jingciu-dingw ee qongqingw

JUANXHAGSINGX

Ix cutsir ee soxjai hy jyr RXW, qongxx si lamvo jit xee jamxzenn aw iappiah ee jngsia. Uirdiyhh laurve jyr singliw ee enqor, jurr ix qokhau cutgiap hitt nii kaisiw, qui’ qekauw-aw vutsii dy’ decc censuaw qusow, duer hordniuw jit siwquer linlongx jauw. Hagjik-qiwlok siaw did hunbingg, ix vnuar dangx tak quer sir qingx haghau, druar quer snax xee quanrci. Lun jinx qongw, quahiwvanx-aw kiongxqniax dy’ byy inx jiacnirr jiap vnuasuaw.

Qangxdaii-dingw ee javoginxaw kia tringg tringg, siangx ciuw vangwsuii iap'au, bagjiux quw quw aw jiacc nih jit xe. Naxx cincniu jin’ quanwsir jitt jiongw dniubin, dng’ sir~go-jap duir bagjiux dangjee liac ix decc jinn, ix byy jit sud aw lunxneh ee kuanw. Ix ee sniaau qe qe iurqycc puawcec puawcec, henxzenn dngdecc dngxduarlangg; langg sanxtiux sanxtiux, binrbah qycc be ox, u subunn-kuanw. Kyxsiyh ix ee sincing qapp ix ee snidniux byy qaccah, sinkux-dingw ee snxax vagsinx vagsinx, qycc qaxnaxx in’ui sexdng liauw sniu' tiamw, venr qaxx vyc .kir, sindexsnax tingww knuar hen hen. Vehsixsad ee jewhok m na sinx haghau ee miaa iauxx bue siur, lenrr ix qaqi ee miasner dy’ kiamr. Jongw .si, snakor narr hro ciaaw ciax .quer, qeqiamw e lauu snuawziah. Guaw giaa tauu jimjiog qra knuar, hex miaa ee vorhun d.-dingtac-t., zirhingg jin’ yh kir liac; sner dyrr qigqii cingcyw, be jauxsiamw tihh, hex unw si jit xee “Liw” .zri.

"RXW? Jyr hnirkangx m bad tniax .quer. Hiax m jiokk jngkax :ee?" Harkyr jap hunjingx, qui’ din langg jrig jrig dirr juanxhagsingx ee judyh-aw-vnix. Ongg Bixbiw dirr juanxhagsingx ee duiwbin jre .lyc .laii, ciuxqud kuar dirr dyh-aw-dingw, tehtauu mng ix bunrdee.

"Hiax qui’ee longxx snuai’axhngg lar.” Qongxvyr-denrdaii cniuw lecc dab. “Hiax ee snuai-aw dnix butbud qycc duarbuw liap, jiac narr u cunx qycc erdangr guarsiaux. Jex derliw-laursux dyrr bad qar .quer ar!" Qongxvyr-denrdaii naxx qongw, cuiwnuarjuiw naxx beh dinx .lyc .laii ee kuanw.

“Jex nacc u hihanw?” Ongg Bixbiw qongw, “Dirr B-qog, qo’ qo’ Q-jiux ee quexjixhngg dyrr viw lanw longxjongw ee cande kacc kuah!”

Bixbiw inx daux dirr B-qog u cur. Jitt jam aw B-qog ee cuwqer dngdecc lag, tniax qongxx inx sirduarlangg anwsngr tranr siok qnuaxqinw beh qycc hag jit dongr, jionglaii jaboxqniaw qethunx ee sii, tangx sangr hro jyr qewjngx. Bixbiw vunxlangg iauxx m bad kir quer B-qog, vutzirqyr, inx daux jitt jun duarser hxang sing’uac-iongrpinw, jerje longxx B-qok laii :ee. E qir did qurnii hiyczuac ee sii, Bixbiw iaucniaw guaw qapp quiw xee aw kacc u qauvuee :ee jywhuew kir inx snuadingw ee vedjongx cittyy. Inx ee kectniax l.-longwkongr-k., juann tniabin itkair an’ B-qog jinwkauw. Jniar vingg u jit xee viacloo, lairdew jiokk qngqueh, jit sxix aw huexhux ee ngiaxziah dy’ byy. Viacloo dingxquann u dah jit dniux B-qog ee derdoo, jiamr beh qui’ vnuar bin cuwviah, jin’ hniaxbak. Hex dingxtauu qycc u jit xee soxjai lingrgua ing angg vid kox .kiw .laii, qongxx inx B-qog ee cur dyrr kiw dirr hiax. Dirr derdoo ee jniawduiwbin si jiuxduu. Jiuxduu ee qec’aw-dingw cai jit jiah caa kig ee barhiyc, kig qaxx jin’ singg, hng hng knuar, bersux uac :ee qangrkuanw. Hitt jiah barhiyc ee bagjiux cnix ginwginr, cuir jiamx ~ ~, hro guaw ee inwsiong jnia’ cimx. Hranw did knuar langg cur nirr tiauqangx kngr jit jiah e jiac langg ee jingsnix decc denxlamw.

“Aurzid’aw jitt jiah e venr jyr gunw Ongg .qrax ee tuanqavyw.” Bixbiw ee maxmah anxnix duiww gunw qongw.

