Mawrbo

ܡܰܘܪ̈ܒ݂ܶܐ ܓ݂ܰܘܳܢܳܝ̈ܳܬ݂ܳܐ

ܛܶܟ݁ܣܳܐ ܩܰܕ݂ܡܳܝܳܐ

(ܐ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܫܠܳܡ ܠܶܟ݂ܝ̱ ܩܰܕ݁ܺܝ̣ܫܬ݁ܳܐ. ܒ݂ܬ݂ܽܘ̣ܠܬ݁ܳܐ ܝ݀ܳܠܕ݁ܰܬ݂ ܐܰܠܳܗܳܐ. ܐܶܡܳܐ ܡܰܠܝܰܬ݂ ܒ݁ܽܘ̣ܪ̈ܟ݁ܳܬ݂ܳܐ. ܕ݁ܡܶܢܶܟ݂ܝ̱ ܓ݁ܶܝܪ ܨܒ݂ܳܐ ܘܶܐܬ݂ܒ݁ܰܣܰܪ ܡܶܠܬ݂ܳܐ ܡܬ݂ܽܘ̇ܡܳܝܶܗ ܕ݁ܰܐܒ݂ܳܐ. ܕ݁ܠܶܗ ܗ̱ܽܘ ܡܫ̇ܰܒ݁ܚܺܝ̣ܢܰܢ ܘܠܶܟ݂ܝ̱ ܕ݁ܶܝܢ ܐܶܡܳܐ ܕ݂ܟ݂ܺܝ̣ܬ݂ܳܐ ܡ̇ܰܘܪܒ݂ܺܝ̣ܢܰܢ ܀

ܠܡܽܘ̣ܫܶܐ ܡܰܢ ܐܶܬ݂ܚ̣ܰܘܺܝ̣ܬ݁ܝ̱. ܒ݁ܣܰܢܝܳܐ ܕ݂ܕ݂ܳܠܶܩ ܘܠܳܐ ܝ݀ܳܩܶܕ݂. ܒ݁ܬ݂ܽܘ̣ܠܬ݁ܳܐ ܕ݂ܟ݂ܺܝ̣ܬ݂ܳܐ ܘܩܰܕ݁ܺܝ̣ܫܬ݁ܳܐ. ܘܰܠܝܰܥܩܽܘ̇ܒ݂ ܒ݁ܣܶܒ݁ܶܠܬ݂ܳܐ ܘܚܰܙܩܺܝܶܐܠ ܒ݁ܬ݂ܰܪܥܳܐ ܕ݂ܰܐܚܺܝ̣ܕ݂. ܕ݁ܒ݂ܶܗ ܥ̣ܰܠ ܡܳܪܶܐ ܟ݂݀ܽܠ ܠܰܡܫܰܘܙܳܒ݂ܽܘ ܠܥܰܡ̱ܡ̈ܶܐ ܡܶܢ ܛܽܘ̣ܥܝܰܝ ܀

ܕ݁ܩܰܕ݁̈ܺܝ̣ܫܶܐ: ܐܳܘ ܣܳܗܕ݁̈ܶܐ ܩܰܕ݁̈ܺܝ̣ܫܶܐ. ܕܣܰܝܒ݁ܰܪܘ̱ ܫܶܢܕ݁̈ܶܐ ܘܽܐܘ̣ܠ̈ܨܳܢܶܐ. ܡܶܢ ܕ݁̈ܰܝܳܢܶܐ ܥ̈ܰܘܳܠܶܐ. ܗܳܐ ܢܛܺܝ̣ܪ ܗ̱ܽܘ ܦ݂ܽܘ̣ܪܥܳܢܟ݂ܽܘ̇ܢ. ܒ݁ܰܓ݂ܢܽܘ̇ܢ ܢܽܘ̣ܗܪܳܐ ܕ݂ܠܳܐ ܡܶܫܬ݁ܪܶܐ. ܨܠܽܘ̇ܬ݂ܟ݂ܽܘ̇ܢ ܬ݁ܶܗܘܶܐ ܠܰܢ ܫܽܘ̣ܪܳܐ ܪܳܡܳܐ ܘܒ݂ܶܝܬ݂ ܓ݁ܰܘܣܳܐ ܀

ܕ݁ܥܰܢܺܝ̣ܕ݂̈ܶܐ: ܡܺܝ̣̈ܬ݂ܶܐ ܕ݂ܰܥܬ݂ܶܩܘ̱ ܘܰܒ݂ܠܺܝܽܘ. ܒ݁ܚ̈ܶܙܶܐ ܥܰܡܺܝ̣̈ܩܶܐ ܕ݂ܰܫܝܽܘ̇ܠ. ܘܰܗܘ̣ܰܘ ܥܰܦ݂ܪܳܐ ܕ݂ܰܚܺܝ̣ܚܳܐ. ܢܰܚܶܡ ܘܰܐܚܺܝ̣ ܡܳܪܰܢ ܟ݁ܰܕ݂ ܩܳܡ̣ ܒ݁ܝܰܘܡܳܐ ܬ݂ܠܺܝ̣ܬ݂ܳܝܳܐ. ܕ݁ܠܶܗ ܗ̱ܽܘ ܡܫ̇ܰܒ݁ܚܺܝ̣ܢܰܢ ܘܰܠܡܶܐܬ݂ܺܝܬ݂ܶܗ ܕ݁ܬ݂ܰܪܬ݁ܶܝܢ ܡܣ̇ܰܟ݁ܶܝܢܰܢ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܢ̇ܰܣܶܩ ܠܰܐܒ݂ܳܐ. ܘܬ݂ܰܘܕ݁ܺܝܬ݂ܳܐ ܠܰܒ݂ܪܳܐ ܕ݂ܡܶܢܶܗ. ܘܰܠܪܽܘ̣ܚ ܩܽܘ̣ܕ݂ܫܳܐ ܗܽܘ̣ܠܳـܠܳܐ. ܐ̱ܪܳܙܳܐ ܕ݂ܰܬ݂ܠܺܝ̣ܬ݂ܳܝܽܘ̣ܬ݂ܳܐ ܚܰܕ݂ ܐܰܠܳܗܳܐ ܫܰܪܺܝ̣ܪܳܐ. ܕ݁ܠܶܗ ܗ̱ܽܘ ܡܫ̇ܰܒ݁ܚܺܝ̣ܢܰܢ ܘܒ݂ܰܙܡܺܝ̣ܪ̈ܳܬ݂ܳܐ ܕ݂ܪܽܘ̣ܚܳܐ ܡ̇ܰܘܪܒ݂ܺܝ̣ܢܰܢ ܀

(ܒ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܠܶܟ݂ܝ̱ ܕ݁ܺܐܝ̣ܬ݂ܰܝܟ݁ܝ̱ ܫܽܘ̣ܒ݂ܗܳܪܳܐ ܕ݂ܟ݂݀ܽܠܳܗ̇ ܬ݁ܺܒ݂ܶܝܠ. ܝ݀ܳܠܕ݁ܰܬ݂ ܐܰܠܳܗܳܐ. ܕ݁ܡܶܢܶܟ݂ܝ̱ ܓ݁ܶܝܪ ܨܒ݂ܳܐ ܘܶܐܬ݂ܒ݁ܰܣܰܪ ܐܰܠܳܗܳܐ ܡܶܠܬ݂ܳܐ. ܒ݁ܬ݂ܽܘ̣ܠܬ݁ܳܐ ܕ݂ܰܒ݂ܟ݂݀ܽܠ ܩܰܕ݁ܺܝ̣ܫܰܬ݁ܝ̱. ܒ݁ܬ݂ܶܫܒ݁ܚ̈ܳܬ݂ܳܐ ܡ̇ܰܘܪܒ݂ܺܝ̣ܢܰܢ ܀

ܠܶܟ݂ܝ̱ ܬ݁ܰܪܥܳܐ ܐܰܚܺܝ̣ܕ݂ܳܐ ܗܰܘ ܕ݁ܰܚ̣ܙܳܐ ܗ̱ܘܳܐ ܢܒ݂ܺܝܳܐ ܚܰܙܩܺܝܶܐܠ. ܕ݁ܐ̱ܢܳܫ ܡܶܡܬ݂ܽܘ̇ܡ ܠܳܐ ܥ̣ܰܠ ܗ̱ܘܳܐ ܒ݂ܶܗ. ܐܶܠܳܐ ܐܰܠܳܗܳܐ ܡܶܠܬ݂ܳܐ. ܒ݁ܬ݂ܽܘ̣ܠܬ݁ܳܐ ܕ݂ܰܒ݂ܟ݂݀ܽܠ ܩܰܕ݁ܺܝ̣ܫܰܬ݁ܝ̱. ܒ݁ܬ݂ܶܫܒ݁ܚ̈ܳܬ݂ܳܐ ܡ̇ܰܘܪܒ݂ܺܝ̣ܢܰܢ ܀

ܕ݁ܩܰܕ݁̈ܺܝ̣ܫܶܐ: ܠܳܟ݂ ܕ݁ܶܐܫܬ݁ܰܘܕ݁ܺܝ̣ܬ݁ ܘܶܐܡ̣ܰܪܬ݁ ܕ݁ܰܐܝܟ݁ܳܐ ܕ݂ܺܐܝ̣ܬ݂ܰܝ. ܢ̣ܶܗܘܽܘ̇ܢ ܡܫܰܡ̈ܫܳܢܰܝ. ܫܰܡ̣ܥܽܘ̣ܟ݂ ܣܳܗܕ݁̈ܶܐ ܘܰܢܩ̣ܶܦ݂ܘ̱ ܠܳܟ݂. ܘܰܠܚܰܝ̈ܶܐ ܕ݂ܙܰܒ݂ܢܳܐ ܐܰܣܠܺܝ̣ܽܘ. ܕ݁ܚܰܝ̈ܶܐ ܕ݂ܰܠܥ݀ܳܠܰܡ ܢ̣ܺܐܪܬ݁ܽܘ̣ܢ. ܒ݁ܬ݂ܶܫܒ݁ܚ̈ܳܬ݂ܳܐ ܡܩ̇ܰܠܣܺܝ̣ܢܰܢ ܀

ܕ݁ܥܰܢܺܝ̣ܕ݂̈ܶܐ: ܥܒ݂ܶܕ݂ ܡܳܪܰܢ ܒ݁ܰܚܢܳܢܳܟ݂ ܣܰܒ݂ܪܳܐ ܛܳܒ݂ܳܐ. ܠܟ݂݀ܽܠܗܽܘ̇ܢ ܥܰܢܺܝ̣ܕ݂̈ܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ. ܘܶܐܫܬ݁ܺܝܽܘ ܠܰܕ݂ܡܳܟ݂ ܡܚܰܣܝܳܢܳܐ. ܘܰܢ̣ܩܽܘ̣ܡܽܘ̣ܢ ܡܶܢ ܝܰܡܺܝ̣ܢܳܟ݂. ܒ݁ܝܰܘܡܳܐ ܕ݂ܕ݂ܳܢܚܳܐ ܪܰܒ݁ܽܘ̣ܬ݂ܳܟ݂ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܢ̇ܰܣܶܩ ܠܰܐܒ݂ܳܐ. ܘܢ̇ܶܣܓ݁ܽܘ̇ܕ݂ ܠܰܒ݂ܪܳܐ ܘܢ̇ܰܘܕ݁ܶܐ ܠܪܽܘ̣ܚ ܩܽܘ̣ܕ݂ܫܳܐ. ܬ݁ܠܳܬ݂ܳܐ ܩܢܽܘ̇ܡ̈ܶܐ ܩܰܕ݁̈ܺܝ̣ܫܶܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ. ܠܶܗ ܫܽܘ̣ܒ݂ܚܳܐ ܘܰܥܠܰܝܢ ܪ̈ܰܚܡܰܘܗ̱ܝ. ܒ݁ܟ݂݀ܽܠܥܶܕ݁ܳܢ ܐܰܡܺܝܢ ܘܰܐܡܺܝܢ ܀

(ܓ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܛܽܘ̣ܒ݂ܰܝܟ݁ܝ̱ ܡܰܪܝܰܡ ܒ݁ܰܪ̱ܬ݂ ܕ݁ܰܘܺܝܕ݂. ܕ݁ܰܫܘܰܝܬ݁ܝ̱ ܕ݁ܬ݂ܶܗܘܶܝܢ. ܐܶܡܳܐ ܠܰܐܠܳܗܳܐ ܘܶܐܬ݂ܓ݁ܰܫܰܡ ܡܶܢܶܟ݂ܝ̱. ܕ݁ܢ̣ܶܦ݂ܪܽܘ̇ܩ ܠܳܐܕ݂ܳܡ ܘܰܠܝܰܠܕ݁̈ܰܘܗ̱ܝ ܘܰܢ̣ܚܰܪܰܪ ܟ݀݁ܽܠ ܀

ܛܽܘ̣ܒ݂ܰܝܟ݁ܝ̱ ܐܶܡܶܗ ܕ݁ܰܐܠܳܗܳܐ. ܕ݁ܰܒ݂ܥܰܕ݂ܥܺܐܕ݂ܶܟ݂ܝ̱. ܗܳܐ ܚ݀ܳܕ݂ܝܳܐ ܥܺܕ̱݁ܬ݁ܳܐ ܥܰܡ ܟ݀݁ܽܠܗܽܘ̇ܢ ܝܰܠܕ݁̈ܶܝܗ̇. ܘܙ݀ܳܡܪܳܐ ܫܽܘ̣ܒ݂ܚܳܐ ܘܬ݂ܰܘܕ݁ܺܝ̣ܬ݂ܳܐ ܠܡܳܪܝܳܐ ܕ݂ܰܐܘܪܒ݂ܶܟ݂ܝ̱ ܀

ܕ݁ܩܰܕ݁̈ܺܝ̣ܫܶܐ: ܢܒ݂ܺܝ̈ܶܐ ܘܫܠܺܝ̣ܚ̈ܶܐ ܘܣܳܗܕ݁̈ܶܐ. ܘܟ݂ܺܐܢ̈ܶܐ ܘܟ݂ܳܗ̈ܢܶܐ. ܘܟ݂݀ܽܠܗܽܘ̇ܢ ܠܶܘ̈ܳܝܶܐ ܐܰܦ݁ܺܝ̣ܣܘ̱ ܠܰܡܫܺܝ̣ܚܳܐ. ܕ݁ܢ̣ܶܥܒ݁ܶܕ݂ ܪ̈ܰܚܡܶܐ ܥܰܠ ܟ݀݁ܽܠܰܢ ܒ݁ܰܨܠܰܘ̈ܳܬ݂ܟ݂ܽܘ̇ܢ ܀

