damdngx

1.

“WE ARE ICRT, FM ONE HUNDRED, TAIPEI, TAICHUNG, & KAOHSIUNG.” Jap-snax lxauu ee radio jun siw :ee, tong’ nii tangr tnix, kacc tniax dy’ jitt daii.

“Jhung’üann viauxjhunr shhjianx, shh-vax dianr jhngr.” Denrue kar .kir, juanxjiab ee langwpang diyhh tniax Diongqongw, vywimuann qngw jic kikkamw.

Neondingx decc sih, jit xee diamwbin jit pax, longxx jiokk jing’ingx, jiokk u guankir. Tnicnix jit din siwsnuar dirr tnidingw, sui’ liap aw qeww byy-sin.-byy-caiw. Doci ee iarqingw, jaw dyrr byy kueckiamr cniqngx laii jngtna. Tnicnix narr kiamwsinn air beh hiyckunr, sidjai e tangx tranr jaw byy siongqanx.

Bec’amr aw quer, uanaxx kia quann quann dirr tnidingw :ee, guehvingg ing’amr jit baii naxx hniujiyx, u-byy kingsit marr byhongg. Jit nidangx, Veh-gueh jap-go diyhh m tangx puawvni iacc lauwpauu sitqangx, ixgua snax-vah-lak-jap-sir qangx, beh cuthen m cuthen, tengww suijai ix juniulangg kimoji.

Vanrqongx-duarlauu u kongdiauu dngnii suhau, air beh hyw cniaqig, sir bin juann viah byy anx txangx-aw jin’ je. Jit~vnuar qingx aw juxquanw ee vanrqongsig u sed vyletangx, haurvecceh qui' zit byy giuw kuix jamxzenn aw sowsiongg. Harvanx jinwjingg, dirr duarlauu lairdew :ee ciangjai m jaix guartauu tnix qngx iacc tnix amr, lyc ho, cud zit iacc oimx.

Sijingx nng qix kaqud qniaa qaur duiwdit, jaxkiw qauw diamw siongrvanx :ee jiauwgiac longxx erdangr tewkunn. Sittauu jyr byy liauw :ee qaqi diyh’air zinrhun. Dirr jitt qingx jyr denrjuw-jusinr :ee, qangdingsux longxx lamsingr, qavanx :ee iarr longxx javox :ee kacc je. U qadingg ee luxsingr, siqanx qaur, rair qnuaw dngw kir juw amr. Iauxx bue duiwcinx :ee, mngxvox lak diamw quer, uree beh hur iokhue, uree diyhh qnuaw kir voxsibvanx jinwsiux beh qycc tak.

Zit .sii tenx tenx qig snuawsenx, jit qangx ee gupuee-gxiac, snax~sir diamxjingx ixlai beh hur huandiamw, juwsimx-juwqnuax byy jniursngr, juwsinn qaiww derr id iauwqinw. Program decc siaw be kamx did u dnargo. Jid'err sitcyr, aurciuw vo vo cax, ingxingw rair dingtauu pah kiw.

Iong UB vinvangx qeckuix dycbin, sui’ langg ee surburdyh-dingw longxx u jit daii notbuk, poxqiliok snax-jap qonghunx dngg, zxic-go qonghunx kuah. Kacc byy jit-vah kxiw ee zirvnuaa, zuarr je ngiaxsiong, imsniax qapp diwsig, uaxkyr jiaxee u inr zri ee kxiw, jit xee byy qaiwjiw ee ongqog liauu liauu aw kixjy.

“Kacc nguar liw narr iaux, jitt der qenngrqyx hro liw jyr snak bongxx damrsamw.” 

Luxsingr ee sniasaur jit qxur ue suah. Jre dirr denrnauw taujingg :ee taukag iauxx bue hur dngxdyw, jit der qenngrqyx he druar qangdingsux Jngx Bunqed ee dyh-dingw. Qenngrqyx jongsig qaxx jin’ tig, jit renn jit ree tac jiokk je janr, knuar e cud :ee dyrr u ornii, ladjiw qapp krimu.

“Anxnix nacc hyw? Vutsii decc hro liw cniaw.” Bunqed pnaixser pnaixser.

“Qongw jex! Cuiwjiahmic narnia.” Dongsu Queh Siyxjiaw snax-jap tongxtauu, qongxue kenn lecleh, jit py taumngqix dngg qaur iyjiacqud, dit longwsongr, oqimqut aw oqimqut.

“Urdang’aw amwsii dirr qongsix qavanx, vakdow sidjai dy' iaux qaxx, jit xee simqnuax qanda’ sniu qongxx sittauu diyhh jyr jit kamxjam, cnuaxqud, cud kir cuerjiac jin' uiwlanw, dyrr vangr hro ix duarjng qryr siyxjng qurqu qiyr.” Bunqed qig jit xee ciywbin, si bunai ee kuanxsid.

“M si guaw decc jabliamrzuu. Linw javolangg or, ursii aw bersux ginxaw lehh, sintew longxx m jai’ngiaw diyh’air qor.” Queh Siyxjiaw dnir jit xee jong, qexir qra ror, bin-aw ciyr bunxbunw.

“Qniazit vaiwsnax. Liw ing’amr qamxx m si rair kir len ioga?” Bunqed jitt qxur sngr vnuar mng vnuar tecniw.

“Uaa! Liw qiwsnir jiacc hyw .diyc! Guaw dna’ qra liw qongw quer jit vaiw nia qongxx.” Queh Siyxjiaw ciyr qaxx jiokk cunhongx. Guartac-aw muax lehh, vowliuw-aw sui’ liap aw liuw hyxser unn aw si, ix hiongr Bunqed et ciuw qongw baibai, qniaa qaur mngcuiwkauw tingkax, uat tauu hiongr lairdew ee langg qycjaiww siamx .jit .xe.

Qenngrqyx kngr dirr dyh-dingw jiokk snriaa langg', jycsid byy huatdo jyr iwdir. Snax~nng xe ciuw, cuiwkangx muaxjiog dngw laii jyr kangkuer, qaxnaxx u qex jiokk suacciuw, jit lo quer tongquanx, byy duw diyc dua quawgai. Hyw qxingw be quxdngg, veh diamw quer iurqycc kee lehh cud bunrdee. U jerje langg ylyw ix bunlixlangg, hyw singr. Dirr jitt xee sihau, Bunqed taukag pah siw qad, dogdok sniu beh duiww binrtaujingg byy-kax-byy-ciuw ee qekir kiw cyh.

“Iauxqycc decc byy ingg?” Jyr amr sxid ee Qiw Siyxjiaw laii decc tamw knuar. Qtbin qutbin, qutqeh qinx qinx, siyxjiaxlangg jiahjngx, gauu kngr huer, knuar diyc dy’ hagsingginxaw-kuanw, qiuwjinx beh uaw snax-jap.

“Hner a. Acc dyrr pnaiw mia m.” Bunqed qig jit xee koxquebin.

“TAKE A BREAK, siyw hiyh .jit .xe. Bagjiux kacc be siab, ciuxqud marr kacc be quairqinx,” Qiw Siyxjiaw bixir qra kuanxkngr. “Jitt quanr qavix hro liw voxjah. Hongwsimx, byy kofiin :ee, liw benw qniax limx liauw amwsii e kunr be kir.”

“Kofiin dirr guaw tak genxqiuwsow ee sii dyrr sithau :ar. Jraix qyckacc je quanr, dyw lyc kir bincngg, jiauww kunr vutquanw.”

“Urngiaw or! U qraur himsen :ee!” Qiw Siyxjiaw dacciuw huah cud sniax.

“Himsen?”

“Hner a,” Qiw Siyxjiaw dimr tauu. “Bad u quer sxor vaiw, guaw cuir saii m sinwsniar, quer daur quer qycc kir praur jit vxuex qavix quewgenr, hitt amr diyrr e dirr bincngg-dingw ciavuac jiokk quw, be lyc binn dyrr si be lyc binn.” Trow jit xee duarsimkuir, qecviah dyh ee iw-aw giuw jit jiah laii jre dirr Bunqed ee jniawciuxvingg-vnix.

“Linw sidjai jnia’ gauu, erhiauw siaw program. Guaw qanda’ knuar dyrr taukag tniar.” Qiw Siyxjiaw qycc la jit xee uertauu.

“Denrnauw si guaw ee vunxkyx. Qniaa lirkuix jitt xee koaw, guaw marr si vutjewsu.”

“Liw qywkiamx lar,” Qiw Siyxjiaw snia'imx jiokk unsunn. “Qavix liw m dyrr qinw kuix kiw laii limx, knuar guaw brew :ee u hac liw ee cuiwlo .byy.”

Siyxjiaw huanhur, Bunqed sui’ qra kingtih-quanr-aw dingxbin ee ken’aw giuw .kuix. Jiacc quer auu, ix sui’ viw duarvobuw, ylyw qongxx, “hyw limx, hyw limx.”

“Liw u limx diyc simaw-bi .byy?” Qiw Siyxjiaw mng.

“Simaw-bi? U, u, u sim’aw ee bi dyrr driyc, bogquair jiacc pangx.”

Qangdingsux jid’err huah janw, siyxjiaxlangg simhuex kuix, ue dyrr je. Ix qongw kiw diyc dirsii kir cue diyc jitt kuanw kauxbi ee qavix, dyc’ui u der brew, jit quanr bre zuarr je. Qycc qongw cur nirr iauxx u vadd jiongw vaijuw :ee, binhngx beh qycc jah jit quanr laii hro ix limx kiwbi.

“Binaxjair vaiwsir, ervox snax diamw u lerhue. Jitt vaiw qaxnaxx diyc linw vywqyr.” Bunqed pah qow-vnix, qikiauxdig decc qra diamxduh.

“Driyc hnoh! Liw jitmaw qongw guaw jiacc sniu .diyc. Juxzim harvanx jinwjingg qaudair jit tong juliau, qongxx binaxjair kuihue beh ing :ee. Guaw qaur jinw longxx iauxx bue jingxliw. Pnaixser, bersaiw qycc qapp liw qrangw. Guaw diyhh qinw laii byy ingg guaw ee. SEE YOU LATER.”

Hnirkangx tranr diyc jing, Bunqed iarr tangx ithiongr-quisimx qycc dngw laii qapp binrvangx dingxquann ee huhy ciavnuaa. Dyh-dingw ee qavix jiacc limx jit cuir, isin :ee, Bunqed anwsngr kacdingg aw tec kir dryr hniwsag. Qavix, ix quanwsir jiac hen juw :ee. Jitt hy quanxaxjngx :ee iacc si samhab’id :ee, ix hiamm aixdaixdnix. Siyxjiaw ee hyw jxingg hyw ir, dngbin qirjuat jin’ pnaiw singkir, lexlo vuthabgii.

Byy qinrlo tangx qniaa. Liaursiongw si pnirsaiw dua ee sxid, suacc iarr bruw qui’ amr. Juanxjiac ee qesix siux siux kuanw kuanw lehh. Qavanx byy jiongxsniuw, tauqex si qaqi ee viauxhingx. Qongsix beh tongxqer inx jit guehzit qex jyr quiw diamxjingx, packaw iarr diyhh jiauww juxgnow.

“Liw qinaxzit iarr jiacc nguar?” Dongsu Antoni decc danw liulongg, vnivnii jitt jun jiacc harvanx, viw Bunqed jaw jit kavo.

Dirr Zin’air Lo-dingw ee jitt dongr vanrqongx-duarlauu u zi-jap janr. Zidqanx, liulongg byy ingg ciccih. Lyc amwtauu aw, sui’ langg harvanx dngw cur hiyckunr, liulongg iarr tangx tanr diyc cing’ingg. Benw sniaw dngdanw, an’ laubuexdingw laii ee liulongg tauwjuarciax qaur jap-snax lxauu, diongx:a longxx byy hiycjam. Mngg kuix .kuix, bunbinglangg liw niu guaw cniaw, lorbuexsinx, si Antoni viw Bunqed qyckacc qencii.

Byy qaur jit pnee ee kongqanx qycc qnuaix bat bat, dingxtauu ee lingxkiwkangx si u decc sangr hongx, Bunqed jit xee simqnuax jat jat, tauu gongg gongg, qiongbeh hipkuir.

“Amwsii, liulongg ee sokdo qaxnaxx u ho'ngg ciauu kacc ban.” Ue jiacc qut .cud .kir, Bunqed sui’ dyrr hiyrhuew. Iong bagbuew qra sinkuvnix :ee ngiaw .jit .xe. Antoni qig diam diam, dnir cinwciyr.

“U qraur suesiauu. Guaw dongdongg davohanr, suacc hro jit xee knaaxsenx kiycciyr.” Byy qongw cud cuir, Bunqed dirr simqnualai decc liam hro qaqi tniax.

Liulongg qauwui mngg kuix .kuix, siuxui-aw giaa tauu liac inx knuar .jit .xe. Qniaa cud duarlauu, sianglangg jiksii hunx siangtauu. Qui’ srinx m si srer, Bunqed sniu diyc siuxui-aw duxjiah hitt xee ganxsinn. Ix qinnii sxamx-id, u cur, u ciax, u junginn, dogqox kiamr jit xee qeau jywduix.

2.

Dingxvox jap diamw vnuar, li siongrqaiww zuluan ee siongrvanx siqanx jnia’ diamxjingx u :ar, ci-lai qautongx iuguann zuu qawqar, sibzirhowqex pah sixqad, dangx-saix-lamm-vag hiongr ee ciax jrig jrig jyr jit dxuix, be-dinx.-be-dang.

Langg je, ciax je, soxjai dyrr venr kacc ehkeh. Langg rair u der tangx druar, ciax marr rair cue jit xui hro hiyckunr, m si zxic-sir siyxsii jauw vutdng :ee. Dirr sniaa-lai cri jit jiah ciax, vadd hxang kaiing singx lag vnix:a kir, dagg qywguec ee tingcialiau, uree diyh’air cid~veh-cingx, qiongbeh ham' cuwsuewjnii vnii je. Kiarqex jairqin u jit xee derha-tingciadniuu decc cutsuer, congr liauw vutjiw aw suwsi, Bunqed keczi jit kunr qapp langg' ciamx nng nii. Jit sniax jap-bxan cud .kir, jongxcew, jit guehzit sir-cingx tongw. Viw did kiarnii iacc kiarguec decc lap, qex singw did nng-bxan gua kox.

Lirkuix caxla ee dua doci, hiyckunwzit ciax sraiw lehh, qongqingw suiw-baiw byy cax. Handolu pangw jniar vingg, ciax uat hiongr saix liauw banw dit, giar sag qaur D, Bunqed ee simqnuax byy dua, unw unw aw sraiw, sisog hanw did ciauquer lak-jap qongliw. Sir-lenw Nissan ee sniu’axciax tangx jair ix siwqer kir iusniuw, benw qniax tauwhongx iacc lyhho. 

Ci-lai jikciax jiokk suwsiongg, qongciax ciavangx pnaiw jad. Jurqaiong :ee jid’err cud ciakor, kactingg aw beh tingg dyhh, sui’ diyhh huanlyw decc danw. Daivag u denrciax, jiauww-sii-jiauww-jun huatciax, qycc benw danw angcnidingx, uanx-qrex-uad-hang byy qniaa qauwui si dua kiamwdiamw. Vixqauwdig, odobai qex jiokk hyw dngxdyw. Nng-lenw :ee kacc be jai, puebah vaux tih, narr u surqor, ingxingw diyhh lrauu-huih-lrauu-dih. Rid diyc lirven qapp singw sii, Bunqed u kanx jit daii Samiongg 125 :ee, vaiwid qaur vaiwgo kiaa, sunzenn uirdiyhh qangjog.

“Doci soxjai, ciax ping je. Kiaa odobai qaqi rair quanhongg, sewzi.” Qenww vaiw Bunqed denrue kar dngw kir cur nirr, jngkax ee ic :a kacc huanlyw dy’ jitt hxang.

Zit iarr sniu, mii iarr sniu. Siaw beh qui’ lexvair ee program, qattauu tauw kuix, den-tangg jongw jauu, nngxtew cutsir, hnuahiw qaxx be qor .did. Ham' kecho iog jap-id diamw qaux sanxpinw, qimx-aw-dxiamr ee dxiamr-aw-kauw u jit xui, odobai tingg jiax e ho'ngg tuax .be pnaiw qongw, kacc danw kir, m si qruax snax~go hunjingx quw narnia, Bunqed byy beh morhiamw, iarr diyhh cue jit dah unw dakdag :ee kacc si.

“Cniaxmng, lanw jiax qamxx u jit xui Jiamx Honghuix Sensnix?” Qeh jit xee sejixmngg, Bunqed kia dirr mngkadaux, hyxlew aw qa’ngg mng.

“Lanw dyc’ui beh cue :ix?” Kia dirr mngg lairdew hitt vingg, jit xee siyxjiaxlangg dyr mng ix.

“Guaw denrnauw-qongsix :ee. Qinaxzit beh laii qaux qnia.”

“Ar! U, u, ix u qaudair.”

Mngg kuix hna hna cniaw langkeh zip .laii, siyxjiaw qycc qra sejixmngg qnuaix uaw .kir.

“Jiamx .Sensnix jinw byy dirr qongsix?” Bunqed mng.

“Ix kir vran dairjir, liammix dyrr e zip .laii.” Qaixsueh liauw, siyxjiaw cniaw Bunqed iw nirr jre, qycc mng ix beh limx qavix iacc dee.

“Cinwcaiw longxx hyw, vehdee marr hyw, u tangx limx dyrr hyw.” Bunqed qig gnoxzinn, qongw diyc jiokk kuehaii. 

Siyxjiaxlangg tniax diyc simsig, ngx cuir decc ciyr. Dngrr enjix juixhunw, hogsig si sowsig, taumox kacc byy qaur qingqactauu, guarkuanw hyw cincniu jit xee qyhaursingx; sanxsyh ee qutder, sinquann diongvan aw, siyxjiaxlangg si hongx cuex e dyw ee hxingg.

Denrhongx decc cuex, jit dniux dowjuaw kinniuxsniuw hiamw vuex .kir, siyxjiaxlangg qinxciuw tec juaxdeh deh lehh. “Pnaixser. Guanw ee lingxkir knuar suiw :ee narnia.”

“Liw jiacc quiw huer langg? Daigiw qongw qaxx jiacc hyw .diyc!” Siyxjiaw byy ingg decc hniaa qunxjuiw qapp cuann deaux-aw, Bunqed naxx qapp ix kaiqangw.

“Acc dyrr hamban qngw jic, Inggiw qycc lilixlaklag, siaxsimx, iarr diyhh qongw Daigiw kacc unxsun, kacc be lauwkuir.”

Siyxjiaw dee paur hyw pangg .laii. Bunqed vreh kiw srinx, jit dniux penwhongg sunrsuar dux .kir. Siyxjiaw qongw ix laii qongsix kacc byy vnuar dxangx, iauxx byy bingcir, jurgnow qaiwsiau qongw ix sner Qanw, miaa qiyr jyr Lerhunn.

“Lerhunn, bixle ee hunn. Liw ee miaa jnia’ suiw.”

“Liw marr kacc hyw simx lehh, mair qycc qra guaw congwdi. Guanw dyrr jngkalangg, kacc hy dy’ jitt hy caiwci-aw-miaa.”

“Jngkax! Si zuarr jngkax?”

“Hongrsnuax.”

“Hongrsnuax dy’ vnuar doci a!” Bunqed huah cud sniax. “Guanw qowhiongx dirr Qagi Pywjuw, guaw mrjiacc jniawqangw ee jngkax ginxaw.”

“Mrqycc liw Inggiw e tong a. U jaidiau dirr denrnauw-qongsix jyr qangdingsux, Inggiw burvid diyhh jiokk lauw.”

“Maxmaxhuhux lar,” Bunqed qingtauu trec .jit .xe. “Narr u kecho an’ Bixqog laii, tauqex cniajai e qiyr guaw kir vixjiab si urngiaw.”

“Liw u huatdo qapp adok'aw iong Inggiw qongw or!” Lerhunn nng luiw bagjiux ngii qunwqunr. “Liw m u quer qiamjuiw kir guarqog takceh .quer?”

Bunqed hnair tauu, ciywsinn cangr be diauu. “Inggiw air beh e qongw, arsaiw kir qaur gua vangx. Daigiw zuxx laii zuxx be linwdngw, guaw jiacc si dua huanlyw.”

Lerhunn qexir qig jit xee binrcniux, jikjue Bunqed iurqycc decc qongw tenked.

“Uan'ongw ar! Guaw tingww jxiur dang jxua.” Bunqed jniar ciuw sui’ giaa .kiw .laii. “Guanw qongsix lairdew ee jabow dongsu, Daigiw byy qaxx jit xee e qongw. Guaw iong Inggiw, inx dendyww kacc tniax u.”

Bunqed qongw kir quanwcuanr. Lerhunn tniax qaxx hni-aw pag pag pag. Dejingx pangg .kiw .laii, Lerhunn siangx ciuw jinr dee.

“Jex dee jiokk qamx, jiokk hyw au’un, qycc pangx qaxx.” Jrip .jit .cuir cir jubi nia, Bunqed ylyw birsi.

“Dee diyhh qingw langg limx lar. Vnivnii jitt kuanw bagnirhuex-dee, guanw tauqex dyrr hiamm qaxx byy jit der hyw.”

“Linw tauqex? Liw qewangx :ar?”

“Guaw si decc qongw guanw Jiamx .Sensnix lar.”

Duxx qongw quer hni, guarkauw u syxsikenx-aw linglongx qiyr ee sniax. Lerhunn sinkux kiw banxmic, hionghiongg an’ iw nirr kia .kiw .laii. Bunqed qniax jit diyy, ciuw nirr ee dee hiamw hiamw pacjuah.

“Zuac qaxx qiongbeh vreh viah. Lingxkir tacc byy kuix lar?” Jiamx Honghuix huachiux, jit ciuw iauxx dirr hording-gua beh qra mngg giuw uaw .laii. Zip laii qaur lairdew knuar diyc Bunqed, tauqelangg u damrvyc aw gonggniac, syxsii iauxx dirr dyr ciuw byy kngr zip kir kowde-aw, jniar ciuw dairsingx crunx .cud .kir beh ad.

“Dag’ee longxx decc qnuaw hur guehdew. Qinaxzit ginhangg langg u qraur je ee je. Liyc aw u kir drong .diyc, suacc hro liw dirr jiax niauniaux danw.” Qaudair hunhiauw, Jiamx Honghuix jiksii cniaw saihu kir denrnauxdyh denw ciuxlo.

Nng daii PC, tauqex ham’ sinlyy jit langg jit daii. Tauqex decc iong ee binrvangx kacc dua, denrnauw iauxx bue kuiqix dyrr urngiaw.

“Linw jiax soxjai jiokk kuikuah, jiokk hyw.” Co’ kixqniaa, rair singx setding. Denrnauw naxx decc tak, Bunqed bongxx uersenx.

“Guanw jiax tauqex sinlyy jongw:a qiong:a marr jiacc nng xee, qapp linw qongsix iarr suacc e viw .did?” Jiamx Honghuix qongw.

“Langg jiyw hyw a! Jit xee cud bingrling, jit xee kir jinwhingg, kangkuer kacc be tuatic.”

“Hex urngiaw or. Haurdniuw qiamx qongr jxingx siongrqaiww tywdongr, benw crex dix sraiw qxauw, ginhangg sunrsuar qaqi jauw.” Qongw ee langg vnuar qongxciyr, tniax :ee ciyr qaxx nngw iyx.

“Si qongxx, liw marr decc qutlat. Ginhangg ee dairjir, liw tingwhyw qiyr Qanw Siyxjiaw kir jauw dyrr hyw a.” Jitt qxur beh qongw jinwjingg, Bunqed liac siyxjiaxlangg giyw .jit .xe. Lerhunn dngdecc jyr kopi, kajiacpniax hiongr inx.

“Jinw cniuw :ee qiab :ee hiacc je. Ix jit xee nng kax jabow, dongr byy jit xe voxtauu. Jauw guarkauw, iarr diyhh lanw javolangg kacc dingrdongr.” Jiamx Honghuix sueh in'iuu. 

Nngxtew muaxvnuaa quanr zip kir juxqix. Ctrl, Alt qapp Delete, snax xee kxiw dangjee cic .lyc, denrnauw dingg qycc pah kiw.

“Liw jiacc siauwlenn, surgiap tangx jyr qaxx jitt xee qongqingw. Liw dikkag jiokk vniawsir.” Uerbin iauxx bue dniardiyc, lauroo iauxx dirr binrdingw decc gryy, beh trad jitt xee langwpang, Bunqed kanx ang’aw vow horsnuar.

“Byy vniawsir, iarr suacc e dit?” Jiamx Honghuix qra ganxqniar tuh .jit .xe. “Vanrqongsig rair cuwsuer, cniar langg rair huad qipliau. Iarr si linw jiahtaulorlangg kacc unw tanr.”

Huewkax, huewvan, dexsiaux, duarsig, jit vid jit vid s.-siwsnuar-s, lansanx licleh. Nngxtew kaidenw narr u duiwox, kangkuer vadd zit aw dyrr e qex kacc lingrlo. Qesix jiauvi, qangdingsux henrlangg beh jyr demo qiamx qawyc.

“Qamxx mrbenw cniaw Qanw Siyxjiaw dangjee laii yc?” Bunqed hyw ir mng tauqelangg.

“Ix damrvyc aw gongrtyc, dniardnia e cutdiongr. Liw singx qar :guaw dyrr hyw.”

Ser aw sniax qongw liauw, Jiamx Honghuix sui' kir jre dirr denrnauw taujingg. Langg dua piang, nng qix ciuxqud kngr druar ec bicbih ee zirvnuaa dingxbin, jap qix vuipongr ee jingxtauu-aw qaxnaxx longxx liamm liamm jyr jidhuew, jiokk pnaiw dinxdang ee kuanw. Beh rii beh suaw u kacc banrdun, u hunlisix aw gibun, Jiamx Honghuix kuix cuir dyrr mng, mng qaur ix e ix bad jiacc junw si.

“Jit'aursinx narr cud bunrdee lehh?” Qaidongx suecbingg :ee qaur jit xee kamxjam, Jiamx Honghuix mng qinw qinw.

“Liw tingww kar denrnue laii guanw qongsix mng a. Guaw ciuxqix-aw marr longxx e kuix lehh.”Bunqed sui' dab.

Beh dngw .kir jinwjingg, Bunqed qra inx jiyh venrsow beh sew jit xe aw ciuw. Langg’ qra ix vyr duiww aurviah kir. Hangrlo nng vingg ee qecqingx, dywciuxvingg jitt qingx si conglimw, mngg kuix kuix, huewdew tanxhnuaii jap-zi, dunxlunxtahlac muaxlagban. Jniawciuxvingg jitt qingx mngg qnuaix byy siw u lirpang, iokliok snax qix jingxtauu-aw hiacc kuah. Bunqed soksog ngiaw .jit .xe, knuar diyc lairdew u jit dingw bincngg qapp jit niaw byy jih ee mijiycpue u dua angg huex.

3.

Vongdudqanx, qongciax dongwdiam. Cuah jit xe jingsinn, bagjiux vreh kuix jid’err knuar, Lerhunn trow jit xee duarsimkuir. Iauxqycc dirr Sinciu Lo dingw.

Siongsanx huad ee ciavangx beh sraiw qaur Sinjngx, cni’angdingx diyhh quer sxor jap xee, qycc rair hiyh jam kiyh kxeh, qui’ jua longxx byy trad iarr diyhh qui’ diamxjingx. Qongciax lirlorhenw bersux iyqyy. Narr u ixaxui tangx jre, dirr ciax-dingw kunr .kir si jin’ jurzenn. Denrciax qex jiokk jai, dirr ciax-lai qycc tangx knuar ceh. Vutzirqyr, denrciax ee lorsnuar iauxx iuxhan. Viw did druar dirr Bagsax :ee, Sinjngx ee jurbinn qitai jre denrciax siongrvanx, siongrr byy, diyhh ban langg' jap dxangx.

Quiqiw dring siw siw, lak lxauu kiw .kir, lau’axcur rair sed liulongg. Qniax ic'uad qex kaix jnii, go-lxauu-kiw ee qongxuxcur quirnarr vaii dangjee kiw, jerje langg cniuw beh dic. Hang-aw ec dakdag, siy’ siamw ciax be ex .diyc rair u vunxdingw. Cur kiw qaxx beh qangg aw beh qangg. Guarkauxlangg sraiw ciax zip .laii qniaa m jaix lo cud .kir, dirr Lerhunn inx daux jitt kouii-aw qaiww suwsiongg.

Qaux qaux qnrua qnrua vreh qaur go lxauu dingw, duxjiah kir honghunx-ci-aw kuanw ee cair singx kngr dirr tokax tangx tec syxsii. Trow jit kauw kuir jiokk dimm. Harvanx liauxau ee sittauu, mngg kuix .kuix jiacc beh kaisiw.

“Biw guaw vrangx liw sew hyw jinw dirr denrqyx dngdecc juw. Liw diyhh kacc si lehh. Didix ing’amr rair voxsip, diyhh hur ix cid diamw siongrkyr.” Jiacc dac zip mngg, a’buw libuxlilex qongw jit dua qnrua, naxx decc vangr paur-aw.

“Diyhh juw liw ee gxiac bor?” Lerhunn mng.

“Mrbenw. Ing’amr beh qnuaw sxid, iurqycc rair jyr qaur snax qnxix byy vnuawmii.” Cuir qongw, a’buw jre dirr ngii qoxiw byingg decc cing juixhiax. Piaujunw ee cingrcah: hiaqongw, ciuxngxsog, bangrqinx, qaur qangdniuu, rair qycc hogbin. Jingquer sittauu je, jyr be kir, a’buw marr bad qiyr Lerhunn bongxx kir draur jyr, draur kaciuw.

“Tokax qaxnaxx liamlilec, jiac amr vaw rair zriuu. Vangqingx iarr u vunwsywlangw, m hyw qanda’ vniar venrsow qapp jauwkax ee. Tingwhau hiyckunwzit u ingqangx, puerdnuax rair vrag lyc laii sui’ niaw aw sew sew lehh.” Beh kir jycsid jinwjingg, a’buw dairjir qaudair be suah.

“Narr byy hyw hongzit, sew marr be dax. Quikir mair sew kacc ngiaa.” Lerhunn inwcuir.

“Puerdnuax pipak, nar quw jongw si e dax. Guaw iarr byy qiyr liw jitt lexvair-lai jongw sew .kiw .laii.”

A’buw pnaiw sniasaur. Lerhunn byy qycc vyccuir. Buxaxqniaw nng xee longxx auwduhbin ~.

Laurbuw cud mngg kir jycsid. Cur nirr ee kangkuer, jyr langg' jaboxqniaw :ee rair draur pnikinx. Sxix cair qapp qingw cair ee qangjingg kacc dua. Sew hyw, ced hyw, gas kuix .kuix, beh jenx beh caw longxx kuair kuair :ar. Loxbi jarhngx kngr zip kir vingsniux vingx, jit xe aw quw dyrr venr amxdangr, jinw tec cud laii tng, rngiuu .kir marr si jit xe aw quw. Dauriuu snesingg rair, vecqag, qniubuw qapp jucangx, jyliau jairr langg lyc. Daurqnuax, haixdaiwcair qapp loxnng, jitt snax hxang sngr dua qiywsiaur, vutsii rair cutdniuu. Ursii qacpuer qekax, ursii kngr dido, kiyh kiyh jyr jit dniaw habjywhuew lyc kir low. Vinrdnuarlangg beh singw qangx diyh’air sniu petvo. Loxbi low jit dniaw, pow pow aw tangx ingwhur lecc qui’ lexvair.

“Vaiqud sir der dog hyw hyw, lanw duxhyw jit langg jit der. Liw nacc qa’ngg jiac sianghun?" Cang’axnng jenx hyw pangg .laii, knuar diyc dyh-dingw vaiqud kir siyxvnuar, Lerhunn liammix jai’ngiaw si iauquiw siyxdi qa'ngg gneh kir puer.

“A’buw ing’amr byy dirr cur nirr, ix ee hxun guaw ter ix jiac.” Siyxdi rinr qaxx jiokk hyxser. 

Lerhunn jiokk vuthok, pen’ pen’ aw byy jaidiau duc ix jit qxur iacc vnuar qxur. Suacbuew qniaw diktiongw. Ix jin’ jaix, junw a’buw jitt jun dirr cur nirr, qui'uaw a’buw hitt der vaiqud, jap hunx jiamr qauw hunx qauw, quibuew e zip siyxdi ee vakdoxdew.

Naxx jiac naxx knuar denrsi, jit cud banggah vnuax suah, buexau jit cuir vng qut ludsut tunx .lyc .kir, siyxdi pnai’aw pnai lehh, pinpinx-piangrpiang cud .kir.

Denrsi kir qra qimr .srid, Lerhunn drew jit nguaw vng, dirr jiahvngrtniax qaqi jit xee langg liauu liauu aw si, unn unn aw vex. Jiac vaw, nguaxduu-aw-lai tec jit xee nguaxqongx .cud .laii, denrqyx ee cunvng qapp dyh-dingw ee caiwbuew, nguaxqongx duarbuw xee, iuguann drew qaxx jit nguaw jiamx jiamx. Nguaxvnuaa sew hyw kiyckab, Lerhunn kir huloqingx srinn jit tangw juiw, kectniax qaur jauwkax, vowtuax-aw srunn jit linr dngw, dagg xui it’ingr u qniakaqaur.

Dryr quaw satbunhunw, sexsnaqix jun hro qniaa. Qui’ tangw lacsap snxax, u a’buw jycsid decc cing ee uisuqunn, u siyxdi haghau ee unrdongrsnax, a’hniax ee gu’axkor qau dutdud danr dirr siongrr dingxquann, lenqex-qapkauw ee snxax jee qaur, dogdok byy knuar qnir siyxjiaxlangg lairsnakor ee ngiaxjiah.

Sexsnaqix vangr lecc hro gryy. Jahngx dyrr u anwsngr ing’amr beh sew tauu, Lerhunn taujangx byy qaiww dngg, mrqycc dua py, jin’ yh dax. Byy quanwsir iong denrcuex, byy tranr jaw, taujangx iauxx damm damm dyrr jauw kir kunr, binaxzit taukag unw tniar lecc qui’ qangx. Jit tangw siyw juiw, sinkux qapp taujangx jongw vaulamw, qycc tangx sew lingper-aw qapp lairkor. Byy zuarr je vowpid, sexsnavangx iuguann qra cniaw .lyc .laii. Zuee jit xee sniu’ cud lat, satbunpyx punr duiww bagbaii-dingw. Bagjiux qyy diyc sapbunn e sni. Lerhunn qorr cingkir ee ciuxvnuaa qinw qra hruee driau.