"Q-jiux longxx jingr sniaxmih quexjiw?" Qongxvyr-denrdaii suar lecc mng.

"Liw urngiaw si cauxdersongg neh. Q-jiux ee juixqyw tong’ sewqair u miaa :ee. Guarqog-derliw duxjiacc qar .quer. Byy, hitt dangjun liw si decc ducqux, si .m?"

Bixbiw jit ciuw cacqyh, bagjiux dnir dua dua luiw qra qangr. Jingwlangg ciyr kackah, liahjunw si decc qunxsngxciyr.

“Gunw dadi dingw guehzit kir B-qog, dingw lexvair dngw .laii ee sii u brew jit quaw inx hiax ee quexjiw. Qniazit guaw duxhyw u jah, vunxdew si beh jiac daur vaw jiac, dnaxx jinw vunx .linw. Si'angw beh air?”

Bixbiw an’ juvaux tec jit pax pudycnix cud laii denxvyw. Jingwlangg knuar diyc u hyw kangx :ee, jit sniax dy' jongg duiww Bixbiw hiax .kir.

“Bixbiw, liw byy beh jywhuew laii jiac?”

“Linw jyww linw jiac, gunw daux iauxx jiokk je.” Bixbiw duiww dag’ee bunxciyr, sniadiau jinjniar unziuu, qapp jingg:a jamxzenn nng jiongw ngiursniur.

Qui’ din langg uii lehh decc siy' cniuw. Jit pax pudyy zi-snax jap liap, sen’ vunx marr vunx byy qraur gxiac. Hokkir vunx .diyc .ee, hnuatauu-hixbin, jiac qaxx jabjap qiyr; kaciuw kacc syy :ee, diyy kax dngr dxee, kia dirr vnix:a decc genr senqyx. Hutzenqanx, guaw sniu diyc hitt xee juanxhagsingx, jid’err uat tauu, knuar diyc ix tauu damr damr, he sniwmia decc crid ix ee sinx ixdyh.

DUIWTAUU

Qangxdaii-dingw byy laursux decc dinwden, qui’ qingx qauwsig iuguann jin’ sokjing. Qecviah vanx ee laursux decc pah hagsingx, cuee-aw-sniax jit jun jit jun, jitt xee but snax xe, hitt xee sud sir xe. Suibongxx nng qingx qauwsig u qau qau ee viah qeh kuix, gunw iuguann tniax kiw id-cing.-zi-cyw. Hitt quaw vingsiongsii kacc get kacc jen :ee, jitt jun dedvet dniardiyc. Guaw jyr vandniuw :ee qniazit tranr diyc ingg, mrbenw giac cuee-aw qapp inx decc jauw siy’ zib.

Jit xee lux qngtauu ee qiuwcatdui :ee byy-sniax-byy-sueh qniaa .zip .laii, qra jit dniux juaw dah dirr ovangx vnix:a ee qywsirvaii, liauxau, iurqycc byy-sniax-byy-sueh qniaa .cud .kir. Qiuwcatdui :ee jid’err lirkuix, dag’ee iw nirr jre be diauu, sui’ ciongx laii taujingg, amrqunw crunx dngg dngg, qui’ simqnuax decc cue qaqi ee miaa.

Haghau u dring jit hxang quiding, qongxx qauwsig ee jyrui jit guehzit diyh’air ngua jit vaiw. Pnaiw hagsingx jre aurviah, hyw hagsingx jre taujingg. Hyxpnaiw ee viaujunw, dyrsux tangx qaqi junxjad. Guehkyw ee hunsor camkyw nardnia, berdangr juanvo jyr junxjinn. Poxpow aw qra hunlui, jingbin nng vaii jre laursux simbagdiongx ee hyw hagsingx, singjig hyw, qycc diyhh quaikaw, hyw pinxhing; byy air tak ceh, air jokquair kacc ciuxcingr :ee, laursux knuar liauw jin’ ciwcak, tiauqangx hro inx jre dirr siongrr buew vaii vangr guu jiac cauw; cunx :ee jre dirr vnuawdiongnuaa ee hagsingx, ceh kacc be tak, jongw .si jin’ siuw vunxhun, u jiauww tausurlo, be cincniu hitt quaw gauu vnir qxuiw vnir quair iacc vnir qux vnir vih :ee, qui’ zit qapp laursux decc jyr duiwtauu.

“Linw jitt quaw gedtiog vutsiurqaur :ee, jit siwlangg kiycqak lar.” Dyrsux qiamx qokbunn-laursux vutsii anxnix decc liam.

Jurr id nii aw kaisiw, guaw qenww kyw dy’ kia derr id miaa. Kyxcir ee singjig cud .laii, jingwlangg diyhqib beh knuar vngw, tangx jai’ngiaw au jit qywguec beh ho’ngg suaw kir dycc jit dah. Qanda’ guaw laursinn jai jai, m bad qapp langg’ decc keh. Danrsi jitt huee byy qangg, byy ingxquer hiacc sangxser. Guaw langg ser hanr qycc hniux hniux, knuar kacc be diyc qycc iarr jnrix be zip .kir, jixhyw dirr guaruii-aw ngiaw .jit .xe liyw .jit .xe. Kia dy’ byy nng hunjingx, kaqud qamxqag nngxsngx nngxsngx, amrqunw-au gnirjnia gnirjnia, bagjiux qycc siab siab, sidjai jin’ tiamxtauu.

