duicue qalairlangg

(ID)

Vai'iux qapp ngiaxquacnix druu jairgua, Miaurdinx snex bagjiux m bad knuar quer jingpnua cincniu jitt duir hiacnirr hniaxtauu qycc hahnuaa. Javox :ee bersux hiwcud lairdew ee siyxsingx, piauped, hyw hanwenn, snix jyr jiokk donghongg. Jabow :ee iur puee vyc bin snix jyr jiokk sokir, tyhuebak, nac'iyx itdiausinx, suiw qaxx naxx enw qoxjongx ee huednuar, hongx cuex e dyw ee kuanxsid. Miaurdinx drow bagsig, iyh ix qnaxx byy sir-jap-go kilo.

"Jauwkax qaxnaxx u kacc ser qingx." Javox :ee qongw.

"Jex tacc u iauwqinw? Qunduxx guaw iarr be juw." Jabow :ee trow jic, jiurser qycc ping duiww javox :ee hingkamw kir.

Beh kir knuar pix snxax ee lordaii snex jyr sniaw kuanxjer, siyxsingx jniar ciuw lamw huednuar ee erqnair qniaa duiww aurbuew mngg. Miaurdinx tranr inx qajiacpniax hiongr ix, hyxlew aw qra inx ee aurhingg knuar jit xe kacc u lehh.

Dac jit siangx angkamwsig ee quandac'ee, jabow :ee taukakdingw kacc byy qaur javolangg ee hirdui. Sanxser, iur qiqud, cing jit niaw hunxsig qinxsin'aw, hingkamw pog pog, kacngx kiaur kiaur, snriaa langg bak ee qutqeh knuar hen hen.

Vixqauwdig, javolangg ee cingrcah qex jiokk danqanw. Dingw srinx jit niaw amr lxik qapp ciyr lxik qnaiwcah ee didjua POLO snxax, erdew puer jit niaw kongw :ee pactic'axkor. Kax dngg ciuw dngg, qauciangg siwjangr, tangx qongw si henwvingx ee texqeh.

"Txangx-aw vutjiw aw je." Jabow :ee qongw, kauxkir dam dam.

"Ngngr... si a, dirr vangqingx :ee qycc u sed tangjac." Miaurdinx duiwcuir rinr.

"Tacc e longxx byy tang'axnii?" Javox :ee mng.

"Tniadngg qapp vangqingx guandew si u, mrqycc longxx u kacc qu :ar. Cuwjuw u mng guaw qamxx beh voxtuir? Guaw qongw qokk langg ganxqongx byy qangg, diyhh hro sinx cuwjuw qaqi qingxsuanw kacc sit." Miaurdinx dab kiw jiokk qudliux. Jitt xee bunrdee, ix ho'ngg mng quer quixnarr vaiw :ar.

"Anxnex driyc lar," jabow :ee janwsniax. "Hex kaaden uree huesig baiw qyqyy, jiokk siogkir. Beh narr si hitt kuanw ee, mair jrngx kacc bingkir." 

Hranw did u langkeh qapp ix kia qang vingg, Miaurdinx tauu dimr qaxx beh lag .kir.

"Duarbuxqongqingx, qnaxx jiokk pnaiw vniawsaur." Javolangg bagtauu liapqingw.

"Erdangr cniar langg laii vniar a," Miaurdinx duiwcuir rinr. "Jit~nng-cingx kox, qui' qingx qra liw jingxliw qaxx cingkir liuliux, byy-sua.-byy-sab."

"Jiacc siok or, nng-cingx kox dyrr u der cniar!" Jabow :ee bagjiukangx tenw dua luiw.

"Hner a." Miaurdinx ciyr buibuix.

"Jex qu cur huanx :ee, guaw sidjai kacc byy air. Guaw iaxx si kacc qac'ir sinx kiw :ee." Javolangg qeqiamw hiamm.

"Doci ee de quir somsomx, beh dyhh qycc snex jitt hy snax janr kiw ee lau'axcur? Junw narr u, jitt qingx cur ee vnuakauw qanda' erdangr brew inx ee ciakor."

"Qongw diyc qewsiaur. Linw kuiqer sniu' quer quir :ar." Javolangg qycjaiww cud jiaux.

"U dniadauw tangx jingr huex, qycc u cia'ui ven ven, jitt hy cuwqer, tong' Daivag Ci cue byy derr zi qingx :ar." Miaurdinx cuir qongw qycc viw kax viw ciuw.

"Liw qapp cuwjuw qongw knuar mai, knuar anxnex hyw bor?" Javolangg iong qorr jingxtauu-aw viw jit xee sowbok.

"Be diyc lar," Miaurdinx hnair tauu. "Jarhngx u langg juewqer viw liw qex zxic-go-bxan beh brew, cuwjuw jit sniax dyrr qongw m. Linw knuar narr u dingwir, jaiwvutzenn, hro linw jetauu, guaw diongrginn qiamw tanr .quaw. Qewsor linw dyrr m hyw qycc qra guaw ad ar."

Bexbe siangx vingg cud qxunn liac qxunn, jit qxur laii qycc jit qxur kir, bersux decc dapcuiwqow.

"Jitt qingx jiokk hac guaw ee ir neh." Quw quw byy cud sniax, jabow :ee juewjniurjnii, byy-si.-byy-jun cah jit qxur .zip .laii. 

Miaurdinx naxjunxx kir jiac diyc sim'aw, langg qui'ee qiauqiac .kiw .laii, iuu qinw qra cuix .lyc. "U hah'ir diyhh siaxir," Miaurdinx ngua hiongr jabow :ee qongw. "M si guaw decc qra linw hangxkangx. Jitt qingx ee cuwdniuu hyw, guaw jit qangx cua quixnarr xee langkeh laii knuar. Linw jit kax hording-lai jit kax hording-gua iaxx decc siamwbuexau, jitquw u langg decc niaw jnii, binaxjair jit tac ginpiyr dyrr pongw .laii .ar marr bykoxdnia."

Javolangg bih cuir, sim sim. Miaurdinx simqnuax liac lecc cik.

"Acc byy, anxnex lar. Guaw jiacc laii qapp cuwjuw dauwcamsiongg, knuar tang'axnii qui'ee jyr hyw longxjongw kaiiong zuarr je, sii qaur jitt diauu inx laii cud." Qongw qaxx cuir baa, Miaurdinx henr vai'axdew.

"Inx narr m lehh?" Jabow :ee mng qinw qinw.

"Narr m, linw cue guaw tyw." Miaurdinx hongwdnaw vniawvyh.

Nng xee jaboxlangg dauwlat qapp jit xee javox vnivuic. Javox :ee ho'ngg vig qaxx viacqag, vec qii iarr diyhh giaa cud laii et. Ioksux rair singx pacqyw. Quewmiaa, dniartauqimx, siauwbuew dingxdingw jiaxee, Miaurdinx sui' hxang aw hiongr inx sueh hunbingg.

Dairjir qaudair liauxqed, lamluw siangsiangx qapp Miaurdinx lang ciuxhuex qongw jaiwhue. Ciax laii aw ciax kir, javolangg si suqix, jit ciuw hnua dirr jaboxlangg ee sin'iyx, jit ciuw kir kuix ciamngg. Miaurdinx knuar qaxx sinn sinn. Dnaaw banw .diyc ee quexjiw suacc dair lisix aw sngkuir.

(ZI)

Iarr simx qniax, iarr hnuahiw, Miaurdinx jiokk jnia' quw m bad jyr diyc jiacc dua ee kes, zidqanx uirr ix jauw papax habqaizenn, s.-simliam-l., midnawsii qycc iarr berdid ansui. Jyczit-amr bang diyc cur vangham, jarhngx-amr bang diyc sinx cuwjuw langg byy .kir. Jaxkiw kunr jingsinn, qui' lexvair bagqnii dy' ox ox. Qniazit ervox quer, jitt hy kuanw zidjiw qnaxx dyrr tangx jiamrsii qetsog.

"Qionghiw oox!"

