隋朝的時，隋文帝戰爭咧欲輸去，就向山跪拜，希望有人會當來鬥相共，這時三山國王現身幫助隋文帝拍敗敵人，隋文帝就共三山國王封做大將軍。

　　唐朝的時，唐太宗佇咧潮州拄著強盜，三座山將強盜擋落來、救駕有功，唐太宗就共三座山封做三山國王。

　　宋朝的時，幾若位皇帝佇潮州戰爭的時，三山國王攏有來鬥相共，in用神仙的姿態現身共敵人驚甲退兵、落大雨予敵人無路通行、佇皇帝予追殺的時陣救駕有功。皇帝下令共廟宇起閣較大、封in做三山國王、閣賜予in「救駕神靈」四个字。

　　三山國王佇臺灣的故事，和保庇鄉里、族群械鬥（hâi-tàu）相關的較濟。三山國王的傳說故事，攏是佇戰爭當中大展神威較濟，會當知影in是真勇敢、精通戰鬥的神明。

三山嘛有「桃園三結義」

　　三山國王的源起閣有另外一个傳說，當中閣將山變做人：有三个人結拜做兄弟，大兄連傑（Liân Kia̍t）、二兄趙軒（Tiō Hian）、小弟喬俊（Kiâu Tsùn），是隋文帝的開國大將軍，後來退休就去山頂修行，死去了後予封做國王。

　　因為三山國王的故事和三國的劉備、關羽、張飛有部分sio-siāng的所在，佇民間就出現模仿in三个人打造的「白面大王、紅面二王、烏面三王」三山國王的神像。甚至捌有三山國王廟佇咧客人搬走了後，去予改廟名、改拜劉備、關羽、張飛。

韓愈毋但趕走鱷魚爾爾

　　佇唐朝的時，韓愈捌予貶去潮州做官，佇潮州拄著連續幾若工攏做大水，就向當地三座山的山神祈求莫閣落雨，想袂到雨真正就無閣落矣，韓愈就攢牲禮共拜、寫文章呵咾三位山神，予三山國王的信仰通人知，有時會當看見三山國王廟內底閣有韓文公祠。

三山換三官