1. Uanbuanw
Jrer-id ee angngex-aw jiokk qiapknii, vutsii srenx beh ho'ngg py, uanx dangx uanx saix, e.-elee-l. Juw jit dxngr vng iarr diyhh qra ngai lehh, be li kax li ciuw tihh. Nng buew dyhii jenx qaxx berdid tangx qinw sik, a'Buanw :a simhuew iam lewler. Huexdniaw purpu qunw, guarkauw langkectniax ciangrciang qunw. Go huer :ee qapp lak huer :ee decc siy' pah, snax huer :ee cam' sir huer :ee decc ciaqiaa.
"Mair qycc caw :ar. Cuwquar qiongbeh hro linw henx .kuix .ar!" Hii-aw iong cenxaxdniaw jenx hyw pangg .cud .laii, a'Buanw :a sunrsuar huah ginxaw.
Qnedngr longxx dirr jiahvngrdyh :ar. Ginxaw ee laurve iauxx bue dngw .laii, dyckamr kamr lehh, cair kacc be hiacc kuair lingw .kir.
Ang'axmngc ia qaxx qui' siwqer, tokax qycc longxx sapsew. Ginxaxlangg gauu congr lacsab, duarlangg vniar be hur inx uer. Qui' cuwqingx amsixjamx, knuar diyc si akjag qaxx, a'Buanw :a beh dongr qaur qui' din ginxaw jongw kir kunr, sii qaur jiacc laii jyr jit xe kiyh.
"Guanw zi-hniax qongw sewhanr ngix-aw kacc qoxjuix. Inx ang'axbow e dangjee an' Zidvunw dngw laii Daiuann qra memex cua .dngw .kir."
Angsair ee zi-hniax druar dirr Osaka. Sewhanr memex jiacc muaw guec, ix dyrr kar qokjer-denrue laii beh kid ginxaw quewqix, suar .lyc, suacc byy-dongr.-byy-jing, byy-im.-byy-sinr .kir.
"Liw cenban m hyw kar denrue kir qra inx mng oox. Qnaxx jniasit :ee lehh? Guaw quii jap guehzit ee iuwngex-aw beh vehvec hro :inx, qycc diyhh syx .langg luac .langg jit cud?"
Qongw liauw qongw, jyr bow :ee si cxenx dinglingg, bxan jiokhur. Jyr angx :ee pen' pen' aw m tniax bow cuir, amwjni kar dngdoo :ee .kir, jid'err tamr, jiacc jaix inx ang'axjiaw huanxquar :ar.
"Guanw zi-hniax qongw inx angbow longxx u huer :ar, qniax ngix :a kacc duarhanr .kir e py byy hxuad. Inx qongw beh air duarhanr :ee, snax~sir huer iacc sir~go huer aw longxx hyw, qiyr lanw singx qiar quaw siongwpnir kir hro inx knuar mai."
"Benw, jiax ee langg byy beh ho'ngg kyy!" qui' vxag huew, a'Buanw qorr iong ziongw :ee. "Zidvunw vyy-aw be snex. Guancox lanw si duar diyc linw hniaqyx ee binrjniu, sniu qongxx vunx jit xee hro :inx jriab hniuenx, jriab hniulohni. Jaboxqniaw cri qaxx jiacc duarhanr hro inx kiyh ven :ee, inx qycc beh qingw!"
Me huanrr me, siongwpnir marr si u qiar .kir. Dirr Zidvunw ee ang'axbow knuar qac'ir dua :ee, qongxx tingwhau nii quer, siyxguec, dyrr beh laii qra ginxaw cua .dngw .kir.
"Ing'amr naxx jiac qaxx jiacc huwzu?" Angsair dac zip mngg, dyckamr henx .kuix sui' dyrr mng.
"Lanw Jiydi :a diamr cur nirr qycc jiac byy quiw dxngr, dniardiyc rair cuann kacc pongpair lehh." Qongw ee langg bagkox angg angg, bagsaiw qiongg zimw lehh, mng angsair inx hniaqyx binaxjair dangsii e qauwui.
"Qongxx si jre ervox nng diamw ee huelingqix. Liongriog aw, qaur Daiuann duxhyw hur jiac amr."
Duarser hanr qiyr qiyr laii jiahvngrdyh, duxx dorjer :ee iarr u buxqniaxiw tangx jre. Go cud cair, jit dniaw caiwtngx. Nng xee daurlangg qah sir xee vnuar ginxaw, jit der ser der ngidyh-aw jre qaxx ehjnix-j.
"Uee," denrue dann, a'Buanw :a nguaxdi kngr lehh sui' kir jriab.
"Cniaxmng Uann Buanw Luxsu qamxx u dilehh?"
"Lanw dyc'ui beh cue?"
"Guanw jiax ludsux surbursow, beh qra ix tongdix qongxx, ix ee cinqox u vangr ciuxbuew beh hro erunn. Huanrnarr si dingqir Uann Buanw Luxsu ee jaboxqniaw, ix beh muixx jit xee jit-vah-bxan hro inx quijiu."
"Jit-vah-bxan!" Tuax dngg sniax, a'Buanw :a liyc aw gonggniac.
"Si'angw kar .laii .ee? Sniaxmih jit-vah-bxan?" Angx mng qinw qinw.
A'Buanw :a byy qra rinr. Angx qra denrue jriab kir tniax, liammix quw, bagbaii liapqingw, sui' dyrr vnir cnix bin.
"Linw jex longxx decc qa'ngg venw :ee, beh sut langg' ee jnii. Qycc kar, guaw dyrr vyr qingxca." Angsair dua lat qra denrue quawdng.
Byy decc qra jimjiog tniax, hnuaw hnuaw, a'Buanw :a sniu kiw diyc jiokk quw byy laikir ee a'qox, qo' jit langg druar dirr Daidangx, gin javolangg, qui' dai langg byy qewangx.
"Liw qiyr linw zi-hniax benw laii :ar. Lanw Jiydi :a beh lauu diamr lanw sinkuvnix, byy beh hro :inx." a'Buanw :a knuax knuax aw qongw cud cuir, id-cringx-zi-bingg.
"Liw decc huandenx kiw gongrsniu! Hex dyrr kar laii lauxpenwsud :ee," angsair singwde giaa .kiw .laii. "Lanw u go xee jaboxqniaw. Liw sniu qongxx jit tongx denrue laii, jaboxqniaw dyrr tangx uaw syh vunx jnii, lanw daux sui' qex go-vah-bxan cud .laii?"
"Liw jiacc decc huandenx!" a'Buanw :a duiwcuir rinr. "Sni'ngiuw jit xee qniaw duarhanr, jit-vah-bxan beh tacc u qraur?"
Nguaxdi qycjaiww pangg kiw. Vngrcair dirr a'Buanw :a cuir-lai vro, viw did duxjiah, jinw muixx jit cuir dy' hyw-bi-hyw-sor.
2. Kuix Bak
Jurr snex cutsir jiac qaur jinw duxx juer jabow, a'Muii qinaxzit jiacc sngr kuix bak. Cocox knuar qnir diyc jitt xee huahuax-sewqair, qycc tauu vaiw an' qniar-lai sigsai diyc qaqi, a'Muii kow byy erdangr dngw kir jyr cnemee :ee, bagjiupuee mair qycjaiww vreh kuix.
Ixjaw, a'Muii jiabjiap qra verbuw caw beh ciuxsut venr bak qngx :ee. Viyx nng kax hue'aw, sirduarlangg jnii kuanw u jioksor. Yh liuxlak ee ganxkyx-ciuxsut, tauu jiww buew s.-sunrli-l. Jin' byy gii, uanbingg suacc si jit dniuu kangx hnuahiw.
Diongtow jin' suiw, sokqed ee pni-aw jiokk lringg; bagjiux dua dua luiw naxx cincniu suanrjiyc e sih; vec sicsiag ee kixgee dngg :ee dngg dew :ee dew jiokk jingxjee; iuwzi ee qihux, sanxsyc ee siauxtew, taujangx dngg ~ ~ qycc jiokk iuwsix. Qoxceh lairdew ee suiw qoniuu, jap ji' veh~qauw si jitt kuanw snedniux. Binrqniar giaa kiw, a'Muii jiax jinn, hiax knuar, byy qaxx jit xui duiwdangg hro ix jiokk jnia' auwnauw.
"Ix snex jyr hiacnirr aw suiw, kyxviw senluw ha huandinn. Jit xee endauqud qycc hyxgiac ee siauwlenqex, byy kiwhiamm ix bagjiux byy knuar .qnir, itsimx-it'ir beh crua cnemee ee suiw qoniuu-aw jyr bow, byy langg dongr ix e diauu."
Bagjiux byy lorsaiw, taukag jiokk uahdang. Dirr ingxjun oamr ee sizit, bangrsiongw jit xee suawjiab jit xee decc vuh ngiw. Qimzit dac zip qongbingg ee sewqair, jaxjingg ee bang, jit xee jiapsuar jit xee decc siyc .kir.
"Snex jyr jiacc baiw, beh tacc u langg beh air?"
Quewongw ee jiongxjiongw taiww vutkyw kamx, diyhh qinw danr danr hniwsag kacc si. Ving'iuxpnua vnevnee cnemee :ee, qycc qauvuee si qex liauw sii. Diamxzirceh qycc dexkngr e qex dinr xui. Jit jiah pnua ix cutmngg ee qxauw-aw marr beh sangr langg' cri. Ix jinw bak qngx :ar e tangx knuar lo. Cur nirr narr u qxauw, ajamx qiamx huiwciuw. Guanvunw ee miaa marr byy air dic. Quewkir diyhh cringx hro li ~ ~.
Bak qngx liauxau quer jap nii, longxjongw ee haggiap uansingg, cud siarhue, tyxjuanw mrsaiw kyr tuiqunn-liahlingg. Qinaxzit beh kir ingwbo ee qongsix, m si tuantongw sanxgiap, si decc jyr henrdai kyqix ee singliw. Danw beh INTERVIEW :ee jre jre qui' let. Javox jabow jidvnuar jidvnuar, cing'itsig longxx siauwlenn :ee.
"Aurciuw iauxx u qui' jap xee tangx qingxsuanw. Mrqycc, guaw quatding beh caixiong :liw."
Qongw ee langg snex jyr vutjiw aw viaudir, cing sejongx qad nektai, kanx jit qix ozinn bagqniar, damrvyc aw sinvir sinvir. Ix dyh-dingw u jit daii denrnauw, kingkag jin' hiqii, qapp itvnuax :ee byy siysiang.
"Qamxx hyxser qra liw cingxqaur si uirr sniaw enqor?" Mng ee langg ciywsinn muaw bin.
"Lanw ee sanxpinw si beh hogbu bagjiux knuar byy :ee. Duxjiah qapp liw pyxliok aw qrangw .jit .xe, huatqenr liw duiww cnemee :ee jiokk u donglixsimx. Qycc,...." tauqelangg ue du. "Liw ee qongxue-sniax hro guaw sniu kiw diyc kacc jaw ixjingg jit xee ginxaxpnua. Ix bagjiux kir ciuxsut liauw, juann byy laii siy' cue. Qaur dnaxx guaw iauxx jiokk siauwliam :ix."
Tniax qaur jiax, siurr caixiong :ee ciywsinn jiauu byy .kir.
"Liw bagjiux narr knuar u, qamxx iaxqycc e laii cue guaw tittyy?"
"Hex soxdongzenn lor. Ciuxsut narr u sunrli, guaw dagg qangx kanx liw kir sanwvo. Narr junw sitvai, lanw qangrkuanw iaxx u Ox Pni :ee qra lanw cuarlo."
Javox jabow ee ginxaw-sniax, jit qxur laii, jit qxur kir. Ngiaw ngiaw aw, si jap gua dxangx jingg ee qiwdii. Sinx tauqex jre dirr ix binrtaujingg, jit xee taulo ven ven. Beh druar iacc m druar, dna'aw siurr caixiong :ee jamxzenn aw diuduu.
