jyr.
Tanglii-aw giuw .kuix, vangqingx sui' venr qaxx qngx ngiawngiar. Cid jaw veh jaw, zidtauqngx dyrr jiacc qa bak. Cngqinx qra vrag .lyc .laii danr zip kir sewsnaxqix lairdew. Jit quaw sna'axkor kacc kuair amjamx :ee iarr suar qra danr danr zip kir jyr jit kunr sew. Vnevnee longxx sowsig :ee, kacc benw qniax e kir niw diyc sig.
Jnia' qywguec byy jywhuew :ar. Jarhngx ix laii cic denrlingg. Jid'err qnir diyc ix ee bin, nngw simx .qaur .der, iurqycc qra kuix mngg. Ix dyrr si be kamx did langg qra qojniaa. Kingg jinx, sidjai marr si m qamsimx.
Snxax sew hyxser, sui' niaw aw qra tenw kuix pix druar dikqyx dingxquann. Ving'iuw becnarr knuar diyc ix jitt kuanw, dikkag e ciyr ix iurqycc decc jyr genwtauu :ar. Vehvec hro jiac, hro kunr, qecdngw qangx kixcngg, lairsnakor qycc diyhh qra sew, qra pix.
"Liw dyrr sniu qongxx ix duiww liw byy jinx simx, sunzenn si decc sngw :ee narnia, huanrser liw duiww ix dyrr be jiacc cijingg :ar."
"Liw qniaa zip kir jit diauu byy buew hang, quibuew, juwdnia rair vrong viah."
Ham' nng~snax xee aw diqiw dauwdin, inx u cuir qongw qaur byy nxua, jongw qongw .jit .qxur, dyrr si rair ix qinw huanx tauu, qinw dac dongxaw.
"Qongw :ee longxx kacc qanxdanx. Quixlyrr nii ee qamxjingg, qamxx jniasit jiacc qanxdanx qongxx huah cew dyrr cew? Amwmii si dngg lyxlyw. Sinkuvnix byy jit xee langg tangx uaxkyr, hex si zuarr qodnuax lehh linw dy' m jaix."
Ue naxx qongw, bagsaiw naxx lrauu. Ciuxtauu jit diauu ciuxqinx-aw damm loklog, bersux u durdamm .quer.
Cur lairdew kuanw qaxx vutjiw aw jingxjee, dogdok hitt xee jauwkax, hriongx quixquiw, be qnir did langjingr. Hitt xee langg qenww vaiw narr laii, ix quxnii ee sing'uac quanwsir, jit sniax dyrr hro bruw qaxx zuu cangxcangw. Narr byy, cincniu ix jiacc cingkiwsniur, hiaxee nguaxvnuaa iuu decdeh, iarr suacc u tangx kngr qaur huandngw qangx?
Ix m si berhiauw sniu. Uirdiyhh beh qetsog, u jit vaiw, ix qycc juanqangx jauw kir biy nirr jiuwjua hro sinbingg tniax, qongxx jitt huee narr iurqycc nngxjniaw byy dingrdauh, jitt siwlangg quatding byy beh qycc jiac cyx, marr byy beh qycc brew sinx snxax.
Byy-hongx-byy-iyy quer snax qywguec. U jit amr, ix qaqi jit xee kir knuar denrngiaw dngw .laii, knuar diyc hitt xee langg kia dirr ix mngkakauw, domwsuee ~, qongxx iurqycc qapp cur nirr ee langg uanqex. Hitt amr, ix guanjai qycc hro zip .kir, liauxau, qycc jywhuew kir guarkauw jiac jit dxngr cnecaux :ee.
"Langg' ix duiww guaw marr sngr u qaur hyw :ar. Linw knuar jitt diauu puahlen, ix dingw huee kir Hauaii ee sii brew dngw laii sangr .guaw .ee, qongxx si ciuxqangx cngr :ee neh!"
"Qacnarr jinjniar duiww liw jiacc hyw, cud kir cittyy tacc e byy cua liw kir, suacc cua vadd langg kir?"
"Jex marr si byy huatdo ee dairjir. Ix jingwqingx u decc sniu vanrhuad :ar."
"Jiaxee ue, liw sir nii jingg dyrr qongw .quer .ar."
Ving'iuw qra tuccaur, jin' hro lag texben.
"Byy dniardiyc jniasit si siy' kiamwjer. Dingw siwlangg qacc dyrr u kiamr ix, jitt sxer snevunw diyh'air hingg :ix."
