danghngx lixsiongxqog

Derr id bo: Jingr Jxux

Soxjai: iquanw

Qiyh: mamax, vavax, sinsimvu, sinqniaxsair

(ngix:a mawmar hauw, kaur be diam)

mamax: Liw cunvan beh hai ginxaw auxtor iacc lauwsiar, m? M dyrr tec kir siyx juiw siyw drng .jit .xe.

vavax: Duxx brew :ee sinx catcad, iarr diyhh jiacc qanghux?

mamax: Liw qnaw vyxniaw sinx :ee dyrr cingkir? Itdit qaudair qongxx lingcuir-aw siongrr iauwqinw, qiyr liw itding rair jah, liw qan’ qan’ aw m jah.

vavax: Acc dyrr kuanw lauwqaux .kir, iarr m si diaudii :ee. Liw qacc jiacc u senqenr, cutmngg jinwjingg, iarr berhiangw srunn .jit .xe?

mamax: Guaw narr u hitt hy ingg qangx, guaw dyrr qaqi cuann, longxx benw ngr liw.

(Javolangg ciuw tec jit liap lingcuir-aw, cuir nirr cauhcauc liam, qniaa duiww imxjuixqix .kir. Lingcuir-aw sexdng liauw dngw .laii, ix sui’ qra trad duiww angngix-aw ee cuir. Ngix:a kaur-sniax diam .kir. Jit duir siauwlenn angbow dnaxx jiacc qauwui, siangsiangx laii jre dirr inx vnix:a.)

sinsimvu: Jex linw qniaw or? Jiokk qoxjuix neh! Javox iacc jabow :ee?

mamax: Jabow :ee lar.

sinqniaxsair: Iaxx angg angg iur iur, m cimxxx cutsir byy zuarr quw?

mamax: Dingw lexvair duxx muaw guec, qinaxzit cua laii juwsia.

sinsimvu: Jur irhongsia m?

vavax: Beh laii jingr igdau hro ix be snex lar.

sinqniaxsair: Qamxx m si qongxx dorjer jinwjingg u jur dyrr ering .did?

vavax: Jaw iarr jit dxangg, nguar iarr jit dxangg, ginxaw zuxx dua hanr zuxx jaix tniar, e kaur zuxx quw zuxx dua sniax.

sinsimvu: Anxnex marr driyc.

mamax: Linw nng xee ang’axbow m?

sinqniaxsair: Hnar. Dingw qywguec diongsunn vran hungii cniaw jiac dyh, iaxx sngr sinhunx.

mamax: Qionghiw!

sinsimvu: Dysia. Guanw qinaxzit marr si laii beh juwsia, mrqycc si junxvi beh u ginxaw.

vavax: Beh snex diyhh tranr qinw. Liw iarr jaix qnuatniax si m si e cud sniaw vorsor kiaukyr lanw kacc mair snex.

sinqniaxsair: Qamxx e anxnex?

vavax: Inx jingg:a dring huatlut, qongxx beh snex :ee diyhh cud jailik-jingwbingg. Marr jiacc dingw nii ee dairjir nia, linw longxx be qir tihh :ar?

sinsimvu: Hex si beh kakvyw ginxaw cutsir e did diyc sikdongx ee jiauwqor.

mamax: Si dyrr driyc .m. Byy jairvunw, jnii byy cuann qauwgiac iarr tangx snex qniaw? Diyrr m si qa’ngg snex lyc laii duer duarlangg jiahkow qyc!

vavax: Iauxx u lehh. Dingw vrangx m si u decc hue qongxx sangr tagceh-ginxaw kir am’ngi iacc biyrsi yc siuhing, snax guehzit kixbew.

sinqniaxsair: Jit qnia qapp snex qniaw u sniaw kanlenn?

vavax: Tacc e byy kanlenn? Qinaxzit qiyr liw burvit diyhh cutqex, vadd zit aw qiyr liw juadduir berdangr snex.

mamax: Dnaxx liw marr kacc vaiwtog lehh! Sing’iok huanrr sing’iok, qauwiok huanrr qauwiok, liw kanx sniu’ hng .kir .ar lar. (bin uat hiongr sinlangg) Guanw tauu:ee qiyr linw qinw snex, narr jitt qxur dyrr u sidjai. Jit dangg jur .lyc qanda’ dongr vnuar dxangx. Jitt xee qiqanx narr byy siurtaix, linw lingrqangx dniardiyc rair qycc laii.

sinqniaxsair: Linw laii quiw vaiw jiacc u srinx?

vavax: Guanw jit vaiw dyrr OK.

mamax: Tauu jit txex, beh jur jinwjingg rair ciamhuih jyr quaw qiamxjax jiacc diyhh knuar qong’ix. Qycc laii, cinwcaiw isingquanw iacc jinxsow dyrr ersaih.

sinsimvu: Jitt xee linw derr zi :ee?

vavax: Hner a.

sinqniaxsair: Linw dua hanr :ee quiw huer?

mamax: Snax huer jiog, decc tak iuwdirhngg :ar.

sinqniaxsair: Jur jex, u sniaw huwjok’iong bor?

vavax: Liw si qiw duarlangg iacc ginxaw?

sinsimvu/sinqniaxsair: Ginxaw/Duarlangg.

vavax: Guaw jur liauw, ciuqow tniar beh qui’ lexvair, ciuxqud be jiclat, longxx be jyh did sxid.

mamax: Langg’ guaw dy’ hyxser hyxser, sniaxmih kuanw jingwtauu dy' byy.

sinsimvu: Acc ginxaw lehh?

vavax: Hex ginxaw ee jingwtauu jiacc si je. Uree e tror, uree e laur,  qui’ sinkux banxqinx :ee qongxx marr u.

sinsimvu: Hnaa, jiacc lirhai or!

mamax: Knuar kuanw texjid lar. Guanw dua hanr :ee si dna’ huatzet. Qaixzet ee iyhdee qra quanr .lyc, jit amr tewsiyx dyrr hyw liauw li byy dairjir :ar.

vavax: Qongw qaxx henrvo jitt xee jingwhuw iarr birbenw quanw sniu’ kuah. Lanw muixx jit xee lyc too cutsir diyhh jingr jxux hro qaqi be snex. Zid’au qethunx beh dnic ginxaw, diyhh qycc jur qexiyc jiacc u huatdo snex.

mamax: Liw marr decc ue je. Jingwhuw si decc jyr zinkauw-kongwjer. Langg narr sniu’ je, qniaxsunx-aw qnaxx e byy nxiuu byy biw tangx jiac.