3. Gong Diongx :a
Hniaqyx an' ginhangg dngw .laii ee sii, Gong Diongx :a dngdecc saur de. Ix saur beh qui' diamxjingx u :ar. Ejaiw hongx u kacc taur, mngkauxdniaa ee ciurhiyc-aw lag byy tingg, sen' saur dy' be liauw li. Gong Diongx :a jyr kangkuer jiokk dingxjinx, jid'err huatqenr diyc u hiyc-aw lyc de, sui' vniar kir qra saur zip vunwcniaw, jit kig dy' be tuatic.
"Guaw m si jurr cutsir dyrr jiacc gongrtuc. Jyr ginxaw ee sii u jit vaiw huad zet, taukag siyx jit xe padaiw .kir."
A'buw jairsnix ee sii qar ix qongw ee ue, Gong Diongx :a itdit longxx qir diauu diauu, bersux decc liam quaquad, qycc longxx byy lauwqur. Venrnarr duw diyc byy sigsai :ee, ix ciangjai e qongw dairsingx, beh danw langg' mng kiw, hex dyrr pnaiw singkir lor.
A'buw qer hro a'vaa ee sii u qah jit xee jinglangqniaw, kiarr Gong Diongx :a siang buw qycc ve ee a'hniax. A'buw qau vnertniar. A'vaa si tewgnow ee lau o-aw, sindew jiokk iongxqnia. Lau angx jniw vyy, siangx langg cax zi-jap gua huer. A'vaa veh-jap-zi huer lau .kir, a'buw qecdngw nii simjongrvne huatjyh duer lecc dngw .kir. Gong Diongx :a byy jaidiau tyxtanr, cur nirr iauxx u jit xee hniaqyx tangx soxtenx sngr hyw qaijair.
"Inx zinbinpiyr si zuarr dua ngii?" Bow decc mng angx.
"Viw lanw kacc dua lar. Nng dniux nng-vah kox ee sindaipiyr iaxx ngua byy zinbinpiyr jit-vah kox." Angx trow duarkuir.
"Lanw ee nng-vah kox langtaujauw dingxbin qamxx m si inr Jniuw :ee?" Bow qycc mng.
"Si dyrr driyc m," angx duiwcuir rinr. "Sniu diyc sidjai dyrr enwkir. Jaxjingg si beh taii dix banw xmoo. Jitmaw suacc diyhh pongw jit tac Jniuw Qaiwjiyc kir ngua Moo Digdongx dngw .laii."
"Enwkir, berhiangw mair kir."
"Liw qiycsirr guaw decc air kir? Jinw dirr Daiuann henrhen dyrr pnaiw juanxjiac. Jex liw iarr m si decc m jaix!"
"Liw qaqi jit xee kir hitt vingg jurjai-siau'iauu. Guaw diyhh jiuw diamr Daiuann qor linw lauxser :ee."
"Liw urngiaw jaboxlanghuanx neh, sen' qongw dy' be huanciax. Lau :ee qra cur quer hro cinsniqniaw. Lanw cur beh qa'ngg kia, langg byy beh qa'ngg qor, qamxx qongw erdid quer?"
Hniaqyx qapp hniasyw decc dakkee, Gong Diongx :a dirr vangqingx-lai, dagg qxur dy' tangx tniax qaxx bingg ~ ~, uree tniax byy snaw u dyrr urngiaw. Moo Digdongx si qiongrhuiw, dua pnaiw langg, jex ix jaix. A'vaa jairsnix ee sii, qniwnarr qongw diyc jitt xee miaa dyrr qargee-cetciw. "Taii dix banw xmoo" marr jin' jiap tniax. Jingcax qongxx jitt qxur, Gong Diongx :a jairlaii dyrr bongx byy liau'axmngg, qycc marr pnaixser qra langg' mng.
Jit tongx denrue laii, a'hniax iurqycc cutmngg .kir. Gong Diongx :a vakdow iaux iaux, air beh cue a'syw tyw jiahmic, kir qaur inx vangqingx, suacc huatqenr diyc a'syw bagkox angg angg, pnirtauu marr angg angg.
"A'syw, liw nacc decc kaur?"
"A'syw si qniax linw a'hniax e qra lanw vangr lehh, jiaxee Moo Digdongx juaxpiyr qnrua lehh kir hitt vingg sanwsimx aw kaix." A'syw naxx qongw naxx decc cngc.
Angsair ee hingliw kuanw qaur jit xee kamxjam, a'syw kir jauwkax cuann vngrdngr, lauu Gong Diongx :a jit xee dirr vangqingx.
"Dangsi'aw liw dyrr si Moo Digdongx or! Liw jitt xee dua pnaiw langg. Qinaxzit dyrr beh qra liw qaixquad danwsag."
Jit tong juaxpiyr siangx ciuw pongw lehh, Gong Diongx :a qniaa kir qaur qimloo-vnix, sewzi aw si.
"Au huee vaiwvair, duxhyw jurr jiaxee siyx hro a'vaa qapp a'buw, mrbenw qycc brew qimjuaw. A'vaa dirr tnidingw unxdangr jiokk hnuahiw."
Ginpiyr jyr jit xe qra danr zip kir qimloo lairdew, duewciuw qra quar kamr hro bat. Gong Diongx :a jiokk iangkir, tauu vaiw huatqenr qaqi iarr u jingqongx ee sii, jit sud aw dy' byy gong.
4. Ziog
Vuitunw laurve crua ew bow, snex qaxx Hanwsingx :a jitt xee exqow qniaw marr sngr qaizenn. Sentenx vutjiog, lyc too cutsir diyh'air qeqiamw vow. Hanwsingx :a beh dngw duarlangg, kiarr qokhau-aw singqib beh tak qokdiongx hitt dangjun aw, a'buw e jnuax cnecauxiyc-aw hro ix limx gauu duarhanr.
"Ceh tak u quann, jnii tanr e je kacc iauwqinw. Lakde vaw vaw, qniax crua byy bow? Hro hmlangg ziog decc jauw dy' e or." Jyr a'qongx :ee jingxsniax. Hanwsingx :a ee a'buw jurr anxnex byy hiacc jiap jnuax.
Tagceh-ginxaw rair vniar kyxcir tangx diauu hyw haghau. Jingwqingx hro Hanwsingx :a vniar diyc Daidai, iang byy vnuar dxangx, jaboxginxaw pna byy vnuar xee, hen sangw be kiw .laii.
"Guaw m si hiamm liw ew. Guaw ree-aw longxx quandah :ee kacc je. Cinwcaiw qingw jit siangx cing, guaw dyrr viw liw kacc lyr, anxnex nacc hyw?" Jit xee Hanwsingx :a jiokk qac'ir ee jabow dong'yc qapp ix tiacvec tywdit qongw.
Hanwsingx :a utjud qaxx decc sniu duanxqenr. Banglo-dingw m si jinx miaa jniar sner, huiwhuw ee ue qui'ee siaw .cud .kir, jerje bangriuw laii qra an'uir, qiyr ix m hyw lokjir, uree qycc jiokk hyw simx, qar ix be jiyw vorsor.
"Javox :ee dua qaur zi-go, guanw sirduarlangg longxx marr anxnex qongw. Siujuiw be baiw, u ditlat iacc byy, tniax qongxx qycc gua guec aw quer dyrr jaix."
U tniax bangriuw ee cuir, siuu kacc byy vnuar dxangx, Hanwsingx :a tiux quann quixnarr qonghunx, dua qaxx knuar e diyc, kacc sux dacsimx :ee jaw jaw dy' ho'ngg ziog lecc jauw :ar.
"Suiw qoniuu-aw jermixmuaw. Dnaxx jitmaw erdangr qapp langg vnee kia dyrr byy decc qniax :ar." Hanwsingx :a duiww qaqi qongw.
Haggiap uansingg, diyhh singx kir jyr vxingx. Cud siarhue bai taulo, kacc siongr dy' dua qingx qongsix. Hanwsingx :a guarbunn knuar u lo laii, mrqycc cuir vun, Inggiw be lauxdaur kacc kikkuix. Kaix dua jnii cniar jit xee u quer qiamjuiw .quer .ee laii cur nirr id duiww id. Snax~nng guec aw quer, Inggiw siacsiah qiyr, jaboxving'iuw suacc kir hinn diyc qar Inggiw ee sense. Hanwsingx :a jnii liauw, cit'aw iuguann siuw be diauu.
"Inggiw e tongx, tnide-lai jairr guaw jongg. Jnii tanr dua vah, sniaxmih kuanw sewsu dy' hyw lixlyc." Hanwsingx :a simlai decc sniu.
Jniawjniar hro ix liau qaxx driyc ~ ~, Inggiw laur .nng .qxur .aw, langg' siy' jnex beh air qra cniar. Siongrvanx dagg qangx dy' cing sejongx qad niaxduar, druar jit dxangx giabjig jyr u qauwgiac, qongsix qycc puer jit daii sir-lenw :ee hro sraiw. Qinaxzit ix beh ingwbo jitt xee vangvan tangx hro ix cepair. Hylyw iacc Kecqax vutciangjai, siauwlenn cingpiaux :ee jiacc erdangr laii INTERVIEW. Jitt diap dirr Hanwsingx :a binrjingg jre :ee si jit xee Rukai ee qoniuu. Qoniuu-aw qix hniux siyxser, qenngrbin, bagjiux ox luixluiw. Hanwsingx :a zusuwbang hermia jyr, simqnuatauu amr jubuix.
"Liw ee resume dingxquann siaw qongxx, liw qaqi jit xee laii Dairvag, qowhiongx dirr Lamm Daiuann Vindongx. Liw jinw m dyrr decc qa'ngg suewcur?" Hanwsingx :a jin' hnowhenn mng kiw.
"Guaw jit quaw qurviauw :ee kiw laii Daivag quixnarr dxangx :ar. Guaw qenwnarr jnriu vag, longxx e kir hiax qra inx jiycduar."
Hanwsingx :a bunciyr, dimr tauu, suar mng ix qo' srinx laii ingwbo taulo e qniax .be.
"Qinaxzit si guaw ee javoving'iuw pnua guaw laii :ee."
"Javoving'iuw?" Hanwsingx :a bin huanw cnix, iw-aw hiamw jre be diauu. "Liw duxjiacc laii Daivag dyrr qaux diyc javoving'iuw?"
"Ix qapp guaw druar qang vorlok, guanw dauwdin duarhanr :ee."
"Ix iarr beh laii Daivag huatdenw?"
"Ix snex jyr ox qycc cox, Inggiw iurqycc be tongx, laii Daivag cue byy hyw taulo lar," siyxjiaxlangg qaqi qongw qaxx decc kiw air ciyr. "Ix jitmaw qapp inx hniaqyx decc yc jyh iuxqix :ee, cansid jinw dng' je. Guaw qiyr ix benw laii, ix qan' qan' aw be hongwsimx. Ix liammix dyrr beh jre huexciax dngw kir Vindongx."
INTERVIEW liauxqed, Rukai qoniuu singx dngw kir tingwhau denrue tongdix. Hanwsingx :a hiongr vanrqongsig guartauu siamx .jit .xe. Rukai qoniuu qapp jit xee bacsig oqimqut aw oqimqut ee siauwlenqex dangjee lirkuix. Qoniuu-aw cing quandac'ee, qapp javoving'iuw vnee quann. Hanwsingx :a knuar qaxx bagtauu qad qad. Jitt xee guanjurbinn suiw qoniuu beh qra caixiong iacc m, Hanwsingx :a simqnuax qunxqunxjunrqunw.