Dongliauu sui' xee aw laii qra hyrhiw. Miaurdinx jin' jaix jitt qxur "qionghiw" cangr u zuarr je iwbi dirr lairbin. Druar qang jit qingx qongsix, liw u guaw byy, himsen, hnowqii iacc dowhenn, hex dyrr jairr langg ee siu'iongw.

"Linw siyxdi ee juwcecdnuax laii :ar, rair sir-bxan gua kox."

"Liw qra juwcecdnuax kngr dycqui-dingw. Guaw binaxjair e cuxliw."

"Jitt qywguec ee cuwsuer marr iaxx bue lap."

"Cuwtauqex narr u laii tyw, liw jiacc qra uan .jit .xe. Lanw u nng qywguec ee ciuxliamrlai dirr ix hiax."

Miaurdinx qapp a'buw denrue qongw suah, ciuxtauu ee kangkuer cuxliw qaxx qinw qycc jiapsiok. Dingw dingw guehzit jongxqiong jiacc liaurliw jit qingx ser aw qingx ee tywvangg, qurlokqursog, dionglanglew byy-dap.-byy-sab, urngiaw si jyr jit xee giabjig nardnia. Byy vaurpuex, jingg guec qyckacc srid texben, jit qingx dy' byy bre .cud .kir, lenrr suewcuwkia :ee dy' jyr byy. Jitt guehzit narr qycc qongwqux, junw qongsix byy qra sicniar, Miaurdinx qaqi puerpoqngr iarr diyhh qinw qngw qngw lehh kacc sit. Cur nirr qehuir jiokk siongdiong, jin kyr qycc ix jit xee. Jitt kud jnikangx byy zibsiaur, benw zuarr quw dyrr kaix dax :ar.

"Qinaxzit beh ciamiog :ar m?" Qingliw uaw laii decc mng.

"Hner a." Miaurdinx dab.

"Ioksii quiw diamw?"

"Nng diamw. Inx siangx vingg sii qaur longxx e laii lanw jiax."

"Bexjuw hitt vingg u qycc qra CONFIRM .byy?"

"Bexjuw siongrvanx cue byy langwqangx, vangr qxuann hro inx jaboxving'iuw dahsah. Vnuar diamxjingx quw jingg, guaw jiacc qapp inx jaboxving'iuw tongx quer denrue. Ix qongw ix jiac daur vaw rair singx kir ginhangg .jit .jua, dairjir vran suah dyrr e jre qewdingg :ee laii lanw jiax." Miaurdinx dab kiw dandenn jabjiog, kuiwkauw si unw dakdag ee kuanxngiu.

Ziddauwvng jiac suah, uree giabburuann siangx ciuw siy' cew junw jimxtauu, dyh-dingw pag lehh dyrr beh qinw iongxsinn hiyctiamw .jit .xe. Miaurdinx qinxdniux qaxx lrauu ciuw-siyc, beh tacc kunr e kir? Kogkok knuar sisinviyw, diamw vnuar quer, berjuw dairsingx qauwui, Miaurdinx tinn dee, cniaw ix iw nirr jre. Dejuiw siyx tngwtngr, jrip lehh jrip lehh marr si e dax. Sianghongx qacdnia ee sisinn quer go hunjingx :ar, rair jersiaur hitt vingg suacc danw be laii.

"Qra cuix .jit .xe." Knuar qaxnaxx m si srer, qingliw qinw laii draur dnaxjah.

Miaurdinx denrue giaa .kiw .laii, kar qaxx beh siyx .kir, be tongx dyrr si be tongx.

"Jiamrquann :ee cue byy, ngua cue jniawvan :ee suacc berhiangw?" Qingliw liyc aw decc kiw pnaiw bin. Miaurdinx jitt xe aw longxx qapp jabow :ee jiaphiap, m bad qapp javox :ee tongx denrue .quer. Jiax ciaux, hiax hiaux. "Der Kexjongx, iyhcniuw genxqiuwuann". Dingw zit aw qau'ngua ee penwdnuax dyrr si jitt dniux byy cyr.

"Iaxx bue qauwui! Ix qra guaw qongw ix jiac daur vaw dyrr e cutmngg." Denrue hitt vingg qongxue ee sniax jiokk cnecuah. 

Miaurdinx hro ix huah .jit .xe, jidsii simqnuax qriur ann, kabuew lingw qiqix. Kax puu ciuw junr, denrue hiamw jit diamw aw kngr byy hyxser. 

"Jin' sitlew, cniaw qycc siyw danw .jit .xe. Ingwqaix liammix qaur :ar." Miaurdinx qra cuwjuw andah, qongw ee ue vnuar jinx vnuar qew. 

Quer u jit quw aw, Miaurdinx ee ciuxqix-aw giangx. Jingwlangg bagjiux knuar hiongr ix jit xee.

"Dangw Siyxjiaw, jin' sitlew. Jitt qingx cur, guaw byy beh air :ar."

(SNAX)

Taulo vangr lehh, m quanw qecdngw zit qingliw vyh qnaxx e qra liam qaxx caur tauu, Miaurdinx jitt jua byy laii, jit kauw kuir tunx be lyc .kir, zit .sii be jiac, amwsii be kunr, beh tacc u simjniaa vniar surgiap? Jiauww miapenr ee derhuanx cue laii qaur, si kia si hnuaii, narr byy kingg hro jinx lun hro bingg, Miaurdinx quatduanr pah siw m dngw tauu.

"U jit diauu siaur ix itdit byy qapp guaw cringx, qycc iuxir beh dypiah," Miaurdinx qongw, kia tringg tringg. "Guaw qinaxzit tiaulaii jiax dngx :ix, knuar ix beh jauw naxliw kir."

Mngtauu vnuar sinr vnuar gii, duiwqangxqix giaa kiw laii qongw, qajiacpniax hiongr Miaurdinx. "U jit xee sner Dangw ee siyxjiaw beh cue liw. Ix qongw liw kiamr ix jnii byy hingg. Guaw qongw jitt jun siongrvanx-siqanx. Ix qongw ix beh diamr mngg-kax danw liw harvanx."

Ciuxkiaux kud zip byy kud cud, denrue hitt vingg qaudair sniaw, mngtauu jit zri vnuar qxur dy' m qongw. Miaurdinx drow gnirkir m qra mng, qinsiok beh diamr jiax danw qaxx diyc.

"Jiax pnaixser qongxue. Lanw laii kir duiwbin ee qaviquanw." 

Byy-dniu.-byy-dii, langg qaur sniax iarr qaur, Kexjongx huac dua huac qniaa jyr jingg. Jit xee denrue jiacc beh kar qinw ced driau, Miaurdinx kuix vo duewau. Bin be hur qra knuar hro bingg, aurviachingg si sigsai kuanw aw sigsai kuanw, Miaurdinx siongsinr qaqi byy duer m driyc langg.

Nngxliyc ee imgak qaccamx qavix-pangx, simqinghuew iam pongrpong laii dirr jiax, huew junw byy jongw huax, siongrr byy marr sriaux jidvnuar. Nng langg iw nirr jiacc jre dniardiyc, hogbursingx menu sui' sangr .laii. Javox :ee beh kapucino, jabow :ee diamw jit vxuex karamel macciato. Hogbursingx jauw liauw, javox jabow siy' duiwsiongr. Miaurdinx u liyc aw vutjurzuu.

Binrtaujingg ee javolangg sam sam, erhaii ee cuiwciux marr m jaix si jaxkiw byy kaux iacc sinx huad :ee, Miaurdinx iaxx e qir did co' qniwbin hitt zit, javolangg jiokk u sincaiw. Cingwqyx cinwcaiw duw dy' u. Beh qapp jit xee bin iux iux, bagtauu pacqatqiuu :ee qaujiab ongxlaii, jidsidig, Miaurdinx m jaix anwjnuaw kaikauw.

"Linw qongsix hokli qycc be baiw, anwjnuaw? Siongrvanx-sii aw, sinlyy erdangr dairsuwqix cud laii limx qavix." Miaurdinx qra gexsew.

"Guaw qra juxquanw qywqar nng diamxjingx."

