S.-Sikig-K.
Jap-id diamw quer go hunx.
Buerjingrr daur, zidtauu iam hnachnah, dua cuir kuix kuix beh qa langg. Lingxkir decc pangw konglong ~, m jaix si duxjiacc kuix iacc si dongwsor byy qraur, qui’ qingx diamwtauu siyx hongrhong, siklairgua cax m jniaa dxo.
Diamwtaulangg decc dnaxjingw huewbut qinw bangg bangg. Duarsikhuer vaii dirr uaw mngcuir ee qexaw-dingw, kacc dexsiaux :ee kiyckngr kir aurqag. Langxbinrhuer knuawhongw :ee kngr dirr qenwvunxduu, u langg beh dic jiacc kir kngwqingx qycc lingrgua cue.
Dxiamr lairdew jitt jun qauquanlangg dna’ Gnaxbunn jit xee. Jitt xui knuar knuar lehh, hitt qnia bongx bongx lehh. Si’axpuahqinx dua siogbe. Jit xee ix juankyx ee ju'iuw jiokk quw byy laikir, henrvo dirr jit qingx vngrdiamr jyr huwliw. Hitt qingx vngrdiamr ee ervodee jamxzenn aw urmiaa. Puahqinx qingw nng diauu aw kacc gnaxkir :ee, cue jit qangx kacc ingg cinciuw sangr hro :ix. Qngpuex jap-zi dniux beh bre vah-go, Daiuann ee uahqingw, an’ Qelangg qaur Vindongx, suijai langg digsuanw. Uerqax ee miaa m bad tniax .quer, jongw .si, vitlo vutjiw aw u guarkir. Bogsuniuu dirr gersut hagngi qawceh, jiaxee hongqingxdoo, ix vacbin e qac’ir.
U simxmih langg byy air siux diyc lexbut? Zinjingg-sewsu vruee hro qauwqag, jap-veh qangxkax tangx s.-sunrli-l. qniaa taur taur.
Dongqisii, vachuer-qongsix brew :ee jit diauu amrduar qra ix ham' Viktor sag jywduix, diyh jywhuew. Hitt diauu nektai dikginn dring snax-cingx-sir, liahjed liauw jetauu, sinwiongrkah jiacc lur nng-cingx. Jit dnxua luanjingg nng-cingx kox kansingg, junw byy tauwlauu iarr diyh’air taux ciyr.
Jap-id diamw beh vnuar.
Jurdongrmngg kuix .kuix, iurqycc laii jit xee siyxjiaw. Siyxjiaxlangg taujangx dngg liuwsiur, liuxdiauhuex ee misequnn erkavoo u suirciux, qruar jit duir ginsig hnirdui dua dua xee, nng vingg ciuxqud ee ciuxsyh jit kuann quer jit kuann, jngtna u sxingg jit xee Gipsi ee kuanw.
Cur nirr ee “langkeh” pacsngr qauwui :ar. Dan’ lxamm qo’ luw jitmaw e dirr dyc’ui qongw dairjir? Dirr jingg tnxiax? Dirr au tnxiax? Dirr jauwkax? Iacc si dirr…
“Binaxjaikiw liw quiw diamw beh cud mngg? Uaw daur guaw u langkeh beh laii.” Jovox :ee qongw.
“Si’angw beh laii? Rair guaw qra linw cuann diongdauwdngr bor?” Jabow :ee mng.
“Mina duxx an’ Bixqog dngw .laii, iog guaw beh qongw dairjir. Diongdaur guanw qaqi e huadlyc.”
Kiamr go hunx jap-zi diamw.
Diamwbin ee lingxkir byy lingw, diamr dirr lairdew naxx cincniu decc er daurcair. Cud laii guarkauw qingwqycc kiab. Zit dng' qenx, tong' siwqer siyx hongx, lo qycc e cringr enx, dingw jenx xe vig.
Jiokk jnia’ quw byy kir cantniax jiahvng. Cuahqag zi lxauu jit qingx Itali cantniax juanbunn decc juw spagetti. Qinaxzit, Gnaxbunn beh hyw hyw aw uiwlyy qaqi.
Lingxkir u lingw qycc byy sniax, soxjai kacc ec, mrqycc jin’ cingkiwsniur. Hogburuann, siauwlenn :ee qapp vnuawlyxlau :ee jidvnuar ~, kaciuw longxx jiokk saliac. Langkeh vutjiw aw je, iauxx byy langg jre ee ixdyh byy quiw der. Gnaxbunn diamw jit vnuaa hamx-aw tongsimmi, kacc benw jap-go hunjingx dyrr juw hyw sangr laii hro :ix.
“Hyw jiac bor?”
Javox :ee nng luiw siauxqauxaxbak liuliuciuciux, snia'imx saux saux decc mng jre dirr ix qinrvnix ee luxsu. Jabow :ee jiac qaxx qui’ cuir byy jaidiau rinr, qanda’ qor dimr tauu. Jiac vaw, jabow :ee crunx ciuw beh sax quexjiw laii jiac. Javox :ee hionghiongg vreh kiw srinx uaw kir qra jabow :ee py .kiw .laii, snax vo jyr nng huac vniar duiww vangqingx .kir. Jabow :ee naxx decc ho’ngg vniwlang, cuir iuu lewler byy crid, jniar ciuw jit liap juixlaii dnec diauu lehh m qramx vangr.
Quer daur beh uaw jit diamw.
Jiac vng vaw, beh limx qavix iacc dee suijai langkeh. Ogamrsig ee imxliau, byy camx tngg, byy camx gunix, kyr pangtauu decc inxkeh, qongw hyw limx marr byngiaw, kow kow ee jubi liyc liyc aw u hac Gnaxbunn ee simqingw.
“Tniax qongxx Viktor qycc qaux diyc jit xee.”
“Jex siausid qamxx u jniasit? Gnaxbunn qamxx jaix?”
“Dnaxx ix hitt xee langg dyrr siongrr binxqamw :ee, iarr u hitt hy m jaix?”
“Mrqycc, ix henrhen iauxx druar dirr inx daux byy vnuax .cud .kir ne.”
“Byy druar dirr hiax, liw beh qiyr ix juanxqux kir dyhh? Ix iauxx cimkiamr langg qui’ vah bxan dilehh. Qra Viktor ec jit sniax, guaw knuar ix qnaxx dy' m qnaw.”
Diamw vnuar junw junw.
Erdauwdngr hogbu qaur jiax, beh qycc jre diyh’air qiyr diamxsimx damrsamw. Gnaxbunn knuar siviyr, simqnuadew decc liac siqanx. Qavix siongrr buew aw cuir limx hro dax, beh qetsiaur diyhh kir siauwquirdyh.
Unn unn aw tong, cib cib aw qniaa. Zidtauu dirr Gnaxbunn taukag-dingw, taujingg ee lo qycc byy ding’axkax tangx ziax zit. Kax sngx ciuw nngw, muaw srinx dang qnua. Laii qaur hang-aw-kauw :ar, ix kacc anwjnuaw dy’ m qnaw uad .zip .kir. Jingww jiauw longxx beh laii tyw xmngg, diamwbin iauxx bue quewvnuaa, sinwjiyh qycc jit dxangx jiacc taur, jit jriw siauwdnuax guehdew rair lap, siyxmue-aw au qywguec guehcuex beh qewangx...
Ervox nng diamw quer.
Qaur jiax jinrvong :ar, ix byy beh qycc dirr guarkauw longrlenliuw. Mehtiaur jiokk qinw, Gnaxsunn qra syxsii kinx aw cah zip kir syxsikangx, bagjiux vangr kreh.
“Siongrder, Quan'imx Posad, Maxjow, cniaw vyxvir cur lairdew jitt jun byy langg.”
Bagjiux vreh kuix, ix hyw dnaw jun mnglinx.
Jingcniw
“Hyw bue?” sir kax vuic dit dit, jaboxlangg bin hiongr tenhuavanw. “Narr hyw :ar dyrr cud .kir. Guaw air kunr qaxx.”
Sinkux picpak'ngar iauxx decc cuanw, tniax diyc kanciuw ee ue, bersux kir hro jiamx cak .diyc, Sai Sangr sui’ huandngw srinx dyw tanxciywtnix.
Deh dirr sinkux-dingw ee dangrliong byy .kir, kanciuw jiax bongx hiax bongx sax diyc lairkor, dnuardnua vreh kiw srinx, kacngx tehpuu, jit xe ciuw, kowtauu giuw qaur dorjaii. Sinkux banw tanxkix, niu’axsipue giab dirr qyc'erkax, quer kacc byy jit hunjingx, kanciuw cuir-aw kuix kuix decc kiw hnoo.
Vangqingx ee veh-kax-bincngg, a’maw kunr u diyc, a’buw kunr u diyc. Sai Sangr siyh vyw siyh jxingg, id~zi-jap dxangx, m qramx qra danwqak.
Kunwbinn quer, bagjiux qimx kokkog, jit sxix aw aiwkunwsinn dy’ byy. Sai Sangr pue henx .kuix lyc bincngg, qniaa kir qaur lordaii diamw jit qix hrunx. Nikotin si tangx bavir sinqingx iacc si hro qaqi qyckacc cingcniw, jitt diap, ix byy anwsngr beh sniu jinx. Guarkauw hongx taur. Hun’enx li cuir, hongx sui’ qra sag qaur hng ~ ~ .kir.
“Guanw laurbuw ciangjai qiyr guaw singwde rair qaiw. Ix qongw guaw jit diauu drngg-aw taur buexkauw kacc e diksid langg.” Qongxue :ee jiacc zi-jap tongw, siauwluw cingcunx, cuiwpuew anggee, bagjiux qngx sicsih.
“Langg qapp langg dauwdin, ue qongw jinrjingg jiokk iauwqinw. Narr beh qanx qanx qxuiw qxuiw, sui’ e snix jit quaw s.-sirhuix-h.” Qongxue :ee bue muaw snax-jap, cingrcah vicjah, qruar jit qix qinrsirqniar, bagqniawzinn jiokk qau.
“Guanw buw:a qycc u qongw, qongxx jaboxginxaw diyhh jinrliongg yc kacc iuwsiur. Qex jit quaw sainaikuir, javolangg e qex kacc qac’ir.” Siauwluw qongw.
“Vadd langg qac’ir sniaw, guaw m jaix," javolangg qongw. "Guaw jiokk byy air jaboxlangg tiauqangx beh qig qaxx kenn memex, giuw giuw jun jun longxx be duarvan.”
Sai Sangr qra hrunx cuh hro ix huax, cuir nirr sui’ qycc qa jit qix, laitar ked lehh ked lehh, beh diamw iacc m iauxx bue quatding.
Lordaii ee hueknax dagg jangg dy’ cnex qniwqnir, hiyc-aw huad qapp jejingw qycc u hxingg. Beh siongrvanx jinwjingg, ag juiw, ingr vuii, jenw hiyc, dagg qangx jaxkiw, kanciuw dy’ sunrtauu-lixlo.
"Duxjiah dag’ee decc vair, ix nacc qaqi jit xee langg dirr tniatauu cngw quejiw, knuar denrsi?” Hniaqyx mng.
“Ix jiahqaur :ee, liw be qir .did?” Hniasyw dab.
“Qnialew marr hyw a. Qinaxzit vaa :a jywqi. Lanw iarr byy beh qiyr ix giac hniux vair sinbingg iacc joxsenx.”
“Guaw marr si anxnix qra qongw. Langg’ ix qongw m dyrr si m, qycc qra lanw qawsi, qongw lanw kiywsinn dang, vair toang’aw besinr. Ciywkuex qaxx u cunx! Qongmaw qamxx m si linw hniadi-aw pah qongqex? Joxqongx ee ciuxdew ix dyrr mimii beh.”
