SHABAB JULY 01, 2011
വുദ്വൂ ജലദുര്‍വിനിയോഗമല്ലേ?
കേവലം ഒരു ആരാധനക്കുവേണ്ടി വുദ്വൂ ചെയ്‌ത്‌ കോടിക്കണക്കിന്‌ ജലം പാഴാക്കിക്കളയുന്നുണ്ട്‌ ഇന്ന്‌ മുസ്‌ലിംകള്‍. തയമ്മും പോലെയുള്ള കാര്യങ്ങളില്‍ കൂടുതല്‍ ഊന്നല്‍ കൊടുക്കുകയാണെങ്കില്‍ ഈ ജലം പാഴാക്കുന്നതില്‍നിന്നും ഏറെ മാറിനില്‍ക്കാം. നല്ല വൃത്തിയിലും സൂക്ഷ്‌മതയിലും നടക്കുന്ന ഇക്കാലത്ത്‌ വുദ്വൂവിന്‌ പകരം തയമ്മും വ്യാപകമാക്കിക്കൂടേ? ഈ വുദ്വൂ (ജലം കളയുക) വഴി എന്ത്‌ ധന്യതയാണ്‌ ഇസ്‌ലാം കാണുന്നത്‌?
കെ അഹ്‌മദ്‌ കബീര്‍ തിരുവനന്തപുരം
മഴ പെയ്യിക്കുന്ന പടച്ചതമ്പുരാന്‌ മാത്രമാണ്‌ വെള്ളത്തിന്റെ സദ്‌വിനിയോഗവും ദുര്‍വിനിയോഗവും സംബന്ധിച്ച്‌ തീര്‍പ്പ്‌ കല്‌പിക്കാന്‍ അവകാശമുള്ളത്‌. വിശുദ്ധ ഖുര്‍ആന്‍ അഞ്ചാം അധ്യായത്തില്‍ ആറാം സൂക്തത്തില്‍ അല്ലാഹുവാണ്‌ നമസ്‌കാരത്തിന്‌ ഒരുങ്ങുമ്പോള്‍ അംഗശുദ്ധി വരുത്തണമെന്ന്‌ കല്‌പിച്ചത്‌. രോഗം നിമിത്തം അംഗശുദ്ധി വരുത്താന്‍ പറ്റാതാവുകയോ വെള്ളം കിട്ടാതാവുകയോ ചെയ്‌താല്‍ തയമ്മും ചെയ്യാനുള്ള നിര്‍ദേശവും ഈ സൂക്തത്തില്‍ തന്നെയാണുള്ളത്‌.
സത്യവിശ്വാസിക്ക്‌ അല്ലാഹുവോട്‌ പരമമായ വണക്കം പ്രകടിപ്പിക്കാനും പ്രാര്‍ഥിക്കാനും സംഭാഷണം നടത്താനുമുള്ള സന്ദര്‍ഭമാണ്‌ നമസ്‌കാരം. ആ മഹത്തായ ആരാധനാകര്‍മത്തില്‍ പ്രവേശിക്കുമ്പോള്‍ മനസ്സാന്നിധ്യത്തിനും ശാരീരിക ഉന്മേഷത്തിനും ഉതകുന്ന തരത്തില്‍ മുഖവും കൈകാലുകളും കഴുകുന്നത്‌ തികച്ചും പ്രസക്തമാണെന്ന കാര്യത്തില്‍ യഥാര്‍ഥ വിശ്വാസികള്‍ക്ക്‌ സംശയമുണ്ടാകാന്‍ സാധ്യതയില്ല. ചേറിലും ചെളിയിലും ജോലിചെയ്‌തു വരുന്നവര്‍ക്ക്‌ മാത്രമല്ല, ഏത്‌ ജോലി ചെയ്യുന്നവര്‍ക്കും ജോലി ചെയ്യാതിരിക്കുന്നവര്‍ക്കും അംഗശുദ്ധി ശാരീരികമായും മാനസികമായും സല്‍ഫലമുളവാക്കും.
നബി(സ) വളരെ കുറച്ചു വെള്ളം മാത്രം ഉപയോഗിച്ചാണ്‌ അംഗശുദ്ധി വരുത്തിയിരുന്നതെന്ന്‌ ഹദീസുകളില്‍ കാണാം. ജലം ഉള്‍പെടെ എന്തിന്റെയും അമിതോപയോഗം വിശുദ്ധ ഖുര്‍ആനിലൂടെയും നബിവചനങ്ങളിലൂടെയും വിലക്കിയിട്ടുണ്ട്‌. വുദ്വൂ ചെയ്യാനോ കുളിക്കാനോ ആരെങ്കിലും ആവശ്യത്തിലേറെ വെള്ളം ഉപയോഗിക്കുന്നുവെങ്കില്‍ അത്‌ ഇസ്‌ലാം വിലക്കിയ ധൂര്‍ത്തിന്റെയും ദുര്‍വ്യയത്തിന്റെയും വകുപ്പിലാണ്‌ ഉള്‍പ്പെടുക.
