sir jixmue

I

Vah Nii ee Syxlen

Luna, ix jitt xee langg dauwdew sniaw kuanw? Qiamxcaiw liw kir mng jap xee langg, huanrser u jap jiongw qaiww byy siy' siangg ee dap'anr jauw .cud .laii. Tniar :ee si qra tniar qaur dacdew, hin :ee iurqycc qra hin qaur zip qutcuew. Hongpingg, tangx qongw tnix juac de.

Jnuaxngiu e kir qapp jitt kuanw jiacnirr aw u jinggirsingr ee zinbut decc qauvuee lehh? Narr beh kingg hro jinx, hex diyhh an' guanw sigsai hitt qangx kaisiw qongw kiw.

Jit nii jap-zi qywguec, narr gne beh qra hunx jyr sir jad, dirr Daiuann, zuahtnix viw did cxunx, cxiux qapp dxangx jitt snax xee qruix, sidjai u kacc jiamwngiaa. Gorguehjangr buerjingrr jiac, dngg rngw :ee siux siux .kiw .laii, dag'ee dy' cing vehzuac. Cid~Veh-guec, haghau hiyczuac ee sii, hansuxjiamx quer snax-jap dxo si dagg qangx :ee, snax-jap-go~lak dxo marr jin' suwsiongg. Itdit qaur Qauw-guec, duarser hanr ee hagsingginxaw longxx kaihak :ar, zidtauu iauxx jiokk mew, jiokk iam. Guaw tak dairhak id nii juwceh hitt jit zit duxhyw si ciuhunx, tnihau kiokk ut'aur zuac, sidjai byy singg ciutnix ee kuanw. Jaxkiw jingsinn, qui' senx langg nngw tue tue, sinkux siyx tngwtngr. Jiac qaur jiacc dua hanr, tauu jit vaiw qamxqag qaqi qaxnaxx kir zuac .diyc. Tnikir siyzuac, liangg hongx qinw cuex .jit .xe, sintew beh kuehok iarr kuair kuair :ar. Kacc yh liuxlag :ee si cincniu Luna jitt jiongw qngxleaxhongx. Liw narr hro qngw .zip .kir, sii qaur beh lyc dirr dyc'ui, hex dyrr juanzenn be anwsngr .did.

"Guaw guarbunn hxe :ee. Acc liw lehh?"

Danw beh juwceh :ee jit vaii tuax qaxx dngg ~ ~, ix kia dirr guaw taujingg, byy-dniu.-byy-dii uat tauu cue guaw qongxue.

Qongw jit qxur jinx :ee, guaw jiokk jaw dyrr u decc jimjiog ix :ar. Ix sinkux pangx qongwqongr, jit py taumngg ox snawsnar, dngg liuliux, qycc jnia' iur sxix ee kuanw. Ix pactic'axkor ee kowkax kuah kuah, qycc si jenw hro ciux ciux hitt kuanw :ee, dingw srinx hitt niaw jiokk vagsinx ee T SHIRT qyckacc si ciaudingw duadbak, dorjaii teh teh si hitt dangjun siqniaa :ee, diauwqac'aw ho'ngg knuar hen hen e suxx langg' bak vec jic trow.

"Guaw tak huerqer."

Guaw damwsuee damwsuee, qongxue qycc siyxkuaw decc junr. Ix vunxdew dyrr viw guaw kacc lyr, qycc cing jit siangx quandah ee sandalu, jiokjiog qex guaw jit liap tauu .cud .laii.

Ix mng guaw dyc'ui ee langg, cur nirr decc congr sniaw. Guaw qongw guanw druar Logqangw, cur nirr decc kuix qimjuaw-dxiamr, diamwbin dyrr dirr Liongsanx Sxi ee hurqin. Ix qanda' qongw jit sniax "or", suar .lyc, dyrr ngua ix ee cuttauu :ar.

"Guaw guarsingxlangg lar. Liw tniax guaw qongxue, ingwqaix marr jaix lar hnoh."

Ix qongw inx laurve si Buanxjiux bxow jit xee hongcinx-qokcig ee hiyrser qniaxsunx, langg snex jyr siwtangxjee iurqycc cingpiaux, qycc qongw inx laurve marr u qra ix hy jit xee Buanxjok ee miaa. Guaw e qir did hex miaa qaxnaxx u dair simxmic lrow, simxmic bok .zri dilehh, lywlyr dngg.

"Lun jinx qongw .laii, guaw uanaxx sngr jit xee qongjuw ne!" Ix erhaii kiaur quann quann duiww guaw qongw.

Qongjuw, hex m siyxsuad lairdew jiacc u :ee, sniu be qaur qongxx qimdnuar suacc hro guaw kir drng diyc jit xee.

"Linw maxmah lehh? Ix qamxx marr quiwjok?" guaw mng.

"Ix Dairqaclangg lar."

Byy pacsngr, ix qanxdanx quiw zri dyrr qra junw .quer. Guaw vunxdew sniu qongxx ix e qra uerdee qycc kanx qaur jap-snax tnix-gua .kir. Ix vutjiw aw e qongw.

"Guaw beh kir guarkauw kar denrue. Guaw ee xui, liw siyw qra guaw jiamr .jit .xe, hyw bor?"

Bagjiacmngg dngg dngg kiaur kiaur, ix siangx ciuw habsip, bagjiux nih lehh nih lehh decc sraiw bagjnir. Guaw byy sniu sniu' je, jit sniax dyrr qra rinr hyw. Iarr byy sngxsid .diyc, jyr jit xee zinjingg hro ix tacc e baiw?

Juwceh si dirr dua lexdngg decc jinwhingg, soxjai sngr vutjiw aw kuah, mrqycc lairbin byy anx lingxkir, tang'axmngg iurqycc sed sniu' jiyw, kongkir be liutongx. Guaw qnua diddit decc vniar, kogkok tamx tauu hiongr mngcuir hiax jimjiog. Kir beh jiongvox quw, qycc decbeh diyc qaur ix :ar, langg qan' qan' aw m qinw dngw .laii. Guaw simqnuax luan ciccih, jin' huatnauw, jid'err uat tauu, suacc knuar diyc ix tec jit quanr kola anww guaw jitt vingg qnuaw .laii.

"Sitlew, sitlew. Guarkauw danw beh kar denrue ee langg sniu' je. E cuiwdax be? Laii, jitt quanr hro liw jiac liangg."

Ix jiacc hyxlew, guaw amr amr aw decc qamxqag pnaixqiok. Ix byy qycc danw sniu' quw, jid'err zip .laii, sui' dyrr diyc qaur ix juwceh.

"Jiacc duxhyw! Lanw druar qangg qingx soksiar ne." Danw guaw marr vran hyxser, ix knuar diyc guaw vangqingmngg ee hyrbew, sui' dyrr anxnix huad cud sniax.

"Tacc u kyxlingg?" guaw qongw. "Guaw tak sxiongx :ee, liw bunn :ee ne!"

Ix sinvir sinvir, cuir uaw dirr guaw ee hnirkangx-vnix ing ciuw jac lehh qongw, "Guaw taudo :ee."

Guaw qniax jit diyy, nng luiw bagjiux liac ix qimx qimx siongr. Ix cuir ngx lehh decc amr ciyr. Danw ix ciyr u qraur kuir :ar, jiacc qamguan duiww guaw suecbingg lairdiongx ee enqor.

"Haghau ee soksiar jiacc hitt quiw dongr aw punr punr, jurvunw dy' dna' linw gua votauu ee hagsingx jiacc erdangr druar. Hex si duxhyw gunw vaxvah qapp lanw haghau ee juxzim-qauwqnuax u sigsai. Narr byy, cniu guaw jitt jiongw druar Daivag Ci-lai :ee, beh nacc cringw e diyc?"

Guaw qongw guaw druar hagliauu si qovutjiongx, qycc qongw guaw nguarjunw si ix, jingguan dagg qangx tongkinn tangx dngw kir qapp cur nirr ee langg dauwdin jiahvng.

"Tak qaur dairhak :ar, qycc ham' verbuw druar jywhuew. SHIT!" Ix hngc .jit .sniax.

"Hnaa?"

"'SHIT', S, H, I, T, jitt zri Inggiw, liw berhiauw or?"

Guaw dimr tauu beh viauxsi qongxx erhiauw, sniu sniu lehh qycc qaxnaxx m driyc, dyrr qnuaxqinw qycc iyy tauu. Ix biccuir decc ciyr. Guaw qamxqag gairgiyc ~.

Qapp Luna jyr sik'iuw marr qanda' jit nii ee enhun. Ix air juriuu, hiamm hagliauu quiqiw liauliauu byy lirven, druar byy snax lexvair, dyrr huah beh kir guarkauw suer cur. Hitt sii, ix u long guaw qapp ix dauwdin vnuax cud kir druar. Guaw qongw dna'aw jiacc vnuax .zip .laii, byy druar jin' pacsngw, qycc qongw narr beh vnuax, marr danw jitt hagqii druar suah, knuar sii jiacc laii pacsngr. Bersux jin' vutkyxkamx, ix jiksii dyrr beh vnuax .cud .kir. Ix hro guaw jin' pnaiw jywlangg. Duxjiacc kaihak, jit quaw u:ee byy:ee ee huiwiong qax qax lehh, marr jamxzenn aw siongdiong. Qycc cur nirr iarr m si decc zuarr hyw quer, luixcur decc qra inx crunx dngg ciuw, marr sidjai jin' m quewsimx. Buew:a, guaw dyrr hyw dnaw qra ix huee driau. Jingrr qapp ix sigsai, hex si guaw tauu jit vaiw qra ix qongw "m".

Jurr anxnix, ix qaqi vnuax cud kir druar, quixlyrr lexvair longxx byy siy' cue. Quer u jit jam aw, ix laii soksiar cue .guaw, qongw beh ham' guaw akciuw qangxhyy. U jit mngg qiongrdongg kybok, guaw qapp ix qangg jit xee laursux. Ix rair guaw ee vitqir hro ix kopi, tangx ingwhur guec-drew ee kyxcir. Guaw jin' hnuahiw qycjaiww qapp ix jyr ving'iuw. Ix jin' kongxqaux, langbin kuah. Narr erdangr qapp ix kia dangjee, qnialo qex zuarr aw u hongx lehh.

U jit xee vaiwlak-sii aw, guaw dirr dosuquanw decc qnuaw jit pnix vywqyr. Luna bersux u sintongx, go janr kiw ee duarlauu, ix iarr qra guaw cue .diyc. Ix cing qaxx jit srinx ped ~ ~, ciuw nirr tec jit dniux juaw dirr guaw ee binrtaujingg decc lang.

"Sinx ceh huatviauxhue. U cuwbi bor?"

Ix jin' qanxdanx qongw, mrqycc guaw jai'ngiaw ix decc qongw :ee si sniaw. Hitt jam aw, Daiuann decc cuex Hiongqangw Hongx. Ngiaxcnex iacc quacnex longxx diyhh MADE IN HONG KONG :ee jiacc u sinqer. Marr u jit xee Daiuann ee jokqax vnuax kir Hiongqangw druar, viw did ingxsii, ix jitmaw siaw ee ceh e qex jiokk hyw siausiuu. Luna laii cue :guaw, dingrsi beh jiyx guaw kir camqax hitt xee jokqax ee sinx ceh huatviauxhue. Haurhngg lairdew, ix ee haixvyr dah vutjiw aw je. Hitt vunw ceh, guaw narr byy qir m driyc, ingwqaix si qiyr jyr 'Vah Nii ee Syxlen'.

"Guaw u qex jit dniux piyr .cud .laii, sui' dyrr sniu diyc liw."

Guaw jin' qamxsimx, in'ui u tniax qongxx hex piyr qik yh tyw :ee. Qniax vywqyr sii qaur qnuaw be cud .laii, guaw qra trex driau. Ix iarr byy mng jit xee in'iuu, duiwcuir dyrr qongw, "Hex cenw cenw :a, liw benw qniax e tniax byy. Narr jniasit dyc'ui kacc m bad, liw tingwhyw qra guaw mng. Guaw e jre dirr liw vnix:a."

Dyrr anxnix, ix byy qycc hro guaw kyxlu. Guaw gne hro ix tuax .kir.

"Luna, dirr jiax lar!"

Guanw nng xee qnuaw qaur der, sui' u langg decc huah ix ee miaa. Guaw qaur hitt sii jiacc jai'ngiaw qongxx guaw m si uiid siurr ix iaucniaw ee langg.

Huerdniuu lairdew jre qaxx jat nigc'ngih, langg dyrr si langg. Qycc u qiwjiaw laii beh caixhongw, vywjuaw qapp denrsirdaii :ee longxx u.

"Daiuann ee bunhuar, dyrr naxx cincniu jit jangg ciu-aw, dingxtauu ee hiyc-aw qiamxcaiw huad qaxx jin' om, mrqycc erkax ee byxqinx byy jai, kacc benw zuarr quw, sui' dyrr qngxlenx, oauw, iacc jrex .kir. Quibuew, qui' jangg ee hiyc-aw lag liauw liauw, tangx qongw byy snax zit hyw qongqingw. Guaw byy air druar Daiuann, siongrqaiww juxiaur ee guan'inx dyrr si dirr jiax."

Guaw itdit decc huanlyw hitt pnxix vywqyr ee dairjir, vingrr byy jin' juwsinn decc tniax enxqangw. Dogdok dingw:a jitt dnxua, dagg qxur guaw dy' tniax qaxx jiokk jinx :ee.

Snuawdniuu ee sii, guarkauw dngdecc lyc saivakho. Dag'ee siy' jiyx kir qinrvnix ee qaviquanw bih ho, sunrsuar kaiqangw paclaliangg.

"Pnaiw qxuiw cuartauu. Byy beh diamr Daiuann ia jxingw ag vuii byy dnaxqinw, jyh qaxx beh siw :ee qycc diyhh hro piwsniur." Jit xee dauwdin kir :ee tehtauu anxnix qongw.

"Qongw qaxx jiacc keckir. Guaw qongw ix si dngw laii decc jnaw diu'axbuew :ee. Linw byy knuar ix hex jrux bre hitt tong. Jitt jua ix unxdangr kuanw be jiyw dngw .kir." Qycc u jit xee langg qongw.

"Linw vakdngg tacc e jiacc ec, be kamx did ho'ngg qongw .jit .xe!" Luna qra inx vog dywdngw. "Langg' ix dirr guarqog kacc cingsimx, siaxjog ee lingqamw kacc u, jokpinw diddit cud .laii, jex duiww lanw bunhuawqair qamxx byy kacc hyw? Dycc jit qangx narr jniasit hro ix tec diyc NOBEL bunhagjiongw, linw jiacc jaix ix ee lirhai."

"Linw hxe nirr u jit xee qauwsiu marr u decc siaw. Ix ee vitlo vutjiw aw iur, qycc jnia' u Daiuann-kuir. Vnivnii longxx decc siaw siyxsuad, guaw dendyww kacc himsiongw ix ee jokpinw." Duxjiah hitt xee tehtauu :ee qongw.

"Liw decc qongw :ee hitt xee, ix duxhyw si guaw jit xee codiongx dong'yc ee laurve, inx daux guaw bad kir .quer. Linw beh sinr bor? Inx daux ee cecqer-aw-dingw lenrr jit vunw Angg Laxuu Bang dy' byy!" Luna qongw.

"Huanrser ix qoxjaw ixjingg dyrr tak .quer .ar."

Guaw jid'err qongw suah, inx jingwlangg dangjee ciyr .cud .laii, dogdok Luna byy decc ciyr. Ix ee cuiwpuew pongr saisaix, qaxnaxx si decc siurkir ee kuanw.

"Ix u tak quer Angg Lxauu Bang bor, hex sidjai byy kangai. Guarqoklangg inx benw knuar Angg Lxauu Bang, benw tak suwsux-gnoxqingx, sewqair u miaa ee jokpinw, longxx inx decc cutsanw :ee kacc je." U langg qycc laii decc qra Luna tiaujenr.

"Dnaxx cirbin-siong hitt quaw NOBEL bunhagqax ee jokpinw, qamxx jniasit dagg vunw longxx jiacc janw? Lanw or, dyrr si kueckiamr jurjuxiwsig. Langg' cinwcaiw jit xee lrong jit xee ingw laii, lanw dyrr hunx be cingcyw dangx saix lamm vag, qanda' dirr hiax decc bogbok siuu."

Luna qongw suah, dag'ee jing jiaucjiauh. Uree qra dimr tauu, uree dner cinwciyr. Luna knuar hiongr guaw. Guaw qinw ngar tauu ing sucqongw limx guaw ee qyxjiab. Hitt qangx dngw .kir, Luna ngwdngr ngwdngr, byy juxdong cue guaw qongw qaxx jit qxur. Guaw jai'ngiaw ix decc qapp guaw auxkir, jingcax m jaix si uirdiyhh dycc jit diauu dai.

Luna ee laurve si qunx :ee, qongxx buxqaix qycc vutjiw aw quann. Luna vutsii marr decc qra guaw denw qongxx inx daux ee langg, bylun duarlangg iacc ginxaw, knuawvne longxx benw kaix jnii. Ix qapp inx siyxdi-aw jurr qokhau-aw qaur Dairhak, juwcechuir longxx qanda' langg' ee snax hxun jit iacc snax hxun zi. Siongrqaiww ho'ngg bagkangw ciah :ee dyrr si inx kia :ee hitt qingx cur qongxx si qongqax kiw ven ven cniaw inx zip kir druar :ee.

Tautauu laii Daivag ee sii, dirr lo nirr u knuar diyc jit der kanwvanw siaw qongxx, 'Qunqongqaur Hokli Diongsimx'. Dngw .kir, guaw sui' dyrr kir mng Luna.

"Hex diyh'air jitt dniux jiacc erdangr zip .kir."

Luna an' dutuah-lai qra jit dniux jingwqnia ciaux .cud .laii, qycc jin' u gi, byy diauqnia beh jiyh :guaw. Qecdngw qangx, guaw sui' vniar .kir. Jid'err knuar diyc lairdew ee mihqnia pacqer longxx jiacc qe, guaw ee ciuw dur be diauu, u decc ing :ee qapp byy decc ing :ee kuanw kuanw jit dua tuax, qnrua qaxx berdid dngw .kir. Jiac diyc dnix, au .laii guaw qycc kir quer quixnarr jua. Ix vnuax .cud .kir liauxau, guaw qycc e qapp ix iog siqanx, juanqangx kir ix ee harsiog tec hitt dniux jingwqnia. U jit vaiw kir, suacc jit xee javox :ee laii qra guaw kuix mngg. Zin hro jinx, jiacc jaix si Luna dna'aw jiacc qaux ee javoving'iuw. Jitt xee javox :ee u jxox jit xee BAND, qongxx qui' nii tangr tnix siwqer decc enxcniur.

"Jre lar! Tacc e suacc kia lehh."

Luna an' vangqingx cud laii decc qra guaw anwnai. Guaw tamx tauu knuar lairdew .jit .xe.

"Benw qniax lar, ix dngw kir erqangw." Luna qongw.

"Linw decc qongw si'angw a?" Javox :ee mng.

"Lau qokut lar!" Luna dab.

"Liw si qongw linw hitt xee zi cuwjuw?" Javox :ee qycc mng.

Luna dimr tauu, "Qongw .kiw .laii uanaxx kyxlenn lar. Byy-cin.-byy-jniaa, qodnuax jit xee langg dirr Daivag decc tyxtanr. Ix qycc jiokk diauu cur :ee, hiyckunwzit iarr byy cud kir decc SOCIAL. Kacqex ix marr qer be cud .kir."

"Ix si dyc'ui ee langg?" guaw mng.

"M jaix ne. Erqangxlangg." Luna qongw.

"Ix dirr dyhh decc jiac taulo?" Javox :ee mng.

"Ix bad qongw .quer. Dnaxx, guaw marr be qir .did .ar. Ix hitt xee langg jiokk pnaiw dauwdin. Narr m si vutdikvud, guaw si jiokk byy air qapp ix siy' qaucab."

Guanw snax xee jre dirr langkectniax. Luna ping druar javoving'iuw ee hxingx-jingg, guaw jre dirr inx ee duiwbin. Guanw decc kaiqangw ee sii, javox :ee liamvnix decc syx Luna ee taujangx, kacdingg aw qycc suaw kir bongx Luna ee katuiw, byy sii dikdnia.

"Liw ee bin nacc e kow kow?" Javox :ee jimx Luna ee cuiwpuew, liauxau, bagtauu qad qad anxnix decc mng.

"Guaw tauduxaw u ing ciwqueaxnii qoo iyhcauxqyx ur bin lar," Luna qongw. "Guaw jit lexvair siongrr jiwjiyw diyh'air jyr jit vaiw, anxnix puehux mrjiacc e vec paupaux qycc iur mimix. Liw jimjiog knuar. Qamxx byy qex jiokk riux :ee?"

Javox :ee m na ing bagjiux decc knuar, qycc ing ciuw kir bongx, suar .lyc, nng xee suacc cuir duw cuir kaisiw decc siy' jimx .jit .cud.

Guaw qamxqag jin' byy iwsinn, mihqnia tec lehh, qaqi diam diam aw lirkuix, byy ham' inx qongw jiauwhue. Qniaa qaur lautuitauu, knuar diyc guarkauw decc dih ho, jiacc sniu diyc horsnuar be qir did giaa, dyrr qinw qycc uat dywdngw .kir.

"Snix bagjiux m bad knuar quer jitt hy cauxdersongg. Liw tacc e qapp jitt sow :ee decc dauwdin?"

"Ix jin' hyw crex. U jit xee siyw liaulyy tangx ceqah, hex qex zuarr lirven lehh."

"Guaw knuar ix ee hxingg, qaiww singg byy sniaw zuarr jingqongx."

"Byy hii hee marr hyw m. Qeqiamw ing lar."

Qetqyw hitt qangx, guaw byy qycc zip .kir, qanda' qaur mngkauw hiax dyrr liamx kax qinw qycc qniaa lyc lautuix. Byy horsnuar, siangx ciuw siyw ziax lehh ing jauw :ee dngw .kir. Qaur der, kacniur pah be tingg. Hitt amr, guaw huatsiyx, qamxmo, vni kir jin' ziyc, suar .lyc .laii quixlyrr qangx longxx qywvne, byy jaidiau kir siongrkyr.

Puawvne hitt quiw zit, guaw langg dyw dirr bincngg-dingw, simlai ixqingx u pacsngr, danw sintew narr u kacc cuncuaw, sui' dyrr beh qra jingwqnia tec dngw kir hingg langg'.

Quibuew, jitt hxang guaw vingrr byy jyr qaxx qaur. Danw guaw tewsiyx, cuann beh cud kir siongrkyr ee hitt qangx jaxkiw, guaw duxhyw angg laii. Sniu jinr sniu trer, lorbuew, guaw quatding dauhangg. Jit der jacvor-xmii-aw qiamw beh kox vnuar, siyxkuaw jnii, jiap brew uanaxx qniax langg.

"Huanrser si guaw qa'ngg gorqaiw. Langg' inx hitt sii iarr m si decc qongw guaw."

Guaw ngua jit xee qakdo laii sniu. Itdit qaur jinw, guaw iuguann anxnix zinrding.

Vuthunx Quiwjok Xiyx Zi Snax

Daivag jitt kuir ee ho sidjai jnia' be ylyw .did, lyc beh jnia' qywguec :ar, qaur jinw, iauxx byy anwsngr beh tingg ee kuanw. Qycc ix narr beh lyc, m dyrr crann crann cer cer srer jyr jit xe kacc dua jun lehh. Qui' zit dih lehh dih lehh, beh naxx m lehh, bersux Daivaklangg, q.-qumox-m., hro langg' jnia' sen.

Diongdaur hiyckunr, dag'ee jiac vaw air beh siyw bii .jit .xe, qniax caw, marr qniax qngx, denrhuew longxx e qimr .srid. Qinaxzit u damrvyc aw qi'ngiu, amr sysyx ee vanrqongsig, vutsii dyrr tniax diyc u langg decc ciyr, ser aw sniax dyrr urngiaw. Inx decc vnir sniaw cuttauu, guaw jaw dyrr knuar cud cud. Inx liahjunw guaw juanzenn m jaix!

"Snezit kuaiwlok!"

Nng~snax xee langg jywdin qra jit xee qenngrqyx pangg .cud .laii. Qenngrqyx dingxquann lahjig cah qaxx qiongbeh byy xui, lahjikhuew uree beh srid aw beh srid.