sinqniaxsair: Inx m na kuawlu jitt jann. Qokk langg jingr jxux narr u jiauww kixqangx, lanw siarhue ee jaboxlangg dyrr be qycc u hitt hy birsinglenn, iacc si ho’ngg qiongqanx, higjiaw iwgua u srinx :ee. Kiarr muixx jit xee ginxaw longxx si inx verbuw u qewue hyxser jiacc ho’ngg snex .lyc .laii .ee.

mamax: Liw qongw diyc jex, guaw dyrr sniu diyc guanw imaw. Ix siauwlenn ee sii qapp jit xee u bow :ee taux snex qniaw. Ginxaw byy laurve kiamr quanxqor, jap-go~lak huer iauxx langdngg dyrr ham' langg’ u srinx. Inx buxaxqniaw ee unrmia sidjai qaiww kyxlinn, bersux decc lunhuee, itdit tiaur be cud camxqingw, kow tngx limx be uann.

sinsimvu: Kyhagqax huatbingg jujniux, qongdig kacc dua tnix.

mamax: Dangwjinx urngiaw.

vavax: Jingwhuw qacc beh qevyy, beh quanw quanw hiacc je, ginxaw qamxx m si diyhh qokqax laii cri jiacc habliw?

sinqniaxsair: Jitt diamw guaw marr bad sukyw .quer. Dnuasinlangg iacc byy snex ee angbow rair qa’ngg draur cri qniaw, qaxnaxx duiww inx kacc byy jiauwdit.

vavax: Byy kyr lanw jiaxee zinrhun decc snex, aurzit aw kangkuewdniuu ee sittauu si’angw jyh?

sinsimvu: Snengiuw jit xee ginxaw rair he dang vunw. Narr longxx beh air jingwhuw cud, ginxaw duarhanr duiww siarhue byy qongwhenr, simrjiww uihuix samw jyr, qokqax daujux dirr ix sinkux-dingw :ee, si m si diyhh qra tyw dywdngw .laii?

vavax: Cutqelangg tauwbuew iarr byy decc tyxtanr, duiww lanw siarhue u sniaw qongwhenr? Lanw dagg nii diyhh lap suewginn cri inx hiaxee, linw longxx be qap iarr be hnaix?

sinsimvu: Inx ee itgenn-ithingg longxx u qaiwlut rair cisiuw, be jyr og jyr dok, lanw siarhue qex kacc anhyy.

vavax: Liw m longxx byy decc knuar sinbunn ee kuanw hnoh? Air limx, tamx jaii, iacc hnor sig :ee, byy-qimw.-byy-ki ee Dix Vatqair jit siwqer u or. Dagg hxang hingr ee cutqelangg qongxx marr byy hanxqnir.

sinqniaxsair: Hex ingqaix longxx siauxsor lar. Jingwhuw byy qiongg vig lanw snex. Qaqi air dnic ginxaw, langg’ diyhh jiahgiac qra lanw draur cud jnii, jex lixlo beh anwjnuaw vnuaa e dit lehh?

mamax: Qux-kax qux-lai bah lar. Qokqax venx irsuanr cnia’iongw ginxaw jiacc laii qra duarlangg kywsuer, iarr u kacc juac? Qoksiyw qaur Dairhak longxx u sed qonglip ee haghau, verbuw benw kaix dua jnii sangr ginxaw kir tak sulip :ee dyrr hro lanw qex jin’ knuiwuac :ar.

(“dinxdong”, qiyr hy ee denrhuew juanxngua)

vavax: Diyc qaur lanw :ar. Kacc qinw lehh, m hyw hro sensnix danw.

(mamax py angngix-aw, vavax kar mngg, nng xee vnuar langg jywhuew zip kir knuar isingx)

Derr zi bo: Hunpuer Tuccaur Jxox

Soxjai: bangrlo-dingw

Qiyh: Dogqox, Dingx Gnoo(a’Gnoo), Li Enn, Six Juiw(a'Juiw :a)

Dogqox: Dingx Gnoo, hongsniax qongxx liw dingrcinx :ar. Qamxx urngiaw?

Dingx Gnoo: Byy lar, si u decc kyxlu nia.

Dogqox: Liw qamxx byy beh trer cud lanw jitt xee qunjox?

Six Juiw: Lanw jiax u angx u qniaw :ee byy decc jiyxkueh. Si anwjnuaw dandanx a’Gnoo diyhh tewcud?

Dogqox: Dirr lanw qunjox lairdew, u byy qer angx :ee, u trer qeqah :ee, iarr u duiww qadingg-sing’uac juadbang :ee, dyrr si byy hitt hy junxvi beh singqex :ee. Vadd zit aw lanw decc tuccaur, ix venr jyr lanw suansew ee duiwsiongr e jin’ gairgiyc.

Li Enn: a'Gnoo, dongcox guaw jiyx liw qazip, dyrr si beh hro liw bingvik hun'inx ee jinsit bin. Liw dirr jiax qamxx iauxx tniax byy qraur je? Jiacc hyw dnaw, iarr qnaw dac .zip .kir?

Dingx Gnoo: Huanrsu longxx u lergua. Guaw dyrr dna’ sniu beh air u jit xee pnua.

Li Enn: Dongqimx siarhue jin’ kaihuar, dongqux :ee duarbuw din. Qethunx si qex ciavnuaa.

Dingx Gnoo: Byy zip qeqah, qamxqag dy’ be dacjat, be unxding.

Six Juiw: Sixkutjuiw be-dinx.-be-dang jiokk unxding, mrqycc byy sngsor, tiaur .zip .kir liammix dy’ be cuanxkuir.

Li Enn: a’Juiw :a ee piwzu u qacpah. Narr guaw qywzinn ee qinggiam, byy qer jinwjingg, langg’ decc ziog .lanw xmii quaww snii; quer mngg liauxau, ngua lanw decc ziog .langg’, hro lanw cue be diyc jin’ suwsiongg.

Six Juiw: M bad qewcua .quer .ee ingxingw duiww hun’inx u huanwsiongw, u jit quaw byy hac sidjer ee qitai. Inx sniu qongxx qethunx liauxau, bagjingg ee bunrdee dyrr tangx qaixquad, cuxkir dyrr erdangr quer diyc hingrhog kuaiwlok ee zidjiw, hunbingg qra hun'inx knuar jyr naxx banrlingdanx.

Li Enn: Survutdix qibang zuxx je, sitbang e zuxx dua. Zen’au, dyrr kaisiw bai’uanr duiwhongx si anwjnuaw venr jit xee kuanw, iacc si qongxx guancox u kimuaa, jiangwsii henr cud vunxsiongr. Uanqex dakkauw langr sii byy langr zit, angbow ee jinghun jit vrangx uanx .quer jit vrangx vyc, kixcox vutbuanw qaur qaxx quibuew iamwor.

