ගරු පීඨාධිපති තුමියගේ සුභාශිංසන
ඔක්තෝම්බර් පළමු වන දින ලෝකයේ සියලුම දෙනාගේ විශේෂ අවධානයට යොමු වන දිනයකි. ගුරු සිසුන් වන ඔබට ද මග පෙන්වන්නන් ලෙස අපට ද ඉතා වැදගත් වන්නේ ජාතියේ ජීවනාලිය බඳු වූ ලෝකයේ ළමයා වෙනුවෙන් වෙන් කරන ලද ළමයාගේ අයිතිවාසිකම් හා යුතුකම් පිළිබඳව ප්‍රත්‍යවේක්ෂණය කරමින් කටයුතු කරන දිනයක් වීම නිසයි.
ළමයා ළමයෙකි. කුඩා, වැඩිහිටියෙක් නොව ඔබ මෙවන් වූ අදහසක් සිතේ දරාගෙන නිතර පන්ති කාමරයට පිවිසිය යුතුය. එවන් පිවිසීමට පෙර දැක්මක් ලෙස වයඹ ජාතික අධ්‍යාපන විද්‍යාපීඨයේ ලෝක ළමා දිනය සැමරීමට ගත් උත්සහය පිළිබඳව මාගේ හෘදයාංගම සුභාශිංසනයන් ප්‍රථමයෙන්ම පුද කරමි.
විසි එක් වන සියවසේ ජීවත් වන පාසල් දරුවන් තුළ ගොඩනැගිය යුතු අනාගත සංවර්ධනය සඳහා තොරතුරු තාක්ෂණ නිපුණතා සංවර්ධනය කිරීම සඳහා ලෝක ළමා දිනයට සමගාමීව ඩිජිටල් සඟරාවක් එළි දැක්වීමට කටයුතු කිරීම ඉතා අගනේය. මෙම අතිමහත් කාර්යභාරය සියතට ගෙන කටයුතු කළ ලෝක ළමා දින සංවිධායක කමිටුවේ අනුශාසකවරුන් වන කථිකාචාර්ය නන්දන අල්ගෙවත්ත, කථිකාචාරිණී අනුෂා පියදර්ශනී සහ කථිකාචාරිණී ප්‍රසංගිකා සෝමසිරි යන අනුශාසකවරුන් ට මගේ හෘදයාංගම සුභ පැතුම් මෙයින් එක් කරමි. ඔබ විසින් ගන්නා ලද ප්‍රයත්නය ඉතාමත් අනභිභවනීය වන්නේ මෙම කාර්ය ඔබේ කාර්යයක් වීම නිසයි. සංවිධායක කමිටුවේ ආදරණීය ගුරු ශිෂ්‍යය ශිෂ්‍යාවනි ඔබට මාගේ සුභ පැතුම්. සහෝදරත්වයට ප්‍රතිමූර්තියක් බඳු වූ වයඹ පවුලේ කථිකාචාර්ය කැළ හා දරුවන් වන 2018/2020 කණ්ඩායමේ ඔබ සැම කුළුදුලේ නිමවන ලද මෙම විද්‍යුත් සඟරාවට ඉත සිතින් සුභ පතමි. අනාගතයේ දීත් මෙවැනි නවතම නිර්මාණ කාර්යයන්හී යෙදීමට අවශ්‍ය ශක්තිය ධෛර්යය ලැබේවායි පතමි.
රමණි අබේනායක
පීඨාධිපති
වයඹ ජාතික අධ්‍යාපන විද්‍යාපීඨය
බිංගිරිය
ගරු උප පීඨාධිපති තුමාගේ සුභාශිංසන.
“ලෝකයට විමුක්තිය හෝ සහනයක් ලැබේ නම් හුදෙක් ම දරුවා වෙතින් පමණි. කවර හෙයින්ද යත් දරුවා , මිනිසාගේ ද සමාජයේ ද නිර්මාපකයා වන බැවිනි.”
(මාරියා මොන්ටිසෝරි)
ලෝක ළමා දින සැමරුමට සමගාමීව වයඹ ජාතික අධ්‍යාපන විද්‍යාපීඨය මගින් එළි දක්වනු ලබන "විද්‍යුත් සගරාව” සදහා සුබපැතුම් පණිවිඩයක් ලබා දීම පිළිබද සතුටට පත් වෙමි. ළමයා යනු අමිල නිධානයකි. ඔවුන්ගේ වටිනාකම කිසිසේත් ලඝුකොට තැකිය නොහැකිය.