Inx jit din langg hihix-huarhua, qiyr guaw qra lahjikhuew pu hro srid. Guaw trex qongxx langg siyxkuaw qamw .diyc. Inx qiyr guaw ced qenngrqyx, guaw qongw ciuxqud dingw zit aw kir jrig .diyc.

"Banrcniaw si lehh. U jit hxang dairjir lanw longxx be qir .did. Ix dy' iauxx bue he guan lehh." Jongxqingliw ee viwsux qibsii jixsingw.

"Si dyrr driyc. Itvnuadig si he snax xee, marr tangx he jit xee dyrr hyw." Sui' u langg janrsniax.

Inx snax cniaw sir qojniaa. Ham' inx ciavnuaa .jit .kunr .aw, guaw huanhur dag'ee sokjing mair cud sniax, auqngw cringx .jit .xe, dyrr qongw, "Guaw hibang a'qiong :a binaxjair dyrr pah .laii, a'Huix :a suanvor Daiuann doglip."

Jitt qxur ue dna'aw qongw cud cuir, oqnuaa ee kiwhunx sui' hro langg qamxqag e diyc. Qongw sit :ee, hex vywjuaw, guaw qanda' knuar gerbunn, iliauu, byy dyrr hurluw hitt quiw xee vanxbin. Narr jingwdi iacc qingjer jitt jiongw kacc gnerdauw :ee, guaw bongxx ngiaw lehh narnia, m bad jimjiog tak.

"Liw or, dyrr si ginxaxsingr, siongrr air qunxsngxciyr." Viwsux ciyr bunw bunw, ter guaw qra lahjikhuew vunn .srid, liauxau, sui’ kir qra qenngrqyx ced hro vnii dua der aw vnii dua der vunx hro dag’ee.

Jitt xee jongw:ee ee viwsux qapp guaw cax dingxe huer, ginxaw snex snax xee .kir .ar. Acc guaw lehh, birlaii ee angsair, qaur dnaxx iauxx bue sigsai. Ix hyjiongr, vutjiw aw u lang'enn. Tauqex tniar :ix, dongsu tin :ix, lenrr hitt hy tagceh ginxaxqangx dy’ qapp ix cinx howhor. Ix u jit lo cruw, be kuair siurkir. Narr jitt hxang, guaw pacsngr jit siwlangg dy’ duer ix be diyc. Aurbuw kacc hyw aurbuw miaa. Kacc jyr dy’ hitt quaw jabceaxqangx, qyckacc lingqanr, ix marr qanda' viwsux ee gxiac.

"Harvanx liauxau u simxmih jetbok .byy?" Viwsux mng.

"Ehngx u langg beh cniaw guaw jiac amr, cantniax dingw lexvair dyrr uriog :ar." Guaw qongw.

"Hoox, javoving'iuw! Driyc bor?" Caixqangw vxo ee memex qongw. Guaw cinwciyr, byy inwue. Inx jitt xee nihuer ee jaboxginxaw longxx asex asex, cuanww sniu dy' sniu duiww hiax kir. Diyhh vyxvir inx cenban m tangx kir dng diyc hitt hy lauxaw. Narr dycc jit qangx jniasit kir ho'ngg sud .kir, jit vaiw inx dyrr jiac be dax.

"Ginxaxlangg u hni byy cuir. Mng mng hiacc je beh nii?" viwsux duiww memex qongw.

"Langg' gunw menii dyrr erdangr suanxqiw ar ne! Qycc qra gunw knuar jyr ginxaw." memex vuthok.

"Liw or, siyxliabjiw, ciangjai dy’ jiacc iuwkiw. Be cincniu gunw jitt jiongw duarkox-duarvew :ee, jiokk cauwlau."

"Jiacc be lehh! Liw mair qa'ngg qongw liw u angx u qniaw, langg' unxdangr e iyh liw iauxx zi-jap tongw huer narnia."

"Qamxx urngiaw? Si u langg vyr guaw jit tiab cnecauxiyc, iong jnuax :ee, junw qunxjuiw limx. Liw knuar guaw u qex kacc sanw bor?"

"Urngiaw venr kacc sanw dyrr driyc! Liw byy qongw, guaw qycc byy juwir .diyc."

Inx nng xee jit qxur laii, jit qxur kir. Guaw byy cuwbi tniax jitt quaw gorsiwsnax :ee, uad lehh jauw. Inx qor qongxue, iarr longxx byy decc qra guaw junwbun.

Harvanx, qongciax jre beh jnia’ diamxjingx. Lyc ciax, en’ lo qa’ngg mng, qniaa jap gua hunjingx jiacc laii qaur Tenbuw ee jit qingx cantniax taujingg. Qinaxzit dyrr ho laii. Beh narr hyw tnix hyw sii, Tenbuw dyrr kyxviw qiwdii lairdew ee Barcelona, u gersut-kuir, jiokk suiw kuanw. Go~lak nii jingg, jitt siwlangg tauu jit vaiw cutqog dyrr si kir Sevangaa. Uirdiyhh hitt vaiw ee luxhingg, kiam jiac lunw cuir taubuew jit dxangx, luxhuir kingg u qraur jiacc qnaw kir vran passport. Jitt quiw nii, ciuxtauu u kacc kuah kacc pnar, air cittyy, hingliw kuanw lehh dyrr tangx kixdingg. Aujiux, Bixjiux, lenrr Huijiux marr duer luxhingtuann kir sngw .quer .ar. Qui'ee derqiuu iuu taur taur, iauxx si tauu jit vaiw ee qiwig siongrr suiw, inwsiong siongrr cimx.

"Siyxjiaw, qanda' liw jit xee langg?"

Boi qra guaw cua kir jit xee uaw venrsow ee xui. Guaw sui' kiw pnaiw bin, qra ix tyw beh jre txangx-aw-vnix :ee. Daivag druar u quw :ar, quanli iacc hokli dingxdingw jiaxee, guaw vad qaxx u cunx.

"Hiax si anwsngr beh hro sir xee langkeh jre :ee."

"Linw singlixlangg jnia' jnix, kacc hyw xui :ee, tiauqangx iw-aw longxx cai hiacc je jiah. Acc guanw jitt hy dogsinx-aw m dyrr laii decc tappang draur nguaxgiac :ee nia?"

Guaw sniatauu jiokk puu. Hogbursingx jin' siauwlenn, hro guaw had jit xe, bin-aw dngw sig cnex sunxsunw. Ix ee dingxsix qnuaxqinw uaw laii duiwcik, vaiqaiw. Dyrr anxnex, guaw ho'ngg cua kir guaw rair beh jre ee soxjai.

Menu an' tauu jit iac henx qaur siongrr buew iac, guaw ping dirr iw nirr unn unn aw si. Jit xee jabow hogbursingx kia dirr vnix .tauu dniudanw.

"Linw jex hii qamxx u cnrix? M tangx jiac liauw pnaiw vakdow or!" Guaw qongw.

"Liw narr e qniax, gunw u guvaii, divaii." Hogbursingx qenwgi.

"Liw m longxx byy decc knuar vywjuaw ee kuanw? Guu qapp dix longxx diyhjex. Jex liw qamxx m jaix?"

Hogbursingx diam diam byy inwcuir. Guaw qra jit vunw vyc vyc ee menu vingw laii vingw kir, kyxlu .jit .kunr, buew:a, quatding beh jiac duarmircaw.

"Siyxjiaw, hex u camx dibah oox!"

"Guaw suacc berhiauw qra qingw .kiw .laii."

Hogbursingx bin-aw vnir vnir, mng guaw beh jiac salad iacc si limx tngx, qongxx si benxhuir siy' sangr :ee.

"Iarr u jitt kuanw :ee? Langg' vadd qingx cantniax nng hxang longxx u qah."

Hogbursingx bagjiux cnix ginwginr. Guaw hnirkangx vniar kangx kangx decc tingwhau, pen' pen' aw ix jit qxur longxx byy.

"Guaw knuar, dyrr tngx bongxx limx hyw lar. Linw cantniax sew cair longxx cinwcaiw jimr .jit .xe narnia, long'iyc iauxx diauu dirr caiwhiyc-aw-dingw. Byy duxhyw, hro linw dok .siw kacc kuair!"

Jabow hogbursingx dua lat an' guaw ciuw nirr qra menu siux .dngw .kir, beh jauw jinwjingg, cuir nirr gnauhgnauc liam, qaxnaxx si me guaw "lau qovyy".

Hagsingx sidai, cavutdyx jap-veh~qauw huer hitt kadac aw, guaw u qapp jit xee druar qecviah sniajngx ee javoginxaw decc qniaa. Inx daux hniadi-aw be jiyw xee, vutzirqyr, canhngg cuwtec marr jin' je dilehh. Ix jin' u jiwkir, qongxx byy beh ngr hitt quaw verqonggiap, itsimx-it'ir beh lirkuix jngkax kir doci qriuu huatdenw. Ix qiyr guaw ceh mair qycc tak, diyhh qapp ix jywhuew kir Qyhiongg pacvniar, qenwdir qadingg. Guaw simqnuatauu u decc qunxliongr, jit bin sniu qongxx cunx jit nii dyrr cutgiap, byy tak sidjai jin' pacsngw. Acc narr vangr dacsimx :ee kir, nng langg li li hiacc kuix jiacc laii decc sniusix, quawdiaur, guaw iurqycc m qramx.

Ix duiww guaw qongw kiw ix ee guan, ix ee bang, qycc qongw guaw narr byy qapp ix drangg junn qniaa, soxu ee jiwbong dikkag be jniaa. Guaw tniax qaxx hni-aw pag ~ ~. Dyrr anxnex, guanw amr iog beh dirr bxow jit zit bxow jit sii dirr ciatauu siy' danw. Guaw iauxx e qir did hitt qangx jiac amr vaw, tranr buw :a decc sew snxax, guaw pauhok-aw lringg lehh an' aurviah mngg taux suanx .cud .kir. Qui' kauw jaur, dyrr qanda' ser hanr siyxmue jai'ngiaw guaw ee pacsngr. Guaw e qra ix qongw, sunzenn si qniax inx qecdngw zit cue guaw byy e qnir qxuiw qnir quair luanrsuw sniu. Survutdix, siyxmue suacc vrue :guaw kir bidsor. Guanw vaa :a krir cuaccuah, jongg kir qaur ciatauu qra guaw jac .lyc .laii me jit dniuu. Hitt xee javox qiyr guaw diyhh juxsimdnia, qycc qongw ing'amr narr byy duer ix kir, hiyrzit sniurtewhuew dyrr be hur lor. Guanw vaa :a marr byy decc nngw, qongxx guaw iauxx jnixciyh be hiauw did sniu, qycc ciangr qongxx ing'amr guaw narr kongkamw pniaa pniaa duer langg' jauw, ix dyrr beh qapp guaw byy verqniaw, guanw daux ee hording iarr byy beh qycc hro guaw hna .quer.

Guaw hitt jun iauxx jiyw huer, dnaxtauu byy jai. Guanw vaa :a qra guaw hangxhib .jit .xe, guaw kaciuxbah dyrr laglak cuah :ar, suacc qnaw gnoxgik :ix. Bagjiux qimx qimx knuar aiwzinn-aw qniaa kir duiwbin ee iahdingg, simqnuatauu bunrtniar, cincniu liuhingquax-aw decc cniur :ee, "naxx jiamx decc ruix."

Nng~snax nii quer :ar, ix byy-pue.-byy-sinr, byy-siau.-byy-sid. Bad u jit quaw jimw :a vyy :a laii beh vyr cinjniaa, qiyr guaw kir qapp langg' duiwknuar. Guaw jit sniax dyrr qa'ngg qongw m. Guaw simqnuadew u jit jiongw qitai, m bad qongw cud laii hro langg' jaix. Guaw itdit sniu qongxx byy dikkag u jit zit, ix e huantauu dywdngw laii cue :guaw.

Dirr ix lirkuix qowhiongx derr go nii, guaw jriab diyc ix beh cuarbow ee tiab-aw. Guaw byy kir jiac sinniujiuw, qanda' qiar langg vaux angvanx .kir. U kir ee langg, dngw .laii longxx decc ylyw qongxx sinniuu snex jyr zuarr suiw duxx zuarr suiw, qycc qongw sinlongg hyw un crua diyc huwhorlangg ee cenqimx, cuxkir u hyw boxsnuax, jiac cringx, kunr qingx, jit siwlangg cing’ingg.

Qaur jiax laii, guaw duiww ix tetdexdig sixsimx. Jurr anxnex, guaw vnuax laii Daivag, jit xee viw Qyhiongg qyckacc dua ee sniaci. Guaw lirkuix qowhiongx ee sii dy' iauxx bue zi-go, bak jit nih quw, jitmaw longxx snax-jap gua ~ ~. Hniadi-jixmue dirr jitt quiw nii sui' xee aw qewcua .kir .ar. Nng xee lau :ee qapp dua-hniax inx druar. Guaw dagg huee dngw .kir, inx bersux qra guaw knuar jyr langkeh decc kuanxtai, jin' hyxlew, suacc marr venr qaxx jiokk snehun.

"Guaw qinaxzit snezit. Linw dirr vywjuaw u kranx qongxqyr, qongxx jitt guehzit snex :ee u jetqer, sir quah." Qavix iauxx cunx jit cuir, guaw qiyr hogbursingx qra siauwdnuax tec .laii. Inx qycc paiwkenw lingrgua jit xee laii. Jitt vaiw jitt xee kacc u huer.

"Hex diyh'air diongdauwdngr diamw tywcanx jiacc u. Vywjuaw dingxtauu u juwbingg. Guaw tec laii hro liw knuar." 

Qongw suah, ix sui' kir qra vywjuaw tec .laii.

"Siaw qaxx jiacc ser zri, langg' nacc e juwir .diyc. Guaw juanqangx jre qewdingciax laii :ee ne!"

Air qongw bongxx qongw. Guaw jnivaux-aw tec .cud .laii beh qetsiaur.

"Jin' pnaixser, guanw byy siux sinwiongrkah."

"Byy siux sinwiongrkah si beh qapp langg' jyr simxmih singliw?"

"Sitlew lar. Guanw qewsiaur rah jiacc qe qniaa dairjiongr-lorsnuar. Narr byy siux henrginn, guanw cantniax e dyww liauw."

"Qajair guaw jnii jah u qraur. Narr byy, guaw m suacc diyhh qra linw sew nguaw duxgiac?"

Hyw binrjingg kia, ix diddit qra guaw hue sitlew, qycc qongw e qra dingw:a qenwgi jyr qaixjinr.

Jitt qingx cantniax dairkair qapp guaw duiwciongx. Guaw decc quer snezit, ham' guaw jicjiab u diyc :ee longxx u jiac diyc guaw ee pongwvniaw.

Guarkauw cunx hoaxmngx. Qacc jit jua lo laii :ar, byy siwqer kir laux laux lehh marr jnia' bycaiw. Kacc jaw dngw .kir, marr si qapp snax dow viah siy' duiwsiongr. Guaw kir sehqex, knuar suiw snxax, knuar diyc qac'ir :ee, qewsiaur benw sniu' juii, sui' dyrr qra brew :ar. Quer snezit, jit nii marr jiacc jit vaiw.

"Lerhuaa Jew :a, duxjiah u jit xee javox :ee kar denrue beh cue :liw."

Jid'err zip mngg, qapp guaw vnee decc suer cur ee dairhagsingx sui' qra guaw vyr qinw qinw. Guaw qra ix qongw quer quixlyrr vaiw, qongxx jrunw ix didjiab qiyr miaa, benw qiyr qaxx simxmih "jew" .kir. Ix qaxnaxx vnuar tiauqangx :ee, vaiw vaiw qongw dy' qongw be tniax.

"Si si'angw? U lauu denrue .byy?"

"Byy lehh."

"Liw nacc berhiauw mng?"

"Ix dyrr qongw kacc danw e qycc kar."

"Dyrr junw si anxnex, marr diyh'air siyw mng knuar lehh. Lanw jiax denrue qanda' kanx jit qix. Liw qapp liw hitt quaw javoving'iuw jid'err qrangw .lyc .kir longxx qui’ diamxjingx :ee. Langg' beh nacc kar e zip .laii?"

Guaw qra ror, uad lehh dyrr zip kir vangqingx.

Mihqnia qui' tuax qui' qyy jiamrcniaw he druar bincngg-dingw. Naxx ngua snxax, taukag-lai naxx decc sniu.

Dauwdew si si'angw kar :ee? Siyxdi? Be lehh. Jiac kax jiac ciuw ee jycsitlangg, cid jaw veh jaw dyrr kir kunr :ar. Byy, qamxx e si juxzim? U jit amr, ix dirr qongsix qavanx cue byy uerdoo ee qesix, bad kar denrue laii decc mng. Mrqycc jitt jam aw iarr byy sittauu decc qnuaw. Narr byy, qamxx e dingw zit aw hitt xee sraiw BENZ ee endauaxsangr? Qamxx e? Qnaxx be lehh. Ix qaiww singg byy jitt dah ee denruerhuanx.

Id vutdit, zi vutdit, longxx hitt xee siw jaboxquiw-aw diyc :ee. Jniaw jniaw ee dairjir dy' jyr be hyxser. Knuar diyc ix dyrr giamw. Ix sidjai jnia' qror guaw uanr.

Sinkux jiokk ciac'iac. An' guartauu qy jit srinx tohunw dngw .laii, dyrr si m qnaw kir sew. Banrvutzi denrue narr duxhyw laii lehh?

Guaw qra hitt vunw juhy 'Jersenn ee Dethak Binrsiongr' tec .cud .laii, anwsngr naxx knuar naxx danw. Henrhen dyrr quiw jua zri narnia, jingg tak au tak knuar quixlyrr vaiw, suacc itdit dongr dirr hiax. Ngua jit vunw kacc nngxsingr :ee, 'Vuthunx Quiwjok Xiyx Zi Snax'. Jnia' hai, iuguann tak be lyc simx.

Dyrr anxnex, ceh jit vunw ngua quer jit vunw, itdit qaur huandiamw, denrue byy qycc giangx quer jit sniax.

Pag dirr sejngdaii-dingw hauw jit kunr, hauw suah, qamxqag bagjiux jiokk sngx, jiokk siab. Jit log jit log sinx brew ee snaaxkor qra vnua duiww tokax, qui' senx langg sui’ siag duiww bincngg-dingw .kir.

"Ing'amr, tingww singw jit liap aiwkunwiyc-aw."

Dirr amr binbongx ee vangqingx-aw lai, guaw anxnex an'uir qaqi.

Qaqi ee Vangqingx

Denrue giangx jit sniax, sunzenn jit sniax, qa'nngg jit sniax.

"Jongxqingliw Vanrqongsig, liw hyw. Daujux qongsix? Pnaixser, ix cutqog byy dilehh. Zuarr quw? Nng~snax qywguec."

Denrue giangx jit sniax, sunzenn jit sniax, qa'nngg jit sniax.

"Jongxqingliw vanrqongsig, liw hyw. Siauwhang ee dairjir or. Jin' sitlew, ix cud kir tamwhongw jit xee juxqowkeh. Ciuxqix-aw? Qaxnaxx byy jah .cud .kir ne."

Denrue giangx jit sniax, sunzenn jit sniax, qa'nngg jit sniax.

"Jongxqingliw Vanrqongsig, liw hyw. Ar, Liw Dangxsurdniuw, gunw jongw:ee ix dendecc qapp giabbu vxo :ee decc MEETING. Cniaw liw jiamrr danw .jit .xe. Guaw sui' jriab hro ix. Be be, be huiwkir. Ix u qaudair qongxx liw narr u kar .laii, sui' diyh'air hro ix jaix."

Denrue sunrsiok decc zip .laii. Siongrr buew tongx jiacc cuxliw suah, dirr lairdew decc huergi :ee sui' xee aw qniaa .cud .laii. Qycc u .hiacc .quw .aw, denrue qycc dann. Jitt huee si lairsnuar ee huew decc sih.

"Jongxqingliw, liw u simmih huanhur?"

"LISA, liw zip .laii .jit .xe."

Siokjingx qra vid qapp ciuxcaux tec lehh, mngg kok nng xee, mng sag .kuix dyrr didjiab zip .kir.

"Jitt dniux puex sui' qra guaw FAX kir Bixqog, dingxtauu juwbingg beh hro setqer vxo ee DENIS. Singx qra guaw jriab Kux Dangw :ee, jiacc qiyr zinsu vxo ee Dniux Juxzim kiw .laii .jit .jua. Qycc u, qavix qra guaw pangg jit vuex laii, ESPRESSO, camx tngg, mair camx gulingx."

Siokjingx it'id qra qiwlok .lyc .laii, jiauww qinxiaur ee cuwde, sui' hxang aw liaurliw hyxser.

Qethunx jiacc cid~veh nii, mrqycc jitt qingx qongsix, Siokjingx druar beh jap-go dxangx :ar, tangx qongw qongsix ee tauqex viw cur nirr ee tauqex kacc jucimx. Ix jrux tak byy qongxx qaiww quann, in'ui jin' minua yc, langg iurqycc lingxli, guarqaux marr be baiw, an' cimxtauu decc jyr langg' ee jorciuw kxangr qaur jinw jyr jongw:ee ee viwsux marr sngr hab'ingwqaix. Qiamxcaiw u langg amwjni decc qra uanwdor, dirr bingg :ee, si byy langg qnaw qex qongxue.

"Siokjingx Jew, Jongxqingliw qiyr Dniux Juxzim kiw laii beh congr sniaw?" Caixqangw vormngg ee memex qra qongbunn sangr .laii ee sii, sunrsuar decc tamr siausid.

"Guaw beh sniaw jaix?" Siokjingx qongw.

"Guaw knuar liw si m qongw kacc urngiaw. Qui' qingx qongsix, dyrr liw ee cuir siongrr bat!"

"Gunw jiacc byy cincniu linw siauwlenn :ee, qongxue longxx byy decc qnuaix aurbuexmngg."

Memex ciyr hihix, cuiwjic tror .jit .xe.

"Driyc lar. Guaw u denrngiaxpiyr, ing'amr :ee, dirr Semngdingx. Liw u beh jywhuew laii kir bor?" Beh lyc .kir jinwjingg, memex anxnix mng.

"Guaw diyhh qnuaw dngw kir juxvng, iarr u tangx cincniu linw siyxjiaxlangg-aw byy-ku.-byy-sog hiacc juriuu."

"Acc vaiwlak lehh? U jit dniuu enxqangw qaxnaxx be baiw, qongxx si beh tamwtyw luxsingr dirr henrdai-siarhue ee qaksig qapp derui."

"Vaiwlak ginxaw byy siongrkyr, cur nirr berdangr byy daurlangg dilehh."

"Ginxaw berhiauw qiyr linw angx-aw siyw cua .jit .xe."

"Ix iarr u jaidiau!" Siokjingx qongw. "Ix ee siqanx longxx be anwsngr .did. Ing'amr ix e dngw laii jiac bor, guaw dyrr iauxx m jaix lehh!"

Qongsix harvanx ee siqanx qongxx si go diamr vnuar. Uree vormngg kacc cing'ingg :ee, siqanx bue qaur dyrr junxvi decc danw dngr kxaw. Jyr viwsux :ee dyrr byy jiacc hyw kangx, longxx diyhh danw qaur dingxsix qongw jit qxur "byy dairjir :ar, erdangr harvanx :ar", ix jiacc tangx kaisiw kuanw mihqnia. Ehngx, harvanx siqanx hen dyrr qaur :ar, jongw:ee limsii-lim'iau iurqycc danr jit hxang kangkuer .lyc .laii. Ix amwdiongx decc qiyr kow, bin-aw iuguann qig ciyr ciyr. Jre dirr denrnauw taujingg he snewmia qnuaw, danw ix jyr suah, ixqingx beh lak diamw :ar.

Ix qra dyh-dingw ee puehamm qapp qongbunn kiyh kiyh hro siapdiab, dingxsix hiax qra jiauwhue .jit .xe, puevaux-aw pnai lehh dyrr qnuaw beh dngw .kir.