“Hyw :ar lar, mair qycc qongw :ar! Inx ang’axbow dingw zit aw ruanx duxjiacc suah. Jiaxee ue hro lauxser :ee tniax .diyc, e qycc hai inx pacqiauc pnaiw qamxjingg.”
Jit jiah bangw dirr hnirkangx-vnix hngx hngx qiyr, Sai Sangr qinw iong ciuw vnua. Amr sysyx, beh pah beh kux iarr knuar byy. Ix zip laii cur-lai, suawciuw qra bangxaxmngg qnuaix uaw .laii.
Dycqui-dingw jit dniux puesinr, iupiyr byy dah, iauxx bue hrongx puex; jursow u siaw, si beh qiar hro qer kir Sueden ee siyxii.
Hro guaw camr qaxx junw junw. Vnuax cud kir beh vnuar dxangx, Zirqauxmee jingg jit amr, qnrua jit kax hingliw, ix dngw .laii .ar.
Guaw juw jit nguaw haixsanxmuee junw diamxsimdngr. Kacc benw snax hunjingx, nguaxqongx cincniu hro qxauw ji .quer qangrkuanw, ix jiac qaxx cingkir damdamx.
An’ snasniux tec jit sxux kunwsnax .cud .laii kngr druar bincngg-dingw, guaw zip kir huloqingx laur siyx juiw, cud .laii ee sii, knuar diyc ix qra kunwsnax pongw dirr ciuw nirr uaw dirr pni-aw decc pnri. Guanw daux ee sapbunhunw jiokk pangx, Bixqog ee vaiwjuw, huanrser linw Aujiux marr brew u.
Tranr ix kir sew sinkux, guaw qra cupue ngua jit niaw cingkir :ee, dyw lyc kir bincngg, iurqycc pnri diyc sapbunhunw ee pangbi.
Liw anwsngr dangsii beh dngw .laii? Lanw nng xee siysux guaw ngiaa ee jnii, si byy beh hro liw kiamr sniu’ quw oox. Haax! Haax! Haax!
Puejuaw auw hro hyw longx zip kir puekag kngr dngw kir dycqui-dingw, Sai Sangr qniaa zip kir vangqingx-lai. Bincngg-dingw ee langg dua kunr siyw siw, jit qix vuivec ee katuiw jauw cud laii mipue guarkauw. Sai Sangr simsinn zuu cangxcangw, simqnuax qunxliongr longxx be dniardiyc.
Sajiko
Qowsu posed sniu' jok, s.-siwsnuar-s., byy qraur siapdiap. Knuar tauu jaix buew, dogdok qetqiok hongdongg hamr quarqua. Giuw-giuw-lrak-lrak, tii-tii-kaur-kaur, u Ciongg’iauu ee kuiwkauw, qex jit quaw hongdinn-bi, gnaxkir cax liplib aw. Siongrr quann dringw go liap cnxix. Jitt pnix siyxsuad, auxbann aw, guaw hro ix snax liap.
Qarqinx qra knuar hro liauw, niauxcuw-aw suaw dinxdang, zirjnaiw kok kok cic nng xe, binrtaujingg ee denrnauw ngua jit xee uerbin.
Bunjniux jiapcah, vitlo qycc u quanwcuanr. Ing zri jy qxur, nixbok cenxhen, be huehed, be hihamr. Vehsinlangg go~lak xee, kixjy jit dnxua u.-unkunn-k. ee aiwjingg-qxow. Jokjiaw qanghux u jadvag. Buexqiok ee anvaii u qingsimx, jinjniar suxx langg' iwsiongw vutqip, qiksngr m cud. Limw limw aw beh jap-bxan zri ee siyxsuad, dnuadnuax u jit xee vairvid: qui’ pnix cniaqig h.-hnuaiqec-q. byy vnivang, byy qaur suixkuir, byy qraur…
Kok kok nng sniax, denrnauw ee uerbin sui’ qycc ngua jit iac.
Iuwdiamw ee ciuxlo, jingcaiw ee qxow. Jiokk jnia’ quw byy jitt kuanw ee qamxdong!
Snajiah'ngar ee uerqur, denxhen cud cnijinx ee sewsu zinjingg. Jit vid jit zri sinrdiong aw diaudog, qaksig uac lingwlingr. Hiwdaii-dingw u hitt hy langg, hiwdaii-kax marr u hitt hy langg. Liw guaw sinkuvnix ee hiwcud, dirr jitt pnix siyxsuad lairdew knuar e diyc.
Kensimx ciamquw, binaxjair ee jit liap cnxix, bundnuaa ee qiawbang. Dag’ee diyhh qinw kir knuar. Byy knuar si jin’ bycaiw.
Taubuew jit kunr ciuw knuar liauw, Sajiko bagkox qamm bagsaiw, simqnuatauu amr jubuix.
“Jiaxee faks duxjiacc zip .laii .ee. Jarhngx ervox ee invois u m driyc rair qaiw.” Qongsix ee siyxhuew qongw.
“Liw kngr lehh. Guaw kacc danw e knuar.” Sajiko rinr.
“Sinx ee nngxtew, liw nacc byy air ing knuar mai aw?" siyxhuew mng. "Hitt tyr nngxtew vutjiw aw kuaiwven. Quotasion, invois qapp hro qangdniuu ee order, liw qaiw jit xee, cunx :ee nng xee, denrnauw e qaqi ter liw qaiw qaxx hyxser ~, benw qniax e lauwqaux .kir.”
“Guaw dyrr qamxqag be quanwing, huiwkir qaxx.” Sajiko dab.
“Taukixsingx iauxx bue quanwsir snesingg e kacc ban. Qex ing .nng .vaiw danw sigciuw .laii, singw sii, singw loxlat, qycc be dingdnaa.”
“Jiacqycc qongw lar. Tauqex narr u cud bingrling, hitt sii guaw jiacc laii yc.”
Qelangg Lo id dnxua, jap cuttauu pnee ee cuwkia dyrr tangx kuix qongsix junw vanrqongtniax. Denrue, faks qapp inwviyxqix, snax jiongw henrdai ee sanxbut qingw jitt diap dangjee laii decc caxvanx. Siyxhuew siaurmew kir sinwqiok qiar puex, jinw qongsix dna’ Sajiko jit xee. Liammix kac juaw, liammix byy juaw; id snuar denrue kecho decc danw vywqer, zi snuar si qangdniuu beh kakzin sipment ee zidjiw, Ngiumuii dngdoo :ee.
“Jiokk byy ingg hnoh?” Sajiko denrue qongw suah, uat dngw srinx, knuar diyc tauqex ee dongcongx qiamx huewkeh Lin Sangr qui' sinkux jin' cuangwdiamw kia dirr ix kajiac’au decc qra mng.
“Sidjai jin’ pnaixser. Guanw tauqex iauxx dirr lo nirr, ingwqaix sui’ qauwui :ar. Sampulu ix e jah .laii. Cniaw liw siyw danw .ix .jit .xe.” Sajiko qongw, aptauu qra langkeh hue sitlew.
Lin Sangr et ciuw qongw byy iauwqinw, qniaa lexlor, tec jit quanr COCO CHANEL ee pangjuiw hro Sajiko, jit kax BERBERRY ee puevaux-aw beh hro Sajiko decc tak dairhak ee jaboxqniaw, qongxx si an’ Auropa jah .dngw .laii ee ciuxsinr.
“Anxnix nacc tangx? Dagg vaiw dy’ hro liw puawhuir.”
Sajiko cniaw langkeh iw nirr jre, kar denrue qiyr laukax ee qaviquanw sangr nng vxuex kapucino kiw .laii. Ciuxtauu ee sxid jiamrcniaw vangr lehh, Sajiko kiw langg kiw kxeh, dirr Lin Sangr dywciuxvingg ee din’iw jre .lyc .laii. Nng langg kaiqangw, ciyr tauu ciyr bin, katauunguaw samvutzirsii qycc e siy’ kap.
“Ix qinaxzit kacc cunhongx oox! Taujangx niw qaxx ox nawnar, dingw-dunn-ciux qycc sriux qaxx hiacc jejingw.”
Tauqex qauwui, qra langkeh cniaw zip kir ix ee vangrqongsig. Siyxhuew duer tauqex ee kacngx-au zip .laii, knuar diyc u langkeh laii, dyrr qapp Sajiko qongw jit quaw ue’axuersueh.
“Si or? Guaw qycc byy juwir .diyc.” Sajiko cringr qringx.
“Inx ang’axbow jitmaw qamxx iauxx druar dauwdin?" Siyxhuew siaurmew mng.
"Guaw m jaix." Sajiko iyy tauu.
"Gunw mamax qongw javolangg kacc byy dongr. Ix unxdangr e dirr guarkauw qycc qaux.”
“Langg daux ee dairjir, lanw mair qa’ngg cab hiacc je.” Sajiko sniax jiokk qed. Siaurmew cuir bih bih, byy ir aw byy ir.
Jaboxqniaw jitt nng qangx qapp siartuann kir lorngiaa. Amwvng, Sajiko qanda’ cuann nng xee langg ee gxiac dyrr u :ar. Angsair dirr qoksuewqiok jiac qongqax ee taulo, junxsii siongrharvanx. Sajiko cid diamw vnuar dngw qaur cur, angsair dirr kectniax decc knuar denrsi, qui’ sinkux trngr qaxx cunx jit niaw lairkor.
Kngr dirr vingsniux ee caiwbuew qra tec kir mikro. Angsiybah caiwci-aw brew ven :ee. Todauriuu zet qunxqunw, suanwvan kenwpangx craw tngsi’axcair. Pnri diyc pangbi, jre dirr kectniax :ee benw langg qiyr, qaqi uaw laii jiahvngrtniax.
Juw qaxx qui’ srinx qnuarsniuu, Sajiko singx kir sew bin sew sinkux. Taukag vaux jit diauu binrqinx an’ sexsinkuqingx cud .laii, knuar diyc angsair jiac vaw qycc kir kectniax ham' denrsi siyduiwsiongr.
Drew vnuar nguaw vng qra cair jongw kingg kingg lehh, dua vnuaa siyw dic sew hyw, dyh-dingw crid cingkir, Sajiko tamx tauu qra kectniax ee langg ngiaw .jit .xe, qniaa zip kir vangqingx, mngg sunrsuar qnuaix .kiw .laii.
Sejngdaii-dingw ee notbuk, Sajiko tauu jit daii sriok dirr qaqi ee denrnauw, qurnii ee buxcinjed hitt zit laii qaur inx daux. Qui’ lexvair, Sajiko ee ciuw iauxx byy bongx diyc angsair ee sinkux; dagg amr cavutdyx jitt sii, jap qix jingxtauu-aw qapp denrnauw zi~snax-jap xee kxiw be-liauw-be-li. Ham' vyleqniar-lai ee langg snaduiwtauu, Sajiko simqnuax jit sii kiw pylong, ciuxqud gniauc gniauc drang.
“Jaboxlangg ee sinkux-dingw longxx u dah qewsiaur dilehh. Beh air zuarr je, jyww liw qongw, guaw be qra liw cud.”
“Duirlyc enhuadniuu si qovutjiongx. Guaw miaa qiyr Tyhuex, guaw ee simsingr si juixlenn.”
“Cab liw qiyr simxmih huex, ing’amr guaw longxx beh banw.”
“Liw iong qiongg :ee, guaw pacsngr byy huatdo :liw. Jongw .si, liw did e diyc guaw ee srinx, liw ingxuanw be did diyc guaw ee simx.”
“Liw iurqycc decc siaw sniaw?” Angsair hionghiongg dirr qniar-lai cuthen.