“සියල්ල ළමා යහපතට ම වෙන් කරමු. හොද දේ සියල්ල ළමයින්ට ම දෙමු.”
(වී.අයි. ලෙනින්)
2021 වර්ෂයේ වයඹ ජාතික අධ්‍යාපන විද්‍යපීඨයේ දෙවන වසර ශික්ෂණලාභී කණ්ඩායම විසින්, පවත්නා කොරෝනා වසංගතය නිසා ලෝක ළමා දින සැමරුමට සමගාමීව දුරස්ථව සිටිමින් විද්‍යුත් සගරාවක් නිර්මාණය කිරීමට ගත් උත්සාහය පළමුව අගය කරමි.
“ අපි, අපේ අද දවස කැප කිරීමෙන් ළමයින්ට, වඩා හොද හෙට දවසක් ලැබෙනු ඇත.” (අබ්දුල් කලාම්)
යනුවෙන් සදහන් කර ඇත්තේ වැඩිහිටියන් වන ඔබ, අප සැමගේ වගකීම එය බව පසක් කිරීමටය. සංකීර්ණ වූ සමාජය තුළ එකිනෙකා අභිබවා ඉස්මතු වීම සදහා අරගලයක යෙදෙමින් මිනිසත් බව පිළිබද වටිනාකම් ගිලිහෙමින් යන අවධියක අපගේ උතුම් සම්පත වන දරු පරපුර සුමගට යොමු කිරීමේ උදාර අරමුණින් මෙරට ගුරු අධ්‍යාපනය නංවා ලීම විද්‍යාපීඨවල මුඛ්‍ය පරමාර්ථය වේ. රටක අනාගතය දරුවන්ය. දේශයේ විශිෂ්ටතම අනාගතය පෝෂණය කිරීමට නම් දරුවාට ඔවුන්ට හිමි ළමා විය අත්දකින්ට අවස්ථාව දිය යුතුය. ළමාවියෙන් ආරම්භ වන ජීවිතය මහා පෞරුෂයක්, සමබර පෞරුෂයක් කරන්නට ඔවුන්ට අවැසි ශක්තිය වැඩිහිටියන් විසින් ම විශේෂයෙන් ගුරුවරුන් විසින් ම අවස්ථා සම්පාදනය කළ යුතු ය.
ජාතික අධ්‍යාපන විද්‍යාපීඨවල පූර්ව සේවා ගුරු අධ්‍යාපනය හදාරණ ඔබ වැනි ආරම්භක ගුරු පිරිස අනාගතයේ පාසල් පද්ධතිය තුළ දී, පන්ති කාමරය තුළ දී ළමයාට ළමයකු සේ සලකා කුඩා වැඩිහිටියකු ලෙස නොසිතා ළමයා තුළ පවතින විභව්‍යතා මැනවින් හදුනාගෙන ඒවා මතු කර ගැනීමට අවශ්‍ය අවස්ථා සම්පාදනය කළ යුතුව ඇත. ඒ සදහා අවශ්‍ය ප්‍රමාණවත් ශක්තිය ඔබතුළ ඇතැයි උදක් ම විශ්වාස කරමි. ඒ සදහා යොමු වන්න . කැප වන්න.
“ ශීත කාලය පැමිණේවි , තද ශීත කුණාටු හමාවි , හිම කැට සහිත නපුරු සුළි සුළං හමාවි එහෙත් , වසන්තය එනවා සත්තකයි.” (ගුරු ගීතය- චින්ගීස් අයිත්මාතව්)
මෙම විද්‍යුත් සගරාව නිර්මාණය කිරිමේ දී ඒ සදහා මගපෙන් වූ ,උපදෙස් ලබා දුන් සැමට සහ කාලය , ශ්‍රමය , මුදල් වැය කරමින් කටයුතු කළ සංවිධායක කමිටුවට ද මගේ ස්තුතිය ප්‍රකාශ කරමි.
ඩී.ඒ.ජී. දිසානායක.
