angg ho lyc dirr cingsanlo

Tauu Jam

1

Kinx kax qniaa ee jaboxqnuax

taukag lee lee

ix si kex-vnix ee liuxhiyc

be kramx did jit jun ee hongx cuex

Amrniaw qapp amrqunw ee qaudnii

jit pxenr naxx seh

sna’axkimx ee luerdiongx

cangr u zuarr je ee viwbit dilehh

Iarr byy guaw ee inxjunw, zi-hniax qaqi duarjuxir, qra guaw ee jit siuw six tec kir camqax haghau ee qokgixbunn ciwhap. Byy vanrpuex, u diyhdingw, u niaw diyc jit dniux sniuxjng qapp jit qix banrlenvid jyr sniuxpinw. Qui’ qingx haghau, dna' guaw jit xee Daiuann ginxaw u diyc. A’vaa qra cur nirr duarser hanr longxx qiyr qiyr .laii, dirr tniatauu qra guaw ee six liam qaxx dua ~ sniax.

“Dnaxx siaw qaxx hex simxmih nguaxqyx six? Linw ve tniax longxx byy.”

A’qongx kapang kuix kuix, dyr kax dac de, jniar kax qiux kiw laii ixliauu-dingw. Ix Cingqog sidai cutsir :ee, nng jua bagbaii dngg liuwsiur, naxx cingciux, jit qix taujangbuew an’ siauwlenn lauu qaur jinw. Ix kajiacpniax u pnai jit liap qux, jiokk u aukongr. Tong’ jngx-aw-lai, byy langg m bad ix jitt senx laurqong’aw-pxiaux.

“A’qongx, hex si decc siaw inx Zidvunw qoniuu cing kimono qnialo ee textair lar. Guaw yc hro liw knuar, u singg liuxqix decc dinxdang bor?”

Zi-hniax qnialo kax uad zip, dirr jingwlangg taujingg decc vixser.

“Mair dirr hiax decc vutdenx-vutqair,” a’qongx huacsniax qra dongr, pnaiw cuir lagdauw. “Simxmih decc liuxhiyc lor? Narr guaw decc knuar, si naxjunxx acbi’aw. Qongw qaxx hiaxee Zidvunxvyy-aw, exaxdangquex, baiw qycc qau saiw, byy qaxx jit xee e hauwqox .did.”

“Langg’ jex dyrr hy juer bunhak,” a’vaa sui' vog dywdngw. “Henrhen dyrr baiw jijix, siaw qaxx hro liw liaurqiyr si Sesix, jex mrjiacc qongxx u jaijingg.”

“Siaw siaw hex beh siw! Si erdangr qra zriok zriok lehh junw vng tunx niih? Iauxx si sngwvnuaa qinw kir yc tag kacc sit lar!” a’qongx qycc qongw.

“Tanx byngiaw. Liw jueww liw siaw, jueww liw tak. Tosang hro liw kyr.”

A’vaa cuir uaw dirr guaw hnirkangx-vnix taux taux aw qongw hro guaw jaix.

Bec’amr aw, a’buw vngrcair cuann hyxser, dyrr huah javox :ee singx laii jiac. Jit der jiahvngrdyh jre nng xee duarlangg, snax xee ginxaw, xui iauxx langx langx, be ehkeh.

“Vyxjniar jarhngx u laii, decc mng knuar lanw u beh qaiw sner bor.”

Vng naxx decc jiac, a’vaa vorvinn kanx jitt xee uertauu .cud .laii.

“Qaiw sner! Danw linw ve snax cunr kuir dng jiacc qongw.”

A’qongx qongw, m si sniasaur. Ix duxjiah had jit sniax, u quiw liap aw vngrliap an’ ix cuiwkixpang punr .cud .laii lag dirr dyh-dingw. Ix sui’ liap aw qra kiyh .kiw .laii, qinw qycc kngr zip kir cuir nirr vro.

“Lanw hokkir u cringw diyc vaii, u juanbe ee singliw decc vauvak. Sner narr byy qaiw, a’Vunw :a dycc jit qangx kiw baiw mox, uat tauu jitt kangx byy beh hro lanw juanw, hex dyrr hai liuxliur lor!” a'vaa qongw, bin iux qatqad.

“Byy air dyrr tair. Jiax ee langg jaw dyrr be genr jyr :ar," a'qongw qongw, dah iw dah dyh. "Qamxx jinjniar diyhh jiacc suesiauu? Lanw qra draur tanwjnii, qycc diyhh hro inx sraiw sikjuiw!” 

A’qongx huexhusingr qycc qniurpiah. A’vaa knuar jitt xee vanrser, dyrr amr amr aw decc qra dua-hniax sud bak, hiur cuir. A’qongx siongrr tniar ix jitt xee duarhanwsunx, jex guanw dag’ee longxx marr jaix.

“Lanw daux ee sner vunxdew dyrr luan circa, snax hniadi jiac snax xee sner. Jitmaw u jitt xee lauvaiw jin' cuicenx, hortaumiaa lanw dyrr qui’ qekauw-aw longxx qra qaiw jyr qangg sner. Anxnix byy jnia’ uanbuanw?” 

Dua-hniax uahganw gauu knuar samsig, jin’ jaix a’vaa ee kindang. Ix sun a’vaa ee ir, dyrr anxnix kuitiah hro a’qongx tniax.

“Genn kiw jin’ driyc!” a’vaa sun dua-hniax ee uerbuew qongw. “Inx snax hniadi-aw ee miaa, guaw marr longxx hy hyxser :ar. Junwhiongg, aurvaiw lanw dyrr qiyr ix juer Toshio; Buxhiongg, dyrr qaiw juer Takeo; a’Jingr :a, snesingg dyrr qiyr Masao, ham’ inx guandew ee miaa duxhyw longxx ba ~ ~.”

“Tosang, acc sner lehh? Beh qaiw jnuaxngiu?” zi-hniax mng.

“Tanaka, dirr Zidvunw marr dua sner. Linw knuar sniaw kuanw?” a'vaa mng jingwlangg.

“Beh sner sniaw, iauxx byy diyc qaur linw juxir!” a’qongx sraiw ausniax decc ziangw. Dag’ee qniax kabkap, tauu lee lee, duarkuir m qnaw cuanw jit xe.

“Qamxx byy beh mng a’jow knuar mai?” quer .u .jit .quw .aw, dua-hniax tetauu qycjaiww qongw kiw.

Guanw a’jow jiac dngg huewsiu, qinnii veh-jap-sir. Jurr guaw cursir qaur dnaxx, iauxx m bad knuar ix puawvne .quer. Ix ee angsair snax-jap tongw huer diyc diyc Malalia, jurr anxnix jyr sinn .kir, vangr a’jow qo’ jit xee damniaw jit qrex, quii quii qnrua qnrua qra snax xee jaboxqniaw cniaa dua.

Qoxjaw, javox :ee siqniaa hro jabow :ee hitt vingg daux ee langg jiyx. Dirr guanw daux, a’vaa hro a’buw jiyx, a’qongx hro a’maw jiyx, qaxnaxx guanw javojow iarr si hro guanw a’jow jiyx :ee. Javox :ee ho’ngg jiyx zip mngg, cuxkir jiac-kunr unw, benw qycc jyr lyhanwkax-aw siwquer puqux. A’vaa qapp a’buw ee jitt qnia cinjniaa, dirr guancox, a'buw jitt vingg dyrr u prinw qongxx beh tiux dibyxsuer, taujniu’aw diyhh sner Dne tangx trngg a’qongx ee sner, derr zi xee duer a’maw sner Jiux. Narr u qycc cud dxingx, dyrr tangx sner Kux, jiac a’vaa ee sner. Acc a’jow lehh? Ix kia simxmih miaa, jre simxmih sner, qaiwsingg m bad tniax langg' decc qiyr ix ee miaa .quer. A’maw byy dilehh :ar. Acc a’qongx lehh? Narr mng ix, m jaix mng u .byy?

“Linw a’jow huanx-aw huanx qicqa, ix jai’ngiaw jit kox qen!”

A’qongx qongw suah, nguaw qycjaiww pangg kiw laii dua cuir vex. Guaw uat tauu knuar a’jow. Ix jre dirr viacvnix decc danw jiahvng. A’jow ee bin liab qnaixqnaiw, mauccuir, nng vingg ee cuiwpuew moh moh, an’ siangvingg ee hiahqag qaur cuiwerhuaii u nng jua suat'osig ee ciaczi. Huan’axlangg qongw huan’axue, qui’ qekauw-aw taucuir jap tongw xee, dyrr dna’ a’maw qapp ix u gengiw tongx. A’qongx poxmec aw tniax u, mrqycc ix hiamm ic'uad, jin’ byy air qapp a’jow siy’ qaucab. A’maw ongxnii qruix senx, dagg snax dxngr, a’buw cuann hro a’jow jiac longxx qorr viw :ee.

A’jow cimx bag'ux, bagjiuzinn qngx sicsih, bersux iur ngex :a. M jaix anwjnuaxngiu diyc, ix jitt jun bagqnii damlunr aw damlunr, bagjiux ng ng. A’jow berhiauw qongw guanw ee ue. Acc guanw qongw :ee, qniwjinx ix jit qxur dy’ tniax byy?

“Nisang, liw u lauu jit der aw jaubah hro guaw bor?”

Javox :ee jiacc jiac suah, ser hanr siyxmue sui’ vniar laii decc mng qinw qinw.

“U lar. Jai’ngiaw liw iaulyy air congg.”

Siyxmue ciyr gix gix. Inx jabow :ee duer a’buw sner, inx longxx sner Kow.

2

A’vaa tauwjaw dyrr cutmngg kir qaur gua votauu siux jox. Dairjir vran liauw qinxkuair, ix amwtauu aw dngw .laii, dyrr hro guanw snax hniadi jit langg go sxenw jnii brew damrsamw. Guanw snax xee jinwjingg iarr byy qongw tongtyr, jiac amr vaw, jing’au kax longxx jongg duiww dua biy hiax kir.

Qinnii, diyc qaur guanw jngtauu jyr jxiyr. Dirr biy-jingg ee kangquanwde, dagg qangx longxx u jyr duarhir decc ho’ngg knuar. Guaw vniar qauwui ee sii, hiwdaii-dingw dngdecc vanrsenx, cimm-aw cnar cnar qiyr, lyqow cniccnar hauw, laurzet qunxqunw.

Kacc jaw bad u jit jam, guaw jiokk hingr beh yc vunn cuex. Qniwnarr u qua’axhiwvanx-aw laii, tingkyr liauxau, guaw dyrr e syy kir hiax knuar langg' anwjnuaw decc vunn. U jit vaiw, guaw knuar qaxx zib'ir be qir did siqanx. Guanw a’vaa vniar kir hiax cue :guaw, duiww guaw ee am’axniaw lringg lehh, dirr jingwlangg ee binrtaujingg aclah guaw dngw .kir. Hitt amr guaw bah cuah, hro langg' ing cuee-aw diap qaxx tiamw tiamw. Guaw byy kaur. Dendyww si guanw a’vaa, ix jidbin sud jidbin me, bagsaiw siwlamsuii. Ix qongw vunn hex dadix be cuttuad, qycc qongw guaw si gnoxgigzii, beh jaix, cutsir dyrr hyw qra guaw zuee zuee .siw.

Hiwvnii-kax ox kamkamm, langg cah ~ ~. Duer hiwvanx bre mihjiac :ee iarr qa'iac qaxx. Guaw neh kabuew qimqimx siongr. Dua-hniax qapp zi-hniax m jaix jauw dycc kir? Dyrr u langg qra guaw vyr qongxx inx jaw jaw dyrr laii :ar.

Hiwdaii-dingw decc jyr Qamx Qokvyw quer Daiuann ee hiwcud. Qamx Qokvyw iauxx bue snax-jap iauxx bue zxic-go, kaix-vruac-jiac-tid yc qaxx dagg hxang e. Sux qxiauw, lakde-aw dngrr jnisenx. Jnii byy langg nngxsyy, binrpuee dner qau qau kir qra viauw :ee jiyh. Viauxsiyxmue knuar ix jin’ byy diyc, tranr qihue qra lingxziok jit dniuu. Qamx Qokvyw hro gik .diyc, puesiw quer Ox Juixqaux laii Daiuann qriuu huatdenw. Hitt sii Daiuann dertauu byy vingjing, Dngsnuakeh ham’ jairderhuanx uirdiyhh derdniuu qapp qaiwjiw, vutsii dyrr decc siy' ruanx siy’ taii. Qamx Qokvyw langg vutjiw jijngr, cuiwhuex qycc lrai, jin' hyw kauxjuiw. Vnevohuanx gong gong m bad how, vanrpuex ix si hyw langg, qycc qra jaboxqniaw sangr hro ix juer kanciuw. Qamx Qokvyw jiac nguaw-lai sew nguaw-gua, dac diyc hyw dervo virr hrongx jyr cenjongw, niaw cenqunx zip huanqair. Vnevox-aw siw :ee siw, dyy :ee dyy, qui’ee huansia ho’ngg taii qaxx cunwcauw-vutliuu. Jongxiaa dua dua kywsniuw. Qamx Qokvyw jiokk iang, dik'ir iongiongg huedngw hniuliw.

Jitt cud qaur jiax suah hxir. Suar .lyc, beh vnuax Qaujetenx. Jit quaw giahqiqun'aw dairsingx cud laii decc palinwdauw, pax zuxx je linr, erkax ee pog’aw dyrr zuxx dua sniax.

Sunjavow vyrqizenn laii decc sunsi. Inx jyr hxir :ee kaciuw jnia’ mew, kacc byy go biyxjingx, sui’ u jit pxangg langg jauw cud laii ngua vnuax sinqiok. Jitt cud :ee guaw kacc byy lo, qycc kia quw kaqud marr e sngx, xui niu hro vadd langg, siwqer laii laux laux lehh kacc si.

Dua-hniax qapp jit xee jrngx qoxjongx ee siyw niuu-aw dirr aurdniuu :ee hiax decc jywquir hro guaw knuar .diyc. Inx ciuw nirr sui’ langg u jit quanr namune. Guaw sui’ jai’ngiaw qongxx dua-hniax hitt go sxenw jnii liongrvid longxx pah pah .siw .ar. Dnaxx ix dyrr siongrr gauu qig aqysiar.

“Liw m dyrr qiyr linw hiwjuw hro liw hiyh .jit~.nng .qangx .aw. Dagg qangx anxnix decc caux, sintew si e pacpaiw!”

“Bersaih .did .lar. Byy jyr dyrr byy tangx jiac a!”

Qoniuu-aw suec'ue qiaux dicdih. Dua-hniax qapp ix decc paclaur cuir-aw gix gix. Guaw dac uaw .kir knuar kacc jinx lehh, dangsi’aw dyrr si duxjiah daii-a-dingw juer Qamx Qokvyw ee kanciuw hitt xee siyxdnuar.

“A’hniax, nguar :ar, hyw laii dngw :ar.” Guaw uaw ix hirangr-aw decc qra qongw.

“Cauhsiauu a! Beh dngw jyww liw singx dngw.”

“Hex kabak oamr, guaw qaqi jit xee langg e qniax.”

“Javoqniaw, jiacc byy dnaw. Guaw jitt xee siyxdi, sewqair siyw dnaw :ee.”

Dua-hniax bin hiongr hiwdnuar, dandanx qorr duartaubuw qiw guaw. Qoniuu-aw taux ciyr qanda’ qor omx cuir, nng vingg ee jiuxkud-aw, ix omx byy diyc.

Jamxzenn aw byy iwsinn, guaw uat tauu dyrr beh laii jauw. Dua-hniax huacsniax qra guaw qiyr dywdngw .laii, beh crex guaw qra kangx qxanx-aw tec kir hingg.

“Qxanx-aw-jnii duw liw ee qnialorqangx.”

Dua-hniax ee singwde u kir jxingw diyc a’qongx, jin' cnuar, hnuaii vecveh, byy beh hro langg' qongw m. Ix go qix jingxtauu-aw gim nng qix kangx qxanx-aw. Guaw ee ciuw kacc ser xee, jit qix ciuxqud byy hxuad .did, dyrr qorr siangx ciuw qra jrih .quer .laii.

Dairjir vran hyxser, guaw qra jnii dre zip kir doxde. A’vaa hro guaw ee go sxenw jnii, duxjiah cuir sar, brew jit qix lixaxtngg-ciamw u kaix nng sxenw .kir. Jitquw qex tanr diyc jit diauu, naxx qniaa naxx diyy, jnii-sniax liagliak hauw.

Duer vnii-kax :ee vaii qaxx bat bat si. Jitt vingg decc jyr tngang'aw, hitt vingg decc juw mirdee. Kacc vnix:a u jit din langg vnuar kuu lehh, hiwher qiyr, qihqac qunw. Qecviah jngx ee a’Zuu jre dirr ixqoxtauu-aw decc la pongwtngg. Jit quaw angg bak U :a, uree kia lehh, uree kuu lehh, linlongdngw uii lehh draur laurzet.

“Pongr :ar, pongr :ar.”

Kacc byy dangsii-aw snax-hxun-jit ee tngjuiw, juw qaur buew:a, suacc venr qaxx jit liap pongr saisaix, bersux cur nirr angqewdyh-dingw ee huatquew. Dag’ee siy’ jnex beh vreh jit der aw cir knuar qambi sniaw kuanw. Zi-hniax byy-dniu.-byy-dii jongg .cud .laii, qiyr dag’ee siamw kacc kuix. Ix qapp a’Zuu qoduiwdog decc ciangr dur, beh priac knuar sniaw langg pongwtngg kacc gauu la. Tniax hiaxee decc huah xiyx huah liok :ee, qaxnaxx zi-hniax iauxx sux langg' nng dniaw. Zi-hniax cuann kaciuw, genn qongxx beh juw jit liap tenvawongg :ee, pacsngr jitt dxauw beh pacpniaa ee kuanxsir.

Hangloo dingxquann ee huew jin’ mew, ciactngg rngiuu .kir liauxau, jit diamw aw quw dyrr kaisiw decc vuh puec, cringr juixenx.

“Qunw :ar, qunw :ar! Pongwhunw hyw camx :ar!”

Jiur Pni Sun :a anxnix decc huah. Zi-hniax qra dik’axdi unr quaw pongwhunw.

“Dyrr iauxx bue kansix lehh. Qycc danw .jit .sii .aw.” Kuah cuir Pog :a qra dongr.

“Beh qycc danw! Kactingg aw narr cauwhuexdax, liw dyrr banw be dngw .laii.”

Jiur pni Sun :a qycc decc qra vig qinw. Zi-hniax diuduu .jit .xe, dangsii suaw kir tokax he snewmia la.

“Sniu’ ban lar! Liw m dyrr la kacc qinw lehh.”

“Byy kacc juac lar! Byy qiok .kir .ar! Guaw dyrr qongw qalixlenx, linw qan' qan' aw m sinr.”

Inx hitt nng xee iurqycc decc jniwcuir siy' dag. Zi-hniax kajiacpniax kud kacc lyc .kir qyckacc cud lat.

“Qaxnaxx e pongr oox! Di hyw tingg :ar!”

Zi-hniax tniax Sun :a ee cuir, qinw dac dongxaw. Hex pongwvniaw unn unn aw decc pongr .kiw .laii, bak nih aw quw, sui' qycc lab .lyc .kir.

“Vnixjix. Guaw dyrr jaix lehh!”

“Qanghux cax langg' jit kuir. Iauxx si a’Zuu kacc lauw.”

“Longxx linw diyc .ee .lar,” zi-hniax duiww inx nng xee ziangw. “Iwqenr liauliauu, qui' din dirr hiax caxsuex, hai guaw tauduxaw be juansimx.”

“Liw marr decc gauu kantuax,” Sun :a qongw. “Qesitauu dirr liw ciuw nirr, beh iacc m, jairr liw quad :ee. Javoqniaw, lanw diyhh kacc dramx su’ngiaa lehh. Pongwtngg juw sux langg’ nia dyrr kiw puiwbin!”

Jairlaii byy air ho'ngg pixvok, byy la qaur ngiaa m qamguan, zi-hniax jauw kir tauqex hiax beh qycc pig. Kacc sux ix dingxe ee sna’axkor cue taur taur, zimm byy vnuar sxenw jnii.

Guaw kiw kax jiacc beh laii liujauw, jnia’ uan'am, suacc hro ix ngiaw .diyc. Ix vuackuix jingwlangg hiongr guaw uaw .laii, ciuw crunx dngg dngg qiyr guaw singx jiyh .ix. Guaw qra hnair tauu. Ix bin sui’ dyrr lruac .kiw .laii.

“Jnii kngr lehh ingg marr decc ingg. Nng sxenw aw jiyh .guaw si e qaur dyhh?" zi-hniax og tictih. "Danw aurzit aw narr u, guaw jiacc dingvue hingg .liw, anxnix m dyrr hyw?”

“Byy jnii lar, kaix liauw .kir .ar.” 

“Benw penr lar. Liw si qaxnaxx jnicuw, go sxenw jnii iarr suacc u kyxlingg jit amr kaix dax .kir!”

Jid’err qongw suah, ix ciuw crunx zip kir guaw ee doxde. Guaw be hur qra jianuaa, uadlinwdngw, dyrr hro ix nguaiqnuai lriuw .kir. Guaw giuw ix ee ciuxngw-khauw beh qra cniuw dywdngw .laii. Ix langg snex jyr jin’ coiongw, jin’ kunxtauu, cnaw .jit .xe narnia, guaw dangrkintauu kia be jai, suacc dngwqux, siag jit xee kongrkakiaur.

Zi-hniax liac guaw ngiaw .jit .xe, jnii tec lehh dyrr jyww ix jauw .kir.

An’ tokax vreh .kiw .laii, kacngpuew hrux hrux zuanw zuanw lehh, guaw qra tohunw vnua vnua hro cingkir, qra snxax giuw hro crunx, jitt sii jiacc huatqenr jniawciuxvingg ee ciuxngw puawlic, ciuxaurkiaux hiax liuwpuee.

Beh dngw kir ee lo diyhh qingquer jit pxenr bong’axvox. Amwsii aw, imhongx sngwsngr, ciurhiyc sahsac qiyr. Guaw kiw damxhann, uiwqniax u hitt xee pnaiw kangx :ee, qebyxpuee diddit kiw crangr. Buexdangqud hiax diuh diuh tniar, kavo sidjai qnuaw be qinw. Dyrr anxnix jap vo qauw huetauu, vnuar qniaa vnuar jauw, jit lo kuekakok kuaiw .dngw .kir.

3

Bylun iam tnix ciah zit iacc si ho laii dapdih, tauwdaur ee sii, a’Jaii Vxeh :a jongw e lab jit daii snalenxciax laii haghau ee mngkakauw dngdanw, beh jair guaw qapp nng xee hniaqyx dngw .kir.

A’Jaii Vxeh :a si guanw qangrkiarlai ee suxiongrlangg, siauwlenn ee sii dyrr hro a’qongx cniar jyr dngqangx, guanw daux snax dai qeww sriu ix hongrdair u diyc.

U tniax guanw buw :a decc qongw, qongxx bue laii guanw daux jinwjingg, a’Jaii Vxeh :a siwqer qa'ngg jyr cuiwqangx, duarjuiw lrauu puar vor, snax dxngr jiac byy jit dxngr siyx. Hitt jun duxgu qamjiar dua cud kiamr kunxqangx ciax kir huersia quer vong, a’Jaii Vxeh :a sinkux jit niaw puar snaqee, an’ tauwjaw jyr qaur zidtauu lyc snuax. Kixqingx, ix jyr dnaxqnia :ee, kacc quer, jiacc ngua jiac gueh'aw. A’qongx knuar ix sittauu decc jyc jin’ mijnix, qycc langg marr hordit, dyrr qra cniar jyr sinlyy, qui’ nii tangr tnix druar dirr guanw daux, qaxnaxx qangg jit kauw jaur :ee.

Kacc u decc lydong :ee, langg qex kacc kuair jaux. A’Jaii Vxeh :a diongw a’vaa m jniaa huer, nng langg kia jywhuew, ix urngiaw qex jiokk lau kuanw. Qycc dongcox vnevnee lyhanwkax-aw, a’vaa hro a’buw jiyx, suacc viw ix kacc jaw crua. A’Jaii Vxeh :a kiuu kiuu kiam kiam sxor jap dxangx, cuarbow-vunw kingg u :ar jiacc qenwdir qeau. Nguar crua, snesingg dyrr qniaxzii ban, sir-jap gua ~ ~ jiacc jyr laurve. Ginxaw jiacc cutsir, ginxaw ee laurbuw drir diyc guehlairhongx, jiax sngx, hiax tniar, jit xee langg vutsii dyrr kiaur kiaur dyw. Kixtauu, vni jin' bann, inx m jaix lirhai, ciackasenx-aw ee sig'iyc vniawsir quanr, hermia tunx, qaur qaxx vne gimwgimr, langg qiongbeh byy kuir :ar jiacc jaix jiahlat. Qinxmew pingwcniaw sensnix laii knuar. Sensnix jre nng lenw ee vunwdauxciax qnuaw .laii, bairjingr liauw, bin-aw iux qatqad, qongw hongsiaa qamw zip vii, quer sii quer kig kir gro .diyc, junw u sendanx biauriyc iarr byy qiur.

Dyrr anxnix, cutsir ginxaw bue muaw guec dyrr byy laurbuw ngiusniuu. Qeqangx cua qeaxqniaw e tuapangg. A’Jaii Vxeh :a jiokk vaqed, jit xee javolangg qnaa jit xee iur qniaw, qycc guanw cur nirr ee sittauu marr byy decc nngxqauu, ix iarr beh lai iarr beh gua, coqangx qapp iuwlo :ee, dagg hxang dy’ jiauww-kix.-jiauww-qangx congr qaxx jin’ diamxdinn, jin’ qauwkamr.

A’vaa knuar ix juewsu vutjiw vaxag jin' e qaudiong .did, duarser hxang longxx air qaudair ix, kacc byy air cue vadd langg. Dogdok siauwhang jitt jann, qeww ix qaqi decc lixlyc, byy beh hro guarkauxlangg bakciuw. A’vaa jywlangg qaiww qinxsin, jniginn jitt quanx siuw jin’ diauu.

“A’Jingr Siauwiaa, guanw dirr jiax lar.”

Jiacc an’ haghau cud .laii, guaw dyrr knuar diyc a’Jaii Vxeh :a dirr hng hng decc et ciuw, huachiux. Ix byy diong cing, zuac .langg, jit niaw lairqac’aw cing lehh dyrr siwquer kir; kacc lingw ee sii, a’vaa nng~snax niaw byy air dic ee puar hiuu-aw dyrr tangx hro ix quewkiaur.

“Dirr guartauu, liw m dyrr qiyr guaw Masao. Dyrr qra liw qaudair quer bysowvaiw :ar!” Guaw qra ix pnaiw sniasaur.

“Sitlew sitlew! Jiac lau kacc byy simqnuax, qiwdii baiw.”

“Jaii Vxeh :a, jitt jann, liw diyhh kacc juwsimx lehh. Langg’ ix jitmaw jiokk cringr, sinhun byy qangg :ar ne! Ix ee miaa liw luan luan qra hiamr, banrvutzi hro langg’ tniax .diyc, si e hai ix ho’ngg ciyr songg!”

Dua-hniax dirr vnix:a decc samdanghuex qongw liangkiangx. Guaw siongrr creh langg’ qra guaw congwdi, be genr qycc ham’ ix jywhuew, dyrr qongw beh qig vorlenw, qaqi singx laii dngw.

“Qycc danw .jit .kunr .aw. Zi-siauwiaa pacsngr decbeh cud .laii .ar.” a’Jaii Vxeh :a qongw.

“Ix log'axdee, m jaix qycc jauw dyc'ui kir. Lanw rair danw ix qaur dirsii? ”

“Ix qacc beh dngw, liw dyrr hro kir maar. Snalenxciax dingxquann qiamw jit xee, liw byy kacc nngxlat?”

Dua-hniax kiaux kax, qongxue byy-lamx.-byy-ne. Cuir dunx :ee kacc suser, guaw qenww vaiw qapp ix kauxqec, byy qaxx jit vaiw byy hro ix jiac quer quer. Sniu diyc jin' byy iwsinn, guaw uad lehh jauw.

Hagsingx-ginxaw jit din jit din qinwqongwqunw. Jit dingw sianglangg qrngx ee qiy dirr duiwbin dauc dauc aw uaw .laii, dingxquann jre jit xee cing kimono ee qoniuu. Guaw simjong pigpok cnaiw, jit sijun suacc snackuir.

Qinaxzit cing jitt siangx ree-aw sidjai dua mrdid, songg qycc auwlongg, dyr kax ee epni liyc aw kuicuir. A’vaa dingw zit aw u qra guaw brew jit siangx vec vowee. Jarhngx ho laii. Guaw qniax lo ciok, sinx cakcag ee ree-aw e pacziah paclasamm, mrjiacc m qramx cing .cud .laii.

Nng xee qrngx qiy :ee longxx u dir cauxlec-aw, qnua guan'aw jit dih jit dih itdit an’ tauhiac-dingw dinx .lyc .laii. Jre dirr qiy-dingw :ee ziax jit qix juaxhorsnuar, marr vutsii iong ciuxqinx-aw jiax crid .jit .xe, hiax crid .jit .xe. Akiko Siyxjiaw, ix si guanw sense ee cenqimx. Ix ham’ guaw siysiang, longxx dionghaghau id nii :ee, tak byy qang qingx dyrr urngiaw. Ix jitt jua laii, pacsngr iurqycc beh kir cue inx tosang. Sense knuar guaw jin’ u kiw, u simxmih kangkuer kiamr kaciuw, ix vadd langg be kir cesaiw, qan’ qan’ aw air cue guaw. Dyrr qaxnaxx qongxx Akiko Siyxjiaw dagg vaiw laii, sense dy’ e qiyr guaw tinn dee hro inx jaboxqniaw limx. Suisi qimqix-gighiyc, Akiko iuguann jiokk keckir, be qyjuiw iacc qig duarder. Qenwnarr siurr langg' kuanxtai, ix longxx e jin’ hyxlew qra liw qongw jit sniax aligado, kinx sniax ser sueh, jamxzenn aw sunrjingg.

