1. a’Liongg
Tniax diyc jxingx-aw-sniax, a’Liongg cecpnai-aw pnai qinw qinw. An’ dingxvox qaur erdauwvox bersux qnasiuu. Jauxpiah langdin, cud haghaurmngg, ix suisii vangr vo qniaa.
“Miaux. Miaux. Miaux”
Byy buew hang ee jinrqag u kacc amwsamr, a’Liongg yc niau-aw-sniax, jit duir bagjiux qakqag cue.
“Miaux.”
Cue vnuar vox cue byy buexje, jid’err tniax diyc niaux ee qiywsniax, a’Liongg ngar tauu knuar. Jit jiah huevanx niaux tauu kenr kenr dirr ix kadaux.
“Guaw qycc jah hyw liau :ee laii hro :liw :ar.”
Jit vaux qeqnuax iong qorr sokqalok-aw vaux lehh, dirr cecpnai-aw-lai vir he lehh, a'Liongg jinw qra tec .cud .laii kngr diamr tokax. Uanxzenn decc qra a’Liongg diwir. Niaux-aw qniwnarr jiac nng~snax cuir liauxau dyrr e dnax tauu “miaux” .jit .sniax, jin’ sainaikuir.
“A’buw narr kingw hro guaw qra liw cua .dngw .kir, lanw dyrr benw ngx ngx iab iab, qniax kir hro qang’yc jai’ngiaw laii qra lanw kiycciyr.”
Jing jing aw tingwhau niaux-aw jiac vaw, qapp ix sngw jit kunr, siogziho, a’Liongg qapp niaux-aw siy’ srii, ioksog binaxjair qang jitt sii beh qycc laii siy’ cue.
Jiac amr vaw, a’Liongg bagjiux sui’ kir dingr dirr denrsi. Vnuar diamxjingx quw quer, a’buw laii qra qnuaw zip kir vangqingx siaw siokdee.
Jniar ciuw lang vitqnuaiw, dyr ciuw tuh erhaii. Giaa tauu giaa hni, tnidingw guec tuanuann. Liuxdiautangx-gua cuahqakjua ee zinqecur, jit xee javoginxaw qapp jit jiah hueqauw decc sngxhua. a’Liongg knuar qaxx juu ~ ~, siaxzirdyh-dingw ee suanwhak-dree, qaxnaxx sen' sngr dy' sngr vutsi.
“Vaa, guaw sniu beh cri niaux.” Cud vangqingmngg laii qaur langkectniax, diongwdnaw hiongr laurve vinxqiuu, a’Liongg sniatauu liyc aw e junr.
“Siaw zri m siaw zri, sniu sniu hiaxee vutdongrlixkenx :ee.” Laurve qongw suah, vywjuaw qycc tec kiw laii knuar.
“Gunw vanx :ee cur nirr longxx u cri tausnex-aw. Uree cri niaux, uree cri qxauw, cri tor iacc cri qux :ee iarr longxx u. Lanw daux sniaxmih dy’ byy. Guaw dirr haghau, qapp langg’ longxx byy ue qongw, be lyhlauw.”
“Qurnii dyrr u hro liw cri qimhii a.” Laurve jit sniax qra vog dywdngw.
“Qimhii cri dirr qimhiknax qanda’ knuar suiw, be bongx be kap tihh jin’ byy cuwbi.” a’Liongg vnua'ue.
“Liw or, kuair hingx kuair trer, tauu:a air nicnih, liammix dyrr lringx :ar. Sii qaur cri quw air lranw, liw ingwhingg :ee, cringx :ee iacc vniar :ee longxx byy jiauww kixqangx, buexciuw iurqycc venr guaw ee kangkuer. Qurnii hitt qrngx qimhii-aw dyrr si anxnex!” Jyr laurbuw :ee liac pang pah uersngx.
A’Liongg qapp verbuw ngjngg, jiwsamx-jiwsur vauvyw qongxx jitt dxauw quatding e jiahdur, u-her.-u-lyc.
“Liw narr u jaidiau kyw taujingg go miaa, knuar liw beh cri sniaw, longxx suijai :liw.” Sraiw qikdiauu, laurve jrunn uahkaur hro dairjir u jit vo tauw.
“Be qniaa .did lar. Cri niaux vutviw hii-aw. Niaux diamr cur-lai tiaur quann tiaur qe. Guaw kiyh be hur ix uer.” Laurbuw qycjaiww puawcuir-puawjic.
“Guaw e qra cri diamr guaw ee vangqingx, be qra cur nirr uewsuer.”
U lixiuu qongw qaxx byy lixiuu, laurbuw nngw gee .kir.
Bogpiaux henxbingg, suar .lyc .laii diyhh sunjuann kyr qaqi. Jiacnirr pacvniar decc tagceh, taur siwlangg bue bad bue. Siongrkyr, ix be qycc jiuwqud jyr puatqauu; knuar denrsi, qaqi iarr jaix jamrjad. Kywqii dirr au lexvair. Snuawyc, a’Liongg singx vniar kir cue niaux.
“Miaux. Miaux miaux. Miaux miaux.”
Liammix nih kabuew giac tauu knuar cuwbuexdingw, liammix kud iyx ngr amkangx tamwknuar, jit siwqer cue taur taur, cutjai ix qyckacc anwjnuaw hiamr, ix cri beh vnuar dxangx ee niaux-aw, vutqenr dyrr si vutqenr.
“Si jauw kir dyhh? Jarzit laii dyrr iauxx dilehh.”
M siaxsimx, a’Liongg dingw:a xe:a srunn qycjaiww srunn, cue qycjaiww cue.
“Miaux.”
Tniax diyc sigsai ee sniax, pacqad ee bagbaitauu liammisii kuix .kuix.
“Liw tacc jauw kir langg’ daux lar! Qinw lyc .laii. Guaw jiax u hyw jiahmic.” A’Liongg et ciuw, jin naaudew kangr.
Niaux-aw byy-dongr.-byy-jing, dandanx liac ix qimx qimx knuar.
Jitt xee sijun, jit xee javoginxaw an’ zinqecur nirr cud .laii, qra niaux ee tauu syx syx lehh, suar qra py .kiw .laii moh dirr hxingx-jingg. Niaux-aw quaix quaix longxx byy qunxliongr, jin’ lyhsingr ee kuanxsig.
Qnialo song song, kavo samwdam, dngw laii qaur cur, pnai vnuar qxah ee cecpnai-aw pniax lehh, a’Liongg vniar kir bincngg-dingw, bin hiongr viah, tanxkisinx dyw lehh.
“Vng juw sik :ar.” Laurbuw dirr guarbin longr mngg huah jiahvng.
“Guaw byy air jiac.” a’Liongg inwue.
“Byy air jiac, si beh jyr senx niih?”
“Suijai ix lar. Jit dxngr aw byy jiac be pah kicqag lar.” Laurve cud sniax hnuarsuah.
Dirr vangg-aw-lai, guarkauw ee qongxue-sniax, dagg qxur dy’ tniax qaxx bingg ~ ~. a’Liongg qra ziongg-aw tanw-aw giuw laii qah, jit kunr aw quer dyrr kunr .kir .ar.
“Niaux, guaw byy air cri :ar. Guaw beh ngua cri jiauw-aw.” Dyr ciuw nic jit dniux singjikdnuax, jniar ciuw qnrua jit kax jiauxlangw-aw, jit lexvair au, a’Liongg dirr laurbuw binrtaujingg kia tringg tringg.
“Liw kir dyc’ui qa’ngg liac jitt jiah huebii?” Knuar quer singjikdnuax liauxau, laurbuw mng kiw.
