qoxjaw qxow

1. haixqux vangr nxng

Tniqongjow u nng xee siangsnix aw qniaw, jingrr cutsir dyrr ruanx be suah. Tniqongjow quanw byy hxuad .did, qovutjiongx, qra inx sangr kir hanrqanx, jit xee druar snuax-dingw jyr Snuax Sinn, jit xee diamr haiw-drew jyr Haiw Sinn, qokk langg quanw jit xui, be siy' duxtauu, benw siy' qaucab.

Jit jiah haixqux hongwsur byy jiauww quiqiw laii, taux taux aw jniurjuiw cittyy. Jiax qniaa hiax knuar, vut'ir, suacc syy kir qaur Snuax Sinn ee derqair.

"Liw simxmih jingsnex? Byy guaw ee unxjunw, iarr qnaw laii jiax gytid?" Snuax Sinn piwper qiyr.

Haixqux bagjiux cuh cuh, liahjunw si Haiw Sinn kixsnuax beh laii qra bangx .dngw .kir, gihgic junx, tauu damr ~, qongw, "Haiw Sinn, cniaw liw ziausiar guaw. Aurquer, guaw dikkag e quaix quaix aw druar dirr haiw-drew, be qycjaiww jniurhnua."

Snuax Sinn jiksii hiauw .did, byy pacsngr qongw puar, suacc itsimx sniu beh qra congwdi.

"Liw tangx dngw duarhaiw puewhunx, vutzirqyr, juh nxng diyhh dirr liogde." Snuax Sinn qexngiaw jyr Haiw Sinn ee sniasaur.

"Nxng vu .cud .laii m si jit qangx nng qangx. Li haiwjuiw sniu' quw, guaw e kiaux .kir."

"Guaw vutcab. Jit dxangx ixlai, nxng byy dirr liogde juh .cud .laii, liw tangx liongrjaw qaudair horsu."

Haixqux bin-aw liksig, qui' simx beh qnuaw kacc qinw kax dngw kir haixur, kajiacpniax pnai jit xee qukag dang knuairknuai jin' diyhlat. Siongwcinx, qapvangg, kixsnuax vangr nxng, qinw kax qinw ciuw, mia qor hro diauu iauwqinw iauwqinw.

"Linw diyhh e qir .did e qir .did. Tingwhau linw srinx jngg kax dngg, taukag e cunlunx, diyhh qniaa hiongr duarhaiw laii cue a'buw."

Vuew suax qra qui' juiw ee nxng ham hro bat, jap vo qauw huetauu, haixqux unn unn aw siuu lyc haiw .kir.

2. amwsii ee zidtauu

Kacc jaw ixjingg, langg jit qangx bagjiux qimx qimx ee sii dyrr si jit zit. Zidtauu cud, kixcngg; zidtauu lyc, kir kunr. Qnuaa .langg, mii dngg; zuac .langg, mii dew. Zuac .langg kunwbinn jiyw, qnuaa .langg tangx kunr kacc je.

U jit amr, jit xee qiyr jyr a'Muaw ee ginxaw vnuawmii aw jingsinn. Huandngw zit jaxsii, ix qra a'hniax qapp a'jew qongw, "Jarhng'amr, zidtauu u .cud .laii, byy hiacc qngx dyrr urngiaw."

"Miqanx iarr u zidtauu or! Liw qongw :ee narr urngiaw, lanw m suacc qui' qangx longxx benw kunr?"

Nng xee hniajew itjee qra suanx qra giyhciyr, qongxx ix decc qongw hamwqow.

Nng~snax qangx aw quer, jaxkiw duxjiacc cud zit, javoginxaw a'Kih :a sui' qra a'jew vyr qinw qinw, qongw, "Zidtauu amwsii urngiaw e cud .laii, mrqycc u kicqag, m si ngii ~ ~."

"Zidtauu kicqag? Acc si ding'axtuii hamw :ee, iacc si voxtauu puar vingg?"

Vaujiw qra vaude suansiah, qycc qiyr ix diyhh kacc jaw kunr kacc be hamrbinn.

Qycc quer snax~go zit, jaboxginxaw a'Baii aw mii-buew aw kiw .laii, bagjiux hxex hxex. Ix zip kir cur-lai qra siyxdi qapp siyxmue qiyr jingsinn. Snax xee jiaxdi-aw dangjee cud laii cur guarkauw. Jitt diab, qxex duxhyw tii.

"Amwsii junw u zit, marr qanda' jit baii baii aw qniaw narnia." Duarjew qapp siyxdi siyxmue siy' jnewcuir.

"Lanw snax xee ing'amr longxx mair kunr. Qaur sii qaur jun, dyrr jaix amwmii ee zit si uanbuanw iacc kicqag, iahjiar si pak'iyx kiauqux."

Zit amr liauw, snax xee hniajixmue jiac vng vaw dyrr kir jre diamr hording-kax. Danw ar danw, tnix kangx lylyx, amr sysyx, hitt amr ee tnix, simxmic dy' byy.

3. snuawiarquiw

Tnix snex bxan but, jerje singlingg dirr sewqanx snetnuar. Uree u nng qix kax, uree snex sir qix tuiw, e vuex, e qniaa, e siuu, e tiaur :ee, simxmih kuanw dy' longxx u. Tnidingw u sinhunn vaii vaii qui' let danw beh dingxter, itdanr u kax liongr dit iacc pnirkangx be cuanxkuir :ee, dingxbin jit xee luiwtuir erdew jit xee, vintauu aw laii, berdangr qingxsuanw, byy tangx camsiongg.

U jit xee dingw sxer jyr langg :ee, diyc qaur ix ee sii, duxsii-duxjun jit jiah quexjixbaa ongxsingx. Ix m zinrhun, m qniaa m suaw diamr hiax sairdingwhing.

"Guaw lingkyw danw, danw qaur u 'langg' tangx jyr jiacc beh kir cutsir."

Quiqiw qniaa sxor bxan nii, qongw jit byy nng. Byy jiauww juxgnow jiauww junxjinn :ee diyhh ho'ngg huiwdui, siag lyc huanqanx jyr snuawiarquiw.

Dirr zinsewqanx u hxunn byy tew, snuawiarquiw kiw hiabhun. Qnir diyc langg dyrr air qa'ngg hriax, qa'ngg congwqingw.

"Liw beh dic sniaw, u sniaw uankud? Uirr sniaw su m kacc qinw kir dautaix, suacc dirr iongqanx decc congwdi langg?" Ham' bonglingg u gengiw tongx, vorlok ee ang'ii hyxlew aw mng kiw.

"Guaw air jyr langg. Inx beh hingqiongg ab guaw jyr jingsnix. Narr beh qiyr guaw mair qycc jyr qxuiw, diyh'air u jit diauu langmia guan jiyh guaw dingg cutsir." Snuawiarquiw qongw.

"Guaw huewtauu veh-jap-veh, mia jo liw qycc dautaix byy qangai. Mraxqycc, liw cutsir diyhh jyr hyw, m hyw jyr pnaiw. Narr byy jiarr, hex guaw si byy air."

Snuawiarquiw jaiwsnax ingwinw, qycc vaiwcniaw Taiwimx Niuniuu jyr diqnir. Sna' dauxngua, laurhuexaw tingkongx singtenx, snuawiarquiw vniwjniaa angngex-aw cutsir, kih cuir, uaix pni, dywvingg cuewpuew u jiaxbuw jyr qiwzin. Baiw snejuer, hyw simqnuax, duarhanr vniwjniaa tong' hniujngx siongrqaiww senrliongg ee langg.

4. bow qapp angx

Sxor vah nii jingg, Poasoa u nng xee vorlok, jit xee qiyr Angx, jit xee qiyr Bow. Angx qapp Bow qed sixuanx quixnarr sxer quer jit sxer. Nng vingg ee langg byy qewcua, byy siy' qaucab. Jit~vnuar vaiw aw kongrduxciang u jicjiab, sixsiongx lanbenw, langgiac jerjiyw decc jingcax narnia.

U jit nii, siqniajingr dua siqniaa, drir qaur Angx hitt xee vorlok ee jabow :ee longxx siw, Bow hitt xee vorlok ee davox :ee longxx byy kuir. Dnaxx jitt sniax, byy air vorlok kudjingw .kir, nng vingg ee davox jabow dikkag diyhh qed cinjniaa.

"Lanw texqeh snevunw dy' kacc sux inx davox :ee, kuiwlat qapp inx qyckacc si be vixping .did. Lanw quii quii qnrua qnrua, snesiw qaudnii jiacc tangx snex cutsir ee ngex-aw, aurquer longxx diyhh jiac inx ee sner, siuw inx ee toxsiok, yc inx ee uergiw. Lanw qamxx byy jiokk kikkuix?"

"Lanw diyhh qapp inx bingg hox bingg ciangr, kacc benw aurzit aw jiacc laii duii simqnuax. Codang lanw laii jyr, byy qangai. Inx beh kax dax ciuw dax, vutdong samvyw marr suijai inx. Cur lairgua duarser hxang dairjir diyhh lanw jabow :ee juanxkuann juxir jiacc e iong .did."

Bow kuix diauqnia, Angx jinrqaix ingwsingg. Knuar sii knuar zit, jaboxlangg jiyx sair jyr duarlangg.

5. huelok-jniax

Daiuann sevo kuiuii ee cauxvox, huelok qui' dua din dirr hitt binrdingw snetnuar, diyy diyy tiaur tiaur. Logpuee jyr snxax, logqud kongwtngx, logbah junw vng, guanbinn uaxvng huelok dorsnix, qapp huelok vnevnee dirr cauxvox quer sing'uac.

Kajiacpniax pnai qingjnir, jit xee Hoania ee siauwlenqex cutgua denw qige. Qruar qrui :ee m tangx qra sria, iauxx bue duarjiah :ee m hyw liac, cindiongw sirdua jaiww-snax-jaiww-sir u qawsi. Bagjiux-jingg jit din lok-aw ngar tauu decc jiac cauw. U knuar diyc qacbak :ee, siauwlenqex siongr jinx jinx jnxir vuex .cud .kir. Lok-aw diyc cneqniax, jit siwqer cuanwdyy. Bulongrsongr kuah ee cauxvox cunx jit jiah diyc jnxir :ee dyw dirr tokax qunxlingr.

Siauwlenqex qinruaw kir beh kiyh ix ee lahbut. Huelok bagjiux niar quann, kuix cuir qongxue, snia'auu nngw siysiyy. "Guaw diyhsit qra liw qongw, guaw si lok-aw-jniax. Liw hro guaw jit diauu uahmia. Liw beh air guaw jyr sniaw, guaw quatding ingwhur liw qaxx qaur." 

Lok-aw-jniax sniu venwvo beh tauxtuah. Liamdongsii, siauwlenqex bongx byy lo.

"Guaw venr jyr jit xee qoniuu hro liw jyr bow, liw sniu sniaw kuanw?" Lok-aw-jniax la jit xee uertauu.

"Langg qapp iaujniax nacc tangx puewduir jyr angbow? Guaw kacc jiac be quer vah huer. Liw tangx uac lecc d.-dngquw-q." Siauwlenqex hnair tauu.

"Acc narr guaw venr jyr jit jiah qxauw lehh? Guaw jyr qxauw qra liw qor cur. Liw cutgau tyxliac ee sii, guaw iarr tangx tewqangx draur kaciuw."

"Qxauw, guanw cri u qraur je jiah :ar. Guanw daux taucuir jap gua xee, jinw longxx dngdanw guaw liac jit jiah tausnex-aw dngw kir tangx pingjuw."

"Anxnex guaw jaix :ar. Guaw laii venr jyr jit jangg quexjixciu, hro liw qapp liw ee qniaxsunx-aw jiac ingxqiuw. Junw narr dycc jit zit jit jiah tausnex-aw dy' liac byy, siongrr jiwjiyw, linw iauxx u quexjiw tangx diriaux."

"U tongx oox!"

Siauwlenqex jid'err rinr hyw, uat jit xe srinx, jingsnex vniwjniaa ciurjaix. Siauwlenqex qra quexjixciu hnair kir qaur qingqactauu. Dngw qaur vorlok hruat lyc too, lenvnix kuix huex, kacc quer, qui' jangg ciu-aw juixlaii-aw qed qaxx luirdyxqix.

6. syc'axtuix

Taiwqow sidai, langg qapp sinn u dring iokzi, langg jiauww jiac jiauww juer siuw vunxhun byy jyr pnaiw, tnisinn e dirr zit cud ee sii an' tnidingw vangr syc'axtuix lyc .laii, zit amr siux dywdngw. U air beh did diyc ingxuac :ee, lrui duarsyh vreh jnriu tnix, qihue jit langg jit vaiw, byy nng vaiw. Lamluw byy hunx, dogdok ginxaxlangg diyhh quer jap-lak huer jiacc u hxun.

U jit duir duarjew siyxdi, jurr sewhanr dyrr sna' duanwiog beh qangg sijun kir vreh hitt diauu syc'axtuix. Byy pacsngr, siyxdi buerjingrr jap-lak huer suacc ziamw diyc igjingr, sensnix laii ongxjinw, hnair tauu trow kuir, duanr qongxx qycc uac byy vnuar nii.

"Tnisinn druar ee soxjai sniaw qongqingw, guaw jitt siwlangg duanwduanr knuar be diyc :ar."

Siyxdi dirr bincngg-dingw vnuar tedyw, simdew ud ud jiokk samwdam, naxx qongw qycc naxx decc kamrsaur. Duarjew knuar diyc jiokk m qramx. Uirdiyhh siyxdi, jit zidqanx ee qanghux, tnidingw dere beh qniaa ongxhuee.

"Hitt binrdingw u sniaw qingxdir, tingwhau guaw dngxhuee, guaw tangx qra liw qongw siongser." Duarjew duiww siyxdi qongw.

"Hex jiacc si m tangx lar," laurbuw qra jnaa qinw qinw. "Zit lyc snuax, duarsyh ho'ngg siux siux .dngw .kir. Sii qaur, liw vuac vuac .siw kacc kuair."

"A'buw, liw hongwsimx. Guaw quatding qnuaw e dngw .laii."

Syc'axtuix, vreh kiw benw qniax qodnuax, vreh lyc laii, jit srinx jit mia byy qaxx jit xee pnua. Duarjew tniar siyxdi m qnaw encenn. Henrduxhen, zidtauu decbeh lyhsnuax.

7. juixdii-lai ee jaboxquiw

Dirr Kavalan ee vingngiuu-kongwtow u jit kud dua juixdii, lairdew druar jit xe jaboxquiw, duarser bak, quanrqe pni, duarbin cnex sunxsungw qycc kiccuir. Pni-bak-cuir baiw qaxx jiauu driyc, dogdok jit vo qua'auu qamdnix. Javolangg bongwdnaw sax byy jangw :ee hro ix ee quasniax snriaa kir qaur juixdii-vnix, snesiw limqib. Beh air mia diyh'air quer tongquanx. Quer narr u quer, jiacc u tangx qycc uac qycc cuanxkuir.

"Guaw snex jyr u suiw bor?" Jaboxquiw mng.

"U, liw snex jyr jiokk suiw jiokk suiw, bersux tnidingw ee senluw."

Javolangg jiacc qongw suah, jaboxquiw jit xe ciuw qra ix tuax kir juixdii lairdew.

"Guaw snex jyr sniaw kuanw? Liw diyhh qongw jiauwsit, m tangx u ziamuaa." Jaboxquiw mng lingrr jit xee javolangg.

"Suiw-baiw jairr langg knuar. Guaw snex bagjiux m bad knuar quer qoniuu-aw cincniu liw jiacc kiauxsinn, jiacc u lingkir."

Javolangg naxx qongw qycc naxx vixciuw. Uat jit linr dngw, juixdii iurqycc qex jit xee juixquiw qapp jaboxquiw jywpnua.

U jit zit, jit xee cnemee :ee sriu jaboxquiw ee quasniax inxcua, jidlo cue laii qaur der, jaboxquiw jiauww siogle mng ix qangrkuanw ee bunrdee.

"Jaboxqnuax, liw jin' gauu qa'ngg congwdi. Guaw bagjiux knuar byy, beh tacc jai'ngiaw liw snex jyr ngii iacc vniw?"

"Guaw cab cab liw hiacc je! Guaw hyw-baiw snejuer, qinduw liw diyh'air hro guaw jit qxur ue. Byy jiarr, juixdii-lai dyrr si liw jongwsinx ji' de." Jaboxquiw dahgne m lyhnngw.