“Byy lar.” Sajiko qra dongxanr qnuaix .kiw .laii.
“Siaw siaw hiaxee u:ee byy:ee, qamxx u langg decc knuar?”
“Iarr u jit xee byy? Qycc u langg knuar liauw dirr bangrlo dingxquann huatviauw qamxsiongw lehh!”
“Dua jokqax, ing’amr qaur jiax mair qycc siaw. Nguar ar, hyw laii kunr ar.”
Ue qongw uann, angsair kir qra vangqingx ee denrhuew qimr hro jiauu ser pax aw, kxangr kiw kir bincngw-dingw, bak jit nih quw, qaxnaxx dyrr lyc binn :ar.
Qra denrnauw qimr srid, Sajiko qniaa duiww bincngg .kir, taukag jiacc kap diyc vowjimw, vnix:a ee langg vingw jit xe srinx, sinkux dyrr hiongr ix cic uaw .laii.
Angsair jit xee hxenr jiokk dang, Sajiko qamxqag iar qaxx, simqnuax jiokk akjag, kacc sux ix dy’ byy hitt hy kiwpig qra angsair sag .kuix, lenrr jit sniax “m”, ix dy’ qongw be cud cuir.
Bagjiux hahgiyy, Sajiko taukag-lai jauw jit xee javolangg ee hing’ngiaw .cud .laii. Vutdix-vutqag siangx ciuw crunx .cud .kir beh lamw, deh dirr dingxquann :ee jitt sii qyckacc cud lat.
Binn binn aw, u javolangg canx canx qiyr ee sniax dirr Sajiko hnirkangx-vnix. Hionghiongg, javolangg aix jit sniax dua dua sniax qaiww singg jin’ tongwkow. Sajiko bagjiux vreh qimx, knuar diyc sinkux-dingw ee langg, simqnuax diyc jit qniax, cud lat qra sag duiww vnix:a .kir.
“Si anwjnuaw? Liw nacc e…” Angsair sax byy taujangr, bagtauu qad qad.
Sajiko tanxkisinx bin hiongr viah, cuiwkixqinx qa ann ann, qiongg lunw lehh byy beh kaur cud sniax.
# qiwhy, b qiwhy
Taucaiw! Taucaiw!
Qamxsia Niuu Suirjinx Laursux koxsimx jaivuee. Hnuahiw lanw haghau habcniuwtuann did diyc juanqog qydiongsingx habcniur-vixsair quanqunx.
Juann hrau sensnix qapp hagsingx qiongrdongg hatcaiw hyrhixsu
Haurhngg jing jiaucjiauh. Hagsingginxaw jauw liauw, vew mngg ee qang’iuw qra duarmngg qnuaix .kiw .laii. Beh cutzip, jinw diyh’air an’ penmngg.
Dirr cuandngg ee vowqywbunn taujingg kia u jit kunr, hitt binrdingw ee duarzi, qar imgak ee jabow sensnix tak qycjaiww tak, knuar qycjaiww knuar. Qui’ vnuar nii ee lylik, siudangx jin jitt sii. Hyw qrer pnaiw qrer vutciangjai, ix ee quexjiw jiokk cingdnix.
“Jitt vaiw hro liw jiokk sinkow. Qonglyy tecteh rair sngr dair liw.” Byy-dniu.-byy-dii, qauwburdniuw kinx sniax qniaa laii dirr imgak-laursux aurviah.
“By’ngiaw, by’ngiaw. Si ginxaw inx ee qindew jai, jiokk hyw cua, cinwcaiw sensnix laii dy’ jin’ hyw qar.” Imgak-laursux simqnuax pigpok cnaiw, taukag qaux qaux, snia’imx siyxkuaw e junr.
“Niuu Laursux sidjai jiokk qowkiamx. Jitt tuann habcniuwtuann vunxdew si jiokk snuawhingg. Liw qurnii laii, inx qui’ee venr jit xee kuanw, m na u jaidiau jnriu dai'axdingw kir vixsair, qycc suacc ter haghau ngiaa jit bin diksingwqii dngw .laii.” Qauwburdniuw qongw, hyw ciywsinn.
“Jitt vaiw cud .kir e tangx diyhdingw, lanw qingw :ee hitt der Daiuann qua’iauu dikkag iarr si dingxinx. Lun jinx qongw, jitt jann liw marr u hxun oox!” Niuu Laursux qongw tenked, cuxdiongx ee in’iuu bangbu. Qauwburdniuw tniax liauw kiw air ciyr. Byy qongw cud ee ue, sianglangg simqnuadew longxx u qamxhuar.
Amvojee ee qiyr-sniax iauxx dirr kampus hiangxliang, sinx pingwcniaw ee sensnix hingr ciccih, dagg qangx dirr imgak-yhvangg denw kaciuw, guehkimm, qngwkimm, ix longxx e diangx. Hagsingginxaw ee quasniax beh dua sniax iacc ser sniax, diyhh jimjiog sensnix ee hyrling. Lenrr amvojee qaxnaxx iarr sriu ix jixhuix, jai’ngiaw dangsii diyhh cud sniax iacc dnia .kir.
“Duxjiah linw decc cniur :ee hitt diauu qamxx si Itali ee bin’iauu?” Qauwburdniuw dirr haurhngg qnia'unn, qauwsig sui’ qingx aw kir sunsi, qingquer imgagsig, kavo jurr anxnix dongwdiam, tingwhau harkyr, sui’ kir mng qawyc sensnix.
“Hner a! Qauwburdniuw liw iarr air tniax Itali ee bin’iauu?” Imgag-laursux mng.
“Huanrnarr bin’iauu guaw longxx air tniax, bylun dycc jit qog :ee. Lanw Daiuann jaxnii ee jit quaw qua’iauu guaw marr jiokk qac’ir. Dandanx Susiangqix, guaw tangx tniax qui’ amr longxx be sen.”
“Susiangqix!" imgak-laursux huah cud sniax. "E qir did jyr ginxaw ee sii, zuac .langg bec’amr aw, guanw a’qongx dyrr e dirr dniadauw, jidbin ex henn-aw, cuir naxx decc hnaix ‘srux ar siangx ar qix’.”
“Jitt jun ee ginxaw longxx berhiauw cniur :ar. Uree qycc lenrr tniax dy’ m bad tniax .quer.”
Harkyr jap hunjingx, jitt vaiw damsimx qongxdnar dirr vnuar dxangx jingg, vnuar dxangx au kuix huex qed jiw.
Vew mngg ee qang’iuw jit qnrua syxsii dirr ciuw nirr lang qaxx kinkongx qiyr. Sianglangg qangg sijun uat tauu qra knuar.
“Guaw sangr liw laii dngw, hyw bor?” Qauwburdniuw mng.
“Qaxnaxx linw taiwtair qinaxzit dngw .laii, qamxx m si? Liw qamxx mrbenw kir huelingqidniuu qra jriab?” M si decc qra mng, qongw jitt qxur si pacvnilow decc qra diamxduh. Byy tingwhau dap’anr, qaidongx jre qongciax :ee qo' jit xee knuax knuax aw qniaa ngr ciavaii-aw kir.
Amwtauu aw veh diamw, Tyhngg Qokjer Qidniuu iauxx nau caicaix, huarhua qunw. Beh kir Niu Iork ee huelingqix junxdiamw. An’ Tokio vuex .laii .ee e ban vnuar diamxjingx quw qaur. Singapor Hangkongx Qongsix quirdaii ee denrnauw qowjiongx, luxkeh rair suaw kir Malaisia ciekin. Hiongqangw jiangwsii jyr hongtaix, beh vuex kir hiax ee vanqix, Huahangg qapp Qoktair longxx kanselu.
“Kacc sewzi lehh! Lairdew u jit jiah koala, porcelin :ee.” Qeau qongw, qinxdniux ninix.
Ybut jrih quer ciuw, angsair qniaa jyr jingg, jyr bow :ee duer dirr ix aurbin. Kir qaur tingciadniuu, dua kax hingliw kngr zip kir aurciadauw. Qysog-qonglo jitt sii jin' duartongx, dngw qaur Daivag Sniaa-lai narr byy jikciax, sir-jap hunjingx dyrr e qaur cur.
“Liw qimhii-aw u dagg qangx cri .byy?” Bow mng, jre dirr qawsuxjy vnix:a.
“U.” Angx ciuw hnua handolu, snia’imx naxx cincniu an’ pnirkangx cud .laii.
“Huex u ag .byy?” Bow qycc mng.
“U lar.” Angx rinr, iuguann jiokk danqanw.
Venrtyr dai qongw suah, ciax-lai dngrr sinn vuex, dngrr bangw hauw. Cuir byy dairjir jyr, taukag beh uahdang.
Iokliok zi-jap dxangx jingg, qar sowhak ee javox laursux qac’ir diyc jit xui duxx an’ Suhuan cutgiap, qar Ingqokbunn ee jabow laursux. M si angx sxingx bow dnuar laii qongw, nng vingg mngho siongdongx u hahtautuii, dniardiyc did diyc jingwlangg ee qionghiw qapp janwsingg.
Qethunx liauw derr snax nii ginxaw cutsir, qaur ix jap-zi huer qokhau-aw cutgiap, ang’axbow dyrr qra vyxvuer aw qniaw sangr kir Ywjiux inx a’qu hiax. Cur-lai uiid ee luxsingr, snax qywguec kir dirr Australia jyr mamax, visa qauwqii jinwjingg, jiacc vuex dngw laii Daiuann jyr langg' ee kanciuw.
Quixnarr qywguec byy jywhuew ar. Qeau dingw jua beh cutqog jinwjingg, ang’axbow dakkee, nng qywguec dah dah byy qniavangg. Quewkir snax nii, dyrr dna’ u jit vaiw diongdaur sii aw dngw qaur Daiuann. Narr jre amwsii cid~veh diamw landing jitt vrangx, qaur cur liauw dyrr jywair sngr si rutin.
Ciax sraiw qauwui, jyr angx :ee qra hingliw jit qnia aw jit qnia vnuax .zip .laii, jyr bow :ee tranr jitt sii singx kir sew sinkux. Angx qra mngg qnuaix qnuaix cnuar cnuar lehh zip kir qaur vangqingx, kanciuw sinkux sew qaxx pangx qongwqongr .cud .laii dngdecc buah losion.
“Ngaax!”
Angjiaw nng langg siy’ deh, siy’ liamm, kanciuw ser aw sniax huah jit sniax. Dycqui-dingw ee luanrjingx-aw dak dak dak dak, jap biyxjingx quer .kir, zi-jap biyxjingx quer .kir, derr snax-jap biyw, sir-jap… Biyxjiamx duxjiacc an’ XII qycjaiww kixqniaa, deh dirr dingxquann :ee byy beh qycc tuasuax, qaix jnua :ee jnua, vaklai u jit vorhun kangx .kir, lenrr simqnuax marr si.
Susu qapp Lulu
Ciuxqix-aw dirr qniawdaii-dingw, ciuw crunx .cud .kir dyrr tec e diyc, lenrr vreh kiw srinx dy’ benw. Si qongxx, qamxx tangx? Dew dew nng~snax qxur ue dingg liauw dingg, tniax byy jap vaiw, veh vaiw dingrquix si u.
“Susu, liw ee jokpinw qinaxzit qauwui :ar. Jniawjniar u liw dogqax ee kiwbi dyrr driyc. Guaw knuar e diyc, marr pnri e diyc. Ciau.”
14:58, hitt diap, qaqi si dirr dyhh lehh? Tacc e jit tongx denrue jiacc quandiong suacc lauwqaux .kir byy jriab .diyc!
