I. Cur-jingg
Hencex
Tauu diyc buew si, surburdyh-dingw ee zirjuaw diyhh siyw jejnaw kiyh qui' hxang kiyh hro qui’ jriw. Narr iauwqinw :ee diyhh kngr kacc badjet ee soxjai. Dyc’axtuah u dingwjuan. Qra iauwqnia kngr .zip .kir giaa syxsii sryw lehh, dyctaudingx pachuax, qinaxjair huanjap ee kangkuer qaur jiax cexbuew.
Vanrqongsig jre qangxx zit, iyjiacqud nngxsngx, qingqacqud batniar. Dywvingg ciuxqud be jiclat si qu jingwtauu, seix qapp hanwix longxx knuar be hyw, rix be uanjuann, u isingx knuar qaxx byy isingx. Angsair ee qongsix qurnii Gorzidjeh quer, sinlyy ee qipqimx tuakiamr si samvutzirsii, qaxnaxx qiongbeh dyxhy. Qurlik nii jinwjingg, tauqex amwjni qra surgiap qui’ pxangg isuaw kir Cina, vangr jit xee kangx kag lauu dirr Daiuann. Cur nirr nng xee ginxaw longxx tak susiok. Dingw guehzit kui’yc juwceh, cego jiacc jicuw ee sinsuiw uat linr dngw dyrr dax :ar. Hag cur ee dairqimx, guehtnuax diyhh qycc go nii jiacc e taur. Taucuir sir xee dan’ kyr ix jit hxun guehhong, doci dua soxjai ee iongrdo qycc ping siongdiong :ee. Laijnii liamxjiyw, kaikongr-vuthux, tamring si langr zit byy langr guec. Qiawqimx jitt quw aw diddit jiyw .kir marr ingqaizenn.
Lyc denrciax, vniar dairsingx. Amwdngr ee caiwpuer, qimjaw cutmngg dyrr u vakqyw :ar. Ervox u kar denrue huanhur angsair qra hii singx tec cud laii jauxdangr, biw diyhh sew nng qngw. Hang-aw-kauw ee caiwhuanr-aw qin'ehngx iurqycc dnax laii bre. Knuar diyc siogkanx :ee, simqnuax hniaurhniau. Huecair kacc suiw :ee tiaux .jit .liap, ingwcair jit vew jiacc jap-go kox dyrr kacc cinwcaiw.
Quii quii jah jah, guanjai snax vo juer jit huac byy tuatic. Dingw lexvair iyx kir siamw .diyc, narr byy, qaidongx erdangr vniar qyckacc qinw. Qauwui, giaa syxsii kuix puetangw tec puex. Druar siy’ qecviah ee tauqex, jurqa'iong :ee tingg hyxser, iarr duxx qaur cur.
“Harvanx :ar.” Luxsu hniwhnax pah tauu van.
“Hner a. E dang be? Guaw qra liw draur tec.” Liuwhiac ee javolangg bunliw aw mng.
“Guaw qaqi u huatdo. Jin’ loxlat.”
Liulongg laii. Javolangg niu luxsu singx zip .kir.
“Dingw vrangx u tniax oksangr decc qongw, qongxx linw tauqex iurqycc decc hing qoxdux.” Dirr e dinxdang ee dua kax sniux-aw-lai, jaboxlangg kiw jit xee uertauu.
“Qongsix qurnii u tanwjnii.” Javolangg qongw, uertew jabsniaa ing’uix ee kuanxsir.
“Jnia’ hokkir!”
“Vngruaw dag’ee ee hok’imr lar.”
“Jarhngx jyhzit aw qapp oksangr dirr lautuitauu duw .diyc, qaxnaxx qongxx, linw u decc knuar cur?”
“Jnii qiar ginhangg diddit vyc .kir. Diongqow :ee pow pow aw iauxx lap e kiw. Haursnix erzit aw qenwdir qequanr, qniaxsimvu duxcaiw byy air qapp qeqnuax jywhuew kia, sniaa-lai jitt qingx iaxjiacc laii niu hro inx siauwlenn :ee. Nng xee lau angvyy u jit xui tangx iongxsiam, jit hxang cinghiux dyrr tywdongr :ar.”
“Linw jnia’ gauu pacdad.”
Liulongg ee mngg kuix .kuix, jiauwguann luxsu iusenx. Dngw laii cur nirr singx ngua venrsnax, isiuqunn haa lehh. Jit der qebah dirr jauwhiac duwhen, jinjniar beh air :ee suacc cue byy.
“Liw si diaudii qig kiwzinn beh gin .langg iacc buaa .langg, si m? Guaw bingbingg dyrr qongw ing’amr beh jenx hii-aw. Liw koxkoxx beh tec qebah!” Kiwkow .qaur .der, jaboxlangg an’ duvangg vniar kir kectniax, lig pni lig bak.
“Sniaxmih hii-aw? Liw qanda’ qra guaw qongw bah rair tec cud laii tewvingx.” Angsair vyccuir.
“Liw decc diyhqauu! Guaw si qongw sambah! Liw hnirangr-aw si tniax duiww dyc’ui kir?”
Byy biw juw hanjuu-tngx, tongquann-dadvenr, diyhh jiu zi dxng sir kir ciaucig. Qipsii qnuaxqinw vaiw, sniu venwvo rair sraiw qinxliauu. Qebuexjuix cnuaa hniwsag, liauxau rair jaux rair snirqiamm, ngiucangx kuaiwqinw ced vnuar liap jyr caiwkax. Damrvyc aw kacc drong qangx. Ehngx dag’ee diyhh kacc nguar jiac.
Dua hanr :ee vaiwzi amwsii rair voxsip, jitt dxngr dna’ cuann snax langg gxiac dyrr u :ar. Kar snax liap nxng, caiwvoxbiw he .quaw jywhuew qiauxla, caiwvoxnng jenx qapp pangx ~ ~, sir pxed jit pinxnguaw tngx jiauu jnriu dyh sui' dyrr qiyr jiac amr. Ser hanr :ee vng drew lehh, mihpuer gneh lehh, uat linr dngw iurqycc kir jre dirr denrnauw taujingg, dywciuw pangg nguaw, jniawciuw hruee maus. Juxjiac :ee zit .sii jiac taulo samsu-gnoxsu jiokk qiapqer byy hanhaa, vng naxx vex, denrsi sinbunn jerjiyw iarr diyhh qeqiamw knuar .jit .xe, siarhue qniadac kacc be lauwdin. Jiahvngrtniax kangx longlongx, horjuw qo’ langg jre jit dyh. Boxqniaw kox be uaw, si qiamm si jniaw vutciangjai, qnedngr qex jit bi utbun qniurvec'nir tunx .lyc.
“Binaxjair diyc qaxx guaw hiyckunr. Huloqingx siabjuiw. Guaw u vaiwtog jonghongg Io Sangr binaxervox laii knuar.” Hurzinlangg cuir qongw, siangx ciuw naxx decc kingg nguaxbuew qapp lacsab nguaxped.
“Hex qiyr angmngtoo sxaix laii qra tailu ngua .quer dyrr qaixquad :ar. Iarr succ diyhh hiacc qanghux, qiyr qaxx jonghongg :ee!” Angsair naxx qongw naxx hnair tauu.
“Jitt jann qaudair liw, qui’ vnuar dxangx byy-dongr.-byy-jing. Qigvutqik guaw qaqi kar denrue qiyr langg laii. Liw iurqycc decc towlensenn, iwqenr liauliauu.”
Hurzinlangg bagbaii dywkia sraiw uerdu. Javolangg itsiqanx cuir vniw vniw.
Nguaw-dic-di sextua liauw vingxkalanxpag dewjuiw. Jit der deaux diauu cib, hiyckunwzit u ingg jiacc laii lur. Juw-sew-bongx-buaa, jauwkax ee qesu jiacc jiacc aw siusuah, jit langw snxax kuiciuw jiacc beh jih, angsair dirr tniatauu hiamr qongxx u denrue.