"Guanw sirduarlangg bad qra guaw qongw, qongxx tniqongveh :a jiokk vnejniar, sur langg jit hyw, ingxingw jit baiw qacpuer. Guaw bagjiux cnemee. Mraxqycc, guaw ee hni-aw jiokk lxingg, qxauw-aw dy' qapp guaw be vixvniar tihh. Liw snia'imx jiacc hyw tniax, binrjuiw narr qycc viw langg kacc suiw, hex dy' jiokk byy tniliw."

"Hngr, liw jywlangg u sidjai, ue qongw girliw si. Guaw m na beh zriauu liw snewmia, simrcniaw beh qer hro liw jyr bow."

Bak jit xe nih, baiw jijix ee jaboxquiw vnir jniaa jit xee suiw gianggiangx ee qoniuu-aw. Hitt zit, cnemee :ee vehvec kiyh diyc jit xee bow .dngw .kir.

8. tamkud

Ingxsii dirr lairsnuax soxjai u jit kud tamkud, cimx longwlongr, cringx ngiarngia. Qniwnarr u sinkow-vnertniar iacc tauu siyx hni zet :ee kir qaur tamkud jimr dirr lairbin kacc benw zuarr quw, langg jiksii jinghed ciongjiog, songxsinn, lenrr tongwkow ee qiwdii dy' tangx sew hro cingkir.

Qangg hitt liap snuax lairdew, u jit xee vorlok dirr hiax kiarkiw. Vorlok li tamkud siongdongx u .jit .der .aw, snuax qia lo cux. Beh anwjnuaw kir qaur xui, lorjua diyhh sewdai siogsingg, dingw vuer qar xe vuer.

Qalyhjair, vorlok ee langg longxx jiokk hranw did puawvne, dag'ee qycc jin' liongsen, m bad decc siy' pah, uanqex iacc tautec. Laurlangqex qongxqow ee sii, ginxaxlangg jiacc jaix tnikae u "siy' taii" jitt hy kuanw dairjir. Jerje langg jurr cutsir qaur dngw .kir, tamkud hitt dah m bad dahkaqaur .quer.

U jit zit, qiongqongwcat laii qaur vorlok jingviangr, knuar diyc mic dyrr duat, qnir diyc langg dyrr taii. Jit kunr aw quer, vorlok qui'ee ho'ngg jaubet, qanda' jit xee siauwlenqex bih dirr derhamrkax byy ho'ngg huatqenr.

Vunxzenn cing'iux ee vorlok vniwjniaa sinsix dua siwqer. Laurve, laurbuw, hniaqyx qapp jixmue jiauu ho'ngg qetqyw sniwmia, siauwlenqex kaur qaxx exsniax, bagsaiw nguainguaix lrauu qycjaiww lrauu, simqnuax qankow qaxx qiongbeh giac dyx lec amrqunw.

"Bylun simxmih kuanw qankow kacc dua tnix, tamkud ee juiw tangx qra lanw sew liauw li."

Hionghiongg, siauwlenqex sniu kiw diyc a'vaa quewkir duiww ix ee qawsi. Dandanx kir quer jit vaiw, qajair, jyr ginxaw hitt sii hyw qiwjaii. Danzinn-dogmaw, uanaxx hro ix qniaa qaur xui.

"Tingwhau an' tamkud vreh kiw srinx, qui' senx langg e cincniu dingg cutsir qangrkuanw, quewongw baiw :ee jit sud sud aw dy' be lauu diamr sinkux-dingw."

Dingxtauu snxax jiacc tngwsag, sniu diyc a'buw jairsnix ee sii kniavyc ee aurngiaw, beh iacc m, siauwlenqex jin' suangniau.

"Qiwdii jiauu jiauu cringx hniwdiux, a'vaa qapp a'buw iong koxsimx qar lanw :ee, m dyrr iarr sew sew .kir?"

Sniu jinr sniu trer u .jit .kunr, siauwlenqex ui' tamkud srinn jit ciuw juiw ur dirr simjyy binrdingw. Kacc quer, ix simqnuax be qycjaiww qankow. Qiwdii jit diamw jit duh dy' byy pacqasuax .kir.

9. vinnngciu

U jit xee qoniuu-aw, duxx jyr jap-lak huer, air cing ngiucnix ee snaqunn, taukag suwsiongg cah jit luiw vec huex, sinkudingw vutsii u jit jiongw pangkuir. Vunxjngx ee siauwlenn :ee qeww jiokk uirr ix cibee.

U jit xee qapp ix qangg jngx ee jaboxginxaw kiw dowsimx, amr amr decc qra ix jiuwliam. Suiw qoniuu-aw hut .jit .xe venr jyr jit jangg vinnngciu, tong' jngx dukiw liamrjiur :ee, byy qaxx vnuar xee jai'ngiaw.

Qoniuu-aw venr jyr vinnngciu qodnuax druar dirr snuapniaa, simliam cur-lai ee langg, qui' qangx tihauw byy suah.

"Si si'angw dirr hiax tii tii kaur kaur hnaa?"

Jit xee ang'ii bagjiux qanhuex, tniax diyc hex kaur-sniax, dac jinwjingg mng bai. Tauu laii buew kir, vinnngg qoniuu sueh tauwqix. Ang'ii tniax diyc jin' m qramx, jin' qra kyxlinn.

"Taux liac qxex iarr diyhh liauw quaw biw. Beh venr dywdngw .kir jairjuiw si byy huatdo. Dingg qycc cutsir jyr langg dyrr tangx cir knuar mai." Ang'ii qongw, snia'imx qe qe.

"Narr u tangx qycc jyr langg, kacc kow guaw dy' m qniax." Vinnngg qoniuu duiwcuir rinr.

"Liw diyhh hro langg' voziok qapp lingdi cenvah vaiw, sinsix lyc too dyrr tangx dingtauu snex."

Ang'ii vangr vo. Vinnngg qoniuu jiksii u hiauxgno.

Qecdngw qangx cingjaw, jit xee siauwlenlangg beh laii caiw iyhbi, hng hng hah diyc jit jun pangkir, lang'axdnar vangr lehh, itsimx-it'ir beh cue qintauu. Jit xe aw quw vniar laii qaur, knuar diyc jit jangg ciu-aw dit longwsongr, cnex viangviangx, vehsig ee huex kuix qaxx bat bat si.

"Jex simxmih ciu, huex qycc jiacc cingpangx .diyc! Dyrr m jaix ciurjiw jubi sniaw kuanw?"

Siauwlenlangg an' tokax cinwcaiw kiyh jit liap ciurjiw danr zip kir cuiwkangx. Vinnngjiw si siab siab hiamx hiamx ee kauxbi, dirr cuir-lai vro qycc e suawcuir. Siauwlenlangg cuiwkangx kuix lehh hap lehh, jap vaiw, sxor jap vaiw, jnia' vah vaiw, itdit qaur vinnngg vec lahsac byy bi .kir, siauwlenlangg jiacc qamguan.

Dngqyngii ee ciurjiw vniwjniaa pyh ho'ngg puiwsag dirr tokax. Jit diauu snewmiaa amr amr aw decc snejniaa.

10. huexsnuax

Ping quann, ping qia, snuatauu jit liap suawjiab jit liap, vnevox uaw juiw kacc byy langg air kia. Hongx dua jun, ho dua liap, zidtauu vutsii dy' ciah ngiarngia. Ingxjun qoxjaw sii, zidtauqongx e qa'ngg qa, cneqongg hongx e qa'ngg ciax dyw, duarjuixho e qa'ngg qongr qaxx gong gong. Langmia cer cer, qnuaa .siw, zuac .siw, jiokk sowsiongg.

"Snuax-dingw hyw qingxdir. Tniqongx bagkangw ciah, diau'iwqor m hro lanw hyw kiarkiw. Lanw lingkyw vnuax laii snuax ee vakdow lairdew bih." U langg anxnex ciongwkixtauu.

"Hiax beh anwjnuaw druar? Langg byy kongkir be uac." Suisii u cniuwliam byy qangg sniax :ee.

"Kuix kiwkangx dyrr tywdongr :ar. Snuax ee vaklai be nar diyc zit, marr be lramm diyc ho, hongx junw hro ix jngr e quer, kuiwcauw marr lijiw narnia."

Vnuaa jingliw, snuadingxlangg liw jit cuir, guaw jit jic. Priyr hongx priyr ho, dag'ee sniu .diyc sidjai dy' qniax. Snuax ee vaklai ox cnxix amr guec, qaur jiax laii, katkow iarr diyhh qniaa.

Duardniaw, dang'uex, huextnuar, langsngg jit sngg, juxjiac ee qesix diyhh kuanw hro jiaujngg jacc be gy dow. Jiahvng-sii jid'err qaur, hniahuew derr id dairsingx. Huexhunx an' kiwkangx syy .cud .kir, diamr dirr guarkauw :ee m jaix jit xee mohmec, bin-aw liksig huah qiyr "huexsnuax! huexsnuax!" Jiac vng vaw, hniaa juiw sew sinkux. Sew-sinkux-juiw siyx tngwtngr, lrauu cud kir qaur kauxsinx iauxx e cingwenx. Unsiyx ee tngjnuaa dngg lrauu dngg tauu.

11. pongwciw? vueciw?

Ciurnaa-aw-lai jit juiw pongwciw, byy qangg texqeh tongxqiong snax xee hniadi. Dua :ee snex jyr ngii qunwqunr, kuiwcauw vaw, atciuxvar jin' hranw did sux. Derr zi :ee kax lyr ciuw dngg, gauu jauw, gauu tiaur, qycc gauu nngwjngr. Sewhanr :ee genwvavax qycc dew kax, u simxmih hyw jiahmic, ingxingw diyhh nng xee hniaqyx jiac cunx :ee jiacc u diyc qaur ix. Ser jiah pogngwciw jiokk utjud, taujauxcur quixnarr vaiw, byy qaxx jit vaiw byy ho'ngg liac .dngw .laii.

"Tokax byy jac byy ngaa, qycc u uahdauh jiacc si qniax langg. Liw kaciuw gniausix ~, diyhh druar ciu-dingw kacc dewdauw."

Tauu damr damr tniax a'buw liamrlec. Qecviah daux ee jit jiah pongwciw dirr tokax uai'unn luarlua syy, uat jit linr dngw, jit jiah ingjunw qra qa lehh vuex kir tnidingw.

U jit qangx, nng xee hniaqyx cud kir cittyy, vangr siyxdi-aw qo' jit xee qor cur. Ser jiah pongwciw hng hng knuar qnir diyc jit buew gimxjuaa dirr a'hniax aurviah jyr-qxuiw-jyr-sui, iamw iamw iab iab, kuicex ee cuiwjic nar lehh nar lehh. Ser jiah pongwciw dua diyhqniax, kacc sux dyrr byy aukongr, sen' huah dy' be dua sniax. Narr beh tongx siausid kir qra inx vywjaix, jauw qauwui, hniaqyx kiongxqniax dyrr venr jyr gimxjuaa ee diamxsimx .kir .ar.

"Narr mrbenw vreh kiw vreh lyc vyhqnaxx dyrr hur e diyc."

Liamdongsii jit xee simliam snex cutsir, kax lenvnisii liongr kiw.  Ser jiah pongwciw siyxqecjingw, jid'err tiaur, kaciuw kinqnia vuex quer snax jangg ciu.

"Linw dag'ee knuar, e vuex ee pongwciw!"

Jit jiah qausanx-aw huah qaxx duarser sniax. Diamrjing ee ciurnaa-aw-lai kiw huanxhua.

12. haixangx

Qongxkuah kui'uii ee ngiuhaiw, jerje uahmic dirr hitt lairbin snetnuar. Jit jiah hy qiyr Tenvawongg ee haixangx, uanaxx jiac, uanaxx hua, uanaxx dua, siurguann jiac qaur jit-vah gua ~ ~, guanjai jiokk ciydiyy, jiokk uah'ingw, kir qaur dyhh longxx ciongx taujingg.

U jit qangx, jit din haixangx siy' jiyx kir cittyy. Hongx kinsngw, zit nngxiyc, juiw cringx cringx. Tenvawongg hingr cuartauu, jit lo hiongr saix didddit siuu .kir. Lo-diongx gu diyc dywqaxlauu, Tenvawongg hionghiongg uat tauu, jiacc jaix qaqi lakdin .kir, aurviah :ee jit xee dy' byy duer .laii.

"Hiongr vag kacc qnuaa, hiongr lamm kacc zuac. Hiongr saix qycc kir e vrong viah. Guaw diyhh qinw huanx tauu dngw srinx kacc si."

Diwqag diyc hionghiamw, uat jit xe srinx, qnuaw jit xe qinw, Tenvawongg hionghiongg diyc vnerhongx, jit piang duarbuw piang suacc dirr haixdiongngx cai lehh, tauu hiongr vaktauu, buew hiongr lamm.

"Linw dag'ee knuar, kywdax ee haixangx dirr tauqaur hiax."

Cuartauu ee haixdix-aw decc huah, duewau quixnarr jiah sui' tiaur cud haixbin cimxknuar.

"Lanw diyhh qinw pax dywdngw, qycc kir e byy snewmia."

Haixdix-aw siy' vywcuir. U haixangx naxx jit jua vychnua jac lehh, kryw lrauu iacc juiw limm longxx unw dakdag.

13. snuadibyw qapp angngex-aw

"Nguaaxxx... Nguaaxxx..."

Jiauw tii, kex lrauu, hiyc drang, dniardiyc ee cimx snuax ciurnaa-aw-lai, hionghiongg, anngex-aw ee kaur-sniax camcab, huanvalixqiauw. Jit jiah snuadibyw hnowsursiong, tniax diyc sniax sui' jongg cud laii knuar. Ngex-aw sewiur-i. qycc pongwpauh pongwpauh. Snuadibyw knuar jit xe qac'ir, dyrr qra kiyh dngw kir cri.

"Cinvag snex :ee dy' qiongbeh cri be dua :ar, qycc qor qaxx langg ee ginxaw .kir." Snuadiqangx knuar be jyr .did, qra dibyw kiycciyr.

"Jyww liw hongwsimx. Guaw lingx vaw vaw dilehh, byy cax qaxx jex jitt xee ginxaxpiw."

Qongw suah, snuadibyw dyw tanxkix. Jit din di'axqniaw sui' cnii uaw laii beh suh lingx. Angngex-aw cuir saii lehh saii lehh, cue diyc lingtauu, qapp di'axqniaw qangrngiu, qamm lehh hermia suh.

Jit xee snuadingxlangg srunn hy beh laii liac snuadix, cue laii qaur der, knuar diyc jit juiw ee di'axqniaw decc jiac nix, diongx:a qycc qaccamx jit xee ginxaxqniaw. Snuadingxlangg diam diam m qnaw jyr sniax, kutbih dirr ciurnaa lairdew. Tnix amr .laii, snuadibyw diyhh cud kir cuerjiac. Tranr jit xee hyw qigu, snuadinglangg ginxaw py kiw, kiyh kiw kax, jauw naxx decc vuex.

Bak jit xe nih, dongqisii suh dibyxlingx ee iur ngex :a vniwjniaa jewsix. U jit nii, jngx-lai siarsinn diyhh cuann singlew.

"Lanw diyhh taii diqangx, m hyw taii dibyw. Acc narr qxex-aw dyrr vutciangjai, qebyw, qeqag, iacc qenua'aw, suijai linw vaii."

Jewsix qacc u huanhur, dibyw qyckacc vuii dy' byy taii. Diqangx diqynua cabdap dinx, qaur sii qaur jun, danw jnriu diqongqer.

14. angngex-aw

Jairjaw dirr vnevode, langg qapp tausnex-aw qokk jiamr tnide jit pxenr. Bylun huelok, qnxiux-aw iacc niauvar, lyc too cutsir benw zuarr quw, sir qix kaqud iauxx hniuser, qaqi diyhh dnir lat qinw tner kiw, narr byy, snewmia dyrr limguii. Langg kiyh qniaw, byy cincniu tausnex-aw hiacc qinw e qniaa. Angngex-aw cuttauu qecdngw qangx dyrr kuix bak, kax quaww ciuw dirr tokax vee, uanaxx jit siwqer liuliux kir.

"Simqnuax aw, laii jiac daur lor!"

Laurbuw decc qiyr qniaw. Uat jit xee srinx, duxx muaw guec ee ngix :a ngr a'buw hiax liahdit vee .kir.

"Senrang'aw, dngw laii ngo'ngix kunr lor."

A'maw dua sniax hiamr sunx ee penmiaa. Iauxx bue dorjer ee angngex-aw tniax diyc sniax, kaw mew ciuw mee vee .dngw .kir, junxnaxx jit jiah senrangaxtangg.

U jit xee jaboxginxaxngix, kaqud ciuxqud snex cutsir dy' nngw siysiyy, beh vingw jit xee srinx dy' byy jaidiau, qui' qangx dirr bincngg-dingw dyw ciyr ciyr, sursu-hangrhang longxx diyhh niulew qra huadlyc.