Guaw dac jinwjingg beh qapp ix aisaju. Jit xee sunjavow qra guaw jac .lyc .laii, qiyr guaw qapp lingrgua snax xee javox ginxaw vaii qui’ vaii huadkia beh sui' xee aw diaux. Ix qra guanw ee by-aw liur .lyc .laii danr dirr tokax, suar .lyc qra guanw juaix cuiwpuew, viak cuiwpuew, jniar ciuw viak liauw ngua dyr ciuw, qycc tiauqangx qig jit xee sniadiau ma guanw si Cingqokloo. Akiko knuar qaxx ciyr bibix. Hitt xee sunjavow cuir-aw hix hix, taujingg nng kxiw saixvekiw ngg gamgamm. Itdit qaur qoniuu-aw ee qiy zip haghau, ix jiacc vangr guanw jauw. Jingrr cutsir qaur dnaxx, guaw tauwdew m bad jiacc qenwsiaur .quer.

“Masao snax siauwiaa, liw iauxx dirr jiax. Iauxsiu or! Liw cuiwpuew nacc e haux haux, bin hamr qaxx jitt hxingg? Si u langg jeh .liw, si bor?” a’Jaii Vxeh :a bin liksig, mng qaxx cnijinx .kiw .laii.

“Dauwdew si anwjnuaw, dnaxx m dyrr qongw. Knuar si dycc jit xee hunrjiangr dongsix qra liw pah :ee, liw qra guaw qongw, guaw beh duiww ix suanwjiangr!”

Zi-hniax an’ snalenxciax-dingw tiaur .lyc .laii, ciuw hnua dirr guaw qingtauu mng qaxx jiokk ciongqongg. Cuir bat bat, guaw qra ix ee ciuw vuew .kuix, en’ lo jauw, en’ lo kaur. Jauw dngw kir qaur cur, in’ui kaux hongx, bagsaiw duxhyw dax .kir.

4

A’qongx ixjaw si apenwsenx, byy jiac ohunx e genr. Jitt hxang ee soxhuir vutjiw aw siongdiong. Jaxzit kacc siauwlenn ee sii, ix bad jit~vnuar vaiw aw qapp langg' jiac simsig nia. Quiw nii aw quer, cur nirr siongdongx u tanr .quaw, qycc u cringw diyc hunvaii, air beh jiac, Juanbe Qiok quah dyrr u.

A’qongx marr jnia’ erhiauw sox, vutdanrna coqesix hag qui’ jxox, qycc u cniar jit xee diamw apenwhunx :ee dagg qangx laii cur nirr suhau ix vog hrunx. Dingw guehzit aw, a’qongx iongx langg' an’ Dngsnuax hitt vingg jah jit qix huncuex dngw .laii, qongxx beh jyr guanxkir. Byy siok, diyhh quixlyrr vah qycc quer jit vah.

Lexvair-sii aw, a’qongx hitt quaw qxiauw-kax lau hniadi longxx e jiyx ix kir vruac jab’oaw. U huer ee langg samvutgorsii jiyx qui’ din bongxx juer girniu, ciuw tiw siwsikvaii, taukag u decc ing marr kacc be snex sxenx.

Dua-hniax qapp zi-hniax jin’ jenrciuw, suha jywtyr, qongxx beh tranr a’qongx cud .kir byy dilehh ee sii, dyrr beh zip kir ix ee vangqingx sngw ix hitt qix sinx brew ee huncuex. Inx jiyx guaw jywhuew kir. Guaw qra inx hnair tauu, qongw a’qongx narr jai’ngiaw e huatnauw.

“Dnaxx si decc qniax sniaw? Liw dingw:a u nng xee hniaqyx hro liw kyr.”

“Dyrr driyc m! Buw :a si byy snex dnaw hro liw, si m? Qniax siw siw!”

Inx nng xee, jit xee dangqix, jit xee dyctauu. Jitt quer narr byy qapp inx kir, vadd zit aw m jaix beh qycc snex zuarr je uersaiw .cud .laii.

A’qongx ee vangqingx dirr au lyc. Beh qniaa quer horlingg jinwjingg, dua-hniax qiyr guanw qra bagqiac trngr .lyc .laii. Guanw dyrr tngwciackax, sui’ xee aw neh kabuew liamx .quer .kir.

Qaur der, mngg sag .kuix, sui’ pnri diyc jit xee cauwhuexhunx-bi. Zi-hniax kiardiongx dairsingx dac .zip .kir. Bincngg-dingw cue byy, ngua dycquirtuah; dycquirtuah cue byy, ngua sna’axduu, lenpenr ciaux, lenpenr hiaux, jit siwquer qra vingw taur taur. Qnaxx si dua-hniax qapp a’qongx ee simqnuax kacc u siy’ tongx, ix vreh kiw bincngvangx, ciuw nngx zip kir jimxtauvor lairdew. Jit xe dyrr hro ix cue .diyc.

Zi-hniax qra huan’axhuexqix dux uaw .kir. Dua-hniax huncuir qamm lehh, jit kuir aw quw, dyrr dauc dauc aw u decc cud huexenx.

“Kiwbi sniaw kuanw? U kacc janw bor?” zi-hniax mng.

“Vingvingg aw, cavutdyx cavutdyx lar!” dua-hniax dab.

“Qamxx anxnix? Hro guaw cir knuar mai lehh.”

Zi-hniax qongw suah, dyrr beh qra huncuex sax .kir. Dua-hniax draux lehh m vangr. Inx nng xee dirr hiax decc giuw giuw lrak lrak, jit xe byy jimjiog, huncuex suacc qalauc, qxongw siag jyr nng quec. Guaw kia dirr mngkakauw, knuar jit xe, simqnuax hiamw dnia .kir.

“Longxx liw hai :ee lar, qiyr liw hro guaw suh .jit .xe, liw iarr byy tangx. Dnaxx jitt sniax knuar beh anwjnuaw?” Zi-hniax qongw, bin-aw cnex sunxsunw.

“Benw qniax lar! Dairjir byy hiacc dua diauu.” Dua-hniax iuguann laursinn jai jai.

“A’qongx tniar liw, kacc qex liw marr anxnix sniu. Acc guaw lehh? Ix jitt quer narr byy ing sauwsegimw-aw qra guaw bud .siw, guaw jiacc sux :liw.”

“Liw urngiaw jnia’ daigong ne! Lanw longxx mair qongw, ix beh taixtyw e jaix? Jyww liw anx lar!”

Inx nng xee langg dauwhoxciux, horsiongx dnaxhap. Guaw lapvo beh piuwjauw ee sii, inx qra guaw dongr ju, jit langg ing jit ciuw var dirr guaw ee qingqactauu, rair guaw inwdamr qongxx quatding be cutbe inx. Inx qycc hig .guaw, qongxx guaw narr byy jiauww inx ee iwsur kir jyr, sii qaur qui'ee beh kancew hro :guaw.

A’qongx amwtauu aw dngw .laii, uad lehh dyrr zip kir ix ee vangqingx. Bak nih aw quw, ix qycc jongg .cud .laii, kixsingr-logde, qongw ix jit qix huncuex hro langg tautec .kir.

“Dnaxx si qycc jnuaxngiu? Jap-snax tnix gua dyrr u tniax diyc lau :ee decc ngowngor ziongw.”

A’qongx hxongg dng’ huad, honghuew dng’ dyc ee sii, a’vaa an’ guarbin dngw .laii, sui’ qra a’buw kiuw kir vnix:a decc mng.

“Acc dyrr ix jit qix huncuex decc cue byy, gii qongxx u langg zip kir ix ee vangqingx qra tec .kir”

A’vaa qra guanw snax hniadi qiyr kir mng. Dua-hniax qapp zi-hniax, inx jit sniax dyrr qra qongw byy, rinr qra jiokk hyxser. Guaw simqnuax guandew u cuann ven ven decc tingwhau. Diyc qaur guaw inwdab ee sii, qui’ sinkux banxmec, itgenn-vuanwqur dy' qongw be cud cuir.

“Dnaxx liw si diyc exqauxsuax niih? Mng liw suacc berhiauw rinr!” a’vaa qongw.

“Bingg :a hiax qamxx benw laii kir cue knuar mai lehh?” dua-hniax cud laii qra guaw ing’uii. “Ervox, guaw u knuar diyc ix dirr a’qongx ee vangqingmngg hiax decc siamx lehh siamx lehh.”

Bingg :a si a’Jaii Vxeh :a ee haursnex, duarjic, qongxue e dingg qxur. Dua-hniax qapp zi-hniax vingsor dyrr jin’ air qra congwqingw, air dih .ix. A’vaa qiyr a’Jaii Vxeh :a ham’ ix qongdongg kir ciaux. Jniawjniar dirr ix jimxtauu erdew ciaux .diyc!

“Iauxsiu siw ginxaw, liw si jiac diyc hyw dnaw iyc-aw, si m? Dua lauriaa ee qniartauu, liw iarr qnaw kir jen!” 

A’Jaii Vxeh :a guu-sniax bew hauw, huah qaxx duarser sniax.

“Gua…guaw… by…byy lar.” Bingg :a tic tic qiyr, jit qxur ue tuu qui’ vnuar vox qongw be did si.

“Siw ginxawjex. Jiacc sewhanxaxqniaw vehcat-vehlud. Linw ve qniazit dyrr beh qra liw but hro siw, benw did aurzit aw henrsir diyc joxqongx.”

Qongw suah, a’Jaii Vxeh :a kir giaa jit qix dik'axgimw laii, dirr a’qongx qapp a'vaa ee binrtaujingg, anww Bingg :a sinkux siau .lyc .kir, jit xee suar jit xee byy tingkig. Bingg :a sinkux qiux qiux decc sriu pah, snxax lamr kuarkua, kowkax tuax too. Ix qiamw guaw go huer, jurr sewhanr dyrr kiyh guaw ee snxax decc cing.

“Hyw tingg :ar, cutgiac :ar!” a’qongx cud sniax qra dongr. “Ginxaxlangg, snesingg kacc ciuxcingr. U diabdnaw .quer dyrr ersaih, mair qycc pah.”

A’Jaii Vxeh :a tauu dimr qaxx beh lag .kir, itdit hue sitlew, qycc qongw dagg guehzit ee sinlyjnii beh hro guanw a’vaa kraur, tangx vuee hitt qix siag huai .kir ee huncuex.

Zidtauu lyc snuax, sui’ dyrr venr kacc lianglingw. Bingg :a hro langg qiyr kir tenjniw huadqui, amr dxngr marr byy tangx jiac. Iurr qnuaa iurr iaux, iarr be benw did ix sinkux vutsii decc kiw qa’iamx.

Kacc amr, guaw beh kir jniurcer, qniaa quer jauwkax ee sii, an’ tang’axqeh knuar .zip .kir. A’Jaii Vxeh :a inx nng xee veaxqniaw katau’ux duiww katau’ux jre dirr duarjaur vnix:a.

“A’vaa, guaw jnia… jniasit byy kir… kir jen hi… hi… hitt xee hun…huncuex.”

“Guaw jaix lar. Mair qycc tic a! Dnaxx qinw jiac. Liw duxjiah m si decc huah vakdow jiokk iaux?”

Amrqunw-au buah diauwqyx, Bingg :a ciuxtauu u jit nguaw hanjiciamx. Ix dua cuir sabsap jiac, jit xe ciuw dyrr qed liauw liauw.

A’Jaii Vxeh :a jitt sii giaa tauu knuar diyc guaw. Guaw pnaixser jit xe, qinw qycc jongg dngw kir vangqingx. Huandngw qangx jingsinn, guaw ee kor-drew damm qaucquah, bincngg-dingw marr si. Guaw qra u cauwziyrpuar-bi ee cngqinx vrag .lyc .laii, ham' lacsab snakor aux jyr jit dxuix pniax hro a’buw.

“Dyrr jiacc duarhanr :ar, tacc e qycc decc cuarziy? Qnaxx diyhh cniiyhpor jauw .jit .juaw, laii kir qab quiw bi aw qunsinn dngw laii jnuax hro jiac knuar e dngrqinx .be.”

Beh hna quer hordingrtauu jinwjingg, guaw tniax diyc a’buw qaqi anxnix decc qaucqauh liam.

5

Bixqog-aw ee huelingqix jnia’ byy siqniaa, sii daur sii amr longxx e laii decc kongsip. Inx qenww vaiw laii qra liw danr nng liap aw jawdann dyrr vuex jauw .kir, naxx cincniu ginxaw decc vniwqaulang, byy anxnix inx be quewzit .did.

Qongw marr decc qrii, radio dagg qangx dy’ vyr qongxx dyc’ui qapp dyc’ui Zidvunxqunx dua singwli, qnuatniax hitt vingg qinxdniux ninix, rair vecsner narr u der kir, dyrr jinrliong sokaix kir piacsiah ee soxjai siyw bih .jit .xe. Qaur jiax laii, ceh marr benw tak :ar. Duarlangg huanlyw jenr be suah, rair jauw luan jin’ enwkir, guanw ginxaw tranr diyc hiyckunr, jrux tangx jiamrsii vangwsag jin' hnuahiw. Cuwvnix-taubuew jiyx jiyx lehh, knuar si beh kelua pix juixpix, iacc si kir vijunr zimm senrhii, dagg qangx longxx u sinx ee cuttauu, mrsaiw qniax byy xui tangx kir. Jniasit sngw qaxx byy sniaw tangx sngw :ar, tokax jiyhtauu-aw kiyh kiw laii vyr, dongrquewsii marr hyw.

Duiwbin hnua hitt vingg ee kangwvox kuah saisaix, qaur dnaxx guanw iauxx bue qniakaqaur. Zi-hniax jingg:a dyrr u qapp langg' ioksog hyxser, qongxx narr u hyw hongzit, qinrzidqanx dyrr beh quer kir hiax cittyy-t. lehh.

Quer hyy diyh’air tedo. Zi-hniax qongw guaw sniu’ jiyw huer, qutlo qycc hniux hniux, unw trex be ngiaa, dyrr byy beh hro guaw duer. Guaw jin’ vuthok, misnii beh kir.

“Liw marr mair qaxnaxx liamtix lehh! Guaw qniaa qaur dyhh, liw dyrr beh duer qaur dyhh.” Zi-hniax bin iux decdeh.

“Liw narr m hro guaw duer, guaw dyrr beh laii qra tosang qongw, qongw liw iurqycc beh qapp langg' kir sngw juiw langrhiamw.” Guaw qra iauhiap.

“Vywbexaw!”

Benw sniaw qniaa, benw sniaw jauw, hyy-vnix li guanw druar ee soxjai byy quiw vo lo. Qauwui ee sii, kuah cuir Pog :a, jiur pni Sun :a qapp debiw-por ee tauqeaxqniaw a’Zuu, inx snax xee ixqingx dirr hiax decc danw. Jit qniaa sir~go miaa anwsngr trex nng jiah dikvaii-aw. Zi-hniax dagg hxang dairjir dy' beh air tauu kiw, dairsingx vreh .kiw .kir, qiyr guaw ham’ Sun :a qapp ix jit jxox.

“Anxnix nacc driyc?” a’Zuu duiww zi-hniax qongw. “Liw qapp Sun :a longxx jiacc dua jangg. Linw hitt jiah jnaixtangx qycc qex jair langg?”

“Anx lar, tedo guaw jiokk quanciuw!" zi-hniax jurkaikyx. "Qycjaiww qongw, guanw ser :ee jit liap aw qniaw nia, e tangx qaur zuarr dang? Liw or, iauxx si huanlyw linw qaqi hitt jiah kacc sidjai.”

Snax xee langg ee dikvaii-aw kacc pnaiw trex. Zi-hniax air jyr cingwhniax, tingxqiongg beh jyr jingg. Guaw qniax vingw junn, m qnaw ovec dinxdang, jre dirr jniawdiong’ngx, bin hiongr aurviah, knuar diyc a’Zuu kia lehh, langg quann hanr dua, suar sniu kiw diyc ix hitt xee kir jyr Zidvunxvingx ee hniaqyx.

A’Zuu qapp guanw zi-hniax vnee je huer, kax lauwhamx lauwhamx, vutjiw aw bunn. Inx hniaqyx marr lyr kax :ee, mrqycc kacc copyh, qex jiokk hyw texqeh.

Jap-qauw huer snezit jiacc quer, a’Zuu ee hniaqyx qaqi hnuahiw qamguan kir ter Zidvunw Tenhongg siy’ jenr. Inx Zidvunxlangg marr jin’ qauxjer, Daiuann ginxaw jurguan beh jyr inx Zidvunxvingx, quixlyrr vah xee qongxx jiacc kiyh jit xee. A’Zuu inx hniaqyx m na hanwcauw hyw, langg enx, jrux marr be hamrban tak. Ingxquer haghau decc driaur hagsingginxaw dngx qongcex, ciangjai jixding ix kir huatling.

Beh cuthuad ee jingg jit qangx, a’Zuu inx cur nirr u vran jit sxik dyh qra inx hniaqyx sangr, hii hii bah bah, jiokk pongpair, jiokk cnecaux. Surau, a’Zuu u decc yc hro guanw tniax, qongxx inx a’maw anwjnuaw an’ siw kaur dngw laii, bagjiux dagg qangx dy' hamx hamx. Inx tosang knuar laurbuw bagsaiw lrauu be qenx jnia’ m qramx, dyrr qra ix hangxpenr qongxx qycc kaur .lyc .kir e qra inx sunx dair suex. Inx a’maw tniax diyc anxnix jiacc qinw diam .kir. Hitt amr dirr inx cur nirr, banjai ee sniax huah byy suah, e limx iacc be limx :ee, jiuw longxx jiac qaxx max max.

Nng jiah dikvaii-aw sun sun aw qniaa, duiwhnua ee cauw-ngiaw qapp ciu-ngiaw uadd laii uadd bingg. Guanw qor decc knuar qongqingw, jit kud qngxleaxjng siamw byy li, dikvaii-aw qui’ee vingw .quer.

Amwlauu cneqongg. Guaw m bad juixsingr, jid’err vuac lyc juiw, qinxdniux .qaur .der, kaqud ovec tad.

“Kacc dikdnia lehh! M hyw qycc tad ar!”

Zi-hniax ing jit qix ciuw qra guaw ee am’axqunw kox lehh, kax naxx lab juiw, lingrgua jit ciuw naxx decc vuew lehh vuew lehh.

Guanw nng xee hniadi-aw anjuann jnriu hnua, tniax diyc hyy nirr u langg decc huah qiuwmia ee sniax. Jiur pni Sun :a ee taukag dirr juiw-bin puu lehh dimm lehh, qiongbeh hro juiw du .siw.

“Tomx” jit sniax! a’Zuu vuetnix tiaur lyc juiw-drew hiongr Sun :a hitt xui uaw .kir.

Taujingg u hionglauu, Pog :a qaqi jit xee iauxx dirr dikvaii-aw-dingw. Ix dikvaii-aw vangr qiwjai ix hro juiw lrauu .kir, qaqi jiacc siuu quer laii guanw jitt vingg siongrliok.

Kacc quer, go xee langg tong' jiauu kixsnuax, dag’ee kaciuw henr henr jit senx jit senx dyw kiycciyr, tiamw qaxx e kox qxex, be vunn huew.

“Jitmaw lenrr jit jiah dikvaii-aw dy’ byy, dnaxx si beh anwjnuaw dngw .kir? Kuah Cuir :ee, longxx liw hai .ee .lar!” Guaw duiww Kuah Cuir :ee bu cia'axqongr.

“Jex tacc erdangr quair :guaw? Hiangwsii a’Zuu vangr guaw jit xee jueww ix jauw .kir. Hex dikvaii-aw jiacc dang .diyc, guaw langg genr vavax beh anwjnuaw trex e qniaa? Byy qinw vangwsag, banrvutzi narr lrauu hng .kir, sii qaur qycc siuu be qauwui, anxnix knuar beh jnuaxngiu?” Pog :a qnuaxqinw venrvik.

“Sun :a hitt sii qiongbeh qikjuiw siw, jex linw marr u knuar .diyc. Guaw hitt jun narr byy qinw tiaur .lyc .kir, ix m jaw dyrr hro juixquiw liac kir sriab amrkangx :ar!” a’Zuu qongw.

“Id laii zi kir, longxx liw m driyc lar.” Sun :a jingxtauu-aw qiw zi-hniax decc qra saur texben. “Langg’ duxjiah a’Zuu dyrr qra liw qingwqyr, qongxx snax xee langg m unxdangr, liw pen' pen' aw m tniax. Guaw jitt diauu mia hiamw hro liw hai .siw.”

“Acc dyrr limsii qex jit xee qxauw duer saiw :ee. Narr byy, lanw sir xee nng siangx, dng’ duiwdox, beh taixtyw e vingw junww?”

Dag’ee jit qxur laii jit qxur kir decc siy’ duc. a’Zuu qiyr dag’ee diyhh kiychyy, qycc qongw tranr tnix iauxx qngx qngx, diyhh qinw laii cue knuar linqin u zinqecur tangx pacpox na .jit .amr bor.

“Hongx jiacc taur, vakdow iaux .qaur .der, guaw qniax lanw ee sintew e jicjair be diauu.”

Ix anxnix qongw sidjai u jit xee lixkir, guanw vreh kiw srinx dyrr beh duer ix kir. Jiangwsii, zi-hniax cud sniax giaa gne qxyx. Ix qongw dertauu cnesox-s., sii qaur qniaa m jaix lo e tauu kacc dua srinx dyww jiahlat.

“Lanw dirr jiax jre lehh danw qiuwvingx, anxnix qamxx byy kacc unxdangr?”

Dahgne, inx nng xee longxx byy beh ziuu .jit .vo. Pog :a quixtauu quixnauw gauu sniu jingwtauu, tegi dag’ee giaa ciuw quatgi qniaa binjuxsid :ee.

“Jit langg jit piyr, qongdy, byy surlo.” Pog :a qongw.

“U tongx oox!” Guaw qra tinrtauu.

Ciuxkiaux kud zip byy kud cud, qangg vxag snex :ee, guaw jitt piyr snesingg be jauw .kir. Sun :a jit diauu mia si a’Zuu qra qiur :ee, uaw ix hitt vingg habqaizenn. Nng piyr duiww nng piyr, su’ngiaa diyhh jairr kuah cuir :ee juxquad.

“Pog :a, dirr jiax gong gong aw danw, m si vanrhuad lar.” a’Zuu qongw.

“Snuavnix qok'axpang byy langg druar, qniaa jitt jua, e qex liauw gong kaqud.” Zi-hniax qongw.

Inx nng xee iauxx decc siy’ jner, langg’ zidtauu jyww ix lyc snuax, byy beh siy’ danw. Amr amr aw bongx, sik sik lo dy’ e qniaa m driyc, byhqiyh si snehun soxjai. Hyy-vnix jiahhongx, dag'ee qnuaa qaxx dangwkiw sicsih junr; byy nriuu, byy cauw, vakdow iaux qaxx beh naih qajiah.

Si guaw dairsingx huatqenr diyc hyy-dingw u dinghuew decc siamxsih. Kixtauu, guaw qycc liahjunw si qaqi iaux qaxx dongwgong .kir, bagjiux kiw en'ng. Danw hex junsinx naxx laii naxx bingg, knuar diyc a’vaa qapp dua-hniax kia dirr junn-tauu, jiacc jaix qiuwvingx jniasit qauwui :ar.

Dangsi'aw dua-hniax hiangwsii dirr lairtauu u tniax diyc guaw qapp zi-hniax decc qongxue. Ix knuar amr ar guanw byy huedngw, dyrr qinw qra duarlangg sueh jiauwsit.

Guaw qapp zi-hniax hro langg' diap qaxx tiamw ~ ~. Guanw jin’ zinrhun, diam diam aw siurjer, jit qxur dy' m qnaw cuir je.

6

Haghau jing jiaucjiauh, bersux bong’axvox. Qang’iuw a’vxeh decc cnuar aurbuew mngg, guaw dirr zi lxauu tniax diyc hex sniax, suacc naxx cincniu decc huatluii. Qauwsig lairdew qanda’ cunx guaw jit xee hagsingx qapp sensnix dilehh. Guaw u jit quaw dong’yc, inx narr siokdee byy jyr, byy dyrr sniu’ get, hitt zit vangwyc, dy’ e hro langg' huadjue kia ovangx. Ehngx guaw berdangr junxsii tingkyr ee en'iuu qapp dingw:a qongw :ee longxx byy siongqanx, dogdok uirdiyhh binaxjair ee sowhagkyr, guaw diyhh qra jit quaw kacc cimx ee debak, sui’ diauu aw siaw hro jinx siaw hro bingg. Laursux jin’ pnaiw singwde. Sii qaur ix narr qar m driyc lakkag, guaw puee qaqi diyhh vnex kacc ann lehh.

Laursux kiaux kax jre dirr guaw vnix:a liammix decc kak puiw, liammix decc cngcpni, cngh suah, qra pnirqyy an’ tang’axmngg hiur .cud .kir, liauxau, ciuxqud dirr ix dngg kor dingxtauu huee lehh huee lehh, qycc iong ciuxngw jut pnxi. Guaw u cingkiwsniur. Ix jiacc taixqyx, guaw qamxqag jiokk okcog, itdit beh vxag vingw. Bagjiux-jingg jitt diauu debak dy' qanxdanx qanxdanx ee kuanw, guaw tuc qui’ vox quw, kacc anwjnuaw dy’ jadtauu, qraiw be cud .laii.

Ix ciuxqud giaa .kiw .laii decc knuar ciuxviyw-aw, bingg duw bingg si danw quw, jre be diauu decc qra guaw cuix :ar. Guaw ing jit qix ciuw qra dyr vingg ee bin siyw jac lehh. Byy knuar .qnir dyrr hyw liauw liauw, jnia’ jap diauu ee snaqag-dree, jit xe aw quw dyrr hro guaw kuanw .kiw .laii .ar.

“Taxmar dyh! Jyxmyx jianxdann!”

Tauu:a hitt qxur guaw tniax qaxx jin’ bingg, hex si decc qa’ngg jiuwcamr ee ue. Jin’ je axsnuax :ee longxx u decc qongw. Aurviah :ee dyrr kacc ycdit. Guaw qaxnaxx ah-aw decc tniax luii, jit sud aw dy’ tniax byy. Hyw dnaw ing bagjiux-buew qra jriauu .jit .xe. Ix ciyr tauu ciyr bin, cuir-aw hix hix, bersux kir diyc diyc taucaiw. Guaw knuar ix jiacc qauhingr, simqnuax dyrr u kacc kuix. Buew:a hitt qxur dyrr junw m si decc qra guaw ylyw, dairkair marr m si pnaiw ue jiacc driyc.

“Nir koxiw jor lar.”

Qongxue punr juixciux, ix hiur ciuw, liongrvid si beh vangr guaw dngw .kir .ar. Jit biyxjingx dy’ byy encenn, guaw cecpnai-aw kuanw kuanw lehh beh qinw piux jauw.

“Vuwkoxiw tongg tongrsüeh jiangr, siauxdeh vuw siauxdeh?”

Byy-dniu.-byy-dii ix iurqycc vow jit qxur. Ix decc qongw ee sii, jit qix qixjnaiw kngr druar dingxe dunn ee vnuawdiongngx, bagjiuzinn trow trow, qaxnaxx hi’axbak. Guaw iyh ix pacsngr si qiyr guaw diyh’air qinxgenn, m tangx luanrjuw kir guarkauw hongwsangr. Guaw kia tringg tringg hiongr ix qniaa hiahlew, qnuaxqinw beh jauw, cecpnai-aw hiamw be qir .did.

Jaxjingg dirr Daiuann hiauvaix vnuar sewqiw ee a’Vunw-aw, jid’err jenr sux, jit jiah jit jiah ee qun’iongrqauw, jit sijun suacc longxx venr jyr iapbuexqauw. Tniax qongxx hitt jun aw dirr haixuanx, bylun huewjunn iacc huexjunn, dagg jiah dy’ kryw judjut, dagg qangx, Zidvunxlangg longxx qui’ junjai decc lirkuix.

Jenwjingx jiacc suah, a’qongx dyrr caw qongxx beh vnuax dngw laii qu cur druar. Susii guanw sokaix kir jngkax ee sii, guanw hitt qingx dua hiarcur dyrr iauxx jin' qenjongr. Jit~vnuar nii aw byy druar nia, cniuviah vxangx, didusix qnrix qaxx bat bat si, jit siwquer longxx ing’iax, h.-hnghuir-h.

Haghau qycc kaisiw siongrkyr liauxau, zidtauu angg pnawpnar ee qokqii byy .kir .ar, inx ee dervnuaa, qui’ee hro vehsig zidtauu ee qii-aw jiamr .kir. Sensnix qapp dong’yc jerje longxx snehunrlangg. Dngsnuax laii ee laursux qongxue ngingix-ngorngo, snisnix-snorsno, qaxnaxx guarqok’ue. Guanw dirr haghau diyhh an’ vpmf vin’ tauu yc kiw. Jit quaw jurr sewhanr dauwdin sngw qaur duarhanr ee ving’iuw, cittypnua, jingg:a iauxx Zidvunw Jingwhuw decc quanw ee sii, inx sui’ xee aw ho’ngg driaur kir jyr hagsingvingx, jurr anxnix dyrr byy-siau.-byy-sid .kir. Guaw qurdew soxx sigsai ee sewqair jiauu venwqiok. Hex dyrr naxx a’qongx inx decc vruac jab’oo-aw, jit dxauw i suah, qui’ hur huevaii qycc ho’ngg cab .quer.

Dirr guarkauw decc jauxtiaur :ee, jitt jun, jabow :ee suacc viw javox :ee kacc je. Duarjunnii ee quewnii quer, Daivag qongxx uirdiyhh jit xee bre hrunx ee obasang, vecsner qapp qnuavingx kiw ciongdng, qycc iarr u dnua siw langg, Qelangg siw qaxx luirdyxduix, dairjir naurdong be suah. Quer kacc byy jit guehzit, guanw jngx nirr marr vutsii u cingr-sniax. A’buw lunw qaxx qiongbeh puar dnaw, hitt jam aw, kacc anwjnuaw dy’ m hro guanw cutmngg. Cingwjiw byy snex bagjiux. Vuthing kir jyr diyc lorvongrsix, siw liauw si byy langg qnaw uaw kir zin.