Guaw quatding jiamrsii singx dngw kir ixaxui hiyccuanw, lordiongx, sibquanwsingr quancad guaw ee duiwciuw. Guaw huathen ix liangser aw liangser, kiaux kax decc knuar qoxceh. Guaw knuar jit xe, simqnuatauu ee huew sui' dyc .kiw .laii.

Mrjiacc vnuar qywguec ee siqanx, guaw ithiongr ee derui jitt jam aw suacc lorlo henw, qaxnaxx suisii e ho'ngg enw .dyw. Tenliongg qongw, ix urngiaw jin’ cutdiyh, vutquanw bunn :ee iacc bxuw :ee, ix dagg hxang longxx tongx. U jit vaiw sowhagkyr, laursux dirr ovangx cud jit xee debak, rair gunw nng xee jit langg kia jit vingg dirr ovangx dingxquann qra dab .cud .laii. Guaw ee sowhagdew vutjiw aw jai, guehkyw ee hunsor dirr haghau lairdew si vaii u jnriu dringw :ee, byy gigo, hitt vaiw guaw suacc diyhdag, ban ix beh jit hunjingx quw jiacc qaixdab .cud .laii. Jin’ je javoginxaw dua lat pah pog'aw, jre dirr aurviah vaii :ee qycc u langg kosi'aw. Laursux ciyr bibix, kogkok dimr tauu ylyw ix u sowhak-tenjaii. Guaw jin' auwnauw, qnialo sam sam dngw kir jyrui. Jurr hitt zit kiw, guaw dyrr qra ix knuar jyr sniwmia-diongx tauu jit hy ee duiwdik. Vutqyr ix naxx cniurr uanjuann byy qra guaw knuar jairr ganxlai. Kyxviw jitt jun ix hitt xee hxingg, hro langg' knuar diyc jinjniar e gingg.

Dyrsux byy-dniu.-byy-dii dirr mngkakauw cuthen, sraiw kiarbak, ciuw nirr moh jit tac kyxqngr. Dag’ee knuar jitt xee vanrser dyrr jaix dai, m qnaw encenn, qnuaxqinw vniar dngw kir qaqi ee xui. Guaw in’ui jre tauu jit vaii, li qywsi qaiww qin, qui’ din langg snruar .kir liauxau, guaw qra bagqniar tuh quann, bagjiux cuxbangw.

Jex nacc u kyxlingg lehh?

Dyrsux qra cuee-aw cniaw .cud .laii, sui’ xee aw kaisiw huah miaa, vuthing ho’ngg diamw .diyc .ee, dniardiyc diyhh jiac jit dxngr aw dik’axqix craw bacsix liauxau, dairjir jiacc erdangr suah. Inx uree ciuxqud crunx dit dit, bagjiux kreh sensenn, danw laursux pah u qauwgiac, siangx ciuw dirr katuiw syx syx lehh, iurqycc uac uac tiaur tiaur, qapp jingg:a byy nng ngiu; uree bin-aw cnix sunxsunw, ciuxqud laglak cuah, mrjiacc ho’ngg pah jit xe, ciuw sui’ qiux .dngw .kir, jionganxnix byy beh qycc crunx .cud .laii. Marr u jit vorhun langg, buerjingrr pah, bagsaiw siwlamsuii, qui lyc tokaux, dua sniax aiqiyr m qnaw.

Lorbuexciuw, laursux huah ix ee miaa. Ix jin’ piauped, jit vo jit vo qniaa hiongr qacdniuu, byy nisix marr byy hiongqongg. Laursux qiyr ix qra ciuw crunx .cud .laii, ix liac gnirpni qan’ qan’ aw m tniax. Laursux hohad ix be drang, gik .diyc, cuee-aw giac .kiw .laii an’ ix sinkux srer .lyc .kir. Ix longxx byy junwbun, quwjai langg’ pah. Laursux qyckacc huatlat, cuee-aw dnec ann ann kaisiw luan but. Ix iuguann kia dit dit, jurr tauu qaur dnaxx, byy tniax ix hnaix qaxx jit sniax. Buexau, guaw sidjai knuar m quewsimx, tauu uat vnix:a m qnaw qycc knuar. Cuee-aw sud dinxdang kongkir ee snia’imx hihu qiyr. Guaw qnuaxqinw qra hni-aw ngx .kiw .laii, kow byy jitt jiongw kiongxvor ee dniubin jaw jit sii qetsog.

Ho’ngg sud ee langg iauxx siauwlenn, pah langg :ee kiokk u huer :ar, be kamx did anxnix qikkir. Laursux ee ciuw suee .lyc .laii, hingkamw pongr lehh naih lehh.

“Benw qiywsi liw vadd kyx longxx kyw... kyw buanxhunx dyrr decc... dyrr decc hiauvaix. Jixiaur guaw... guaw iauxqycc jyr liw ee dyrsux, liw ingxuanw... ingxuanw benw siauwsniu ersaih suaw... suaw xui.”

Dyrsux jidbin ma jidbin cuanw, jit qxur ue hunx jyr quixlyrr jad qongw. Ho’ngg ma ee langg byy-iauw.-byy-qinw, kyxciwdnuax-aw sax lehh jyww ix huantauu dngw kir ix ee xui.