Dngdecc auwnauw, vut’ir, ciuxqix-aw ee sniax dann. Simqnuax vorvinn ciak .jit .xe, iarr byy knuar si’angw kar :ee, kxiw cic .lyc, sui’ qra ciuxqix-aw dah dirr hnirangr-aw.
“Hello, decc congr sniaw? Beh cud laii bor? Guaw dirr ‘lanw ee soxjai.’”
Sniasaur si luxsingr :ee, qycc si Susu jiokk sigsai :ee. U quaw sitbong, jit hongbin, simqnuatauu qycc u quaw qitai. Quanhe hitt xee javolangg ee dairjir, jixmueaxpnua Lulu uanaxx jai’ngiaw jit tangsu.
Sinhai Qyqer dingxquann, ciasog uree vniar qaur cid~veh-jap. Dirr ci-lai ee cialo dyrr berdangr sraiw hiacc hiongg, bylun an’ Bagsax laii :ee iacc si an’ ciatauu hitt vingg laii :ee, Roosevelt id dnxua qaur lak dnxua, sisog go-jap qongliw si qigkamw.
An’ Sinsingx Lamm Lo cid lxauu ee txangx-aw knuar .lyc .kir, iajixciu jit vaii quer jitt vaii, quann bongxx quann, qapp siwkouii-aw ee lau’axcur sidjai be viw .did. Tangx vixlun jyr suaboo-diongx ee oasis, ser bongxx ser, tnide iuguann jiamr jit pxenr.
“Id~zi-jap dxangx dirr bungerqair decc ing'uii, jerje jaboxlangg dirr guaw sniwmia-diongx laii laii kir kir. Mair mng guaw kixinx si sniaw. Dirr qodnuax ee cimx xia, guaw ciangjai e sniu kiw diyc liw. Huailiam liw ee ciywiongg, liw ee unsunn; rid diyc liw iuwsiur ee simsux tangx tauxvangr guaw diyhbuaa ee simsinn. Duiww liw u kacc sitlew, guaw beh qongw jit qxur kacc cocuir :ee. Qiogvutqiok guaw diyhh qaqi vaiqaiw ee sii, u liw ee hing’ngiaw dirr guaw taukag-lai siy’ suii, guaw ee ziogtew did diyc knuiwuac, guaw ee sinhunn be drir qaur lyc Ovi Dergak.”
Sinkux kiw qalunxsngw, nng vingg cuiwpuew quaww amrqunw suacc siyx tngr tngr. Snax dxangx jingg jit dnxua ue kngr dirr simqnuadew, samvutsii u decc liu, dagg qxur iauxx qir qaxx bingg ~ ~.
Javolangg u quiw hunx jinx simx, ue qongw qamxx u jinrjingg? Bingqii jaix duiwhongx cuiwjic tangx dngw lenhuex, huabiw ee gengiw siongsiongg diwsuw Lulu ee simtauu qunw ngiax.
“Liw unxdangr sniu be qaur, si’angg duxjiah kar denrue hro :guaw.” Jid’err qauwui, Susu buerjingrr jre dnia, ue qongw dairsingx.
“Si’angw?” Lulu mng, byy ir byy ir.
“Liw singx iyh knaur mai.”
“Onglok aw?”
“Liw tacc e jaix?” Susu bagjiuw denw dua luiw.
“Hnaa! Jnjniar si ix? Guaw cinwcaiw qongw :ee ne!”
Vingx qavix iong qorr sucqongw la la lehh, dingxquann jit enn krimu dauc dauc aw siau’ngiuu .kir, hnuaxox ee kofi lorbuew venr jyr dimhniusig. Imxliau vah vah kuanw, Susu siongrr hingr jitt bi. Lulu kacc jaw qauwui, quexjixdee derr zi praur iauxx sngqamdnix aw sngqamdnix.
“Ix kar denrue cue liw beh congr sniaw?” Lulu naxx tinn dee, naxx decc mng kiw.
“Byy simxmih iauwqinw :ee," Susu dab. "Dyrr qanda’ beh qra guaw qongw guaw qiar ee iuqnia ix u siux .diyc .ar.”
“Acc liw u ham' ix qongw sniaw .byy?”
“Ix dirr guaw ee ciuxqix-aw lauu messiji. Guaw byy cam' ix qongw diyc ue.”
“Liw qamxx u qra huee denrue, qongw liw u tniax diyc ix ee messiji?”
“Huee denrue! Qamxx rair?”
“Qamxx mrbenw? Bydnia ix jitt jun iaxx decc gong gong aw danw liw ee denrue.”
“Mrqycc, guaw jiokk qniax ix iurqycc lylilylyx tic be suah. U jit vaiw zuarr hamr lehh, liw dy’ m jaix. Jiokjiog qongw beh nng diamxjingx quw, bersux ix kar denrue longxx benw jnii qangrkuanw.”
“Jex guaw beh sinr. U jit amr, ix vnuawmii quer kar hro :guaw. Guaw si air kunr qaxx. Ix tuax lecc diddit qongw iarr be cuiwdax. Ciavnuaa qui’ amr, itdit qaur tnix beh qngx, ix jiacc vangr guaw suah.”
Zit lyc srinx, diamwbin ee neondingx jingsinn. Siauwdnuax tec lehh, inx jywhuew kir qetsiaur. Jiauww qu le, gnirkaqingx. Ving’iuw beh dngqah, jnihang diyhh sngr hro hunbingg.
Beh quer cialo kir jre denrciax. Susu jre qaur Daivag Ciatauu jiacqycc vnuaa ongw Lamqangw :ee. Lulu cur suer dirr Sindiamr, didtaur e qaur.
Dirr lorkauw danw cnix dingx. Duiwbin u jit duir jingpnua ciuw kanx ciuw danw beh quer .laii. Knuar jit xee jinx, Susu bin-aw cnix sunxsunw, taukag qinw ngar .lyc, Lulu bin uat duiww jniawvingg, simjong pogpok dnua.
Be camsiongg .did, angg dingx danw quw venr cnix dingx, tong’ sewqair qangg jit ngiu. Beh dngxuad, dngxsinx iacc qniaa jinwjingg, suijai langg ee kavo, diyhh cunvan dairsingx diyrr si.
Tiactuiw
“Hnaa! Jit liap rair jiacc quir or?”
“Jiac u hauriong e kixvong kacc iauwqinw lar. U:ee byy:ee jiac jiac hiacc je, jnii liauw junw duxhyw, jingwtauu huanxdngw siongdiong jiacc si jiahlat.”
Ozinn-bagqniar byy vrag .lyc .laii, helmet marr iauxx dir diauu lehh, odobai lorvnix cinwcaiw cah lehh zip laii qaur seiyhvangg, qnuaw huwhur, jixmiaa beh air Viagra.
Zidtauu siyx huwhur, uirdiyhh jit liap nasig ee uan’iyc, peciax quer Daivag Qiyy. Seiyhvangg, inx cur laukax dyrr u jit qingx, qamxaxdiamr qecviah iarr u jit qingx, uaw snaqag-qonghngg hitt qingx sinx kuix :ee, ciavaii-aw hitt qingx li cur kacc hng, iyhbi jiaujngg. Sionghongx qamxmo, ix quanwsir kir iyhvangg jenxiyc qab iyhsnuaw. Uree iyhjesux, lenrr ix ee miaa dy’ qiyr e cud .laii.
“Liw jitt quiw zit aw u qapp linw jaboxlangg jywhuew .quer.”
“By..byy.”
“Byy! Qamxx anxnix?”
“Guanw bow marr rair langg jiauwqor. Guaw be qapp ix lirhunx.”
“Beh lii m lii, linw daux ee dairjir. Guaw byy beh dnic suanrjiyc, marr be qra liw tyw lau’axcur iacc vedjongx. Juanqangx cingxqaw qapp liw cud laii kuix vangqingx, lauxsit qongw, guaw iauxx bue songw .diyc.”
“Byy, liw diyh’air quiw vaiw jiacc e qauwkuir? M bad knuar quer jaboxlangg jiahsinn jiacc dang!”
“Guaw jiahsinn dang, qaur dnaxx liw jiacc jaix m? Beh damjingg-suec’air, cniaw liw kir cue vadd langg, kacc benw did bycaiw guaw ee siqanx, siauu marr tangx juan’id lauu hro linw taiwtair.”
Odobai kiaa dngw laii qaur cur, ciaciuw sryw lehh, au lenw qycc quaww jit xee dua sryw. Qongsix dirr dangkux, jaxkixsii siongrvanx, ozinn-bagqniar byy qruar e tnee bak. Dirr harvanx ee lortauu, zidtauqongx qangrkuanw dirr ix taujingbin didjiyr, bec’amr aw lak diamw, iuguann jiokk mew, jiokk ciah.
“Qycc danw .jit .xe. Cnicair craw lehh dyrr hyw :ar.”
Beh jniurau sinrsuar sew jit xe ciuw, taiwtair kajiacpniax hiongr ix, sinkux uii jit niaw isinqunn dirr huexjaur taujingg juw qaxx zet qunxqunw.
Qethunx beh jnia’ jap dxangx longxx byy snix, taiwtair ee texqeh qapp jap-gua dxangx jingg cavutdyx ~, byy kacc vuii marr byy kacc sanw. M na hingtew iauxx siyxjiaxlangg-kuanw, lenrr simsux dy’ iauxx jiokk dansunn, byy-suax-byy-sab. Jiac ginhangg ee taulo, ginhangg dyrr dirr jairqin ee caiwci-aw-tauu, qnialo go hunjingx dyrr e qaur. Jit lexvair siongrvanx go qangx, guad'iaurzit jiww qim'iaurzit, jaxkiw veh diamw vnuar qaur ervox go diamw vnuar. Jitt hxun kangkuer dirr ix dairhak cutgiap jyr qaur dnaxx m bad ngua .quer.
“Liw dyc’ui decc byy songxkuair, si bor? Knuar liw qaxnaxx sen laklag, qanda’qor vex vng, cair iarr byy gneh kir puer.” Ang’axbow dirr kectniax naxx jiac amr naxx decc knuar denrsi, jyr bow :ee sui’ u diwqag .diyc.
“Iarr jaix. Dyrr simqnuatauu jyx jyx, cuir qycc jniaw pirpu.”
“Qamxx e si kir qamw .diyc? Guaw bongx knuar u huatsiyx .byy.” Nguaxdi hongwha, taiwtair ciuw crunx .cud .kir dyrr beh kir ur angsair ee tauhiac.
“Byy lar. Guaw byy huatsiyx.” Jyr angx :ee ciuw giac quann kinx lat qra dongr.
“Kacc danw sinkux sew sew lehh, ing’amr kacc jaw hiyckunr. Liw jitt jam aw naxx cincniu u kacc hix. Guaw jiacc laii kir hanwiyhdiamr vaiwtog sensnix tiah jit hok iyhtauu, binaxjair caiwci-aw brew jit jiah juanqex dngw laii dimrvow.”
Jiac vng vaw, nguaxvnuaa siux siux lehh, taiwtair dyrr qnuaw beh cud kir tiah iyc. Tniax diyc mngg ser aw sniax “pong” jit sniax, javolangg sui' qniaa uaw kir denrue-vnix.
“Dangsi'aw guaw si hyzuac diyc sxuax lar, mrjiacc hitt dangjun e srid jing’ingx. Guaw beh qra liw hue sitlew. Guaw byy ingwqaix duiww liw qongw hiaxee ue.”
Amwsii aw beh kunr, taiwtair qra vangqingx ee lingxkir kuix .kuix. Qniax mibuew aw e venr kacc lingw, angsair sintew hix e kir qnuaa .diyc, ix jun siongrr ser vong :ee.