Ciuw qnrua jit kax cecvaux-aw qniaa laii qaur duarlortauu, drng diyc kuah cuir Pog :a inx a’qongx, muaw qrex sec linlongx decc siux pnaiw dangg qu sxiah. Inx a’qongx qapp guanw a’qongx jab’oo-aw uanaxx dauwdin sngw u diyc. Qokbinn Jingwhur qui’ee suaw laii Daiuann liauxau, zidjiw viw did jenwjingx ee sii iauxx qyckacc pnaiw quer. Qovutjiongx, lak~cid-jap huer ee laurduarlangg, cinwtuii tuax diyc buew marr diyhh cud laii tyxtanr.

Kacc kir, knuar diyc jit din jaboxlangg cic pongwpuh-aw decc sew snxax. Jiur pni Sun :a inx laurbuw kadaux jit tong snxax jiamx dokdog, kajiacpniax ngai jit xee sewhanr ginxaw qapp langg' kuu dirr hiax decc sew. U jit amr, nng~snax xee vxingx-aw jringx mngg dac hxo kir Sun :a inx daux qra inx laurve rah jauw. Inx laurve jurr anxnix sitjongx, byy jit xee herlyc. Inx cur nirr taucuir cid~veh xee, lau :ee lau, iur :ee iur, qaur jiax laii, juann kyr Sun :a inx new qra langg' sew snxax decc dro zidsit.

Dirr hang-aw-kauw, jit xee taujangx vnuarsamr, cingrcah jin’ lapjeh ee jaboxlangg hut :a .jit .xe an’ uatqag jongg .cud .laii, naxx jit xee samr xmngg qxuiw, qapp guaw hiamw hiamw siy’ vong .diyc. A’Zuu inx jew :a siauw beh nng dxangx :ar, qaur dnaxx iauxx siauw be jingsinn. Bad tniax buw :a qapp cuwvnix jit quaw mw :a jimw :a kaiqangw ee sii decc damgenn, qongxx si u jit zit, a’Zuu inx jew :a cud kir brew siuwjiamx qapp siuwsnuar, dngw .laii, langg gongrsinn gongrsinn, qecdngw qangx dyrr ho’ngg sangr kir siauwvnerngi :ar, kacc quer, qycc dua vakdow. Tniax qongxx ix hitt jua cud .kir, qniaa quer huanbehhngg ee sii, u kir duw diyc Dngsnuax laii ee vxingx-aw.

Uat jit xee hiongr, vut-di.-vut-qag, qycc qniaa qaur Akiko inx cur ee mngcuiwkauw.

Akiko inx jitt qingx Zidvunxcur, buexciuw, si hro jit hxo guarsingw :ee jiamr kir druar. Guaw bad hiongr inx tamwtniax, beh jai’ngiaw Akiko inx qui’ qekauw-aw dangsii vnuax jauw .ee. Inx qongxue lilix-lylyx, qiqix-qyrqy, qapp haghau qar :ee iurqycc byy qangg. Viw ciuw rue dyx ciavnuaa qui’ vox quw, quibuew marr si liauw gong qangx, byy kacc juac.

Sniusix vne qaxx qauwqik, guaw hyw dnaw qra a’buw tyw jnii, qongw beh tiah junpiyr kir Zidvunw cue dacsimqnuax-aw. A’buw qiycsirr guaw decc qongw sngw :ee nia, taubuew longxx m ciuwcaiw. Au .laii, qnuatniax vowling qaiwgiamm, cejiw m hro vecsner cinwcaiw cutqog. Guaw ee cingcunx-bang qniaa qaur jitt xee kamxjam hionghiongg hro langg' paccnew. Byy beh junw suah, iarr byy hxuad ix daruaa.

Derr Zi Jam

1

Jap nii koxtok byy langg jaix

Qimvngw temiaa u jairlai

Derliw tenbunn bad tangr haiw

Iamhongg qniaxsunx siongrr jiongwjaii

Qowhiongx ee cuandniuw vxeh :a qaiww gauu qongw siwquwlenn. Cur nirr u hixsu :ee, knuar si cuarbow, snex qniaw, iacc si laurduarlangg jyr snezit, dag’ee longxx jiokk air cniaw ix kir gimm six jyr duir qongw hyw ue, cuwbi ~, qycc iarr tangx tyw jit xee hyw caixtauu.

Jiokk jaw ixjingg guaw dyrr u diucig hyxser, anwsngr jitt siwlangg beh jyr kiaryc-sensnix, pangg ticvngrnguaw, quer anding ee sing’uac. Guaw dirr haghau singjig dy’ iarr be baiw, qingbiy iacc sirngi marr u jiauww kixqangx kir qniaa. M jaix anwjnuaxngiu aw diyc, suhuan :ee suacc sen’ kyw dy’ logde.

U decc tuann qongxx diyhh kir camqax Qokbinn Dongw jiacc u qihue. Vnuar sinwgii, guaw taux taux aw qazip byy hro cur nirr ee langg jaix. Huandngw nii guaw iurqycc kir kyw. Jitt vaiw dyrr u hro guaw kyw diauu :ar, qycc si hunhuad kir dua doci!

Cuandniuw vxeh :a marr jnia’ qanghux, uirdiyhh jitt jann, qycc cinsinx laii guanw daux qra guaw qionghiw. Simsikhingr jid’err qaur, siwquwlenn suisii cud cuiwkauw.

Guaw tniax qaxx simhuex jiauu kuix, sui’ tec juaxvid qra caux .lyc .laii. Hitt dniux juaw, jitmaw dyrr kngr dirr guaw ee surburdyh-dingw. Narr u dongsu knuar .diyc decc mng kiw, guaw marr tangx qra tec cud laii denw vyw.

“Kiu Sangr, hyw kangx :ee iurqycc laii lor!”

Dongliauu Lai Sangr srex jit xee haixqat’axtauu, ciuw tec jit hxun qongbunn laii dirr guaw binrtaujingg. Guaw qapp ix, suha longxx qorr Zidgiw decc siy’ qiyr. Dingxsix hitt vingg byy air guanw qongw Daiuan’ue. Inx tniax byy :ee, dyrr liahjunw langg' decc pah au paur. Acc narr Zidvunxue, inx qyckacc gree. Cniurr guanw jitt quaw Zidgiw e tongx :ee, vutsii marr hro inx qingduanx jyr Zidvunw jauxqauw. Inx qongw guanw hro Zidvunxlangg quanw sniu’ quw, lojai’axsingr dng iauxx bue li.

“Simxmih kuanw hyw kangx :ee?” Guaw mng.

“Au lexvair, u jit qingx inr camkyxjux :ee beh laii. Hitt qangx guanw cur nirr u dairjir, guaw diyh’air cingxqar. Guaw u qapp dingw:a hiax qongw hyxser :ar. Liw tangx dingw guaw ee kueh.”

“Liw cue vadd langg lar," guaw qra qirjuat. "Inx qenwnarr laii, dyrr beh qra liw cua kir jamr jiuxqax. Jitt kangx guaw byy hingwbi.”

“Acc dyrr inx guarsingw :ee kacc air jitt cud :ee. Liw dyrr vangr kacc lringx lehh. Qinduw iarr byy liauw diyc liw!”

Guanw haghau u jnia’ vah xee laursux, Daiuanlangg qapp guarsingxlangg covnidit aw jiamr jidvnuar jidvnuar. Cocox laii ee sii, gam gam m jaix dixser, kab be diyc dyrr e kir diksid diyc langg', hyw did buew .laii u Lai Sangr decc kankiyh. Ix viw guaw kacc jiyw huer, mrqycc druar kacc quw qycc jiamjngr, kacc jaix jit quaw m.-meqag-q. :ee.

“Inx hiaxee longxx uaiqysenx. Guanw sidjai jiokk byy air qapp inx dauwdin.” Guaw qongw.

“Quanwsir dyrr hyw lar. Liw knuar inx guarsingw :ee, dag’ee marr iuu sexsew, jiac qaxx beh vingw .quer. Guaw vangr vo hro liw, liw qeqiamw yc. U hyw byy baiw lar!”

Qrangw qaur jiax, jongxbu-cxur hitt xee dua bak aw knuax knuax aw hiongr guanw qniaa uaw .laii.

Iurqycc si guec-drew ar. Qongburuann jiac biw jiauww puewqib. Ix qra bixdnuax sangr .laii, rair guanw ciamzi dec'inr.

“Jiacc qinw, jit qywguec qycc quer .ar.” Guaw qongw.

“Si dyrr driyc m. Dingw vrangx :ee jiac iauxx u cunx lehh!” Lai Sangr qongw.

“Diyhh qinw jiac. Narr byy, si e snex bixqux!”

Dua bak aw qoniuu-aw Vakqniagiw be hamrban qongw, qngw jic marr qngw qaxx jin’ hyxser. U tniax qongxx ix qokhau-aw dy’ byy vidgiap, u jit xee dirr Diaujax Qiok siongrvanx ee jexhux, ix jiacc tangx laii jiax jiac taulo.

“Linw daux u qraur jiac bor? Narr byy qraur, guanw daux ee vunx quaw hro :linw.”

Lai Sangr gauu qig ueaxzinn, jin’ u jaboxlang'enn. Dua bak aw hro ix ee ue lang qaxx ciyr buibuix, pni, bak, cuir qyckacc bingg, binrboo-aw qyckacc suiw.

“Kunr bongxx kunr, si m tangx qnghbinn lamrsamw sniu ne!”

Qoniuu-aw jauw liauxau, Lai sangr sui’ decc qra guaw diamxduh.

“Ix bue qer, guaw bue crua, si anwjnuaw bersaih .did?” guaw mng.

“Langg’ ix jaw dy’ ho’ngg sangwdnia .kir .ar!”

“Urngiaw? Duiwhongx si si’angw?” guaw qycc mng.

“Jit xee guarsingw :ee, haixqunx snax liap cnxex :ee!”

“Tacc e jiacc byy qongdy? Suiw jaboxginxaw qeww hro inx jiamr .kir!”

“Vuthok? Danw dycc jit qangx liw sringx qaur haghaurdniuw iacc qauwburdniuw, qongxue qikqyx, siyxjiaxlangg snriaa e dyw, beh qapp langg' vniawdur marr kacc u bin.” Lai Sangr jin’ qra guaw lauwkuir.

Dyh-aw-dingw u jit diauu jaboxlangg ee niaxqinx. Guaw qra kiyh kiw laii pni, pangx qaxx; qra dnec dirr ciuxtauu, qycc liyc aw u siykir. Guaw anwsngr jiamrsii qra draux lehh. Jongxbu-cxur hiax, lingrzit jiacc vuacqangx qniaa .jit .jua.

2

Qui' tuax huexciax lairdew bersux caiwci-aw, qihqic qarqa. Hiyrhuew hitt sii sngwvnuaa pah m driyc qnxir, uirdiyhh beh kiam quiw koginn-aw kir tiah jitt hy banrciadnuax, dagg jam hiyh byy dnaxqinw, ursii uirr beh danw qiphingg :ee, hiyh lyc qaur der, id~zi jap hunx, simrjiww vnuar diamxjingx quw dy' u.

Qenwnarr beh uaw cingbingg ee lexvair-sii aw, jerje cutgua tanwjiac :ee tranr hiyckunwzit beh dngw kir qowhiongx deh borjuaw, huexciax dagg vrangx dy’ buanxuann, jnrix qaxx be did lyc. Jit daii duiwhyrkuair :ee dirr iahtauu qapp guanw siy’ siamw ciax, sucsuh jauw, dingxquann ee langkeh uanaxx jat hnichnih. Danw hitt vrangx huexciajua jauw qaxx byy knuar did ngiaw :ar, guanw ee huexciax jiacqycc kixqniaa.

Ho-laii-tnix, txangx-gua dar bangbu, byy qongqingw tangx knuar. Jit xee duarvakdow ee hurzinlangg an’ dingw jit xee ciasniux qniaa .zip .laii. Guaw bagjiupuee qinw hap uaw .laii qew dua hnuaa. Lortauu iauxx jin’ hng. Qongxx narr qin qin :a m dyrr qinw niu ix jre.

“Jyr totnuawkangx! Hex m guihiamw qaxx. Jingg:a qnuatniax toxde decc ho’ngg hongwniaw, liw tacc berhiauw kir cringw quiw hunx aw de laii jyh?”

“Cur nirr dngrr dangg byy vnuar hxang, snax dxngr dy’ decc qor be vaw :ar, beh dyhh snex hiaxee jnii kir cringw?”

“Anxnix qongw marr urngiaw. Jitmaw jitt xee jingwhuw, canjox qra liw kiyh ping dang :ee. Lanw beh he quaw vuii, jnua quaw iyc-aw, qycc diyhh ciax bixliap qapp inx ngua. Qacc narr pnaiw dangdy, jyh sniaw sidjai marr cavutdyx.”

“Si dyrr driyc m.”

“Qongw jiacc decc qongw. Linw m dyrr kacc jiap dngw laii cittyy lehh. Jngx nirr dag’ee dy’ longxx jiokk siauwliam :linw.”

“Iarr suacc e kamx did dniardnia dngw .kir? Jit~vnuar qangx aw qiamw jyr, qui’ kauw jaur diyhh diamx pueee jiac mox. Qycc jre jex huexciax, ongxhuee marr diyhh kaix lecc quixlyrr kox lioh!”

Hnirkangx-vnix longrlong qiyr, aurviah decc kaiqangw ee sniax, dongdut jiqanx suacc dnia .kir. Bagjiux vreh qimx, dangsi’aw si decc quer vongrkangx.

Jitt xee vongrkangx qycc vutjiw aw dngg. Qycjaiww qnir diyc qngbingg ee sii, jitt vingg tnix cud dua zit, qycc liyc aw e tnebak.

Haixjuiw cnex langlangx, ham' tnix ee sig beh uaw aw beh uaw. Guaw mihqnia kuanw kuanw lehh, sinkux cun'unn .jit .xe. Jre beh snax diamjingx quw, iw nirr bersux u qoo qoo-aw, kaqud byy kacc cud lat hiamw vreh be kiw .laii.

Qaur jam lyc ciax, ciatauu guarkauw, danw beh jre kec’un :ee vaii qaxx jit let dngg longwsongr. Dirr Daivag qaixjad zip guaddaii ee sii, huexciax dyrr banrhunx, kec’un :ee jit lo ban ban aw kok, iauxx bue jre qauwui, tnix amr sysyx. Hyw did dertauu jin’ sik, byy dinghuew, byy guehqngx, iuguann bongx u lo.

“Tnix byy jiauww qacjiw, langg byy jiauww tniliw. Guaw marr urngiaw decc lau pnaiw mia, jiac qaur taumngg cuiwciux vec :ar, qycc diyhh hro simvu knaixjuec.”

Guaw jre dirr bincngdy, a’vaa vnuar tedyw, naxx decc dauu hro guaw tniax ee sii, qycc vutsii e kamsaur.

“Tosang, liw siyw qycc zimw .jit .xe. Danw guaw jnii kiam u qraur brew cur, liw dyrr tangx vnuax laii qapp guaw jywhuew druar.”

“Doci soxjai, guaw druar be lyhsiy lar. Qycjaiww qongw, liw dirr qokhau-aw decc jyr sensnix, jit guehzit u tangx niaw qaur zuarr je? Guaw kir, si hro liw qex siongdiong :ee nia.”

“Byy cax qaxx liw jit der nguaw jit siangx di lar!”

“Liw u jit diamw simx, guaw dyrr jnia’ hnuahiw ar. Liw marr beh snax-jap :ar, marr hyw crua lor. Liw qaqi byy qinw jxig quaw bixbyw-aw, sniaw langg qnaw qra jaboxqniaw qer :liw?”

“Qongw diyc jnii. Hitt quaw qoxpiyr, liw sidjai diyhh kir niaw!” Guaw qongw.

“Jnia' vah qxah ee de jingsiux .kir, quiw dniux aw byy loring ee juaw dyrr beh qiyr guaw cuir trad .kiw .laii. Toxhuiw aw jingwhuw! Linw ve dyrr si be genr kir niaw!”

“Cam' jnii decc sraiw singwde, kacc anwjnuaw sngr dy’ be hyvnuaa. Jitmaw ee siarhue, longxx senxtauu-aw decc jywlangg. Sinhun narr qig e dang, benw qniax byy langg duiww liw harmaw, poo poo tnaw tnaw dy’ e or.”

Guaw huntiah hro tniax. A’vaa trow duarkuir, jinjniar hibii ee kuanw.

“Jit jua lo jiacc hng .diyc, liw qycc jniasit vniar .dngw .laii!”

Langg bue qaur, sniax singx qaur, dua-hniax sinkux-dingw jit niaw obah iauxx cing lehh, pacsngr si duxx dywdngw qaur cur.

“Cnemiaa ne! Iarr suacc ersaih byy dngw .laii.” Guaw qongw.

“Iarr jaix linw docirlangg taukag anwjnuaw decc juxvnuaa. Buw :a jyr duiwnii, liw dyrr byy dngw .laii!”

“Tihsiongg a!” a’vaa himhuah. “Langg’ ix dyrr qra liw qongw .quer .ar, qongxx jit zit kiamwkinn dyrr byy jiongxqimx tangx niaw. Qaqi ee siyxdi-aw lar, qongxue benw jiacc cnuacir!”

“Tosang, liw sniu cuac .kir .ar,” dua-hniax qinw beh venrqaiw. “Ix decc qawceh, vaiwid qaur vaiwlak longxx diyhh kir haghau. Guaw si qniax ix lexvair byy hiyh .diyc langg e tiamw.”

“Kechanw .liw!" a'vaa pnaiw sniasaur. "Benw qycc dirr hiax qongw qongw hiaxee cid dangg veh tih byy zinn :ee. Dnaxx langg qacc dngw .laii .ar, linw buw :a qapp linw qongx :a ee bong, binaxjair diyhh kir qra saur saur kacc qanghux lehh. Dingw nii aw kir, hex cauw-aw si huad qaxx dngg liuciux, linw a’qongx ee bong hiamw hiamw dy’ cue byy. Bycaiw linw a’qongx jairsnex ee sijun hiacnirr aw tniar :liw!”

Auwbuew aw qxur, a’vaa hunbingg si decc qongw hro dua-hniax tniax. A’qongx vacnii huer au, ciuxdew vangr be jiyw. Dua-sunx dingw buew qniaw, a’hniax u hxun diyc jit hxun. Dua-hniax si singlixkax, qorr hiaxee jnii jingxvunw kuix hangqaux, singliw zuxx jyr zuxx dua, jitt quiw nii aw, jaisanw, qehuew, qaxnaxx vutjiw aw u hro jxig .quaw.

“Zi-hniax lehh, u ix ee siausid bor?” Guaw mng, simqnuax damw damw.

“Mng hitt kox ee dairjir beh congw sniaw? Jitt xee tiksnix, siongrr hyw longxx mair qra guaw dngw .laii.”

A’vaa hiwqngw lramw, singwde narr giaa .kiw .laii, qongw diyc ue sui’ dyrr cuanw pnerpne, jingg kuir m jriab au kuir.

Zi-hniax jurjaw dyrr qaiww hongwdong, kaix-vruac-jiac-tid byy jit xee huncunr. Au .laii, ix kuix qiauxqingx, vruac quaww dongx, sux qaxx cnicamw logpig. Cittyy aw cimx mngg dac hxo laii beh tyw qiauxsiaur, vangwsniax qongxx qihan-lai byy hnaii dyrr beh jamw dng ix ee au kaqinx. Hitt jun aw guanw zi-syw dua vakdow urtex dilehh. Guanw zi-hniax simqnuax marr jnia’ hiongg, vangr bow li qniaw, jyww ix qaqi jauw kir guarhniux bih .kiw .laii. Ix bad an’ hiax siaw jit dniux puesinr dngw .laii, qongxx ix jauxlo kiamr soxhuir. A’vaa knuar suah, sui’ qra puex lir driau, krir putpud, huanhur cur nirr ee langg jit qakginn dy’ m tangx qiar kir hro :ix. Sniu diyc zi-hniax dirr tahiongx cimsinx, qox-vinn-kow snax zri juann, guaw sidjai jiokk m quewsimx, dyrr amr amr aw qapp siyxmue-aw inx camsiongg. Guaw hitt quiw xee siyxmue-aw, inx sui' langg qra sukiaginn ow jit quaw cud laii pnirkinx, dag'ee kingg kingg lehh jyr jit vid qiar hro zi-hniax jiamrr dro. Jitt jann, guanw byy hro dua-hniax jai’ngiaw. Inx ang’axbow, jniqngwtauu vak ann ann, qik kiuu buviw. Beh qiyr inx draur cud? Jiac kacc baiw lehh!

“A’jik’aw, liw qamxx u decc byy ingg?”

Dua-syw qiyr qaxx cinx howhor, dirr vangqingmngg-kauwlunx tauu lig am, aurviah qycc duer jit xee javoginxaw.

“U simxmih dairjir?” a’vaa ter guaw mng, jin’ pnaiw sniasaur.

“Tosang, si anxnix lar. Cuanx :a au .zit beh camqax haghau ee enxqangw-vixsair. Ix u singx tywven, sniu beh vaiwtog a’jik’aw qra guanw camkyw .jit .xe, knuar ix imx qongw liauw u junw bor.” Dua-syw suec'ue.

“Iarr suacc diyhh qaxx anxnix? Guaw knuar, liw si air denw kacc urngiaw.” a’vaa qongw.

“Byy lar. Acc dyrr doci ee guarsingxlangg kacc je, a’jik’aw dirr hiax decc jyr laursux, jiap jiap tniax, qokgiw dniardiyc qongw kacc u ganw, kauximx marr kacc jniar.”

Qongw suah, zi-syw qra javoginxaw sag laii taujingg. Jyr niulew :ee qra qniaw sraiw jit xee bagsig, javoginxaw naaudir-aw cringx .jit .xe liauxau dyrr kixqow.

“Guaw qinaxzit beh qongw ee debak si ‘Uersingx ee Diongriaur.’ Byy uersingx, dyrr qau bangxtangg, bangxtangg narr qau, dyrr kuair puawvne……, dirr ingbingg ee Jniuw Jongxtongw lingxdyw ji’ ha, lanw beh pacdyw banrog ee qiongrhuiw, qaixqiur Dairliok koxlan ee dongvaux.”

Duxx cutsir ee Cuanx :a jiokk qoxjuix, bagjiux ngii linlinx, bagjiuzinn qycc gauu dngxlunn. E qir did ix sir~go huer ee sii marr iauxx jin’ qenrdiux, jin’ tiauwtad. Duarhanr tagceh .kir, suacc venr qaxx qiux qiux, jiokk hipjingr, anwjnuaw knuar dy’ be duarvan.

“Qongw qaxx hex di’axue, u qaur jyy hni.”

Ginxaw jiacc qongw suah, inx a’qongx sui’ dyrr u iwqenr.

“Tosang, mair dirr ginxaw ee binrtaujingg qongw jex lar!”

A’hniax crinr tauu crinr bin, qaiww byy hnuahiw ee kuanw.

Cuanx :a tauu ngar ngar kia dirr inx a’vaa qapp inx a’qongx diongx:a. Guaw tanxkisinx liac ix knuar .jit .xe. Ginxaw ee binrhingg ham’ inx banx jig-aw ee suacc beh qangg aw beh qangg.

3

Jiac amr vaw byy girniu, jairqin ee iarci-aw laii kir qra sec sec lehh. Dngw .laii ee sii duarmngg sag .kuix, lairdew iuguann amr binbongx, byy qaxx jit pax denrhuew si dyc :ee.

Guaw qra caur buec-aw qapp a.-amjamx-j. ee lairsnakor, qui’ tong moh kir juixdyrtauu erkax zriuu zriuu tuah tuah lehh, iong cingjuiw tua liauw, sui’ niaw aw qra nee druar snaaxquir. Bruw beh jnia’ diamxjingx quw, jingsinn iauxx hyw qaxx, be tiamw, marr be air kunr. Qra tuacduu-aw lairdew jit jriw bunqecjuaw tec .cud .laii, bunjniux siaw qaxx dng’ sun dng’ siacpah ee sii, qui’ amr dirr guartauu hongsyx :ee sui’ xee aw syy .dngw .laii .ar.

Cuwtauqex sngwvnuaa gauu tag, uirdiyhh beh qex jiyx quaw cuwkax, qex siux quaw cuwsuer, snax-jap tongw pnee ee cur, qingqeh dniux qaxx lak qingx. Qycc ix air beh singw jnii, m qramx tiap jngx-aw buah angmngtoo qeh qingx, meniavangx cinwcaiw dingr dingr lehh junw duxhyw. Qokk langg dirr qaqi ee vangqingx-lai decc congr snaw, druar siy’ qecviah :ee horsiongx tangx tniax qaxx bingg ~ ~.

“Mair ar lar.”

“Qycc jit vaiw hyw lar.”

Qecviah qingx :ee cua cit’aw dngw laii quer mee, qenww vaiw dy’ bruw qaxx ping dua sniax, byy-kamx.-byy-jam. Obah tac lehh, lacvah-sryw ee mngg qra qnuix uaw .laii. Hro inx caw jit xe, beh anwjnuaw qycc siaw e cud .laii?

An’ jap-lak huer hitt nii kiw, guaw dy’ byy qycc dua quer jit cunr. Guanw daux, dua-hniax siongrr lyr, quann qaur beh vah-veh kir. Zi-hniax byy ix jiacc dua hanr, marr iauxx u vah-cid. Snax hniadi-aw lairdew, dyrr guaw siongrr ser hanr, kacc limw vah-lak nia.

Kyw diauu qongburguann liauxau, si u jit quaw cin'axdongg iacc cuwvnix laii decc vyr cinjniaa. Cauxde qoniuu cutsongg, sidjai cua be cud mngg. Acc narr doci :ee, langg’ hiamm lanw sniu’ exser, knuar lanw be jnriu bak. Jiacc zi-jap kacc tongw, dua-hniax qapp zi-hniax, inx longxx crua bow snex qniaw .kir .ar. Guaw huewtauu jiac qaur snax-jap, dnuasinx-pitbew dirr doci, qeau qaur jinw iauxx bue qenwdir.

“Langkecqnuax, zip laii jre lar!”

Qoniuu-aw iong bagbuew quah .langg jiokk gauu puann kxeh, cuiwdunn ee enjix diamw qaxx angg qiwqir, kia dirr mngbaii-kax ngiaxiongg.

Enhuax-qxair :ee, inx iarr jai’ngiaw diyhh qetci kacc hyw juanxjiac. Jit diauu amr hang-aw juann caiwdiamr, niau’axqingx, byy vadd jiongw diamwbin.

“Zuarr je?”

Guaw tauu damr damr, dac jinwjingg kir mng laurcangx :ee.

“Ing’amr iauxx bue kuici lehh. Liw kiarr guanw tauu jit xee langkeh. Digvet sarvis, sngr liw snax-jap dyrr hyw.”

Guaw liyc aw sniu .jit .xe, dyrr an’ lakde-aw zimm snax dniux cnex bin :ee cud laii hro ix.

“U hanrdnia air sniaw kuanw :ee bor? Si beh qiyr iuwkiw :ee, iacc si liw air beh kacc sik :ee?”

“Cinwcaiw lar. Mair hro guaw hitt hy vaiqutsox :ee dyrr hyw.”

Kanqongtauu et jit xe ciuw, huanhur erciuxlangg laii cua guaw zip .kir. Jit xee den olangtauu :ee sui’ dyrr uaw .laii. Jitt xee hniadi zinjaii pixuiw hnuaibacbin, texqeh kiycliap ~, m si jin’ angwjangr. Ix qui’ sinkux dingxe dyrr ix ee quntaubuw siongrqaiww hniaxbak, jiokk haix, snex bagjiux m bad knuar quer jiacc dua kenx :ee.

Lairtauu amr amr jniur jniur, pnri diyc cauwziyrhiamx. Olangtauu :ee cua guaw qaur jit qingx vangqingx ee mngkauw. Jit xee siyxjiaxlangg cing qaxx jin’ bacqamw, bin hiongr viah dirr bincngg-dingw dyw tanxdit.

Guaw ho’ngg sag .zip .laii. Siyxjiaxlangg-aw knuar diyc guaw laii, dyrr kaisiw decc trngr snxax.

Denrhuexqiuu-aw dyrr decc ser liap, qycc hro langg ing angg dimdimx ee vylejuaw vaux .kiw .laii. Siyxjiaxlangg-aw ee ang'axbin knuar byy sniaw u, dogdok ix ee bagjiux, bersux nng pax denrhuew, qngx sicsih, dua dua luiw, hro guaw sniu kiw diyc zit .sii ee dua bak aw qoniuu.

“Liw qiyr simxmih miaa?”

Guaw qorr Vakqniagiw qapp ix qongw. Qoniuu-aw dner diam diam liac guaw qimx qimx siongr, liauxau, uat jit xee srinx, kajiacpniax hiongr guaw. Duxjiah jiacc trngr .lyc .laii ee snxax, ix jit niaw jit niaw qycc qra cing .dngw .kir.

“Anwjnuaxngiu aw? Lanw beh ngua vangqingx, si bor?”

Ix hnair tauu, jit xee bin sim ~ ~. Guaw liahjunw ix exqauw. Quer u .hiacc .quw .aw, ix suacc cud sniax qongxue.

“Guaw jitt siwlangg, vorvinn m bad knuar quer guanw laurve. Guanw buw :a qanda’ qra guaw qongw ix si jit xee guarsingw :ee, sner sniaw miaa sniaw, guanw buw :a jngzenn m jaix. Guanw jyr jitt dxoo :ee, sniaw kuanw langkeh marr u. Dycc jit qangx narr hiacc duxdng, guanw cinhniax cinde iacc viauxhniax viauxde laii jiax kaix, juwsiw hro guaw jriab .diyc, anxnix dyrr jinjniar juerquar lor!”

“Guaw m si guarsingw :ee.”

Tniax ix anxnix qongw, guaw qinw ngua qongw Daiuan’ue.

“Omidohut or, tacc e u langg nng jiongw ue longxx jiacc gauu qongw .diyc! Liw unxdangr jiokk u gixgenn-tenjaii.”

Qongw suah, ix ngar lyc srinx decc cing ree-aw, hxingx-jingg nng liap nix-aw henr henr, qiongbeh jauw cud laii knuar langg.

“Jitmaw iurqycc jnuaxngiu? Dyrr qra liw qongw guaw m si guarsingw :ee, liw tingwhyw hongwsimx a!”