Guarkauw ho dngdecc dua. Hyw did qajair, derhardy sed dirr inx duarlauu ee kauxbin. Qongsix u jit hxang quiding, qongxx jabow :ee longxx bersaih cing dngg kor kir siongrvanx, qyckacc qnuaa marr diyh'air cing qunn. Ix qniazit cing jit sxux tywjongx, qunn ec ec, dew dew, snesingg diyhh qah quann dah :ee jiacc e suwpuer. Quandac'ee kikix-kogkok, sokdow qnuaw zuxx qinw qycc zuxx dua sniax. Cud derham, ix knuar diyc ix beh jre ee qongciax decbeh kixqniaa, hng hng dyrr qra unjiang et ciuw, horsnuar be qor did ziax, ing jongg :ee qnuaw .kir. Qongciax lai jat jnijnix, lenrr ciuw hnua ee soxjai dy' suacc cue byy. Langg je marr u jit vo cruw, narr qamxqag decc henw, qycc byy jit xee kip tangx kanbanw, taujingg aurviah :ee siyw qra ping lehh, marr benw qniax e vuahdyw. Harvanx siqanx ciangjai e tatlo, narr duw diyc lyhhortnix e qyckacc camw. Sinwhyrdingx henrhen dyrr cnix dingx, sibzirlo-kauw ee ciax qui'ee jxig diauu lehh, be-dinx.-be-dang. Siokjingx uahbeh qib .siw, mrqycc marr by ix hxuad.

Qauwui lyc ciax, ho u kacc ser :ar, tokax sniuu lecleh, juixvehsig ee si'axbec suacc hro juixhuex punr qaxx huediamw huediamw.

"Simw Taiwtair, liw ehngx kacc nguar hnoh?" Ancinvanx ee laursux mng.

"Sitlew sitlew. Liw dy' jaix, lyhhortnix, Daivag Ci-lai siwqer longxx tatciax."

"Byy iauwqinw lar. Guanw sed ancinvanx dyrr si beh hro verbuw ansimx :ee."

Laursux qiyr langg' qra ginxaw cua .cud .laii, qycc qra Siokjingx ylyw qongxx ix nng xee ginxaw zuarr kiauw duxx zuarr kiauw.

"Linw qra maxmah qongw quaqyw Inggiw beh anwjnuaw qongw." Ginxaw cud .laii liauxau, laursux sui' qra inx kyw.

"APPLE."

"Acc qinjiyx lehh?"

"BANANA."

Laursux pah ciuxjniuw, diddit ylyw qongxx, "Jnia' gauu, jnia' gauu." Siokjingx an' puevaux-aw tec jit log jnii .cud .laii, qongxx si au qywguec ee huiwiong.

"Dyrr iauxx bue lehh. Au lexvair jiacc lap dyrr ersaih a."

"Qinaxzit duxhyw niaw guehqib. Danw qaur au lexvair, qniax dairjir je, sii qaur iurqycc be qir .did."

Ginxaw qra laursux qongw baibai. Laursux ciyr gigix kia dirr mngkauw, et ciuw sangr inx buxaxqniaw snax xee lirkuix.

Nng xee jaboxginxaw vnee dua hanr, derr zi :ee si dirr amwguec u :ee, soxiw marr vnee je huer, kiarr jit xee nii-tauu, jit xee nii-buew. Siokjingx jin' qongvnee, be duarser simx, bylun snxax, kor iacc si ree-aw, jejex u, memex dyrr u; qycc longxx qra brew qangrkuanw :ee, kacc benw did inx decc siy' jnex. Nng xee jixmue-aw ciuw kanx ciuw qniaa dauwdin, hunxang'axsig ee hormuax, angsig ee hiaqongw, qycc longxx vak nng qix qaciadinjangx. M jaix ee langg, longxx e liahjunw inx si siangsnex-aw.

Siokjingx ee angsair si cur nirr ee dua-qniaw, dua-sunx, sngr diyh'air pangg qimdauw :ee. Inx ang'axbow nng langg kixtauu dyrr u pacsngr beh qinw snex ginxaw tuann hniuhuew. Siokjingx ee vakdoxpuee marr jin' e ylyw .did, qethunx liauxau qecdngw nii, taujniu aw dyrr cutsir, mrqycc si jabow :ee dyrr urngiaw. Angsair cuir qongw jin' hnuahiw, marr jin' zinrjinx decc qra ginxaw hy miaa. Dagg amr kunr qangg pox, angsair ee simqnuax, Siokjingx iarr jin jaix. Ix dyrr sniu qongxx hnuidit qinxjuahban beh snex, dyrr qinw snex snex lehh kacc diaudit. Byy pacsngr, derr zi txex iurqycc si buw :ee.

Derr zi :ee duxjiacc muaxguec, angsair dyrr jun'ir beh qinw qycc vniar jit vaiw, qaiww singg qangxdairlangg byy snex diyc lanrpax m qamguan. Dairkair si buxsinx texjid ee quanhe, jing'au nng xee longxx puawvag snex :ee, qycc inx hitt dangjun cur ee dairkuanw qapp ciax ee dairkuanw longxx duxjiacc kaisiw lap, Siokjingx qowlu diyc qaqi ee sintew, marr kyxlu diyc ginxaw birlaii cnia'iongw lilix-kokkog ee soxhuir, dyrr qra angsair hox qongxx bylun javox jabow, au jit xee dikkag si siongrr suacbuew xee. Jitt txex langr kacc quw, snax nii au jiacqycc ursinx. Jitt jyx, ix qra inx Simw .Qrax qycc tnrix jit xee cenqimx.

Jitt xee ginxaw si Siokjingx qaqi kir vyr cutsir :ee. Hitt jam aw, ginxaw ee laurve dniardnia decc huah byy ingg, byy siqanx tangx kir horjingr-surbursow. Qycc ginxaw ee miaa marr si laurbuw hy :ee. Laurve qra tauu jit xee jaboxqniaw hy jyr Qimhong, qra derr zi xee qiyr Vyxhong. Siokjingx dyrr qra lauxsnax :ee hy jyr Gioghong, kiarr buew:a 'hong' ee imx guanjai, qanda' diongx:a siyw qaiw .jit .xe dyrr OK :ar.

"Jex holindau anwjnuaw bre?" Siokjingx cua nng xee ginxaw uanx kir  vunwsywci-aw.

"Jit qinx lak-jap." Bre cair ee asangw qongw.

"Jiacc quir .diyc!"

"Dnaxx jex holindau jiacc kinx cinr, vnuar qxinx dyrr hro linw jiacc qaxx be qir .did .ar. Liw qanda'..."

"Hyw lar, qra liw cinr .vnuar .qxinx. M tangx qra guaw hrow cinwtauu or!"

"Liw qongw hex byy :ee. Guaw jitt xee dnar-aw dirr jiax beh qui' jap dxangx :ar ne! Jex caiwtauu marr hyw jiac. Beh bor? Jaxkixsii snax qix bre go-jap. Amr :ar, beh siux :ar, vniawvunw, qex sangr jit qix hro :liw."

"M a. Dingw vaiw brew diyc vongrsimx :ee, quibuew cunx kacc byy jidvnuar ee gxiac."

"Jit jam jit jam lar, byy diyc sii longxx marr e anxnix. Byy, diksunw lar, qunn tngx dng' hyw jiac :ee."

"Knuar hex qaxnaxx qruax qaxx."

"Cinwcaiw qongw qongw lehh. Jex diksunw duxjiacc tuh :ee, iur mimix or, liw qra guaw qongw qruax."

"Liw iarr byy sngr kacc siok lehh?"

"Jit qxinx sir-jap. Jex dyxderqer. Juann Daiuann cue byy viw guaw kacc siok :ee!"

Asangw knuar Siokjingx byy qycc qongw .anwjnuaw, sui' dyrr tec sokqade-aw laii decc drew.

"Qingw kacc suiw :ee ne!"

"Jex dagg qix marr suiw." Asangw naxx drew naxx qongw.

"Cangx-aw byy qah nng qix aw laii."

"Diyhh u caiwhiyc-aw :ee mrjiacc u qah. Jitmaw cangx-aw quir ne. Byy, liw vueling'aw brew .jit .vew."

"Nng qix cangx-aw nia, qamxx u qaur dyhh? Qra liw qauquanx jiacc je :ar."

Tauqex dyrr ad nng qix cangx-aw. Siokjingx qaqi qex ad jit qix sreh .zip .kir.

"Quexjiw air bor? Jex navuat-aw dnix butbud, tong' langg ylyw :ee or!"

"Dnaxx hex uree dy' cauwkangx auwlog .kir ar."

"Jit~vnuar liap aw nia lar. Byy, jex vongqyw lar, uree u uwdew. Liw jongw bauc, sngr liw jit-vah dyrr hyw."

Mihqnia kuanw hyxser, jnii marr lap hyxser, asangw hro ginxaw jit langg jit liap jxyw-aw, benw sxenw :ee.

"Cutmngg qycc jah qaxx nng xee vyxviyx. Qoxjuix qaxx, m siangsnex-aw niih?"

Ho iurqycc decc dua .laii .ar. Siokjingx qnuaw beh kir lingbuw hiax jriab ser hanr :ee, dyrr qiyr nng xee ginxaw qniaa kacc qinw lehh.

"Gulinghunw iauxx u lehh, ziyrju-aw decbeh byy :ar." Lingbuw qongw.

"Au jua guaw e jah .laii." Siokjingx qra ngex-aw an' lingbuw hiax qra py .quer .laii.

Ho dng’ dua jun. Duxjiah dirr caiwci-aw brew ee cair qapp quexjiw, ix qiyr nng xee dua hanr :ee jit langg draur qnrua jit hxang, ix qaqi jit ciuw py ginxaw, jit ciuw ziax horsnuar, qniaa qaur cur, kax sngx, ciuw nngw, qui' sinkux snxax damm qawqar.

Nng xee ginxaw cecpnai-aw pniax lehh, denrsi qinw jun .kuix. Zidvunw banggah MARUKO, inx dagg qangx longxx u decc knuar.

"Qimhong, memex rair siy' qor lehh, m tangx qor knuar denrsi."

"Or."

Siokjingx qra ser hanr :ee krngr lyc kir iynaa, uisuqunn haa lehh, qnuaxqinw kir jauwkax cuann beh juxjiac.

Cosii uirdiyhh beh qra ginxaw ee vangqingx qrig kacc dua qingx, jauwkax suacc qiux qaxx cunx guanvunw ee jidvnuar, jiokk ehseh, qycc siyx hongrhong, juw jit dxngr vng lyc .laii, dniardnia dy' bruw qaxx qnua lrauu dapdih. Duxjiah jenx caiwvoxnng u siyxkuaw qiapdniaw. Siokjingx ing caiwquecer dua lat decc lur decc tuh, tauhiac-dingw ee qnua, jit liap jit liap naxx decc dinx .lyc .laii.

"Mamax, denrue." Dua hanr :ee dirr kectniax decc hiux, sniax jin' ong.

"Si'angw a?"

"Jit xee a'ii, ix qongw beh cue vavax."

Siokjingx qra caiwquecer vangr lehh, juixdyrjuiw qimr hro ann.

"Uee, ix iauxx bue dngw .laii ne. Lanw dyc'ui a?"

"Guaw ix jit xee ving'iuw lar. Byy iauwqinw, m si sniaw qipbu, guaw kacc amr jiacqycc kar."

Siokjingx jiacc beh mng ix ee miaa qapp denruerhuanx, hitt vingg suacc singx ced driau.

Qniaa dngw kir jauwkax, Siokjingx qra gasloo qycc ked hro dyc, iuu dryr quaw lyc .kir, suanwtauu dnec dirr ciuw-lai junxvi beh lyc dniaw.

"Qiquair, jitt xee jabow si si'angw, qongxue qycc jiacc sainaix."

Siokjingx taukag-lai naxx decc sniu, ciuw naxx decc la, jid'err srid qakcad, ox cor suacc dongwjyr dauriuu qra dryr .lyc .kir.

"Cec! Jniasit beh kiwlow!" Siokjingx tror jit kauw kuir.

Diksunw-tngx iauxx decc qunn, Siokjingx singx huah nng xee ginxaw laii jiahvng. Ix qra ser hanr :ee marr py laii jiahvngrdyh, amrsee-aw qra haa lehh, kad jit nguaw kyxtaumuee naxx decc qra cri.

"Jiahvng byy jyr iwdir." Nng xee jixmue-aw naxx jiac naxx hua, Siokjingx sui' qra inx qawsi.

Jiac vng vaw, ginxaw sui' qycc kir jriuw druar denrsirqix taujingg. Siokjingx laur sexsinkujuiw qiyr nng xee dua hanr :ee singx kir sew. Ix qra ngex-aw iyy hro kunr, suar kir aurviah ee belanda qra jyc .zit pix ee snxax an' dikqyx dingxquann qra siux .lyc .laii. Dngdecc jic snxax, u langg decc cic denrlingg. Si druar dirr siy' qecviah ee oksang.

"Junwbingg Syw :a, pnaixser lar, liw m dngdecc byy ingg. Guaw beh qra liw siux saur lautuix ee jnii lar."

"M duxjiacc siux .quer nia?"

"Qongw jit qxur kacc sitlew :ee, liw mair siurkir ne. Lanw qui' dongr lau'axcur, dagg vaiw dyrr linw jitt hxo siongrr suacbuew jiacc qaux. Guaw jai'ngiaw linw m si tiauqangx :ee lar. Linw daux zit .sii byy langg dilehh, acc amwsii aw guaw lensiogqiok knuar .lyc .kir longxx quixarr cud :ee. Guaw dyrr sniu qongxx, quikir singx qra liw siux hro ven, anxnix dyrr benw qniax duw be diyc liw kir cenn .diyc. Mrjiacc snax-vah kox nardnia. Qongxx narr kacc dua diauu, gunw marr pnaixser qra liw kuix cuir."

Siokjingx qamxqag ix qongw :ee marr u habliw, dyrr cniaw ix siyw danw .jit .xe, qaqi jiacc zip kir vangqingx tec jnii cud laii hro :ix.

"Driyc lar. Diongdaur u jit xee obasang, qongxx beh laii siux gulingx-jnii. Linw daux dyrr byy langg dilehh m, denrlingg dyrr cic duiww guanw daux laii." Jnii tec .diyc, qecvaih ee oksang qycc qongw.

"Au jua ix narr qycc laii, qamxx erdangr vaiwtog liw singx ter guaw lap .jit .xe. Knuar zuarr je, guaw dngw .laii jiacc hro :liw."

"Anxnix qamxx tangx? Iarr m jaix linw limx quiw qxanx."

"Byy quiw qxanx lar. Dagg qywguec cavutdyx nng~snax vah kox nardnia."

"Guaw knuar dyrr hro ix qycc jauw .jit .jua, lanw horsiongx kacc be decc hueqyx. Qinsiok lanw si ix ee langkeh, ix snevunw rair laii qapp lanw siux :ee maar."

Ginxaw sinkux sew hyw, dirr sexsinkuqingx decc qiyr mamax laii qra inx cing snxax. Siokjingx qra inx ngua kunwsnax, qycc qiyr inx sew cuir, sew hyw, tangx junxvi kir kunr.

"Guaw beh danw vavax dngw .laii. Ix jarhngx u qongw beh brew HELLO KITTY ee envit'ac-aw hro :guaw." Duar hanr :ee qongw.

"Guaw marr beh danw vavax dngw .laii." Ser hanr :ee tranr duar hanr :ee ee ngiu.

"Sniu' amr ar. Linw singx kir kunr. Vavax narr u brew mihqnia, binaxjair kiw .laii, linw qangrkuanw knuar e diyc."

Siokjingx vnuar penr vnuar hingqiongg. Nng xee ginxaw zuu qui' vox marr e tiamw, denrhuew qra qimr hro ser pax, jit diamw aw quw, inx dyrr kunr qaxx m jaix langg kir :ar.

Ginxaw ee dairjir longxx andah hyxser, Siokjingx dycvor tec lehh qinw siwqer crid crid lehh, giaa sauwciuw saur tokax, suar iong vowtuax-aw zriuu zriuu lehh. Dingw jua daqex laii, cur nirr nng qangx byy vniawdng duxciang hro ix jangx .diyc. Daqex byy ma ix uiwbuaa byy vniar cur-lai, suacc qongw verbuw byy siaxsir, dagg qangx diyhh cud kir guarkauw tanwjnii byy ingg tangx quanxqor ginxaw, qui' qingx cur mrjiacc hro inx bruw qaxx jiacc lacsab. Jurr hitt vaiw liauxau, qyckacc byy ingg, ix dagg qangx longxx e vuah siqanx siyw vniar .jit .xe. Ix dyrr si byy beh lyc daqex ee cuir.

Guarbin u syxsii ee sniax linlinlonglongx, quer jit xe aw quw, mngg kuix qaxx ngi'nguaix qiyr.

"Tacc e iurqycc jiacc nguar?" Siokjingx duiww cimxx zibmngg ee angsair qongw. "Cair iauxx bue siux lehh. Beh jiac bor?"

Angsair qra dimr tauu. Siokjingx qra dyckamr henx .kuix, qra caiwtngx pangg kir jauwkax siyw tng .jit .xe.

"Jex ciacjangx qaxnaxx u rar bi. Si qa'ngg brew diyc byy cnrix :ee, si m?" angsair qongw, bagtauu qad .laii.

"Byy lar. Qnaxx si dauriuu iacc bixjiuw he liauw kacc byy duxhyw."

Siokjingx simqnuax amr qniahniaa, ox cor knuar jyr dauriuu jitt jann, gne qra amkamr .lyc .laii. Qongw diyc jex, marr suacc hro ix sniu diyc hitt tongx qiquair ee denrue.

"Beh amr aw u jit xee jabow :ee kar denrue laii beh cue liw, qongxx kacc nguar beh qycc kar, qetqyw marr byy. Hitt jun beh mng ix ee denrue, ix suacc qra guaw ced dng. Ix dauwdew si si'angw?"

"Liw qongw qaxx anxnix h.-hamhoo-h., guaw beh sniaw jaix ix si o-aw iacc hanjii."

"Qacc jiacc qrii, liw e m jaix!"

Angsair cuir nirr jehjec qiyr. Siokjingx jin' jai'ngiaw angsair si decc hiamm ix jabliam. Byy huatdo, jaboxlangg jid'err duw diyc jitt hxang, siu'iongw qyckacc hyw :ee marr dongr be diauu.

Jiac vaw, angsair kixtog tec lehh jyww ix kir knuar denrsi-sinbunn naxx tog kxiw. Siokjingx qra caiwbuew siux zip kir vingsniux, nguaxdi sew hyw, qinw kir ciangg jit xe aw sinkux. Danw ix vreh jnriu bincngg, longxx jap~id-zi diamw :ar.

Angsair iauxx dirr langkectniax decc knuar denrsi. Ix qra jimxtauu cai kia .kiw .laii tangx tex lehh, qra jit vunw hy jyr 'Qaqi ee Vangqingx' ee jrux bongxx tec cud laii tak. Dongsu u decc ylyw qongxx jitt vunw an' Ingbunn huan'ik .quer .laii ee siyxsuad siaw qaxx jin' janw, jin' u qenwqaiw, qycc hyw simx jiyh ix tec dngw laii knuar. Tak dy' byy nng iac, ix qamxqag bagjiupuee dang qaxx, dyrr kaisiw decc ducqaje.

"Buw :a jaixkiw u kar denrue hro :guaw, qongxx au lexvair beh laii lanw jiax druar .quiw .qangx .aw." Angsair qiux zip laii mijiycpue lairdew ee sii anxnix qongw.

"M si guaw air qongw. Linw buw :a sidjai jnia' gauu qra guaw kiax. Liamvnix hiamm guaw hamrban juxjiac, liamvnix qongw guaw berhiauw kniqex. Ix dyrr si air guaw qui' qangx diamr dirr cur-lai juxvng, congr cair, sew snxax, cua ginxaw, mair kir guarkauw siongrvanx."

"Liw qacc jiacc jaix, berhiauw taulo srii srii lehh, mair qycc kir :ar."

"Liw tanr qaxx hiaxee jnii, lap dairkuanw dyrr qiongbeh byy qraur :ar. Guaw byy qeqiamw draur tnrix .jit .quaw, lanw m sui' dyrr diauwdniaw :ar. Linw laurbuw knuar guaw be dingwir, air liam bongxx liam lar. Qongxx ginxaw berhiauw qongw Daigiw iarr guaw ee dai."

Bincngg-dingw lingrgua hitt xee langg byy inwcuir. Siokjingx qamxqag ngirquair, in'ui angsair vingsor duiww ginxaw yc Inggiw jitt jann, ix vutjiw aw u iwqenr. Ix itdit hiamm haghuir sniu' quir.

"Jiax Daivag ne, vutviw erqangw jngkax soxjai. Dnaxx liw u tniax diyc lanw jiax dycc jit hxo ee ginxaw decc qongw Daigiw .quer? Inggiw jiacc si iauwqinw, byy qinw yc, aurzit aw e duer langg' be diyc. Liw qui' zit qapp hiaxee tngwkowvanx jywqang'axlangg dauwdin, m jaix jitmaw guarkauw langg' zuarr qingrjingx lehh. Inggiw byy lauw, liw hen dyrr kacc suser."

Qongw qaur jiax, angsair iuguann byy genn byy giw. Siokjingx tamx tauu qra jimjiog. Dangsi'aw angsair ixqingx decc qnoo :ar, langg m jaix kunr qaur dyc'ui kir :ar.

Siokjingx simqnuatauu bun bun jag jag, gang gang jre dirr bincngg-dingw qui' vox quw. Trow jit xee duarsimkuir, ix qra anwtaudingx qimr .srid, dirr mijiycpue-lai kinx sniax duiww qaqi qongw jit qxur, "Siokjingx, jriog liw snezit kuaiwlok!"

    Iucaiwhuex ee Cuntnix

    Derr Id Bo: Kunwvangg

(denrsi-sniax)

lamjuxqag: Siokhui, liw diyh'air siongsinr :guaw. Dngcuesii, guaw jniasit m jai'ngiaw liw ursinx dilehh.

luxjuxqag: Jiwhongg, guaw byy quair :liw. Jex itcer longxx si mia. Erdangr dirr quewkuir jinwjingg qycc qnir diyc liw jit bin, guaw simqnualai dyrr byy paurhun :ar.

lamjuxqag: Siokhui, liw m tangx ovec sniu. Guaw e cue siongrr hyw ee isingx qra liw idi. Liw ee vne jin' qinw dyrr e hyw .kiw .laii.

luxjuxqag: Guaw si ehngx jaxamr ee langg, jex guaw qaqi jaix jaix. Guaw jitmaw siongrr huanlyw :ee si lanw ee qniaxzii byy laurbuw tangx qra cnia'iongw. Liw diyh'air dac'ingr :guaw, danw guaw siw liauxau, dikkag diyhh qra ginxaw crua jit xee e tniawsiyh ix ee mamax. Narr anxnix, guaw jiacc e tangx hongwsimx aw kir lar.

lamjuxqag: Guaw m. Jitt siwlangg, guaw qanda' zinrding liw jit xee, byy kyxlingg qycc kir air vadd langg. Bylun rair kaix zuarr je iyhjnii, guaw itding beh qra liw ee vne rix hro hyw.

luxjuxqag: Jiwhongg, m tangx uirr guaw qycc kaix uan'ongw jnii. Guaw jitt siwlangg juwdnia byy hokkir jyr liw ee kanciuw. Jitt sxer byy enn, danw au cutsir, lanw jiacc laii jyr hucex.

(denrue giangx)

a'Jux: Uee.

Dniux Taiwtair: Uee, Guaw sir lxauu ee Dniux Taiwtair lar. Liw tacc e angr sniax angr sniax?

a'Jux: Byy lar, tacc u.

Dniux Taiwtair: Henrhen dyrr u qycc jner byy. Anwjnuaxngiu? Linw tauu:ee qra liw dnaix or?

a'Jux: Liw mair ovec iyh! Guaw decc knuar lensiogqiok lar.

Dniux Taiwtair: Lanquair or. Decc knuar 'Iucaiwhuex ee Cuntnix' m?

a'Jux: Hner a.

Dniux Taiwtair: Jinw vnuax qaur dyhh? Guaw langr quixlyrr jip byy knuar :ar.

a'Jux: Acc dyrr Siokhui vne qycc huankox, venr qaxx dua kangwku, jin' guii. Jiwhongg jriuw dirr ix ee sinkuvnix, qongw narr byy ix, jit siwlangg longxx byy beh crua.