Ving'iuw jitt vxenr diam diam byy qycc qra lauwkuir. Ix qaqi dirr simqnuadew taux taux aw decc huah qajair, quatding qongxx au huee dyrr longxx beh anxnix qaixsueh kacc quikir.
2002.2
Zinrhun
A'Quir :a ix vunxjniaa dy' iarr zinrhun aw zinrhun. Tniax diyc langg' qui' qekauw-aw dirr langkectniax ciyr qaxx qirqarqunw, simqnuadew iurqycc decc kiw uanwceh.
Tnix ximx ximx gann gann, juixdyrjuiw iurqycc lingw vingx vingx. Jit siangx ciuxqud dangr qaxx beh hai .kir, nguaxdi marr diyhh qra sew .kiw .laii. Ix jiokk hyxlew aw decc sew, m qnaw cinwcaiw. Jiauww ingxquer ee qinggiam, jitt jun siongrr gauu longr puar nguaw. Jiacc duarhanr :ar, kangkuer decc jyr narr u srid qakcad, langg' jitmaw si be qra diap, dairvutliauw si qra gew .jit~.nng .qxur .aw, byy dyrr qig jit xee binrcniux hro knuar. Penpenx aw ix ee singwjingg dyrr kacc kutqiongg. Ix qamguan ho'ngg pah, ho'ngg ma, dyrr si be kamx did hro langg' anxnix qra bauhsiac.
"Jendniaw qapp jensii diyhh sunrsuar lur lur sew sew lehh."
"Guaw erhiauw lar."
Buxqim dirr langkectniax dua sniax decc huanhur. a'Quir :a tniax .diyc, dyrr qnuaxqinw qra rinr.
Id~zi-jap nii jingg, a'Quir :a ee laurbuw qapp langg' dua vakdow, qra ix snix .lyc .laii liauxau dyrr qra vangr lehh jyww ix jauw .kir. Jurr anxnix, a'Quir :a dui' cutsir dyrr hro a'qu qapp a'qim inx cnia'iongw itdit qaur jinw.
A'qu inx daux qaqi taucuir guandew dyrr be jiyw xee. U a'maw jyr uaxdua, a'qim m qnaw qongw .anwjnuaw. A'maw vacnii lau .kir, a'qim dyrr jiokk air pacpair dairjir hro jyr. a'Quir :a hitt jun jap-snax~sir huer, dng' qniu, jiokk pnaiw piacpnir, a'qim qiyr ix ongw dangx, ix xmii xmii beh hiongr saix, vutsii dyrr air giaa gne qxyx qapp a'qim rinr cuir rinr jic. U jit dxauw, a'Quir :a qapp viauxhniaqyx uanqex, nng xee langg pah qaxx ox tauu cnix bin, jit jiah qoxiw iarr suacc siag siag .pnaiw. A'qim qaqi ee haursnix jit qxur dy' m qramx ma, dandanx qiyr a'Quir :a kir huadqui. Ix .krir .qaur .der, hitt amr dyrr lirqax cutjauw. Ix sniu beh kir cue inx niulew.
"Qongw qaur liw jitt xee ginxaw jiacc byy jxingg .diyc. Guaw cri liw jiacc je nii, qamxx iauxx kacc sux linw buw :a? Nguaxqyx lehh. Huanrser ix jaw dyrr qer angx snex qniaw .kir .ar." Dirr huexciatauu hro langg' cue .diyc liac .dngw .laii, a'qim sui' qra lrew.
Hitt amr, a'Quir :a bih dirr mijiycpue-lai amr amr aw decc hauw. Ix jiokk uanwhun inx laurbuw, jnuaxngiu simqnuax jiacc hiongg qra ix vangwsag, hai ix jiangwsii diyh'air uaw langg' ee mngho, knuar langg' ee bagsig.
Kacc duarhanr .laii, ix u venr kacc erhiauw sniu. Huanrnarr a'qim juanling qaudair :ee, ix sui' quaix quaix aw kir jyr, be qycc qex qongxue. Qycc qenwnarr hiyckunwzit, ix dy' e cud kir cue snruar sxid bongxx tanr. Ix qaqi simqnuatauu u pacsngr dilehh. Danw dycc jit qangx ginniuw kiam u qraur gxiac, ix dniardiyc beh vnuax .cud .kir, be genr qycc qux dirr langg ee katuiw-vnix.