ܕ݁ܥܰܢܺܝ̣ܕ݂̈ܶܐ: ܡܫܺܝ̣ܚܳܐ ܡܰܠܟ݁ܳܐ ܕ݂ܬ݂ܶܫܒ݁ܽܘ̇ܚܬ݁ܳܐ. ܥܒ݂ܶܕ݂ ܒ݁ܰܚܢܳܢܳܟ݂. ܢܝ݀ܳܚܳܐ ܘܕ݂ܽܘ̣ܟ݂ܪܳܢܳܐ ܛ݀ܳܒ݂ܳܐ ܠܥܰܢܺܝ̣ܕ݂̈ܶܐ ܡܗܰܝܡ̈ܢܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ. ܘܶܐܫܬ݁ܺܝܽܘ ܠܰܕ݂ܡܳܟ݂ ܘܰܫܟ݂ܶܒ݂ܘ̱ ܥܰܠ ܣܰܒ݂ܪܳܟ݂ ܀

ܫܘܒ ܘ ܡܢ: ܡܳܪܰܢ ܡܳܪܳܐ ܕ݂ܡܰܠܰܐܟ݂̈ܶܐ. ܫܡܰܥ ܒ݁ܳ݀ܥܽܘ̣ܬ݂ܰܢ. ܘܩܰܒ݁ܶܠ ܬ݁ܶܫܡܶܫܬ݁ܰܢ ܘܶܐܬ݂ܪܰܚܰܡ ܥܠܰܝܢ. ܒ݁ܝܰܕ݂ ܨܠܽܘ̇ܬ݂ ܐܶܡܳܐ ܕ݂ܺܝܠ̣ܶܕ݂ܬ݂ܳܟ݂ ܘܰܕ݂ܩܰܕ݁̈ܺܝ̣ܫܰܝܟ݁ ܀

ܛܶܟ݁ܣܳܐ ܬ݂ܪܰܝܳܢܳܐ

(ܐ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܕ݁ܟ݂ܺܝ̣ܬ݂ܳܐ ܘܰܡܫܰܒ݁ܰܚܬ݁ܳܐ. ܘܡܰܠܝܰܬ݂ ܫܽܘ̣ܦ݂ܪ̈ܶܐ ܐܶܡܶܗ ܕ݁ܢܽܘ̣ܗܪܳܐ. ܠܶܟ݂ܝ̱ ܒ݁ܰܠܚܽܘ̇ܕ݂ܰܝܟ݁ܝ̱ ܝ݀ܳܕ݂ܥܺܝ̣ܢܰܢ. ܒ݂ܬ݂ܽܘ̣ܠܬ݁ܳܐ ܝܳ݀ܠܕ݁ܰܬ݂ ܐܰܠܳܗܳܐ ܟ݂݀ܽܠܰܢ ܡܰܘܪܒ݂ܺܝܢܰܢ ܀

ܡܰܪܝܰܡ ܕ݁ܰܗܘܳܬ݂݀ ܐܶܡܳܐ. ܠܡܳܪܶܐ ܡܰܠܟ݁̈ܶܐ ܡܶܛܽܠ ܫܽܘ̣ܦ݂ܪܳܗ̇. ܒ݁ܥܳܝ ܘܶܐܬ݂ܟ݁ܰܫܰܦ݂ܝ̱ ܠܰܡܫܺܝ̣ܚܳܐ. ܕ݁ܢ̣ܶܥܒ݁ܶܕ݂ ܪ̈ܰܚܡܶܐ ܥܰܠ ܟ݀݁ܽܠܰܢ ܒ݁ܰܨܠܰܘ̈ܳܬ݂ܶܟ݂ܝ̱ ܀

ܕ݁ܩܰܕ݁̈ܺܝ̣ܫܶܐ: ܣܳܗܕ݁̈ܶܐ ܕ݂ܰܗܘܰܘ ܕ݁ܶܒ݂ܚ̈ܶܐ. ܠܡܳܪܶܐ ܟ݂ܽܘ̣ܡܪ̈ܶܐ ܡܶܛܽܠ ܚܽܘ̣ܒ݁ܶܗ. ܒ݁ܥܰܘ ܘܶܐܬ݂ܟ݁ܰܫܰܦ݂ܘ̱ ܠܰܡܫܺܝ̣ܚܳܐ. ܕ݁ܢ̣ܶܥܒ݁ܶܕ݂ ܪ̈ܰܚܡܶܐ ܥܰܠ ܟ݀݁ܽܠܰܢ ܒ݁ܰܨܠܰܘ̈ܳܬ݂ܟ݂ܽܘ̇ܢ ܀

ܕ݁ܥܰܢܺܝ̣ܕ݂̈ܶܐ. ܥܰܠ ܦ݁ܳܬ݂ܽܘ̇ܪ ܡܰܠܟ݁ܽܘ̣ܬ݂ܳܐ. ܒ݁ܓ݂ܽܘ̣ܕ݁ܳܐ ܕ݂ܟ݂ܺܐܢ̈ܶܐ ܘܰܕ݂ܙܰܕ݁̈ܺܝ̣ܩܶܐ. ܐܰܫܪܳܐ ܘܰܐܢܺܝ̣ܚ ܡܳܪܶܐ ܟ݂݀ܽܠ. ܢܰܦ݂ܫ̈ܳܬ݂ܳܐ ܕ݂ܥܰܒ݂ܕ݁̈ܰܝܟ݁ ܕ݁ܰܫܟ݂ܶܒ݂ܘ̱ ܥܰܠ ܣܰܒ݂ܪܳܟ݂ ܀

ܫܘܒ ܘ ܡܢ: ܠܚܰܝܠܳܐ ܫܘܶܐ ܒ݂ܽܐܘ̣ܣܺܝܰܐ. ܕ݁ܬ݂ܠܳܬ݂ܳܐ ܩܢܽܘ̇ܡ̈ܶܐ ܩܰܕ݁̈ܺܝ̣ܫܶܐ. ܐܰܒ݂ܳܐ ܘܰܒ݂ܪܳܐ ܘܪܽܘ̣ܚ ܩܽܘ̣ܕ݂ܫܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ ܕ݂ܠܶܗ ܗ̱ܽܘ ܡܫ̇ܰܒ݁ܚܺܝ̣ܢܰܢ܀

(ܒ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܠܥܶܠ ܒ݁ܰܫܡܰܝܳܐ. ܒ݂ܬ݂ܶܗܪܳܐ ܡܶܬ݂ܝܰܩܪܳܐ. ܘܗܳܪܟ݁ܳܐ ܒ݂ܥܺܕ̱݁ܬ݁ܳܐ. ܕ݂ܠܳܐ ܫܶܠܝܳܐ ܡܶܬ݂ܩܰܠܣܳܐ. ܫܠܳܡ ܠܶܟ݂ܝ̱ ܐܶܡܳܐ ܠܳܐ ܡܙܰܘܰܓ݂ܬ݁ܳܐ ܀

ܠܥܶܠ ܒ݁ܰܫܡܰܝܳܐ. ܥܺܝ̣ܪ̈ܶܐ ܡܫ̇ܰܡܫܺܝܢ ܠܶܗ. ܘܰܠܬ݂ܰܚܬ݁ ܒ݁ܰܐܪܥܳܐ. ܐ̱ܢܳܫ̈ܳܐ ܣ݀ܳܓ݂ܕ݁ܺܝܢ ܠܶܗ. ܕ݁ܶܐܬ݂ܓ݁ܰܫܰܡ ܡܶܢ ܒ݁ܰܪ̱ܬ݂ ܕ݁ܰܘܺܝܕ݂. ܕ݁ܢ̣ܶܦ݂ܪܽܘ̇ܩ ܠܳܐܕ݂ܳܡ ܘܰܠܝܰܠܕ݁̈ܰܘܗ̱ܝ܀

ܕ݁ܩܰܕ݁̈ܺܝ̣ܫܶܐ: ܠܥܶܠ ܒ݁ܰܫܡܰܝܳܐ. ܟ݁ܠܺܝ̣̈ܠܶܐ ܡܶܬ݂ܓ݁ܰܕ݂ܠܺܝ̣ܢ. ܠܣܳܗܕ݁̈ܶܐ ܒ݂ܪ̈ܺܝ̣ܟ݂ܶܐ ܕ݂ܰܢܨܰܚܘ̱ ܘܶܐܬ݂ܟ݁ܰܠܰܠܘ̱. ܘܗܳܐ ܢܳܨܚܺܝ̣ܢ ܕ݁ܽܘ̣ܟ݂ܪ̈ܳܢܰܝܗܽܘ̇ܢ. ܨܠܽܘ̇ܬ݂ܗܽܘ̇ܢ ܫܽܘ̣ܪܳܐ ܬ݂ܶܗܘܶܐ ܠܰܢ ܀

ܕ݁ܥܰܢܺܝ̣ܕ݂̈ܶܐ: ܠܥܶܠ ܒ݁ܰܫܡܰܝܳܐ. ܘܥܰܠ ܡܰܕ݂ܒ݁ܰܚ ܩܽܘ̣ܕ݂ܫܳܐ. ܢܗܶܐ ܕ݂ܽܘ̣ܟ݂ܪܳܢܳܐ ܠܥܰܢܺܝ̣ܕ݂̈ܶܐ ܡܗܰܝܡ̈ܢܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ ܘܶܐܫܬ݁ܺܝܽܘ ܠܰܕ݂ܡܳܟ݂. ܘܰܫܟ݂ܶܒ݂ܘ̱ ܥܰܠ ܣܰܒ݂ܪܳܟ݂ ܀

ܫܘܒ ܘ ܡܢ: ܠܥܶܠ ܐܰܢ̱ܬ݁ ܘܰܠܬ݂ܰܚܬ݁. ܒ݁ܰܫܡܰܝܳܐ ܘܒ݂ܰܐܪܥܳܐ. ܣ݀ܳܗܶܕ݂ ܝܰܘܢܳܢ. ܕ݁ܰܒ݂ܝܰܡܳܐ ܚܒ݂ܰܫ̣ܬ݁ܳܝܗ̱ܝ. ܡܳܪܳܐ ܕ݂ܝܰܡ̱̈ܡܶܐ ܘܢܰܗܪ̈ܰܘܳܬ݂ܳܐ. ܐܰܢ̱ܬ݁ ܕ݁ܰܠܺܝ̣ܬ݁ܳܝܗ̱ܝ܀

(ܓ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܒ݁ܕ݂ܽܘ̣ܟ݂ܪܳܢܳܗ̇ ܕ݁ܶܐܡܳܐ ܡܒ݂ܰܪܰܟ݂ܬ݁ܳܐ. ܚܳܕ݂̈ܝܳܢ ܟ݀݁ܽܠܗܶܝܢ ܒ݁ܶܪ̈ܝܳܬ݂ܳܐ ܘܙ݀ܳܡܪ̈ܳܢ ܫܽܘ̣ܒ݂ܚܳܐ. ܠܰܡܫܺܝ̣ܚܳܐ ܕ݂ܰܕ݂ܢ̣ܰܚ ܡܶܢܳܗ̇ ܘܪܰܡ̣ܪܶܡ ܘܰܐܘܪܶܒ݂ ܕ݁ܽܘ̣ܟ݂ܪܳܢܳܗ̇. ܕ݁ܠܶܗ ܫܰܒ݁ܰܚܘ̱ ܥܒ݂ܳܕ݂̈ܰܘܗ̱ܝ ܘܟ݂݀ܽܠܗܶܝܢ ܒ݁ܶܪ̈ܝܳܬ݂ܶܗ. ܕ݁ܝܰܬ݁ܺܝ̣ܪ ܢ̇ܪܰܡܪܶܡ ܘܢ̇ܰܘܕ݁ܶܐ ܠܰܫܡܶܗ ܩܰܕ݁ܺܝ̣ܫܳܐ ܠܥ݀ܳܠܡܺܝ̣ܢ ܀

ܕ݁ܩܰܕ݁̈ܺܝ̣ܫܶܐ: ܠܰܐܠܳܗܳܐ ܕܒ݂ܰܐܬ݁ܽܘ̇ܢܳܐ ܕ݂ܢܽܘ̣ܪܳܐ. ܥܰܡ ܛܠܳܝ̈ܶܐ ܒ݂ܢ̈ܰܝ ܥܶܒ݂ܪ̈ܳܝܶܐ ܐܰܟ݂ܚܕ݂ܳܐ ܢܚ̣ܶܬ݂ ܗ̱ܘܳܐ ܘܩ̣ܳܡ. ܘܰܠܫܰܠܗܶܒ݂ܺܝܬ݂ܳܐ ܕ݂ܝ݀ܳܩܕ݁ܳܐ ܠܛܰـܠܳܐ ܗܰܢܺܝܳܐܐ ܫܰܚܠ̣ܶܦ݂. ܕ݁ܠܶܗ ܫܰܒ݁ܰܚܘ̱ ܥܒ݂ܳܕ݂̈ܰܘܗ̱ܝ ܘܟ݂݀ܽܠܗܶܝܢ ܒ݁ܶܪ̈ܝܳܬ݂ܶܗ. ܕ݁ܝܰܬ݁ܺܝ̣ܪ ܢ̇ܪܰܡܪܶܡ ܘܢ̇ܰܘܕ݁ܶܐ ܠܰܫܡܶܗ ܩܰܕ݁ܺܝ̣ܫܳܐ ܠܥܳ݀ܠܡܺܝ̣ܢ ܀

ܕ݁ܚܰܕ݂ ܩܢܽܘ̇ܡܳܐ: ܠܰܐܠܳܗܳܐ ܕ݂ܚ̣ܰܝܠܶܗ ܒ݁ܰܐܓ݂ܽܘ̇ܢܳܐ. ܠܢܰܨܺܝ̣ܚܳܐ ܡܳܪܝ ܩܽܘ̇ܪܝܰܩܳܘ̇ܣ ܘܰܙܟ݂ܳܐ ܘܰܢ̣ܨܰܚ. ܘܰܐܥܕ݁ܺܝ̣ ܟ݂ܠܺܝ̣ܠܳܐ ܕ݂ܙܳܟ݂ܽܘ̣ܬ݂ܳܐ ܒ݂ܝܰܕ݂ ܚܰܝܠܳܐ ܐܰܠܳܗܳܝܳܐ. ܕ݁ܠܶܗ ܫܰܒ݁ܰܚܘ̱ ܥܒ݂ܳܕ݂̈ܰܘܗ̱ܝ ܘܟ݂݀ܽܠܗܶܝܢ ܒ݁ܶܪ̈ܝܳܬ݂ܶܗ. ܕ݁ܝܰܬ݁ܺܝ̣ܪ ܢ̇ܪܰܡܪܶܡ ܘܢ̇ܰܘܕ݁ܶܐ ܠܰܫܡܶܗ ܩܰܕ݁ܺܝ̣ܫܳܐ ܠܥܳ݀ܠܡܺܝ̣ܢ ܀