“Jiauw-aw dxiamr brew :ee.”
U tak u cax. Jitt vaiw kyxcir u quer tongquanx, singjikdnuax huawsinx jyr lorjiyr, junxdnuax. Buxaxqniaw longxx u jiauww iog qniaa.
“Liw rair quaix quaix oox. Danw guaw an’ haghau dngw .laii, guaw jiacc qapp liw sngw.” Qapp jiauw-aw qongw baibai, a’Liongg qniaa lyc lautuix ee sii qycc naxx decc krox si’aw.
Jaxsii qra jiauxluiw tec cud laii kngr cirliau sunrsuar ngua cingkir juiw, beh amr aw diyhh vniar jiauxlangw-aw, dagg qangx ee kangkuer, a’Liongg longxx jiauww vo laii.
“Guaw ee huebii zuarr gauu cniuwkig lehh, liw dy’ m jaix. Ix qycc qaxnaxx e zin langg. Qniwnarr guaw uaw .kir, ix longxx cniur be diam.” Lyh'yc, a’Liongg siwqer decc denw. Inx vanx :ee, bylun javox jabow, a’Liongg jitquw longxx hnuahiw qapp inx qauvuee.
Zidlunn nghnuaw dirr taujingbin. Mngxvox ee zidtauqngx unsunn be qarbak. Qang jit diauu lo a’Liongg decc qniaa, jit qywguarguec jingg ham’ jitt jun vixping, jngzenn nng jiongw simjingg.
“Miaux.”
Syxsii cah zip syxsikangx jiacc jun .kuix, jid’err tniax diyc sniax, a’Liongg sinkux vyrvinn junr .jit .xe. Uat jit xee srinx. Qoxsionghyw lriauu .laii, sidsit qux diamr ix kajiah-au.
“Liw tacc e laii jiax? Qinw dngw .kir!” a’Liongg naxx qongw, ciuw naxx decc et.
“Miaux.”
Niaux-aw byy jauw, huanxdngw qniaa uaw kir decc nauxtauu-junrau. Naxx cincniu si jit jiongw quanwsir, a’Liongg jurzendig kuu .lyc kir syx niaux-aw ee tauu. Jit diap aw quw quer, a’Liongg hionghiongg qra sag .kuix, nng~snax janr ee lautuix jit sniax jongg .kiw .kir longxx byy hiyccuanw.
“Miaux.”
Vreh laii qaur snax lxauu mngkakauw, niaux ee qiywsniax iguann tniax e diyc.
“Miaux. Miaux. Miaux.”
Laukax ee niaux qiyr be diam. a’Liongg ee bagbaii zuxx kiyh zuxx uaw.
“Liw py jit jiah niaux dngw laii cur nirr beh dai?” An’ jauwkax pangg cair .cud .laii, laurbuw mng, bagjiux cnix ginwginr.
“A’vaa u qongw .quer, qongxx kyw narr u jingg go miaa, beh cri sniaw suijai guaw cri.” a’Liongg duiwcuir rinr.
“Dyrr u hro liw cri jiauw :ar.”
“Jiauw cri dirr jiauxlangx lairdew, iarr berhiangw sainaix.”
“Liw beh dyclyc snix hiacc je siqanx? Beh cri niaux, qycc beh cri jiauw!”
“Siqanx guaw qaqi e ciauu.” a'Liongg sraiw uerjur.
“Qacc hiacc sunxlag! Guaw knuar liw or, juceh liammix dyrr hnghuer liauw liauw, singjig dywtnuaa qinxjuahban lar.”
“Singjig narr lud narr tnuaa, guaw jiacc qra jiauw-aw vangwci. Anxnex m dyrr hyw?”
Buxaxqniaw longxx qongw qaxx siurkir siurduac. “Viangw” jit sniax, jitt vaiw ee dakkauw jiyh jit dingg vangqingmngg virr nuaa .kuix.
Kunr byy jiog binn, sesinn sesinn, beh kir tagceh jinwjingg, a'Liongg tauu jit vaiw be qir did qra jiauxluiw ngua juiw.
Vangr jit jiah niaux qapp jit jiah jiauw dirr vangqingx, qui’ qangx dirr haghau byy simjniaa tagceh. Dongr qaxx sir diamw quer, cud haghaurmngg dyrr iong jauw :ee. Tokax jit kud cib cib aw juiw, a’Liongg byy liu'ir dac .zip .kir, kowkax ciok damm cnibongrjong. Niaux ee cirliau duxjiah brew :ar, jiauw ee cirliau diyhh qniaa kacc hng jiacc brew u. Jongg laii jongg kir, a’Liongg vniar qaxx qui’ sinkux qnua.
Vangqingmngg qnuix bat bat. Qimjaw cutmngg ee sii dyrr si jitt hy kuanw. Mngciuw jun .kuix, jit jun lingw hongx duiww a’Liongg ee bin cuex .laii. Vangqingx ee tang’axmngg kuix hna hna, jiauxlamx kangx longlongx. a’Liongg knuar qnir niaux-aw dirr ix bincngg-dingw hachir, vnuarsaix, jin' jurzuu. Jidsidig, ciuxtauu ee cirliau venr qaxx jiokk hangrdang.
2. Bixcaix :a
“Guaw jiac sor. Liw air jiac cyx, diyhh lingrr dniaw liaurliw.” Sinx simvu Bixcaix :a tauu vaiw zip jauwkax, daqex uaw laii decc denw uihingg.
“Liw tacc byy qra guaw qongw linw buw :a jiac sor?” Hitt amr angsair snuawqangx dngw .laii, Bixcaix :a dirr vangqingx-lai dngtauu duiwbin qra mng.
“Anwjnuaw niih? Liw qamxx berhiauw juw sowcair?” Angsair cuir qongw, bagjiux m qnaw knuar bow.
“Liw jitt xee langg qongxue tacc e jitt hxingg? Linw buw :a si dxngr longxx jiac cair byy singx qra guaw toktaur, guaw kir caiwci-aw kuanw hii hii bah bah dngw .laii, qamxx vnir u lo?”
Jitt sniax, angsair qxex-cuir venr ah-cuir. Cincniu hro langg' congwqingw .kir, Bixcaix :a uanwkir muaw vxag, jin’ m qamguan laii qongw, duw .diyc .ar, iarr diyhh zinrhun.
“Brew cair dngw .laii ar or?” Cuwvnix asangw hyxlew aw mng qiamx aisaju, ciyr buibuix, bagjiux hiongr caiwnaa-aw tuaciax giyw .jit .xe.
“Hner a. Kacc jaw kir, caiwci-aw kacc byy hiacc qa’iac, qex jiokk qinw.” Bixcaix :a qig duanhongx, hyxlew aw qra rinr.
“U tniax linw daqex decc qongw, qongxx liw duer ix jiac sor, qamxx urngiaw?” Asangw jiapsuar qycc mng.
“Hner a. Guaw byy diong jiac.” Bixcaix :a qanxdanx rinr.
“Liw sidjai jin’ hyw luxdig. Jiac cair duiww sintew kacc hyw. Iucyx jiac je, huec’iuu lyy, huecqngw kacc e kir trad .diyc.”
“Linw qamxx iarr jiac cair?” Bixcaix :a dyww mng ix.
“Jiac cair guaw si jin’ air lar. Mraxqycc, dniaxjaur m si lanw decc hnua, sidjai si jinrvo byy huatdo.”
Bixcaix :a byy suawue, caiwnaaxciax tuax quer mngding, jid’err dnax tauu, knuar diyc daqex kajiacpniax hiongr ix, bin hiongr sinbingdyh.