Kexjongx qongw liauw, sianghongx iurqycc diam .kir. Qajair qavix dirr jitt sii juw hyw sangr jnriu dyh. U kafein ee imxliau qaxnaxx u qonghau. Miaurdinx damx .jit .xe narnia, qamxqag qex jiokk jairdnaw.

"Guaw bre cur jyr gelangg m si snax qangx go qangx, bexbe sianghongx liamdongliamsii huanxquar huanw m, guaw duw qaxx m :ar. Byindiwdnuax vueriog qra guaw vangr jiauw, liw si tauu jit xee." Cuanvan ee ue sunrli tauxvangr .cud .kir, Miaurdinx amr amr aw qra qaqi pah pog'aw. 

Byy vanrpuex, jre dirr duiwbin :ee byy-dongr.-byy-jing. Miaurdinx hyw-sniax-hyw-sueh, Kexjongx qig exqauw. Byy beh qycc keckir, Miaurdinx junxvi beh hro ix pnaiw knuar bin.

"Guaw ho'ngg venw vah-go-bxan .kir."

Ue vnivnii dirr naaulingx-aw, Kexjongx jaw Miaurdinx jit vo cud cuiwkauw. Uertauu qacc dac u cud .kir, suar .lyc dyrr benw langg' cniaw benw langg' cuix, tauu jiww buew jiokk sunrliuu, bersux Jiyhmngg Juixkor decc siabhongg.

"Guaw kuix jit dniux dongzit jipiyr beh hro ix kir qapp linw qap'iog. Ix byy kir linw hiax, suacc kir ginhangg qra jipiyr duirngua jyr henrjnii. Guaw kir ix suewcuwkia ee soxjai. Kir qaur der jiacc jaix tewjox :ar. Cuwtauqex u kuix mngg hro guaw knuar. Vnuax qaxx kangx sosox, jiaujiyw aw snuawsyh dy' byy lauu." Kexjongx qongw qaxx duarsimkuir, hauwlamsinn ~.

"Inx cur nirr ee langg lehh? Liw u kir qra inx la knuar mai bor?" Miaurdinx jit sniax dyrr puawpang.

"Ix ee cinlangg qongxx longxx dirr Hiongqangw. Dirr Daiuann :ee qongxx juann jit quaw langx-cinjniaa, byy decc tong'ongw."

"Acc ving'iuw lehh? Daiuann nng-cingx snax-vah gua bxan langg, ix qamxx qanda' qapp liw u qauvuee?"

"Ix Daiuann Hiongqangw laii laii kir kir, ving'iuw ongxlaii longxx kyr ciuxqix-aw. U snax~go xee aw guaw tniax quer sniax, qapp inx qongw quer denrue, mrqycc m bad qnir bin .quer, marr m jaix beh anwjnuaw cue :inx."

Miaurdinx niar bak, beh ciyr m did, beh kaur iarr m did. U jaidiau hro dua qingx iyhcniuw cniar jyr genxqiuwuann, haglik dikdig be qe, jnuaxngiu ix erdangr gam qaxx jitt kuanw? Si himm si how dy' knuar iaxx byy jinx, dua vew ginniuw ix hiacc hyw dnaw qaux hro langg' kir huadlyc! Miaurdinx knuar ix dyrr jamxzenn aw jingqongx, byy decc dongwgong. Javolangg qamxx jniasit hiacc vutdiongwiong, hro suiw qoniuu-aw naix .jit .xe dyrr jauxjingx huanxhingg .kir?

"Liw qamxx u anwsngr qra qryr?" Miaurdinx mng.

"Guaw iarr m jaix ix langg bih dirr dyhh, beh qryr mosinn-aw?" Kexjongx iarr dirr honghuextauu. "Jinn Siokle qamxx ix ee jinx miaa jniar sner, qnaxx diyhh singx cniar tamwjingx craa siongser. Jitt jann banrvutzi narr hro moxmih qiwjiaw sax kir cud sinbunn bruw qaxx tong' langg jaix, guaw dyrr kir liauw liauw :ar."

Tniax qaur jiax, Miaurdinx amwjni decc kiw air ciyr. Javolangg, dyrr hitt renn binrpuee qor siongrr diauu. Simhuew siaubyy .kir. Jitt xee kes qaur jiax klos. Binrtaujingg ee javolangg jitt vaiw lyhliur, jabow qapp jniginn nng kangx jongw kangx. Siy' vixping, Miaurdinx liauw quaw kuiwlat qapp jingsinn sidjai iaxx sngr siyxkuaw.

Miaurdinx an' gunvaux tiux nng dniux angg juaxpiyr .cud .laii beh lap qavix ee jnii, Kexjongx qra dongr, qongw ix beh cniaw. "Jitt vaiw hro liw jyr vehqangx sidjai jiokk sitlew. Aurvaiw narr cinjniaa ving'iuw u cuwqingx beh cuxliw, guaw e vyr inx kir cue :liw."

Miaurdinx bunxciyr. Bexbe byy sxingg, sewqanx qycc qex jit xee digzinn, hex urngiaw siangx tauu liauw, jnia' m dat. Huatdong qiciax, Miaurdinx qapp Kexjongx siy' srii. Beh laii ee sii creh vnuar siw. beh dyr .kir ee lo nirr, Miaurdinx ee cuiwqag vutsii kiaur hiongr tnix.

(SIR)

Zidtauu unsunn, ciuhongx unziuu. Veh diamw jaiw kiaa autobaik, jitt jua beh kir qongsix ee lo jin' liangkir. Siyxdi qapp siyxmue iaxx decc siangr dua binn, duxjiah cutmngg ee sii, Miaurdinx qnialo diyhh liamx liamx. Hiyckunwzit, tagcecginxaw byy kunr qaxx quer daur be cnew. Vunxsiongsii, a'buw nguar kunr jaw jingsinn, qniwnarr benw hiamr ginxaw kixcngg jniuryc ee zidjiw longxx e qex kunr jit~nng diamxjingx qra binn liaucniaw vow jit quaw dngw .laii. Acc narr Miaurdinx, vaiwlak qapp lexvair siongrr byy ingg, berdangr hiycqangx. Vaiwid qaur vaiwgo dag'ee jiauwunn, Miaurdinx jyczit jiacc hiyh .quer.

"Langg m si tih pah :ee, qaix hiyh iarr diyhh hiyh." A'buw naxx jit jxy sinwhyrdingx, samvutzirsii e cud sinwhy qiyr jaboxqniaw dac dongxaw, m hyw jidlo itdit ciongx .kir.

Cuwqingx ee siongwpnir kngr jnriu bangrlo, dairsux vaiwid beh dnic :ee cuann hro hyw, jrap jrap cruir cruir :ee, Miaurdinx cuxliw dairsingx. Qinaxzit u langkeh iog beh knuar cur, kaciuw rair kacc sri lehh. Marr u cur beh qiawbe :ee, Miaurdinx jarhngx amwsii jriab diyc denrue.

"Liw dangsii kacc ingg? U jitt qingx cur beh cniaw liw laii qrow knuar mai."

Tniax diyc Kexjongx ee sniax, Miaurdinx simqnuax liammix be dinwjing. Vakdauu, an' cur nirr iacc qongsix beh kir qaur hiax longxx vutjiw aw u jit der. Hyqor byy jit sniax dyrr qra qongw "m"? Miaurdinx byy air kir cimx sniu.

Hoiog sir diamw kir inx daux. Beh uaw snax diamw, luiqongho an' tnidingw ciax tangw dryr. Autobaik kiaa qauwui, jit sinkux log jiccih kir langg' daux jin' byy tongx. Qongciax jit jam jit jam dauc dauc aw tuh qycc qniax qnuaw be hur. Crann crann kir duarlo-vnix jac qewdingg :ee, singw sii qycc benw sriu hongho, jin' siongx vunw dyrr urngiaw.

"Ho jiacc dua. Guaw jiacc decc sniu qongxx liw qamxx e qaiw siqanx, lingrr qangx jiacc laii." Liulongg ee mngg kuix .kuix. Kexjongx kia dirr kauxbin danxjih. 