ܕ݁ܥܰܢܺܝ̣ܕ݂̈ܶܐ: ܠܰܐܠܳܗܳܐ ܕ݂ܰܒ݂ܝܰܕ݂ ܚܰܙܩܺܝܶܐܠ. ܗܰܘ ܬ݁ܡܺܝ̣ܗ ܒ݁ܓ݂ܶܠܝ̈ܳܢܶܐ ܕ݂ܪܽܘ̣ܚܳܐ ܩ̣̈ܰܕ݁ܶܡ ܒ݁ܰܕ݁ܶܩ. ܥܰܠ ܩܝܳܡܬ݁ܳܐ ܓ݂ܰܘܳܢܳܝܬ݁ܳܐ ܘܢܽܘ̣ܚܳܡܳܐ ܘܚܰܝܰܬ݂ ܡܺܝ̣̈ܬ݂ܶܐ. ܕ݁ܠܶܗ ܫܰܒ݁ܰܚܘ̱ ܥܒ݂ܳܕ݂̈ܰܘܗ̱ܝ ܘܟ݂݀ܽܠܗܶܝܢ ܒ݁ܶܪ̈ܝܳܬ݂ܶܗ. ܕ݁ܝܰܬ݁ܺܝ̣ܪ ܢ̇ܪܰܡܪܶܡ ܘܢ̇ܰܘܕ݁ܶܐ ܠܰܫܡܶܗ ܩܰܕ݁ܺܝ̣ܫܳܐ ܠܥܳ݀ܠܡܺܝ̣ܢ ܀

ܫܘܒ ܘ ܡܢ: ܠܰܐܠܳܗܳܐ ܡܳܪܳܐ ܕ݂ܟ݂݀ܽܠ ܒ݁ܶܪ̈ܝܳܢ. ܕ݁ܡܽܘ̣ܬ݂ܳܐ ܕ݂ܥܰܒ݂ܕ݁ܳܐ ܢܣ̣ܰܒ݂ ܗ̱ܘܳܐ ܠܶܗ ܡܶܛܽܠ ܪ̈ܳܚܡܰܘܗ̱ܝ. ܘܶܐܬ݂ܗܰܦ݁ܰܟ݂ ܒ݁ܰܐܪܥܳܐ ܕ݂ܺܝܗܽܘ̣ܕ݂ ܕ݁ܠܰܢ ܢ̣ܶܦ݂ܪܽܘ̇ܩ ܡܶܢ ܥܰܒ݂ܕ݁ܽܘ̣ܬ݂ܳܐ. ܘܠܶܗ ܫܰܒ݁ܰܚܘ̱ ܥܒ݂ܳܕ݂̈ܰܘܗ̱ܝ ܘܟ݂݀ܽܠܗܶܝܢ ܒ݁ܶܪ̈ܝܳܬ݂ܶܗ. ܕ݁ܝܰܬ݁ܺܝ̣ܪ ܢ̇ܪܰܡܪܶܡ ܘܢ̇ܰܘܕ݁ܶܐ ܠܰܫܡܶܗ ܩܰܕ݁ܺܝ̣ܫܳܐ ܠܥܳ݀ܠܡܺܝ̣ܢ܀

ܛܶܟ݁ܣܳܐ ܬ݂ܠܺܝ̣ܬ݂ܳܝܳܐ

(ܐ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ. ܠܶܟ݂ܝ̱ ܕ݁ܟ݂ܺܝ̣ܬ݂ܳܐ ܘܙܰܗܝܰܬ݂ ܒ݁ܓ݂ܽܘ̣ܫܡܳܗ̇. ܕ݁ܰܐܘܨܰܪ ܩܽܘ̣ܕ݂̈ܫܶܐ ܗܘܳܬ݂݀ ܢܰܦ݂ܫܶܟ݂ܝ̱. ܘܰܥ̣ܪܳܐ ܡܰܪܒ݁ܥܶܟ݂ܝ̱ ܒ݁ܬ݂ܶܕ݂ܡܽܘ̣ܪܬ݁ܳܐ. ܠܰܐܠܳܗܳܐ ܕ݂ܠܳܐ ܡܶܣܬ݁ܰܝܰܟ݂. ܝ݀ܳܠܕ݁ܰܬ݂ ܐܰܠܳܗܳܐ ܒ݂ܬ݂ܽܘ̣ܠܬ݁ܳܐ ܟ݂݀ܽܠܰܢ ܡ̇ܰܘܪܒ݂ܺܝ̣ܢܰܢ ܀

ܠܶܟ݂ܝ̱ ܕ݁ܩ̣ܰܕ݁ܶܡܘ̱ ܨܳܪܽܘ̣ܟ݂ܝ̱ ܢܒ݂ܺܝ̈ܶܐ. ܒ݁ܐ̱ܪ̈ܳܙܰܝܗܽܘ̇ܢ ܡܰܠ̈ܝܰܝ ܬ݁ܶܗܪܳܐ. ܒ݁ܣܰܢܝܳܐ ܘܓ݂ܶܙܬ݂ܳܐ ܘܰܥܢܳܢܳܐ. ܘܩܺܒ݂ܽܘ̇ܬ݂ܳܐ ܕ݂ܕ݂ܺܝܰܬ݂ܺܝܩܺܝ. ܘܰܡܢܳܪܬ݁ܳܐ ܘܫܰܒ݂ܛܶܗ ܕ݁ܰܐܗܪܽܘ̇ܢ ܘܠܽܘ̣ܚ̈ܶܐ ܕ݂ܢܳܡܽܘ̇ܣܳܐ ܀

ܕ݁ܚܰܕ݂ ܩܢܽܘ̇ܡܳܐ: ܠܳܟ݂ ܡܳܪܝ̱ ܐܰܦ݂ܪܶܝܡ ܩܳܪܶܝܢܰܢ. ܒ݁ܗܳܝ ܕ݁ܣܰܓ݁ܺܝ ܐܰܠܺܝ̣ܨܺܝ̣ܢܰܢ. ܥܢܺܝ ܠܰܢ ܒ݁ܰܥܓ݂ܰܠ ܩܰܕ݁ܺܝ̣ܫܳܐ. ܘܣܰܪܗܶܒ݂ ܦ݁ܰܢܳܐ ܫܶܐܠ̈ܳܬ݂ܰܢ. ܕ݁ܠܳܟ݂ ܪܳܚܶܡ ܡܳܪܳܟ݂ ܡܶܢ ܟ݀݁ܽܠ. ܨܠܽܘ̇ܬ݂ܳܟ݂ ܫܽܘ̣ܪܳܐ ܬ݂ܶܗܘܶܐ ܠܰܢ܀

ܕ݁ܥܰܢܺܝ̣ܕ݂̈ܶܐ: ܪܰܗܒ݁ܽܘ̇ܢܳܐ ܕ݂ܚܰܝ̈ܶܐ ܚܰܕ̱݂̈ܬ݂ܶܐ. ܝܰܗ̱ܒ݂ ܦ݁ܳܪܽܘ̇ܩܰܢ ܠܰܡܗܰܝܡ̈ܢܶܐ. ܕ݁ܡܶܢ ܡܰܘܬ݁ܳܐ ܠܚܰܝ̈ܶܐ ܢ̣ܫܰܢܽܘ̇ܢ. ܒ݁ܝܰܕ݂ ܦ݁ܰܓ݂ܪܶܗ ܘܰܕ݂ܡܶܗ ܕ݁ܰܢܣܰܒ݂ܘ̱. ܛܽܘ̣ܒ݂ܳܐ ܠܥܰܢܺܝ̣ܕ݂̈ܶܐ ܕ݂ܰܐܟ݂ܠܽܘܗ̱ܝ. ܕ݁ܗܽܘ̣ܝܽܘ ܡܢܰܚܶܡ ܠܰܢ ܀

ܫܘܒ ܘ ܡܢ: ܫܽܘ̣ܒ݂ܚ̈ܶܐ ܫܦ݂ܰܝ̈ܳܐ ܘܗܰܢܺܝ̈ܶܐܐ. ܒ݁ܩ̈ܳܠܶܐ ܚܠܰܝ̈ܳܐ ܘܒ݂ܰܣ̈ܺܝ̣ܡܶܐ. ܡܩ̇ܰܪܒ݂ܳܐ ܥܺܕ̱݁ܬ݁ܳܐ ܥܰܡ ܝܰܠܕ݁̈ܶܝܗ̇. ܠܐܰܒ݂ܳܐ ܘܠܰܒ݂ܪܳܐ ܘܪܽܘ̣ܚ ܩܽܘ̣ܕ݂ܫܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ. ܕ݁ܠܶܗ ܗ̱ܽܘ ܡܫ̇ܰܒ݂ܚܺܝܢܰܢ ܀

(ܒ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܐܰܢ̱ܬ݁ܝ̱ ܕ݁ܺܐܝ̣ܬ݂ܰܝܟ݁ܝ̱ ܐܶܡܶܗ ܕܰܐܠܳܗܳܐ. ܐܰܢ̱ܬ݁ܝ̱ ܕ݁ܰܕ݂ܢ̣ܰܚ. ܡܶܢ ܥܽܘ̣ܒܶܟ݂ܝ̱ ܕ݁ܰܟ݂ܝܳܐ. ܗܰܘ ܫܶܡܫܳܐ ܕ݂ܙܰܕ݁ܝ̣ܩܽܘ̣ܬ݂ܳܐ. ܡܫܺܝ̣ܚܳܐ ܐܰܠܳܗܳܐ ܕ݂ܰܕ݂ܢ̣ܰܚ ܡܶܢܳܗ̇. ܪܰܚܶܡܥܠܰܝܢ ܀

ܠܶܟ݂ܝ̱ ܡܰܪܝܰܡ ܢܒ݂ܺܝ̈ܶܐ ܨ݀ܳܝܪܺܝ̣ܢ ܗ̱ܘܰܘ. ܒ݁ܣܶܒ݁ܠܬ݂ܳܐ. ܘܓ݂ܶܙܬ݂ܳܐ ܘܰܥܢܳܢܳܐ ܘܩܺܒ݂ܽܘ̇ܬ݂ܳܐ ܕ݂ܕ݂ܺܝܰܬ݂ܺܝܩܺܝ. ܘܰܡܢܳܪܬ݁ܳܐ ܘܫܰܒ݂ܛܶܗ ܕ݁ܰܐܗܪܽܘ̇ܢ. ܘܠܽܘ̣ܚ̈ܶܐ ܕ݂ܢܳܡܽܘ̇ܣܳܐ ܀

ܕ݁ܩܰܕ݁̈ܺܝ̣ܫܶܐ: ܛܽܘ̣ܒ݂ܰܝܟ݁ܽܘ̇ܢ ܣܳܗܕ݁̈ܶܐ ܩܰܕ݁̈ܺܝ̣ܫܶܐ. ܕܰ݁ܒ݂ܡܳܪܟ݂ܽܘ̇ܢ. ܚܰܝܳܐ ܐܰܘܕ݁ܺܝ̣ܬ݁ܽܘ̇ܢ ܘܗܳܐ ܢܳܨܚܺܝ̣ܢ ܕ݁ܽܘ̣ܟ݂ܪ̈ܳܢܰܝܟ݁ܽܘ̇ܢ. ܗܳܪܟ݁ܳܐ ܘܰܠܥܶܠ ܒܰ݁ܫܡܰܝܳܐ. ܨܠܽܘ̇ܬ݂ܟ݂ܽܘ̇ܢ ܫܽܘ̣ܪܳܐ ܬ݂ܶܗܘܶܐ ܠܰܢ ܀

ܕ݁ܥܰܢܺܝ̣ܕ݂̈ܶܐ: ܦ݁ܳܪܽܘ̇ܩܰܢ ܐܶܫܬ݁ܰܘܕ݁ܺܝܬ݁ ܘܶܐܡ̣ܰܪܬ݁. ܒ݁ܰܣܒ݂ܰܪܬ݂ܳܟ݂. ܗܳܝ ܡܰܚܝܳܢܺܝ̣ܬ݂ܳܐ ܟ݂݀ܽܠ ܐܰܝܢܳܐ ܕ݂ܳܐܟ݂ܶܠ ܡܶܢ ܦ݁ܰܓ݂ܪܝ̱. ܘܫ݀ܳܬ݂ܶܐ ܟ݂ܳܣܳܐ ܕ݂ܕ݂ܶܡܝ̱. ܗܽܘ̣ ܒ݂ܺܝ̣ ܡܩ̇ܰܘܶܐ ܘܶܐܢܳܐ ܒ݂ܶܗ ܀

ܫܘܒ ܘ ܡܢ: ܡܫܰܒ݁ܚܺܝ̣ܢܰܢ ܠܰܬ݂ܠܺܝ̣ܬ݂ܳܝܽܘ̣ܬ݂ܳܐ. ܗܳܝ ܕ݁ܺܐܝ̣ܬ݂ܶܝܗ̇. ܚܕ݂ܳܐ ܐܰܠܳܗܽܘ̣ܬ݂ܳܐ. ܐܰܒ݂ܳܐ ܘܰܒ݂ܪܳܐ ܘܪܽܘ̣ܚ ܩܽܘ̣ܕ݂ܫܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ. ܕ݁ܠܶܗ ܗ̱ܽܘ ܡܫ̇ܰܒ݁ܚܺܝ̣ܢܰܢ ܀

(ܓ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܝ݀ܳܠܕ݁ܰܬ݂ ܐܰܠܳܗܳܐ ܒ݂ܬ݂ܽܘ̣ܠܬ݁ܳܐ. ܐܶܡܳܐ ܕ݂ܟ݂ܺܝ̣ܬ݂ܳܐ. ܠܗܰܘ ܕ݁ܡܶܢܶܟ݂ܝ̱ ܐܶܬ݂ܺܝ̣ܠܶܕ݂. ܡܫ̇ܰܒ݁ܚܺܝ̣ܢܰܢ ܀

ܐܰܢ̱ܬ݁ ܗ̱ܽܘ ܐܰܠܳܗܳܐ ܕ݂ܥܰܠ ܟ݀݁ܽܠ. ܡܪܰܝܡܳܐ ܘܰܕ݂ܚܺܝ̣ܠܳܐ. ܕ݁ܰܚܠܳܦ݂ܰܝܢ ܐܶܬ݂ܒ݁ܰܣܰܪܬ݁. ܡܫ̇ܰܒ݁ܚܺܝ̣ܢܰܢ ܀