“Lau :ee ar, sinx crua zibmngg jitt xee be snex. Qajair taujingg hitt xee u qra lanw Dann .Qrax snex nng xee qimsunx. Liw diyhh vyxvir inx v.-ving’anx-a., duarhanr u cuttuad.” Daqex qongw suah, habjiongw vair.
Bixcaix :a tranr jitt jun qra caiwnaa-aw tuax zip kir jauwkax, vingvingx-vongrvong, bersux qapp langg' decc ping dua sniax. Caiwnaa-aw ee cair sui’ hxang aw tec .cud .laii. Kacc duewbuew beh liaurliw :ee singx kngr dirr jauwhiac, cunx :ee kngr vingsniux .kir. Dnaxdiap qaur jit xee kamxjam, Bixcaix :a zip kir vangqingx ngua jit sux cur-lai cocing :ee, cud .laii ee sii, knuar diyc vingsniux ee mngg kuix kuix, daqex kia dirr vingsniux taujingg, dingw:a siongr, xe:a srunn.
“A’buw, liw decc cue sniaw, si bor?” Bixcaix :a mng.
“By... byy lar. Beh limx jit xee liangg :ee.” Daqex dngw jihquanx, rinr qaxx dicdicduhduc, cuiwkiw snriux qimx knuar e diyc. Vingsniumngg sag uaw .kir, jyr daqex :ee sniaxmih dy’ byy tec dyrr bih duiww vangqingx .kir.
Beh amr aw, nng xee hniadi-aw an’ haghau dngw .laii, qokk langg ciuw nirr jit der qevaii-jnir.
“Liw iurqycc cua linw siyxdi kir brew sniaw?” Jyr a’maw :ee mng sunx, cuir ciyr bak ciyr.
“Tacc u! Si ix huah vakdow iaux. Guaw mrjiacc cua ix kir brew.” Dua hanr :ee ter qaqi sexcingx.
“A’maw, liw beh jiac .m?” Ser hanr :ee mng.
“Linw jiac dyrr hyw. A’maw m jiac.”
Maxsunx-aw snax xee diamr langkectniax. Nng xee ginxaw naxx jiac naxx knuar denrsi.
“E cuiwdax be? A’maw tinn kiwjuiw hro linw limx, hyw bor?” A’maw mng.
Nng xee ginxaw qor knuar denrsi, longxx dna’ dimr tauu junw .quer.
“A’buw, kacc danw sui’ beh jiac amr :ar, nacc tangx hro inx jiac hiaxee u :ee byy :ee?” Bixcaix :a qongw.
“Cur nirr ee liaurliw juw qaxx vec lahsac, jniaw pihpuc, be kuix vii. Inx dngdecc huatsinx, air jiac :ee byy qeqiamw jiac jit xe aw juvow, m liammix dyrr dingrdanx .kir.” Daqex qongw, crinr tauu crinr bin.
Bixcaix :a tniax diyc huexkir qig, kixqinx qa ann qiongg lunw lehh byy inwcuir.
Jaxsii, rair siongrvanx iacc jniurkyr :ee liamm kax jrih kax qnuaw cutmngg, beh amr aw, dngdew aw dngw qaur cur. Siyxqox jiac suzinn qongsix ee taulo, harvanx siqanx be junxsii, ing’amr iurqycc veh diamw quer jiacc dngw .laii, kingg caiwbuew, ciuw duer ciuw vaux vngrvaux, jiokk saliac.
“Linw dongsu qamxx iarr longxx jah venrdongx?” Siyxqox jiac vaw, Bixcaix :a siux nguaxvnuaa ee sii qra mng.
“Qanda’ guaw qapp siuxue-aw narnia,” siyxqox rinr. “Qongsix jiuqin qanda’ jit qingx sowsit jurjorcanx, jiac quw marr e iar. Quikir jah venrdongx kacc taulo dit.”
Amwsii aw jap-id diamw quer, lau :ee, jniw :ee qapp iur :ee longxx kir kunr :ar. Bixcaix :a kar denrue dngw kir erqangw ee aurtauu. Siyxmue amwqongjiauw, qapp ix qongw tauxkuir, tywdongr :ee.
“Jit simx beh jiac sowsit, jit simx air dang kauxbi. Dnaxx si beh qiyr langg’ anwjnuaw liaurliw? Sidjai u qraur pnaiw kuanxtai!”
“Ix qongw :ee liw dyrr mair qra ciuwcaiw. Air jiac cyx :ee, qiamm :ee iacc hiamx :ee, liw jyww liw juw laii jiac. Qamxx qongxx ix e uirdiyhh jitt diauu qiyr inx qniaw siaw lirensux?”
“Simvu jiac bah, daqex jiac cair. Jitt hy ue tuann .cud .kir, qamxx e tniax .did?”
“Taux taux aw vnir suacc berhiangw?”
“Byy hiacc hyw jiahkunr,” Bixcaix :a qongw. “Guaw brew cair dngw .laii, ix e kir qiamxjax vingsniux, knuar guaw u jauxkaux pywqair bor.”
“Jiacc lirhai!”
“Liw jiacc jaix? Langg’ ix duarbuw siwqongqer decc tong'iongg qongxx guaw duer ix jiac cair. Dnaxx jitt sniax, cuwvnix taubuew qex quixnarr duir bagjiux ter ix decc qra lanw acsog. Liw knuar guaw jitt xee daqex u kiangr bor?”
“Dagg dxngr jiac cair. Dyrr m si decc jyr niqox qyc!”
“Liw qongw diyc niqox, guaw dyrr sniu diyc guanw siyxqox. Lanw snax dxngr jiac cair si qojiongbunai. Langg’ ix qycc an’ cur nirr jah venrdongx kir qongsix cuex. Vnijniar lun, jitt hxang, lanw sux ix tiamw tiamw.”
“Acc ix narr jurlaii m bad jiac quer hyw liau :ee, m jaix hyw hii hyw bah snex jyr sniaxmih kuanw, iarr bogquair ix kacc u dniuwtauu, be kir hamwsiongw iucyx.”
Qapp siyxmue denrue qongw suah, Bixcaix :a simhuew u kacc sriaux, cuiwkixtangg suacc decc gniauc gniauc drang. Qui’ amr u bang, cuanww bang dy’ bang diyc jiac :ee.
Qewangx snax guehzit, sinniuu venr qu niuu. Dyc’ui tangx brew diyc kacc cnrix ee nxng, dycc jit qingx diamwtauu kacc siok iacc li cur kacc qin, Bixcaix :a jiokk siglo, be jauw m driyc. Caiwci-aw ee dnaxaxui, Bixcaix :a uanaxx jaix taur taur. Jitt dnar ee cinwtauu jiog qaxx u cunx. hitt dnar ee caiwhuanxaw air qongw tiongwqow. Ix bad langg’, jiap qauquanx, langg’ iarr bad ix.
“Oksangr, liw qinaxzit beh air sniaw cair? Eaxcair, qaiwnaa, anghongrcair, iacc vueling’aw?” Knuar diyc Bixcaix :a, caiwhuanxaw zet qunxqunw.
“Linw jiac juansor :ee, haixcair rair qex jiac .quaw, ing’iongxhunx jiacc e qauwgiac.” Haixduawcair naxx cinr, tauqelangg naxx decc qapp Bixcaix :a pywdau.
Rair brew :ee longxx kuanw .diyc .ar, Bixcaix :a qniaa huantauu. Tauqaur jit dnar bre loxliau :ee, sinx kuix :ee, tauduxjiah laii ee sii, Bixcaix :a dyrr u ngiaw .diyc. Vutdix-vutqag crig uaw .kir. Siyqex, siyah qapp angsiybah, jitt quaw langxbinrhuer cai diong’ngx. Bixcaix :a knuar qaxx juu .kir, qaqi cuir-aw kuix hna hna iarr byy diwqag.