U jit zit, jit xee bre behgeqyx laii decc huacbe, ciuw nirr jit qix iyqoxlongx longlongx hauw.

"Laii or, air jiac behgeqyx :ee qinw uaw .laii or!"

Duarlangg byy ingg jycsid. Ginxaxlangg qui' din vekangwiah cnii uaw .kir. Bre behgeqyx :ee qra sewhanr ginxaw snriaa kir qaur guarvotauu, jit xee bre jit kox ginn. Tong' jngtauu, qanda' kaciuw nngw qaucqauh :ee byy ho'ngg quaixbe .kir.

Jit vaiw srid qakcad, sirduarlangg simqnuax siucsiuh dnua. Qycc kir, bylun cutsir iuwngex :a zuarr gauu dua, zuarr gauu vee, laurbuw qra iuwqniaw qor diauu diauu, iong py :ee, qorr riang :ee. Angngex-aw kaqud ciuxqud cingkir damdamx. Laurve laurbuw simtauu k.-kinsangx-s.

15. ciurlangg

Jaxjenn ee lairsnualangg, sinkux e huad qix, e snex hiyc, jiac juiw dyrr e vaw, suh kongkir dyrr e uac, byy qinx dnivnuar, jit siangx kax iongw kenwkenr, jiongzit liuliux jauw.

U jit zit, lairsnualangg jit qniaa quixnarr miaa lyhsnuax laii qaur jit ziah u kehyy unkunn ee vnevox decc tamr lorquanx, hongx bibii, juiw cringx cringx, qongqingw suiw qaxx byy-ten.-byy-liongg.

"Jitt xui hyw kiarkiw. Snuadingw qnuaa sngwsngr. Lanw quikir vnuax laii jiax druar hyw lar."

Jerje qra ix janr sniax. Juxir hnua dnia, kaqud circa gniaux, be dniardiyc, diddit beh qniasuaw xui.

"Kax dingr lyc kir too nirr dyrr banw e diauu."

Tokax jit qix cauxaxqix ser aw sniax decc vangr vo, cud juxir. Jit din langg sinr daucdauh, kax giac quann dua lat jamr .lyc .kir. Bersux liamtix, angzintoo qra kaqud liamm diauu diauu, jiokk jairdew, hongx anwjnuaw cuex dy' be dyw, beh qniasuw jit vo suacc iarr byy hxuad tihh. Jit din langg beh kaur, bagsaiw suacc linr be lyc .laii.

"Dag'ee mair siongsimx. Guaw pnri e diyc joxqex ee pangbi, tniax e diyc joxqex decc qiyr lanw ee sniax. Linw duer guaw qniaa."

Cuartauu :ee qig lat beh qra kaqud crunx hro dngg. U langg ciongx taujingg, u langg dirr aurviacbin qinduer. Quixnarr siangx kaqud dirr too nirr hiongr joxqex ee cinlangg diddit uaw .kir.

16. Duarbuw Snuax

U jit xee canjngx ee ginxaxhniax kir lairsnuax cue snuax cittyy. Erdauwvox laii qauwui, beh amr aw beh sna' lirvet hitt diap, ginxaxhniax mng snuax hy jyr simxmih miaa.

"Miaa? Simxmih si miaa?"

"Langg' anwjnuaw qra liw qiyr, hex dyrr si liw ee miaa."

"Langg' longxx qiyr guaw jyr Snuax."

"Jiaxee snuax je mixmuaw. Liw byy jit xee qaqi ee miaa, guaw au jua laii narr cue byy lo, beh anwjnuaw mng kiw?"

Byy jit xee miaa tangx vyr ho'ngg jaix, Snuax trow duarsimkuir, jiokk ywlyc, mng ginxaxhniax diyhh anwjnuaw jiacc erdangr u jit xee miaa.

"Guaw ee miaa si gunw sirduarlangg qra guaw hy :ee. Liw byy-cinx-byy-crig, guaw laii qra liw draur hy miaa. Vadd zit aw narr u langg mng liw ee miazi, liw dyrr qongw liw qiyr jyr Tapu."

U jit xee miaa tangx ho'ngg qiyr, Tapu jiokk hnuahiw. Ginxaxhniax qapp Tapu ioksog beh qycc sna' qnir. Jongw .si, ginxaxhniax jit kir byy qycc dngw .laii.

Quer u hiacc quw, u jit zit, jit xee druar dirr snuax-kax ee javoginxaw qniakaqaur.

"Guaw qiyr jyr Dabu." Langg' buerjingrr mng, Snuax dairsingx vyr qinw qinw.

"Guaw qinaxzit kir snuadingw kiyh caa, u jit liap snuax qra guaw qongw ix hy jyr Duabu."

Javoginxaw dngw kir qaur snuax-kax anxnix decc qongw ho'ngg tniax. Jit din ginxaw kiw huanxhua, qecdngw qangx dangjee kir qapp jitt liap u miaa ee snuax sigsai.

"Duarbuw! Duarbuw Snuax!"

Ginxaxlangg hihix-huarhua. Juixciangg qapp jiauxjiah iarr decc draur laurzet, huah qaxx duarbuw sniax. Dandanx Snuax, ix byy-ue-byy-qxur.

17. kahy

U jit xee sriu tnisinn jiuwjow ee siartauu, jniw qangrr lau vutlun, kahuac qniaa narr jnriu cingx-bxan, qecdngw qangx hitt ejaiw dyrr e quisenx, simxmih kuanw iyhbi laii dy' qiur be dngw .laii.

"Nng qix kaqud qniaa .quer .ee ingxingw e lauu hy. U quixsinn e laii qra linw sngr vo. Kaziah sui' langg u jingcax, be dingdnaa. Guanw quatduanr be hro linw siurkuix, be qra linw auxkud. Sii qaur zit qaur, byy langg jauw e quer ciuw."

Tnisinn pnaiw cingwcingr. Ix jid'err ciangwsniax, tong' jngtauu bersux kir uer diyc siqniajingr. Zit putauu, qxex qiywqnix, uree si angx cneciyh siw, uree si qniaw qiyr be jingsinn. Ciydiyy iacc uah'ingw :ee longxx jiac be quw, be qniaa be jauw :ee kixdyww dngg huewsiu.

"Lanw mair cutmngg suacc berhiangw? Byy kahy, lanw dyrr benw kir qnir Giamlyy."

"Byy cutgua tyxliac, qiux diamr cur-lai juat suixhuew, qinxban marr si iaux .siw."

"Lanw beh narr u sxit-aw m jnia' hyw? Iong vuex :ee benw qorr qniaa :ee, l.-laikir-k., c.-cutzip-z. qyckacc je jua, tokax longxx be u ziah."

"Qongw qongw hiaxee byy sursaiw :ee beh nii? Narr u sidqow lanw dyrr ingsinx :ar, iarr suacc diyhh dirr jiax decc trow duarkuir?"

Jingwlangg sniu byy venwvo, jiokk jnia' koxnauw. Jitt sijun, jit xee ginxaw ciax qux lang angr longr puar amqngx, kaqud diyhsiongx, cnehueh cabcap dih.

"Simxmih langg vowjad-aw qinw qra guaw tec jit der laii? Kajiacdew diyhh siyw uanw lehh jiacc be qycc dih."

Ginxaw ee laurbuw huah sniax si, ginxaw ee laurve suisii kir. Vowjad-aw jit renn quer jit renn, ginxaw-kax vunxjniaa ser aw xee suacc vniwjniaa naxx duarlangg ee cunwciyh. Dirr tokax qniasuaw, qycc iarr byy kajingxtauu-aw ee ngiaxziah.

Vowtauu vowbuew vutciangjai, dag'ee u ngiu tranr ngiu, kadew dnii dnii .kiw .laii kacc iauwqinw si.

"Kahunn sii dua sii ser, lanw jit qnrua langg, knuar inx beh an' dyhh sngr kiw?"

Kaqud vaux jit renn vor, byy qycc tngwciackax, dag'ee unxsimx aw cutmngg, lortauu qyckacc hng dy' qnaw kir.

18. sidqow

Jit siangx ciuxqud e liac, nng qix kaqud e qniaa, ingxvaiw ee langg, kajiacpniax qycc u snex jit duir sidqow tangx vuex kir tnidingw. Dedang iacc dua juiw tytyx, sidqow pet .nng .xe qinw vuex kir ciu-dingw dyrr tywdongr :ar. Dyx-vxingx-juiw-huew-qiab, byy jit hxang qniax. Gauu snetnuar qycc dngg snewmia, langg naxx laii naxx je, tnidingw, tokax, muaw tnie qewqer langg ee ngiaxziah.

Qiongbeh hro langg vig qaxx jauw byy lo, snuakimm iaxsiur siy' qingrkax, quat'ir beh qapp langg vniar jit xee qaurvyc, tangx qra derqair cniuw dywdngw .laii. Langg qapp jingsnex-aw jenr snax mee snax zit, siangvingg diyhsiongx :ee dujairgua, siw :ee dy' qangxx bxan. Be kamx did sixsiongx, langg dairsingx beh qangxhyy.

"Qaiwsunn rue hro dniardiyc. Aurzit aw qongr sixvanw, knuar si beh tnidingw vuex iacc tokax jauw, nng hxang hro linw qingw jit hxang. Dagg hxang beh jiamr ngiaa sen' m tangx."

Jingsnex-aw singx kuivnuaa. Jiongww langg siy' duw cuir decc gimxgi.

"Kax dac dirr too kacc sidjai, sidqow jenw driau byy qangai. Lanw diyhh qapp inx tuii qongr tih. Jit siangx ciuxqud diyhh hro lanw lauu lecc jycjiac, vadd zit aw beh jauxtanr kacc byy kunwlann."

Dingw srinx jit siangx ciuw, xe srinx jit siangx kax, sidqow qrax hniwsag, langg qapp tausnex-aw jiamrsii cuxhyy.

Langg dirr tokax qniaa, samvutsii aw e siauwliam hitt dnxua dirr tnidingw packovuex ee zidjiw, qniwnarr dedang iacc jetaujuiw laii ee sii qyckacc si.

19. pacjiyhsaix

Jit xee pacjiyhsaix kir keqaux kiyh jiyhtauu. Jit der jiyhqow kuix sniax qongw, "Guaw si qauu."

Pacjiyhsaix did diyc kuitauw, jiyhqow iong qorr ciax-aw ciax dngw kir cur nirr, ciamwdyx giac jnriu ciuw, jit xee vnuar vox quer, cur-lai qex jit jiah jiyhqauu .cud .laii.

Huandngw zit, pacjiyhsaix iurqycc kir qangg jit xui beh jaursimm jiyhtauu.

"Guaw si lok-aw."

Tniax diyc sniax, pacjiyhsaix qra qesix giaa .cud .laii. Nng xee vnuar ciuw, jit jiah jiyhtauu jam ee lok-aw dirr kex-qnii naxx jit jrunx kiarangx. 

Qniax langg jaikiyh ix ee viwbit liauxau e laii qapp ix siy' jnecniuw, pacjiycsaix bih diamr cur-lai, kacc benw ham' langg jicjiab ee sii tutcuir; beh kir keqaux qniax langg siangr buexau, jap vo qauw uat tauu. Dagg qangx tnix tiachac, pacjiyhsaix dyrr jongg kir keqaux tniax jiyhtauu cud jixsi.

"Pacjiyhsaix qamxx si puawvne? Dagg qangx mngg qnuaix diauu diauu."

"Ix m air ham' langg siy' qaucab, qui' zit qapp hitt quaw be qongxue ee jiyhtauu siy' duiwsiongr, siauxsimx si qinxjuahban."

Cuwvnix sna' duw cuir, gnihbuc-gnihgniac.

U jit qangx, zidtauu iam lecleh, pacjiyhsaix iguann vniar kir keqaux. Ingxquer ix venrnarr laii, jiyhtauu qiqixqiauhqiauc siy' jnex beh qapp ix qongw, qinaxzit suacc longxx diam jiucjiuh, naxx cincniu venr exqauw .kir.

"Qinw qra guaw qongw, liw si sniaw?" Pacjiyhsaix mng binrtaujingg ee jit der jiyhtauu.

"Guaw jiyhtauu a! Iarr suacc diyhh mng?" Jiyhtauu rinr.

"Simxmih kuanw ee jiyhtauu? Si himm, si how, iacc si sraix venr :ee?"

"Liw decc qongw sniaw, guaw tniax longxx byy. Guaw druar dirr keqaux, qursii ixlaii m bad suaw xui. Jiyhtauu si guaw ee miaa, jurr kuix tnide m bad quexvnir."

Pacjiyhsaix m suacsimx, keqaux ee jiyhtauu mng taur taur, did diyc ee inwsniax longxx cavutdyx, byy sniaw dua jingcax.

Siangx ciuw kangx kangx beh dngxhuee, pacjiyhsaix jiokk samwdam. En' lo qenww duw diyc langg, jitt dnxua qingquer, jit vaiw qycc jit vaiw qongw longxx be sen.

"Keqaux ee jiyhtauu erhiangw qongxue."

Hang-tauu qrex-buew u anxnix decc hongsniax.

20. hnirangr-aw

Tangx vixjai hii-aw siangx vingg ee cxix, qoxjaxlangg ee jit duir hni-aw jiokk uah'ingw, e-din.-e-dang. Hnirhiyc tenw kuix, snia'imx tangx tniax qaxx bingg ~ ~. Hnirhiyc-aw unkunn, lilix aw imsniax dy' jngr be zip .kir.

Bagjiux marr u duarmngg  vew lehh, mrqycc jiokk vutdiongwiong, air kunr, tiamxtauu, bagjiupuee dang knuairknuai, ciauhciauc nih, gne beh tenw qimx henrhen dy' byy jaidiau. Hni-aw dyrr jiokk u nai, byy daur byy amr, hnirhiyc beh kuix beh qnuix quwjai langg juxir.

Amwmii si guehniuu ee tnisii. Qui' din tnicnix iarr hnuahiw qapp ix jywpnua, bagjiux qngx sicsih. Zidtauu jid'err lyc snuax, langg ee bagjiux dyrr qnuix mngg cnuar hxo. Beh ansui, hnirangr-aw ee duarmngg sunrsuar qnuaix qnuaix .kiw .laii, kacc m qniax ho'ngg caw jingsinn.

Tnix diauwsyr, quixnarr qangx byy lyc ho. Jit qix juixiuqiah'aw qalauc, uat linr dngw, vniwjniaa dua huew huangrhuang dyc. 

"Langg laii or! Diyc huew siyx lor!"

Mibuew aw, dag'ee kunr qaxx dng' babuix, hnirangr-aw iurqycc qnuix qaxx bat liuxliuw, huah qiur huew ee sniax qyckacc dua iarr byy langg laii junwbun. Huew siyx cur, siyx quer qingx. Jitt sii jiacc jingsinn :ee, sen' jauw dy' jauw byy lo.

Siw :ee siw, siongx :ee siongx, jit vaiw huexeh liauw qehuew. Qecdngw amr, cur guarkauw u donghuanx jiuxqnex :ee, sui' langg bagjiux kreh kreh, hnirhiyc aw kuix ~ ~. Jit amwtauu quer, nng amwtauu quer, kunr qaxx marr quanwsir quanwsir. Hni-aw ee mngg quw byy caulen, suacc naxx cincniu snex sxenx, dinxdang diyc dy' ngingix-nguaihnguaic, buexciuw qycc suacc hap be uaw .laii. Jurr hitt zit kiw, hnirkangx zxic-sir siyxsii dongdit, jit nii snax-vah-lak-jap-go qangx, byy jit qangx si hiyckunwzit. U snia'imx laii, ix jiksii dyrr vywdix.

21. cuiwkiw duw tnix

Ingxjaw ee langg, cuiwkiw dingxe vaii habqiong zi-jap kxiw. Dingxquann lak kxiw hiongr erdew kir, duw diyc too dyrr dongwdiam, byy qycc huatsinx. Erdew lak kxiw hiongr dingxquann huad, decc dua budixjiw.

Qauxkiw jiamx dokdog, ngr tnix diddit kir. Dirr hitt binrdingw druar:ee, qyqyy bin-aw cnex sunxsunw, cirbu-circa decc qiauc qiauc, jip jip jywhuew decc camgi.

"Byy qinw ciaucig, jinjniar e lic or! Inx langg qiongbeh vreh qaur lanw taukakbuew dingw ar!"

"Inx qnaw laii, lanw qra inx ee cuiwkiw banw banw .kiw .laii suacc berhiauw?"

"Byy cuiwkiw beh anwjnuaw vro? Hex m cunvan beh air inx iaux iaux .siw?"