“Qinnii Diongguann, lanw beh cniaw jit quaw byy qewcua ee dongsu laii cur nirr jiac pow. Qurnii buexgee, qapp lanw jre qangg dyh u jit xee qongquanx-qingliw, liw iauxx e qir .did bor? Lanw marr qra ix iaucniaw .laii, hyw bor?” Ang’axbow longxx kunr tanxdyw. Vangqingx denrhuew qimr qaxx amr bagbak. Angsair uat tauu duiww taiwtair ee hnirkangx-vnix qongw.
“Liw si qongxx snex jyr vuivec aw vuivec hitt xee oniaujew m?”
“Hner a.”
“Ix qamxx beh laii? Lanw si cocaiwvng narnia.”
“Guaw javox :ee qra ix qiyr, ix itding qongw m. Vnivnii jabow :ee, liw hyw cuir qra iaucniaw, ix kacc pnaixser qongw byy air.”
“Or. Acc beh anwjnuaw qra ix qiyr? Kar denrue, iacc si vangr tiab-aw?”
“Snesingg diyhh kar denrue kacc qinw. Binaxjaxkiw liw dyrr qra kar.”
“Or, hyw.”
“Sii qaur, liw dyrr qra ix qongw si liw tiaucniaw, benw tee kiw guaw ee miaa.”
“Hngr, hyw.”
Crunx ciuw qra taiwtair lamw kacc uaw sinkuvnix, suawciuw qra syx taujangx. Jyr bow jairlaii kacc hyw kunr, lingxkir liangg liangg aw qyckacc kuair lyc binn. Jyr angx :ee bagjiux kreh kreh, taukag jiokk uahdang. Qim’ia, ix hibang u hyw bang tingwhyw bang.
Guadbiw
Denrsi qiongbeh jun pnaiw .kir. Cur nirr u kanx derr sir daii, cid~veh-jap daii tangx qingxsuanw, jun laii jun kir, byy qaxx jitt daii Guadbiw knuar e dniardiyc, knuar e qac’ir.
Viackamx-dingw ee vecqag-sijingx “diangx” jit sniax, jinw jiacc quer daur nng diamr vnuar. Ingxsii iauxx decc cua sunx, diongdauwdngr jiac vaw, sunx qra ngaw hro kunr, Guadbiw sui’ kir jauwkax cuann ehngvng, qaix qingw, qaix ced, qaix sew :ee, tranr hitt sii singx kuanw kuanw .kiw .laii. Tingwhau sunx kunr jingsinn, lingbuxciax sag kir hang’axkauw ee snaqag-qonghngg, cinwcaiw duw dy’ cue u sigsai :ee tangx pywdau. Diamr hiax qaur qaxx bangw-aw vywgee dyrr hyw dngw .kir, lingbuxciax unn aw si sag, qaur cur, duxhyw hur juw amr.
Dingw lexvaiwgo, jaboxqniaw qra sunx cua .dngw .kir qongxx beh qaqi riyx. Jitt qangx jaxban e qaur, Guadbiw simqnualai u anwsngr dilehh. Jingcax qongxx sizit viw did ix liongrsiongw :ee u kacc jaw, byy kacc nguar. Ix vunxjniaa iauxx pruex qongxx, siongrr byy erdangr cua qaur ginxaw dorjer, huad gee, e vee.
Beh quair si’angw lehh? Jaboxqniaw air cingkiwsniur sngr jxingw diyc laurbuw. Jaxjingg ginxaw sewhanr ee sii, qenwnarr qapp angsair sionghyw .quer ee qecjaxkiw, Guadbiw jongw e qra cngqinx vrag .lyc .laii, suawciuw danr zip kir sexsnaqix sew. Ginxaw ciangjai e dirr inx ang’axbow ee bincngw-dingw hua lar, tunw lar, ciapalinwdauw dy’ e. Ginxaxlangg naxx vec juaw jit dniux. Guadbiw byy air hro inx bag diyc lasamm.
“Liw vnivnii hitt siangx ciuw, zit .sii py sunx, amwsii beh lamw javolangg. Liw qiyr guaw jyr laurbuw :ee beh jnaixaw unxsimx qra ginxaw vangr hro liw cua?”
Diongdaur sac dax mi, jaramr ee caiwbuew sunrsuar kingg kingg lehh. Nng der nguaxvnuaa punr punr, beh sew jinwjingg singx druar ciurlinx-ciuxlog. Ciuxlog lairdew ee ciuw iauxx qor qaxx jin’ suiw, byy likhunn, byy ovanx, vutjiw aw riux.
Qongw kiw diyc Guadbiw jitt siangx ciuxqud, siongrqaiww u hro ix lamw .diyc .ee, ingwgiac, dyrr si ix jitt xee qojaboxqniaw.
Ixjaw narr qapp angsair uanqex u qerquai, Guadbiw jiahkir jauw kir qapp jaboxqniaw keh jit dingw bincngg, siylensuar jit lexvair iacc vnuar qywguec longxx vutjiw aw suwsiongg. Angsair qex Guadbiw jap-sir huer, liogqunx cutsinx, jurr nng langg qethuad jyr hucex, javolangg m bad qra jyr bow :ee ce m driyc iacc hue sitlew .quer, jaiww vutzenn duiww taiwtair qamx-genn-bit-giw, qongw quaw hyw tniax ue dyrr jin’ vutdikliauw :ar.
Guadbiw be kamx did langg qojniaa, jid’err viauxhen cud kacc lyhnngw, hitt amr, angsair dyrr jiokk qausiongr, kow byy Guadbiw qra ginxaw kacc jaw penr hro kunr, ix tangx hyw qra taiwtair tuax kir vangqingx-aw lai qinw tauw .jit .xe. Tangx qongw jap vaiw u veh vaiw, qecdngw qangx jaxkiw, angsair e venr jit xee hxingg, crinr tauu crinr bin venrva, u sijun qycc e duiww cur nirr ee langg pnaiw sniasaur.
Juw jit vxuex qyvidee, camx gulingx, byy camx tngg. An’ vylequanr-aw tec snax der qaqi viag ee vniaw .cud .laii, quar qinw qycc kamr lehh kacc be lrunr .kir. Pnri e diyc hingrzinn-bi ee vniaw, cuir jiac si jniaw ngiarngia. Dirr Guadbiw ee zinrdix, snax hunx juniuu sir hunx jrngx, sinjaii texqeh diyh’air jinx biw jniar qnar, be ngkamr .did. Quii quer ginxaw ee vakdow, iyx kacc anwjnuaw sog dy’ byy huatdo cincniu jyr siyxjiaw ee sii zi-zi cunr. Jongw .si, naxx vuahtangw ee siniyx, Guadbiw qanda’ sniu dyrr cuah lecc danw. Narr junw dycc jit zit jniasit venr jyr hitt xee ngiu, ix qamguan siw siw lehh kacc knuiwuac.
“Liw longxx m qniax pnaixser? Qiamw liw beh zi-jap huer! Liw snix ix e quer ne!”
Jaboxqniaw qinnii zi-qauw, Guadbiw go-jap-lak jyr maw. Ix jiahjngx, qycc gauu vyxiongw, co’ sigsai :ee longxx e liahjunw ix si sir~go-jap huer langg. Ix qunxsngxciyr qongw qaqi sxiab-id, uanaxx u langg sinr daucdauh.
Qa jit cuir vniaw, vniaxsud lag qaxx qui' dyh-dingw. Tiux jit dniux mi’axjuaw sui’ cringx hro li, kacc benw qauxhia laii dakdnii.
Angsair kir dirr hitt vingg, qui’ vnuar dxangx jiacc dngw laii jit vaiw. Lau angx tniar jniw vyy, hmlangg jit qix huevycuir rue lringg rue hxong, gauu pobinrtanx qongw qaxx hyw lxyy hyw qow, lau angx u bow u qniaw jitt jann, an’ tauu jiww buew jit qxur dy’ byy tesueh.
Tniatauu jit vunw Jujer cud ee jabjir, jyczit qiar qauwui, Guadbiw iauxx bue qra tauw .kuix. Cur nirr byy hogsai sinvut, lenrr qongmaw dy’ byy. Qurnii ciutnix u ving’iuw jiyx beh kir giamngi jersenn, tniax suhu qangxqingx. Kir qaur cimsnuax-nalai, Guadbiw simqnuax liac tanxhnuaii, vunxjniaa jin’ pnaiw kuix cuir ee dairjir, dirr senvangg ee vaiwdiam qui lehh, puar vakdngg jyr jit xe tnaw hiongr suhu camwhuew. Dirr snuadingw jiahcair, siuhing, snax mii snax zit, jingcax jit vo byy tir tauu juer niqox. Dngw laii qaur doci, dagg zit liamrvut byy jiac cyx. Jit lexvair quer, nng lexvair quer. Qaur qaxx derr snax lexvair, langg' jit tongx denrue laii, Guadbiw sejngx dnaxvan .jit .xe, puevaux-aw qnrua lehh dyrr cud kir hur iokhue.
“Maah, guaw ing’amr be dngw kir jiac.”
Qinaxzit vaiwsir. Jarhng’amr beh huanx diamw haursnix jiacc qaur cur. Guadbiw qra suatqaur, qongxx lensiysuar snax qangx byy beh dngw laii jiac amr longxx iarr byy qongw. Jarborzit ziongw ziongw lehh, ix jiacc tangx danw diyc duxjiah hitt tongx denrue.
Denruerpo-aw henx .kuix, jitt jun ervox sir diamw. Baciokkax narr kiyh e jee, qycc byy sniu’ je lenjongx iacc cauwjongx, baciog jit ciongr, nng ciongr, pah suah, duxhyw knuar veh-diamw-dongr.
Muersair
Vnetnaw-t. ee nngxdow, puebah qngqut-q., m bad quii quer ginxaw, si byy decc kingg caiwbuew ee vakdow. Vec qycc iur ee jingxtauu-aw dngsngw, byy decc sew snxax, sew cair, sew nguaxvnuaa, si qui' dxoo decc caujog denrnauw ee ciuw.
Pongwcngg jiamr beh vangqingx ee jidvnuar kuah, binrdingw ee langg kunr tanxkix, uan’ngiuiyx, lingboo ngidni, qui’ senx kacc byy pongwcngg ee sir hxun jit hiacc dua.
Sinkux kir jrangg jit xee liangg, pangjuiw-bi, qnuarsngx-bi, pnri e diyc :ee, bylun pangx bi iacc baiw bi, jit vaiw jongw qaxx sew hro li. Jinwjingg danr dirr pongwziok-dingw ee snaaxkor sui’ niaw aw cing .dngw .kir, lenrr lairkor dy’ cing guandew hitt niaw, byy ngua cingkir :ee. Taujangx den .quer benw sniaw jingxliw. Kia dirr qniawdaii-jingg, qniar-lai ee langg, guarvan ham' jaxkiw cutmngg ee sii knuar .kiw .laii byy qyc’ngiu.
Bincngg-dingw :ee iauxx dirr kunwden, qaxnaxx angngex-aw, kunr qaxx jiokk lyc binn. Byy uaw kir qra jimx, dogdok qra ix qngx liuliux ee kacngpuew kinx kinx aw hrux .jit .xe. Sinkux jiacc sew cingkir, m hyw qycc kir bag .diyc. Siqanx qaur, luxdiongx e laii longr mngg qra ix qiyr jingsinn.
Vangqingmngg hyxlew aw qnuaix uaw .laii, lakde-aw jiax zimm hiax zimm bongx diyc ciuxqix-aw, jiacc kuiqix nia, denrue sui’ dyrr laii :ar.
“Uee.”
“Uee. Liw langg si dirr dyhh? Guaw denrue kar qui’ diamxjingx longxx be tongx.” Kanciuw qorr huah :ee.
“Beh congr sniaw lar? Jiacc iauwqinw.”