Miaurdinx qig ciyr ciyr, gairgiyc gairgiyc. "Hongho sniu' dua qnuaw be qaur", jitt jiongw lixiuu, langkeh jap xee u qauw xee longxx erdangr kuanziauu. Miaurdinx jidsii sniu liauw jin' vut'uat, qaqi qinaxzit si huan sxuah iacc si dycc jit diauu qinx kir puac .kir? Si anwjnuaw jiacc doxqiongg laii hur jitt jruw?

Kexjongx diamr decc gi, qra duarmngg kuix henr henr huangingg langkeh qniakaqaur. Qiamxcaiw si jitgiap-piah, Miaurdinx jid'err dac zip mngg, bagjiux jinn, bagbuew siamx, ganxjux byy jit sii dniardiyc.

Jit tnxiax jit vangg, vangqingmngg qnuix lehh, igvangg marr m jaix duarser qingx, Miaurdinx u ngiaw diyc sexigjyy dyrr si. Qanxsingw ee gas-daii, erdangr hniaa dee iacc sac mi, qesitauu byy qraur vanrcair juw liaurliw. Tniatauu ee cecduu jiamr jit bin viah, kia siy' duiwsiongr :ee u denrsi qapp imhiongw setvi. Caa-dervangx binrdingw u jit jxox ixdyh, dyh-dingw u quixnarr vunw jabjir.

"Jiax si'angw decc druar?" Dap'anr u iyh diyc cid~veh hunx, Miaurdinx beh air viaujunw :ee.

"Guaw a!" Kexjongx duiwcuir rinr.

"Si anwjnuaw beh bre?"

"Guaw cutguec rair vnuax kir Daidiongx, qongsix driaur guaw kir hitt vingg siongrvanx," Kexjongx qongw. "Jaxjingg dyrr u anwsngr beh bre, hitt jun si sniu qongxx ser qingx ngua dua qingx. Au .laii dyrr..." Lauu jit xee uerbuew, Kexjongx cingwqingx qra junw .quer, uat jit xee srinx kir kuix vangqingx-mngg.

"Jit qingx si vangqingx. Zip .laii .ar." Kexjongx qra Miaurdinx et ciuw.

"Mrbenw lar. Diamr jiax dyrr knuar u :ar."

"Liw qniax guaw e qra liw anwjnuaw?"

Miaurdinx byy qra rinr, erhaii giaa giaa, jit kax dac .zip .kir.

"Duarduu jyr siw :ee." Miaurdinx gorqinqee kok kok nng xee.

"Hner a." Kexjongx qongw.

"Siaxzirdyh marr jyr siw :ee, berdangr isuaw." Miaurdinx qor jngxtauu-aw qiw uaw txangx-aw ee dyh-aw.

"Hngr, qanda' jitt dingw nngxsimr cngg si uahdang :ee." Kexjongx qangrkuanw iong ciuw qiw.

Miaurdinx hiongr jingxtauu-aw qiw hitt qaktauu giyw .jit .xe, mng Kexjongx bincngg qaur-si.-qaur-hau qamxx beh vnuax jauw.

"Jitt dingw m si qaiww hyw kunr, vingw jit xe srinx, siyxkuaw dinxdang diyc dyrr e ngingixnguairnguai," Kexjongx naxx qongw naxx iyy tauu. "Sinx cuwjuw narr beh dnic dyrr hro :ix. Beh byy, guaw dyrr qiyr vnuax cur :ee laii cuxliw hniwsag."

Miaurdinx dimr tauu, uad lehh beh dngw kir kectniax, qajiah-au ee sianglangg-jimxtauu suacc dinr dirr ix taukag-lai m jauw.

"Liw liongrqiiog aw qrow lehh, guaw jitt qingx mini aparto erdangr bre zuarr je?" Kexjongx mng kiw, liangsinn liangsinn.

"Cuwqingx bexbe, gelangg muaw siwqer. Liw tacc byy cue jairqin :ee?" Miaurdinx dyww mng ix.

"Jitt diauu dionglangjnii, guaw tiaudii beh hro liw juanw. Qycjaiww qongw, vah-bxan singliw, jongw diyhh qaudair hro u sigsai :ee kacc ansimx."

Miaurdinx ee ciuxqix-aw decc hiangw, xe jit xee kecho vunxjniaa iog amwsii, jit tongx denrue laii rair Miaurdinx suidit qnuaw .kir.

"Guaw rair singx sitvuee. Binaxjair jiacc qra liw vywqer."

"Liw kiaa autobaik?"

"Ho laii, byy kiaa."

"Guaw sraiw ciax jair liw laii kir."

"Anxnex nacc hyw?"

"Beh tacc u sniaxmih m hyw?"

Liulongg an' jap-id lxauu jidlo didtaur qaur derha tingciadniuu. Sir lenw decc jauw kaksit qex jiokk qinw, tih-srinx vaux bah-srinx, marr qex kacc anjuann. Ciax sraiw qauwui, jit xee sir~go-jap huer kuanw ee javolangg kia dirr hordingrkax. Miaurdinx qinxmiw lyc ciax kir qapp cuwjuw ad ciuw. Vnuar diamxjingx quw quer, Miaurdinx an' cur-lai cud .laii, mngkakauw tingg jit daii jurqaiong :ee.

"Liw nacc qycc dirr jiax?" Miauxdinx qniax .jit .xe.

"Liw qo' jit xee jaboxginxaw qapp javolangg zip kir langg' cur-lai. Liw qiyr guaw beh anwjnuaw e hongwsimx?"

"Guaw duxjiah kir linw daux marr si qoqox jit xee." Miaurdinx kiw air ciyr.

"Hex byy qangg a! Lanw nng xee u sigsai."

"Jitt xui sensnix u kir quer guanw hiax. Denrue guaw marr qapp ix dramm quer quixnarr vaiw :ar. Lun jinx, guaw qapp ix dendyww kacc sik."

Jit qxur laii jit qxur kir qaur jiax, Kexjongx cue byy ue tangx rinr, jidsii vnixcuir .kir.

Iaxqycc u dairjir rair cuxliw, Miaurdinx ee qongsix dyrr dirr hang-aw-tauu ee duarlo-vnix, vorlenw go hunjingx. Jitt vaiw siy' srii si sit duw sit. Miaurdinx knuar ciax sraiw lirkuix, muaw simx qitai au jit huee qniwbin ee zidjiw.

(GO)

Uanr byy, byy uanr jiyw, bylun hyw-baiw cur iacc hyw-pnaiw qrer, kanqau'aw jit qix huelencuir, siw juaa qongw qaxx venr uac senrhii, kacc sniu marr hitt vid dionglangjnii. Qewsiaur dirr denrue-diongx ciauu dniardiyc, Kexjongx harvanx dyrr beh laii qapp Miaurdinx ee qongsix ciamding huxtog inwker. 

"Guaw beh kir brew venrdongx. Si m si iarr qra liw jah jit xee dngw .laii?" Dongsu Siyw Dann :ee mng Miaurdinx.

"Dysia :liw. Guaw iaxx bue iaux ne."

Druar qang qingx qongsix, ursii liw cniaw guaw jiac amr, ursii guaw cniaw liw jiac daur, jabow ho'ngg cniaw ee vaixsniax qex jiokk je jiokk je.

Kexjongx jiauww ioksog ee siqanx junxsii laii qaur. Juaw-tauu qurmiaa, juaw-buew dngr inr. Jingwqingx dairjir liaurliw qaur jiax sngr jit xee diaudnua, Kexjongx beh cniaw Miaurdinx jiac vng.

"Jex sngr si he lxo ee kuiciuxlew, cur jiacc vaiwtog liw qra guaw bre jit xee kacc hyw qrer." Qig gnoxzinn, Kexjongx naxx qongw qycc naxx vaiwib. 

Hud langg' iwsur jin' pnaiw singkir. Miaurdinx iong bagbuew qra Siyw Dann :ee giyw .jit .xe, beh kir acc m, qinrsinx nng xee javolangg, ix jongw e kir diksid diyc inx qidiongx jit xee.