“A’buw iurqycc tyw beh jiac vatvyxmuee. Guaw juw qui’ dniaw, juw hyw sui’ kad jit nguaw kir hro :ix. Ix qanda’ jiac jit cuir dyrr qra lanw qongw m driyc bi, byy qaccuir byy air jiac.” Dangsai kar denrue laii beh kiw qiuwvingx.
“Liw si m si u dycc jit hxang lauwqaux byy kngr lyc kir juw?”
“Iwzinn, lenjiw, judbiw, dai’axbiw, angsiyxdau, angjyw, linggingxqnuax qapp todaurzinn, jiauww liw qar :ee, guaw dagg hxang marr camx qaxx diyc. Byy, qamxx u dycc jit hxang camx byy diyc? ”
"Qamxx si liw jimr byy qraur quw iacc qrunn byy nua?"
"Jimr qui' jaxkiw kuc beh jnia' diamxjingx, qamxx iauxqyxx byy qraur?"
“Hnair, au lexvair huexkaux dyrr diyc qaur guaw :ar. Qauwsii qaur, guaw jiacc cuann hro jiac lar.”
“Ix qra guaw lyx quixnarr qangx :ar, iarr suacc u tangx lunw qaxx au lexvair kir?”
“Hnair! Liw singx qra andah, qongxx guaw e diamr cur nirr juw hyw, binaxjaxkiw lakling dyrr qra qnrua .kir.”
Denrue siusnuar, suaw kax kir ciaux vingsniux qapp huexsidduu. Angjyw, lenjiw qapp linggingxqnuax longxx iauxx u, cunx :ee diyhh kir laukax qanquexdiamr kuanw. Ngua jit niaw dngg kor, ovar tac lehh. Sraiw qinw liauu, byy hyw vo, jit xee dac cux .kir, kax hiamw hiamw nguaic .diyc. Lrauu qnuarhuex qnuaw qaur der, byy paiwpuex, judbiw suacc brew byy.
“Ervox u qowkeh laii cinr zi-jap qxinx dngw .kir, qongw beh vak jangr. Guaw u qycc qiyr, diyhh binaxau .zit jiacc e sangr .laii.” Diamwjuw qongw diyc pnaixser pnaixser.
Kacc kir hitt qingx jabhuexaxdiamr m si nng vo vnuar dyrr e qaur. Henrjingg u :ee, hen cinr hen cringx singx qiawkngr lehh, kacc quw aw jiacc uat dngw laii tec, kacc benw qnrua qaxx dang hnichnih, qex pilyy.
Duvangg siusir cingkir :ar. Vatvyxmuee benw dang dniaw dang jaur kacc qajair. Cimxcimxx kuanw .dngw .laii .ee dryr zip juixnguaw tua nng vaiw quer, qaidongx jimr :ee jimr, qecdngw jaxkiw qra lam lam jyr jit dniaw, denrqyx ced lyc juw dyrr tangx vangr ix kir :ar.
Nng qix kaqud qui’ amr bersux decc viag qoxdi, huexlingg-huexbew qnuaxqinw-q., caux qaxx jin’ u qauwkuir. Ciavnuaa qaur laii, jap-id diamw tongw. Bagjiupuee dang qaxx. Bagjiux nicciauh nicciauh, sinkux jiauu qauxquecsenx, huexsog kir ciangg .jit .xe. Zip laii vangqingx, tidqud dnaxx aw jiac dyw .lyc nia, angsair liamvnix-v. cih uaw .laii, tyw beh air sionghyw.
“Byy air lar! Guaw jiokk tiamw :ar.”
Liammisii ngua kunr tanxkix, hurzinlangg qajiacpniax hiongr angx qra sraiw ngiwbuew. Javolangg toxkuir vunhnai, bin hiongr tenlyvanw. Jaboxlangg bagjiux hahgiyy, byy-junw.-byy-bun.
Liongcex
Jarhngx dirr bincngg-dingw huanpox jit~nng diamxjingx, qimjaw iguann dangsir juer sig dyrr jingsinn. Venww srinx nngw amxamw, senrsuc jaubinn byy air vreh kiw, lenrr tnewbak dy’ be genr. Nng vingg hnirkangx m jaxi tangx mohuix decc hai, guarkauw ticmngg vongr .jit .xe tniax qaxx bingg ~ ~ jin' byy dardit'uaa. Haursnix tagceh hur cid diamw vnuar, jurlenxciax id~zi-jap hunjingx-lai qnuaw e qauwui. Quer u .hiacc .quw .aw iurqycc jit sniax. Dyw dirr bincngpox :ee diauwjingx benw knuar, jiangwsii duxduxx veh diamw be dingdnaa. Angsair siongrvanx ping junxsii.
Bagjiux vreh qimx, nng qix ciuxqud giac quann cununn .jit .xe. M-jing.-m-guan lyc bingcngpox, jniawvingg qingqah duii duii lehh ngua dywvingg, siogzirho, ciuw suar hnair hnair lehh. Lyc aurnii beh go-jap :ar. Guariongg suiw-baiw jairr langg knuar. Sindew hyw-baiw jurqiw siongrr jaix dai.
Jarhng’amr kingg caiwbuew u jiac kacc quewtauu. Daurlingx jit vxuex byy camx tngg junw jaxkixdngr, limx jit xee be cni’iaux dyrr hyw. Huedaii-dingw ee huebak jairlaii limx juixjiab dyrr e vaw. Hueknax qorr suanrqongw vin’ tauu ag, huehiyc jiacc iong juixjuh punr, zidtauu pak kacc be lenvow .kir. Jitt hxang sittauu suah, suaw kax kir haursnix ee kunwvangg beh qra vniar pox.
Vangmngg-lai hrngx hrngx hnir hnir, tagcecdyh-dingw qingwqyckacc si huex lixlyx, zuu qawqar. Siyw qra dnaxjingw siusip .jit .xe, jit dniux haghau ee didnuax vyrqizenn jauw cud laii knuar langg. Vaiwlak ervox u devniaxhue, beh jiy’iyx qadniuw ham’ qauwsux benrdamm, siongrr buexliux qycc u sensnix kiarmiaa qiamx aczit.
Dxangx gua jingg, ginxaw dirr haghau qapp langg’ jingqongwpah. Jyr laurbuw :ee jriab diyc denrue vniar kir qaur der, qnir diyc sensnix hyw hanwenn, nngw-ke.-nngw-haii, dairsinn-dairdy naxx Dairdyqongx, honghuew suisii kir jidvnuar. Ginxaw jitt hagqii singjig lag qaxx byy jit xee kuanw. Jiacc decc sniu jingwtauu, u anwsngr diyhh qinw laii kir haghau cue laursux sna' duw cuir sionggi.
“Jitt hy jiacc jiwiaur iarr byy tec hro lanw knuar. Cunvan byy air lanw kir ee kuanw.”
Simqnualai decc liam, dingxpue-erziog naxx decc dnaxjingw, vutjenrciuw suacc kir vingw diyc jit xee kondom, henxzenn si u ing .quer .ee.
“Siw ginxaxjex, hiacc hyw dnaw! Cua cit'aw dngw laii cur nirr kunr longxx byy decc jiauwhue!”
Jit duir ginxaxdux dirr pongwcngg-dingw vniwlang, sniu qnir diyc hitt xee qxingw, simqnuax pigpok cnaiw, dua bin angg qiqix. Jimxtautyr, cngqinx qapp puerdnuax, erdangr sew ee puerpox jiauu vrag .lyc .laii, juer jit xe qra danr zip kir sexsnaqix.