ܕ݁ܣ݀ܳܗܕ݁̈ܶܐ: ܡܶܛܽܠܳܬ݂ܳܟ݂ ܡ݀ܳܝܬ݁ܺܝ̣ܢܰܢ. ܬ݁ܳܐ ܠܥܽܘ̣ܕ݂ܪܳܢܰܢ. ܩܥ̣ܰܘ ܣܳܗܕ݁̈ܶܐ ܒ݂ܒ݂ܶܝܬ݂ ܕ݁ܺܝ̣ܢܳܐ. ܠܰܡܫܺܝ̣ܚܳܐ ܀

ܕ݁ܥܰܢܺܝ̣ܕ݂̈ܶܐ: ܐܰܢܺܝ̣ܚ ܒ݁ܰܡ̈ܛܰܠ̱ܠܶܐ ܕ݂ܢܽܘ̣ܗܪܳܐ. ܒ݁ܡܰܫܟ݁ܢ̈ܶܐ ܕ݂ܟ݂ܺܐܢ̈ܶܐ. ܠܢܰܦ݂ܫ̈ܳܬ݂ܳܐ ܕ݂ܥܰܢܺܝ̣ܕ݂̈ܶܐ ܡܗܰܝ̈ܡܢܶܐ ܀

ܫܘܒ ܘ ܡܢ: ܢ̇ܰܘܕ݁ܶܐ ܘܢ̇ܶܣܓ݁ܽܘ̇ܕ݂ ܘܰܢ̇ܫܰܒ݁ܰܚ. ܠܰܐܒ݂ܳܐ ܘܠܰܒ݂ܪܳܐ ܘܰܠܪܽܘ̣ܚܳܐ ܩܰܕ݁ܺܝ̣ܫܳܐ. ܒ݁ܟ݂݀ܽܠܥܶܕ݁̈ܳܢܺܝܢ ܀

ܛܶܟ݁ܣܳܐ ܪܒ݂ܺܝ̣ܥܳܝܳܐ

(ܐ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܠܶܟ݂ܝ̱ ܢ̇ܶܬ݂ܟ݁ܰܫܰܦ. ܕ݁ܥܰܡܰܢ ܘܰܚܠܳܦ݂ܰܝܢ ܬ݁ܶܗܘܶܝܢ ܡܦ݁ܺܝ̣ܣܳܢܺܝ̣ܬ݂ܳܐ. ܠܰܡܠܶܟ݂ ܡܰܠܟ݁̈ܶܐ. ܕ݁ܢ̣ܰܫܪܶܐ ܫܰܝܢܶܗ ܘܰܫܠܳܡܶܗ ܒ݁ܥܳ݀ܠܡܳܐ ܟ݂݀ܽܠܶܗ. ܘܢ̣ܰܥܒ݁ܰܪ ܫܰܒ݂̈ܛܶܐ ܕ݂ܪܽܘ̣ܓ݂ܙܳܐ. ܡܶܢ ܟ݀݁ܽܠܳܗ̇. ܥܳܡܰܪܬ݁ܳܐ. ܒܰ݁ܡܪܰܚܡܳܢܽܘ̣ܬ݂ܶܗ܀

ܠܶܟ݂ܝ̱ ܨ݀ܳܝܪܺܝ̣ܢ ܗ̱ܘܰܘ. ܢܒ݂ܺܝ̈ܶܐ ܟ݂݀ܽܠܗܽܘ̇ܢ ܒ݁ܐ̱ܪ̈ܙܰܝܗܽܘ̇ܢ ܒ݁ܬ݂ܽܘ̣ܠܬ݁ܳܐ ܡܰܪܝܰܡ. ܡܽܘ̣ܫܶܐ ܒ݂ܣܰܢܝܳܐ. ܘܚܰܙܩܺܝܶܐܠ ܒ݁ܰܪ ܓ݁ܳܠܽܘ̣ܬ݂ܳܐ ܬ݂ܰܪܥܳܐ ܕ݂ܰܐܚܺܝ̣ܕ݂ ܩܪܳܟ݂ܝ̱. ܘܶܐܫܰܥܝܳܐ ܕ݂ܽܘ̣ܡܳܪܳܐ. ܘܶܐܠܺܝܫܰܥ ܩܽܘ̇ܩܬ݂ܳܐ ܚܕ݂ܰܬ݁ܳܐ. ܐܳܦ݂ ܓ݁ܶܕ݂ܥܽܘ̇ܢ. ܓ݁ܶܙܬ݂ܳܐ ܀

ܕ݁ܰܫܠܺܝ̣ܚ̈ܶܐ: ܫܠܺܝ̣̈ܚܶܐ ܓ݂ܒ݂ܰܝ̈ܳܐ. ܕ݁ܶܐܫ̣ܬ݁ܰܕ݁ܰܪܘ̱ ܡܶܢ ܐܰܠܳܗܳܐ ܠܥܳ݀ܠܡܳܐ ܟ݂݀ܽܠܶܗ. ܘܰܢܦ݂ܰܩܘ̱ ܐܰܟ݂ܪܶܙܘ̱. ܣܒ݂ܰܪܬ݂ܶܗ ܕ݁ܰܒ݂ܪܳܐ ܒ݂ܶܝܬ݂ ܥܰܡ̱̈ܡܶܐ ܘܥܶܒ݂ܪ̈ܶܝܗ̇ ܕ݁ܰܐܪܥܳܐ. ܣܰܒ݁ܰܪܘ̱ ܗ̱ܘܰܘ ܡܰܠܟ݁ܽܘ̣ܬ݂ܳܐ. ܕܰ݁ܫܡܰܝܳܐ ܟ݂ܰܕ݂ ܐܳ݀ܡܪܺܝ̣ܢ. ܛܽܘ̣ܒ݂ܳܐ ܠܰܡܗܰܝ̈ܡܢܶܐ ܀

ܕ݁ܥܰܢܺܝ̣ܕ݂̈ܶܐ: ܒܰܠܡܺܐܢ ܚܰܝ̈ܶܐ. ܘܒ݂ܰܐܘܳܢ̈ܶܐ ܡܰܠܝ̈ܰܝ ܪܘܳܙܳܐ ܐܰܢܺܝ̣ܚ ܐܶܢܶܝܢ. ܡܰܠܟ݁ܳܐ ܡܫܺܝ̣ܚܳܐ. ܠܢܰܦ݂ܫ̈ܳܬ݂ܳܐ ܕ݂ܥܰܒ݂ܕ݁̈ܶܐ ܕ݂ܺܝ̣ܠܳܟ݂ ܕ݁ܰܫܟ݂ܶܒ݂ܘ̱ ܥܰܠ ܣܰܒ݂ܪܳܟ݂. ܘܡܳܐ ܕ݂ܳܐܬ݂ܶܐ ܐܰܢ̱ܬ݁ ܒ݁ܫܽܘ̣ܒ݂ܚܳܐ. ܕ݁ܬ݂ܶܬ݁ܶܠ ܐܰܓ݂ܪܳܐ ܠܦ݂ܳܠܚܰܝ̈ܟ݁. ܕ݁ܥܰܡܳܟ݂ ܢ̣ܶܬ݂ܒ݁ܰܣܡܽܘ̣ܢ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܠܰܐܒ݂ܳܐ. ܕ݁ܰܒ݂ܪܳܐ ܠܥܳܠܡ̈ܶܐ ܘܒ݂ܶܪ̈ܝܳܬ݂ܳܐ ܡܶܢ ܠܳܐ ܡܶܕ݁ܶܡ. ܘܣܶܓ݂ܕ݁ܬ݂ܳܐ ܠܰܒ݂ܪܳܐ. ܕ݁ܰܨܡ̣ܰܚ ܡܶܢ ܥܽܘ̣ܒ݁ܳܐ ܒ݂ܬ݂ܽܘ̣ܠܳܐ ܕ݂ܗܳܝ ܒ݁ܰܪ̱ܬ݂ ܕ݁ܰܘܝܕ݂. ܣܓ݂ܺܝ̣ܕ݂ ܪܽܘ̣ܚܳܐ ܩܰܕ݁ܺܝ̣ܫܳܐ. ܕ݁ܚܰܟ݁ܶܡ ܐܶܢܽܘ̇ܢ ܠܰܫܠܺܝ̣ܚ̈ܶܐ. ܘܫ̣ܰܪܰܪ ܡܶܠܰܝ̈ܗܽܘ̇ܢ ܀

(ܒ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܠܶܟ݂ܝ̱ ܦ݁ܰܐܝܳܐ ܕ݁ܰܢ̇ܩܰܠܶܣ. ܝ݀ܳܠܕ݁ܰܬ݂ ܐܰܠܳܗܳܐ ܒ݂ܬ݂ܽܘ̣ܠܬ݁ܳܐ. ܡܶܛܽܠ ܕ݁ܒ݂ܺܐܝ̣ܕ݂̈ܰܝܟ݁ ܐܶܬ݂ܪܰܥܺܝ̣. ܠܓ݂ܶܢܣܳܐ ܕ݂ܺܝ̣ܠܰܢ ܒ݁ܢܰܝ̈ܢܳܫܳܐ. ܐܰܠܳܗܳܐ ܐܰܒ݂ܳܐ ܀

ܡܒ݂ܰܪܰܟ݂ ܗ̱ܽܘ ܡܳܪܝܳܐ. ܐܰܠܳܗܶܗ ܕܺܐܝܣܪܳܐܝܶܠ. ܡܶܛܽܠ ܕ݁ܰܣܥ̣ܰܪ ܠܰܢ ܒ݁ܪ̈ܰܚܡܰܘܗ̱ܝ. ܘܰܥܒ݂ܰܕ݂ ܦ݁ܽܘ̣ܪܩܳܢܳܐ ܘܫܽܘ̣ܘܙܳܒ݂ܳܐ. ܠܥܰܡ̱̈ܡܶܐ ܕ݂ܗܰܝܡ̣ܶܢܘ ܒ݁ܶܗ܀

ܕ݁ܩܰܕ݁̈ܺܝ̣ܫܶܐ: ܩܰܕ݁̈ܺܝ̣ܫܶܐ ܕ݂ܟ݂݀ܽܠ ܚܰܫܺܝ̈ܢ. ܘܟ݂݀ܽܠ ܐܘ̣ܽܠܨܳܢܺܝ̈ܢ ܣܰܝܒ݁ܰܪܘ̱. ܒ݁ܚܽܘ̣ܒ݁ܳܟ݂ ܡܳܪܶܐ ܟ݂݀ܽܠ. ܗܶܢܽܘ̇ܢ ܢ̣ܶܗܘܽܘ̇ܢ ܠܳܟ݂ ܡܦ݁ܺܝ̣ܣܳܢ̈ܶܐ. ܚܠܳܦ݂ܰܝܢ ܚܰܛܳܝ̈ܶܐ ܀

ܕ݁ܥܰܢܺܝ̣ܕ݂̈ܶܐ: ܥܰܢܺܝ̣ܕ݂̈ܶܐ ܡܗܰܝܡܢ̈ܶܐ. ܠܝܽܘ̇ܡ ܡܶܐܬ݂ܺܝ̣ܬ݂ܳܟ݂ ܚܳܝܪܺܝܢ. ܡܫܺܝ̣ܚܳܐ ܐܰܠܳܗܳܐ. ܕ݁ܰܬ݂ܒ݂ܰܝܰܐ ܐܶܢܽܘ̇ܢ ܒ݁ܢܽܘ̣ܚܳܡܳܐ. ܕ݁ܢ̣ܰܘܕ݁ܽܘ̇ܢ ܠܛܰܝܒ݁ܽܘ̣ܬ݂ܳܟ݂ ܀

ܫܘܒ ܘ ܡܢ: ܩܰܕ݁ܺܝ̣ܫܰܬ݁ ܐܰܠܳܗܳܐ. ܡܪܰܝܡܳܐ ܕ݂ܰܠܥܳܠܰܡ ܥܳܠܡܺܝ̣ܢ. ܕ݁ܥ݀ܳܡܰܪ ܒ݁ܰܫܡܰܝܳܐ. ܘܰܒ݂ܥܺܕ̱݁ܬ݁ܶܗ ܐܰܬ݂ܩ̣ܶܢ ܒ݁ܛܰܝܒ݁ܽܘ̣ܬ݂ܶܗ. ܡܰܕ݂ܒ݁ܚܳܐ ܡܚܰܣܝܳܢܳܐ ܀

(ܓ)

ܕ݁ܝܳܠܕ݁ܰܬ݂ ܐܰܠܳܗܳܐ: ܐܰܝܟ݂ ܡܶܠܬ݂ܳܐ ܕ݂ܺܝ̣ܠܶܟ݂ܝ̱ ܝ݀ܳܠܕ݁ܰܬ݂ ܐܰܠܳܗܳܐ. ܟ݀ܽ݁ܠܗܶܝܢ ܫܰܪ̈ܒ݂ܳܬ݂ܳܐ ܕ݂ܰܐܪܥܳܐ ܛܽܘ̣ܒ݂ܳܐ ܝܳܗ̈ܒ݁ܳܢ ܠܶܟ݂ܝ̱. ܡܶܛܽܠ ܕ݁ܰܒ݂ܥܽܘ̣ܒ݁ܶܟ݂ܝ̱ ܐܰܓ݁ܶܢ. ܗܰܘ ܕ݁ܒ݂ܰܡܪ̈ܰܘܡܶܐ ܥܶܠܳܝ̈ܶܐ ܥܳ݀ܡܰܪ ܠܥ݀ܳܠܰܡ ܥܳ݀ܠܡܺܝ̣ܢ ܀

ܡܰܪܟ݁ܰܒ݂ܬ݂ܳܐ ܕ݂ܚܺܝ̣ܠܬ݁ܳܐ ܕ݂ܰܚ̣ܙܳܐ ܚܰܙܩܺܝܶܐܠ. ܠܳܐ ܦ݂ܳ݀ܚܡܳܐ ܒ݂ܫܽܘ̣ܦ݂ܪ̈ܰܝܟ݁ܝ̱ ܒ݁ܬ݂ܽܘ̣ܠܬ݁ܳܐ ܩܰܕ݁ܺܝ̣ܫܬ݁ܳܐ. ܡܶܛܽܠ ܕ݁ܙܰܝܰܚ̣ܬ݁ܝ̱ ܒ݁ܰܕ݂ܪ̈ܳܥܰܝܟ݁ܝ̱. ܠܗܰܘ ܕ݁ܒ݂ܰܡܪ̈ܰܘܡܶܐ ܥܶܠܳܝ̈ܶܐ ܥܳܡܰܪ ܠܥ݀ܳܠܰܡ ܥܳ݀ܠܡܺܝ̣ܢ ܀