“Jin’ duiwvutju, ing’amr byy simjniaa jyr liw ee singliw :ar!”

Ix an’ ix ee ginlag-aw kingg go-jap kox cud laii hro guaw, viw guaw jinwjingg lap .cud .kir .ee iauxx qex zi-jap. Guaw jiokk sniu beh ciongx .quer .kir qra ix var lyc kir bincngg-dingw, iauxx decc pacsngr, langg’ ix taujangx vinr vinr kiyh kiyh lehh dyrr jyww ix qniaa .cud .kir, byy qycc qra guaw junwbun qaxx jit sxix.

Kanqongx jid’err knuar diyc guaw, sui’ dyrr ngar tauu knuar ix ee siviyw. Ix ciyr qaxx jin’ aiwmai, kia dirr mngkakauw qiyr guaw u ingg jiacqycc laii.

Guaw siangx ciuw cah dirr kowde-aw lai, iarr byy kir vadd qingx lingrgua qiyr siyxjiaw, qui' jua song song qniaa .dngw .kir.

Hitt amr, iuguann si qodnuax jit xee dyw dirr bincngg-dingw, mipue bongxx lamw kacc kunr e lyc binn.

4

Dniaxquar jid’err henx .kuix, tatami jit xee cauwpuw-bi dyrr qaxnaxx kacc byy .kir. Huexqyx qunw ciangciangg, jit buew cnrex tiaur tiaur ee cauxhee danr .lyc .kir, kacc benw vnuar hunjingx, qui’ jiah dyrr venr qaxx angg qongwqongr. Sir~go-jap huer kuanw ee nejiang byy ingg kiw byy ingg lyc. Jitt xee air limx beh’axjiuw, hitt xee kacc hingr cingjiuw sake, qycc marr u langg tyw beh limx Anglorjiuw, gnoxqavii. Dag’ee jiauww jaxjingg ioksog ee siqanx dngdew aw laii, uree tejaw, uree kacc nguar .damrvyc, lorbuew jap-zi xee longxx u jiauu qaur.

“Linw qamxx e qir did qiamw lanw jit qair, dirr haghau venx jabjir hitt xee Goo :ee? Tniax qongxx jingg quiw zit aw hro Qingxjongw :ee kok .kir!”

“Acc dyrr kamr tauu kamr bin, cnimii m qniax juaa lar. Jniuw Qaiwjiyc qamxx ix decc qiyr :ee niih?”

“Si dyrr driyc m.”

“M jaix e qra pnuar sixhingg .be?”

“Qnaxx be lar. Ix siaw :ee hitt pnxix, tauu qaur buew longxx decc poo Jniuw :ee. Jaiwvutzenn, qra sangr kir Huexsiyx Dxyw qux .quiw .nii .aw suah.”

“Guaw decc knuar marr si anxnix. Acc narr guanw jit xee dirr sinbunsia jiac taulo ee cuwvnix, ix dyrr jin' jiahlat.”

“Ix si anwjnuaw?”

“Langg' dag’ee jitmaw Binqog dy’ ing qaxx quanwsir quanwsir, ix dyrr hiauu kacngx, byy-sur.-byy-qor jauw jit xee seguannii .cud .laii. Inx qongw ix susiongw u jauxcuac, qycc qongw ix si qiongrhuiw, u iwdoo beh jyrhuanw.”

“Narr virr pnuawdnia si qiongrhuiw, unw ho’ngg paccingr jauw be kir.”

Jiacc qongw suah, dyrr u tniax diyc trow duarkuir ee sniax. Siyjiuxvuex-aw pangg kiw laii qanvuex, dag'ee longxx bersux decc quanr dorqauu.

“Kux :ee, tniax qongxx vywjuaw huwkanx jingg:a bad kranx quer liw ee six. Qamxx urngiaw?” Bagqniar :ee mng :guaw.

“Urngiaw lor, tacc u hitt hy byngiaw! Laii, guaw gimm jit dnxua hro linw pnirpangx .jit .xe.”

Abula kia .kiw .laii, ciuw tenw kuix dniux jit xee sinser.

Lamdyw ee ciurnaa

M vad joxqog dangseh ee qnuaa

Dangx hongx nngxluanw

Cuex be quer haixqiab hitt vingg hnua

Simx subo :ee ar

Liw siurr langg kunxvak

Camxceh ar camxceh

Tniax diyc liw cuanxkuir ee sniax

Abula liam suah, dag’ee dua lat quad ciuxjniuw.

“Kaksit u giydy dyrr driyc, vitbuew be sux inx guarsingw :ee.”

“E kranx dirr vywjuaw dingxbin :ee, hex snesingg janw :ee lor.”

“Qenwsiaur qenwsiaur, ovec ut :ee lar.” Guaw cuir anxnix qongw, simqnualai amr hnuahiw.

“Liw quewkiamx lar. M si qongxx u diyhdingw?”

“Urngiaw or! Kux :ee, liw sidjai jiokk u bunjaii, Zidbunn, Diongbunn, siangx vingg tongx.”

Guaw taukag lee lee, simlai itdit jubuix .kiw .laii.

“a’Huad :a, liw u siaw jit pnix dew bunn qongxx beh inw taulo ing :ee, liw beh liam .jit .xe bor? Hro dag'ee pingg knuar hyw iacc baiw marr tangx qra liw cud iwqenr.”

Hxur vandniuw decc qongw ee sii, qycc naxx ing ciuxqow decc dux a’Huad :a. Ix lang’enn be baiw, jin’ zedsimx, jyr dairjir iurqycc diamxdinn. Guanw tak Zirdiongx ee sii, vandniuw dagg nii longxx decc ngua, dogdok hxur vandniuw, ix jiokjiog jyr snax zim.

“Qamxx hyw? Pnaixser pnaixser ne.”

“Dnaxx decc pnaixser sniaw?" hxur vandniuw qongw. "Jiaxee juann sigsairlangg, iarr m si decc byy siy’ bad.”

A’Huad :a an’ kowde-aw zimm jit dniux juaw .cud .laii, ziauu vecveh, binrdingw siaw qaxx bat bat si.

Guanw daux u sir xee hniadi-jixmue, guaw ban’axqniaw, dingw:a u jit xee a’jew qapp nng xee hniaqyx. Dua-jew dirr Zidvunw Dairjingr Sidai cutsir, guaw qapp nng xee hniaqyx longxx si Jiauhyy Sidai snix :ee, guanw horsiongx longxx cax nng huer nng huer.

1945 nii, Taiwvingg Xngiuu Jenwjingx suah, qokbinn jingwhuw laii Daiuann, guanw laurve vuthing dirr qecdngw nii quewsinx. Hitt jam aw, budjux jin’ kueh, jnii jit zit jit zit vyc, jnia’ je langg longxx decc iaux vakdow. Guanw buw :a uirdiyhh beh jaivuee ginxaw, qovutjiongx, jiacc kir qer hro jit xee axsnuax :ee jyr bow.

Kacc camw dyrr au angx be uaxkyr .did. Guanw guarsingw-aw aurjig si vuahqiauxsenx, qxiauw sux, byy jnii tangx hingg qiauxsiaur, dyrr qra guanw a’jew sangr kir hro ix hitt quaw jewjuw dixhingg. Guanw buw :a jid’err jai’ngiaw, cecsimx .qaur .der, suacc jauw kir tiaur qangw.

Guanw a’jew jin’ giamxgne, qra guanw a’buw sangr cutsnuax liauxau, ix vauhok-aw kuanw lehh, tauwmee cua guanw snax hniadi-aw lirkuix guanw aurjig ee cur.

A’jew ix jiokk tniar guanw, uirdiyhh beh hro siyxdi-aw snax dxngr jiac e vaw cing e siyx, ix zit iarr jyr, mii iarr jyr, hyw kangx :ee hyw liau :ee qeww lauu hro siyxdi-aw, qaqi jiacc laii jiac qaxx genr genr, sanw qix lyc hiyc.

Qnaxx si jyr qaxx quewtauu, zi-jap gua huer, a’jew dyrr laii dir diyc hiwlyy. Ix jit siwlangg byy qewangx, quewsinx ee sii dy’ jiacc snax-jap tongw nia. A'jew ee unjingg kacc dua tnix, guaw ingxuanw dy' be vangr be qir.

“Iarr u langg inw taulo anxnix siaw :ee. Dyrr m si decc siaw siyxsuad qyc.”

“Dua sizinn ar, liw knuar ix anxnix siaw qamxx u tongx?”

“…”

“Siongrr jiwjiyw, guarsingw-aw aurjig hitt dnxua diyhh qaiw.”

“Hmr. Hniah caa tnrix huew dyc, u qiausyx guarsingxlangg qapp vunxsingxlangg kiw ciongdut ee hiamgii.”

“Vecsner hah qaxx siw byy langg hitt dnxua, uanaxx m hyw siaw.”

“Driyc! Dairiuxuii ee jingwhuw decc hnuarvnuaa, vecsner nacc u kyxlingg e iaux dow?”

Dag’ee decc pah ciywkuex, ciyr qaxx dangx dyw saix uaix. U langg tehtauu qongw duiww jabow-kangx .kir, dag’ee simjingg qex jiokk kinsangx, siyjiuw quanr .lyc, maxsex maxsex, Zidvunw qunquax hingjinwkig jit vxenr cniur quer jit vxenr, byy-qimr-byy-ki.

5

Dangjeh-ngii jiacc jiac .quer, dong'uw dyrr qauwui :ar, jit vrangx lyc .quer jit vrangx qnuaa. Hiuu-aw, liambah, pongwsesnax, dirr jitt hy tnix, qaxnaxx cing qyckacc je dy’ longxx byy qraur knuar. Radio u decc vyr, qongxx jitt quiw zit aw undo e qycc qangr, qiyr dag’ee snxax diyh’air qex cing .quaw. Langg' decc qongxx lau puee be quer hongx. Mrqycc laurduarlangg ee hueh kacc lyy, huecqngw narr hro het’iuu trad diauu lehh, huicqngw viag puar lyxcionghed, qnuaa .langg kunr kunr aw siw :ee marr be qaiww hihanw.

A’vaa jniurnii ciuxsut .quer liauxau, sintew dyrr qyckacc hix .kir, jid’err venwtnix, ix dyrr kiw kamsaur, sraur qaxx sniu’ cud lat, urdangsii aw qycc e auw hueh. A’vaa sintew baiw bongxx baiw, dirr inx jitt enn :ee, ix sngr jiac dngg huewsiu. Langg narr jiac lau, angg-veh vaux, zinjingg vueduer, hex snevunw e kacc je. Jit tauwjaw, dua-hniax dngdoo :ee low .laii, qongxx cur nirr jarhngx iurqycc siux diyc jit dniux huwimx.

“a’Jaii Vxeh :a dingw lexvair quewsinx.”

“a’Jaii Vxeh :a!” guaw cokgok .jit .xe.

“Acc dyrr ixjaw lanw daux ee cniar :ee a! Ix u jit xee haursnex qiyr Bingg :a, duarjic duarjic hitt xee, u inwsiong bor?”

Guaw qig diam diam byy inwsniax, taukag-lai sniu kiw diyc jit xee sanxkiangx qiamx vyc vxanw ee javolangg, nng qix hniux hniux ee kaqud jit vingg kiw jit vingg lyc hermia decc lap jit daii snalenxciax. Guaw e qir did hitt xee javox :ee taumngg sesamr sesamr, puebah osenx osenx, zuahtnix-sii, sinkux jit niaw lairqac’aw qaxnaxx vutquanxsii dy’ damm loklog. Qongw marr decc qrii, ix ee binrboo-aw simxmih hxingg, pni bak cuir snex jyr sniaw kuanw, guaw sen’ sniu dy’ sniu be kiw .laii.

“Ix anwjnuaw siw .ee? Qamxx si puawvne?” Guaw mng dua-hniax.

“Qongxx si simjongrvne huatjog.”

“Inx qamxx byy qiyr qiuwhorciax sangr vnerngi jyr qipqiur?”

“Acc dyrr inx cur nirr ee langg huatqenr ee sii, langg dyrr siw qaxx gen ~ ~ :ar. Tniax qongxx hiangwsii jit quanr Qiuwsimx iauxx dnec dirr ix ciuxtauu, pacsngr si iyhquanr bue hur kuix .kuix dyrr cuah .kiw .laii .ar.”

Tniax denrue hitt vingg ee langg anxnix decc qongw, guaw suacc naxx cincniu u cinbak knuar diyc a’Jaii Vxeh :a beh quewkuir jinwjingg, qo’ jit langg dirr tokax decc qunwlingr ee cnicamw hxingg.

“U qongw dangsii beh cutsnuax bor?” Guaw qycc mng.

“Au lexvair.”

“Tosang qamxx u beh kir diauwjer?”

“Ix sniu beh kir, guaw qra qongw m tangx. Vaa u huer :ar, be kamx did laii laii kir kir anxnix decc lik.”

“…”

“Guaw knuar marr diyhh liw kir qniaa .jit .jua. Jinw dua guec, jingg:a jit xee sinlyy qycc byy druar :ar, guaw dagg qangx dy’ bruw qaxx beh oamwhinn, sidjai jauw be kuix kax. Inx daux li liw hiax dy’ iarr byy qaiww hng. Liw dyrr knuar dycc jit zit kacc ingg, vuah jit xee qangx kir qra liamhniux qnialew .jit .xe.”

Denrue cetdng, guaw dyr ciuw tuh dirr erhaii, dua dua lat trow jit kauw kuir.

Siqanx decc quer jinjniar qinw, jit bak nih quw, Zidvunxlangg dy’ jauw beh zi-jap dxangx :ar. Qokbinn Jingwhuw cocox suaw laii Daiuann hitt quiw nii, guanw cur nirr suacc dyww lyhlab, dyww vangvai, dorzit dyrr decc qanlann :ar, nacc u jaidiau qycc cniar suxiongrlangg. Qovutzirjiongx, a’Jaii Vxeh qoqniaw Bingg :a knaiw lehh, nng xee veaxqniaw jurr anxnix vnuax lirkuix guanw daux kir guarui aw tyxtanr.

A'Jaii Vxeh :a jin’ diongdit, jin’ siyh jxingg. Dingw nii aw a’vaa modng’iam ciuxsut, ix u juanqangx laii bairvne, knuar diyc guanw, uanaxx “tauqex, siauwiaa” decc cinghox. Ix laii hitt qangx duxcenx diyc guaw dirr vnerngi qor guanw a’vaa. Guanw decc mng kiw Bingg :a ee dairjir, jiacc jai’ngiaw qongxx Bingg :a u tec diyc iogjaijox, quer qiamjuiw kir dirr Bixqog decc liuhak :ar. A’vaa ylyw Bingg :a u cuttuad, u jiongxjinr. a’Jaii Vxeh :a jin’ kiamx, duiwcuir dyrr qinw qongw “by’ngiaw by’ngiaw”. Ix qongw ee sii, cuir ciyr bak ciyr. Guaw jin’ jai’ngiaw qongxx ix simlai itding jin’ lepuew. Hitt qangx sngr guaw jitt siwlangg siongrr buew vaiw knuar diyc ix.

“Kux Laursux, liw si decc sniu sniaw? Dirr mngkakauw knuar liw jit xee langg jre dirr jiax qamquh qamquh, sniu qaxx juu ~ ~. Qra liw qiyr quirlyrr sniax, liw longxx byy qra guaw rinr.”

Hunwdy-juxzim byy-dniu.-byy-dii qniaa uaw .laii, ciuw hnua dirr guaw qingqactauu decc mng kiw. Guaw qinw qra hue sitlew, simqnuatauu damw damw, mng ix u simxmih dairjir.

“Liw cur qamxx iauxx suer dirr lanw haghau jit koaxuii byy vnuasuaw?”

“Si lehh. Anwjnuaxngiu aw?”

“Marr byy lar. Acc dyrr dingxquann hiax qiyr guaw mng .knuar .lehh, knuar dag’ee jursow u qaiw bor.”

Hunwdy-juxzim qongxue u dair jit xee Jetqangx-kniux jiokk dang. Ix siongrr air cing hitt hy Diongsanjongx, dyrr si dingxe jongxqiong u sir xee dua lakde-aw ee snxax.

Ehngx harvanx, guaw byy sui’ dngw .kir. U dairjir kuar dirr simtauu byy qinw cuxliw-l. lehh, kacc anwjnuaw dy’ be kinsangx. Guaw qniaa kir duiwbin jre sraiw duiww ci-gua ee qongciax. Ho laii, tnix decc amr qex kacc qinw, suqix jaw jaw dyrr qra ciax-lai ee denrhuew kuix .kuix.

Qongqiong dniuhap   cniaw qongw qokgiw

Qiamxqiw huixdiap   langlangg u jikzim

Bersux Sinjniax-sii aw ee mngduir, jitt nng diauu jingwling cavutdyx dagg daii bus dingxquann longxx knuar e diyc.

Qongciax uaw jam dongwdiam, guaw duer dirr jit xee obasang aurviah lyc .kir. Beh quer qiyy diyh’air ngua jit vrangx ciax. Guaw pacsngr qorr vorlenw :ee. Id qiamx zi qor, singw jnii, qycc tangx tranr qihue siyw unrdong .jit .xe.

Qiyy-dingw ee hongx jin’ taur, qycc si jniwhongx. Guaw cing qaxx jit sinkux vunrcingg ~, iuguann kax ganr, ciuw ganr, qnuaa qaxx e dakkiw.

Horsnuar bersux cringr pnxi qoo :ee, hairqauu baixlo hxuer, buerbatbue dyrr kuix horsnuawhuex. Guaw quikir qra siux siux .kiw .laii byy beh ziax, piywhongx-piywho, jidbin qniaa, jidbin junr.

Quer qiyy .quer, dirr derr zi xee hang-aw-tauu uad jniar uad, sui’ knuar diyc hang-aw-buew u dah jit xee horvnee, hng hng dyrr u tniax diyc saiqongx siongrqingx ee sniax. Guaw qniaa uaw .kir, singx qra a’Jaii Vxeh :a siyx snax jangg hniux, habciuw qniaa jit xee duarlew liauw, dre dirr amwqeh ee juaxqingr qinw tec .cud .laii.

“Tacc e byy knuar diyc Bingg :a? Ix qamxx byy dngw .laii?”

Qaidongx qniaa ee lexsor jiauvi, guaw kinx sniax hiongr songhu mng kiw.

“Ox miadnuax lairdew u ix ee miaa, si beh anwjnuaw dngw .laii?”

“Ox miadnuax! Tacc e anxnix?”

“Acc dyrr hnirkangx kinx qycc bongwdnaw m, duer langg kir camqax simxmih qux-lyx-vih-syy, mic’axvar ee hue. Qnuatniax qongw ix qapp qiongrhuiw qangg quah :ee. Dnaxx jitt sniax laurve siw iarr suacc berdangr dngw laii qra sangr cutsnuax. Liw knuar e hiauhing .be?”

A’Jaii Vxeh :a ee birbongzinn naxx hnair tauu naxx trow kuir. Ix qapp a’Jaii Vxeh :a jitt jann im’enn, sianghongx longxx si zirhuncinx. A'Jaii Vxeh u jit xee haursnex. Ix si quaww nng xee duer-qiy-au :ee qer hro a’Jaii Vxeh :a juer qewcex.

“Bagbaimngg byy jniux amw, jingwdi :ee ix iarr qnaw kir hax! Liahjunw beh cuttautnix :ar qongxx, ix suacc dirr Bixqog qra liw bruw jitt cud :ee. Qoxjaxlangg decc qongw, ‘jit xee jyr pnaiw, lui qinx lui dinn’. Guaw jitmaw decc huanlyw qongxx guaw hitt nng xee m jaix e hro lrui .diyc .be.”

Birbongzinn qorr ciuw qiw decc vyr guaw knuar. Nng xee siauwlenn :ee kuu dirr jit kax qimdniaw vnix:a dngdecc qra inx aurjig siyx kowjnii. Inx longxx u duawsnghar, mngkax dngg liuliux, cuiwciux hoo laplab. Knuar inx ee hxingg, qaxnaxx qiamw guaw byy quiw huer ee kuanw.

Bunrsongx liauw, dngw .kir ee lo, guaw guanjai iong vorlenw :ee qniaa quer qiyy. Amr niauniaux, ho iurqycc decc dua puah, qongciax sraiw .laii dyrr qra kxangr kiw kir jre. Lo uanx laii uad kir, qapp beh laii ee sii qniaa ee lo longxx byy qangg. Quer beh vnuar diamxjingx iauxx jre be qauwui, guaw simlai dyrr decc kiw giaugii. Mng jit xee jinx, jiacc jai’ngiaw hud m driyc .kir, cid :ee qra knuar jyr veh :ee. Guaw qinw lyc ciax, qnuaw kir duiwbin danw huantauu ee ciavangx. Puevaux-aw m jaix dangsii kir ho’ngg jenw .kir. Jnriu ciax liauxau zimm byy jnii, jiacc jre jit jam iurqycc ho’ngg qnuaw qnuaw .lyc .laii. Sinkux dngrr vnuar sxenw, beh kar jit xee aw denrue tyw qiuwvingx dy’ byy jaidiau. Jinjniar dy’ qniaa byy vo :ar, qovutjiongx, jap-id hy ee qonglorciax marr diyhh bongxx tuh.

“Kux Jingwhiongg hnoh? Lyhuann liw qapp guanw qniaa .jit .jua.”

Guaw jingg kax jiacc dac zip mngg, nng xee cing hong’ix :ee duer guaw ee kacngx au zip .laii.

“Linw simxmih langg? Rair guaw duer linw kir beh congr sniaw?”

“Guanw diaujaqiok :ee. U quaw dairjir beh qra liw cingxqaur .jit .xe.”

Dirr guarbin qapp hongho jenr jit amr cimxx qaur cur, taukag h.-hunrdun-d. Guaw iauxx bue hur huanxingr, inx nng xee jit langg jit vingg sui’ beh qra guaw rah jauw. Guaw uat tauu hiongr lairdew ngiaw .jit .xe, m jaix si dnarbak iacc si qniax .jit .xe gongrdenx, jit sii, naxx cincniu u knuar diyc huexqimqox ee qngx, jit jiah jit jiah dirr txangx-aw-vnix decc sih lehh sih lehh, sih lehh sih lehh.

6

Cuntnix ee kavo qniaa laii qaur Dangqniax, gnoxhuex-jabsig ee sakura siongrr dairsingx jai’ngiaw. Sinsiok jitt vingg ee inghuex dngdecc dua kuix, Siongriaw hitt vingg :ee lag qaxx beh jin :ar. Zidvunxlangg jiacc air inghuex, tniax qongxx, u vorhun dyrr si uirdiyhh ix hueqii dew kixqenr. Angg :ee, hunw :ee, qycc iarr u vec :ee, jit jangg jit jangg siy’ puac siy’ muax qnaiwsig kuix, suiw qaxx be qor .did.

“Kiu Sangr, decc iongrqongx or?”

Guaw jre dirr dosuquanw ee ket’aw, naxx knuar ceh, naxx decc sniuxhuex. Jingwdi Sow ee Jin Sangr qniaa uaw laii decc siyjiycmng.

“Byy lar.” Guaw qanxdanx qra rinr.

“Ing’amr u donghionghue. Beh jywhuew .laii .bor?”

“Byy huatdo ne. Qauwsiu huanhur ee ceh jxig jxig qui’ dux longxx iauxx bue kir vingw. Tranr jitt xee lexvaiwzit, guaw diyhh qinw qra siauhuar danwsag.”

“Byy cax qaxx hex jit amr lar. Lanw jex jurhue, jit guehzit mrjiacc jit vaiw nia. Vnivnii Daiuann laii ee liuhagsingx, dag’ee kiyh kiyh jyr jidhuew bongxx kaiqangw, qeqiamw marr tangx tauw jit xe aw simx bun.”

“Guaw knuar, au jua hyw lar.”

Guaw nngw nngw aw qra qirjuat. Duiwhongx qingqactauu giac .jit .xe, byy ir aw byy ir ee kuanw.

Tnidingw siyxkuaw decc punr ho. Ciuxtauu ee qapceh si dosuquanw jiyh :ee. Guaw qinw qra siux zip kir kabang lairdew, sunrsuar qra osig ee horsnuar tec cud laii ziax.

“Vaijua vaijua!”

Danw beh brew piyr :ee jit let vaii qaxx jin’ u dedsu, jit xee javolangg siauwsniu beh an’ diongx:a cah .zip .laii, sui’ dyrr hro langg' qra nuajac.

“Unxdangr iurqycc si Diongqoklangg. Jnia’ byy quiqiw.”

Jit xee ozisang qra jit xee obasang qongw. Guaw tauu ngar ngar, marr m jaix qaqi decc qenwsiaur sniaw.

Derhartih dirr tokax erdew decc jauw, bersux qui’ jua longxx decc quer vongrkangx qangrkuanw. Langg tattad dni, mrqycc be caw, jin’ diamrjing.

Jniawciuxvingg kia jit xee qyhau ee javoginxaw, ix ciuw nirr pongw jit vunw ceh dngdecc tak. Sraiw ciaa bak qra siamx .jit .xe. Cecganw si 1984.

“Liw tiauqangx beh tyw puee tniar :ee m? Dongconghue ee miadnuax qycc m qinw let .cud .laii.”

“Simxmih dongconghue? Guaw m jaix. Linw qyckacc anwjnuaw qra guaw hringg marr byy kacc juac. Byy dyrr si byy.”

“Guanw ee ganxbak diaujax qaxx id-cing.-zi-cyw, dikkag be dingdnaa. Liw dyrr mair qycc juewjyh lar."

“Qacc anxnix, linw berhiauw qycc cniar ix kir craa. Cutbe ving’iuw ee dairjir, guaw quatding be jyr!”

“Jiacc gnirkir or! Acc narr kir hueqingx pah cauwcyx, kaix hitt hy birsinglenn ee iuwkiw :ee, jex, liw dyrr jyr e lyc ciuw lar hnoh?”

“…!”

“Iauxqycc u lehh. Liw qapp haixgua panwluan hunrjuw u decc laikir. Jitt jann, guanw ciuxtauu si u-jingw.-u-qur dilehh. Angg by-aw qapp vec by-aw longxx qra liw dir .kiw .kir, qaur sii qaur zit, liw jit srinx dy' byy qraur siw!”

“…!!”

“Liw dyrr quaix quaix aw qra miadnuax siaw .cud .laii. Guanw vyxniaw liw benw jerqnax, lenrr anwdew dy' be lauu.”

Guarkauw amr sysyx. Denrciax-lai u denrhuew qngx ngiawngiar, bin duiww vyletangx dyrr bersux decc jiywqniar.

Guaw huehunn giaa tauu, qniax .jit .xe qiongbeh puawdnaw. Jit xee qauciangg dua hanr, bin siwqag siwqag ee javolangg kia dirr guaw ee aurviah, m jaix qra guaw jimjiog zuarr quw :ar. Kax lingw ciuw lingw, simqnuax pigpok tiaur jiokk qinw. Jre dy’ iauxx bue qaur jam, denrciax dongwdiam mngg kuix .kuix, guaw vniar derr id tiaur lyc ciax .kir.

Derhartih ee cutkauw u jit dnar decc bre vywjuaw :ee. Hex tauqex byy ingg ciccih, dngdecc qra amwvyr kngr kiw qxer-aw-dingw. Guaw qra lakde-aw ee ginqag-aw kingg kingg lehh, duxhyw u qraur brew jit hxun vywjuaw.

Daiuann ee Jniuw Jingwhuw, jarhngx iurqycc cingwsad snax xee susiongxhuan.

Jitt diauu sinbunn kranx dirr derr snax vanw dywciuxvingg ee erbin. Daiuann ee muitew, jitt jiongw dairjir, inx longxx byy decc vyr. Denrsi, vywjuaw iacc radio, longxjongw be vyr.

Tokio ee qetauu ox kamkamm jit pxenr, langg dyrr si langg. Jyr ginxaw ee sii, derr id ngwbang dyrr si jre junn laii luerde jiax iulamw cittyy. Quer zi-jap nii liauxau jniasit laii qaur der, guaw dyrr iarr m si ix ee qokbinn :ar.

“Kir qaur Zidvunw tagceh, jingwdi ee dairjir dyrr cenban m tangx kir bag, jaix bor?”

Dua-hniax dirr Siongrsanx Qidniuu qra guaw sangr ee sii anxnix qaudair. Jurr cutsir jyr hniadi-aw, ix ee juxdniux dyrr jitt vaiw qapp guaw ee siongrr ba.

Qnaxx si jingg jit amr utjimw kunr byy vaw binn, tauu jit vaiw jre huelingqix, qycc siyxkuaw e hinn. Lyc huelingqix, guaw qinw dua lat suh jit cuir kongkir. Qniwjinx u juriuu ee kiwbi!

Dirr Dangqniax, jit dongr jit dongr ee lau’axcur kiw ping quann :ee, dag’ee qnialo ee sokdo viw draur qinw :ee. An’ tenqiyy-dingw knuar .lyc .kir, erkax ee langg bersux jit din qauxhia, jiax jngr hiax nngr, m bad decc tingg kax hiyccuanw.

Bagsaiw m jaix dangsii linr .lyc .laii, qaqi jngzenn byy diwqag .diyc. Giaa tauu knuar duiww qowhiongx hitt vingg tnix, simlai jiokk sniu beh jai’ngiaw, canjngx ee duarser jiah juixguu, jitmaw qamxx iauxqycc decc tuax ciax?

Derr Snax Jam

1

Jarbo-ehngx, ser jiah :ee jin’ huanxsiongr, diddit hauw, kacc anwjnuaw dy’ penr be diam. Inx buw :a qra ngaw dirr hingkamw beh iyy hro ix kunr, bin ur diyc ix ee tauhiac, hangx hangx, amrqunw qycc jit diamw jit diamw angg angg, cincniu si kiw cinwmoh.

Jyr laurbuw :ee m qramx diucdiuh, iyh qongxx si decc cud piac, qiyr guaw diyhh qinw py kir isingquanw. Snax qnxix mii vnuar, marr qanda’ dua vnerngi ee qipjinw u decc qa’ngg knuar. Qewdingciax ongxhuee jit jua diyhh quixlyrr kox, qycc vnerngi ee sensnix, tauu qniwbin dyrr qra guanw memex jur jit dxangg dua dxangg :ee. Guaw zit .sii dirr vanrqongsig jre veh~qauw diamxjingx tanr :ee, cid kraur veh druu, jit xe aw quw dy’ longxx punw .kir .ar.