5. Koxjuw
Lak-guec huew siyx vxox, dngrr diamw hongx. Zidtaudaur qyckacc si zuac qaxx be qongw tihh ee zuac. Hokjuann :a 125 :ee kiaa lehh, Daivag Sniaa-lai dagg siwqer lrong, qui' sinkux qnua quwjai ix lrauu. Dur diamr bagbaii-dingw :ee, cinwcaiw qycc qig quaw siy' tnrix, qui'ee dyrr beh dih .lyc .laii. Tranr decc danw cnidingx, qinxciuw qra huee driau, beh byy, jur zip bagjiux-lai, qnua si qiamm :ee, sni diyc si e cak.
Jiacc tniax qongxx jit xee juankyx sidai ee cong'iuw siwqer decc inw taulo. Bersux kir hro quer .diyc, quer kacc byy jit qywguec, suacc diyc qaur Hokjuann :a hro qongsix taii tauu. Jnriu sxiab jiacc qycc decc bai sittauu jyr. Qongqingw jin' buat, siqix baiw qaxx hyw cincniu diauu drew dywdnua be dngw .laii. Snax qycc gua guec longxx byy jycsid, cur nirr u boxqniaw rair cri, jit guehzit ee soxhuir siongrqaiww byy iarr diyhh snax-bxan kox, ginhangg jungunn jit xe aw dyrr beh dax :ar. Huanlyw cur-lai qiongbeh dngrr huexhunx, hyw did cuwvnix decc vyr qongxx u jit qingx jyr kuaiwdiw :ee, dnaxqnia tiutauu, qaqi narr u autobaik, tauqex longxx e cniar, bylun jniw qangrr lau.
Cnidingx :ar, iumngg cuix .lyc beh qycc kixqniaa. Qycc kir jitt jruw qongxx si qongsix ee laurjuxqor, berdangr sitjue, hiycdaur jinwjingg quatding rair puewdat qaxx qaur.
Qrix.....! Vrong!!!
Ngorngix ngorngix ee qiuwhorciax cnuar lo, hnuaii qniaa dit drng, qelo ee cni'angdingx jairlaii hro ix jyr camkyw :ee narnia. Jit daii nng lenw ee 125 :ee vuthing hro ix longr .diyc, qui' ciax ee huewqnia lag lyc tokax pacsnuawia; ciajuw siag dyw jairr de, be-dinx.-be-dang, hunbee m jaix langg. Kacc quer, lingrr jit daii qiuwhorciax qauwui. Ciax-dingw ee horliw-zin'uann iong qorr nngxcngg qra diyhsiongx :ee qrngx zip kir qiuwhorciax-lai.
"Lo rair niu hro qiuwhorciax singx quer, snax huer ginxaw dy' jaix!" Ciuw hnua handolu, Tenlok :a cuir-lai qnauhqnauc liam.
"Vnerngi qamxx e qra lanw kaiduu, qiyr lanw dngw kir jiac qaqi?" Tenlok :a bagtauu pacqad.
"Dnaxx jitt sniax narr qa'ngg longr qaxx puawsniur, guaw jitt siwlangg m juann anxnex kangmaux :ar?"
Simsinn zuu qongqongg, Tenlok :a simtauu luan hunhunx. Vnevnee jitt diauu lo cavutdyx dagg qangx decc qniaa, qinaxzit jitt jua bersux duw tnix, sraiw iarr be qauwui.
Ciuxsudvangg sed dirr sir lxauu, guarkauw ee ixaxui jitt jun u nng xui oksangr dirr hiax jre, jit xee diuu diuu nngw nngw, bin hunw qaxx vec quatquad; jit xee byy-jng.-byy-tna, qui' sinkux covowsnax.
"Sangr .zip .laii sui' jiyr denrqongx, kapuew guarpuee ee siongx qongxx si jniaw jniaw dai, qingqacqud qapp kadangqud longxx dng .kir kacc jiahlat. Qongxx ciuxsut narr u sunrli, siongrr jiwjiyw iarr diyhh qui' lexvair jiacc erdangr tewngi." Cing sowsig ijniuu ee hurzinlangg ciuxqix-aw qongw iux tauu qad bin.
"Qongxx si kir qapp qiuwhorciax siy' jringx. Dnaxx jitt diauu marr m jaix sngr dair si'angw? Si qra suqix tyw? Iacc si vnerngi e jergiac? Kuaiwdiw jyr iauxx bue jit guehzit, jit sxenw go lii dy' iauxx bue niaw .diyc. Jitt sniax narr dair jit kax iacc jit ciuw, aurzit aw si beh kir dyhh inw taulo?" Ciuxqix-aw naxx qongw, oksangr duarsimkuir trow be li.
Viacjingx qinxbanrjiamx siy' tac nng vaiw .quer .ar. Ciuxsudvangg ee mngg kuix .kuix ee sii, nng xui hurzinlangg dangjee dnax tauu knuar. Jit xee sensnilangg naxx qra cuiwdar vrag .lyc .laii, naxx ngr inx crig qin .laii.
"Dycc jit xui si Sunx Taiwtair?" Sensnix mng.
Tauu qaur buew byy-sniax-byy-sueh ee hurzinlangg kixui.
"Sunx Sner sniu' nguar sangr vnerngi, qiur byy dngw .laii. Cniaw liw jet'aix."
Dua qingx vnerngi, jit guehzit jerjiyw u vnerlangg e dirr hitt lairbin qui'imx, dngrkuir. Sensnilangg vyr siw byy dair iu'iongg. Dna'aw siw angx :ee hniwhnaix jit xe dy' byy u kacc hiqii, bagsaiw dyrr qyckacc benw tee kiw.
"Jitt dniux marr suar ciamx .jit .xe."
Langg ongxsingx, diyhh isingx jywjingr. Suar .lyc, dyrr diyc qaur ludsulangg cutdniuu. Hiuzi, quibuew jitt jruw tanr byy diyc, lixcuw ciuxbuexjnii ee singsuu kacc byy singli marr bongxx juanw.
"Ix hitt xee lortauu-bow byy laii qra liw lylenw?" Zirjuaw ciamzi uanvi, ludsux hnowhenn mng kiw.
"Ix hyw dnaw laii qyc," siw angx :ee duiwcuir rinr. "Langg dirr ix hiax diyc jniurbexhann, guaw byy cue ix tyw mia dyrr be baiw :ar."
"Sraiw qiuwhorciax hitt xee siauwlenn :ee, guaw u qapp ix qongw hyw :ar. Au lexvaiwid kiw, ix dyrr si liw ee suzinn suqix."
Siw angx :ee dimr jit xe tauu viauxsi buanxir, suar .lyc, an' vuepaux-aw lairdew tec jit dniux jnidnuax .cud .laii. "Jitt dniux uiwjiawliau jiacc cniaw liw tec kir hro hitt xee jyr kuaiwdiw :ee, dyrr qongxx si u langg beh dairter suqix ce inx :ee."
"Jiacc je!" Ludsux jrih quer ciuw ee sii cuah jit diyy.
"Juriuu buqer." Qnuaxhu Sunx Taiwtair cicamw ciyr.
6. Taux Snex :ee
Jap-zi lxauu ee ludsux surbursow, jit xee vylemngg jiokk hangrdang, cutzip lairgua diyhh siyxkuaw qig lat jiacc ering tihh. Siokluw :a kacc byy go-jap kilo, beh zip .kir hiangwsii, cocox sag be kuix, m jaix qiycsirr mngg sryw lehh, siwqer cue denrlingg beh cic. Qajair, beh cud .laii jiangwsii, buerjingrbue, u langg' ter ix qra mngg kuix hyxser, longxx benw kixdang diyc qaqi ee ciuxqud.
"Byy sniu diyc qongxx inx e jiacc pnaiw tiwtauu." Siokluw :a trow duarkuir.
"Anx lar. Liw jitt qnia si bangw-aw dingr guqag, unw dakdag :ee." Ludsulangg quaww vyxjingr.
"Guaw jitt siwlangg jin vniar dy' vniar jitt dxauw. Narr sux .kir, quan'ig tyw be diyc, binrjuw jin saur lyc de, aurzit aw dirr siarhue-siong e pnaiw kiarkiw." Siokluw :a qongw, iux tauu iux bin.
"Sinkux-dingw lrauu ee hueh be qew tihh," ludsux qongw, naxx qra bagqniar tuh quann. "Jairr inx DNA anwjnuaw giam, jniar qimx m qniax len."
Hyw tniax ue, byy hiamm je. Ludsux ee ciywsinn u tnuar kir qaur kecho ee bin-dingw .kir. Siokluw :a cuir bacbunw, bagbaii ee uahqad u kacc tauw .quaw.
Jurr cutsir dyrr byy laurve, qokhau-aw id nii, cuwvnix ee javoginxaw qra ix gex, qongw ix si taux snex :ee. Siokluw :a jiokk pniwsiw, jit xee jaboxginxaxngix iarr qapp langg' siy' jringx siy' pah, pah qaxx qui' sinkux ocnex ginghueh. Byy pacsngr, dirr ix jyr jap-lak huer hitt nii, u jit zit, a'buw byy-dniu.-byy-dii qra Siokluw :a ee ciuw kanx lehh, qongw ix si mow dua tauqex ee jaboxqniaw, qeqacpo-dingw iauxx byy miaa narnia.
"Diyhh danw linw laurve vacnii liauxau, liw jiacc tangx kir qapp liw hitt quaw qang ve qycc buw ee hniadi-jixmue siy' zin."
Siokluw :a jairlaii dy' jiokk tniax a'buw ee cuir, jongw u gignaiw muaw vxag, jitt quer ix iuguann byy qex qongxue, jiokk vaqed, jiokk tunlunw, lenrr angsair dy' byy hro ix jaix.
Dniudanw jitt qangx taubuew beh zi-jap dxangx :ar, ix si cud quer siarhue, qycc si jyr langg' qeau jyr langg' laurbuw :ee. Qaur-sii-qaur-jun beh anwjnuaw qapp inx vixjiab, kavunw vensniu quer quixnarr vunw quer jit vunw. Jingwqingx beh vnuax :ar, hiwbunn byy beh jiauww ix ee qniaa, cingwjiw cuann cuann qui' dua qnrua, dnua be cud .kir marr byy hau.
"Jitmaw ee langg qau pueangr, taux snex :ee iarr qnaw cimx mngg dac hxo laii decc ziongxnau. Ngua juer si guaw, kow byy cue jit xui byy langg sigsai ee soxjai kir bicbat, zuxx jiyw langg jaix zuxx hyw." Dua-jew naxx moui, qongxue cir giagiaa.
"Linw buxaxqniaw marr jnia' qnaw. Linw laurbuw dngcuex tyw diyc gunw laurve. Guanw daux byy qapp linw qewqaur. Linw suacc doo beh laii vunx qehuew!" Dua-hniax hnuaii baii kia bak.
"Liw sngwvnuaa qycc gauu diak or. Laurve jairsnix ee sii m bad laii iuxhaur, siw liauw, jiacc laii decc kauwauu. Sngr liw u jxingw diyc guanw dowsangr dyrr driyc." Duarhanr simvu qra sngx.
Jiongww langg liw jit cuir, guaw jit jic, sniaxmih kuanw dingwdok ee ue jiauu vangr cud lamx. Bingw how jit jiah dy' dexciuw be quer qausanx-aw jit qrunn, hongwqiamx Siokluw :a bersux jit jiah niauniuu ziiw.
Siokluw :a kar dngdoo :ee decc yc hro inx druar dirr erqangw ee banx ii tniax. A'ii-aw m qramx guersingluw jiahqnix, qongw qaxx krir suahsuac. "Hitt sijun liw berhiangw qra inx rinr qongxx, laurve jit vaiw dy' byy qra liw py .quer siyh .quer, ingwgiac, liw rair vunx kacc je jiacc driyc. Inx an' lau :ee hiax, qanda' qewcua qapp hag cur, qokk langg dy' m jaix ow zuarr je kir :ar."