"Si dyrr driyc m. Huad cuiwkiw si tensingx-jurzenn :ee, iarr m si inx qaqi beh :ee."

Liw jit cuir, guaw jit jic, jiongww tnisinn girlun hunhunx vut'id.

"Lanw laii qiyr inx cuiwkiw dingg huad, qu ee lingkiw mair dic, sinx huad :ee qex hro inx jap-zi kxiw. Amx laii cew kir, dag'ee byy siy' pnix."

"U tongx oox," suisii u janwsniax :ee. "Vadd zit aw qycc huad ee jniawkiw, diyhh qra inx qatdnia, berdangr vangr quwjai inx dua."

Jiongww tnisinn dimr tauu viauxsi janwsingg.

"Taujangx, cuiwciux, qapp jingxqah lehh? Qamxx mrbenw jyr jit vaiw qra inx hanrhad?"

"Hiaxee hiongr tokax decc dngg, be qangai diyc lanw."

Jiongww tnisinn tongboo, libkig paiwvuah liaulyy kir qapp langg camsiongg pah iokdnia. Lingkiw lag jit kxiw, jniawkiw lenvnisii vow jit kxiw hingg :ix. Vec siaksiag ee cuiwkiw jiokk sokqed. Tingwhau qaur langg dua qaur jai, dingxe vaii cuiwkiw duxhyw snax-jap-zi kxiw.

22. jaboxlangg qapp javolangg

Dirr tnide cocox qenwdir ee sii, javox jabow vuntiah druar. Javox :ee dirr dangx, jabow :ee dirr saix, nng vingg ee langg byy sigsai, byy ongxlaii, byy siy' qaucab.

Jit qrunn jabow byy hunx liw guaw. Beh jiac ee bixcig, beh cing ee snaqunn, beh ing ee qesix, venrnarr u hat u kueckiamr, sna' vrangx draur jyh, naxx laii naxx ongrkuir.

Viw did jabow :ee jitt vingg, javox :ee qex jiokk air vixping. Viw cuiwciux dngdew, ping texqeh hyw-baiw, vixliac dorjaii quanqe, busow-vutjir. Siy' ruanx, siy' dag, langr sii byy langr zit. Ursii honghuew dyc, siy' pah, siy' jringx, lenrr siy' taii dy' e. Javox :ee jitt vingg langgiac jit zit jit zit jiyw .kir, naxx laii naxx lyhsuex.

U jit huee dedang, jauxsnuax. Javox ham' jabow kiarkiw ee soxjai crig crig siy' uaw, siy' duxgu byy kunwlann. Buexciuw, qycc suacc ciuw kanx ciuw, jyr angbow .kir.

Javox qapp jabow jniaa jyr ittew, jabow :ee duawqui qinxjuahban. Qauw guehzit aw quer, qniaw lyc too cutsir. Javox :ee jyr langg' ee angx, air dag, air jnex ee singwpiah jiauwguann, jit piw piw aw dy' byy qaixuii. Jabow :ee jyr langg' laurbuw diyhh iyci qniaw. Qniax ix iaux, bah iab jit der kiw .laii. Qniax ix qnuaa, taux jenw vor laii qra jyr suiw snxax. Uirdiyhh cinsniqniaw, dagg hxang dy' air kinghunx qaxx qaur, jaboxlangg yc erhiauw siy' jnex, siy' cniuw. Javox qapp jabow ee langgiac jiamrjiam iurqycc vnevang.

23. hongx ee uergiw

Dirr lau qoxjaw, langg ham' hongx uergiw e tongx. Soxjai byy hunx, jeckuir byy lun, haixkauxhongx, lyhsnuahongx, qauxqangwhongx, huanrnarr e cud sniax :ee dy' u kiarmiaa.

"Quer daur e ho laii. Au lexvair e jyr hongtaix." Jit jun vywtauhongx vyr qinw qinw.

"Binaxjair quisinwtnix, qui' qangx cud dua zit." Jairderhongx toktaur, jairunw aw jairunw.

Hongx kyxviw si birpog-sendix :ee. Langg qra hongx knuar jyr si maji :ee. Zidtauu qapp hunho bagkangx ciah, kiw uanwdor. Amwjing qauqed aur dxi-aw qoxlehongx.

"Liw u ingg laii jiax bongxx qniakax. Langg knuar diyc liw jiacc u hing'uix, qinw qinw marr hongrtai liw naxx juxqongx."

Qoxlehongx hnirkangx kinx, sriu inx tiausyx. Hingr cuccuh laii qaur xui, ciu dyw, livax tiah, lenrr cuwquar dy' suacc hro cuex henx .kuix.

Langg dua siurkir, saixpiah byy air qapp hongx siy' qaucab. Quw .laii, horsiongx gengiw jiamrjiam be tongx. Qaur qaxx au .laii, hongx ee uergiw qui'ee sittuann, langg ee qniaxsunx aurde jit qxur dy' tniax byy.

24. horjuiw sinn

U jit xee uaw haixkauxsir ee jngsia, u jit nii zuac .langg jyr xngua. Zit .sii, zidtauu ciah ngiarngia, huew siyx vxox. Beh amr aw ursijun jiokk hipzuac, qaxnaxx u decc qig ho, dih be lyc .laii qan' qan' aw jiahlat.

"Ho m qinw laii, lenrr qoxjnexjuiw dy' qiongqiongg beh dax :ar." Hurzinlangg qongw, bin iux bin ciuu.

"Tacc m cniaw jewsix he sinn mng knuar mai?"

Jit xee siauwlenlangg tetauu qongw kiw. Jerje qra ix janwsniax.

Taii dix dyw ngiuu henwqingr, samsingx-jiuxlew cuann jiaujngg. Knuar sii knuar zit, jewsix dirr kangwde-aw ter tong' jngx mng sinn kid ho.

Qesix jiacc giac jnriu ciuw, huandngw srinx, cneqongg hongx kiw. Jit diab quw aw quer, luii huad ciccuah, ho jiahpiah m qramx lyc. Jingwlangg tauu kenr kenr, qanda' genr. Vanrpuex jitt jiaux byy sursaiw, byy-dniu.-byy-dii, suacc u qongxue-sniax an' tnidingw laii.

"Tausnex-aw guaw byy air. Singlew diyhh singsimx-ken'ir jiacc tangx vaii .cud .laii."

Jingww dairqex sna' girlun, uree qongw dangx, uree hue saix, qui' din hra .kiw .laii. Knuar m si srer, jewsix kuisiwdniuu dngxsu, beh huaa suah.

"Horjuiw Sinn beh air lanw langg qaqi jyr samsingpuex. Narr byy jiarr, ho kacc anwjnuaw dy' be laii."

Jingwlangg liw knuar guaw, guaw knuar liw, sui' xee aw bicciux .kir.

"Horjuiw Sinn narr byy kiwhiamm, guaw laii kir hro ix jyr diamxsimx."

Jap-go~lak huer aw ee siauwlenqex, qongxue iauxx cauwlindaix ~. Cuann jit dyh kiw-bew-dyh qra sangwhongx. Jit qangw quixaxhongx kiw, siauwlenqex hro Horjuiw Sinn siusib .kir. Kax jrih kax, saivakho an' tnidingw puah lyc laii, iauxx bue quer canhnua dyrr duwdauw, dongr lehh, uat linr dngw qycc sui' suacjni, kuix zit.

"Ginxaxtunn, byy-dap.-byy-sab, byy qraur kuir soxx dongzenn. Jitt vaiw diyhh cue jit xee duarlangg duarjingw :ee, horjuiw jiacc e lyc be li."

Jewsix qongw sniax si, byy langg qnaw giac duxtuii.

Jngx-lai u jit xee byy bow byy qauu :ee. Dag'ee qra vaiwtog, cniaw ix ter jingwlangg draur jiujuann. Be kramx did langg' cid qriuu veh qriuu, iongw hanr qongw, "Linw diyhh qra guaw quaww vyxjingr, vyxjingr guanw cur nirr ee sirduarlangg u langg dniduer, jixmue-hniadi benw quawhuann jiahcing."

Iauwqinw sijun, langg' dagg hxang dy' rinw :ix. Jitt quer, ho lyc taur mee taur zit.

Horjuiw Sinn kiapsaiw tong' langg jaix. Cur nirr ee jiuxangr, bixangr qapp amqngx jiauu cringx cringx hro kangx tangx tec laii drew juiw, huwho kacc dua kax, qesu cingdam :ee kacc ser kax. U liongrsing :ee qycc tangx cinwdang bre. Tanr diyc jnii, qniaxsunx-aw hyw quer zit.

25. ingqyx

Dirr qoxjaw ixjingg, jiauw-aw tniax u langg qongw ee ue. Langg jid'err hiamr qongxx "Jiauw-aw, laii." Jiauw-aw suisii dyrr vuex uaw .kir. Huah sniax, "Jiauw-aw, mair caw." Jiauw-aw lenvnix diam .kir, jiokk tniacuir. Qycc inx iarr e qiywquax hro langg' snuawud qraiw simx bun. Hitquw, cur nirr cri jiauw-aw laii jywpnua jiokk siqniaa.

U jit xee dnuabak aw siwqer decc qra langg denw qongxx ix qapp jiauw-aw uergiw e tongx. Bylun simxmih kuanw jiauw, venrnarr cud sniax, ix bagjiux dna' jit luiw laii qongw, marr jai'ngiaw inx decc qongw sniaw. Jerje u cri jiauw :ee jiokk hnowhenn, vnuar sinwgii laii beh cue ix cir knuar mai.

"Ix qongw cirliau jingrr jaw qaur dnaxx longxx byy venwkuanw. Ix jiac qaxx iar laklag."

Cnidi'aw ee juxlangg jid'err tniax, suisii kir kuanw vadd jiongw kauxbi ee jiahsit laii hro ix. Cnidi'aw jit cuir suawjiab jit cuir, byy sii tingg.

"Ix qongw liw qra ix dingr jit kax jiauxlangw-aw hiacc duax kax. Ix qaqi jit xee druar jiokk qodnuax."

"Anxnex beh anwjnuaw?" Vanqah ee juxlangg mng qinw qinw.

"Qra ix crua simvu suacc berhiauw."

Dnuabak aw cud juxir, vanqah ee juxlangg qinxkuair kir cue jit jiah buw :ee laii qapp ix ee vanqah qapvangg. Qangx :ee knuar diyc buw :ee laii, hnuahiw qaxx qiqix qiyr, ciagciak diyy.

Jingwlangg ylyw dnuabak aw u junw. Cur nirr u cri jiauw :ee, siy' jnex cua jiauw-aw laii beh cniaw ix jyr tong'ik.

"Ix qongw ix ziamw diyc dang vne, dagg qangx dy' jiokk qankow quer. Qaiww hyw liw qinw qetqyw ix ee sniwmia. Ix iarr tangx jaw siw jaw ciausingx." Dnuabak aw bagtauu qad qad.

"Si urngiaw iacc byngiaw? Ix henrhen dy' iauxx uac tiaur tiaur!" Dngbuexdig ee juxlangg diyc cneqniax.

"&*#^$%!" Dngbuexdig huachiamr.

"Ix jitmaw iurqycc decc qongw sniaw?"

"Ix qongw ix ee vne e quer .langg. Tingwhau qaur vne kixjingr, cur nirr ee langg kiongxqniax e hro uer .diyc."

Tniax qaur jiax, dngbuexdig ee juxlangg lenvnix kir qnrua jit tangw siyx juiw laii, jit xe ciuw ongw dngbuexdig sinkux dingw puah. Kacc benw jit sii aw quw, dngbuexdig dyrr be-dinx.-be-dang kiauwtenx .ar.

"Liw jitt jiah huebii beh air juriuu."

"Juriuu! Mraxqycc, ix si dirr jiauxlangx-aw dokjiur nngrkag cutsir :ee, jurlaii m bad kir guarkauw .quer. Narr qra ix vangwvuex, hex bersux decc sangr ix hur siw."

"jepxwqxrty!" Huebii huah sniax.

"Ix gnicgniah qiyr decc qongw sniaw?"

"Ix qongw liw narr m hro ix cud .kir, ix jaxban e utjud siw."

Huebii ee juxlangg m qramx diucdiuh, qarqinx qra langaxmngg kuix .kuix. Huebii sidqow et nng xee vuex kir hiyh diamr ciurlex-dingw byy vuex hng .kir. Jid'err byy juwsinn, jit jiah barhiyc an' tnidingw vuex .lyc .laii, siongr junw junw, jit xe dyrr qra qa decc jauw.

"<;:^, >.?}!" Vorvinn, ingqyx qiyr qaxx duarser sniax.

"Liw si dyc'ui decc byy duxhyw? Byy-dniu.-byy-dii, huah qaxx m jniaa sniadiau?" Ingqyx ee juxlangg qongdy vxeh :a qongw.

"Ix qongw ix si liw jingsnisir ee jewjuw. Dingg cutsir huawsnix jyr ingqyx laii beh air liw vuee mia."

"Uan'ongw ar! Vehcat-vehcid!" Dnuabak aw jiacc qongw suah, ingqyx suacc cud sniax qongw langg-ue.

Jingwlangg qiw qiw duc duc, cicix-curcu. Dnuabak aw iurr qniax iurr qenwsiaur, kiyh kixkax, piux lehh jaw qaxx bujongx-bujig .kir.

26. king-qiyy

Dirr qoxjaw sidai, u jit vaiw zuac .langg, tnisii jyr baiw. Dedang, hongtaix, lyc dua ho qapp jyr dua juiw, ciangduxciang jyr jit kunr laii. Tnidingw vuex :ee, tokax syy :ee iacc juiw nirr siuu :ee longxx siw jit drunx. Tnide jiqanx, e cuanxkuir :ee, jongw diyc.

Beh zip tendingg ee mngg ec bicbih. Sui' xee qnuaw beh air dingg cutsir, jit din jig jig dirr mngkakauw zuu qawqar, be jinr be trer.

"Niu guaw quer. Guaw dairsingx laii :ee." Gimxjuaa duarkox vew, qongw m qongw, dner dua naaukangx iong qorr huah :ee.

"Guaw tacc diyhh niu :liw? Guaw u sidqow qycc u kaziauw, qamxx e kacc sux liw jitt hy dirr tokax decc nuar, decc qyy tohunw :ee?" Ringx-aw qra ped quaww ged, knuar ix jiokk byy bagde.

"Banrcniaw lehh. Linw jnia' hyw dnaw, iarr byy juncunn guaw. Tnikae, dyrr guaw siongrr dua buew. Siamw kacc kuix lehh, diyhh singx hro guaw quer." Haixangx jit jiah duarbongw jiah, jid'err cud sniax, naxx cincniu decc dann tniluii.

Gimxjuaa, ringx-aw, haixangx, samvuthok. Kacc iur qiqud :ee, qauunw, cauxhee qapp iam'ngix siongr diyc pang, iarr siy' jnex beh jnrix .zip .kir, byy decc siy' niu.

Qirqa qunw, duarser jiah byy lun. E qniaa, e syy, e diyy, e vee, e vuex iacc e siuu :ee, byy jit kig dniardiyc, byy jit sii diamrjing.

"Dnaxx beh anwjnuaw si hyw? Guaw hro inx caw qaxx bun jaujaux."

Tniqongx trow dua kuir, bagtauu pacqad. Liamdongsii, sicnar dirr tnidingw nar .jit .xe. Tniqongx kuix simkiaur, liauu cid der vangx, longxx byy qangg sig, dirr hykex dingr jit vxanw qiyy. E qniaa e jauw :ee, angg :ee hitt liauu angg qongwqongr. Qorr sir kax decc vee :ee, sriok qamaxsig. Dirr tokax gniac gniac suanx :ee, nngrzinsig diyhh knuar hro bingg. Dirr cauxvox diytiaur :ee, cauxaxsig qaiww hyw zin. Tnidingw vuex :ee, jairjuiw si tencnisig. Juiw nirr siuu :ee, haixjuixsig kacc unxdangr. Puawsniur :ee marr u lo tangx qniaa, qiysig dirr vnix vnix :a, kacc benw qapp inx decc ekeh.

Ho lyc jit tingg, lenvnisii cud zit. Duarser jiah byy lun. E qniaa, e syy, e diyy, e vee, e vuex iacc e siuu :ee, jiauww sikjuiw vaihangg, vin' tauu aw laii. Tnidingw jamrzenn aw siokjing.

27. tnicnix qapp suajiyc

Zidtauu qapp guehniuu dujairgua. Qoxjaw qoxjaw ixjenn, tnide jiqanx qanda' u tnicnix qapp suajiyc jitt nng xee qajok-aw. Tnicnix druar dirr tnidingw. Suajiyc druar dirr tokax. Uac m uac quw quw, qniaxsunx-aw iurqycc je qaxx berdid sngr.