Lordaii ee sexsnaqix konglong ~ dng’ vniawsir. Qeh jit dow viah, dirr huloqingx lairdew :ee tangx tniax qaxx bingg ~ ~.

Jap-zi huer beh sringx qokdiongx hitt nii ee zuac .langg, Lerhunn dirr cur nirr kir venrsow, kor trngr .lyc .laii, huatqenr dingxquann u bag huih. Diyc cniqniax, dua sniax huah a’buw. A’buw cuir bih bih, kir tuacduu-aw tec jit vaux Kyr Did Ju hro :ix, qiyr ix tec jit der ju dirr kor-drew, qycc huanhur qongxx lasixsamm ee kor, kacc danw diyhh sunsuar jnrix jnrix .kiw .laii. Suar .lyc hitt qui’ lexvair, Lerhunn byy qycc qra lairkor danr zip kir sexsnaqix lairdew. Au .laii, byy hanrdnia dirr guehsinr laii, dagg qangx ix longxx qorr ciuw sew qaqi ee lairsnakor. Sexsnaqix naxx jit dniaw jab'yqnix. Siongrqaiww dacba ee sincing diyhh qapp javolangg :ee dauwdin dirr hitt lairbin decc qaw, Lerhunn qanda’ sniu dyrr qiongbeh tror.

“Lerhunn, liw dirr lairdew si bor?”

Cringx juiw quer tua jiacc beh jun hro dax, hionghiongg, a’hniax dirr guarkauw longr mngg. Hariwsikdig, Lerhunn siangx ciuw lamw hxingx, uat tauu jimjiog mngsngx u srngx .byy.

“Hne lar.” Lerhunn jedjet rinr.

“Kacc qinw lehh. Guaw beh vangr ziy.”

“Liammix hyw ar. Decc cing snxax :ar.”

Qinw kax qinw ciuw, kunwsnax siongrr dingxtauu nng liap liuw-aw be qor did liuw. Mngg kuix .kuix, sui’ knuar diyc a’hniax jit senx langg dua dua jangg kia dirr mngcuir, jit xee bin jiamjni jiamjni, siajuh henr hxingx.

“Liw nacc jiacc siyy jiacc gauu rmox lar? Au vaiw liw sinkux kacc jaw sew lehh.” A’hniax jit xee bixtaibin, mngg iarr byy qnuaix, tuaclen-aw tuah .lyc .laii sui’ dyrr siautauw.

Aurviah ee lordaii byy horjac kacc e puah ho, snxax sew hyw diyhh qnrua kir taujingg pix jiacc jairunw. Snaaxkor tenw kuix, Lerhunn sui’ niaw aw qra pix druar snaaxqyx. Beh jap diamw :ar, cuwvnix-taubuew iauxx jiokk uahkuir. Laudingw ee qauxqangx decc vui, laukax ee qauxbuw liammisii inwcuir; duiwbin zi lxauu ee ang’axbow iurqycc decc uanqex lyduarjer, sir lxauu ee sirdua decc pah sirser; dnaxqag ee zinqedaux decc knuar ciywkuecud, uatqag ee denrsi decc vnuax…?!

Knuar jit xee jinx, Lerhunn simjong pigpok tiaur.

Venrsow o’ngiaw ~, cur-lai byy-dong.-byy-jing. A'hniax qamxx iaxx dirr hitt lairbin? Lerhunn sniu diyc simx huann ir luan.

4.

Zi-jap-id sewqiw ee tauqelangg taukag uac, jiangw surgiap gauu sniu lo. Ziddiongdaur, nng diamxjingx dah dah hro sinlyy hiyh jit xe kacc u lehh, sui’ langg erdauwvox iurqycc uac linglingg, jingsinn vaxjiog be kacc sux dingxvox, ganw-jingx-ciuw-kuair, sokdo qapp jid liongxjuann.

Jiac vng vaw, jit dniux siaw qaxx bat bat si ee suatbingsux, Bunqed an’ siongrr tauu:a jit zri tak kiw, byy tiaur jua, byy langr zri, qui’ee jiauww vo laii. Jairr ix ee quanliam, e-be benw langg gauu, siqanx kingw liauw, vyxniaw yc erhiauw.

Digitol siongwqix, Bunqed siauwsniu beh qui’ dxangx :ar. Jnijuiw suisi liauliong, beh qingw dycc jit hxingg dycc jit xee vaijuw, quewdiuu u kacc pnaiw lib’ir. Bunqed simqnuadew poxmec u liac jit xee hiongr. Siongwqix ee qonglingg je, dikgunn be qaiww lirqingx, guarkuanw suiw-baiw vaii siongrr buew kxamw, tangx vauvyw quiw nii siongrqaiww jiwiaur. Narr denrkiwpinw, acbuew jitt jann mng u jinx, jniqngwtauu ix jiacc u tauw .kuix.

U cuir qongw vadd langg, iarr diyhh crunx ciuw bongx simqnuax. Duiww qaqi ee kecmngg, Bunqed uanaxx diong sinwiong, be holiupiur, ue m qnaw vnaixtnai laii vnaixtnai kir. Huewqnia sriaux .cud .kir, siogho hogbu hyw-baiw ingxingw jiacc jaix su’ngiaa.

Nng diamw, siongwqix ee den jiacc ced driau, jongxqix jit tongx denrue laii, qongw Siongsanx ee kecho, inx denrnauw nngxtew iurqycc decc juai, beh cniaw Bunqed cinsinx jauw .jit .jua.

“Iurqycc beh kir ‘busoxvud :ee’ hitt qingx?” Bunqed dywciuxvingg-vnix ee dongsu decc mng.

“Hner a.” Bunqed rinr.

“Liw qamxx byy beh singx kar denrue? Denrue-diongx erdangr vaiqaiw, dyrr benw jit jua qangx jauw qaxx hiacc hng .kir.” Dongsu qra qenwgi.

“Qongw be cunciax lar. Guaw jitt jun dyrr qinw laii kir. Narr u sunrsi byy kuawkad, ervox aurviah hang ee vau’aw kiw sngg, huanrser guaw iauxx hur e diyc.”

“Snax qangx nng qangx dyrr laii decc hiamwqiur, inx marr birbenw sniu’ quer qerlo!” Dongsu knuar qaxx vutbok.

“Inx urngiaw u kacc hamban. Beh anwjnuaw qongw lehh? Ngi'axtngx suex-ong ngiuw.” Bunqed kenciyr.

“Qamxx m si qongxx, inx lairdew ee huerqer bue qewangx iauxx jiokk siauwlenn? Qiamxcaiw si qoniuu-aw kir snah diyc liw ee dingxvakquar, denrnauw berhiauw si jiauwsuu, sidjai si air beh knuar diyc endauu aw hniax.” Jniawciuxvingg ee dongsu iarr laii camx .jit .kax. Bunqed byy inwue, haax haax nng sniax junw .quer.

Lorjua byy sik dna’ taukixsingx jit vaiw, byhqongxqiyh jitt jruw jitt jam aw naxx decc qniaa jauwkax. Odobai dyc’ui u der tingg, dycc jit qingx ee diamxsimx cnixcuir, ix jinw iarr sik lauwlaur.

“Jitt qingx ee hunxngii juw qaxx nngw kiu kiu, lingdee kiwbi marr be baiw. Liw limx knuar mai.” Bunqed qra jit vxuex hunxngii-lingdee dux hro Lerhunn.

“Anxnix nacc hyw?" Lerhunn qongw. "Vutsii rair qra liw lyx dyrr decc jiokk uwkir, suacc qycc hro liw suxhuir!”

“Dnaxx jex iarr m jniaa jnii. Liw mair qapp guaw kectyr lar.” Bunqed qycjaiww qra lingdee dux jinwjingg. Byy qycc tesii, Lerhunn jitt huee u qra jrih .quer .laii.

“Jitt daii denrnauw qaxnaxx e qapp guaw jyr duiwtauu. Dingg jua liw laii dy' hyxser ~, diyc qaur guaw caujog, sen' qiyr be qniaa.” Lerhunn qongw liauw, cuiwdunn hiyx .kiw .laii

“Denrnauw e zin langg, jex liw m jaix or?” Sun siyxjiaw ee uerir, Bunqed jre dirr denrnauw taujingg, qapp Lerhunn jit qxur laii, jit qxur kir. Lerhunn tniax .jit .xe kiw air ciyr, jit cuir lingdee hiamw hiamw bu .cud .laii.

“Tauqex byy dilehh?” Jingxtauu-aw naxx decc dinxdang, Bunqed hiongr lairvingg siamx .jit .xe.

“Ix kir erqangw siux siaur, rair qui’ lexvair jiacc e dngw .laii.” Lerhunn rinr.

“Sidjai qenwsiaur. Jiamx .Sensnix marr qaxnaxx guaw ee huer narnia, langg’ ix u qaqi ee surgiap, qycc jyr qaxx u jit xee huezi.”

“Vin' ix, iarr suacc u jaidiau kuix qongsix? Jitt qingx si ix jit xee buxqu vangr hro ix hnua :ee.” 

Tniax Lerhunn qongw liauw, Bunqed dua cuir kuix hna hna viauxsi iwgua, hiongr siyxjiaxlangg dnaxtamr, qinw beh jaix jit xee tauhang.

“Inx a’qxu byy qniaw, jinw vnuax kir dirr Niu Ziland inx dua hanr jaboxqniaw hiax. Qaxnaxx si qongxx lyc junn-.nii kir :ee, u pacsngr beh dirr hiax iongxsiam.” Jyr jit kuir, Lerhunn qongw kiw jiokk qudcuir.

“Liw druar dy’ byy vnuar dxangx, qycc jai’ngiaw jiacc je dairjir .diyc!” Bunqed qongw.

“Singliw si Jiamx .Sensnix decc qing’ingg, mrqycc qongsix ee dua tauqex tauwdew si inx a'qxu. Qenwnarr u simxmih bunqnia, junxdnuax, mic’arvar :ee rair ciamx miaa rue hy, guaw diyhh faks kir Niu Ziland, byy dyrr kir qiar iuven.” 

“Jiacc huiwkir or!" Bunqed huah cud sniax.

“Qycc m na anxnix. Dagg qywguec ee guansiux-cutjunn, jit diauu jitt diauu guaw longxx diyhh lrik .cud .laii, sii qaur faks .quer .kir. Guaw decc iyh, inx a’qxu duiww jitt xee guersingx dairkair marr byy decc zuarr hongwsimx ee kuanw.”

Ue qongw u jiac qxax, denrnauw ee bunrdee liaurliw qaur jit xee herlyc, qangdingsux beh vangr vo hro siyxjiaw.

“Bidbew liw qaqi cic, benw guaw jaix.” Bunqed qongw, sui’ beh niu xui hro Lerhunn.

“Bidbew diyhh guanw Jiamx .Sensnix jiacc jaix.”

“Byy bidbew tangx zip kir hertongw, liw jyr u simxmih hangrdangr?”

“Jin’ iuxhan dyrr driyc m.” Lerhunn cuir bih bih. “Jitt qingx qongsix longxqiong jiacc diongrdat zuarr je? Qra guaw junw cat-aw decc hrongg! Sidjai knuar langg' jiokk baglai byy.”

U damrvyc aw gairgiyc, Bunqed jidsii m jaix diyhh qongw sniaw qra kuanwuir. Hyw did ix sngr u kiauwsinn, sec jit xe logqag, qongxx beh qar Lerhunn jit quaw qivunw ee vorsor.

“Dangtauu qanghux yc jitt vew, liw tangx ingwhur qaur dangbuew.” Bunqed qikqud qongw. Lerhunn tniax diyc ciyr gix gix.

Viw did tauqex, Lerhunn urngiaw kacc hunrdun. Liammisii dongxanr byy sef, siyxtingg aw dongxmiaa snix siangsnix, d.-dangsaix-s., jap-jap-veh-veh.

“Liw jit kunr qar jiacc je, langg’ beh nacc yc e kiw? Lanw qinaxzit dyrr qaur jiax, hyw bor?” Lerhunn caciuw decc sainaix.

“Ersaih a! Mrqycc au jua laii, guaw beh singx qra liw kyxcir.” Bunqed qew hyw hangxtauu.

“Hnaa, rair kyxcir or! Acc narr kyw byy qibqeh e anwjnuaw?”

“Rair vrag puee dre cokngx.”

“Jiacc hinggik! Guaw qanda’ qniax dy’ siw.”

Sir bak siongduir, nng langg longxx ciyr qaxx cunhongx muaw bin.

Ervox iauxx cud dua zit, mngxvox suacc ohunn-sit’amr, u decc qikho ee kuanxsid. Byy jah hormuax, ho tnidingw puah .lyc .laii jinwjingg, Bunqed diyhh qnuaw dngw kir qongsix, jiacc be ag qaxx damm dicdih.

“Jitt nng dniux denrngiaxpiyr hro :liw. Jitt cud tniax qongxx pah liauw be baiw.” Bunqed an’ puelag-aw tiux nng dniux hiwdnuax dux hro Lerhunn.

“Liw qaqi nacc byy beh kir knuar?” Lerhunn mng.

“Jit xee langg knuar denrngiaw kacc byy kuanxkiog. Qacc jiyx byy pnua, vutzuu hro liw qapp linw javoving’iuw jywhuew kir knuar.”

“Si’angw qra liw qongw guaw u javoving’iuw?”

“Linw jitt hy huer ee qoniuu longxx marr u langg decc ziog. Je qapp jiyw narnia.”

“U langg laii beh ziog, guaw qamxx dyrr cinwcaiw qapp ix cud .kir? Ngua junw si liw, qamxx e?”

“M jaix ne, m bad qinggiam .quer.” Bunqed beh ciyr dner m ciyr. “Dairkair si be ee kuanw.”

“Si or. Qacc anxnix, lanw dyrr byy huatdo jywhuew kir knuar.”

Jin’ byy qanxdanx, siyxjiaw pah jit qix qunx .cud .laii. Bunqed itsimx-it’ir beh kiyh laii qaur, dyrr qinw vuexhue, qongxx vunxjniaa dyrr anwsngr inx jit langg jit dniux, jingcax tauduxjiah pnaixser kuix cuir qra iaucniaw. Ix qycc tegi, qongxx minaxehngx dyrr tingwhyw kir.

“Acc beh iog dirr dyhh?” Lerhunn mng.

“Liw qra guaw qongw linw daux derjiw. Guaw sraiw ciax laii kir jair :liw.”

“Liw u ciax or!” Lerhunn bagjiux denw dua luiw.

“Jit daii Nissan dingw dingw qywguec jiacc kanx :ee. Cur ee dairkuanw marr lap quixnarr dxangx :a. Tauqii-henrkuanw si guanw a’buw qapp a’jew draur cud :ee dyrr urngiaw.”

“U cur qycc u ciax, liw hyxqadangr oox!” Lerhunn ciywbin siy’ knuar.

“Dua qehuew m sngr si, auxban’aw iauxx erdid quer lar.”

Tnidingw luiqongx kurku hauw. Bunqed beh jauw jinwjingg, nng langg ioksog lexvaiwzit sna’ qnir.

5.

Ngiuhogduu be ser xee, iuguann jnrix qaxx jat tongxtongw, beh vrag jit~vnuar niaw aw lyc .laii diyhh qex iong quaw kuiwlat. Bincngg-dingw q.-qniqee-q. juann juann snaaxkor, u singg lorvnix decc huah siogbe :ee. Jit niaw hiuu-aw pomii :ee, bid’ngg ee sikdir, cing dirr sinkudingw jiokk duarvan. Qinaxzit kacc siyzuac, qniax qnuarjuiw crid be li, jiacc an’ ngiuhogduu qra cniaw .lyc .laii, Lerhunn sui’ qycc qra cniaw .dngw .kir. U likqingw ee siuwqunn kacc byy qaur katauunguaw, snax dxangx jingg brew :ee, jinw beh cing, ix qniax e quewtauu cingcunx. Jit sxux ngiuhogjongx, qenwvunxduu ee ang’aw laii cing si jiokk suiw kuanw. Quixnarr cingx quer jit cingx, jitt guehzit sincing ee kaicud uirdiyhh jitt sxux jongw pah pah .siw. Qangrkuanw ee snxax cing dirr qaqi ee sinkudingw, dirr kiarqniar taujingg jid’err knuar, snxax ee ngiursig qui’ee jauxvan .kir. Lerhunn qinw qra trngr .lyc .laii, bersux qex ganw jit biyw dyrr qex jaksimx.

Qniwjinx byy qaxx jit sxux e qniwjingr tihh!

Sniu’ jiap qniwbin dyrr si u jitt vo baiw. Lerhunn siongrvanx cing :ee hitt quiw sxux, hitt xee langg qaxnaxx longxx bad knuar .quer. Sniu byy vo :ar, qovutzirjiongx, a’buw ee snxax iarr bongxx tec cud laii viw.

Limw limw aw beh snax-jap pnee ee cur, juw vng qapp jiac vng ee xui dikkag rair liong .cud .laii, sexsinkux quaww venrsow ee soxjai qyckacc diyh’air, langkectniax u-byy erdangr cinwcaiw. Druu jiaxee cunx :ee, Lerhunn inx daux longxqiong qig snax qingx vangg, druar sir xee langg.

Iauxx bue vnuacur jinwjingg, Lerhunn dyrr ciangwkixtauu, qongxx ix qo’ jit xee jaboxginxaxlangg diyhh qaqi druar jit qingx vangg, kacc ser qingx byy siongqanx; Duarhniax qapp siyxdi nng xee javox :ee kunr hitt qingx siongrr dua qingx :ee; qapp langkectniax qorr mocviacduu qeckuix hitt qingx diongvan aw dua :ee, a’buw laii druar duxduxhyw. Buerjingg qongw suah, nng xee javox :ee kogkok hnair tauu. Dagg qywguec decc lap dairkuanw :ee qig sim sim, byy-sniax-byy-sueh. Lerhunn byy langg oenw, nng piyr duiww jit piyr, jabow :ee jitt vingg sux .kir, laurbuw qapp jaboxqniaw snaqab kunr jit qingx.

“Qapp guaw kunr si decc zuarr baiw? Acc byy, liw si air beh qapp si’angw kunr?”

Kixsingx jiacc jiacc gixdnia ee sii, Lerhunn jiokk m qamguan, iauxx samxsniu beh saixlong a’buw jingxsniax, survutliau, suacc hro a’buw qra giaksiag.

“Si anwjnuaw diyhh hiacc kikvok? Ix qamxx m jaix qongxue quawqud e siongx diyc langg? Jaboxqniaw cinsnix :ee. Buxziok diyc qunqux qalauc :ee, ix qamxx dyrr e knuawuac?”

Hitt amr ee zidqiwpo, bunrdee-qiwhy kacc je quer longxjongw. Quaww sryw ee simsniax, byy beh qongw vunx langg tniax. Utkir byy qiamw u qex, qu :ee cauwqox, sinx :ee huad qnar.

Saaxduu duarvingg ee snxax sriok a’buw ee qehuew. Cimxx vnuax .zip .laii ee sii, buxaxqniaw dyrr u qongw tonghyy, jaboxqniaw ee snxax kngr siyxvingg, laurbuw :ee jinrliong uaw dywciuxvingg diaur. Bad u jit~nng vaiw aw jiyh a’buw ee snxax cing, aurbuew byy kngr qui’ui, a’buw byy-ue-byy-qxur, dng’ ix ee bin quaww snaaxqingx qra snxax cniaw .dngw .kir. Acc narr Lerhunn ee snxax jauw quewqair, a’buw knuar .diyc, iarr sui’ e qra sag duiww jniawvingg .kir.

Jit niaw sowbin daurzinlik ee misequnn, ingwqaix si a’buw sinx brew :ee, ham' Lerhunn dingxsinx jitt niaw gulingvec :ee u puewcah. Vakdoxvnix u kacc ling, iyduar diyhh haa lehh kacc dingrdongr, benw did siyw danw cud .kir dirr guarkauw kahkac langw.

Langkectniax denrue decc giangx. Lerhunn giaa tauu knuar diauwjingx, simlai iyh qongxx jitt tongx denrue vycqnaxx beh cue ix :ee. Sniar sniar, a’buw dirr guarbin hiamr ix ee miaa. Rinr sniax si, c.-cniuxcuah-c. A’buw qedaisinn, qex danw jit biyxjingx dyrr u singwde.

“Uee.”

“Uee, guaw Jngx Bunqed lar.”

“Liw langg jitmaw dirr dyhh?”

“Linw hang-aw-kauw u jit dnar vinnngg-dnar. Guaw ciax siyw jiyh tingg lehh e ho’ngg tuax .kir .be?”

“Liw diamr ciax-dingw danw .guaw dyrr hyw. Guaw liammix lyc .kir.”

Denrue ced driau, Lerhunn kir vangqingx qnrua puevaux-aw, cud .laii ee sii, a’buw guanjai jre dirr langkectniax decc sxix binxdau-aw.

“Guaw qapp ving’iuw beh kir knuar ngiaxhir.” Soksog jit qxur ue, Lerhunn qnuaw beh cud mngg.

“E dngw laii jiac amr .be?” A’buw mng, snia'imx caa caa.

“Iauxx m jaix ne.”

“M jaix! Anxnix guaw vng beh anwjnuaw juw?”

“Jairlaii lanw dy’ juw nng kog vnuar. Narr u cunx vng, sii qaur jiacc drew .kiw .laii kngr vingsniux vingx.”

“Acc longxx benw puer cair, qanda’ vex vehvng dyrr driyc m?”

“Marr si ersaih a! Guaw jiac cinwsngx vng duarhanr :ee.”

Centuax ngua siuwee, Lerhunn uad lehh cud .kir, mngg “pong” jit sniax dua dua sniax.

Kacc byy jit pnee dua ee diamwtauu, u vingsniux, u denrsi. Decc qor vinnngg-dnar ee siyxjiaw cing jit niaw iurr dew iurr vaksinx ee snxax jre dirr jit jiah lyr-kax-iw dingxbin decc qauh jiyhhuex, nng qix katuiw dongrdong hnir. Jit dniux angg juaxpiyr dauxngua jit vaux cni’aw, qetqer u qongdy, kiwbi hyw-baiw diyhh vro knuar mai jiacc e jaix. Laii beh qauquanx ee langkeh, jap xee u qauw xee cuir-aw angg qiqix, vinnngg jid’err tec .diyc, sui’ danr jit liap zip cuiwkangx quewgenr.

Bunqed jre dirr ciax-lai, bakumiror siyw ciauu .jit .xe. Qniar-lai ee javolangg, nng vaii cuiwkiw vec siaksiag, dngrr kixsniuu; haixqat’axtauu puar jniawvingg, v.-vingsun-s.; cuiwciux kaux qaxx jiokk qngqueh, erhaii jit dah cnesiongx, ser aw kangx aw, byy jimjiog knuar, knuar byy.

Ang’axtauu u qibqeh, cingrcah byy duiwtin marr si liauxzenn. Siajuh u quer rud .quer, sejongkor didlongrsong, ham' dingxtauu snxax ee sikjuiw beh uaw aw beh uaw. Jabjir dingxquann u decc qar, qongxx jitt kuanw jngtna, langvan knuar .kiw .laii e kacc dngsngw.

Ngic'ngih-danw ee hing’ngiaw cuthen, Bunqed qinw lyc ciax, ciuxqud giaa quann he mia et.

“Liw ciax vehsig :ee!” Lerhunn qongw, bagjiux niar qimx.

“Hner a. Anwjnuaxngiu aw si bor?” Bunqed bagtauu jyr jit xe qad uaw .laii.

“Jurqa’iong :ee dyrr vec :ee siongrr suiw! Denrsi qenwnarr jyr qoxjongx :ee, hyw langg kiaa :ee marr longxx vec bew kacc je.”

Bunqed byy inwue, ciywsinn hen duw hen.

Sendiksenx, hiyrdikhiy, piyr ven ven laii qongw, rair rah ixaxui, Bunqed qapp Lerhunn iarr diyhh qapp langg' vailet. Huanbehbixpangx vrong qaxx pangx qongwqongr. Beh zip ngiaxhiwquanw jinwjingg, Bunqed u kir berdiamr kuanw jit quaw damrsamw qapp imxliaurjuiw. Quaww qongxqyr, jit cud hxir taubuew beh nng diamxjingx, vnuax suah, beh uaw lak diamw. Bunqed jiyx Lerhunn kir jiac amr.

“Lanw diyhh duiwqngx tnuasiaur iacc kaix qok’id, bersaiw hro liw cniaw oox!” Lerhunn prinw dairsingx.

“Hyw lar hyw lar, jiacqycc qongw.” Bunqed i’yx jiongsu.

Hiyckunwzit, kacc urmiaa ee cantniax dagg qingx dy’ buanxuann, byy singx kar denrue juwbunn, quatding rair dirr mngkauw danxvan.

“Pnaixser. Hro liw diamr jiax huadkia.” Bunqed qongw.

“Kia lehh kacc gauu dua.” Lerhunn qongw pokked.

“Hex urngiaw. Jabow :ee tangx dua qaur duardo.”

Nng langg naxx pah kixtog, tingwhau ee siqanx qex kacc kuair quer. Hogbursingx laii decc inxcua inx kir zi lxauu ee sianglangjy, menu jit langg jit hxun sunrsuar hro :inx.

“Guaw beh diamw jit xee siapusiapu. Acc liw lehh?” Bunqed mng Lerhunn.

“Inx jex lamen qaxnaxx jiokk hyw jiac kuanw. M jaix e juw sniu’ dua xee .be?”

“Juw dua xee jiacc hyw a, juw dua xee," Bunqed dab. "Liw narr jiac be liauw, guaw jiacc draur jiac. Guaw marr iauxx e dua.”

Cantniax jiongxpor cniar je xee, qacc u tangx zip .laii, danw beh jiac dyrr qinw ar. Lerhunn ee misosilu lamen juw hyw pangg .laii, Bunqed ee huexqydniaw marr dngdecc cix. Bacpnir jid’err lyc dniaw dyrr sik, Bunqed he nng der lyc .kir, suar .lyc, ziuhii, uahhee, ortauu qapp hi’uann iarr it’ingr sianghun.

“Duxjiah liw qongw beh qra guaw draur jiac, jinw dendyww guaw decc jiac liw ee .jit .cud.” Bunqed qra juw sik ee liaurliw gneh hro Lerhunn, Lerhunn sui’ duii ox dau.

“Hongwsimx lar. Guaw e lamxbuew.” Bunqed qongw suah nia, jit buew hee-aw iurqycc tiaur zip kir Lerhunn ee nguaxqongx lairdew.

“Vaxvii ar, jinjniar jiac be lyc ar.” Lerhunn syx vakdow, nguaw-drew iauxx cunx jit cog mi byy jiac.

“Jiac be lyc mair gne tunx. Lingrzit aw lanw ngua laii jiac Hanqog :ee. Vnevnee huexqyx qapp tngmi, kiwbi u jingcax.”

“Anxnix iarr suacc e dit! Liw cunn beh hai guaw venr duarkodaix iacc avutdyw m?”

“E jiac si jiahhog. Junw venr avutdyw, sii qaur marr si liw qapp guaw nng senx.”

Tniax Bunqed qongw liauw, Lerhunn lamw vakdow decc ciyr.

“Qongw diyc avutdyw. Linw qongsix u jit senx ven ven.” Bunqed bagjiux l.-liuciux-c.

“Liw si decc qongw Jiamx Honghuix m?" Lerhunn ciywsinn byy .kir. “Avutdyw jiokk qoxjuix-hxingg. Ix beh tacc u singg? Qongw ix naxx jit jiah diqyx kacc urngiaw.”

“Diqyx? Ix qamxx e…”

“E or, iarr u jit xee be!” Lerhunn jiapsuar ix ee uerbuew. “Kangkuewdniuu cai jit dingw sianglangg bincngg, byy vniwbangw, guaw jiacc sux :liw.”

“Liw u damrvyc aw duer be diyc sidai oox! Bagqimx ee siarhue, javox jabow beh dauwdin, zirviw-qamguan :ee, mrsaiw si angbow-aw.”

“Ix u cuarbow penr langg' qongxx ix jab’itqyx lar.” Lerhunn qongw qaxx qargee-cetciw.

“U bow!” Bunqed bagjiux ox luiluix tenw dua luiw. “U qadingg :ee qycc qnaw dirr qongsix pah cauwcyx, hex jingwqingx jnia’ hyxdnaw.”

“Inx lirenn .kir .ar.” Lerhunn voxtab jit qxur.

“Qacc lirenn dyrr byy sngwgiac a! Ix qongw ix si dogsinx-aw dyrr byy m driyc a!”

“Inx iauxx druar jywhuew, qongxx si qokk langg kunr jit qingx.”

“Si urngiaw iacc byngiaw? Jiacc huelixlyy!”

“Ix hitt xee langg jurdew dy’ jiokk lamrsamw laii, liw m jaix? Javolangg buhingjiw iacc byy dairjaii siongrr qor langg uanr.” Lerhunn qongw qaxx cuiwpuew pongr saisaix.

Dnuatauu laii, Lerhunn beh lap lamen ee jnii. Bunqed sui’ qra nuajiw.

“Guaw inx ee hueruann, jiac ciauquer go-vah kox itqiuxkaur. Jitt dxngr guaw cud. Lanw mair hro inx singlixlangg qex tanr.”

Uersueh qongw kiw sun-lriw-sun-lo. Lerhunn vangr Bunqed kir siauwqui uansiaur.

“Guaw qamxx erdangr kar denrue hro :liw?”

Jair siyxjiaw dngw qaur cur, Bunqed dirr Lerhunn beh lyc ciax jinwjingg mng kiw.

“Jyww liw kar a! Liw byy kar hro :guaw, guaw marr e cue :liw. Qongsix denrnauw ee bunrdee iauxx jit dua tuax.”

Qniaa qaur beh uaw hang-aw-kauw, Lerhunn qycc uat tauu qapp ciax-dingw :ee et ciuw. Danw qaur lang’ngiaw byy .kir, Bunqed qamguan :ar, vehsig ee jurqa’iong :ee qycjaiww kixdingg.

6.

“Kacc danw u jit xee sner Kow ee siyxjiaw e laii. Liw jiacc qra jiyhox.”

“Sner Qox?”

“Kow. Kow be liauw ee Kow.”

Dingxvox ee miting suah, viauwduarhniax qra Bunqed qiyr kir ix ee vanrqongsig qongxue. Cud .laii ee sii, Bunqed ciuw nirr tec jit jriw failu, jerje siangx bagjiux siongr duiww ix.

Jiahtaulorlangg, sinqimx sixquad, jyr kacc je, dagg guehzit marr niaw hiaxee. Kacc kinbenw kacc u diwsimx :ee, kecmngg qor e diauu, nijiongx kacc dua vaux, dirr qongsix qnialo marr qex jiokk u hongx.

Tewgnow co’ cud siarhue, jit xee dairhak ee dongcongx vyr Bunqed jit xee taulo, qongxx jitt kangx hyw kueh. Cuann kax vrih ciuw, Bunqed he quatjir beh dirr Daivag vniar jit pxenr tnix. Zip kir druar kacc byy vnuar dxangx, qongsix ee huwliw ham' giaa quirsii :ee dauwkangx beh qra jongxvan qred .lyc .laii. Gudiauu-lai dag gubuw, Bunqed saur diyc hongtaibuew. Langg’ jiyx ix camx .jit .kax, qycc hangxhuah qongxx narr m, lingrzit aw qongsix ngua inx jangxtauu, Bunqed diyhh dngw kir jiac qaqi. Beh qapp inx ciavniar vruee qaur drew, qniax qaqi ladjuiw kacc kat; uad lehh jauw, jit koxginn dy’ byy tangx tec, Bunqed iurqycc jiokk m qamguan.

“Suah suah .kir lar, u taukag, qniax byy suaby tangx dir? Uirdiyhh quiw bxan kox aw bruw dix bruw qxauw, junw hro liw tyw .diyc, dysiauw iarr e kir bag diyc cauwcnir. A'qox qamxx m si u qiyr liw kir qra inx qniaw draur jyr? Qaqi ee viauxhniax, kacc be qra lanw kibaiw.” A’jew hitt sii u kar denrue laii kuanxkngr. 

Simqnuatauu dua qunxjun, lorbuexciuw, Bunqed u tniax a’jew ee cuir.

Dyh-dingw ee denrue dann, lairsnuar ee sinwhyrdingx decc sih. Jongxqix-siyxjiaw laii decc vywsueh, qongxx qauquankeh qauwui :ar. Bunqed knuar jit xe aw viyw-aw, viw ioksog :ee kacc jaw jap-go hunjingx.

“Jitt xee pacsngr iarr qinxsingr :ee.” Bunqed simlai decc sniu, juliau tec lehh, qniaa duiww anwnairtniax. 

Langkeh jre tringg tringg, Bunqed dirr hng hng dyrr tangx knuar diyc ix ee aurviachingg. Taumngg dew dew, be samr samr ia ia, jamrzenn aw u hxingg, qingqactauu quer pongwiw u jit jad, jaboxlangg jitt xee quando sngr be ser hanr.

Dikkag u tniax diyc kavo-sniax, langkeh giaa tauu, an’ iw nirr vreh kiw, qiongbech qapp Bunqed vnii quann. Bunqed iyh ix u ciauquer vah-cid. Ix ednex be qaiww quann.

“Liw Jngx .Sensnix hnoh? Guaw sner Kow. Guaw qiyr Kow Qunhui.” Qunhui jniar ciuw crunx .cud .laii. Bunqed marr qinw crunx ciuw kir qapp ix ad. Siyxjiaxlangg ciuxqud lingw qiqix, gimrciuw ee ladtauu jiokk qed, jiokk diamrding.

Sanxue byy qex sueh, laii .jiarr jid’err dyrr puawdee. Jiac singlixvng, qongw singlixue. Jyr surgiap, beh qapp langg' u qingrjingx, sanxpinw vutsii huansinx qaiww iauwqinw. e-sidai, jyr singliw byy duer lecc e .kiw .laii, henrvutdnaw qapp langg' dy’ byy vniawbin. Bangrjiw cringw ven ven, bangriac danxtai langg he liau tnrix quaw sikcaiw.