“Siyxjiaw, beh air sniaw?”
Tniax diyc sniax, Bixcaix :a cnejinx huehunn, knuar diyc binrtaujingg ee diamwdew ciyr bunxbunw, sir-jap gua huer kuanw, dingw srinx dna’ jit niaw nailinggu.
“Guaw qewangx :ar, guaw jiac sor.” Lauwkauw qongw .cud .laii, Bixcaix :a caiwnaa-aw-tuaciax tuax lecc jauw, longxx byy qycc uat tauu.
Ceid jap-go, daqex longxx rair kir sirngi siongrqingx lexhut. Juw, sew, bongx, buaa, jaxkixvox kuanw ingg, denrsi air knuar dycc jit daii longxx benw jiu langg’, suijai qaqi qingw. Jun quer laii, knuar quer kir, quixnarr daii longxx decc qongw liaurliw. Uree decc qar langg juxjiac, uree decc siaurqair derhngx hyw jiahmic. Linghee, vaurhii iacc cic-aw, haixsanxbi :ee, cinwcaiw juw dy’ cnexcuir.
“Lanw qamxx jniasit jiacc giap mia? Au vuanwsingx juwdnia qapp cnecaux :ee byy enn, diyhh caiwvoxqinx qarqiamm qaur zip qnuacavangx? Higjiaw diyhh danw qaur daqex srinx-au?”
Qo’ jit langg dirr pongwiw jre, Bixcaix :a zuxx sniu zuxx vutguan. Jit xee simqnuax be-dik.-be-dnia, cuiwnua minua tunx.
“Guaw beh air siyqex vnuar jiah, siybah jit qxinx, enciangg snax diauu. Longxx ced jyr der.”
Beh uaw daur, caiwci-aw jerje longxx siux dnar :ar. Bixcaix :a tauu ngar ngar vniar zip kir brew loxliau. Jniginn cud .kir, mihqnia qnrua quer ciuw, Bixcaix :a snax kax jyr nng vo, dua lo m qniaa nngr siyw hang. Beh jnia’ vnuar dxangx :ar, qinaxzit tauu vaiw kuicyx. Iarr byy langg siy’ jnecniuw, Bixcaix :a jit cuir suar jit cuir, bersux qniax jiac byy. Kacc benw vnuar diamxjingx, jit vaux loxbi jiac qaxx kangx ~ ~. Vakdow vaw ducduh, Bixcaix :a kajiah hiongr duiww pongwiw vecsiwdenw, lenrr kia dy’ kia be kiw .laii.
3. a’Jingr :a
Amwtauu aw cid diamw go-jap-go.
Jre diamr denrsirqix taujingg, a’Jingr :a liac denrsi juu juu siongr, ciuxtauu nng dniux caixquanr lriam diauu diauu, bersux beh hro cud jiab.
“Vavax, jitt diauu suanwhak guaw berhiauw. Liw qra guaw qar, hyw bor?” Ciuw tec envid qapp siokdee, haursnix uaw laii mng.
“Vavax kacqycc aw jiacc qar :liw. Guaw rair singx duir jiongw.” a’Jingr :a qongw, lenrr uat jit xe tauu dy’ byy.
“Hnaa! Rair qycc danw hiacc quw or?”
“Mair caw. Narr dongciamx diyc diyc tenjaii, vavax dyrr tangx qra liw pingr qaqaur.”
Ginxaw qamm dunn byy inwcuir, uad lehh zip kir vangqingx.
“Ing’amr tauu jitt jxox hyrbew, 08; suar .lyc, 18; qycc laii si…”
Siyxbew-qiuu jit xee suar jit xee linr .cud .laii, a’Jingr :a ee baitauu liammix kuix kuix, liammix qad qad. Tingwhau hyrbew jongw kuix .cud .laii, langg qui’ee sixsinn, sosab.
“Liw beh kir dyhh a?” Denrsi qimr .srid, caixquanr lir driau danr zip kir vunwsywlangw, a’Jingr :a jiacc beh cutmngg, cuwlairlangg sui’ qra dongr .lyc .laii.
“Beh laii brew hrunx.” a'Jingr :a dab.
“Juixjyy-aw jig juiw. Liw qra guaw qongw ing’amr beh siuliw.”
“Danw guaw dngw .laii jiacc congr lar.”
Am'axrniaw giuw kacc quann. Amwsii aw u kacc lianglingw. Byy kir brew hrunx, snax uad sir uad, a’Jingr :a iurqycc uad kir cue vyr bingvaii :ee.
“Toxdirqongx Vxeh :a, liw vyr :ee kaksit u junw. Quair guaw qaqi m sinwsniar, hiauhuex kir qingw vadd xee sowzi. Vaiwtog liw diyhh qycc qra guaw vyr jit vaiw. Guaw narr diyc taucaiw, dikkag laii qra liw jrngx qimsinx jioksia, dapguan.”
Qapp Toxdi qongw suah, a’Jingr :a kir hang-aw-kauw ee qamxaxdiamr brew jit vaux hrunx, hunvaux liammisii dangrhongx, dirr mngkauw vog jit qix liauxau jiacc dngw .kir.
“Jinw quiw diamw :ar? Juixjyy-aw liw si u anwsngr beh siuliw iacc byy?” A’Jingr :a dnaxx jiacc zibmngg, cuwlairlangg siangx ciuw lamw hxingx, jit xee cnecinr bin decc dngdanw.
“Guaw binaxjair jiacc congr lar.”
“Liw jarhngx marr anxnex qongw,” cuwlairlangg kngckngh qiyr. “Qiyr liw jyr jit xee srid, liw qanda' hocjaix, kunr naxx cniw, jit qangx tuax quer jit qangx. Qongw diyc caixquanr, liw cud-tauu-cud-kax jnxir tauu viyx. Byy sux qaxx longrqex-snuawtec, liw be siux kax sew ciuw.”
“Caixquanr narr u diyc jiongw, caixqimx guaw marr longxx qaux :liw. Guaw jyr :ee dycc jitt hxang m si uirdiyhh jitt xee qex?”
“Liw urngiaw bad sngr m bad druu neh! Dagg qywguec kaix quixlyrr cingx quer jit cingx vruac sowzi. Jit~vnuar vaiw aw diyc hex quiw vah kox liw iarr qnaw tec cud laii denw? Tanwjnii cri boxqniaw, jex vunxjniaa dyrr linw javolangg ee dairjir. Liw qaqi hingr sngw, benw decc hiax kaihyx, pinxpongw.”
“Driyc lar, linw angx jin’ harhuex lar. Acc byy, guaw laii cniuw ginhangg, anxnex hyw bor?” Qongw suah, a’Jingr :a uad lehh zip kir vangqingx.
Hitt mii, dua bang, siyw bang, hyw bang, pnaiw bang, suar suar bang, lak jxox siyxbew kiyh be uaw, a’Jingr :a kunr cnew qan’ genr.
“Iurqycc qongwqux. Siylensuar snax qrii :ar. M bad jiacc pnaiw ersiaur .quer.” A’Jingr :a trow duarkuir, hiongr dongliauu qongw jit xe aw bongxx siautauw.
“Benw utjud lar. Tniax qongxx au qywguec kiw qaur nii-drew sittauu longxx vutjiw aw je. Jycsid kacc unw tanr.”