Narr jiauww qongvor ee singjig laii qra sngr, guaw dagg kyx cexunn sux ix beh jnia’ jap hunx, qetqiok, in’ui qokbunn jit kyx, jitt huee, guaw dyww jamr ix jap hunx.

Suizenn jitt vaiw guaw derr id miaa siuw u diauu, guaw vingrr byy in’ui anxnix laii hnuahiw. Guaw qaqi simlai jaix jaix, narr m si in’ui ix tiau'iwqor beh ziaw dyrsux siurkir, qokbunn tiauqangx kyw byy qibqeh, quanqunx ee vyxjy, jitt huee qaidongx ix laii jre jiacc driyc.

Ix jitt jiongw qikqud ee qywsingr hro guaw jin’ iamwor, zuxx tyxiar :ix, zuxx sniu beh jai’ngiaw ix dirr aurviah decc vnir sniaw dai. U jit vaiw ee qokbunkyr, tranr laursux decc siaw ovangx, guaw iurqycc uat tauu, ciangrduxciang qapp ix ee uahganw sna’ duir. Guaw qinw uat dngw tauu, nng vingg cuiwpuew hnah hnah, simjong pogpok cnaiw. Jurjiongg hitt vaiw ee iwgua liauxau, guaw u kacc qinxsin, siqix kakding u tywdongr, jiacc e kir jyr jitt qnia qaqi narr sniu .diyc dy’ e qamxqag qenwsiaur ee daijir.

SU'NGIAA

Jaxkixsii veh diamw, jxingx-aw-sniax duxx giangx, dngcex a'vxeh jikkig qra nng snir ticmngg qnuix uaw .laii, zen’au cnuar mngg, itdit qaur bec'amr aw sir~go diamw jiacc u qycc kuix .kuix tangx vangr hagsingginxaw cud .kir.

Gunw jitt vanx ee langsor vunxdew u sir-jap-go xee, cing qunn :ee viw cing dngkor :ee qex jit xee. Juanxhagsingx dirr hagqii diongqanx juanw .zip .laii liauxau, javox jabow duxduxx hyw duiwvnuar. Dag’ee u enn jyr dongcongx, jit qangx veh~qauw diamxjingx quw longxx dauwdin, dangjee jiahvng, jywhuew siongrkyr. In’ui javox jabow texjid byy qangg, texiogkyr habqaix diyhh hunx jyr nng vingg, javox huanrr javox, jabow huanrr jabow. Jongw .si siongrkyr ee siqanx qangrkuanw, dirr unrdongrdniaa ciangjai e drng .diyc.

Tnikir hipzuac, ervox siongsiongg e lyc saivakho. Diongdaur jiac vaw, knuar tniser oimx oimx, kactingg, luihuew jit jun jit jun. Byy zuarr quw, horjuiw dua dua qangw an’ tnidingw puah .lyc .laii. Qaur beh siong texiogkyr jinwjingg, ho iuguann lyc be li. Unrdongrdniaa jit pxenr bu bu puw puw, tokax damm jniuwjniur. Laursux qra hagsingx cua kir texiogquanw, javox pah naqiuu, jabow pah dycqiuu. U jit vanx quann gunw nng nii ee hagsingx cam’ gunw qangg jitt xee sijun decc siongrkyr. Nng vanx ee javoginxaw lut ciuw lut kax sna' duiwdin, junxvi beh dirr naqiudniuu viw jit xee quanqe. Caipnuar jit sniax dngg dngg ee vi’aw vunn liauxau, sianghongx kaijenr. Jaboxginxaw byy langg u simjniaa qycc pah qiuu. Javox :ee dirr qiudniuu ping qirsut, jabow :ee dirr vnix:a vniar sniaser. Jit vingg kia jit dui, diggnow hunbingg.

Ho zuxx laii zuxx dua, qiudniaa ee kiwhunx zuxx laii zuxx qinxdniux. Pah byy jap hunjingx, javoginxaw jit xee aw jit xee tngwvakteh, qnuarjuiw jit dih jit dih dabdap dinx, bersux decc lyc ho lehh. Guarkauw decc vangr horkax, lairdew decc punr horsab-aw.

Narr dansunn jiurr texqeh laii lunrduanr, gunw sidjai kacc jiahkuix. Mrquxx gunw jitt dui ee go xee jenwjiongr, jenwsut ee unriong jin' uahkuir, qokk langg naqiuu qindew qycc jai, jingxtew laii knuar, marr si u singwsuanr. Jingrr kaisiw qaur dnaxx, sianghongx vniawdin, su’ngiaa itdit vyxcii dirr lak hunx ixlai.

Ix marr si gunw jitt dui qidiongx jit xee. Duxx an’ vadd qingx haghau juanw .laii, ix qapp langg' dauwdin lenrsip ee siqanx dniardiyc byy je, mrqycc jid’err cutdin, qui'ee sewbin ix sui’ u vaxag, qapp duiriuw marr jin’ kewhap, uanxzenn lau jenwiuw itvnuax. Tuantexjenr diksingr ee quanqen, jueww juxiaur dirr hunqangx qapp habjog. Ix ee jitbu si jorqongx, qaqi kacc hranw did cutciuw. In’ui qivunw-dongrjog lauxlen, qiuu dirr ix ee ciuw nirr, iauxx m bad sitlyc .quer.