Simqnuax bun jiaujiaux, be ciaucik, cur nirr qux be diauu. Kunwsnax ngua sowix, binrqyx siyw buah .jit .xe, enjix dyrr benw :ar. Vorqniaa qaur caiwci, ingsii-vehhe, mrbenw sni langqee qapp langg siy' keh. Ehngdngr u anr cair longxx dirr vingsniux :ar, quexjixdnar kuanw quaw quexjiw dyrr hyw, kacc benw qnrua dang. Dnaxqag jit dnar bre bacmuee :ee jiokk qa’iac. Siongr diyc xui, suaw kax uaw .kir singx jre .lyc, suar qiyr jit nguaw muee qapp jit diauu siyqeqngw. Qecviah dyh :ee, jnir sox sox ee siybah qaccamx quaw qniusix unr jniur, jit der suar jit der. Knuar diyc qaiww hyw jiac kuanw, cuiwtauu dang jin' dongr be ge, qinw qiyr tauqex ced jit hxun laii qexgenr.
“Ziddauwdngr singw .kiw .laii, benw jiac.”
Nguaw-drew jit cuir muee qrut .lyc, simdew dyrr u anxnex dnaxsngr. Jiac vaw dow dang. Hyw did ix sniaxmih byy, siqanx si je qaxnaxx snuax. Unn unn aw song, liauu liauu aw si. Siyw daur ee sii qniaa dngw laii qaur cur, liulongg an’ id lxau jidloo tauwjua. Mngg kuix .kuix. Quandua siwtangwjee ee javolangg qapp ix siy’ siamw srinx quer. Jabow :ee beh cud, javox :ee beh zip.
“Liw qinaxzit byy siongrvanx?”
“Sexsinkuqingx beh siujingw cniaw langg’ laii qrow. Setqewsux qongxx jin qinaxzit u ingg.”
“Caicaii lyc .kir hit xee qamxx dyrr setqewsux?”
“Hner a.”
“Linw angx u cue diyc taulo :ar, si .m? Jitt xe aw ix qaxnaxx jaxkiw longxx e cud .kir.”
“Ix kir yc denrnauw lar. Vaiwzi qapp vaiwsir longxx rair siongrkyr.”
“Jiacc qutlat.”
“Hex qnuatniax vran :ee, yc benw jnii :ee. Diamr cur nirr ingg marr decc ingg, qeqiamw siong.”
Druar siy’ qecviah nng xee oksangr dirr mngcuir amwhap qeqiamw qrangw. Syxsimx jun .kuix zip laii cur lairbin, caiwci-aw kuanw :ee, rair vingx :ee vingx. Bagjiux siab siab. Jiangwsii vow jit xe aw binn, kunr kiw .laii cuann juw amr duxduxx aw hyw.
Huad amwsaix, kunr vaw vaw, jensii beh kixqangx. Jenx jit buew bachii kacc cenn qangx, cunx :ee dyrr kacc kinsngw. Jit dniaw qenwjiwbah qapp loxnng, dingw zit aw vuanrlow :ee, jit qekauw tangx jiac lecc qui’ lexvair. Jit buew u lehhuex ee ziuhii sac sik rair ced. Uasabi qiauw dauriuu iong qorr dauriudic-aw drew. Jitt cud qaiww singw qangx, jin' sunxlag, siongsiongg decc juw, veaxqniaw nng langg bak nih aw quw qui’ vnuaa jiac jiac .kir si vaiw vaiw :ee. Qelai nng xee javox :ee dandanx hingr baclo, tobin huad .cud .laii .ee longxx byy air. Ingxvaiw bad liaurliw quer cunqnuax craw kincair. Dairsingx ingrvng :ee ziuhiqngw gne kir puer jongw jiac jiac .kir, caiwdew cunx kincair snuawia knuar liauw mohmoc. Juw ee langg hitt amr caiwqah vro qaxx erhaii qiongbeh lrauw .diyc, sanwsimx, dryr dryr junw punx taulo dit.
“Liw sidjai zuxx laii zuxx m si kuanw. Jiax kiarqex, m si niau’axqingx. Liw au vaiw mair qycc qra guaw cua jaboxginxaw dngw laii duawmee.” Qniaw vangwhe dngw .laii, juer laurbuw :ee dngbin qra tikme.
“Byy laii lanw daux, capjauw beh kir inx daux?” Qniaw inwcuir inwjic.
“Liw si dnaaw jniurdingx ee tagcecginxaw neh! Beh siauw marr diyhh siauw kacc u kuanw :ee. Iarr u langg siauw hitt hy byy kuanw :ee?”
“Guaw siauw diqyx beh air lamw cit’aw, liw rair taux ciyr jiacc driyc. Linw qniaw narr knaaxsenx, liw qamxx dyrr e kacc cingwir?”
Haursnix lutlud cud, juer laurbuw :ee nngw gee, jidsidig cue byy ue duc.
Lak diamw quer, angsair tewkinn dngw .laii. Qniaxzii ee pnaiw qniagii qapp sitdig dai, cuwlairlangg juer jit kunr dauu, naxx qiquanpaur.
“Mair qra quanw hiacc je lar. Siauwlenlangg snijniaa kacc vaxjniux, beh pna iarr si jit juiw aw niardnia. Cua .dngw .laii kacc ngiaa ix kir guarbin kuix vangqingx, liauw jnii qycc je qauliauu.” Juer laurve :ee juer hysurlyw beh quewvnii.
“Qxuiw qapp bew hauw!” giag qah piag, juer langg' laurbuw :ee hauxsaux, cnix qinx dniur am. “Liw m iauxx langtunn-aw dyrr siongsiongg kir hotelu kaix m? Mrjiacc e hiacc kuair pnaiw, sraiw byy nng xe dyrr vairbew byy sursaiw .kir.”
Hro kanciuw qra bauhsuac, juer angx :ee byy-ue-byy-qxur cnibongrjong, tauu nngxsuee qor vex vng birsi.
Sui’ langg jit hur nguaxdi, luxjuxlangg quiding qokk langg ee qaqi sextua. Auwbuew ing vng :ee diyhh lamxbuew, jiac cunx :ee rair vingx, jiac u liauw :ee rair sew. Jit qekauw dngdew aw zip kir qaqi ee kunwvangg. Langkecqingx qimr qaxx amwjniur-j.
Nngxliyc imgak ee CD cic hro gryy, jaboxlangg len YOGA vutjiw sunsiok. Jit xee rair hniawiyx ee bexser crig be jniurjniar dyrr decc jysimx auxnauw, qecviah qingx :ee qingw jitt diap laii caxvanx. Qoxpiyr hangjingg kaitiah, dersiwdaii ee sensnix vongr qaxx snuax quann juixguu dua, zuxx qongw snia’auu qycc zuxx puu.
“Vangvai iaa, dagg amr tniax, dagg vaiw liauw. Lorgiy cangx vutsingg suanr, u qraur harsiaux!”
Simtauu huathuew, jaboxlangg kir qra imhiongw jun kacc dua sniax qra apdyw. Vutliau, duiwbin qingx suacc u jabow hnix hnix hnaix hnaix ee sniax, jiokk siasinn, decc vnuax sniaxmih cud bingg duw bingg.
“Liw tagceh m tagceh, knuar hex taixqyxquiw :ee si decc vnir sniaw kangtauu?” Jyr laurbuw :ee kia dirr haursnix vangqingx ee mngcuiwkauw qiaucqiauh ziongw.
“Bangrlo-dingw knuar benw sxenw :ee, guaw cingcingx dyrr si hingr jitt hy kuanw cuttauu lar,” horsingqex qig jit xee lanrmuakuir. “Liw qapp vaa :a ang’axbow jyr kangx kag :ee, huanxdngw beh qra cur nirr venr juer huesniu-biy, niqox-xamx!”
Haursnix qra laurbuw qingtew, piwsniur, juanzenn byy sna’ duar .diyc. Siauw qoxdux :ee hitt qingx henrjniaa sokjing qiamx byy bangw. Jaboxlangg qargee cetciw. Jex sewqanx qapp ix siongrqaiww u sna’ liamm dxir duar :ee, jidsiqanx, qaqi marr m jaix kacc iamwhun dycc jit xee.
Aiwcex
“Ciuxam sehkolinx. Ciuxqud giaa quann. E qir did rair jamr kavo. Jin’ hyw! Laii, dingtauu qycc jit vaiw.”