Dingx Gnoo: Guaw m si cingcunx siauwluw byy tuntor, ham' langg’ qau’ongw marr m si jit dxangx nng dxangx narnia. Ix ee diongqii iacc duanxcur, lanw knuar jinx jinx, m si gong tauu gong bin hiacc vutsiaur, lamrsamw decc jyr quatding.

Six Juiw: Guarjai kuanqingw e venwcenx, langsimx qeh dorvag qycc e venwsiongr. Qaur hitt jun, duiwhongx ee iudiamw ingxingw knuar m qnir, kiamwdiamw venr qaxx hro lanw jiac be dax. Hnuahiw kuaiwlok ee zidjiw junw u marr jit kuir aw nia; ciauhuann, iuciuu, uanwdor iacc siurkir muixx qangx jujux laii decc sec saibuexlee.

Dingx Gnoo: Hex longxx inghuanlyw lar. Zinsingx jurvunw dy’ ciongmuaw kyxgiam, byy hanrdnia dirr hun'inx lairdew.

Dogqox: Langg longxx si jursux :ee, tangx qongw duiww sniwmia u jipdiok :ee dyrr u susimx, air qaqi tongsiongg e viw air vadd langg kacc je. Quat’ir beh qenwdir qaqi ee qadingg, hex ingxingw si hiongr iogbong kuthok iacc si qongxx tywhiap ee qetqyw.

Dingx Gnoo: Tywhiap?

Dogqox: Si a. U langg kiamr ginniuw jiacc kir qewcua, uree simlingg beh air u qiawtog qniax qodnuax. Javolangg beh tauw iacc si beh dnic juxvng-vyy, uanaxx su'iok decc jokjong jiacc ham zip hun'inx jitt xee lybang.

Dingx Gnoo: Junw jinjniar si tywhiap, dairqer si sniaw?

Dogqox: Juriuu a! Jit quaw knuar qaqi kacc dang, jip’auw byy beh tewziong :ee, jitt hy angbow kacc e kiw kauxqag, ruanx liauw ruanx. Cur-lai beh air habhyy, be vutsii caw qex la txec, duhuix diyhh inx qidiongx jit xee gauu tunlunw jiacc u huatdo.

Li Enn: Hun'inx ee lordoo jin’ pnaiw qniaa. Javolangg juadduir m si jaboxlangg hingrhog ee jiongdiamw, qongw inx si huanlyw ee iynade dendyww kacc zibsit. Mrjiacc denrngiaw iacc siyxsuad hiwbunn venx qaur lamluw-juxqag nng langg qethap dyrr suawqiok, in’ui qycc suar .lyc .kir dyrr pnaiw knuar :ar.

Dingx Gnoo: Byy-uan.-byy-qex, vutsingg hucex.

Six Juiw: Hex urngiaw or. Be uanqex ee angvyy jin’ hihanw, vywjuaw e siy’ jnex beh kranx. Langg u singwde. Ham' lanw zuxx cinx :ee, lirhai-quanhe ingxingw e zuxx cimx, kiw ciongdut ee qihue marr e zuxx je.

Dogqox: Guanw verbuw jurr siauwlenn ruanx qaur lau, guaw an’ jyr ginxaw qaur singlenn cinbak knuar qnir qnir. Ixjaw guaw iarr bad kiw qethunx ee liamrtauu .quer, sniu diyc inx, suisii pah tewdangqow.

Dingx Gnoo: Ang’axbow cngg-tauu pah, cngg-buew hryy. Sinkuvnix qex jit xee tangx camsiongg iacc draur lixlyc :ee, u hyw byy baiw jiacc driyc.

Li Enn: Sioggiw camkyw dyrr hyw. E siy’ me dah jenwvnee, huexkir qig iauxx u qiur, lingw ganw siongtai, hex kiongxqniax dyrr byy iyc rix :ar.

Dingx Gnoo: Zimrhyy jit dnxua quanhe longxx u honghiamw, longxx rair iongrsimx qing’ingg. U simx pah jiyc jiyc jniaa jiamx, guaw kaksinr tenha byy lann su. Qycjaiww qongw, dro quer lanquanx, zinsingx e qyckacc vutvinghuann.

Dogqox: U langg hingr siyjiuw, u langg hingr daurhu. U qethunx bor longxx u landee rair lixluaw si byy cyr. Daurhu jniaw vihvuc, mraxqycc u ing’iongxhunx. Jiuw jiac je e siongx qnuax, qycc e venr kowsenx be juwsinn, ham’ jiac apenr jidvnuangiu. Qnir langg’ jinwjiuw byy joxjiw, sniu .diyc dy' iuxkuir.

Dingx Gnoo: Narr u junxjad, jiuw byy itding dy’ baiw. Jiahsit vah vah jiongw, m na jit hxang daurhu, u ing’iongw qycc hyw birsor :ee je qaxnaxx snuax. Dyrr junw aursii jinjniar qniaa be lyc .kir, dairvutliauw lirenn suah, jiwjiyw nng langg u hingrhog dauwdin .quer.

Li Enn: Lirenn ee quewdingg tongwkow buviw, guaw si ticqanjingr. Ciavuahvingw jit langwtangr, congwsiongx junw u siupiw marr qniax langg’ kangr. Jit xee qenvax dilehh, uanxzenn decc tecniw lanw zinsingx u puawqeh, tangwtniar m na dirr puebah, si dor zip kir qaur simqnuangiw.

Six Juiw: Lii narr e sxingg iaxx sngr hokkir. Guaw jit xee qecvag-duarjew, bue qer jinwjingg, qongxx aiwjingg si kongkir, byy suh .diyc e siw. Zip langg’ mngg kacc limw go dxangx, angx draur huexqir. Narr ho’ngg trer qeqah, guanw jew :a qniax zid’au pnaiw miasniax, sniu qongxx sngw quw jongw e sen, guanw jexhux jaxban e jaix dngxtauu. Dagg guehzit jnii narr u zip kauxjy, ix pacsngr vangr bak junw m jaix. Byy vanrpuex, lorbuew lenrr langg dy’ byy dngw .laii, beh lirenn iarr cue byy langg ciamx zri.

Lii Enn: Guaw si u jit xee viauxduarjew itdit decc qer angx. Tauu jit xee guarkauw u jabow, derr zi xee e pah bow, henrzim :ee qongxx si vuahqiauw senx qiamx siyjiuw senx, juann jit quaw siamr ziy iacc cuah saiw :ee, byy qaxx jit xee jniurvan.

Dogqox: Jaboxlangg narr lirenn qycc u huer, duiwsiong e kacc pnaiw cue. Vutviw javolangg, narr hauvaux dangrdauw, lauu guu jiac iur qnuasunw si muaxsiwsnuax.

