Munduko Historia Garaikidea

MINTEGIA: Gizarte Mintegia

IRAKASLEAREN IZENA: Maite Legarreta

IKASGAIA: Munduko Historia Garaikidea

MAILA: Batxilergo 1.maila

1 Unitate Didaktikoaren edo jardueraren AZALPENA

GAIA: Gaur egungo gatazkak eta migrazio mugimenduak

HELBURU OROKORRA: Egungo gatazkak aztertzea eta gatazkok eragiten dituzten errefuxiatu/migrazio mugimenduak hurbiletik ezagutzea, pertsona hauek pairatzen duten egoera pertsonalaz jabetzeko.

DENBORALIZAZIOA (saio kopurua, banaketa …): Lana egiteko 10 saio erabili zituzten eta aurkezpenak egiteko 2/3 saio.

DESKRIBAPENA (jarduerak, metodologia …):

Ikasleek gaur egungo zenbait gatazka (armatu, politiko, sozial…) aztertu zituzten, gatazka hauek egun pil pilean dagoen errefuxiatuen/migratuen gaiarekin lotuz. Taldeka (3-4 kide) egin beharreko lan honetan, gatazka egoera bat pairatzen ari den toki bateko pertsona baten/batzuen azalean sartu behar izan zuten, eta gatazka egoerak bultzatuta, beraien jatorrizko herrialdetik beste herrialde batera egindako ibilbidea kontatu behar izan zuten.

Horretarako ikasleek hainbat puntu landu zituzten, beraien ekoizpena irakasleak sortutako site batean bilduz (site horretan talde bakoitzak bere lana biltzeko orrialde bat izan du).

Pertsonaia/pertsonaiak asmatu eta aurkeztu. Zuzenean sitean egiteko edo drivean egiteko eta dokumentua sitean txertatzeko aukera zuten.
Jatorrizko herrialdea uztera behartu zituzten arrazoiak (gatazka bera) azaldu. Zuzenean sitean egiteko edo drivean egin eta dokumentua sitean txertatzeko aukera zuten.
Jatorrizko herrialdetik aukeratutako harrera herrialdera egindako ibilbidea irudikatu, ibilbideko puntu ezberdinetan pertsonaiaren bizipenak azalduz (nola egin dute ibilbidea, zer aurkitu dute bertan, izandako arazoak...). Puntu hau osatzeko testigantza errealetan oinarritu ziren ikasleak zenbait kasutan. Ibilbidea Google maps-en irudikatu eta site-an txertatu zuten.
Harrera herrian bizitako egoera azaldu (nolakoa izan da harrera, nolakoa da pertsonaiaren bizimodua herrialde berri horretan, jatorrizko herrialdera itzultzeko asmorik duten....).
Dokumentazio fasean (informazio bilketa/Bibliografia) sortutako drive dokumentua ere estekatu behar zuten lanaren bukaeran.

Idatzizko lana bukatu ondoren ikasleek beraien lana ikaskideen aurrean azaldu zuten. Aurkezpena gainera lehen pertsonan egin zuten, asmatutako pertsonaiaren paperean sartuz, eta horrek, entzuten ari ginenok gatazka bera eta pertsonaien egoera modu hurbilagoan bizitzea eragin zuen.

BALORAZIOA:

Emaitzak kasu batzuetan espero zirenak izan ez arren (gatazka oso azaletik kontatu zuten batzuek), balorazioa oso positiboa da batez ere lanaren helburu nagusia jatorrizko herrialdea uztera behartuta dauden pertsonen egoerara hurbiltzea zelako, eta zentzu horretan ikasleen hitzetan lana oso aberasgarria izan da beraientzat.

BALIABIDEAK:

Google site, google drive eta google maps. Informazioa lortzeko ikasleek hainbat webgune kontsultatu zituzten.

SORTUTAKO MATERIALA (Driveko karpeta, URLak …):

https://sites.google.com/a/koldomitxelena.net/gaur-egungo-munduaren-gatazkak/

2 Unitate Didaktikoaren edo jardueraren AZALPENA

GAIA: GERRA HOTZA

HELBURU OROKORRA:

Gerra Hotzeko gatazka nagusiak aztertzea.

DENBORALIZAZIOA (saio kopurua, banaketa …):

Gaiarekin lotutako teoria lantzen genuen bitartean ikasleek etxean dokumentazio fasea garatu zuten (informazio iturriak eta bestelako materialak biltzea).
Teoria bukatuta 8 saio eman zituzten gatazka aztertzen, idatzizko lana prestatzen eta gidoia idazten.
Ondoren grabaketa eta muntaia fasea egin zuten klase orduetatik kanpo (3 aste utzi nizkien egiteko, tartean Gabonetako oporrak).
Beste bi edo hiru saio erabili genituen dokumentalak ikusi eta beraiek ebaluazio txantiloia betetzeko.

DESKRIBAPENA (jarduerak, metodologia …):

Lehendabizi, google drive erabiliz talde bakoitzak ( 3 edo 4 kidetakoak) bere karpeta (“portafolioa”) sortu eta classroomaren bidez partekatu zuten. Karpeta horretan lanaren fase ezberdinetan sortu beharreko ekoizpenak bildu zituzten:

Lehen lana dokumentazio fasea izan zen. Drive dokumentu batean beraien lana egiteko erabilgarriak izan zitezkeen iturrien zerrenda egin zuten, iturriotarako estekak txertatuz (webguneak, irudiak, mapak, bideoak...).
Ondoren gatazka bera zertan zetzan azaldu eta horretan oinarrituz dokumentalaren gidoia idatzi behar izan zuten beste drive dokumentu baten.
Material guztia lortuta, grabazio eta muntaia faseari ekin zioten. Bideoa bukatutakoan, drive karpetara igo zuten.
Azkenik gatazka bakoitzaren bideoa google mapsen zegokion lekuan txertatu behar izan zuten.

Bideoak bukatu zituztenean, berauek ikusi eta ebaluatzeko momentua heldu zen. Horretarako txantiloi bat pasatu zitzaien ikasleei eta ebaluazioa 4 item desberdin kontuan hartuz burutu zuten: Edukia, euskarria, euskara eta originaltasuna. Ikaskideek aktore bezala egindako lana ere baloratu zuten.

Jarduera lehiaketa bezala planteatu zen ikasleen motibazioa bultzatzeko asmoz. Sari banaketa gala egin genuen eta honako sariak banatu ziren:

Ikuslearen saria (ikasleen ebaluazioan oinarritua)
Aktore onenaren saria (ikasleen bozketan oinarritua)
Epaimahaiaren saria (Historia mintegiko batxilergoko irakasleek aukeratua)

Saria Mikel Beorlegik egindako grabatua izan zen.

BALORAZIOA:

Esperientzia ezin hobea izan da, ikasleek egindako lanak benetan txalotzekoak eta beraien balorazioa ere oso positiboa izan da.

BALIABIDEAK:

Classroom, Drive (dokumentuak eta mapa), informazioa lortzeko hainbat webgune, bideo kamera eta mugikorrak eta bideoa editatzeko programak (camtasia, movie maker…)

SORTUTAKO MATERIALA (Driveko karpeta, URLak …):

Ikasleek sortutako bideoak biltzen dituen mapa:

https://www.google.com/maps/d/edit?mid=1GZrFRTiBjEv-VLkxdMwa7XkxdVk

Mikel Beorlegik egindako grabatua (saria):

Page updated

Report abuse