Qauwsux dirr taujingg cuarcaux qiamx hyrling. Jit din jaboxqnuax u ngiu tranr ngiu diyhh juer iwdir, jidsii hongxhud duer byy diyc jua si e sitkuir. Muixx lexvaiwsir ee kytingg jinwhingg qui’ vnuar dxangx :ar, cud guec dyrr beh jnriu enxdaii. U minua laii :ee, kavo ciuxlo narr juer u qauwqag, liogliok aw si u jit xee van :ar. Dingw lexvair caihongg sxaix u jah pueciyh laii. Beh jenw vor juer snaaxkor diyhh jaix qoklangg ee sindenn si vuipauh iacc sanxsyh, si lyr kax iacc exqow. Vutviw sowsiongg lenrsip cocing, vor kacc sanxsinx, dingdaii ee ijniuu diyhh kacc huacaiw, juer e jiahbak jiacc si ngiu. Juseangg ee sikdik juer kixdew, u senr voo kacc be suix, bixsig qunw qnii liamcamx ogamsig ee lesuh, ciuxngxkauw u kunn lanqanx, qunqux enr juixpyhunn. Vowdew beh air kacc iuwzi, kacc iuwnngw, kox kox qex kaix .quaw hab’ingx.
“Ervox ersaiw .be? Muaw :ar! Acc byy, binaxjaxkiw lehh? Jap diamw vnuar. OK.”
Suackyr, sui’ iong qorr ciuxqix-aw iog beh jyr SPA, sinkux beh qinw ho'ngg liac liac lehh. Pacdngqah ee langkeh, miasner benw vyr, langg’ jid’err tniax sniax dyrr jaiqix.
“Nina! Liw qamxx si Nina?”
Trngr samwqunn ngua venrhok, jiacc jiacc aw ham’ qangrvanx :ee cuir iog au lexvair jaiww sna’ qnir, byy-din.-byy-dang tniax diyc u langg decc qiyr ix ee sengiuu miaa. Uat bin, dua ix nng nii ee dairhak hag’iuw dyrr kia dirr ix jniawciuxvingg vnix.
Bu’iwdiongx siy’ ciang, nng langg duiwbin ciyr gix gix. Siy’ jiycmng .quer, jiacc jaix vaiwsir jaxvox vnivnii e dirr jitt dongr lxauu-aw siongrkyr. Javox :ee yc denrnauw, jabow :ee yc flamenko.
“U decc pacsngr beh dngw vadd kangx juanw vadd dxoo,” javolangg qongw. “Henrqimx dagg hxang longxx diyhh ing diyc denrnauw. Yc narr u jairciuw, kacc benw diyhh kir iongx .langg.”
Zit beh daur, Nina kixgi juewdin kir pah dionggnow. Javolangg jid’err qra inxdamr, Nina suisii u juxir.
“Cuahqag jit qingx Zidvunw liaurliw, inx ee oangwcngr jiokk cnrix qycc iur mimii, zip cuiwkauw dyrr rngiuu .kir, longxx benw vro, itdit u hongtuann qongxx qamjiw jin' hyw. Dingw zit aw u kir qra qauquanx .quer, kaksit itdow :ee.” Nina cuir cingjanr quaww viw jingxtauqongx.
Luxsu qongw qaxx u huex u zri. Javolangg jitt diab narr hnair tauu, qniax e hai langg' byy iwsinn.
“Cimx bak :ee kacc cimx enn. Guaw binrpuee ziauu pexpew. Liw gauu kngwhuer, jit sxix aw longxx byy venr, itliausinx, qangrkuanw jiacc suiw jiacc siauwlenn.” Javolangg qongw, jit der hinng susi naxx decc vorjiac.
“Iarr u hitt hy dairjir? Vnuawlyxzinn :ar. Liw qongw qiak :ee, tiauqangx beh qongw hro guaw hnuahiw. Guaw suacc m jaix?” Nina qongw, cuiwqag juann ciywsinn.
Jauxdyh :ee qra linghee ciuxqngw sangr .laii. Ciuw gim haixcair qauh ee jiahmngc, javolangg dramm kiw diyc cuwlai ee langg, byy ir aw byy ir.
“Jit xee jaux bangrlo ee gem, tagcecginxaw dniardnia huandiamw iaxx m kunr, hiyckunwzit uadzuxx si byy krangr mizit. Acc lingrgua jit xee m dairhak tak qaxx vnuawamsirnng, jit hagqii tak bue muaw dyrr suacjux vran hiyc’yc, jitmaw dagg qangx decc voxsip junxvi beh dingg kyw. Dandanx ginxaw ee dairjir dyrr huanlyw be liauw.” Javolangg trow duarsimkuir.
“Liw hyw mia m jaix. U qniaw tangx cauhuann kacc qniu byy.” Nina binrsig amwdam.
“Liw qamxx byy?” Javolangg sunrcuir mng.
Nina hnair tauu, cuir bih bih. Javolangg hnowhenn, indnuax kixliw didtaur mng.
“Dairtauu u jiokk qutlat cue isu knuar,” Nina dam dam aw sueh kiw, bagtauu qad .laii, taukag damwqe. “Jur duardangg, vniar iyhtngx, uirdiyhh beh air jit xee cinsniqniaw, sniaxmih samdingw-zirhy ee qxuad marr m.-mijnix-j. decc cir. Lanw jyr ix ee qeau knuar diyc sidjai jiokk vutzimxsimx, dyrr qiyr ix siaxsimx vangwhed mair qycc brang.”
"Kir py jit xee laii riyx suacc berhiangw!" Javolangg dairgenn kixgi.
"Guanw angx air jniawvag cinsnix :ee, byy air binglingg :ee," Nina trow dua kuir. "Byy qniaw mia huanrser si sxor hyw hyw :ee. Guaw jit diamw aw dy’ byy quair ix.”
Tniax qaur jiax, javolangg binglangw jaix tauu dang, tanwqinw dngw uerquanx. “Qniaw-jxer dang knuaiknuaii. Benw pnai :ee a.-anhann-h., qex zuarr knuiwuac, zuarr cingqingw lehh!”
Duiwua qaur jiaxx duxhyw jit xee jamrtauu. Daurjniuwtngx sui’ langg jit nguaw limx .lyc jiokk vaxqig. Jit vnuaa sasimi jiac iauxx u cunx. Javolangg tegi diyhh snaqab kingg hro kangx kacc be pacsngw. Nina byy qongw byy dnar, kixciuw qra ciacsinx jiauu gneh hro qang dyh :ee.
“Longxx guaw jiac, nacc hyw?” Javolangg pnaixser pnaixser.
“Guaw dingw jua laii u jiac quewqongr. Iarr m si decc byy sigsai. Lanw longxx benw sewzi.”
Siauwdnuax laii, Nina qinw ciuw qra jrih .kir, dahgni jitt dxngr beh juer dongx. “Danw liw qycc u lairlo jiacc laii hro liw dykaihuir.”
Nng langg siy’ srii ciyr bibix. Javolangg kiaa odobai. Nina kir duarlo-vnix et qewdingg :ee. U jit xee jairjaw ee cuwvnix decc juer jauxjuixkeh, Zidvunw qapp Daiuann tauwdangx huelingqix laii huelingqix kir. Ix dirr qevag u pah jit qingx hangdiamr, jiauu tauwqangw :ee, dingw zit aw u kar denrue vywdix, qongxx iurqycc u sinx kuanw ee snxax-aw qauwui, muaxvnuaa jniar lailo ee dingxsig hxuer. Qimdnuawzit ee kimoji giangx qycc u duiwdangg. Taksi dirr lorkauw danw cnidingx. Nina liamdongliamsii huanhur qongxx beh kir vadd xui. Unwjiangr jiksii uaddngxciuw uanx jit xee qingjniwdow.
“Jex qui’ sux :ee, byy langg decc dnuadiah lar.”