Six Juiw: Qer diyc hyw angx si viw diyc lotto tauu caiw iaxx kacc hanxiuw.

Li Enn: Huex byy vah zit angg, zedjingg quibuew e siauter. Ang'axbow mngsniwvanw draur be ba, benxqiongw dauwdin si juerquar.

Dogqox: Bylun u angx iacc byy angx, u lirenn iacc byy lirenn, hun’inx jitt jann si jerje jaboxlangg simlai ee tangwtniar, simrjiww si qimwki, be kamx did tee kiw.

Dingx Gnoo: Qamxqag linw ue liac pongwbew. Narr jiauww qurnii ee tongxqer, u qethunx ee vixle quann quer qodnuasinx, angbow tauwlauu ee pasor iuguann kacc ngiaa lirenn :ee.

Lii Enn: a’Gnoo, mng liw quiw xee bunrdee, liw benw dirr jiax qongkaix hueingr byy iauwqinw. Liw langg snex jyr siuwle qycc u ham’iongw, u zuarr je u bow :ee duiww liw viauxsi quer aiwbo? Hex vixle, liw zinruii si quann iacc qe? Liw u zuarr je vaxag, liw birlaii ee angx be jauxhiongr, be qapp langg’ taux laii amr kir?

Dogqox: Qanda’ siauwsniu byy hingdong :ee u jniursngr iacc byy?

Li Enn: Narr beh sngr jairlai, hitt xee vixle e qyckacc quann.

Six Juiw: Hex quann je lor! Narr huatlut hixkyw, qycc vunxsinx iarr u jaidiau, javolangg be dna’ crua jit xee, junw hro crua diyc sewqair-siyxjiaw marr be jiok’ir. Qokk langg diyhh sniu hro cingcyw. Qethunx liauxau, angx subo lingrr jit xee jaboxlangg e hro liw dongr be diauu :ee, m hyw kir qer kacc driyc.

Dingx Gnoo: Guaw byy hiacc jnixciyh, qaxnaxx cuanww sniu hyw :ee, byy decc sniu baiw :ee. Hun’inx-sing’uac narr be sunrsi, u ginxaw tangx an’uir, birlaii iaxx erdangr qitai, mrjiacc e kyxlu qethunx jitt diauu lo. “U qniaw bxan su jiog”, langg’ qamxx m si longxx anxnex qongw?

Li Enn: "U qniaw bxan su jiog”, jitt qxur dongwjyr ue qongw iauxx kyxiw, qra dangwjinx dyrr hai tangxtangw lor. Jit xee qniaw jiacc hyw ing, sewqanx dyrr benw jongqaur iacc simgliw-ixsingx. Dag’ee longxx kir qethunx snex qniaw, bunrdee dyrr qaixquad :ar.

Dogqox: Quii qniaw sinkow, snix qniaw tongwkow, cri qniaw lykow. Narr qanda’ qer angx vixqauwdig iauxx dansunn, u qniaw dyrr si dnivnuar. Uirr qniaw kow uirr qniaw lryy, srinx qapp simx longxx buatuax. Qer hro ig-bxan urkanglangg, qniaw iarr diyhh qaqi riyx qaqi cua. Ginxaw longxx air cue mamax.

Six Juiw: Dogqox qongw :ee byy kuadiongx. Qniaw pnaiw cuiwdauw dagg hxang m jiac, lanw qniax ix dingrvii, be duarhanr. Acc narr ix tamx congg dua jiac, lanw qycc huanlyw ix venr duarkodaix hro langg’ tixciyr.

Dingx Gnoo: Jex jniawjniar dyrr si uixdai ee buxair hro langg’ qamxdong ee soxjai.

Dogqox: Buxair erdangr liongrhuar bor? Si m si snex zuxx je xee, buxair e zuxx dua, zuxx dang iacc zuxx kuah?

Dingx Gnoo: Buxair si qorr hing’uii decc viauxhen, byy decc cinwdang sngr quiw qxinx quiw niuw.

Dogqox: Sniaxmih kuanw ee hing’uii sngr si buxair? U sniaw dingrjunw higsi qurtew ee hxuan bor?

Six Juiw: Knuar byy sniaw u. Dogqox, liw qamxx erdangr qongw kacc veh’ue lehh?

Dogqox: Kyxviw qongxx, byy cri langlingx cri gulingx, jitt xee byxcinx u buxair bor? Iacc si qongxx, cri langlingx ee laurbuw si m si viw cri gulingx ee laurbuw kacc u buxair?

Dingx Gnoo: Qokk langg hing’uii ee ca’ngi mrbenw quer pingg. Dongrqix si uirr qniaw decc setsiongw, narr u jitt hy simx dyrr junxsngr.

Dogqox: Acc narr vnivnii u hitt xee simx, mrqycc binghun byy qangg lehh?

Li Enn: Sniaxmih iwsur?

Dogqox: Qangrkuanw ngiuxci qniaw, riyx qaqi snex :ee qapp qa’ngg vunx laii riyx, dycc jitt xee laurbuw kacc uixdai?

Six Juiw: Dogqox, liw qamxx be kanx sniu hng .kir? M quanw si cinsnex :ee iacc binglingjuw, verbuw tniar qniaw byy jursux, jex cenw cenw dyrliw iarsaiw tyxlun.

Li Enn: Verbuw duiww ginxaw ee qowair qamxx jinjniar longxx byy qnaa susimx? Narr guaw knuar .diyc .ee, u diauqnia ee air qaxnaxx be jiyw.

Six Juiw: Simxmic qiyr juer u diauqnia ee air?

Li Enn: Cnia’iongw jit xee ginxaw duarhanr jin’ siongx vunw, m na jniginn decc kaiing, langqangx qapp jingsinn marr diyhh he jit vew. U lyc vunw daujux, dyrr e sniu beh did quaw imwqow. Rair qniaw jiauww lanw ee iwsur kir jyr, qapp vadd langg daux ee ginxaw viw suiw, viw kiauw iacc viw jaijingg. Uree iauwqiuu, duarlangg qaqi dy’ jyr be qaur. Qniaw narr hro inx sitbong srid liamxbin, jit quaw jyr verbuw :ee m na cnebin siurkir nia, cud ciuw diap dy’ e.

Dingx Gnoo: Inx si uirr qniaw hyw, brang qniaw e singkir.

Li Enn: Denw vyw, qra qniaw ee siongwpnir pox dirr bangrlo-dingw, jitt hy duiww qniaw u sniaw hyw .cxur?

Six Juiw: Dirr siarhue jauxtiaur rair qapp langg’ hordong. Ginxaw decc dua, lanw qra inx hib sxiong jyr qiwlok vunx langg’ knuar, dysiauw jingtiamx jit quaw kuaiwlok ee kiwhunx qamxx e baiw?