“Linw siyxmue-aw cud dairjir :ar.”
“Cud dairjir! Cud simxmih dairjir?”
“Linw muersair kir duer diyc huexqir qapp langg' decc taux laii amr kir. Linw siyxmue-aw laii dirr lanw daux decc qywuanx, tii tii kaur kaur, qongw beh kir diauwdau, beh daujuiw tiauwqangw, beh kir…”
Byy tingwhau kanciuw libuxlilex qongw suah, denrue dyrr qra ced driau. Vnuar qorr jauw :ee kir qaur tingciadniuu kanx ciax. Go-vah kox cutmngg byy nairsingr danw jaurgunn, iumngg cuix lehh, handolu uat hiongr dangx. Inx daux jit qingx sir~go-jap pnee ee qylauu dirr sniaa-lai ee Sinwgi Kux.
Jitt xee muersair qapp ix vnii je huer. Codiongx qapp qydiongx, inx nng xee longxx kyw diauu qangg jit qingx haghau, taubuew lak nii qycc venx dirr qangg jit vanx jiacc u crenx. Hagsingx sidai, jyr siyxmue :ee qapp hniaqyx ee nguartiab :ee poxliok aw u sigsai. Qaur qaxx dag’ee longxx cutgiap, cud siarhue, jyr hniaqyx :ee juxir, dyrr qra siyxmue jyr hro dongcongx :ee. Hiangwsii sinlongg zi-lak huer, sinniuu zi-sir.
“Uee.” Dirr sibzirlorkauw danw cnix dingx, ciuxqix-aw jiangwsii qycc dann.
“Tauqex, guaw a’Huad :a. Qinaxzit u jit dniux dniardnuax, beh jnia’ cingx bxan. Guaw u mng qangdniudniuw qamxx beh jriab. Ix qongw kuanxhang sniu’ dua, diyhh tingwhau liw catduat.”
“Liw siyw qra an lehh. Binaxjair guaw kir jiacc lixluaw.”
Vux vux vux!
Nng vingg vnix ee ciax qycjaiww kixqniaa. Duer dirr ix aurviah ee ciax, lacvah he sniwmia cic byy suah. Quer jitt xee cni’angdingx, inx daux hitt dongr lauaxcur dirr hng hng dyrr knuar e diyc.
Inx cur druar jap-veh lxauu, iauxx bue kiw hyw dyrr qa’ngg juwbunn. Siyxmue inx druar go lxauu, vnuar qurlyc, qra ginhangg dai nng~snax-vah-bxan, iauxx go nii jiacc taur. Vnivnii an’ jitt dongr lau’axcur cutmngg kir qaur Dionglik ee qangdniuu, muersair dagg qangx junxsii siongrharvanx, ix jyr tauqex :ee snax qnxix mii vnuar iauxx dirr guarkauw ingwsiuu qongw singliw jin’ sowsiongg, qecdngw qangx ciangjai kunr qaur quer daur jiacc jingsinn dyrr urngiaw.
“Dnaxx si jniasit iacc qexngiaw :ee? Go-jap cuttauu huer, taumngg cuiwciux vec, lakde-aw qycc iarr m si vaw vaw, sing’uahkox-aw qycc jiokk ec, m si kangkuewdniuu dyrr si kiarqex, ix beh taixtyw u qienn kir sigsai lehh? Vacbin si decc qongw sngw :ee. Cincniu ix jitt van :ee, nacc u jaboxginxaw beh duer :ix?” Taukag-lai naxx decc sniu, ix naxx qra ciax sraiw zip kir ciakor.
“Siar-siw.-siar-jingr. Jiac qaxx cid-lau-veh-lau, ginxaw longxx decc tak dairhak :ar, kacngx jiacc decc vingw hro langg' knuar.” a’buw be kamx did krir.
“Javolangg or, jiac narr u jit dxngr siyx dyrr siauwsniu beh ciyx. Qongxx jiacc zi-jap tongw huer narnia.” Kanciuw qongw liangkiangx.
“Iauxsiu or. Jitmaw ee jaboxginxaw marr jnia’ qnaw.”
“Qnaw nor, tacc e m qnaw? Dankii-dogmaw kir qaur qangdniuu beh jiyx vyxsiu, suacc jidlo jiyx duiww bincngg-dingw kir.”
“Acc si snex jyr sniaw kuanw? Qamxx jinjniar u hiacc suiw?”
“Qongw beh zuarr u bagsit, dairkair marr byy lar, qigqex dyrr jit vo siauwlenn.”
Daqex simvu jit qxur laii, jit qxur kir.
“Liw qamxx longxx m jai’ngiaw?” Siyxmue bagkox angg angg, vyrqizenn cud sniax. Jairdniuu snax xee jaboxlangg liac ix jit xee javolangg qimx qimx siongr.
“Jai’ngiaw sniaw?”
“Inx dauwdin vutjiw aw quw :ar. Liw si jniasit m jaix, iacc si tiau'ir beh ter ix amkamr?”
“Guaw tacc diyhh ter ix amkamr? Liw si guaw ee cinsiyxmue. Ix si guaw ee erkaciuw.”
Jyr hniaqyx :ee qra siyxmue dah hingkamw quaww vyxjingr, qongxx it'ir beh qiyr muersair jiksii qapp hitt xee jabow dng hro li ~ ~. Jyr hniasyw :ee qra siyxqox sangr dngw kir qaur cur. Jre liulongg, snax hunjingx au dngw .laii, sui’ beh kir cuann amwdngr hro angsair jiac.
“Bec’amr aw, guaw u dirr lorvnidiamr-aw jiac jit nguaw bacqnix-mi. Jinw vakdow be iaux.”
Tniax angsair anxnix qongw, jyr qeau :ee sui’ beh kir sexsingkuqingx laur siyx juiw.
“Tiamw qaxx, byy sniu beh sew. Ing’amr beh kacc jaw laii kunr.”
Qongw suah, jyr angsair :ee uad lehh zip kir vangqingx, sruaw kauw sew bin, lairkor ngua jit niaw cingkir :ee, sui’ krangr duiww bincngg-dingw. Jitt dingw bincngg, inx ang'axbow kunr beh zi-jap dxangx :ar, cinwcaiw dinxdang .diyc dyrr ngingix-nguairnguai. Mrqycc, ix byy anwsngr beh ngua. Tanxaw vakdow qah lehh, qim'amr, ix iuguann erdangr jiokk unw kunr, tangx jit cnew qaur tniqngbauw.
Quewjuiw Imenn
Sinniuciax qauwui, paur-aw-sniax vidvit-vogvok. Sinx simvu dac zip erhok ho'ngg crua zip mngg, sinlangg sui’ dirr tniatauu vair qongmaw. Jngx nirr u tauu u bin :ee jre duarui, cojyclangg kangkuer jiamrsii vangr lehh laii beh dauwhiw knuar laurzet. Laurve qapp haursnex jywhuew crua simvu, qui’ vah dxangx duw m jaix u jit vaiw .byy. Jitt jua byy laii jinjniar bycaiw.
Dua hanr simvu Quiwhongx :a bagkox hamwpuc ~, jit dniaw dnitngx jit nguaw kad quer jit nguaw, ciuw longxx byy tangx hiyckunr. Jarhngmee nuaw cer syx ngii-aw, qaur beh tnix qngx jiacc kir limr .jit .cnew, jingsinn, sui’ hniahuew lyc kir puu. Laii jiarr si kxeh, bylun ginxaxhniax iacc u huer :ee, u langg u hxun.
Jiauww-lex.-jiauww-sor, sinniuu singx cniaw zip vangg, tingwhau diongdaur hunenr ee sii jiacc u qycc cud .laii. Nng xui sinlongg dirr guarkauw anwnai. Jyr haursnex :ee cingx dua lexhok, qui’ sinkux vec quacquah, lenrr pue’ee dy’ vec :ee, amrqunxniaw qad angkauxsig ee jiujiu, qongxx jyr sinlongg jitmaw cingrcah siqniaa jitt kuanw hxingg. Jyr laurve :ee qra qoxjaw crua bow hitt sxux sebilo an’ snaaxduu ciaux .cud .laii. Jiacc cing quer jit vaiw, iauxx sinx diamxdiamw, kowtauu qaiw kacc ling lehh, dingw srinx kacc vak, m.-maxhux-h. tangx juw .quer. Didjuarhuex, dimwlamm :ee, vutjiw aw duarvan.
“Linw daux marr decc simsig. Tacc byy quikir crua qangg qog :ee, suacc laurve crua Uadlamm, haursnex qingw Indonesia :ee?” Hiongdniuw jin’ hnowhenn.
“Guanw veaxqniaw si longxx kacc qac’ir Uadlamm :ee lar. Jit kunr qingw nng xee, vingwdiongrginn qycc tangx singw lecc snax snxiaa. Acc dyrr siongrr suiw siongrr iuwkiw :ee, siauwlenn :ee singx qingw .kir .ar. Lanw jex zi crua :ee, Inwnii :ee bongxx kiyh.”
“Inwnii :ee marr be baiw a! Byy Uadlamm aw hiacc vec dyrr urngiaw, bagjiux marr dua luiw, sngr ox suiw aw ox suiw lar.” Longhue jongxqanwsu qongw.
“M na binrmau, texqeh marr jin’ tangx ylyw.” Hiongdniuw janrcuir.
“Si dyrr driyc m. Be sniu’ ew, be sniu’ lyr, lingx-aw qycc pog pog.” Jongxqanwsu gauu dauwue, cuir qongw, qycc vixciuw-lyhqiyh. Jingwlangg knuar qaxx ciyr hihix.
“Gin'axtauu kaisiaux zuarr aw je .kir .ar, qycc byy lingx, dyrr byy decc crua pnaiw mia :ee qyc.” Lau sinlongg u ue qongw.
“Hner a,” haursnex janwsniax. “Guaw hitt xee go-jap kilo kadkax kadkax, sixdi’axqer zxic-go-bxan. Guanw vaa ee kacc u baczinn, byy snax-jap-bxan qongxx be diyc.”
“Snax-jap-bxan! Siok siok siok,” jongxqanwsu viw ciuxduarvorbuw. “Guanw qecviah :ee crua Dairliok-aw, sanw m sanw kihkic, qycc juann iong bagbuew decc knuar langg. Taubuew, ciuxsiogliau, huelingqipiyr, dua dnia qapp siyw dnia qax qax lehh, qiongrjongw kaix beh qui’ vah bxan.”
“Qniax dyw langg!” lau sinlongg huah cud sniax. “Qacc u qui’ vah bxan tangx kaix, Daiuann vunw de :ee, cinwcaiw crua marr u.”
Cuesngg cringr enx, iudniaw dng’ zet, jiongxpowlangg byy ingg qaxx muaw srinx dang qnua be hur crid. Pah dyh cniaw langkeh, dyh-sniax ranr zi-jap. Dniadauw tngwkadyh qapp iw-aw vaii .lyc, qiongbeh byy kalo. Decbeh kuix dyh, dua hanr simvu Quiwhongx :a cniaw langkeh kir jerdyh.
“Qinaxzit liw viw sinniuu-aw kacc angg oox! Qui’ jaikiw knuar liw jongg cud jongg zip.” Hiongdniuw duiww Quiwhongx :a qongw.
“Ix byy ingg qui’ qywguec :ar,” jyr daqnuax :ee qongw. “Binaxjair kiw, qex nng xee kaciuw dyrr cing’ingg :ar.”
“Si qongxx, a’vaa, Daiuann cair, inx nng xee qamxx erhiauw liaurliw?” Siauwlenn sinlongg bagtauu qad qad.