വെള്ളത്തിന്റെ മിതമായ ഉപയോഗത്തിലൂടെ ഒരു പരിധിവരെ ജലലഭ്യത ഉറപ്പുവരുത്താനേ കഴിയൂ. മഴ ഒന്നോ രണ്ടോ വര്‍ഷം വൈകിയാല്‍ മനുഷ്യര്‍ സംഭരിച്ചുവെച്ച വെള്ളമൊക്കെ തീര്‍ന്നുപോകും. ഭൂമിയിലെ ഉറവുകളൊക്കെ വറ്റിപ്പോകും. മഴയുടെ കാര്യം അല്ലാഹുവിന്റെ മാത്രം നിയന്ത്രണത്തിലാണ്‌. അവനോട്‌ അവന്‍ നിര്‍ദേശിച്ച രൂപത്തിലും അവന്റെ പ്രവാചകന്‍ മാതൃക കാണിച്ച രീതിയിലും പ്രാര്‍ഥിക്കുക മാത്രമേ അപ്പോള്‍ കരണീയമായിട്ടുള്ളൂ.
ഭൂമിയിലെ മൊത്തം വെള്ളത്തിന്റെ അളവില്‍ ഒരിക്കലും വ്യത്യാസം വരുന്നില്ല. ഹിമമായോ വെള്ളമായോ നീരാവിയായോ കാര്‍മേഘമായോ മാറിമാറി അത്‌ ഭൂമിയിലോ അന്തരീക്ഷത്തിലോ ഉണ്ടാകും. അതിന്റെയൊക്കെ അളവും അനുപാതവും നിശ്ചയിക്കുന്നതില്‍ മനുഷ്യര്‍ക്ക്‌ കാര്യമായ പങ്കൊന്നും വഹിക്കാനില്ല.
വലിയ പ്രളയമുണ്ടാകുമ്പോള്‍ കോടിക്കണക്കില്‍ ഘനമീറ്റര്‍ ജലമാണ്‌ സമുദ്രങ്ങളിലേക്ക്‌ ഒഴുകിപ്പോകുന്നത്‌. ഈ ജലനഷ്‌ടം ആര്‍ക്കാണ്‌ നികത്താനാവുക? വീണ്ടും നീരാവിയാക്കി, മഴയാക്കി അത്‌ കരയില്‍ എത്തിച്ചുതരാന്‍ അല്ലാഹുവിന്‌ മാത്രമേ കഴിയൂ. അവനാണ്‌ വുദ്വൂ എടുക്കാന്‍ കല്‌പിച്ചത്‌. ജനകോടികള്‍ അംഗശുദ്ധി വരുത്തിയാലും അവന്റെ ഖജനാവിലുള്ള വെള്ളത്തില്‍ യാതൊന്നും നഷ്‌ടപ്പെടുകയില്ല. അവന്റെ ചില വചനങ്ങള്‍ നോക്കൂ:
``യാതൊരു വസ്‌തുവും നമ്മുടെ പക്കല്‍ അതിന്റെ ഖജനാവുകള്‍ ഉള്ളതായിട്ടല്ലാതെ ഇല്ല. (എന്നാല്‍) ഒരു നിര്‍ണിതമായ തോതനുസരിച്ചല്ലാതെ നാം അത്‌ ഇറക്കുന്നതല്ല. മേഘങ്ങള്‍ ഉത്‌പാദിപ്പിക്കുന്ന കാറ്റുകളെ നാം അയക്കുകയും എന്നിട്ട്‌ ആകാശത്ത്‌ നിന്ന്‌ നാം വെള്ളം ചൊരിഞ്ഞുതരികയും എന്നിട്ട്‌ നിങ്ങള്‍ക്ക്‌ നാം അത്‌ കുടിക്കുമാറാക്കുകയും ചെയ്‌തു. നിങ്ങള്‍ക്ക്‌ അത്‌ സംഭരിച്ചുവെക്കാന്‍ കഴിയുമായിരുന്നില്ല.'' (വി.ഖു. 15:21,22)
``ഇനി നിങ്ങള്‍ കുടിക്കുന്ന വെള്ളത്തെപ്പറ്റി നിങ്ങള്‍ ചിന്തിച്ചുനോക്കിയിട്ടുണ്ടോ? നിങ്ങളാണോ അത്‌ മേഘത്തില്‍നിന്ന്‌ ഇറക്കിയത്‌? അതല്ല, നാമാണോ ഇറക്കിയവന്‍? നാം ഉദ്ദേശിച്ചിരുന്നുവെങ്കില്‍ അത്‌ നാം ദുസ്സ്വാദുള്ള ഉപ്പുവെള്ളമാക്കുമായിരുന്നു. എന്നിരിക്കെ നിങ്ങള്‍ നന്ദികാണിക്കാത്തതെന്താണ്‌?'' (വി.ഖു. 56:68-70)