Li Enn: Be snex :ee knuar .diyc, dasimx unwbun qnaxx dy’ e, hixlok ee simjniaa beh dyhh snex? Qycjaiww qongw, hingrhog hyw mia m hyw denw, zuxx denw e zuxx jurdua.

Dogqox: Qoxjaxlangg beh air snex haursnex, aurzit aw jiacc u cinsniqniaw tangx pangg dauw iacc jriab hniulohni. Henrdairlangg qongw javox jabow longxjongw hyw, ginxaw bersux ciurlingsog, tangx qra angbow nng langg kox lehh, kacc be huah lii dyrr lii. Ginxaw ee qonglingg vutjiw aw je jiongw, qeww duarlangg jing'iok huatdong jiacc ho'ngg snex .lyc .laii.

Six Juiw: Ciurlingsog jitt jann guaw beh zin. Narr m si uirdiyhh guanw qniaw iauxx jiyw huer, hun’inx guaw jaw jaw dyrr byy air dnic :ar.

Dingx Gnoo: Langg sniu beh snetnuar au dai si vunxsingr, qamxx m si?

Dogqox: Si dongrbudsingr. Dongrbut qangrkuanw e tniawtangr inx ee aurdai, buxair ee viauxhen marr jin’ “uixdai”. Jongw .si, buxair iarr u oamr bin. Tniar qniaw byy siyh dairqer, lenrr jursinx ee sniwmia iarr qramx hisingx. Danrgai uirdiyhh qor qaqi ee qniaw diwsuw diyhh kir sionghai vadd langg ee qniaw, jex dyrr jin’ tangx girlun lor. Ciuxtauu cunx jit der pxangw, u zuarr je verbuw e qra pxangw dux hro vadd langg ee qniaw, vangr qaqi ee qniaw decc iaugy?

Six Juiw: Tniar jit xee qniaw erdangr vuengiuw jusimx, kacc ngiaa jit zit qaur amr dandanx decc qor qaqi ee lirig.

Dogqox: Jitt jiongw quandiamw suxx langg’ hamgii. Snex jit xee qniaw, sewqanx sui’ qex jit hxang “guaw ee” .cud .laii. “Guaw ee” longxx rair vyxho, jausimx-vecvag, dang knuaiknuaii ee qniaw-jxer diyhh pnai qui’ siwlangg. Snex zuxx je xee, uancinx-jewjuw zuxx je, susimx ziajac dyrsimx.

Six Juiw: Daqeqnuax beh air py sunx, byy snex e ho’ngg qongw vuthaur.

Li Enn: Lamluw jewjy ginxaw ee quewdingg e tangx tanr diyc songxkuair, ginxaw duarhanr qycc qiyr langg’ rair qra inx iuxhaur! Nacc u jitt hy jiacc hyw kangx ee dairjir?

Dogqox: Qa’ngg snex .lyc .laii .ee, snesingg rair qa’ngg iycua. Ginxaw diongxdai-singzinn beh iuxhaur sirdua si inx jaix qamxunx. Ginxaw hro duarlangg ee sniwmia tiamx sikcaiw, inx ving’anx uac lehh dyrr si tenhing lor. Jyr verbuw :ee ingqaix dijiog, nacc tangx qycc qex iauqiuu sniaw?

Six Juiw: Jitt quaw a’qongx a’maw marr jin’ ciywkuex. Iyci qniaw si hiacnirr aw diyhbuaa, inx qamxx longxx be qir .did .ar? Siauwlenn-sii soxx sriu ee kow, inx jitmaw qycc qiauxsyx haursnex jaboxqniaw iarr kir cir!

Dingx Gnoo: Jit qex jit kuanw, m hyw jit qix dikqyx rah dyw jit junjair, hongwqiamx qankow iacc kuaiwlok si jairr langg’ decc qamxsiu. Jaivuee ginxaw duarhanr, zid’au inx qongwhenr siarhue u dua singjiu, jex si jerje jyr verbuw :ee duiww qniaw uiid ee ngwbang.

Dogqox: U ngwbang diyrr junjai sitbang ee kyxlingsingr. Jyr sniaw qingqiw jiacc sngr u qongwhenr cniaw anwha. Ginxaw duarhanr hui’uii-jokdaiw, huanxx venr jyr siarhue ee hurdamx, verbuw ee koxsimx dy’ jin’ m dat lor.

Dingx Gnoo: Jitt jiongw sniurhuad sniu’ quer viquanx. Diyhh jniawbin sukyw kacc qenrkongx.

Six Juiw: a’Gnoo, liw jingg:a cri qxauw, qxauw-aw siurjiongx, liw hitt dangjun jiokk siongsimx, dag’ee dirr jiax qra liw an’uir. Qxauw siw, liw dyrr jiacc visiongx, narr qniaw vuthing jaw siw, liw m dyrr kir duii hxingx .jit .cud.

Dingx Gnoo: Qniaw ingxingw e viw lanw kacc nguar jauw.

Li Enn: Qnuacaa drew siw byy drew lau. Ginxaw narr u snax dngg nng dew simxmih vutcig, jyr laurbuw :ee simqnuax e tniar diucdiuh, in’ui jniawvag si simqnuabah.

Dogqox: Qniaw byy .kir, bylun siw .kir iacc prangw .qnir, longxx si zinqanx jiww dua ee vicamw dai, dna’ puawvne dyrr tangx hro jyr laurbuw :ee ciausimx qaxx be jiac be kunr. Knuar m puar kir snex jit xee, jingr jit xee aurzit aw tangwtniar ee xinx, liw diyhh junxvi uirr qniaw quawhuann qui' siwlangg.

Six Juiw: a’Gnoo, liw nacc hionghiongg sniu beh qethunx? Si liw iacc ix singx tee kiw?

Dingx Gnoo: Ix si dnuasniqniaw, inx laurve laurbuw beh air ix trngg sinjuw.

Li Enn: Benw lanw riyx :ee si jin’ qoxjuix, diyhh lanw riyx :ee e qaiww ngidnii.

Dingx Gnoo: Ix qongw bow si crua laii tniar :ee, ginxaw ix e draur cua.

Six Juiw: Inx javolangg longxx marr anxnex qongw.

Dingx Gnoo: Liw ee iwsur si inx decc qra lanw penr?

Six Juiw: Birvitzenn si penr. Ginxaw bersux gokii, e qra lanw ee texlat qapp kuiwlat suh dax .kir. Damniaw jit xee ginxaxpiw, hex dnawtauu zuarr dang, vycdnia inx iarr byy vacbin liauxqaiw.