Zi-veh huer qewangx, zi-qauw huer hitt nii, a'buw diyc vnerhongx, taubuew kacc byy vnuar dxangx dyrr quewsinx. Sxamx-id huer, jaboxqniaw cutsir, iauxx bue dorjer jinwjingg, Siokluw :a vakdow samvutsii aw u qyc'ngiu, kir vnerngi qiamxjax, jiacc jaix snedngg snex pnaiw mic-aw, jurr anxnex be snex.
"Hyw qniaw mrbenw je. Cnia'iongw jit xee ginxaw jiokk siongx vunw. Qycjaiww qongw, suzinn qongsix jiokk gnerdauw, byy tangx hro liw dniardnia decc dua vakdow. Vutviw dirr qongqax-qiquanx, bylun snex quiw xee, longxx tangx hro liw guehlai hiyh qaxx sen, hiyh qaxx qiyr m qnaw." Banx ii-aw tiauqangx qig kuehaii. Siokluw :a simqnualai jaix jaix.
Qinaxzit cingxqar byy siongrvanx, jingwqingx dairjir byy vran quiw qnia qongxx dyrr mngxvox quer go diamw :ar. Jaboxqniaw jinw tak qokhau-aw go nii, juvaux lairdew u jit qnrua cur nirr ee syxsii. Ingxquer kacc sewhanr ee sii, vangwyc diyhh kir ancinvanx danw mamax harvanx liauxau jiacc kir qra jriab. Henrvo duarhanr :ar, m na erhiauw qaqi dngw .kir, qycc jai'ngiaw singx sew biw qapp qingw cair, tingwhau mamax lak diamw aw quer dngw .laii, cair caw lehh dyrr tangx jiac amr.
"Mamax, liw knuar. Vavax py jit xee didix dngw .laii ne!" Ginxaxlangg qenrdiux, ciyr qaxx gi saisaix.
"Ginxaw ee laurbuw huatsingx surqor. Snax huer ginxaw, aurtauu hitt vingg byy langg tangx qra iyci." Tauu damr damr, angsair qongw qaxx hohun.
Siokluw :a dac jinwjingg jimjiog kir qra siongr. Koktauu, nacpni, qapp angsair bersux qangg jit xee pueboo inr .cud .laii .ee. Jaboxqniaw marr kog, jingcax ix pni-aw jxingw diyc Siokluw :a, longxx cangqongxpni.
"Mamax, vavax qongw ix beh kir brew jit dingw bincngg kngr diamr guaw ee vangqingx. Ix qongw aurvaiw didix amwsii dyrr qapp guaw kunr."
Jaboxqniaw cuir ciyr bak dnix. Jidsidig, Siokluw :a jit zri vnuar qxur dy' jrig be cud .laii.
7. Byy Iyc Rix
Qokhau-aw ee unrdongrdniaa uaw cialo hitt vingg, quixnarr jangg ciu-aw jingr jingr qui' let. Dirr jit jangg cingg-aw-kax u jit jiah qu loksog ee suisindyw, Cid~veh-guec-tnix, lauw Oo :ee ziddauwau muixmuiw e laii jiax jerliangg, kunwdaur. Cur lairdew hiphongx siyx hongrhong, cinwcaiw dinxdang diyc dyrr qui' sinkux qnua, qux diamr cur nirr bersux decc hib daurcair. Denrhongx snax~nng qix, kacc anwjnuaw pangw dy' m ciucinr. Denrhuir diddit kiw, lingxkir m qramx kuix. Lingxkir dy' siongrqaiww siongdiong den :ee.
Hongsix-aw jiokk nngxliyc, lauw Oo :ee jre lyc iw, siangx kax siangx ciuw vecsiwtenw, jit xe aw quw sui' dyrr bii .kir. Binn binn aw, u tniax diyc quandac'ee jamr qaxx kogkok qiyr. Bak sarsi, jit xee cing qaxx jiokk bacqamw ee oniaujew dirr ix binrjingg kia.
"Beh tauw .jit .xe bor?"
"Byy jah jnii cud .laii, sinkux byy vnuar sxenw dilehh."
Oniaujew ciyr bibix, qongw, "Qyxqyh ar, liw sidjai diaudit qaxx u cunx neh! Vran dairjir rair bincngg. Huanxaxqingx kuix vangqingx, jni'axtauu siongrr byy iarr diyhh quixarr vah cutmngg. Lanw laii kir linw daux, singw jnii qycc lirven."
Lauw Oo :ee u decc diuduu. Cuwvnix hitt quaw qau-ue-vyy ping gauu qongw langg' ee ing'axue.
"Laii lar, benw qniax pnaixser lar." Oniaujew naxx qongw naxx kir kanx Lauw Oo :ee ee ciuw.
Sianglangg siy' cua qniaa qauwui. Lauw Oo :ee singx kir qra lingxkir kuix .kuix, suawciuw qra tang'axmngg jongw qnuix qnuix hro bat, lingxkir qapp snia'imx kacc be jauw jauw .cud .kir.
"Qamxx hyxser singx labjnii? Jyww liw hongwsimx. Vyxniaw hro liw sngw qaxx qauwkuir."
Lauw Oo :ee kir bincngduu lairdew sngr jit jriw juaxpiyr cud .laii. Jniginn quer ciuw, oniaujew snaaxkor sui' niaw aw vrag, jiokk liabjiap. Cangwpang, Lauw Oo :ee qra jit liap jongwiongg :ee puer jit cuir qunxjuiw qut lyc auu. Kajiah-au :ee danw qaxx byy siyc decc dag jingxqacbaii. Javolangg ee qesix suacc byy-dongr.-byy-jing, be kixvong dyrr si be kixvong.
"Liw jnii hingg :guaw. Guaw byy air :ar." Lauw Oo :ee taukag ngar ngar.
"Liw qongw hex sniaxmih siauw ue? Si liw qaqi be huat'iongg, iarr m si guaw huanxhiaux byy beh hro liw songw." Oniaujew kiw puiwbin.
"Acc byy, liw zimm jidvnuar hingg :guaw. Guaw lenrr lingx dy' byy qra liw bongx .diyc ne!"
Crinr tauu crinr bin, oniaujew an' piywvaux-aw tiux nng dniux aw cud laii danr dirr bincngg-dingw, hngc jit sniax, gniuw lehh cud .kir.
"Dang iyc truix .lyc iarr be ge. Qamxx qongxx jitt dai langg dyrr anxnex longxx kir :ar, vnir byy lenw ar?"
Simqnuax utjud qaxx be qongw .did, Lauw Oo :ee qra Siaurhingx :ee cniaw .cud .laii, siyjiuxvuex juix juix muaw muaw jyr jit cuir qra jraix .lyc. Jiuw kow, simx iarr kow.
"Jarhngx ee vywjuaw liw u knuar .diyc bor? Qongxx u jit xee lau diqyx, iyhjiuw quanr jit xe quewliong, suacc diyc jniurbexhongx, siw dirr kiarviah :ee sinkux-dingw."
"Qongw qaxx inx hiaxee javolangg u qraur genwtauu. Kaix jnii jongwiongg jiacc kir piauu jabow, siangx vingg liauw. Byy duxhyw diyc diyc qamcngx, taixqyx nuarlyy, tauu dnax be kiw .laii. Jywlangg narr qniaa qaur jitt kuanw dervo, siw siw huanrser iaxx kacc knuiwuac."
Cuwvnix nng xee oksangr decc liautenx-liaude. Lauw Oo :ee hnirkangx iah lrai lrai, simqnuatauu hniah hniah, amwjne decc huah "limhiamw-vuthiamw, hyw did qajair."
Kewqniaw sangr iyhsanw kir hro jit xee isingx qowkeh, kiaa odobai, sunrlo laii knuar kewve.
"M jai'ngiaw kewve-aw liw u decc jiac qaiwpnir. Lingrqangx guaw u an' jiax quer, jiacc qnrua quiw quanr aw laii hro :liw. Liw jitmaw decc jiac :ee jitt vaii :ee, diongtywvan narnia. Guanw iyhcniuw :ee u kacc janw."
"Dangsi'aw si qaiwpnir or," Lauw Oo :ee huah cud sniax. "Iauxsiu aw, penr lanw jitt hy ABC ngiubunn knuar m bad :ee, qra guaw qongw si..."
Liamdongsii dac dongxaw, aurciuw ee ue byy qongw cud cuir. Kewqniaw jauw liauxau, be kamx did krir, denrue giaa .kiw .laii sui' beh cue langg tyxvnee.
"Sitlew lar. Hiongwdongsii bagjiux puccih tec m driyc quanr .kir. Guaw binaxjair e jah jit quanr sinx jewiyc kir liw hiax. Jitt tiab narr byy haurlik, guaw tauu dog hro liw junw iw-aw jre."
Denrue qongw suah, Lauw Oo :ee cunhongx muaw bin, simqnuax itdit jubuix .kiw .laii.
8. Jenxliuxaw
Siqix qet, jap qingx diamwbin dyw qauw qingx. Dua qangx byy langg beh cniar, ser qangx iurqycc siongr byy vnuar qnia, bai taulo jiokjiog beh vnuar dxangx, qniaa qaur juadhongniaw, benw vunw ee singliw, a'Vinx :a iarr qapp langg' decc yc jyr knuar mai.
"Jingwhuw jniniuu qra lanw kiyh hiacc dang .diyc. Jenw narr byy quewciuw, laii kir long'aw-lai jiac benw-jnii-vng, marr sngr u qra pnee quaw dngw .laii."
Cuarlorqex si dirr bangrlo sigsai :ee. a'Vinx :a qra ix ee ue junw hyw-dnaw-iyc-aw, crann crann jit cuir qra tunx .lyc .kir.
Niqingw lingw vingvingx, sui' langg havaux-aw iarr jiokk hibii, longxx cuiwjnii, kacc byy dua dniux :ee tner dniubin.
"Qongqingw jiacc baiw, u henaw tangx jenw, ser vah iarr tangx taux ciyr. Narr bongx diyc sinwiongrkaw, qnaw lur iarr diyhh jyr jit vaiw, cenban m tangx draux lehh. Ciuxqix-aw narr kacc qniasii :ee uree vutjiw aw u qrer, luixngua lecc quiw cingx kox aw laii kaix marr be baiw."
Cuarlorqex vangr vo, a'Vinx :a jiokk jimjiog tniax. Iarci-aw, denrciax-dingw, langg je ee soxjai qongxx ginpiyr dyrr je.
"Siauwlenlangg, hyw hyw sittauu m jyr, decc jyr jenxliuxaw." Javolangg bak toxluii, pnaiw cingwcingr.
"Li...liw ovec qongw sniaw? Jex gua...guaw ee." a'Vinx :a qongw qaxx tic tic tuc tuc.
"Lixgee, jaboxlangg cuiwkiw lehh, liw ee! Ciuxqix-aw qinw hnaii :guaw."
"Linw nng xee longxx benw dirr hiax jner siw jner uac qau kauxset. Beh jai'ngiaw ciuxqix-aw si'angw ee m kacc kuair. Ciuxqix-aw hyrbew, knuar linw dycc jit xee u jaidiau singx vyr .laii. Guaw iong guaw ee ciuxqix-aw kar, liammix dyrr jaix su'ngiaa."
Jit xee ozisang cutbin qaixhuar jyr ioksiuw. Vut'ir, a'Vinx :a ciuw nirr ee ciuxqix-aw suacc decc dann. Nng xee surjuw liw knuar guaw, guaw knuar liw.
A'Vinx :a cuanvan beh lauwjauw, ciuxqix-aw beh danr .cud .kir jinwjingg, hariwsikdig qra hyrbew ngiaw .jit .xe. Ngeex! Tacc e si...?!
"Uee?" a'Vinx :a jriab denrue, simqnuax pigpok cingw.
"a'Vinx :a?"
"a'hniax?"
"Hner a. Guaw ciuxqix-aw cue qui' vox quw cue byy. Dangsi'aw dyrr si liw qra guaw sax .kir."