ܕ݁ܣܳܗܕ݁̈ܶܐ: ܣܳܗܕ݁̈ܶܐ ܩܰܕ݁̈ܺܝ̣ܫܶܐ ܪ̈ܚܽܘ̇ܡܰܘܗ̱ܝ ܕ݁ܰܡܫܺܝ̣ܚܳܐ. ܩܰܪܶܒ݂ܘ ܒ݁ܳ݀ܥܽܘ̣ܬ݂ܳܐ ܚܠܳܦ݂ ܥܰܘܠܶܗ ܕ݁ܥܳ݀ܠܡܳܐ. ܠܰܡܫܺܝ̣ܚܳܐ ܕ݂ܰܪܚ̣ܶܡܬ݁ܽܘ̇ܢܳܝܗ̱ܝ. ܕ݁ܢ̇ܫܬ݁ܘܶܐ ܠܫܽܘ̣ܒ݂ܩܳܢ ܚܰܘܒܴ݁̈ܬ݂ܰܢ. ܘܥܰܡܟ݂ܽܘ̇ܢ ܢ̇ܥܽܘ̇ܠ ܠܰܓ݂ܢܽܘ̇ܢ ܚܰܕ݂̈ܘܳܬ݂ܳܐ ܀

ܕ݁ܥܰܢܺܝ̣ܕ݂̈ܶܐ: ܛܰܠܳܟ݂ ܡܳܪܝ̱ ܡܰܚܝܳܢܳܐ ܢ̣ܶܚܽܘ̇ܬ݂ ܠܳܗ̇ ܠܰܫܝܽܘ̇ܠ. ܘܰܢ̣ܪܰܣܶܣ ܥܰܠ ܓܰ݁ܪ̈ܡܰܝܗܽܘ̇ܢ ܕ݁ܥܰܢܺܝ̣ܕ̈ܶܐ ܡܗܰܝ̈ܡܢܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ. ܘܶܐܫܬ݁ܺܝܽܘ ܠܰܕ݂ܡܳܟ݂ ܡܚܰܣܝܳܢܳܐ. ܒ݁ܰܓ݂ܢܽܘ̇ܢ ܢܽܘ̣ܗܪܳܐ ܥܰܡܳܟ݂ ܢ̣ܶܬ݂ܒ݁ܰܣܡܽܘ̣ܢ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܠܶܗ ܠܰܐܒ݂ܳܐ ܘܬ݂ܰܘܕ݁ܺܝ̣ܬ݂ܳܐ ܠܰܒ݂ܪܳܐ. ܘܰܠܪܽܘ̣ܚܳܐ ܕ݂ܩܽܘ̣ܕ݂ܫܳܐ ܐܺܝ̣ܩܳܪܳܐ ܘܣܶܓ݂ܕ݁ܬ݂ܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ. ܗܰܘ ܕ݁ܒ݂ܰܡܪ̈ܰܘܡܶܐ ܥܶܠܳܝ̈ܶܐ ܥܳܡܰܪ ܠܥ݀ܳܠܰܡ ܥܳ݀ܠܡܺܝ̣ܢ ܀

ܛܶܟ݁ܣܳܐ ܚܡܺܝ̣ܫܳܝܳܐ

(ܐ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܐܶܫܰܥܝܳܐ ܕ݂ܽܘ̣ܨ ܟ݁ܰܕ݂ ܚ݀ܳܕ݂ܶܝܬ݁ ܕ݁ܗܳܐ ܓ݂ܶܝܪ ܒ݁ܬ݂ܽܘ̣ܠܬ݁ܳܐ ܩܰܒ݁ܠܰܬ݂݀ ܒ݁ܰܛܢܳܐ. ܘܺܝܠ̣ܶܕ݂ܬ݂ܶܗ ܠܰܒ݂ܪܳܐ ܒ݂ܽܘ̣ܟ݂ܪܳܐ. ܠܶܗ ܠܥܰܡܰܢܽܘ̣ܐܶܝܠ. ܐܰܠܳܗܳܐ ܕ݂ܡܶܢ ܐܰܠܳܗܳܐ. ܨܶܡܚܳܐ ܘܕ݂ܶܢܚܳܐ ܢܒ݂ܺܝܳܐ ܫܰܡܗܶܗ ܗ̱ܘܳܐ. ܗܰܘ ܕ݁ܠܶܗ ܗ̱ܽܘ ܡܫ̇ܰܒ݁ܚܺܝ̣ܢܰܢ ܘܰܠܝܳ݀ܠܶܕ݁ܬ݂ܶܗ ܛܽܘ̣ܒ݂ܳܐ ܝܳ݀ܗܒ݁ܺܝ̣ܢܰܢ ܀

ܫܠܳܡ ܠܶܟ݂ܝ̱ ܡܰܠܝܰܬ݂ ܛܰܝܒ݁ܽܘ̣ܬ݂ܳܐ ܕ݂ܓ݂݀ܳܗܪܺܝܢ ܡܶܢܶܟ݂ܝ̱. ܚܰܙܳܝ̈ܶܐ ܕ݂ܪܽܘ̣ܚܳܐ. ܫܠܳܡ ܠܶܟ݂ܝ̱ ܥܢܳܢܳܐ ܩܰܠܺܝ̣ܠܬ݁ܳܐ ܗܳܝ ܕ݁ܶܐܡ̣ܰܪ. ܐܶܫܰܥܝܳܐ ܡܫܰܒ݁ܚܳܐ. ܫܠܳܡ ܠܶܟ݂ܝ̱ ܢܰܘܣܳܐ ܕ݂ܰܟ݂ܝܳܐ ܕ݂ܰܐܠܳܗܽܘ̣ܬ݂ܳܐ. ܘܰܬ݂ܪܽܘ̇ܢܳܘ̇ܣ ܓ݁ܰܐܝܳܐ. ܫܠܳܡ ܠܶܟ݂ܝ̱ ܫܰܒ݂ܛܶܗ ܕ݁ܰܐܗܪܘ̇ܢ ܗܰܘ ܕ݁ܰܐܦ݂ܪܰܥ ܗ̱ܘܳܐ. ܘܛܰܪ̈ܦ݁ܶܐ ܛܥ̣ܶܢ ܚܰܕ݂̱̈ܬ݂ܐ ܀

ܕ݁ܡܰܠܦ݂ܳܢ̈ܶܐ: ܕ݁ܽܘ̣ܨܘ̱ ܘܶܐܬ݂ܦ݁ܰܨܰܚܘ̱ ܓ݁ܡܺܝ̣ܪܳܐܝ̣ܬ݂ ܐܰܒ݂ܳܗ̈ܳܬ݂ܳܐ ܘܡܰܠܦ݂ܳܢ̈ܶܐ ܒ݂ܚܺܝ̣ܪ̈ܶܐ. ܕ݁ܗܳܐ ܙܰܪܥܳܐ ܕ݂ܡܰܠܦ݂ܳܢܘ̣ܬ݂ܟ݂ܽܘ̇ܢ. ܫܘܰܚ ܘܰܪܒ݂ܳܐ ܘܰܣܠ̣ܶܩ. ܘܝܗ̱ܰܒ݂ ܦ݁ܺܐܪ̈ܶܐ ܕ݂ܗܰܝܡܳܢܽܘ̣ܬ݂ܳܐ ܚܰܕ݂ ܒ݁ܰܬ݂ܠܳܬ݂ܺܝܢ ܘܒ݂ܶܫܬ݁ܺܝܢ ܘܒ݂ܰܡܳܐܐ. ܐܰܝܟ݂ ܡܶܠܬ݂ܳܐ ܫܰܪܺܝ̣ܪܬ݁ܳܐ ܕ݂ܶܐܡ̣ܰܪ ܡܳܪܰܢ. ܒ݁ܶܐܘܢܓ݁ܶܠܝܽܘ̇ܢ ܀

ܕ݁ܥܰܢܺܝ̣ܕ݂̈ܶܐ: ܢܝܳܚܳܐ ܘܒ݂ܽܘ̣ܣܳܡܳܐ ܫܰܟ݁ܶܢ ܡܫܺܝ̣ܚܳܐ ܐܰܠܳܗܳܐ ܠܥܰܒ݂ܕ݁̈ܶܐ ܕ݂ܺܝ̣ܠܳܟ݂. ܘܒ݂ܰܝܰܐ ܐܶܢܽܘ̇ܢ ܒ݁ܢܽܘ̣ܚܳܡܳܐ. ܐܰܟ݂ܡܳܐ ܕ݂ܶܐܫܬ݁ܰܘܕ݁ܺܝ̣ܬ݁. ܐܰܢ̱ܬ݁ ܕ݁ܶܐܬ݂ܡ̣ܢܺܝ̣ܬ݁ ܥܰܡ ܥܰܢܺܝ̣ܕ݂̈ܶܐ ܘܰܐܟ݂ܪܶܙܬ݁ ܠܗܽܘ̇ܢ. ܣܰܒ݂ܪܳܐ ܫܰܪܺܝ̣ܪܳܐ. ܘܢܽܘ̣ܚܳܡܳܐ ܕ݁ܙܰܕ݁ܺܝ̣ܩܽܘ̣ܬ݂ܳܐ ܕ݂ܡܶܢ ܐܰܒ݂ܕ݁ܳܢܳܐ. ܕ݁ܰܫܝܽܘ̇ܠ ܬ݁ܩܺܝ̣ܡ ܐܶܢܽܘ̇ܢ ܀

ܫܘܒ ܘ ܡܢ: ܬ̣݁ܶܒ݂ܪܽܘ̇ܟ݂ ܘܬ݂ܶܣܓ݁ܽܘ̇ܕ݂ ܘܰܬ݂ܫܰܒ݁ܰܚ ܥܺܕ݂ܰܬ݂ ܩܽܘ̣ܕ݂ܫܳܐ. ܥܰܡ ܟ݀݁ܽܠܗܽܘ̇ܢ ܝܰܠܕ݁̈ܶܝܗ̇. ܠܰܐܒ݂ܳܐ ܘܠܰܒ݂ܪܳܐ ܘܪܽܘ̣ܚ ܩܽܘ̣ܕ݂ܫܳܐ. ܐ̱ܪܳܙܳܐ ܬ݂ܠܺܝ̣ܬ݂ܳܝܳܐ. ܐܰܒ݂ܳܐ ܢܽܘ̣ܗܪܳܐ ܫܰܪܺܝ̣ܪܳܐ ܘܰܒ݂ܪܳܐ ܨܶܡܚܳܐ ܫܘܶܐ ܠܶܗ ܒ݁ܽܐܘ̣ܣܝܰܐ. ܘܪܽܘ̣ܚܩܽܘ̣ܕ݂ܫܳܐ ܦ݂ܰܪܩܠܺܝܛܳܐ ܐ̱ܪܳܙܳܐ ܫܰܠܡܳܐ. ܕ݁ܰܬ݂ܠܺܝ̣ܬ݂ܳܝܽܘ̣ܬ݂ܳܐ ܀

(ܒ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܠܶܟ݂ܝ̱ ܕ݁ܰܠܥܶܠ ܡܶܢ ܗܰܘܢܳܐ ܘܡܶܠܬ݂ܳܐ ܐܶܡܶܗ ܕ݁ܰܐܳܠܳܗܳܐ. ܐܰܢ̱ܬ݁ܝ̱ ܕ݁ܰܒ݂ܙܰܒ݂ܢܳܐ ܠܗܰܘ ܕ݁ܰܡܥܰܠܰܝ ܡܶܢ ܙܰܒ݂ܢ̈ܶܐ ܝܠ̣ܶܕ݁ܬ݁ܝ̱ ܕ݁ܠܳܐ ܦ݂ܽܘ̣ܫܳܩ. ܝܳ݀ܠܕ݁ܰܬ݂ ܐܰܠܳܗܳܐ ܒ݂ܬ݂ܽܘ̣ܠܬ݁ܳܐ. ܟ݁݀ܽܠܰܢ ܡ̇ܰܘܪܒ݂ܺܝ̣ܢܰܢ܀

ܠܶܟ݂ܝ̱ ܠܳܐ ܡܢܰܣܝܰܬ݂ ܒ݁ܙܽܘ̣ܘܳܓ݂ܳܐ ܐܶܬ݂ܺܝ̣ܗܶܒ݂ ܫܠܳܡܳܐ. ܒ݁ܝܰܕ݂ ܓ݁ܰܒ݂ܪܺܐܶܝܠ ܪܺܝܫ ܡܰܠܰܐܟ݂̈ܶܐ. ܕ݁ܡܳܪܝ̱ ܥܰܡܶܟ݂ܝ̱ ܘܡܶܢܶܟ݂ܝ̱ ܕ݀݁ܳܢܰܚ. ܡܚܰܬ݁ܡܰܬ݂ ܐ̱ܪ̈ܳܙܶܐ ܢܒ݂ܺܝܳܝ̈ܶܐ. ܟ݁݀ܽܠܰܢ ܡ̇ܰܘܪܒ݂ܺܝ̣ܢܰܢ܀

ܕ݁ܰܫܠܺܝ̣̈ܚܶܐ: ܠܳܟ݂ ܐܰܠܳܗܳܐ ܕ݂ܒ݂ܰܫܪܳܪܳܟ݂ ܫܠܺܝ̣̈ܚܶܐ ܐܶܙܕ݁ܰܝܰܢܘ̱. ܘܰܢܦ݂ܰܩ̣ܘ̱ ܐܰܟ݂ܪܶܙܘ̱ ܒ݁ܰܐܪܒ݁ܰܥ ܦ݁ܶܢܝ̈ܳܢ. ܗܰܝܡܳܢܽܘ̣ܬ݂ܳܐ ܕ݂ܰܫܪܳܪܳܐ. ܘܗܳܐ ܥܺܕ݂ܰܬ݂ ܩܽܘ̣ܕ݂ܫܳܐ ܘܝܰܠܕ݁̈ܝܗ̇. ܡܙܰܝܚܳܐ ܠܥܺܐܕ݂̈ܰܝܗܘ̇ܢ ܀

ܕ݁ܥܰܢܺܝ̣ܕ݂̈ܶܐ: ܥܒ݂ܶܕ݂ ܡܳܪܰܢ ܒ݁ܰܚܢܳܢܳܟ݂ ܕ݁ܽܘ̣ܟ݂ܪܳܢ ܥܰܢܺܝ̣ܕ݂̈ܰܝܢ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܘܶܐܫܬ݁ܺܝܽܘ ܠܰܕ݂ܡܳܟ݂. ܘܚܰܣܳܐ ܠܗܽܘ̇ܢ ܒ݁ܽܘ̣ܨܳܪ̈ܰܝܗܽܘ̇ܢ. ܘܡܶܢ ܝܰܡܺܝ̣ܢܳܟ݂ ܢܶܩܥܽܘ̇ܢ. ܠܳܟ݂ ܫܽܘ̣ܒ݂ܚܳܐ ܡܳܐ ܕ݂ܳܐܬ݂ܶܝܬ݁ ܀