"Liw qnaw jiac hiamx bor? Lanw laii kir jiac uanngiux huexqyx."

Jid'err tniax diyc "uanngiux", Miaurdinx cuir rinr qongxx "be qingw jiac", simqnuadew decc kiw pnaixser. Kexjongx jair Miaurdinx qra ciax sraiw kir qaur Tenbuw. Jiahvng siqanx, dagg qingx ee singliw dy' hyw qaxx be qongw .did.

"Benw huanlyw. Guaw lauxjaw dyrr u kar denrue dingrui :ar." Kexjongx qongw diyc jiokk iongkir, jidlo qapp diamwuann aisaju, bingbingg dy' sigsai kxeh ee qewser.

Huexqyx dxiamr kuix qaxx duarbuw siwqer, jitt qingx ee caiwsig byy der hiamm kiw, tnglo qyckacc si itdingxid :ee; qycc jonghongg marr vutjiw aw cuanwdiamw.

"Bogquair viw langg' kacc quir, iarr bogquair ix air laii." Miaurdinx amr sniu, vorvinn, jit buew suahee qui' sinkux angg hamxhamw dirr jitt sijun tiaur zip ix ee nguaw-lai.

"Hyw liau :ee longxx dirr dniaw-drew, liw m jai'ngiaw tangx gneh." Naxx qongw, Kexjongx naxx iong dua qix tngsii-aw kad, dewtngx .quer, tauwtiux, ziuhii qapp ham'aw, jidjee zip Miaurdinx ee nguaw-lai. 

Uanngiux huexqyx nng langg jit dniaw, buxtngx jit vingg u hiamx jit vingg byy hiamx, mew huew iacc bunn huew, qeww Kexjongx decc kongwjer. Hueqi'uann qapp heuann, jit langg jit liap; jiauxaxnng qapp hi'uann kacc ser liap, jit kunr nng liap jiacc u qauwkuir.

"Guaw jiac byy hiacc je. M hyw qycc kad hro :guaw :ar." Miaurdinx iyy ciuw qra dongr.

"Unn unn aw si, iarr byy qnuaxqinw," Kexjongx qongw, mex jit vew dang'yx lyc .kir, qycc u hniuqox, siongziongg, qimjiamqox qapp qylecair, qanda' socair dyrr jiokk u tangx jiac.

"Liw kir Daidiongx beh druar dyhh?" Miaurdinx cue quaw ue liaucniaw puer, qra dniaxkamr kamr .kiw .laii kacc kuair sik.

"Qongsix u sioksiar. Singx vnuax .kir jiacc laii dauc dauc aw cue."

"Beh brew iacc suer?"

"Jit vaiw dy' qiyr m qnaw :ar, qycc brew!" Kexjongx iong qorr huah :ee. "Dongqisii si sniu qongxx dagg guehzit lap cuwsuer, lingkyw hag jit qingx siyw qong'uw, cur nirr ee langg an' Qyhiongg kiw .laii marr u der tangx hiycmee. Beh sniaw jaix cxenx sngr bxan sngr, m dat tnix cinwcaiw ciauu .jit .xe."

Juiw qunw carca, cingr juixenx. Kexjongx qra dniaxkamr henx .kuix, gas qimr kacc ser. Iutngx bog .jit .xe bog .jit .xe, baiw baiw aw huew, m tangx hro lingw .kir dyrr hyw.

"Liw dagg amr dy' jyr qaxx hiacc nguar, lexvaiwzit qycc byy tangx hiyh. Javoving'iuw beh jiyx liw iokhue diyhh cue dangsii?" Diyc qaur Kexjongx cud kyxdee. 

Iwsig diyc debok u sed hamrkud, Miaurdinx qniax diyhdiaur, ue qut cud cuir jinwjingg u quer suniuu. "Beh jyr guaw Dangw Miaurdinx ee javoving'iuw, siqanx rair qapp guaw e puewhap jiacc jyr e kiw."

Kexjongx dimr tauu, bagtauu qad qad. Jitt xee dab junw byy lirqingx-lirhut, dairkair marr byy duiwox ee kuanw.

Dniaw-drew cringx qaxx kangx ~ ~, nng langg longxx jiac qaxx jiokk vaxvii. Uaxdanx vangr dyh-dingw, Kexjongx kir kaisiaur. Miaurdinx kar denrue hro qingliw, qongxx ing'amr be qycc zip .kir.

"Linw qingliw dyrr u bow :ar. Narr byy, ix qapp liw ee siqanx duxhyw ba sngwsngr." Miaurdinx jit tongx denrue jiacc qongw suah, Kexjongx dirr ix qajiah-au decc liam.

"Narr beh anxnex lun kiw, guaw jit quaw dongsu qapp guaw qyckacc bardah. Inx longxx iauxx bue siursig." Miaurdinx marr byy decc nngw. 

Kexjongx kir qra ciax sraiw .laii beh jair Miaurdinx dngw .kir, jidlo, nng langg cuiwqow dab byy suah.

(LAK)

Jiauww siogle, vaiwzi qapp vaiwsir ee jaxkiw diyhh huergi. Qingliw kia dirr vehvangx taujingg qongw qaxx cuiwqag juann pyx. Knuawkuanw kes, dangsii rair tniqer, panqer iacc lakqer; knuawkuanw langkeh, beh anwjnuaw cik'ingr, cuiciauu, qauwlew kuanxtai, xmee xmee qag qag. Jap sxor dxangx bre cur ee vorsor qapp iauwquad, qingliw sui' hxang aw tuanqar, vangr vo.

"Dagg qywguec-cex diyhh setding bogviaux. Vixlun qongxx, jit qangx narr u tangx anvaii nng jruw knuar cur. Jit guehzit dyrr u go~lak-jap jruw. Hro liw qyckacc pnaiw siun, jongw byy go~lak-jap jruw longxjongw qongwqux."

Jniar ciuw vehvanxvid, dyr ciuw vehvanxcad, qingliw iong koxsimx kanqar, vehvangx dingxquann siaw qaxx bat bat si. Miaurdinx bagjiux knuar, hnirkangx tniax, jit xee simqnuax zuu cangxcangw. Jitt guehzit beh u zibsiaur, jin kyr dy' ciuxtauu hitt qingx duarsig cur iarquxqnaw. Vutzirqyr, itdanr narr cue diyc sinx cuwjuw, cuxkir, qapp qu cuwjuw dyrr cann byy qaux, juiw byy lrauu, longxx byy kantuax :ar.

"Liw qamxx u sigsai vnuax cur :ee?" Duarjyhzit diongdaur, Kexjongx denrue kar laii beh tyw qiuwvingx. 

"Hitt vingg si tywvangg. Guaw hitt jxox ixdyh kiongxqniax byy der kngr. Beh anwjnuaw si hyw?" Jarhngx jaxkiw, Miaurdinx jiacc jingsinn iauxx bue sew ciuxbin, Kexjongx denrue dyrr longr .laii.

"Guaw kiamr jit xee dycqui. Liw ing'amr u ingg bor? Qamxx erdangr qapp guaw kir qingw?" Qimjaw jit tongx, bec'amr aw iurqycc jit tongx, diamw gua jxingx au, Kexjongx sraiw ciax laii qra Miaurdinx jair lecc jauw.

Miaurdinx jitt dxoo sngr si hogburgiap laii qongw, marr m si quwjai langkeh ceqiyr. Sniu' taiwqyr :ee, qra tesuu-iaxqor qongxx m vingrr be sitlew. Jingrr qaur dnaxx, Kexjongx jit kaix kauw, Miaurdinx iaxx m bad qra iyy tauu, dagg hxang dy' ingwhur ix qaxx qaur. Jitt hy kuanw tairgu m si kyxdingkyw, si dandanx Kexjongx jiacc u :ee.

"Der .Sensnix ee anr qniaa qaur dyhh ar?" Lerhue kuix suah, qingliw uaw laii quansimx.