“Tanr qaxx jex m jniaa jnii, dagg qangx diyhh jyr qaxx beh uaix iyx berdid siw. Narr dycc jit qangx taucaiw hro guaw diyc .diyc, guaw beh qaqi kuix hangg jre dxiamr, ngua lanw laii jyr jit xe aw tauqelangg quewgenr.”
Hiyh daur, a’Jingr :a kir quexjiw-dnar kuanw quaw quexjiw, suar kir qamxaxdiamr qnrua jit quanr bixjiuxtauu. Jit guehzit ee sionghuir pah sixkaur. Amx laii cew kir, beh air juer huwongx, jiamrsii hrunx rair qiamw jiac .quaw, diongdauwdngr diyhh kacc kiamrsingw jiacc u qraur ing.
“37 qapp 21, jitt nng jxox hanw qongxx e kuix. Cniaw Toxdirqongx Vxeh :a cud jixsi.”
Jid’err vruac, sniurvuex. a’Jingr :a cuir ciyr bak ciyr. Siyjiuw qinw tinn jit vxuex qingwlew.
“49 qapp 38, henrguec kuix nng vaiw .kir .ar. Narr au qrii e qycc kuix, jiacc cniaw Toxdirqongx qycc sur guaw jit xee sniurvuex.”
Kensimx-ken’ir vuahvuex liauw, a’Jingr :a siyjiuw qycc tinn, ciyr tauu ciyr bin.
“Liw jenzit u laii tokbang. Derjuw gugong, beh cingxmng qongxx 54 qapp 36 qamxx iuguann e ciamx .did?”
Bue bad jingrr bue, lenlenn snax vxuex longxx sniurvuex. a’Jingr :a hnuahiw qaxx be qor .did, rair hauwqingr ee jiuw iarr suacc be qir did tinn.
Hyw kangx :ee draur siy’ vyr. Jitt kuanw hyw lauvaiw, simx qaux qapp diqiw :ee byy vywjaix, sii qaur diyc jiongw jin’ pnaiw qaudair.
“Liw ciuxtauu u juaxvid bor? Qinw siaw .lyc .laii. Guaw u bingvaii.” Ciuxqix-aw vyr bingvaii, a’Jingr :a qongw qaxx qongg suacsuah.
“Iurqycc si Samtaiwjuw vyr :ee m?” Denrue hitt vingg mng.
“Suacc si! Ix hex ginxaxlangg, be kyr .did.”
“Liw kacc jaw m si qongxx ix sniar qaxx?”
“Laurlangg lau vo dnia. Iarr diyhh mng Toxdi kacc dingrdongr.”
Denrue qongw suah, a’Jingr :a qnuaw beh kir ginhangg qaulap ginxaw ee senrhuir. Qimjaw cutmngg, cuwlairlangg jnii sngr hyw hyw hro :ix. Nng-cingx nng-vah lak-jap-lak kox, jit koginn dy’ byy qex.
Ing’amr kuix jiongw. Taucaiw qangxx ig.
Qniaa quer jiongxquanr dxiamr, jit der kanpang jin’ cnexbak. Bersux kir jiac diyc behundanx, simqnuatauu u qunxliongr, acbuexciuw, a’Jingr :a u uat zip kir diamwtauu.
Snuawqangx, qesitauu jiacc kuanw hyxser. Qangtauu uaw laii cue ix qongxue. “U sittauu beh qnuaw, kiamr kaciuw. Vaiwlak beh laii bor?”
“Jitt lexvair quer jiacc qongw," a'Jingw :a rinr. "Ginxaw duxx kaihak, cur-lai camcamx zuu. Jitt quw byy simjniaa jycsid.”
Horciux decc lyc. Bingw ho lingw hongx, autobaik dy' jiauww kiaa vutgno, jitt hy hormngx-aw secseh, horix benw cing, jidlo ciongx .dngw .kir byy dnaxqinw.
“Siudnuax lehh? Tec .laii.” a”Jingr :a dnaxx zibmngg, cuwlairlangg sui' decc vuanqed, viktyw.
“Hnaa?!”
“Ginaxaw senrhuir ee siudnuax a!”
“Qin… qinaxzit be qir did kir lap,” lrak diyc huexquanr, a'Jingr :a qongw diyc duarjihkauw.
“Liw tacc e jiacc nua, vran jit xee dairjir vutlixvutcaiw! Jnii tec .laii, guaw binaxjaiw vangwqangx laii kir lap.”
“Jni…jnii, dongsu jiyh .kir .ar.” a'Jingr :a dngw jihquanx, qongxue dingg qxur.
“Liw qingg siw siw, sanr qaxx qxuiw beh liac .kir. Dycc jit xee jiacc gam bin e laii qra liw jiyh jnii? Liw lauxsit qongw, liw qamxx iurqycc qra jnii tec kir ciamx caixquanr?”
“Byy lar.” Hro bow duc huecbuw, dua bin angg qiqix.
“Itding u. Liw benw qycc qra guaw penr.”
“Jex marr sngr daujux-gxiac. Dycc jit qangx hro guaw diyc diyc taucaiw, jinwjingg cud .kir .ee dy’ longxx dngw .laii ar maar.”
“Guaw qar liw lar. Liw suacc berhiauw qra boxqniaw bre .langg kacc singw cri. Knuar si beh sngr langtauu iacc pingdang qinsniax bexbe. Quiciuw deh jit dur kacc dua dur lehh, beh tanr kacc qinw.”
A’Jingr :a qig hmc hmc be cecvnir, simqnualai amr sniu, “Ing’amr diyc taucaiw, ngua liw laii qra guaw hyxcuiwnuarjic.”
Qycc vnuar diamxjingx jiacc kuix jiongw. Jiac amr vaw, cur nirr qux be diauu. Snaqaktangx jit qingx bre caixquanr :ee u denrsi. A’Jingr :a kir tec diaur dirr snaqer-aw ee liamwbah.
“Liw iurqycc beh cud .kir! Juixjyy-aw liw dauwdew dirsii beh siuliw?” Cuwlairlangg cir giagiaa.
“Kacc danw dngw .laii sui’ siuliw, anxnex m dyrr hyw.”
“Liw jitmaw qnaw qra guaw cud .kir cir knuar mai, ing’amr liw dyrr benw sniu beh zibmngg.” Cuwlairlangg vangwdiaux.
Sxamx jinr sxamx trer, simqnuax jerje iap, diuduu .jit .quw .aw, a’Jingr :a iuguann jauw .cud .kir.
Bre caixquanr ee diamwtauu laurzet caixcaiw, qa’iac qaxx. A’Jingr :a laii qaur der, vunxjniaa jiokk akjag ee simjniaa qui’ee dniardiyc .lyc .laii.
“Qinxdniux, qinxdniux. Cikwqig, ciwqig. Sniaxmih langg ee bixbang ing’amr beh sxingg jinx lehh? Knuar jiax laii. Tauu jit xee hyrbew si…”
Jingwlangg juwsinn nih nih knuar. Quiw hunjingx aw quer, denrsirqix taujingg ee langqunn sna’ srer jauw. Si’angw u diyc si’angw byy diyc iarr m jaix.
Amr xia dngrr sniasueh, dna’ tniax diyc qxauw-aw decc cuex qauxlee. A’Jingr :a qniaa laii qaur Toxdirqongx biy-aw, iong qorr siangx ciuw qra Toxdi cniaw .lyc .laii suar qra giaa quann quann, sraiw verbuxlat jit sniax qra vut-aw siag duiww tokax. Toxdirqongx dingxe srinx vrid jyr nng vingg, ciuxtauu ee bangxsud-aw iarr dng juer nng jamw, byy-siax.-byy-sir.