Duarjuarhuex, suat'oo ee sikdir, snaaxqunn duarvan qycc quiwkir, enwniaw sikdir sniu' qiaux puer liauw byy qacsig u kacc bycaiw. Nina qanda’ beh air erquec ee vacqingxqunn. Diamwdongx m unxdamr.
“Guaw junw qui’ sux jongw jah .dngw .kir, liw beh cruw quiw jred hro .guaw?” Nina tyxjed. Diamwdongx qorr ciuxjnaiw viw nng qix kuix vnuaa. Pah babax, Nina sui' qra cutqer, qex jit qix viw dywdngw. Diamwdongx lig bagbaii, buexau, iaxx si kniawtauu, snax quah qatdnia.
“Liw vehbacdew. Jitt niaw jiauxmngg-hiuu ee sikjuiw u hac liw cing, m sunrsuar hniah .jit .niaw?” Diamwdongx decc qra longrsongw, hiuu-aw ciuw-lai lang.
“M a,” Nina qra iyy ciuw. “Snaaxduu u nng~snax niaw :ar.”
“Jitt niaw byy qangg lar. Kinx niuxsniuw qycc e siyx. Guarenn si hongjuixvor, tangw junw suat’ix iacc horsnax cing. M pnawping, jit niaw duiwduw snax niaw.”
Diamwdongx qongw qaxx hyw lxyy hyw qow. Nina hnirkangx kinx, be kamx did langg’ saixlong, hueziongg guartyr singx trngr hetqak, sinx snxax quer ciuw sui’ ciwcing bai. U hahsux, qycc iarr diksit jiokk kinsinx. Dirr kiarqniar taujingg zuxx knuar zuxx qacbak. Vnuar sniax vnuar, sinwiongrkah tec cud laii lur.
“Jitt diauu qingqacmuax u qac’ir bor? Jniawjoxqex Kashimer ee ngiumngg jrid :ee, jiokk nngxzuanw. Beh air juiw sig :ee marr u oox!” Diamwdongx misnii decc sysuw.
“Au jua lar,” Nina duiwcuir rinr. “Dagg huee laii liw jiax longxx kacc camw tiah juaw. Gunw angx knuar diyc siauwgiac unxdangr e liam.”
“Be lar. Linw angx sing bow tong’ langg jaix :ee. Ix byy tniar liw si beh tniar si’angw?”
Brew qaxx qui' tuax qui' qyy, quii quii qnrua qnrua, narr byy kar denrue qiyr qewdingciax, beh qniaa kir qaur duarlo-vnix dy’ qanlann. Ciax laii, diamwdongx ter siongrkeh kuix ciamngg, cuir ciyr bak ciyr hongrsangr kixtingg.
Cur lairdew nng xee ngiuhogduu, snxax kngr qaxx dnirtad-t. Nina dirr ciax-lai decc pacdad. Qnuaa .langg cing :ee qau dutdud, byy dairsingx cringx quiw niaw aw cud .laii, sinx singbew :ee cingjai sreh be zip .kir. Qaur cur, kuanw .dngw .laii ee qniartauu bongxcniaw qruax dirr langkectniax ee pueiw. Ciuxbin sew sew lehh, snaaxkor jit ter jit ngua, nngw simwsimr ee pongwcngg beh songwsimx aw kunr. M jaix quer zuarr quw, binn binn aw, u tniax diyc dniaxquar kinkinkiangkiang ee sniax. Lyc bincngg, sam sam kir qaur jauwkax. Angsair kia dirr gasloo taujingg, ciuw giaa jit qix haursiac-aw.
“Liw decc sa juixqiauw?” Nina naxx qongw naxx hachir.
“Liw qamxx u juw?” Angsair mng.
Nina hnair tauu.
“Liw beh jiac sniaw? Guaw kir qra liw brew.” Angsair qongw.
“Mrbenw lar. Guaw marr jiac juixqiauw dyrr hyw.”
Tausingx juw :ee puu ar juer jit xe hoo .kiw .laii singx hro bow, juer angx :ee iurqycjaiww he jap-go liap lyc kir sa.
Jiac amr vaw, angx qra hagsingx ginxaw ee kyxqngr tec cud laii qaiw. Kangkuer uanbingg, bunqu singrsuar siusip jingxjee, qitew sew cingkir ngua kunwsnax, angx uad zip kir kunwvangg jersenn, viwbak unrsinn.
“Guehcex guanw dyrr beh cut’enw. Linw siyxdi siyxmue iacc dongliauu kacc diqaux :ee longxx tangx qiyr laii knuar. Zibpiyr jit dniux snax-vah, guaw u juwbunn jap dniux.” Denrsi knuar suah, Nina iarr zip laii vangqingx.
“Brew qaxx jap dniux! Qamxx be sniu’ je?” Angsair henxzenn u kiw qanhuew.
“Liw qongw dyrr qongw, nacc diyhh anxnex og tictih?” Nina auu dni, bagsaiw qiongbeh linr .lyc .laii ee kuanw. “Narr hyw lirlo, langg’ inx u bingciangr qongxx beh quanenn hro qozi'ngi. Jongxqer marr jiacc snax-cingx kox narnia. Guaw si u junxjad :ee, be qra liw kuikongr paccingw ing lar.”
Nina qongw qaxx beh kaur beh nih. Angsair cuir-aw bih bih byy inwue. Denrhuew qimr huax, Nina huansinx qra angx lamw lehh. Juer angx :ee sui’ jaix dai, tauu ngar .lyc beh qra jimx.
“Lanw qamxx m si lyhjyhzit jiacc jyr .quer?” Nina vnuar etex.
Angsair liyc aw dunwdauw, lorbuexsinx vangr ciuw, iamxqii-sitqow.
“Liw byy air?” Nina mng qaxx jiokk cnejinx, byy pacpuex angx liamdongsii qiux kax liab .lyc .kir.
“Guaw liahjunw liw…” Cuiwtauu ee ue tunx .lyc, angx qycjaiww qra bow lamw uaw .kir.
Nina qra sag .kuix, suar qongw jit qxur, “Mair benxqiongw lar.”
Mitauu cnilingw. Amr jutjud ee vangqingx-aw-lai, bincngg-dingw :ee qeww amwjuewjni decc toxkuir.
II. Cur-au
Liongcex
Zit ciaa snuax. Denrciajam sna' ex sna' keh, snuawkunn ee langqunn naxx haixingw jit jun suar jit jun, beh kiw beh lyc :ee qewqer qinw viagviak. Cur nirr u suxiongrlangg :ee qapp langg’ kacc byy qangg. Benw qnuaw beh dngw kir juw dxngr, kavo tangx unn aw suaw. Duxaxx jiacc kixloo ee hniuquir kauxsovniaw hangx qaxx pangx cingwcingr, sox sox aw zet qongxx zip cuir dyrr hux. Brew jit ap-aw hro nng xee ginxaw damrdnix, rair vaijua danxvan marr qamguan. Iyqangr, angsair jurr siauwlenn dyrr hingr jitt lo. Uaw iahtauu jit qingx qyvniaw powho dingw lexvair tauu kuici, iyqangr ee kauxbi jerje jiongw, kiycjiamx vaii kiw jin' kaxkuanw. Angdau, pangbit, otngg qapp oliongdee, dagg hxang longxx qra tec .nng .der. Jiac narr si cuir, au zit aw jiacqycc laii qauquanx.
“A’buw nihuer u :ar. Huekaux narr diyc qaur lanw, zit .sii vangr ix jit xee langg dirr cur nirr sidjai hro langg' jiokk be hongwsimx. Lanw cniar jit xee juw vng :ee qapp ix dauwpnua, qycc tangx qra liw draur jyr qesu. Liw marr tangx lingxtingw kacc cing’ingg lehh.”