ܫܘܒ ܘ ܡܢ: ܠܬ݂ܰܠܺܝ̣ܬ݂ܳܝܽܘ̣ܬ݂ܳܐ ܣܓ݂ܺܝ̣ܕ݁ܬ݁ܳܐ ܘܫܰܘܝܰܬ݂ ܒ݁ܽܐܘ̣ܣܝܰܐ. ܟ݀݁ܽܠܰܢ ܡܗܰܝ̈ܡܢܶܐ ܒ݂ܕ݂ܶܚܠܳܐ ܢ̇ܝܰܩܰܪ. ܘܰܢ̇ܪܰܡܪܶܡ ܐܰܠܳܗܳܐܝ̣ܬ݂. ܟ݁ܰܕ݂ ܠܳܐ ܡܶܬ݂ܦ݁ܰܠܓ݂ܳܢܳܐܝ̣ܬ݂. ܫܽܘ̣݂ܒ݂ܚܳܐ ܡ̇ܰܣܩܺܝ̣ܢܰܢ ܀

(ܓ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܗܳܝ ܕ݁ܰܠܡܶܠܬ݂ܳܐ ܘܡܳܪܳܐ ܝܶܠ̣ܕ݁ܰܬ݂݀. ܝܳ݀ܠܕ݁ܰܬ݂ ܐܰܠܳܗܳܐ ܚܢܰܢ ܡܗܰܝ̈ܡܢܶܐ. ܠܶܟ݂ܝ̱ ܒ݁ܰܠܚܽܘ̇ܕ݂ܰܝܟ݁ܝ ܝܳܕ݂ܥܺܝ̣ܢܰܢ. ܒ݁ܬ݂ܽܘ̣ܠܬ݁ܳܐ ܝܳ݀ܠܕ݁ܰܬ݂ ܐܰܠܳܗܳܐ ܀

ܗܳܝ ܕ݁ܰܥܠܶܝܗ̇ ܩ̣ܰܕ݁ܶܡ ܐܶܬ݂ܢܰܒ݁ܝ̣. ܐܶܫܰܥܝܳܐ ܢܒ݂ܺܝܳܐ ܟ݂ܰܕ݂ ܐܳ݀ܡܰܪ. ܕ݁ܗܳܐ ܒ݂ܬ݂ܽܘ̣ܠܬ݁ܳܐ ܒ݂ܳܛܢܳܐ ܘܝܳ݀ܠܕ݁ܳܐ. ܝܰܠܕ݁ܳܐ ܕ݂ܺܐܝ̣ܬ݂ܰܘܗ̱ܝ ܕ݁ܽܘ̣ܡܳܪܳܐ ܀

ܕ݁ܩܰܕ݁̈ܺܝ̣ܫܶܐ: ܠܟ݂ܽܘ̇ܢ ܛܽܘ̣ܒ݂ܰܝܟ݁ܘ̇ܢ ܐܳܘ ܩܰܕ݁̈ܺܝ̣ܫܶܐ. ܡܳܐܢ̈ܶܐ ܓ݁ܒ݂ܰܝ̈ܳܐ ܕ݂ܪܽܘ̣ܚܩܽܘ̣ܕ݂ܫܳܐ. ܛܽܘ̣ܒ݂ܰܝܟ݁ܘ̇ܢ ܕ݁ܶܐܬ݂ܟ݁ܰܠܰܠܬ݁ܽܘ̇ܢ. ܕ݂ܗܳܐ ܢܳܨܚܺܝ̣ܢ ܕ݁ܽܘ̣ܟ݂ܪ̈ܳܢܰܝܟ݁ܽܘ̇ܢ ܀

ܕ݁ܥܰܢܺܝ̣ܕ݂̈ܶܐ: ܡܰܠܟ݁ܳܐ ܡܰܫܺܝ̣ܚܳܐ ܥܒ݂ܶܕ݂ ܒܰ݁ܚܢܳܢܳܟ݂. ܢܝܳܚܳܐ ܘܕ݂ܽܘ̣ܟ݂ܪܳܢܳܐ ܠܥܰܢܺܝ̣ܕ݂̈ܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ. ܘܶܐܫܬ݁ܺܝܽܘ ܠܰܕ݂ܡܳܟ݂ ܡܚܰܣܝܳܢܳܐ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܠܰܐܒ݂ܳܐ ܒ݂ܺܝܚܺܝ̣ܕ݂ܶܗ. ܘܣܶܓ݂ܕ݁ܬ݂ܳܐ ܠܰܒ݂ܪܳܐ ܒ݂ܝܳ݀ܠܘ̇ܕ݂ܶܗ. ܘܬ݂ܰܘܕ݁ܺܝ̣ܬ݂ܳܐ ܠܪܽܘ̣ܚܳܐ ܕ݂ܩܽܘ̣ܕ݂ܫܳܐ. ܫܘܶܐ ܠܰܐܒ݂ܳܐ ܘܥܳ݀ܡܰܪ ܒ݁ܰܒ݂ܪܳܐ ܀

ܛܶܟ݁ܣܳܐ ܫܬ݁ܺܝ̣ܬ݂ܳܝܳܐ

(ܐ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܟܰܕ݂ ܡܩܰܕ݁ܡܺܝ̣ܢܰܢ ܡ̇ܰܘܪܒ݂ܺܝܢܰܢ ܠܶܟ݂ܝ̱. ܝ݀ܳܠܕ݁ܰܬ݂ ܐܰܠܳܗܳܐ ܒ݂ܬ݂ܽܘ̣ܠܬ݁ܳܐ. ܘܰܠܗܰܘ ܕ݁ܡܶܢܶܟ݂ܝ̱ ܐܶܬ݂ܺܝ̣ܠܶܕ݂ ܒ݁ܰܒ݂ܣܰܪ. ܣ݀ܳܓ݂ܕ݁ܺܝܢܰܢ ܘܡܫ̇ܰܒ݁ܚܺܝ̣ܢܰܢ ܀

ܟܰܕ݂ ܡܩܰܕ݁ܡܺܝ̣ܢܰܢ ܣ݀ܳܓ݂ܕ݁ܺܝ̣ܢܰܢ ܠܳܟ݂ ܡܫܺܝ̣ܚܳܐ ܐܰܠܳܗܳܐ ܕ݂ܺܝ̣ܠܰܢ. ܡܶܛܽܠ ܕ݁ܟ݂ܰܕ݂ ܐܶܬ݂ܒ݁ܰܣ̣ܰܪܬ݁ ܡܶܢ ܒ݁ܬ݂ܽܘ̣ܠܬ݁ܳܐ. ܠܥܳ݀ܠܡܳܐ ܡܶܢ ܣܳܟ݂ܶܗ ܐܰܢܗ̣ܰܪܬ݁ ܀

ܕ݁ܩܰܕ݁̈ܺܝ̣ܫܶܐ: ܟܰܕ݂ ܡܩܰܕ݁ܡܺܝ̣ܢܰܢ ܡܩ̇ܰܠܣܺܝ̣ܢܰܢ ܠܟ݂ܽܘ̇ܢ. ܢܒ݂ܺܝ̈ܶܐ ܘܫܠܺܝ̣̈ܚܶܐ ܘܣ݀ܳܗܕ݁̈ܶܐ. ܘܠܗܰܘ ܕ݁ܰܚܠܳܦ݂ܰܘܗ̱ܝ ܚܰܫ̈ܶܐ ܘܽܐܘ̣ܠܨܳܢ̈ܶܐ ܣܒ݂ܰܠ̣ܬ݁ܽܘ̇ܢ. ܣ݀ܳܓ݂ܕ݁ܺܝ̣ܢܰܢ ܘܡܫ̇ܰܒ݁ܚܺܝ̣ܢܰܢ܀

ܕ݁ܥܰܢܺܝ̣ܕ݂̈ܶܐ: ܟܰܕ݂ ܡܩܰܕ݁ܡܺܝ̣ܢܰܢ ܡܶܬ݂ܰܥܗܕ݁ܺܝ̣ܢܰܢ ܠܟ݂ܽܘ̇ܢ. ܥܰܢܺܝ̣ܕ݂̈ܶܐ ܡܗܰܝ̈ܡܢܶܐ. ܘܰܠܗܰܘ ܕ݁ܥܰܠ ܣܰܒ݂ܪܶܗ ܫܟ݂ܶܒ݂ܬ݁ܽܘ̇ܢ ܘܶܐܬ݁ܬ݁ܢܺܝ̣ܚܬ݁ܽܘ̇ܢ. ܡܦ݁ܽܝ̣ܣܺܝ̣ܢܰܢ ܕ݁ܰܢ̣ܚܰܣܶܐ ܠܟ݂ܽܘ̇ܢ ܀

ܫܘܒ ܘ ܡܢ: ܟܰܕ݂ ܡܩܰܕ݁ܡܺܝ̣ܢܰܢ ܡܫܰܒ݁ܚܺܝ̣ܢܰܢ ܠܳܟ݂. ܡܫܺܝ̣ܚܳܐ ܐܰܠܳܗܳܐ ܕ݂ܺܝ̣ܠܰܢ. ܘܠܰܐܒ݂ܽܘ̣ܟ݂ ܘܰܠܪܽܘ̣ܚܳܐ ܕ݂ܩܽܘ̣ܕ݂ܫܳܐ. ܣ݀ܳܓ݂ܕ݁ܺܝ̣ܢܰܢ ܘܡܫ̇ܰܒ݁ܚܺܝ̣ܢܰܢ ܀

(ܒ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܠܥܶܠ ܡܶܢ ܡܶܠܬ݂ܳܐ ܕ݂ܠܳܐ ܦ݂ܽܘ̣ܫܳܩܳܐ. ܒ݁ܚܰܪܰܬ݂ ܙܰܒ݂ܢ̈ܶܐ ܒ݂ܓ݂ܰܘ ܥܽܘ̣ܒ݁ܶܟ݂ܝ̱ ܐܰܓ݁ܶܢ. ܗܰܘ ܕ݁ܰܓ݂ܢܺܝ̣ܙܳܐܝܺܬ݂ ܥܰܠ ܡܰܪܟ݁ܰܒ݂ܬ݂ܳܐ ܕ݂ܰܟ݂ܪ̈ܽܘ̇ܒ݂ܶܐ. ܒ݁ܬ݂ܶܗܪܳܐ ܪܰܒ݁ܳܐ ܘܙܰܘܚܳܐ ܡܶܙܕ݁ܰܝܰܚ ܀

ܫܠܳܡ ܠܶܟ݂ܝ̱ ܐܳܘ ܐܶܡܳܐ ܡܒ݂ܰܪܰܟ݂ܬ݁ܳܐ. ܒ݁ܬ݂ܽܘ̣ܠܬ݁ܳܐ ܕ݂ܟ݂ܺܝ̣ܬ݂ܳܐ ܝܳ݀ܠܕ݁ܰܬ݂ ܐܰܠܳܗܳܐ. ܫܠܳܡ ܠܶܟ݂ܝ̱ ܕ݁ܺܝܠ̣ܶܕ݁ܬ݁ܺܝܽܘܗ̱ܝ ܠܡܶܠܬ݂ܳܐ ܡܬ݂ܽܘ̇ܡܳܝܶܗ ܕ݁ܰܐܒ݂ܳܐ. ܘܗܳܐ ܟ݂ܽ݀ܠ ܫܰܪ̈ܒ݂ܳܢ ܛܽܘ̣ܒ݂ܳܐ ܝܳܗ̈ܒ݁ܳܢ ܠܶܟ݂ܝ̱ ܀

ܕ݁ܩܰܕ݁̈ܺܝ̣ܫܶܐ: ܟ݁ܰܕ݂ ܠܰܐܓ݂ܽܘ̇ܢܳܐ ܕ݂ܰܡܠܶܐ ܚܰܫ̈ܶܐ. ܥܰܠ̣ܬ݁ܽܘ̇ܢ ܣܳܗܕ݁̈ܶܐ ܦ݂ܰܐܝ̈ܰܝ ܢܶܨܚ̈ܳܢܶܐ. ܙܰܝܢܳܐ ܕ݂ܙܳܟ݂ܽܘ̣ܬ݂ܳܐ ܨܠܺܝ̣ܒ݂ܳܐ ܩܰܕ݁ܺܝ̣ܫܳܐ ܢܣܰܒ݂ܬ݁ܽܘ̇ܢ. ܘܒ݂ܶܗ ܐܰܒ݂ܗܶܬ݁ܬ݁ܽܘ̇ܢ ܠܓ݂ܰܒ݁ܳܐ ܕ݂ܣܶܡܳܠܳܐ ܀

ܕ݁ܥܰܢܺܝ̣ܕ݂̈ܶܐ: ܟܰܕ݂ ܒ݁ܰܥܒ݂ܳܪ ܦ݁ܽܘ̣ܩܕ݁ܳܢܶܗ ܕ݁ܳܐܕ݂ܳܡ. ܐܰܡܠ̣ܶܟ݂ ܡܰܘܬ݁ܳܐ ܥܰܠ ܟ݀݁ܽܠܗܽܘ̇ܢ ܝܰܠܕ݁̈ܰܘܗ̱ܝ. ܦ݁ܶܣܳܐ ܡܛܳܐ ܠܳܟ݂ ܡܳܪܝ̱ ܕ݁ܬ݂ܶܗܘܶܐ ܡܰܢܝܳܐ ܒ݂ܰܩܒ݂ܺܝ̣ܪ̈ܶܐ. ܘܬ݂ܶܫܬ݁ܶܐ ܠܟ݂ܳܣܳܐ ܗܰܘ ܕ݁ܰܡܙܰܓ݂ ܐܳܕ݂ܳܡ ܀

ܫܘܒ ܘ ܡܢ: ܢ̇ܰܣܶܩ ܫܽܘ̣ܒ݂ܚܳܐ ܠܰܐܒ݂ܳܐ ܓ݂ܢܺܝ̣ܙܳܐ. ܘܢ̇ܶܣܓ݁ܽܘ̇ܕ݂ ܠܰܒ݂ܪܳܐ ܕ݂ܦ݂ܰܪܩܰܢ ܒ݁ܰܨܠܺܝ̣ܒ݂ܶܗ. ܘܢ̇ܰܘܕ݁ܶܐ ܠܪܽܘ̣ܚ ܩܽܘ̣ܕ݂ܫܳܐ ܬ݂ܠܺܝ̣ܬ݂ܝܽܘ̣ܬ݂ܳܐ ܩܰܕ݁ܺܝ̣ܫܬ݁ܳܐ. ܚܰܕ݂ ܐܰܠܳܗܳܐ ܕ݂ܠܶܗ ܗ̱ܽܘ ܡܫܰܒ݁ܚܺܝ̣ܢܰܢ ܀