Nguaxdi sew hyxser. Dirr langkectniax :ee vunxdew decc qunxciyr, jinw suacc huanxdngw decc siy' ziongw.
Ix byy cud kir knuar laurzet. Ciuw gnirhue, jingxtauu-aw dangr qaxx vrid .kuix. Diyhh singx cue knuar u siauqyx buah buah lehh kacc iauwqinw.
"Qnaxx diyhh laii brew jit siangx ciuxlongg. Binaxjair qangrkuanw iauxx u nguaw tangx sew."
Jiamrsii, a'Quix :a qanda' sniu diyc jitt hxang venwvo.
2002.2
Vee Lingjunn
"Amxbow :ee ar, dnaxx liw iurqycc decc syy sniaw? Kacc sirsua lehh. Byy, lanw si e qnuaw be hur or."
"Qyckacc qnuaxqinw, marr diyhh danw guaw qra hiuu-aw siux .zip .laii. Banrvutzi narr ho laii, m bycaiw guaw decc sew qaxx."
Hurzinlangg dikqycex giac lehh, qra hiuu-aw sui' niaw aw an' dikqyx dingxquann siux .lyc .laii.
"Jangr u jah bor?" Angx mng.
"U lar. Iarsaiw diyhh liw huanhur." Hurzinlangg qexngiaw qra inx angsair grinn.
Hyy-vnix laurzet ciccih, langg-sniax hanxhuah. An' lxun-aw-dingw knuar .lyc .kir, ox kamkamm jit pxenr, langg kryw kryw kryw.
Dingxvox ee vixsair dirr uaw daur ee sii qetsok, cunx Logkud Cuanx ham' Dik'uii aw Cuanx nng dxui beh drow su'ngiaa.
Diongdauwdngr jiac suah, dag'ee jnriu junn junxvi beh ciavniar. Sianghongx longxx jiokk vniawsir, lingjunn sraiw quer diongsnuar, dycc jit vingg kacc u ngiaa bin iauxx jin' pnaiw qongw.
Kia uaw lringg-tauu decc huah hyrling :ee uat jit xee srinx, virvan beh cunx kax cud ciuw. Diongx:a decc qyr junn :ee dua liap qnua ser liap dih, jap gua xee dongrjog dauwdah. Hnua drua :ee u kacc nngw lat. Narr byy ix, honghiongr kacc e cuac .kir.
Vixsair decbeh u qetqyw. Kex-vnix ee langg-sniax qapp qow-sniax, nng vingg longxx decc viw draur dua sniax. Buexciuw, Logkud Cuanx singx cniuw diyc viyx-qii, digciuw qapp ix jingcax ee siqanx si bak jit sud nia.
Ngiaa ee hitt dxui hnuatauu-hixbin, tiongr qaxx be qor .did. Duarqongx jin' qinxjet, voxtauu giaa quann quann, jit sniax dyrr qra lringg-tauu pud .lyc .laii, muanii tangx qycc jyr sinx :ee.
"A'vaa, guanw qinnii diyc quanqunx ne! Linw duxjiah qamxx u laii qra guanw knuar?"
"Iarr u jit xee byy? Ter linw huah qaxx sausniax .kir dyrr u or."
"Liw jinw unxdangr iaux qaxx. Jex jangr qinw jiac. Hex lringg siongrr qniax jex jangwhiyc-aw ee bi. Jex jangr jiac .lyc, dyrr benw qniax e hro hitt buew dua juaa ee imhunn sxuah .diyc."
Niulew jiacc qongw suah, jyr haursnix :ee jangwhiyc-aw tauw .kuix, sui' dua cuir qra sar .lyc .kir.
2002. 3
Sionggnoo
Gueh'niuu qngx qngx dah dirr tnidingw. BBQ ee bi viah-tauu hang-buew jit siwquer longxx si. Gnoxqimhangg Naa :ee dirr mngkakauw cai hangloo kiw huew, bah naxx hangx, singliw guan'aw jiauww jyr.
"Ix hy juer Sionggnoo, Hokqenr Dang'nguax hitt xui ee langg."
Qecviah jyr tojuiw Ngg :ee dingw nii aw siw bow, dingw guehzit juanqangx quer kir Dngsnuax crua jit xee suiw buacbuah ee memex dngw laii juer aursiu. Sinhunjiuw si dirr hitt vingg cniaw :ee. Tranr Diongciumii dag'ee kacc u ingg, qinw qra cua cud laii hro cuwvnidaux sigsai.