Angx u hauwsimx qycc siyh bow-aw. Tnrix jit xee vangciuw, juw-sew-bongx-buaa u langg tangx popnix, urngiaw qex jiokk ingsinx. Cur-lai u langg’ vniawdng, nguaxvnuaa u langg’ draur sextua, snakor u langg pipak u langg jih, kax sangx, ciuw lang, samvyw benw drang. Ixjaw jyr siyxjiaw ee sii dy’ byy henrsii jiacc jairgnow.
Dac zip mng’ag, jauwkax hongrhong qiyr, juxjiac ee dniaw dng’ zet. An’ Uadlamm qer laii Daiuann ee hurluxlangg jiokk kiauxkir. Daiuann cair, dandanx qra qar jit vaiw dyrr juw qaxx siacsiah qiyr. Pinxliau narr u qraur, ix urjun aw qycc e cuann Uadlamm ee liaurliw hro cur-lai ee langg ngua cuir ngua do. Vngrdngr u vadd langg decc huadlyc, luxjuxlangg tangx singx kir laur juiw sew sinkux. Hunhionghuex kiwbi ee jing’iuu, qurnii jaboxqniaw sangr ee snezit-lexmic, dih nng dih aw lyc kir sexigjyy, qongxx beh daqingx ee hurzinlangg laii jimr, aurdngxsinx kacc be u jit quaw lysyx vni iacc qau jedaiw.
“Sexigqingx ee juixjuanrtauu qimr be ann, dap dap dap, diddit decc dih juiw.” Angsair harvanx cimxx dngw .laii, sinkux jiacc jiacc aw sew hyw :ee dac dirr tokaju, cuir drang cuir qongw kiw.
“Ejaiw sew cuir ee sii guaw dyrr u huatqenr :ar. Juixden :ee ehng’amr dyrr e laii cagvoxlau.” Angx qongw.
“M jniaa qauu! Dangsi'aw liw jiacc qinxqniux jiacc kiangwdauw .diyc!” Bow qra angx ylyw.
“Snuadingw ee vedjongx qongxx u dniux qingqeh :ar, mngtangx-horsnir iarr jiauu dniudaur hyw :ar. Io Sangr ervox u qapp guaw lenlok, iog binaxamr beh tec hui’axjngx ee huekuanw laii hro lanw qingw.”
“Beh pox derjngx :ar! Acc m decbeh erdangr druar :ar?” Bow niar bak mng qinw qinw.
Angx jiokk ing’ingw, dimr tauu bacbunxciyr. “Siongrr ban lyc au guec dyrr e tangx zibcur. Jitt aursinx hiyckunwzit, lanw dyrr tangx druar kacc huadlok, mrbenw qui’ qekauw-aw longxx qiux dirr doci ee qong’uw.”
Cur-lai ee denrue dann. Daqex air beh jiac vatvyxjimqnix, siyxjimw berhiauw liaurliw, vutdanrhuann, juanqangx kar denrue laii cingxmng.
“Jitt cud, guanw daux jitt xee Uadlamm laii :ee erhiangw. Guaw e cepair ix binaxjair kir linw daux juw jit vaiw hro liw knuar, vyxniaw liw liammix yc erhiauw.” Jyr langg’ hniasyw :ee quaww vyxjingr.
“A’buw qingw jiac, qik pnaiw cuiwdauw, jex liw dyrr siongrr jaix. Lanw cuann :ee ix dyrr siongsiongg decc be qaccuir, qongxx byy hahvii, byhqongxx si guarqoklangg.” Siyxjimw u hiabgii.
“A’buw dingw guehzit dirr guanw jiax druar, jiahsit longxx marr Uadlamm :ee decc virvan. Tauu jiww buew iarr m bad tniax ix decc hiamm, dendyww ylyw birsi, qongxx Uadlamm jabow jin’ qamxqah, vaux juixqiauw, lenrr juixqiauxpuee dy' qaqi lrunw."
“Qamxx urngiaw?”
“Guaw penr liw beh congr sniaw? Qinduxx liw singx qra liau cuann hro jiaujngg. E-be, hen cir dyrr qniwjindniux.”
Lak diamw vnuar, cojyh ho’ngg cniar :ee jit qangx ee sittauu suah. Cur-lai ee duarlangg ginxaw xee xee uaw laii jiahvngrtniax longxx benw langg huah.
Imwsni-aw craw bacpnir, u cnihuanqniux-aw, bogniw, dnix hiamjiyx qapp cangvec juer jyliau, jit vnuaa jabhuex-gnoxsig, knuar diyc dy’ hyw jiac kuanw. Vingsngduu jit buew qalac ehng’amr liac laii juer gnoxliuxqux. Hii-aw iong cniiamm qapp bixjiuw singx sni, qyy hanjihunw lyc iudniaw pingx. Dua dniaw zet, cangtauu singx lyc kir quer iuu, suar .lyc, hniuqox, navok, qiamcair qapp bexjii, sui’ hxang aw he lyc jywhuew liaurliw. Ketciapu qapp ox cor juer kenwtauu, taiwvighunw kanx qnix tranr siyx lramm lyc hijnir dingxtauu. Snglamx dnix aw snglamx dnix, vutjiw aw lirkauw. Jitt cud qau qangx. Uadlamm :ee zim kyw vutdyw.
Cunx :ee snax hxang dyrr qex jiokk singxqangx. Hezinn cuex nxng si venrtywcair. Kar snax~go liap aw nxng la hro snruar, jiacqycc he quiw buew aw hezinn zip .kir vangr hro denrqyx juw, benw sniaw jiahqangx. Hii hii bah bah iarr diyhh cair qah. Cnicer ee qecnacair, dandanx jit bi suanwvan kenwpangx lyc kir pingx, jiac diyc cnixcuir qycc iongw sinmia. Jit jiah hongqex vikvax brew ven :ee. Byy siok. Beh air jiac, qycc diyhh jit lexvair jingg singx juwbunn, m si hen brew hen u. Luxjuxlangg ehngx harvanx u uad kir kiyh juwbunn, liac .dngw .laii iarr diyhh qaux hro Uadlamm :ee dog hro qui’ vnuaa jiacc tangx junw jit cud cair sangr jnriu dyh.
Dngdux ee vngrdyh, jit qekauw duxhyw jit langg jre jit vingg, dirr qokk langg ee ixaxui iong vng jiokk habhyy.
“Nibuew sniuxqimx qinnii huad sir qywguec vnuar. Hiycqnuaa, lanw tangx anvaii laii kir guarqog quansanx-guanxsuiw. Zidvunw, Bixqog iacc Aujiux, iujai linw qingw.” Byy-din.-byy-dang, hordniuw duiww jairjy :ee suanqyr.
Nng xee ginxaw ciyr qaxx cuir-aw gi saisaix, snax kax diyy, nng kax tiaur, hnuahiw qaxx be qor tihh. Angjiaw-aw sir bak siy’ knuar. Jiahvngrtniax gia'ngsig ee gersuddingx huexngw iuziuu, kyxviw angx qapp bow ee kiwsiong, hiacnirr aw anzenn, hiacnirr aw unsunn.
Aiwcex
Zidtauqngx hyw vunxdingw, tangnii-aw jit renn quer jit renn henrhen dy’ u giuw qaur jinrbuew, ix cue kangx cue pang suanx zip laii langg’ ee vangqingx-lai camquanx m bad decc jiauwhue.
Qui’ mii qangg cngg kunr :ee jniaw kax cuxvo kuar dirr ix ee katuiw. U quaw dangrtauu, jaboxlangg hunlii-aw dy’ byy decc iauwir, simqnualai denwdyww decc jubuix. Javolangg jaramr qui’ senx deh dirr ix nngw tew dang hnichnih ix dy’ byy qongw .anwjnuaw, kow byy unsiyx ee dingxquar itdit qapp ix liamm siy’ uaw.
Jarhngx iaxx jin’ qngjngg ee cuiwpuew, jit amr quer, iurqycc hoo nawsnah. Dingxdunciux, erdauxciuw qapp nng vingg ee vinwciux tongdongg decc huad. Vnuar ovec ee taujangx qapp siauwlenn ee sijun vnii hiacc om. Hxiac-jingg nng qix aw mngsuix suii .lyc kinx lat qra vuew duiww dingw:a .kir. Jiokk sniu beh qra bongx qra jimx, qycc qniax e qra paccnixbinn.