"Guanw diamr quandingw knuar dyww lyc .laii. Linw decc vniar sniaw quixquair, guanw id-cringx-zi-bingg." Tnicnix qongw qaxx iang decdeh.

"Linw air cingxvanx iacc tnewtauu marr qanda' amwsii narnia. Zidtauu cud .laii, linw dyrr sui' xee aw jauw qaxx byy knuar did ngiaw. Byy cincniu guanw, vutsii dyrr kax dac sit de, kia jniar jniar."

"Bagjiux knuar quann byy knuar qe. Kacc anwjnuaw linw dy' dirr gunw erdew." Tnicnix iuguann cringr quarqua.

"Linw benw decc hiauvaix. Linw qniwnarr kia byy jai, vruac lyc bew, sii qaur, marr si qruix guanw." Suajiyc sraiw dywtautuii, byy decc nngw.

Nng vingg siy' jnewcuir. Tnicnix jit cuir jit jic, cuiwnuarjuiw an' tnidingw dih lyc laii. Tnix qngx, zit cud, zidtauu iurqycc qra kib dywdngw kir tnidingw. Ongxhuee jiqanx, jarhngx huad cauw, qinaxzit snex tangg, siursor u dixjiw. Snesingg banrbut, be liauw be jin.

28. jiyhtauqow

U jit liap dua jiyhqow, copyh, dingrdauh, puebin kiokqansi qimqut aw qimqut, be covalixniaux, dniduer tnide cutsir, quxnii dirr keqaux-vnix kiarkiw. Kadaux ee cauxqix, e siw, e lau. Suwquir liuhingg ee hongx byy sii dikdnia, e vuex, e qniajauw. Zidtauu qapp guehniuu, hiyckunr jiauww kauhunx. Keqaux dnglaujuiw, ursii byy tangx jin' cuah. Dogdok ix jitt liap dua jiyhqow, cingx-vah nii quer, dagg vutsii dy' hiacc jai, hiacc unw, hiacc enx.

U jit zit, jit xee qoniuu-aw an' hiax quer. Liglo kax sngx, qniaa qaxx qiongbeh uaxingw, knuar diyc jiyhtauqow vnee liuliux, dyrr jiamrsii tingkax, jre diamr hitt binrdingw hiyccuanw, ciucinr, suar liamrquax.

"Siyw qoniuu-aw, liw snex jyr qoxjuix, auun hro guaw tniax diyc snacsimkuir. Qamxx tangx diamr jiax qapp guaw druar, zid'ia siy' jywpnua." Jiyhqow kinx sniax mng.

"Gunw daux druar dirr snuax-dingw buexliux. Jaxkiw-sii, zidtauu qapp gunw siy' duiwsiongr. Amwtauu aw, u guehniuu ham' cnidauw qapp gunw pnua siy' suii." Siyw qoniuu rinr.

"Acc byy, liw muixx qangx longxx laii cue guaw cittyy." Jiyhqow m sixsimx.

"Guaw dagg qangx sittauu je qaxnaxx snuax. Qinaxzit si duxhyw an' jiax quer. Beh qiyr guaw vuacqangx laii, iarr suacc u huatdo?"

"Quikir anxnix, guaw duer liw dngw .kir, hyw bor?"

"Liw be qniaa be jauw, beh anwjnuaw duer guaw laii dngw?"

"Liw qra guaw moh, suacc berhiauw?"

"Liw dang knuairknuai. Guaw beh nacc vnuax u hxuad tihh?"

"Qra guaw puar jyr jit der jit der dyrr kinlat :ar. Narr erdangr qapp liw jywhuew, simxmih qankow vnirtniar guaw dy' m qniax."

"Liw ding kokkog, junw giac voxtauu laii, vycqnaxx dy' jam liw be puar."

Hiyh u qraur kuir :ar, siyw qoniuu qapp jiyhtauqow siy' srii. Siyw qoniuu jauw liauxau, jiyhtauqow jiokk siongsimx. Hongx cuex e qnuaa, ho lramm e tniar, zit pak e cak, lenrr cauxaxqix dy' byy air qapp ix uaw. Simx siongvix qauwkamw, qui' der jiyhqow cuiwqud-hunsix vniwjniaa jiyhnng cingvah liap dirr kekamr snruar laglak, dua liap ser liap, ngii :ee vniw :ee jiamx :ee, dagg liap dy' qang simjniaa.

29. bagjiux ee qowsu

Qoxjaw qoxjaw, dirr cimsnuax-nalai ee langg u sir luiw bagjiux, bin dingxbin nng luiw, au taukog iarr u nng luiw. Taujingg :ee qor knuar lo, knuar qxingw, aurviah :ee quanqor snuakimm-iaxsiur qapp digzinn.

Taukaknguaw e huad taujangx, samvutsii rair tir, rair sriux, jiacc be kamr diyc bagjiux. Javox :ee lux qngx qngx qaiww sowsiongg. Jabow :ee dyrr qex jiokk gauu vniwqingw.

U jit xee dew kax :ee, cutsir ee sii, aurviah ee bagjiux dyrr cnemee, quikir taujangx lauu hro dngg ~ ~ qra kamr .kiw .laii. Uree ginxaw gauu dicdang :ee, vutsii air qra ix qrang, taukag qra senr .jit .xe, byy dyrr kajiacpniax qra duc .jit .xe, jnia' air dui' aurviah qra ix congwdi.

U jit zit, qui' din ginxaw cutgua cittyy, quw quw cue byy juiw tangx limx, iurqycc qniaa m jaix lo dngxhuee, qiongbeh cuiwdax .siw.

"Guaw u tniax diyc juixciangce. Duer guaw laii kir." Dew Kax :ee qongw.

"Nacc u? Guaw dy' byy tniax .qnir." Cangqongw-pni :ee qongw.

"Guaw marr byy. Dew Kax :ee liw decc hamrbinn." Niauxcuw-hni :ee janwcuir.

"Dikkag u lar. Linw duer guaw laii kir, kacc danw dyrr u liangg :ee, hro linw limx tangr haiw :ee." Dew Kax :ee qongw diyc jai viakviag.

"Guaw jiacc m lehh," cangqongw-pni :ee qongw. "Cnemee :ee jyr inxlorsaix. Jitt jua kir, unw siw be uac."

M sinr :ee uat duiww vadd xui kir cue juiw. Beh qapp Dew Kax :ee jywhuew kir :ee, bagjiusinn si jiong' sinr jiong' gii.

Dew Kax :ee cuartauu qniaa, juwsinn decc tniax juiw-sniax, byy kuar uat tauu jimjiog aurvingg.

"Linw u knuar .diyc .byy? Jit jiah var duer dirr lanw kacngx au."

Viyx kxiw :ee ser aw sniax mng. Dukiw Dew Kax :ee, cunx :ee jongw qra dimr tauu. Lenvnisii, qui' din jongg duiww ciurnaa-aw lai beh siamxbih, suacc sui' xee aw hro lairdew ee dogjuaa qra inx qetqyw sniwmia.

"Guaw cue .diyc .ar. Dirr jiax."

Dew Kax :ee uat tauu beh hiamr dangpnua, knuar jit xe hiamr puar dnaw. Ix aurviah jit jiah var.

"Liw benw qniax, guaw be qra liw qa. Duxjiah liac diyc jit xee cangqongw pni :ee qapp jit xee niauxcuw hni :ee jyr damrsamw, jinw vakdow jiokk vaxlaa, qanda' cuiwdax."

Var qniaa uaw kir juixkud, tauu ngar .lyc he sniwmia ji juiw jriw kuah. Qui' din ginxaw dangjee cutmngg. Qetbuew, qanda' nng luiw bagjiux sunrli dngw qaur cur.

30. linghee kixjuiw

Linghee jit qekauw-aw dirr haiw-xe kiarkiw. U jit zit, jit xee tyxhi'angx jyr jit kunr qra inx jongw liac .kir, qanda' jit jiah lingheqniaw hyw un u jauw quewciuw.

"Guaw beh laii kir cue :inx." Lingheqniaw qongw.

"Liw beh kir dyhh cue?" Cittypnua bagjat-aw mng.

"Kixjuiw laii kir cue a." Lingheqniaw duiwcuir rinr.

"Liw dirr haixdew cutsir, dirr haixdew duarhanr. Jinjniar kir qaur der, cniqauu m jaix lo, jiac m driyc juixtow, buerjingrbue siw kiauw kiauw qnaxx dy' e or."

"Guaw e jimjiog."

"M hyw kir lar. Huanrser inx lauxjaw vnir jyr dyh-dingw ee liaurliw, zip langg vakdoxdew .kir .ar."

"Narr junw anxnix, guaw qyckacc rair laii kir vyr uansiuu."

Lingheqniaw simjir hnua dnia, jidlo byy hiyh siuu kir haixgan.

Jniursnuax liauxau, siangvingg longxjongw jap gua qix kaqud cunx veh qix, dirr tokax vee kacc lingxli. Taukag nng qix ciux, ciux-buew vnir jyr gneh'aw-hxingg. Gu diyc hyw jiac mic, u gneh'aw gneh qex jin' lirven.

"A'hniax, liw qinw laii knuar. Jitt buew simxmih tangg? Snex jyr jiokk ququair!"

"Urngiaw ququair dyrr driyc. Dingw vnuar jad cniurr get'aw, suacc tuax jit xee linghee ee buexliux."

"Linghee! Acc m dyrr lanw jarhngx jiac :ee hex?"

"Hner a."

Hniadi-aw jit qxur laii, jit qxur kir, lingheqniaw tniax qaxx id-cringx-zi-bingg. Sinkux-buew guandew naxx cincniu tenw .kuix ee kuesnir, jitt diap, kuesnir hap uaw .laii, tiudngg kiaur quann quann, buexliux qycc cah jit qix jiamx.

Lingheqniaw siongr junw junw, nng xee hniadi-aw ee kaqud iong qorr buexliux ee jiamx qra duc .lyc .kir, jit langg jit xe. Hniadi-aw tniar qaxx aix aix qiyr, jit diap quw aw quer, suacc dyw dirr tokax, hrun hrun siw siw .kir.

31. tniqong'axqniaw

U jit xee u srinx ee hurzinlangg, u jit amr binbang, bang diyc tniqongx laii qra jixsi, qongxx ix vakdow-lai quii jit xee tnix pah tnix jniaa ee tniqong'axqniaw dilehh.

"Iongw kenwkenr, jit siwlangg byy kueh byy kiamr. Itzirvnii, qui' lo s.-sunrli-l, m jaix simxmih kuanw hy jyr siongvix, narr junw tnix u jiauww qacjiw."

Binbang quer, qecdngw lexvair sunrguec. Angngex-aw lyc too dngrr kaur-sniax, jit xee cuir-aw ciyr gigix. Kax qnia ciuw qnia, erhaii qycc lauwjii. Jrer id yc qniaa, jai viakviag, longxx be vuahdyw. Qnuaa .diyc, zuac .diyc, m bad jingrr bue, lenrr pah kacniur dy' jin' hranw .did. Cur nirr dagg vutsii dy' u cunniuu, vakdow ciangjai vaw dniur dniur. Jurr cutsir qaur dngw duarlangg, iauxx m jaix bagsaiw snix jyr sniaw kuanw.

Tnisii jyr pnaiw, lensiysuar quixnarr guehzit, byy qaxx jit dih horjuiw an' tnidingw dih .lyc .laii. Ciurhiyc-aw kiarngg, suixqex vingw do, diu-aw be zibbiw siw genrgen, qoxjnew dax kogkok.

Snex bagjiux m bad knuar qnir quer jitt kuanw cnicamw hxingg, kia dirr canhnua-vnix, tniqong'axqniaw sinn .kir, nng jua bagsaiw knuax knuax aw linr .lyc .laii. Bersux kelauu qangrkuanw, bagsaiw lrauu byy tingg linr kir qaur cann nirr. Juixdiu-aw limx diyc tniqong'axqniaw ee bagsaiw, suisii uac .kiw .laii. U langg u hxun, ciurjangg iarr laii beh vunx, dorqnuaii iarr vniawmia suh. Qiongbeh qodax ee too iurqycc vaxjuiw, tingww dongr quw quw.

32. angngex-aw qapp sensnix

U jit xee duxx cutsir byy zuarr quw ee angngex-aw, m jaix anwjnuaxngiu diyc, qui' zit kaur be diam. Jyr laurve :ee iyh qongxx si puawvne. Kacc sux angngex-aw iauxx sewhanr, dyc'ui qankow iarr berhiangw qongw. Laurve laurbuw m jaix diyhh anwjnuaw vran, bagjiux qimx qimx, huanlyw qaxx be jiac be kunr.

"Narr tangx hro guanw qniaw queweh, tnix dua de dua ee juerquar guaw laii dnax. Qycc m na anxnex. Vadd langg daux ee ngex-aw u sinkow-vnirtniar :ee, guaw iarr qamguan ter inx jerjue." Jyr laurve :ee qra ix ee senjow qiuhe. 

Jiacc qongw suah, vakdow qunxqaw tniar, ix qnuaxqinw iyhcauw camx go hunx qamcyw lyc kir jnuax, jnuax hyw, iarr tinn quaw hro ngex-aw. Ngex-aw limx lyc auu, suisii be kaur.

Vakdow jiacc be tniar nia, jyr laurve :ee hni-aw suacc decc uix uix jngr. Quer u jit quw aw, ngua qecviah daux ee ginxaw decc kaur qapp tii.

"Linw ginxaw hnirangx-aw vuhlangg. Diyhh qra qoo iyc-aw jiacc e hyw li."

Quer kir qecviah beh tyw quaw qoiyc, sun qihue qiamx jyr sensnix. Jit diab quw aw quer, duarlangg hni-aw hyw li li, ginxaw byy qycc hnix.

Ngex-aw ee vnerjingr liac qaxx junw junw, huatguan ee laurve jurr anxnix qaixdoo jyr sensnix. Miasniax jid'err hanw .kiw .laii, cur nirr qenwnarr u ginxaw puawvne :ee, qyckacc hng lordoo, iarr air cua laii hro sensnix knuar.

33. qir

Lairsnuax u jit duir ang'axbow snex go xee haursnex. Duarhanr :ee snex jyr buxkunw ~, ladtauu jiokk vaw. Derr zi :ee lyr kax lyr kax, jauw qaxnaxx decc vuex. Derr snax :ee jin' liuwjnix, jit liap taukag qik dua buviw. Derr sir :ee bagjiux dua dua luiw, bagsig hyw qaxx qapp larhiyc u ping.

Siongrr sewhanr haursnex muaw jap huer hitt zit, sir xee hniaqyx cua ix cutgua paclac, kuix ganxqair. Jin' pnaiw un, lo nirr duw diyc cniuxvakcat. Qniax sewhanr siyxdi diyhsiongx, sir xee hniaqyx qapp qiapcat dua ciavniar, lorbuexsinx, suacc iong mia qapp inx puer jiacc acsuah.

"Jap huer ginxaw, lorcauw byy sik, lo nirr qycc jiauu qiongqongr, iaxsiur. Lanw diyhh horsangr ix dngw .kir kacc driyc." Sir xee hniadi-aw siw liauw venr quixhunn, jip jywhuew decc gimxgi; dua-hniax tetauu qongw kiw.

"Beh anwjnuaw sangr ix dngw .kir?" zi-hniax duiwcuir mng kiw. "Lanw jitmaw si qxuiw, sriu tniqongx quanxhat, byy tangx hyw beh kir duehh dyrr kir duehh."

"Lanw sui' langg venr jyr jit liap qir hur dirr ix sinkudingw, ix qniaa lanw iarr qniaa, ix hiyh lanw iarr hiyh, vutquanxsii dy' tangx vyxsiuw ix. Linw sniu sniaw kuanw?" Snax-hniax cud juxir.

"U tongx oox! Qir jiacc jit liap aw qniaw, lanw sir xee jongw kiw .kir marr be qra ix deh hro vniw vniw."

Sir-hniax dairsingx qra janwsingg, lenvnisii jauw kir bagbaitauu hiax jiamwui. U ngiu tranr ngiu, dua-hniax kia dirr jniawciuw ee ciuxqoxtauu, duarvan aw duarvan. Dywkax ee katuixzinn, zi-hniax kir hiax dinwden, qauu-kax qauu-ciuw. Vinr-vnix uaw taiwionghed u quiw qix aw taujangx ziakamr, derr snax :ee syy duiww hitt dah bongxx qux. Qokk langg jerui dniardiyc, go xee hniadi-aw vniwjniaa jidtew.