“Si dyrr driyc,” Hiongdniuw qongw. “Inx cimxx cimxx qer .laii, hanjii o-aw hunx berdid si qnaxx dy’ e or.”
“Hiongdniuw jitt qxur qongw kiw u sidjai,” jongxqanwsu qra ylyw. “Sioggixue qongw, ‘niuu kuair jyr, qanw yh yc', hongwcniaw qycc si guarqokhuanx. Beh juw jit dxngr kacc e hauwqox :ee, snax dxangx go dxangx or.”
Qongw suah, jingwlangg longxx decc dimr tauu. Quiwhongx longxx byy inwue, qanda’ bih cuir decc ciyr.
“Guaw knuar anxnix hyw lar. Cur-lai kangkuer, codang :ee, liw dyrr qiyr inx kir jyr. Acc narr iur sxid, inx duer dirr liw vnix:a dauc dauc aw dytua. Kacc quer, jiacc knuar inx dauwdew u jniurqar bor.” Daqnuax sinlongg jyr jit xee juxcaii.
Langkeh dngg dngg dew dew laii, jiuxgnauu jiac suah, beh jauw jyr jit xe jauw. Vanrdyh :ee qra dniadauw saur saur lehh, tokax ee qnialangg kanx ciurlingqongw suan juiw ciangg ciangg hro cingkir dyrr beh cringw jnii. Qorr duxjiah siux ee lexgii, Quiwhongx :a sui’ sngr sngr hro :langg'. Dyh-aw iw-aw, nguaxdi, qesix, nng daii kacciax jyr jit kunr laii jair jauw. Zit lyc srinx, lamqax ee mngkauxdniaa d.-diamrjing-j., c.-cingkir-k.
Srinn jit tangw siyx juiw, iuqauw, qnuarsniuu, jit der dekox vniawlat lur. Sinkux sew hyw dngw kir qaur vangqingx. Angsair qinaxzit siwqer qingwjiuw, bin angg qongwqongr, bagjiux kreh kreh, jinw dyw dirr bincngg-dingw.
“Laii, guaw jimx .jit .xe.”
Cenw cniuu vyc viah, dywvingg qingx daqnuax ee sniax bingg ~ ~. Quiwhongx :a tniax diyc kiw pnaixser.
“Kapang kuix kacc kuix lehh.”
Jniawvingg qingx siyxjig ee sniax jinx duw jinx. Quiwhongx :a simjong pogpok dnua, uat tauu cimxknuar sinkuvnix :ee. Angsair byy-sniax-byy-sueh, byy-dongr.-byy-jing, qaxnaxx decc siangwduarbinn. Qycc laii, nng vingg bersux decc viw dxaur dua sniax. Quiwhongx :a e qir did qaqi jyr sinniuu hitt amr, naxx jit xee exqauw-aw qangrkuanw, qyckacc anwjnuaw dy’ m qnaw cud sniax. Quiwhongx m jaix daqex qapp siyxjimw si decc huah tniar iacc si jnuaxngiu, inx longxx aix qaxx m jniaa sniadiau.
Angsair beeru ervox m jaix limx quiw qxanx, ing’amr decc kunr, m na longxx byy vingw srinx, qycc be kiw hnoo. Vingsowsii aw, ix si ping gauu qnoo :ee.
Quiwhongx :a bagjiux vangr kreh, be tniax .did ee snia’imx suacc zuxx zuxx bingg. Valuntauu, mijiyh kamr qaur taukakbuew-dingw .kir, binn binn aw, Quiwhongx :a iauxx tniax diyc cuanxkuir qapp hauxcanx ee sniax, an’ siangx vingg qecviah laii :ee, tauwamr byy tingg.
Girniu
Jarhngx erhngx, angsair qra dua kax kabang an’ bincngg-kax tuax .cud .laii, byy-qongx.-byy-dnar. Giogjo :a marr vinrdnua qra mng. Ix jin’ jai’ngiaw qinaxzit diyhh qycc kuanw hingliw :ar.
Sew qaxx cingkir ~ ee siaju qapp sejongkor kngr dirr siongrr erdew, nailinggu viw did ingxquer u qex qra jah .nng .niaw. Cid~Veh-guec aw gauu lrauu qnua, snuadingw u kacc liangg laii qongw, Daiuann ee hernix, kir qaur dyhh dy’ siyzuac.
Lingxxx…
Cue qnir diyc jit xee kangpang, Giogjo :a jiacc beh qra kixbinw qapp kixqyx sreh .zip .kir, denrue decc hiangw. Ix uat tauu knuar, si id snuar ee denrue decc sih, bogquair dirr cuwbuexdingw :ee byy jriab. Narr zi snuar denrue dyrr vacbin kar laii beh cue angsair :ee be dingdnaa, ving’iuw, pacdngqah ee langkeh, byy dyrr siyxdi iacc siyxmue narnia.
“Tniax qongxx linw ang’aw iurqycc beh kir jersenn siulen :ar m? Jitt dxauw si beh kir zuarr quw?”Giogjo ee jixmueaxpnua dirr denrue hitt vingg decc mng.
“Jit qywguec.” Giogjo :a dab.
“Omidohut, beh kir qaxx qui’ qywguec! Ix si pacsngr beh jyr huesniu niih? Byy, tacc e zuxx druar zuxx quw?”
“Iarr jaix. Lanw m qnaw qra mng hiacc je.”
“Guanw siyxjig-aw dauwhuexqir, guanw siyxjimw-aw caw beh lii. Lorbuexciuw, jitt jann si guaw jiongdiongx qra inx cuxhyy :ee. Liw ee duiwdik si vut, si dirr tnidingw :ee. Jex guaw jinjniar dyrr buling'uii, sniu byy vo lor.” Qongw suah, denrue hitt vingg ee langg trow duarsimkuir.
Juankyx ee dongcongx, simxmih dairjir dy’ tangx qongw ee diiuw, Giogjo :a qewangx hitt qangx cniaw ix jyr pnuarqer. Dongcongx sinhunx zip sinx cur hitt nii, Giogjo :a inx ang’axbow iauxx decc qa’ngg suer cur. Qethunx liauxau, jit xee zi-lak huer singx jyr mamax, jit xee zi-veh huer singx snix diyc lanrpax. Viw dongcongx kacc jaw jit nii dax qingx dngrsnuaw, dongcongx kacc jaw ix nng dxangx kir hryy hueqniar.
Sniu kiw diyc quewongw, jyr sinniuu-aw hitt qangx ee qongqingw dirr taukag-lai iauxx jin’ cringx, jin’ bingg. Uir qenwsiaur ee sinlongg, qongxx m bad qaux quer cit’aw. Lun kiw jyr laurve, ix jin’ suawser, byy kacc sux :langg'. Giogjo :a qaqi bad dywdac zidjiw dag .quer, dongrvongg hitt amr, angsair dyrr hro ix ursinx si jin’ duarbin.
Liongw qex habhunx, jit gnauh sinkux qauqilenn. Jit duir sinlangg dirr sinniuvangg oamr bongx. U sniu beh iuwsiur, subunn. Co' qapvangg, cnihiongg qinw viakviag, ladtauu junxjad be duiwdiamw. Sinx hangloo, sinx deqow, ang’axbow dagg amr sionghyw qongxx si suwsiongg. Jyr angsair :ee kacngpuew u jit jua kii, bow u huathen; jyr qeau :ee hingkamw ocnex jit dah si cngbuw jyr uiqir, angx knuar qnir qnir. Snex quer ginxaw ee hingtew venr kacc vuisnex, angngex-aw suh .quer ee lingvoo u kacc suee, jiaxee, angsair longxx u jaiqix. Giogjo :a kajiacpniax snex jit liap amwqir, qurnii kir Vakdauu jimr unjnuaa ee sii jit xee oksang decc qra ix qongw, angsair qaur dnaxx iauxx byy knuar .quer. Laubuexdingw ee vangqingx u bincngg u venrsow. Vangqingx ee syxsii dna' jit qix, angsair vutsii jah dirr sinkudingw.
"Guanw siyxmue ciuxsut liauw qongxx u sunrsu, vutzit dyrr erdangr cutngi.” Vngrcair juw sik, amwtauu aw cid diamw, angsair an’ lauxbuexdingw lyc .laii, Giogjo :a cuir drang cuir qra qongw.
“Inx marr sidjai jiokk sniu be kuix. Byy snex si e anwjnuaw? Vakdoxpuee diyhh kir hro jiamx ruix, ginpiyr qycc diyhh kaix jit vew.” Angsair naxx qongw naxx hnair tauu.
Hariwsikdig kir bongx qaqi ee vakdow, Giogjo :a qig diam diam. Dua hanr :ee si puawvag snex :ee. Dongqisii, daqex uirdiyhh iauxx dirr simvu vakdow-lai ee sunx u juanqangx kir cue jit xee siongwmiarsenx, dngw .laii dyrr qra inx qniaw qaudair, qongxx ngex-aw diyhh hanrdnia zit cutsir jiacc e lingxli qycc hyw iyci.
“Zinkauw dyrr decc sniu’ je, dag’ee qycc he snewmia snex," angsair iurqycc decc hnair tauu. "Jitmaw ee langg longxx kacc byy herlyc, ginxaw snex .lyc .laii cri e vaw .be marr longxx byy-pac.-byy-sngr.”
Qongw liauw, angsair qra nguaw-drew jit cog vng jyr jit cuir vex. Cur nirr jiahsit qyckacc danqanw, angsair m bad qra hiamm. Nng xee gauu qingxjiac :ee, jit xee kir dirr Dailamm tagceh, jit xee amwsii aw rair voxsip, jiac guarkauw kacc je.
Binaxzit tauwjaw go diamw vnuar ee ciavangx, angsair qra Giogjo :a huanhur, qongxx qim'ehngx ix e kacc jaw kir kunr, denrue laii byy beh jriab. Veh diamw quer, qalairsid kuanw ingg, Giogjo :a qo’ jit langg jre dirr kectniax, vywjuaw bongxx qycc vingw. Kranx dirr derr jap-veh vanw ee sinbunn, qongxx Daiuann luxsingr kanx cexunn .kir, vingg vingg aw tangx uac qaur cid-jap-veh. Ix iauxx bue go-jap huer, tangx qycc jiac lecc snax-jap dxangx, siongdongx jit-bxan gua ee zidjiw, snax-bxan quixlyrr cingx dxngr vng.
‘Quer daur ji’ luann’, jaxjingg Zidvunw jit vunw vutjiw aw cutmiaa ee siyxsuad kngr dirr cecqing, siyxkuaw u ing’iax. Giogjo :a qra ceh tec .lyc .laii, anwsngr ing’amr qycc knaur jit vaiw. Laurlangbak, ceh knuar be qinw, knuar byy liauw :ee, binaxjair ervox uanaxx lywlyr dngg. Narr iurqycc tak byy uann, marr iauxx u au .zit, dua au .zit, dua dua au .zit…, be-liauw-be-jin.
Srinx-Ter
Qau dutdud ee tang’axvor an’ siangvingvnix ho’ngg tuah uaw .laii, uirdiyhh beh jac zit, jit hongbin marr uirdiyhh subit. Vangqingx-lai ee denrhuew qngx ngiawngiar. Zidtauqngx iong qyckacc je dy’ benw jnii, dyrr jit vo be anwsngr .did decc huiwkir. Liammix hunn laii hiyckax, kacdingg aw qaqi beh qniasuaw. Ing den rair kaix jnii. Beh dua pax iacc ser pax tangx jairr langg' ciauu, benw kuawlu jitt hxang hitt hxang, kangkuer u juwsimx kacc jyh u sxid.