Dniux Taiwtair: Inx longxx marr anxnix venx. Knuar jitt xee vanrser, acc m dyrr beh suah :ar?

a'Jux: Iarr jaix. Byy-dair.-byy-jir qycc vuh jit xee siyxmue .cud .laii. Guaw knuar, qycc jnia' u tangx vnuax lehh.

Dniux Taiwtair: Quanxtax inx anwjnuaw venx. Dnaxx jinw denrsirdaii je qaxnaxx snuax lehh. Narr pnaiw knuar, lanw dyrr qra jun daii knuar vadd cud.

a'Jux: Qongw si anxnix qongw. Jitt cud jyr beh vnuar dxangx :ar, byy qra knuar hro tangwbuew e gairgiyc.

Dniux Taiwtair: Liw marr sngr sixdiongx :ee dyrr driyc lar. Ueer, guanw jiax snax kax kiamr jit kax, liw m dyrr berdangr laii?

a'Jux: Qniazit vaiwquiw?

Dniux Taiwtair: Vaiwsnax a! Anwjnuaxngiu aw si bor?

a'Jux: Vaiwsnax! Bering did, bering did. Qenwnarr vaiwsnax i, guaw longxx sux qaxx hee ~ ~.

Dniux Taiwtair: Liw decc hambinn. Dingw dingw qywguec liw dua tiyx hitt vaiw, liw qa'ngg kuanw nng~snax-cingx kow dngw .kir, hitt qangx vaiwsnax ne!

a'Jux: Qamxx anxnix?

Dniux Taiwtair: Guaw penr liw beh congr sniaw? Anwjnuaw, beh laii bor? Iacc si liw beh qycc knuar lensiogqiok?

a'Jux: Jex jarhngx knuar .quer .ar, jitmaw decc dingvyr. Linw siyw danw .guaw .jit .xe. Guaw snxax pix lehh, kacding'aw sui' dyrr lyc .kir.

    Derr Zi Bo:  Baciokqingx

Dniux Taiwtair: Jarhngx jyhzit aw iurqycc decc ruanx :ar. Linw nng xee kia kacc hng m jaix. Guaw qapp ix druar qangg jit dongr lau'axcur, hex si tniax qaxx bingg ~ ~.

baciokkax qxah: Anxnix iarr suacc e dit? Vutsii dyrr decc siy' ziongw, ang'axbow qamxjingg beh nacc e hyw?

Dniux Taiwtair: Jitt jun qycc decc qongw simxmih qamxjingg! Nng xee langg mair qaxnaxx uansiulangg dyrr jin' qajair lor. Jitt vaiw ruanx qaxx u lirhai, qaiww singg e lii oox!

baciokkax xid: Qamxx urngiaw? Guaw knuar inx qongw tiongr :ee nia lar.

baciokkax qxah: Guaw decc knuar marr si anxnix. Dauwdin dy' zi-jap gua dxangx :ar, qnaxx jniasit huah cew dyrr cew?

Dniux Taiwtair: Mrjiacc qongw linw m jaix maar. Langg' decc caw beh vnuax zip laii jywhuew druar :ar.

baciokkax qxah: Tacc u langg jiacc ticbinrpuee, jiacc be vuecsiw? Inx sidjai sniu' quer byy kuanw!

baciokkax xid: Dyrr si anxnix m si sniaw? Qongw qaxx inx javolangg or, sidjai be sing .did.

baciokkax qxah: Jitt sniax narr hro ix crua u quer ciuw, aurzit aw inx hitt qrex dyrr jniasit e caxqex-lartec lor.

Dniux Taiwtair: Lanw qongw jit qxur kacc byy su'ngiaa :ee. Qinaxzit e qniaa qaur jitt xee dervo, u jidvnuar si ix qaqi jyr did laii :ee. Cimxtauu aw duxx jaix ee sijun, ix dyrr ingwqaix dac kacc gne lehh, sui' qapp ix vingw, iarr suacc tangx cincniu ix anxnix qig kowkor, vangr lecc hro inx kir. Langg' qra ix knuar qaxx vxaii-aw-drew kir, kacc qex marr ho'ngg jiac jap-veh dur qaur qaur.

baciokkax qxah: Marr byngiaw cincniu liw qongw :ee anxnix lar. Liw byy ter ix siyw sniu knuar lehh. Hitt jun aw ginxaw iauxx jiyw huer, qiyr ix beh anwjnuaw vangr e kuix kax.

Dniux Taiwtair: Acc jitmaw lehh? Ginxaw longxx duarbuw langg duarbuw jxingw :ar, linw qamxx bad tniax ix qongw .anwjnuaw?

baciokkax qxah: Jitmaw iurqycc byy qangg :ar. Dnaxx ix marr liyc aw u huer :ar, vitbagsuanr byy vnuar ped, giac vindnax qycc byy hxuad .did. Taulo inw byy, sii qaur, liw beh cri ix or?

baciokkax xid: Lanw cunn tenliongg qongw, langg' ix marr sidjai u kiangr, erdangr lunw jiacc quw.

Dniux Taiwtair: Langg' dyrr si siongr junw junw mrjiacc decc qra ix truix nngw :ee m. Lanw jaboxlangg diyhh yc kacc giamxgne lehh, jiacc be dniardnia hro inx javolangg decc knuar suex.

baciokkax xid: Dairjir byy qaur qaqi ee taukakbuexdingw, qenr su id dingg moc. Ix dniardiyc u ix ee uilann dilehh, jingcax qongxx lanw byy jaidiau texhue.

Dniux Taiwtair: Linw qapp ix kacc u decc laikir, huanrser duiww ix kacc u liauxqaiw. Guaw knuar ix anxnix b.-bavir-v., jiacc vutdiongwiong ee kuanw, qenww vaiw narr sniu .diyc, singwde dyrr qiongbeh giaa .kiw .laii.

baciokkax qxah: Liw qacc knuar ix jiacc ciwcak, qycc kar denrue qa'ngg qiyr .laii.

Dniux Taiwtair: Acc dyrr kiamr jit kax m, byy huatdo.

(denrlingg-sniax)

Dniux Taiwtair: Ix laii :ar, dag'ee qongxue kacc sewzi lehh.

baciokkax qxah: Jaix lar, iarsaih diyhh liw huanhur.

(Dniux Taiwtair kir kuix mngg)

a'Jux: Baciokziw-aw cuann hyw be? Linw byy singx qiywui qongxx.

   Derr Snax Bo:  Langkectniax

haursnex: Hitt xee mrjniaqniaw iurqycc decc qexsiauw :ar m? Hex dniardiyc rair qra driaux lor, diak knuar e kacc quaix bor qongxx. Sniaw? Beh qycc venrknuar? Guaw knuar m tangx lar. Sii qaur narr duarbuew .kiw .laii, liw dyrr yh liuxlag lor. Hnaa? Or hex or, hex jensii ee sniax lar. Acc dyrr gunw buw :a dirr jauwkax decc juxjiac lar. Inx or, qangrkuanw a. Guaw uaw dycc jit vingg? Hex snevunw diyhh uaw senxtauu-aw kacc dua vew hitt vingg lor. Qiyr ix qapp gunw laurve lienn? Guaw dyrr byy decc kixsiauw qyc! Gunw buw :a narr jauw, guaw ee snxax beh qiyr si'angw sew, guaw ee vangqingx si'angw beh vniar? Aurbuw? Jnia' vniar lehh, mair qra lanw koxdok dyrr jin' banrhing lor. Ginxaw? Byy tniax inx decc qongw. Junw narr u, guaw hor marr beh qra hor .cud .kir. Si anwjnuaw? Lensiogqiok iacc siarhue-sinbunn liw m longxx byy decc knuar? Lau :ee narr kiaux .kir, suacc mrbenw hungiap vunx qehuew? Liw sidjai u qaur hauwdaix ne! Lenrr jex liw iarr m vad.

(a'Jux qniaa uaw .laii. Haursnex qra denrue ced driau.)

a'Jux: Juw sik :ar. Ersaih kir jiac lor.

haursnex: Vaa :a lehh?

a'Jux: Linw vaa :a iurqycc lyc kir erqangw, ing'amr byy beh dngw .laii.

haursnex: Guaw kacc danw sui' dyrr beh cud .kir.

a'Jux: Liw beh kir dyhh?

haursnex: Qelangg.

a'Jux: Vniar qaur Qelangg .kir! Jinw jiahvng siqanx ne!

haursnex: Dyrr si beh kir hiax jiac haixsanw :ee a! Qui' pangg langg ixqingx dirr hiax decc danw guaw :ar.

a'Jux: Dnaxx liw m jiac, linw vaa :a iurqycc m dngw .laii, hex qui' dniaw loxbah, guaw jit xee langg beh nacc jiac e kir?

haursnex: Dagg vaiw dyrr qiyr liw mair juw juw hiacc je, liw qan' qan' aw m tniax.

a'Jux: Suacc m jaix linw vaa :a dniardnia decc me guaw hansanx, cair juw sniu' jiyw byy qraur linw veaxqniaw hauwqox. Dnaxx hyw lar, liw qacc beh kir dyrr liongrjaw.

haursnex: Jnii laii a, byy diuh nng-cingx kox aw laii lehh.

a'Jux: Beh congr sniaw?

haursnex: Jiac vng suacc benw kaix jnii niih.

a'Jux: Liw or, siongrr gauu kuix kangx kuix kiah qra linw buw :a pacsew. Dingw zit aw guaw jiacc hro liw go-cingx lehh.

haursnex: Haghau duxx kaihak, cinwcaiw pah jit xe kacniur dyrr byy .kir .ar.

a'Jux: Liw diyhh kacc kiam aw ing lehh, kaix jnii m tangx hiacc cer puee. Aurzit aw linw buw :a narr byy dilehh, si byy langg tangx hro liw crunx dngg ciuw!

haursnex: Anwjnuaw qongw liw e byy dilehh? Liw qnaxx m si beh qapp vaa :a lirhunx lar hnoh?

a'Jux: Junw narr si lehh?

haursnex: Hex jiacc si m tangx or!

a'Jux: Si anwjnuaw?

haursnex: Cur, m si dingqir liw ee miaa; jnii, marr byy qiar dirr liw ee hortauu. Vaa :a jywlangg sniaw kuanw, liw iarr m si byy liauxqaiw. Sii qaur, ix narr kiw panr, jin' u kyxlingg jit qag ginn dy' m hro :liw.

a'Jux: M dyrr tair. Guaw suacc berhiauw qaqi cud kir tanr.

haursnex: Qongw :ee kacc qanxdanx.

a'Jux: Liw knuar linw buw :a jiokk byy diamw.

haursnex: Buw :a, liw marr kacc hyw simx lehh, mair tiauqangx beh uanx langg' ee ue. Liw bingqii jaix linw qniaw si decc ter liw huanlyw, qniax liw e kir jiac diyc qnix.

a'Jux: Linw vaa :a dirr guarkauw cri jabow, jingrr qaur dnaxx, guaw m bad tniax liw qra pngc quer jit qxur. Liw narr jniasit jiacc ui :guaw, tacc e itdit longxx vangr sib sib?

haursnex: Jitt jiongw dairjir, guaw jyr langg' sirser :ee sidjai jin' pnaiw capciuw. Vaa :a dyrr qanda' kacc hongliuu nia. Siongrqaiww byy, ix iauxx m bad duiww liw kiw kax drang ciuw .quer.

a'Jux: Acc narr anxnix qongw, guaw m dyrr ho'ngg bog qax ocnex-ginghueh, dua bongx ser lruii, qaur hitt jun, liw jiacc beh cab guaw m?

haursnex: Ang'axboxdai, mair qongw qaxx jiacc pnaiw tniax lar.

a'Jux: Beh zuarr hyw tniax? Sursit dyrr si anxnix!

haursnex: Buw :a, liw simqnuax diyhh sniu kacc dngg lehh. Qangg jit kauw jaur :ee, qui' qangx dirr hiax decc uanqex-niurjer, anxnix beh nacc si hyw?

a'Jux: Liw qiycsirr guaw air? Liw dyrr m jaix, guaw...

(lacvah-sniax)

haursnex: Langg' laii beh jair guaw :ar. Baibai.

a'Jux: Siyw danw lehh! Liw jnii byy beh air :ar?

haursnex: Driyc hnoh! MOMMY, I LOVE YOU.

a'Jux: Aqauu! Qew kenn!

    Derr Sir Bo: Mngcuiwkauw

cuwvnix: Lanw jitt xee siarkux sidjai jnia' pnaiw kiarkiw. Liamvnix jitt hxo ho'ngg taux, kacdingg aw hitt qrex ho'ngg qiab, qycc iarr u hitt hy snax~sir huer ee ginxaw ho'ngg taux py kir bre :ee. Qongw qaxx jitt quaw huixlui, sidjai byy hxuad byy tnix.

a'Jux: Qiyr quanxkux :ee a! Linw suacc berhiauw qiyr quanxkux :ee laii srunn.

cuwvnix: Beh ngr inx, hex m qaxnaxx tor-aw decc brang guec. Inx hex jiac qongqax ee taulo :ee, longxx marr decc mohuix kacc je. Lanw qiyr be qniaa lar.

a'Jux: Anxnix guaw marr byy huatdo a.

cuwvnix:  Si u langg decc ciongwgi, qongxx beh cniaw vyxjuann :ee laii qor.

a'Jux: Vyxjuann :ee! Hex quir qaxx beh iauxsiu .siw! Linw beh cniar, linw qaqi kir cniar. Gunw ee mngho qaqi e jimjiog.

cuwvnix: Jitmaw si anxnix lar. Vyxjuann :ee lanw byy anwsngr beh cniar. Dyrr naxx liw qongw :ee, hex diyh'air kaix jit vid jnii. Qycc u tniax qongxx inx hex jnia' je longxx u anwdew. Banrvutzi narr jniasit kaix jnii cniar langg laii jyr cat, hex dyrr urngiaw jin' vutbingg or!

a'Jux: Si dyrr driyc m.

cuwvnix: Lanw jiax uree taukag kacc hyw :ee u sniu diyc jit vo, qongxx quikir lanw qaqi lyc kir qor, singw jnii qycc unxdangr.

a'Jux: Beh anwjnuaw qaqi qor?

cuwvnix: Hex jin' qanxdanx. Knuar si beh jiauww lunkaux iacc si siy' vangwpnua, suisii longxx tingwhyw ciauu.

a'Jux: Gunw javolangg si decc jyr singliw :ee, dniardnia diyhh lyc kir erqangw cutdniux, byy dirr cur nirr ee siqanx kacc je.

cuwvnix: Byy hanrding inx javox :ee a! Lanw jitt quaw obasang marr erdangr draur tauu draur buew draur kaciuw.

a'Jux: Acc si beh jyr sniaw? Guaw diyh'air qor cur neh.

cuwvnix: Qor cur qor qui' qangx :ee?

a'Jux: Lanw cuwvnix jyr jiacc quw :ar, guaw dyrr qra liw jiauwsit qongw lar. Gunw tauu:ee kacc air guaw diamr cur nirr. Ix jiokk byy air guaw cud kir guarkauw papax jauw.

cuwvnix: Anxnix or. Byy, draur qor ginxaw hyw bor? Druar linw qecviah :ee, inx nng xee ang'axjiaw longxx decc siongrvanx, dniardnia dyrr vangr ginxaw qaqi dirr cur nirr, sidjai jnia' byy tywdongr.

a'Jux: Liw qiyr guaw qycc cua ginxaw or! Guanw daux jit xee, guaw dna'aw jiacc qra liap dua :ee.

Cuwvnix: Mrjiacc qongw si beh vaiwtog liw draur qor. Acc dyrr cuwvnidaux, siyw dauwsnaqang .jit .xe a!

a'Jux: Dauwsnaqangx guaw si jin' air lar. Mrqycc, guaw diyh'air mng guanw tauqex .jit .xe.

cuwvnix: Qamxx diyhh jiacc qanghux? Jex siyxkuaw dai nia, liw qaqi qamxx berdangr juxir?

a'Jux: Liw si m tangx anxnix sniu. Lanw jaboxlangg qui' nii tangr tnix longxx decc byy ingg cur nirr ee kangkuer, kacc byy decc cutzip lairgua. Jitmaw siarhue venr anwjnuaw, iauxx si inx javolangg kacc vad. Qycjaiww qongw, lanw jyr langg' qeau :ee, bxan hxang dairjir, siyw cunn jit xee aw angsair ee iwqenr, u hyw byy baiw lar. Byy, dyrr anxnix lar hnoh. Guaw kunwdaur duxjiacc kiw .laii, lingxkir iauxx bue qimr lehh. Dnaxx guaw diyhh qinw zip .laii .kir .ar. Pnaixser lar, pnaixser.

    Derr Go Bo:  Maxjow Qingx

biyrqongx: Jiyhvunw Syw :a, liw si anwjnuaxngiu diyc, tacc e jit senx langg suesinn suesinn?

a'Jux: Haar! Mair qongw kacc ngiaa. Narr jniasit beh qongw kiw, hex tnix sui' dyrr ox jit vingg.

biyrqongx: Mair anxnix lar! Liw byy qongw cud laii vunx langg' tniax lehh, guaw beh anwjnuaw qra liw cud juxir.

a'Jux: Guaw qongw liw jitt jam aw m longxx byy qapp langg' decc qauvnuaa. Guanw tauu:ee dirr guarkauw kir duer diyc vadd xee jabow, jex liw qamxx m jaix?

biyrqongx: Uaar! Dnaxx jex dyrr jin' pnaiw pangw lor.

a'Jux: Simxmic jiacc pnaiw pangw nia. Guaw knuar si kir liauw liauw :ar!

biyrqongx: Acc jex zuarr quw ee dairjir? Kacc jaw ixjingg iarr byy tniax liw decc qongw.

a'Jux: Sir~go dxangx qnaxx u :ar.

biyrqongx: Jiacc quw :ar! Jitt hy dairjir longxx marr diyh'air qinw qaixquad, iarr suacc tangx tuax jiacc quw.

a'Jux: Liw iarr jai'ngiaw guaw byy? Guaw duxx u diwqag .diyc ee sijun, dyrr sui' laii mng quer Maxjow, knuar beh zuhyy si hyw.

biyrqongx: Maxjow anwjnuaw qongw?

a'Jux: Ix qiyr guaw rair lunw.

biyrqongx: Anxnix or. Acc liw u jiauww jixsi kir qniaa bor?

a'Jux: Iarr u jit xee byy! Tauu qaur buew snax nii, guaw longxx dner diam diam vangr lecc hro kir, ngwbang knuar dycc jit qangx ix qaqi e jaix dngw tauu .be. Langg' decc qongw nngw too cimx qrut lar. Jitmaw ix suacc caw beh qra crua .zip .laii!

biyrqongx: Sidjai jnia' m si kuanw. Liw byy qinw qycc kir cingxsi Maxjow?

a'Jux: Iarsaih diyhh liw qar, guaw duxjiah jiacc kir mng .quer.

biyrqongx: Qetqyw anwjnuaw?

a'Jux: Ix qongw diyhh hro crua.

biyrqongx: Anxnesnix or! Jex dyrr qrii lor.

a'Jux: Dyrr driyc m. Guaw u decc sniu, qamxx e lanw jitt qingx biy byy sniar :ar?

biyrqongx: Liw duarqimrcuir, lamrsamw lut. Guanw hniuhuew dagg qangx dy' jiacc ong, dag'ee marr ylyw qongxx sniar qaxx, dyrr qanda' liw qapp langg' huah byy qangg.

a'Jux: Guaw si qamxqag jin' ququair. Qinaxzit guaw narr kir mng Quanx Lyxiaa, qongxx hex dyrr huanrser huanrser. Vnevnee longxx jaboxlangg, ix tacc e junw langg' kir crua sewii?

biyrqongx: Acc byy, liw qra hitt xee jabow ee dexhe qongw hro guaw jaix lehh.

a'Jux: Ix sner Qangx, qongxx ham' guaw qangrkuanw, uanaxx qiyr a'Jux. Ix qapp guanw tauu:ee longxx sniur dix, inx nng xee duxhyw cax nng qixnii.

biyrqongx: Anxnix dyrr driyc ar maar. Linw tauqex ee miaa lairder u jit zri jiyc, acc liw ee miaa u jit xee jux .zri. Jiyhtauu qongr vyxjux, bogquair liw e hro ix rah lyc drew. Dnaxx Maxjoxvyy u vyxvir, cauwduxkamw hro ix qycc kir cue diyc jit liap jux. Jitt xee laii, m si beh qapp liw jyr duiwtauu :ee, dendyww si beh ter liw jerdauu :ee. Hro crua byy iauwqinw, unw tywdongr :ee.

a'Jux: Qamxx tangx? Langg' hex jiacc zi-jap tongw nia ne! Acc guaw lehh, qiongbeh jyr maw .kir .ar, liw jaix bor?

biyrqongx: Benw qniax lar. Ix hex liaurjux, hyw knuawtauu nia. Acc liw si jinjux neh, guarpuee baiw bongxx baiw, jinjniar u qewdat si liw jitt jiongw :ee.

a'Jux: Qamxx anxnex?

biyrqongx: M si anxnex, byy si sniaw? Acc byy, guaw qycc mng :liw lehh. Duxjiah liw u vuahvuex bor?

a'Jux: Liw marr decc ciywkuex. Byy vuahvuex beh tacc mng u?

biyrqongx: Acc liw anwjnuaw mng?

a'Jux: Guaw dyrr mng qongxx qamxx tangx hro crua zip mngg?

biyrqongx: Qetqyw lehh?

a'Jux: Lensuar snax vxuex longxx sinrvuex.

biyrqongx: Hnoh hnoh, liw knuar liw knuar, jex hunbingg dyrr si miardew dingdair, jur hyw hyw :ee liw qycc m sinwsniar. Lanw Maxjoxvyy qyxzenn u lxingg u ingxhiongw a!

   Derr Lak Bo:  Cantniax

(pog'aw-sniax, paur-aw-sniax, naurnau-caixcaiw.)

langkeh qxah: Kia dirr duartiau aurviah hitt xee si si'angw?

langkeh xid: Hitt xee or, suacc m jaix hitt xee dua-bow lar.

langkeh qxah: Dua-bow! Tacc e anxnix bih bih cih cih, qaxnaxx sinvu'aw lehh?

langkeh xid: Acc dyrr tongsux dingxquann siaw qongxx sniur tor :ee qinaxzit qapp sinniuu-aw sna' krig sna' huan.

langkeh qxah: Acc ix m dyrr duxhyw sniur tor m? Kyxlendai or.

II

Ingxuanw ee Cuningx

“Uirdiyhh Bixqog jiyh’iuu-qrer diddit jriangw soxx drir, Daiuann ee qoxci qinaxzit qui’ee jongw lyc, siuvnuaa lag jit-vah-kxongr-veh diamw.”

Bylun qoxpiyr kiw iacc lyc, radio vywimuann ee sniax an’ tauu qaur buew vnee pypyx, bersux qekiwlangg decc qongxue. Cuningx ee simqnuax tangx vixping hitt xee sniax, bersux jit kud sixkut'axjuiw, jit sxix aw juixhunn dy’ qig be kiw .laii.

Iarr m jaix jitt kuanw hxingg si hyw iacc baiw. Ixjaw, sowzi decc tiaur quann tiaur qe, Cuningx ee simqnuax iauxx e duer lecc kiw kiw lyc lyc. Tuathuar si jit jiongw tauxvangr, iacc si hro qaqi ee sing’uac venr qyckacc byy qiok .kir, jingrr bunrdee cutsir qaur dnaxx, ix itdit iauxx byy jit xee dap’anr.

“Limm Kywdniuw, jiacc cniaw liw siy' qamxqair.”

Mngkakauw ee langg qniaa dua lew, tauu dimr qaxx qiongbeh lag .kir. Kywdniuw bagjiux buix buix, cuir-aw lic saisaix, ingqaix si tywdongr :ar. Jiauww ingxquer ee qinggiam, Cuningx simlai decc iyh, jitt jy lexsor u cuann qauwgiac, qycc inx marr qniaa beh jap jua u :ar.

Taux liac qxex iarr diyhh jit vew biw. U tniax diyc iautuann, qongxx inx jitt xee dingxsi, jaxdangsii si kaix dua jnii qa’ngg osex, jiacc u tangx dirr dew dew nng~snax nii dyrr sringx qaur kywdniuw. Jjitt jann narr jniasit, jinw qra knuar, sidjai diyhh ylyw ix sngwvnuaa gauu diak. Kacc benw jit nii, byxqimx quaww lxai, ix qnaxx jongw siux siux .dngw .laii .ar.