“Knuar diyc suiw kuanw snesingg rair. Denrnauw guanw longxx jiokk lamxlo. Aurciuw bangriac beh tnitauu iacc tuiwjiab, aurvnee-setqer diyhh hahciuw, qonglingg rair je kuanw, mrqycc caujog diyhh zuxx qanxhuar zuxx hyw.” Lililylyx jit qnrua, Qunhui qongw kiw jiokk qudliur.

“Pnaixser, liw duxjiah qaxnaxx qongw linw decc jyr huii-aw cutkauw?” Bunqed mng.

“Vorhun nia. Vylee jiacc si duarsikhuer.”

“Longxx sriaux kir dyhh kacc je?”

“Bixjiux qapp Aujiux longxx u, sriaux Bixqog siongrr je.”

Bagtauu kiycqingw, Bunqed cuir bih bih, “Guaw u jit xee kecho, decc jyr porcelin guarsiaux, marr si qniaa Bixqog-snuar :ee. Jin’ sitlew, liw ee sittauu, guaw u simx, mrqycc jyr be qaur.”

Liyc aw gonggniac, jitt vaiw, ngua Qunhui decc lig bagbaii. “Inx qamxx u iauqiuu linw berdangr ter vadd qingx jyr?”

“Si byy lar. Mrqycc, siangvingg tec, jingliw kacc dew. Jitt diauu, guaw tanr be lyc ciuw.”

“Hylii-aw cunqiux ee kongqanx dy’ byy mah?” Qunhui iauxx byy sixsimx.

“Guanw qongsix qyciuw iauxx jiokk je xee. Liw ee kangkuer, guaw e cniaw guanw tauqex pair vadd langg jyr.” Bunqed sraiw gnerpiah, singr jin' qiang.

“Guaw u tamwtniax .quer. Bangriac jitt hongbin, linw qongsix dyrr liw siongrr cutdiyh. Vnivnii kaix hiaxee jnii, dniardiyc rair qingw itdingxid :ee.”

“Liw beh cue vadd qingx, guaw u siy’ vad :ee, inx qanghux marr longxx be baiw.”

“Guaw jitt diauu jnii, liw beh sag hro vadd qingx denrnauw-qongsix tanr?” Qunhui qongw, jin' vutsugi ee kuanw.

“Hner a.” Bunqed dimr tauu.

“Jitt qingx qongsix dycc jit zit narr byy beh qycc cniar :liw, liw u guaw ee mewsih, vutqisii longxx tingwhyw laii cue :guaw. Guaw qeqiamw u sigsai jit quaw diongsiyw-kiwgiabjuw, dikkag u jit xui tangx hro liw denw kaciuw.”

Jaw laii marr jaw jauw, Qunhui taubuew jre kacc byy vnuar diamxjingx. Bunqed huew jiokk dyc, denrue giaa .kiw .laii longxx benw qycc sniu. Jitt jam aw, jitt xee denruerhuanx ix siongrr jiap kar.

“Byy beh qra jyr dyrr kiw puiwbin, qycc jiuwcamr guaw ho’ngg srii taulo ne! Liw knuar u pnaiw simx .byy?” Tauwquer denrue, Bunqed qongw tauxkuir.

“Liw qongw hitt xee jabow sner Kow. Qamxx si Kow Qunhui?” Lerhunn mng.

“Si a! Linw u siy' vad?”

“Liw marr decc air suecciyr! Gunw jyr sinlyy :ee beh tacc u juqeh kir sigsai inx hitt hy tauqelangg?" Lerhunn hngc jit sniax. "Guaw si bad tniax guanw Jiamx .Sensnix qapp langg' decc qrangw, qongxx jitt xee jaboxlangg jiokk u ciuxuanw. Ix qapp jingg angx ciamzi snuawdauw qongxx u tyw diyc jit dur iongxsiamrginn. Ix jurr hiaxee kuix qongsix jyr singliw, quiw nii aw quer, jinw marr jyr qaxx u qix u hiyc :ar.”

“Dangsi'aw si lirenn :ee or! Acc inx qamxx u ginxaw?” Bunqed mng.

“Tniax qongxx u jit xee jaboxqniaw, duer laurbuw.”

“Hmr, urngiaw si qiycsiaur dyrr driyc. Huanrser ix u tamwtniax diyc guaw dyrr si ter linw setqer nngxtew :ee, qexir jnii beh hro guanw tanr, qiuwjinx si beh laii laur guaw ee ue, rair guaw tror jit quaw singlixdniuu ee siausid hro :ix.”

“Guaw qongw jit xee ngiaw, liw snix jit dua dxuix qniaw. Liw narr jinjniar hro linw tauqex qra liw qaixqor, liw tangx qaixdoo jyr tamwjingx.”

“Lenrr liw iarr decc qra guaw knuawsuex?”

“Dairzinn uan’ongw or, dairzinn! Langg’ gunw si decc ylyw liw jiokk jabjaii, dagg hxang e!”

Jit tongx denrue qongw id~zi-jap hunx be senrtauu. Denruersnuar zet huthud, sianglangg simqnuatauu dnibidbit.

7.

Dingxvox qauw diamw ee Niu Iork ciaciaqunw, dng' jing'ingx. Amwsii qauw diamw ee Daivag Sniaa nguar kunr, suesinn suesinn. Denrnauw-sidai ee singlixdniuu, EMAIL bersaih byy tihh. Puex laii puex kir, qewsiaur beh ciauu qaxx hyxser, benw jit qangx iarr diyhh vnuar zit. Jit tongx qokjer-denrue jin' siongvunw laii qongw, kacc singw sii, qycc tangx tanr diyc jit mii ansui.

Jyr tauqex mrbenw qnuaw siongrvanx packaw, jaxkiw laii kuix mngg :ee, jit nii suwquir, duarvnuar si Qunhui. Jit qangx ee kangkuer suah, simwbuexau jauw :ee, ingxingw iarr tauqelangg qaqi. Jairr Qunhui ee quanliam, dingxsix byy hyw ngiu, ersix qiyr kacc be qniaa. Qongsix naxx cinsniqniaw, qyckacc tiamxtauu iarr diyhh dixdngx.

Ervox kir giam hxuer dngw .laii, Qunhui qra ciax hiyh dirr aurviah dongr ee hang-aw. Beh kir kanx ciax, tamx diyc si qinrlo, honghuexhang amr niauniaux iarr diyhh qniaa. Ciywcniw ee MARCH sokqed ~, dngxuanx dngxuad jin’ saliac, qycc marr hyw hiyh ciax. Lorvnix ser aw xui, vadd langg ee ciax cah be zip .kir, Qunhui jitt daii qex ced .quiw .vaiw dyrr benw qycc kir siwqer cue. Ciax ser daii, guarvan kacc siauxqiok. A’jew dyrr bad qra diamxcnew, qongxx guarqog langkeh laii, diyhh qorr otau’aw jair kacc be srid langg' lew.

“Inx laii si beh kuanw hxuer knuar qangcniuw, m si laii decc latenx iusniuw. Daiuann ee diongsiyw-kiwgiap decc pangw jit qingx qongsix si jiokk gnerdauw. Lanw byy decc lingrkuir, hro inx jaix sidjingg, singliw qiamxcaiw kacc e dngmngg.” Venrvog qau kauxset, Qunhui cuir lrai, simqnuax h.-hunluan-l.

Syxsii jit qnua duarbuw qnua, cue diyc cur nii duarmngg hitt qix, cah zip kir syxsikangx anww jiangwvingg jun .kuix. Mngg si dangg :ee, rair dner quaw lat. Asangw knuar Qunhui dngw .laii, denrsi sui’ qra qimr .srid.

“Kow Siyxjiaw, liw jit quaw kacc hyw ee snxax dy’ m hyw danr zip kir sexsnaqix qaw, e lic snuawje.  Acc qycc hnoh, guaw qinaxzit pix snxax, knuar diyc liw jit niaw ju’axsnax ee jux-aw lag quixnarr liap .kir. Cincniu jitt kuanw snxax, diyhh sangr sew-snxax-aw-dxiamr. Qaqi sew, qex jiokk kuair pnaiw.” Asangw qongw diyc qinxdniux ninix, pihpihpiagpiak jyr jit dxauw.

“Byy qangai lar. Huai .kir junxduxsuah. Lingrqangx jitt hy snxax pac'ox u uwjur, guaw jiacc qaqi qorr ciuw sew.” Qunhui qinw qra andah.

“Acc hangx-snxax :ee lehh? Liw qamxx brew :ar?” Asangw suar lyc mng. 

"Iauxx bue lehh."

“Quixarr qangx byy cud zit, sib qaxx, sew hyw ee snxax pix qyckacc quw dy’ lrunr lrunr. Bycaiw guaw qra snxax sew hiacc cingkir. Guaw ingxquer decc qa’ngg riyx angngex-aw, langg’ inx hex sirduarlangg si iauwqinw qaxx or, jit niaw nuarsuee iarr diyhh quer hangx .quer jiacc e tec kir qra ginxaw haa. Dnaxx hex jit daii iarr byy zuarr je jnii, jnia’ bxan kox ingwqaix dyrr u :ar.”

“Pnaixser lar. Jitt jam aw qongsix duxhyw duarguec. Binaxjair au .zit, guaw jiacc laii kir denrkiwhangg juwbunn.”

Asangw dimr tauu viauxsi lixqaiw, uad lehh beh kir jauwkax qra qnedngr tng hro siyx.

“Guaw qaqi erhiauw congr. Nguar :ar. Liw qinw dngw .kir.”

“Druar duiwbin nia, si byy cax hex quiw hunjingx lar. Si qongxx, ing’amr u kacc air kunr si urngiaw,” naxx qongw, asangw cuir ngx lehh naxx decc pacham. “Sioktingg qinaxzit dirr haghau qorr sikjuaw auw jit jiah junn, jinw kngr dirr ix vangqingx ee judyh-aw-dingw. Ix beh kir kunr jinwjingg qaudair guaw qongxx liw dngw .laii diyhh vyr liw knuar. Guaw beh amr aw kir jriab .ix, knuar laii knuar kir, iarr si lanw Sioktingg jitt jiah siongrqaiww suiw, jyr qaxx siongrr singg.”

Qunhui qra asangw sangr kir qaur duarmngg, mngg qnuaix uaw .laii sunrsuar lyc sryw. Kinx kax ser ciuw kir qaur jaboxqniaw ee vangqingx. Bincngg-dingw :ee ngiu’axbak, bagjiupuee vnuar iamw mngg aw. Qunhui dac uaw .kir. Jaboxqniaw kunr u lyc binn .byy, jyr laurbuw :ee tniax sniax dyrr jaix. Dyh-dingw jit jiah juaw auw ee pangjunn kia jai jai, quwjai langg' qra himsiongw. Vnix:a ee lenlogpo-aw u henx .kuix, rair dirr binrdingw ciamx miaa :ee benw qycc hiaucue, lenrr vid dy’ cuann ven ven. Diamxdinghuexiuw ee sikig, Qunhui longxx iauxx dirr qongsix kacc je. Jitt lexvair, Qunhui iauxx byy ham' jaboxqniaw dauwdin jiac amr .quer.

“Jingquer liw decc ho’ngg cniar, dagg amr bruw qaxx snax qnxix mii vnuar, jit xee angsair qor qaxx byy .kir. Jitt jun qongsix qaqi ee, suacc iarr byy tangx vuah quaw siqanx hro jaboxqniaw. Liw dyrr qanda’ jitt xee tngsng’uann. Aurzit aw narr ham' liw byy qangg simx, liw beh kaur dy’ byy bagsaiw.” Knuar be juer .did, a’jew e qra siyxmue-aw suatqaur. Qunhui tniax u zip hni, u simx beh i'uat, henrsit kuanqingw jyr duiwtauu marr byy hxuad :ix.

Miaa ciamx hyxser, Qunhui qra vangqingmngg kinx kinx aw qnuaix uaw .laii. Kir qaur jiahvngrtniax, dyckamw henx .kuix. Crinr vng dngx iaux langg. Beh tingwhau qaur tng siyx, junw siau’ia dy’ hiamm sniu’ nguar. Quer auu m qniax siyx iarr m jaix lingw. Vngrcair vex zip cuir cinwcaiw vro .nng .xe dyrr tunx lyc vakdoxdew. Jiac cunx :ee kiyh kiyh jyr jit vnuaa iong qorr sokqamoc hrongx lehh tec zip kir vingsniux vingx. Nguaxped-aw kngr zip kir sexnguaxqix, asangw binaxjair laii e cuxliw.

Dycqui-dingw jit tac puesinr, siauwdnuax qapp jabjir, jit qangx jit jriw ho'ngg iong ciurlingsog-aw sog lehh. Asangw jycsid quanwsir jiauww vo laii, byy air cinwcaiw. Zidongg Vnerngi Guehkanx, dagg qywguec cavutdyx jitt xee sii dy’ e qiar laii hro Jniuw Sioktingg Memex. Jaboxqniaw iauxx byy jaidiau tak. Jyr mamax :ee qyckacc byy ingg, jitt hxun kanbut ee viaudee e qui’ee ngiaw .quer.

Nng dxangx jingg, jaboxqniaw go huer iauxx decc tak iuwdirhngg ee sii, u jit amr vorvinn huah vakdow tniar. Hitt jun cur nirr iauxx byy jurqa’iong :ee. Qunhui qra jaboxqniaw py lehh, vnuawqniajauw kir duarlorvnix jac qewdingg :ee. Jidlo vniar qaur isingquanw, sensnix jinxduanr, qongxx si modngg huat’iam, byy qinw ciuxsut, en’uan qniaqnir u vnerbuew.

Xia cimxr, Qunhui qo' jit langg dirr ciuxsudvangg kauxbin. Binrtaujingg jit qix qongqiong-denrue, jit koginn dyrr tingwhyw vnuax qiuwvingx, dyrr u qetding ee hingkamw tangx uaxping. Ginqag-aw dnec dirr ciuxtauu, simqnuax luan caucaux. Itbuexciuw, Qunhui iarr si qra hitt jitt koginn singw .lyc .laii byy kaisaiw .kir.

Ciuxsut sngr u sunrsi. Jaxkiw veh diamw, Qunhui an’ vnerngi kar denrue hro a’jew.

“Liw tacc e jiacc diaudit lar! Liw jarhngx dyrr ingqaix qra guaw qongw. Guaw kir, qeqiamw marr erdangr dauwkaciuw!” a’jew dirr denrue hitt vingg, iarr siurkir, iarr diyhqib.

“Hionghiongx-huwhur, ciuxqix-aw byy jah, sinkux qycc juann dua dniux :ee, byy ginqag-aw kar denrue.” Qunhui jiawue qongw. “Guaw kacc danw u sittauu rair cuxliw. Sioktingg ba’iyc iauxx bue trer, jitt jun iauxx decc kunr. Horsu huanhur qongxx, qaiww hyw lanw u langg dirr ix sinkuvnix qor, ix jingsinn ee sii kacc be diyhcneqniax.”

A’jew dua Qunhui go huer, sinquann viw Qunhui kacc ew, jixmuex-aw jingcax u jap-go qonghunx hiacc je. Ew bongxx ew, a'jew kaciuw jiokk liabjiap, jyr dairjir vutjiw qngjngg. Denrue qongw suah kacc byy vnuar diamxjingx, jyr langg’ a’ii :ee vniar qauwui, qycc u ham' Qunhui qnir diyc bin qongw diyc ue.

Sew jit xe aw ciuxbin, ngua jit sxux cingkir ee kunwsnax. Sianglangg bincngg qojinw-dogbenn, Qunhui iauxx hiamm byy qraur dua dingw. Qunhui pnaiw kunwpiah. Jaboxqniaw laii dirr ix vangqingx knuar denrsi knuar qaxx kunr .kir, Qunhui ingxingw e qra py dngw kir ix qaqi ee vangqingx kunr. Qunhui qniax vnuawmii aw narr qra jaboxqniaw pah jingsinn, qecdngw qangx ix kir haghau tagceh e ducqux byy jingsinn.

“Linw sidjai jiokk u lat. Guanw haursnix tak iyjixenw kir, guaw dyrr py ix be ngiaa :ar. Qenww vaiw ix dirr ciax-dingw kunr .kir qiyr be jingsinn, longxx marr diyhh guanw angx jiacc u jaidiau qra py zip kir cur-lai.” 'Haixngir-aw’ siyw qiqud, sewliabjiw. Dongconghue dag’ee naxx jiahvng naxx kaiqangw, ix snia'imx be viw langg' kacc ser.

“U jaidiau marr diyhh jongrkangx jyr byy jaidiau. Qiaux dicdih ee jaboxlangg kacc did javolangg tniar, jex linw m jaix or?” Qongw ee langg iauxx bue qewangx, qik gauu qa'ngg kausew.

“Hex urngiaw or.” ‘Vuii Milik’ janwcuir. “Guanw tauu:ee dniardnia marr decc piw .guaw, qongxx guaw bersux jit jiah guu, m na iongxjongr, qycc u sir xee xui, ix tanr byy qraur guaw jiac.”

Snax dxangx jingg ee jurhue, hiangwsii, Qunhui iauxx si jinvauu ee Jniuw Taiwtair. Hitt vaiw, ix cing jit niaw Kasimia ee ngiumngsnax kir, erdew si osig ee pactic’axkor qapp NIKE ee unrdongree. Angsair m si qaiww lyr. Jurr dairhak sigsai qaur vidgiap jyr angbow, qui’ jap dxangx, Qunhui jin’ hranw did cing quanqiac-aw.

Luanrjingx-aw setding dniardiyc, denrhuew qimr .srid. Qyckacc tiamw, qyckacc air kunr, binaxjair cid diamw, Qunhui quatding rair jingsinn. Ix beh qapp vyxvuer jaboxqniaw jywhuew jiac jaxkixdngr.

8.

Snax kavo, jit kxamw dxiamr. Dirr duarlo-vnix ee lau'axcur, id lxauu cavutdyx dagg qingx dy' decc jyr singliw. Ginhangg, byy dyrr habjoksia, jap qingx diamwbin inx jiamr jit qingx dirr henrvo sngr jin’ poxpenr. Vnivnii jnijuiw decc cud cud zip zip, beh dauwngiaa, m na viw lirsig quanqe, hogbu jyr u qauwqag, singliw cax jin’ je.

Siyxkuaw singliw decc qing'ingg marr rair vunw. Jniginn samvutven. Kacc jaw ixjingg, beh qra snax dua hangkor jiyh nng sxenw jnii diyhh snax-vyw-lak-zin. Henrsii ginhangg trad dyw qrex, sinwiong byy dyxdnar :ee, beh jiyh jnii quewliauu qex jiokk qanxdanx. Juliau cuann u jejngg, jiauww-kix.-jiauww-qangx jiauww vo laii, jnitauu ivuah si kuair kuair :ar.

“Jin' siw! Jaiburviyw guaw qaxnaxx qa’ngg kngr dirr cur nirr byy jah .laii.” Tauqex beh kir qra ginhangg jiujuanw, jit dniux A4 ee jaiburviyw siwqer decc cue byy, Lerhunn bin-aw cnex sunxsunw, ciuxqud gihgic cuah.

“Liw qra jaiburviyw tec dngw kir cur nirr congr sniaw?” Jiamx Honghuix qikquix, bagjiux ror ror.

“Acc dyrr jarhngx beh harvanx jinwjingg huathen siauwbak u m driyc, mrjiacc qra tec dngw kir cur nirr qycc dingg sngr jit vaiw.”

“Guaw qapp ginhangg ee langg iog jap-id diamw. Liw jitmaw hen jyr .cud .laii.” Jiamx Honghuix qra Lerhunn pnaiw sniasaur.

“Jinw longxx jap diamw :ar, beh congr qaxx laii, vaivec hur be diyc jap-id diamw. Guaw jre qewdingg :ee dngw laii tec kacc driyc.”

“Benw benw benw,” Jiamx Honghuix iyy ciuw. “Guaw sraiw ciax jair liw laii dngw. Liw mihqnia kuanw kuanw lehh. Kacc danw tangx sunrsuar kir ginhangg.”

Bersux decc siy’ jenr, jit biyxjingx dy’ be kamx did encenn. Jiamx Honghuix bin crinr decdeh. Lerhunn jre dirr qawsuw ee vnix:a, lenrr cuanxkuir dy’ jiokk sewzi.

“M hyw qycc syy kax syy ciuw, go hunjingx-lai diyh’air lyc .laii." Tauqelangg huatling.

Rinr sniax si, Lerhunn sui’ lyc ciax. Jit siangx kax naxx viag qoxdi, naxx jauw, qycc naxx decc cue syxsii. Snax janr lautuix jyr nng vo huac, qajair qinaxzit m si cing dew qunn. Byy hiyccuanw, qui’ lo vniar laii qaur go lxauu. Qnuaw huwhur, mngsyw jun .kuix, syxsii iuguann cah dirr hex dingxquann byy vrag .lyc .laii, ree-aw marr byy trngr. Bang’axmngg tuah .kuix, knuar byy jit xee langngiaw, cur-lai suacc u jaboxlangg ee sniax, hnix hnix hnaix hnaix.

M qnaw qycc dua sniax cuanxkuir, Lerhunn hnirkangx vniar kangx kangx, juwsinn decc cue snia’imx ee guantauu. Liamx kax nir vo, huatqenr a’hniax ee vangqingmngg kuix kuix byy qnuaix, Lerhunn kavo dongwdiam, amrqunw crunx dngg dngg ngr lairdew siamx .jit .xe. Bincngg-dingw jit duir lamluw ciah diauu diauu, setsinx lortew siy’ tac siy’ lamw; jabow :ee tanxciyr, javox :ee picpag.

Simlai u juerquar, jit duir bagjiux qan’ qan’ aw m qramx isuaw. Vut’ir, laukax u lacvax ee sniax, Lerhunn diyc jit qniax, beh huah cud sniax jinwjingg qinw qra cuir omx lehh. Bincngg-dingw :ee juanzenn byy junwbun .diyc ee kuanw, iarr byy tingg .jit .kig, iuguann byingg inx ee.

Dywter lux, liyc liyc aw li vangqingx u .jit .jad, Lerhunn uat jit xe srinx kuix kax qniaa. Lordaii jit siangx jaboxlangg ee liang'ee henrhen m si a’buw ee saiz, duxjiah beh zip .laii ee sii qongg suac suac, longxx byy juwir .diyc.

“Liw drong qui’ vox si decc syy sniaw?” Dirr ciax-lai danw jit xe quw, Jiamx Honghuix sraiw bagqag, piacpnir sui’ qycc laii.

“Acc dyrr… acc dyrr hitt hy, hitt hy…” Lerhunn utkauw.

“Dycc jit hy?”

“Dyrr hitt hy, hitt hy cue… cue byy.”

“Cue byy!” Jiamx Honghuix jit xee luiqongbin og ciccih. “An’ Daivag jit jua lo juanqangx laii qaur Sinjngx, iurqycc si byy. Liw cunvan decc qra guaw jrngx siauw :ee m?”

Tauu cih cih, binriongg amwdam. Q.-qiuquec-q., Lerhunn jit qxur qongw dy’ byy jaidiau sueh. Danw byy inwue, Jiamx Honghuix binrcniux qyckacc pnaiw knuar, ciuxqix-aw giaa .kiw .laii dyrr kar.

“Jin’ duiwvutju. Qongsix siyxjiaw jin' lauwceh, dirr jitt xee siiaur jiacc qra lanw qongw jitt hxang kiamr, hitt hxang byy. Duiww linw jiokk sitlew. Tingwhau mihqnia longxx jiaujee, siongrr ban, guaw binaxjair itding e quer .kir.”

Bersux decc ngua siauxquixbin, denrue qongw suah, Jiamx Honghuix iurqycc auwdurdu. Lerhunn uiwhniaw, sinqingsnuar kacc iur quer taumngqix. Qenwnarr virr siaudauw siurr tikme, ix longxx qankow qui’ qangx, be jiac be kunr dy’ e. Jitt diap, ix simqnuax uanaxx cingqingw be laii, mrqycc m si dandanx uirr jitt diauu dai.

Ciax huatdong kixqniaa, beh uad zip kir duarlo jinwjingg duw diyc angg dingx iurqycc dongwdiam. Tauqaur jniawciuxvingg jit dongr sir-janr-kiw ee qong'uxcur, byy qaxx jit qingx u langg druar, qycc iarr byy tiah, vangr quwjai lecc cri bangw, siwkolenwdngw pnaiw cauw huad qaxx vnuar langg quann. 

Dirr Gorqow qapp Sinjngx ee qauqair, u jit dongr lau’axcur kiw jit xee pue’aw nia suacc qongw m si qenwde, qenwsiongx jnii kuanw lehh jauw kir Cina, siurjai :ee snax~sir-jap hxo, cexunn, jit hxo liauw lecc lak~cid-jap-bxan tyw be dngw .laii, Lerhunn iarr qidiongx jit xee. 

Muakamr diyc cur nirr ee langg, Lerhunn taux taux aw kir lap jit qingx tywvangg-gxiac :ee. Kixtauu byy langg jaix, jit xee niauxcuxbuew siusuah qyckacc m hyw qongw kiw. Quixnarr jap bxan vehvec liauw .kir jitt jann narr langrhongx, Lerhunn simlai jaix jaix, hex unxdangr e hro inx me qaxx caur tauu nua hni.

“Laukax hanwiyhvangg ee sensniniuu decc jiyx hue-aw, jit-bxan kox :ee, anwsngr jiyx zi-jap kax, jit qywguec viyx jit vaiw, benw nng nii dyrr taur. Liw marr kir duer .jit .kax, beh jxig saikiax viw qiar dirr ginhangg qex jiokk qinw.”

“Guaw jiacc byy air. Dingw vrangx bre cair Gi :a hitt kax, liw qongw beh hro guaw siux buexhue, qetqyw qa’ngg viyx .kir.”

“Jex liw iarr decc qongw! Hitt kax siw hue longxx guaw decc lap :ee.”

“Huertaujnii si guaw cud :ee, liw iarr byy hingg :guaw.”

“Linw a’hniax hu jit srinx jrer, byy viyx hue-aw ter ix cinghuann, cunvan beh vig ix kir jauxlo?”

“Si’angw qiyr ix beh ovec qapp langg' dauwqow. Hro langg dyw .kir si ix qaqi bagjiux vreh byy qimx.”

“Guaw nacc e cri qaxx liw jitt xee jaboxqniaw jiacc kudcingg? Hex liw a'hniax ne!”

“Guaw byy jxingg? Guaw guehqib dagg gywguec tec jidvnuar cud laii hro cur nirr kaiing. Ix tec quiw ngii? Liw qenww vaiw dy' rui :ix, dagg hxang dy' qra vauvir!”

Uirdiyhh jnikangx, buxaxqniaw sna' vyccuir dirr snax dxangx jingg. Hiangwsii, ix dirr jit qingx iyjixenw draur cua ginxaw, jaxkiw cid diamw cud mngg, amwsii veh diamw huedngw qaur cur, jit guehzit tanr nng-bxan niuxginn.

“Hrunx kir qra guaw brew jit vaux laii.” Ciax tingg dirr jit qingx zxic-sir siyxsii ee jabhuewdiamr taujingg, Jiamx Honghuix lakdeaw zimm jit xee go-jap kox ee dangluix hro Lerhunn. Cid Cnxix :ee, benw qex qaudair, Lerhunn brew quixnarr vaiw quer jit vaiw :ar.

Ter langg brew hrunx ee qinggiam byy kueckiamr. Jyr ginxaw ee sii, a’vaa qingsiongg e ceqah Lerhunn kir qecviah qamxaxdiamr brew Dngsiu :ee. Kacc je si dan’ dan’ brew jit vaux, sinkux narr qanda’ dua dniux byy lansanx :ee, ursii marr e quikir qiyr Lerhunn brew qui’ diauu. Narr u jaurjnii, a’vaa dyrr sniuw hro Lerhunn junw kapuejnii. Snax kox go kox qeqiamw juanw, jitt hxang sittauu m si pnaiw kangx.

Hrunx brew .laii, Jiamx Honghuix sui’ tauw, liux jit qix cud .laii, huedyked ked hro dyc, dua dua cuir suh jit cuir singx decgenr. Jniar ciuw hnua qawsuxvnuaa, hunqix dyr ciuw nng qix jingxtauu-aw giab lehh, hunsaiw kar duiww txangx-aw-gua kir. 

Lerhunn knuar qaxx sinn sinn. Kacc jaw ixjingg duer a’hniax cud kir sangr hxuer, a’hniax dirr ciax-lai vog hrunx, jit xee juser qapp Jiamx Honghuix jinw itmoo-itngiu.

Hniamue cax nng huer, jyr ginxaw ee sii bad u jit jam, Lerhunn e qra a’hniax duer jingg duer au, jywhuew kunr jywhuew jiac, lenrr sew sinkux dy’ qangg sii qangg kud. Kacc duarhanr .laii, sinkux e u qyc’ngiu, taukag e jaix susniu. Jaboxginxaw jap-veh venr, jrngx hro suiw suiw tingwhau langg ziog. Javoginxaw dngw duarlangg, qnir diyc suiw qoniuu-aw e kiw ciyx.

Sniu qaur jiax, Lerhunn uat tauu hiongr qawsuw ee ertew bix .jit .xe. Giac bak, knuar diyc Jiamx Honghuix liac ix qimx qimx siongr, nng luiw bagjiux lyy lyy.

9.

“Linw tauqex siauxpixlenw, jywlangg qiamm quaww siab.”

“Jex guaw viw liw kacc jaix, hyw bor?”

“Narr si ix qiyr, guaw jiacc be genr kir.”

“Si. Liauxqaiw.”

Lerhunn jit tongx denrue laii, Bunqed hnuahiw dirr simlai. Javolangg cuir qniu, qeqiamw qig jit xee kuiwkauw snesingg rair :ee.

Cenqahuer denxlamxhue, dirr Daiuann jit nii jiacc jit vaiw, dnaxaxui quixlyhh qywguec jinwjingg dyrr ho’ngg dingqir liauw :ar. Uree qongsix ee dnaxaxui, jit pxenr kuah saisaix, bincngg qapp pongwiw nng~snax jxox dy’ kngr e lyc. Iarr u ser aw xui dna’ jit liauu iw-aw cam’ jit der dyh :ee, uanxzenn decc qa'ngg siongr mia. Singliw jiyx u jiyx byy benw sniu’ qiksngr, qyckacc anwjnuaw, iarr diyhh tranr jitt jun tongw jit xe tauu qapp langg' keh jit xui cuanxkuir.

“Linw tauqex lehh? Ix nacc vangr liw jit xee jaboxginxaw decc jycsid?” Jiauww ioksog qnuaw laii qaur denxlamxdniuu, knuar diyc Lerhunn qo’ jit langg decc byy ingg, Bunqed tauu qniwbin dyrr mng.

“Ix ejaiw rair kir huelingqidniuu jriab jit xee Zidvunw langkeh, qongxx jiac daur vaw jiacc e quer .laii.” Lerhunn dab.

Qauw diamw quer, an’ sewqair qokk qog laii beh caixvan ee bexciuw dyrr beh qauwui. Dirr hex jinwjingg, dnaxaxui diyhh vowdah hyxser. Qaix jrngx :ee jrngx, qaix saur :ee saur, u lat jin vniar dyrr si.

“Jitt sniux beh kngr dyhh?” Bunqed ciuw moh jit kax juaxsniux-aw.

“Qangrkuanw singx kngr vnix:a kir. Mair mair mair. Kngr dyh-aw-kax hyw lar, kacc be dinr xui.” Kia dirr jit jiah ixqoxtauu-aw dingxquann, naxx qra ngiurpinw jrngx hyw knuar, Lerhunn naxx decc qra Bunqed huanhur. Jid’err uat dngw srinx dangrkintauu, ixqoxtauu-aw cux dinxdang. Lerhunn qrix jit sniax, cax damrvyc aw dyrr beh siag lyc tokax hitt diap, vnix:a jit siangx ciuxqud qnuaw laii qaur, crenx ~ ~. Siangx kax dac lyc de, qetsit ee ciuxqoxtauu byy suaw jauw, iuguann qra Lerhunn ee pang'iyx lamw diauu diauu. Kinx lat liongr .kuix, siyxjiaxlangg taux qaux qaux, bin angg qiqix.

“Liw e cuiwdax .be? Guaw laii kir brew nng quanr aw liangg :ee.” Byy tingwhau inwdab, piuliusiux, Bunqed jauw naxx decc vuex.

Qauw diamw qaur, qingxui-aw qra mngg kuix .kuix. Bexjuw liogsiok decc zip dniuu. Qinnii kacc cniuxci :ee, juixjnix vaii tauu kxamw. Nguaxvnuaa, juhuex, jiac :ee, cing :ee, ing :ee, lilixkokkog dingxdingw, u ing taukag gauu venwqingw :ee, dniardnuax kacc ciamx e diyc.

Ciuw qnrua nng quanr imxliau, u simx beh qinw qnuaw .dngw .kir, Bunqed kavo kiokk m qnaw jamr sniu’ qinw. Duxjiah vnuax jit cud inghiongg qiur bixzinn, simjong pigpok dnua, hyw did jitt jun u kacc dniardiyc, m hyw quewtauu qra linglik. Jiac qinw e longr puar nguaw, knuax knuax aw laii kacc si vorsor.

“Vnivnii hueqanx, linw dring ee qewsiaur beh vadd qingx ee nng vxue quann.”

“Jaijid byy qangg lar. Guanw jyr sinwiong :ee, m qniax langg' kir vixqaur.”

“Linw ee qangx u kacc iur. Liw sngr kacc nngw lehh, dniardnuax guaw sui’ ciamx hro :liw.”

“Guanw Daiuann u jit qxur sioggiw, qongw, ‘taii tauu singliw u langg qnaw jyr, liauw jnii ee singliw byy langg beh jyr.’ Lanw tiacvec qongw, liw jitt dniux dnuax lirsunn jin' buat. Sdjai si sniu qongxx hro inx qangdniuu ee qekir bongxx pangw, mair snex sxenx cnriu puw .kir.”

Sigsai ee snia’imx, Bunqed giaa tauu siwqer cue. Taujingg jniawciuxvingg ee dnaxaxui u jit xee dew taujangx, qutder sanxtiux-t ee jaboxlangg dngdecc qapp langg' ciauu qewsiaur. Taukag damr qe, Bunqed qniaa huantauu kunn duiww tanxvnix jua.