Uerqax byy ingg decc cuann sikliau, jid’err giac tauu, knuar diyc binrtaujingg ee javolangg qui’ sinkux snxax trngr qaxx cunx jit niaw angkamwsig ee lairdexkor. Bagjiuzinn jurzendig duer javolangg ee sin’ngiaw isuaw, uerqax m qnaw cinwcaiw dinxdang, qaxnaxx lenrr cuanxkuir dy’ jiokk sewzi.
Qngqut-q. ee puebah, m si vec secseh, marr be ox ket ket, u siyxkuaw uaw qavisig. Qutqeh byy qaiww angwjangr, qinbah si jiokk dingrjnix ee kuanw. Javolangg siksu tec .diyc kir jywvingx duxx tewgnow, Daiuanhuer zi-jap-veh, snxax driaux lehh vutjiw aw subunn, snxax trngr liauw liauw, javolangg ee iaxsingr cangr be diauu.
Decc tagceh ee sii, haghau sensnix qiyr .laii ee modelu, u sir-jap gua :ee, u zi-jap tongw :ee, itvnuadig, longxx viw hagsingx kacc je huer. Danw qaur vidgiap cud siarhue, beh rue doo, modelu diyhh qaqi kir cue, sniu’ siauwlenn iacc si kacc u huer :ee, uerqax longxx byy air, beh uaw snax-jap si ix siongrqaiww qac’ir ee niqiw. Uerqax huewtauu jit nii jit nii qatnix, uervo dingxquann ee langg berdangr laursniur. Jongw iarr u jitt jit zit, kaix jnii cniar ee modelu viw uerqax vunxlangg kacc jiyw huer.
“Liw jiax qaxnaxx byy snaquir. Guaw snxax beh kngr dirr dyhh?" Modelu mng.
“Kngr pongwiw, iacc si qixdyh binrdingw, suijai :liw.” Uerqax dab.
Snaaxkor liyc aw jih jih lehh qui’ tac kngr druar pongwiw binrdingw, tngwciacteh qapp jabow uerqax dirr vangqingx-lai, javolangg kia jniar jniar, viw vingsiongsii iauxx kacc tringg. Hro gersudqax cniar jyr modelu kiyh siauxingw, qinaxzit m si qxex tauu tii. Uerqax, diaukig :ee, liap jiyhqyang’aw :ee, jitt xee vyr hitt xee, siongsiongg u gersudqax kar denrue laii beh siy’ cniaw. Zit .sii dirr denrjuw qongsix jyr genxqiuwuann, modelu sngr si jywtexgue, vnuar cuwbi :ee.
“Sniu beh cniaw liw jyr guaw ee modelu, lexvaiwsii aw nng qangx dyrr u qauwgiac. Mrqycc berdangr cing snxax, ersinx marr diyh’air teh teh. Liw e iongg .did bor?”
Jriab diyc jabow uerqax ee denrue, sriu cniaw :ee u decc diuduu. Dirr jaboxlangg binrjingg tngwteh, jitt jiongw qinggiam ix byy kueckiamr. Qui’ sinkux ciah diaudiauu vangr lecc ho’ngg jinn, sidjai u damrvyc aw… hitt hy.
“Liw sinkux hiongr guaw, bin uat hiongr txangx-aw hitt vingg, juser jairr liw viw, kia lehh dyrr hyw.”
Sriu jaboxlangg jixhuix, u liyc aw be quanwsir. Ixx ix ee singwpiah, hiangwsii jnuaxngiu e dac’ingr lehh? Si sriu uerqax hitt vxag kngr dirr bixsudquanw denxlamw ee doo inxcua, c.-cebee-b.? Iacc si kyxlenn ix jit xee ee jaboxlangg qodiauqinx, byy-dah-byy-hnua byy soxx qruix? Huanrser, si uirdiyhh ix hitt dnxua vecvuic byy herlyc ee luanjingg decc qamxkair, a.-ai’uanr-u.?
“Liw u beh bongx knuar mai bor?” Modelu mng.
“Hnaa?”
“Guaw ee sintew liw u qorr ciuxqud syluac .quer, lyc vid qamxx m si e kacc kuair?”
“Marr birvid. Gersut ee mihqnia vunxjniaa dyrr vnuar siongxsiong :ee.”
“Jiauww guaw ee lixqaiw, narr u jinjniar knuar .diyc, tniax .diyc iacc bongx .diyc, cud .laii ee jokpinw e qyckacc u sniwmiarlat jiacc driyc.”
Uerqax simqnuatauu decc qunxlingr. Sniu laii kir dyr u .jit .quw .aw, hyxdnaw ciuw qra crunx uaw .kir.
Javolangg diam diam byy jyr sniax quwjai ix bongx. Uerqax ciuxqud laii beh qaur qaixvnix, tamwhiamw jitt sii dongwdiam, byy qycc hiongr jingg.
Ho’ngg bongx :ee sui’ u diwqag .diyc, qinxmew qra uerqax ee ciuw jangx diauu lehh, byy beh hro ix dirr jitt xee siiaur pah tewdangqow.
Uerqax diyc cniqniax, qarkiw qiklat beh liongr jauw. Pacnuaw .jit .quw, kacc qongw iarr javolangg ladtauu kacc vaw. Jabow :ee niurciuw, go qix jingxtauu-aw qra javolangg ee diongqunx qnivnuar diauu lehh, vangwsimx decc qamxsiu javolangg ee siyx hyhyx, ding tictih.
Qnaxx si qaur qaxx javolangg ee qigkamw :ar, byy cing snaaxkor :ee qra taujingbin ee siyxtew lamw uaw .laii, tauu ngar .lyc dyrr beh jimx.
Be kamx did qycc tewniu, uerqax dywlunx hniuw .jit .xe, jin buxlat iong ciuw qruew qra sag .kuix. Javolangg vorvinn kia byy jai dngwlapje dirr pongwiw. Naxx cincniu decc jauxluan, jaboxlangg c.-conghongg-h., qunwqunr jauw lirkuix qaqi ee studio.
Liap'ngiaxsux V.S. Modelu
Ciu’ia, guehqngx jiyr setangx. Denxlamxqingx ee denrhuexpok'aw tangx vixping guehniuu, uree ingmuaw, uree guehbaii-hxingg; vnivnii lak-jap jxig ciy .lyc, jitt vingg jiokk qngliang, hitt vingg guec ng ng. Snax-jap gua pnee ee kongqanx byy kuah, knuar e diyc snuadingw ee janhunn, zittauu vnuar dimm lyc haiw, dua kuix ee yhuex qapp quann duw tnix ee ciurongqongx, hiyc-aw lag liauw li.
“Urngiaw itdoxid :ee dyrr driyc. Iarr bogquair dag’ee sxaix :ee decc qra cinghox”
“Tniax qongxx ix hib jiaxee siongwpnir, taubuew snax dxangx dah dah, simsinn qapp jniginn longxx kaix jit vew .kir.”
“Jex guaw beh sinr. Vadd hxang singx benw lun kiw, qanda’ hiaxee filmu, qongxx dyrr iong qui’ cingx kunn ne!”
“Gersut qeww qimaxqag tiap .kiw .laii .ee, liw m jaix? Kacc danw narr u knuar diyc qac’ir :ee dyrr qra qauquanx, lanw m tangx qycc qa’ngg jamrqer.”
Amwtauu aw venwtnix, guec hnraa ohunn byy-sii-byy-hrau. Qajair lordingx jiac den, byy hunx hyw tnix iacc pnaiw tnix, guehcex iacc guehdew, dagg amr dongdit.
“Lanw qra vyletangx qnuaix .kiw .laii, hyw bor? Guaw siyxkuaw decc uiwqnuaa.” Ciacsinx-lortew, bin dir jit xee siauxquixaxkag, modelu naxx qongw naxx decc junr.
“Jitt kunn cunx kacc byy jap dniux, hib liauw jiacc qongw.” Liap’ngiaxsux byy ingg decc liac jiaudiamw, inwcuir, tauu iarr byy giaa .kiw .laii.
“Duiwbin zinqecur ee lordaii qaxnaxx u jit xee ongiaw. Qamxx e si u langg decc qra lanw taux knuar?”
“Air knuar jyww inx knuar. Hib jiaxee siongwpnir, quibuew dyrr si beh denxlamw :ee.”
Ciak! Ciak! Jiacc qongw suah nia, jaboxlangg siauxtew ee hing’ngiaw iurqycc ho’ngg kiyh zip kir hipsiongwqix lairdew.
“Liw jingquer hib ciu-aw qapp huecauw, ciuxlo zuxx laii zuxx lauxdaur, siarhue marr jiokk qra liw kingxding. Qamxx jniasit diyhh ngua hib jex? Simxmih kuanw langg e brew?” Modelu bin-aw iux decdeh.
“Guaw jiaxee jokpinw, sii qaur si beh dirr dua qingx bixsudquanw denxlamw, m si beh ciax kir iarci-aw huah jit-vah nng-vah. Ing’amr, Daiuann ee gersut dirr jiax beh u dua jinwig.”
Qongw suah, liap’ngiaxsux kir kuix vingsniux. “Liw sinkux ngar .lyc, ciuw pag dirr tokax. Jitt qix qetuiw liw qa lehh, bin uat hiongr qniawtauu.”
“Jex bah iauxx cnrex :ee!” Modelu bin cnex sunxsunw.
“Snesingg si cnrex :ee lor. Byy, liw qamxx bad knuar quer sraix jiac juw sik ee bah?”
Jiksii-jikkig, liap’ngiaxsux qniaa uaw .kir, dyr ciuw qra modelu ee taujangx knaiw .kiw .laii, jniar ciuw tec jit qix qetuiw, siongr junw junw anww modelu ee cuiwkangx gne jnrix .zip .kir. Vunxjniaa jiauu ser xee aw qniaw ee cuir, suacc qringx qaxx dua dua xee.
Cuir ho’ngg trad diauu lehh dyrr decc pnaiw cuanxkuir, jid’err pnri, qeww bah ee cauwhenr. Jidsidig kiw ciacsimx, dnewlat qra javolangg ee ciuw sag .kuix, modelu jongg zip kir venrsow, binrdar vrag .lyc .laii, sisisuarsua tror qaxx qui’ qingx.
“Byy jaidiau, jingrr kixtauu liw dyrr m tangx qra guaw rinw, guaw tangx kir cue vadd langg, kacc benw decc pacsngw guaw ee dexpnir.” Liap’ngiaxsux qongw suah, obah tac lehh, uad lehh cud .kir.
Kniavyc ee sinmia, duxjiah auxtor sniu’ cud lat, modelu bagkox cilunr-l., m jaix si bagsaiw iacc bag’iuu. An’ tokax vreh kiw, uaw kir juixdyrtauu beh srinn juiw logcuir, vut’ir, knuar diyc qniar-lai :ee taumngg samr iaria bersux samsaiqauw, byy-sin.-byy-caiw, uanxzenn jit xee lau a’vyy.
Bagsaiw dih lyc hxingx-jingg, dagg dih dy’ zinn ~ ~. Jingg angx cak vanxue, ingquer, iarr jin' air bow ee sindangg jyr knuawvan. Qangrkuanw diyhh henwhingx-henwqah, jingg angx be qiyr ix viw jit quaw juser jiokk harjen.
Jap-qauw huer pnai vauhok-aw duer langg' jauw, cingcunx siauwluw qapp guarqex dng lortauu. Liauxqed zi-jap gua dxangx ee huninx, vnuawlyxlau ee jaboxlangg qra qniaxzii vangwhe, simx qengingg beh qapp aiwzinn-aw juewduix.
Uih jit qix huanaxhuew, par .jit .xe dyc .kiw .laii, jitt qingx cur-lai ee negatif beh jongw cringx. Huexjic nar lehh nar lehh, hingr beh jiac ee mic m na dexpnir.