Dngw qaur cur, ginxaw sui’ qinw dux hro guanw kanx:ee. Jaxkiw, jurbingjingx u giangx bor marr m jaix, jid’err kunr jingsinn, veh diamw quer go hunx!

H.-hongqongg-q., be qir did qimzit niaw hxiongr diyh’air ing diyc inwjiongx. Dyrr si uirdiyhh anxnix, jinw jiacc diyhh laii dngr jixboo, bag qaxx qui’ xee jingxtaubuw juann inwsig liauw liauw.

“Pnaixser. Liw qaxnaxx qiamw sngr snax-vah ee kuanw?” Huerqer siyxjiaw sinsuixde-aw qaux hro :guaw ee sii, guaw knuar hex juaxlog-aw dingxquann siaw :ee u gorbiu, sui’ dyrr qra mng.

“Liw decc tentyc!” huerqer siyxjiaw bin-aw lruac .kiw .laii, duiwcuir qra guaw pngc. “Dingw zit aw liw laii, rair guanw snax-vah kox ciauvuah, danw guehdew huad qipqimx ee sijun jiacc an’ lairdew kraur. Jiycgindnuax binrdingw u liw ee ciamzi. Guanw jitt vingg si hro liw be hamhoo .did.”

Urngiaw dyrr driyc. Hitt jun aw jnii ann, kanx:ee qiyr guaw singx qra qongsix jiyh. Iarr bogquair guaw e be qir .did. Hex jnii quer guaw ee ciuw dre iauxx bue siyx dyrr ho'ngg tec .kir, jit qakginn qaqi dy' kaix byy diyc.

Langg sen daucdauh, nngw qaucqauh. Qniazit vaiwsnax, kactingg aw harvanx qycc diyhh qnuaw kir vadd xui. Jitt xee sittauu sngr qiamx :ee, qanda’ id, sxamx, gnow ee amwsii. Jingg jit jam aw jnikuir u kacc ann, kanx:ee u dngw kir aurtaucur qra inx nisang kuix cuir. Guanw dua-qu’aw jnii byy jiyh :guanw, suacc ter guaw inw jitt xee taulo qiyr guaw diyhh kir jyr. Kacjaw dirr Zidvunw tagceh ee sii, dyc’ui u alubaido ee kueh, guaw uanaxx e kir juanw. Jingcax qongxx hitt sii narr sniu sen byy air jyr, iaux, si dna' iaux jit langg. Jinw dyrr byy qangg :ar, iaux, si e iaux qui’ vangg. Qyckacc tiamw, tuax mia katkow marr diyhh qniaa.

“Liuhagsingx ar, jitt tong liw ee, ing’amr diyhh qra congr hro hyw.”

“Jiacc je .diyc. Guaw qo' jit xee langg kiongxqniax jyr be kir.” Guaw naxx qongw naxx hnair tauu.

“M jyr dyrr tair. Guarkauw si u jiokk je decc haurkueh!”

Juxquanw dirr jingwlangg binrtaujingg qongw qaxx duarbuw sniax. Guaw pnaixser qaxx, jit xee bin bih qaxx byy lo.

Tauu jit pnxix lunrbunn duxjiacc kaisiw siaw nia, suacc siux diyc cur nirr qiar .laii ee puex, qongxx a’vaa puawvne zip ngi, langg hunbee, vnerser limguii. Hingliw cinwcaiw kuanw kuanw lehh, qinw an’ Zidvunw jre huelingqix vniar .dngw .laii. Quer kacc byy jit lexvair, a’vaa dyrr ongxsingx :ar.

Kar dngdoo :ee kir Zidvunw, qauwsiu qongw diyhh qycc tak jit nii jiacc beh hro guaw vidgiap. Jingg:a jyr qauwuann knikiam liabjig ee jnii, jitt quiw nii dirr Zidvunw kaix qaxx dax ~ ~. Beh qycc dngw kir jiac qongqax ee taulo, kacc sux dy' cue byy haghau beh qra lanw cniar.

Laurve quewsinx, qehuew buxlong liauw liauw, hag’ui byy tec .diyc, taulo pnaiw inw. Jitt xee sijun, guaw sigsai guanw kanx:ee. Dyrr anxnix, guanw daux ee mngdauw an’ kiarhar ngua qat’angg, diongx:a qeh kacc byy vnuar dxangx. Cuarbow kixqex hitt nii, guaw snax-jap-go huer.

“Kux :ee dyrr si norsingr, kiamr langg' driaux. Dnaxx guaw knuar langg dyrr siongrr junw a!”

Mihqnia dirr siqanx-lai qaux .cud .kir, guaw tniax diyc juxquanw anxnix decc qongw hro langg' tniax.

Tauwjaw jyr qaur mehngx, huedngw qaur cur, kanx:ee kajiacpniax hiongr guaw, siangx ciuw byingg decc jycsid, byy diwqag diyc u langg zip .laii. Ix byy decc jiac taulo, mrqycc e inw jit quaw ciuxqangx dirr cuir nirr jyr. Ciax snxax, auw juaw, jyr sokqahuex, dagg hxang ix dy’ e.

“Jarhngx qaudair liw :ee, liw u kir brew iacc byy?”

Guaw cnuar mngg ee sniax dairkair u kacc dua, ix jinw jiacc uat tauu knuar guaw.

“Tacc e byy! Liw byy knuar guaw ciuw nirr jit qnrua jiacc dua qnrua?”

Iarr m jaix ix qaqi jit xee kud dirr hiax jyr zuarr quw :ar, kanx:ee siangx ciuw hnua dirr dycqnii, kax baa, hiamw vreh be kiw .laii.

“Jex sniaw?” Kanx:ee mng.

“Bixaxhux a.” Guaw rinr.

“Liw brew m diyc vaijuw.”

“M si longxx qangrkuanw.”

“Jitt vaii :ee kauxbi byy qangg. Memex jiac be hac.”

“Iarr u jitt hy dai! Jiac quw dyrr quanwsir :ar. Dua hanr :ee dyrr si sniu' quer tiongwair, jitmaw jiacc e jiacc pnaiw cuiwdauw, dagg hxang dy’ m jiac!”

“Hner lar, guaw dyrr hamrban, kacc crur lo :ee. Liw beh cue kacc gauu :ee, jyww liw kir. Guaw be qra liw dongr!” Kiwkow qig dua sniax, kanx:ee bagkox angg angg.

Qethunx liauxau druar jywhuew, guaw jiacc huatqenr diyc qongxx kanciuw ee hni-aw u qyc'ngiu, byy kacc dua sniax lehh, ix dy’ tniax byy. Huanrser si sentenx u jitt hxang puawvnerlo, diwsuw ix viw langg kacc binxqamw, kacc e gii sinn gii qxuiw. Guaw narr siyxkuaw kacc pnaiw sniasaur, ix qaqi dyrr e ovec iyh, luanrsuw sniu, huanhuanqyy qongw guaw decc kiwhiamm ix, beh hiaux ix, beh qapp ix snelii.

Guaw qra sinsuixde-aw kngr dirr dyh-aw-dingw qaux ix, jitt vaiw ee dauwkauw anwsngr beh anxnix junw suah.

“Tacc e jiacc ser jriw?” Kanciuw mng.

“Siongrsunn jiyh :ee, harsunn suacc mrbenw hingg niih?” Guaw dyww mng ix.

“Jiaxee duxhyw lap jitt qywguec ee dairkuanw. Quer .nng .qangx .aw, liw diyhh qinw qycc kir qra linw qongsix jiyh quiw vah kox aw dngw .laii.”

“Duxjiacc hingg lehh, beh qycc jiyh?”

“Cur nirr caa kangx biw jin qiongbeh dngrr huexhunx. M jiyh, liw cunvan beh qra guanw buxaxqniaw iaux hro siw .m?”

“Dagg qywguec dyrr decc cimtec, jiokk byy texben.”

“Jiycmng .jit .xe, liw ee binrjuiw jit qxinx si dat zuarr je? Si erdangr tec laii lap denrhuew juixdy, iacc si tangx diac biw dah iuu?”

Guaw liyc aw gang .kir, beh kaur m did, beh ciyr marr m did. Trow jit kauw kuir, guaw byy inwcuir. Qycc dag .lyc .kir byy liauw sii, qex pilyy :ee nia.

“Vunwsywlangw lairdew, jex jit liauu jit liauu angsig ee juaxcuir si sniaw?” Guaw kir danr vunwsyr ee sii, cuir drang cuir mng .jit .xe.

“Hex or. Acc dyrr qniazit u langg qiar jit dniux angg tiab-aw beh hro :liw. Guaw knuar hex byy loring, dyrr qra ix lir driau.” Kanx:ee qongxue ee snia’imx e junr.

“Liw qra ix lir driau! Byy-dair.-byy-jir, liw si qra lir jnaixngiu?”

“Guaw si sniu qongxx quibuew liw iarr be kir, dyrr quikir qra ix lir lir danwsag.”

“Guaw dangsii qra liw qongw guaw m kir? Langg’ hex tiab-aw si beh qiar hro guaw :ee. Liw beh qra lir driau, suacc benw singx qra guaw mng?”

“Iarr suacc diyhh mng!” kanx:ee qongw. “Liw ciah kogkok, jit xee qex dy' qor be qia, boxqniaw qiongbeh rair qiar langg cri, qycc u jaidiau jauw songhixsu?”

Kanx:ee rinr qaxx jin’ hyxser. Guaw dua cuir kuix kuix, jit sijun, suacc cue byy vnuar qxur ue tangx rinr.

Guaw qra vunwsywlangw qui’ee dryr cud laii hiaux. Qui’ dniux qanxtiab ho’ngg lir qaxx cruir iyh'iyc. Guaw bruw qui' vox, kacc anwjnuaw draur dy’ be uanjuann.

2

Qimjaw kiw .laii, ngua jit niaw kacc qu ee dexkowjad-aw, hosqongw qra kanx duiww kauxbin laii. Guaw ee VESPA, tranr lexvaiwsii aw hiyckunr, qinw qra ciangg jit xe aw sinkux lehh.

Jitt daii nng lenw :ee duer guaw cid nii :ar. Dagg qangx decc kiaa, qaur jinw iauxx sinx catcad, bersux duxx an’ ciax-dxiamr kanx .dngw .laii qangrkuanw. Guaw u viw langg' kacc gauu qor ciax, m na dniardnia qra sew, qra crid, huexjux-aw qapp dongxaxpuee jitt quaw siaumopinw, siqanx narr qaur, guaw longxx e jiauwkixqangx ngua sinx :ee.

Qongw qaxx inx jaboxlangg sidjai u kacc luiduix. Dniardnia marr tniax guanw kanx:ee decc liam, qongw guaw dangrkivingg, tniar ciax kacc quewbin tniar bow. Ix be qir did guanjaw guaw qapp ix iauxx decc qniaa ee sii, guaw dyrr si kiaa jitt daii jair ix siwqer kir cittyy. Hitt sijun, nng langg knuar si beh qaugua iusniuw, iacc si beh dirr sniaa-lai knuar ngiaxhir, jin kyr marr kyr jitt daii VESPA.

Bow crua, ginxaw cutsir, VESPA viw did ingxzit qyckacc iauwqinw. Kanx:ee sunrguec decc cuijun, guaw ing jitt daii qra sangr kir vnerngi; ginxaw duarhanr tak iojien, guaw ing jitt daii dagg qangx qra jair kir haghau. Byy jitt daii guaw dyrr qaxnaxx byy kax. Byy kacc siyh lehh iarr suacc ersaih .did.

“Vavax, hyw bue?”

“Hyw :ar hyw :ar. Juixdyrjuiw qra qimr .kiw .laii.”

Ginxaxqangx, hyw iongqah. Narr decc kiamr kaciuw, duarhanr jaboxqniaw qeqiamw erdangr dauwsnaqang.

“a’Dinx :a, zip laii ngua snxax. Lanw beh laii kir :ar!”

Ciax duxjiah sew hyxser, boxlee sui’ qycc decc dann. Guanw cavee dirr cur lardew hiux. Ix qnuaw beh dngw kir guarqex.

“Bruw qaxx jit sinkux ox dewder, qui’ tauu qui’ bin baiw qyqyy. Snxax byy qinw ngua, qamxx e qniwjingr .did!”

Laurbuw decc me jaboxqniaw, bagjiuzinn suacc decc qra ginxaw ee laurve ror.

Jit qekauw-aw cuann hyxser beh cutmngg, dirr mngkauw suacc duw diyc qecviah ee oksang.

“Cing qaxx jiacc suiw, taumngg qycc vak siangqakjangx! Vavax mamax beh cua liw cud kir cittyy or?” Oksang taujangx vak qxuer, cing jit sux Dngsnax angg pnawpnar, jit ciuw naxx decc hrux ginxaw ee bin.

Qapp guanw druar siy’ qecviah jitt xee hurzinlangg si tunbuw, qethunx id~zi-jap dxangx, lenrr jit jiah qauxhia iacc qajuac dy’ byy qra inx angx snex .cud .laii. Ix jin’ air tniax Zidvunxquax, qycc naxx cincniu siongrr air hitt diauu Hibali cniur :ee Linggo Duihunx, tniax qycjaiww tniax, tniax qycjaiww tniax. Hitt der imcniuwvnuaa, marr cavutdyx hro ix tniax qaxx beh ruix .kir .ar.

Guanw kanx:ee air quer qex quer txec, jingg:a qapp langg’ c.-cinciangx-c. ee sii, vutsii dyrr jauw kir inx daux decc paclaliangg. Jaboxlangg qau ue, cur nii kiamr soxhuir dniardnia decc jongg jnii jitt jann, guanw kanx:ee iarr qongw qongw .cud .kir. Oksang jai’ngiaw guanw druar :ee jitt qingx cur dagg guehzit ee dairkuanw jin' dang, dyrr qongw aurzit aw jitt diauu ix beh ter guanw lap, mrqycc u diauqnia. Dangsi’aw ix air guanw a’Dinx :a hro ix jyr jaboxqniaw. Ix pacsngr ing jitt vo laii banw inx angsair ee simqnuax.

Guanw kanx:ee marr jin' ced, jit sniax dyrr qra qongw m. Jitt qnia dairjir quer liauw, dairkair inx sianglangg ee simqnuadir-aw qeqiamw u gairgiyc dilehh, jurr anxnix dyrr kacc byy decc laikir.

“Kiu Sangr, linw bow dua-sin.-dua-mia, liw qycc qorr jitt daii nng lenw :ee qra inx jair or?” Oksang qongw, vutsugi ee kuanw.

“Acc dyrr qongciax yh danw, kiaa ciax kacc qinw lar,” guanw kanx:ee dairter guaw dab, suawjiab qycc qongw, “Qinaxzit guanw laurve jywqi, duxjiah hro inx veaxqniaw cenn lehh, decbeh be hur vair :ar.”

“E sniu’ qnuaw be? Guaw laii qiyr gunw tauu:ee sraiw ciax jair linw kir kacc driyc.”

“Dniardnia decc kixdang .linw, anxnix nacc hyw?" kanx:ee tesii-iaxqor. "Hiyckunwzit be jikciax, liammix dyrr qauwui :ar. Dysia :liw lar.”

Enzin huatdong, jejex a’Dinx dyrr kangr kiw kir ix ee xui -- guaw taujingg qex sed ee ser der iw-aw. Guanw jaboxlangg dniardiyc jre dirr guaw aurviacbin. Guanw ang’axbow diongx:a giab memex a’Hunn. Acc memex a’Hunn qapp inx laurbuw diongx:a qycc u jit jiah ser jiah :ee, iauxx m jaix qangx :ee iacc buw :ee.

Kanx:ee inx guarqecur li guanw daux u .jit .der .aw. Sokdo vniar qyckacc qinw, iarr diyhh jniaa diamxjingx quw jiacc kiaa e qaur. Acc narr jre qongciax dauc dauc aw tuh, hex qyckacc quw, siongrr byy diamw vnuar jxingx jauw be kir.

Qauwui, enzin jiacc qimr srid, sui’ tniax diyc kanx:ee inx nisang dirr lairdew decc duarser sniax, m jaix decc qra si’angw ziongw. Zip mngg mng jit xee jinx, jiacc jai’ngiaw iurqycc si jnihang qapp langg’ decc huex be cringx. Inx jit xee jikvechniax siauwlenn ee sii kir guarde huatdenw, id~zi-jap nii quer, byy-din.-byy-dangx syy .dngw .laii, juanqangx dyrr si beh laii tyw qehuew :ee.

“Jitt qingx cur guaw kia qui’ jap dxangx, tehdersuer qapp qaoksuer, ix qamxx bad cud quer jit sxenw? Simxmih guaw decc qa’ngg vawjiamr, tunx langg' ee cur? Cinwcaiw qongw qongw lehh!” Dua-qu’aw qongw qaxx krir cuaccuah.

“Jex cur qu-aur-qu-caur, ix narr air, dyrr hingg ix maar. Lanw iarr m si byy ee langg, laii druar sinx cur byy kacc janw? Zid'au dag’ee cann byy qxaux, juiw byy lrauu, jit langg jit qex dai, horsiongx benw siy’ qaucab.” Duardniu qongw.

“Jex guanw Pnee .Qrax ee qasu, byy diyc qaur liw capcuir.” Dua-qu’aw qra tikma.

“Nisang, liw jitt qxur ue qamxx be sniu’ lirqingx? Ix lanw Pnee .Qrax ee qniaxsair ne!”

I’aw qra had dywdngw. Dag’ee bin-aw crinr crinr, cuir-aw bih bih, sui' langg longxx qui’ vakdow huew.

“Lanw laii vaiwtog cinjniaa cutbin juxcii qongdy, linw knuar sniaw kuanw?” Zi-qu’aw tegi.

“Bycaiw qangx lar,” i’aw qongw. “Zidtauu ciah ngiarngia, iarr m si kangx :ee, langg' jiacc byy beh quanw quanw liw hiacc je.”

Dua-qu’aw inx dua hanr haursnex a’Dig :a an’ vangqingx cud .laii. Tniadngg longxx ix ee sirdua, ix jit xee dy’ byy qiywcuir.

“Liw beh cud .kir .or?” Inx buw :a knuar ix cuann beh cutmngg, sui’ dyrr qra mng.

“Guaw qapp jit quaw ving’iuw iog hyxser, dag’ee beh jywdin laii Daivag kongwgi.”

“Kongwgi! Kongwgi sniaw?” Guaw mng.

“Denrsi sinbunn linw qamxx longxx byy decc knuar? Lanw Diywhidaii beh hro langg' jiamr .kir .ar!” a'Dig :a qongw qaxx qargee-cetciw.

“Tagjux m tagjux, qapp langg' decc cab hex. Linw jitt quaw dairhagsingx, cuttauu siongrr je.” Zi-qu’aw qongw.

“a’Vunw aw qapp Bixqog aw habjee decc kihu :lanw, linw iauxqycc b.-bavir-v., jre dirr cur nirr decc kaiqangw, latenx. Linw dyrr si qoxjaw jyr inx Zidvunxlangg ee lojai’axpuex quanwsir, jitmaw jiacc e jiacc no, m jaix diyhh qapp inx duiwkongr.”

Siauwlenlangg qongw qaxx krir putpud, singwde u jxingw diyc inx laurve.

"Acc byy, liw marr danw vair suah jiac jow liauw jiacc kir.” Inx buw :a qongw.

“Simxmih dairjir u viw qokqax ee snesiw kacc iauwqinw?”

Huantaiw, ix uat jit xee srinx dyrr jongg .cud .kir.

Guanw ser jiah :ee air kunr decc kiw huanx, hnix hnix qiyr, kaur be diam. Inx buw :a marr jnia’ byy tausinn, siongrqaiww iauwqinw ee lingcuir-aw suacc byy jah.

“Berhiauw qinw qycc kir brew .jit .xe.” Dua-qu’aw qongw.

“Dyc’ui u der brew?” Guaw mng.

“Lanw jitt diauu hang-aw dit dit cud .kir, qniaa qaur jinrvong jiacc jniar uad. Dirr lorkauw, liw dyrr e knuar diyc cuahqag u jit qingx seiyhvangg.”

Kanx:ee inx hniasyw qniax guaw m jai’ngiaw lo, qiyr inx ser hanr :ee cua guaw kir. Guanw dua-qu’aw inx ang’axbow jnia’ hokkir, snex qaxx nng xee haursnex longxx gauu tagceh. U tniax guanw kanx:ee decc qongw, qongxx ix jitt nng xee did'aw, qokhau-aw vidgiap longxx tec quanrdniuxjiongw.

Beh quer sibzirqex ee sii duw diyc angg dingx, guaw kavo jurzendig dongwdiam.

“Qodniu, m dyrr qniaa a!”

“Angg dingx ne.”

“Iarr byy ciax. Anx lar, dag’ee longxx marr anxnix.”

Ginxaxlangg qaiww saliac, bak jit xe nih, langg’ ix sui’ ciongx qaur duiwbin .kir .ar.

3

Jarhngx jaxkiw kiaa VESPA beh kir siongrvanx, tnidingw vangr horvec, jit bin cud zit qycc jit bin lyc ho, hormuax iarr m jaix diyhh cing iacc m, simlai u decc iyh qongxx, qnaxx iurqycc u hongtaix beh laii. Dngw laii qaur cur knuar denrsi sinbunn, qycc jniasit byy cyr, hro guaw iyh qaxx junw ~ ~. U jit xee ciauqib dua hongtaix dirr Hualenn guarhaiw, jit vo jit vo decbeh uaw .laii .ar.

Benw guanw kanx:ee huah, guaw qaqi jin’ zinrhun. Dyc’ui aw u pang, guaw dyrr tec puar vor sriab kangx. Cur-jingg cur-au ee juixqaux-aw, guaw giaa ticvee jongw qra cringx cringx lehh, kacc benw did sii qaur ho dua .laii, juixqau’axjuiw siar be li rimx zip laii cur nirr. Cur si kaix qehuew brew :ee, qycc huanrser si beh druar qui’ siwlangg :ee, snesingg rair qor, rair kacc siycliyc. Narr si qa’ngg suewcuwkia, qiamxcaiw guaw jitmaw dyrr byy jiacc qutlat.

Sniu kiw diyc guanw dongcox hag jitt qingx cur taubuew ee qingquer, hex uanaxx u jit dnxua qowsu dilehh.

Kanx:ee inx sirduarlangg dirr ix jiokk sewhanr ee sii dyrr dngw .kir .ar. Ix si inx daux ee banx qniaw, hniajew longxx jin’ qra jiauwliau, jin’ qra tniawsiyh. Guaw qapp guanw kanx:ee jiacc decc qniaa, iauxx bue lun qaur qewcua, inx dua-hniax vutsii dyrr u decc qra guaw toktaur, qiyr guaw huanwcur diyhh qinw kir lap .jit .qingx, qycc qongw tauqiknuaw ix beh cud, kiarr qewjngx ee gxiac.

“Sewqanx iarr u jitt hy hyw kangtauu? Byy duxhyw si beh air liw hro inx jiyx!”

Guanw hniasyw simhiongx jin' pnaiw qycc gauu dor, jai’ngiaw guaw u tangx dac diyc jitt hy dervo, ix sui’ dyrr be did :ar. Guaw be kamx did krir, dyrr qra ciangr qongxx aurquer ginxaw cutsir, muixx jit xee longxx e jiac guaw ee sner.

Kanciuw ee hni-aw dair jingwtauu jitt jann, guanw qethunx byy zuarr quw dyrr vitpang :ar.

“Guaw dyrr jaix lehh. Qer jaboxqniaw qycc qacquar cuwqingx! Dangsii aw dyrr si cauwhnirlangg dicduh.”

Guanw hniasyw qik gauu qa'ngg lauwqingw. Hyw hyw dairjir quer ix ee cuir liauxau, dyrr byy qaxx jit qxur e tniax .did.

“Cuwbuexdingw ee tensnuar, diyhh kir qra dingr kacc diauu lehh. Banrvutzi narr hro hongx cuex dng .kir, lanw dyrr byy denrsi tangx knuar.”

Jaboxlangg sniu dairjir, vixqauwdig u kacc diamxdinn. Kanx:ee narr byy qra guaw jixsingw, guaw dikkag be kir sniu diyc jitt hxang.

Dingxquann ee hongx jamxzenn aw taur. Vyrqizenn jit jun duiwbinrhongx, taukag jit dingw by-aw hro cuex qaur vnuawtnix kir.

Tensnuar dikkag marr si hro hongjun cuex uaix .kir .ee, kix qui’ vingg, beh dyw aw beh dyw. Guaw qinw qra ciauu hro jniar, qycc ing ensnuar qra qowding dniardiyc. Qesix qajair u jah, u quiw liap aw losix ling .kir, guaw marr qinw qra sryw hro ann.

Guanw jitt daii denrsi si qurnii jiacc hag :ee. Jingg:a dag’ee vowderhir knuar qaxx zet putpud, jit qangx narr byy knuar, simqnuax dyrr be kinsangx, mrjiacc e sniu qongxx quikir qaqi laii brew .jit .daii, kacc benw did siqanx qaur diyh’air jauw kir vadd langg daux knuar.

Dirr dingxtauu bruw beh vnuar vox. lyc .laii, denrsi qra jun .kuix. Hunjiux Dairzuqiab Suw Iamrbunn duxx kaisiw beh vnuax.

Qanda’ tniax sniax dyrr jaix jitt cud vowderhir byy ongxsiongg hiacc cringr, hiacc hyw kuir. Ixjaw dirr jitt xee sii, qetauu-hangrbuew, cenbunn-banrho longxx marr knuar jitt daii. Qenwnarr Koxhaiw Luxsinliongg iacc Lingxsongjuw dingxdingw jiaxee quakig hiangw kiw, hex sniax e in dywdngw .laii, bersux u anx imhiongw. Baiw dyrr baiw dirr quiw qywguec jingg, Quair Noxjuw qapp Harbex Nng Kxiw :ee, inx jiaxee vowderhiwang’aw suacc longxx ngua qongw Qokgiw. Jin’ je langg hiamm kuiwkauw jauxjingx .kir knuar be siakpah, jurr anxnix byy qycc qra inx pangdniuu.

Si u tniax langg decc qongw, qongxx Sinbunn Qiok u jit xee dua qnuahow marr jin’ air knuar jitt cud. Kacc sux ix dyrr Daigiw berhiauw, mrjiacc e qiyr inx diyhh qaiw qongw Qokgiw. Si qongxx anxnix marr m driyc. Dyrr qanda’ uirdiyhh ix jit xee langg, suacc ngua cur nirr ee jit quaw laurhuexawinx decc tniax byy.

Hongtaitnix, dirr cur nirr sidjai byy sniaw girniu, qycc vadd daii iarr byy kacc hyw ee jetbok, qongw Qokgiw ee vowderhir marr qra bongxx knuar.

Denrsi lairdew jnia’ laurzet, kinkinx-kiangkiangx, qimqongx ciangciangg qunw. Nng senx vowderhiwang’aw cutdniuu, jit xee e vuex tnix, jit xee e jngr de, sianglangg kud bexser, qinaxzit dyrr beh vniar jit xee su’ngiaa.

Suw Iamrbunn: Cadcnix, liw hyw dnaw dyrr cud laii viw jit xee quanqe. Guaw jitt diauu mia cunvan qapp liw puer, qimzit dikkag beh siaubet liw jitt xee banrog ee juerkuex.

Jongqniawzinn: Linw jitt quaw tak Kongxjuxceh :ee ar, taukag dingrjnix be venwkiaur. Guaw dirr aurviah sraiw amr vo dyrr tangx jiac linw qaur qaur, iarr suacc diyhh qapp liw gni duw gni, taii qaxx huicjuiw cabcap dih.

Suw Iamrbunn: Vipiw ee siauxzinn, knuar guaw ee Sun’iongjiangw.

Jongqniawzinn: Dangsi’aw miasniax jiacc tauw ee Sun’iongjiangw marr jiacc zucuw narnia. Ingg langg siamw kacc kuix, knuar guaw Jongqniawzinn laii denw uix. Imhongqunn, hro kir :ar.

Suw Iamrbunn: Huixlui, len jitt hy ajax qanghux!

Jongqniawzinn: Jitmaw liw tangx jai’ngiaw guaw ee lirhai ar hnoh? Hahaha! Sun guaw jiarr sxingx, gik guaw jiarr brongg a.

“Kongrkiangx” jit sniax. Guaw cuah jit diyy, bagjiux vreh kuix sui’ dyrr jingsinn.

“Langg ar, qinw laii or, aurviah ee vylee puar jit der .kir .ar!”

Kanx:ee dirr jauwkax decc hiux. Guaw tniax .jit .xe, simlai decc kiw air ciyr. Duxjiah denrsi knuar qaxx cuu .kir, hamrbinn-hamrdag, qycc qiycsirr Jongqniawzinn ee jiangxhongx jniasit pah qaur guarkauw jiax laii.

4

Dingw dingw lexvaiwgo amr dxngr duxjiacc jiac .quer, kanciuw juixper puar, dahsah cuijun beh snex :ar. Cur nirr snax xee iur ginxaw tog cuwvnix siyw qor .jit .xe, guaw kir bexlo jac jit daii qewdingg :ee, kacc benw jap hunjingx dyrr qaur hursanxkyx.

Qongw marr decc qrii, taujingg dyrr snex snax xee .kir .ar, diyc qaur jitt xee, suacc decc snex be cud .laii. Sensnix qongw ngex-aw taukag sniu’ dua kenx, qenwgi diyhh puawvag kacc unxdangr. Guanw kanx:ee qniurqud, doxqiongg beh jurzenn snex. Langg’ ix marr jin’ vaqed, tniar qaxx jit xe bin-aw cnex sunxsunw, ciuxsimx hro jingxtauu-aw drangr qaxx jit srunn jit srunn, ix cuiwkixqinx qa lehh qiongg lunw .lyc .laii, itdit dongr qaur qecdngw qangx bauxsii tnix barbu qngx jiacc snex. Javox :ee!

“Muaxguan :ar hnoh?”