Vixsair jinwzip quatjenr ee sikig, juewau jit hunjingx, gunw dui sux duiwhongx jit hunx. Ngiaa :ee hitt dui ee jenwdaur-jingsinn dairkair liyc aw u vangwsangx, ix an’ duiwhongx juxjiongr ee ciuw nirr qra qiuu qiab .kir. Jitt sii, jingwlangg ee surkir cringr qaur jueww quandiamw, hanxhuah ee snia’imx be sux tnidingw ee luiqongx.

Ing siongrr qinw ee sokdo, ix jit xee langg qra qiuu vnuaa qaur qiulongx erkax. Dng’ ix siangx ciuw giac quann junxvi beh cutciuw, duiwhongx ee zinmaw qnuaw qauwui, snax xee duiwhur ix jit xee. Ix ciuw qiux .zip .kir, jinr byy lo, trer byy vo, jurr anxnix dirr hiax dongwdauw. Siqanx jit biyw jit biyw diddit decc quer .kir. Vnix:a ee quanjiongr knuar qaxx simx qongg sywzet, kow byy erdangr tiaur zip kir qra qaixuii. Siongr diyc jit xee kangpang, ix tanwser qnuaxqinw qra qiuu danr cud kir hro duiriuw. Jitt ee sijun, caipnuar ee vi’aw-sniax duxdng dann.

Vi’aw-sniax jiacc suah, ho-sniax duer lecc dnia .kir. Laursux suanvor harkyr. Sir~go langg jit cog jit cog qniaa lirkuix texiogquanw, jidlo itdit u langg decc huatviyw qamxsiongw.

“Ix kia ee qakdo berbaiw, ingqaix duardnaw cutciuw jiacc driyc. M jaix ix decc diuduu snaw?”

“Dnaxx sux dy’ sux ciangjai :ar, jitmaw tyxlun jex u sniaw loring lehh?”

“E ngiaa ee qiuu pah qaxx sux, qamxx byy langg diyhh dixdongx hu jikzim? Hitt jun narr ngua jyr vadd langg, guaw qnaw qongw, jitmaw decc hnuahiw kingwjiog :ee si lanw.”

“Liw m tangx be qir .did, hitt liap qiuu si ix cnuaa .diyc .ee.”

Jingwlangg girlun hunhunx, knuawhuad jit langg jit kuanw.

Zidtauu qruar dirr vnuawtnix, dirr ix ciaduiwbin u jit diauu cid sig ee king. Haurhngg jing ciaucciauh, duardysor ee hagsingx longxx ixqingx dngw kir cur nirr. Qinaxzit diyc guaw didzit, vunwsyr vniar suah jiacc erdangr lirkuix. Vunwsywdniuu uaw aurviacmngg, li qauwsig u .jit .jad .aw. Nng dre vunwsyr dang hnuaiwhnuair, guaw en’ lo qniaa en’ lo cuanw, decbeh qauwui ee sii, huathen uatqag ee jingciu-dingw naxx cniurr u jit xee sigsai ee langngiaw. Guaw kavo dongr lehh, bagqniar tuh quann.

Jinjniar si ix!

Honghunx ee zidngiaw unziuu be cagbak, byy cancniu diongdauwsii-aw anxnix og kiagkiak, qnir langg dyrr qa. Ix siangx ciuw tner dirr ciuruex, bagjiux ngr zidtauu lyhsnuax ee honghiongr.

Hitt dingxtauu ee qongqingw dauwdew jnuaxngiu, taixtyw hro ix knuar qaxx jiacnirr aw cibee m qramx lyc .laii? Iauxqycc, ix taukag-lai dngdecc sniu sniaw? Si huesiongw quewkir, iacc si qewue birlaii? Qyckacc diongriaur :ee, ix ee simjingg sniaw kuanw? Si u ngwbang :ee, iacc si juadbang :ee?

Ciu-dingw m na ix jit langg. U jit jiah hoxpuesig ee vanniaux pag dirr ix ee sinkuvnix. Niaux-aw bagjiux kreh kreh, sinkux iujai juxlangg husyx. Jit jun hongx qniaa .quer, niaux-aw ee puecauw hro cuex dinxdang, jin’ suiw, naxx haixingw lehh.

"Vandniuw, dangsi’aw liw dirr jiax! Guaw siwquer longxx cue liw byy." Qongxvyr-denrdaii dua sniax huachiux.

“Liw qycc qnaw qongw. Guaw duxjiah dirr qauwsig danw liw qui’ vnuar vox.”

“Sitlew, sitlew. Acc dyrr u langg jiyx guaw senr ang’axpiaux, qniaa be kuix kax.”

Guaw quawir jingciu-dingw hitt xee langg, byy simjniaa tniax qongxvyr-denrdaii vuexhue. Ciu-dingw ee langg ixqingx lyc .laii, niaux-aw duer juxlangg kajiah-au tiaur .lyc .laii. Ciu-kax u jit kax langw-aw, ix kuu .lyc qra mngjac-aw kuix .kuix duiww niaux-aw et ciuw. Niaux-aw qux dirr tokax, byy air jiongg ix. Ix qycjaiww dua lat et ciuw, vingwcniaw siurkir huacsniax. Niaux-aw miaux miaux hauw, lorbuew, marr si quaix quaix aw nngr .zip .kir, suijai juxlangg qra qnrua lecc qniaa.