"U qapp ix decc ciauu zidjiw beh qaux syxsii :ar." Miaurdinx qig ciyr ciyr, ciywsinn lairbin amwjni qauqnaa aiciuu.

Kunr hro nguar nguar, qui' senx langg qig hro snruar snurar. Muixx qangx lorsix sryw qaxx ann dongwdongr, tingwhau qaxx nng lexvair jiacc jit qangx ee hiyckunwzit, lorsix vangr kacc ling lehh ingwqaizenn. Qinaxzit diyc qaur Miaurdinx lunhiux, cid diamw quer, naurjingx-aw dyrr giangx giangx hauw.

"Liw nacc jiacc jaw dyrr kiw .laii? Liw m si benw kir siongrvanx?"

"U ving'iuw ejaiw beh vnuax kir Daidiongx. Guaw rair kir qra dauwkaciuw."

Byy sngr vehvad'ue, luerdiongx u koxjingg byy duiww a'buw qongw marr si sursit. Miaurdinx simsinn be dnia, cud duarmngg ee sii dahtam, hiamw jit hiamw vuahdyw. Vnuar diamxjingx quw au laii qaur jap-id lxauu ee mini aparto, cuwqingx kangx longlongx. Dua qnia hingliw qapp qesix-jabbut, jarhngx ixjingg dyrr jair jauw :ar, Miaurdinx si qamwqangx. Vangqingx ee bincngg-dingw vunxjniaa u jit niaw cngqinx qapp huetanw, jinw marr longxx siux qaxx kangx ~ ~, qanda' cunx ciuw qnrua hingliw jit qnia qapp jit senx langg cringx cringx.

"Guaw e kar denrue hro :liw." Snia'imx qe qe, Kexjongx bagjiux huanw lyy.

"Liw benw huanlyw. Narr u hyw siausid, guaw e sui' qra liw qongw." Miaurdinx qinw qra quaww vyxjingr.

"Cur ee dairjir, guaw jit diamw aw dy' byy huanlyw. Hro guaw quawhuann :ee si lingrgua jit hxang."

Miaurdinx bagtauu qad qad. Kexjongx dac jinwjingg jit vo, iong qorr hingdong qaixsueh.

Nng pnir cuiwdunn vongdudqanx dar .lyc .laii, Miaurdinx qamxsiu diyc javolangg ee siylyx, damlunr qapp ladcauw. Naxx cincniu decc binbang, Miaurdinx bagjiux kreh sensenn, vangr quwjai ix bruw. Byy sriu diyc najac, javolangg bersux jiac diyc hyxdnaxiyc-aw, sunrser qra siyxjiaxlangg cic lyc bincngg .kir. Miaurdinx diyc cneqniax, qingtauu tec tec, siauxtew jiksii banw ann. Dikkag u diwqag diyc ix ee uiwhniah, Kexjongx dirr ix hnirkangx-vnix iong dnix genn bit giw qra decqniax.

Javolangg gauu qig suwliok, sraiw ee vorsor urcaixqangx. Miaurdinx qui' sinkux venr qaxx nngw terte runx dirr bincngg-dingw. Byy cngqinx, qanda' u kusion. Binn binn aw, Miaurdinx pow pow aw pnri diyc jaboxlangg siampoo ee pangbi, jit xee taujangx lauu qaur buexdangqud ee siyxjiaw liamdongsii dirr taukag-lai nicsnih. Iong jin lingbuxlat, Miaurdinx qra Kexjongx sag .kuix, qinw kax qinw ciuw vreh kiw srinx.

"Liw dyrr beh kir Daidiongx :ar. Lanw anxnex si decc value sniaw?" Taukag damr damr, Miaurdinx trow duarkuir.

"Dnaxx Daivag qaur Daidiongx iarr byy zuarr je lixtingg a!" Kexjongx qongw. "Guaw vaiwgo-amr kiw .laii, lexvair-amr dngw .kir, sraiw ciax kiwdyr marr jiacc snax diamw gua jxingx."

"Liw laii Daivag beh druar dyhh? Luxsia? Anxnex nacc u tongx?"

"Jitt qingx lanw banrcniaw si cuxliw, suacc berhiangw?"

Miaurdinx giac tauu knuar Kexjongx, iyhsniu bagjiux-jingg ee javolangg decc hnuarsngr sniaxhuer. Jit qingx cur quir somsomx, vaiwid qaur vaiwgo vangr kangx qingx, vaiwlak lexvair jiacc laii junw hotelu. Miaurdinx si bre cur :ee, jitt jiongw sngwvnuaa anwjnuaw diak dy' be duiwvnuaa, qniaa beh taixdyw e quxdngg?

Jit qnrua syxsii snax tauu nng qix aw gianggiangx qaux druar Miaurdinx ee ciuxtauu. Miaurdinx tec diyc suacc si cxenx qxinx bxan dang. Bagjiux qimx qimx knuar ciax sraiw jauw, kaciuw nngxsngx, Miaurdinx ee sinhunn kir jidvnuar.

(CID)

Knuar diyc Miaurdinx cua langkeh qaur, id lxauu lobbi ee qingxui-aw suisii dimr tauu pah jiyhox, bin-aw ciyr bibix. Tauu vaiw laii beh jre liulongg kiw .kir, longxx diyhh ciammiaa uerhy qycc ho'ngg duir jit xe aw ID. Snax qywguec jingg co' crur dahkaqaur, Miaurdinx diyrr si jiauww quiqiw laii. Snax qywguec au, ix cutzip j.-jurjai-j, bersux jiax ee jurho.

Qar ngiuhenkimm ee siauwlenn sensnix beh jiyx hagsingx.  Kectniax u qraur kuah, tangx kngr ix hitt daii YAMAHA enxjaur-hxingg ee sengiukimm. Jit qingx vangg, dnuasinx siyxjiaxlangg laii druar duxduxx hyw. Beh quad .lyc jinwjingg sniu beh qycc laii knuar jit vaiw.

"Qautongx u sunrven. Duarser qingx duxaxhyw. Viacdow u qraur qau, be kir syziauw diyc cuwvnix, jitt diamw, siongrr hac guaw ee ir." Siauwlenn jabow sensnix qongw diyc ue kinx sniax ser sueh, kyxviw gag'imx hiacc hyw tniax. 

Miaurdinx sangr ix lyc .kir, qycc dngw .laii ee sii, cuwqingx qui'ee hibii .kiw .laii.

"Jinjniar beh bre :ar." Miaurdinw tror duarsimkuir, sam sam kir qaur vangqingx. Sianglangg dua bincngg, sinx cuwjuw byy qacbak, binaxjair diyh'air qiyr langg' laii vnuax jauw. Dirr bincngg-qnii jre tanxkix jujux sniu, Miaurdinx zusuwbang lenlenn bongr .cud .laii.

"Hitt dangjun narr qapp ix dyw .lyc, m jaix e venr anwjnuaw?"

Byy dap'anr.

"Jitt dingw bincngg taubuew u zuarr je jaoxlangg dirr jiax kunr .quer?"

Qangrkuanw byy dap'anr.

Dyrr beh qaux cur :ar. Miaurdinx liongrsiongw qinaxzit qnaxx si siongrr suacbuew vaiw laii jiax, qycc kir, syxsii diyh'air qui' qnrua qaux .cud .kir.

"Suex qaxx giaa qiy! Kir hro tauqex quaiw .kir! Sniaxmih decc huathiongr qex snax snxiaa, dangsi'aw dyrr si kangkuer qex dingvue. Dagg amr dy' bruw qaxx snax qnxix byy vnuawmii jiacc dngw .kir. Jitt lexvair sidjai taiww byingg lehh. Au lexvair guaw jiacc kir Daivag cue :liw."

Vnuax kir Daidiongx beh qui' qywguec ar, Kexjongx denrue jongw :a qiong :a laii jit tongx. Denrue-diongx soxx qongw kiw :ee, bylun "jitt lexvair" iacc "au lexvair", Kexjongx longxx byy laii.