Ginxaw cutsir tauu jit vaiw beh jiac lingx, kanx:ee ciuw py haizii, naxx decc qapp guaw qongxciyr. Ix dingw nii aw jiacc qycc qra guaw snex jit xee jaboxqniaw, quanrr taujingg snax xee longxx memex. A’vaa jairsnex ee sijun, cxenx dinglingg bxan qaudair, simsimx-liamrliamr :ee dyrr si rair guaw qra ix snex jit xee javosunx, tangx qra ix ee sner tngg .lyc .kir. Jinwjingg guaw qaqi u decc pacdad, sniu qongxx jitt txex narr iurqycc jabow :ee, dyrr quikir qra vunx cud kir ho’ngg riyx. Curr nirr iarr byy decc hyw quewzit. Langg’ narr e qra lanw tniar, ginxaw qra sangr kir jyr hyxgiahlangg ee jaboxqniaw, dikkag e kacc hingrhog. Tniqongveh :a u vyxvir, qajair u hro guaw snex diyc lamdingx. Dairkair guanw vaa :a u qamxingr, dirr dingxquann iarr amr amr aw u decc jorjan.

Kanx:ee cutngi, guaw qra inx buxaxqniaw sangr kir guanw dua-qu’aw hiax. Jaboxlangg snuawlai, dagg qangx diyhh jiac qanhuex iacc qejiuw jitt quaw lilixkokkog :ee juvow. Guaw jit xee javolangg, zit .sii qycc diyhh siongrvanx, byy jaidiau kir vnir hiaxee. Hyw did inx hniasyw beh qra jyr guehlai. Snax dxngr u langg qor tauu knuar buew, benw qongw marr diyhh vnuax kir hiax druar kacc tongx.

Cutsir ginxaw dniardiyc duer laurbuw. Snax xee jaboxqniaw byy langg tangx quanxqor, iarr sunrsuar diyhh quer kir inx a'qxu hiax druar. Kanx:ee u jingr quaw huejaix, zuac .langg dagg qangx diyhh ag juiw, cur nirr qui’ qywguec vangr kangx ngiaa bering .did. Jitt snax-jap qangx guaw dyrr qaqi jit xee langg druar. Lexvaiwzit benw siongrvanx, guaw vaiwlak-amr jiacc quer kir qapp inx druar jit mee. Ing'amr dirr qongsix qavanx beh nng diamxjingx, harvanx liauw didjiab dngw cur byy quer kir knuar :inx. Cur nirr ginxaw narr je xee, jyr langg’ verbuw :ee dyrr benw siauwsniu beh zuarr cing’ingg. Liammix jitt xee aix, kactingg hitt xee hauw; jitt xee ciuw jen, hitt xee ciagqauu, ciax qux lang angr, dnuaxdnuaw diyhh u duarlangg dirr inx sinkuvnix knuar jingg knuar au. Ingxsiongsii hro inx caxla quanwsir, jit sniax snax xee jongw quer .kir, cur nirr sokjing qiamx byy bangw, suacc u damrvyc aw hibii.

Guanw cur jitt kouii sngr laurzet soxjai, hurqin u jit qingx hiwngi, amwsii qycc u iarqex tangx sec. Taujingg decc bre jiac :ee, caur daurhu, yaxmirsnuar, suwsintngx, jiaxee si siyx :ee; ywgiyy, ngiutyjiab, sencauxvingx, jiaxee si liangg :ee. Qyckacc quer, u decc huah siogbe :ee. Brew lairniaxsnax sangr lairkor, brew bulazia sangr dycvor. Qycc marr u jabser-aw. Bangxdar, cauxciyc-aw, deqipsiyx, knuar kiamr sniaw, vaux snuax vaux haiw, dagg hxang dy’ ingwhur liw qaxx qaur.

Dirr iarci-aw ee buexliux hiax, ox kamkamm jit din langg uree kuu uree kia, ciuw nirr longxx tec jit vunw juceh decc vingw, decc knuar. Guaw langg be jabcab, mrqycc u kacc hnowsusiong. Uaw kadaux jit vunw jabjir, guaw ngar srinx qra kiyh kiw laii knuar.

Jniuw .Qrax veaxqniaw uiquann tongxdi, Daiuanlangg dirsii cuttautnix?--2

KMT, qokkor tongx dongxkor; qeqnuax qeqen, qnaw :ee gneh kir puer!--8

Huanxqiong hogqog, zi-jap sewqiw siongrr dua ee hamwqow--14

Hanwcat vutliongxlip, Daiuann jniaa jyr Asia ee qozii--26

“Kiu Sangr! Liw Kiu Sangr hno?”

Tniax diyc u langg decc hiamr guaw ee miaa, guaw jiokk cneqniax, ciuw nirr ee jabjir qinw qinw qra danr hetqak.

“Urngiaw si liw dyrr driyc. Liw be zin .did .ar? Guaw Lua :ee a!”

Dangsi’aw dyrr si Lai Sangr, jingquer dirr qokhau-aw decc qawceh ee qu dongsu.

Ix guarhingg ee venwhuar, bylun texqeh, binrhingg iacc cingrcah, longxx jamxzenn aw dua. Tamrdow, cuiwerdauw hiax lauu jit cog cuiwciux; cing jit niaw qakhueaw-kor jiokk jnawjuiw. Narr m si ix duxjiah jurdong laii siy’ zin, dirr lo nirr gu .diyc, guaw quatding be uaw kir qra qiyr.

Ix ciuw dairsingx crunx .cud .laii qapp guaw ad, dua lat cik, cik qaxx guaw jit qix ciuxqud qiongbeh lag .kir.

“Liw qamxx iarr druar jiax?” Guaw mng.

“Byy lar. Guaw ing'amr laii jiax cue jit xee ving’iuw.”

Jnia' jap nii byy lenlok, guanw horsiongx decc mng kiw duiwhongx ee dairjir, jiacc jai’ngiaw qongxx ix laursux uanaxx byy jyr :ar, jitt jun decc jyr siyxhangg tanr Bixqimx. Qycc ix boxqniaw marr u qenwdir :ar, jingcax qongxx guaw ee ciangjai dirr sinkuvnix, acc narr ix ee, vnuar nii jiacc tangx qnir jit vaiw bin. Inx haursnex tiauwqix kir dirr Bixqog tagceh, jyr laurbuw :ee iarr quer kir decc dauwjah.

“Acc linw daux jitmaw m dyrr dna’ cunx liw jit langg dirr Daiuann?” Guaw mng.

“Byy huatdo a. Ginxaw byy sirduarlangg dirr sinkuvnix dnaxjah, kax jingg kax au quw dyrr ho’ngg tua pnaiw .kir. Hiax pnaiw ginxaw zuarr je lehh, liw m jaix!”

“Liw qacc e qniax, tacc e qra bow qapp qniaw vangr dirr hiacc hng ee soxjai .kir?”

“Liw qiycsirr guaw air?" Lai Sangr duiwcuir rinr. "Daiuann si qiongbeh ho’ngg vangwsag .kir .ar. Lanw jyr langg’ sirdua :ee byy liongrjaw ter inx pacsngr, vadd zit aw Qokbinn Dongw narr qra inx driaur kir qapp qiongrhuiw siy’ taii, siy’ jenr, sii qaur, liw beh kaur dy’ byy bagsaiw.”

Ix qongw qaxx jiokk cnejinx, bersux u knuar diyc pauwhuew pah .laii .ar. Guaw amwdngr iaxx bue jiac, dyrr jiyx ix kir tauqaur ee haixsanxdnar sib .jit .vxuex. 

“Lingrqangx lar. Ing’amr radio beh juanxvyr pah iaxqiuu, guaw diyhh qinw laii dngw.” Lai Sangr qongw.

“Liw iarr u hingr jex or? Acc liw si beh ter dycc jit vingg qa’iuu? Bixqog, iacc si Daiuann?” guaw mng.

“Benw qongw marr lanw Daiuann jitt vingg. Jex iarr suacc diyhh mng!”

“Acc mrqycc, liw boxqniaw longxx jyr Bixqoklangg kir ar ne? Liw m dyrr pacsngr qapp inx byy qangg qog?”

“Ox qxanx-aw drew dauriuu. Knuar liw qaxnaxx qoxir kuanw, m jaix liw qycc jiacc gauu qongxgiak.”

Lai Sangr qongw suah, guanw nng xee longxx ciyr qaxx beh uaix iyx .kir.

“Linw qniaw jyr muaxguec narr u hib iuvng, diyhh e qir did vunx jit nguaw-aw hro guaw jitt xee qodnuax laurlangg!”

Siy’ srii jinwjingg, ix anxnix huanhur, qik kuehaii :ee.

Guaw am’axqunw crunx dngg dngg itdit qra jimjiog. Danw ix kajiacsimx bidbu .kir, guaw jiacqycc uat dngw tauu.

“Jitt vunw quiw ngii?” Guaw ciuw tec jit vunw jabjir mng cechuanr-aw.

“Zi-jap.”

Jnii zimm hro ix, jabjir qra giab dirr qyc'e, guaw kiw kax qinw jauw byy huetauu.

5

Inx jex snax daii denrsirdaii pacsngr horsiongx u qongw tongtyr. Amwsii ee denrsi-sinbunn guaw jongw qra knuar. Jun quer laii knuar quer kir, tauu jit diauu snesingg si Jniuw Jongxtongw jixsi qongxx anwjnuaw duw anwjnuaw, suar .lyc, dyrr vyr qongxx qniazit Jniuw Ngirdniuw qycc kir dyhh sunsi, kir dyhh tamwhongw. M na cuwsu qangrkuanw, juxvyr ee qyw qycc longxx cavutdyx cavutdyx, beh uaw aw beh uaw. Qacc si anxnix, iarr suacc diyhh sed qaxx snax daii?

“Guarkauw u langg decc cic denrlingg, m dyrr qinw kir kuix. Guaw decc qra ginxaw sew sinkux, byy-ingg-byy-qangx.”

Kanx:ee dirr igqingx decc huah. Guaw an’ pongwiw vreh kiw. Mngg kuix .kuix, jit xee siauqix-lyhbah ee jaboxlagg kia dirr mngkakauw.

“Zi-syw!”

“Snax-hniax, pnaixser. Byy-sii-byy-jun jauw laii qra liw jakjy.”

Mngg kuix kacc kuix, guaw qinw cniaw ix zip laii lairdew jre.

“Si’angw ar?” Kanx:ee an’ igqingx-aw qniaa .cud .laii, nng qix ciuxqud qycc naxx decc hiur juiw.

Guaw siaurqair inx horsiongx sigsai. Nng xee jaboxlangg tauu jit vaiw qniwbin, dairkair si qniax pnaixser, longxx qanda’ dimr jit xe tauu nia, iarr byy siy’ cinghox. Dag’ee kia lehh qaxnaxx gairgiyc gairgiyc, guaw dyrr cniaw zi-syw iw nirr jre, qycc qiyr kanx:ee kir hniaa qunxjuiw praur dee tangx kuanxtai langkeh.

Zi-syw tauu qaux qaux jre lehh, qapp guaw snax-jap gua nii jingg tauu jit vaiw qnir diyc ix ee sii qangrkuanw, byy-ue-byy-qxur, diamrdi aw diamrdi. Guaw viw kacc je huer. Mrqycc narr lun vuer, guaw diyhh qiyr ix a’syw. 

Jiacc cid~veh huer ee jaboxginxaxngix, ix dyrr hro inx sirduarlangg sangr laii guanw daux jyr simvu’aw, mrqycc hitt jun, iauxx m jaix beh jyr hro guanw snax hniadi-aw dycc jit xee dyrr urngiaw. Ix nihuer qapp guaw kacc uaw, qycc guaw marr kacc be hiacc get, be cincniu guaw nng xee hniaqyx, dniardnia air qra ix cuxdi. Dyrr si uirdiyhh anxnix, ix longxx kacc air duer guaw, kacc air qapp guaw jywhuew.

Ix jap-go~lak aw dngw duarlangg, guanw vaa :a jywjuw, qra ix qapp guanw zi-hniax nng xee sag jywduix. Dyrr anxnix, ix an’ a’Muii venr jyr guanw zi-syw. Langg’ ix dy’ byy jingcax, a’vaa guanjai qiyr a’vaa, a’buw qangrkuanw qiyr a’buw, lenrr inx angx, ix iuguann zi-hniax zi-hniax decc hiux, longxx benw nguarcuir.

“Jiokk quw longxx byy liw ee siausid. Liw quer liauw hyw bor? Langg’ u kacc qra liw tniar bor?”

Ho’ngg mng ee langg byy inwue. Ix cuir-aw bih bih, bagkox angg angg, qiongg lunw lehh byy beh hro bagsaiw lrauu .lyc .laii ee kuanxsid.

Ix iong ciuxvnuaa dirr bagjiux-dingw huee .quer, pni cngc lehh cngc lehh, iuguann byy-sniax-byy-sueh. Knuar ix jitt kuanw kyxlendai, dnaxx benw qycc mng, cinwcaiw langg marr tangx iyh diyc jit xee veh~qauw hunx.

Zi-hniax vruac sux qxiauw, jauxlo lirkuix vunxsow, hitt dangjun guanw syw :a dua vakdow ursinx dilehh. Ginxaw cutsir lyc too, guanw a’vaa jaisanw marr vunx hyxser :ar. Qongw si qongxx u langg u hxun, kingjinx, zi vangg :ee inx hitt hxun sidjai u kacc ser hxun. A’vaa lau bongxx lau, iarr m si hitt hy qenwqow byy kaihuar :ee. Ix beh vangr guanw syw :a juriuu, jrunw ix qycc kir qer. Zi-syw qongw ix beh suhau daqeqnuax, jit siwlangg lauu dirr guanw daux byy beh qycc qewangx. Sngr marr jin’ u hyw luxdig.

Guanw buw :a qapp guanw vaa :a longxx dngw .kir ixau, cur nirr ngua dua-vangg decc hnuarvnuaa. Guanw dua-syw hiamm guanw zisyw si kinvyhniuu, kax jiamx ciuw iur qycc qau puawvne, iarr byy cunn jit xe aw guanw zi-syw ee iwsur, jit sniax dyrr qra jyr hro vadd langg tangx qra hor hor .cud .kir.

Javox hitt vingg qongxx iarr si qycc crua :ee, quanrr guanw zi-syw qer kir jyr langg' ee aursiu. Tniax qongxx inx hitt xee daqex jin’ kiangwkax, jin’ gauu lingziok simvu. U hongsniax qongxx jingg bow dyrr si be kamx did daqex lingdi, jit sii sniu be kuix, nng xee cinsniqniaw vangr lehh, long’iyc sax lehh quanr lyc auu.

“Zi-syw, liw qamxx u qycc snex?” Kanx:ee mng. Ix dee praur hyw pangg .cud .laii dyrr itdit jre dirr guaw vnix:a.

“Jnriu sxiab ee langg :ar, qycc snex, e ciyr puar langg' ee cuir.” Zi-syw ciyr ciyr aw rinr.

Dag’ee kaiqangw .jit .kunr .aw. Kanx:ee qaxnaxx decc jre be diauu :ar, dyrr mng langkeh jitt vaiw laii si uirdiyhh dycc jit jann.

“Snax-hniax ciuxtauu narr u quaw junginn, qamxx erdangr jiyh guaw dngxsec .jit .xe? Guanw tauu:ee u jit dniux jipiyr vutdo, au lexvair jinwjingg jnii narr byy longx .zip .kir, diyhh ho’ngg liac kir long’aw-lai qnuaix.”

Hro guaw iyh qaxx jiokk sniawziah. Jiacc vuacqangx laii jauw jitt jua, jairunw si beh jiyh jnii. Guaw duxjiah dyrr lunw lehh byy beh singx tee kiw. Qongw diyc jnii sidjai dyrr be duarvan.

“Lanw nng xee sngr dangsai-aw, dnaxx qongw .cud .laii marr m qniax hro liw kiycciyr. Guanw jitt jam aw marr vutjiw aw andauw, byy tangx hyw knuiwuac. Dua :ee inx hitt vangg qex jiokk hyw quer, jnii kyw kyw dilehh. Liw berhiauw kir qra inx jiyh. Inx kacc u.” Kanx:ee qongw.

“Inx hitt kauw jaur, siauw zip byy siauw cud, jit xee jnii pah zi-sir xee qad. Inx narr tec e cud .laii, guaw jiacc sux :liw.” 

Guaw huanxqongw, m si sniasaur. Kanx:ee byy qycc rinr cuir, mrqycc nng vingg cuiwpuew pongr saisaix, jin’ pnaiw binrcniux. Zi-syw srig srig langg, ix knuar sewbin vutduir, dyrr vreh kiw srinx qongw beh sitvuee. Guaw marr byy qra lauu, qanda’ qongw e ter ix jingjyc, lixluaw narr u, sii qaur jiacqycc qapp ix lenlok.

“Jiac u jit dxngr siyx, liw kitjiac dyrr beh lang quaixaxhuex m? Linw bow si kiamm drngg neh do decc qra liw knii jitt xee qrex. Liw qycc qew kongxkair, jniginn beh qra guaw tec cud kir lamrsamw ia!”

Langkeh jauw liauxau, kanx:ee singwde sui’ dyrr giaa .kiw .laii.

“Langg' decc qongw dairjir, liw diam diam tniax dyrr hyw. Cab cuir cab jic.” Guaw qra pngc.

“Hner lar, guaw qau ue, guaw jabcab lar. Acc liw lehh, dyrr qanda’ erhiauw dirr guarkauxlangg binrtaujingg decc denw uihongx, ma bow ma qniaw. Linw joxmaw jaw dyrr qra liw knuar cud cud :ar!”

“…”

“Narr beh qongw diyc qankow songwhiongx :ee, hex si muaw siwquer. Jingg:a Qelangg tnuawkangx siw :ee hiaxee qamxx byy kyxlenn? Lanw qiuwjer be liauw lar!”

“…”

“Qaqi kunr dyh-kax, dyrr mair kir huanlyw vadd langg ee cur lrau. Lanw jitt quer jnii narr jiyh :ix, hex dyrr bersux tec bacvaux decc qred qxauw, u kir byy dngxtauu. Liw air langg vyx, air langg cniaw, sii qaur dyrr gy siw boxqniaw.”

“Dnaxx liw si liam suah .bue? Dairjir dyrr qanxdanx, beh jiyh, byy rair jiyh, anxnix nia. Qongw qaxx lililylyx jit dua tuax.”

Qaur jiax, guaw qinw qra denrsi kuix .kuix. Kanx:ee cuiwjic kacc lrai quer dyx. Qycc jenr .lyc .kir, guaw si kacc suser.

Duarhanr :ee tec lenlogpo-aw laii beh hro inx buw :a ciamx miaa, qycc sunrsuar decc tyw jnii, qongw binaxjair kir tagceh diyhh qaux go koginn.

“Liw iurqycc dirr haghau qongw Daigiw hro laursux huat m?” Inx buw :a mng.

“Jiacc byy lehh.” Dua hanr :ee sui’ qra rinr. “Acc dyrr Jniuw Jongxtongw snezit decbeh qaur :ar, Jniuw Ngirdniuw qoxle hagsingginxaw cud jnii brew buxkir, brew huelingqix, tangx hro laurduarlangg hnuahiw .jit .xe.”

“Brew simxmih qix? Lanw daux lenrr sexsnaqix dy’ iauxx byy lehh. Qra linw laursux qongw byy jnii!” Jyr laurbuw :ee qongw.

“Bersaih lar. Haghau u quiding qongxx, jit xee langg siongrr jiwjiyw diyhh qiawhur go kox.” Dua hanr :ee qongw.

“Huelingqix qycc diyhh vecsner qaqi cud jnii brew, lap suer longxx decc lap qew :ee!” Kanx:ee cuir decc liam, go koginn guanjai u hro :ix.

“Mamax, guaw taukag jiokk jniu :ee.”

Dua hanr :ee jiacc bruw suah, jitt vaiw ngua lauxzi :ee.

“Aiio, tacc e iurqycc snex satbuw lar. Satvinr qinw kir giaa .laii, dirr guaw sejngdyh ee tuah-aw.”

Ginxaw tniax inx laurbuw qongw suah, sui’ dyrr kir giaa. Kanx:ee giaa jit jiah ixqoxtauu-aw, qiyr ginxaw jre dirr ix kapang diongx:a.

“Unw si kir hro linw dong’yc uer .diyc .ee. Au vaiw tauu m tangx qapp langg kab jywhuew, jaix bor?” Kanx:ee pnaiw qogqok, naxx luac, naxx decc qra ginxaw qawsi.

“Mair qra duarser sniax lar. Ginxaw decc sngw, iarr e juwir qaur hiax kir.”

“Jex satbuw zuarr bakdag, zuarr pnaiw tau lehh, liw dy' m jaix. Liw qanda’ cud jit qix cuir, samdanghuex erhiauw nia lar. Narr jingwqingx dairjir, byy vnuar ped lar!”

Snax-qongw-sir-qongw, iurqycc qongw duiww guaw jiax laii. Kanx:ee ing’amr jin’ pnaiw piah. Guaw vangr inx buxaxqniaw dirr kectniax liac satbuw, pni-aw bongx lehh, kacc jaw laii kunr kacc sit.

6

Dirr Jionghuar soxjai, ingxquer, kanx:ee inx sngr hiax ee unho. Guanw dniurlangg dirr Zidvunw Sidai jyr jniulyw ee singliw dua kixqex, siw liauxau, qycc u vangr quixarr der de dilehh, qeww jiyhtauvox, be jingwjyh :ee dyrr urngiaw.

Jingg:a jingwhuw jingsiux toxde beh kiw qysog-qonglo, guanw kanx:ee inx Jionghuar ee de hro inx jingsiux u diyc. Inx nisang jin’ qongdy, de bre .kir tec .diyc ee jnii, inx daux sir xee hniadi-jixmue jiauww sir hxun vunx, byy qongw qer .cud .kir .ee dyrr hxun byy, iacc si qongxx hxun kacc jiyw. Narr jiurr jitt diamw laii lun kiw, guanw daux hitt vingg ee quanliam sidjai u kacc duer langg' be diyc.

Tnix beh cri langg vuii lutlud. Bersux kir kiyh diyc duarjuixcaa, jitt diauu jnii tec .diyc ee sii, guanw ang’axbow hnuahiw qaxx qui’ amr longxx byy kunr.

“Liw guargiw e tongx, qycc borik marr u bad .quaw. Quikir lanw qaqi lyc kir jyr, anxnix tanr e qex kacc qinw.”

Tniax bow cuir, dua huwquir. Mrqycc sed qongsix, juvunxgiac siongrr jiwjiyw diyhh jap-bxan. Kanx:ee marr jnia’ qnaw ciongx, jnia’ u quatjir, cur ee dairkuanw iauxx decc lap, dyrr qra tec kir hro ginhangg setding. Jitt sniax qacc lriauu .lyc .kir .ar, byy vniar bersaih .did.

Sii qaur un qaur, kixcox bre denrhongx jiacc kaisiw yc jyr nia, sui’ dyrr hro guaw tanr diyc jnii. Suar .lyc ngua jyr horsnuar, iurqycc hro guaw bauc diyc jit tnuax.

“Lanw jitmaw vutsii rair jair hxuer, sangr hxuer, sniu’axciax diyhh qinw laii kanx .jit .jiah. Jre hex qewdingg :ee jiokk siongvunw.”

Taiwjy qacc u bingrling, jyr angx :ee dyrr kir jinwhingg. Qawjiaur kyw .quer, guanw dyrr kir kanx jit daii Zurliongg aw laii sraiw.

Langg narr decc ong, hex dyrr qaxnaxx li juiw vxangx snuax, sen’ dongr dy’ dongr be diauu. Guaw jyr sniaw tanr sniaw, lauwjunn, sraiw sunrhongx pxangg, dniardnia dy' jyr qaur buanxvnuaa.

Cua ginxaw jiokk tiamxtauu, jex guaw jin’ jai’ngiaw. Dnaxx jitmaw cur nirr dyrr u cunx .quaw, guaw dyrr qenwgi beh cnair jit xee obasang laii draur kaciuw. Kanx:ee kiamm-drew :ee, ix qongw ix u jaidiau cua, jitt diauu ix iarr beh singw .kiw .laii, byy beh hro vadd langg tanr.

Dingw lexvair, uersingsow u qiar tongdix laii, rair guanw qra ginxaw cua kir jur irhongsia. Guanw kanx:ee cua nng xee ser hanr :ee cutmngg ee sii u qra guaw huanhur, qiyr guaw siqanx qaur diyhh kir jriab nng xee dua hanr :ee dngw .laii. Inx kir yc piano, jit xee langg vnuar diamxjingx.

“Dagg lexvair diyhh sangr laii sangr kir, huiwkir qaxx. Au qywguec, guaw anwsngr cniar laursux laii cur nirr qar.”

Jit xee jrngx qaxx q.-quiwkir-k. ee hurzinlangg decc qongw hro guaw tniax. Inx vaii dirr guanw aurviah, kiarr guanw nng xee jaboxqniaw yc suah jiacc diyc qaur inx jaboxqniaw dnuaa.

“Kir linw daux qar! Acc linw daux m dyrr u qngwkimm jiacc ersaih?” guaw mng.

“U a. Linw daux qamxx byy?”

Guaw hnair tauu.

“Cur nirr byy qngwkimm beh taixtyw yc erhiauw? Langg' hex longxx marr diyh’air dagg qangx lenrsip, anxnix jingxtauu-aw mrjiacc e liuxliac!”

“Jit daii qngwkimm quir somsomx. Duxjiacc kaisiw yc nia, iarr m jaix inx yc e diauu be.” Guaw qongw.

“Pah derqix ee sii siongrqaiww iauwqinw. Narr qniax sniu’ quir, m mic, linw berhiauw kir brew hitt hy vnuawqurlyc :ee, snax~go-bxan aw dyrr u :ar.”

“Qacc beh brew dyrr brew sinx :ee," guaw rinr qinw qinw. "Si qniax inx yc vnuawdiongnuaa iurqycc m yc, sii qaur kngr dirr cur-lai dinwder.”

“Anxnix qongw marr urngiaw. Guanw Siyxquanx dingw vrangx caw qongxx beh yc uerdoo. Hex simxmih lahvid iacc uerdovid, guaw longxx qra brew qui’ jxox :ee. Qetqyw, ix kir jit vaiw dyrr qra guaw qongw byy beh qycc kir :ar. Jitmaw ee ginxaw sidjai si hyw mia m jaix.”

Ix cuir qongw qycc quaww ciuw viw Guaw ee bagjiux hro jit dy qngx cak jit xe qiongbeh tiw be kuix. Knuar jit xe jinx, dangsi’aw dyrr si ix jingxtauu-aw ee suanrjiyc-ciuxjiw qngx siamxsiamw laii soxx drir.

Hitt amr, sir xee ginxaw longxx andah hyxser, kanx:ee zip laii vangqingx ngua kunwsnax cuann beh kunr. Denrhuew ced huax .kir liauxau, guaw qra kanx:ee qongw kiw diyc zit .sii dirr yc qngwkimm hiax qapp jit xui hurzinlangg decc kaiqangw ee dairjir.

“Hitt xee Jngx Taiwtair lar!" kanx :ee qongw. "Dnaxx ix hitt xee langg dyrr siongrr cauwpuir, siongrr air denw vyw! Jex guanw jitt quaw mamax dag’ee marr jaix. Si liw decc m jaix nia.”

“Inx qaxnaxx vutjiw aw u ee kuanw. Inx tauu :ee decc jyr sniaw?” guaw mng.

“Jyr ingjy :ee lar. Dnaxx jitmaw kiw cur dyrr siongrr tanwjnii.”

“Qongw diyc kiw cur guaw jiacc sniu .diyc. Lanw guehdew qamxx m si u jit dniux dingrqii :ee beh qauwqii :ar?"

"Si a. Anwjnuaw?"

"Lanw si m si jurr hiaxee jnii qinw qycc laii lap .jit .qingx? Cur kngr lehh, ix qaqi e kixqer. Ginpiyr dendywvingw, kngr quw si e vyc .kir!”

“Mrqycc guaw au lexvair diyhh lap jit diauu huertaujnii.”

“Huertaujnii?”

“Acc dyrr guaw jit xee dongcongx :ee laii decc jiyx kax. Qongw qaur hex ginhangg ee lirsig, byy-dap.-byy-sab, iauxx si duer hue’aw kacc u tongx.”

“Jitt din iyhue si zuarr quw?”

“Nng nii vnuar nia. Guaw anwsngr beh qra duer go kax.”

“Jit kunr duer qaxx go kax!” Guaw huah cud sniax.

“Langg’ inx longxx viyx zuarr quann lehh! Narr hro lanw lamw diyc buew hue, hex cur lanw dyrr tingwhyw henrqimx qra brew!”

“Hex qamxx u unw? Liw si m tangx ho'ngg dyw .kir .or, guaw qra liw qongw.”

“Be lar. Jairdongr-jairde, jitt xee huertauu guaw diqiw :ee, be jauw lanw ee jnii lar.”

“Bre decc byy langg brew lehh, be! Byy jin' jairjuw, dy' m tangx duer kacc driyc.”

“Mair qycc lysyx lar, dnaxx guaw dy' inw .langg .ar.”

Kanx:ee sinkux banw .jit .xe, kajiacpniax hiongr guaw dyw tanxkix. Jitt xee juser, guaw knuar qaxx byy air knuar :ar. Ix unxdangr iurqycc decc sairpuah, decc cai puawnua kunr.

“Guanw banx qu :a ee jaboxqniaw au qywguec beh ho’ngg sangwdnia. Guaw beh vaux cingx-zi.”

Guaw liaurqiyr ix beh kunr ar. Byy girgo, ix iurqycc cud sniax.

“Siauw! Vaux qaxx cingx-zi! Lak-vah dyrr jnia’ iongw ar.” Guaw qongw.

“Lak-vah iarr suacc e knuawkauw .did? Hex guanw buxqu ne! Langg' ix u qongw beh qiyr lanw memex kir kanx sinniubang-aw. Sii qaur, inx qycc e vaux jitt xee angg hro :lanw.”

“Qacc anxnix, m byy, qex vaux nng-vah kox hro inx.”

“Lak-vah qax nng-vah, anxnix mrjiacc veh-vah nia? Sniu’ jiyw lar. Siongrr byy, marr diyh’air jit-cingx.”

“Liw si jnuaxngiu? Guaw qongw veh-vah dyrr veh-vah!”

“Guaw dyrr qan’ qan’ aw beh vaux jit-cingx!”

“Veh-vah!”