"Pacjingw ee niaux-aw ix iarr knuar jyr vyxvuer decc cri!"

Qongxvyr-denrdaii sun guaw ee bagbuew quanknuar, zen’au qiqiqurqu anxnix decc liam.

"Liw qamxx erhiauw vreh ciu-aw?" Danw ix qniaa qaxx bidbu, guaw uat dngw srinx mng sinkuvnix ee langg.

"Iarr u jit xee berhiauw? Hex qanxdanx." Qongxvyr-denrdaii qongw.

"Liw qar .guaw, hyw bor?"

“Qar liw sniaw?”

“Vreh ciu-aw a!”

Qongxvyr-denrdaii binrsig iux iux, ziaur jit xe aw taukag qongw, "Diyh'air cing dngkor jiacc hyxser vreh. Liw qamxx u dngkor?"

Guaw jin’ sitbong, cimx cimx trow jit kauw duarkuir, “Gunw maxmah qongw cing dngkor byy jaboxginxaxkuanw, itdit longxx vutjunw guaw cing.”

Qongxvyr-denrdaii dimr tauu dong’ir jitt xee knuawhuad. Gunw nng xee dauwdin qra vunwsyr tec kir danr hniwsag. Lordiongx, qongxvyr-denrdaii dirr guaw hnirkangx-vnix ciauhciauc qiyr, ue qongw be tingg. Guaw in’ui u simsu, taukag-lai decc sniu dairjir, byy qaxx jit qxur u qra tniax zip hni .kir.

QENNGRQYX

Vaiwgo ervox, qui’ qingx qauwsig herhe diy, dag’ee u qongw u ciyr, byy singg jit xee tagjux ee soxjai. Qycc lunw jit~nng diamxjingx, jiokjiog nng qangx ee lexvair-qawqii dyrr beh lailimm. Qycjaiww qongw, aurviah ee kxyr benw tagceh, benw kyxcir, dag’ee simjingg kinsangx, binriongg jurzenn kacc u ciywsinn.

Duliauw texiogkyr javox jabow tiah jyr nng vanx, vaiwgo ervox ee qangge qapp qajingr iarr e hunx jyr nng vingg. Mrqycc u jit diamw jingcax, jitt jed kxyr jairr langg ee hingwcur qingw qaqi qac’ir :ee, byy hanrdnia javox iacc jabow. Jongw .si dysowlangg ee suanxdik iauxx si tuantongxdig :ee, javox :ee qingw qangge, giac qongwtuii dingr ticdingx; jabow :ee siong qajingr, ciacsiur juer jiamjiw. Jitt nng hxang in’ui m si hagkyx, ham' singjig qapp dingxde byy qan’gai, guaw jionglaii m bad zinrjinx decc siongrkyr, marr longxx byy hingwcur beh yc.

M jaix dirr dangsii kiw, guaw knuawtai qajingwkyr ee simtair u jit-vah-veh-jap dxo ee juanxvenr. Dingw vrangx, qajingr-laursux suanvor jitt guehzit ee qauwhak-jinwdo, qongxx beh qar gunw jyr jex jyr hex. Guaw qecdngw qangx sui’ jauw kir cirdniuu, siongrkyr rair beh ing ee jywliau, guaw jiaujngg qra brew dngw laii kuanw hro ven, zen’au dagg qangx knuar zidjir, hibang vaiwgo qnuaxqinw qaur.

“Nngrzinn singx hrngx .kiw .laii, qanda’ nngrcingx lyc kir pah. Diyhh icii qang jit xee ciuxser, sokdo zuxx qinw zuxx hyw, cincniu anxnix.”

Qajingr-laursux kia dirr qangxdaii-dingw, dyr ciuw moh jit xee dua nguaxqongx, jniar ciuw giac jit qix tngsii la qaxx kniknix-knaiknaix. Hagsingx u ngiu knuar ngiu, siangx ciuw duer decc dinxdang, qui’ qingx qajingr-qauwsig laurzet ciccih.

Taukixsingx laursux dyrr u qaudair, qongxx nngrcingx diyhh pah qaxx kiw pyx, qra dniaw tanxkab marr be lag .lyc .laii jiacc u junxsngr. Guaw ngar iyx, liamvnix dyr ciuw, liamvnix jniar ciuw, siangx ciuw lunliuu byy sii tingg. Pyx zuxx laii zuxx pongr, kiokk marr zuxx laii zuxx dang. Qaur qaxx qiongbeh kenr be qniaa, guaw jiauww laursux qongw .ee kab dniaw. Jniasit longxx be lag .lyc .laii!

Tec hueqinx-aw qra qnua crid crid lehh, qycc laii, jiauww ovangx dingxquann siaw .ee, diyhh he nng kog mirhunw, snax aux jingtngg, qycc camx damrvyc aw guling'iuu qapp hniuliau. Buexciuw, guaw qra qiauw hyxser ee liau qui’ xee dryr zip kir jit xee simx-hxingg ee boo-aw, hangloo ee huew ked dyc liauxau, suar .lyc .laii ee kangkuer, jriw cunx danxtai narnia.