4. Cunlann
Langkectniax ee mocviacduu, sniuxvaii jit der jit der cai qui’ let, jiokk jiahbak. Dagg qangx jaxkiw, Cunlann dy’ iong dax vor crid, m hro ing’iax srid qimtauu .kir.
“Jnia’ gauu snix, snix qaxx jit xee jiongrguann qniaw, vrangx vrangx kyw dy’ tauu jit miaa.” Cuwvnix oksangr ylyw qycc viw duarbuxongx.
Cunlann liyc aw pnaixser ~. Angx dirr ginxaw puar vid zib’yc hitt nii dngw .kir. Nng kax jabow cnia’iongw iur qniaw, iarr beh lai, iarr beh gua, kangkuer sen’ jyr dy’ jyr be suah. Jit nii snax-vah-lak-jap-go qangx, byy jit qangx tangx hiyckunr.
“Guanw vanx :ee jiokk je longxx u GAME BOY.”
Sux langg m sux din, m qramx qokhau-aw snax nii ee haursnix dirr haghau ho’ngg knuawkinx. Qecdngw qangx, Cunlann sui’ kir brew jit daii dngw .laii.
“Cur nirr byy denrnauw, siaw jokgiap iacc craa juliau longxx mngw langg’ jit vo.”
Jiacc jiacc aw sringx qokdiongx ee haursnix jit qxur ue, kacc benw jit lexvair, denrnauw liamcamx bangrlo qui’ jxox anx hyxser kngr dirr ginxaw ee vangqingx suijai ix ing.
“Guaw jyr liapngiaw sia ee siardniuw. Byy jit daii qaqi ee kamera, siaruann be sinwhok.”
Qydiongx zirnisingx jid’err kuix cuir, Cunlann jnii sui’ kir niaw hro ix, qiyr ix qaqi kir qingw.
“Snax-bxan kox diyhh dre hro hyw. M tangx ho’ngg jenw .kir.” Jnii qaudair hro qniaxzii, Cunlann jaiwsnax-jaiwsir dinglingg.
Cuwbi siartuann, kywgiap kacc qor byy diyc. Dairhak byy kyw diyc qongjingr sed :ee, sulip ee hagjux jit hagqii sir~go-bxan, diyhh Cunlann nng qywguec ee guehqip jiacc u qraur lap.
“Dairhak kir, air beh tak, inx diyhh qaqi kir juanxuanx sethuad. Beh singx hiyc’yc iacc kir alubaido, guaw longxx vutcab.” Dua-jew qongw hro siyxmue Cunlann camkyw.
Cunlann byy inwsniax, juwcechuir guanjai kir lap.
“Linw qniaw genxqiuwsow :ee, u cecdew, taulo qex kacc hyw inw. Guanw hitt xee tak qaur juankyx narnia. Jitmaw singlixbin baiw qaxx. U tauqex beh cniar, guaw qiyr ix diyhh qinw kir, m hyw qycc snax qingw sir qingw.” Vnivnii u qniaw tewgnow dngw .laii dngdecc cue sing'uahqer, kangkuer naxx jyr, dongliauu naxx decc huntiah hro Cunlann tniax.
Cego huathiongr. Qra ginhangg sinwjiyh brew cur, jiauww pnihingg, qisiaur dagg guehzit rair qui’ bxan kox. Guehqib jit sniax snax hxun jit byy .kir. Qnuaw huwhur vniar .dngw .laii, qingw cair, juw vng, hniaa juiw juw tngx, Cunlann vin’ tauu laii, jiokk jauxciuw. Vnuar diamxjingx quw quer, snax xee cair qah jit nguaxqongx ee tngx jiauu jnriu dyh.
“Jiac vng :ar. Jiac vaw, beh kunr jiacqycc kunr.” Kinx genn ser giw, Cunlann qra bincngg-dingw ee haursnix qiyr jingsinn.
Haursnix gniauh .kiw .laii cunqingx-banxam, bagjiux suwbangw. Cunlann singx kir drew nng nguaw vng kngr dirr jiahvngrdyh-aw-dingw.
“Ui tniar u kacc hyw bor?” Cunlann mng.
Qniaw dimr tauu.
“Hitt xe aw qaxnaxx u tniax liw qongxx binaxjair vaiwgo u qongsix qiyr liw kir benrdamm, qamxx si?” Cunlann mng kiw qig simsimx.
“Guaw u kar denrue qra inx qongw byy beh kir ar.” Qniaw dab.
“Si anwjnuaxngiu aw?”
“Hitt qingx li lanw daux sniu’ hng. Jit jua kir diyhh qui’ diamxjingx. Be hryy.”
“Dingw lexvair hitt qingx, jre denrciax jap-go hunjingx dyrr e qaur.”
“Dyrr qra liw qongw .quer .ar. Inx ee tairgu sniu’ cax.”
“Cocox guehsinx dniardiyc be quann. Jyr narr u quw, dauc dauc aw e diaujingw.”
“Dongdongg siksu kir niaw dairhagsingx ee sinsuiw, jit qangx guaw dy’ be genr jyr.”
“Idniu inxjinr :ee hitt qingx, diauqnia be baiw. Liw qamxx byy beh kir cir knuar mai?”
“Liw m bad lar. Hitt qingx hongpingg byy hyw.”
Cunlann u ue qongw qaxx vnixcuir .kir. Jit dxngr vng jiac qaxx byy-ju.-byy-bi.
Dua guec quer jriab siyw guec, kangkuer qex jiokk likling. Lixdniuw cniar sensnix beh laii qar lixbinn caujog denrnauw. Tranr jitt xee langwpang, Cunlann sniu beh kir yc. Vut’ir, haursnix qra dongr.
“Qui’ amr liac denrnauw dokdog jinn, hex zuarr siongx bagjiux lehh! Liw cenban m tangx kir!”
“Guaw si sniu qongxx, denrnauw jiamrjiam naxx poxpenr. Narr berhiauw, qniax duer be diyc sidai.” Cunlann qongw.
“Liw beh air congr sniaw, guaw longxx tangx qra liw draur jyr. M hyw qaqi kir cue jit xee qee laii giaa.”
Cunlann vunxjniaa hingr cuccuh, zet vutvud. Qniaw jid’err kuix cuir, zedjingg ee undo juer jit xe qangr, qangr qaxx qiongbeh tangx qetvingx.
Go-guec derr zi xee lexvaiwzit jitt qangx, haursnix muixx nii longxx e sangr lexbut hro Cunlann. Qinnii, Cunlann tec diyc jit quanr Ueequrliw.
“Jitt vaii :ee denrsi suwsiongg decc qongxqyr. Liw m kaix jiokk je jnii kir brew?” Cunlann mng qniaw.
“Guaw dirr bangrlo-dingw u brew diyc siok :ee. U huer :ee, qinqud rair qor. Kacc quir marr diyhh brew laii hro liw jiac.”
“U ving’iuw qiyr guaw rair qeqiamw unrdong, qycc jiy'iyx guaw hiyckunwzit qapp inx kir vreh snuax.”
“Hex jiacc si m tangx,” haursnix qra dongr qinw qinw. “Vreh snuax vreh lautuix longxx e kixdang diyc katauux. Quanjad lylok kuair tewhuar. Bycaiw lanw kaix jnii decc jiac Ueequrliw.”
“Gunw ving’iuw uanaxx guaw ee huer. Langg’ ix cavutdyx dagg lexvair longxx e kir vreh. Iarr m bad tniax ix qongw dyc’ui decc sngtniar.”