Dogqox: Mrjiacc javolangg jin’ hnuahiw laii siongrjanr buxair, tangx hro jaboxlangg qamguan uirr inx snex qniaw, qycc zinrhun aw iycua. Jitt dur, inx bau ngiaa byy bau sux.

Dingx Gnoo: Hiamx, dnix, qiamm, sngx, kow, narr byy hongwdnaw kir cir, zinsingx ee gnoxbi qnaxx e kiamr jit bi, simlai e u kuatham.

Li Enn: Langg narr itdit sniu beh hiangxlok dramx sinx bi, simqnuax ingxuanw be buanxjiog. Iogbong cimx :ee jiac dang qiamm, qyckacc yh did jiok’ir.

Six Juiw: Suiw bow dirr vadd vangg, suiw huex dirr vadd jangg. Qriuu be diyc jin’ kyxnauw, jiac liauw hiamm aur hxuer :ee marr jit siwqer si. Liw qinaxzit qethunx, huanrser binxjair aurzit sui’ kiw uanwceh. Liw byy qer ix, langg’ zid’au simx simx liam liam :ee longxx si liw iarr qnaxx e.

Dingx Gnoo: Qamxx qongxx dag’ee longxx mair qethunx, longxx laii jyr qovyy?

Dogqox: Sunzenn uirdiyhh beh hro duiwhongx hingrhog, m si uirr qaqi, jitt jiongw imenn dyrr tangx kyxlu, qethunx liauxau marr kacc be hiyrhuew, kacc be uanr srinx creh mia, me tnix uanr de.

Li Enn: Uirdiyhh beh qethap, byy siyh sionghai vadd langg, iong cniuw :ee, iong taux :ee, iongrsimx-qewqaur, iong jin ciuxdnua. Jitt hy :ee, Iogbong jiacc qiongg, susimx jiacc dang, hun'inx e d.-dapkap-k.

Dingx Gnoo: Linw qamxx berdangr qra guaw jiokhog dyrr hyw?

Li Enn: Ersaih ar! Guaw jriog linw ang’axbow siy’ ziongw siy’ dag viw langg’ kacc jiyw, jriog liw be ho’ngg hiauhuanw, linw angx be taux jiac cyx.

Six Juiw: Lanw jiax dna’ qongw puawvak’ue, uivue zinrdix :ee, lanw sidjai qongw be cud cuir.

Dogqox: Dionggenn-gigniw. Linw nng xee junw tensingx jit duir, ang’axbow qamxjingg dnglaujuiw, kow kacc jiyw quer dnix, jit xee narr singx jauw, quanhux qnuaxhu qodnuax quer zit, quibew marr si lyc bry.

Dingx Gnoo: Qethunx ee dairjir e qycc sulu, guaw e singx tewcud qunjox. Dysia juui senvuer duarjew jitt quiw nii ee aiwqor. (an’ bangrlo tuatter)

Derr snax bo: Enxhuar

Soxjai: genxqiuwsig

Qiyh: a’Jinr :a. a’Dongr :a

a’Jinr :a: Langg e jingtyw, e satduat, qog qapp qog e siy’ taii siy’ jenr, susimx qapp iogbong si juerkenx.

a’Dongr :a: Jingjenr u sii suah. Singtair-kuanqingw virr puawsngw byy huatdo hoghuee, dua qnuaa dua zuac byy jiauww qacjiw, duarjuiw dua sngseh langr guec byy langr nii. Zinlui jurjog-jurjuanx. Derqiuu ee singbut sriu tuatui, diwsuw juadjingw qngkut jinjniar buqox byy siaxsir.

a’Jinr :a: Kuanqingw-vyxho si bag’e ee iauwbu. Huah kauxhy marr diyhh qex sniu .quiw .qxur. Beh u dua ling’uii, qnaxx diyhh je tauu jinwhingg marr jiacc e hur ci.

a’Dongr :a: Liw narr u sniurqer, tangx qongw laii tniax knuar mai.

a’Jinr :a: Hyw jxingw be tngg, pnaiw jxingw qycc yh dng. Langg hiongr gua knikip, uirr suli tranr suiok, diwsuw qanhiauhiamw cud vutjin. Olokdo :ee suisi jiyxsor, dyrdig-kuanwqaiw duiww itvnuax langg qycc byy sursaiw. Guaw u decc sniu, an’ uituann-qiinx diogciuw huanrser e duiwlo.

a’Dongr :a: Qiinx! Sniaxmih iwsur?

a’Jinr :a: E kir cutqex :ee, inx ee iogbong tongsiongg viw sewsioglangg kacc jiyw, kacc qe. Lanw qra cutqelangg ee jingtangg qapp nngrjux jokhap, kiarr snex huanrr snex, riyx huanrr riyx. Zinlui ee qiinx lairdew, tamliam ee singhun e dauc dauc aw byy .kir. Iongxve qapp iongxbuw marr tangx vueiongw byy pensux ee tniawsimx, kacc be qongxx qaqi ee qniaw tniar mia mia, vadd langg :ee kow byy siw hro liauw.

a’Dongr :a: Beh snex rair singx qnuajunw dyrr decc gesiauu :ar. Qiyr langg’ tanwjnii cri vadd langg ee qniaw, beh vaixlong langg’ jyrhuanw marr m tangx anxnex.

a’Jinw :a: Acc byy, beh air cinsnex :ee, cnia’iongw ginxaw ee kaihur diyhh qaqi cud, berdangr iauwqiuu jingwhuw vangtiab.

a’Dongr :a: Kiarr u jnii langg jiacc erdangr snex m? Lanw siarhue ee vinhu-duiwdin, liw hiamm iauxx byy qraur qikqax, si bor?

a’Jinr :a: Lanw longxx si ixx ginxaw ee lirig jyr kixdiamw decc sukyw dairjir. Ngex-aw cutsir lyc too, inx ee jiac-cing-ing qapp ixau ee qauwiok longxx diyhh kaix dua jnii, soxhuir jin’ dang. Vixqaur siyxmnghongx ee qadingg, huwqax-drew ee qniaxsunx soxx did .diyc ee jiauwqor e kacc qauwqag.

a’Dongr :a: Jitt hy uihuanw zinsingr ee jingwcig dyrr junw hro liw cuisag e qniaa, beh danw qaur knuar e diyc haurjig, lanw ee juxde byy hro dogpinw tau .siw iacc cingwhaii dnua .siw, lacsab juiw qapp kongkir qnaxx dy’ qra inx tau siw liauw liauw :ar.

a’Jinr :a: Simlingg-jingrhuar si dua qangdingg, qiinx-enxhuar si beh jo ix qasog jinwhingg. Qauwiok ginxaw lirig-tazinn byy susimx, haghau qapp qadingg longxx u jikzim, qauwhuar ee kangkuer jit kxig dy’ m hyw tingg.