"U jit xee qar piano ee siyxjiaw knuar qac'ir liw ee cur. Vaiwlak liw kiw laii Daivag .jit .jua, hyxser bor?" Gelangg Miaurdinx jarhngx kar denrue qapp guann cuwjuw lenlok. 

Kexjongx jit sniax dyrr rinr hyw. Denrue siusnuar, Miaurdinx gang gang, simx bangg bangg. Hnuahiw decbeh qnir diyc ix, suacc iarr huanlyw dyrr beh qnir diyc ix. Jaiww qniwbin hitt qangx qaix cing sniaw kuanw snxax? Dew qunn, kowtuixkor iacc ngiuhogjongx? Aisaju diyhh iong sniaxmih jiongw ee uersueh? Ving'iuxjingg :ee iacc kecjingg? Siongrqaiww suxx langg jauhuann :ee, dorberzi ciamx dnia, qauwsiqaur, e ioksog dycc jit zit jaiww sionghue, iacc si saionara id kir vutjair huee?

Terse terse qniaa cud qong'uw duarlauu, tnidingw decc punr hoaxmngx, hormuax iarr diyhh muax lehh kacc be kir qnuaa .diyc. Anjuanby bylun duarser hanr iacc javox jabow, dag'ee longxx diyhh dir, kuanxsig dyrr jairr langg qac'ir, byy jiwjair. Qniax hongsuax, iarr qniax pak qaxx ox mawmar, Miaurdinx ee si qui' dingw :ee, liamrr bin dy' kamr qaxx bat ~ ~. Angdingx dongwdiam, cnidingx kixqniaa, qui' jua lo byy sniaw ciax. Miaurdinx dirr jit xee jabzirlortauu danw cnidingx, dywciuxvingg jit daii jurqa'iong :ee binrsik ~. Siongr jit xee jinx, jre dirr qawsuxjy :ee jniawjniar si Miaurdinx s.-suliam-l. ee langg. Javolangg m si pacdnuavuex, vnix:a jre jit xee suiw jaboxqnuax, iaxx hagsingx kuanw.

"Qycc qra guaw qongw sittauu je, mezit byy ingg kangkuer. Venxsenx-aw!"

Cnidingx jiapter angdingx, ngdingx tiauwkamw. Sir lenw :ee jit sniax puc .cud .kir. Nng lenw :ee sentenx kacc suser, hnua ciatauu :ee qycc sinn sinn. Kixjauw qacc sux sux .kir, kacc ziog dy' ziog be diyc lor.

Jitt kauw kuir tunx be lyc .kir, Miaurdinx quatding beh hro ix pnaiw knuar bin.

"Liw qinaxzit qamxx u siongrvanx?"

"U a. Liw tacc decc mng?"

"Guaw duxjiah kar denrue kir linw qongsix. Linw dongsu qongw liw cingxqar."

"Guaw u cesu, tauqex pair guaw cutcex, inx m jaix. Liw cue guaw u dairjir?"

"Guaw..."

Liamdongsii, Miaurdinx sixcuir, beh qa'ngg jabun :ee suacc ho'ngg mng dyw .kir. Cinwcaiw cue jit xee jiawsuu, denrue qinw qinw siusnuar.

"Guaw si decc congr sniaw? Beh liahqauu, marr byy diyc qaur guaw."

Dngw jit xe uad laii sniu, sitlyc ee simjniaa qejiyw u cue diyc qiuwsiok. Duiww bin cuex .laii ee hongx u juriuu ee kiwbi. Miaurdinx jitt diap iaxx lramw sinmia. Juriuu ee kongkir jairr ix decc pnri si dair kow bi :ee.

(VEH)

"Dangw Siyxjiaw, iauxx e qir did guaw bor?"

Mngg kuix .kuix, laii jiarr m si snehunrlangg, Miaurdinx gonggniac, hionghiongg qiyr be cud miaa. Siyxjiaxlangg samvanw iyy an' Miaurdinx ee binrtaujingg qniaa .quer. Jit jun siampoo ee bi jiokk sigsai, Miaurdinx jiksii huehunn, ingxjun ee qiwdii jyr jit xe draux uaw .laii.

"Kexjongx jitt jam aw taiww byy ingg lehh, vangr qxuann hro guaw laii qapp linw pah kewiog."

Qongw suah, siyxjiaw an' LV puevaux tec jit dniux zirjuaw cud laii jyr jingwqnir. Miaurdinx qra ganw .jit .xe, u singg Kexjongx ee vitjig dyrr driyc.

"Liw u ix ee denrue, tangx kar denrue qra mng knuar mai." Siyxjiaxlangg sngr lau qang'oo, jit xe dyrr jaix taudang. 

Qamxx diyhh kar? Qamxx mrbenw kar? Miaurdinx simtauu liac be dnia, cauwkaw denrlingg-sniax dirr jitt sijun decc qiyr. Sinx cuwjuw laii beh ciamiog qaux dnia.

Jid'err knuar diyc langg laii, pangx qongwqongr siyxjiaw qnuaw derr id kir qapp langg' dunr ciuw, longxx benw lyhuann Miaurdinx siaurqair. Cue byy siqix cud uersueh, Miaurdinx diam diam kia dirr vnix .tauu, bersux jit xee jaboxqanw.

"Vangqingx e saijiywzit, rair anx lingxkir. Lordaii e puah ho, beh nee snxax diyhh kamr hisasi." Uanxzenn luxjuxlangg ee qewser, pangx qongwqongr siyxjiaw sui' hxang aw dinglingg.

"Qu :ee hitt dingw bincngg jiokk pnaiw kunr. Kunr jit xe kacc quw, iyjiacqud e sngtniar. Guaw si uahqanjingr. Qajair liw u ngua vadd dingw." Pangx qongwqongr siyxjiaw nauxtauu-junram, nih bak qiamx nar jic qew qoxjuix. 

Piano laursux hnowhenn ee bagsinn hiongr duiww cur-lai lingrgua jit xee jaboxlangg. Jid'err qakcad .diyc, Miaurdinx qinw qinw qra tauu uat duiww vnix:a kir.

D.-dangsaix-s. dairlixkair qaudair qaxx jit xee kamxjam. Nng vunw u dngr kamwhap ee hab'ioksux ven ven, jit dniux ciuxhingg henr henr. Qnir jnii be duarvan, Miaurdinx sinqingsnuar liammisii banw ann.

"Guaw qapp Der .Sensnix jiokk sigsai laii qongw, liw jipiyr iarr diyhh uersnuar, lyhmiaa Der Kexjongx qimr-vue. Hro liw kacc lyhsimx, marr benw did Dangw Siyxjiaw giab dirr diongngx decc pnaiw jywlangg." Pangx qongwqongr siyxjiaw sik liuwliur, snax~nng qxur ue vaixvuah hyxser. Miaurdinx quer xeh.

Snax tauu zi bin ciamx zri qaiwhy, sinx cuwjuw qinaxzit dyrr beh vnuax sinx qaqu zip cuwqingx. Miaurdinx qapp pangx qongwqongr siyxjiaw dangjee qapp siauwlenn laursux vaiwsii. Aurciuw, dairsux ee kangkuer jiamr kacc je. Tingwhau jnii-buew zip siauwho, sinx-qu cuwjuw dyrr cavutdyx kanke nai ar.

"Hiangwdongsii guanw laurbuw dirr Hiongqangw puawvni ciuxsut rair ing jnii. Diyhqib qaur der, jiacc kir uiter hitt dniux ciuxhingg singx lruiw laii qiuwqib. Guaw qra Kexjongx qongw e dauc dauc aw tnuahingg. Ix u guan'iu .guaw, rair guaw dngw kir ix sinkuvnix, jnihang ee dairjir benw qycc tee kiw."

Dirr liulongg lairdew, pangx qongwqongr siyxjiaw jyr jit kunr qaudair suah. M jaix si pangjuiw hniahniax, iacc liulongg ee kongkir sniu' hix, jidsidig, Miaurdinx hingkamw jat jat, hiamw hiamw be cuanxkuir.