“Liw tacc e kir hiacc quw .diyc? Tauduxaw u adok'aw laii, ham' inx sen’ qongw dy’ be huanciax, uac beh qib .siw!” Jid’err qnir diyc Bunqed dngw .laii, Lerhunn hequx be lunw did sraur.

“Guaw duxjiah knuar diyc Kow Qunhui. Ix dngdecc qapp jit xee Inwdo aw decc qongw singliw.” Bunqed naxx qongw, naxx decc kuix imxliau.

“Iong Inggiw qongw or?”

“Hner a.”

“Inggiw hiacc cimx, gunw yc be kiw. Langg’ inx hex tauqelangg, qycc si dairhak vidgiap, snesingg e qongw.”

“Qongw si e qongw lar, mrqycc ix huat'imx be qaiww suiw, zirqur marr longxx qicow :ee, jit vo sokdo be ban sixsyy, pow pow aw hrow langg e quewciuw.”

Qnaw dirr kacngx-au qra langg' pah diamxsor, qaqi iarr diyhh u nng vew aw qanghux. Qenwnarr u guarqog langkeh dahkaqaur, bylun ox jxingw, vec jxingw iacc ngg jxingw :ee, vunxderue be tongx :ee, Bunqed dy’ laur Inggiw jicjiab.

“M jniaa qauu, liw Inggiw qycc jiacc lauw.” Lerhunn qra ylyw.

“Tanwjiac-vo narnia, si liw m qramx hiamm.”

Sianglangg jywpnua bongxx pah ciauwdamm, siqanx decc quer qex jin’ qinw. Jit bak nih, beh uaw daur. U huanxaw ciax sakciax laii decc huacbe venrdongx. Bunqed beh kir ter nng langg kuanw diongdauwdngr. Lerhunn qra dongwdauw.

“Hyw did qajair qinaxzit u liw laii jorjan. Jitt dxngr guaw cniaw. Liw air jiac sniaw jyww liw diamw.”

Byy tesii, qycc iarr m qramx hro siyxjiaw siongdiong, Bunqed qiyr jit xee vaiqutvng. Lerhunn kacc hingr haixsanw-bi :ee. Viw did dibah, muahii-venrdongx u qex kacc quir.

“Inx jex angsiyx-xmuaa kiwbi be baiw, jiokk cnixcuir. Liw beh jiac jit der aw knuar mai bor?” Lerhunn mng. Bunqed dimr tauu rinr hyw. Lerhunn jit kunr gneh nng der hro :ix.

“Aiiar! Tacc e hro liw qux dirr jiax decc jiac venrdongx lar? Sidjai u qraur sitlew.” Jit dxngr vng jiac iauxx bue liauw, tauqex qnuaw laii qaur.

“Jnaiw tangx anxnix qongw? Jex venrdongx dyrr hyw jiac a, jiokk pongpair. Qanw Siyxjiaw cniaw :ee.” Bunqed qra Lerhunn sraiw jit xee bagbuew.

“Liw keckir lar. Laii laii laii, liw di kngr lehh. Lanw laii kir cantniax, guaw jyr dongx.”

“Tauqex, liw iauxx bue jiac or?” Lerhunn mng. “Liw m si kir qidniuu jriab Zidvunw langkeh, qongxx jiac daur vaw jiacc e quer .laii?”

“Guaw si qongw inx quer daur quer jiacc e laii. Guaw dangsii qra liw qongw e qapp inx jywhuew jiac vng?” Ngiuqybin kuair vingw, Jiamx Honghuix duxjiah qapp Bunqed qongxue iauxx ciyr-tauu-ciyr-bin.

“Tauwziddaur, jitt jun cantniax singliw dng’ jniurjuiw, beh jiac jit dxngr yh danw. Liw qui’ jaxkiw, qidniuu qapp Daivag siangvingg jauw, jinw vakdow unxdangr iaux qaxx. Iarr si vaiwtog Qanw Siyxjiaw kir qra liw brew jit xee venrdongx singx jixqix.” Bunqed cud juxir, Jiamx Honghuix sui’ qra janwsingg. Knuar diyc tauqex dimr tauu, Lerhunn iyvaux-aw tec lehh, kiyckixkax dyrr qniaa.

“Ue cuanww tniax dy’ uerciux, qycc longxx beh qaqi sniu.” Lerhunn jid'err jauw, Jiamx Honghuix hnair tauu qiamx trow kuir. Bunqed hmc hmc byy cud sniax, byy janwcuir marr byy inwjic.

Erdauwvox, langg qui’ee jrig .laii. Jiamx Honghuix Inggiw hamr hamr, huewsig sik lauxlauw, qewqeh beh vyr quann iacc vyr qe, jairr ix sngwvnuaa decc diak.

“Jitt jxox rair zuarr je?” Diongdangx ee langkeh decc mng, ciuw nirr jit daii qewsngwqix.

“FOB Bixqimx snax kox.” Jiamx Honghuix qra vywqer, beh qongw jinwjingg liyc aw diuduu.

“Jex jit der aw qniaw rair snax kox! Sniu’ quir. Pacqer nng kox vnuar kacc cavutdyx.”

“Nng kox vnuar iarr suacc e diyc? Jex juixjnix :ee ne! Acc byy, jitt jxox lar, kox vnuar dyrr u :ar.”

“Dnaxx jex dyrr vylee :ee. Qacc vylee :ee, qyckacc siok marr u. Duxjiah hitt jxox, guaw qycc tac jit qakginn hro :liw, kiarr nng kox lak, vyxhiamxhuir linw lap.”

“Liw dniardnuax zuarr dua dniux?” Jiamx Honghuix mng.

“Qewqiong guaw beh rair jit-bxan jxox, cimxnii singx cud snax-cingx pis dyrr hyw.”

Jiamx Honghuix lig bagbaii, qewsngwqix cic cic lehh, qongw, “Quikir anxnix lar, L/C hro liw qex kuix jit qywguec byy iauwqinw, guaw qiyr siyxjiaw quotacion pah CIF Bixqimx nng kox cid, jit-bxan pis guaw jyr jit vaiw qaux :liw.”

Tauqex qapp langkeh crig qewsiaur, Lerhunn kia dirr vnix:a danxhau jixsi, liammix sangr katalogu, kactingg aw rair ciaucue ngiurpinw, sinqingsnuar vnrix qaxx ann dongwdongr.

“Pnaixser, jiycquer .jit .xe.”

Bunqed qinw hiongr jniar vingg suaw jit vo.

“Sitlew, liw iw-aw qamxx ersaih singx jiyh guaw jre. Guaw beh huad jit dniux denrjuxpuex.” 

Kia lehh dinr langg’ kalo, iw-aw qycc jre be siyx, byy iwsinn, Bunqed qongw beh singx qywsii.

“Qniazit sidjai taiww byy ingg lehh.” Jiamx Honghuix qongw. “Lingrqangx knuar dangsii, lanw laii sib .jit .vxuex. Guaw cniaw.”

Buerjingrr kuix vo qniaa, Bunqed qra Lerhunn jimjiog .jit .xe. Siyxjiaw byy ingg decc diamw qnia, lenrr giaa tauu qra siy' sangr dy’ byy.

“Kax e sngx .be? Jitt jiah iw-aw hro liw jre.”

“Tauqex, liw jre. Guaw kax be sngx, kuu lehh kacc hyw jyr kangkuer.”

Kajiah-au, jit duir tauqex sinlyy jijijurju. Bunqed loksong ~, iarr m jaix u simx iacc byy ir, dingw vox siamw dy’ be diyc tihh :ee, jitt diap qapp Bunqed dngtauu-duiwbin.

“Ngeex! Liw iarr u laii. Qinaxzit jitt dniuu m si decc denxlamw denrnauw oox.” Qunhui qunxsngxciyr, vnuar qra congwqingw.

“Acc dyrr pnaiw un qaux diyc pnaiw ving’iuw, hiyckunwzit hro langg' qiyr laii jywqangx.” Bunqed cinwciyr. “Kangkuir sniaw kuanw? Dniardnuax jriab quiw dniux :ar?”

Qunhui hnair tauu, qongw, “Longxx laii decc tamr lorquanx :ee kacc je. Dag’ee qanda’ air siok. Siok mic dyrr byy hyw hxuer.”

“Singlixlangg diyhh yc erhiauw cunqiux, m tangx gne viangviangx.”

Ue cincniu decc cux jiyhlux, didtaur qrut .cud .kir. Qunhui tniax liauw bin liksig. Bunqed qenwsiaur qaxx, taukag-lai dna’ jit zri 'suanx', kacc sux ix kavo qapp simqnuax vnii dimdang.

10.

Kyqix decc huatdenw, qu ngua sinx si sngr guec byy sngr nii. Ciuxqix-aw huatbingg marr jiacc id~zi jap dxangx, qaur jitt jun .laii, qenwnarr dann, narsaiw tniax sniax dyrr tangx jaix boxmih langg beh siy’ cue. Decc miting iacc decc qapp langg' jiaphiap, ciuxqix-aw diyhh diam diam berdangr cud sniax. Denrue laii, denruerqix snax-jap-lak qutjad jiauu dinxdang. Ganw jit xe aw binrvangx, snehun huanhy m jriab; laii byy hy qycc kir byy ziah :ee, veh-qauw snxiaa kar laii beh lutpenr, qex tniax qex akjag u nia. U jit xee denruerhuanx, Bunqed sik qaxx tangx dywtauu liam, kar qyckacc je tongx laii, ciuxqix-aw ee juxlangg vangr quwjai kar ee langg dirr hitt vingg kuarkua danw, qan' qan' aw byy beh cab .ix.

Bangrlo-dingw ee sinbunn, jarhngx :ee u jit diauu decc vyr qongxx u jit jiongw dna'aw cutsir ee duiwikqix, bylun niaux qiyr iacc qxauw vui, quer qekir kaiqaiw, qiyr-sniax ee iwbi qapp jingsnex-aw ee kimoji jiauu tangx jaiqix. Bunqed qaqi tow sniu, erzit aw denrue laii, duiwhongx jit hunjingx simx tiaur quiw vaiw, texunx quiw dxo, simxmih kuanw simjingg, ciuxqix-aw iarr tangx henxsi marr bykoxdnia.

“Liw si cimkiamr ix quiw vah bxan lar? Qui’ jaxkiw kar byy tingg. Ix be tiamw, guaw si uahbeh hro jag .siw.” Hiyckunwjam, jongxqix-siyxjiaw laii decc qiywkow. Iongx langg' duselow, dongqizenn rair siulyy. Byy derr zi qxur ue, Bunqed sui’ qongw beh cniaw ix jiahvng.

“Kecho ee denrue liw m jriab. Liw m qniax linw qoviauw :ee laii qra liw liamrqingx suatqaur?” Vnivnii si qangdingsux, dongsu hyw ir qra ix tecniw.

“Jitt jruw, guaw jyr quewvnuaa :ar. U si inx pnex :guaw kacc je, guaw byy decc kiamr :inx.” Bunqed crinr-tauu-crinr-bin, qongxue qiklat.

Sewqaiwvuex futbol vixsair, ham' Olimpik siysiangg, sir nii jiacc jit vaiw, qinnii dirr Aujiux tad. GMT ervox nng diamw, caixpnuar vi’aw-sniax dirr qiudniuu vivix dann, Daiuann amwsii qauw diamw denrsi kuix .kuix, hex vi’aw-sniax sui’ iarr tniax e diyc. Denrngiaw-daii qapp unrdong vixsair :ee, jitt nng jiongxlui, Bunqed siongrr jiap knuar, rimokong setding dniardiyc kacc benw decc cue byy. DISCOVERY, ix samvutgorsii iarr e jun laii knuar. Qajingx jit quaw dongrbut qapp kehak ee diwsig, u hyw byy baiw. Cid-syy-veh-syy, Bunqed ing'amr beh veh diamw jiacc lirkuix qongsix. Uad kir iarci-aw jiac jit xee qalixvng puer dniaxvnisyy junw dxngr, huedngw qaur cur, denrsi jun .kuix si decc vnuax dongrqiuu, denrsirdaii qauw diamw jiacc e iong uercnix hongwsangr kaqiuu-vixsair.

Qo’ liap qiuu, jingwlangg cniuw, tangx qorr kax tad, qorr hingkamw dongr, qorr taukag longr, dan’ dan’ berdangr iong ciuw. Knuar rue-ox-cad-vec ee qiuu dirr unrdongrdniaa linr laii linr kir, vuex laii vuex kir, jitt jiongw girniu benw qig taukag, be cionghuan diyc simsinn. Denrsirdaii cid~veh-jap daii. Bunqed quatding ing’amr dyrr beh jriuw dirr jitt daii, byy beh jun laii jun kir.

Viw qanghux, Aujiux ee qiudui poxpenwdig u kacc ngiaa hunsiaur; srer sokdo, Huijiux laii :ee jitt vrangx longxx siauwlenn :ee, jurzendig qex kacc gauu jauw. Sinbunn vyr qongxx nng dui gorhuex ~ jin’ u vniar. Dingw vnuar dniuu decbeh suah, ox bah :ee sux vec puee :ee jit hunx. Bunqed amr amr aw decc qra inx pah diamxsor, vec :ee jitt vingg qinaxzit ee kiwun kacc ong.

Dinxdong dinxdong.

Denrlingg dann. Bunqed an’ pongwiw vreh kiw srinx, tauu kix jit vingg, bagjiuzinn m qramx suaw lirkuix denrsi.

“Halo! Liw qamxx decc kunr :ar? U qra liw caw .diyc .byy?” Mii riu riu, Lerhunn dandok kia dirr mngkauxcuir. Bunqed qui’ srinx be-dinx.-be-dang, qo’ qo’ simqnuax jiokk uahtiaur, bih dirr hingkamw lairdew decc pigpok cnaiw.

“Liw byy beh cniaw guaw zip kir jre?” Bin duiww bin, siyxjiaw qra juxlangg kuix cuir. Bunqed qra mngg kuix kacc kuix, sunrser niu jit xee srinx; ix iauxx sniu byy ue tangx qongw.

“Guaw dyrr jai’ngiaw liw unxdangr decc knuar jitt daii.” Dac zip kectniax knuar diyc denrsi, Lerhunn qongw diyc cuir gix gix.

“Oox! Liw anwjnuaw iyh :ee? Liw nacc e jai’ngiaw guaw air knuar tad kaqiuu?” Bunqed tiaudii qig jit xee sniasaur jiokk cinwlingw, ciak ciak diyy ee simqnuax qiongrqiong beh diamw diyc huexjingw.

“Liw dingw zit aw dyrr bad qra guaw qongw .quer.” Lerhunn duiwcuir qra rinr.

“Qamxx u? Guaw dangsii qra liw qongw :ee?”

“Dyrr si hitt qangx lanw jywhuew kir jiac Hanqog liaurliw, liw qongw qinnii Korea iurqycc u tad zip kir sewqaiwvuex, qycc qongw, denrsi narr u juanxvyr, liw dagg dniuu longxx beh knuar. Liw qongw ee ue, guaw si longxx qra liw qir diauu diauu oox!”

Byy inwue, Bunqed iuguann bin crinr crinr, sinkux kiokk jiokk siyly. Huexjingw dikkag dyc :ar byy cyr.

“Liw cur nirr u nguaxvnuaa iacc pxed-aw byy?” Lerhunn mng. “Guaw u jah jit quaw loxbi laii. Iong vnuaa-aw drew kacc hyxser jiac.”

Bunqed mng ix beh air zuarr dua der.

“Cinwcaiw, diongvan-aw :ee dyrr ersaih. Qycc liw vylevuex-aw narr u, sunrsuar marr tec nng der laii.”

“Beh congr sniaw?” Bunqed mng.

“Beh tangx limx beh’axjiuw a! Guaw jit kunr qnrua vnuar dnraw laii, liw byy knuar .diyc?” Lerhunn qongw, qra lak quanr beeru kngr dirr dyh-dingw.

Javoalngg ciuw dua xee, nguaxped-aw ham’ siyjiuxvuex jyr jit vaiw tec .laii. Lerhunn qra loxcair dryr .cud .laii kngr druar vnuaa-aw. Alunmi ee kan’aw giuw .kuix, jit quanr siyjiuw jit langg tinn jit vxuex iauxx u cunx.

“Guaw kacc be limx. Liw qanvuex, guaw suiir.” Jiacc qongw suah, Lerhunn jit xe ciuw quanr vnuar vxuex zip auu. Byy beh hro siyxjiaxlangg knuar suex, Bunqed qra siyjiuxvuex pangg uaw cuir, vxuex-drew byy huatdo cri qimhii.

Jiac jiuw qraiw ud, jiac jiuw iarr tangx sriaux dowhin. Snax quanr beeru lyc vakdoxdew, liw hniax guaw mue, qauvuee itliab’id. Quewongw u puatcex, u qecbew, qiamxcaiw si dnarlau, uirdiyhh qaqi sniu cax soxx drir. Siongrqaiww byy, langg jitt jun dirr ix sinkuvnix be haux .did.

“Liw qaxnaxx kacc rui ox :ee hitt vingg oox?” Lerhunn mng, qapp juxlangg srinx uaw srinx jre diamr qangg jit jiah pongwiw-dingw.

“Dniardiyc rair rui ox :ee lor!” Bunqed rinr. “Inx vehlangg hiauvaix hiacc quw :ar. Lanw vnivnii u sig :ee rair draur qing, jaw jit zit qra inx enw .dyw guaw dy’ siongrr tiongr.”

Jurr jitt diap, ox :ee iurqycc qex jit xui luxsingr huwhy-luidongg huah i’yx :ee. Qau’nguarqiok liauxau, sewbin uanxzenn juan linr dngw, ox :ee kacc kia hongtauvingg, qrongx viw siuw ee sijun kacc je. Bunqed qapp Lerhunn dirr denrsi taujingg qangg sii toxkuir, hnuahiw ee sii, pog'aw-sniax dangjee, vreh kiw laii hiamr dy’ e.

Jnia’ jap langg hysimx-hiablik, ox :ee hunwjir tad jit qiuu zip mngg, nng dui jurr anxnix byy su’ngiaa, pah vnequer. Bunqed hnuahiw jit xe, jniar ciuw crunx cud kir qra Lerhunn ee qaingqah qaux uaw .laii, cuir suawser dux uaw .kir. Denrsi lairdew jiokk zeddniuu, denrsi guarbin qanda’ cunx cuanxkuir ee sniax. Sir pnir cuiwdunn qoduiwdingr, u beh’axjiuw ee bi; bactew qaudnii siy’ ex, sinkux undo siy’ uer.

Vyrvinn, Lerhunn ee ciuxqix-aw dann. Nng langg bersux kir hro den den .diyc, sinkux hud .jit .xe dnua .kuix.

"Jiamx .Sensnix! Hner a. Guaw jaix, guaw e kacc jaw kir kunr. Hyw, baibai." Lerhunn jit tongx denrue qongw iauxx bue suah, Bunqed vingww uad zip kir vangqingx giaa syxsii.

“Amr :ar, guaw sangr liw laii dngw.” Binqijaix ing’amr qojimw-dogbenn unw pnaiw kunr, kiwhunx vutduir byy daruaa, Bunqed naxx qongw naxx decc tac snxax.

“Mrbenw lar. Liw qra vixsair knuar hro suah.” Tauu kix kix, m qnaw giac bak knuar, Lerhunn qor beh qinw jauxtuad, cneqongg .qaur .der, ciax dyw jit quanr beh’axjiuw iarr byy diwqag .diyc.

Denrsi lairdew qahqac qunw, jingcaiw jniawdngsii. Bunqed kir qra POWER qimr .srid. Quanxtax inx su’ngiaa, ox :ee iacc vec :ee longxx byy jaidiau juanxngua ix ee simjniaa.

11.

Jurqa’iong :ee ven ven. Ginxaw air simsig, a’qxu druar dirr Vakdauu, denrciax jit vrangx dyrr e qaur, lyc ciax rair qniaa .jit .jad .aw dyrr urngiaw. Qaqi beh :ee, be hiamm tiamw iacc huah kaqud sngx, qycc e qra mamax draur qnrua pnuarciuw.

A’buw jyr benxqi, a’syw dingw dingw lexvair denrue dyrr kar laii decc qiyr qinw qinw. A’jew jarhngx marr u kar laii tecniw, jit vaiw dirr jaxkiw, jit vaiw dirr amwsii.

“Jex sniaw lar? Qnrua qnrua jiacc je laii!” dua-syw huah, qra duarmngg kuix qyckacc kuix. “Dyrr qongw longxx guaw cuann, linw langg laii dyrr hyw. Linw nng xee jixmue-aw, kacc anwjnuaw qongw dy’ be tniax.”

Qunhui buxaxqniaw siangsiangx qniaa .zip .laii, a’qxu, a’ii, idniu, Qunhui huanhur jaboxqniaw sui’ xee aw qiywcuir. Cur nirr ee sirdua, dogdok sewhanr a’qxu qapp a’qim qiyr byy diyc.

“A’dxi-aw qinaxzit be laii, qongxx jitt hy hiyckunwzit, inx ang’axbow longxx rair qavanx,” a’jew duiww cimxx qauwui :ee qongw. “Qandna’ qor tanr jnii, qniaw iarr m qinw snix snix lehh.”

“Mair qa'ngg quanw hiacc je lar!” inx angx sui’ qra liam. “Langg’ inx juriuu-jurjai, kax dax ciuw dax, mrbenw decc giaa qniaxqee, byy jnia’ hyw? Byy cincniu lanw, jit qniaa ciangjai dy’ sir~go miaa.”

Jiacc qongw suah, qoviauw iviauw snax xee ginxaxpnua, uirdiyhh jit senx Vaxvir Uaauax decc be duxhyw; nng xee javoginxaw uirdiyhh jit qix sokqax-cingr decc kiw qauvnex.

“Cuwquar qiongbeh henx .kuix .ar! Jiaxee ginxaw sidjai u qraur gauu caw.” A’jew hnair tauu.

“Ginxaw dyrr si ginxaw. Gauu uanqex qycc peng air dauwdin.” A’hniax jriab lecc qongw.

“Lanw jyr ginxaw ee sii marr jiokk gauu ruanx, liammix cniuw jiac siwsiur-aw, liammix ing’axmic decc vunx be vnee. Sngr inx longxx u jxingw diyc lanw lar.” Qunhui qongw jit xee vnuar simsig.

“Beh vangr quwjai inx caw or?” a’syw knuar be jyr .did. “a’Hongg, liw kacc je huer berhiauw niu siyxdi-aw, si bor? Puee dyrr vnex kacc ann lehh, guaw kiyh knuaw e jyr jit vaiw diap.” A’syw dirr qokhau-aw jib qauwvenx, jid’err angrsniax, qui’ cuwqingx ee duarlangg ginxaw jit siqanx dngrr sniasueh.

Caiwqingr qapp singlew jap gua xee, siwqakdyh-dingw vaii qaxx beh byy xui. Hrau sii hrau jun, duarlangg jit langg snax jangg cinghniux, ginxaxlangg giac jit qix duewvair dyrr ersaiw.

A’hniax qapp a’syw qau kiycdiy, qongxx hniux siyx byy vnuar quec, qimginjuaw lenrr bongx dy’ m tangx. Danw qaur laii, qnedngr jiauu lingw lingw .kir. Kanqnix :ee diyhh qycc quer tng, beh byy, jinjniar tunx be lyc auu. Cunx :ee dyrr kacc cinwcaiw byy sniaw iauwqinw. Jitt dxngr, jyr sniawlangg .kir ee a’buw jiac e vaw kacc cet'iaur.

Jiac vng vaw, ginxaw qui’ din kir jre dirr denrsirqix taujingg decc knuar denrngiaxcud ee HARRY POTTER, duarlangg byy isuaw, jiahvngrdyh-aw jit langg jit xui uii lecc kaiqangw.

“Urngiaw sixlangg kuair quer zit dyrr driyc. Bagsarsi, qongxx cid nii :ar.” Qunhui qongw, trow jit xee kuir.

“A’buw quewsinx hitt jun, linw Sioktingg quiw huer?” Hniasyw mng siyxqox.

“Duxx dorjer,” Qunhui rinr. “E vee, decc yc qniaa, iauxx berhiauw qongxue.”

“Acc m dyrr longxx byy qiyr diyc a’maw? Bycaiw.” Jyr langg’ a’ii :ee qongw.

“Byy guarmaw, marr iauxx u lairmaw a.” Jyr langg’ idniu :ee jriab bow ee ue.

“Ginxaw lenrr laurve dy’ byy, beh dyhh snix jit xee maw hro ix qiyr?” Jyr langg’ a’qxu :ee dit drngg dit dxo. Uertauu kanx qaur jiax, dag’ee tauu damr damr, gairgiyc ~.

“Ix u iongx langg decc tamwtniax, beh jai’ngiaw gunw buxaxqniaw jitmaw druar dirr dyc’ui.” Quer u jit quw aw, Qunhui qycc qra uertauu giuw dngw laii qongw.

“Ix cue linw beh congr sniaw? Liw u kar denrue qra mng .byy?” A’syw jin’ hnowhenn.

“Iarr suacc diyhh mng?” Qunhui qongw. “Ix beh knuar jaboxqniaw, qycc byy air hro guaw jaix. Dnaxx ix hitt xee langg, guaw vad qaxx u cunx.”

“Narr si anxnix dyrr benw qycc qapp ix ciavnuaa,” a’jew cuir qongw, ciuw naxx iyy. “Qanda’ beh tniax langg’ qiyr ix vavax, ginxaw iarr byy beh draur rngiuw. Laurve jiacc hyw jyr or?”

“Acc liw ee iwsur m dyrr qongxx, ix jnii laii dyrr tangx jyr a’diax m?” Inx angx qapp ix vnuacuiwhuex.

“Ix dirr snuadingw druar vedjongx. Guanw buxaxqniaw kud dirr hunxjiauxaxduu. Guaw qra tyw jit qingx qong’uw tangx hro jaboxqniaw druar kacc suwsi, qamxx u ciauquer?” Qunhui qra ue cniuw kir qongw, snia'imx quann veh dxo.

“Ix dyrr qed’axqyx lar. Liw beh siw hro :ix?” a’hniax qongw. “Ix narr muixx guehzit snax-bxan go-bxan tec e cud .laii, liw tangx ham' ix qongw knuar mai.”

“Hner a,” jyr jexhux :ee janwcuir. “Qycjaiww qongw, veaxqniaw si qutziok-jiwcinx. Dongr byy hro inx qniwbin, lanw sidjai u kacc dew lriw, qniax be quer did langg' cuir.”

“Dnaxx si driyc iacc m driyc? Si ix singx hiaux :lanw :ee ne! Hro liw qongw .jit .xe, suacc venr jyr lanw decc kiamr :ix.” A’jew me angx, qongw qaxx krir cuaccuah.

“Quewsii lahzit dyrr mair qycc kir vingw, kacc iauwqinw :ee si ganxjenn,” jyr a’syw :ee qongw. “Narr erdangr qinw cuxliw-l. lehh, u hyw ee duiwsiong, guanw a’qox-aw marr tangx qycc qer.”

“Simxmic beh qycc qer! Ginxaw longxx jiacc duarhanr :ar, cunvan beh ciyr dyw langg marr m si anxnix!” A’hniax giagnerqyx. Jiahvngrtniax :ee, liw jit cuir, guaw jit jic, jit langg juxdniux jit kuanw.

Langkectniax :ee, denrsi knuar qaxx juu ~ ~, sui’ xee kacngx naxx cincniu liamm dirr iw-aw binrdingw, jit cud ngiaxhir suah, jiacc qamguan vreh kiw.

“Linw byy sraiw ciax laii, guanw jair linw laii dngw.” A’jew duiww Qunhui qongw.

“Benw lar. Iarr byy sunrlo.” Qunhui rinr.

“Hranw did quiw sii jiacc jit vaiw, liw mair qapp guaw decc sewzi.” Qensimx-quat’ir, a’jew byy beh hro ix qongw m. Bacsig kacc dimr, a’jew jurr ser hanr dyrr hro langg' qiyr ox bixzinn; bagjiux dua luiw qycc qimx sicsih, langg’ muixmuiw e liaurqiyr ix decc qa’ngg grinn.

Snax xee ginxaw cavutdyx jnriu ciax dyrr binn .kir. Vnuawlo, ciax uad kir qa’iujam, inx juanzenn m jaix, jyww inx jniar pag dyr hniar songwsimx kunr.

“Guaw m si decc dnoxgnerkir. Guaw sunzenn uirr ginxaw decc setsiongw.” Sraiw ciax :ee lyc kir qnuaix iusniux, lap iujnii, Qunhui kinx sniax duiww a'jew sueh kiw.

“Junw qongxx liw si decc qapp ix qikkir, guaw marr tin :liw.” Jre dirr qawsuxjy vnix:a ee a'jew qongw.

“Snax-bxan go-bxan beh qaixquad, cimxtauu aw guaw dyrr tangx qapp ix ciamx zri kap inr, marr mrbenw tuatic qaur jitt jun iauxx decc lenhuee.”

“Liw qaqi simtauu liac u dnia dyrr hyw. Ter liw juxir, ter liw pacdad, quibuew, iarr diyhh liw cud bin jingtyw.”

Jaboxqniaw pag dirr Qunhui ee kapuew decc qnoo. Kax baa qaxx, jyr mamax :ee qniax qra caw jingsinn, m qnaw luanrsuw dinxdang.

“Kacc danw dirr lorkauw tingg dyrr hyw.” Buerjingrbue, Qunhui huanhur qinw qinw.

“Tacc diyhh anxnix? Ciax erdangr sraiw .zip .kir a!” A’jew u iwqenr.

“Hex hang-aw hangrsud, pnaiw dngxdyw. Mair kacc driyc.” Qunhui qongw.

“Lorkauw li cur iauxx vutjiw aw u jit jad. Liw py ginxaw, beh tacc qniaa e qauwui?” A’jew qycc qongw.

“Guaw beh qiyr ix qaqi qniaa. Jiacc duarhanr ar, dyrr byy decc a’ngix iacc byy snix kax hro :Ix.”

“Acc byy, qiyr linw jexhux qra py. Ix javoalangg kacc u hxuad.”

“Hner a, hner a.” Jyr langg idniu qapp jexhux :ee muaw cuir ingwsingg.

“M tangx lar. Ho'ngg py quw e jniurngiu. Guaw ee ginxaw be kamx did tingxsing.”

Kunr qajue hro langg' qiyr cnew, ginxaw bin-aw auwdirdu. Buxaxqniaw lyc ciax, jaboxqniaw zuee bagjiux, laurbuw kaqud sniu’ baa, hiamw kia be jai.

“Mamax.”

“Hnaa?”

“Liw qamxx u knuar quer Haxliw Poxtyw?”

“Byy lehh.”

“Guaw qra liw qongw oox, Haxliw Poxtyw byy laurve marr byy laurbuw ne!”

“Si or? Jiokk kyxlenn.”

“Hngr a! Ix si a’jig qapp a’jimw cniaa dua :ee, mrqycc inx longxx duiww ix jiokk kokdok. Qajair Haxliw Poxtyw erhiauw huatsut. Liw qamxx jai’ngiaw, ix u huatdo… ”

Jaboxqniaw qongw qxow hro laurbuw tniax. Jit xe aw qux, inx daux dirr bagjiux-jingg.

12.

“Jitt kax gigkuann hro :liw.”

“Beh hro :guaw? Jex gigkuann longxx byy hxaa jiacc suiw .diyc, tacc e byy sangr linw anada?”

“Ix ciuxqud dua qix, gigkuann u kacc ser xee, qruar diyc byy hahtautuii.”

“Acc m dyrr ix qingw cunx :ee jiacc u tangx diyc qaur guaw?”

“Liw pni-bak-cuir longxx u guaw ee ngiaw, lenrr singwpiah dy’ ham' guaw siy’ siangg. Bylun sizit quer zuarr quw, lortauu li zuarr hng, liw lanw ingxuanw dy’ jiwcinx, m si cinwcaiw langg e tangx vixping.”

Jre Jurqiongghy :ee laii Daivag drngx qongcex, laurve jarhngx dirr erqangw dyrr kar jaboxqniaw ee ciuxqix-aw iog beh siy’ qnir. Siqanx hanrdnia dirr qinaxzit, soxjai iujai jaboxqniaw juxir.

“Jitt jxox qekiwlangg, liw tec hro sewhanr didix. Ix snezit dirr au lexvair, qamxx m si?” Lexbut dux .cud .kir, jyr jaboxqniaw :ee mng kiw.

“Liw jurr sewhanr dyrr nngw simqnuax qycc iuwzi, cam' linw buw :a duxhyw dendywvingw.” Ingqypni, erhaii hor hor, jyr laurve :ee qongw suah trow jit xee kuir. Vinwsuix vehpuw, taumox u niw srex kir jin' qngqueh, go-jap gua huer ee ojisang vutjiw aw u Zidvunw sinsu ee kuanxsir.

Hur iokhue, duiwsiong vutciangjai, qeqiamw iarr diyhh jrngx. Mngxvox, ho lyc jit tingg, qniax snxax-aw qapp vylebuec punr damm u pacziah, kavo m qnaw dac sniu’ hiongg. Qongw jaiwhue ixau, suiw-baiw dyrr kacc cinwcaiw. Lyc qongciax ee sii beh uaw jap-id diamw, Lerhunn qnuaxqinw-q., ersusnax jit sii aw quw sui’ cniurvanx punwdiamw.

“Hitt xee ginxaw ham' ix snex jyr iarr byy singg. Qnaxx si huexqir dyww cri huebii, ix oqux laurve jyr m jaix.”

Qeh jit dow mngviah, Lerhunn dirr guarkauw dyrr tniax diyc a’buw ee sniax, jid’err zip .laii jiacc jai’ngiaw a’buw si decc ham' langg' qongw denrue.

“Cuwlairsid, guaw dagg qangx dy’ dnaxjingw qaxx jiokk suwsi; haursnix jaboxqniaw qycc marr u snix hro :ix. Ix hingr beh jyr surgiap, juvunxgiac qycc si guaw kir jxingw :ee. Jyr ix ee qeau, lanw si dyc’ui iauxx kuanxtai ix byy qraur, ix diyhh kir pah cauwcyx, guarkauw tyw jabow laii draur?”