“Jitquw quiw diamw?” Angbow jyr quw vyhqnaxx nixgnow simqnuax u qamxtongx. Angx byy-di.-byy-dang mng bow, bagjiux iarr byy niar qimx.
“Cid diamw tongw narnia. Jyww liw qycc kunr.” Bow rinr, naxx decc syluac angx ee taumngg.
“Kunwbinn jauw .kir .ar. Mraxqycc, guaw beh air liw ee sinkux hro guaw jyr bincngg.” Angx h.-hiwhiog-h.
“Tentyc!” Bow hiwhiauh, qexir qra taktig, cuir ciyr bak ciyr.
Angx qra bow lamw lecc jimx, cunhongx muaw bin. Angvyduir jyr sanxquir tauwjaw tauwiaur.
Liongw sner habhunx qinnii muaw zi-jap dxangx. Angjiaw siy’ cua laii Malaisia ee jit xee qo’ dxyw iusniuw hiangxlok. Kecquanw jaxkiw u cuanvan BUFFET jairr langg jiac. Cud vangqingmngg diyhh ngua snxax jin’ uiwhuann. Jit tongx denrue crex langg’ sangr .laii. Jit sii aw quw quer, sui’ u langg laii decc longr mngg.
“WHO IS IT?”
“ROOM SERVICE.”
Seqog liaurliw ee jaxkixdngr. Nngrvaux, enbah qapp enciangg kngr diamr qang jit der vnuaa-aw. Guarkuanw bersux guqag ee kroissant iong qorr jit kax bihnaa drew qui’ naa. Hen gingw hen juw ee qavix jit xoo. Hen qaw ee liuxdingjiab nng vxuex. Hylanjuu salad sui’ langg jit nguaw. Sakciax ee jiahmic sui’ hxang aw ho’ngg suaw kir dyh-dingw vaii qaxx suwsi suwsi. Jiac kiwbi qycc qiamx jiac kiwhunx. Jit qix u cah lanhuex ee vann cai diongngx. Siyxcaiw jrih quer ciuw, sangwdyh :ee suecsia, ciyr tauu ciyr bin.
“Hngr, jex mirvaux hangx qaxx jiokk sox. Liw jiac knuar mai.” Bow qongw, liamr jit der aw trad duiww angx ee cuiwkangx.
“Urngiaw dyrr diyc,” angx naxx vro naxx qongw. “Inx ee enbah marr be baiw. Nngrvaux qycc gauu jenx, vnuawqniunngw, byy cauwhuehunx bi iarr byy cauwcnix bi. Longxx be hamban juw.”
Pangx qongwqongr ee qavix limx quer auu, aiwkunwsinn jauw qaxx byy-hrunn-byy-ngiaw. Ciuxbin sew cingkir, ngua jit sux kacc liangkir ee guarsnax, sandalu cing lehh, liangby-aw dir lehh, ozinn bagqniar tuh anww tauhiac-dingw urvi, jit qangx ee huanlok beh kixkenr.
Dingxdaur beh jre kuaiwtingw iujunn. Dairqongx qapp zirciuw nng xee langg qindnuar dandanx suhau jit duir junkeh, ang’axbow qauwui dyrr kixqniaa, longxx benw tingwhau iacc danxjee. Cnicuir ee ciurnaa, vnuawtnix u ringx-aw decc sunlyy. Tingw-aw dirr haixdiongx siyw hiyh. Haixhunxlik ee haixjuiw cringx iuiux. Vingg hongx jing lrong, beh knuar tnidingw ee jiauw vuex iacc haiw nirr ee hii siuu, dairqongx viw jngxtaubuw qongw jitt xui pah derr id janw. Qniax junkeh cuir dax auu kuah, zirciuw u cuann iajiuw. Qorr sucqongw unn unn aw suh, limx diyc tangwsimliangg.
Hiyh u .jit .kunr .aw, enzin qycjaiww huatdong. Kuaiwtingw sraiw hiongr suasnuar. Kixsnuax jnriu tnuax ee sii vnuawdaur, dng’axdo u decc kiw huanxluan, haixsuavox vingww u barbikiu dniudanw inx qonglimm. Jit din hogsai :ee vaii qui’ let bersux decc danxjic singsiongr. U qra inx ciauu vunwdauxiw :ee, u sangr hylansejuiw :ee. Dycqinx dnaxx jiacc crux hyxser, linghee, angjimm, vauhido, sui’ nguaw cud.
“Jiac qaxx jit kenx do. Cunx :ee longxx liw ee.” Bow qongw, naxx decc suh bid’angr.
“Jaboxlangg qniax venr vuipangr, liamw cuiwtauu, jiac qaxx genwsenx genwsenx, taukag ingxingw marr kangx lylyx.” Angx poktenked.
Bow tniax liauw kiw air ciyr, binrtaujingg ee jimqongxkax qycjaiww cud gnoxliauxlingg kir lrak.
“Qra guaw draur e qir .did. Ehng’amr rair qapp qniaw tongx denrnauw qongxue.” Angx qongw.
“Liw jarhngx dirr igqingx sew sinkux ee sijun, langg’ guaw dyrr u jniurbang qapp ix kaiqangw .quer .ar.” Bow rinr.
“Linw buxaxqniaw qamxx si decc qongw guaw ee kacng’aurue? Tiauqangx qingw hitt sii decc lensnuar!” Angx sraiw kiarbak, qexir qig jit xee pnaiw binrcniux.
“Langg’ inx siauwlenn :ee qongxqaux qycc jiokk u der tangx kir. Si lanw lexha :ix. M si liw qongw dangsii dyrr tangx dangsii.”
“Niuqniaw qawsi liauw si. Zinhux tniacuir diyrr si.” Angx qongw quaww cniuwzia.
“Kuehaii.” Bow qra angx sutbak. Ang'axbow giyhciyr jit qxur laii jit qxur kir.
Jiac vaw vaw, dow hangrdang. Diamr haixtnuax jiac daur suar dirr hiax langwdaur. Dirr jah’iw dingxbin vnuawtedyw, aurviacbin u duarqongw horsnuar muaziax. Cinghongx ziuluanw, haixingw si tenzenn ee gag'imx. Qalairsu, qoklairsu iacc tenhardai, jitvo, byy qaxx jit hunhyy lauu diamr dirr taukag-lai.
“Lanw menii hiyczuac qycc laii, hyw bor?” Bak sarsi, angx mng bow.
“Liw sngw longxx be sen?”
“U liw sna’ pnua, beh tacc e sen?”
Diamr dirr uanxzenn senkud ee haixsu, dnuax angx jiah bow iu’iux jurjai, knuawuac be sux tnidingw ee senzinn.
Hencex
“Mami, guaw dngw .laii .ar.”
Cecvaux-aw hongwha, tagcecginxaw jid’err zibmngg dyrr decc cue niunew. Dirr jauwkax tniax diyc sniax, juer laurbuw :ee qniaa duiww vingduu qra quexjixvnuaa pangg .cud .laii. Vuad’aw, lenxbu qapp tomato, dagg jiongw longxx u singx jimr iamjuiw .quer jiacqycc iong cingx juiw tua, angg :ee, cnix :ee qapp hunw :ee vaii qaxx itzirvnii, tongtongx kngr kngr juer jit vnuaa.
“Lenxbu u dnix bor?” Mami mng jaboxqniaw qycc naxx tec binrvor hro crid.
“U a. Dagg hxang longxx jiokk dnix, jiokk hyw jiac.”
“U air jiac dyrr qex jiac .quaw. Jiaxee longxx hyw quexjiw.”
Quer u .hiacc .quw .aw, tak qydiongx ee haursnix iarr vangwhe dngw .laii, ciuw nirr moh jit liap naqiuu, qnua lrauu jiab dih.