“Jit-vah, jit-vah, longxjongw jit-vah.”

Caiwci-aw-tauu u jit dnar decc bre sna’axkor :ee, tauqex kia dirr jit jiah qoxiw dingxquann dua sniax decc huah siogbe. Cuningx qniaa uaw .kir, qapp jit din hurzinlangg kia qui’ let decc qingw snxax.

“Obasang, jex snxax hyw cing lar. Be ziauu, qycc e sywqnua. Langg’ uree jit kunr kuanw quixnarr niaw dngw .kir.”

Tauqeniuu jiacc qongw suah, Cuningx bin-aw vnir vnir uad lehh jauw, jit niaw dy’ byy qra qauquanx. Hro langg' qra qiyr taiwtair iacc oksang, qurnii quer, qaxnaxx zuxx laii zuxx suwsiongg. Mrqycc, ho'ngg hiamr obasang, jex dyrr tauwsiwlangg tauu jit vaiw. Cuningx jinx jaix siauwlenn tauqeniuu byy pnaiw ir. Byy cuir suiw, jnii tanr be diyc iarr sngr qaizenn.

Suiw snxax, Cuningx byy decc jiyxkueh. Cur nirr snaaxduu-lai ee ngiuhogjongx, quixnarr sxux quer jit sxux, uree jit nii cing dy' byy jit vaiw. Jyr huerqer, cingrcah mrbenw sniu’ qangxqiur. Cocing ee snxax cing quanwsir, dycc jit qangx qruad jit xe aw enjix, pah jit xe aw hunw, sui’ dyrr e huan langg gex.

“Bue qewangx :ee dyrr si anxnix decc kikkuix. Guanw hiax jit quaw u angx u qniaw :ee, dagg qangx dy’ jrngx qaxx suiw dangdangx kir siongrvanx, ham' endauu aw sangr pah ciywkuex, langg' qycc knuar jyr cuwbi. Acc narr cincniu lanw jitt jiongw dogsinx aw kunr dnuax pox :ee, cinwcaiw qapp javolangg ciyr .jit .xe iacc kaiqangw .jit .xe, kacngx-au sui’ qra liw snejy ue.”

“Cuir snix dirr langg ee bin, quanxtax inx anwjnuaw qongw. Liw jurr kacc jaw dyrr siusiapkir qycc qau simsux, mrjiacc e qaur jinw iauxx bue puewangx.” Cuningx bad qra jit xee jixmueaxpnua kaur kow. Langg’ suacc huanxdngw hro ix jit dxngr qawsi.

“Cuningx, sampulu ee dairjir, liw pacsngr dangsii beh qra tauqex vywqyr?” Zit .sii ee sittauu suah dngw cur hiyckunr, jiac amr vaw, Cuningx laii lingrgua jit qingx jyr PART TIME :ee. Cimxx dac zip mngg, giabbu juxzimm sui’ dyrr mng qinw qinw.

“Guaw knuar, iauxx si mair hro ix jaix kacc tywdongr. Binaxjair ix beh kir erqangw cutdniux, guaw jiacc laii cuxliw.”

“Liw si qongxx, jitt diauu liw beh cud or?”

Cuningx qra dimr tauu.

“Anxnix nacc tangx?” Giabbu juxzim pnaixser ~ ee kuanw.

“Dingw huee mihqnia qiar dnargo, lanw nng xee hro tauqex me qaxx beh caur tauu nua hni .kir, lorbuew, qycc diyhh ho’ngg kraur sinsuiw. Guaw u ho’ngg qawquaix :ar. Jitt vaiw jitt qnia ngiurpinw, qigqex nng~snax-cingx kox suah, e hryy lar.”

Giabbu juxzim ciyr girgi, taux taux aw iab jit liap juixbidtyy hro Cuningx, qongxx vadd langg byy, dna' ix u nia.

“Liw sidjai u kiangr. Jarhngx, guaw knuar liw dyh-dingw juann siauwdnuax, iauxx decc sniu qongxx, jitt qywguec ee sinhong pacsngr byy huatdo junxsii niaw .diyc qongxx.” Sinsuiw ee duiwdnuax naxx ciamx, huwliw naxx qapp Cuningx kaiqangw.

“Kaciuw byy vniar kacc qinw lehh, beh anwjnuaw qapp siauwlenn :ee qingrjingx? Linw Ingbunn lauw :ee, taulo cinwcinw inw dy' u. Dycc jit qangx Daiuann qingjer narr lyhsuex, Daiuanlangg qui’ pxangg diyhh kir guarqog tyxtanr, cincniu gunw jitt jiongw Inggiw be tongx :ee, beh kir qa’ngg juw vng sew snxax, kiongxqniax langg dy’ byy rair.” Cuningx qongw qaxx qigmngg.

“Liw marr decc gauu cauhuann, sniu sniu qaur hiax kir.” Huwliw qra ciyr.

“Dyrr urngiaw a,” Cuningx sniatauu puu .kiw .laii. “Hex qongqax :ee si jiokk cauwnua, jiokk gauu songxjnii! Narr iuguann vangr lecc quwjai inx uaiqyx, Daiuann vangvai si qinxjuahban.”

Harvanx ee jxingx-aw giangx. Jidsidig, Cuningx simjong he sniwmia cnaiw. Qenww tniax diyc cicix-cabcap ee kavo-sniax, ix dyrr dnax tauu jimjiog.

“Siyw danw lehh. Liw horsnuar be qir did giaa.”

Cuningx ziog kir qaur guarkauw. Qangdingsux me qaqi qenrbongg byy tausinn, iong gorqinqee kiak qaqi ee taukag. Horsnuar jiacc tenw .kuix, jit xee jabow dongsu jongg .cud .laii, qongxx beh jiyh qangdingsux ee horsnuar jywhuew ziax. Qangdingsux sui’ qra horsnuar dux uaw .kir. Nng xee langg dangjee qapp Cuningx qongw baibai. Cuningx qig ciywbin, simqnuax bun jyjyx.

“Qongw si qongxx qanda’ inx veaxqniaw snax xee iog beh jiac vng. Guaw decc iyh, hitt xee jabow unxdangr marr e kir. Simxmic decc jaboxqniaw qapp laurbuw kacc qangrsimx. Iarr suacc urngiaw.”

Cuningx byy ingg decc qetsiaur. Jongxbu juxzim ing’amr dongdit, jre dirr ix vnix:a decc qongw quaw qalairsu hro ix tniax.

“Jitmaw ee siauwlenn :ee, dyc’ui u hyw kangx :ee dyrr cnii uaw .kir. Linw nng xee jaboxqniaw sngr be baiw :ar, tanr jnii qycc e tec damrvyc aw iuxhaur :liw.” Qewsngwqix naxx zic, Cuningx naxx decc huntiah.

Jaixsii cid diamw dyrr cutmngg, harvanx dngw .laii, amr niauniaux, qinrdaux ee diamwbin kacc je longxx qnuaix mngg cnuar hxo :ar. Hang-aw-tauu jitt qingx, denrhuew qngx ngiawngiar. Cuningx zip .kir, nng xee jabow hagsingx dirr hiax decc qingw ceh, juvaux pnai dirr qingqactauu.

Uirdiyhh verbuw, uirdiyhh siyxdi qapp siyxmue, Suatciux vangwsag simx soxx air :ee, qovutjiongx laii qer hro jit xee kuee kax :ee jyr aursiu. Baiw baiw angx e qra tniawsiyh .be? Hyw snejyr, mia qamxx dikkag dyrr e kiapsir?

Jitt xee qowsu, ix u qac’ir knuar. Cuningx ceh tec lehh kir lap joqimx. Aiwjingg-siyxsuad jox jit vunw aw dngw .kir, ing’amr benw qniax e byy girniu.

Dngw qaur cur, Cuningx puevaux-aw kngr lehh kir jauwkax. Vingsniux ee mngg kuix .kuix, jit xee dniaxquar suacc lag .lyc .laii, kinkinx-kiangkiangx.

“Cuningx ar, liw dngw .laii .ar m?” a’buw an’ vangqingx cud .laii, bagjiux decc srur, kunwbin kunwbin.

“Jex jitt qywguec :ee.” Cuningx an’ puevaux-aw lairdew tec jit log juaxlog-aw .cud .laii. A’buw qra juaxlog-aw duiwauw dre zip kir lakde-aw, zip jauwkax, qongxx beh sa jit nguaw mi hro Cuningx jiac siau’ia.

“Mrbenw lar. Guaw amwdngr jiac jiokk vaw, jitt jun vakdow be iaux.”

“Vingsniux u lxaii-aw, byy, marr u ligdaurtngx. Lingxdongwkor u m’axvingx, lanw qaqi qig :ee.” a’buw sui’ kir kuix vingsniux beh vyr Cuningx knuar.

“Liw kir kunr lar. Air beh jiac sniaw, guaw qaqi erhiauw cue lar.”

Sinkux sew hyw, taujangx ing denrcuex cuex hro dax, Cuningx vreh kiw kir bincngg-dingw, duxjiah jox ee siyxsuad sui' henx kiw laii tak.

Ing’amr liw si guaw ee. Guaw beh qapp liw jniaa jyr jidtew.

Knuar qaxx dng’ suacpah dng’ jingcaiw, tniax diyc cicix-carca, qaxnaxx si tangg decc vee ee sniax. Cuningx qra denrhuew kuix kacc dua pax, dangsi'aw si nng jiah qajuac dirr viah-dingw dngdecc qaubuew.

Tec jit kax cenxtuax qra inx saur .lyc .laii. Nng jiah qajuac siag lyc tokax iauxx siy’ pnai liamm jywhuew. Cuningx sniu kiw diyc jingg:a knuar .quer ee jit qix Zidvunw-pnir, si decc qongw jit jann vutlunn luanjingg. Lorbuexciuw, lamluw juxqag jiac dok jursad, nng langg lamw jywhuew, siw liauxau, sinkux ding kokkog, sen’ vrag dy’ vrag be kuix.

Tec mi’axjuaw qra siw qajuac nrix .kiw .laii danr zip kir bextangw lairdew. Juiw qra cic .lyc, nng jiah qajuac dirr hitt lairbin sehkolinx. Juiw dniardiyc .lyc .laii, qajuac byy .kir, bextangw iurqycc c.-cingkir-k., jit diamw aw lasamm dy’ byy kir uer .diyc.

Hxong Dngw Siu

Tauwjaw, Siongrhaiw ee hniaqyx denrue laii, qongxx cuwjuw hitt vingg u qongw dniardiyc :ar, dyrr qanda’ kaciuw rair kacc qinw, binaxjair ervox jinwjingg, aurciuw jit-vah-bxan diyhh qinw zip siauwho jiacc u junxsngr.

Qycc gua guec jingg, jnii dyrr cuann ven ven decc tingwhau. Rair qnuaxqinw cutmngg vran dairjir, qui’ bin ovanx hosinsaiw byy siyw qexcniaa siage .jit .xe, hen dyrr be qniwjingr .did. Hongrlingg jre dirr sejngdaii taujingg, pongwhunw jit renn tac quer jit renn, hunw narr lag, niauhunn si e jauw cud laii knuar langg.

Ginhangg lairbin jin' kec'ec. Qinaxzit cego, qongsix-hanghy dirr jitt qangx huad sinlyy-ginn :ee jin’ je. Uree beh niaw henrjnii huad, uree didjiab zip qokk langg ee qiawqimpo-aw kacc m qniax uisid. Senditsenx, hiyrdithiy. Bylun dairjir duarser diauu, sui’ langg ciuxtauu jit dniux hyrbexdnuax jiauww lunvan. Hongrlingg kogkok knuar ciuxkuanviyw, danw qaxx be did diyc. Qaur qaxx dairjir longxx cuxliw hyxser, brew mia :ar, diamw vnuar kiamr go hunx!

Taukag hinn, bagjiux bu, het’ab unxdangr iurqycc cringr qaxx vah-veh .kir. Qnuaw nng diamw ee ervovanx, byy qewdingg :ee dikkag be hur. Kia kacc uaw lorvnix, ciuw benw et, ngsig ee sir lenw :ee sui’ sraiw qaur binrtaujingg.

“Unjiang, vaiwtog liw sraiw kacc qinw lehh. Guaw decc qnuaw siqanx.”

Ciax-lai jiokk cingkiwsniur, qycc u gioglanhuex ee pangbi. Jinw m si siongrharvanx iacc siongrharkyr ee sii, narr byy duw diyc angg dingx, jit lo tongtaur. Hongrlingg qra ciatangx vangr .lyc .laii, quwjai hongx jit jun jit jun hrux ix ee bin, hiwlang ix ee taujangsix. Denrdaii dngdecc hongwsangr jit diauu jazz ee quakig, saksfon enxjaur :ee, nngw iyc’iyh, jin' hyw tniax, m jai’ngiaw simxmih miaa kacc kyxsiyh.

“Nng-vah kox hro :liw. Benw jau.”

Qauwui lyc ciax, dnaxx bue hur jiac daur :ar. Lorvnidnar-aw qiamm muee kad .jit .nguaw kuair kuair :ar. Jiac muee kuair iaux, quexjiw kuanw .quaw, ervox iarr tangx vunx dongsu bongxx damrsamw.

“Hongrlingg Jew, jex ongrlaii jiokk dnix :ee.”

“U dnix hnoh? Narr air jiac, jyww linw longxx jiac jiac .kir, benw sewzi.”

Jit lriam ongrlaii ced jyr der, jingwlangg jit cuir suar jit cuir, naxx jiac qycc naxx kaiqangw, qunxciyr.

“Hongrlingg Jew, tewhiux liauxau, liw u anwsngr beh congr sniaw bor?” U langg kiw jit xee tauu anxnix mng kiw.

“Gunw Siongrhaiw ee hniaqyx decc qra guaw vyr, qongxx inx cuwvnix u jit dongr nng janr lxauu aw beh siok siok aw bre. Guaw u liyc aw diak .quer. Dirr hiax cur hag .jit .qingx, sii qaur, tewhiuqimx jah jnia’ vah bxan aw kir, dyrr tangx quer qaxx jiokk sox, jiokk suwsi.”

“Liw u hniaqyx!” giabbu juxzim dairsingx huah cud sniax. “Guaw liahjunw liw qanda’ nng xee siyxdi, liw si linw daux siongrr dua :ee qongxx.”

“Hitt xee si guanw laurve laii Daiuann jinwjingg, qapp hitt vingg ee bow snex :ee. Kiarr qangg ve qycc buw lar.”

“Linw itdit longxx u decc lenlok or?”

“Marr byy,” Hongrlingg hnair tauu. “Qu jrunn .nii, guanw laurbuw-aw quewsinx. Kacc quer, guanw laurve-aw qra guanw snax xee jiaxdi-aw qiyr .kir, qongxx dairliok hitt vingg ix u boxqniaw dilehh, tranr kax iauxx e qniaa, ix beh dngw kir knuar mai.”

Qongw qaur jiax, dag’ee jin’ hnowhenn, qnuaxqinw air beh jai’ngiaw Hongrlingg ee simjingg.

“Jrunn tenliongg qongw, taukixsingx, guaw simqnuax jiokk qankow, qycc marr jiokk siurkir. Guaw krir guanw laurve tacc e muapenr guanw jiacc quw longxx byy qongw. Krir bongxx krir, quibuew iauxx si quttaucinx. Qycjaiww qongw, quewkir jex sir~go-jap nii, narr viw did inx hitt vingg, guanw si qex jiokk hyw quewzit.” Qongw suah, Hongrlingg trow jit kauw kuir.

Ervox siongrvanx :ee, qauw diamr vnuar harvanx. Huerqer byy ingg decc vnuasiaur. Siauwbok dagg diauu laii-cringx-kir-bingg byy vuerbiu, siauwpo quaww henrqimx qapp jit jih ciuxhingg longxx qra siux zip kir vyxhiamxqui lairdew. Ing’amr diyc Hongrlingg dongdit diyhh sryw mngg, lirkuix qongsix ee sii jap diamw tongw, jre qongciax dngw qaur cur, duxduxx jap-id diamw.

Jaboxqniaw kir erqangw cue inx laurve-aw, ehng'amr byy beh dngw laii kunr. Ix qra denrsi jun .kuix. Daurqnuax, dibacqnuax qapp snuai’axqnuax, cur nirr ee siwsiur-aw, ix jit xee langg jit amr jiac qaxx kangx ~ ~.

“Langg' hex byy qewangx :ee, qui’ vnuar siwlangg jyr huerqer junxsii siongrharvanx, iarr m bad tniax ix decc huah qodnuax. Lanw jitt hy decbeh jyr maw :ee dendyww decc qniax byy pnua.” Qecdngw qangx dirr qongsix, Hongrlingg qinw cue langg qongw jit xee aw tauxkuir.

“Siyw lunw lehh dyrr quer .ar. Byy, liw qamxx beh qycc dngw kir qapp langg' qongqex angsair?" Huwliw anxnix qra Hongrlingg koxkngr.

Tauqex ehngx kir ho'ngg cniaw, sinlyy be vnuax haixhuanw, jit quaw air laingg :ee jin tranr jitt jun, byy qongw e qamxqag pacsngw.

“Linw qamxx jaix? Emi jarhngx qapp qangdingsux decc sraiw bagjnir. Dyrr dirr jiax, dirr jingwlangg binrtaujingg!” Giabbu juxzim snia'imx qig qe qe, buah qaxx angg qiwqir ee cuiwdunn ing jit qix ciuw vnuar amx lehh decc qongw.

“Jitmaw ee jaboxginxaw sidjai jiokk byy jit xee kuanw. Ix narr snex dirr guanw daux, guaw jaw jaw dyrr qra rah .dngw .kir, kacc benw ix dirr guarkauw decc siawsiwjniu.” Hongrlingg qongw suah, jin’ je langg longxx qra janwcuir.

Dyctauu ee lahzit siaw qaxx bat bat si, qinaxzit jueww derr id qinxiaur ee dairjir si diamw huewdew. Dirr qongsix druar jap gua dxangx, Hongrlingg ee dnawtauu naxx laii naxx dang, jin’ je hxang kangkuer diyhh ix dimr tauu iacc ciamx zri liauxau, erciuxlangg jiacc e kir jinwhingg. Jiksingg dua, sittauu kiokk si zuxx jyr zuxx jiyw, jit quaw snruar sxid, ix tangx pacpair jorliw dauwkaciuw, mrbenw cincniu ingxquer diyhh ix lyxsinx :ee qaqi cutbew

“Dingw zit aw u tniax diyc tauqex decc ylyw Hongrlingg Jew, qongxx lanw qongsix, dyrr ix siongrr e tokdiong.”

“Ix jyr dairjir jairlaii dy’ jiokk diamxdinn qycc jiokk badjiap. Qycc tauqex ee ue, ix longxx knuar jyr naxx singwjiw, dagg hxang dy’ qra cuxliw qaxx jiokk qauwqag, jiokk jiujir.”

Nng xee siauwlenn :ee sxid naxx jyh, naxx decc kaiqangw.

Nijiongx, qinnii huad jit qywguec. U langg hiamm jiyw, u langg qongw singlixbin jiacc baiw, u dyrr tangx taux ciyr. Hongrlingg dirr qongsix druar kacc quw, m na u jiongxqimx, nii-aw jeh-aw byy sngr, jit nii qycc u jap-go qangx tangx hiyh. Luxhingsia duxjiah u qra kors faks .quer .laii. Vorvinn m bad qnir quer bin ee jiwcinx iacc mirsnuawcinx, tranr jitt jua kir Siongrhaiw, diyhh qapp inx sui’ xee aw sigsai. Jnxiax-guec-sii aw, Vakqniax qnuaa sngwsngr. Beh vreh Bxan Lxiw Dngg Sniaa, Hongrlingg anwsngr tewhiux vnuax kir hitt vingg druar, aurzit aw jiacc jit xui aw jit xui, dauc dauc aw kir iusniuw, cittyy.

“Hongrlingg Jew, zi snuar, liw ee denrue.”

Tniax diyc qongsix ee memex decc hiamr ix ee miaa, ciuxtauu ee kors liaucniaw kngr lehh, Hongrlingg qra denrue giac kiw laii tniax. Nng~snax hunjingx qongw suah, Hongrlingg qui' sinkux lrauu crinr qnua.

“Liw ee binrsig tacc e jiacc pnaiw knuar? Si anwjnuaw, si bor?” Giabbu juxzim siongrr dairsingx huatqenr.

“Inx qongxx… qongxx… Siongrhaiw hitt qingx cur berdangr quewho.” Hongrlingg sinkux banxmic, qongw qaxx qiongg beh byy buew sniax .kir.

“Hitt qingx cur, aurciuw jit-vah-bxan, liw qamxx lap hro inx :ar?” Huerqer mng. 

Hongrlingg byy-ue-byy-qxur, taukag lee lee, bin iux qad qad.

“U qaur iauxsiu. Siyxmue-aw ee jnii iarr beh cimx.” Huwliw qongw qaxx krir cuaccuah.

“Inx m si tiauqangx :ee lar,” Hongrlingg qinw qra inx amoo. “Qiongrsanw :ee, inx ee huatlut qapp lanw byy qangg.”

Liw jit cuir, guaw jit jic, sui' langg sueh hyw ue qra an'uir, qycc longxx qongxx hitt diauu jnii, ix dikkag tyw e dngw .laii. Hongrlingg kogkok dimr tauu, qongxx ix jit sud aw dy’ byy decc huanlyw.

“Liw qinw qra guaw pah jit dniux huelingqipiyr, didjiab vuex Siongrhaiw :ee. Diyhh quewnii jinwjingg. Guaw beh cingxqar laii kir.” Tranr vanrqogsig byy vadd langg dilehh, Hongrlingg qnuaxqinw kar denrue hro luxhingsia :ee.

Siuwhunn Dua :ee

“Dag’ee uaw .laii or. Jiax u hyw liau :ee oox.” Siuwhunn huah.

“Ciaurkyxliw qenngrqyx! Siuwhunn Juxzim, qinaxzit simxmih zit aw?” Qongsix ee memex mng, cuir ciyr bak ciyr.

“Huwliw jarhngx hro tauqex qra sew bin, linw byy langg jaix hnoh? Linw dag’ee kiarr vrng diyc ix ee hokkir. A, qongw langg, langg qaur. Huwliw, guaw ced jit der kacc dua der hro :liw.” Siuwhunn qongw, naxx decc ced qenngrqyx.

“Guaw duxjiacc jiac vaw, jitquw jiac be lyc .kir.” Huwliw iyy tauu, bin-aw crinr crinr.

“Jex uirr liw juanqangx brew :ee ne! Liw jarhngx pnaiw un jiac diyc tauqex ee pongwvniaw. Guaw dyrr sniu qongxx brew jit der qenngrqyx jiacc dnix dnix, hro liw simqnuax kacc kuix. Sniaw kuanw, guaw duiww liw be baiw lar hnoh?” Qongw suah, Siuwhunn sui’ qra qenngrqyx dux qaur langg’ binrtaujingg .kir, byy beh hro langg' qongw m.

Qoxdenw imgak dirr vanrqongsig lairdew decc hongwsangr. Imhiongw sed dirr Siuwhunn surburdyh-aw jniar ciuw vingg, ix ciuw crunx .cud .kir dyrr jun e diyc. Jarhngx si quaqiok, qinaxzit vangr qauhiongxgak, binaxjair qapp au .zit iauxx u se’ngiuu qu quax qapp kinx imgak, sui’ hxang aw cud.

“Siuwhunn Juxzim, jitt diauu qiyr simxmih miaa? Jiokk hyw tniax.” Jorliw siangx ciuw tuh erhaii decc mng.

“Jitt diauu si Bach jiokk u miaa ee hiabjauwkig ne! Lenrr jex liw iarr m jaix or?” Siuwhunn bagjiux denw dua luiw huah cud sniax. “Qongw qaxx linw jitt quaw siauwlenn :ee sidjai jin’ hai. Kacc tniax dy’ hitt quaw liuhingquax-aw, bogquair kiwjid longxx jiacc cax.”

Ciuxqix-aw liangx liangx qiyr, Siuwhunn sui' jriab, qongw qaxx duarbuw sniax, bixbiau ee imgak hro qongxue-sniax kamr .quer.