Qongw qaxx kiw-singw.-lrak-de, bersux decc ham' langg' sna' dakcuir. Qniax kir qiauxnau diyc cuwvnix ee kunwbinn, Lerhunn qinw qra tang’axmngg qnuaix qnuaix .kiw .laii.

“Liw si ham' si’angw decc qongw?” A’buw denrue qongw suah, Lerhunn sui’ qra mng.

“Linw a’ii a, qycc u si’angw?”

“Liw longxx jnia’ air henx ciuxdew hro guarkauxlangg knuar, qycc cuanww la dy’ a’vaa ee pnaiw ue.”

“Guaw qaqi ee siyxmue-aw nacc si guarkauxlangg?” a’buw tamluansiauw, singwde qycc giaa .kiw .laii. “Linw laurve dauwdew hro liw zuarr je hyw kangx :ee? Guaw qongw .ix .nng .qxur .aw narnia, liw dyrr qui’ sinkux ciac’iac!”

“Simx pnaiw byy langg jaix, cuir pnaiw siongrr lirhai. A’vaa dyrr si hro liw liam qaxx cur nirr druar be diauu, mrjiacc e vnuax kir lamvo.”

“Liw m bad jit xee auwhnox lar!" a'buw qra pnaiw sniasau. "Linw laurve si duer diyc jabow jiacc ziog qaur erqangw kir. Iarr m jaix lanw jyr simxmih pnaiw sitdig, cri qaxx liw jit jiah niauxcuw laii decc qa vowde.”

Buxaxqniaw sraiw honghuexbak, ox zinn duiww vec zinn. Kacc uaw langkectniax ee vangqingmngg dirr jitt diap kuix .kuix, nng langg jiauu uat tauu jimjiog.

“Guaw si huan diyc linw nng xee, si m? Duxjiacc kunr lyc binn, linw qingw jitt sii uanqex!” Lerhunn ee hniaqyx tngwvakteh, binrcniux og ciccih.

“Byy dairjir :ar. Jyww liw qycc kir kunr.” A’buw ciuw hit lehh hit lehh duiww haursnix qongw.

“Lerhunn, liw qui’ amr si jauw kir dyhh?” Hniaqyx hriongx qaiwqair, iauxx byy beh vangwsuah.

“Guaw kir dyhh qycc diyhh qra liw vywqyr?” Lerhunn inwcuir.

“Qui’ amr denrue liangliangx qiyr, qeww jixmiaa beh cue liw. Guaw jongg cud jongg zip, jriab qaxx beh gongrbin .kir.”

“Liw hitt dangjun byy qiyr inx kar ciuxqix-aw?” A’buw mng.

“Iarr suacc e byy! ” hniaqyx qongw. “Jit xee javox :ee vnuar diamxjingx quw dyrr kar laii jit vaiw, qongw Lerhunn ciuxqix-aw longxx be tongx, itdit mng guaw qongxx langg qamxx u dngw .laii .ar. Linw jaboxqniaw m jaix decc vnir dycc jit cud, ciuxqix-aw longxx kanx qew :ee.”

Jyr laurbuw :ee bin liksig. “Lerhunn ar, nng kax kiaa sen' m tangx. Qauu qa qauu, liw huicjuiw e cabcap lrauu.” 

Lerhunn dner cinwciyr, jit qxur vnuar qxur dy’ vinrdnua vuexhue, uad lehh jyww ix zip kir vangqingx.

Be kamx did byy binn. Vingsor jitt jun, Lerhunn m jaw dyrr kir kunwden iulamw :ar. Huandngw zit kangkuer guanjai gnerdauw. Laur siyx juiw rair sii, jang’ik rair trngr snxax li uiwloxlat, ing’amr, ix beh qanda’ sew bin sew kaciuw kacc qinw.

Beh huandiamw :ar. Luanrjingx-aw setding dirr cid diamw benw qycc jun, e qir did qra vranx duiww ON hitt vingg .kir dyrr tywdongr :ar. A’buw uanaxx diong binn, jinw suacc iauxx dirr tniatauu knuar denrsi byy zip laii kunr. Buxaxqniaw qongqex vangqingx, bincngg jit langg jit dingw. Dua pax denrhuew qimr huax, dogdok lauu dyctaudingx kacc byy zi-jap jxig.

Mii-buew iurqycc jit puah ho lyc qaxx pihpicpiagpiak, tniqngbauw duxhyw langr horjam. Iapcickangw kir qaur qongsix, jit xe bin iauxx air-kunr-sinn ~. Mngg sag .kuix, vut’ir, lairdew jre jit xui hurluxlangg, ciuw nirr py haizii.

“Jitt xee linw siyxmue-aw. Linw laurve qra ix hy miaa qiyr Bixhunn.” Hurluxlangg kinx sniax qongw.

“Siyxmue! Liw dirsii snix :ee? Jnuaxngiu guaw byy tniax guanw a’vaa qongw .quer?”

“Ginxaw duxjiacc muaxguec, jitt jua juanqangx laii hing qejiuw qapp iuvng. Ix jitt jun duxx jingsinn byy decc kunr. Liw u beh py bor?”

Mng huanrr mng, byy haurdanw inwue, hurluxlangg jit sniax dyrr qra ginxaw dux hro :langg'.

Cutsir ngex-aw m jniaa dangrsniax, duarlangg-duarjingw py jit xee ginxaxngix, ciuw suacc e kiw cuah. Ngar tauu knuar juxser, iur ngex-aw jiamx cuir, byy pni, bagjiux ngii linlinx, bin anggee pongr saisaix, benw langg' lang, qaqi gi gi ciyr birsi.

Ginxaw py lehh qniaa kir qaur txangx-aw-vnix, tang’axmngg qorr ciuxaurdnix sag .kuix. Qui’ sinkux ho'ngg vaux qaxx bat jiucjiuh cunx jit xee bin hiongr tnix, iauxx bue huad cuiwkiw ee angngex-aw jin naaudew kangr “Qiur mia or!”

Bagjiux vreh qimx hionghiongg jingsinn, bagjiux-jingg amwox byy dinghuexngiaw. Cuir dax, jiokk qun’auu. Lerhunn lyc bincngg kir jauwkax tinn jit vxuex qunxjuiw sraiw did’auu. Dngw laii qaur vangqingx, a’buw iuguann dirr bincngg-dingw decc siangr dua binn.

Jit dniuu bang jiokk singg jinx qxingw. Qycjaiww kunr lyc jximw, qiwdii naxx laii naxx bu .kir, duiwue, lang’ngiaw, lansanx licleh; ginxaw ee linghenr, hurluxlangg sinkux-dingw ee pangbi, Lerhunn suacc qaxnaxx pnri e diyc, bagjiux vangr kreh qyckacc si.

“Lerhunn, kiw .laii.” Qaxnaxx jiacc zip binn byy snax hunjingx, u langg kia dirr cngg-vnix decc qra ix qiyr jingsinn.

“Beh congr sniaw lar? Jitmaw quiw diamw?” Vangqingx ee denrhuew jiokk qngx, tnevec, Lerhunn bagjiux denw be qimx cabcap nih.

“Iauxx bue tnix qngx lar,” a’buw qongw. “Linw a'vaa jre iarkuaiwciax dngw .laii. Liw ee bincngg niu hro ix kunr. Liw kir qapp linw a’hniax keh jit dingw.”

“Liw m dyrr kir qiyr a’dxi-aw jiacc driyc. Inx longxx javox :ee.”

“Ix binaxjair guehkyw. Jitmaw qra ix qiyr jingsinn, m cunvan beh hai ix kyw acnng?”

“Iarr m si ang’axbow, javox jabow nacc tangx kunr dauwdin?”

“Linw nng xee longxx guaw vakdoxpuee snex :ee, cinhniamue-aw nacc u iauwqinw?”

Naxx decc tuax siw dix-aw, a’buw qra ix tuax kir qaur a’hniax ee vangqingx gne sag .zip .kir. Cing jit niaw lairqac’aw jre dirr bincngg-qnii. a'hniax ox bagqnii ciyr gix gix decc qra et ciuw. Lerhunn uat dngw srinx beh lauwjauw, vangqingmngg uanxzenn ho’ngg dingr siw, kacc anwjnuaw dy’ be kuix. Ciuw longr qaxx puawpuee, cuir huah qaxx exauu, bagsaiw lrauu dax qycc dih. Vyrqizenn, jit qix ciuxqud hnua dirr ix qingqactauu, Lerhunn bagjiux qig kreh kreh m uat tauu knuar.

“Hyw kiw .laii .ar, siongrvanx beh be hur :ar. Jiacc hyw kunr, anxnix. Giangjingx-aw giangx vnuar vox iarr qiyr be kiw cngg.”

Tniax diyc luxsingr ee sniasaur, Lerhunn bagjiux vreh qimx, dyw dirr bincngg-dingw knuar diyc a’buw kacngpuew hiongr ix decc jih pue. Mipue jih hyw, a'buw uat dngw srinx, zidtauqngx jiyr dirr ix u imjikhunn ee bin, bersux jit senx angvut. Jidsidig, Lerhunn vnuar damdax ee bagqnii qycjaiww cilunr.

13.

Jit xee druar dirr Dionglik ee juxqor qimjaw denrue cuix qinw qinw, qongxx qongsix ee denrnuaw kir hro hackeh vniwquiw vangr dok, iongcniaw Bunqed qyckacc anwjnuaw qinaxzit diyhh kir .jit .jua. Hackeh jitt cud sngr siauxzikex :ee. Saihu qauwui sui’ qra rah lyc drew, rair qangx dingg vaiviw dyrr si. Congr qaur laii, zit lyc srinx, ngr vag ee qysog :ee dng’ trad, jit qongliw lo tuh lecc qui’ jap hunjingx. Qinaxzit u decc pah iaxqiuu. Dirr ciax-dingw tniax juanxvyr joklok, qui’ lo jikciax iarr kacc be utjud.

Vixsair qaur qaxx derr veh qiok, go viw snax, sianghongx duiwdin cax nng hunx. Sux :ee hitt dui jitt jun u jit langg dirr id lxuiw, jit qix juanluixdnaw dyrr tangx qra hunsor pnee .dngw .laii. Qongw :ee iacc sniu :ee longxx kacc kuair. Narr u tangx qongr andnaw, jit hunx jit hunx ziog ingxingw kacc sidjai. Jit xee qiudui jap gua xee langg, qanghux hyxbaiw samvutdingw, jenwsut juann kyr qauwlen decc dngdyw. Qiuuann qyckacc lauxciuw, qauwlen jit xee jixling, tniaqniaa dyrr si, hisingx dy’ rair. Duiwdik narr u sitcyr, jit qix andnaw dyrr zip hunx marr be qaiww hihanw.

“Lensiysuar sir liap pnaiw qiuu. Henxjuxsii jit langg cutqiok, id lxuiw qapp zi lxuiw longxx u qiuuann decc dniudanw qihue beh jauw dngw laii diyc hunx. Dauciuw qapp voxciuw tauu kap tauu decc sionggi. Qauwlen bin kiycqingw kia dirr qiudniuu vnix:a. Knuar jitt xee vanrser, liaursngr si beh dauxngua...”

Cihcihcic, cuhcuhcuc...

Ciax sraiw qaur Tyhngg, denrdaii vywimuann ee sniax suacc puawqeh .kir. Bunqed crunx ciuw dywvingg jniavingg siyw jun lehh, jiacc cue .diyc nia, jit sii aw quw iurqycc jauw .kir.

“Qrongx qaur zi lxuiw, jitt hy lauvaiw byy dniardnia u :ee.” Jun qaur jitt gamw dongwdiam, Bunqed simqnuax u cnigii. 

“Narr u tangx qaur snax lxuiw, itvnuadig, aurciuw e zip hunx kacc duarmngg.”

“Acc narr byy lehh? Qycc suar .lyc .kir, sewqiok e anwjnuaw huatdenw lehh?”

“Dua hyw dua baiw lar. Uree jurr anxnix huah cew, uree ciuw kanx ciuw, iyx hnua iyx, qethuad kir jyr hucex.”

Tniax qaur jiax, Bunqed qaqi jit xee langg dirr ciax-lai ciyr qaxx beh nngw iyx. Jitt xee jetbok bad tniax dongsu decc hue, qongxx si nng xee javolangg, jit xee dangqix, jit xee dyctauu, quilo decc qangxlun qamxjingg-siong ee piacjingr, snax hunx kuehaii, cid hunx sidjingg.

“Berhiauw lauxpenwsut ee javolangg, jaboxlangg knuar byy qraur dang.”

“Qamxx anxnix? Liw be qir did dingw zit aw jit xee dairhagsingx siaw puex laii, qongw ix dna' jit vaiw byy quiqiw ho'ngg liac .diyc, jaboxving’iuw dyrr qapp ix saionara qongw baibai.”

“Taux jiac diyh’air erhiauw crid cuir. Jyr qaxx ho’ngg knuar henxzenn, langg’ be lyc lautuix, dniardiyc si cexvaiw liauxjet simx kacc cringx.”

“Taux jiac rair e qir did crid cuir si urngiaw. Narr u simx beh qapp langg' qniaa quxdngg, lauxsit byy sic vunw.”

Ciax beh quer Taiwsanx Siuhuiwjam. Bunqed qra vyletangx vangr jidvnuar lyc .laii. Siux quewlorliau ee siyxjiaw qyqyy hyw qutqeh, hogbin, knuar be cud binrbah odor iacc vehteh.

Cihcic-cuhcuc, cihcihcihcuh...

Audio iurqycc decc be duiwdiamw. Tniax qaxx iauxx byy qaur jit xee jamrtauu, Bunqed qinxmew beh qycc qra ciauu .dngw .laii.

“Urngiaw qiuu si ngii :ee. Byy knuar qaur taur, dauwdew si jitt dui beh diyy kax iacc hitt dui beh dngr dxee longxx birkyxdix.”

“Jin knuar dy’ knuar dauciuw. Ix ciuxtauu hitt liap qiuu cud .kir dyrr beh qniwjindniux.”

Jingxtauu-aw hiyh .jit .xe nia sui’ qycc kixdingg. Simqnuax qacc byy dirr jiax, qyckacc jingcaiw dy’ snriaa Bunqed be dyw.

“Javox ziog jabow, diyhh naxx liamqax, vutsii knii diauu diauu, iacc si diyhh naxx gokisog, tangx sog qaxx andanx, iarr tangx qringx hro hng ~ ~, kuix ~ ~?”

“Knuar kuanw. Lanw tangx qycc viw iaxqiuu jyr le. Liw dauciuw air beh qinw qa’ngg sansin, mrqycc hyw qiuu narr sniu’ jiap, langg sui’ qra liw knuar tangr .quer. Ue kanx dngxtauu. Henrvuthen u snax liap pnaiw qiuu ee anwdew, dauciuw jatlat ee kongqanx snesingg venr jiokk ser; rair kenx hyw qiuu, qycc diyhh dihongg langg’ qongr andnaw iacc juanluidnaw.”

“Vo vo decc qig suwliok, jitt jiongw luan’air, jiauu jiyw aw romantik dy’ byy, mair dramm kacc ngiaa.”

“Lanw nng xee dirr kongdiongx qongw pnawdamm, lauwerhamx, tniajiongr ving’iuw marr si bongxx tniax bongxx jyr girniu narnia. Horumon narr dirr texlai decc vnir qux vnir vih, lanw u cuir qongw qaxx byy nua, dongr be diauu vniar .kir .ee si bylun tnix qngx iacc mii vnuar.”

Qaidongx dirr Diongkingr Vag Lo ee qauliudy jiacc lyc qysog, knuar diyc Gorqow, Bunqed handolu pangw lehh dyrr lyc .kir, m quanw snax cid zi-jap-id. Lau qxauw byy sinx cuttauu, iog knuar denrngiaw, jurr kacc jaw qaur jinw iauxx bue trer liuhingg. Lyc ciax kir qamxaxdiamr brew jit hxun vywjuaw. U jit cud bungerpnir, tniax qongxx qowsu jiokk qamxdong langg, buexqiok koxsiongvix kacc baixjaii. Quixaxcud, siyxjiaxlangg byy dnaw, m qnaw knuar. Siy’ jenr siy’ taii :ee hiamm cohoo. Jit qix kacc uaw tamwjingx cuiliw :ee qongxx povaii jiokk badjat, dyrenw ciuxlo qycc iuwzi, knuar .quer .ee qeww ylyw qaxx e dak jic, mrqycc lairdew u jit xee qniawtauu, luxjuxqag dingw srinx dngrr vnuar sesnuar. Siongr ar siongr, qanda’ cunx ciywkuex :ee tangx qingxsuanw. JIM CARREY gauu vnir qaulang, siauxcid-aw-cud quw quw aw knuar .jit .vaiw byhongg.

Horumon u decc vniwbangw be dingdnaa, qajair taukag iauxx u lorsaiw, damrvyc aw kuekax, iauxx byy vuanwsui. Kar denrue dnia piyr, juaxginn benw cud mngg, qecdngw guehzit sinwiongrkaw siauwdnuax e qiar laii cringw jnii. Vaiwgo-amr, langg unw je, kaienw jinwjingg jiacc tiah piyr, junw brew u, jerui iarr byy tangx hyw.

Hxang hxang diyhh kyr denrue. Ue dirr simlai virvan hyxser, Bunqed cic denruerhuanx.

“Ehngx guaw diyh’air qavanx.” Lerhunn qongw.

“Vaiwgo amwsii qax simxmih vanx? Si jingwqingx iacc qexngiaw?” Qequix-aw siauhongx, Bunqed u huexkir.

“Guaw penr liw beh congr sniaw? Liw liaurjunw dag’ee longxx cincniu liw hiacc hyw mia?”

M jaix si’angw kacc utjud, qavanx :ee iacc si byy pnua :ee? Jit tongx denrue suah, Bunqed ee simqnuax jyx qaxx.

“Guaw tacc e jiacc congxvong .diyc? M dyrr singx mng hyxser jiacc tiah piyr!” Bunqed jikjue qaqi.

“Ix jinw qamxx jinjniar dirr qongsix decc qavanx? Ciuxqix-aw si tangx jah lecc siwqer kir :ee.” 

Sniu diyc jiokk m driyc, Bunqed simqnuadew kiw cauwgii. Qycc kar jit tongx denrue kir qongsix dyrr jaiqix. Si qongxx, banrvutzi narr hro langg' knuar puar kaciuw, hex m qenwsiaur siw!

Siqanx iauxx u. Jitt jun qnuaw .kir, inx qongsix ee denrhuew narr qng’iam, ix qongw :ee jiauwgiac si jinx be si qew. Radio ee qautongdaii decc vyr, qongxx ci-lai kacc dua diauu ee cialo, bylun dangx saix lamm vag hiongr :ee qeqiamw longxx u jikciax, uree qycc trad qaxx hang-aw-lai kir. Sokdo vniar be qinw, qenwnarr qaur Bunqed beh quer siangcelo, qycc suacc venr angg dingx. Bunqed jad siqanx, denrngiaw beh qaqi kir knuar bor, jitt diap diyh’air quatding.

Vnax vnax vnax!

Simtauu iauxx decc hnua be dnia, duer dirr ix aurviah ee ciax beh jniar uad decc qra ix cic lacvah. Jitt sniax, byy vadd diauu lo tangx digsuanw. Sraiw duiww jiax laii, beh kir hiwngi iacc kir inx qongsix longxx diyhh pax jit linr. Narr diddit qniaa, byy qycc uanx laii uad kir, jitt diauu si jniawdoo, beh li cur zuxx laii zuxx qin.

14.

Jit nguaw gubacmi liauw, jingsinn qex jiokk qiauqiah. Tauqex qapp sinlyy jiac qangrkuanw, jingcax javolangg byy dua nguaw :ee jiac be vaw. Bre gubacmi :ee dyrr dirr qongsix erkax id lxauu, muixx qangx cud cud zip zip dag’ee longxx jin’ sigsai. Narr kangkuer byy ingg higjiaw ho laii vandnua cutmngg, jit tongx denrue kir, jit sii aw quw sangr laii qaur qongsix, tngx zet tngwtngr u entauu, mi iuguann kiuu ~ ~. Siyxcair jairr langg qac’ir, u pidanr, daurqnuax qapp haixduar, qycc u hivow craw imwsni-aw. Lerhunn siongrr air jit bi suanwziongg ciwqueaxnii, jiac diyc jiokk cnixcuir.

Lerhunn surburdyh dingxtauu ee zidqongdingx sih lehh sih lehh, pacsngr si dingqongw iong quw rair ngua :ar. Sittauu dyrr decc jyr be kir, byy hitt hy ingqangx cud kir brew jit qix sinx :ee. Jiamx Honghuix qra qaqi ee ixaxui niu hro Lerhunn jre. 

"Kacc anwjnuaw, ing’amr qra siauwceh lrik hro tig saisaix derr id qinxiaur, zidcingpo iarr diyhh qor qaxx qaur," Jiamx Honghuix huanhur. “Baiw simvu be qnir did daqeqnuax. Guanw a’qxu qui’ dxangx qui’ vnuar dxangx jiacc u dngw laii jit vaiw. Ix juewsu vutjiw u quer miqag. Ix qaqi be lamrsamw laii, marr be kamx did langg' cinwcaiw.”

"Hyw, guaw jaix." Lerhunn dab, byy vadd qxur ue; kiarsnuax tauqex marrr si tauqex, qavanx habqaizenn, byhqongxx amwdngr benw cud jnii.

“Jitt dah qaxnaxx u cutzip. Ingwgiac, dingw vnuar nii ee kaiiong byy ingwqaix jiacc qe.”

“Guaw knuar mai lehh,” Lerhunn qra nng vunw siauwpo vixduir .jit .xe. “Ar, siaw duiww qurnii :ee kir. Sitlew sitlew! Guaw sui’ qaiw hro :liw.”

“Qinw su snax hunx sux. Knuax knuax aw laii,” Jiamx Honghuix qongw. “Lylik qui’ qangx :ar, qycc longxx juann sowbexzi, caulik m driyc ingxingw e.”

Giac bak qra sinkuvnix ee langg ganw .jit .xe, Lerhunn simqnuangiw-aw siyly siyly. Dangsi'aw tauqex Jiamx Honghuix iarr e tangx jiacc unsunn, cuir erdangr jiacc dnix.

Srunn qycjaiww srunn, sir luiw bagjiux byy qycc huatqenr diyc cywgo, vehjuaw jit jriw cuann hro ciongjiog. Inwviyxqix punwbak :ee, jit jua quer jit jua decc saur, inr jit dniux diyhh jit hunjingx.

“Sidjai rair laii kir kuanw jit daii laser :ee. Jitt hy iong qorr bagjuiw :ee, sokdo u qraur ban.” Jiamx Honghuix naxx qongw naxx hnair tauu.

“Mraxqycc, laser :ee byy siok, qaxnaxx diyhh bxan gua kox ne!” Lerhunn qongw.

“Bangrlo dingxquann ee pacberjam, vnuawqurlyc :ee, cid~veh-cingx kox dyrr e diyc. Tingwhau guaw cur ee dairjir cuxliw qaur jit xee kamxjam, m na inwviyxqix, lanw ngiaxinwqix dniardnia decc kac juaw, guaw marr anwsngr beh ngua jit daii sinx :ee.”

“Liw si u simxmih cur ee bunrdee decc cuxliw?” Kangkuer siong :ee singx cniaw jit vnix, tauqex qywzinn ee dairjir, Lerhunn jiokk u hingwdauw beh jaix.

Bagtauu pacqad, Jiamx Honghuix trow jit xee duarsimkuir. Inwviyxqix decc jauw ee sniax vanxvanw, jit iac liauw jurdong suawjiab au jit iac. Qiwdii jap jap veh veh, vintauu vaii kiw, Jiamx Honghuix qra uertauu giuw kir qaur cuarbow kixqex hitt xee jamrjad.

Siy’ bad, siy’ kanx, siy’ cuarqniaa, tuabuew snax nidangx, tniar qapp hun siy’ camcab. Angx qniaa dangx, bow kir saix, ang’axjiaw huah byy qangg sniax jin’ sowsiongg. Buexciuw, qanda’ jit hxang nng langg u qangg simqnuax: jenw dng jit dnxua imensnuar.

“Mraxqycc, dingw zit aw qra ginhangg vran dairkuanw, guaw u knuar quer liw ee sinhunrjingr, linw bow ee miaa henrhen iauxx dirr birdingw.” Qui’ vakdow ee hnowhenn, Lerhunn simqnuax be kngr did ue.

“Miaa beh catsag m kacc qanxdanx, lirensux dingxtauu zirviw lyc miaa dngr inr, qongsow jauw .jit-.nng .jua dyrr u :ar. Jitmaw si diauqnia qongw be duiwdangg decc dapdaiw. Byy langg dix-aw taii siw jiacc cutqer.”

“Anxnix guaw jaix :ar. Linw uirdiyhh Ingxhyy hitt qingx cur decc ciauu be vnee, driyc bor?”

Jiamx Honghuix dimr tauu. “Cur dingqir guaw ee miaa, dagg qywguec dairkuanw longxx guaw decc jongg guaw decc lap, ix m bad cud quer jit koginn. Lanw vunxdew sniu qongxx jaw cew jaw liauxli, quah bah qamguan cur jidvnuar vunx :ix, knuar ix beh kia iacc si lanw hen jnii dnraw :ix jairr ix qingw. Beh nacc jaix ix suacc kiw vingw, guaw siwqer pasax kingg nng~snax-vah-bxan, jnii ix dre lecc siyx, cuwqingx ix suacc jiauww druar, iarr byy beh vnuax quer xui.”

“Tacc u langg jiacc hnuaii lar? Toxquiw jiac mohnox beh tyw nga, ix marr jnia’ qnaw siw!” Lerhunn ter tauqex vutvingg.

“Dyrr si anxnix decc pnaiw dauwdin m. Lanw niu :ix, ix suacc hyw kuanw, huanxdywdngw jiac lanw siw siw. Sidjai byy huatdo qycc ham' ix druar jywhuew, mrjiacc e dirr qongsix cai jit dingw bincngg, sniu qongxx byy siongduxtauu, qiamxcaiw e kacc cingqingw.”

“Dangsi'aw si anxnix or!” Ser aw sniax, Lerhunn bersux decc qongw hro qaqi tniax qangrkuanw.

“U qaur liubuew hnoh? Qaqi u cur ven ven, suacc diyhh laii qux dirr qongsix cnicamw-logpig!” Qongw liauw, Jiamx Honghuix iurqycc decc toxkuir.

Inwviywqix dnia .kir. Jit dniux juaw inr uaicuac jauw byy quer. Lerhunn denrnauw dingg jaiww setding, beh inr jinwjingg, juaw qui’ jriw tec cud laii crig crig hro siwtin.

“Narr junw dycc jit qangx jinjniar qapp ix cew qaxx li li li, liw qamxx e qycc crua?” Qekir qycjaiww dinxdang, Lerhunn qra uertauu giuw .dngw .laii.

“Jairr liw knuar lehh? Guaw diyhh kacc qinw qycc crua, iacc si vangr lecc jyr lyhhanwkax?” Jiamx Honghuix qra bunrdee sag .dngw .kir.

“Mng guaw nacc driyc? Guaw beh tacc e jaix?” Byy quer sniu .quer, Lerhunn duiwcuir dyrr rinr.

“Snesingg rair mng :liw a! Jit qangx zxic-sir siyxsii, dyrr liw qapp guaw dauwdin siongrr quw. Liw jai’ngiaw guaw air jiac mi, byy air jiac bixhunw; jaikiyh guaw vog simxmih vaijuw ee hrunx, kacc air limx simxmih kuanw ee beeru. Guaw pnai zuarr je jewbu, tongdniur lairdew u quiw ngii, jiaxee liw longxx jaix, viw guaw kacc cingcyw dy’ u.”

“Gunw si jaboxqanw-gxiac, knuar e diyc, bongx be diyc. Liw lenrr doqiwinr dy’ m qnaw qaux :guaw.” Lerhunn ue qongw diyc sngx qiucqiuh.

“Dongqisii qapp guanw bow bingg hox bingg ciangr, qongxx jnii zip kauxjy, nng langg dyrr cann byy qaux, juiw byy lrauu. Lanw jinglixlangg jiauww ioksog qniaa, langg' ix qapp lanw taii kiaux caa, lanw bagjiux qimx qimx marr byy ix ee huatdo. Guaw m si byy sinwiong :liw, sidjai si jit vaiw dyrr ho’ngg qar quaix, qniax jit xee likdnaw .kir.”

Jiokk sniu beh kiw air ciyr, qiongg lunw lehh jinjniar diyhbuaa. Lerhunn qig jit xee binrcniux byy ir aw byy ir, qongw, “Dnaxx liw jitmaw byy cur-lai ee langg dnivnuar, byy-kuaw.-byy-lu dng’ juriuu, beh air kir dyhh, byy langg quanw liw e diyc.”

“Guaw iarr byy decc air hongsyx a!” bersux sriu diyc ongxkud, Jiamx Honghuix iong qorr huah :ee. “Guaw cud kir ingwsiuu si qovutjiongx. Guaw si kow byy dagg amr erdangr kacc jaw dngw laii hiycsen. Lanw longxx duarbuxlangjingw :ar, guaw tangx qra liw qongw vec :ee. Guaw qui’ vnuar dxangx byy ham' jaboxlangg jywhuew :ar.”

Lerhunn ee simqnuax pigpok cingw, qniaqnir qapp ix siy’ duiwsiongr, bagjiux qinw suaw duiww vadd xui aw kir. 

U kngr jit dingw sianglangg bincngg ee vangqingx, tranr Jiamx Honghunx byy dirr qongsix ee sii, samvutgorsii aw, Lerhunn e zip kir qra ‘camquanx’ .jit .xe. Vangqingx ser aw qingx, bincngg si juxqiyh, jiamr siongrr dua xui. Hitt dingxquann ee mipue m bad jih, snaaxkor danr qaxx huex-huex-hnir-hnir, u siaju, nailinggu, nekutai, qycc iarr u snaqakkor, qeww sriok dirr javolangg ee. Vangqingx ee viah huanw sib, quixlyrr xui cad hiauh .kiw .laii, uree soxjai qycc cniurba. Jitt qingx qongxx beh jiyx cit’aw jywsanxkuir, sidjai taiww qoxqanw; sunzenn beh kunr, Lerhunn dy’ hiamm uwuer.

“Iauxx m si juriusinx, duiww siyxjiaxlangg u iwair, iarr diyhh cangr dirr simlai.” Jiamx Honghuix binrsig samwdam. “Zidjiw rair quer, qaqi diyhh sniu venwvo. Jrngx pnaiw binrcniux, qig pnaiw sniasaur, guaw ee koxjingg, liw anxnix u liauxqaiw :ar bor?”

Jit dnxua ue, hyw cincniu burvylee. Lerhunn dagg qxur dy’ u tniax zip hni, hionghiongg ho’ngg mng kiw, suacc m jaix diyhh dimr tauu iacc m si.

“Liw benw diyhqniax. Guaw be ovec duiww liw anwjnuaw.” Lerhunn qig diam diam, Jiamx Honghuix pacpuar sixjing. “Liw byy qer, guaw u crua. Jin’ jai’ngiaw qaqi puer liw be kiw, bagjiux pen’ pen’ aw sniu beh knuar :liw, ciuxqud qan’ qan’ aw sniu beh uaw .kir.”

Qui’ sinkux siyx hangx hangx, Lerhunn tauu qaux qaux. Ing’amr ee Jiamx Honghuix jiokk huanxhingg. Jit vingg simqnuax huah qongxx diyhh qinw liusuanx, jit vingg qycc sniu beh dngdanw au cuttauu.

“Guaw qamxx erdangr qra liw jimx .jit .xe? Jimx .jit .xe nia. Jimx .jit .xe dyrr hyw.” Jiamx Honghuix kunxqiuu, puawcer sniax. 

Naxx bangw-aw decc qiyr, Lerhunn dew dew jit sniax “hngr”, javolangg tniax .diyc sui’ cnii uaw .kir, siangx ciuw qra siyxjiaw ee bin tnaw quann, vui’nngw ee cuir duir hiongr u buah enjix ee dunn. Siy’ dah siy’ hruee, nng duir cuiwdunn cocox sigsai, kacc benw zuarr quw, quandingw longxx qnaa u duiwhongx ee kiwbi.

Diongjam hiyccuanw, Jiamx Honghuix qra Lerhunn ee siauxtew lamw diauu lehh. Uaxping dirr javolangg dingrdauh ee hingkamw, jaboxlangg qui’ sinkux nngw siysiyy. Vorvinn, diwqag diyc javolangg ersinx u qyc’ngiu, Lerhunn giac bak, knuar diyc Jiamx Honghuix jit duir bagjiux lyy qiakqiag, jiacc beh liongwjauw, javolangg qra ix ee siangx ciuw knii diauu lehh, qycc suacc dirr siyxjiaxlangg binrjingg pah vnuar qui.

“Lerhunn, guaw air :liw, guaw aiwbo liw jiokk quw :ar.”

“Jiamx .Sensnix, liw...liw beh congr sniaw?” Lerhunn naxx qongw naxx junr.

“Lerhunn, liw benw huanlyw, guaw e tniar :liw. Liw hro gauw air, hyw bor?”

Vreh kiw srinx, Jiamx Honghuix qycjaiww qra Lerhunn lamw dirr hxingx-jingg. Bagjiux kiw damm, sinkux hro javolangg ee ciuxqud sryw lehh, Lerhunn hingkamw jat jat pnaiw cuanxkuir, jongw .si, bagsaiw lrauu m si uirdiyhh jitt jann.

Hingjingg ee siauxtew nngxliyc, dikdnia. Javolangg angwjangr-snix, jit xe ciuw qra siyxjiaw py kiw longxx byy hniwhnaix, kuix kax qniaa ee hiongr ngr vangqingx kir.

Inwviyxqix dnia .kir, qinaxzit ee kangkuer qaur jiax suah. Mii, duxx beh cnia’ngia.

15.

Cuwbin vnuar qu sniur ee lxauu-aw, liulongg si sinx ngiu sinx kuanw, byy l.-longrkong-k. ee sniax, jre diyc qycc be d.-dongrhnir. Bunqed ingxvaiw aw vniar giabbu, dahkaqaur ee qongsix jnia’ vah qingx ingwgiac si u, beh cincniu Kow Qunhuix inx jitt jiongw jiacc mini jiacc sokqed :ee, dirr Jngx Bunqed ee qiwdii lairdew cue byy.