“Mami, u sniaxmih tangx damrsamw :ee bor?" haursnix mng. "Guaw iaux qaxx duardngg decc qyr siyxdngg.”
“Dyh-dingw u juixqyw. Mami jarhngx vig ee geqokvniaw, huexsidduu lairdew marr iaxx u. Liw singx kir sew ciuw, ngua snxax, kacc be qui’ sinkux pnri diyc cauwqnuarsiyc bi hiacc dang.”
Langtun’aw dngdecc huatsinx, vuehqud. Ciuxbin sew hyw cud .laii, nng xee vnuar ciuw, quexjiw sud qaxx itsoxkongx.
Mami dirr jauwkax cuann mngxdngr. Nng xee hniamue-aw jiauww jiac jiauww jyr, jin’ siyh vunxhun, qokk langg zip kir qaqi ee vangqingx siaw siokdee longxx jurdong aw jurdong.
“Ehngx iurqycc cuann sniaw hyw liau :ee?” Snuawqangx, angx liamx kax uaw laii lamw bow ee hebixiyx.
Ciuw nirr giac jensii :ee juan’ir decc vnir qnidngr, sidsit u diyc cniqniax qycc suar dachniah .jit .xe.“Dniardiyc si juw ginxaw air jiac :ee a.”
“U guaw air jiac :ee bor?” Angx mng.
“Jiac kacc baiw lehh. Guaw cab cab liw hiacc je.”
Ang’axjiaw dirr jauwkax jywquir. Jid’err tniax diyc ginxaw ee kavo-sniax, bow qinxjed qra angx sag .kuix
Nng vnuaa qenrui ee cauxcair dairsingx craw, dairsingx cud. O'mm koxquex jiokk cniwcuir, snglamdnix dair koxiamw, lenqex qapkauw longxx jiokk air jitt bi, jaxkiw dyrr liaurliw hyxser kngr vingsniux vingx. Jit buew cingdim ee suathii liuwbuew cud, an’ denruex lairdew qra cnaiw .cud .laii, vng iarr juw sik kyr dax :ar. Hnuardniaw :ee qiyr jiahvng.
“Mami, jitt dniaw si sniaw?” Haursnix pacbuanxdauw vniar laii jiahvngrtniax, knuar diyc sinx cair mng qinw qinw.
“Hniuqox bacsyr,” mami rinr. “Jitt bi jiokk hyw puer vng. Liw lramm jit kog cir mai, knuar kiwbi sniaw kuanw.”
Cuir-lai mauh iauxx bue lyc auu, haursnix bagjiux niar quann viw jingxtauqongx, qycc kir dyrr jidlo byy tingg cuir, itdit qaur qnir nguaw-drew.
Jaboxqniaw knuar hniaqyx jit xe ciuw hud beh vnuar nguaw .kir, vnuar sniax vnuar, qnuaw kir nguaxduu-aw tec jit der huenguaw drew vng iarr beh qinw cir jit xe aw qiamjniaw.
“Jitt cud liw iarr erhiauw vnir! Qycc jai’ngiaw iong huii-aw krongr. Ering did kuix vngrdiamr :ar.” Angx jin’ air qapp bow qongxhua qunxciyr.
“Qacc hiacc lingxli, jnii hiacc hyw tanr?” bow duiwcuir rinr, qexngiaw qra angx sraiw bagqag. “Dingw zit aw denrsi decc qar langg’ anwjnuaw liaurliw. Guaw jarhngx juanqangx sraiw ciax kir Ingqyx jah jitt kax dngw .laii.”
Jit nguaxtauu vng jiacjiacc aw sud liauw, haursnix qimxmiw vreh kiw srinx uaw kir vngrknax iurqycc drew qaxx jit nguaw juix juix muaw muaw. Juer laurbuw :ee ciuw duer ciuw qra vngrsii jrih .quer drew vnuar nguaw. Jiac dy’ byy nng cuir, jit xee simqaux :ee kar denrue beh laii jiyx knuar hxir, jiac ingg dxngr, lriauu tenx lriauu de.
“Dangsii?”
“Ngiaxhir binaxervox u jit dniuu.”
“Liw nacc jiacc gauu qingw? Binaxjair guanw ser hanr :ee haghau u imgak enxjauwhue. Ix rair dingdaii viauxenw.”
“Acc narr au .zit lehh?”
“Jnia’ byy duxhyw. Guanw dua hanr :ee hro inx haghau pair kir qapp guarqog ginxaw qah sowhak u diyhdingw. Qauwiok qiogdniuw au .zit beh vyjiongw, qongxx sirduarlangg iarr diyhh jairdniuu. U qraur uiwhuann!”
“Nng xee ginxaw longxx jiacc quailai, jiacc jabjaii, hro liw jitt xee juer laurbuw :ee suacc dyww byy ingg.”
“Lanw kacc giabsiongr marquxqnaw, miardew snesingg byy tangx cingkyr.” Mami naxx qongw naxx toxkuir, cuiwqag ee ciywiongg jinx duw jinx.
Dangquex hamx-aw tngx jit langg jit nguaw lyc vxag, qaqi juer ee otngqyx juer dnilo. Angx qapp jit duir haursnix jaboxqniaw dirr langkectniax jiac dniliau naxx pywdau. Bow qra lacsab nguaxvnuaa kngr zip kir sexnguaxqix, jiacc decc jut sexnguaxqyx, kauxbin u langg laii decc qiywmngg. Jit sii aw quer, haursnix laii dirr jauwkax.
“Mami, guarkauw u jit xee obasang beh cue liw.”
Qekir cic hro dinxdang, lunx tauu jid’err knuar. Diangsi’aw si dua caiwci ee qxex-huanxaw.
“Liw ejaiw kar denrue laii juwbunn. Jitt nng jiah oqutqex duxjiacc taii :ee.” Obasang duiww laii decc anwlai ee luxjuxlangg qongw.
“Linw kaciuw jiacc mexcer. Guaw pxuex qongxx siongrr qinw marr diyhh miac'aurzit kir :ar.”
Mami qra qxex liac zip .kir, sunrsuar kir tec puevaux-aw beh lap jnii.
“Duxjiah laii kuix mngg hitt xee baibak jiokk hunbingg ee siauwlenqex si si’angw?” Jnii dre hyxser, obasang tamwmng.
“Guanw haursnix a.”
“Sniaw? Hitt xee linw haursnix! Acc liw m dyrr jap gua huer aw dyrr qewangx :ar?”
“Guaw jnriu sxiab :ar neh.”
“Dnaxx si jinx :ee iacc qew :ee? Liw si jiac sniaw vutlyxdanx decc driauu? M dyrr qinw vyr hro a’vyy :a pnirpangx .jit .xe.”
“Sewqanx iarr tacc u hitt hy mngc? Liw decc qikgorkangx, tiauqangx beh qra guaw congwdi.”Cuwlairlangg qongw, ciyr qaxx jiokk cunhongx.
Tnidingw cud guec. Uadzuxx amr, laii beh dauwlaurzet ee cnidauw zuxx je. Qajenxjuer bongx ingg, Mami zip laii kunwvangg. Byy vanrpuex, jit cngr jiokk kaxkuanw ee jinjux puahlen dirr mngvinn-vnix decc danxjih.
“Qinaxzit si lanw ee qethunx qiwliamrzit.” Angx qongw diyc jxingg cimx ir dang.
“Jin’ hai, guaw longxx be qir did liauw liauw!” Bow qongw diyc iuxkuir.
“Byy qangai. Guaw e qir .did dyrr hyw.” Angx duiww bow jiokk dacliap.
“Jitt qnrua m quir qaxx?” Bow mng.
“Jnii brew e diyc .ee longxx iuxhan. Liw jiacc si buqewvyw.”
Angx qniaa kir bow ee qajiah-au qra ix qruar puahlen. Bow jidsii auu dni, bagjiux kiw jux, qamxdong ee bagsaiw damm bagqnii.