“Linw anada m?” Siuwhunn denrue qongw suah, u dongsu decc mng.

“Hner a.” Siuwhunn rinr. “Qongxx iurqycc rair qavanx, ehngx byy huatdo dngw cur nirr jiac amr.”

“Linw anada qaxnaxx jiokk jiap decc qavanx. Ix jit qywguec m tanr lecc qui’ jap bxan?”

“Iarr suacc u! Jiacc veh~qauw-bxan aw nia.” Siuwhunn qongw, cuir-aw kiaur ducduh.

“Qacc u veh-bxan marr be baiw :ar. Liw qycc decc hiamm?”

“Dairliok hitt vingg ee igjingr narr u kacc huee, gunw u anwsngr muanii beh suaw kir hiax huatdenw."

"Hnaa! Qamxx hyw? Linw angx qamxx m si dirr jitt qingx druar jiokk quw :ar?"

"Inx hitt xee tauqex, susiongw u bunrdee, kuix cuir hap cuir dy’ qiongrhuiw qiongrhuiw. Dagg qangx decc qra jit xee Daidok aw draur tanr jnii, qenwnarr sniu .diyc dy’ jiokk enwkir.”

"Si qongxx, hitt vingg ee tairgu qamxx u kacc hyw?"

"Liw m hyw qongw .cud .kir, Dairliok u qongsix cud dingvue sinsuiw cniaw gunw tauu:ee kir." Siuwhunn qongw kiw iongkir.

Erdauwvox dng' byy ingg ee sii, Siuwhunn ho’ngg qiyr zip kir tauqex ee vanrqongsig lairdew qongxue. Tauqex jit kunr qongw beh vnuar diamxjingx byy tinghiyh, longxx decc me huwliw hro tniax kacc je.

“Ix dagg qangx dy' tauu jit xee qauwui, siongrr nguar harvanx iarr dniardnia si ix," Siuwhunn ter dongsu qongw hyw ue. "Ix dyrr tuatsnuar, jyr dairjir snesingg kacc lauwcec, kacc be diamxdinn. Guaw vutsii dy’ dirr vnix:a decc qra draur jimjiog. Mrqycc guaw qaqi dairjir marr je, byy huatdo su-su-hxang-hxang qor qaxx diyc.”

Suar .lyc .laii ee vnuar diamxjingx, liammix hnair tauu, liammix dngr dyh-aw, tauqex qra jongxbu juxzim hiamm qaxx byy jit der hyw.

“Hitt qangx guaw sidjai byy ingwqaix cingxqar," Siuwhunn trow dua kuir. "Ix dirr qongsix druar u quw laii qongw, guaw ee kangkuer, m si cinwcaiw langg dyrr erdangr jicciuw :ee.”

Tauqex ciuw hnua dirr Siuwhunn ee qingqactauu, ylyw qongxx qui’ qingx qongsix dyrr ix siongrr jingqongx, ix hnua ee giabbu vxo hro langg' siongrr hongwsimx.

“Narr byy liw decc kanqar, beh nacc u qinaxzit ee Siuwhunn? Guaw narr jinjniar dyc’ui u viw vadd langg kacc jamr, sidjai si guaw u cimx cimx qakgo diyc qongxx, dikkag diyhh taii-pah-cyr qapp liw yc qanghux jiacc si taulo.”

Qongw suah, tauqex tec jit quanr debiw hro Siuwhunn, Dangwdingw :ee, qongxx jit qxinx rair nng~snax-cingx kox.

Vaiwlak, qongsix beh vran buexgee. Quer daur nng diamw tongw, giabbu vxo :ee u sinx pair ee sittauu rair kir jinwhingg, guandew ee kangkuer diyhh jiamrsii kngwhe.

“Mocaiw ee jiongxpinw nacc tangx ing vehsig ee juaw vauhongx? Guaw sidjai e ho’ngg linw krir .siw. Dingg vaux, dingg vaux!” Jit xee jabceaxqangx hro Siuwhunn dng’ bin qra textag.

“Maiku jit qix iarr suacc u qaur? Diyhh qex cuann .jit .qix. Cue byy! Suacc berhiauw qinw kir brew!” Siuwhunn dua sniax qawsi.

“Sniaw? Miadnuax iaxx bue CONFIRM! Linw kaciuw m dyrr kacc sirsua lehh!" Qanda’ cud cuir nia, Siuwhunn qui’ sinkux qnua lrauu dapdih.

Huerqer ciuw tec jit dniux dnuaqur laii decc cue Siuwhunn, qongxx beh mng ix jit diauu siauwbak ee dairjir.

“Kacc danw lehh qamxx bersaiw? Liw byy knuar guaw jitmaw dngdecc byy ingg.” Siuwhunn qongw, byy hyw cuir. 

“Guaw danw si byy iauwqinw. Qniax si qniax dingw:a kacc byy nairsingr, danw quw e samjiauhuew dua.” Huerqer qongw.

“Tauqex beh mng :ee! Liw m dyrr kacc jaw qongw lehh.”

Huerqer qra siauwdnuax dux hro ix knuar, mng ix qongxx buexgee ee cniaxtiab, qamxx si ix huanhur langg' tec kir qiar :ee.

“Hner a. Anwjnuaxngiu aw, si bor?”

“Dingw:a decc byy hnuahiw, qongxx tiab-aw si anwjnuaw diyhh qiar qaxx quawhy, bycaiw jnii.”

Tniax liauxau, Siuwhunn bin liksig, hiamr langg qiyr qiar puex ee memex laii duiwjiw. Memex gang gang m jaix vnuar hxang, qanda’ qongw si Siuwhunn Juxzim qaudair :ee.

“Liw decc hambinn! Guaw bingbingg qiyr liw qiar kuaiwsinr. Kuaiwsinr jiacc jap-zi kox, quawhy diyh’air zxic-go. Ovec laii! Kraur liw ee sinsuiw diw.”

Memex cuir decc cuah, sinkux decc junr, jauw cud kir guarkauw, bagsaiw naxx decc lrauu.

“Dongcox guaw dyrr u qra liw qongw .quer, qongxx jitt xee jaboxginxaw berdangr caixiong. Liw dyrr qan’ qan’ aw m tniax guaw ee cuir.” Siuwhunn qra jongxbu juxzim og.

“Liw nacc qongw jitt kuanw gengiw! Dnaxx ix laii beh vnuar dxangx :ar, langg longxx marr liw decc cesaiw kacc je.” Jongxbu juxzim qra had dywdngw.

“Acc liw jitmaw m dyrr qongw guaw hamban cua langg m? Jyww liw kir qra tauqex dauu lar. Jiax ee langg byy decc qniax.”

“Liw jyww liw hongwsimx. Tauqex knuar lanw quiw qxinx dang, gunw qaqi sir niuw ngxaw u druu lar. Dyrr byy decc gam tauu gam bin qyc, qaqi jauw kir hur siw.”

Duxdag qaur jiax, sianghongx cuir diam .kir. Siy’ ruanx siy’ jner, jit qangx siuh .jit .xe iurqycc quer :ar. Surburdyh-dingw ee mihqnia kingg kingg kuanw kuanw lehh, Siuwhunn ee ciuxqix-aw qiyr be suah. Mrbenw jriab. Jitt xee sii, unxdangr si angsair kar :ee be dingdnaa.

“Hitt jriw kecho miadnuax, diyhh qinw kir kopi jit hxun kiw .laii.”

“Anxnix qamxx hyw? Qaxnaxx decc jyr cat-aw lehh.”

“Luan luan qongw! Simxmic decc jyr cat-aw! Lanw si decc sniu vo beh ter qongsix tanr jnii.”

Beh harvanx jinwjingg, Siuwhunn qra ix erciuw :ee qiyr .laii, amr amr aw decc qar ix jit quaw vorsor.

“Jiacc ban .diyc. Liw si decc syy sniaw?” Angsair bin caur caur, ciuw kuar dirr handolu.

“Liw liahjunw jitt qingx qongsix linw bow kuix :ee, air beh harvanx sui' erdangr jauw?" Siuwhunn iarr byy hyw sniasaur. "Guaw qui’ zit diyhh qapp hitt quaw langg ciavnuaa, dagg qangx dy’ tiamw qaxx beh hai .siw, byy decc hyw juanxjiac!”

“Beh qiyr langg' danw, ciuxqix-aw dy’ ven ven, berhiangw kar .jit .xe, si bor?”

“Jit quer vnuar quer siyw danw .jit .xe, si e qaur dyc’ui? Liw benw dirr hiax qikkangx. Guaw si be hro liw pnaiw sngw :ee.”

Trow jit xee kuir, ciax huatdong, Siuwhunn ee angsair byy qycc inwcuir.

Lacvah ee sniax, qautongx qingxcad ee vi’aw-sniax, ciax vaii qui’ jua be-dinx.-be-dang. Jitt xee sii, Hyvingg Dangx Lo dingxquann byy qaiww vinghyy.

“Liw dyrr hiauhuex lar. Qiyr liw qniaa Zin’air Lo, liw dy' m. Ar, beh qycc angg dingx :ar. Kacc qinw, kacc qinw. Ar, siyw danw, siyw danw. Aurviah u…”

Dongxaw qrix jit sniax, langg ee sniax qyckacc jiamx marr vniar ix be ngiaa. Siuwhunn krir putpud, ciamngg sag .kuix, dairsingx jongg .lyc .kir.

“Liw qongw hex uso :ee! Simxmih decc gunw qra liw longr. Si liw qaqi cnex-vrong-vec-vrong uaw .laii .ee. Beh siy’ qryr? Laii :ar, qniax :liw. Langg ar, liw catauu or, berhiauw lyc .laii, si m?” Siuwhunn siangx ciuw cacqyh kia dirr lording’ngx, dua sniax suanziongw decc hiamr inx javolangg.

Lerjingx ee Suanxdee

1.Daiuanlangg

2.Diongqoklangg

3.Daiuanlangg qapp Diongqoklangg

Jarhngx harvanx, Lerjingx dirr jit xee qelo-vnix danw cnix dingx, u jit din hagsingx cing qam'ngg ee qac’aw, qnir diyc quewlorlangg dyrr uaw .kir, rair langg' dirr snax xee suanxhang lairdew qingw jit xee.

Ho’ngg mng .diyc ee sii, Lerjingx liyc aw diuduu, liauxau, dyrr ing ciuxjingxtauu-aw viw jit xee sowbak. Dngw qaur cur, zuxx sniu zuxx m driyc. Si anwjnuaw m driyc, ix qycc iarr qongw byy lo laii.

“Tauqex, vngruann jit liap, daurlingx jit vxuex, lalunn aw siyx.”

Snaqaktangx jit qingx daurlingx-dxiamr, Lerjingx kavo qniaa qaur jiax dongwdiam. Jiokk quw byy laii qra qauquanx :ar. Jitt dnar bre daurlingx :ee, jurr Lerjingx jyr ginxaw ee sii kuix qaur dnaxx. Hitt jun aw ee diamwtauqex si jit xee lau obasang. Obasang kaciuw jiokk liuxliac, dedvet si vaux vngruann ee sokdo, tangx qongw sewqair qinw :ee. Obasang vacnii lau .kir, jinw diyc inx jaboxsunx-aw decc hnua. Daurlingx ee kiwbi guanjai, jingcax jiahsit qex jiokk je kuanw .cud .laii. Bacvaux, banxtyy, qycc u sanuici qapp angg dee.

Jaxdngr kngr dirr surburdyh-dingw. Lerjingx bagjiux kreh kreh, siangx ciuw sna' cew. U .jit .quw .aw, bagjiux vreh qimx, qorr sucqongw suh jit cuir aw daurlingx, Ingbunn vywjuaw qra henx .kuix.

Juankyx cutgiap, Ingbunn qaqi minua dryy, id~zi-jap nii longxx byy jihjam. Vormngg ee jorliw jit dxuix dairhagsingx, lun kiw diyc Ingbunn ee tingdo, Lerjingx byy kacc sux :inx, qansiap diyc juangiap :ee, qyckacc si ngiaa inx tiamw tiamw. Sir-jap gua huer langg, cingrcah qapp cur nirr nng xee siauwlenn ginxaw qangrkuanw, T-SHIRT qapp gu’axkor longx lehh dyrr cutmngg. Qongsix ee sinjinr jit~vnuar xee aw kamr tauu kamr bin :ee, liahjunw ix qongsix vniawsaur :ee, qycc suacc cepair ix kir tinn dee.

“Tauqex narr jai’ngiaw liw beh kir jurhue, bin'axjair berdangr qavanx, unxdangr e qycc kiw singwde.”Jongxbu juxzim qongw, bin-aw iux iux, bagtauu qad qad.

“Dag’ee jiauww prinw diyhh jiauww qniaa,” Lerjingx duiwcuir rinr. “Vaiwlak tauwjaw laii qra jyr benw jnii qangx, vaiwgo-amr snesingg rair vangr guaw juriuu.”

“Tauqex dingw zit aw jiacc decc qongw, qongxx liw jit simx qor junn, jit simx qor jai, jitt jua dngw kir Dairliok tamwcinx, qongxx syxsii qapp inwsinr, ix beh qaudair vadd langg, byy beh qaux :liw.”

“Anxnix siongrqaiww hyw. Guaw tanr diyc cing’ingg.”

Jongxbu juxzim u cuir qongw qaxx byy nxua iarr byy Lerjingx ee hxuad.

“Lanw jiax ee langg, juixjunw urngiaw kacc qe, u hyw m bad vyw, qanda’ air beh siok narnia.” Vaiwsir ervox, juxquanw qxib :ee qowding kuix hue, giabbu juxzim decc qongw kiw.

“Si m si, me qaqi, huansu diyhh singx jursingw. Huanrser jurr tauu qaur buew dyrr si suantuann jyr byy qraur, iacc si byy qrongx driyc vorui.” Lerjingx lunrven sraiw ausniax, bin vnir suatsuad.

“Qongw dyrr qongw, nacc diyhh anxnix og kiagkiak?" giabbu juxzim iarr byy decc nngw. "Liw si kir jiac diyc cingwiyc, si bor? Honghuew jiacc dua!" 

Inx nng xee langg jre siy’ duiwbin, ox zinn duiww vec zinn. Jre dirr inx vnix:a :ee tauu cih cih, dua kuir dy’ m qnaw cuanw jit xee.

“Ix bingqii jaix guaw jiacc ciuxsut, qycc diau’iwqor qongw hex ue decc gik .guaw!” Huergi suah, Lerjingx duiww huerer qongw tauxkuir.

“Knuar kacc huar lehh lar. Ix haixkauw lrai qycc gauu vniwkangx, dycc jit qangx dirr tauqex binrjingg cinwcaiw vuanx .nng .qxur qra liw jraur pnaiw ue, anwjnuaw siw :ee, sii qaur liw qaqi dy’ m jaix.” Huerqer qra Lerjingx kuanxkngr.

Byy ingg qui' qangx, dairjir iauxx qui’ snuapniaa tingwhau Lerjingx sui’ hxang aw kir cuxliw. Jitt xee beh duiwsiaur, hitt xee beh mng qewqeh, jorliw decc danw ix ee ciamdnuax, tauqex qnuaw beh tniax ix ee qewue.

“Caiwtngx tng tng lehh dyrr tingwhyw jiac :ar. Denrqyx ee cactauu rair e qir did vuec .lyc .laii. Jiac vaw, nguaw rair sew sew .kiw .laii.” Tranr jit xee langwpang, Lerjingx qinw qra jaboxqniaw kar jit xee denrue.

“Liw duarser simx, dagg vaiw dy’ qiyr guaw sew, didix dagg hxang longxx benw jyr!”

“Iarr suacc urngiaw! Langg' hex tokax longxx ix decc lux.”

“Dnaxx tokax iarr mrbenw dagg qangx lux.”

“Mair jiacc gauu kinghunx lar. Ix qycc nng qywguec dyrr beh kyw dairhak :ar. Liw jyr langg’ jejex, m jaix diyhh tniar siyxdi-aw, si bor?”

Decc qnuaw sxid, jitt lexvair cavutdyx dagg qangx longxx rair qavanx. Lerjingx cud jnii cniaw dag’ee jiac amr. Hyw dauwdin iacc pnaiw dauwdin :ee, kinqangx iacc vindnua :ee, hyw uirkauw iacc pnaiw cuiwdauw :ee, ix longxjongw cniaw.

“Qongsix ee venrdongx narr u tangx jiacc hyw jiac m jnia’ hyw.” Vng naxx jiac, jongxbu juxzim ee jorliw bongxx qongw jit xe aw siautauw.

Zidjiw jit qangx quer jit qangx, qinaxzit quer liauw ngua mi'axjair, sittauu ingxuanw jyr be uann, kangkuer kacc anwjnuaw dy’ liaurliw be jin. Lerjingx ham' jit xee guarsiongx decc ciauu cuthuer ee dairjir, denrue qongw iauxx bue suah, jorliw dux jit dniux zirjuaw kngr dirr ix dyh-dingw. Tauqex duxjiacc zip .laii, qongxx sui’ beh cue Lerjingx miiting.

“Tniax qongxx, u langg decc hiamm qongsix qiyr ee venrdongx pnaiw jiac, qycc sag liw laii qra guaw tyw, qiyr guaw jnii dnraw :inx, inx qokk langg qaqi beh huadlyc. Qamxx u jitt hy dairjir?”

Lerjingx dangxhniah diyc cneqniax. Jarhngx, jit qxur ue cuir drang cuir qongw :ee, vywbew-aw sui' dyrr ue je.

“Jitmaw ee sinlyy sidjai jiokk m jaix hyw baiw. Sniu’ qexsiauw, longxx qra guaw dngw kir jiac qaqi. Qycc liw jyr juxquanw :ee hro erciuw :ee tuax lecc qniaa, anxnix qamxx u jit xee kuanw?” Tauqex qongxue naxx decc vangr paur-aw longxx byy tingg, byy tangx hro Lerjingx vuexhue qaxx jit qxur.

Nii dnaxx quer, guansiau’ngii marr jiac .ar, u langg decc mng qongxx Zi-guec zxic-veh qamxx diyhh siongrvanx.

“228, qnuatniax dyrr u qongw si qawzit, dniardiyc rair hro langg' hiyckunr.” Jongxbu vxo ee jorliw anxnix qongw.

“Tauqex u qaudair, qongxx beh hiyh, au qywguec diyhh cue jit qangx jyr hingg :ix.” Jongxbu juxzim tuann singwjiw.

“Qacc anxnix, guaw lingkyw hitt qangx laii siongrvanx kacc dit.” Giabbu vxo ee jorliw qongw.

“Dyrr driyc m. Hiyh qaxx simxmih 228 .kir? Krismas dy’ byy hiyh :ar!” Giabbu juxzim qongw.

“Knuar beh anwjnuaw, dag’ee diyhh singx tywgi, m tangx jit langg juxir jit kuanw. Dingw:a narr kixmox baiw, tranr qihue qra lanw hoklirqimx siux siux .dngw .kir, hex dyrr urngiaw kiwdyr liauw.” Huerqer qongw.

“Guaw knuar, lanw qokk langg kacc zinrhun lehh. Qinnii ee qawzit dyrr iauxx jiokk je, byy cax qaxx hex jit qangx.” Lerjingx qongw suah, u langg dua dua qra janwcuir, marr u langg crinr tauu crinr bin. Jongw .si, byy qaxx jit xee u cud sniax giaa gnirqyx.

Jitt quiw zit aw, hormngx aw dabdap dih. Qimjaw kiw .laii, cun’imx cun’imx, byy qinw tac jit niaw snxax qycc damrvyc aw e dangr. Snaaxduu kuix .kuix, Lerjingx kia dirr hex taujingg siongr qui’ vox. Lairdew jit sxux osig ee snaaxqunn, jaboxqniaw qurnii sangr ix :ee, taubuew ix jiacc cing quer jit vaiw.

“Qinaxzit qaxnaxx liangg liangg :a. Cing jitt sxux duxduxx hyw.”

Byy diuduu, Lerjingx sui’ qra snxax cniaw .cud .laii.

Viw dirr vingsor sii, qinaxzit tauwjaw, lo nirr qex jiokk lingxcingx, langg qapp ciax longxx qex jiokk jiyw. Qaur qongsix, horziax siux hyxser, jid’err uat tauu, knuar diyc tauqex cuir bih bih, nng luiw bagjiux grinn ror ror.

“228 qiyr linw siongrvanx, liw dyrr qui’ sinkux cing qaxx ox mawmar laii. Liw qiycsirr liw qaqi jnia’ gauu m, tiau'ir vnir jitt cud beh laii hro guaw gingg!”

Tauqex kuisiwdniuu me, dua kuir be hur cuanw, am’axqinx jiauu puu .cud .laii. Jingwlangg tniax diyc sniax qinw jongg uaw .laii. Giabbu juxzim qra tauqex cah kir iw nirr jre, qycc huanhur jongxbu juxzim qra tauqex tinn jit vxuex dee.

“Liw qinw dngw kir ngua jit sxux snxax jiacqycc laii.” Huerqer dirr Lerjingx hnirkangx-vnix taux diamxduh.

H.-hiongqongg.-q, horsnuar byy giaa dyrr jauw .cud .laii. Guarkauw, ho dng’ cox. Ho puah dirr bin, bagsaiw camx horjuiw, siyx :ee traur lingw :ee lam lam jyr jidhuew.

Duiwbin ee ding’axkax u jit din hagsingginxaw tac qam'ngg ee qac’aw decc bicho. Lerjingx knuax knuax aw qniaa uaw .kir. Jingxtauu-aw rair viw quiw qix, jitt vaiw, ix be qycjaiww u giliam.

III

1. Sangwdnia

Snax-janr-kiw ee tauwtnicur, Jux .Qrax ee jauwkax sed dirr laukax uaw aurbinrmngg, dngdux :ee, jauwkangx qapp vingsniux siy’ duiwsiongr, caiwdiamx qapp caiwduu-aw diamr siangx vingg vnix, juixjyy ee duiwbin juann qrngx-aw-angr-dxang. Snax xee jaboxlangg kia qui’ vaii, jit xee sew, jit xee ced, jit xee juw. Dog suanwvan ee sniax naxx huesniu decc pah kok; jensii ler diyc jendniaw e cnihcnic-cnarcna; juixdyrjuiw marr laii decc draur laurzet, cewcer qiyr, liyc aw u singg punwjuixdii.

“Kia kacc vnix:a .kir, guaw beh quer.” Duarhanr sinvu Siuwhui ciuw moh jit vaux biw. Cunx :ee hitt nng xee jid’err tniax .diyc, sui’ suaw jit xee xui niu ix quer.

“A’jew, liw u hxuad tihh .byy? Diyh’air guaw dauwsnaqang bor?” Sewii-aw Sowkingx hyxlew aw qra mng.

“Benw. Liw ciuxtauu ee kangkuer qinw jyr, iauxx jit jiah qxex rair dog.”

“A’syw, qniubuw byy :ar, cur-lai qanda’ cunx jit quaw jniw qniux. Hitt buew vehcniux, lanw qinaxzit qorr jenx :ee, mair iong cruex :ee, ersaiw bor?” Tingwhau Siuwhui qra qui’ vaux biw dryr zip kir bixangr, sewhanr sinvu Bixhuaa kuix cuir qra mng, snia'imx e junr.

“Dirsii qra liw qongw beh iong cruex :ee? Vehcniux vunxjniaa diyh’air iong jenx :ee, kiw dniaw kngr druar iyjixvnuaa, dingxquann jiacqycc samr quaw hojiyx. Jurr kacc jaw lanw dy’ longxx anxnix liaurliw.”

“Mrqycc, liw dingw zit aw huanhur qongxx hii rair qorr cruex :ee.”

“Diyhh knuawkuanw hii a! Qycc liw narr beh cruex m dyrr liong kacc jaw. Jinw longxx beh uaw draur :ar. Byy iong jenx :ee beh tacc e hur?” Duarmw qra siyxjimw pnaiw sniasaur. Bixhuaa binrsig amwdam, exqapqab byy inwcuir.

“A’jew qongw kiw jin’ driyc,” Sowkingx janwsniax. “Urngiaw diyhh knuawkuanw hii liaurliw lar.”

“Liw u beh juw knuar mai .byy?” Bixhuaa mng Sowkingx. “Jitt xee jauwkangx guaw hnua beh qui’ dxangx :ar. Ngua langg juxjiac, ngua cuir ngua cuir, dag’ee ingwqaix e jiokk hnuahiw.”