“Linw qongsix, jiokk... cingkiwsniur.” Dac zip Qunhui ee qongsix jid’err knuar, Bunqed simqnuax jiksii lingw jidvnuar, benxqiongw hro ix cue diyc jit qxur ue, qongw diyc qycc vuanwtuntor.

“Soxjai ehjnix-j., byy kuanw hro jingxjee, siapdiap, simqnuax akjag, jyr iarr suacc u sxid?” Qongw diyc jiokk bunai, Qunhui m si koxquebin.

Dirr qanda’ cai nng jxox surburixdyh ee vanrqongsig, tauqelangg siaurqair dongsu hro langkeh sigsai. Siyxjiaw vreh kiw xui, qapp tauqex kia dangjee, sinquann cax Qunhui beh jit liap tauu. Ix duiww Bunqed dimr tauu bunxciyr, lexgii qniaa suah, iurqycc kir byingg ix ee kangkuer. Bunqed soksog giyw .jit .xe, jit daii denrnauw dirr ix dyh-dingw jiamr duarui, inwviyxqix kngr dirr ix dywciuxvingg, si tangx kopi, faks qapp skan ee qihingg. Siyxjiaw ee jerui aurviah u dingr qxer-aw, qui’ vaii bunsugiab-aw qangg sig :ee kiyh jywhuew, liyc aw u singg honggee.

“Liw ee ixaxui qaxnaxx kacc ser.” Bunqed qongw qycc qorr ciuw qiw.

“Decc jycsid :ee kacc dua. Guaw dagg qangx c.-cutzip-z., jiamr dua xui e pacsngw soxjai.” Qunhuix qaixsueh.

Tuax jit jiah iw hro langkeh jre, Qunhui mng Bunqed beh limx cnidee iacc cauwpuxdee.

“Pnaixser, qavix duxjiacc limx liauw, iauxx bue kir brew.” Qunhui qycc vow jit qxur.

“Qunxjuiw dyrr hyw.” Bunqed dab.

“Qunxjuiw! Acc m dyrr vec qavix? Hmr, liw jin’ hyw kuanxtai. Jyr linw bow be baiw.” Qunhui qongw ciywkueue, an’ unquanr zic jit aux qunxjuiw laii hro langkeh, lalunn siyx :ee.

“Liw qongsix nacc byy suer kacc dua qingx lehh?” Bunqed mng. “Liw singliw narr jyr dua .laii, sii qaur beh qex cniar langg iarr byy diongwgiac ee ixaxui tangx jre.”

“Beh ixaxui m kacc qanxdanx. Vanrqongsig cue kacc dua qingx :ee dyrr u a!” Qunhui liac diyc ue dyrr rinr.

“Rair qycc cue, hex dyrr tauu kacc dua srinx a! Kixqix ee sii, liw simqnuax tacc byy sniu kacc dngg lehh?” Bunqed qongw qaxx jiokk zedsyr. Jidsii, sir luiw luxsingr ee bagjiux cnix ginwginr jiauu knuar duiww ix. Diwqag diyc u sitgenn, Bunqed qinw ngua jit xee kauxkir. “Vnuax cur si jiokk huiwkir, qongsix qyckacc si. Jit vaiw censuaw, qanda’ qra kecho tongdix sinx ee derjiw qapp denruerhuanx dyrr tangx hro liw bruw qaxx gong .kir.”

“Jitt qxur sursit.” Qunhui qra dimr tauu janwsingg. “Cuwsuer narr lap e kiw, aurzit aw beh vnuasuaw xui, guaw itding jiauww liw qar :ee kir suer jit qingx kacc dua qingx :ee.”

Binrtaujingg ee jaboxlangg ciywbin siy’ knuar, Bunqed suacc naxx exqauw-aw jiac diyc koxquex, utjud qaxx be qongw .did. Jit vo cax, vo vo cax. Jarhngx kar denrue iog beh qniwbin, langg’ tegi kir qaviquanw, ix jip'ir beh laii inx qongsix. Jinw jre dirr jiax ho’ngg gexsew, sunzenn qaqi jyr did laii.

“Jngx .Sensnix jitt jua laii, si beh...” Hequx be lunw did sraur, juxlangg dairsingx kaikauw. 

Bunqed giac bak qra vnix:a decc jycsid ee siyxjiaw knuar .jit .xe.

“Kux Siyxjiaw jywsu jiokk qinxsin, langg qycc diamrjaii. Liw tingwhyw hongwsimx.”

Qunhui bingbingg jit qxur ue, Bunqed suacc pnaixser jit xe. Iong bagbuew qycc qa’ngg giyw .jit .xe. Siyxjiaw kax dew ciuw dew, sittauu decc jyr jiokk mexcer. Siux-huad tuanjinx ee sinwhy-sniax l.-liogsiok-s., denrjuxpuex qyckacc si laii laii kir kir, denrue jicjiab iarr jit tongx quer jit tongx. Inx qongxue-sniax qiauxziauw diyc ix jycsid dendyww kacc duarbin.

“Dingw zit aw liw kir guanw qongsix, liw qongw narr dycc jit qangx guaw ho’ngg srii taulo, liw qiyr guaw laii cue :liw.” Bunqed hyxlew aw sueh kiw.

“Liw hiax byy druar :ar?” Qunhui mng, bagtauu qad qad.

“U, u, guaw iauxx dirr hiax jyr, byy jauw.” Bunqed qnuaxqinw vuexhue.

“Jinwjingg beh iongtog linw qongsix hitt xee sittauu, guaw u cue diyc vadd qingx jyr :ar. Liw qamxx decc cue guarlo-aw qiamkueh :ee?” Qunhui suar lyc mng.

“Marr byy,” Bunqed iurqycc iyy tauu. “Linw ee sanxgiap ham’ denrnauxqair, siwqakjngx dac byy jit qag diyc. Guaw jinjniar hnowqii, guaw narr laii erdangr congr simxmichuer?”

Mng diyc in’iuu, beh qongw ee ue, Qunhui dirr tuakag-lai liyc aw singx quer jingxliw, “Guaw jerje ving’iuw longxx decc cue kacc u qanghudew :ee. Guaw jit xee a’hniax uanaxx jyr denrnauw jitt dxoo :ee, vutsii dyrr tniax ix decc uanwtanr, qongxx u jnii cniar byy langg draur jyr.”

“Qacc u sigsai :ee, qycc iarr u hniaqyx dauwjah, liw tacc jauw laii guanw qongsi beh kaix dua jnii?” Bunqed beh criuu jit xee qinguann.

“Inx byy qraur qiciuw, jyr byy lo laii.” Duiwcuir rinr, Qunhui lenrr sniu .jit .xe dy’ byy.

“Liw nacc e jaix? Liw qamxx u hro inx cir knuar mai?” Bunqed tniax diyc amr jubuix, suar lyc mng qinw qinw.

“Iarr u jit xee byy? Inx jid’err tniax dyrr qra guaw hnair tauu. Guaw jit xee ving’iuw jiacc si cuwbi, qniax guaw qycc kir qra lyx, qinw let jit dniux dnuax, qiyr guaw kar denrue kir mng.”

“Acc m dyrr guanw qongsix iarr u dirr hitt dniux miadnuax lairdew?”

“Dyrr si u, guaw hitt zit mrjiacc e vniar .kir.”

Id laii zi kir mng kir jinx, sueh did bingg. Jurdew jit xee simqnuax qed qui’ uann jyr jit xe vangwsangx, Bunqed qra iw-aw giuw kacc uaw .kir, s.-sinvir-v., mng Qunhui qamxx bad jit xee hy jyr Jiamx Honghuix ee langg.

“U siy' bad, byy qongxx qaiww sigsai.” Qunhui dam dam aw rinr.

“Linw u sigsai! Liw dingw jua kir guanw qongsix ee sii tacc e byy qongw?” Bunqed sniasaur u qnaa singwde.

"Guaw hitt sii iarr m jaix linw u sigsai a!" Qunhui qongw diyc jiokk buqox. "Qycc guaw hitt zit narr tee kiw ix ee miaa, guanw qongsix jitt xee kes, liw qamxx dyrr e jriab?"

Byy-sniax-byy-qxur, Bunqed vnixcuir .kir. Kux Siyxjiaw dirr jitt sii qra inx nng xui hue sitlew, qongw u dairjir beh qra tauqex cingxsi. Bunqed sunrser qra iw-aw lux kacc aurviah, li Qunhui kacc hng .kir.

“Jitt xee jabow urngiaw qauxked dyrr driyc. Guarkauw langg decc hongsniax :ee kakkag si jinx m si qew.” Tauqex qapp sinlyy decc dramm qongsu, Bunqed jre dirr vnix:a diam diam sniu.

“Pnaixser. Lanw duxjiah qongw qaur dyhh?” Qaudair liauwxqed, qra iw-aw sec jit xee hiongr, Qunhui iurqycc qapp Bunqed bin duiww bin.

“Jiamx Honghuix inx qongsix ee bangrjam si guaw jonghongg cniaqig :ee.”

Tniax liauw, Qunhui dimr tauu.

“Liw jaix?! Liw si anwjnuaw e jaix?” Bunqed mng qinw qinw.

“Qaxnaxx m jaix tniax si’angw qongw :ee. Quer hiacc quw :ar, jinw be qir .did .ar.”

“Liw jiacc jnix, be qir did jiacc si qrii.” Bunqed iurqycc dirr simlai decc liam.

“Jairr liw decc knuar, ix dairkair aw simxmih kuanw langg?” Bunqed iurqycc mng kiw.

“Si’angw?” Qunhui lig bagbaii.

“Jiamx Honghuix a!” Bunqed rinr qaxx jin’ qizenn.

“Qauvuee iarr byy qongxx qaiww cimx, beh anwjnuaw lun kiw?”

“Langg’ ix dyrr qaxnaxx duiww liw jiokk jnia’ liauxqaiw. Lenrr liw ginxaw quiw xee quiw huer, langg' ix dy’ jaix.”

“Oox!” Qunhui jit sniax danqanw, byy qex qongw simxmic.

Denrnauw caux quw sraiw piacpni, bangriac kuix be kuix, inwviyxqix iarr m tniax cuir. Siyxjiaw mng tauqex qamxx beh qiyr langg' laii knuar. Bunqed sui’ qongw beh ter inx singx srunn bai.

“Si dyrr driyc. Saihu ven ven dyrr dirr lanw jiax qongxx!” Tauqex jit qxur ue, siyxjiaw sui’ vreh kiw srinx niu langkeh jre. 

Nng xee jaboxlangg jit langg jit vingg kia dirr Bunqed sinkuvnix knuar ix denw ciuxlo. Jiax cic hiax zic, qycjaiww kuiqix liauw, denrnauw naxx cniu dingtausnix, qniajauw sun ~ ~, jingwtauu li ~ ~. Nng xee jaboxlangg longxx qra langkeh ylyw birsi.

“Aurquer ix narr qycc dicduh pnaiw siw, liw dyrr qra diap, dagg ziw longxx qra cic. Narr junw iauxx qar be quaix, guaw ee denruerhuanx linw u, jyww linw kar laii mng.”

Kavo-ciuxlo denw jit huee, Bunqed qongw beh qywsii. Tauqex qapp sinlyy jywhuew sangr ix kir jre liulongg. Cud duarlauu, Bunqed naxx qniaa naxx decc kosi’aw.

16.

Jit puah ho quer, tnix naxx cincniu virr dxng .quer qangrkuanw, cringx ~ ~. Kacc kir, guehniuu tauu qaux qaux cud siuwvangg, sinkuvnix u tnicnix vueduer, sui’ liap aw bingg ~ ~.

Jauxciax liglo, an’ Daivag Sniaa-lai jit jua vniar laii qaur Samjix. Jurqa’iong :ee sraiw qauwui, qycc kir ee lo diyhh qor vorlenw. Zinde-liongxsox, zit .sii laii dy’ byy koxx cue e diyc, dogdok tauxaw vyr .laii ee siausid, qongxx amwtauu aw kacc drng e diyc langg.

Qor duir jursow-huanhy byy knuar lo, jit kud lapkud-aw byy juwir .diyc, dahdenx kongrkong pinn, Qunhui hiamw hiamw vuahdyw. Tokax sniuu quequee diyhh unn aw si qniaa. Narr cinwcaiw vuac jit xe, dikkag diyhh qniaa huantauu pah tewdangqow. Jitt jua si beh laii duiww langg' jingqaur, qapp langg' qinwqongr. Jit srinx vicjah dy’ iauxx damw damw, sinkux narr uer diyc lasamm, snxax siyxkuaw amjamx, dirr langg binrtaujingg tanxkia dy’ be jniar, siy’ jnewcuir beh anwjnuaw u vniawbin?

“Ingwqaix dyrr si jitt qingx.” 

Nng-janr-kiw ee tauwtnicur kiw liauw vutjiw u ganw. Kia dirr cur taujingg, Qunhui dirr cuir-lai qongw hro qaqi tniax.

“Pah ix byy gii kacc u ngiabin.” 

Dirr cur nirr cuisngr sxor vaiw, sniu laii dyw kir, jnia’ byy qanxdanx jiacc juxsimdnia, jinjinx laii qaur der, kax sngx ciuw nngw, denrlingg beh cic henrvutdnaw dy’ byy jaidiau.

“Jnriu snaux jit qangx, lyc haiw iarr jit qangx. Jiongvutzenn hro langg' hor .cud .laii suah. Buerjingrr jenr dyrr qiukax, ongxhuir ehngx laii jauw jitt jua.”

Kuivo qniaa, byy huantauu, ciuw siyxkuaw decc junr, denrlingg ee liuw-aw qra zic dimm.

“Sniaw langg?”

“Guaw Kow Qunhui.”

Sodow lairgua ee sniax longxx jabow :ee. Jinx miaa jniar sner d.-dairdenw-d. vyr hro :langg, mngsniwvanw byy-dongr.-byy-jing. Danw jit xe quw, kia dirr mngkauxcuir decc senr danghongx :ee kiw sywsimx, jiacc decc diuduu qamxx beh qycc zic, mngg suacc kuix .kuix. ‘Jniuw Qenwhongg’, Kow Qunhui sinhunrjingr binrdingw knuar e diyc jitt xee miaa, henrlangg jitt diap dyrr dirr ix binrjingg kia.

“Liw byy beh cniaw guaw zip .kir?” Qunhui qongw. “Guaw byy taixqyx iarr byy lryy-jxingr, lenrr qasaur dy’ hranw .did.”

Jniuw Qenwhongg jit xe bin sim sim.

“Dirr guarkauw cri bangw si byy iauwqinw. Guaw naaukangx dua, jex liw dy’ jaix. Qiauxziauw diyc cuwvnix, inx sui’ hxo aw jauw cud laii huah, qniaqnir duiww liw kacc sitlew.”

Hangxhig ee ue junxjad liauw u duiwlo, mngg dua kuix, dac zip hording-lai, tauu jit vo qxii u sraiw quer bin jin' hnuahiw, suar .lyc jiacc si dua cud hxir, Qunhui simtuu u cuanvan, qniax qniax decc danw.

Cyxqiiog jiamr qui’ janr jidvnuar kuah ee langkectniax, jiuxduu jyr siw :ee naxx jit dow viah, lairdew X.O. qapp uiski vaii qaxx beh byy xui. Nngrcingvec ee pongwiw L hxingg, tangx jre, tangx tex, iarr tangx junw bincngg kunr. Imhiongw qapp denrsi hag qui’ jxox :ee, sir xee lacvah cai dirr sir qaksir. Jauwkax qapp jiahvngrtniax knuar hen hen, vangqingx qig dirr laudingw, nng janr lxauu kyr jit qix calautuix decc jniurlyc.

“Linw daux jiokk u paiwtauu qycc dua qingx, nng xee langg druar unw suwsi :ee.” 

Jiacc jre lyc iw, Qunhui dairsingx la jit xee uertauu. Juxlangg qingqah trec .jit .xe, qongw cur si cniaqig ven :ee; ixdyh qapp denrkir, kacc je si dingw ciuw vnuar bre vnuar siy’ sangr :ee.

“Jitt hy qymngg quir soxjai, junw byy jonghongg dan’ dan’ cuwkag, byy cuann lecc cingx gua bxan qnaxx vnuax be zip .laii.”

Juxlangg qongw cur brew diyc siok, jit-cingx-bxan kacc benw.

“Jiacc hyw xe!” Qunhui dner cinwciyr. “Liw tacc e itdit longxx jiacc qnia'un?”

Juxlangg qongw dingw ciuw qoxpiyr vruac sux, jidsii dexkiamr dngw be quer, vniawqer tangx did henrsiauginn.

“Jitt dongr vedjongx liw henrqimx brew :ee?” Qunhui qongw, bagjiux tenw dua luiw. 

Juxlangg qinw et ciuw, qongw dongsii si qra ginhangg sinwjiyh, pnipox hingg rair jnia’ jap dxangx jiacc e liauw.

Guarkauw u langg decc qiywmngg. Juxlangg hionghiongg vreh kiw srinx, katauhux kap diyc dyh-qnii duarbuw sniax qycc iarr byy huah tniar.

“Jniuw .Sensnix! Tacc e liw laii kuix mngg? Linw taiwtair beh criah pongwsex kiamr jit qix pongwsejiamx. Guaw qra qongw guaw u. Duxjiah kir cue .cud .laii, jitmaw beh tec laii hro :ix.”

Juxlangg qra mihqnia jrih .quer, sueh jit sniax dysia, mngg dyrr beh qnuaix .kiw .laii.

“Jniuw Taiwtair byy dilehh? Ix u jit der VCD qongxx beh jiyh guaw tec dngw kir knuar.”

Juxlangg qongw henrvo kacc byy lirven, diyhh tingwhau binaxjair.

“Linw cur nirr qaxnaxx u langkeh hnoh? Acc byy, guaw lingrqangx jiacqycc laii.”

Uat jit xee srinx beh jauw jinwjingg, qecviah oksangr hiongr lairdew siamx .jit .xe, bagjiux gnoxduxzenn qapp dirr langkectniax jre :ee siy’ gu.

“Ix langg dyrr dirr laudingw qamxx m si? Langg’ juanqangx laii, mihqnia liw qamxx benw qinw tec kir hro :ix? Huanrser ix dngdecc danw jitt qix pongwsejiamx tangx qra liw criah jit niaw snxax qnuaa .langg cing.”

Juxlangg qongw ix jairlaii qniax zuac m uir qnuaa, jitt diamw Qunhui siongrr jaix; qycc qongw pongwsesnax snaaxduu quixnarr niaw byy decc jiyxkueh.

“Liw buew:a jitt qxur guaw beh sinr. Druar qaxx vedjongx .laii, jiac-cing-ing iarr suacc e kiamr? Quewjiog dy’ e or. Si qongxx, liw qapp langg’ u angbow qniaa, byy angbow miaa. Rmuaa cnelangg-bak u si jit sii, iarr diyhh qa’ngg binghunx-daircua kacc lortauu dit.”

Juxlangg pnirqinx qriur qriur amr dimgimm. Qunhui danw byy jit sniax vnuar qxur.

“Liw benw huanlyw. Guaw ing’amr m si laii beh diauqoxdongw, dendyww si beh hro liw jit vo tauw. Guaw tee :ee setsuw liw u dong’ir, lanw binaxjair dyrr tingwhyw ciamzi.”

Jitt huee, juxlangg ue rinr qinw qinw, qongw u sniu beh tniax jit xe tauwqix, si, m, longxx tingww qycc ciauu.

“Cuwqingx guaw hongwkir. Liw anwsngr zuarr je beh dnraw :guaw?” Qunhui kuix diauqnia.

“Hnaa?”

“Ingxvaiw qra liw tyw jit qingx cur, jitt jann juw suah, benw qycc qongw kiw. Jaboxqniaw dngdecc dua, bagjiux vreh qimx vo vo longxx diyhh jnii. Liw jyr langg’ laurve :ee byy draur cnia’iongw cud quaw soxhuir, qamxx qongw erdid quer?”

Juxlangg iurqycc bin iux bin kiuu, qongw cur brew kacc byy jit dxangx, jnijuiw jin’ andauw; qycc qongw jaboxqniaw qo’ xee, beh narr u cundiongg, qinw qinw marr vud hro ix, be qenlin.

“Qamxx anxnix?”

Juxlangg tauu dimr qaxx beh lag .kir.

“Jaboxqniaw liw narr u tniar, guaw u sniu diyc jit vo," Qunhui cuanw jit xee kuir. "Liw qoxpiyr qui’ee quer hro :gunw, jit sxenw go lii liw dy’ benw zimm.”

Juxlangg binrkangw cnix sunxsunw, cuir-aw kuix kuix. Jin’ diyc sii, denrue qingw jitt diap giangx, juxlangg qinxmew kir jriab.

“Uee. Hngr. Jaix lar. Kacc danw jiacc qongw. Dyrr qra liw qongw guaw jaix a!”

Jit tongx denrue suah, juxlangg binrsig amwdam, dngw jit xee sniasaur, qongxx qongxpiyr ee dairjir rair qycc dnaxhap, itsii-itkig byy huatdo vaiviw qaxx dingrdongr.

“Guaw liauxqaiw. Qiamxcaiw liw diyhh qapp laudingw :ee singx camgi. Vitqingr, liw ee qedangr ix iarr u hxun.”

Juxlangg hnair tauu, qongxx uree qoxpiyr jitt jun naxx qowjuaw, m dat snax sxenw jnii; quewmiaa diyhh jit xee qangx, loxkuir qiamx diyhlat.

“Suijai liw. Qinsiok, guaw lirsux cuann ven ven dilehh. Huexqir qapp juaxginn dycc jit xee kacc u dangrsniax dyrr jairr liw nriu.”

Beh laii diyhh vecqia, qajair u guehniuu dirr taujingg jiywlo. Jitt sii beh huedngw, guehniuu vreh kir dirr Qunhui taukakbuexdingw. Cud vedjongx qniaa snax vo lo, Qunhui uat tauu knuar. Zi lxauu txangx-aw-lai jit xee ongiaw dongrhnir, taujangx dngg longlongx, bersux jaboxquiw.

Jin’ jaix si koxjenr, jnex u jnex byy iauxx bue hunhiauw. Tauu qaur buew, lairenn ee bow, qexvauu ee Jniuw Taiwtair byy henwsinx. Byy-lamr.-byy-siyc, Qunhui zinrding qaqi jitt jenr vaux sux :ee, bylun auwbuew tyw diyc zuarr je.

“Suah suah .kir, sniu sniu hiacc je beh nii? Beh junw inx cexvaiw, hitt xee langg marr be qycc si lanw ee.”

Tnicnix siamxsih, u singg decc dimr tauu qra janwsingg.

17.

Kongrlong kongrlong. Knuawkngr ee tnix, iurqycc u jit jiah huelingqix vniar jinrpangg ngr ix ciongx .kir. Huelingqix sriok dycc jit qingx qongsix :ee, dairkair e vuex kir dyc’ui, Lerhunn siangx kax dac dirr tokax tauu kenr kenr, qyckacc anwjnuaw jinn anwjnuaw siongr, bagjiux knuar e diyc :ee marr qanda’ qui’ sinkux vec puxpuw ee kuanxhingg.

“Liw dingw jua laii qidniuu si dangsii ee dairjir?” Huelingqix vuex duiww tnidingw, bri zip kir hunn nirr. Qaur jiax, Lerhunn qamguan :ar, sinkuvnix ee Jiamx Honghuix sui’ qra mng kiw.

“Guaw ixjingg m bad laii .quer,” Lerhunn hnair tauu. “Qinaxzit sngr guaw jitt siwlangg tauu vaiw knuar diyc huelingqix kixvuex.”

“Liw m bad cutqog .quer?” Jiamx Honghuix jit xee bin jinw iwgua ee kuanw.

“Dingw nii aw u jit vaiw cnimiaa lensuar hiyh snax qangx, u ving’iuw jiyx guaw jywhuew kir Hiongqangw.”

“Narr Hiongqangw, jre huelingqix, diamw gua jxingx quw dyrr e qaur. Li Daiuann jin’ qin laii qongw, marr sngr cutqog, byy horjiaur berdangr kir.”

“Horjiaur guaw u. Hitt jun aw, qipiyr qapp luxsia marr qa’ngg juwbunn :ar. Acc dyrr beh cutqog hitt xe, guanw a’buw ui puawkangx zibngi, qiyr kiw qiyr kunr juann ngr guaw jit xee. Mrjiacc hitt jua, guaw jurr anxnix byy kir.” Lerhunn qongw, trow jit xee kuir. “Qnaxx si guaw juwdnia byy cutqog ee mia.”

“Qongw hex!” Jiamx Honghuix qexngiaw qig jit xee binrcniux. “Dnaxx jitmaw cutqog qanxdanx qaxx. Liw qacc horjiaur ven ven, jit tongx denrue kar kir luxhingsia, qipiyr qapp ciamjingr, inx qeww qra liw huadlyc qaxx hyxser hyxser, benw liw qaqi buaa kapuee.”

Qongw diyc cittyy, bagjiux dyrr qimx. Lerhunn jamxzenn aw hnowhenn, mng Honghuix jingrr qaur dnaxx cutqog quiw vaiw.

“Berdangr sngr vaiw,” Jiamx Honghuix qongw diyc jiokk ciygiyy. “Qanda’ Taiwqog, guaw dyrr kir quer go~lak huee.”

Naxx cincniu decc tniax senqow, Lerhunn hni-aw pag pag, iarr qrii, iarr himsen.

Jit vrangx dirr snax diamw kxongr sir hunx vuex qauwui ee huelingqix, luxkeh iokqiliok dirr sir diamw jinwjingg dyrr tangx cud haixquanx. Jit daii sakciax an’ Lerhunn sinkuvnix quer, dingxquann hingliw dua xee ser xee qeww jiokk dangrsinx ee kuanw, javolangg sag iarr byy tangx zuarr kinlat. Qapp ix qniaa dangjee ee jaboxlangg siangx ciuw iarr byy tangx lingxtingw. Dyr ciuw kanx haizii, jniawvingg jit log jit log qnrua qui’ ciuw. Lerhunn jimjiog qra knuar, juanjuanx DUTY FREE :ee.

“A’qxu! A’qxu, guaw dirr jiax lar.” Am’axqunw crunx dngg dngg, Jiamx Honghuix ciuw giaa quann quann dua lat decc et qycc naxx huah. Lerhunn iauxx decc nicnih cue, Jiamx Honghuix vnuar qniajauw anww jniawvingg diddit kir. Qniax lauwdin, Lerhunn qinxkax duer dirr ix aurviah. Sinx ree qa kax, qycc si quandah :ee, jit vo dahlab, kaam hiamw hiamw kir jrig .diyc.

“A’qxu, huelingqix jre hiacc quw, liw unxdangr jiokk tiamw. Laii, hingliw qaux :guaw, guaw laii qnrua." Jiamx Honghuix ciyr tauu ciyr bin qra hingliw jrih .quer. Ham' ix kia duiwbin :ee taujangx vec cangcangx duiwvnuar srex, binrbew siwvangx, pnirdyx jiokk qiamr, kanx jit qix bagqniar, bagqniawkingx dorqimx :ee, qniawbah qaurlue.

“Jitt xui qnaxx dyrr si Qanw Siyxjiaw hnoh?” Lau sensnix liac Lerhunn qimqimx knuar.

“A’qxu, ix hy jyr Lerhunn,” Jiamx Honghuix qongw. “Iarr tangx qanxdanx qiyr ix a’Hunn dyrr ersaih. Jairr liw qiyr.”

Nng xee javolangg qniaa jyr jingg decc dramm dairjir, Lerhunn uaw dirr Jiamx Honghuix jniawciuxvingvnix, diau’iwqor kacc ban inx vnuar vo. Jiamx Honghuix qaqi sraiw ciax qapp Lerhunn laii jriab a’qxu. Lirkuix qidniuu tingciadniaa jnriu qysog, beh quer siuhuiwjam jinwjingg, jit jriw quewlordnuax Lerhunn singx lir jit dniux lyc laii dniudanw.

“Diyhh jair guaw kir Laiilaii.” Quer siuhuiwjam, jre dirr aurviacjy ee a’qxu qra guersingx huanhur.

“Lailai? A’qxu liw ingxquer qamxx m si longxx druar Qokvinx?” Honghuix mng.

“Kaxlingg dyrr qra guaw dring dirr Lailai, qongxx qycc gua guec jingg dyrr dring :ar.” A’qxu qanxdanx qaixsueh.

“Hex Lailai jitmaw decc huanx, cutzip jiokk byy lirven. Ix taukag si decc sniu sniaw, tacc e kir qingw hitt qingx?” Honghuix liyc aw u singwde.

“Dnaxx dyrr dring :ar, kacdingg aw qniwbin dyrr benw qycc kiyh kiw laii qongw. Lailai marr dua qingx vngrdiamr, uanaxx go liap cnxix :ee. Langg’ vadd langg marr decc druar, iarr m si qanda’ lanw.”

A’qxu qongw liauw, jidsidig, ciax-lai jing ciaucciauh. Quer u jit quw aw, Lerhunn uat tauu mng a’qxu Kaxlingg si si’angw? Jyr langg’ sirdua :ee bin crinr crinr, cuir him diauu diauu, byy cuwbi beh qra rinr ee kuanxsir.

“Kaxlingg si a’qxu ee kewjaboxqniaw.” Ngingix-ngorngo, Honghuix puee puee aw qongw.

Ciax sraiw qauwui, jit xee dir angg by-aw :ee uaw laii beh draur qnrua hingliw. Honghuix qra ciax ee syxsii sunrsuar qaux :ix. Zip laii qaur vngrdiamr lairbin, jit xee jaboxlangg vunxjniaa dirr lobbi decc jre sui’ vreh kiw srinx hiongr inx snax xee qniaa uaw .kir.

“Guaw u ciek in :ar, vangqingx dirr cid lxauu.” Rinx jit xee quexaxlee, diamw enjix pah juixhunw, kewjaboxqniaw Kaxlingg qra kewve-aw vrinw bingg.

“Cid lxauu tongdongg poxtongx vangg ne!” Honghuix diaur quann sniax. “A’qxu hranw did quiw sii jiacc dngw laii jit vaiw, m dyrr hro ix druar kacc suwsi lehh, tacc e qra dnia jitt hy qap’axduu.”

“Qamxx u hiacc ser qingx? Liw bad kir druar .quer or?” Kaxlingg vyccuir dyww mng ix.

“Dingw zit aw guaw jit xee Singapor ee langkeh laii, cutzip air beh druar go liap cnxix :ee, jit xee jnii pah zxic-sir xee qad. Hiangwsii ix vangqingx dyrr dring dirr Lailai cid lxauu. Ix taubuew druar kacc byy jit lexvair, guaw dagg qangx dy’ tniax ix qra vangqingx hiamm qaxx cauwsaiw. Ix qongw setvi jaulauw junw duxhyw, soxjai ehdec jiokk uwjag, kacc dua qnia hingliw dinr lehh dy’ pnaiw qniasuaw, druar diyc jiokk be songxkuair.” Jiamx Honghuix yc hro inx tniax.

“Jitt dingxqib ee langkecvangg, inx jitt guehzit u jettauu.” Kaxlingg uirr qaqi hunhue.

“Liw m bad kir .quer liw m jaix. Langg’ a’qxu inx Niuxselann ee cur qui’ee longwkongqingx, zuarr aw nirr kui’uii lehh! Vngrdiamr jitt hy siksutduu, a’qxu unw druar be diauu lar.” Jiamx Honghuix qongw qaxx krir cuaccuah.

“Jinjniar be quanwsir jiacc laii ciauu. U jnii, qniax byy soxjai druar?” Sirdua cutbin jyr qongcinx. Honghuix qapp Kaxlingg jiamrsii tingjenr.

Guersingx qnrua hingliw, syxsii dirr kewjaboxqniaw ciuxtauu. Jit qniaa snax~sir miaa beh kir jre liulongg, nng xee guarqog langkeh jaw inx jit kavo dirr mngkauw dngdanw, qauciangg duarhanr.

“Jyr jit jua m jaix e quewdang .be? Jitt duir dog pni-aw longxx dua-ko.-dua-vew.” Kaxlingg kauhkauc liam. Tniax u :ee byy jiyx byy cua, qangg sijunqra tniax byy :ee giyw .jit .xe.

“Qiquantuix jre be lyc, liw laukax danw. Tingwhau dairjir longxx huadlyc hyxser, guaw e kir cue :liw.” Beh dac zip liulongg jinwjingg, Honghuix qra Lerhunn qaudair nng qxur.

“Jitt xee si Honghuix cniar :ee.” Liulongg ee mngg beh hap uaw .laii jinwjingg, kewve duiww kewjaboxqniaw hnirangx-aw-vnix qongw, qoxqanw jit qxur.

Lobbi jin’ qa’iac. Jit tuann Zidvunw laii ee langkeh duxjiacc lyc iulamxciax. Ozisang qapp obasang jit duir jit duir, sui’ xee aw diam diam iw nirr jre. Jiahvng sisinn, Lerhunn vakdow sidjai u iaux, qycc qniax jit dxngr vng jiac iauxx bue liauw, tauqex laii decc cue. Kir vngrdiamr ee qavitniax diamw jit vuex qavix cringx cringx, siyxdingg aw iarr diyhh jit~nng-vah koginn cutmngg. 

“Snaqab biw jiacc juw u vng. Ixaxui beh dogjiamr, ix si byy hitt hy kacngx.”

Javolangg ee qongxue-sniax bingg ~ ~. Byy uat tauu knuar, Lerhunn puesniu snia’imx an’ aurviah dyh laii :ee.

“Ix dy’ u huewsniax :ar, quikir qaux hro liw jipjiangw jyr taulauw, ix byy kacc cingsimx?” Jaboxlangg qongw, snia’auu dair sainaix-kuir.

“Jit din how-lringg-var-viux byy-sii-byy-hrau dirr ix sinkuvnix decc siongr pang, pnircue, jex liw dy’ siongrr jaix. Jinjniar qui’ee vangr guaw hnua, buerjingrr dua, guaw dyrr hro inx tiacjiac lyc vxag.” Javolangg huntiah.

“M si lanw decc gauu giaugii. Jit kunr rair guaw tec qui’ vah-bxan .cud .laii, juaw-tauu byy guaw ee miaa, juaw-buew iarr byy guaw ee miaa, byy-zri-byy-bxak.”

“Narr qacc lenrr guaw, liw iarr jiacc be sinwsit, lanw binaxjair dyrr cniar ludsux qongjingr. Jitt diauu lanw lingkyw mair singw.”