(ܓ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܫܠܳܡ ܠܶܟ݂ܝ̱ ܟ݁ܢܺܝ̣ܟ݂ܬ݁ܳܐ. ܒ݁ܬ݂ܽܘ̣ܠܬ݁ܳܐ ܝܳ݀ܠܕ݁ܰܬ݂ ܐܰܠܳܗܳܐ ܐܶܡܳܐ ܠܳܐ ܡܙܰܘܰܓ݂ܬ݁ܳܐ. ܘܠܶܟ݂ܝ̱ ܗ̱ܺܝ ܡܰܘܪ̈ܒ݂ܳܢ ܟ݀݁ܽܠ ܒ݁ܶܪ̈ܝܳܬ݂ܳܐ. ܐܶܡܶܗ ܕ݁ܢܽܘ̣ܗܪܳܐ ܡܬ݂ܽܘ̇ܡܳܝܳܐ ܀

ܐܰܢ̱ܬ݁ܝ̱ ܗ̱ܺܝ ܢܽܘ̣ܗܪܳܐ. ܕ݁ܰܐܝܠܶܝܢ ܕ݁ܝ݀ܳܬ݂ܒ݁ܺܝ̣ܢ ܒ݁ܚܶܫܽܘ̇ܟ݂ܳܐ ܘܗܶܕ݂ܪܳܐ ܘܫܽܘ̣ܒ݂ܗܳܪܳܐ ܕ݂ܰܡܗܰܝܡ̈ܢܶܐ. ܘܠܶܟ݂ܝ̱ ܗ̱ܺܝ ܡܰܘܪ̈ܒ݂ܳܢ ܟ݀݁ܽܠ ܒ݁ܶܪ̈ܝܳܬ݂ܳܐ. ܐܶܡܶܗ ܕ݁ܢܽܘ̣ܗܪܳܐ ܡܬ݂ܽܘ̇ܡܳܝܳܐ ܀

ܕ݁ܩܰܕ݁̈ܺܝ̣ܫܶܐ: ܣܳܗܕ݁̈ܶܐ ܒ݂ܪ̈ܺܝ̣ܟ݂ܶܐ. ܕ݁ܰܐܩܠܺܝܽܘ ܥܰܠ ܚܰܫ̈ܶܐ ܘܫܶܢܕ݁̈ܶܐ ܘܟ݂݀ܽܠ ܐܽܘ̣ܠ̈ܨܳܢܺܝܢ ܣܰܝܒ݁ܰܪܘ̱. ܘܗܳܐ ܡܶܢ ܓ݁ܰܪ̈ܡܰܝܗܽܘ̇ܢ ܢ݀ܳܒ݂ܥܺܝܢ. ܥܽܘ̣ܕ݂ܪ̈ܳܢܶܐ ܠܰܒ݂ܢ̈ܰܝܢܳܫܳܐ ܀

ܕ݁ܥܰܢܺܝ̣ܕ݂̈ܶܐ: ܥܒ݂ܶܕ݂ ܡܳܪܝ̱ ܒ݁ܪ̈ܰܚܡܰܝܟ݁. ܢܝܳܚܳܐ ܘܕ݂ܽܘ̣ܟ݂ܪܳܢܳܐ ܛ݀ܳܒ݂ܳܐ ܠܥܰܢܺܝ̣ܕ݂̈ܶܐ ܡܗܰܝܡ̈ܢܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ. ܘܶܐܫܬ݁ܺܝܽܘ ܠܰܕ݂ܡܳܟ݂ ܡܚܰܣܝܳܢܳܐ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܠܰܐܒ݂ܳܐ. ܘܬ݂ܰܘܕ݁ܺܝ̣ܬ݂ܳܐ ܠܰܒ݂ܪܳܐ ܕ݂ܡܶܢܶܗ ܘܰܠܪܽܘ̣ܚ ܩܽܘ̣ܕ݂ܫܳܐ ܗܽܘ̣ܠܳـܠܳܐ. ܐ̱ܪܳܙܳܐ ܕ݂ܰܬ݂ܠܺܝ̣ܬ݂ܳܝܽܘ̣ܬ݂ܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ ܀

ܛܶܟ݁ܣܳܐ ܫܒ݂ܺܝ̣ܥܳܝܳܐ

(ܐ)

ܕ݁ܝ݀ܳܠܕ݁ܰܬ݂ ܐܰܠܳܗܳܐ: ܠܗܰܘ ܕ݁ܶܐܬ݂ܺܝܠ̣ܶܕ݂ ܓ݁ܰܠܝܳܐܝ̣ܬ݂ ܡܶܢ ܒ݁ܬ݂ܽܘ̣ܠܬ݁ܳܐ ܕ݂ܠܳܐ ܙܽܘ̣ܘܳܓ݂ܳܐ. ܬ݁ܰܘ ܢ̇ܫܰܒ݁ܰܚ. ܠܗܰܘ ܫܶܡܫܳܐ ܕ݂ܙܰܕ݁ܺܝ̣ܩܽܘ̣ܬ݂ܳܐ ܕ݂ܰܨܡ̣ܰܚ ܡܶܢ ܥܽܘ̣ܒ݁ܳܐ ܒ݂ܬ݂ܽܘ̣ܠܳܐ. ܟ݀݁ܽܠܰܢ ܢ̇ܶܣܓ݁ܽܘ̇ܕ݂. ܘܰܕ݂ܠܳܐ ܫܶܠܝܳܐ ܢ̇ܫܰܒ݁ܚܺܝܘܗ̱ܝ ܠܥܳ݀ܠܰܡ ܥܳ݀ܠܡܺܝ̣ܢ ܀

ܠܗܰܘ ܕ݁ܡܶܢ ܡܰܪܝܰܡ ܐܶܬ݂ܺܝܠ̣ܶܕ݂ ܒ݁ܰܡܥܰܪܬ݂ܳܐ ܒ݂ܓ݂ܰܘ ܒ݁ܶܝܬ݂ ܠܚܶܡ. ܬ݁ܰܘ ܢ̇ܫܰܒ݁ܰܚ. ܘܺܝܢ̣ܶܩ ܚܰܠܒ݂ܳܐ ܐܰܝܟ݂ ܫܰܒ݂ܪܳܐ ܗܰܘ ܕ݁ܣܰܒ݁ܰܥ ܐܰܠܦ݂̈ܶܐ ܒ݂ܕ݂ܰܒ݂ܪܳܐ. ܟ݀݁ܽܠܰܢ ܢ̇ܶܣܓ݁ܽܘ̇ܕ݂. ܘܰܕ݂ܠܳܐ ܫܶܠܝܳܐ ܢ̇ܫܰܒ݁ܚܺܝܽܘܗ̱ܝ ܠܥܳ݀ܠܰܡ ܥܳ݀ܠܡܺܝ̣ܢ ܀

ܕ݁ܩܰܕ݁̈ܺܝ̣ܫܶܐ: ܠܗܰܘ ܕ݁ܚܰܝܶܠ ܗ̱ܘܳܐ ܠܰܐܬ݂ܠܺܝ̣̈ܛܰܘܗ̱ܝ ܒ݁ܰܐܓ݂ܽܘ̇ܢܳܐ ܕ݂ܠܽܘ̣ܩܒ݂ܰܠ ܒ݁ܺܝ̣ܫܳܐ. ܬ݁ܰܘ ܢ̇ܫܰܒ݁ܰܚ. ܘܰܐܩܪܶܒ݂ܘ̱ ܘܰܙܟ݂ܰܘ ܘܶܐܬ݂ܢܰܨܰܚܘ̱ ܘܰܐܥܕ݁ܺܝ̣ܽܘ ܟ݂ܠܺܝ̣̈ܠܶܐ ܕ݂ܙܳܟ݂ܽܘ̣ܬ݂ܳܐ. ܟ݀݁ܽܠܰܢ ܢ̇ܶܣܓ݁ܽܘ̇ܕ݂. ܘܰܕ݂ܠܳܐ ܫܶܠܝܳܐ ܢ̇ܫܰܒ݁ܚܺܝܘܗ̱ܝ ܠܥܳ݀ܠܰܡ ܥܳ݀ܠܡܺܝ̣ܢ ܀

ܕ݁ܥܰܢܺܝܕ݂̈ܶܐ: ܠܗܰܘ ܕ݁ܰܠܪܳܚܡܶܗ ܠܳܥܳܙܳܪ ܡܶܢ ܩܰܒ݂ܪܳܐ ܩ̣ܪܳܝܗ̱ܝ ܘܰܐܩܺܝ̣ܡܶܗ. ܬ݁ܰܘ ܢ̇ܫܰܒ݁ܰܚ. ܘܠܰܥܠܰܝܡܳܐ ܒ݂ܪܳܐ ܕ݂ܰܐܪܡܰܠܬ݁ܳܐ ܡܶܢ ܦ݁ܟ݂ܳܪ̈ܶܐ ܕ݂ܡܰܘܬ݁ܳܐ ܐܰܥܕ݁ܺܝ. ܟ݀݁ܽܠܰܢ ܢ̇ܶܣܓ݁ܽܘ̇ܕ݂. ܘܰܕ݂ܠܳܐ ܫܶܠܝܳܐ ܢܫܰܒ݁ܚܺܝܘܗ̱ܝ ܠܥܳ݀ܠܰܡ ܥܳ݀ܠܡܺܝ̣ܢ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܢ̇ܰܣܶܩ ܠܶܗ ܠܰܐܒ݂ܳܐ ܘܬ݂ܰܘܕ݁ܺܝ̣ܬ݂ܳܐ ܠܰܒ݂ܪܳܐ ܕ݂ܡܶܢܶܗ. ܬ݁ܰܘ ܢ̇ܫܰܒ݁ܰܚ. ܘܰܠܪܽܘ̣ܚ ܩܽܘ̣ܕ݂ܫܳܐ ܗܽܘ̣ܠܳـܠܳܐ ܐ̱ܪܳܙܳܐ ܕ݂ܰܬ݂ܠܺܝ̣ܬ݂ܳܝܽܘ̣ܬ݂ܳܐ. ܟ݁ܽܠܰܢ ܢ̇ܶܣܓ݁ܽܘ̇ܕ݂. ܘܰܕ݂ܠܳܐ ܫܶܠܝܳܐ ܢ̇ܫܰܒ݁ܚܺܝܘܗ̱ܝ ܠܥܳ݀ܠܰܡ ܥ݀ܳܠܡܺܝ̣ܢ ܀

(ܒ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܕ݁ܶܐܬ݂ܦ݁ܢܺܝ ܒ݂ܪ̈ܰܚܡܰܘܗ̱ܝ ܥܰܠ ܡܽܘ̣ܟ݁ܳܟ݂ܳܐ ܕ݂ܰܐܡܬ݂ܶܗ. ܗܽܘ̣ ܡܰܘܪܶܒ݂ ܠܝܳ݀ܠܶܕ݁ܬ݂ܶܗ. ܩܰܕ݁ܺܝ̣ܫܳܐ ܐܰܠܳܗܳܐ ܀

ܕ݁ܰܗܘܳܐ ܒ݂ܚܽܘ̣ܒ݁ܶܗ ܒ݁ܰܪܢܳܫܳܐ ܡܶܛܽܠܳܬ݂ܰܢ. ܗܰܘ ܕ݁ܰܦ݂ܪܰܩ ܘܫܰܘܙܶܒ݂ ܠܰܢ. ܩܰܕ݁ܺܝ̣ܫܳܐ ܐܰܠܳܗܳܐ ܀

ܕ݁ܩܰܕ݁̈ܺܝ̣ܫܶܐ: ܕ݁ܰܨܒ݂ܳܐ ܒ݂ܪ̈ܰܚܡܰܘܗ̱ܝ ܘܠܩܰܕ݁̈ܺܝ̣ܫܰܘܗ̱ܝ ܢ̣ܰܨܰܚ. ܒ݁ܰܐܓ݂ܽܘ̇ܢܳܐ ܠܽܘ̣ܩܒ݂ܰܠ ܒ݁ܺܝ̣ܫܳܐ. ܩܰܕ݁ܺܝ̣ܫܳܐ ܐܰܠܳܗܳܐ ܀

ܕ݁ܥܰܢܺܝ̣ܕ݂̈ܶܐ: ܐܰܢܺܝ̣ܚ ܒ݁ܪ̈ܰܚܡܰܝܟ݁ ܠܢܰܦ݂ܫ̈ܳܬ݂ܳܐ ܕ݂ܣܳܓ݂ܽܘ̇ܕ݂̈ܰܝܟ݁. ܕ݁ܰܐܘܕܺܝܽܘ ܒ݁ܳܟ݂ ܘܗܰܝܡܶܢܘ̱ ܒ݁ܳܟ݂. ܘܰܫܟ݂ܶܒ݂ܘ̱ ܘܶܐܬ݁ܬ݁ܢܺܝ̣ܚܘ̱ ܥܰܠ ܣܰܒ݂ܪܳܟ݂ ܀

ܫܘܒ ܘ ܡܢ: ܩܰܒ݁ܶܠ ܒ݁ܪ̈ܰܚܡܰܝܟ݁ ܠܬ݂ܶܫܡܫܬ݁ܳܐ ܕ݂ܣܳܓ݂ܽܘ̇ܕ݂̈ܰܝܟ݁. ܕ݁ܰܡܫܰܡܫܺܝ̣ܢ ܠܰܐܠܳܗܽܘ̣ܬ݂ܳܟ݂. ܩܰܕ݁ܺܝ̣ܫܳܐ ܐܰܠܳܗܳܐ ܀

(ܓ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܝܳ݀ܠܕ݁ܰܬ݂ ܐܰܠܳܗܳܐ ܫܽܘ̣ܒ݂ܗܳܪܶܗ ܕ݁ܥܳ݀ܠܡܳܐ ܠܰܐܝܠܶܝܢ ܕ݁ܡܰܘܪܒ݂ܺܝ̣ܢ ܠܶܟ݂ܝ̱. ܥܠܰܝܟ݁ܝ̱ ܗ̱ܽܘ ܬ݂ܟ݂ܺܝ̣ܠܺܝ̣ܢܰܢ. ܘܒ݂ܶܟ݂ܝ̱ ܡܶܬ݂ܓ݁ܰܘܣܺܝ̣ܢܰܢ. ܐܶܬ݂ܟ݁ܰܫܰܦ݂ܝ̱ ܘܰܒ݂ܥܳܝ ܠܗܰܘ ܕ݁ܡܶܢܶܟ݂ܝ̱ ܐܶܬ݂ܺܝܠ̣ܶܕ݂. ܕ݁ܢ̣ܶܥܒ݁ܶܕ݂ ܥܠܰܝܢ ܪ̈ܰܚܡܶܐ ܀