“Jit-cingx!” “Veh-vah” “….” “….”

Buew Jam

1

Dua hanr siyxmue qimdnuawzit crua simvu. Iarr m jaix si huanrsuah iacc si jnaixngiu, jaxkiw sinniuu-aw dac zip hording liauxau, jyr daqex :ee dyrr kogkok decc tutcuee. Liammix deh deaux ee dnitngx byy cuann .jit .cud, liammix byy diamw hniux hro sinlangg vair qongmaw .jit .cud. Iauxx u qyckacc hamr :ee. Langg’ jarmee qaux hro ix jit duir qimx-aw, qongxx si sinlongg sinniuu qruar ciuxjiw beh ing :ee dng’ iauwqinw, limsii-lim’iau, ix suacc qra liw qongw cue byy, be qir did qaqi qra siux kir dyhh kngr.

“Dy’ iarr m si tauu vaiw jyr daqex, kaciuxbah iarr qapp langg' decc laglak cuah.”

“Jex iarr bogquair. Langg’ jitt xee sinniuu-aw si jre huelingqix laii :ee!”

U tniax diyc jit quaw cuwvnix ee hurzinlangg ser aw sniax anxnix decc gex.

Vut diong qrngx, langg diong jrngx. Sinlongg cing sebily, knuar .kiw .laii urngiaw qex kacc u langvan. Qniazit cuarbow jitt xee guersingx-aw, ix si inx daux siongrr dua :ee. Ix erkax snax xee siyxdi, langg’ inx quixnarr nii jingg dy’ longxx jyr a’vaa .kir .ar. Ix kacc viwsur, hamban qongxue byy dnaxqinw, nng kxiw saixvuekiw viyx viyx, qycc vutsii cing qaxx jit sinkux a.-aujaux-j., sidjai jin' be qnir did langjingr.

Guanw siyxmue-aw uirr jitt xee dua hanr haursnex jnia’ huanlyw. Au .laii, u langg an’ Uadlamm decc jinwkauw sinniuu. Guanw guersingx-aw mng diyc jit xee pnirbagcuir, jit biyw dy’ be danw .did, jiksii vniar duiww hiax kir. Jiac qaxx jitt xee huer :ar, qaqi iarr jaix jad hingkamxqud, knuar diyc u qacbak :ee, ciuxsiok vran hyxser, dua dnia, siyw dnia, lexvniaw, ab’axvniaw, sisisuarsua, jit guehzit lai jongw O.K.

“Qiyr qurqongx. Erhiauw be? Liw m dyrr qiyr!”

Ser hanr siyxmue qra jaboxsunx cua laii jiahdyh. Jiauww lexsiok qniaa, dua-hniax ho’ngg cniaw kir sinniudyh jre duarui. Guaw qapp kanx:ee ham' quiw xee siyxmue qapp duarsewdniu kiyh kiyh jyr jit dyh. Qeww longxx qaqirlangg, beh kaiqangw marr kacc u uerdee.

Daiuanlangg marr jnia’ liauxzenn, hyw :ee m duer, acc narr baiw :ee, dagg hxang dyrr yc qaxx diyc ~ ~. Tiab-aw dingxquann qiyr langg' lak diamw rair qauwui, hen dyrr cid diamw quer :ar, inx iauxx byy anwsngr beh kuix cair. Dag’ee kiwjuiw bongxx limx, quejiw bongxx cngw. Guanw daux hniadi-jixmue snruar dirr Daiuann qokk soxjai, jit nii hranw did quiw sii jiacc qniwbin jit vaiw, beh qrangw, jin jitt hy sii nia.

“Hyw mia lecc veh vaiw lehh, hyw mia,” zi-mue qongw. “Langg' ix sangw kax sangw ciuw, dagg qangx dy' jrngx qaxx suiw dangdangx, dagg hxang dy' vangr hro guaw jitt xee lau a’vyy :a decc jyr. Guaw dyrr m jai’ngiaw qongxx crua qaxx jitt hy e jiac be siy’ jringx :ee si beh congr sniaw?”

“Anxnix sngr be baiw :ar!” snax-mue qongw. “Guanw daux hitt xee m na byy air jyr, qycc hiamm dangx hiamm saix, qongxue snax qag lak jiamx, cniajai dy’ qig jit xee pnaiw binrcniux hro lanw knuar. Dauwdew daqex si si’angw decc jyr, urdangsii aw guaw qaqi dy’ sax byy!”

“Liw hitt xee simvu qamxx m si guarsingw :ee? Jingwhuw jitmaw u kaihongr lau o-aw dngw kir Dngsnuax tamwcinx. Acc linw cinqex qamxx u kir?” guaw mng ser hanr siyxmue.

“Iarr u jit xee byy! Qnuaw dairsingx or,” muersair cniuw lecc rinr. “Jnii he snewmia vud vud .dngw .kir. Dingw jua dngw .laii, qongxx beh kir hiax daujux, rair guanw jnii lruiw :ix, u tanr beh vunx :guanw.”

“Linw diyh’air sewzi or! Tniax qongxx hitt quaw qiongrsanw :ee, langg simqnuax, guu vakdow, qik hiongg buviw!” Guaw qra inx qingxqair.

“Jex guanw jaix lar! Guaw byy hiacc hiacc gongrsongr.” Snax-mue rinr.

Guarkauw decc vangr paur-aw. Pidpitpogpok ee sniax iauxx bue tingg, jnia' jap liap qauxkangw qapp sikdir jin' lac ee ohijiw lingw vnuaa singx jnriu dyh.

Vingsor dirr jitt xee sijun, nguaxdi huanrser dy’ longxx sew hyw :ar. Jingwlangg iauxx qaxx duardngg qryr siyxdngg, cid~veh siangx di dangjee cutdong, jit bak nih quw, qui’ vnuaa ho’ngg gneh qaxx cingkir liuliux.

Derr zi cud si angg jimm bixqyx. Jitt hxang sngr kacc cox cair. Hex jimqongw ser aw qix, qycc longxx juann qangx :ee, byy zinn. Crinr vng dngx iaux langg. Jit din naxx dycsaur, sui' langg drew jit nguaw kir jiac, qui' sngg ee bixqyx byy cunx qaxx vnuar sxix.

Dag’ee di jiamrsii siyw kngr lehh danw cud cair. Siaurhingjiuw kuix .kuix, ue iurqycc je lor.

“Linw nng xee dua hanr :ee qamxx longxx iauxx dirr Bixqog?” Snax-muersair mng.

“Hner a. Jit xee dirr San Francisko jiac taulo, jit xee dirr Niu Iork tagceh.” Guaw dab.

“Acc linw m dniardnia Daiuann qapp Bixqog siangvingg decc jauw?” Ser hanr muersair mng.

“Daiuann, Bixqog, dangvo, saivo, uahbecc tiamw siw!” Kanx:ee qongw, cuir-aw ciyr girgi.

“Linw jnia’ gauu snex, snex qaxx jit quaw ginxaw longxx jiacc kiauw, jiacc u huatdenw.” Zi-mue ylyw.

“Marr byy lar. Guanw hitt xee javox :ee dyrr kacc hongr, kacc byy air tak.” Guaw qongw.

“Jingg:a qamxx m si qongxx u jit xee beh qer hro Bixqoklangg? Acc si dycc jit xee?” Zi-muersair mng.

“Derr snax :ee lar!” kanx:ee rinr. “Qra guanw qongw sigsai jit xee guarqoklangg, qycc qongw beh qapp ix qethunx, beh qapp ix kir Bixqog. U jit qangx ix qra cua dngw laii cur nirr beh hro guanw knuar. Suacc si jit xee olangg lar!”

“Si qongxx hitt xee olangg qamxx m si Bixqokjik :ee qaax?” Snax-muersair mng.

“Liw nacc jiacc kongx .diyc?” snax-mue baghuew-baghni. “Syw :a decc qongw Bixqoklangg, hex snesingg si jiw vehjingw :ee maar!”

Kanx:ee dimr tauu. “M si guaw jyr laurbuw :ee qaqi decc jnuar decc tanghongg. Guanw jitt xee ser hanr jaboxqniaw si suiw qaxx jit qix naxx huex lehh. Ziog ix ee javox, byy jap xee marr u qauw xee. Qamxx hiacc lyhsuex, diyhh kir qer qaxx hitt hy ox lulux naxx huextnuar :ee?”

Jauxdyh :ee siangx ciuw pangg jit knax huiknax, hng hng dyrr decc huah siyx. Oqutqex dim sim’aw,  tngtauu jiokk janw, guaw u hahcuir. Vran jex jit dyh m jaix rair zuarr je?

“Laii, amm .jit .cuir. Amm!”

Jyr a’maw :ee hyw-sniax-hyw-sueh decc qojniaa a'sunx :ee jiahvng. Ginxaw, qyxjiab qapp kiwjuiw quanr .lyc dy' vaw :ar, iarr suacc e iaux.

“Qiyr liw mair cua .laii, liw dyrr qan’ qan’ aw beh. Giaa qee.” Ser hanr muersair decc qra inx bow liam.

“Byy huatdo a! Ix dyrr kauw be diam, gne beh duer .laii!” Ser hanr siyxmue vuexhue.

“Au vaiw m tangx a! Beh zuu .siw!” Ser hanr muersair jabjap qiyr.

“Hyw ar lar! Javolangg, jiacc cauwcenn .diyc. Iarr mrbenw liw cua!”

Uirdiyhh sunx ee dairjir, ser hanr siyxmue inx nng xee ang’axbow dng’ jingwlangg ee binrjingg caxcuir.

Muelangg cuartauu, huah qongxx sinniuu sinlongg beh laii qingwjiuw, qiyr dag’ee jiuxvuex-aw singx tinn hro dni. Guanw siyxmue, muersair, cinqex, cnemw duer dirr sinlangg aurviah, jit qniaa lak~cid miaa.

“Jex a’qxu, a’qim, a’ii, iauxqycc u idniu.”

Sinniuu-aw jiauww muelangg qar :ee sui’ xee aw qiywcuir, jin’ hyw qiwjaii.

Iarr bogquair langg' decc qingtew, qongxx si lau guu jiac iur qnuasunw. Sinniuu-aw jiacc jiyw huer kuanw, guanw guersingx-aw huanrser snex ix e dyw!

“Sinniuu-aw Daigiw qycc be hamban qongw. U gixgenn tenjaii oox!” Zi-mue qra yx.

“Qyckacc tenjaii, hex marr diyhh qaqi u simx beh yc. Guanw simvu, ix Inggiw siawsiar qiyr. Lanw qapp ix qongw Daigiw, ix tniax u marr byy beh sna' qiywinr.” Snax-mue decc dauu hro guanw tniax.

Jiuxenr jin buexsaux, cud cair ee sokdo zuxx laii zuxx qinw. Jit buew jiyhvanx iauxx byy sniaw jiac .diyc, jit der iuu dapdab ee tuixkor dyrr qra liw sangr .laii. Dag’ee knuar lyc qaur der dy’ uir qaxx, lenrr giaa di gneh dy' vindnua. Jiac qaxx jiokk vaxlaa. Dnilo bexdesox jiyw langg pangdniuu. Iongxlogdyx sngx sngx dnix dnix jo siaulap kacc sriu huangingg.

Siyxmue qra jauxdyh :ee tyw sokqade-aw, qongxx beh qra hitt quaw jiac byy liauw :ee vaux .dngw .kir.

“Hyw hyw mihqnia tec kir huiw hniwsag, tyxjer langg ee mic!”

Snax xee siyxmue byy ingg decc pacvaux caiwbuew, dax :ee, damm :ee, dnix :ee, qiamm :ee, vaux e kir :ee jongw kingg.

“Linw beh bor? Jitt buew hii hro :linw.” Zi-mue mng :guanw.

“Guanw mrbenw.” Kanx:ee qnuaw dirr guaw taujingg qra rinr.

“Jiaxee longxx qaqi byy vadd langg, linw si m tangx keckir neh!” Snax-mue qongw.

“Jniasit byy qapp linw keckir. Linw snax xee vunx dyrr hyw!”

Dyh-dingw ee jiahmic hro inx kuanw qaxx cingkir damdamx, lenrr jit liap quejiw dyrr byy hro pacsngw. Ngiaw diyc kanx:ee biccuir decc taux ciyr, guaw giaa tauu giaa hni, knuar jiax, knuar hiax, dyrr si byy beh knuar :inx.

2

Inx soxx qongw :ee Binjinr Dongw, qinaxzit dirr Daivag huatdong iuhingg, jyrsingg ci-lai qautongx be-dinx.-be-dang. Vecsner qiyr kow lentenx. Inx jit quaw bin’ir-dairviauw jinwjingg dirr qokhue siag iw siag dyh ee qniawtauu, tauwquer sinbunn muitew ee vywdy qapp hongwsangr, juann sewqair ee langg dirr denrsirqix taujingg knuar qaxx bingg ~ ~, giamdiong sngxhai diyc lanw qokqax ee hingsiong.

“Sidjai m tangx anxnix decc nau. Lauwkuir-lauwdag.”

Sinbunn juxvyr dirr denrsi lairdew decc vyr, kanx:ee dirr denrsi guarkauw decc cachue’aw.

“Linw or, juann jit quaw gong vecsner, hro Qokbinn Dongw sexnauw sew qaxx kong'amx .kir.”

“Hner lar. Guaw narr byy jiacc gong, dngcesii tacc e kir duer qaxx liw jitt van :ee?”

Kanx:ee an’ pongwiw vreh kiw, bin aur bin caur zip kir vangqingx.

Sinbunn iauxx decc vyr qetauu kongwgi jitt diauu, qniawtauu suaw kir qnuatniax jitt vingg bin. Quixnarr qix cincniu pachuexciax hitt hy hosuqongw cuann ven ven, dinwvy-qingxcad vaii qui' let, tingwhau dingxsix cud hyrling, ciuxtauu ee juixcingr dyrr beh dnua .cud .kir.

Hongx sngwsngr qiyr. Kiwsiong decc vyr u junw, qinaxzit kaksit u qnuaa dyrr driyc. Jitt hy tnix, ciangg lingw juiw m jaix simxmih kuanw?

Guaw qra denrsi qimr .srid, kectniax jing jiaucjiah. Cur narr dua qingx, ang’axbow mngsniwvanw draur be ba decc qikkir, qokk langg diamr jit xui, benw siy’ qaucab.

Hax jit cuir aw laurlangdee, hueqniar qra qruar .kiw .kir. Jaixsii knuar .quer ee vyxjuaw, bongxx qycc srunn knuar u tak lauwqaux .kir .ee iacc byy.

Denrue giangx quixlyrr sniax. Kanx:ee pacsngr lensiogqiok iurqycc knuar qaxx sinn .kir. Narr byy, cur nirr denrue laii, ix longxx jriab qinw qinw.

“Nisang or. A’Jaii Vxeh :a? Dongzenn iaxx e qir .did, guaw dyrr u kir qra liamx hniux lehh. Bingg :a dngw .laii .ar! Mair qapp ix laikir! Si anwjnuaw lehh? Be lar, jinw dy’ qaixgiamm :ar. Anxnix qamxx hyw? Ix jingg:a ho'ngg let dirr ox miadnuax, quixnarr nii berdangr dngw .laii dyrr decc cicamw liauw ar, lanw jitmaw iurqycc byy beh ham' langg'...”

“Si anwjnuaw liw byy beh tniax guaw ee cuir?”

Guaw jit qxur ue buerjingrr qongw suah, denrue hitt vingg ee langg dyrr qra guaw dnaa .kir.

“Dyrr qra liw qongw jingwdi :ee m tangx kir bag, byy duxhyw e dyww limsinx. Guaw qongw ee ue, liw m dyrr longxx byy decc qra guaw sinwdauw, m?”

Qongw suah, ix qra guaw siag denrue, siag jit xe dua dua lat, hai guaw cuah jit diyy.

“Si’angw lar?” Kanx:ee jauw cud laii decc mng.

“Guanw dua :ee lar," guaw qra qongw. "Liw duxjiah si decc congr sniaw? Denrue giangx hiacc quw iarr m jriab.”

“Liw jriab .jit .xe si e anwjnuaw? Guaw suacc benw kuu venrsow, si m?”

Kanx:ee qongw suah iurqycc uad .zip .kir, vangqingx ee denrsi jun qaxx draur dua sniax.

Piano dingxquann u kngr jit vaux mihqnia, qau qau jit jriw ing gupuejuaxlog-aw vaux lehh. Guaw qra tauw kiw laii knuar. Si muanii ee zidtiah.

Uat tauu beh jaix qniazit taiwimlik dangsii, jiacc huatqenr diyc qongxx zidjiwjuaw jiokk quw byy lir :ar. Cue diyc qinaxzit ee zidjiw, jnia' jap dniux jyww jit kunr qra lir driau.

a’vaa jywqi

Zidjiwjuaw dingxbin u jitt jua zri, hex henrhen dyrr guaw ee vitjig!

Jinw longxx quiw diamw :ar, beh kir dyhh cuann singlew laii vair? Byy huatdo, hniux diamw .quiw .qix, qinniii dyrr anxnix junw .quer.

Jywqi ee dairjir, jex vunxjniaa longxx guanw dua-syw decc huadlyc. Guanw syw :a qau suasab, cuir vutliamm, cuanww qongw dy’ byy hyw ue. Guaw qapp siyxmue-aw dirr ix kacngx-au, dag'ee si longxx qra suan qaxx qiongbeh byy lat. Jongw .si ix marr u jit vo cruw. A’qongx, a’maw, a’vaa qapp a’buw ee jewzit, ix longxx u jiauww kixqangx decc vair, m bad qiamxsingw .quer. Narr lun jitt diamw, guanw dyrr jin’ pnaiw qa’ngg hiamm kiw.

Dua jrunn .nii, guanw dua-syw kir vnerngi jyr sintew qiamxjax, huatqenr drir diyc ling'ingx, kacc byy jit nii, ix siangx kax liongr dit dyrr dngw .kir .ar, vangr guanw a’hniax jit xee langg byy pnua. Inx kir dirr Argentina ibinn ee haursnex u cniar jit xee Filipin :ee laii ter guanw a’hniax sew snxax, saur cur qapp kuanw snax dxngr. Inx Filipinlangg sinr Tenjuxqaur, berhiauw vair. Qovutjiongx, qongmaw mrjiacc cniaw cniaw laii guanw daux hogsai. Uirdiyhh jitt quaw sinjuxvaii-aw, guaw juanqangx jauw kir Liongsanx Sxi hag qongmaxkamx qapp angqewdyh, qui' jxox :ee, cai dirr qag qag ee soxjai, byy cai dirr duartniax.

“Guaw beh laii kunr :ar. Liw diamw hniux diyh'air sewzi!”

Hunenx diamwbadbat, kanx:ee dirr lairdew decc huah. Ix siauwlenn ee sii dyrr duer langg' sinr Iasox-qxaur, byy decc giac hniux.

Guaw qra denrsi jun .kuix, Zidvunw ee NHK dngdecc vyr sewqair sinbunn. Snax daii denrsi qra knuar id~zi-jap dxangx, kacc vnuax dy’ hitt quaw u :ee byy :ee. Ser qix hni-aw dna’aw jiacc cud .laii, guaw sui’ qiyr langg' laii cur nirr anjngx. Inggiw :ee kacc tniax byy, narr u jit~vnuar daii aw qongw Zidgiw :ee dyrr jnia’ u tangx knuar :ar.

Guarkauw u langg beh kuix mngg zip .laii. Tnix beh lyc angg ho :ar, dy’ iauxx bue huandiamw lehh, haursnex ing'amr qycc jiacc jaw dyrr dngw .laii.

“Denrsi u qra guaw lrok bor?”

Haursnex qinxdniux ninix, jid’err zip mngg dyrr mng jitt hxang. Guaw dimr tauu, qniaa kir log’ngiaxqix hiax cic PLAY.

Bec'amr aw ee sii ix u kar denrue dngw .laii, huanhur guanw qra lrok jit dniuu tennis vixsair, qongxx si ongg duiww ongg beh vniar qaurvyc, unw hyw knuar :ee.

“Qniazit linw a’qongx jyr snezidqi.” Haursnex decc knuar denrsi, guaw jre dirr ix vnix:a decc qongw.

“Or.” Haursnex qanxdanx rinr, bagjiux byy suaw lirkuix denrsirqix.

“Urngiaw lau :ar dyrr driyc. Zidjiwjuaw byy lir, ix ee jewzit iarr qra be qir .did.”

“Hngr.”

“Linw a’qongx quewsinx zi-jap gua dxangx, tauu jit vaiw byy cuann singlew qra vair.”

“…”

“Liw marr rair draur e qir .did. Aurquer, jex huanrser dyrr venr liw ee kangkuer.”

“…”

“Guaw decc qongw, liw si u decc tniax bor?” Guaw siyxkuaw kiw singwde.

“Hnaa, liw duxjiah qongw sniaw?”

Guaw byy qra rinr, trow jit kauw kuir, qra kectniax qui’ee niu hro :ix.

3

Lensiysuar quixnarr lexvair, qenwnarr hiyckunwzit dyrr ho laii, m bad jit vaiw hyw tnix .quer. Jarmee, sinbunn vyr qongxx qniazit e cud zit, guaw simqnuax dyrr hnuahiw decc danw. Jiokk quw byy unrdong :ar, quttauu qiongbeh hamsaux .kir.

“Liw suido byy jah.”

Jnia’ byy tausinn, jarhngx-ervox hniaa ee cnecauxaxdee, hiamw hiamw dyrr qra be qir .did. Marr qajair guaw lau qinjad, jai’ngiaw diyhh vaiwtog hencex qra guaw draur jixsingw.

Guaw qapp kanx:ee dangjee cutmngg, qniaa qaur sibzirlo-kauw jiacc jit langg qniaa jit lo. Ix beh kir hok'imdngg jyr lexvair, qnialo dyrr e qaur. Guaw qapp langg' iog dirr ciatauu siy’ danw, qongciajam dirr duiwbin.

Kacc jaw ixjingg ee jit xee dongsu, ix qapp langg' u jxox jit xee dingsanxhue. Dingw nii aw dirr jit xee enxsuathue qapp ix siy’ duw, ix dyrr jiyx guaw qazip, lexvaiwsii aw duer inx kir vreh snuax. Inx jitt xee hue, bylun taur hongx iacc lyc ho, quer nii quer jeh, dagg lexvair dy’ kir, byy decc hiyh. Guaw byy jiacc qutlat, ci-lai narr siyxkuaw oimx guaw dyrr byy kir. U huer :ar, benw jiacc vniawsir.

Ciax-lai juann ginxaw ee sniax, qiqiqarqa harha qunw. Inx vavax mamax m jaix beh cua inx kir dyhh cittyy, knuar inx qui’ sinkux cing qaxx ped ~ ~, unrdongrsnax, unrdongree, uree qycc dir Disni ee by-aw. Poxtongx narr dirr jitt xee sii, qongciax kiyh ee langkeh longxx siongrvanjok :ee kacc je. Jiahtaulorlangg, vaiwid qaur vaiwlak diyhh qnuaw siongrvanx, lexvaiwsii aw longxx e kunr kacc nguar beh vow binn. Guaw qaqi kuix qongsix, mrbenw qnuaw qongciax, mrbenw knuar langg ee tauvingg. Jitt quiw nii aw, singliw decc jyr u kacc qet, byy jap gua dxangx jingg hiacc hyw qongqingw. Hitt jun, Daiuann ee qingjer dngdecc kixqnar, guaw u duer diyc ciavangx, tranr qigu jig be jiyw kiw .laii. Hiangwsii u pnee derqix, jinw siuw siuw aw jyr dyrr ersaiw.

Ciatauu qaur :ar, vnevnee qapp guaw dirr jitt jam lyc ciax :ee qycc be jiyw. Guaw qniaa hiongr dag’ee iog beh siy’ dngrtauu ee soxjai. Qimzit beh kir Sindiamr hitt vingg. Daiuann snuax je, dandanx Daivag jiax dyrr jnia’ u tangx vreh.

“Taiwtair tacc e byy jywhuew laii?” U hueriuw decc qra guaw mng.

“Ix kir amen.” Guaw dab.

“Hnaa?”

“Kir qauwhue vair siongrdewqongx lar!”

Marr decc qrii, marr decc quair, qenwnarr qapp jitt quaw vecsnuax :ee dauwdin, guaw dyrr qex jiokk kuehaii, jiokk gauu dnir ciywue qapp langg' qunxsngxciyr. Guanw jiax, lau :ee, jniw :ee, siauwlenn :ee, dionglenn :ee, sniaw kuanw nihuer dy’ u. Binqog cutsir :ee jiamrr siongrr je. Cincniu guaw jitt kuanw Jiauhyy Nii :ee sngr vnuawlyxzinn nia. U jit xee veh-jap tongw ee lau hniaqyx, ix Dairjingr snax nii cutsir. Vadd langg jiac qaur ix jitt xee huer, jerje longxx dyw dirr vnerngi decc diaur sanso, langg’ ix angg qxyx ciah cic, sintew iauxx iongw kenwkenr. Jit din langg decc vreh snuax, ix dniardnia dy’ ciongx dairsingx, m bad qniaa auwbuew.

Sraiw hiongr qaugua ee kec’un :ee, narr hiyckunwzit qycc hyw tnix, langg dyrr dedvet je. Guanw jit qniaa jap gua xee dirr Piktamm lyc ciax, ciax-dingw ee langkeh iuguann tattad dni. Niaxdui giaa jit qix qxii-aw qniaa jyr jingg, qiyr dag’ee diyhh qrinx kacc diauu lehh, nng xee nng xee jit jxox duer ix qniaa. Guanw naxx vreh naxx kaiqangw. Marr u langg en’ lo naxx decc qid vowdiauu-aw jyr hyrtauu. Aurvaiw laii :ee narr knuar .diyc, dyrr kacc be qniaa m jaix lo.

Beh vreh jit jam kacc qia ee snualo ee sii, qinggiam kacc u :ee qiyr dag’ee sinkux ngar qe, kaaurdnex kuix kuix, kajnix kiyh uaw, qongxx anxnix kajiacdew kacc e banw too, kacc be cu dyw. Qycc kir, u qingquer jit pxenr ciurnaa, ciu-aw jiokk om, u ciwdig e cak .langg. Dirr taujingg decc cuarlo :ee qiyr dag’ee ciuw kanx jywhuew, jit xee duer jit xee, ix qaqi giac jit qix liamlik-aw, naxx qra cixaw cyr hro dng. Guanw lairdew u nng xee siyxjiaxlangg sintew kacc ziok, texlat byy, qongxx beh qniaa huantau. Jingwlangg qra inx qoxle, qiyr inx qycc qewsiok, qongxx jitmaw hongwkir jin’ bycaiw. Uree beh ter inx pnai pnai’aw, qycc u langg qongw beh qra inx ngai, qinsiok, jit xee dy' byy beh vangwsag dyrr driyc.

Qniaa quer jitt jad qongxx si siongrr gnerdauw :ee, niaxdui qiyr dag’ee tingkax, qokk langg cue jit xui kacc ciucinr ee soxjai hiyccuanw, siauliangg .jit .xe. Guaw jre dirr jit jangg ciu-kax ee jiyhtauu dingw, qra cnecauxaxdee dyw cud laii limx. Jaixsii jiacc an’ lingxdongwkor tec .cud .laii .ee, jinw iauxx bue jiauu tewvingx. Liangg ~ ~, hyw limx qaxx.

Ciu-aw zuxx dua jangg, ciurtauu dyrr zuxx jai. Mrqycc ciurhiyc-aw om, siongduiwdingw, marr kacc e jiac hongx. Jit quaw kacc lamw, kacc lau :ee, be kamx did siyxkuaw hongx senr .jit .xe, jicjair be diauu, jit hiyc jit hiyc lag lag .lyc .laii, jerje duxhyw lag dirr ciu-kax jit qingx Toxdirqongx Biy ee cuwbuexdingw.

Jitt qingx hogsai Hokdikjingwsinn ee biy-aw, ix ee guarkag iauxx jin’ sin’enx, narr ngr lairdew qra knuar, jnia’ kiongxvor, jit senx Toxdi suacc byy tauu, cunx jit xee sinkux qapp jit qix bangxsud-aw.

“Hex unw si hitt quaw ciamx Dawjiaxlyw :ee laii jiax decc vig bingvaii. Hyrbew kuix .cud .laii, qongwqux, krir .qaur .der, suacc laii qra Toxdirqongx ee tauu jam jam pud pud .kir.”

Qongw ee langg dirr jingwquanwhangg decc jiac taulo. Ix dagg qangx cutzip dirr qoxci, jingwdi surqnia, qingjer siausid, ixqip siarhue dongrtai dingxdingw jiaxee sinbunn, ix dagg hxang marr jaix taur taur.

Niaxdui huah qongxx beh qycc kixdingg. Zidtauu iam jngwjngr, naxx laii si naxx zuac. Beh uaw daur ee sii, guanw qniaa laii qaur snuadingw ee jit qingx zinqecur. Diongdaur, guanw dyrr beh jiyh inx ee dniadauw kiw huew juxjiac.

Jit xee oksang cud hyrling, pacpair kangkuer hro dag’ee kir byy ingg. Jabow :ee sxix cair, javox :ee ced cair; siauwlenn :ee cnriu juiw, kacc u huer :ee kiw huew. Dirr jitt xee snuax-dingw buexliux, jap gua langg habjee juw qaxx jit dniaw jabcaiwmi pangx qongwqongr, qongwqongr pangx. Dag’ee iaux sywsyr, jiac qaxx sudsut qiyr, iauxx siyx tngwtngr marr dua cuir qra truix .lyc .kir.

“Dirr cur nirr, muevng longxx m jiac. Lanw beh qra cri, qycc diyhh qapp ix jauw siy’ ziog. Laii jiax, vitow jiauu kuix. Duxjiah qra drew jit nguaw dni dni, jit xe aw quw, sui’ sud qaxx qui’ nguaw kangx ~ ~.” Jit xee mamax qongw qaxx cuir ciyr bak ciyr.

“Ginxaxlangg, tiaur quer qxaux, jiac snax aux. Diyhh kacc jiap qra cua cud laii unrdong. Guaw vyxniaw ginxaw aurzit aw qaqi e tyw beh jiac, liw marr benw jiacc huiwciuw, dagg snax dxngr qycc diyhh qra qojniaa.” Niaxdui :ee anxnix qra jitt xee siauwlenn mamax qenwgi.