“Iaxx m jaix lehh! Sii qaur jinjniar huah qankow dyrr be hur :ar. Qycjaiww qongw, kir vreh snuax :ee samqaur-qiuxliuu, sniaxmih kuanw langg dy’ u. Lairdew junw u jit xee laii decc qapp liw oamwvinw beh penr jaii penr sig :ee, duw jit vaiw dyrr jiac be sriaux :ar.” Haursnix qongw qaxx jiokk cnejinx.
Cunlann u hro pacqniax .diyc, vreh snuax ee dairjir jyc hetqak, m qnaw qycjaiww tee kiw.
Tewgnow beh qui’ dxangx, cue byy qacsimdur hahtautuii :ee, taulo sen’ jiac dy’ jiac be diauu. Byy ngr haursnix jitt hxun siuzip, kikliamw aw ing, liamw liamw aw iauxx erdangr quer. Haursnix zuxx laii zuxx diamwkax, byy air cud kir qapp langg' jicjiab qauvuee. Dogdok jitt hxang hro Cunlann kacc huanlyw.
“Jarhngx jyczit aw dirr ciavaii-aw danw ciax, qongxx kir duw diyc Ngg Sewqed. Ix qongw dingw vaiw ee dongconghue liw byy kir, qycc qongw jiokk je longxx decc mng kiw liw.” Jiac amr vaw, haursnix qra nng vingg rngw-kauw tuh kacc kiw beh sew nguaw. Cunlann qra cunx cair kngr zip kir vingsniux ee sii naxx decc dramm kiw.
“Juann juann jit quaw hnowsursiong :ee liauliauu. Cutgiap, qokk langg qniaa qokk lo. U sniaw tangx hyw mng?” Qniaw qongw, ciuw nirr jit quex caiwquecuer naxx decc lur jensii.
“Langg’ inx qaidongx marr si hyw ir. Qydiongx snax dxangx dirr qang jit qingx qauwsig siongrkyr, jex marr sngr jit jiongw enn.”
“Inx hiaxee longxx knuar quann byy knuar qe, kacc qongw dy’ decc viw si’angw tanr kacc je. Guaw qapp inx byy ue qongw.”
“Dongconghue quw quw aw jiacc vran jit vaiw. Liw longxx byy kir camqax, jurr anxnex qapp inx dngrlo .kir, anxnex nacc hyw?”
“Inx hiaxee m dat diyc guaw liauw siqanx kir qapp inx siy’ qaucab.”
Cuir bih bih, bagtauu qad qad, Cunlann diam cuir .kir.
Qongsix druar quw, dagg hxang hokli qex kacc u. Cunlann jit dxangx u jap qangx tangx cringw hiyckunr. Daqnuax qinaxzit jyr qi, dua-syw dingw lexvair dyrr u kar denrue laii qiyr. Jap diamw gua, haursnix iauxx bue cud laii jiac jaxdngr. Cunlann cuiw ix jarhngx iurqycc nguar kunr, byy beh qra pah jingsinn. Jre qongciax siqanx kacc pnaiw junxjad. Narr drong .diyc qnuaw be hur vair, duiww dua-vxeh inx e jin’ pnaixser, diyhh liongrjaw cutmngg kacc unxdangr.
“Lauu Cunlann, quawhy.”
Mngg jiacc unziuu siongser kam uaw .laii, duiwqingw, jauxpuex :ee iuqnia puewdat qaur jiax.
Kuix sryw zip kir tec jit liap venrinr .cud .laii, vauqyw siugud. Jid’err tauw kuix knuar, Cunlann hiamw hiamw simjong byy lat.
“Dycc jit xee m jniaa langg, qiar qaxx jitt dingxhy vutlog-vutsog ee mihqnia laii hro :guaw!” Cunlann cuir-lai naxx decc lexliam, giaa syxsii qra mngg kuix .kuix, anwsngr qra mihqnia tec zip kir pniax danwsag.
“Liw iarr u cuwbi knuar jex or?” Qecviah oksangr duxduxx brew cair dngw .laii, bagbuew ngr Cunlann ciuxtauu ee mihqnia giyw .jit .xe.
“M jaix si’angw jiacc iauxsiu, qongxx qiar jitt hy taiqyx ngiaxpnir laii hro :guaw.”
“M si liw dring :ee! Anxnex guaw jaix, unxdangr si linw haursnix iong liw ee miaa dring :ee.” Oksangr qongw.
“Beh tacc u kyxlingg?”
“Tacc e byy kyxlingg? Gunw qniaw jingg:a dyrr kir bangrlo-dingw qa’ngg juwbunn jit dxuix dngw .laii, qongxx si huewbuew, siongqax siok siok aw bre. Linw qniaw jitmaw qamxx u dilehh? Si m si, qra qiyr cud laii mng dyrr jaix :ar maar.”
Jinwter liongxlann, Cunlann jit xee simqnuax zuu cangxcangw.
“Ar, guaw sniu .diyc ar. U ving’iuw dingw zit aw qiar guaw qra brew :ee. U huer :ar, taukag venr jnia’ baiw.” Cunlann ee snia'imx liyc aw e junr.
“Acc ix nacc byy qaqi dring, diyhh laii jioktog :liw?”
“Acc dyrr inx daux zit .sii byy langg dilehh, quawhy siux be diyc.” Cunlann qongw qaxx jiokk conghongg.
Zip laii qaur cur-lai, Cunlann hingkamw pongr lehh naih lehh, jingg kuir jriab be au kuir diyc. Bagjiux siongr duiww haursnix ee vangqingmngg, ciuxtauu ee mic, jidsiqanx, Cunlann suacc m jaix rair anwjnuaw laii cuxdir.
5. a’Bunn
Jid’err jai’ngiaw qongxx inx nng xee kiarqongx, quatding beh habqow juer surgiap, a’Bunn bersux hro langg' sag lyc kir knekamr, tauu hinn bak amr, simqnuax qed qui’ uann.
“Jitt xee guaw ee dongcongx, dirr vowjngx decc jiac taulo. Liw dycc jit qangx narr u beh jyr vor ee singliw, hxuer cue ix pnruar dyrr driyc :ar.”
Jit dxangx jingg, a’Bunn siaurqair hangqaux qapp quacdiamr sigsai. Jit dxangx au, langg’ inx nng xee beh habhuew dirr singlixdniuu pacvniar.
Dirr bincngg-dingw vingw laii vingw kir kunr be lyc binn. Qecdngw jaxkiw kunr jingsinn iuguann byy-sim.-byy-jniaa, taujangx byy vinr, gu’axkor longx lehh, jit niaw T SHIRT unrziauu iarr cing cutmngg.
Jaxkixdngr, jit nguaw daurlingx puer jit liap vngruann iacc vau’aw dyrr jin’ u qauwgiac. Qinaxzit, a’Bunn qex qiyr jit diauu iuciaquew, cunx beh vnuar quec jiac be lyc, kixui beh kir labjnii, diddit decc toxeh, jiacc jaix jitt dxngr kaksit jiac kir sniu' vaxdo.
Qauw diamw jinwjingg dnaxkah sngr junxsii. Rair ing .diyc ee qesix qauwliauu-qauwsiaur dirr dyh-dingw :ar, jit xee simqnuax be dniardiyc decc dapdaiw. a’Bunn zuxx sniu zuxx uthuew. Qapp dongcongx :ee vnii je huer, qycc qang jit nii cud siarhue. Langg’ liammix beh jyr tauqex .kir .ar, ix iauxx kud dirr jiax decc jyr sinlyy niaw siw guehsinx.
“Guaw u sniu beh hunr surgiap, singliw jyr kacc kuah lehh, rair kanbanw langg laii vangciuw.” Pittauqaux dingw guehzit laii knuar vanrtauu, u ir naxx byy ir qongw kiw.