“Mrbenw lar! Qnaxx jniasit :ee? Jit-vah-bxan narnia, kixdang diyc ludsux e ho’ngg kiycciyr.”

Jit vuex qavix iauxx e cingwenx, Lerhunn limx jit cuir nia, Honghuix uaw laii qaur.

“Iauxx byy vec juaw ox zri siaw dniardiyc, mrqycc u cuiwiog :ar.” Laii qauwui, Honghuix ue sueh qinw qinw. “Guaw qra a’qxu qongw liw siaur liac kiw jin’ junw, dagg qywguec siauwbak marr id-cringx-zi-bingg. Ix duiwdiong liw ee jaiqanr. Jiyx liw habqow, ix u janwsingg.”

“Jitt jann guaw dngw .kir u qycc sukyw .quer. Guaw vehvec jiac miaa, qoxhunrginn rair liw kir jringw. Anxnix nacc hyw?” Lerhunn jiokk pnaixser-kuanw.

“Jitt vaiw qongsix beh qetnix juvunxgiac, lanw ciuxtauu byy nng qix aw qoxdongvaii, ham' langg' i nacc u lo laii? Qinaxzit liw cud jit xee miaa, ter lanw jiamr jit xee gxiac. Erzit aw qongsix u puewdongx, sii qaur, jongw liw tec; byy tanr, jnii liauw guaw ee.”

Syluac dniardiyc, Honghuix kir qetsiaur. Nng langg cud cantniax beh kir kanx ciax, Lerhunn tesueh diyc duxjiah aurviah dyh hitt duir lamluw, suar mng Honghuix qamxx u inwsiongw u juwir .diyc.

“Byy lehh. Anwjnuaxngiu aw si bor?” Honghuix qongw, mng diyc hongr hongr.

“Dy’ m jaix sewqanx nacc u jitt hy jaboxlangg jiacc kongx, jiacc hnirkangx kinx :ee? Jnii jiyh .langg qongxx benw siaw jiyczi! Hitt xee javox jit qix suanrjiyhcuir, henrhen dyrr venwsenx aw jit xee beh sriap ix ee jnii. Si qongxx, ix qacc qaqi sangr bah jnriu diamx, qinxban jyr qxuiw iarr ix ee mia lar.”Vadd langg daux ee dairjir, Lerhunn tniax diyc jiokk vutbak, qongw qaxx krir caicaix.

18.

Byy qniaxzii ee dairjir dnivnuar, iarr byy qehuew ngaqab, jxingg qyckacc anwjnuaw cimx, inx dy’ dnaxx lamluw-ving’iuw, ham' angbow be vixping tihh, liongxhongx narr u quat’ir beh cexsuah, si tangx jiokk qanxsingw ee qanxsingw. Beh qapp langg' juaddng, siongwpnir dikkag diyhh cuxdir, beh cringx diyhh jyr jit dxauw. Jongw kuanw kuanw .laii, qui’ jriw, qui’ vunw, qui’ tac, kacc je si siangsiangx-duiwduir.

Ciuxtauu jitt dniux si amwtauu aw hib :ee. Jit dui jiokk cutmiaa ee Aujiux gagtuann laii Daiuann jauwenw, piyr yh brew qycc quir qaxx be bongx .did. Jitt dniuu qangg sijun dirr imgagtniax guarkauw u juanxvyr. Inx qapp jingwlangg kir jre dirr dniadauw tniax byy liau :ee. Siongwpnir lairbin, siyxjiaxlangg qra tauu qruax dirr javoving’iuw ee qingqactauu.

Ngua tec jit dniux zit .sii .ee. Angg tnix ciah zit dahcauxcnix, qniaa byy quiw vo, qnrua lrauu jiab dih, huah cuir dax, huah kax sngx. Cue jit xui u imwngw ee ciu-kax ciucinr, vnix .tauu u jit xee bre qi’axvingx :ee. Zimm jap koginn qra qauqiamx jit qix ongrlaii kauxbi :ee nng langg qongqex, qongxx jit langg jit cuir jiac kacc qinw, kacc benw did rngiuu .kir.

Puxcangx ee tnix juer vuerqingw, hiyckunwzit siy’ cuarqniaa beh kir Jiyhmngg jiac uac hii. Haixqnii ee qongqingw taiww snriaa :langg, sianglangg lyc ciax liap’ngiaw. Qycjaiww jnriu ciax, suacc vairbew huad be qniaa. Iauqix-sitdngr danw tuax-ciax :ee. Ciax tuax .kir, saivakho an’ tnidingw puah lyc laii.

Qajenw giaa jnriu ciuw, dyvnir kuix kuix crann crann gab .lyc .kir, siongwpnir jiksii jyr nng vingg, jit langg jiamr jit pnir tnix, duxduxx cexunn. Bunqed simqnuax iux iux aw tniar. Dangsi'aw dymii hiacnirr aw lrai, byy cinciuw cir .quer m jaix lirhai.

“Liw qongxue kiw-kiw-dyw-dyw. Guandew hiamm ix iaulii qycc e kuecjuec sinlyy, jitt jun kuix cuir hap cuir dy’ ‘gunw Honghuix Qyx.’”

“Langg e dua, sniurhuad e venwngua. Ongxhuir hro liw tak qaur hiacc quann, jitt hy cenw cenw dyrliw iarr sniu berhiauw.”

“Urngiaw lar. Liw bagtauu kiauw qycc gauu vingxvnir, guaw sux liw tiamw tiamw.”

“Si’angw kacc gauu vingxvnir iauxx m jaix lehh. Liw qxur-qxur-sniax-sniax qongxx longxx decc rui :guaw, jingrr qaur dnaxx, m bad ter guaw hiongr ix jingcuw diyc sniaw.”

“Liw byy quair ix, dendyww quair guaw .jit .cud! Liw jitt jam aw si m si qapp ix u sniaw quaqad?”

“Jiycmng lehh. Liw si gunw hniax, gunw ve, iacc gunw tauu :ee? Kecdic .liw! Guaw byy huan liw mng, sriu liw qaiwquanw.”

Lrai qiamwqiamr ee qadyx qycjaiww jnriu ciuw, snax~sir dniux siongwpnir kiyh kiyh hro jee jyr jit xe hringg. Hyw ciuxser, qrax diyc jiokk qinw, qycc benw sniaw iong diyc lat. Bagjiux kiw lyy, qaqi knuar be diyc; jit xee simqnuax ciak ciak diyy, Bunqed dyrr c.-cingcyw-c.

U dernue decc dann. Sinkux jiax bongx hiax zimm longxx byy, giaa tauu siwqer cue, jit qix ciuxqix-aw dirr juqui-dingw, naxx decc qiywsniax qycc naxx junr. Snax kavo nng vo huac vniar .quer .kir, denruerhuanx si siagsai byy snehun, Bunqed jit biyxjingx dy’ m qnaw qycc encenn.

“Uee, uee, uee.”

“Jngx .Sensnix, qamxx hyxser cniaw liw laii .jit .jua. Guanw ee denrnauw byy sniaw duxhyw.”

M si qitai ee imsniax, beh kir hitt xui u hitt xee hing’ngiaw. Ciuxtauu ee sxid byy qnuaw, ngua jit niaw cingkir ee siaju, syxsii, ciuxqix-aw qapp wuallet, snax hxang jrngg dyrr tangx cutmngg.

Odobai huatdong, puc lehh cud .kir. Qaur qaxx duarlorkauw decc danw sinwhyrdingx, Bunqed hionghiongg jiacc diwqag .diyc, jitt diauu lo kir si taur Sinjngx :ee. Dywhuankox, cnidingx decc sih byy qra junwbun, qnir diyc ngdingx qyckacc diyhh cuix jinrmngg. Hongxhud srid qakcad qniaa uan’ongw lo, pax jit linr siongrr byy drong lecc qui’ jap hunjingx .kir.

“Hiyckunwzit, lydong .liw, jin' pnaixser.” Qunhui duiww cimxx qauwui ee Bunqed qongw.

“Linw dna’ hiyh dua lexvair m?” Bunqed mng.

“Gunw dagg lexvair hiyh,” Qunhui rinr. “Acc dyrr jitt lexvair rair qnuaw sxid hur guehdew, vaiwtog Kux Siyxjiaw qinaxzit jaxkiw laii qavanx, denrnauw suacc decc dunwdnix sairdingwhing, sen’ qiyr dy’ be qniaa. Vaiwlak-sii aw, saihu yh cue. Gunw nng xee mrjiacc sniu qongxx, qra liw bongxx kar knuar mai.”

‘0’ qapp ‘1’ jyrjniaa ee sewqair, Bunqed jin' sik, qalew jairr ix diyh; cnekax :ee q.-qiuquec-q., vo vo dy’ qniax kir dac diyc huexluii. Denrnauw kiamwanx, sensnix laii decc jatmec. Jingwtauu zin u jinx, idi ee iyhhngx kuix u duiwlo, beh jiauwguann benw jit zit vnuar zit, hyw ciuxdnua, vnuar diamxjingx dyrr tangx qra dogtangg cringx qaxx dngrr vnuar jiah. Denrnauw guanjuann qycjaiww kixqangx, kax qnia, ciuw qnia. Kangkuer jinwhingg itliusuiw, beh daur jinwjingg u qaur jit xee kamxjam, Kux Siyxjiaw rair hur iokhue diyhh singx qywsii.

Knuar jit xe aw sijingx, Qunhui qongw beh cniaw langkeh jiahdaur. Bunqed dimr tauu byy tesii, pni-bak-cuir iarr duer lecc rinr hyw.

“Kecqacair jiac e hac .be?” Qunhui mng Bunqed. “Qecviah hang-aw jit qingx sinx kuix ee cantniax, tauqex si Samgi ee Keclangg, dagg cud dy’ jniawqangw kecqacair.”

Bunqed qongw ix be qingxjiac, jin’ hyw cuiwdauw, dagg kuanw liaurliw dy’ u cuwbi beh cir bai.

Bue qaur diongdauwsimx, cantniax iauxx byy jin’ qa’iac. Ixaxui suijai langg jre, menu sui' langg jit vunw, tingww dauc dauc aw knuar, liauu liauu aw qingw.

“U knuar diyc qac’ir :ee .byy?” Qunhui mng.

“Beh anwjnuaw? Qaxnaxx dagg hxang dy’ qac’ir.” Bunqed ciyr ciyr aw rinr. “Inx jex miaa longxx hy qaxx jiokk hyw jiac kuanw, qanda’ knuar dy’ qiongbeh lrauu cuiwnua.”

Jitt dxngr ee caiwsig, Bunqed byy anwsngr beh cud iwqenr, quisu qaudiong Qunhui anvaii diyrr si.

Kongwbah sunxqnuax si jiauvaicair, viah-dingw siaw qaxx dua dua zri. Qniusix duardngg caw qiamcair, jitt cud u qiamsiamx, jin' hyw puer vng. Koxquex vuan qiam’acnng jin’ hihanw, Qunhui cur nirr qaqi decc liaurliw, koxquex u si juw tngx iacc si caw imwsni-aw. Itbuew qycc qiyr jit cud jniawvanw ee kecqax-siyxcaw, jit vnuaa cair lairdew u daurqnuax, kincair qapp ziuhii.

“Beh air tngx bor? Guanw ee pakcair-tngx, jiac .quer .ee longxx qongw janw!” Tauqeniuu qaqi laii decc anwnai. 

Qunhui qorr kec’ue qra juwbunn cair. Tauqeniuu bagjiux jiauu ser luiw aw, jid’err ciyr, duxduxx cunx jit baii.

“Liw erhiauw qongw Kecgiw?” Bunqed bagjiuw tenw dua luiw.

“Jit~vnuar qxur aw narnia.”

Duardngg qapp kongwbah singx cud, nng nguaw vng jiamx jiamx iarr sunrsuar sangr laii qauwui.

“Cniaw iong di.” Qunhui viw jit xee ciuxser. 

Bunqed byy qapp ix keckir. Jit vnuaa kongwbah caw sunxqnuax, javox :ee qra bah qingw .kir, jabow :ee air jiac sunw-aw. Duardngg juw nua nua, benw sniaw vro, sianglangg jiac diyc longxx jiokk qaccuir. Aurciuw nng cud, koxquex dairsingx, jabcyr-caw duewbuew. Bunqed vng qycc drew jit nguaw. Qunhui guandew hitt nguaw iaxx u, mrbenw qycc drew.

“Qinaxzit laii yh diyc jit cud koxquex vuan qiam’acnng. Jitt dxngr dna’ qiyr jitt cud dyrr u qaur vunw.” Qongw suah, Qunhui ee di qycjaiww crunx hiongr koxquex hitt vnuaa.

“Liw u decc juxjiac?” Bunqed giga.

“Guaw si jyr langg’ mamax :ee. Byy juw, ginxaw beh anwjnuaw cri e dua?” Qunhui inwue l.-liuciux-c.

“Qamxx m si qongxx liw ginxaw u cniar langg' cua?”

“Liw siausid qycc jiacc tangqngx. Gunw daux jitt hy pnirsaiw dua ee dairjir liw iarr jaix.” Qunhui guanjai hyw ciywsinn. 

Bunqed kiw qniasimx, cuir drang cuir jit qxur kiamr sukyw, langg’ suisii liac diyc uerqud.

“Guaw qapp Jiamx Honghuix inx qongsix ee siyxjiaw bad qau'ongw, jinw cew ar.” Bunqed sueh kiw, cnex-dnia-vec-dnia.

“Or.” Qunhui qanxdanx rinr.

“En’iuu-qindir, guaw tangx qongw hro liw jaix.”

“Hyw a.”

“Liw qaiwsingg byy cuwbi beh tniax?”

“Tniax si u sniu beh tniax. Si qongxx, liw uanaxx surjuw. Tniax liw taubuew qongw jit kunr, diyhh sinr liw quiw hunx, suacc diyhh qig taukag cuixliau, qaxnaxx marr vutjiw aw huiwkir.”

Qunhui uerqur u qabi. Bunqed tniax cud cud, bun byy ir, bagtauu kiycqingw.

Pakcaiwtngx juw qaxx jit nguaxqongx dua dua xee. Pakcair qapp ciahbah qrox .kiw .laii, caiwtngx suijai. Siauwdnuax laii, Qunhui qinw kax qinw ciuw jrih .quer, Bunqed marr byy qapp ix siy’ jnex.

“Linw qongsix jit quaw nngxtew u kacc qursniur. Au lexvair, guaw cue jit qangx aw kacc ingg kir qra linw nguarsinx.” Qniaa cud laii cantniax guarkauw, Bunqed iurqycc kanx jit xee uertauu.

“Jiacc jiap decc huann :liw, nacc hyw?”

“Siyxkuaw dairjir nia, benw keckir. Guaw decc congr, qinw qinw :a.”

Byy qycc tesii, Qunhui gensia.

“Jiamx Honghuix inx qongsix decc ing :ee hitt tyr huerqer-nngxtew, guaw u qycc dingg siaw .quer. Au jua kir, iarr tangx sunrsuar quanr hro :linw.”

Bunqed qongw suah, Qunhui bagtauu qad .laii.

“Liw benw huanlyw. Jitt jann be kankac diyc huatlut ee dairjir.”

Bunqed quaww vyxjingr. Qunhui iuguann bin iux iux, pni-bak-cuir qed qui’ qiuu.

19.

Mii cimx, xia jing, jit zit jit duiwsii beh qycc dingg pah kiw. Cur nirr ee denrnauw kunr qui’ zit, Bunqed jitt diap jiacc qra qiyr jingsinn. Snuawlo jriab tongx, juann sewqair ee bangriac longxx decc dniudanw iuxsimlangg laii qet’enn. U ngiaw, u sniax, qycc erdangr siaw. Cimx srux qapp tow sniu samvutdingw, jingxtauu-aw tiauwtah, inwsniax junw sniuxginn, bonas.

Bunqed: Halo. Guaw Jngx Bunqed.

Qunhui: Liw iarr dirr snuar-dingw!

Bunqed: Hner a. Jiacc amr :ar iauxx bue kunr, liw amwqongjiauw oox.

Qunhui: Marr byy. Quixnarr dniux EMAIL rair huee, amwsii aw kacc jing, simx cringx, kacc siaw u lo laii.

Bunqed: Jex urngiaw. Jarhngx hro liw cniaw jiac daur, jiacc decc sniu qongxx diyhh kar jit tongx denrue qra liw suecsia, ing’amr suacc dirr jiax siy’ duw. Guaw qnaxx si dirr hongsuixtauu.

Qunhui: Guaw denrnauw jin’ hamban. Snuar-dingw kaiqangw si qaqi gni dryy :ee. Cur nirr u ginxaw, u sinx ee cuttauu iarr diyhh bongxx yc. Duer be diyc siqniaa e hro inx ciyr vutdongw.

Bunqed: Liw laurbuw jyr qaxx jin’ qauwqag.

Qunhui: Liw decc qra guaw gesew m?

Bunqed: Guaw iarr suacc qnaw? Lexvair tniax qongxx si hyw hongzit, be qycc ho laii dapdih. Guaw u ciax, tangx jair linw buxaxqniaw cud laii cittyy.

Qunhui: Jnia’ byy duxhyw, lexvair u dairjir rair kir Samjix jit jua.

Bunqed: Iokhue?

Qunhui: Vnuar sngr si.

(taubuew beh nng hunjingx, nng vingg longxx byy zirqur suawjiab)

Qunhui: Liw qamxx iauxx dilehh?

Bunqed: Liw u pacsngr qycc qer dyrr driyc m?

Qunhui: M qnaw siauwsniu. Guanw angx qapp huatlut longxx be hixjunw.

Bunqed: Linw angx! Liw qamxx m si tewtauhunx :ee?

Qunhui: Iauxx m si. Guanw qanda’ vunkuix druar. Ginxaw duer guaw.

Bunqed: Ginxaw liw cua, soxhuir ix dnax?

Qunhui: Iarr suacc u! Jiac kacc baiw lehh.

Bunqed: Guarkauw decc iauu qongxx, liw kuix qongsix benw jingxvunw, jyr tauqex kyr lirhunx.

Qunhui: Daiuann-jnii, rimx kabak, liw m bad tniax .quer? Jinw ginhangg trad dyw qrex, cinwcaiw jiyh marr u.

Bunqed: Linw jiokk jiap decc lenlok?

Qunhui: Qapp ginhangg?

Bunqed: Qapp linw angx.

Qunhui: Jin’ hranw .did. U siy’ cue, ingxingw uirdiyhh ginxaw ee dairjir beh camsiongg kacc je.

Bunqed: Lexvair liw beh hur ee iokhue, qamxx dyrr si qapp ix?

Qunhui: Si a. Guandew qapp guaw iog vaiwsnax-amr, snax-cenn-sir-cenn, jarhngx jit tongx denruer laii, qongw beh qaiw lexvair.

Bunqed: Linw nng langg huah beh lii, liw iauxx jiacc jiu :ix, jiacc tniax ix ee cuir. Linw angx marr sidjai si u hyw m jaix siyh vyw.

Qunhui: Guaw marr jiokk tniax liw ee cuir. Gunw qongsix denrnauw beh jitt hxang, byy air hitt hxang, jitmaw longxx liw decc juxir.

(snax hunjingx quer, kangx jua vec zri)

Qunhui: Amr ar, guaw beh laii kir kunr. Qinaxzit dyrr... (iauxx byy sangr .cud .kir)

Bunqed: Narr au lexvair lehh? Liw qamxx u ingg?

Qunhui: Beh congr sniaw?

Bunqed: Laii kir cittyy a.

Qunhui: M jaix ne. Au lexvair u guarqog langkeh beh laii.

Bunqed: Beh byy, quer au lexvair marr ersaiw. Jiyhmngg qongqingw hyw, lortauu qycc be sniu’ hng. Liw sniu sniaw kuanw?

Qunhui: Jiacqycc venrknuar. Guanw jaboxqniaw dingw lexvair kir qamw .diyc, sraur longxx be hyw.

Bunqed: Guaw jap diamw quer jiacc kir jriab :linw. Linw tangx kunr hro vaw binn. Kir qaur hiax duxhyw hur jiac daur.

Qunhui: Guaw qongw guanw jaboxqniaw sraur qaxx jiokk lirhai.

Bunqed: Guaw jit xee dongsu u dri qasaur ee iyhhngx, jiokk u hau. Guaw binaxjair kir siongrvanx sui’ qra mng.

Qunhui: Anxnix jinjniar dysia. Singx qra liw qongw loxlat. Buanxanx. (dairsingx lyhsnuar)

Juxlangg kir ansui, denrnauw duer lecc hiyckunr. Vnivnii kaiqangw, Lerhunn qapp Honghuix nng vingg denruersnuar iauxx zet sywsyr. Javox :ee tngwvakteh vnuar tedyw dirr bincngg-dingw, jabow :ee dirr sejngdaii ee iw-aw-dingw unlunkunn, katauux cangr dirr kunwsnax ee pongwqunn lairdew.

“Linw a’qxu hitt xee kewjaboxqniaw qongxue gnexgnew, jit xee sim’axkuir dair jiokk dang, knuar diyc jiokk gairbak.”

“Ix lakdeaw vuwdauw, u sim'axkuir snesingg :ee.”

“Liaurqiyr linw a’qxu zuarr qongganw lehh. Langg’ si rid diyc ix ee qehuew vaxdni jiacc knii uaw .kir, jex ix iarr knuar m bad.”

“Ix zuarr gauu qra guanw a’qxu ow jnii, jairr ix ee vunxdingw. Mair tuatui diyc lanw jitt qingx sinx sed ee qongsix dyrr hyw.”

“Zit .sii dirr qongsix inx dilehh, pnaixser qongw. Tanwjnii rair qapp inx qongqex, dagg qangx jongg cud jongg zip cud lat :ee dna’ liw jit xee. Guaw sidjai jiokk knuar be juer .did.”

“Byy qangai lar. Lanw dyrr kacc giabmia, byy sxid jyr dyww qankow.”

“Hyw simx :ee dirdecc gy, pnaiw simx :ee dir qnuaby. Sewqandai tacc e jiacc byy qongdy?”

“Qaix lanw ee, mair qra lanw cimkiamr, snax dxngr dro e vaw, cunx :ee dyrr hamr hamr ar.”

“Qongw jiacc decc qongw. Denrnauw-qongsix :ee jaxkiw iurqycc kar denrue laii decc tyw jnii, qongw lanw dingw guehzit ee kiamwsiaur iauxx bue cringx.”

“Knuar zuarr je, jipiyr binaxjair kuix kuix hro :inx, kacc benw vutsii laii beh lytix.”

“Ix jitmaw qapp Kow Qunhui kowduar qad siy’ liamm, lanw juliau m jaix hro ix vud zuarr je kir. Jitt diauu byy tyxvnee, jnii qycc diyhh hro ix tanr, sidjai jiokk m qamguan.”

“Byy, beh anwjnauw? Lanw jiacqycc laii cue vadd qingx, aurzit aw mair qycc siy’ qaucab.”

“Dniardiyc rair cue vadd qingx, beh byy, qamxx qycc... Ueer, guaw berdangr qycc qongw. Qaxnaxx si guanw a’buw dngw .laii .ar.”

“OK. Danw guanw a'qxu dngw .kir, liw laii jiax quer mee, lanw tangx qui' amr qongw jit xee kacc u lehh."

"Hngr, hyw. GOOD NIGHT!"

"Oiasuminasai.”

20.

Denrdongrmngg kuix .kuix, knuar diyc si snehunrbin, Lerhunn vreh kiw srinx qniaa uaw .kir, buerjingg mng kiw, laii jiarr qaqi ee miasner vyr dairsingx. Lerhunn jamxzenn aw gonggniac, cneqniax ee simjingg siaw dirr bin.

“Dangxsurdniuw iog guaw beh qongw dairjir, qiyr guaw sir diamw laii linw qongsix. Henrsii snax diamw go-jap-go.” Langkeh dauc dauc aw sueh kiw

Binrjingg kia :ee tangx sngr inx singlixdniuu ee duiwdik, ew langg beh jit liap tauu, Lerhunn qapp langkeh diauduir m hro zip .laii, jingcax jit vo byy iong siangx ciuw jac lehh. Vanrqongsig ee denrue dann, Lerhunn beh kir jriab, dirr henquanx kia :ee iurqycc hro ix quawhuaii, qnuaxqinw .qaur .der, kajingxtaubuw tad diyc dyckax m qnaw huah tniar.

“Kow Qunhui qauwui :ar?”

“Hngr.” Lerhunn qanxdanx rinr, jiokk qe sniax.

“Guanw a’qxu e kacc nguar qaur. Liw qiyr ix iw nirr jre, danw .jit .xe.”

“Acc liw lehh? Liw qamxx e zip .laii?”

“Guaw vadd xui aw u dairjir rair cuxliw. Kacdingg aw inx decc qongw sniaw, liw rair siongser tniax. Hitt xee jabow singlixhow, gauu kuix ham kuix langx, vutjiw aw qankiauw. M hyw hro viah .kir.”

Dingxsix qorr denrue huanrhur suah, Lerhunn tniaqniaa. ‘duiwdik’ cimx mngg dac zip hxo, Lerhunn byy pnaiw cuir lagdauw, iarr byy hyw binrcniux ho'ngg knuar.

“Jiax jre lar. Tauqex liammix qauwui.” Lerhunn naxx qongw, naxx qra dyh-dingw ee vywjuaw kiyh kiyh qui’ xui.

“U tniax qongxx liw uanaxx qoxdongx. Liw marr tauqex-gxiac oox.” Qunhui ciyr ciyr aw qongw.

“Byy, byy, byy. Gunw jex dauwgiac :ee narnia,” Lerhunn et ciuw. “Langg' inx hex u cur u ciax :ee jiacc si jniawvan :ee.”

Kuicuiwtniax longwkongr kuah, go~lak-jap pnee ee qongsix dna’ venrsow ham’ dangxsurdniuw-sxig u qecqingx. Vanrqong’ixdyh sinx catcad, uree qycc lenrr guarbin ee sokqakamr dy’ iauxx vaux diauu lehh byy lir.

“Liw u beh limx dee bor?” Lerhunn mng langkeh.

“Mrbenw, mrbenw, m hyw lyhuann liw ee qangx.”

“Liw si langkeh, qycc si dua tauqex, qongw anxnix?” Lerhunn duiwcuir rinr. “Guanw jiax jit quanr debiw, inx hiamm pnaiw limx, dryr danwsag sniu’ sngxjer, brew :ee longxx jnii, mrjiacc sniu qongxx, narr langkeh laii, dyrr qinw praur praur hro liauw junw duxhyw.” 

Lerhunn qongw diyc cuir ciyr bak ciyr, Qunhui tniax liauw bin vnir vnir. Dyh-dingw ee vywjuaw qeqiamw vingw qeqiamw knuar. Sraiw amr jnxir si siauwzinn ee vorsor. Henrvo siangx kax dac dirr langg’ ee dertauu, diyc siongx tniar diucdiuh, qarqinx qexngiaw jyr byy qangai, Qunhui anwsngr qniaa jitt vo qxii.

“Linw qongsix jiacc dua qingx, saur jit xe tokax qnaxx diyh’air qui’ vnuar diamxjingx.” Qunhui la jit xee uertauu.

“Guanw u cniaw jit xee obasang id sxamx gnow bec'amr aw laii. Linw qongsix qamxx qaqi saur?” Lerhunn dyww mng Qunhui.

“Linw jiax naxx Kaihongx Huw, guanw hiax naxx jiauxaxduu. Guaw qapp guanw siyxjiaw lundngx vniawsaur, dagg qangx jaxkiw jap-go hunjingx quw ixlai dyrr hyxser liuliux :ar.”

“Kinkiam kacc u voxsow, jitmaw qycc u jit xee denrnauw-qangdingsux qra linw jyr byy liau :ee.”

“Zinjingjer yc cinghuann. Urdangsii aw jnii liauw, ngua jit xee ingg ingg cringx cringx, guaw dendyww kacc air.”

Senx vniar senx, cuiwdunpuee siy’ siah benw iong diyc kuiwlat.

Denrdongrmngg qycjaiww kuix .kuix, ho'ngg danw ee langg qauwui qycc qah jit xee dniduer :ee. Kewve qapp kewjaboxqniaw siangsiangx dac zip qongsix, jyr a’qxu :ee tauqniwbin dyrr beh cue ix ee guersingx.

“Ix duxjiah u denrue zip .laii, qongxx u singliw dngdecc jicjiab. Liw iog ix sir diamw, ix qnuaw be diyc.”Lerhunn vyr qinw qinw, qongw diyc duarjic duarjic. 

Jyr a’qxu :ee kauhkauc liam, viw jit xee ciuxser, cniaw langkeh zip kir ix ee vangrqongsig.

S.-siwqag-q. ee dangxsurdniuw-sxig u nng vingg si bingvylee, juxlangg qapp langkeh ee itqiw-itdong, diamr dirr guarkauw :ee tangx knuar did cringx qnir did bingg. Kacc sux jit qxur dy’ tniax be diyc, Lerhunn bagjiux qimx qimx langg siongdiong jiokk utjud. Surburdyh-dingw u jit tac puex qapp qongxqywdnuax, kewjaboxqniaw naxx decc knuar, bagbuew vutsii hiongr hitt lairdew :ee jimjiog.

“Liw ham' ix u sigsai?” Kewjaboxqniaw mng kiw, u ir naxx byy ir.

“Hnaa?” Lerhunn bagtauu liapqingw.

“Bad tniax Honghuix decc hue, qongxx Kow Qunhui qapp liw siy’ jnecniuw jit xee javolangg.”

“Ix qacc qac’ir, lanw dyrr niu :ix, nacc diyhh siy’ jnex? Lanw qongsix ee denrnauw jaxjingg quiciuw vangr hro hitt xee javox decc qor. Guaw qapp Honghuix jiokk huanlyw, qniax qnir ix qra lanw qongsix ee qibit siablau .cud .kir.” Lerhunn iux tauu qad bin.

“Jex iarr suacc e dit? Guanw kewve-aw qamxx jaix?”

“Honghuix pow pow aw u qra dangxsurdniuw toktaur.”

“Acc guanw kewve-aw anwjnuaw qongw?”

“Ix qongw byy-jingw.-byy-qnir, m hyw qa'ngg bulua.”

Kewjaboxqniaw sim sim qig diam diam.

Lerhunn hiongr dangxsurdniuw-sxig ngiaw .jit .xe. Lairdew :ee jit qxur laii jit qxur kir, u singg jamrqer, iarr cincniu decc uanqex. Knuar e diyc, tniax be diyc, Lerhunn simqnuatauu gniaux, dongr be diauu, hyw dnaw hiongr kewjaboxqniaw dnaxtamr.

“Nng xee tauqelangg iog dirr singlixdniuu, liw liaurqiyr inx e kir qongw haurhiax qongw vngrlee?” Kewjaboxqniaw qra sauciyr. “Jiac singliw-vng, dniardiyc qongw singliw-ue. Jex iarr suacc diyhh mng?”

Siongdamm kacc byy vnuar siyxsii, juxlangg qapp langkeh akciuw siy’ srii. Qunhui hiongr nng xui luxsu dimr jit xe tauu jauw, dangxsurdniuw duer ix ee kahy laii dirr vanrqongtniax.

“Qongxqyr kranx .be?” Dangxsurdniuw mng Lerhunn.

“Honghuix qongw bangrlo jiokk huatdenw. Bagqimx ee siauwlenqex hranw did knuar vywjuaw, lanw diyhh ngua...”

“Bangrlo dyrr bangrlo,” dangxsurdniuw pacjic ix ee uervner. “Kranx :ar .be?”

“Decbeh :ar.”

“U dyrr u, byy dyrr byy, simxic decbeh :ar?” Dangxsurdniuw qikquix, amrqunxaxqinx jiauu puu. “Daiuann guaw quw byy dngw .laii, siarhue venr sniaw kuanw kacc byy liauxqaiw iarquxqnaw. Kranx jit xee qongxqyr, cniar jit xee giabbu diyhh hiacc yh, guaw sidjai jiokk m sinr.”

Suatqaur jit tingg, u-huer-langg beh dngw kecdiamr hiycsen. Kewjaboxqniaw duer jingg duer au, sangr ix qaur laukax suar et qewdingciax.

“Uee, guaw qra liw qongw oox, linw a’qxu ix....”

Langg jauw liauw, Lerhunn denrue qinw giaa kiw laii kar.

21.

Ho lyc qui’ guehzit, vaiwlak tnix kacc lrang, huandngw zit lexvair qongxx qycc e cud dua zit. Vreh snuax, iulamw iacc qonghngg dahcnix, tniqongx narr byy duar .diyc, qyckacc hyw cittyy, dysiauw u kuatham, simsig kiamr jit bi.

Jinwjingg tegi beh kir Jiyhmngg, haurdanw ginxaw sikiwqamw hyw liauw li, iarr diyhh tnisii qamguan jyr hyw, vanrpuex jitt vaiw unw dakdag, sniaw langg ee ciax beh cutdong decc ciauu be vnii, denrue nng vingg :ee ud ud dirr simdew, liyc liyc aw u kacc angrsniax, uersueh junxjad, anwjnuaw qongw kacc be pnaiw qamxjingg, zirviw longxx u decc iongrsimx qewqaur.

“Jitt jann guaw kixtauu :ee. Guaw sraiw ciax jair linw kir si qaizenn.” Bunqed qongw, simx-qenx-ir-quad.

“Liw ciax sraiw laii gunw daux kir Jiyhmng rair kaux hng lo. Iarr diyhh guaw sraiw ciax, guanw buxaxqniaw kir jriab :liw kacc tongx.”

Qunhui uanaxx jiac gnerpiah. Lorbuexciuw, Jiyhmngg cniaw jit vnix, ngua beh kir Damrjuiw; sir-lenw :ee longxx benw, siangsiangx ioksog dirr iahtauu huerjee jiacc jywdin kir jre denrciax.

Ho laii pniaxser cutmngg, docirlangg vaiwlak-sii aw longxx qnuaix dirr qong’uxcur. Tnix jnee, hongx jne, jiauw-aw vangr cud lamx si qui’ qrunn qui’ quah. Vychnua-vnix ee lordnar-aw, diamxsimx qapp ving’axjuiw je dnar decc bre, iarr je langg qauquanx. Jnii jau be hur, ciuxqud bongx byy tingg, tauqex cuir-aw ciyr gix gix. Qycc iarr u hyw cittyy ee dnaxaxui. Go-jap koxginn jap liap qiuu, qred kir duiwox tangx diyc ang’axmic. Sioktingg ginxaxlangg siongr be junw, ciuxbuexlat marr byy qraur, kacc anwjnuaw krenx dy’ jauxjinn, gnoxsig ee qiuu sui’ liap aw qiamw .kir iaxx diyc byy vnuar hxang mic.