Denrue hitt vingg tauu :ee sniakangx jiokk dua. Bak toxluii :ee kixkax liukiangx, jauw qaxnaxx vuex.
9. Zirqauxmee
Nijiongx-guehmuaw, hongx qapp ho iarr qapp langg' duer siqniaa decc vniar huewdew. Hongx jit jun duer jit jun, ho jit puah quer jit puah, viw hiongg, ping qiongg, denw iongw. Liausiauw qiamx jaulau, mngsniwvanw qapp puar jnghia be kamx did lingdi, siongrr dairsingx qiyr m qnaw, aiqiuu hongho vangr inx jit diauu uahmia.
"Liw si beh kir duehh? Liammix beh jiahvng :ar."
"Cud .kir .jit .xe, kacdingg aw sui' dngw .laii."
Qniaw snaaxniaw giuw quann, uad lehh cud .kir. Jyr laurve :ee jre lun'iw, bagjiux qimx qimx m jaix rair anwjnuaw qra nuaa lehh decc vutdig-kaikiaux. Dacquxaw quer, luxjuxlangg qapp duarhanr jaboxqniaw dngw .laii, nng xee langg sir qix ciuw, dua xee ser xee, qaux qaux qnrua qnrua.
"Liw jingg kax cutmngg, linw haursnex sui' duer kax-au cud .kir. Zirqauxmee, jit xee qex siwsnuar-lirlauc, anxnex qamxx u jit xee kuanw?" Hordniuw kiw-singw.-lrak-de.
"Liw iarr jaix ing'amr zirqauxmee or?" jyr bow :ee dywmng angx. "Cur-lai kangx lylyx. Guaw byy kir jongjyc, cur nirr taucuir go~lak xee ing'amr m cunvan beh suh kongkir dorvaw?"
"Liw iurqycc kir qa'ngg vunx :ar m?" Hordniuw mng, bin aur bin caur.
"Lixdniuw mw :a qniax lanw qui' qekauw-aw iaugy srid vngrdngr, jinwjingg dyrr u qiyr lanw ehngx lak diamw aw quer dyrr tangx kir inx daux kuanw quaw vngrcair dngw laii quewnii."
"Langg' inx si jiac cunx :ee jiacc u tangx hro :lanw. Qa'ngg draur kingg caiwbuew. Liw iarr tiongr qaxx jitt kuanw."
"U tangx jiac, qycc hiamm! U jaidiau, liw kir vran jit dyh laii hro liw ee boxqniaw hauwqox. Benw pongpair, jiac jit xee covaw dyrr ersaiw."
"Hitt xee jabow jit qix cuir naxx hongwsangwtauu, ping air kir vowiongg. Lanw jitt jann, tangx hro ix an' nii-tauu denxhongg qaur nimedaux, cuwvnix-taubuew jaix taur taur."
"Liw vadd hxang qeww byy-iauw.-byy-qinw, dyrr qanda' liw hitt xenn binrdexpuee qor diauu diauu."
Byy beh qapp angsair qycc dapcuiwqow, hurzinlangg uat hiongr duarhanr jaboxqniaw, huanhur ix kir jauwkax tec quaw nguaxped-aw laii drew qnedngr. Jit dniaw caiwtngx liamlyy iong qorr snedniaw drew.
"Jitt daii gasloo uanaxx inx jiyh .lanw .ee m?" Angsair mng.
"Inx sinx brew jit daii denrjuxloo, qongxx jitt daii beh hro lanw, benw qycc tec kir hingg :inx."
Qongw suah, hurzinlangg qra angsair sag laii jiahvngrdyh-vnix uiloo. Duarhanr jaboxqniaw ter siyxdi siyxmue cuann nguaxdi, mng a'buw qamxx mrbenw danw inx a'hniax.
"Benw danw lar," jyr laurbuw :ee rinr. "Dag'ee vakdow longxx iaux :ar. Kir tec jit der nguaxqongx qra ix ee gxiac singx qiamw .kiw .laii dyrr hyw."
Kauxbin danghongx sngcsngh qiyr. U jit jxox gasloo cai diamr dyh-dingw diong'ngx, junw huew byy dyc, cur nirr qamxqag marr e qex jiokk unluanw. Dniaw jiokk viktzet, qokk langg nguaxtauu-aw marr longxx decc cingwenx. Mngkakauw u jurdongrciax ee sniax. Bak nih aw quer, duarhanr haursnex kajiacpniax pnai jit kax kabang, siangx ciuw moh jit daii LCD ee denrsi .zip .laii.
"Liw kir dyc'ui qa'ngg moh jitt daii?" Laurve mng.
"Ving'iuw inx daux diongw :ee." Haursnex rinr, ingwhur ingwhur.
"Jitt daii iauxx sinx catcad. Cur nirr u cutgiac ingwqaix marr be cinwcaiw hro langg'. Jex byy siok neh! Liw dangsii u sigsai jitt hy kuanw ving'iuw-dirhniax, guaw nacc longxx m jaix?" Laurbuw muaw bin juann gignaiw.
"Mair mng mng hiacc je lar. Hyxgiahdew byy cax qaxx jex," duarhanr haursnex uat hiongr duarhanr siyxmue. "Guaw kabang lairdew u quaw hyw liaurliw. Liw kir tec vnuaa-aw laii drew. Siyjiuxvuex sunrsuar tec nng der aw laii."
Duarhniax qongxue jiokk u ing'uix, bersux laurve. Jyr siyxmue m qnaw encenn, jit qxur dy' m qnaw qex mng. Uat jit linr dngw, dyh-dingw qex jit jiah siyqex, jit vii ohijiw nglac ~, tngtauu ngua ngiubah :ee, qycc u jit quanr Skotland ee uiski.
"Liw iarr byy jnii a, nacc u tangx kir kuanw jiaxee dngw .laii?" Jyr laurbuw :ee qycjaiww mng kiw.
"Naxsaiw diyhh brew? Langg' daux vingsniux kuix .kuix, knuar qac'ir, suijai lanw tec." Haursnex rinr.
"Iurqycc liw hitt xee hyxgiac ving'iuw hro liw :ee m?" Laurbuw suar lyc mng.
"Jex iarr diyhh qycc mng?" jyr angx :ee qra bow sraiw ciaa bak. "Denrsi qui' daii dy' hro ix vnuax .dngw .laii .ar, iarr suacc e knuar qaxx jex?"
Jyr qniaw :ee qra uiski kuix .kuix, dyh-dingw snax aux siyjiuxvuex qra tinn hro dni.
"Liw u hongtniar, m hyw limx lar." Jyr bow :ee bin iux iux.
"Jit nii jiacc jit vaiw, byy qangai lar." Jyr angx :ee sui' beh qapp qniaw qanvuex.
"Acc byy, jit vxuex dyrr hyw oox!"
"Hyw lar. Lysyx."
Angx qapp bow palaken huah jit kunr. Duarlangg naxx jiac naxx sib, ginxaxlangg byingg decc cngw qetuiw qapp qesit. Jiac amr vaw, qui' qehuew-aw knuar denrsi, siuw nii danw cutjniax.
Beh huandiamw, paur-aw-sniax pihpiak hauw, qingxcatciax ngorngix ~ ee sniax iarr ho'ngg kamr .quer. Zirqauxmee, diyhvanx ee qingxcat byy ingg ciccih.
10. Hokkir
Huewtauu jiac beh vnuar vah, kax beh hnua quer paiwcutsow ee mngding, a'Hur :a simqnuax pigpok dnua, naxx cincniu decc longr qow. Ho'ngg quaiw .kir ee ginniuw ziog e dngw .laii .be iauxx birkyxdix, jitt jua laii, lauwkuir dai dnaxx dyrr tong' langg jaix. Sniu diyc qaur der, simqnuax dyrr utjud qaxx be qongw tihh.
"Liw dyrr si siauxtamx lar. Byy-dair.-byy-jir hai lanw liauw jit vid jnii."
"Ix qongw qaxx naxx jinx :ee lehh. Guaw beh sniaw jaix si venw .langg .ee?"
Ang'axbow caxcuir, jidlo uanx qaur paiwcutsow. Dirr mngcuiwkauw, a'Hur :a qiux kax, sniu beh pah tewdangqow, diyhzit ee qingxcat'uann giaa tauu mng ix u sniaxmih dairjir.
"Guanw beh vywanr." a'Hur :a qanxdanx rinr.
"Vyr sniaxmih anr?"
"Gua… guanw jnii ho'ngg ven… venw .kir."
Qingxcat'uann hnair tauu qiamx trow kuir, qiyr a'Hur :a vnix:a jre, uat dngw srinx cuann juaxvid.
"Duxjiah qongw qaur dyhh?" Qingxcat'uann mng, vid naxx decc siaw.
"Acc dyrr qongw qaur guaw beh kir qiauxqaux ginxaw ee juwcechuir, jiacc jai'ngiaw inx jinwjingg qiar .laii .ee si vuad'axpiyr, diyc jiongw ee dairjir taubuew dy' byngiaw." Hurzinlangg qongw qaxx krir ciongtnix. a'Hur :a dirr vnix .tauu tniax qaxx kiw gongrsinn, bagjiux vec qaiwqair.
"Liw qamxx dyrr si ix vunxlangg?"
"Hner a."
"Qionghiw .liw. Liw diyc diyc jit-vah-bxan."
"Jiacc hyw xe or! Guaw jitt hy taukag jiamx jiamx :ee iarr e diyc jiongw? Linw penr langg' decc m bad."
"Jniasit :ee lar, byy qra liw penr, cniaw liw hongwsimx."
"Acc byy, hex jit-vah-bxan, guaw rair jnaixngiu niaw?"
"Liw qra ginhangg ee siauwhy qra gunw qongw. Jit-vah-bxan kacdingg aw dyrr e zip liw ee kauxjy."
"Jex iarr suacc e dit? Siauwhy narr hro linw jaix, guaw qiawqimpo-aw lairdew ee jnii sui' hro linw niaw niaw .kir kacc kuair."
"Jex beh tacc u kyxlingg lar? Byy doqiwinr qapp qiawqimpo, ginhangg ee jnii qamxx erdangr hro langg' cinwcaiw niaw tihh? Guanw k.-kaksit-s. beh qra jiongxqimx qinw hro :liw. Danw liw kakding jit-vah-bxan u zip liw ee hortauu, jiacc cniaw liw vow jap-go pxax ee suewqimx hro :guanw."
"Rair kiyh qaxx jap-go pxax lehh or! Acc m dyrr duxhyw jap-go-bxan?"
"Jex qnuatniax quiding :ee, guanw be qra liw qex siux lar. Jitt diauu liw narr byy lap, taujauxsuer si u jue oox."
Ang'axbow siangsiangx an' iw nirr vreh kiw, duiww qingxcat'uann suecsia qiamx vaiwtog, uad lehh beh qniaa lirkuix.
"Diyc liw ar." Qingxcat'uann qongw.
"Guaw ee qanxdanx. Duxjiah hitt duir ang'axbow ee vitlok siyxkuaw siuqaiw .jit .xe dyrr hyxser :ar."
Ue, qaix qongw :ee qongw; miaa, qaix ciamx :ee ciamx. Cur nirr ee langg rair anwjnuaw kacc qaudair e quer, lirkuix paiwcutsow liauxau jiacc si dua cud hxir.
Dngw qaur cur, bow sunrsuar kir kuix puetangw, jit diab quw aw quer, h.-hongqongg-q. beh qycc cutmngg.
"Liw beh kir dyhh?" a'Hur :a qra mng.
"Langg' siaw puex laii tongdix qongxx guaw diyc jiongw :ar."
"Diyc jiongw! Diyc jit-vah-bxan?"