“Qiyr guaw! Hex nacc tangx?” Sowkingx bagjiux tenw dua luiw. “Jabow lau :ee ixjaw bad qongw .quer, qongxx guaw dirr jauwkax dauwkaciuw, u si giac kau’aw qapp caiwdyx; acc narr haurkag-aw qapp jensii, ix qiyr guaw longxx mair bongx.”

“Dycc jit zit guaw narr puawvne, dyw dirr bincngg byy jaidiau vreh kiw laii juw, lanw qui’ qehuew-aw m diyh’air gy dxngg gy dow?” Bixhuaa tee cud gibun.

“Linw nng xee benw dirr hiax dapcuiwqow!” Siuwhui jac inx ee uertauu. “Danw sinniuu-aw crua zip mngg, snax dxngr si’angw juw jiacqycc laii ciauu iarr suacc berhiangw?”

“Ix jiacc siauwlenn, qycc si tak qaur dairhak :ee, qamxx erhiauw juw?” Sowkingx bagtauu kiycqingw.

“Berhiangw juw marr diyhh yc juw.” Siuwhui diaur quann sniax. “Byy jaidiau kuanw jit dxngr aw ho'ngg damrsamw, ix qnaw zip langg mngg, juer langg ee simvu?”

Jauwkax duarjaur cawcar qiyr, cicix qunw, huexjic pongrpong dyc. Langkectniax jiangwsii iarr laurzet ciccih, dua pax denrhuew iarr jongw kuix. Tenqauw narr qingw jitt diap jiac zit, dirr tniatauu :ee qnaxx byy langg e diwqag.

“Linw laii knuar ix ee hnirjux, jiacc dua der .diyc; qycc jex jit siangx ciuw, vec pauh pauh, iur qaxx naxx dxuan, hunbingg dyrr hyw miardew :ee.” Dua-mw qra Giogqiaux ee ciuxqud vingw quer laii qycc vingw quer kir.

“Mia hyw-baiw, tnix cuivaii. Ceh gauu tak, dyrr jinjniar qaqi ee vunxdingw.” Snax-jimw suar ix ee uerbuew. “Langg’ ix jid’err cutgiap dyrr kir kyw ludsux, cingcingx jit vaiw dyrr diauu :ar.”

“Urngiaw or!" dua-mw huad cud sniax. "Hex ludsuvaii qik pnaiw kyw :ee ne! Tniax qongxx uree langg quixlyrr jap vaiw marr decc kyw.”

“Dyrr si anxnix decc gauu m.” Snax-jimw qongw.

“Qongw diyc ludsux, guaw jiacc sniu .diyc. Guanw qecviah inx hitt qingx vnuawlauu-aw jitt jam aw beh huanqair. Guanw nng hxo diongx:a qurdew u jit jua qau’amm junw qecqair. Inx jinw suacc qra tun .kiw .laii qongxx hitt der de inx ee.” Dua-mw qongw, qiongbeh kixsingr.

“Tacc u langg jiacc hnuaii .diyc?” Duarniuqox cud sniax ter dua-mw vutvingg. “Giogqiaux, jex liw lairhangg :ee. Liw knuar lanw rair anwjnuaw laii tyxvnii?”

“Beh qniaa huatngi diyh’air u-vin.-u-qur. Dua-mw liw narr sinwiong :guaw, au jua liw qra derqidnuax jah .laii. Guaw tangx tec dngw laii genxqiur knuar mai.” Giogqiaux huntiah hro inx tniax, qongw kiw vutjiw vnevang.

“Qaqirlangg, beh nacc u hitt hy be sinwiong?” Dua-mw qongw qaxx cuir ciyr bak ciyr. “Guaw kacc danw dyrr laii kar denrue, qiyr guanw haursnex qra derker qapp cuwker longxx tec .laii.”

“Lanw Jux .Qrax juer-jik.-juer-dig crua diyc hyw simvu, vadd zit aw narr qapp langg’ siy’ qryr longxx benw cuann vunw.” Duarniuqox qongw jit xee vnuar simsig. Jingwlangg ciyr qaxx huarhua qiyr.

“Decbeh juw sik :ar. Dag’ee qycc lunw .jit .xe.” Siuwhui an’ cur-au qniaa .laii.

“Benw qnuaxqinw lar, vakdow iauxx byy jin’ iaux.” Snax-jimw ter dag’ee rinr. 

“Guaw knuar liw qui’ jaxkiw jongg cud jongg zip, liammix tniatauu, liammix jauwkax. Liw duarhanr simvu, sittauu diyhh vangr hro siyxjimw qapp siyxqequanr. Linw dua kauw jaur. Narr dagg hxang jiauu beh kiyh laii jyr, liw e tiamw .siw.” Dua-mw vangr vo.

“Byy qongw, a'mw liw dy’ m jaix. M si lanw decc hingr cab. Inx nng xee dy’ jiokk be qaudiong .did, sen’ qar dy’ qar be e. Sngr lanw lylok jxer bue muaw, guaw narr byy kacc unkunn, kacc qutlat kir srunn tauu qor buew, inx qinw qinw marr cud dairjir.” Qongw suah, Siuwhui trow duarkuir.

“Guaw duxjiah an’ jauwkax quer, u tniax diyc linw decc girlun qongxx simxmic diyc liw juw, diyc ix juw lor.” Snax-jimw jin’ hnowsusiong.

“Acc dyrr u langg decc tee qongxx, danw guanw banx jimw aw zip mngg, diyhh ngua langg juw.” Siuwhui suecbingg.

“Inx tacc jiacc gauu kinghunx?” dua-mw kiw singwde. “Giogqiaux dyrr tagceclangg lar, lingrzit aw huanrser qycc e qaqi kuigiap. Dangsai-aw-dai, dag’ee diyhh kacc horsiongx lehh.”

“A'mw, liw qawsi lar driyc. Guaw marr si anxnix sniu.” Siuwhui qongw.

“Vnivnii Jux .Qrax ee simvu, byy qapp dag’ee lunkaux, guaw qniax kacc be quer did langg' cuir.” Giogqiaux pnaixser ~.

“Benw huanlyw hex lar. Sii qaur liw narr jniasit byy huatdo, guaw jiacc jyr liw ee tewciuw.” Siuwhui ciyr ciyr aw qongw.

“Qamxx tangx? Guaw qer .laii byy dauwjah, dendyww hro dua-syw liw qex byy ingg.”

“Cur nirr sittauu si jiongnii-tangwtnix :ee, guaw jyr quanwsir :ar, byy cax qaxx hiaxee snuaw sxid.”

Siuwhui bunw bunw aw ciyr. Tniatauu jit qex dnuadnuangii.

Jiahvngrtniax jit der siwqakdyh-aw. Sowkingx qra auw dirr lairdew ee dycvingg crunx dit, sir vingg jongw congr hyxser, jurr anxnix venr jit der dua ngii dyh. Ix qra jit der juixangg u quaww ciux ee dyc'uii tenw .kuix crux dirr dyh-aw binrdingw. Qoxiw jit jiah jit jiah vaii vaii hro jejingw kongx jit linr.

“Syw :a, qinaxzit hro linw jiokk jnia’ sinkow.” Dyh-dingw iauxx kiamr nng hur nguaxdi, Giogqiaux jiangwsii uaw laii decc tamwtauu siyjiycmng.

“Qiyr guaw Sowkingx lar,” naxx qongw, Sowkingx naxx an’ dirlang liux sir qix cadi .cud .laii. “Guanw a’jew, liw jiacc tangx ixx hniasyw qra cinghox.”

“Linw dirr jauwkax juw qaxx pangx qongwqongr. Guaw dirr guarkauw hng hng dyrr u pnri .diyc. Linw juann jongxpowsaix, longxx gauu juxjiac. Aurzit aw guaw rair kacc jiap ham' linw yc qanghux.”

“Hex qapp guaw byy dirdai. Langg m si guaw taii :ee.”

“Hnaa?” Giogqiaux bagtauu qad qad, sax byy buxbak.

“Lanw dyrr jngkax cutsinx :ee lar. Langg’ inx docirlangg, erqangw-cair jiac be qaccuir.”

“Si or!” Giogqiaux qamxqag gairgiyc ~. “Acc jinw m dyrr dua-syw qapp zi-syw decc lunn?”

“A’jew ix jiokk quw byy hnua dniaw :ar. Jitmaw dna’ lauxzi :ee decc juw.” Sowkingx qongw, naxx decc qra hiaux hiaux ee dycqunn diyh diyh hro vnii. 

“Anxnex marr driyc. Cur nirr qacc u kaciuw, sittauu vangr hro siyxjimw, ix qaqi dyrr tangx kacc cing’ingg.”

“A’mue-aw liw urngiaw jiokk qoxir, jiokk diaudit,” Sowkingx vnuar suansew. “Langg’ ix si hingr juw qaxx or, kow byy qra lanw jiauu longxx qnuaw qnuaw .cud .kir, jauwkax ix tangx qui’ee jangxtauu.”

“Ix air juw, si anwjnuaw longxx byy decc juw? Qamxx si zi-syw qapp ix decc siy' jnex?” Giogqiaux iyh.

Sowkingx hnair tauu. “Suacc m jaix jabow lau :ee bad hiamm guanw jew :a juw sniu’ qiamm sniu’ hiamx, qycc qongw jauwkax narr hro hnua, duarser hanr sui’ xee aw rair kir sew iyjiw. Qisit, ix si qniax guanw a’jew pnaiw ciuxziauw, e amtamx cair-jnii. Jitt jann, cur-lai :ee liw .jaix .jaix, guaw .jaix .jaix, jingcax dag’ee sna' duar .diyc byy qongw puar narnia.” Sowkingx qongw qaxx jiokk quanwcuanr. Giogqiaux zuxx tniax zuxx qniagii.

Siqanx jad qaxx jiokk junw. Duartniax ee tiaurjingx, jingtuii jap-zi sniax qongr iauxx bue jidvnuar, dirr jauwkax juxjiac :ee laii decc cniaw langkeh kir jiahvngrtniax. Byy cincniu guarkauw vanrdyh sui’ nguaw cud, cur nirr enwkeh, jongw kuanw hyxser jiacc u qiyr langg' laii jerdyh. Jit der ngii dyh-aw be ser der, iuguann vaii qaxx beh berdid lyc. Jit dniaw tngx marr iauxx dirr jaur-dingw byy pangg .cud .laii.

Quawcair camx quaw qangziaujux kanqnix, dua-mw qongw jitt cud u singg cantniax ee liaurliw. Hezinn qapp iujiahquew dog qaxx cruir sapsab, bersux decc qauh zunrvniaw, velecaiwngiw-aw junw zunrvniaxpuee, snax-jimw ylyw janw, jitt qauh suar jit qauh. Lingxvnuaa cai dirr diong’ngx, vylecaiwsix jyr caiwdew, linghee pruex pnir dirr binrdingw lramm maionez; ziuhii kiuu kiuu u quer liyy, beh jiac diyhh unr suanwziongg-dauriuu. Cnihipnir caiwci-aw brew ven :ee, qah quaw caiwtausix unr uasabi, duarniuqox viw duartaubuw, naxx vro naxx decc lrauu bag’iuu, cuir-aw ciyr birsi. Vehcniux angsiyx :ee, sngqamx aw sngqamx jingwlangg air, dogdok Siuwhui, jit cuir dy’ byy pangdniuu. Siuwhui jairlaii duiww bah kacc hingr. Pakcair juw samjann, ix qra bah qingw kir puer; jit vnuaa vehsaqex, tauu qniwbin, tuiw gneh qinw qinw, qesit naxx cngw, bagjiux siongr duiww buexjuix .kir. Sowkingx jre dirr Siuwhui vnix:a, qanda’ qor vex vng, di hranw did cutmngg. Qajair binrtaujingg u jit vnuaa hueqi’uann qapp linghongrtuiw, jniwlo :ee, zip vakdow dyrr vaxlaa :ar. Vaurhii hniuqox qxex byy jnriu dyh. Narr u langg tyw beh limx tngx, Bixhuaa sui’ kir jauwkax kad. Jitt bi :ee qongxx e voxvii, tngx cringx cringx, u limx :ee longxx ylyw qaxx e dakjic.

Jiac vng vaw, jit langg jit nguaw dnitngx, iajiw saiqokbixngii, jiac liangg :ee. Dyh-dingw qycc u ojinjux lenxbu, jit liap jit liap kig hyw hyw. Marr u ngiutyy qapp navuat, dingxquann samw qamcyxhunw, beh jiac diyhh iong ciamw-aw ciamw.

Byy draur juw, Giogqiaux u draur siux nguaxvnuaa. Dac zip jauwkax, Giogqiaux knuar diyc lairdew ee langg tauu kix kix dngdecc lur jauwhiac, hingngiaw jiokk sanxsyh.

“Zi… Jiycmng. Jiaxee tngsii-aw beh kngr dyc’ui kacc hyw?” Jit sniax zi-syw, Giogqiaux hionghiongg qiyr be cud cuir.

“Cinwcaiw kngr druar juixjyy-aw dyrr ersaih,” Bixhuaa qongw ee sii qycc iong ciuw qiw. “Liw qaxnaxx longxx byy sniaw jiac .diyc. Guanw juw ee cair kacc be cnixcuir hnoh? ”

“Guaw jiac u qraur je neh!” Giogqiaux qinw vuexhue. “Sidjai guaw diyh’air kniurcuir jiacc driyc. Duarcua hitt qangx ee snxax longxx kuanw hyw :ar. Sii qaur narr venr duarkox cing be lyc, snxax sui’ niaw aw qycc diyhh qaiw, hex dyrr huiwkir lor. Liw hiamm guaw jiac sniu’ jiyw. Qisit guaw u juwir .diyc, dagg hxang cair, liw qaqi marr qanda’ gnec jit vaiw.”

“Guandew guaw dy’ kacc siyw jiac. Cair guaw juw :ee. Juw liauw pnaiw jiac, langkeh pnaixser qongw, lanw qaqi diyhh jai’ngiaw qiamjniaw.”

“Duxjiah u tniax Sowkingx Jew decc qongw, qongxx lanw cur nirr longxx jiac kacc jniaw.”

“Sowkingx? Ix qycc u qra liw qongw sniaw?” Bixhuaa hyxlew aw qra mng. Giogqiaux liyc aw diuduu .jit .xe, iyy tauu qra rinr “byy”.

“Jarhngx jyhzit aw u tniax diyc a’syw qapp Sowkingx decc liam, qongw linw dniarvniaw jiac sniu’ je xee.” Bixhuaa qongw, naxx decc sew zriuu dycvor.

“Guaw ee cinjniaa ving’iuw je qaxnaxx snuax, guanw laurve laurbuw qycc qanda’ snex guaw jit xee jaboxqniaw.” Giogqiaux qongw diyc jiokk qikdong.

“Liw singx mair siurkir. Hiaxee ue huanrser si inx cuir drang cuir qongw :ee, kingsit byy pnaiw ir.” Bixhuaa qinw qra andah. “Dua-syw qer laii kacc quw, qoxjaw ee dairjir lanw kacc m jaix. Acc narr Sowkingx, guaw bad tniax guanw tauu:ee decc qongw, qongxx inx hitt vingg duardnia qapp siyxdnia longxx u siux, go-jap-bxan jauw be kir. Vnuadnar marr byy srid inx ee lew. Dikax, lenhii, haixsimx, qetvniaw, jap-zi hxang cuann qaxx jiauu ~ ~. Linw jit koginn dy’ byy tec, vniaw qra inx qex jiac .quiw .ac, jex marr zip-jxingg-zip-lriw.”

“Zi-syw, liw tangx qra guaw qongw bor? Dngcuesii, liw lexvniaw qapp ah’axvniaw longxjongw jiac quiw xee, pingwqimx qra inx tec zuarr je?” Giogqiaux ser aw sniax mng.

"Guaw lexvniaw qra inx jiac kacc byy go-jap xee, ah’axvniaw qyckacc jiyw, jiacc zi~snax-jap ac punr punr. Dingrhunx hitt qangx, jap-bxan veh-bxan iwsur iwusr qra lanw decdnia. Beh qethunx ee sii, guaw qewjngx si qah qui’ kacciax.”

Caqiac ee sniax kihkickogkok an’ jauwkax jiax uaw .laii. Bixhuaa ue qongw bue suah dyrr diam .kir, banw jit xee srinx qinw qycc cue dairjir byy ingg.

“Kngr be lyc oox. Gne jnrix .zip .kir, mngg marr qnuaix be uaw.” Vingsniumngg kuix .kuix, Sowkingx jiax siongr hiax siongr.

“Qycc suaw .jit .xe. Jitt hy tnix jiacc zuac, kngr lehh byy vingx, e sui’ cauwjed .kir.” Siuwhui qongw, ciuw nirr pangg jit vnuaa caiwbuew.

“Danw binaxjair kacc ingg, vingsniux guaw jiacc laii cringx cringx lehh.” Bixhuaa uat tauu duiww inx qongw.

“Lanw daux dyrr dua qekauw, vingsniux tacc byy hag kacc dua daii lehh? Jit daii vingsniux jiacc zuarr je jnii? Linw jit langg cud .jit-.bxan dyrr u :ar maar.” Giogqiaux tegi.

Liw knuar guaw, guaw knuar liw, jauwkax snax xee dangsai-aw byy-ue-byy-qxur, longxx byy inwcuir.

2. Tyw Kechniax

Tnikir auwnauw zuac. Zit .sii utho, oimx oimx. Lyc amwtauu aw, horjuiw iuguann be lyc .laii. Denrhong’iap-aw pangw qyckacc qinw dy’ siyx hongx. Cur-lai jiokk hib. Tokax cii cii, bersux duxx qorr vowtuax-aw lux .quer. Viacdow marr cii cii, u singg decc lrauu crinr qnua.

Jiac amr vaw, veh-diamw-cud vnuax suah, duarlangg ginxaw longxx benw langg huah, sui’ langg zip kir qaqi ee vangqingx, zinrhun aw zinrhun. Diongxvuer jaxsii u huanhur, qongxx denrjnii quir somsomx, kacc jaw kunr kacc be siongdiong den. Amwsii qauw diamw quer, duartniax ee denrhuew longxx diyhh ced huax. Jitt hxang jiksingg qaudair hro duarhanr simvu tiaux.

“Dua-mw liw narr u janwsingg, guaw dyrr sui’ laii kir jinwhingg.” Siuwhui dirr tniatauu ee teiw jre, dyr ciuw giaa denrue, jniar ciuw jit qix kuesnir naxx decc et.

“Guaw longxx byy iwqenr. Liw duarhanr simvu, cur nirr liw tangx juanquann huadlyc.”

Jitt tongx denrue qongw suah, Siuwhui qorr sniwvner cic denrue sui’ qycc kar.

“Ceid qapp jap-go, Bixhuaa tangx jah quaw singlew kir dyrdnuaa. Linw daqeqnuax jaxjingg rinw .ix ee sii, guaw u cinhni tniax .diyc.” Snax-jimw dirr denrue hitt vingg qongw.

“Si byy m driyc lar,” Siuwhui qongw. “Singlew beh jah .kir, qaqi marr diyhh jai’ngiaw jamrjad. Dniquew iacc huatquew jairr ix tec, lanw be qex qongxue. Qui’ jiah qxex ix iarr tec kir haur, qamxx be sniu’ quewvnuaa?”

“Ix jiacc minua kir liamrvut, siongrqingx, marr si decc qriuu cur nirr ving'anx. Dingw zit aw linw ser hanr :ee cua kir hiax siuqniax, qamxx m si qongxx langg’ jit sxenw jnii dy’ byy qra linw siux?”

“Inx jitt vo qiyr jyr jit’axhii diyr duardaix. Dagg qywguec siux lanw hiacc je enqimx, inx iarr suacc e knuar qaxx hex lansanx :ee?”

“Jitt jann beh vaiqaiw diyhh jimjiog, berdangr qunxsngxciyr. Congr byy hyxser, pacpnaiw mnghongx si e hai or.”

“Jitmaw jiacc beh qor texben qaxnaxx u kacc drii. U tniax diyc hnirhongx, qongw ix qapp saiqongx qiqix-qyqyy, byy-cing.-byy-cyw.”

“Omidohut! Vng erdangr ovec jiac, ue berdangr luanrsuw qongw. Narr byy jingwqir, jitt hy dairjir si m tangx siwqer kir iauu.”

“Sowkingx u jit vaiw sew snxax, byiwdiongx dirr Bixhuaa ee lakde-aw zimm diyc jit dniux zirjuaw tec laii hro guaw knuar. Qongw .laii, ix marr jin’ laklenw. Jiac qaxx jitt hy huer :ar, qycc iong juaxdiauu-aw qapp langg' decc taux laii amr kir. Guaw duxjiah u qapp dua-mw tongx quer denrue. Ix tniax .jit .xe marr krir qaxx, tauu qaur buew jiuwlew qui’ jap hunjingx longxx byy tingg. Ix qaxnaxx jit qangx dy’ be danw tihh, qiyr guaw ing’amr diyh’air sui’ cuxliw.”

“Jex dairjir dua diauu, dniardiyc m tangx encenn. Jiauww guanw syw :a ee iwsur kir jyr dyrr driyc lar.”

Tnidingw giaa hun’angx, luiqongx qapp luivenx dng’ cnia’ngia. Horjuiw bexser kia jai tingwhau beh dua puah jit tingg. Dniadauw ee ciurjangg qapp huejangg marr decc dniudanw, jitt juiw horjun m na tangx jriw cuiwdax, inx beh jyr jit kunr limx hro vaw, au jua ho laii beh danw dirsii sidjai be anwsngr .did.

Guarkauw u langg decc cic denrlingg, ho qingw jiangwsii decc puah. Denrlingg-sniax jiokk cniqongg. Tokax qut lutsud. Sowkingx ciuw giaa horsnuar, byy sewzi aw qniaa, vuahdyw si e dngwdangrje.

“Jex ho huanx huanx, qui’ qangx jiacc quw iarr m lyc. Guaw jiacc lyc ciax, ix dyrr puah .lyc .laii. M qajair ciavaii-aw u uaw lanw daux. Narr byy, jitt sniax unw ag qaxx damm loklog.” Mngg kuix .kuix, Giogqiaux qo’ jit langg kia dirr tapsiu-aw, sinkux jit sxux puxlik ee misesnax dingxquann u hordiamw.

“Dnaxx qinw zip .laii," Sowkingx qongw, ciuw naxx et. "A’jew beh amr aw u qaudair, qongxx liw ing’amr e laii.”

Nng langg siy’ uaxsinx bih dirr jit qix horsnuar erbin. Qniaa quer jiyhdniaa qaur nijnii-kax, Giogqiaux sinkux vnua vnua lehh. Sowkingx horsnuar siux .kiw .laii hiur hiur hro kacc dax.

"Guaw rair singx sitvuee, huloqingx jit drunx snxax rair sew." Sowkingx qongw. 

“Zi-syw lehh? M si qongxx nguaw liw sew, sna’axkor ix sew?” Giogqiaux mng.

“Qniwnarr ceid qapp jap-go, ix dagg qywguec dy’ cud .kir, ix ee sxid lanw longxx diyhh vrangx ix jyh. Lanw dyrr giabmia, kangkuer kacc je dy’ m qniax. Guanw cinjixmue dingw dingw guehzit jiyx guaw kir knuar hxir. Hitt qangx duxx qurlik jap-go, lanw diyhh jiu :ix, jurr anxnix varva .liauw.”

Tniatauu qongw denrue ee sniax diam .kir. Sowkingx bagbuew hiongr lairdew giyw .jit .xe, uad lehh dyrr qniaa duiww aurviah .kir.

“Banx jimw-aw liw dangsii laii :ee? M dyrr zip laii jre qongxx, nacc dirr guarkauw decc kia?” Siuwhui denrue qongw suah laii decc anwnai. Ix qra denrhongx qimr driau, beh kir kuix lingxkir. Giogqiaux qra dongr, qongw jinw ho laii, u hongx, be zuac.

“Cur nirr jitt daii lingxkir si langkeh qaur jiacc u kuix. Vingsii si kngr lecc knuar suiw :ee.” Siuwhui ciyr haihaix, qra denrhongx qycc vangr hro gryy.