"Sionggnoo! Acc m qapp druar dirr guehniuu dingxbin hitt xee qang miaa?" Naa :ee ee haursnix Congbingg :a anxnix mng.
"Qiakqiag oox! Langg' hex hongdewniuu iarr hro liw crua dngw laii juer kanciuw." Gnoxqimhangg Naa :ee qunxsngxciyr. Jyr Tojuiw Ngg :ee bin-aw angg qongwqongr.
Hanglohuew dng' zet. Ciuxqud la la hiur, cuir marr byy decc ingg. Ue qongw Cinaqog qoxjaw u jit xee hongder, crua jit xee bow qiyr jyr Sionggnoo. Hongder air beh jiac dngg huewsiu, cak kangx cak sunw, dyrr huanhur langg' len vutsuxdanx jit liap. Sionggnoo jai'ngiaw, simqnualai kiw damxhann. Ix qniax qaqi jit zit jit zit lau, qinxjuahban e ho'ngg vangwsag, satsimx, suacc kir taux jiac hitt liap sendanx. Byy gigo, jiac liauw suacc vuex vuex kir guehniuu dingw, jurr anxnix druar dirr hiax, zit lenn mii, mii lenn zit, q.-qodnuax-d. byy langg juewpnua.
"Haghau sensnix u qra guanw qongw, qongxx hex sendenx si qorr sewhanwqniaw ee bacsinx kir len :ee." Qxow jiacc qongw suah, qinnii duxx sringx qokdiongx ee Congbingg :a sui' vow jitt qxur cachueaw.
"Inx hitt qog ee hongder simqnuax marr jnia' crann. Jitt kuanw dairjir inx iarr jyr e lyc ciuw?" Congbingg :a ee a'qu anxnix qongw.
"Javolangg longxx jitt hy ngiursniur. Jnii u, sxer u, dyrr m siuw vunxhun." Congbingg :a ee a'qim anxnix qongw.
U langkeh laii, Naa :ee huanhur kanciuw qex tec quaw mihqnia cud laii hangx. "Jauwkax jit buew ziuhii m dyrr qinw qra tec .cud .laii. Jex iarr diyhh guaw qar?"
Kanciuw qra langkeh hue sitlew, me qaqi m bad lexsor.
"Suanwvan byy vreh quaw laii. Enciangg qah suanwvan jiac mrjiacc e driyc bi." Kanciuw jiacc beh uad zip kir lairdew byy ingg, Naa :ee qycc qex qaudair jit hxang.
Ox hunn jit pxenr an' guehniuu binrtaujingg qniaa .quer. Jit sijun, tnidingw amr niauniaux, ciuhongx dair hibii. Dngsnuax laii ee sinniuu-aw byy-dniu.-byy-dii pah jit xee kacniur. Naa :ee qiyr kanciuw kir hniah jit niaw obah laii hro muax, cuir drang cuir, suar mng sinniuu-aw haixgnec nng vingg quewjeh u simxmic byy qangg ee soxjai.
"Linw Daiuann Diongciux qamxx byy decc jiac guehvniaw?" Sionggnoo mng.
"U a, jiac kacc jiyw dyrr urngiaw," Naa :ee qongw. "Acc dyrr denrsi dingxquann ciangjai decc qingxqyr, qongxx jit liap guehvniaw ee kaloli zuarr quann duw zuarr quann. Lanw langg narr u huer, jitt jiongw mihqnia dyrr be kamx did jiac je."
"Dirr guanw qowhiongx, jitt jiongw mihqnia marr qangrkuanw be kamx did jiac je. Jit xee guehvniaw longxx marr juer sir hxun vunx." Sionggnoo qonggw.
"Linw iarr qniax hex kaloli sniu' je, jiac liauw het'ab e cringr quann m?"
"Linw decc qongw simxmih kaloli? Jex guaw m bad. Guaw qanda' jai'ngiaw qongxx brew jit xee guehvniaw ee jnii tingwhyw juw jit dxngr vng. Jex guanw a'buw qra guanw qongw :ee."
Dag'ee cuir-aw kuix kuix, bagjiuzinn tenw dua dua luiw, bersux kir tniax diyc hamr qxow.
"Congbingg :a, sidduu lairbin hitt quanr XO kir qnrua .cud .laii. Iauxqycc u, qiyr linw buw :a kacc danw sui' kir brew jit ac aw guehvniaw dngw .laii. Rair u vaux nngrzinn hitt jiongw :ee." Gnoxqimhangg Naa :ee anxnix qra inx haursnix huanhur.