"Nng-vah-bxan lehh," bow cuir ciyr bak ciyr. "Qajair lanw iuqiok ee hortauu u jnii dilehh. Byy qraur hyxgiac, jitt diauu qycc niaw byy lehh. Inx qongw ludsuhuir lilixkokkog :ee, lanw rair singx lap snax-jap-bxan ee ciuxsowliau hro :inx."
Qig diam diam tniax bow jyr jit xe qongw suah, a'Hur :a tauu kenr kenr vangr sniax dua ciyr.
11. Sinniuu Diyc Guaw Jyr?
"Liw snedngg snex pnaiw mic-aw. Quah driau si kacc ingsinx. Mrqycc quah driau, liw dyrr be snex :ar."
Sensnix qongw diyc byy ir aw byy ir. M si honghiamxjingr byy iyc rix, Bixdinx :a suacc bersux hro langg pnuar sixhingg, iux tauu kow bin, simqnuax qed qui' uann.
"Guaw rair qycc jimjiog sniu knuar." Bixdinx :a qongxue e junr.
"Pnaiw mic-aw e dua, beh quah m quah longxx diyhh liongrjaw juxir."
Sensnix pnuawhingg dirr jit lexvair jingg. Samhuanx-gnoxhog, suliong dingg liauw dingg, crann crann laii qaur vnerngi, langg kyw jadjat. Uree decc danw qiyr hy tangx hro isingx knuar, uree decc hrau iyhjewsux qab iyc-aw. Bixdinx :a jinw vakdow qex jit xee uwsuer mic, siyxkuaw dinxdang diyc dy' jiokk tiamxtauu, iarr diyhh jre lecc tingwhau kacc suwsi. U jit xee laurhuexaxlangg duxduxx vreh kiw. Bixdinx :a qinw kax qinw ciuw sui' kir jiamr iw.
"Liw ee quiw qywguec :ar?" Jniawciuxvingg ee dua do :ee byy-dniu.-byy-dii cud sniax.
"Hnaa?" Bixdinx :a jangw byy tauu.
"Ar, sitlew! Guaw knuar liw decc syx vakdow, qiywsirr liw iarr ursinx :ar." Hurzinlangg qongw diyc cuir ciyr bak ciyr.
Byy qra rinr, Bixdinx :a iw nirr jre, quewkir ee duiwua itdit liu.
"Guaw jiuwjow inx bow qinw siw, gamm kacc anwjnuaw cringx dy' be liauw li." Bixdinx :a qongw diyc qargee-cetciw.
"Hymickow? Inx bow junxnarr siw, ix marr byy juadduir e crua :liw. Hunxsig diqaux byy hiamm je, acc narr beh crua dngw kir mizit siy' knuar :ee, inx hex javolangg longxx jnia' kyxlu lehh."
"Liw knuar guaw jiacc byy diamw. Lun guariongg iacc lairjaii, guaw dyc'ui kacc sux inx bow?"
"Jex beh anwjnuaxngiu vixping iacc pah diamxsor? Diqiw u vacvah jiongw. Bow ee kuanxhingg, narr javolangg decc knuar, ingxingw dna' jit xee ngiursniur."
Jixmueaxpnua siy' kuanxkngr, u cuir qongw qaxx qiongbeh byy nua. Bixdinx :a liac sixquad, kacc anwjnuaw dy' tniax be lyc hni.
"Guanw angx laii :ar." Dua do :ee iurqycc cud sniax, qycc iong ciuw qiw. Bixdinx :a sun ix qiw ee hitt hiongr knuar. Nacc e...?!
"Taujangx vnuar ovec hitt xee linw angx?" Bixdinx :a taukag qinxkuair ngar kacc qe lyc .kir.
"Hner a." Dua do :ee dab.
"Ix hiacc lau ar neh! Tacc e …"
"Guaw ix zi crua :ee lar. Ix jingg bow diyc gamm, jrunn .nii dngw .kir."
Iw-aw bersux u draur huexloo, Bixdinx :a jit kig dy' jre be diauu. Vreh kiw srinx, tauu lee lee, hiongr vnerngi lairbin hitt vingg diddit kir. Vut'ir, u langg dirr kajiah-au dah ix ee qingqactauu. Bixdinx :a decc diuduu qamxx beh uat tauu.
"Bixdinx, qycc jniasit si liw!" Javolangg qongw, hnuatauu-hixbin.
Jiacc je nii quer, byy vanrpuex e dirr jiax siy' duw, Bixdinx :a cuiwjic bersux kir pah qad, jit qxur vnuar qxur dy' qongw be cud cuir.
"Liw laii knuawvne?" Javolangg mng.
"By… byy lar. Guaw jit xee ving'iuw zip ngi. Guaw laii knuar ix." Bixdinx :a haukiwue qongw diyc vnuar tuntow.
"Liw qamxx qer :ar?" Javolangg qycc mng.
"Byy lehh? Anwjnuaxngiu aw si bor?"
"Marr byy lar, vutjenrcuir bongxx mng .jit .xe narnia."
"Acc liw lehh? Liw qamxx u crua?"
"Guanw haursnex dingx lexvair duxjiacc muaw guec. Guaw qapp guanw jaboxlangg qinaxzit py angngex-aw laii jur irhongsia."
Qongw langg, langg qaur. Texqeh diongtyr aw, bagjiux dua luiw, byy pni, cuiwdunn jit liap jux, hurzinlangg dauc dauc aw qniaa uaw .laii, ciuw nirr py jit xee ngex :a.
"Ix si Angg Bixdinx Siyxjiaw. Guaw jaxjingg ee dongsu."
Nng xee jaboxlangg horsiongx dimr jit xee tauu junw .quer. Jyr mamax :ee huanlyw ngex :a vakdow iaux, qnuaw beh dngw cur nirr cri buxlingx.
"U hyw siausiad, rair vangr tiab-aw hro :guaw." Javolangg qapp Bixdinx :a siy' srii, qra ngex :a an' qeau ee ciuw nirr jrih quer kir py. Jaboxlangg jniar ciuw kir hnua dirr angsair jniar vingg ee iyx. Jit qekauw-aw drangg cud drangg zip.
"Duxjiah py angngex-aw hitt xee m dyrr linw siyxmue-aw m?" Jre dirr iw nirr, ciuw tuh jit qix qnuaiw-aw, lau a'vyy vorvinn mng kiw.
"Hnaa?"
"Guaw qongw linw jixmue-aw snex jyr jiokk singg."
"Jiokk singg?!"
"Hner m. Mrqycc ix viw liw kacc u bah."
Bixdinx :a liyc aw sinn .kir.
Ciuxqix-aw dann, Bixdinx :a diyc jit qniax, denrue naxx beh jriab, naxx qniaa duiww sikgua kir.
"Bixdinx :a, guaw qra liw qongw. Guanw cuwvnix u jit xee duxx siw bow, jiac qongqax taulo :ee. Guaw qra liw ee siongwpnir tec hro ix knuar. Ix qongw sniu beh cniaw liw jiahvng limx qavix. Inx bow qaxnaxx qongxx qapp liw vnii je huer." Jyr jit kuir longxx byy dngrjam, a'jew qongxue byy tangx hro siyxmue-aw qnaiwcah.
Tauduxaw hau qaxx qionngbeh kiw singwde. Jinjniar diyc qaur Bixdinx :a suacc quewjuax .kir, dirr ix aurviah hy :ee huanxx knuar dairsingx.
"Dyrr qapp ix vruac jit vaiw knuar mai."
Qra sensnix vangr hunxjiauw, Bixdinx :a qniaa lirkuix vnerngi. Guarkauw jit xee quisinwtnix.
12. Daiuann Hyw Kiarkiw
An' iyhqiok cud .laii, ciuxtauu qex jit ap aiwkunwiyc, kowde-aw juaxginn qiamw jit dniux .kir. Siangx ciuw pyw haixzii qniaa kir qaur huextnuar-dxiamr, siongrr buew jit dniux ginpiyr cutmngg dauxngua diyc snax qxinx vexvnuar ee huextnuar qapp jit xee go-jap kox ee dangluix.
Jit ciuw qnrua huextnuar, dnaxx jitt sniax haursnix byy jaidiau qra py, diyhh hro ix qaqi qniaa. Ginxaxkax qniaa diyc kongrkiangx ~, iarr diyhh vavax jit ciuw kanx lehh kacc unxdangr.
Ervox sir diamw tongw, pxangw-dxiamr ee pxangw cimxx cutloo, pangx qongwqongr.
"Air jiac dycc jitt jiongw, liw qaqi qingw."
Laurve kinx sniax duiww ginxaw qongw. Ginxaxlangg, kacc siongr dy' siongr duiww jiqulat .kir. Laurve ciuw dnec dangsenw kir lap jnii. Ginxaw mirvong sax lehh dyrr mauh, jiac qaxx jit xee bin naxx ocuiwvit'aw.
"Liw quiw huer?" Hurzinrlangg ngar srinx mng ginxaw.
Ginxaw viw nng qix jingxtauu-aw.
"Mamax lehh?" Hurzinlangg jiapsuar mng.
Ginxaw berhiangw rinr, qanda' hnair tauu. Jitt diap, laurve duxx uaw .laii.
"Jex linw qniaw or?"
Laurve dimr tauu.
"Jnia' qoxjuix."
Laurve cuir bih bih, binrsig amwdam.
"Guaw ingxquer marr u jit xee, lyc too pnaiw veczi, jiacc erhiauw qiyr mamax dyrr hro huixdoo taii taii .siw." Angr sniax angr sniax, hurzinlangg bagkox angg angg.
"Ginxaw vaiwtog liw qra guaw qor .jit .xe, qamxx hyw? Guaw kir duiwbin qamxaxdiamr qnrua jit quanr gulinx liammix dngw .laii."
"Hyw ar, hyw ar. Liw kir. Ginxaw guaw qra liw qor."
"Liw qapp a'ii dauwdin rair quaix quaix, jaix bor?"
Laurve qra ginxaw ee tauu syx .jit .xe. Ginxaw bagjiux qimx qimx knuar laurve qra ix vangr lehh jyww ix kir, suisii vangr sniax hauw. Go hunjingx quer .kir, vnuar diamxjingx quer .kir. Ginxaw kaur quw jongw iarr e tiamw. Laurve tauwbuew byy qycc dngxhuee.
Qoxpiyr dngrtauu, bow duer langg' jauw. Javolangg siyx huextnuar, kunr kunr aw siw. Jit xee iuwzii siwqer ho'ngg cue longxx byy, cuwvnix kir paiwcutsow vyr sitjongx.
Dingw vox veh diamw gua, hurzinlangg dirr jiahvngrtniax knuar vywjuaw. Jit xee nng huer ginxaw jre dirr ix vnix:a, jit cuir vau'aw puer jit cuir daurlingx, byy hnaix, byy kaur, marr byy caw. Buah jit xe aw enjix, taujangx kiyh kiyh luac luac lehh, hurzinlangg jit ciuw tuax caiwnaaxciax, jit ciuw kanx ginxaw, cunhongx muaw bin.
"Sniaw langg daux ee ginxaw, liw decc qa'ngg cua?" Caiwci-aw-tauu, bre loxliau ee a'sangw mng.
"Guaw kir qa'ngg kid :ee. U qoxjuix bor?" Hurzinlangg ciyr bunxbunw, qra ginxaw lamw uaw .kir, cuiwpuew dua dua xe qra jimx .jit .xe. Ginxaxkax qniaa be qinw. Caiwci-aw knuax knuax aw sec jit linr. Caiwnaaxciax drew qaxx kyw vicvih.
Dngw laii qaur go-janr-kiw ee aparto, sinwsniux jit dniux puex henn dirr kauxbin knuawqnir-q. Cutmngg jit jua, dacpuex :ee u laii .quer .ar.
Liw decc tak jitt dniux puex ee sii, guaw langg vycqnaxx dirr huelingqix-dingw. Ginxaw duarhanr, rair tagceh :ar. Daiuann diranx jit zit jit zit baiw, guanw kanx :ee jiokk jaw ixjingg dyrr caw beh ibinn.