“Jit liap vunx guaw sngw, hyw bor?” Bunqed a’jig jitt sii laii beh jan au ciuw. Sioktingg qra cunx :ee longxx dux hro :ix. Bunqed siongr crenx crenx, jit xe dyrr diyc diyc jit jiah Teddi Himm, hongw :ee, Sioktingg qangrkuanw hnuahiw qaxx, dah dirr hingkamw cincniu decc riyx angngex-aw.

Kacc kir, diamwtauu hitt vingg u jit dnar decc hroo qimhii :ee. Hroo diyc go jiah sangr jit jiah. Sioktingg ciuxtauu dna’ snax buew, buerjingrbue, jit qix qimhii-hroo qnix:a puar jit kangx. Bunqed a’jig vyr ix jit jiah kacc ser buew kacc sixsyy :ee. Ziog jit xe aw quw nia, u hroo .diyc, mrqycc qui’ qix iarr puar qoqoo .kir.

M quewir, Sioktingg qra mamax tyw beh qycc sngw jit vaiw. Qunhui hnair tauu qongw bersaiw. “Sngw jit xe cuwbi dyrr hyw. Mamax qamxx byy qra liw qar .quer, qongxx jnii m tangx lamrsamw kaix, diyh’air kiycsip yc kiamrliamw.”

Qunhui qawsi jaboxqniaw. Sioktingg dimr tauu, cuir bih bih. Knuar m si srer, Bunqed qinw qongw beh cniaw inx jiac a’qee. Sioktingg bin huanw ciyr, qongxx ix jaix dyc'ui u der brew, snax kax diyy nng kax tiaur qniaa jywjingg.

“Liw duiww ginxaw jiokk giamgaii.” Bunqed ser aw sniax qongw.

“Cur nirr u marr berdangr vangr quwjai ix, byhqongxqiyh ix byy laurve cniadii.” Qunhui dab, iarr ser aw sniax.

Damrjuiw bunbingg ee jiahmic a’qee, danghunw vaux dirr daurqnuajnir lairdew, lramm quaw dnihuanqniu’axjniur, sui’ langg qiyr jit xee puer jit nguaw hi’uann-tngx, duarlangg ginxaw jiauu qaccuir.

“Memex itdow :ee oox. Viw vavax mamax jiac kacc qinw.” Qapp inx jre qangg dyh ee a’sangw qra Sioktingg viw duarbuxongx. Ginxaw bagtauu qad qad, duarlangg taukag ngar ngar, javolangg decc bicciyr, jabow :ee jiokk pnaiw iwsinn.

Dorjuntauu langqunn vaii qui’ let, haurdanw junn laii beh dacdo, hyy hitt vingg si Vatliw. Bunqed beh kir pacpiyr. Qunhui qinw et ciuw qra dongr. “Guanw Sioktingg jiokk gauu hinn ciax hinn junn. Duxx jiac vaw vaw, qniax qnir ix dac jnriu vunrbin dyrr eh sngjuiw.”

Miasniax jiokk tauw ee Damrjuiw borsig, go diamw aw quer diam diam aw cut’enw. Dirr kax sngx qniaa be kir jinwjingg diyhh qaur denrciajam, Sioktingg jniar ciuw hro mamax kanx, dyr ciuw kanx Bunqed a’jig, saijiywzit dirr inx kajiah-au.

Damrjuiw-snuar ee denrciax, Damrjuiw si buexjam, dongqizenn iarr dirr jiax huad ciax. Denrciabuw tuax lak xee ciasniux kangx ciax sraiw .laii, siqanx qaur beh kixqniaa, ixaxui u langg jre :ee iokliok cid~veh snxiaa. Cimxx sraiw dinxdang, iauxx bue qaur Dik’uii aw, dirr ciax-dingw iuguann knuar e diyc honghunx ee zidtauu, jingcax jitt sii dna’ vnuar vingg, cunx :ee vingww dimm lyc kir haiw nirr. Ginxaxlangg air-kunr-sinn qaur, mamax ee duartuiw junw jimxtauu jyww ix siangr duardix, qongqingw qyckacc lewdauw iarr byy jaidiau snriaa ix kuix bak.

“Tiamw :ar.” Qunhui ciuw qiw jaboxqniaw.

“Jiacc vnuar qangx nia ne!” Bunqed qongw. “Liw m jiokk hranw did cua ix cud laii qniadac ee kuanw?”

Trow jit xee kuir, Qunhui sueh qongxx ix kangkuer je, hiyckunwzit qnuaw sxid vutjiw aw suwsiongg. U tangx ingg, ingxingw e sniursen, vinrdnua cutmngg.

“Jit xee ginxaxpiw viw jit jiyc biw kacc diyhlat.” Qunhui qew kenciyr, jingxtauu-aw qycc qiw duiww Sioktingg.

“Jex guaw beh sinr,” Bunqed janwcuir. “Si qongxx, narr u langg draur cua dyrr qex kacc nngxlo, liw dnawtauu dyrr be hiacc dang.”

Zidtauu qui’ liap dimm lyc haiw :ar laii qongw, tnix byy longxx amr, qeqiamw iauxx u qingxdir tangx hyw knuar. Tingwhau denrciax quer Ngisnuax aw Jam jngr zip kir tokax, txangx-gua ox lysyx, simxmic dy’ knuar byy.

“Jiamx Honghuix inx a’qxu sunwjyhzit kar denrue hro :guaw.” Bunqed vorvinn hiongr Qunhui qongw kiw.

“Oox!” Qunhui tauu kix kix.

“Ix kar laii beh diyr guaw ee ue, decc tamr qongxx Jiamx Honghuix inx ingxsii denrnauw ee hang:a-dangr:a, guaw ciuxtauu qamxx u iuxbih :ee.”

“Acc liw anwjnuaw qra rinr?”

“Guaw qongw byy-sig.-byy-sai, junw u marr be qaux :ix.”

Qunhui jing jing tniax, jujux sniu, byy inwue.

“Linw horsiongx qamxx u siongsig?” Bunqed mng. “Hiangwsii ix u tee kiw diyc liw ee miaa.”

“Ix jit xee qniaxsair si guanw hniasyw ee siyxdi, kiarr guanw hniaqyx ee boxtaucinx. Qnir diyc bin, guaw rair qiyr ix jit sniax cinqex.” Id laii zi kir, Qunhui sueh herhang. Bunqed dimr tauu, diyc ix decc sim sim.

Qoxdingg Jam beh qaur. Hongwsangwtauu vyr qongxx beh air kir Dionghyy Lamsiwqag hitt hiongr ee luxkeh diyhh dirr jitt jam vnuaa ciax. Qunhui qra jaboxqniaw qiyr jingsinn. Sioktingg qig jit xee air kaur bin, hauxhnix-hauxhut qongxx ix jiokk air kunr, qniaa be kir.

“Hro kunr lar. Guaw laii qra py.” Bunqed qongw, siangx ciuw sui’ crunx .cud .kir.

“Ix sokax vindnua qniaa, qew jniurjnii, beh air langg' py lar,” Qunhui hnair tauu. “Qycjaiww qongw, liw rair qycc jre nng jam jiacc qauwui, qamxx m si?”

Bunqed qongw Daivag qautongx jin' lirven, jitt jun marr iauxx jaw jaw. “Qunduw, guaw qinaxzit bre hro linw buxaxqniaw :ar.”

Hranw did decc py ginxaw, Bunqed jit xee ciuxser kacc anwjnuaw he dy’ be jniurjniar. Sioktingg bagjiux qig kreh kreh, siangx ciuw qra Bunqed a’jig ee amrqunw kip diauu lehh. Viw did duarlangg decc laglak hnih, ho’ngg py :ee qex jiokk quanwciuw. Ket’aw vreh kiw vreh lyc, ciuw py ginxaw, Bunqed kavo jai viakviag, jit sniax hniwhnaix dy’ byy.

“Cur nirr zuu cangxcangw. Danw vniar kacc cingkir, jitt qinrzit aw jiacc cniaw liw laii hongrdee.”

Dirr lautuix-kauw, Qunhui qra Bunqed suecsia qiamx siy’ srii. Ginxaw jrih quer ciuw, nng langg qihux siy’ kap be benw .did.

“Jiamx Honghuix inx a’qxu beh air ee mic, kaksit guaw u jyr kopi.” Bunqed kiw jit xee kenwtauu, byy qongw cud ee ue, iongx bagjiux dairter.

“Si or? Anxnix diyhh siux hro hyw, m tangx pah m qnir.”

Qunhui qra Sioktingg qiyr jingsinn air ix qaqi qniaa. Sioktingg bagjiux hxex hxex. Qajair, aurciuw ee lo, ix amr amr bongx marr m qniax e vuahdyw.

22.

Mngg jiacc qnuaix uaw .kir be hur cnuar, be qor did sryw, Qunhui vniar kir jauxbexlongg sniu’ cnixqongg drong diyc qixdyh, dingxtauu ee jit qix hueqanx lo lo henw, hiamw hiamw dyw. Am’axqunw crunx dngg, Qunhui diddit jinn. Jiongqibuew, laukax :ee jyww inx kir, longxx byy giaa tauu knuar laudingw.

“Qewsiaur jiacc qapp langg' ciauu hyw nia, jaboxqniaw sui’ beh ho’ngg cua kir jauw.”

A’jew qongw qikqut’ue, vyh qnaxx si cuir drang cuir. Qunhui tniax diyc jiokk qec hni, qui’ amr akjag qaxx kunr be kir. Mibuew aw jiacc lyc binn, qau binbang, marr si pnaiw kunr.

Qnuartangw srinn vnuar tangw juiw, jap gua knax hueknax, an’ jniawvingg qaur dywvingg, Qunhui qorr vuhiax kad jit kog juiw hro inx, sui’ xee aw laii byy tiauwkamw. Ag huex jitt jann, Sioktingg ee asangw bad qongw quer beh qra ix ter. Qunhui suecsia tesii, qongxx qyckacc byy ingg, jitt xee kangkuer iarr diyhh cinsinx laii, byy beh jiawciuw. Ginxaw decc danx, qui’ lexvair quer, sirduarlangg huanrser iauxx byy diwqag. Huecauw dyrr byy qangg. Uree kacc lamxsinx :ee, jit qangx aw byy limx juiw, sui’ dyrr kiarngg iacc qngxlenx hro liw knuar.

Lexvaiwzit asangw byy laii. Vindnua juw, marr hamban juw, Qunhui kacc je si cua Sioktingg kir jiac guarkauw, kir Maiwdangxlauu jiac hanwvauu. Qinaxzit qacc qo’ qo’ ix jit xee, sa jit nguaw mi, cunx vng craw craw lehh, cinwcaiw jiac jit xee be iaux, jitt dxngr beh cuann si jin' kinngi. Cur-lai kangkuer bongx ingg, tauwdiongdaur dirr jauwkax huadlyc jit xee langg ee qnedngr iarr diyhh bruw qaxx dua liap qnua ser liap dih.

“Liw si decc congr sniaw? Tacc e qui’ qingx oenx pinrpong?” Tniax diyc denrlingg-sniax, Qunhui jensii cniaw he lehh kir kuix mngg. A’jew jid’err zip .laii, lig pni lig bagbaii, cuir dadax qiyr.

“Guaw decc caw vng,” Qunhui rinr. “Acc dyrr cimxtauu be qir did tiux iuenx lar.”

“Qimr qimr .kiw .laii, mair qycc vnir :ar, laii jiac susi.” A’jew cud hyrling. 

Qunhui uat dngw kir jauwkax siubuew. Jit vnuaa caw-vng caw qaxx cauwhuexlyx pangg .cud .laii, qapp dyh-dingw ee susi vaii jywhuew, kacc anwjnuaw knuar, iarr vehbixvng :ee kacc hyw jiac kuanw.

“Jex susi oisi ne! Liw dyc’ui brew :ee?” Iauxx vnuar cuir bue jiauu tunx lyc auu, Qunhuix qra a’jew mng qinw qinw.

“Suacc si brew :ee. Jex guaw qaqi jyr :ee.”

Qunhui jamxzenn aw daiwgii. A’jew bagde ho’ngg knuawkinx jin’ m guan, itgnow-zirqngwcid sueh kiw, sunrsuar vangr vo, qar siyxmue-aw anwjnuaw jyr susi.

“A’buw ee qanghux, dagg hxang liw dy’ yc qaxx jiauu diyc. Byy cincniu guaw, qesu byy vnuar ped.” Qunhui hnair tauu toxkuir.

“Dy’ hro liw singliw gauu jyr :ar, jongw byy liw siauwsniu beh u siangg dingg jraii? Marr diyhh lauu jit xui aw hro gunw jitt hy juxvngrvyy denw ciuxlo lehh.”

A’jew uersueh qaliau, Qunhui susi cuir nirr vro qex jit bi, sngdnix ~. Jiac vng puer ue, Qunhui mng a’jew, cur nirr ee jexhux qapp sun’aw ee diongdauwdngr anwjnuaw cuxdir.

“Guaw qra inx cuann ven ven jiacc cutmngg :ee,” a’jew rinr. “Javolangg qeww cauwjenrqud, jit dxngr aw byy qra hongrdair, cinwcaiw cauwcyx :ee dyrr snriaa .kir .ar.”

Jiac vng vaw, Qunhui kir juw qavix,  a’jew qra radio jun .kuix. Byy ginxaw cauxlau, cing’ingg iarr cingsimx. Jixmue-aw ee iokhue si kiyh :ee, byy dniardnia u :ee.

“Liw cur-lai qinaxzit qycc kiyh qaxx jiacc qngqueh.” A’jew qongw, ciuw nirr jit vxuex qavix.

“Dy’ longxx cavutdyx a. Tacc e u?” Qunhui duiwcuir rinr.

“Tacc e byy?” a’jew vyccuir. “Guaw qenww vaiw laii, m si vywjuaw, byy dyrr jabjir, ciangjai dinr qaxx qui’ kectniax.”

Qunhui byy inwue, qavix jrip .jit .cuir. A’jew qycc la jit xee uertauu, mng ginxaw quiw diamw ho’ngg cua .kir .ee.

“Guanjaw iog qauw diamw. Ix tejaw vnuar diamxjingx qaur.” Qunhui rinr, tauu lee lee.

“Liw hro ix dirr laukax danw m?”

Qunhui hnair tauu.

“Liw u hro ix kiw laii laudingw?”

Qunhui dimr tauu.

“Guaw cxenx dinglingg bxan qaudair, qongxx juadduir m tangx hro ix kiw .laii. Liw tacc e qongw be tniax, qar be e?” Qingtauu banw banw, a’jew huad singwde.

“Sioktingg kunr quewbinn. Hitt jun aw ix laii ee sii, guanw dy’ iauxx decc jiac jaxkiw. Qamxx qongxx, beh qiyr ix dirr laukax huadkia?” Uirr qaqi hunhue, Qunhui kiw ue duw.

“Acc liw jin’ m qramx hro ix huadkia dyrr driyc.”

“A’jew, liw qongw duiww dyc’ui kir?” Qunhui snia'imx jyr jit xe puu .kiw .laii. “Ix jit senx langg cai dirr hiax, cuwvnix-qecviah jiacc laii decc iauu hitt hy dngdew kax :ee, anxnix qamxx dyrr kacc hyw?”

Cuir bih bih, cuiwpuew pongr saisaix, duarjiw siyxmue jiauu pnaiw binrcniux.

Kyxviw qibsi’uw, cur nirr ee denrue giangx giangx qiyr. Dniardiyc juxlangg kir jriab. Langkeh qra radio qimr driau, hni-aw iah lrai lrai.

“Laurve cua .cud .kir. Hner a. Au lexvair? M jaix lehh, rair singx mng ginxaw knuar mai. Hngr. Dysia lar. Jiacqycc lenlok.”

Hunho quer, zidtauu bue lyhsnuax guanjai siyzuac. Denrue jiacc kngr qui’ui, a'jew sui' mng si'angw kar .laii.

“Liw byy sigsai.” Qunhui qanxdanx rinr.

“Hex jiacc si byy dikkag. Liw m jaix guaw jiac vaw ingg ingg, juandoo decc kiyh lorvnix-siausid.” A’jew be suacsimx beh mng tauwdew. 

Byy ix ee hxuad, Qunhui qongw jit xee dairlixkair hro a’jew quewgenr.

“A’syw inx cinqex jingg:a decc mng liw ee denruerhuanx, qongw liw qapp inx ingxjun ee denrnauw qangdingsux decc qniaa. Duxjiah denrue qamxx dyrr jitt xee kar :ee?”

“Iauxx byy decc qniaa lar. Dyrr sor sor aw ving’iuw narnia.” Hro a’jew iyh qaxx duir duir, Qunhui qenwsiaur dngw siurkir, bin-aw angg qiqix.

“Jitt xee sor ving’iuw beh qapp liw ioksog au lexvair m?”

Jin' jaix a’jew decc qra diyr ue, m jiac zxi qycc berdangr junw .quer. M guan bongxx m guan, luerdiongx ee indnuax-kixliw, Qunhui qra a’jew qaudair hunbingg, jit sud aw herhang dy’ m tangx pah qalauc, banrvutzi ho’ngg liahvaux pah uersngx dyww huiwkir. Dogdok zusuwbang tangkyw amr .kiw .laii byy jiauzin.

“Liw diyhh qrinx kacc diauu lehh. Qimhii snix kax si e jauw .kir.” A’jew qra siyxmue-aw diamxdnaw. 

Qunhui tniax diyc air diyc, rinr qongxx, “Guaw jitt xee siyxmue hro liw jiokk be hongwsimx .did ee kuanw. Buerjingrbue, liw huanlyw decc danw.”

“Sewzi byy sihvunw. Liw cuir yc kacc dnix lehh, singwpiah liyc aw kacc unsunn lehh dyrr tywdongr ar.”

“Kiarr sngr qongxx, guaw dy’ m tangx qapp javolangg inwcuir-inwjic, sursu-hangrhang longxx sunrtanr inx ee ir dyrr diyc.”

“Qapp guaw siy’ jner cuir, junw muixx vaiw longxx hro liw jner ngiaa, javolangg liw qamxx dyrr draux e diauu niih? Diyhh qorr nngw syh kanx dix jiacc si vo. Hro langg qihue, byy qyc’ngiu hro qaqi jit xee qihue.” U lriw u lo, a’jew qongw diyc cuiwqag juann pyx.

Vixvan jiahtaulorlangg, jaxkiw qauw diamw ginxaw qaux laurve, jiauww ioksog, go diamw diyhh dngw laurbuw sinkuvnix hiyh siu jiacc habgii. Qniax kir qapp muersair snaduxtauu e pnaiw bak siy’ knuar, jit vxuex qavix limx liauw, a’jew jaw jaw dyrr huah beh jauw.

“Sangr sinn kacc yh did cniaw sinn. Liw m tangx qig kowsinn, qycjaiww hro ix dac zip hording.” Puevaux-aw pnai dirr qingqah, a’jew dinglingg jaiwsnax. Danw byy siyxmue qra inxdamr, simqnuax qanda’ qib, jit qxur vnuar qxur iarr m qnaw qex qongw.

Dirr hang-aw-tauu kia beh qui’ vnuar diamxjingx cri bangw, veaxqniaw tangx qongw siangg sii knuar diyc Qunhui. Ginxaxlangg hnuahiw ee simjniaa puu jnriu bin, pni-bak-cuir tangx jyr jingwqnir. Viw did qimjaw tangx dingbunn ee ing’ingw, jyr laurve :ee jiangwsii sixsngx ~.

“Linw qinaxzit kir dyhh?” Naxx decc vreh lautuix, Qunhui mng jaboxqniaw.

“Dongrbudhngg,” Sioktingg rinr. “Vavax ylyw guaw jiokk quaix, qongxx au jua beh cua lanw kir knuar haixdix.”

“Lanw?” Qunhui dirr cuir-lai liam. Jaboxqniaw qongxue hranw did dingdnaa.

“Mamax, sii qaur lanw qamxx si rair jre junn? Langg’ gunw dong’yc inx vavax mamax cua inx kir knuar haixdix longxx u jre junn ne!”

“Hngr...”

“Junn beh kir dyhh jre ar? Gunw dong’yc qongw rair pah jundnuax.”

“Hngr...”

“Lanw qamxx si rair kar denrur hro vavax? Huanrser ix m jai’ngiaw diyh’air singx tiacpiyr.”

Jaboxqniaw bunrdee siy’ jiapsuar. Jyr mamax :ee taukag zuu cangxcangw.

23.

Qesitauu-aw hag u jiaujngg, dirr qongsix, dirr cur nirr, dirr siddngg iacc dirr ciax-dingw, puesinr ongxhuee benw tokdiong vunx puex :ee, jaxkiw, amwmii iacc diongdaur, denrjuw iuvenrqiok zxic-sir siyxsii byy qnuaix mngg. Kuix puetangw benw syxsii, qaqi setding ee amwbew diyhh qir hro diauu dyrr urngiaw, jit zri aw m driyc dyrr kuix be kuix. ********. Knuar si knuar byy, zic liauw driyc bor, dogdok denrnauw jaikiyh.

Puetangw sunrsi kuix .kuix, qongxx u jap-cid dniux puex sinx qiar qauwui. Kacc limw jit dxangx jingg, jit qangx qui’ vah dniux ee puex rig .zip .laii jiokk suwsiongg. Henrsii, kacc byy qurdew ee snax hxun jit. Jit guehzit qex kaix .quiw .ngii, cringx dok qiamx kiyh vunwsyr, narr si spam, jurdong e suaw kir vunwsywlangw, kacc benw knuar diyc ciwcak. Narr byy, qanda’ cringx hiaxee vunwsywpuex, jingsinn kir jidvnuar, sxid be jyh, qauu benw lang. Jit~vnuar dniux aw luiqongx cue byy diyc :ee, tangx qra diamw iuu jyr qiwhy, vadd zit aw laii dakdnii dyrr byy tangx hro ix qycc jauw quewciuw.

Kectauu dairqor diyhh dairsingx cuxliw, cunx :ee u ingg jiacc tak. Piaudee ngiaw .jit .xe, sigsai :ee qiar .laii .ee u dongsu, dongcongx, nguartiab :ee, qycc u... qu aiwzinn!

‘koxluw ee simsniax— cniaw liw jingrsimx tniax’

Niauxcuw-aw dinxdang suaw kir piaudee. Simqnuatau pihpok qiyr, ciuxqud gicgih cuah, saxliur ee qixjnaiw, jitt diap jauxjingx .kir.

Bunqed Hniax,

Jiokk jnia’ quw byy lenlok. Jitt jam aw hyw bor?

Jarhngx kuanw cur-lai, dirr pongwiw erdew kiyh diyc jit dniux siongwpnir, vycdnia ingxzit aw zip siongwpo ee sii pah jauxsaux :ee. Dingw vrangx kir Jiyhmngg dngw .laii, lanw u sew jit kunn dexpnir. Jitt jann, m jaix liw qamxx iauxx u qiwdii?

Jiokk bycaiw. Quibuew, Jiyhmngg uahhii jiac byy diyc. Lanw jit jua juanqangx kir :ee qongxx! Jikjue tniqongx jyr duiwtauu u kacc kantuax. Jurjaw ixlaii, guaw dy’ kacc byy hokkir. Mia narr jur hyw hyw, sidjai dy’ hro lanw be auxbann .did.

Kow Qunhui Siyxjiaw inx qongsix ee denrnauw-hertongw, tniax qongxx henrvo si liw decc qor. Dingw zit aw ix laii guanw qongsix. Co' crur qniwbin, guaw u jinwdee, mrqycc ix jit cuir dy’ byy limx. Ix ham’ guanw dangxsurdniuw siy’ lenn dxir duar, qongxx si u cinjniaa quanhe. Hyxgiahlangg cinjniaa lanw byy siy’ bad, m jaix inx snex jyr ngii iacc vniw; m bad zin kewbuw kewve, lenrr cinsnix laurve diyh’air qapp qecvag :ee qongqex.

Juankyx cutgiap, guaw jit xee jixmueaxpnua hro inx sirduarlangg sangr kir voxsibvanx tak, id~zi-jap-bxan liauw, jit dxangx quer, ix sunrsi kir jyr dairhagsingx. Ingxsii dirr haghau, muixx hagqii guaw dy’ vaii taujingg jap miaa, ix longxx diauwciabuew. Hiangwsii narr u langg jap-bxan veh-bxan beh qra lanw kansingg, guaw tingww qapp ix ciamx hab’iokzi quaww vyxjingr, byy diauu qoklip :ee, jnisniax guaw zid'au jongg dingvue hingg :ix.

Tagceh jitt jann, lanw m qnaw qycc siauwsniu. Taulo qor e diauu, jiahqinx byy dng .kir, snax dxngr qor narr e vaw, cunx :ee dyrr hamr hamr :a, cisux-bongrsiongw si qex pilyy :ee narnia.

Dingw jam aw, diongkuir iurqycc decc be tauw, simjong kab be diyc dyrr giaa kiw laii diuctniar. Bingqijaix diyhh qinw cue sensnix knuar. Jit jua kir, siongrr byy iarr diyhh cingxqaw vnuar qangx. Dua tauqex jiangwsii dngw laii dirr Daiuann.

Qenww vaiw qra liw siaw puex, ue dyrr dedvet je. Qyckacc m qramx, jitt diap iarr diyh’air dac dongxaw. Beh hur liw dirr huandiamw jinwjingg knuar .diyc, puex liongrjaw qiar kacc unxdangr. Bunqed Hniax, qinaxzit lanw sigsai duxduxx muaw jit dxangx.

Lerhunn siaw dirr ziddiongdaur

dow kangx, qamxunx jadvag

24.

Sinhunrjingr ngua sinx snxax, tong’ Daiuann ee qokbinn, u langg u hxun. Laurve laurbuw iguann be qaixuii, cutsir ee zidjiw qapp derhy marr jiauwqu siaw, be dingdnaa. Jursow hitt dah, u langg jin’ jiap qaiw, marr uree tauwsiwlangg byy venwqingx. U qethunx :ee, tauduir ee miahy venwngua zuxx laii zuxx suwsiongg, byy dyrr guanvunw :ee catsiaux venr jyr kangx nuaa huantauu jyr dogsinx aw. Dycc quiw xui ham' henrsit byy hac u quaiwjuac, tranr jitt vaiw jyr jit kunr qaiw.

Kiarqex beh suaw kir Dairanx Kux, Jniuw Taiwtair ee hamm luixngua diyc vnuar qingx cur. Singliw jitt kiw qamxx u hyvnuaa, zic qewsngwqix sngr .cud .laii .ee si byy liauw, narr jingqamxdig :ee dyrr pnaiw sngr kiw.

“Noruei ee langkeh siaw puex laii beh tyw ngiurpinw. Lanw jiax byy vnuar qnia dilehh.”

Qongsix cocox qenwdir iurqycc ser qingx, ngiurpinw snax tyw sir tyw qiar be laii, iarr diyhh jauw jit jua qangcniuw qaqi kir tec jiacc vnir u lenw. Jarhngx Kux Siyxjiaw jit qxur ue dinglingg, Qunhui ciuxjicpo-aw henx .kuix, qecdngw qangx rair jauw ee lorjua qycc dingg vaiviw.

Zit snix kax, an’ kuqongsow cud .laii, tnikir u decc dngw zuac. Ciax sraiw qauwui decbeh uaw daur. Bin-aw huathong, vywjuaw auw auw lehh junw snir bongxx et. Qui’ sinkux narr cauwqnuarsngx-bi, qnir diyc langg jin’ pnaixsinkir.

Tauqex cniaw langkeh mngkauxdniaa ee ixqoxtauu-aw siyw jre, tauqeniuu suar kad jit nguaw sencauxvingx laii beh hro ix tewliangg jixkad. Qunhui suecsia siangx ciuw jrih .quer. Sencauw ced jyr dngdux naxx haixduawsix, qut lyc auu longxx benw vro, jiac diyc tauwsimliangg, jiokk tiongwkuair.

Hordingrkax nng xee jaboxginxaw decc sngr juaxang’aw. Pongwqunn, by-aw qapp sandalu vaii qaxx hording muaw siwqer. Giangkenpo, giang ngiaa ee langg tangx singx tiyy. Jit niaw ngiuhogjongx ho’ngg singx qingw .kir, sut sux :ee sairpuawnua, vangr sniax hauw.

“Niu :ix lar. Qycc ruanx, guaw jongw lir lir danwsag. Linw nng xee longxx benw sngw.” Duarlangg cud laii jingxsniax. 

Sun qihue qra jit sxux juaxsnax cniuw .kir, aiwkauwbin :ee kixkax langwliauu.

“Au huee, liw diyhh yc ix kaur baiw baiw.” Vnix:a decc jycsid ee a’jig qapp ginxaw qongxqunxciyr.

“Guaw jiacc byy air.” Ginxaw trow jic quaww vniwhoxniaux.

Sampulu jit sniux duarbuw sniux ho’ngg moh .cud .laii. Qunhui jnii beh qra brew, tauqex et ciuw pnaixser qra tec.

“Rair lar," Qunhui qongw. "Lingrzit aw narr u dniardnuax, jiaxee jiacc an’ huewkuanw kraur.”

Kuanw .diyc ee ngiurpinw sreh zip kir au jxy. Ciax-lai hiphongx siyx hongrhong. Lingxkir qinw qra jun siongrr qiongg. Giaa jit qix sikvid dirr ciuxjicpo dingw:a rue jit diauu snuar, iurqycc jit hxang kangkuer liaurliw suah.

Jiacc jit diamw tongw. Qunhui qra ciax uad kir jit qingx u lingxkir ee diamwbin taujingg hiycciax, qiyr jit xee loxbacvng puer sunxsix, daurqnuajnir qapp jit liap loxnng. Go~lak-jap kox cutmngg, byy kaw iarr jit xee vaw, ervox guanjai gnerdauw.

Jit dniux zxic-go-bxan ee ciuxhingg qinaxzit qauwqii, snax diamw vnuar jinwjingg jnii byy qiar .zip .kir e tiauwpiyr. Jit xee lairsiaux ee kecmngg dyrr dirr qinrvnix. Dua simqnuax, sniu qongxx iauxx jaw jaw, byy tranr jitt xee lauvaiw kir hniwhnar .jit .xe qongw kacc berdid quer. Tauqex hyw kecjingg, knuar diyc Qunhui laii, oliongg dangwdingw sui’ cniaw cud laii anwnai. Qrangw beh jnia’ diamxjingx, snax diamw jniar jniar, jitt diap byy qywsii be dit.

“Liw ciuxtauu narr kacc ann, guaw jipiyr dyrr byy longx .zip .kir, jitt dniux denxuan .jit .guehzit byy siongqanx.”

Luirsu ee ue, duarhniax, siyxdi qapp duarjew longxx qongw .quer. Ciuxjiog jiwcinx laii qongw, jnihang guanguann diyhh hunbingg. Sinwiong qor hro hyw jiacc u tangx dngg laujuiw. 

Vniar qaur der, ginhangg ee ticmngg duxx beh qnuaix. Langg qacc u zip .laii dyrr tywdongr :ar, qyckacc diyhbuaa :ee iarr e huadlyc qaur hyw. Quer snax diamw vnuar ixau, cutzip ginhangg diyhh an’ penmngg. 

“A’syw, guaw jnii u juanw .zip .kir .ar.” Dairjiar vran liauxqed cud .laii, Qunhui dirr ding’axkax qra hniasyw kar denrue.

Jaxsinn cutmngg qaur jinw iauxx bue dac zip qongsix. Qutlat, kiauxsinn qycc lauxsit, e qaudiong :ee cniar .jit .xee benw je xee, daurser hxang kangkuer, Qunhui jinrjai inai Kux Siyxjiaw kir jicjiab, qaqi ciuxqix-aw rair e qir did jah dyrr OK. Ham' Kux Siyxjiaw jit tongx denrue qongw suah, Qunhui sniu diyc dingw zit aw Qanw Lerhunn qiar .laii ee jit dniux denrjuxpuex. Puex siaw qaxx lywlyr dngg, tak diyc simx sngx sngx. Qunhui jamxzenn aw qamxkair. Kacc anwjnuaw qongw, ix dy’ dna’ sinlyy ee gxiac. Jiac langg ee taulo, jit qywguec u tangx niaw zuarr je, dingw:a tauqex iurqycc quixnarr xee; qaqi sintew byy tangx zuarr hyw, cur nirr siyxdi-aw ee juwcechuir qycc rair draur jongg.

“Kow Siyxjiaw. Guaw duxjiah kir kuix puetangw, lairdew u jit dniux tongdidnuax, qongxx u jit dniux quawhyrpuex nng vaiw byy langg siuniaw, rair kir iuvenrqiok jit jua.” Sioktingg ee asangw an’ cur nirr kar denrue hro Qunhui, qongg pniapniax, qongw qaxx duarser sniax.

“Hyw, liw benw qinxdniux. Guaw ervox u ingg e kir niaw.”

Byy vaii zip kangkuer-viyw :ee, jit qangx jit~nng qnia ingxingw u. Singx dngw kir tec iuqiok ee tongdidnuax, jit liap cittyy-inr-aw vutquanxsii kngr dirr puevaux-aw lairdew, sinhunrjingr sinx dangdangx, tauu jit qangx tec .diyc dyrr u lorsaiw.

Qah jitt der qngped-aw, lairdew u siongwpnir, u do’ngiu. Jit vunw siauwpo, liw narr beh dnic, guaw jiacqycc siyx hro :liw.

Duxx niaw .diyc ee quawhyrpuex jiacc knuar liauw, qniaa uaw kir vunwsywlangg, puekag, puejuaw, qapp CD jit der guanhongx-vutdong, qui’ee jywhuew qra danr hnir driau.

Inr-aw dairsingx siux hro hyw, sinhunrjingr beh suawjiab zip puevaux-aw jinwjingg qycc ngiaw .jit .xe. Pitpuer hitt xui kangx kangx. Qunhui qaqi cenw aw sniu, huanrser, jitt dniux sinhunrjingr beh guanguann jiauwqu qaur ix zibbok.