Qniaa byy quiw vo lo, sui' kir duw diyc var. Sir-hniax hng hng knuar diyc jit xui snuakangx vitlehpang tangx hyw bih. Zi-hniax dirr katuiw, jo siyxdi-aw jauw kacc qinw. Jit der jiyhqow hnuaii dirr snuakangx-kauw, dua-hniax qig lat qra vnuax suaw xui.

U sir xee hniaqyx draur janrau, sewhanr siyxdi sunrsi dngw qaur cur, qnir diyc laurve laurbuw, lo-diongx gu diyc ee qanlann qapp vuthing, ix it'id duiww inx sueh kiw.

"Pacsngr a'hniax inx u decc draur vyxvir, guaw jitmaw jiokk gauu jauw, jiokk u lat, qycc erdangr knuar qaxx hng ~ ~ kir."

Go xee haursnex dangjee cutmngg, qanda' jit xee dngxhuee qrex, ang'axbow jiokk siongsimx. Knuar diyc sewhanr haursnex sinkudingw qex sir liap qir .cud .laii, inx suisii jaix dai, jerjiyw iarr u did diyc an'uir.

34. ohunn qapp vehhunn

Byy qniax vnuar langg, u jit xee cadqow dirr zinsewqanx qiongqiab, huixlui. Sriu ix soxx hai :ee, siw liauw venr jyr ohunn, jit der jriab jit der, jxig jxig jyr jit tngg.

Cadqow qyckacc cingxciux jongw iarr e lau, sizit qaur, venr jyr jit pnir vehhunn, dirr tnidingw qapp ohunn siy' duw.

"Tnix byy qecqair, dirr jiax siau'iauu jin' jurjai." Vehhunn iang ciccih.

Ohunn qig diam diam, byy inwcuir. Siujig qaxx u jit xee liong, ohunn vniwjniaa horjuiw dih lyc too, hyw langg dingg cutsir.

Vehhunn ngar tauu qimx qimx siongr, iuguann dirr tnidingw longrliulenx.

35. dikhiyhcnix

Jaxqanx u jit xee javoginxaw, air siwqer papax jauw, qycc ping jen byy deh. Ix vutsii air kir congwdi cuwvnidaux ee qxex-aw, ah-aw qapp qxauw-aw, hai inx laurbuw dniardnia diyhh kir qa'ngg jerlew, hue m si.

U jit zit, qecviah jit jiah gu'axqniaw duxx cutsir, javoginxaw jauw kir qra cuxdi, m dniudii, gu'axqniaw suacc byy kuir .kir.

"Liw jitt xee ginxaw tacc e jiacc jen .diyc? Guaw kow byy liw kaqud ciuxqud jitt diap longxx byy byy .kir siongrr hyw."

Laurbuw hro ix krir jit xe byy liamw cuir, ue jid'err qut .cud .kir narnia, javoginxaw kaciuw suisii byy .kir, suar dirr tokax decc gniaux gniaux syy.

Laurbuw huanxcuir mrdiyhdid, huah qongxx, "Liw byy kax byy ciuw dirr tokax syy, beh anwjnuaw qowsiuw qaqi?"

Laurbuw naxx qongw naxx decc linr bagsaiw. Javoginxaw nng vingg qakkiw dirr jitt sii venr qaxx lrai qiamwqiamr; naxx cincniu jit buew juaa, sinkux snajatkiaux suanx duiww snuadingw kir.

Zidjiw quer liauw quer, sivutsii u langg decc hongsniax, qongxx lairsnuax u jit buew dogjuaa e hai langg sniwmia. Siauwlenn :ee uree kacc hyw dnaw :ee, qesix jah lehh sui' beh kir denw iongw.

"Unxdangr dyrr si liw jitt buew juaa byy cyr. Ovec qa langg qycc suar vangr dok." Qui' tokax jiauu dikhiyc, siauwlenlangg qapp dogjuaa dingwqoqix, ciuxtauu ee qesix lang lehh lang lehh.

"Guaw qamguan au cutsir qycc jyr juaa dirr tokax nuar. Hniadi-aw siy' taii sen' m tangx." Dogjuaa amr amr aw decc huatguan. 

Uat dngw srinx, ix dngg liuliux ee sinkux qeww venr cnix :ee, dirr tokax dniardiyc byy dinxdang, hyw cancniu dig-aw jit jad jit jad.

"Knuar diyc guaw ciuw nirr qesitauu jiacc dua qix, liw gekiw e qa langg marr diyhh langwqangw." Siauwlenlangg kox si'aw, jiokk ing'ingw. 

Tokax ee dikhiyhcnix amwjni trow duarsimkuir.

36. tokadew ee duarsenlangg

Jairjaw u jit xee duarsenlangg, kax dngg, ciuw dngg, tauu dua, hanr dua, be hai :langg, be qrang :langg, dogdok jit vo jiokk gauu qamw sionghann decc qor langg uanr.

"Ix qenwnarr lrauu pnxi dyrr e jyr duajruiw."

"Ix pah jit xee kacniur, cuwquar sui' hro ix cuex qaur citlixjiux .kir."

"Ix jid'err kuh, lenrr snuax dy' e qniaa e jauw."

Jingwlangg decc qra tniqongveh :a dauu. Liw jit cuir, guaw jit jic, cid jong veh jong iauqiuu rair qra duarsenlangg cuxsiw.

"Guaw m si tiauqangx :ee. Qamxhongx, puawvni, guaw qui' sinkux longxx qankow qaxx beh siw." Duarsenlangg bagsaiw qamm bagqnii, jiokk buqox ee kuanxsir.

Binrtaujingg jit din langg krir cuaccuah, tniqongveh :a uat tauu duiww duarselangg qongw, "Liw jit jangg jiacc dua jangg, liyc liyc aw dy' e kir qapp langg' ex .diyc. Lingkyw liw vnuax kir tokadew druar. Hiax soxjai jiokk kuah qanda' liw jit xee langg druar. Byy langg e qapp liw siy' jnecniuw iacc qra liw kiwhiamm."

Cuiwqag suee suee, taukag lee lee, duarsenlangg qovutjiongx qra rinr hyw.

Soxjai kongwkuah, qycc byy zidtauu, duarsenlangg vnuax kir derdew, viw did jaxjingg qyckacc jiap kir qamw .diyc. Ix snex jyr sidjai taiww dua jangg, cinwcaiw hatcniur .jit .xe iacc si kamrqasaur, druar dirr binrdingw :ee sui' dyrr kia be jai, kongrkong henw. Duarsenlangg jingwtauu kacc jiahlat ee sii, m na snuax e qniasuaw, lenrr haiw dy' e kiw qalunxsunw.

37. vueox

Jit nii jit vaiw, kax-ciuw u-byy vutciangjai, huanrnarr haiw nirr cutsir duarhanr :ee, bylun jniw qangrr lau, jiauu tangx laii vixsair.

Hii, hee, badjat, ziuhii, qui' din vaii vaii qui' let danw beh liamx kaux-aw. Puiwtad aw hii ser bongxx ser, iarr laii decc draur laurzet. Viw texqeh, byy diyhdingw; ping suixbaiw, diaur ciabuew; draur gauu siuu, sux langg' tiamw tiamw, puiwtad aw hii byy qaxx jit hxang kacc jamr jingwlangg, jamxzenn aw luexjir. Sehsinn sehsinn dirr haiw-drew bogbok siuu, vorvinn, nng qix osig ee jiauxaxmngg dirr ix binrtaujingg iyy lehh hnair lehh, iyy lehh hnair lehh.

"Jiauw-aw u xmngg e tangx tnidingw vuex. Hii-aw u xmngg m jaix qamxx iarr e vuex?"

Puiwtad aw hii amr sniu, jiauxaxmngg jit vingg jit qix qra draur druar hiet dingxquann, qig lat ciongx lirkuix haiw-bin, tranr jiauw-aw ee ngiu, qexvauu ee sidqow qnuaxqinw et dinxdang.

"Guaw erhiangw vuex! Guaw jinjniar u jaidiau vuex."

Jit kxig dy' be lunw .did, puiwtad aw hii suisii beh denw vyw. Dag'ee knuar qaxx cuir-aw kuix kuix, iarr himsen, iarr huanrgii, qycc qra ix hy jit xee "vueox" ee ciokhy decc cinghox.

Vueox jiokk iangrkir, jiauxaxmngg lrak diauu lehh m qramx vangr. Jit zit tuax quer jit zit, jiauxaxmngg suacc diauu dirr sinkux dingw, sen’ vrag dy' vrag be did lyc.

"Liw sinkux u snex sxit si jin' hyw. Mrqycc marr m tangx sniu' jiap vuex lirkuix haiw-bin. Tniax qongxx hitt binrdingw si guihiamw qaxx be qongw .did. Liw cenban diyhh juwir." Jit jiah syxqngw-aw hyw ir qra tecniw.

"Jex guaw marr jaix. Jitt duir sidqow e qra guaw gniaux drix drix. Guaw narr byy vuex kir haiw-bin cnriuu jit xe aw hongx, qui' sinkux e jiokk ciac'iac."

Vueox qongw diyc iux tauu qad bin, sinkux iurqycc decc cnircna gniaux. Buexliux jin sixlat ciongx cud haiw-bin, sinkux zuxx jniu, vueox tangx vuex zuxx hng.

38. ciwpyx qapp sngsuii

Dingw vorlok ee taubak u nng xee jaboxqniaw. Duarjew snex jyr exdngr exdngr, jin' air cing jit niaw juixangg ee pongwqunn. Siymue-aw kacc tiux, suwsiongg cing qiyhuesig ee kongwvat'axkor.

U jit vaiw, dingw vorlok ee siauwlenqex cutcauw, suacc kir taii siw xe vorlok taubak ee qo' qniaw. Xe vowlok ee taubak jiokk gingsimx, vangwsniax beh liac dingw vorlok taubak ee nng xee jaboxqniaw duxsiaur.

"Si'angw narr laii sionghai guaw nng xee jaboxqniaw, iacc si qra inx cua lirkuix guaw ee sinkuvnix, guaw quatding byy vangr ix suah." Dingw taubak qiawsniax hangxheh dywdngw.

Dingxe vorlok qiongbeh kiw siongsad, sniawmaw knuar diyc jiokk m quewsimx, quat'ir beh jiongdiongx liahhyy, hro sianghongx unxsun tuah quer jitt vaiw ee dyving'eh.

Go-qnxix-jaw, tnix puxaxqngx. Dingw vorlok ee taubak bagjiux vecqimx cue byy jaboxqniaw, qesix giaa lehh, sui' beh kir cue xe vorlok ee taubak su'ngiaa.

"Liw decc qnuaxqinw sniaw? Liw nng xee jaboxqniaw iarr byy prangw .qnir." Sniawmaw laii qra dongwjiw.

"Liw jai'ngiaw inx dirr dahh?" Taubak mng qaxx qinw viagviak.

"Liw cur-jingg cur-au srunn .jit .xe dyrr e knuar diyc inx."

Taubak jiauww ang'ii ee jixsi, byy knuar diyc nng xee jaboxqniaw ee ngiaxjiah, dandanx huatqenr diyc dniadauw huad jit jangg ciwpyx, aurbuexdniaa kia jit jangg sngsuiciu, jarhngx jinwjingg longxx m bad knuar .quer .ee.

"U too, u juiw, u hongx, samvutsii pak quaw zit, inx nng xee tangx uac lecc q.-quxdngg-d, jnia' cingx huer dy' u," sniawmaw qongw. "Inx be qniaa be jauw, dngnii jiuw dirr liw sinvnix, vutquanxsii dy' tangx vuepnua liw."

"Liw si qongxx..."

Taubak laurve jit qxur ue buerjingg suah, xe vorlok ee taubak vniar laii qaur der beh ter inx haursnex tyw mia.

"Inx daux nng xee jaboxqniaw, jit xee vniwjniaa ciwpyx kia dirr cur-jingg, jit xee vniwjniaa sngsuii siuw dirr cur aurbin."

Sniawmaw unliauu aw sueh kiw. Nng xee taubak longxx m siongsinr.

"Ciwpyx jejex qapp sngsuii memex, linw narr si taubak ee jaboxqniaw vniwjniaa :ee, diyhh jiksii kuihuex qetliap, inx dyrr jaix guaw soxx qongw :ee si sit m si hix. Linw nng xee vorlok ee uansiuu, qaur jiax pah duxkiw."

Sniawmaw jiacc qongw suah, cur taujingg :ee lenvnisii kuix huex, suar qed angkauw ee ciwpyx, dagg liap dy' ngii qunwqunr; cur aurviah :ee jit qnrua jit qnrua ee sngsuii snix qaxx iab'iap si, diqnuasig dngw olaiw, qeww dngdungii.

Dingw vorlok ee taubak amr amr aw decc crid bagsaiw. Xe vorlok ee taubak trow duarkuir, byy-sniax-byy-sueh qniaa huantauu, jah .laii ee qesix, jit dih hueh dy' byy bak .diyc.

39. qnuabangx

Jit xee lairsnuax ee siauwlenqex cutmngg tyxliac, hng hng knuar diyc jit din vnederlangg, m si giac dyx, byy dyrr giac cingr, hiongx qaiwqair ngr inx vorlok jitt hiongr vniar .laii.

"Dnaxx camw :ar, vorlok u guihiamw, guaw diyhh qinw dngw laii qra inx tongvyr!"

M qnaw encenn, siauwlenqex jiksii huantauu beh vniawlo.

"Banrcniaw lehh," jit jiah bangrdangdiuxaw huacsniax qra ix dongr. "Inx narr duer liw ee kahy en' lo cue, liw jitt sniax dngw .kir, duxhyw qra inx cuarlo."

"Acc byy, guaw beh anwjnuaw si hyw? Guaw jit xee langg duiww inx jingwlangg, quatding pah inx be ngiaa." Siauwlenqex bin sib sib.

"Liw tangx venwsinx jyr qnuabangx a!" Bangrdangdiuxaw cud juxir.

"Qnuabangx?" Siauwlenqex bagtauu kiycqingw.

"Hner a," bangrdangx duiwcuir rinr.  "Qnuabangx e quah .langg, inx vnederlangg kacc m qnaw qinruaw. Qnuabangx kuihuex e tiuquann, beh kir linw daux ee lorcauw hro qnuabanghuex jac diauu lehh, inx dyrr yh cue lor."

Siauwlenqex tniax liauw, dimr tauu jit sniax rinr hyw narnia, lenvnisii vniwjniaa jit jangg qnuabangx, kacc quer, qui' snuax qui' pniaa tnuar qaxx muaw muaw si.

"Tacc e qui' pxenr jiauu qnuabangx? Dingw jua laii tamr lorcauw, henrhen dy' kangwvox!"

Vnederlangg qniaa m jaix lo, m qnaw langrhiamw. Qui' din laii hingr cuccuh, huah huantauu, bin-aw aur duhduc.

Vniwjniaa qnuabangx, qo' jit xee dirr iaxgua kiarkiw berdangr dngw .kir, siauwlenqex jiokk sniu cur. Bangrdangdiuxaw linsiyh ix, vutsamsii kia dirr cauxaxqix quandingw cniuwquax beh ter ix qaiw simx bun. Ciutnix narr qaur, iarr u snuahongx draur janrciuw. Vehsig ee qnuabanghuex jre sunrlorciax, huedngw qowhiongx knuar cinlangg si inx ee simguan.

40. amvojee ee qewdir

Jit jiah amvojee duxx an' tokangx bunr .cud .laii, bagjiux ganw .diyc .ee, dagg hxang dy' simsig. Siwkouii ee qongqingw taiww belangg, jit jiah cauxqauu syx kax lenw ciuw snaa .uaw .laii qiongqiongg beh qra gab .lyc iarr byy diwqag. Hyw did qajair, jit jiah qimqux cud sniax qiyr ix dihongg, jit diauu sniwmia jiacc kiyh .dngw .laii.

"Liw byy cincniu guanw, u sxit tangx vuex kir tnidingw. Liw qaqi dirr tokax qnia'unn cenban diyh'air sewzi."

Qimqux-aw qor qapp amvojee qongxue, byy decc knuar lo, uat jit xe srinx, suacc kir hro jit niaw didubang liamm .diyc.

"Liw vangr ix kir. Guaw laii dingxter ix. Guaw kacc dua piang, qex kacc u bah, jiac guaw jit dxngr duw ix nng dxngr gxiac."

Amvojee pag dirr ciurvag qapp didux decc sionggi. Didux siauxtamx, knuar amvojee jit jiah vuiluix-l., cuiwnua qiongbeh dinx .lyc .laii. Vixqauxdik, qimqux-aw naxx puiwtad-aw, sanw qycc vyc vanw, didux jiksii qra tad duiww vnix:a kir hiyccuanw.