Viah-dingw ee sijingx hitt nng qix kaqud qniajauw ee sokdo qik ban :ee, naxx qux decc vee lehh. Guaw kogkok giaa tauu juwir siqanx, jre dirr iw nirr tingwhau suacc viw kia lecc pah nxng ee sijun iauxx qyckacc qankow.

U .jit .quw .aw, qenngrqyx ee pangbi taux taux aw suanx .cud .laii. Guaw qra dniaxquar henx .kuix, jit jun siyx huwhur ee juixenx sui’ cringr duiww tenhyvanw .kir. Danw enbu snruar kacc kuix, guaw knuar diyc jit liap iauxqycc decc cringr enx ee simx cuthen dirr dniaw-drew, pongr saisaix, qimx ngiawngiar.

Harkyr jinwjingg, laursux en’ dyh sunsi, qniaa qaur guaw jiax ee sii, laursux giac jit qix dyaxqniaw dirr vnix:a ow jit der-aw cir jubi, liauxau, viw duartaubuw ylyw qongxx guaw ee qenngrqyx m na sikdir suiw, tngg qapp mirhunw longxx ciaux qaxx duxduxx hyw, siongrr diongriaur :ee, guarhingg u congwir, jin’ hniaxbak. Qetqyw, guaw did diyc qauw-jap-zi hunx, qaiwdniuu itdingw quann.

Guaw hnuahiw qaxx be qor .did, qnuaxqinw beh qra qenngrqyx tec dngw kir qauwsig. Jitt xee sijun, hongwsangwtauu u snia’imx cud .laii, rair muixx jit vanx ee vandniuw jauw jit jua qauwbu-cxur.

“Nacc jiacc duxhyw? Dnaxx si beh kir iacc m kir?” Beh sniaw vo vutdid kaikiaux, guaw simlai decc diuduu, qenngrqyx pangg dirr ciuxdiongngx.

“Qokk vanx vandniuw, cniaw qaur qauwbu cxur huerjip. Qokk vanx vandniuw, cniaw jikkig qaur qauwbu cxur jibhap.”

Hongwsangwtauu qycjaiww cuivig, qovutjiongx, guaw qra qenngrqyx qautog jit xee dongyc jiamrsii jiauwquanw. Danw guaw an’ qauwbu cxur dngw .laii, guaw huathen qaqi ee judyh-aw-dingw kngr jit der kih jit qag ee qenngrqyx, qenngrqyx vunxdew ee guarhingg ixqingx knuar be cud .laii ar.

"Nacc e venr anxnix! Dauwdew si si’angw jiac .kir .ee?" Guaw knuar jit xe jiokk qankoxsimx, bagsaiw damm bagqnii.

“Guaw lar.” Qongxvyr-denrdaii jursiur, kenwtenx kenwtenx qongw, “Acc dyrr knuar diyc jnia’ hyxjiahkuanw, guaw dongr be diauu, dyrr qra siamx jit der aw laii jiac.”

“Si’angw inxjunw liw jiac .ee? Guaw qamxx u qongw ersaih jiac!” Guaw dua sniax ziongw, jairdniuu jingwlangg knuar guaw jit xee.

“Mihqnia jyr hyw dyrr si beh ho’ngg jiac .ee, byy qamxx qanda’ beh knuar suiw :ee nardnia?" Qongxvyr-denrdaii ter qaqi venrho.

“Qenngrqyx guaw jyr .ee, qanda’ guaw u juqeh quatding beh cniaw si’angw jiac!”

Guaw viw jingg :a iauxx qyckacc og. Qongxvyr-denrdaii diyc cniqniax, tic tic tuc tuc qongw, “Liw, liw mair siurkir lar. Ehngx dngw .kir, guaw e qra gunw a'buw tyw jnii, binaxjair sui’ brew jit xee vuee :liw.”

“Si’angw hihanw liw ee qenngrqyx!” Guaw qycjaiww huacsniax, zen’au byy-tauu-byy-buew ser aw sniax gniau jit qxur qongxx, "Langg’ gunw dy’ iauxx bue tec hro ix knuar."

"Ix? Si’angw si ix? Liw beh tec sniaxmic ho’ngg knuar?"

Guaw byy inwue, byy ir aw byy ir ngr siongrr buew vaii knuar. Ix ciuw nirr tec jit jad hiquttauu, juan'ir dngdecc cri ix ee niaux-aw. Guaw simqnuax tiutniar, tranr bagsaiw iauxx bue qui’ jua linr .lyc .laii ixjingg, lee tauu jauw lirkuix qauwsig.

DIAMXBAUW

Sijeh iurr beh uaxnii :ar. Jaxkixsii, qnuaa crinr crinr ee danghongx sucsuh qiyr, jit siwquer liuwliur jauw, qauwsig nng vingg ee tang'axmngg, dagg snir qnuix bat bat, gauu nngwjngr ee hongx iuguann u jaidiau cue diyc kangkiah syy .zip .laii. Hagsingginxaw jit xee aw jit xee qauwui, langkir jiamrjiam ong, siklai liyc aw u kacc siyly. Dag’ee sinkux qiux qiux jre jre siy’ uaw, ciuw hasiyx kacc be uiwqnuaa.