උප පීඨාධිපති (පාලන හා මුදල්)
වයඹ ජාතික අධ්‍යාපන විද්‍යාපීඨය.
බිංගිරිය.
ගරු උප පීඨාධිපති තුමියගේ සුභාශිංසන
ලෝක ළමා දිනය නිමිති කර ගෙන වයඹ ජාතික අධ්‍යාපන විද්‍යාපීඨය මගින් පළමු වරට එළි දැක්ත්වවෙන විද්‍යුත් සඟරාව සඳහා සුබ පැතුම් එක් කිරීමට අවස්ථාව ලැබීම මම බෙහෙවින් අගය කොට සලකමි.
සත්ත්ව ලෝකයේ ජීවීන් හා සසඳන කළ මිනිසාට වඩාත් දිගු ළමාවියක් හිමි ව ඇත. මෙම දිගු ළමාවිය තුළ දී ඔහු / ඇය තමා ජීවත් වන ආසන්න පරිසරයෙන් මෙන්ම බාහිර පරිසරයෙන් ද තම ජීවිත පරිපූර්ණත්වයට ඇවැසි සියලු දේ ලබාගනී. එසේ නම් එම පරිසරය අතිශයින් සුන්දර වූ පීඩා දුක් කම්කටොලු වලින් තොර ක්ෂේම භූමියක් විය යුතුය. මෙවැනි පරිසරයක තුළ කුතුහලය හා ක්‍රියාශීලී වීමට ඇති කැමැත්ත යන සහජ කුසලතා වලින් පිරි දරුවා සියලු දේ කෙරෙහි විමසිලිමත්ව කටයුතු කෙරේ. එවන් පසුබිමක අත්දැකීම් උකහා ගන්නා ළමයා වර්තමානයේ පවතින තත්ත්වය හමුවේ ශක්තිමත් කිරීම කාලීන අවශ්‍යතාවක් බවට පත්ව ඇත.
සොඳුරු ලොව වෙත දරුවන් රැගෙන යාමේ කර්තව්‍යය දෙමාපිය ගුරු දෙපිරිස වෙතම පැවරී ඇති භාරදූර කාර්යයකි. එම නිසා සුන්දර ළමා කාලයක් දරුවන්ට උරුම කර දෙන්නේ කෙසේද යන්න පිළිබඳව අපගේ අවධානය යොමු විය යුතුය. මෙවර 2021 වර්ෂයේ ලෝක ළමා දින තේමාව වී ඇත්තේ සියල්ලට ම පෙර දරුවන් යන්නයි නමුත් වර්තමාන අධ්‍යාපන රටාව තුළ ළමයා දැනුම නැමති මහ සයුරේ පිහිනා යාමට උත්සාහ දරන බව පෙනේ. අධ්‍යාපනයෙන් බලාපොරොත්තු වෙන සහයෝගීත්වය, මෘදු බව, සංවේදී බව, නිර්මාණශීලිත්වය යන ගුණාංග හා හැකියා සංවර්ධනයට ලැබෙන ඉඩකඩ සීමිත බව පෙනේ. මෙවැනි හැකියා එළිදැක්වීමට අවස්ථා සැලසිය හැක්කේ මෙවැනි සුවිශේෂ වූ දිනයක දී හෝ ඔවුන්ගේ සැබෑ ලෝකය දෙසට දිශානුගත වීමෙනි.
මේ සඳහා වයඹ ජාතික අධ්‍යාපන විද්‍යාපීඨයේ ශික්ෂණලාභී ඔබ හා කථිකාචාර්ය මඩුල්ල ගෙන ඇති උත්සාහය ඉතා සාර්ථකයි.
සමාජ ජීවියෙක් වන ළමයා ද තවත් වසර කිහිපයකින් සමාජ වගකීම භාරගන්නා පුරවැසියන් බවට පත්වීම අනිවාර්යයෙන් ම සිදුවේ. චීන අගමැතිවරයෙකු වූ මා ඕ සේතුං පවසා ඇත්තේ ලෝකයේ උත්තම චරිතය දරුවා බවයි.