"Liw narr be qaiww cniiaux, diyhh ban'axsi jiac .guaw. Huandiamw quer, guaw e venr jyr siangx xee cud laii hro liw knuar."

"Penr guaw decc m bad, guaw hro liw be hong .did. Cniaa jit xee qniaw duarhanr, byy kiarnii iarr diyhh kiarguec. Quer jit xee mee, liw dyrr tangx venr jit senx .cud .laii. Vunn hongx :ee marr byy jiacc qinw!" Didux qra pngc, jnia' byy air sinr.

"Liw ee diduabang liamm titix, guaw iarr jauw be kir. Guaw qongw :ee narr byngiaw, sii qaur, guaw jyr liw ee amwdngr qiamx diamxsimx, byy duxduxx hyw?"

Sniu .u .jit .quw .aw, didux qongw, "Liw quibuew e zip guaw vakdoxdew, byy cax hex itsii-itkig. Guaw dyrr tingwhau qaur hiangwsii, byy gai."

Unn unn aw si, henn dirr ciurbuexliux ee guehniuu qaur qaxx vnuawmii vreh kiw qaur tnidingw. M jaix si jniu iacc si jnuaxngiu, vunxdew jiokk dniardiyc ee amvojee suacc qunxqunxjunrjun, giauhgiauc drang. Cimxtauu, amvojee tosig ee kajiacpniax tongw jit bongr .cud .laii, qimx nawsar, kacc kir, suacc knuar e diyc kaqud qapp bagjiux.

Didux knuar qaxx cuu .kir. Tingwhau ix u hiauxgo, snex sxit ee amvojee qra qu laksag ee guarkauw snxax liur hetqak, sidqow ped nng xe aw dyrr jueww ix vuex .kir. Didux gna gna, dua cuir kuix kuix. Jit niaw amvojee byy hniah jauw ee qu snxax dyrr hed dirr ix katuiw-vnix.

41. zidtauqongx qapp guehniumaw

Qoxjaw qoxjaw, tnidingw ee denrhuexqiuu-aw u zidtauqongx qapp guehniumaw. Nng xee jiauu qngx qycc vnii dua liap, jycsid siy' qaulunn. Kiarr guaw jyh, liw hiyh; liw jyh, guaw hiyh, jit qangx byy jaw byy amr, be qngx ngiarngia, iarr be amr sysyx.

Guehniumaw ziusingr, bixle, viw did zidtauqongx, qex jiokk u lang'enn. Zidtauqongx gauu uanwdor, jiokk vuthok, vakdow-lai juann juann qxuiw, pacsngr beh duiww guehniumaw sraiw amwvo.

"M jaix anwjnuaxngiu aw diyc, guaw jitt jam aw sen daucdauc, nngw qaucqauh. Liw ciangjai jiacc ciywci, damrvyc aw kuiwlat lruiw .guaw, hyw bor?" Zidtauqongx qew kyxlendai.

"Hyw a, nacc e m hyw?" guehniumaw jit sniax dyrr dac'ingr. "Guaw dingw vox ee kuiwlat, liw singx tec kir ing."

Qewbiyy sraiw quewbin, zidtauqongx dua simqnuax, qecdngw qangx qycjaiww qra guehniumaw kuix cuir.

"Ervox ee kuiwlat, guaw qiamw jit quaw kiw laii hro :liw. Mraxqyxx, liw binaxjair diyhh e qir did hingg :guaw. Narr byy, aurzit aw e diyc guaw decc kiamr sinn."

Muaw kauw dac'ingr, zidtauqongx qra jenw .diyc ee kuiwlat amr amr aw dunxkngr .kiw .laii. Derr snax qangx, guehniumaw suesinn suesinn, laii beh qra zidtauqongx tyw quaw kuiwlat dngw .kir.

"Guaw jxig dy' be hur :ar, beh tacc u qegiac tangx vunx :liw?" Zidtauqongx qongw.

Diyc cneqniax, guehniumaw jitt diap jiacc jaix zidtauqongx pnaiw simhing.

Dingxvox qapp ervox ee kuiwlat qui'ee sitlyc .kir, byy tangx cincniu ingxvaiw hiacc qngx, guehniumaw jiokk auwec, ud jit xe suacc puawvne, vutsamxsii dy' kicqag, be ngii. Jingwtauu giaa .kiw .laii ee sii, byy-sim.-byy-jniaa, quikir hiyckunr, byy cud laii jycsid.

Tnidingw ciangjai byy vnuar hxang mic jiywlo jin' m si kuanw. Qovutzijiongx, tnicnix bii bii aw qngx iarr diyhh ho'ngg cniar laii draur qing. U muaw tnix ee cnxix laii jywpnua, guehniuu ywlyc ee simjingg qeqiamw did diyc andah.

42. haixhongx qapp jiyhgamm

Ozinn duiww vehzinn, nng xee luxtnisinn senx vniar senx. Tnidingw Senx qui' srinx qimx dangdangx. Zidtauu, sicnar, hongho qapp luiqongx, jiauu sriu ix tongxquanw. Tokax Senx qui' srinx ox mawmar. Ciurjangg, jiyhqow, kelauu qapp haixjuiw, vutquanxsii jairr ix ceing.

Dangsaix jit langg kia jit vingg, qoklangg viw jit xee qewser. Jimjiog cuisngr, lenvnix jinr, lenvnix trer. Hut .jit .xe, kongrlongr jit sniax, Tnidingw Senx venr jyr jit der dang hnuaichnuaih ee jiyhgamm. Tokax Senx vnir jniaa jit jun kinx bangxbangw ee haixhongx.

"Kyxngor jiwqik! Guaw snix jyr suiw buacbuah, liw qra guaw venr qaxx baiw qyqyy! Guaw beh air guaw guandew ee ngiu lar." Qongw qaxx krir cuahcuac, Tnidingw Senx vniwjniaa jiyhtauu, iuguann qau singwde.

Tokax Senx vniwjniaa haixhongx diyhh sriu Tnidingw Senx qaiwquanw. Bersux decc caghuex, hongx dirr jiyhtauu sinkuvnix sec jit linr, haiw-vnix jit liap jiyhgamm suisii u Tnidingw Senx ee sinngiu.

Tniaqniaa si qovutjiongx, haixhongx simlai sidjai jin' enwkir, jin' m qamguan. Qig taukag, jinjniar hro ix sniu diyc jit vo tangx vyr niauxcuxaxuanx.

"Jiyhtauqow, guaw lring liw qim'au venr exqauw, byy huatdo qycc cud sniax qra guaw cesaiw."

Byy langg siy' bad, haixhongx jit siwqer liulong, byy jit sii tangx hiyccuanw. Be-dinx.-be-dang, jiyhgamm jit vo dy' berdangr isuaw, qongxue byy sniax. Haixvnix ee jiyhtauu qapp hongx, uansiuu qed jit siwlangg.

43. buexiah'aw dap'unx

U jit jiah buexiah'aw laii dirr zinqedaux ee caiwhngg cittyy qiamx cuerjiac. Qor decc suh huebit, jid'err byy jimjiog, suacc hro jit xee javoginxaw iong qorr bxang-aw qra hriax .kir.

"A'mue-aw, liw knuar guaw liac .diyc .ee jitt jiah iah'aw u suiw bor? Qimx dangdangx, sxit-buew qycc u kiyh qxingw." Javoginxaw ciyr gigix mng inx siyxmue.

"Urngiaw jiokk suiw dy' diyc. Mrqycc a'hniax, liw qinw vangr ix jauw. Ix sidqow ped byy tingg, qaxnaxx jiokk qinxdniux, decbeh be cuanxkuir ee kuanw." Siyxmue-aw knuar diyc jiokk be quewsimx.

"Simxmih decc vangr ix kir? Guaw jiokk byy qanxdanx jiacc qra liac .diyc. Binaxjair laii kir ci-aw huacbe, bre lecc snax~go-vah kox aw ingwqaix byy bunrdee."

Jyr hniaqyx :ee muaw simx qitai. Jyr siyxmue :ee bin-aw iux qatqad.

Mii cimx xia jing, tranr qui' qekauw-aw kunr qaxx dng' babuix, a'mue-aw liamx kax neh ciuw, taux taux aw lyc cngg.

"Liw aurzit aw rair sewzi, m tangx qycc kir ho'ngg liac .diyc, jaix bor?"

Qra bxang-aw ee qad tauw .kuix, a'mue-aw vangr buexiah'aw juriuu.

Cur nirr decc niw vor, hniamue-aw iauxx jiyw huer iarr diyhh draur kaciuw. Huecauw quw byy nguarsinx, jit quaw hueaxvor dunw dunw qui' cuwqingx bre be cud .kir. Bixangr suwsiongg kangx kangx, hniamue-aw vakdow iarr dagg vutsii kangx kangx.

U jit amr, a'mue-aw vakdow iaux qaxx kunr be kir, vreh kiw laii tinn dee bongxx quanr, nng jiah buexiah'aw suacc tingg dirr ix binrtaujingg ee dyh-dingw. Qidiongx jit jiah, siyxmue-aw knuar diyc binrsik binrsik, siongr jit xe jinx, jiacc jaix dyrr si dingw zit aw ix vangr vuex hitt jiah.

"Suiw dangdangx :ee, liw tacc e qycc laii?" A'mue-aw mng.

"Linw daux singliw baiw, guaw cua jixmueaxpnua laii qra linw draur cuivaii. Lingrzit aw quer, dagg amr dy' u jit jiah iah’aw laii linw daux. Liw jiauww ix sinkudingw ee huezi niw vor. Niw .cud .laii ee huesig, langkeh vycdnia jin' qac'ir."

Hitt amr, a'mue-aw dyrr jiauww buexiah'aw ee qawsi kir jyr. Laii inx daux ee iah'aw, uree snex jyr ngii qunwqur, uree si dngdux :ee, marr u sitqow si snaqakhingg, inx sinkudingw ee huehunn, byy qaxx jit jiah siyqangg. Jarhngx laii jit jiah kongw :ee, u osig ee qunxqnii. Qinaxzit si ngg gimwgimr :ee, diongx:a u punwdiamw. Qycc u jit jiah bersux cing jit sux citcaiw ee hueaxsnax, sikdir puewcah jiokk snriaa langg bak, qycc jin' gnaxkir, be cosiok kuanw. Bylun dycc jit jiongw, qecdngw zit, qui' ciax ee nixvor sag kir ci-aw, jit xe aw quw dyrr ho'ngg cniuw liauw liauw, jit pid dy' byy tangx cunx. Jurr anxnix, a'mue-aw inx mrbenw qycc iaux vakdow, ciangjai dy' k.-kuaiwlok-l.

44. snuax qapp haiw

Jurr kuix tnide, snuax qapp haiw tensingx jurzenn jywpnuaw, jyr ving'iuw.

Haiw air qongxue, mii pah zit, qongw qui' nii. Snuax jit~vnuar vaiw aw e qra rinr .jit .xe, jin' hranw did cud cuir. Qanda' tniax haiw didix-dadax ee sniax, uirsii cniuwquax, ursii larkig, snuax dyrr be qodnuax, qamxqag jin' jiok'ir.

U jit zit, nng xee siy' dakcuir, kiw uanqex. Haiw pnaiw singwde, qaulingg dua qunw, pacsngr hor haixjuiw siy' puah.

Snuax qniax kir hro haixjuiw rimx .diyc, qanda' jai'ngiaw nir kabuew. Haixingw dniur zuxx quann, snuax ee kabuew dyrr nir zuxx quann. Jit cunr jit ciyh, snuajiamx qapp haiw zuxx li zuxx hng. Quibuew, snuax suacc knuar be diyc haiw ee ngiaw, iarr tniax be diyc haiw ee sniax.

Snuax jiokk hiyrhuew, venrnarr sniu diyc haiw dyrr aicanx, toxkuir. Tniqongx knuar ix kyxlendai, sniuxsur hunhaiw qapp ix jywpnua. Hunhaiw e qniaa, be qongw. Guandew dyrr jiokk diamrjaii ee snuax, jitt sniax, ue qyckacc jiyw. Qaur qaxx au .laii, lenrr ue dy' be qir did anwjnuaw qongw, snuax jurr anxnix venr exqauw .kir.

45. ciwdig

Kax dac zip tobah, jiac zidtauu ee qngx, limx horjuiw, iab'iap si ee dikhiyc, dingrdauh, cuiwcnix, unxsimx aw dua, hongwsimx aw dirr diknaa-aw-lai kiarkiw.

Jit xee siauwlenqex laii snuadingw liac snuadix. Snuadix byy liac diyc vnuar jiah, suacc kir duw diyc qauxhimm. Siauwlenqex kixkax lauwjauw. Qauxhimm kax jriab kax duer ix kacngx au ziog .laii.

"Laii, kacc qinw zip laii guanw dikpy lairdew bih." Siauwlenqex jauw qaxx cuanxkuiwqnar, dikhiyc hyw simx qra vyr.

"Aurviah u jit jiah qauxhimm, guaw rair laii dymia, berdangr qapp liw qrangw."

"Guanw jiax hiyc-aw huad qaxx bat siamxsiamw, himm bagjiux cuh cuh, knuar be diyc liw."

Siauwlenqex siamwbuexau, tniax diyc kajiah au himm "hnaur" jit sniax dua dua sniax, hniah .jit .xe, sinkux ngar qe qe jongg zip kir diknaa-aw-lai, kax naxx jauw, ciuw naxx vee.

Qauxhimm ziog laii qaur, jiax quanx, hiax siongr, pow pow u pnri diyc bi, byy knuar diyc ngiaw jinjniar gingg. Bersux decc tauxkuir, qauxhimm bin hiongr tnix qycjaiww auqiyr jit sniax liauxau, unn aw qniaa duiww vadd xui aw kir.

Mia kiyh u dngw .laii, siauwlenqex qnuaxqinw lyc snuax, lenvnisii iurqycc laii qauwui, jingcax jitt vaiw ix aurviah si duer jit din langg, qyqyy jit qix voxtauu quc dirr ciuw nirr.

"Jiaxee dig-aw snix qaxx bat jiucjiuh, dagg qix qycc dit liuliux, qrngx laii kir kauxsnuax bre, unxdangr jiokk hyw qrer."

Siauwlenqex vyr langg laii jiax pud dikcaa. Dua qaur jai :ee snesingg be uac. Diongvan :ee iarr jiauu pud liauw liauw. Guandew cnex linglingx ee diknaa venr kangx lylyx, qanda' cunx quaw dna'aw putauu :ee dirr tokax sicsih junr.

U hongx, u zit, u horjuiw, sizit quer, qaix dua :ee dua, qaix qruax :ee qruax.

Dairjir quer liauw sii, siauwlenqex qycjaiww laii qaur snuax nirr, iurqycc kir hro qauxhimm ziog. Siongr diyc jit xui u diknaa :ee, byy cocox laii hitt dah lo hiacc uer, siauwlenqex qnuaw qinw vxanw nngr .zip .kir. Jidsiqanx, amxvniw ee sniwhiyc suacc vnir jyr jiamtauu, dingrsinx, bersux jit jiah moui, qui' sinkux juann juann cxir.

Dirr ciwdig guarbin ee himm byy jaidiau zip .laii. Jiyh diknaa jauxbih ee siauwlenqex iarr byy huatdo cud .kir, i-ingxuanw-u ud dirr lairbin.

46. qusnuax dxyw

Jit jiah qux-byw cua jit din qux-qniaw jniurjuiw uanxjiog. Bec'amr aw, zidtauu vnuar vingg tiam dirr haiw nirr, qux-byw cuartauu lyc juiw beh dngw kir haiw-drew ee cur. Hionghiongg, hongx dua, ingw dua. Dirr haixhnua-vnix ee qux-qniaw jingg kax au kax jin buxlat vuew, qniaa byy nng vo, haixingw kam uaw .laii, sui' hro sag dywdngw haixsuavox, kacc anwjnuaw dy' qniaa be qaur haiw nirr.

"Mamax, mamax, liw dirr dyc'ui?" Qux-qniaw auqiyr mamax laii pacqiur.

Qux-byw tniax diyc sniax, qnuaxqinw huantauu. Hong'ingw cuttenx dua, kajiacpniax iurqycc pnai jit xee qukag dang hnuaichnuaih, hai qux-byw iarr byy jaidiau kixsnuax qiur qniaxzii.

"Mamax, mamax, liw dirr dyc'ui?" Lauwdin ee qux-qniaw hiamwhiux, jit vaiw qycc jit vaiw. 

Qux-byw tniax diyc hex sniax, m qramx diucdiuh. Kacc sux hong'ingw taiww pnaiw simx, tiauqowir qra inx buxaxqniaw siy' qeckuix jyr nng vingg.

"Mamax dirr jiax, linw u knuar .diyc .byy?"