a’Dongr :a: Cutqelangg ee jiahcing sriu siarhue qiongqib, aurderlangg qycc juann inx ee jxingw. Hyw kangx :ee anwjnuaw longxx inx decc did?

a’Jinr :a: Sewsiok ee logtiongr, inx byy tamluann; cinjingg qapp aiwjingg, inx longxjongw vangwhe. Cutqelangg ee vxuah byy hyw pangg. Uanwdor inx, jingliw vutqaix.

a’Dongr :a: Guaw nacc si decc uanwdor? Dongqimx siarhue ee bunrdee jit dua tuax. Jingwqingx taulo m jyr jauw kir cutqex, byy-her.-byy-lyc.

a’Jinr :a: Iogbong si bunrdee ee qangcniuw. Cutqelangg juat liogbuu byy kandnii, jit quaw d.-dangsaix-s. ee kangtauu dyrr kacc be ho’ngg jewjy .cud .laii.

a’Dongr :a: Qongw diyc kangtauu. Liw qimwjiw langg’ snex, jurzenn u langg e sniu kangx sniu pang beh taux snex. Giamm qnuahuw cud qau cat, siarhue e qyckacc hunrluan.

a’Jinr :a: Soxiw rair sniu hro jiaujngg, huatlut diyhh dring hro jiujir. Ve-jingx-buw-hueh, zid’au zinlui m si lamluw qauhap ee qetjnix, qongw kacc vec :ee, m si an' jing’iok sanxsingx .cud .laii .ee dyrr driyc.

a’Dongr :a: Cat-aw jiongrguanjaii. Acc narr cutqelangg jngr huatludpang, u aursuu liauxau, huansiok jiacc kir qenwdir qadingg. Anxnex duiww siuxhuad ee jairqelangg qamxx u qongdy?

a’Jinr :a: Huansiok :ee dyrr berdangr u ginxaw, lanw suacc berhiangw anxnex quiding?

a’Dongr :a: Qamxqag liw longxx kia dirr inx ee libdniuu decc qongxue.

a’Jinr :a: Cutqelangg byy jnii byy srer, ter inx cuttauu u sniaw kyxcuw?

a’Dongr :a: Liw u iwhiongr beh cutqex, jitmaw singx pacdad dniardiyc iarr qnaxx si.

a’Jinr :a: Cutqex byy hanrdnia sniaw kuanw sinhun, narr u quat’ir, langlangg longxx erdangr zip kongbunn.

a’Dongr :a: Jauxvi hongdinn, hiongr henrsit zinrsux, dauhangg. Jitt hy jxingw qamxx u kacc jingliongg?

a’Jinr :a: Liw u siw bow iacc siw qniaw, higjiaw bow u tyw kechniax bor?

a’Dongr :a: U jitt kuanw pnaiw jygu :ee dyrr e sniu be cutqex?

a’Jinr :a: Simqnuax siursiongx, beh uac e lyc .kir diyh’air cue qaixiyc, cue cutlo. Marr u langg lingkyw singx jur irhongsia, kacc benw dycc jit qangx duw .diyc jiacc laii decc qankow-lagtniar.

a’Dongr :a: Cutqex qamxx dyrr vyxjingr tangx li kow did anlok?

a’Jinr :a: Tamx jaii, jaux sig, air miaa, hingr jiac iacc diong kunr, langg ee iogbong je kuanw qycc si cimx knex byy drew. Beh did anlok, diyhh cutqex kacc u qihue.

a’Dongr :a: Duarlangg longxx kir cutqex, ginxaw qamxx si beh qaux vyxjniar?

a’Jinr :a: Cuiwamx byy qauwgiac ee sii, sindew iongw :ee byy qruar kacc byy iauwqinw, diyhh niu hro hudew :ee. Qruar cuiwamx :ee zuxx je dyrr zuxx be siy’ uer, tuanziamxvne kacc be tnuar .kuix. Siuhing :ee zuxx je, lanw siarhue dyrr e zuxx vinghyy, in’ui ruanx be kiw .laii, jnii byy nng xee vruac be dann. Langg decc jinwhuar rair dauc dauc aw qniaa quewdingg, m si itsii-itkig dyrr tangx dadsingg.

a’Dongr :a: Simxmic decc jinwhuar? Tewhuar kacc urngiaw! Jitt cud narr bruw .lyc .kir, zinlui beh jehjingw kacc kuair.

a’Jinr :a: Danw narr u juann sewqair ee zinkauw qiamw jidvnuar .kir hitt qangx, beh qycc snetnuar iacc m, sii qaur, dag’ee jiacc laii sionggi marr iaxx hur ~ ~. Zinlui dirr jitt liap cneqiuu byy .kir huanrser si hyw dai. Qra derqiuu hingg hro dongrbut, inx e kacc hyw singjunn.

a’Dongr :a: Liw duiww hiaxee cutqelangg jiacnirr duiwdiong. Inx soxx sinr ee jongqaur, liw jit sud aw dy’ byy daiwgii qaax?

a’Jinr :a: Cutqelangg u siurqair, kacc be jyr pnaiw, duiww siarhue ee anding u vangjan, qra pah pog’aw dy’ be hur :ar, jnuaw tangx qycc qra inx jitgii?

a’Dongr :a: Jairr guaw decc knuar, jongqaur uanxzenn cuibinsut, h.-hihuanr-h., qiuwqizenn si qew :ee, si langg liapjy :ee.

a’Jinr :a: Junw m si sit :ee, mrqycc si uirr beh kuanwsen, duiww siarhue iarr byy vairhai, qycc si jerje langg simlingg ee kywsnuax, jitt hy jongqaur dyrr u ix junjai ee qewdat.

a’Dongr :a: Lanw langg aurzit aw enxhuar juer besinr qau kenwsngw :ee, guihai jiacc dua, jongqaur qycc cunx zuarr je ee qewdat?

a’Jinr :a: Sinwdoo ursii e kacc byy lixsingr, jitt diamw zinrdix guaw u. Huaipau qitai qapp bixbang qniaa zip hun’inx, qethunx liauxau sitbong siy’ uanwceh :ee tatdyxqex. Hun’inx ee lorjniu je qanlann, lirhunx :ee jit nii je quer jit ni. Qewcua jinwjingg sniu u cingcyw knuar u hunbingg :ee u zuarr je? It’ir beh zip .kir .ee longxx sniu qongxx qaqi hun’au e bixbuanw, e qapp vadd langg byy qangrkuanw. Jitt jiongw dna sniu viw did senrlamm-sinwlu qamxx u kacc lixsingr?

a’Dongr :a: Qethunx qapp cutqex si vinghingg nng diauu lo, liw suacc tec laii jyr vixping. Vutjiw aw u qiok.