Dingw zit aw, guaw u juanw nng qywguec ee jabhuiwjnii zip liw ee hortauu. Narr jiauww henrvo ee pacsngr, qinw jiarr snax nii ban go dxangx, guaw jiacc e qycc dngw kir Daiuann. Narr u liong'enn diyhh vaxag, liw dyrr m hyw qycc danw .guaw.
Puex tak suah, hurzinlangg kuu .lyc .laii duiww ginxaw qongw, "U sniu beh hyw hyw qra liw cnia'iongw dua. Miarun jyr duiwtauu qojiongx bunai. Lanw m si qutziogcinx. Buxaxqniaw jit qangx ee jinghun qaur jiax suah."
Cuiwqag suee suee, bagtauu qad qad, ginxaw taukag giac giac qapp hurzinlangg siy' duiwsiongr, qaxnaxx tniax u, qycc qaxnaxx tniax byy.
Damrjuiw Hyy iurqycc qrox kiw jit ku jabow juixlausix. Qunqur liauxqaiw, sixjiaw jarhngx qra jit xee nng huer ginxaw sangr paiwcutsow, qongxx si ix kiyh .diyc .ee. Qingxhongx genxpnuar, sixjiaw qniaa cud paiwcutsow liauxau dyrr uad duiww Qandau Qiyy-dingw .kir.
Vywqyr-sinbunn knuar suah, qingxcat'uann beh cutkunn qah jit xee nng huer ginxaw.
"Cniuw .langg lor! U cniuxqiab or!"
Qngx tnix vec zit, cniuxdoo dirr dua qelo qiongqiab.
"Ginxaw beh sangr siarhuerqiok. Guaw jinw diyhh singx laii kir ziog qiongqongr."
Qingxcat'uann qra ginxaw qiar jit xee diamwbin ee tauqex, autobaik puc lehh kir.
Qokqax iurqycc kuisid jit xui qingxcat'uann!
Qiapcat srinx quii huexcingr. Qingxcat'uann hionghiongx-huwhur liahduargo, qiapcat byy liac .diyc, qaqi hingkamw diyc cingr siw.
Quewlauu ee qu jabjir, go nii jap nii quer, uree sinbunn, bangrlo-dingw iauxx cue e diyc. Jap-zi huer snezit jitt qangx, javoginxaw ee sinser, iongxbuw-aw unn unn aw sueh tauwqix.
Jitt lexvair ee jokbunn debak, "Daiuann hyw kiarkiw". Javoginxaw qig taukag, denrnauw ee kixvnuaa m jaix diyhh an' dycc jit ziw kar kiw.
13. Jit Hur Paur-aw
Danghongx lingw sicsih, au lexvair ee jitt jun dyrr si sinx jnxiax sii :ar. Cur-lai qanda' kingg kingg kiyh kiyh lehh byy qraur, bincngg-kax qapp dycqui-kax diyhh vniar, juduu qapp kiarduu diyhh cringx, amjamx uwuer m hyw dunxkngr qaur menii .kir.
Dycqui-lai jit hur paur-aw, vnuar dxangx jingg, a'Kunx :a qra sreh zip laii jiax, qiongbeh kngr qaxx be qir .did. Qenr but siongx jxingg. Jyr ginxaw ee sii qniwnarr quewnii, lakde-aw decnijnii vaw vaw, a'Kunx :a longxx e kir qamxaxdiamr brew jit vaux paur-aw, ciuw nirr jit qix hniux, paur-aw cingr kir qaur tnidingw, paur-aw-sniax hibii. Tauwsiwlangg tauu vaiw kir brew jitt hy lejupaur. Sinniuu-aw crua byy quer mngg, im'enn cexvaiw, paur-aw laurzet ee sniax tniax .kiw .laii sniaw kuanw, qaur jinw iaxx m jaix.
"Lanw lixdniuw vaiwlak narr u diauu u lenzim, hitt hur paur-aw tec kir vangr vangr lehh." Buerjingrbue, a'vaa pacsngr dairsingx.
Kacc sux lixdniuw jitt quer ngua langg jyr. Paur-aw iarr diyhh qycc dner exqauw, byy tangx huah cud sniax.
"Cego qeckuix. Sii qaur zit qaur, liw tec hitt hur paur-aw kir kaiqangx, linw tauqex unxdangr jiokk hnuahiw." A'hniax jairlaii dy' jiokk u taukag.
Survutliau, buexgee iauxx bue qaur dyrr hro tauqex taii tauu, a'Kunx :a diyhh dngw laii jiac qaqi. Paur-aw iguann berdangr qnir tnizit.
"Binaxjair au .zit u laurzedvaiw, sraix-din qapp lyxqow-din e an' lanw jiax quer. U siyx hniux u vyxvir. Jit hur paur-aw dyrr hyw, mrbenw je, diyhh e qir did vangr." A'buw qra sewhanr haursnix huanhur.
Jyr haursnix :ee m qnaw tickiw, jiacc anwsngr qecdngw zit qra paur-aw hiaux .cud .laii. Vut'ir, gas-qongsix limsii tongdix qongxx tokax beh draii gasqongw, dinrtauu beh sec duiww vadd xui aw kir, byy beh anww inx jiax laii.
"Quikir tec kir danr driau kacc benw decc dinr der qiamx uewsuer." Siyxmue qongw diyc byy ir aw byy ir.
"Hyw hyw mihqnia qra danr hniwsag, bycaiw." a'buw qra qawsi.
"Kngr hiacc quw, qnaxx marr diamw be dyc :ar." a'hniax cinwciyr.
"Bongxx kngr lehh. Diamw be dyc jiacqycc pacsngr." a'vaa marr kiam-drew :ee, qapp a'buw kia qang jit vingg.
Berdangr crunx kax cud ciuw, jit hur paur-aw ho'ngg qnuaix dirr tuacduu-aw-lai. Qapp ix druar jywhuew :ee u quiw der aw floppi, jit ap kangwvec ee kaset, qapp jit daii hauwdaix hipsiongwqix. a'Kunx :a qra tuacduu-aw qnuaix uaw .kir, lairdew ee mihqnia longxx byy dinxdang, lenrr ciuw kir bongx dy' byy.
Qnxix cimx, xia jing. Qodnuax ee dikcngg, jit xee snax-jap gua huer ee javolangg byy taulo, qinnii ee qnuaa .langg jiokk jnia' lingw. Mipue hen dyrr qau ducduh, qah qyckacc quw dy' be siyly.
Picpih-piagpiak ...
Binn binn aw, u tniax diyc paur-aw pihpiak ee sniax. a'Kunx :a bagjiux vreh qimx, qui' cuwqingx pongrpong hrunx. Kacc quer, pachuexciax ngorngix ~ qnuaw laii qaur.
"Hyw qajair u hitt qnrua paur-aw qra lanw qiyr jingsinn. Narr byy, lanw qui' qekauw-aw jinw huanrser longxx siyx qaxx venr naxx totnuar." Bin cnex sunxsunw, a'buw naxx qongw, jit ciuw naxx decc dah hingkamw.
14. Diyc Jiongw
Ding'axkax nng der siwqakdyh qab jywhuew, sir jiah ixqoxtauu-aw s.-siwsnuar-s., langkecqnuax uree jre, uree kia, bre caixqngr ee diamwkauw kacc qa'iac bexbah. Qangxx ig ee caixqimx sniaw langg beh did, ing'amr veh diamw tauu aw quer dyrr jaix su'ngiaa.
Lak jxox siauxbexzi, ginxaw cutsir ee qizit qaiww je langg rah. Narr tauu vaiw laii beh cir qiamjniaw :ee, benw qig taukag quer susniu, qaqi ee veczi crann crann dyrr qra lyc .kir. Huatqyx :a lyhanwkax-aw, byy bow byy qauu, sinhunrjingr binrdingw dingqir :ee duxhyw si ix hro qozingi kiyh kir cri hitt zit. Huewtauu snax-jap-sir, qinaxzit imlik ceveh, sxiab-lak langg' hanw decc qongxx e kuix, zxic-qauw jriab siy' suar kuix quixnarr qrii :ar.
"Uee."
"Huatqyx :a. Guanw jiax kiamr 500cc. Beh juanw bor?"
"Dangsii?"
"Jitmaw sui' beh. Liw narr beh laii diyhh kacc qinw."
Ciuxqix-aw qongw suah. Denrjuxviyw jitt diap henxsi cud 17:52. Hyrbew longxx jiauu :ar, go-jap kox narnia byy siongdiong, vruac jit xee simsig :ee marr be baiw.
Go-jap aw puc lehh vniar kir qaur vnerngi, het'ab cig u jniurqeh, Huatqyx :a qra ciuxngw vrih .kiw .laii. Horsu cue diyc huecqinx, jiamdangg ruix .lyc .kir, dimangg ee hueh unn unn aw ho'ngg tiux .cud .laii, vunxjniaa moh moh ee hueh-dre diddit decc pongr .kiw .laii.
"Sur lanw sniwmia :ee byy beh qra lanw cniaa. Qra lanw qui' sinkux ee hueh snex viw vadd langg' kacc hihanw kacc dadjnii, marr sngr inx u qra lanw tniar lar." Huatqyx :a dirr vnercngg vnuar tedyw, naxx qapp horsu siyxjiaw hapsenx, pah kixtog.
Ciuxngw vangr .lyc .laii, jit vxuex vnerngi cuann ee gulinx quanr lyc vakdoxdew. Diag henrsenw ee singliw suah, Huatqyx :a giaa tauu knuar jit xe aw viah-dingw ee quawjingx.
"Jitquw laii dngw, qaur cur duxhyw hur kuix jiongw."
Huatqyx :a jingg kax dac cud vnerngi, dirr mnglo qapp jit xee siyxjiaw siy' siamw srinx. Siyxjiaw qruar jit hur ozinn-bagqniar, qui' sinkux pangx qongwqongr, cingrcah pali ~, jrngx qaxx jin' niaux. Nng lexvair au, siyxjiaw dirr denrsi cuthen, Huatqyx :a bagsig hyw, suisii dyrr zin .cud .laii.
qiwjiaw: Qamxx m si qongxx ciuxsut u sunrli? Linw uirr sniaw indnuax beh qiyr vnerngi jerjnii cud uiwjiawliau tnitiab :linw?
siyxjiaw: Dongqisii inx qongw ciuxsut qanxdanx ~, byy sniaw guihiamxsingr, guanw jiacc dac'ingr ciamzi. Jitmaw suacc kixvingw qongxx quanhueh :ee qapp guanw laurve ee hueh u dongdut, qongrqiauc.
qiwjiaw: Vnerngi si qongxx, verbuw qapp cinsnix qniaxzii ee hueh siy' tauwlam, jitt kuanw dongdut jiacc e laii huatsingx.
siyxjiaw: Hex dyrr jiokk qrii! Guanw laurve ee huechingg jiokk digvet. Guanw daux sir xee hniadi-jixmue byy qaxx jit xee ham' ix siysiang. Junw guanw dycc jit xee bad qruanx quer hueh, kacc anwjnuaw marr be jauw duiww guanw laurve ee huecqngw lairdew kir.
Jitt guehzit an' cuex nirr qaur jinw, tauu jiongw itdit qongwqux byy langg diyc, ing'amr caixqimx iuguann jnriu ig. Denrsi jun duiww vadd daii .kir, Huatqyx :a iw nirr jre, jit dniux caixqngr tec druar ciuw nirr.
15. Hisewdinx
Qauxqangwhongx lingw sicsih, jit jun ho iurqycc hiacc cnijinx. Guartausnuax dngrr lang'enx, bih hongx lunx ho ee soxjai byy der cue. Cuanx :a sinkux uiwqnuaa diddit decc kiw banxmec. Tnide kuah liuliux, suacc byy qaxx jit xui tangx hro ix quakax hiyctiamw.