“Liw anwsngr beh cue si’angw?” a’Bunn mng qaxx jiokk cnijinx.
“Guaw laii jiy'inw linw dongcongx :ee, liw sniu sniaw kuanw? Ix qaxnaxx vutjiw aw u singliw-taukag.”
“Liw ganxqongx be baiw. Ix kaksit si singlixkax. Byy cincniu guaw, qanda’ erhiauw rue dancingx giaa jiamsnuar.”
“Liw u lordngg, beh vrangg, beh jenw, beh setqer, jablorjngg, dagg hxang e. Guanw jitt hy byy jit jxingr :ee, qanda’ erdangr kyr jit qix cuir jyr qingqiw.”
“Langg’ ix dirr vowjngx giabjig vaii taujingg kxamw :ee. Kiongxqniax liw vnuacniaw ix be qniaa.”
“Jex diyhh brang liw jiauwingr, qra guanw qeqiamw janwcuir draur inxjenr.”
Hangqaux zet putpud. a’Bunn byy ir aw byy ir. Ingxquer ix laii vixngiu, a’Bunn longxx e cniaw ix limx qavix. Jitt vaiw m na lenrr qunxjuiw dy’ byy, ngiurpinw knuar liauw, a’Bunn sui’ jiauwsuu sangr kxeh, jamxzenn aw dongdut.
“Liw si decc sniu sniaw? Tacc e gna gna?” Cutlap vorvinn laii kia dirr a’Bunn binrtaujingg.
“Byy lar,” a’Bunn hnair tauu. “U dairjir beh cue guaw, si bor?”
“Linw dongcongx :ee duxjiah kar denrue mng guaw siauwhang ee dairjir. Guaw qongw guaw byy knuar diyc siauwwdnuax.”
“Ar! Hex or, dirr jiax lar.” a’Bunn an’ tuacduu-aw lairdew qra ciamdnuax ciaux .cud .laii. “Dingw zit aw dyrr beh tec hro liw, tec qaxx be qir tihh.”
“Jitt qingx cavutdyx dagg qywguec longxx u decc cringw :ee. Liw si sitluann iacc si jnuaxngiu? Jiacc sitsiongg.”
Hro cutlap kiycciyr, a’Bunn bin durdu.
“M jaix inx qniaa qaur dyhh :ar?” Kangkuer qaur jit xee kamxjam, kuar dirr simqnuatauu jitt qnia, a'Bunn jongw e kiyh kiw laii sniu.
Ervox, bagjiupuee dang qaxx, pacdoo qaiwsig sen’ congr dy’ be duiwdangg. Jauw kir tenjnew vog jit qix hrunx cnexbinn, aiwkunwsinn jyr jit xee qnuaw qnuaw .cud .kir. Dngw .laii, vanrqongdyh-dingw cai jit ap ju’iongxpinw. Jimjiog knuar, dangsi'aw si jit xee jyr duarvnuaa ee hangqaux sangr :ee.
“M si nii, m si jeh. Cnix-dnia-vec-dnia sangr omiiage! Qamxx si beh qiausyx lanw ngua tauqex?” a’Bunn simtauu piagpiak dnua, iarr qniax iarr jubuix.
Lexap m jaix diyhh kngr dyc’ui kacc hyw. U sniu beh hro dongsu genwbak .jit .xe, qycc qniax hro tauqex knuar .diyc kiw hiabgii dyrr baiw :ar.
“Ongg Dangw :ee qongxx sangr guaw jex lar.” Qaxvangx qiyr dee, diamwpor qra hunxngii-lingdee sangr qauwui, vangvan vunx hro u qiyr :ee, a’Bunn amwjuewjni qra lexap tec hro ix knuar.
“Qongw qaxx jitt xee Ongg Dangw :ee u qraur byy iwsur, daurser hanr cax hiacc je,” vangvan qihqauc qiyr, jabjap liam, cuir-aw kiaur ducduh. “Linw juxquanxqib :ee longxx enwyx. Guanw jiaxee erkaciuw :ee qanda’ erdangr jiac bixqyx.”
“Linw! Liw si qongxx, dukiw guaw, ix iarr u sangr vadd langg?” a’Bunn mng.
“Tong’ langg u a! Tniax qongxx viwsux qycc tec siangx hxun lehh!”
Vangvan cuir qongw qycc qorr nng qix jingxtauu-aw viw. a’Bunn knuar dirr ganw-lai suacc naxx cincniu decc viw singwli.
“Qinaxzit ee dee tacc e jiacc aixdnix .diyc? Pnaiw limx qaxx!” Iong sucqongw suh .jit .cuir narnia, a'Bunn qui’ bin uanwngor.
“Si or? Guaw kacc danw e kar denrue, qiyr inx au vaiw m hyw camx hiacc dnix.”
“Lingrzit aw mrbenw brew guaw ee. Guaw byy air limx :ar.” a’Bunn byy-dniu.-byy-dii pnaiw sniasaur.
Vutbingg-vutvik jiac pongwvniaw, vangvan bin-aw cnix sunxsunw, vnuar qxur dy’ byy qycc qex qongw.
Lak diamw gua, jit qangx ee kangkuer beh siusuah. Sinqingsnuar vangr kacc ling, ue dyrr je :ar.
“Lanw jiaxee liw druar siongrr quw. Liw qamxx m bad sniu quer beh qaqi cud kir jyr?” Qecviah dyh :ee qesix naxx siux naxx decc tamwmng.
“M bad.” Nng zri danqanw, a’Bunn duiwcuir rinr.
“Jiac langg’ taulo kacc unxdangr. Qaqi jyr, dagg hxang longxx rair quanxqor qaxx diyc, d.-dangsaix-s., jap-jap-veh-veh :ee jit tolaku, byy kacc knuiwuac.” Quanw jairkor :ee sun uertauu jriab lyc qongw.
A’Bunn byy janwsniax, byy vuexcuir, qo’ qo’ qig sim sim.
Yc hogjongx setqer, a’Bunn jid’err cutgiap dyrr laii qongsix siongrvanx niaw guehqib. Jairtauu aw cniciuw u kacc gnirjuiw, siogsig .laii, unw unw sun sun, benw sniaw vingxvnir, duw diyc dua guec kacc diyhh qavanx. Vingwsowsii, cid diamw jyxiu dyrr tangx dngw qaur cur jiac amr, hiyctiamw.
“Liw jarhngx denrue kar .laii hitt jun, guaw duxhyw u dairjir decc byy ingg, be hur mng. Linw dangsii beh kaidiongx?” Beh kar m kar, qui’ amr decc diuduu. Qauw diamw quer, a’Bunn diongwdamw denrue giaa .kiw .laii.
“Liw mng jex beh congr sniaw?” Denrue hitt vingg dyww mng ix.
“Beh cuann hyrlew jriog linw liongsing, huatjaii a!”
“Iauxx bue lehh! Linw dongcongx :ee jiokk qinxsin, dairjir quer ix ee ciuw, ix longxx diyhh snax cuixliw, sir kyxlu. Jiauww jitt jiongw kuanxser, iarr qnaxx diyhh jit dxangx vnuar dxangx ixau :ar.”
Jitt tongx denrue qongw suah, a’Bunn do-lai ju'imx, simjingg qui’ee dngxuanx. Vunxjniaa beh siw narhnai, jinw, ciydiyy qenrdiux, e larkig, e cniuwquax.
Sewsu je venwhuar. Jit dxangx lywlyr dngg. Bagjingg iaxx byy qewik. Siongrqaiww byy, ix iurqycc knuar qnir diyc hibang.