阮這逝訪問的頭家是今年74歲的陳金標先生，伊出世佇咧民國40年，是高雄永安區人。頭家笑笑矣講伊佮前總統陳水扁先生仝一工生日，「人咧做總統，我咧做苦工」，一句耍笑藏著（tio̍h）偌濟過去的苦澀，干焦陳伯伯家己知影。

生活佇彼个只會當食番簽（han-tshiam）仔飯窒喙空（that-tshuì-khang）度日、上艱苦的時代，為著規傢伙仔的食穿，伊對少年時十八歲就開始出來賣魚仔趁錢，頭家講起彼當時，伊賣的魚仔攏是對茄萣（Ka-tiānn）、永安來的，以早茄萣猶袂有漁港的時陣，船仔攏干焦會使倚佇海面，愛閣用竹棑仔（tik-pâi-á）載魚貨入來，才有魚仔通賣。

「若欲出去討海掠魚仔是死一个，無出去就死一家。」 陳頭家按呢講。往過無現代的雷達佮科技，出去討海掠魚攏是看天面，天氣閣較䆀嘛就愛拚性命去，無出去規家大細攏無通食，生活是足艱苦的。仝款自細漢就出來拍拚的頭家，嘛是逐工透早去批魚仔貨，騎武車愛騎兩點鐘來到哈瑪星賣魚，載去路裡、厝內共人喝（huah）——「恁欲買無？」、「買魚仔無？」，想起彼陣，干焦跤踏車就騎歹三台。

就按呢，沓沓仔對跤踏車（二八仔）騎到oo-tóo-bái，到這馬伊佇鼓山市場有一个擔仔位，細漢日子的坎坷、做生理的鋩角（mê-kak）嘛閣伊磨作一个真有智慧閣定定笑頭笑面的魚擔頭家，紲落來，咱作伙來看這位古錐的頭家欲佮阮分享的故事......

紀錄者：邱于耘