a’Jinr :a: Sewqanx ee hiangxsiu jairr langg, si qewdadquanx byy qangg, m si jinliw ee venrlun. Langg qapp jingsnex cax zuarr je, cax dirr dyhh? Haixdix-aw qongxx qaiww congbingg. Qxauw e qor cur qiur juxlangg. Cew qinvingg, langg ee diwlingg u kacc quann, hingsen ee ligliong marr e kacc dua, mraxqyxx narr jyr pnaiw si jin’ qniax langg. Langg narr byy qycc enxhuar, iogbong narr byy jetjer, jit hxang higjuw-buxkir dyrr tangx hro derqiulangg id xia huixbet.

a’Dongr :a: Qongw diyc buxkir. Jongqaur qiyr langg berdangr taii langg. Acc m dyrr u sinr qxaur :ee dyrr m hyw jyr qunzinn?

a’Jinr :a: Berdangr taii langg ee qaiwlut kaksit rair siuw, snewmia hisingx kacc sringr quer pywqair. Uirr beh vyxho cinlangg, beh joxjiw digqunx sionghai qyckacc je singlingg jurguan jiongqunx, qovutjiongx rair suxiong buxkir hitt diap, simlai juanzenn byy hunwlo, byy uanwngor. U jongqaur-sinwgiongw :ee jiacc u huatdo huatdenw cud jitt kuanw ee juvix iarquxqnaw.

a’Dongr :a: Anxnex guaw mng liw. U jaidiau jnriu jenwdniuu siy’ jenr :ee longxx jauw kir cutqex, qokqax beh ngr si’angw vyxho?

a’Jinr :a: Benw huanlyw jitt jann, u jnii sraiw qxuiw e ex bry. Tong’ sewqair narr jiauu u diwqag siuhing cet’iaur, qycc lenrr hueckir-hongqongx ee siauwlenlangg iarr hingr beh cutqex, qokjer-quanhe qnaxx jamxzenn hysun be u jenwsu, marr byy su’iaur qunvingx :ar.

a’Dongr :a: Cisux-bongrsiongw jyr girniu. Narr beh qra jyr genxqiur simrjiww diogciuw jinwhingg, hex diyh’air samwsux. Jnii liauw, langg siongdiong, hex dyrr jin’ vutbingg.

a’Jinr :a: Qoxjaw sidai ee hinghuat jin’ kokdok, vrag puee dre cox kngx iauxx sngr siyxkuaw, cxenx dyx bxan quah, beh siw m dng kuir jiacc si lingdii. Aurvaiw ee langg tak ligsuw, tak diyc lanw jitmaw ee langg iauxx e siy’ taii, e huatdong jenwjingx, qamxcaiw e qamxqag jiokk iaxbann, jiokk vutsugi. Zinlui rair qycc jinwhuar, singx yc erhiauw satzinn sen’ m tangx, quibuew enxhuar qaur dirr gensuu, simrjiww iwliam ee sionghai longxx be sanxsingx.

a'Dongr :a: Jex qnaxx diyhh singwzinn jiacc jyr e qaur.

a'Jinr :a: Tniar vadd langg kacc sringr quer tniar qaqi :ee dangwjinx si singwzinn. Jniaa juer singwhenn ee lo vycqnaxx jiacc si qiuwqingr ji’ dy.

Derr sir bo: Bunrdab

Soxjai: siudyrngi

Qiyh: derjuw R, derjuw X, derjuw W, suhu

Derjuw R: Sinkux si caur puelongg, suhu dniardnia anxnex qongw. Sewqanx jerje qra ix knuar jyr vyw, e qra jrngx hro suiw qor hro iongw. Si sewsioglangg taiww gong, higjiaw si jitt xee puelongg kakkag u ix ee jok’iong?

suhu: U langg snecutsir dair sinmia, u langg qui’ vnuar siwlangg puawsniur in’ui surqor. Dyrr junw itsingx v.-vingsun-s., qesix iong quw e hai .kir e qowjiongr. An’ taukaknguaw qaur kajingxtauu, tong’ srinx u hiacc je kiwquanx rair quanqor. Tamluann kiw jipdiok, kow e kax jriab kax duer lecc qaur. Dogdok sinkux diyhh iong laii siuhing, hyw-baiw longxx si qangku, jniw qangrr lau qeww jin’ hyw ing.

Derjuw R: Derjuw u siurqaur. Qamxsia suhu ee kaisi.

Derjuw X: Knuar diyc qac’ir :ee, langg e taux, e cimx, e sap, simrjiww satduat. Binrduir jiaxee vutgi, juvix beh an’ dyhh snex kiw?

suhu: Narr byy ciqair, byy quanxsog iogliam, langg uanxzenn jitt daii jewjy surduanx ee qekir, jit qxur ue iacc jit xee dongrjog dy’ e juewe-juewgiap, dua qapp ser decc jingcax ziiw. U jurqag :ee diyhh jixinw langg’ qniaa zip jniar dy, jo langg jo qaqi.

Derjuw X: Narr ligliong vutqip, dyrhing byy qaur hiax lehh?

suhu: Jiamrsii qapp langg’ li kacc kuix, duiww vixgnow longxx hyw. Narr jaix si qngxlejuiw, dyrr m tangx dac .zip .kir.

Derjuw W: Zinsingx si koxhaiw, suhu vutsii decc qingxqair. Tickiw m zinrhok :ee, jendoo si zuhyy?

suhu: Ngr duiwhuanw hitt hiongr duiqiuu kuaiwlok, qniaa be qauwui qaizenn, kow tac kow jin’ liauxzenn.

Derjuw W: Suhu ee senrgenn dat cxenx qimx. Derjuw qamxvue jairr simx.

suhu: Sewsu busiongg, hingsen iacc siuhing be kamx did encenn. Linw narr u sinwsiu, huatsimx qaiwid iauwqinw.

Derjuw R: Jiokguan vnerngi byy vnerlangg, qnagak byy qnasiuu. Hibang vnertniar qapp siongvix dirr sewqanx duanrjuat. Lanw ee hokvyr qapp senrliam jinrqaix qruix hro jiongwsingx.

suhu: Qongw kiw jin’ hyw.

Derjuw X: Qiqiuu lanw dngrr uanwkir, dngrr tamliam, dngrr dowsimx. Jiwbong lanw u jiokgiac ee diwhui qapp ligliong tangx hogbu jiongwzinn.

suhu: Hngr, jiwhiongr daddid ylyw.

Derjuw W: Qibang lanw ee jusimx cincniu uahjnuaa, dngg lrauu dngg juiw qycc cingjing.

suhu: Sadu sadu sadu.