Iong jin kuiwlat, qux-byw puu jnriu haiw-bin. Qux-qniaw giaa tauu dy' tangx knuar diyc ix, jai'ngiaw mamax byy qra inx vangwsag.

Mii lenn zit, zit lenn mii, quibuew, qux-byw vnir jniaa jyr jit jxy dyxsu. Tingwhau ingw kacc ser, qux-qniaw zin Qusnuax Dxyw, beh huedngw haiw nirr ee cur ingxx m qniax sitlo.

47. vehtauangx qapp cuwqakjiauw

Cunhongx iyy, tangtua qiyr, jit duir jiauxaxtunn siy' jiyx beh cittyy iusniuw, ioksog dirr gimqnii-kax siy' danw, huerhap.

Zit beh daur, jiauxbuw dairsingx qauwui, ngar tauu quisimx decc dnaxjingw sidqoxmngg. Cnix-dnia-vec-dnia, tnix ox de amr, jit niaw bxang-aw an' ix taukag dingw kamr .lyc .laii, jit diab quw aw, qycc suar ho'ngg liac kir dirr jiauxlangg-aw lai qnuaix.

"Vaiwtog liw hyw simx lehh, diyhh qinw vangr guaw cud .kir." Jiauxbuw qra cuwjuw aiqiuu.

"Guarkauw diyhh senr hongx, diyhh pak zit. Jiax jiokk suwsi, qycc benw huanlyw byy tangx jiac, qamxx byy kacc hyw?" Cuwjuw mng.

"Guaw ee ving’iuxpnua longxx druar dirr guarbin. Henrcuxsii dyrr u jit xee dirr cuwqag decc danw :guaw. Cniaw liw qinw qra mngg kuix .kuix, hyw bor?"

Cuwjuw m cab :ix, dendyww qra lang'axmngg sryw zuxx ann.

Quer sii quer kig, jiauxqangx iuguann kogkok danw, qycc sui' xee aw kir qa'ngg mng.

"Cuwqag ee jiauw-aw? Byy lehh, byy knuar .diyc lehh."

Jit siwqer mng byy, jiauxqangx dua sniax huachiamw.

Jiauxbuw tniax diyc hex sniax, sraiw dit auu qra rinr. Kacc camw dyrr jiauxbuw vyc sniax, jiauxqangx tniax be did diyc. Sniu byy vo, jiauxbuw ngr jiauxlangw-aw he sniwmia longr, sniu beh qra mngg longr .kuix. Lorbuew, jiauxbuw cud lat quewciuw suacc sitjuiw, cuiwjic tror tror jurr anxnix byy kuir.

Cur-jingg cur-au sec kolinx, jiauxqangx cue qui' ervox itdit qaur tnix amr zit lyc snuax, vunxjniaa ox snawnar ee taujangx jyr jit xee venr vec :ee. Jurr hitt zit kiw, dag'ee longxx qiyr ix vehtaukog-aw.

48. snua'inghuex

Vorlok ee qoniuu-aw siy' jiyx kir snuadingw kiyh caa, dirr vnuawlo duw diyc jit din qiapcat, hnuaivar bin, ciqysinn, jit xee viw jit xee kacc baiw. Qoniuu-aw uiwhniaw, kixkax jauxluan naxx huah qiuwmia. Jauw byy quewciuw :ee, aurvnuar siwlangg diyhh kir hro qiapcat jyr bow.

Srinx cing hunxsig ee hueaxsnax, siangx ciuw caux qunqix, jit xee hy jyr a'Ingx ee qoniuu hermia hiongr cimsnuax diddit kir. Jauw u .jit .der .aw, taujingg qycc kir vrong viah. a'Ingx uat tauu jid’err knuar, pnaixdoo decbeh ziog qauwui, diyhqib qaur der, bagsaiw siangx qangw lrauu.

"Suiw qoniuu-aw, liw kaur qaxx jiacc siongsimx si uirr dycc jit jann?" Jit jangg snuacingveh kinx sniax mng.

"Aurviah u qiongdoo qycc pnaiw, qycc baiw. Guaw byy air hro inx jyr bow lar." a'Ingx bagsaiw lrauu bagsaiw dih.

"Liw diamr snuadingw qapp guaw jywpnua. Guaw vyxniaw inx cue liw be diyc."

Cingvecciu cud vyxjingr, a'Ingx dimr tauu hixunw. Duxjiacc rinr sniax hyw, a'Ingx jiksii vnir jniaa jit jangg snua'inghuex, hunxangg ee hueluiw kuix qaxx jiokk iamrle.

"Ququair! Henrhen dyrr knuar ix jauw duiww jiax laii."

Nng xee qiapcat knuar byy lang'ngiaw, sui' dyrr uad kir vadd xui cue.

"Inx jauw .kir .ar. Liw qinw qycc qra guaw venr dywdngw .laii." a'Ingx jit biyxjingx dy' be hur danw.

"Beh nacc ering .did? Liw duxjiah bingbingg u dac'ingr, qonxx beh druar jiax qapp guaw jywpnua." Cingvecciu kiw pnaiw bin.

"Guaw qycc jyr langg, muixx qangx longxx laii jiax knuar :liw, m si qangrkuanw?"

"Hex jiacc si byy qangg," vingvecciu duiwcuir rinr. "Qycjaiww qongw, linw langg qongw ee ue hoo luiwluiw, qxuiw jiacc beh sinr!"

A'Ingx jaiwsnax qra qojniaa, cingvecciu longxx byy ciuwcaiw ix.

Siongsimx tauu ngar ngar. Sniu diyc cur nirr ee a'buw qapp a'diax, a'Ingx qycjaiww lrauu bagsaiw, lag lyc tokax vniwjniaa hueluiw.

49. huelok

V.-vingsun-s. ee ciurnaa-aw-lai, jit din lok-aw qruar byy-su-vaii, jit siwqer diytiaur. Ping gauu jauw, viw gauu tiaur, jauxviyx, bih siy' cue, dagg hxang dy' hyw cittyy.

"A'hniax, liw beh kir dyc'ui?" Lok-aw memex mng qyqyx.

"Jiax sngw qaxx sen :ar. Guaw sniu beh laii kir snuadingw qniaa qniaa knuar knuar lehh."

“Bering .did lar. Mamax dyrr u qra lanw qaudair qongxx snuadingw si hiamw lo, cenban m hyw kir. Liw tacc e longxx byy air tniax mamax ee cuir?"

"Guaw kir binrdingw ganw .jit .xe sui' lyc .laii. Liw qexngiaw m jaix, dngw .kir mair qongw dyrr hyw."

Jit qxur ue buerjingg suah, lok-aw qyqyx piux lehh sui' jauw duiww snuadingw .kir.

Tnix amr .laii, lok-aw-qniaw sui' xee aw dngw cur cue vavax mamax, dogdok byy knuar diyc lok-aw qyqyx ee ngiaxjiah.

"Linw qyqyx lehh? Nacc byy qapp liw jywhuew dngw .laii?" Lok-aw mamax mng.

"Ix qongw ix beh kir snuadingw .jit .xe sui' dngw .laii. Guaw u qiyr ix mair kir. Ix dy' m tniax." Lok-aw memex bagkox angg angg.

"Snuadingw! Snuadingw qnuaa sngcsngh, ciangjai decc lyhseh. Ix cunvan kir hiax hur siw kacc kuair."

Lok-aw vavax sui' beh cud kir cue, jit jiah m jniaa lok-aw suacc dirr ix binrtaujingg kia.

"Liw beh cue si'angw." Lok-aw vavax mng.

"Guaw linw qniaw a!"

"Guanw qniaw? Guanw qniaw qui' sinkux xmngg itsig, suiw qaxx be qor .did. Iarr suacc u cancniu liw, qui'ee kajiacpniax vec vec jit dah jit dah, huevalixniaux!"

"Acc dyrr snuadingw ee seh lag dirr guaw sinkudingw, jxig sniu' dang, suacc dor .zip .kir. Guaw mrjiacc e venr jitt hy kuanw hxingg dngw .laii."

Lok-aw mamax uaw .laii, bagjiux, kadee, buexliux, dagg xui dy' quewhog quer qiamxjax, knuar qaxx jiokk qanghux.

"Jniawjniar si guaw ee simqnuax aw qniaw dyrr driyc. Bxan hing bxan hing. U ving'anx dngw .laii dyrr hyw."

Qecdngw qangx, cittypnua knuar diyc ix qui' sinkux punwdiamw, longxx qapp ix siamw qaxx li ~ ~.

"Aixiyr, ix jiokk taixqyx kuanw. Lanw m hyw qapp ix uaw." Jit jiah lok-aw-qniaw anxnix qongw.

Vunxjniaa v.-vingsun-s. ee ciurnaa-aw-lai, vorvinn, suacc u camxceh ee qiywsnix aix aix hauw.

"Hitt jiah huex loklog :ee mair liac, vacbinrvah u puawvne." Paclac :ee qra ix ee dangpnua diamxduh.

Hitt zit, u jerje lok-aw-qniaw prangw .qnir, byy qycc dngw .kir. Au .laii, lok-aw-qniaw venrnarr duarjiah .laii, inx ee sirduarlangg longxx air inx kir snuadingw, byy hro vehseh dor qaxx vnir jniaa huelok berdangr lyc .laii.

Sxer tuann sxer, jit dai quer jit dai. Buexciuw, qniaxsunx-aw jid'err cutsir, sinkudingw dy' u vec vec punwdiamw dilehh, jurr anxnix benw qycc kir snuadingw sriu sngseh.

50. sauwciuxcnix qapp huexqimqox

Zidtauqongx beh hiyckunr byy singx vyr jaix, guehniumaw ing'amr iurqycc qiux diamr cur nirr m cud .laii. Nng xee hniadi-aw dirr snuadingw paclac, tyxliac, be qir did sii, beh dngw .kir, snuanaa-aw-lai amr sysyx suacc sitlo, qniaa dangx drng diyc kniqaux, qniaa saix vrong diyc viah, dingw:a kiw .kir m si lo, xe:a lyc .kir qia ~ ~, quiwdig snix qaxx bat siamxsiamw.

"Beh anwjnuaw? a'buw qapp a'vaa diamr cur nirr nicnih danw, jinw dikkag jiokk uirr lanw damhuann." Siyxdi bagtauu iux qatqad.

"Tnidingw ee cnxix li lanw hiacc hng. Inx narr u tangx lyc laii qra lanw jiywlo, m jaix beh zuarr hyw?"

Duarhniax trow duarkuir. Ciang duw ciang, tnidingw jit liap sauwciuxcnix qingw jitt diap dirr inx taukag dingw saur .quer. Duarhniax qiyr jit sniax sauwciuxcnix junr jit xe, tosuahunw suacc ia ia .cud .laii, qui'ee vniar lyc huanrqanx.

"A'hniax, liw knuar, tnicnix jinjniar laii decc qra lanw jiywlo ne!"

Cincniu dirr tnidingw, hniadi-aw binrtaujingg ee cnxix qangrkuanw iab'iap sih. Inx qra hy miaa jyr huexqimqox. U huexqimqox cuarlo, hniadi-aw nng langg qrngx jit jiah snuadix, naxx qniaa naxx kosi'aw.

51. cauxmecqongx qapp juixlenhuex

Tauwjaw, zit iauxx bue jiauu cud, cauxvox dar bongg dar bu. Jit jiah cauxmecqongx jaw jaw jingsinn cutmngg cuerjiac jaxkixdngr, tiaur quann tiaur qe, jiax siongr hiax siongr. Byy dniudii "pongx" jit sniax, cauxmeh-aw lag lyc kir jit kud vix-aw

"Qiuwmia or!" Cauxmeh-aw dua sniax huachanw, jingg tuiw he sniwmia vee, tauu puu lehh dimm lehh.

"Laii, liw qinw vreh kiw laii guaw jiax."

Cauxmecqongx siwqer siongr, huatqenr diyc dangsi'aw si jit jangg juixlenn decc qapp ix qongxue.

"Bering .did lar. Kia dirr juiw-dingw, be jai. Liw qinw kir cue jit xee laii qra guaw qiur kacc driyc."

Jit qxur ue buerjingrr suah, iurqycc jiac diyc juiw, cauxmeh-aw jak .diyc, naxx qongw naxx knec.

"Benw qniax lar. Guaw snex jyr jiacc dua hiyc .diyc, quatding e tangx jicjair liw ee dang.”

Qongw jiacc decc qongw, jit jun juixingw iurqycc rig .laii. Limqib, taujingg nng qix kax tner lehh, aurviah :ee jiurser, lingbuxlat jyr jit xe ciuw qra vniar .cud .kir, cauxmeh-aw sir kax vuew dit dit, dyw dirr juixlenhiyc binrdingw duarkuir itdit hxex.

"Guaw dyrr qongw tywdongr :ee, liw duxjiah qycc m sinr! Liw knuar, liw jitmaw byy jai ~ ~?" Juixlenhiyc jiokk ing'ingw.

"Liw qycc qnaw qongw dua sniax ue. Qui'ee juixvix-aw hro linw qa’ngg kamr diauu lehh. Guaw liahjunw si cauxcnix, mrjiacc sir kax jyr jit xe jraix .lyc .kir."

"Guanw e dua, marr e snetnuar; juixvix-aw qycc byy qraur kuah."Juixlenhiyc qinw vuexhue.

"Linw suacc berhiauw qra huex kuix dirr dingxquann jyr hyrtauu? Guanw knuar diyc juixlenhuex, jin' jaix jitt kud si lenhuevix, dyrr be gong gong qycc tiaur .zip .laii."

Hyw simx ee juixlenn u tniax cauxmecqongx ee cuir. Qecdngw jaiw, juixlenhuex dagg luiw dy' kuix ~ ~, bersux decc viw draur dua luiw. Dirr hng hng ee soxjai dy' tangx knuar qaxx bingg ~ ~.

52. iudanghuex vnir jyr hunxiah'aw

Cuntnix ee zit nngw nngw, cuntnix ee ho iur iur. Iudanghuex siangx ciuw  kuix kuix, hnuahiw ho lramm zit jiyr, m jaix iuciuu.

"Iudanghuex jejex, linw snix jyr jiokk suiw. Guanw a'buw pnuawvni, dngnii tangwtnix dyw dirr bincngg, byy jaidiau cutmngg. Narr byy, ix marr jiokk sniu beh laii knuar linw." Jit xee ginxaxhniax kia dirr iudangg erdew decc qongw.

"Ginxaxhniax, linw laurbuw byy huatdo laii jiax, gunw tangx vuex kir linw daux hro ix knuar." Jit luiw iudanghuex qongw.

"Linw byy snex kax, iarr byy snex sxit, beh anwjnuaw laii gunw daux?"

"Benw huanlyw. Qaur sii qaur liw dyrr e jaix."

Qui' snuax qui' pniaa ee iudangciu, iudanghuex kuix qaxx bat bat si. Qaur qaxx Go-guec-buew, iudanghuex sui' xee aw li qix, vehsig ee hueluiw piaupiaux lyc too cincniu seh. Vorvinn, qui' tokax ee iudanghuex vnir jniaa vehhunxiah'aw decc pacsit. Kacc quer, muaw tnix jiauu hunxiah'aw decc ngiarngia vuex.

"Jitt din hunxiah'aw dyc'ui jauw .laii .ee? Jiacc dua din, qycc jiacc suiw .diyc!" Dyw dirr bincngg-dingw ee laurbuw huacsniax.

"A'buw, hex iudanghuex huawsinx :ee!" Ginxaxhniax cud qniahiw sniax.

"Iudanghuex? Liw decc qongw honghamr. Hex henrhen dyrr hunxiah'aw!"

Laurbuw jiacc qongw suah narnia, jit jiah hunxiah'aw vuex laii qaur bincngdy tingkax, lenvnisii huequ jyr jit luiw iudanghuex. Qui' cuwqingx ee hunxiah'aw duer ix ee ngiu. Jit bak nih, opuw ee tokax vnir jyr vec :ee.

"Indanghuex jejex, linw jinjniar laii knuar guanw a'buw :ar." Ginxaxhniax cuir ciyr bak ciyr.

"Dangsi'aw iudanghuex dyrr snix jyr jitt kuanw. Urngiaw suiw dyrr driyc." Laurbuw ciyr bunxbunw, qex jiokk u guankir.

"Guanw jiauww ioksog laii linw daux. Ngwbang muanii cuntnix linw erdangr jywhuew laii guanw snuadingw qniakax."

Buxaxqniaw dangjee rinr sniax "hyw".

Iudanghuex qycjaiww snex sxit. Tingwhau jitt jua huedngw huecziacde, inx dyrr beh vnir jniaa tovuii ingxuanw anhiyh, muanii cuntnix tangx qycc snetnuar jerje.