එම නිසා අප අද ඉතා සුන්දර හැඟීම් සහිතව මතකයට නංවන ළමා කාලය දැයේ ජීව නාලිය වන් දරුවන්ට අවුරුද්දට එක් දවසක් පමණක් ළමා දිනයක් ලෙස නොව අවුරුද්දේ සෑම දිනයක්ම ළමා දිනයක් කරන්නට ඔබට ශක්තිය ධෛර්යය ලැබේවායි කියා මම ප්‍රාර්ථනා කරමි.
ඩබ්. ඩී. දයාවතී
උප පීඨාධිපති (අධ්‍යයන හා ගුණාතමක තහවුරුව)
වයඹ ජාතික අධ්‍යාපන විද්‍යාපීඨය
බිංගිරිය
Message of the Vice-president
Sri Lanka celebrates Children's Day on 1st of October in each year. Children are the most precious possession in a country and loved by everyone. It is important to pay attention to the healthy growth and happiness of children.
“Children are like buds in a garden and should be carefully and lovingly nurtured, as they are the future of the nation and the citizens of tomorrow.”
Jawaharlal Nehru
Children’s day celebrations direct the people towards their knowledge on rights of children. The United Nations General Assembly approved the Convention on the Rights of the Child on 20th November, 1989 and it was agreed internationally to be implemented from 2nd September, 1990. It has been accepted that every child deserves health, education, nutrition and the best of everything.
Children’s day is celebrated to honour children and their rights. Schools and other institutions celebrate this day by organizing different programmes with a wide variety of interactive events for making children engaged and happy. I would like to encourage prospective teachers to contribute their service towards a child-friendly environment at school and in the society, and give every child the strength to face challenges in life. Also, every one of us has to grasp the message in The Rights of Children and develop empathy with less fortunate children.
I believe that the prospective teachers gained a vast knowledge and experience through organizing and implementing Children’s Day Celebrations. I appreciate the collective efforts made by the organizing committee, academic staff and prospective teachers of Wayamba National College of Education in making the launch of the e-magazine on Children’s Day a reality. I congratulate all your hard work and success!
M. K. Padmini de Silva
Vice-president (Continuing Teacher Education)
Wayamba National College of Education
Bingiriya
සංස්කාරක සටහන
සිතුසර සඟරාව, පතග කිරණ පරයන පර්යාප්තියට පසස්නා, පාටනී පුෂ්පයන්ගේ පවස නිවනු වස් රජස පහදක්සේ නිබඳව ලබමින්, බිහිදොර අභියසට පැමිණෙන්නේ, නවමු ප්‍රවේශයක් සැමට එක්කරමිනි.
අපට මෙම ප්‍රවේශයෙහි සන්තුෂ්ටියක් ම ඇත. එය අනෙකක් නිසා නොව, හුදෙක් ම වයඹ ජාතික අධ්‍යාපන විද්‍යාපීඨ ඉතිහාසයේ පූර්වාපර සන්ධි ගලපමින් කුළුඳුල්, මෙවැනි කිරි කැටියකු ජනිතවීම නිසාවෙනි.ඒ කිරි කැටියා නුදුරු දිනයක දී ප්‍රතාප වෘක්ෂයක්සේ අතු පතර විහිද වනු ඇත. එදාට අපි සැවොම ඉන්ද්‍රකීලයක්සේ ඒ දෙස බලා සිටින්නෙමු.
මේ බිළිදා, බිහිවීමේ දවස ලෝක ළමා දිනය වීම සුවිශේෂත්වයකි. ලොව උතුම්ම සම්පත දරුවාය. එය, එසේ නම්, අප ද සිතියර සරසි සරදන්නාසේ මෙම සංක්‍රාන්ති සමයේ, එය සංග්‍රාමයක් බවට පරිවර්තනය කර ගනිමින් සියොලඟ නොසිට හෝ සමාර්ථයන් සමර්ථනයට උත්සුක වීමු. එය සවිඳු අඳුර පලවා හරින්නාක්සේ, රන් හුයක් වූ බව අප දුටිමු. එය දෝර සිලියන සංසිද්ධියක් නොවන්නේ ද? ඉඳින් මේ වෑයම මතුවට ද සදැස එක්කොට සංයමයෙන් යුතුව ව්‍යභිචාර සංහරණය කොට, ගුරුවරුන් වීමට වෙර දරන මානවක මානවිකාවෝ සතතාභ්‍යාසයෙන්ම යුතුව තම සන්තානය තුළ රඳවාගනු ඇත යන්න අපගේ විශ්වාසයයි.