Snuahongx bibii aw cuex. Jiac vaw, dag’ee dirr jit jangg jiauxcingg erkax decc jerliangg. U langg srinn snuajuiw beh praur dee. Diamr snuax tauqex jin’ hyw lew, qra guanw cuann jit quaw todau, bixpangx qapp qiamsngdnix-aw, qongxx beh hro guanw jyr depuer. Guanw naxx hax dee naxx kaiqangw, uerdee dairkair aw longxx dirr vreh snuax jitt jann decc sec.

U jit xee dairhagsingx, ix dingw guehzit aw jiacc an’ Gxik Snuax dingxquann lyc .laii. Ix dirr jingwlangg binrjingg he dua guan, qongxx dirr ix zi-sir huer vidgiap jinwjingg, Daiuann snax-cingx qongciyh kiw .kir ee snuax beh vreh ciauquer jit-vah jxy.

“U kiwpig. A’vxeh qra liw janrsniax.” Guaw ciuw hnua dirr ix qingqactauu anxnix qra qoxle.

Jnriu snuax jin’ tiamxtauu, dngw .kir lyc qia dyrr qex kacc likling. Taujingg u jit xee gorlixdingg, lairdew u jit jrunx danglangg. Iauxx dirr hng hng, dyrr u langg decc iyh qongxx hitt senx danglangg si si’angw.

“Vacbin si Jniuw Qaiwjiyc aw lar.” Veh-jap gua ee lau hniaqyx qongw.

“Guaw iyh si Jniuw Diongjingr," dairhagsingx qongw. "Dirr Daiuann, ix ee kiarsiong cai qaxx duarbuw siwqer.” 

Ix qongw suah, suar mng decc tak qokhau-aw ee ginxaw.

“Kiarsiong? Qamxx e si Jniuw Qongx?" ginxaw qongw. "Guanw haghau marr u jit senx. Laursux huanhur guanw qongxx qingquer ee sii, longxx diyhh qra ix qnialew.”

Tnidingw decc dann cewluii. Jin’ qajair, lyc snuax qnuaw qaur qongciajam, horjuiw jiacc dih .lyc .laii. Narr byy, cincniu jitt hy saivakho lyc qaxx jiacc cox, hormuax qapp horsnuar narr u, sinkux qangrkuanw e ag damm .kir.

“Suatciux qniazit byy kir jyr lexvair. Huanrser si hro inx haursnex sangr kir poxjewdongg iacc iongxjewngi ar.” Huedngw qaur cur, kanx:ee iurqycc decc qra guaw dramm kiw inx qauwiuw ee dairjir.

“Mair qaqi decc ovec iyh lar. Byy-ngiaw-byy-jiah ee dairjir, m hyw kir snegenn-jyrgiw.”

“Simxmic guaw decc snegenn-jyrgiw! Dingw lexvaiwsnax kir bogsux hiax caqingx, diyc qaur ix qidyw ee sii, ix dyrr qongw brang Jruw vyxvir, hibang be hro inx qniaw sangr kir laurlangngi.”

“Acc liw lehh? Liw qra Siongrder tyw sniaw?” Guaw mng.

“Jaihur, kenrkongx a,” kanx:ee duiwcuir rinr. “Guaw qra Jruw qidyw, qriuu Ix vyxvir liw singliw huatdenw tanr dua jnii, sintew iongxqnia jiac vah-zxic. Sniaw kuanw, linw anxbow :ee duiww liw be baiw lar hnoh?”

4

Duiwbin dongr ee qor mngg :ee juwir guaw jiokk quw :ar. Qnaxx si qra guaw knuar jyr huixdoo ee kuanw, ix cuir-aw bih bih, nng luiw bagjiux grinn ror ror decc qra guaw jimjiog, qycc qaxnaxx longxx byy decc nih bak.

An’ hang-aw-tauu qaur hang-aw-buew, laii laii kir kir qniaa beh jnia’ jap jua :ar, jnuaxngiu hex denrlingg guaw qan’ qan’ aw m qnaw qra cic .lyc .kir? Guaw ciuw jac zidtauu, giaa tauu qycc qra quanx jit vaiw. Sir lxauu ee punqingw, jit punn kingrhuex jit kunxtauu snex qaxx sir luiw. Unw si hitt qingx byy cyr. Guaw dyrr m siongsinr iauxx u sniaw langg e viw ix kacc gauu jingr kingrhuex.

“Liw jai’ngiaw guaw qniazit kir duw diyc si’angw? Linw zi-syw!” Kanx:ee jarborzit qapp ix jit quaw jixmuerpnua kir cantniax jiac vng, dngw laii qaur cur, dua-qniax-siyw-qiyr decc vyr hro guaw jaix.

“Liw u qra mng ix jinw druar dyhh bor?” Guaw mng qinw qinw.

Kanx:ee an’ puevaux-lai tec jit dniux zirjuaw cud laii qaux :guaw.

“Tacc e byy sunrsuar caux denrue?”

“Dnaxx guaw iarr byy qapp ix qongw diyc ue, si beh anwjnuaw caux kiw?”

“Liw uirr jnuaxngiu byy qapp ix qongxue?” Guaw tniax qaxx bu sawsar, sax byy jangxquntauu.

“Qapp ix marr qanda’ qnir quer jit vaiw bin, iarr m qnaw kakzin qongxx qamxx dyrr si ix. Marr qajair guaw taukag uac, u qivenr, amr amr aw dirr ix kacngx-au qra qrinx. Narr byy, liw lenrr derjiw dy’ NO sud!” Kanx:ee rinr qaxx jiokk hyxser, bersux tnikae ee lriw qeww qruix dirr ix hitt vingg.

Jarmee, dirr bincngg-dingw vingw laii vingw kir, kacc anwjnuaw dy’ kunr be lyc binn. Kanx:ee hnirkangx dang, bagsig si hyw qaxnaxx sniaw lehh, ix dikkag be knuar dingdnaa jiacc si.

Zi-syw go~lak dxangx jingg qapp inx jiapkax angx lirenn, jurr anxnix, dyrr byy-siau.-byy-sid, qapp guanw daux srid lenlok .kir. Tniax guanw kanx :ee decc qongw, qongxx ix knuar diyc guanw zi-syw cing qaxx qimx sangxsangw, puahlen, hnirqaux qapp ciuxjiw jitt quaw iuwliabmic qruar qaxx qui' sinkux. Ix si u simxmih quiwzinn hen? Tniax qongxx ix lirkuix jing’angx ee sii, langg’ vnuar sxenw jnii dy’ byy hro :ix.

Qor mngg :ee  pacsngr jre be diauu :ar, kia cud laii guarkauw, ciuw cacqyh. Ho’ngg vig .diyc .ar, denrlingg hongwdnaw qra cic .lyc .kir.

“Simxmih langg?”

“Jiycmng lehh, lanw qamxx u jit xui Ngg Muii Luxsu druar dirr jiax?”

Hitt vingg diam diam byy inwue. Guaw jiacc decc sniu qongxx qamxx e hud m driyc .kir, duarmngg suacc qaqi kuix .kuix.

Go lxauu kiw ee cur, byy sed denrtuix, vreh qaur cuwbuexdingw kir marr diyhh qig vorlenw. Jex cur m si sinx kiw :ee, mrqycc jiax ee de jin’ u qrer. Jex jit hxo, byy jit-cingx-bxan kiongxqniax be diyc.

Sir lxauu ee mngg kuix kuix, zi-syw kia dirr mng'ag decc danw :guaw.

Zip laii langkectniax, ix suhau guaw ngua cenxtuax. Cur-lai cingkir damdamx, vniar qaxx dngrdiamxdinn, cinxtuax benw cing sidjai marr byy iauwqinw. Daiuanlangg ee cur longxx sxor sxor ar. Inx daux ee jonghongg u qapp langg' kacc byy qangg, viacjuaw qapp tailu, sikdir longxx qaiww hongw, jamxzenn aw u hitt hy Lamngiuu ee hong'un.

“Dongcox quat’ir beh ing jiaxee huecauw hitt xee langg, henrvo druar dirr Malaisia. Ix narr u laii Daiuann, dy’ e laii druar guaw jiax.”

Jurr jaw ixlaii, guanw zi-syw dyrr vutjiaw aw gauu quanzinn-qenwsig. Jitmaw bunrdee laii :ar. Jitt xee sinvir zinbut dauwdew si lxamm iacc si luw? Narr si javox :ee, guanw zi-syw qapp langg' u sniaw qangai? Ving’iuw? Angbow? Iacc si huexqir?

“Jitt qingx cur si linw zi-hniax brew hro guaw druar :ee.” Zi-syw qongw.

“Zi-hniax! Ix iauxx dilehh?”

Zi-syw dimr tauu, vreh kiw srinx zip kir vangqingx tec jit dniux siongwpnir laii hro guaw knuar. Siongwpnir lairdew u jit xee javox :ee qapp nng xee osuiw aw osuiw ee siauwlenn jaboxginxaw. Javox :ee, mrbenw qex sueh, dyrr si guanw zi-hniax byy cyr. Ix guanvunw dyrr dua jangg, jiac lau, qycc qex kacc hoksiongr, siangvingg cuiwpuew riyh riyh, nng qix ciuxqud vuinngw aw vuinngw, taumngg qngx kutkud, amrqunw-aw qycc qruar qaxx jit diauu qimpuahlen cox ~ ~, jin’ u dua huwongx ee van.

“Kia dirr ix vnix:a hitt nng xee si inx jaboxqniaw, ix qapp inx Malaisia ee bow snex :ee.”

Zi-syw duarkuir trow jit xee. Surjingg ee in’iuu, an’ guankixtauu, ix knuax knuax aw decc sueh kiw.

Jit xee hongwdong ee qiauxqunr qra boxqniaw vangr lehh, lirkuix onaa-huecziah, duer langg’ kir qniahaiw jauw tengaii. Junn sraiw qaur Lam’ngiuu soxjai, jin’ hyw zirun, dirr Malaisia hro ix did diyc dua huatdenw, marr dirr dongde qycjaiww cuarbow kixqex. Bow suiw, cur kuah, jniginn vaw vaw, dogdok kiamr jit xee haursnex tngg qegiap. Ix jni’axtauu ia .lyc .kir, cniar langg laii Daiuann tamwtniax guanpuer qapp qoqniaw ee siausid. Hitt quaw tamxaw marr jnia’ u vunxdingw, qongxx kacc benw jit guehzit dyrr hro inx cue .diyc. Zi-hniax henrlangg vniar dngw laii Daiuann ham' qeau qapp haursnex qniwbin t.-tuanngii, qycc lenrr sunx dy’ u :ar!

“Linw qniaw a’Singg :a lehh?” Guaw mng.

“Inx qui’ qekauw-aw longxx vnuax kir Malaisia.” Zi-syw dab.

“Acc liw jitmaw m dyrr jit xee langg dirr Daiuann?”

Ix dimr tauu, bin-aw caa caa.

“Nisang qamxx jai’ngiaw zi-hniax ee dairjir?” Guaw qycc mng.

Ix hnair tauu. “Linw zi-hniax dairkair si qniax pnaixser, longxx byy qapp linw daux ee langg lenlok.”

“Liw qo’ jit xee langg dirr Daiuann, liw m qniax guanw zi-hniax dycc jit qangx kiw angwdo, jnii byy beh qycc qiar hro :liw?”

“Ix m qnaw,” zi-syw duiwcuir rinr. “Singg :a uaw guaw jitt vingg. Dngcuesii narr byy guaw dimr tauu, guanw Singg :a quatding be kir qiyr ix jit sniax a’vaa.”

Dongrdudqanx, zi-syw ee sniax venr jiokkk ong. Cur laidew dyrr dna’ guaw qapp ix nng xee langg, qycc longxx dirr kectniax jre, nacc diyhh qongw qaxx hiacc dua sniax?

Ix cua guaw camquanx inx ee kiarqex. Inx jitt qingx cur suwhongciyh, jin’ hyw cniaqig, byy hangrlo, kongqanx longxx byy pacsngw .kir. Jiahvngrtniax qapp jauwkax liamm jywhuew, sed dirr aurviah. Huloqingx kacc uaw kectniax. Vangqingx jongw :a qiong :a jiacc qrig nng qingx. Jit qingx kunwvangg, lingrgua jit qingx qongxx si ix ee jaivangg.

“Guaw u duer Senqongx Biy jit xee suhu decc siongrqingx vaiwcamr. Qongxx jaxjingg lanw dyrr kacc byy jaidiau. Jitmaw kacc erdid quer, qongdig qex jyr .quaw, qeqiamw marr e tangx jrig hokvyr.”

Jaivangg ee mngg ho’ngg sag .kuix, lairdew jin’ cing’iux. Jewdnuaa, vaiwdiam, hionghuax-dingjiog, qapp mngg-gua uanxzenn nng xee sewqair.

“Liw knuar guaw zuarr sitlew. Qor qapp liw kaiqangw, suacc byy tinn dee hro liw limx.”

Deqow qnrua lehh, ix sui’ beh kir hniaa dee. Guaw qra dongr, qongxx tnisig nguar :ar, hyw laii dngw :ar.

“Snax-hniax, u jit hxang dairjir diyh’air vaiwtog :liw. Linw zi-hniax iauxx uac lehh, dirr Daiuann, dyrr qanda’ liw qapp guaw nng xee langg jaix narnia. Liw diyhh ter guaw draur amkamr, cenban m tangx laursed .cud .kir!”

Ix jnia’ qanghux, cinsinx sangr guaw qaur laukax, dirr mngcuir qapp guaw et ciuw siy’ srii. Beh dngw .kir ee lo nirr, guaw liyc aw hongxhud. Viw did jing’angx ee giogtai, jitt jiongw qetqiok, zi-syw ingqaix sngr u hyw buexqingw. Taixtyw guaw simqnuatauu bun jaujaux, kacc anwjnuaw dy’ be cingcaiw lehh?

Dngw .laii, guaw qra longxjongw itcer yc hro kanx:ee tniax. Crua jit xee bow cauwhni u jitt vo hyw. Junxnarr qongw jit quaw go-sir-snax iacc alixvutdat :ee, ix iarr e jiokk juwsinn decc tniax.

“Qniax pnaixser? Penr langg decc m bad! Ix decc qniax linw siyxmue hitt quaw sanr cinjniaa kir qra lylud kacc urngiaw.”

Kanx:ee marr jnia’ tenjaii. Qanda’ qra qongw jit xee ngiaw, ix qaqi dyrr tangx vongr qaur jap-snax tnix-gua kir.

“Lanw kacc jaw qu cur hitt xee oksang, air lanw dua hanr :ee hro ix jyr jaboxqniaw hitt xee, liw e qir did bor? Ervox liw byy dilehh ee sijun, ix u laii lanw daux ne!”

Tniax kanx:ee decc qongw, guaw taukag-lai dyrr sniu kiw diyc jit xee qutqeh hniux hniux, qik air tniax Linggo Duihunx hitt diauu enga ee hurzinlangg. Guanw vnuax lirkuix liauxau, dag'ee taukixsingx iauxx u decc tongx denrue. Jitt quiw nii aw kacc byy decc laikir, j.-jurzenn-z. dyrr sxex .kir .ar.

“Lorbuew, ix si u snex bor?”

“Dnaxx jaw jaw dyrr lirenn .kir .ar, beh snex jit kox hnox?”

“Lii :ar! Acc ix jitmaw m jiokk sitjir?”

“Jiacc be lehh,” kanx:ee qongw. “Langg' ix henrjai si pxangw-dxiamr ee tauqex, qanghulangg qapp sinlyy, ix cniar quixlyrr xee. Jit qingx hundiamr qongxx iauxx decc jyrjog, anwsngr au lexvaiwlak kuibo. Ix qiyr lanw u ingg kir qra pangdniuu, tangx hro ong .jit .xe.”

“Acc si kuix dirr dyhh?”

Kanx:ee qra mewsih tec hro :guaw. Knuar suah, guanw nng xee longxx babuix aw ciyr.

“Au lexvaiwlak, lanw singx qauquanx pxangw-dxiamr, liauxau laii kir vaiwhongw linw zi-syw. Qecviah hang-aw nia, qin qin :a, zuarr sunrlo lehh.” Kanx:ee ciyr ciyr aw qongw.

5

Narr m si qongxx piyr dy’ brew :ar, guaw si jiokk sniu beh laii dngw. Qamxx jniasit u jnii byy der kaix? Snax xee duarlangg kaix sir~go-vah kox knuar jit cud Langbah Vau’aw. Jurr jiaxee jnii, guaw tec laii vunx hro lo-vnix ee kitjiac iauxx kacc ngiaa.

“Qycc quer jap hunjingx dyrr erdangr zibdniuu :ar," haursnex qongw. "Linw jiax siyw danw lehh. Guaw laii brew quaw damrsamw, kactingg aw laii lairdew jiac.”

Guaw jiacc beh kuix cuir qra dongr, langg’ ix siauwlenn :ee kaciuw mew, uad lehh sui’ jauw qaxx byy knuar did ngiaw :ar.

Qimdnuawzit si Buxcinjed, haursnex jarhngx dyrr u qongw beh cniaw guanw nng xee lau :ee ervox laii Semngdingx knuar denrngiaw, knuar suah go~lak diamw, sunrsuar laii cantniax jiac amr kingwjiog. Iuxhaur ee honghuad vacvah jiongw, iarr m jaix ix tacc e kir sniu jitt cud :ee. Kanx:ee dy' m jaix zuarr quw m bad decc zip hiwngi knuar ngiaxhir ar! Qoxjaw ixjingg, ix si air knuar hitt hy aiwjingg siyxsuad qaixvenx :ee, dyrr si lamjuxqag endauu, luxjuxqag suiw qaxnaxx tensenx jingwlangg air hitt jiongw jaboxhir. Dnaxx kacc danw beh knuar jitt cud hy qaxx jitt hy pniwmiaa, tniax lyc qaur der dyrr qiongbeh vingxvag. Guanw kanx:ee beh jnuaw e air knuar?

Beh laii knuar hxir ee langkeh u naxx je .laii. Guaw qapp kanx:ee ho’ngg keh qaur qag qag .kir. Hiongqangw pnir dairliong dirr Daiuann jniurliok liauxau, jitt quiw nii aw quer iauxx jin’ qa'iac. Siauwlenn :ee, jap-go~lak~cid huer jitt renn :ee siongrqaiww pangdniuu. Inx decc siauw Hiongqangw ee ngiaxcnix, dyrr junw pnaiw knuar, inx marr jiauwsiongg e laii oenw.

Duiwbin hitt qingx hiwngi dyrr byy jiacc hyw qongqingw, ham' guanw ee viw .kiw .laii qex jiokk hibii. Kaienw ee siqanx beh qaur :ar, inx jiacc nng~snax jiah niaux-aw punr punr. Guaw giaa tauu knuar inx ee kanwvanw, si decc vnuax Zidvunw cud :ee.

Siw beh zi-jap dxangx ee Lauw Jniuw :ee dongcox ham' Zidvunxlangg kiyc'uanr, huanhur qongxx narr qongw Zidgiw :ee longxx berdangr dirr Daiuann vnuax, itdit qaur jingg quiw nii aw jiacc kaiqimr. Kanwvanw dingxquann ee luxjuxqag jin’ siauwlenn kuanw, cing jit sux hyhok jiokk gnaxkir. Vutdix-vutqag, guaw sniu kiw diyc guaw ee coluann Akiko Siyxjiaw.

“Guaw beh knuar duiwbin hitt cud.” Guaw qongw, ciuw qiw hro kanx:ee knuar.

“Mair jiacc qauxquair lar. Langg beh cua lanw cud .laii dyrr be baiw ar. Qycc qingw!” Kanx:ee sraiw vehzinn hro guaw knuar.

Hro guaw iyh qaxx junw juw. Caur hiamhiamx, qiamm dokdog, qui’ cud denrngiaw, an’ tauu jiww buew longxx decc qiqix qiyr. Ing’amr diyhh junxvi jyr amwqongjiauw. Dirr lairdew diamw vnuar jingx quw, u jidvnuar ee siqanx, guaw longxx decc ducbinn kacc je.

“Be pnaiw knuar lar hnoh. Qongxx si jinsit ee qowsu qaixvenx :ee.” Cud .laii liauxau, haursnex anxnix qongw.

“A’buw, guanw dirr jiax lar.”

Jaboxqniaw cua jaboxsunw dirr duiwbin decc et ciuw, huachiux. Inx nng xee buxaxqniaw knuar vadd cud, pacsngr marr duxjiacc cud .laii ee kuanw. Jitmaw ee denrngiaw u hunx qxib. Guanw duxjiah knuar :ee hitt cud qongxx si hanrjer qxib :ee, sewhanr ginxaw berdangr zibdniuu.

“Quaix sunx, a’maw jimx .jit .xe.”

“Jennifer, lw byy hro a’maw jimx .jit .xe.”

Jaboxsunx Daigiw berhiauw tniax, jaboxqniaw ing ginxaw tniax u ee ue qycc qongw jit vaiw. Ginxaw snax huer tongw dyrr hro inx buw :a sangr kir iuwdiruann yc Inggiw, haghuir quir qaxx e qniax :langg, jit hagqii diyhh jnia’ jap-bxan. Qajair qniaxsair iauxx vutjiw aw gauu tanr, narr byy, poxtongx ee sinsuiw qadingg iarr suacc u jaidiau.

“Linw hitt cud qamxx u hyw knuar?” Jaboxqniaw mng.

“Pnaiw knuar qaxx, ovec vnuax, qar pnaiw ginxaw duarser.”

Guaw sidjai zimw be diauu :ar, dyrr cniuw dirr kanx:ee taujingg, singx qongw singx ngiaa.

“Daiuanlangg dyrr si jiacnirr byy juixjunw. Hitt hy pnir iarr jiacc je langg decc vailet," jaboxqniaw qongw. "Linw duxjiah ingqaix duer guanw kir knuar hitt cud Dairliok ee denrngiaw. Langg' inx dyrenw pacpnir ee qanghux zuarr iuwlo lehh.”

“Guaw liahjunw liw qanda’ knuar adok’aw-pnir.” Haursnex qongw.

“Langg' jitmaw inx Dairliok pah ee pnir, ciuxlo be sux HOLLYWOOD ee denrngiaw. Duxjiah guanw knuar :ee hitt cud, vywjuaw ee ngiaxpingg si ylyw qaxx e dag jic.”

Diongqog Dairliok ee pnir uanaxx jitt nng nii aw jiacc kaihongr :ee. Sidai jniasit byy qangg :ar, henrjai ee langg qycc erdangr qongkaix ylyw “qiongrhuiw”. Narr dirr ixjingg, junw u jap diauu mia marr byy qraur siw.

Amr dxngr jaboxqniaw beh cniaw. Cuancair qxuanw, qongxx jit lexvair jingg dyrr singx iog :ar.

“Jitt qingx ee jongxpor si jniawqangw Suwcuanx Singw ee langg, liaurliw si juann Daiuann itdow janw :ee," jaboxqniaw suec'ue. "Poxtongx-sii aw, inx singliw dyrr hyw qaxx. Jitt hy dua zidjiw, byy liongrjaw qra dring, beh tacc u xui?”

Vngrcair qongxx marr jinwjingg dyrr juwbunn hyxser. Cuancair vunxjniaa dy' dang qiamm dang hiamx, jitt qingx ee huanjiyx-aw qycc qaxnaxx he viw langg' kacc je. Sir xee duarlangg qaww jit xee serhanr ginxaw, go~lak xee cair sidjai dy’ u :ar. Guanw jitt xee jaboxqniaw ciuxbin knuar, qiyr qaxx qui’ dyh-dingw jiac qaxx berdid kir.

Laurlangg, ginxaw qapp jaboxlangg longxx siyw jiac, dna' haursnex dua jiac Go :a. Ix jit nguaw quer jit nguaw decc valunx tunx, qred jit xe sniu’ hiongg, qnew quix diyc qajak.

“M dyrr knuax knuax aw jiac, iarr byy langg qapp liw siy’ jnex.” Inx buw :a qongw, qinw tinn qunxjuiw hro limx.

“Dyrr driyc m. Kactingg aw narr vakdow tniar, liw diyhh kir jauw isingquanw suacbuew.” Inx jew :a qra qongw.

Jaboxsunx dyrr byy inx a’qxu jiacc hyw cuiwdauw, jiokk jiahquaix, byy qaxx jit hxang air.

“Guaw beh kir Maiwdangxlauu.” Jaboxsunx cairpuawnua decc uaijuai, qra inx buw :a tyw beh jiacc vadd hxang.

“Singx jiac .jit .cuir, kacc danw lanw jiacc laii kir. Laii, ax."

Inx buw :a qra tngsii-aw dux duiww ix ee cuir. Ix cuir imimx, tauu uat duiww vnix:a kir.

“Vng m vex, snax dxngr cuanww jiac dyrr hitt quaw kola, hanwvaur. Anxnix nacc hyw?” Kanx:ee qongw.

Jit xee a’maw, jit xee a’buw, nng xee duarlangg uirdiyhh beh hro ginxaw jiac jit cuir vng, qorr quaiw :ee, qorr penr :ee, qojniaa :ee, hangxser :ee, vorsor jin denw, bruw qaxx dua liap qnua ser liap dih.

“Kiu Sangr, tacc e jiacc duxhyw, iurqycc kir duw diyc liw.”

Tniax diyc u langg' decc qiyr, guaw an’ iw nirr vreh .kiw .laii. Lai Sangr ciyr haihaix, ing siangx ciuw qra guaw lamw. Ix qniazit cing jit sxux vehsig ee sejongx ciyx qiakqiag, sinkux pangx qongwqongr. Duxjiah hro ix lamw jit xe, dnaxx guaw jitmaw unxdangr marr u hitt hy javolangg ee pangjuiw-bi pnri diyc hianghiangx.

“Jex guanw kanciuw, haursnex, ser hanr jaboxqniaw. Iauxqycc u jitt xee, guanw daux ee lauxdua :ee. Jaboxsunx lar!” Guaw sui’ xee aw siaurqair hro ix sigsai.

“Jnia’ hyw mia, jyr a’qongx :ar!” Lai Sangr qongw.

“Liw qamxx iauxx bue?”

“Iauxx bue a!” Lai Sangr txanr jit sniax. “Qra liw yc hitt hy se’ngiusid :ee m, cit’aw beh qaux, ginxaw m qra liw snex.”

Guaw ciyr ciyr, mng inx haursnex decc jyr sniaw qingqiw.

“Ix dirr Bixqog kongqunx decc sraiw huelingqix.”

“Bixqog kongqunx! Acc m dyrr sraiw qunqix?”

“Hner a!” Lai Sangr dimr tauu. “Guaw duxjiah jiacc kir knuar jit cud denrngiaw, lairdew u jit jiah jenwdauwqix, hy jyr F-16. Guanw haursnex dirr Bixqog decc sraiw ee huelingqix dyrr si jitt hxingg :ee.”

Lai Sangr qongw diyc iang papax, hiauvaix uewuer. Ix qra jitt jiah huelingqix ee setvi qapp qonglingg, jit hxang aw jit hxang siongser qaiwsiau hro guanw tniax. “Byy dniardiyc dycc jit qangx Daiuann narr jniasit qapp a’qiong :a ciangg .kiw .laii, guanw haursnex qycc e sraiw huelingqix laii qra lanw vyxho.”

Hitt cud denrngiaw m jaix qiyr jyr simxmih miaa? Sidjai diyhh cue jit xee siqanx laii qra knuar, knuar hitt jiongw huelingqix dauwdew snex jyr simxmih kuanw.

“Liw lingrgua hitt nng xee dirr Bixqog ee jaboxqniaw narr u gu diyc simxmih kunwlann, vutqisii longxx tingwhyw kir cue guanw qniaw. Ix dirr hiax langbin jin’ kuah.” Lai Sangr beh qniaa dngw kir ix hitt dyh jinwjingg anxnix qongw. 

M jaix si guaw bagjiux huex huex knuar dingdnaa, iacc si ix jiac lau lau dywqiux. Guaw e qir did ix ixjaw dyrr byy jiacc ew!

“Duxjiah hitt xee si si'angw?” Haursnex mng.

“Linw laurve siauwlenn-sii ee dongsu lar.” Kanx:ee ter guaw huedab.

“Vaa :a, liw kacjaw qamxx m si u decc siaw six? Liw jitmaw dyrr ingg ingg :a, tacc e byy beh qycc siaw?” Jaboxqniaw qongw.

“Dyrr driyc m. Inx la bxuw :ee, lanw la bunn :ee qapp inx vniar.” Haursnex qra inx jew :a janwcuir.

Guaw dner diam diam, liac qaqi ee ciuxqud ngiaw .jit .xe. Qniax dyw langg! Ziauu pexpew, qycc dingr huediamw. Jitt kuanw ee ciuw, qamxx iauxx u jaidiau siaw?

Jiac vaw cud cantniax, dag’ee kia dirr lorvnix beh qiyr qewdingg :ee. U jit daii sniu’axciax dingxquann anx lacvah, dirr laurzet ee duarlo dua sniax decc hongwsangr.

“Hex si decc congr sniaw? Hiwher qiyr, jiacc dua sniax .diyc.” Jaboxqniaw mng.

“Liw u qaur tuii ne! Jiax Denrngiaw Qrex, dniardiyc si decc qongxqyr denrngiaw :ee maar! Kyxlingg si Mel Gibson sinx cud ee pnir. Tniax qongxx jitt cud si decc vnuax qoxjaw Skotland doglip ee qowsu.”

Haursnex qongw suah, duxhyw u jit daii qewdingg :ee kangx ciax sraiw .quer .laii.

Haursnex py jaboxsunx jre taujingg. Guaw kia dirr ciamngg-vnix decc danw nng xui luxsu singx jre .zip .kir, hitt daii sniu’axciax jitt sii an’ guaw vnix:a sraiw .quer.

“Lau :ee ar, dnaxx liw decc siongr sniaw? M dyrr qinw zip laii qongxx!” Kanx:ee dirr qewdingciax lairdew decc qra guaw cuix.

“Be hur knuar qongxx jitt cud si’angw vnuax :ee, qanda’ knuar diyc pniwmiaa, qongxx hy jyr ‘Doglip Daiuann Qunx.'”

Guaw jre .zip .laii liauxau, anxnix duiww inx suanqyr.