2002.3
Suanxqiw
Diongdaur-dxngr ee nguaw jiacc sew hyxser, a'Hunn sui' dyrr decc cuann ehngx ee vngrcair. Kacc danw beh dngw kir aurtaucur, daqex ee amr dxngr diyhh singx qra liaurliw hro jiujir.
Cur nirr denrue decc hiangw, jiacc giangx jit sniax nia dyrr ho'ngg jriab .kir. Daqex qapp langg' qongw denrue, liammix jiokk cinciangx, jit sii aw quw, suacc decc kiw-singw.-lak-de. a'Hunn iyh qongxx jitt tongx denrue pacsngr si inx vyxvuer jaboxqniaw kar .laii .ee. Inx nng xee buxaxqniaw denrue kaiqangw, siongrr hingr qa'ngg gixgi, vunn langg ee pnaiw ue. a'Hunn dirr jauwkax hnirkangx vniar kangx kangx decc tniax. Jitt vaiw, iurr decc dauu lauxsnax :ee ee dairjir hro inx jaboxqniaw tniax.
A'Hunn ee daqnuax si Uanlimm ee duarkanglangg, jairsnix ee sii u crua snax xee bow. Daqex vaii derr zi, qapp daurbow ee qamxjingg be sux cinx jimxmue-aw, knuar derr snax :ee suacc naxx uansiulangg, vutsii dy' qra jiuwcamwlew, kow be did ix qinw siw.
"Vnevnee longxx sewii-aw, tacc e m jaix diyhh horsiongx kacc kiychyy, kacc siycliyc lehh?"
Jitt xee bunrdee, a'Hunn qanda' qaqi simlai decc sniu, m bad jingwqingx duiww langg mng kiw.
"A'buw, cair guaw longxx juw hyw :ar. Ing'amr beh jiac, siyw quer tng .jit .xe dyrr erdangr :ar."
"Guaw erhiauw lar, iarsaiw diyhh qaur liw qar." Daqex jin' pnaiw sniasaur.
A'Hunn utjud dirr simlai, jit qxur vnuar qxur dy' m qnaw qex qra rinr.
Zip laii qaur vangqingx, ngex-aw ee mihqnia, saixziyrvor qapp gulinqanx-aw jiaxee, angsair longxx u kuanw ven :ar. Sidjai si beh kaur m dit, beh ciyr iarr m dit. Henrhen dyrr qaqi ee cur, suacc diyhh naxx qoxjaxlangg decc jauxhuanw, qex jit kig dy' druar be diauu. Qongw .laii marr jinjniar si byy da'uaa. Qacc u viauxbingg qapp langg' byy qangg dongw, qokk langg diyh'air kacc dramx su'ngiaa. Go~lak diamw aw quer, piyr dyrr e jongw kuix .cud .laii. Sii qaur, m si liw siw venrr guaw brongg, qetqiok kacc anwjnuaw dy' be uanbuanw.
"Kacdingg aw dyrr dngw .laii .ar. Ziyrju-aw iarr suacc diyhh jah jiacc je."
"Dnaxx dyrr longxx kuanw hyw :ar. Mair qycc juann iwqenr liauliauu."
"Jah qaxx jiacc je byy ing .diyc, qex dang :ee nia."
"Longxx guaw pnai, hyw bor?"
Uad jit xe srinx, angsair kir qra angngex-aw an' iyqyy lairdew py .cud .laii, jitt vaiw ee dowkauw, pacsngr dyrr beh anxnix junw suah. a'Hunn jin' jaix kindang. Jit vingg si qxaux, jit vingg si jxunr. Jyr jiyhbyaxsimx :ee dniardiyc siongrqaiww qankow. Angsair honghuew dua. Ix jyr langg' qeau :ee, sidjai diyhh jiong' simx tew simx kacc driyc.
Jit qekauw-aw nng xee vnuar virvan beh cutmngg. Cur nirr ee denrlingg decc hiangw. a'Hunn kir kuix mngg. Duarniuqox qapp inx angx kia dirr mngkakauw.
"Linw beh cud .kir or?" daurniuqox mng. "Decbeh kuix piyr :ar ne. M dyrr diamr cur nirr dauwdin knuar."
"Suijai inx lar," daqex qongw. "Langg' inx giac ee qii-aw qapp lanw ee byy qangg sig lar."