මේ ප්‍රවේශයේදී, දුරින් සහ ළඟින් සිටිමින් යන මඟෙහි කටු පඳුරු එළි පෙහෙළි කළ අය බොහෝමයකි. ඉතින් අවසරයි ආදරණීය රමණී අබේනායක ගරු පීඨාධිපති තුමියනි, ළෙංගතුකමේ ප්‍රතිමූර්තිය, එකට බැඳී හුයක් වන්නට වදන් වැලක් එක් කළාට. දුහුණන් දැනුම් වඩනා, දයාබර ඩබ්. ඩී. දයාවතී ගරු උප පීඨාධිපති තුමියට, මවකගේ සෙනෙහස යටි හිතේ දරාගෙන හී සැරයක් නොවී මතුපිට. දුන්න ඔවදන් සියල්ලට, අපේ කෘත ගුණ. සමබරව සිත්මින් හැම දෙය, සිනාවෙන් එක්කොට වදන් පෙළ, සෙනෙහසින් දුර කියාදෙන සෙනෙහෙබර, ගාමිණී දිසා දිසානායක උප පීඨාධිපති තුමන්ට තුති මල්. ළඟදී එක් වුවද අප වෙත නිජබිමක් කරගත්තාසේ තම වෙත, වයඹ පුදබිම, අපට දැණුනා ඔබේ සරතැස, පද්මිණි ද සිල්වා ගරු උප පීඨාධිපති තුමියන්ට අපේ ප්‍රණාමය.
අවසන් කරන්නට මත්තෙන් වදන් පෙළ, තවත් අය බොහෝ සිටිති. ඒ අතර තම ශ්‍රමය, කාලය, ධනය කැප කොට තම කාර්යයක් සේ සිතා මේ කාර්යට උදව් උපකාර කළ, කථිකාචාර්ය මණ්ඩලයේ සැමට සහෝදරාත්මක ප්‍රණාමය. මේ ප්‍රවේශය හැඩ වැඩ කරන්න ශාස්ත්‍රීය ලිපි සැපයූ කථිකාචාර්ය මහත්ම, මහත්මීන් සැමට අභිප්‍රශංසාව. 2021 ලෝක ළමා දින සැමරුම සංවිධානයට දහඩිය වගුරවා දරදිය ඇදි ප්‍රධාන සංවිධායක දෙපළ හා හිසමත බර පටවාගත් අනෙකුත් සැමටත් නිර්මාපී බව මුවහත් කරමින් විවිධ නිර්මාණ සැපයූ සැමටත්, ඔබේ අනාගත ගුරු වෘත්තීය කුසලතා සංවර්ධනයට සුබ පතන්නෙමු. එසේම සෑම පුද්ගලයෙකු තුළම ප්‍රතිභා ශක්තිය ඇත, යන්න අපේ විශ්වාසයයි. එය මුවහත් කිරීම දැනුම් තේරුම් ඇත්තන් ගේ වගකීම වේ. මැණිකක් වුව ද දුර්ලභ හෙයින් වටිනාකම වැඩි වන අතර, එය මතුපිටට ගෙන ඔපමට්ටම් කළ කල්හි දීප්තිය පෙරට වඩා වැඩි වෙනු ඇත. අපේ ප්‍රයත්නය ඔපමට්ටම් නොකළ මැණික ඔපමට්ටම් කිරීමක් වැන්න. මෙය ඔබට, ඔවදනක්සේ ගනිමින්, අනාගත දරු පරපුර සියලු ශක්තීන්ගෙන් ඔප් නංවනු ඇතැයි, අපි අපේක්ෂා කරන්නෙමු. ඒ සඳහා ඔබ පියමනින මාවත රජස් කටුකොහොල් හැර රතු පලසක් මත රෝස මල් ඇතුරූ සොඳුරු මාවතක් ම වේවා.
සංස්කාරක කමිටුව,
කථිකාචාර්ය නන්දන අල්ගෙවත්ත
කථිකාචාරිණි අනූෂා ප්‍රියදර්ශනී
කථිකාචාරිණි ප්‍රසංගිකා සෝමසිරි