Qiuwcatdui :ee jin’ junxsii, dagg qangx tauwjaw jitt xee sijun jongxx e dirr gunw qauwsig cuthen. Jiauww ciuw nirr ee miapo, inx sui’ xee aw diamxmiaa, huah snax vaiw byy langg rinr, vid giac lehh dirr binrdingw jyr qiwhy, sui'au qiauxdniaa hunwdy cxur, hagqii-buew jyr jit vaiw cingsiaur.

U jit hxang dairjir, guaw juadduir be kir dingdnaa .kir. Jingrr vnuar dangx gua jingg an’ vadd qingx haghau juanw .laii, qaur jarhngx jriw, ix iauxx m bad vutdyr u kuatsik .quer, danrsi qinaxzit...

Jxingx-aw-sniax giangx, dingxvox tauu jit jed kxyr si qokbunn. Quer beh zi-jap hunjingx, laursux jiacc unn unn aw qniaa .zip .laii.

"Dairsingx, guaw beh hiongr dag’ee suanvor jit hxang dairjir,” dyrsux sniaauu qig qe qe qongw, “Qniazit, lanw vanx u jit xui dongyc byy laii siongrkyr, jiongjitjun, ix marr be qycc laii :ar.”

Dag’ee bagjiux buix buix, bagtauu qad qad, jurzendig uat tauu knuar duiww siongrr buew vaii uaw txangx-aw-vnix hitt xee jyrui. Naxx cancniu decc dabhok jingwlangg ee gibun, laursux qewsiok qycc qongw.

“Inx laurve singliw vairham, kiamr langg' jit sinkux jxer, jiycjuw zib laii qaur lanw jiax. Lenqex-qapkauw, inx jarhng'amr singramwox taux taux aw lirkuix. Byy langg jai’ngiaw inx jauw kir dyhh.”

Laursux jid’err qongw suah, erkax ee langg kaisiw cirbuxcircu decc girlun. Guaw juanzenn tniax byy inx decc qongw sniaw, qanda’ qamxqag taukag dang dang, suwqix sngnngw, simjong benxqiongw decc unrjog, mehtiaur jinjniar ban.

Quer u jit quw aw, guaw huanhunn knuax knuax aw kuehok jingwsiongg. Siwuii ee snia’imx cingcyw .kiw .laii liauxau, tniax diyc jre dirr guaw aurviah ee Bixbiw duiww langg' anxnix decc qongw,

“Ixdyh jre bue siyx dyrr jauw, cincniu ix jitt kuanw :ee, beh nacc qaux u ving’iuw lehh?”

Dangtnix ee taiwiongg, nguar nguar kixcngg, jaw jaw dyrr beh hiyckunr. Haghau vangwyc ee sii, qelo longxx ixqingx jniurhuew. Guaw ciuw nirr gim jit dniux zirjuaw, en’ lo qniaa, en’ lo mng .langg'. Hangrlo uanx uanx uad uad, ec jnijnix iurqycc qut liuwsiur. Guaw jit vo jit huac dauc dauc aw qniaa jinwjingg, buexciuw, dirr jit qingx puar hiarcur taujingg tingkax.

Guaw qra juaxdiauu-aw dingxbin ee jurjiw qapp mngvaii siy’ vixduir, tangx kakding qaqi byy cue m driyc soxjai. Danw jit xee quewlorlangg qniaa hng .kir, guaw qra mngg sag .kuix qnuaxqinw dac .zip .kir, liauxau, soksog qra mngg qnuix .kiw .laii.

Cur-lai vutjiw aw jingxjee, guaw jinwjingg sniu :ee cyr duarbew. Inx qyxzenn jauw qaxx jin’ hiongqongg, jin’ je mihqnia longxx byy vnuax jauw, byy singg jit qingx byy langg decc druar ee cur. Guaw jit siwquer knuar, hitt liap ix suwsiongg jah kir haghau ee naqiuu hed dirr viacqag, mrqycc, hitt kax ix dagg zit longxx e qnrua kir qauwsig ee niaulangw-aw, guaw kacc anxjuaw dy’ cue byy.

"Jiwjiyw ix be qodnuax, siongrr byy, ix iauxx u niaux-aw qapp ix jywpnua." Guaw dirr simlai duiww qaqi anxnix qongw.

M jaix dyc’ui ee txangx-aw qnuix byy bat, jit jun qnuaa sngwsngr ee hongx cuex .laii, guaw qui’ sinkux gihgic junr. Jurr tenvongg qaur dervanw qycjaiww srunn jit vaiw, guaw qra duarmngg qnuix uaw .laii, sun guann lo qniaa .dngw .kir.

Jingciu-dingw qiuwqingr u sniaw hyw qingxdir? Jurr ix lirkuix liauxau, guaw suacc byy hingwcur jaix :ar. Guaw ciangjai decc sniu, qiamxcaiw guaw soxx luanbo .ee, vingrr m si ciu-dingw ee hongqongx-bixqingw. Narr anxnix, guaw simlai jinjniar luanbo :ee dauwdew si simxmic? Byy dniardiyc, guaw qanda’ erdangr ing jit qxur sirduarlangg vutsii duiww guaw qongw ee ue laii huedab.

“Danw liw duarhanr dyrr e jaix :ar.”