"Liw marr decc sitdig. Ziamw diyc jitt jiongw vne, nacc tangx amkamr diauu lehh m qongw? Guaw jit quaw cuwkax qniax kir hro liw uer .diyc, longxx jauw liauw liauw .kir." Cuwtauqex og kiagkiak.
Cuanx :a hingliw kuanw kuanw lehh, vnuax lirkuix ee sii, taukag ngar ~ ~. Sudongsii, igjingr dng' pnaiw dng' lirhai, tong' sewqair qongxx u quixarr bxan langg diyc .diyc, byy iyc rix siongrqaiww jiahlat. Diyhvne :ee qycc jiac byy jit nii, qniaa qaur dyhh hro langg hiamm qaur dyhh qyckacc si kyxlendai. Jin' qaijair, jit~nng nii aw quer, irhongg qapp idi ee hngtauu dangjee jniurci. Cuanx :a sinmia sngr u iongw, puawvnervunw u qauwgiac, u tangx danw qaur iyc-aw cutsir. Jinw jingwtauu hyw liauw li, jitt xee sewqair suacc iuguann m vangr ix suah.
Ihak dua huathen! Ingxvaiw bad diyc quer amwsamwvne ee huanrjiaw, inx ee dng'axdo qongxx erdangr telen jyr jit jiongw iyhtauu. Javox jiac diyc dngg huewsiu, jabow jiac diyc puee iur iur. Bixqog u jit xee jarhngx quewsinx. Genxhuad siyxjow jiksii qra ix ee sinsix jyr qaixpuar.
Vakdow jiokk cneiaux. Pnai'aw lairdew cunx jit der pxangw diyhh haddat kiam kiam aw jiac. Ciuxbinrjnii kaix cing'oo :ar. Ginhangg u qiawqimx laii qongw, m qnaw kir niaw qan' qan' aw hai. Denrnauw-sidai, cinwcaiw jit xee dongrjog, uat linr dngw langg' dyrr tangx ziog qaur xui, ciuxqix-aw qyckacc si. Cuanx :a jit tongx dy' m qnaw kar .cud .kir, acc narr kar laii beh cue ix :ee si tattad dni.
"Cuanx :a, liw diyhh bih hro hyw or. Jitquw guarkauw u jit din langg juandoo decc cue liw. Inx beh qra liw liac kir liyy, liac kir puawvingg." A'buw qongw qaxx qongg pniapniax, jiokk cneqniax.
"Qnuatniax vyxho jingww vecsner habqaizenn. Tong' sewqair cunx byy vah xee, Daiuann duxhyw liw jit xee. Guanw vyxho liw u nia, tacc u hai liw snewmia ee dyrliw?" Hyw-sniax-hyw-sueh, qongw ee langg snia'imx qe qe.
"Qnuatniax qongw :ee, liw byy beh siongsinr. Dog pni-w jit qniaa sxor jap miaa huelingqix jre jap gua diamxjingx juanqangx laii jiax beh cue liw. Langg' inx qyqyy si sewqair urmiaa ee hagjiaw, juanqax. Jitt jam aw dernsi-dingw dagg qangx dy' vyr qaxx. Liw qinw cud .laii, m hyw qycc bih ar." Siyxdi jit qnrua ue lywlyr dngg, bersux qongw denrue mrbenw jnii. Cuanx :a qra ciuxqix-aw pniax hetqak. Kajiacpniax ee hingliw iurqycc venr kacc kinx .kir.
"Guaw ee dng'axdngdo jo linw dngg huewsiu, juewbirsi hro diqauw jingsnix jiac jit dxngr covaw."
M si huixdoo, Cuanx :a byy beh qycc jauxlo. Kax tiabpuann, bagjiux kreh senn senn, jingliw jit kax qra tad lyc kir snuaknix.
16. Sixlo Nng Diauu
(qiwjiaw Oo Vehsuad / Daidiongx vywdy)
Cingr-sniax jaiww kiw!!!
Daidiongx Sionggiap Ginhangg sed dirr Binquann Lo ee hunhangg, cesir jaxkixvox, hro nng xee hogbin ee qiongqiapcat cniuw qui' vah bxan .kir. Pnaixdoo qapp qingxcat'uann dirr qelo giaa cingr siy' dnua. Qingxhongx kuix jnia' jap cingr. Lairdiongx jit xee qiapcat hro duacjauw .kir. Lingrgua jit xee, toxmiaa a’Qauu, hingkamw diyc cingr. Qiyr qiuwhorciax sangr vnerngi, isingx jikkig ciuxsut, suacc huatqenr diyc qiapcat u diyc qnuagamm. Cnesiongx junw erdid uanjuann, gamm-sewvaux gauu tnuar, Giamlyy ee duarpo-dingw guan'aw berdangr dumiaa.
Dinghuexqngx samwdam, denrhuextiau-aw dit longwlongr, lyr siangwsiangr. Iarhongx ciulingw. Huedngw cur ee lo naxx cniurr ingxuanw qniaa be did qaur. Jinjniar qaur qaxx mngkakauw, a'Guann simqnuax suacc decc qunxqunxjun, kavo be jinr be trer.
"Caur daurhu. Hyw jiac ee caur daurhu laii lor."
Jit dnar bre caur daurhu :ee dirr hang-aw-tauu decc jiyx langkeh. Jyr diamxsimdnar ee lirsunn u zuarr je, a'Guann u viw langg' kacc jaix. Qurnii, ix u kuix jit qingx diamwtauu, jyr iutngx :ee, mrbenw uanx qrex piah hang en' lo qniaa en' lo huah, vutzirqyr, cuwsuewjnii jin' qniax langg. Taubuew jit guehzit, jit qangx juw kacc byy jap nguaw mi. Langkeh m laii, duardniaw iarr diyhh siyx siyx dngdanw, hangloo berdangr qimr huax. Gas jit lexvair siongrr byy jit tangw jauw be kir. U jit vxenr, qui' amr danw byy vnuar xee langkeh laii, ix knuar denrsi knuar qaxx ducqajue. Jit dniaw duarquttngx qunn qaxx huexlyx, cauwdax, gas marr duxhyw byy :ar.
Jiacc decc zimm syxsii, tanxcuac vnevnee sraiw qewdingg :ee dnaxx jiacc dngw .laii. Qangg jit diauu hang-aw u nng xee unwjiangr dua :ee, langg' sraiw beh jnia' jap dxangx :ar, a'Guann dingw dingw qycguec jiacc kyw diyc vaii, iauxx cnex qiycsiaur.
Iutngx ee singliw pnaiw juanxjiac, siyw qangx qapp dua qangx iurqycc byy langg beh cniar. Jinjniar sniu byy vo :ar, kanx jit daii qewdingg :ee bongxx sraiw, pnipox hingg, jit guehzit beh jit-bxan. Siqix baiw, vutsii dyrr decc laur kangx ciax, kiwiuu suacc qingw jitt sijun kiw dua qrer. Tanr byy jiac dyrr decc camxdam :ar, hongtaix laii, juiw rimx vnuar langg quann, muaw xngiuu dit qair. Duarjuiw siauter, ciax qinw sangr siulixcniuw qipqiur, tewngi qycc diyhh jit vid jnii.
"Cuwtauqex ervox iurqycc laii ziog cuwsuewjnii."
"Guaw binaxjair e cuxliw."
"Haghau laursux siaw lenlogpo, qongxx jejex diongdauwdngr ee huexsidjnii, jitt guehzit iauxx bue lap."
"Au qywguec jywhuew hro :ix."
"Memex iyjien ee juwcechuir..."
"Memex liw cur nirr qaqi cua. Tingwhau lanw ciuxtauu kacc ling jiacc hro tak."
"Bixangr byy biw :ar. Guaw puevaux-aw qanda' cunx jit dniux jit-vah :ee qapp jit quaw huantauginn."
Jnii jnii jnii. Vo vo longxx diyhh jnii. a'Guann qra sinkux-dingw :ee jongw zimm zimm .cud .laii. Jongw :a qiongw :a jiacc vah tongw kox narnia. Qeau hyxlew aw qra jrih .quer, jit sxenw go lii dy' byy qalauc, vakdoxpuee syx syx lehh, unn aw qniaa duiww vangqingx kir.
Qeau vakdow-lai quii jit xee, nidew sunrguec. a'Guann kutjnaiw sngr sngr lehh, huanrser angngex-aw cutsir duxhyw jyr hawbuexqniaw.
"Liw hir-gamm buew qrii, gamm-sewvaux u tnuar qaur quttauu, huawliauu byy-qong.-byy-hau."
"Sensnix, liw lauxsit qra guaw qongw byy iauwqinw. Guaw qycc uac u tangx zuarr quw? Jit qywguec qamxx u?"
"Narr mair caulyy, diamr cur hyw hyw aw iongxjing, qycc jiac lecc vnuar dxangx simrjiww jit dxangx si byy hihanw."
Dycqui-dingw jiauu siauwdnuax, longxx iauxx bue qriauw. Tingwhau ix bagjiux jid'err kreh, siangx kax liongr dit .kir, jiaxee siauwdnuax jiauww sii jiauww zit guanjai e qiar qaur xui. Sii qaur, cur nirr jit xee duarsinx-duarmia :ee qnaa nng xee iuwqniaw si beh anwjnuaw dorvaw?
"a'Qauu, liw jai'ngiaw dyc'ui u actauu? Guaw beh air jit qix."
Jaxsii qauw diamw, ginhangg ee vac'iabmngg knuax knuax aw qiux dew .kir, qaur qaxx ervox snax diamw vnuar jiacc u qycc crunx .lyc .laii, sxor jap dxangx byy qaixuii. Langg laii langg kir, l.-liogsiok-s. Jap diamw aw quer, lairdew byy hiacc qa'iac. Nng xee hogbin :ee sui' langg sinkux quii jit qix dexcingr. Zip .kir, cud .laii, kacc byy snax hunjingx, vah-bxan juaxpiyr cniuw quer ciuw.
Odobai lo-vnix cinwcaiw pniax lehh, nng xee qiaphuiw jauw zip kir jit diauu piacjing ee hang-aw-lai, qui' vowde ee ginpiyr duiwvnuar vunx, jit langg jit tong.
"Liw anxnex vunx nacc driyc? Ingwgiac, guaw rair did siangx vxue."
"Liw vin' sniaw did kacc je?"
"Vin' sniaw? Vin' qesitauu guaw ee."
"Taii tauu ee kangkuer guaw decc juer. Liw dna' kia diamr mngcuir jyr knuawtauu :ee. Qongw jit qxur kacc byy su'ngiaa :ee. Hiangwsii narr junw u anwjnuaw, liw kax dew buah iuu tangx dairsingx lauwjauw."
"Guaw qui' senx langg hyxser hyxser tin liw qaur drew. Liw diyc gamm, cunx vnuar diauu mia dinrdong hnir, qapp guaw beh anwjnuaw e viw tihh? Qongw jit qxur kacc sitlew :ee. Jitt quer junw jauxciuw, liw u kir anwjnuaw .diyc, huanxdngw tanr diyc jit xee tauxtuah."
Vunx be vnee, nng xee javolangg kiw uanqex. Diyc gamm :ee lramw sinmia, quntaubuw qycc viw langg' kacc ser liap, be kamx did langg' bog jit xe dyrr vuac qaxx dywciywtnix, pnirhueh cabcap dih.
Tokax nng tong juaxpiyr jongw qra drew zip kir qangg jit kax vowde, quntaubuw dua liap :ee odobai kiaa lehh jyww ix punwjauw. Kacc quer, duarqelo u cingr-sniax vongr vongr vongr, bersux decc vangr paur-aw. Dirr hang-aw-lai bic'ux :ee tniax .diyc, be qor did tniar, sogsok vreh kiw, vnuar qniaa vnuar jauw, jidlo ngx ngx iab iab.