Duarniuqox inx daqnuax si KMT dongxuann, jin' driongx, suanxqiw m bad decc jauxpiyr. Mrqycc inx ang'axbow qongw beh dngr hro guarsingw dongw, byy beh dngr hro KMT, jyr laurve :ee jin' qra janwsingg.
Qinnii ee dangtnix u kacc qnuaa. Kiaa odobai byy-ziax-byy-jac. Jitt jua lo viw did ingxquer, qaxnaxx u qex kacc hng.
Dngw laii qauwui, mngg kuix .kuix knuar diyc a'buw, a'Hunn jit sii limw be diauu, bagsaixjux jurr anxnix qui' jua linr .lyc .laii.
2002.3
Daiuanlangg
"Liw jex kopi :ee bersaiw. Rair jniawvunw :ee."
"Pnaixser, guaw qokgiw tniax kacc byy. Qamxx erdangr vaiwtog liw ing Daigiw qycc qongw .jit .vaiw?"
Vanrsu siyxjiaw bu pnirkanghongx hngc jit sniax, qorr Daigiw, jit~vnuar qxur aw dyrr qra junw .quer, amrqunw m jaix kir quai .diyc iacc si jnuaxngiua, iarr m qramx dnax tauu qra binrtaujingg ee langg siyw jimjiog .jit .xe.
"Qanda' jitt xee jaxsii guaw longxjongw jauw snax jua :ar. Vaiwtog liw ciuw giaa quann hro guaw quer lar, hyw bor?"
Byy-qongw-byy-iau, vanrsu siyxjiaw bin-aw hrngx hrngx, jit sniax dyrr qra bunqnia jongw pniax pniax .cud .laii, vutliw-vutcaiw.
Siangx ciuw moh jit log gupuejuaxlog-aw, Laihuad Syw bin iux qad qad, dirr kuqongsow mngkakauw gong gong kia lehh.
"Dnaxx hai :ar. Jitt vaiw unw e ho'ngg ma qaxx cauwtauu .kir."
Laihuad Syw simtauu luan hunhunx. Beh dngw .kir ee lo nirr, jit daii odobai dirr ix kajiah au decc cic laxvah, ix cuah jit diyy.
"Qerlo vxingx! Jit hxang dairjir, jauw jiacc je jua, vran be hyxser."
"Nacc u huatdo. Inx iarr m jyr jit vaiw qongw qongw hro cingcyw. Liammix qra liw qongw rair cuwzi, au jua kir, suacc qongw kueckiamr horkauxceh. Tiauqangx beh congwdi langg marr m si jitt kuanw :ee."
"Liw beh kir jinwjingg m dyrr qaqi sniu kacc diamxdinn lehh. Jyr dairjir anxnix holixhodoo, c.-cinwcaiw-c. Iarr be quer did langg' e qra liw pnaiw binrcniux."
"U jaidiau, liw berhiauw qaqi kir vran. Qo' cud jit qix cuir, sraiw guu sraiw bew siongrr gauu lar."
Buew:a jitt qxur vingrr byy ho'ngg qongw cud cuir. Laihuad Syw dirr simqnuadew decc liam hro qaqi tniax narnia.
Quer diongdaur, laii kuqongsow :ee viw did dingxvox-sii aw, langg u qex kacc jiyw .kir. Zinqunn laii laii kir kir, vanrsuruann dy' ciangjai hitt quiw xee. Jaxkiw qa'ngg pnaiw sniasaur hitt xee siyxjiaw, jitmaw haunxx hro langg' pnaiw dywdngw. Jit xee lau o-aw dirr ix binrtaujingg ngowngor ziongw, dngr iw dngr dyh, bin-aw hnuaii vniwvnir.
"Liw jai'ngiaw guanw haursnix dirr dyhh jiac taulo? Diaujax Qiok lar!"
Siyxjiaxlangg-aw bin-aw cnex sunxsunw, qiux qiux lunx lunx, quaix quaix aw qra siuqnia.
"Liw jex inwqamr m driyc."
Ngua jit xee tang'axkauw, guan'aw qangrkuanw ee miarun. Laihuad Syw be kamx did krir :ar, ix beh…
"Guaw qra linw qongw oox, guaw, guaw…"
Jit qxur ue dihdic duhduc qongw be crunx. Vnix:a :ee, uree sraiw vec zinn qra ror, bih cuir decc ciyr :ee iarr u. Liahuad Syw cuir-aw kuix kuix, jinwjingg beh qongw ee ue, jidsidig, suacc longxx be qir did liauw liauw.
2002.3