Iarr byy siy' danw, liulongg ee mngg kuix .kuix, pangx qongwqongr siyxjiaw jueww ix kir duarlorvnix jac qewdingg :ee, jit qxur jaiwhue ee ue dy' vandnua duiww Miaurdinx qongw.

"Javolangg jniasit longxx duer hormon decc qniaa dyrr driyc. Ho'ngg dog jit vaiw qycc be qar quaix! Siyxjiaxlangg cinwcaiw qra naix .jit .xe, sui' qycc hinn junn bangg sucsuh :ar."

Trow jit xe daursimkuir jiokk yclyc, qaur jiax, Miaurdinx duiww Kexjongx siawsimx lyhdew. Dingw zit aw hitt xee memex narr junw si gorhue, jitt xee dyrr dysiamw be quer, Miaurdinx byy jaidiau qycc jurgnow qaixsueh.

"Ziog jabow, javolangg kavo qnuaw huwhur. Lanw jitt dah m si jiongdiamw, si hro ix hiycjam :ee narnia."

Liauxgno ee simx, cringx cringx, lingw lingw, siyxkuaw e gingg marr jit diab quw aw nia.

"Lanw jiycmng .jit .xe. Dirr ngikuann hitt kouii-aw, linw u jit qingx qakqingcur ee venrdiamr beh suer langg', qamxx si?"

Qu qowkeh jingg kax jiacc jauw, singliw jiyh ciuxqix-aw syy laii qaur.

"Iarr si kangkuer-lo kacc unw qniaa."

Autobaik huatdong, Miaurdinx simtauu qex jiokk hairjai.

(QAUW)

Hixpaur-sniax vidvitvogvok. Viah-tauu :ee jiacc dnia, hang-buew :ee sui' suawjiab. Tongsux siaw qongxx qinaxzit hyw zit, diongdaur ixjingg, zip cur iacc qewcua longxx si sii. Tniqongveh :a marr jin' dauwsiongvangx. Jarhng'amr ho iaxx decc dih, qecdngw jaxkiw, zidtauu ciyr hihix.

Snax-janr-kiw ee tauwtnix qo' der cur, zi lxauu ee juxlangvangg diyhh singx jyrjog. Cunx :ee, langkecvangg qapp suvangg, lingrzit aw jiacc knuax knuax aw laii byy qnuaxqinw.

Duu-aw dingr siw :ee. Bincngg qapp qniawdaii qui' jxox, si kir sewbogdiamr qingw :ee. Pongwiw qapp jiahvngrdyh byy qang soxjai hag :ee, dngdew aw sangr qauwui. Tnrix quaw qesix, u qex quaw zinqecur ee kiwbi. Imhiongw qapp denrsi narr suar cai dinwden, u ngiaw u sniax, cniur :ee viw qongw :ee kacc hyw tniax.

"Liw cutmiaa :ar! Denrsi sinbunn dngdecc vyr liw."

Tniax diyc Miaurdinx huah sniax, ciuxtauu ee kangkuer vangr lehh, Kexjongx sui' vniar .laii.

Duiliac beh uaw vnuar dxangx, lauw-penr-sed jibtuann cadtauu jangx .diyc lor!

Hiongqangw jaboxlangg qui' din tauhok laii Daiuann setsenx iuxsniaa javolangg. Jniginn venw quer ciuw, sui' liusuanx dngw Hiongqangw. Juann Daiuann iu' lamm qaur vag tongxqiong u jnia' vah xee javolangg sriu quaiw pywjaii, siauwgiac qangxx ig. Jitt vxenr erdangr sunrsi cue diyc cadkud, qingxhongx qamxsia cirbinn Der .Sensnix zedsimx teqiongx snuawsyh.

qiwjiaw: Inx jit pxangg langg qeww longxx PRO :ee. Liw dancniux-pitbew, jnuaxngiu qapp inx dauwsenhuad?

Der: Guaw tiauqangx dner dengong. Inx taukag-lai juann sniu tamx byy dihongg, guaw dyrr sunrser kanx qux lyc lamr.

qiwjiaw: Tniax qongxx liw cuir jiokk bat, dongqisii lenrr jaboxving'iuw dy' byy singx qongw hro jaix. Qamxx urngiaw?

Der: Inx hiaxee pnaixdoo hiongg qaiwqair. Narr qra qongw, si hro ix qex cauhuann :ee u nia.

qiwjiaw: Der .Sensnix m na u taukag, marr jiokk u tniawsimx.

Der: Qenwsiaur qenwsiaur. Guaw si ho'ngg qar quaix :ee.

Ixsiong sinbunn si qiwjiaw dirr Daidiongx ee caixhongw vywdy.

Lingx lingx lingxxx...

Jit diauu sinbunn cimxx jiacc knuar suah, u langg decc qiywmngg. Denrlingg lyc jyhzit jiacc anjngx :ee, iaxx byy langkeh cic .quer. Cnix dnia byy vec, snia'imx vorvinn hiangw kiw, Miaurdinx qapp Kexjongx longxx cauwcniqniax.

"Der Kexjongx Sensnix ee vauqyw. Cniaw dirr jiax ciamx miaa." Sangr kuaiwdiw :ee cing jewhok dir by-aw, itvid-itdiongr. Kexjongx qra vauqyw jrih quer ciuw. Miaurdinx sui' mng qongxx si'angw qiar :ee.

"Gunw tauqex."

"Ix qiar sniaxmih beh hro :liw?"

"M jaix lehh. Lanw tauw kiw laii knuar mai."

Nng langg sir qix ciuw qra vaujongjuaw tiah kuix. Lairdew u jit xee vecqag jyrjingx qapp jit dniux kacpnir.

Qionghiw liw zip sinx cur. Ser hxang mic m jniaa qingwir. Qamxsia liw dingw vxangx duiww siauxluw ee janwjo.

"Linw tauqex hiacc qau lexsor. Liw kir vaiwtog linw dongcongx :ee tnrix quaw hunsor hro inx jaboxqniaw tangx tak cut'yc, jitt jann, ix m si u qra liw dapsia .quer .ar?" Miaurdinx qongw.

"Jex tacc u sniaw?" Kexjongx duiwcuir rinr. "Ix jin tniar dy' jitt xee vyxvuer jaboxqniaw. U langg knuar diyc guaw ciax-dingw jair jit xee jap-cid~veh huer :ee, diyrr qiycsirr guaw decc qa'ngg pna, hex jiacc si hihanw."

Miaurdinx jin' jaix Kexjongx decc qongw liangkiangx, quat'ir beh qra snuai dywdngw. "Qokk langg sinwiong diyh'air qor hro hyw. U langg ingxquer dyrr si jiokk byy qingw jiac."

"Guaw jitmaw qex jiokk pnaiw cuiwdauw. M na diyhh hyw-bi-hyw-sor, ing'iongw qapp uersingx longxx qor u diyc, cuir jiacc u kuix."

Kexjongx pachab qongw latenx. Miaurdinx bih cuir taux ciyr. Ciuxqix-aw u denrue laii, dairsux beh dnic horkauxcauvunw vran quewho.

"Liw surgiap suaw laii Daidiongx huatdenw, kecho miapo, guaw cniuw diyc tauu hniux." Kexjongx iurqycc decc qikgorkangx.

"Cniuw e diyc sngr liw hokkir." Miaurdinx sraiw dywtauu tuii.

"Jitt dongr dagg hxang dy' hyw, dogdok jauwkax u kacc ser qingx .damrvyc."

"Erhiauw sew bin benw je juiw. Qycjaiww qongw, dix-aw qacc taii :ar, beh qycc ciauu qewsiaur dyrr pnaiw sewbin lor."

"Guaw vutcab. Liw jyr gelangg rair dairvuee."

Ue jiacc qongw suah, Kexjongx jit xe ciuw qra Miaurdinx giuw laii hxingx-jingg. Miaurdinx jitt sii liauxqaiw ix ee iwdoo, beh jauxbih be hur ci lor. Cimx jxingg ee cuiwdunn jidlo qongjiamr. Cangr dirr lairdew ho'ngg jimx be diyc :ee, Miaurdinx ee simlairir amr amr aw et vec qii.