Luii dnia .kir byy qycc dann, sicnar jaw jaw dyrr kir hiyccuanw. Ho dng’ bingw, lyc qaxx cewcer qiyr. Jitt hy ho ciax tangw dryr lensiysuar jit diamxjingx, uree qokqax jit dxangx ee horjuiw dy’ lyc byy jiacc je.

Kongwkuah ee duartniax, duarmw siyxjimw dngtauu duiwbin jre dnia. Mii .sii qauw diamw, jiacc sangwdnia iauxx bue crua zip mngg ee siyxjimw juanqangx qra cniaw .laii, id laii zi kir, Siuwhui unn unn aw sueh kiw.

“Suacc berhiauw qiyr ix dyrdnuaa m tangx qycc kir," Giogqiaux cud juxir. "Ix narr beh taumngg cir huew m tniax langg' krngr, beh taii beh quah, lanw sii qaur jiacc laii pacsngr.” 

“Ix bruw jitt cud, lanw Jux .Qrax ee miasniax jin saur lyc de. Byy jit xee qawsi, cinwcaiw dyrr vangr ix suah, langg’ si e qra lanw knuar qaxx vniw vniw.” Siuwhui cniur byy qangg sniax.

“Narr beh cincniu dirr huatngi, yc huatqnuax jyr qongpnuar, diyh'air jiauww vo laii hro huanrlangg hunhue, tniax ix qongw hro cringx, sueh hro bingg. Jit sniax qongw puar, banrvutzi u uankud, qniax dag'ee zid'au e pnaiw qamxjingg.”

“Jitt jann, cur nirr sirdua longxx u jrunw :ar. Mrbenw qycc dyjijed.” Siuwhui vorvinn pnaiw pnaiw qiyr. Giogqiaux cuah jit diyy.

Ngua jit xee binrcniux, Siuwhui trow duarsimkuir. “M si guaw decc qra kiakangx. Jit jiah samvanx si e qiauw qex. Liw iauxx bue jyr langg' simvu, liw m jaix.”

“Ok ok ok…” Hyw tniax pnaiw tniax, jairr langg simjniaa. Luiqongho duxjiacc tingg, cniiyh jit jiah jit jiah kuix sniax cniuwquax.

Guehniuu guec qngx qngx. Piuliusiux, ohunn jauw naxx vuex, m jaix decc qnuaw dycc jit diaudai. Jit jun horjuiw tangx jixqix qiamx sexdng, huecauw qapp ciurhiyc ing’amr tingww kunr hro vaw binn, jit cnew qaur tnix qngx.

"Sunrqniaa hnoh." Sowkingx dairter Siuwhui sangr Giogqiaux qaur mngkakauw. 

Qniaa qaur duarlo-vnix, dnaxqag jit xee hurzinlangg decc danw cnix dingx, knuar jit xee jinx, Giogqiaux qinw uat hiongr jniawvingg. Ix beh pax uanlo dngw .kir.

3. Tiah Huexjaur

Vyletangx tauwqngx, jit der jit der crid qaxx cingkir liuliux. Ixaxui dngrdiamxdinn, knuar e diyc iacc bongx e diyc :ee, byy jit sud aw suasab. Go-jap gua huer kuanw ee a’sangw srinx cing jycsitsnax, qaur sii qaur jun, tokax saur qycjaiww saur, lux qycjaiww lux.

Vniawdng ee kangkuer, jit qangx zxic-sir siyxsii, vutkux sii longxx u cniar langg decc cringx, decc crid. Isingx qapp horsu jiokk qinxsin, narr dirr vnerngi, cuiwamx qruar diauu diauu, qanda’ cunx nng luiw bagjiux decc knuar langg, sunrsuar hro langg' knuar.

U ngiu tranr ngiu. Beh dac zip laii vnerngi jinwjingg, uree huanrjiaw cuiwamx marr e qruar qinw qinw. E laii cue sensnix knuawvne :ee, sintew dniardiyc kacc suelamw, iarr kacc be kamx did vnerdok laii ngidnii. Sinkux dair vne, kavo snesingg qnuaw be qinw. Diaur duardangg, jiamx ruix dirr ciuw; qoo iyhjuixvor, dirr taukag, ciuxqud qapp katuiw :ee longxx u. Qycc iarr u tuh qnuaiw-aw iacc jre lun’iw :ee, bin-aw iux qatqad aix aix canx.

Jiax dikkag m si hyw soxjai. Uree langg jit siwlangg rair dahkaqaur quixnarr vaiw, byy laii be suah. Nng-langg-cngg ee vnervangg, jit cngg uaw txangx-aw, jit cngg uaw mngg, diong’ngx jit dow jahvinn qeckuix. Uaw txangx-aw ee vnercngg-dingw decc kunr ee lau a’vyy kyr sangso cuanxkuir. Dirr ix bincngg-vnix jit xee hurzinlangg vuisnix vuisnix, tauu kenr kenr. Jun hro byy sniax ee denrsi anx dirr viacdingw. Ix cuir-aw kuix kuix, bagjiupuee m qramx nih, denrsi knuar qaxx juu ~ ~.

“Jex lanw Lesanx ee pongrqyw, kiwbi be kacc sux Zidvunw Fuji :ee.” Duarniuqox qra jah .laii ee pnuarciuw kngr lehh, mngg-vnix ee iw-aw tuax jit jiah laii jre dirr vnerlangg vnix:a.

“Jnia' pnaixser, hro a'qox-aw liw vuah qangx qniaa jitt jua qycc pywhuir.” Sowkingx vnuar tedyw, binrsig vec cangcangx, qongxue byy-lamx.-byy-ne. 

"Dangsii beh ciuxsut?" Duarniuqox mng.

“Qongxx isingx jitt nng qangx kacc byy lingxtingw, diyhh qaur au .zit jiacc u ingg,” Sowkingx rinr. “Jitt vaiw, qajair guanw a’jew ter guaw jauxjongg, siwqer kir tamwtniax hyw ee sensnix qapp vnerngi. Taukixsingx guaw qaqi cue :ee hitt qingx, jit sniax dyrr qiyr guaw juxqiongx mair dic. Guanw a’jew jai’ngiaw liauxau dyrr qra guaw dongr, qongxx sneqniaxde byy .kir, aurzit aw dyrr be snex :ar.”

“Narr lun kiw jaboxlangg ee jingwtauu, lanw daux byy langg viw ix kacc bad. Ix qaqi dyrr jiyhluw, dongqisii mrjiacc e dac’ingr guanw siyxdi qycc crua sew…”

Buexsniax jit xee “ii” bue qongw cud cuir, duarniuqox qinw dac dongxaw. Jidsidig, vnervangg diam jicjih.

“Jitt cud venx lar be pnaiw knuar.” U .jit .quw .aw, duarniuqox ciuw qiw denrsirqix qycc cud sniax. “Jinw decc qongxue jitt xee si luxjuxqag, buerjingrr qer dyrr ursinx. Ginxaw ee laurve hro cittyy-aw dnua .siw, cur nirr jaisanw decc vunx be vnee.”

“Jitt cud guaw dagg qangx marr u decc knuar,” Sowkingx qongw. “Guanw banx jimw-aw jrahngx laii ee sii dngdecc vnuax kauhunx, guaw dyrr bongxx qra mng qongxx, narr jiauww huatlut qniaa, iauxx bue zip mngg ee simvu qamxx iarr tangx vunx qehuew.”

“Acc ix anwjnuaw qongw?”

“Lanw hnowqii decc qra cingxqaur. Inx tagceclangg dairkair knuar lanw jngkasongg kacc byy, qanda' ciyr ciyr, qimcuir m qramx kuix.” Sowkingx qongw diyc byy ir aw byy ir.

“Dnaxx jyr ludsux si decc zuarr liauxvutkiw? Jiacc qikqyx!” Duarniuqox hngc jit sniax. “U jaidiau, guanw siyxdi-aw kir dirr Aujiux tagceh ee kaiiong, ix jitmaw kir jongg hingg :linw.”

“Hex jiacc si m tangx!” Sowkingx liyc aw kacc qiklat. “Kacc anwjnuaw qongw, guanw banx jimw-aw iauxx bue zip mngg, kingjinx, iauxx sngr si guarlangg. Ue qongw huantauu, nguardngw qinaxzit guaw si hitt xee luxjuxqag, huatlut junw kia dirr guaw jitt vingg, sidjai qongw, jit sxenw go lii guaw dy’ m tec. Bue jnriu qeqah duarvakdow dyrr decc liauxzenn :ar, qacc jiacc berhiauw tangx suex qycc jauw kir qapp langg' jiamr qehuew!”

Byy-dniu.-byy-dii, duarniuqox pah jit xee kacniur duarbuw sniax, qecviah cngg ee lau a’vyy suacc jingsinn. Lau a’vyy cuir be qongw, ngihngic-ngaihngaic, ciuw qiw dyh-dingw ee qunxjuixquanr.

Denrsi knuar qaxx dng' zet ee hurzinlangg uat tauu qra duarniuqox drangr .jit .xe, m-qam.-m-guan, vreh kiw srinx kir tinn qunxjuiw.

4. Lirensux

Dua-mw, snax-jimw qapp duarqox-aw,

Byy huatdo ham’ linw dng’ bin siy’ srii, qiamxcaiw si beh lirkuix jitt jun siongrr dua ee kuatham. M si lanw m bad lexsor. Langg’ beh qnuaw lanw jauw si itsii-itkig. Qovutzijiongx, muaw vxag ee ue diyhh qorr siaw :ee, qiar guanw banx jimw-aw tec hro :linw. Sewsu cenvenr-banrhuar, guaw Bixhuaa ee haursnix ingxuanw dy’ Jux .Qrax ee juxde.

Jit qix jurlaivid giaa dirr ciuw nirr jiokk kinsngw, tuu qui’ vox quw jiacc siaw .cud .laii. Sniu kiw diyc quewkir jex jnia’ jap dxangx dngg nii tangr tnix dirr jauwkax decc pacgyy, jensii giac jnriu ciuw, beh caw, beh jenx, beh iujar, jairr langg' juwbunn. Jyr langg’ simvu diyhh u hyw luxdig. Bixhuaa ceh tak byy quann laii qongw, jitt hy dyrliw cenw cenw :aw, lanw iarr jin’ jaix kindang.

Guaw jurr sewhanr dyrr byy laurve. Laurbuw-aw dingw nii aw lau .kir, guaw tangx qongw byy aurtauu tangx dngw :ar. Daqeqnuax duiww Bixhuaa jairlaii dy’ jin’ tniawtangr. Lanw jiuxqnuaxlangg, inx nng xee sirduarlangg iuguann qra lanw knuar jyr jit qehuew-aw, byy sna’ kiwhiamm. A’vaa Sinx Jnxiax sii quewsinx, a’buw cingbingg bue qaur duer lecc dyw .lyc .kir. Ix jit vaiw zip ngi, jid’err kir dy’ qui’ qywguec, quixnarr lexvair. Guaw qenww vaiww kir dyrdnuaa, kacc qriuu dy’ brang ix sintew jaw jit zit guanjuann. Inx qongw guaw cri huebii, guaw jinjniar sen’ sniu dy’ sniu be qaur. Liahqanx-jaircngg. Vec vec vor niw qaur ox qiyr guaw zinrhok. Qamxx jniasit hnuailangg ee lriw kacc dit?

Banx jimw-aw iog guaw kir inx surbursow ciamzi kamr inr. Ludsulangg, jyr dairjir itvid-itdiongr. Ix si sriu langg' iongtog, jex guaw jin jaix. Qer laii Jux .Qrax id~zi-jap dxangx, qinaxzit qniaa qaur jitt kuanw dervo, qenwnarr sniu kiw, auqngw dyrr dni.

Vacban ciuxhingg dnec dirr ciuxtauu, simqnuadew u sngx, u kow, u qiamm, u siab, jongw .si, byy jit sud aw qamdnix. An’ jitt diap kiw, Jux .Qrax beh qiamw jit vangg. Qsit, marr jiacc guanw buxaxqniaw jit langg vnuar.

Vychnua-vnix lanw hitt der de, kiwgiabjuw knuar qac’ir hitt der, diyhh tamwtniax cingcyw jiacc cutqer. Jitt jann sidjai byy lanw ee dai. Qyckacc hyw qrer, guanw jitt vangg jit qag dy’ byy hxun.

Linw duiww Bixhuaa itdit longxx jiokk tniawsiyh. Dirr Jux .Qrax sriu linw jerje qowair, guaw jitt siwlangg longxx e qir diauu diauu.

Bixhuaa

siaw dirr beh lirkuix jinwjingg jit mii

Puex qaur jiax jin buew jua. Knuar ee langg qra puejuaw lir jyr nng vnuar, zriok zriok jyr jit uann, suawciuw danr zip kir zirjuaxlangw-aw.

5. Tewdnia

“Guaw kar dngdoo :ee kir, denrue longxx byy langg jriab; iong denrnauw siaw puex mng ix decc byy ingg sniaw, ix iarr byy huee. Qamxx e ix dirr Frans qaux diyc vadd xee, cunsimx beh hiaux :guaw?” Byy sowsiongg sii ludsulangg diamrjat ee kuanw, Giogqiaux dirr vadd langg ee tniatauu ngor ngor ziongw.

Snax-jimw qra inx simvu sraiw jit xee bagsig. Liauxau, nng xee decc siaw siokdee ee tagcecginxaw ho’ngg qnuaw qnuaw zip kir vangqingx, langkectniax jauw qaxx cunx nng xee langg. 

“Liw iarr jnia' gauu gii sinn gii qxuiw. Jit~vnuax qangx aw byy lenlok dyrr qinxdniux ninix. Acc byy, lanw qiyr ix ceh vangr lehh mair qycc tak, an’ Aujiux qnuaw dngw laii ham’ liw qapvangg, anxnix m dyrr hyw?” Snax-jimw vnuar qra gex. Giogqiaux tniax liauw cuiwpuew angg qiqix.

“Cur nirr jitt jam aw beh bre de. Guaw vad huatlut, marr knuar quer kausux. A’syw qniax guaw ham' inx jingqaur qehuew.” Giogqiaux kiw satdnaw, jit sniax qongw puar.

“Liw dangsii qaixdoo jyr tamwjingx? Surbursow jitt jun si m si kacc byy sxid?” Snax-jimw venwbin.

“Jinwjingg guaw qiar Sowkingx Jew tec hro linw knuar hitt dniux puex tangx jyr jingwqnir. Zi-syw bingbingg dyrr si hro dua-syw qaixquad danr driau :ee. Jitmaw diyc qaur guaw :ar. Guaw byy decc kong’amx. Ix benw siauwsniu beh jiac guaw panr.”

“Hitt xee jabow jiokk byy siuw luxdig. Jiuxqnuaxlangg iarr m jaix qenwsiaur, siwqer qapp langg' decc kanx bagbuew. Guanw jyr sirdua :ee sunzenn uirdiyhh liw hyw jiacc u qongw. Liw kacc mair cam' ix jywhuew, kacc be hro ix trua pnaiw.”

“Zi-syw cid siauwlenn veh siauwlenn dyrr siw angx, junw u sigsai vadd xee javolangg tangx qycc qer, lanw qamxx m si diyhh qra jiokhog jiacc si? Linw knuar langg decc sruah iamm. Anwjnuaw dua-vxeh crua sewii dyrr byy dairjir?”

“Guanw daux ee dairjir byy diyc qaur liw cab!” snax-jimw kiw pnaiw bin. “Sowkingx ter guanw Jux .Qrax tngg hniuenx. Langg’ ix si jingjethu, u siuw vunxhun, si guanw Jux .Qrax ee hyw simvu.”

“Snax-jimw, duarniuqox jurdew sner Jux, guaw byy kir cue ix didjiab jauw laii cue liw. Linw aurtauu sner Angg byy sner Jux.” 

Ue qongw suah, Giogqiaux kixsinx uad lehh lirkuix. Snax-jimw krir putpud, denrue giaa .kiw .laii, ciuw iauxx gicgih cuah.

“Ciah jabow, ciah vevee. Cnex-vrong-vec-vrong jongg .laii, pnaiw qogqok, bersux pnuawqnuax decc mngranr, suar .lyc qycc suacc qra lanw qawsi .jit .cud. Qajair liw bagtauu kiauw u qra knuar cud cud. Narr hro ix zip mngg jyr lanw Jux .Qrax ee simvu, ix m pacsngr beh vreh qaur lanw taukakbuexdingw .kir?”

6. Buexsniax

Ciuhongx lianglingw, Vecguehjeh dingw lexvair jiacc quer. Dniadauw jit jangg qadangx kia tringg tringg. Ciu iyhongx, ciurhiyc snax~go pnir aw decc lag, dui lyc tokax quer byy nng qangx dyrr naix naix, vrow vrow, kacc quer, qui’ee vnir jniaa tovunr. Qnuaa .langg qnuaa sngwsngr. Ciurhiyc-aw beh v.-ving’anx-a. dro quer qnuatnix u vorsor, ham' vakhongx duiwgnoxciongx be diaudit. Hiyc-aw zuxx dua pnir zuxx jiac hongx, sinkux diyhh unkunn jiacc si vo, qiux qaxx venr jit pnir naxx jiamx dyrr siongrr jairunw.

Sinx hag ee denrvingsniux u snax xee mngg cai dirr jiahvngrtniax. Ginxaxlangg air jiac ee qi’axvingx kngr dirr siongrr dingw:a; jiahvng vaw ee caiwbuew didjiab sangr zip kir vingsniux diongx janr; cauxcair jit log jit log sreh dirr siongrr erdew, jitt janr byy siux hii hii bah bah. Juxjiac :ee beh rair jit qix cangx-aw iarr diyh’air laii jiahvngrtniax. Jauwkax qiamw jit daii vingsniux, soxjai u qex kacc kuacdua.

“M si qongxx u puex? Acc puex lehh?” Siuwhui mng qinw qinw.

“Longxx dirr vangqingx ee qxui-aw-dingw.” Sowkingx ciuw byy ingg decc taii xiu-aw, bag’iuu be qor did crid.

“Inx jit xee ludsux, jit xee qnuaxhu, vunxdew dyrr yh liuxlag. Jitmaw nng xee qycc qab qab jyr jidhuew, e venr qaxx zuarr lirhai, cinwcaiw langg katauhux sniu marr jaix. Lingrzit aw narr u langg kar denrue laii beh cue :inx, duiwhongx ee miasner, denruerhuanx, dagg tongx lanw diyhh mng hro cingcyw. Anxnisnix aw jyr, sunzenn si hrongg sinqiw, lanw tangx giac tauu duiww tnix.” Siuwhui qaudair suah, Sowkingx qra dimr tauu, pni-aw cngc lehh cngc lehh.

Langkeh qui’ din suaw kir duartniax danw jiac quexjiw. Jiahvngrdyh-dingw nguaxbuew jit vnuaa jit vnuaa tingwhau langg' kir kingg. Qewnaa-aw hen caw :ee, qui’ vnuaa ho’ngg jiac qaxx kangx lisix. Enciangg jenx qaxx cauwhuexluah, ding kiauwkiaur, laurduarlangg byy cuiwkiw vro byy hxuad. Jit buew qalac dendyww jenx byy sik, air cngw hitauu :ee tauu liamr .kir, sinkux dyrr hranw did u di qniakaqaur.

“Ciuxge hyw-baiw jiamrcniaw benw lun kiw, hee-aw suaqinx tiux byy cingkir dyrr sidjai qongw berdid quer. Qui’ ervox knuar ix qiux dirr jauwkax, qycc longxx caiwci-aw bre ven :ee kacc je. Tacc e vnir qaxx jitt dyh .cud .laii jiacc lrow?” Snax-jimw aix aix jrap jrap.

“Acc dyrr ixjaw byy decc bag iuenx, juw iauxx bue sigciuw lar.” Siuwhui naxx qongw, xiu-aw sui’ langg snax~go ban aw vunx hro dag’ee. “Jauwkax qui’ee hionghiongg vangr hro ix hnua, cur nirr snax dxngr venrcaiwvng maxmaxhuhux, beh qiyr ix vanrdyh cniaw langkeh, lanw qongw jit qxur sit :ee, ix iauxx cax jit kuir lar.”

“Kacc quer, ix narr itdit byy jinwiah, qnaxx iarr diyhh liw duarhanr simvu lyc kir juw kacc tongx.” Qongw byy nng qxur, duarniuqox kogkok decc trow eh.

“Anxnix nacc tangx? Linw dy’ jaix, a’buw ix byy air guaw juw.” Siuwhui qongw.

“Aurquer liw iamm he kacc jiyw lehh suacc berhiauw?” Duarniuqox ue jid’err qongw suah, dua-mw qapp snax-jimw longxx u qra janwsingg.

"Iarr diyhh Sowkingx laii juw kacc tywdongr lar. Guaw qra ix draur brew cair dyrr ngiaw." Siuwhui qongw.

"Anxnix marr hyw. Jixmue-aw dauwsiongvangx, ix juw liw qamdog, samvutgorsii vangr quaw vo siyw qra qramx lehh." Dua-mw qawsi. Snax-jimw qapp duarniuqox longxx decc dimr tauu.

Bundanr Xiu iur biw, tingwhau siujuiw, dagg liap dy’ jiokk cingdnix, jiac lar jiokk suawcuir. Siongrr buew aw cuir jiacc trad zip kir cuir nirr, snax-jimw mng Siuwhui qongxx ludsux-simvu beh anwjnuaw cuxdir.

“Qaqi qnuaw beh qer, lanw iarr byy qongw byy beh qra crua. Caw beh trer cinjniaa, ciuxjiw m tec laii hingg. Lanw byy qra tyw ciuxjiw, ix dendywtauu rair lanw vuevow :ix, qongw simxmih jingsinn sngxdng d.-dangsaix-s. mic’arvar :ee. Linw qongw u ciywkuex .byy?” Siuwhui lingxciyr.

“Ix pacsngr si sniu qongxx, taux qa qxex-aw :ee dy’ u jit-vah-bxan tangx tec. Ix bongxx lyx knuar mai, narr tyw u si qex tanr :ee. Narr byy, dyrr junw suah.” Duarniuqox huntiah vunx dag’ee tniax. Jingwlangg longxx qra dimr tauu, ylyw ix qongw :ee jin’ diongwkingw, lixlo u dngg.

Veh diamw bue qaur, dag’ee danw beh knuar lensiogqiok. Duxduxhyw jairjy :ee longxx knuar qangg cud. Denrsi jun .kuix, denrsi uerbin si Hokqenr Ermngg. Dua-mw mng Siuwhui cur nirr javolangg jitt jua beh kir zuarr quw.

“Vnuar dxangx.”

“Druar qaxx vnuar dxangx!” duarniuqox huah cud sniax. “Acc m dyrr byy beh dngw laii quewnii?”

Siuwhui dimr tauu.

“Liw diyhh sewzi. Hitt vingg ee jabow, uirdiyhh quiw sxenw jnii, simxmih iauxsiu vo dy’ qnaw sraiw. Ix si guaw ee cinsiyxdi. Guaw rair qra liw tecniw.”

“A’qox-aw, jin’ dysia liw jiacnirr aw qra guanw quansimx. Ix jitt jua beh kir jinwjingg, guaw u qiyr ix singx kir vak .kiw .laii.”

“Urngiaw or!” Snax-jimw bagjiux cnix ginwginr. “Acc Sowkingx qamxx jaix?”

Siuwhui hnair tauu, qongw, “Hitt jun ix langg qankow decc druar ngi, guaw dyrr sniu qongxx mair qra qongw kacc driyc. Ix qau cauhuann, jiokk gauu ovec sniu. Qinsiok, ix haursnix jaboxqniaw longxx u :ar, byy siongqanx lar.”

Duarniuqox qongw ix sniu dairjir jiokk diamxdinn, jiokk jiujir. Dua-mw ylyw ix jiokk u tniawsimx. Snax-jimw qongw ix jiokk qamxqah, Jux .Qrax berdangr jit qangx byy ix.

Guehvingg henn dirr vnuawtnidingw, sinkuvnix byy vnuar liap tnicnix pnua siy’ suii. Sowkingx dirr jauwkax jycsid, o’ngiaw d.-dongrhnir.-h. Jit dxuix nguaxped-aw iuu laplab, beh kunr jinwjingg sew hro cingkir sngwdair ix ee jithun. Jongw .si, sew qinw sew ban, vxuex-aw singx tua iacc si nguaxvnuaa, cutjai ix hnuahiw, jiongqimx-ixau, ix benw qycc sriu langg hrad.