ܒ݁ܬ݂ܽܘ̣ܠܬ݁ܳܐ ܕ݂ܒ݂ܰܒ݂ܬ݂ܽܘ̣̈ܠܶܝܗ̇ ܠܰܐܠܳܗܳܐ ܝܶܠܕ݁ܰܬ݂݀ ܦ݁ܳܪܽܘ̇ܩܶܗ ܕ݁ܥܳ݀ܠܡܳܐ. ܒ݁ܝܰܘܡܳܐ ܕ݂ܕ݂ܽܘ̣ܟ݂ܪܳܢܶܟ݂ܝ̱. ܐܰܦ݁ܺܝ̣ܣܝ̱ ܠܺܝܚܺܝ̣ܕ݂ܶܟ݂ܝ̱. ܕ݁ܰܒ݂ܝܰܕ݂ ܨܠܰܘ̈ܳܬ݂ܶܟܝ̱ ܪ̈ܰܚܡܶܐ ܢ̣ܶܗܘܽܘ̇ܢ ܥܠܰܝܢ. ܒ݁ܰܬ݂ܪ̈ܰܝܗܽܘ̇ܢ ܥܳ݀ܠܡ̈ܶܐ ܀

ܕ݁ܩܰܕ݁̈ܺܝ̣ܫܶܐ: ܣ݀ܳܗܕ݁̈ܶܐ ܒ݂ܒ݂ܶܝܬ݂ ܩܽܘ̣ܕ݂ܫܳܐ ܣܺܝ̣ܡܺܝ̣ܢ ܓ݁ܰܪ̈ܡܰܝܟ݁ܽܘ̇ܢ ܠܺܐܝ̣ܩܳܪܶܗ ܕ݁ܡܳܪܟ݂ܽܘ̇ܢ. ܐܰܦ݁ܺܝ̣ܣܘ̱ ܠܰܡܫܺܝ̣ܚܳܐ. ܕ݁ܢ̣ܰܫܦ݁ܰܥ ܒ݁ܽܘ̣ܪ̈ܟ݁ܳܬ݂ܶܗ. ܥܰܠ ܥܺܕ̱݁ܬ݁ܳܐ ܘܝܰܠܕ݁̈ܶܝܗ̇ ܕ݁ܓ݂ܰܪ̈ܡܰܝܟ݁ܽܘ̇ܢ ܝܰܩܪܰܬ݂݀. ܕ݁ܫܰܝܢܳܐ ܢ̣ܰܡܠܶܟ݂ ܒ݁ܳܗ̇ ܀

ܕ݁ܥܰܢܺܝ̣ܕ݂̈ܶܐ: ܦ݁ܰܘܠܳܘ̇ܣ ܐܰܟ݂ܬ݁ܶܒ݂ ܠܰܢ ܕ݁ܡܺܝ̣̈ܬ݂ܶܐ ܕ݂ܒ݂ܰܡܫܺܝ̣ܚܳܐ ܡܰܘܬ݁ܳܐ ܠܳܐ ܛ݀ܳܥܡܺܝ̣ܢ. ܫܦ݁ܺܝ̣ܪ ܐܶܬ݂ܟ݁ܰܪܙܰܬ݂݀. ܡܶܢ ܣ݀ܳܦ݂ܪܳܐ ܡܗܺܝ̣ܪܳܐ. ܕ݁ܫܳܟ݂̈ܒ݁ܰܝ ܒ݁ܰܡܫܺܝ̣ܚܳܐ ܡܰܘܬ݁ܳܐ ܬ݂ܶܢܝܳܢܳܐ. ܠܥܳ݀ܠܰܡ ܠܳܐ ܛ݀ܳܥܡܺܝ̣ܢ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܠܺܐܝ̣ܬ݂ܽܘ̣ܬ݂ܳܟ݂ ܘܣܶܓ݂ܕ݁ܬ݂ܶܐ ܠܡܳܪܽܘ̣ܬ݂ܳܟ݂ ܦ݁ܳܪܽܘ̇ܩܶܗ ܕܥܳ݀ܠܡܳܐ. ܠܰܐܒ݂ܽܘ̣ܟ݂ ܐܺܝ̣ܩܳܪܳܐ. ܠܪܽܘ̣ܚܳܟ݂ ܪܽܘ̣ܡܪܳܡܳܐ. ܘܰܥܠܰܝܢ ܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ. ܒ݁ܰܬ݂ܪ̈ܰܝܗܽܘ̇ܢ ܥܳܠ̈ܡܶܐ ܀

ܛܶܟ݁ܣܳܐ ܬ݂ܡܺܝ̣ܢܳܝܳܐ

(ܐ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܠܗܰܘ ܝܰܠܕ݁ܳܐ ܓ݂ܢܺܝ̣ܙܳܐ ܕ݂ܶܐܬ݂ܒ݁ܰܕ݁ܰܩ ܗ̱ܘܳܐ. ܥܰܠ ܛܽܘ̣ܪ̈ܰܝ ܚܽܘ̣ܪܺܝ̣ܒ݂. ܒ݁ܓ݂ܰܘ ܣܰܢܝܳܐ ܒ݂ܢܽܘ̣ܪܳܐ ܕ݂ܡܶܬ݂ܓ݁ܰܘܙܠܳܐ. ܨܳܪ ܛܽܘ̣ܦ݂ܣܶܟ݂ܝ̱ ܡܰܠܝܰܬ݂ ܬ݁ܶܗܪܳܐ. ܠܦ݂ܽܘ̣ܪܩܳܢܳܐ ܘܫܽܘ̣ܘܙܳܒ݂ܳܐ ܕ݂ܺܝܠܰܢ ܡܗܰܝ̈ܡܢܶܐ. ܒ݁ܝܰܕ݂ ܗܳܕ݂ܶܐ ܕ݂ܠܳܐ ܫܶܠܝܳܐ ܟ݂݀ܽܠܰܢ ܡܰܘܪܒ݂ܺܝ̣ܢܰܢ ܀

ܣܰܢܝܳܐ ܗܰܘ ܕ݁ܰܚ̣ܙܳܐ ܗ̱ܘܳܐ ܡܽܘ̣ܫܶܐ. ܕ݁ܡܶܬ݂ܓ݁ܰܘܙܰܠ ܗ̱ܘܳܐ ܘܠܳܐ ܝܳܩܶܕ݂. ܒ݁ܬ݂ܽܘ̣ܠܬ݁ܳܐ ܕ݂ܟ݂ܺܝ̣ܬ݂ܳܐ ܠܶܟ݂ܝ̱ ܗ̱ܽܘ ܨܳܐܰܪ ܗ̱ܘܳܐ. ܕ݁ܕ݂ܠܳܐ ܙܰܪܥܳܐ ܝܺܠܶܕ݁ܬ݁ܺܝܽܘܗ̱ܝ. ܠܰܐܠܳܗܳܐ ܒ݂ܳܪܽܘ̇ܝܳܐ ܕ݂ܟ݂݀ܽܠܳܗ̇ ܒ݁ܪܺܝ̣ܬ݂ܳܐ. ܒ݁ܝܰܕ݂ ܗܳܕ݂ܶܐ ܕ݂ܠܳܐ ܫܶܠܝܳܐ ܟ݂݀ܽܠܰܢ ܡܰܘܪܒ݂ܺܝ̣ܢܰܢ ܀

ܕ݁ܩܰܕ݁̈ܺܝ̣ܫܶܐ: ܫܠܺܝ̣ܚ̈ܶܐ ܓ݂ܒ݂̈ܰܝܳܐ ܕ݂ܫܰܠ̣ܚܽܘܗ̱ܝ ܠܥ݀ܳܠܡܳܐ. ܘܫ̣ܳܛܘ̱ ܠܰܐܝܠܶܝܢ ܕ݁ܰܒ݂ܥܳ݀ܠܡܳܐ ܐܶܢܶܝܢ. ܘܠܰܒ݂ܫܽܘܗ̱ܝ ܠܰܡܫܺܝ̣ܚܳܐ ܐܰܠܳܗܳܐ. ܙܰܝܢܳܐ ܠܳܐ ܡܶܙܕ݁ܰܟ݂ܝܳܢܳܐ. ܠܦ݂ܽܘ̣ܪܩܳܢܳܐ ܘܫܽܘ̣ܘܙܳܒ݂ܳܐ ܕ݂ܺܝ̣ܠܰܢ ܡܗܰܝ̈ܡܢܶܐ. ܒ݁ܝܰܕ݂ ܗܳܕ݂ܶܐ ܕ݂ܠܳܐ ܫܶܠܝܳܐ ܟ݂݀ܽܠܰܢ ܡܩܰܠܣܺܝ̣ܢܰܢ ܀

ܕ݁ܥܰܢܺܝ̣ܕ݂̈ܶܐ: ܒ݁ܒ݂ܶܝܬ݂ ܡܰܥܡܪܳܐ ܕ݂ܩܰܕ݁̈ܺܝ̣ܫܶܐ ܗܳܢܽܘ̇ܢ. ܕ݁ܚܳܕ݂ܶܝܢ ܐܳܦ݂ ܪܳܘܙܺܝ̣ܢ ܕ݁ܠܳܐ ܫܶܠܝܳܐ. ܘܒ݂ܰܡܛ̈ܰܠ̱ـܠܶܐ ܕ݂ܢܽܘ̣ܗܪܳܐ ܡܳܪܰܢ. ܘܒ݂ܰܐܬ݂ܪ̈ܰܘܳܬ݂ܳܐ ܕ݂ܩܰܕ݁̈ܺܝ̣ܫܰܝܟ݁. ܬ݁ܰܡܳܢ ܐܰܢ̱ܬ݁ ܐܰܠܳܗܳܐ ܡܪܰܚܡܳܢܳܐ ܐܰܢܺܝ̣ܚ ܐܶܢܶܝܢ. ܠܢܰܦ݂ܫ̈ܳܬ݂ܳܐ ܕ݂ܥܰܒ݂ܕ݁̈ܰܝܟ݁ ܕ݁ܰܫܟ݂ܶܒ݂ܘ̱ ܥܰܠ ܣܰܒ݂ܪܳܟ݂ ܀

ܫܘܒ ܘ ܡܢ: ܫܽܘ̣ܒ݂ܚܳܐ ܠܶܗ ܠܰܐܒ݂ܳܐ ܩܰܕ݁ܺܝ̣ܫܳܐ. ܕ݁ܫ̣ܰܕ݁ܰܪ ܠܰܒ݂ܪܶܗ ܩܰܕ݁ܺܝ̣ܫܳܐ. ܘܰܒ݂ܥܽܘ̣ܒ݁ܳܐ ܕ݂ܰܟ݂ܝܳܐ ܘܩܰܕ݁ܺܝ̣ܫܳܐ. ܢܚ̣ܶܬ݂ ܘܰܫܪܳܐ ܩܰܕ݁ܺܝ̣ܫܳܐܝ̣ܺܬ݂. ܠܦ݂ܽܘ̣ܪܩܳܢܳܐ ܘܫܽܘ̣ܘܙܳܒ݂ܳܐ ܕ݂ܺܝܠܰܢ ܡܗܰܝ̈ܡܢܶܐ. ܒ݁ܝܰܕ݂ ܗܳܕ݂ܶܐ ܕ݂ܠܳܐ ܫܶܠܝܳܐ ܟ݂݀ܽܠܰܢ ܡܫܰܒ݁ܚܺܝ̣ܢܰܢ ܀

(ܒ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܐܶܡܳܐ ܕ݂ܟ݂ܺܝ̣ܬ݂ܳܐ ܘܠܳܐ ܡܙܰܘܰܓ݂ܬ݁ܳܐ. ܒ݁ܶܝܬ݂ ܡܰܥܡܪܳܐ ܗ̱ܘܰܝܬ݁ܝ̱ ܠܶܗ ܠܡܰܠܟ݁ܳܐ ܡܫܺܝ̣ܚܳܐ. ܓ݁ܰܘܣܳܐ ܒ݂ܶܟ݂ܝ̱ ܐ݀ܳܚܕ݁ܺܝ̣ܢܰܢ. ܕ݁ܡܶܢ ܢܶܟ݂ܝ̈ܳܢܶܐ ܢ̇ܶܫܬ݁ܰܘܙܰܒ݂. ܘܠܶܟ݂ܝ̱ ܟ݀݁ܽܠܰܢ ܡܰܘܪܒ݂ܺܝ̣ܢܰܢ܀

ܛܽܘ̣ܒ݂ܬ݂ܳܢܽܘ̣ܬ݂ܶܟ݂ܝ̱ ܚ̣ܙܳܐ ܚܰܙܩܺܝܶܐܠ. ܝܳ݀ܠܕ݁ܰܬ݂ ܐܰܠܳܗܳܐ ܘܬ݂ܰܪܥܳܐ ܫܰܡ̣ܗܶܟ݂ܝ̱. ܒ݁ܬ݂ܽܘ̣ܠܬ݁ܳܐ ܕ݂ܶܐܬ݂ܡܰܬ݁ܠܰܬ݂݀ ܒ݁ܣܰܢܝܳܐ. ܐܰܢ̱ܬ݁ܝ̱ ܗ̱ܺܝ ܝܳ݀ܠܕ݁ܰܬ݂ ܐܰܠܳܗܳܐ. ܘܠܶܟ݂ܝ̱ ܟ݀݁ܽܠܰܢ ܡܰܘܪܒ݂ܺܝ̣ܢܰܢ ܀

ܕ݁ܩܰܕ݁̈ܺܝ̣ܫܶܐ: ܓܰܪ̈ܡܰܘܗ̱ܝ ܕ݁ܝܰܘܣܶܦ݂ ܗܰܘ ܢܰܨܺܝ̣ܚܳܐ. ܣ̣ܳܓ݂ܘ̱ ܬ݁ܽܘ̣ܪ̈ܥܳܬ݂ܳܐ ܕ݂ܺܐܝܣܰܪ̈ܠܳܝܶܐ. ܘܓ݂ܰܪ̈ܡܰܝܟ݁ܽܘ̇ܢ ܕ݁ܺܝ̣ܠܟ݂ܽܘ̇ܢ ܣܳܗܕ݁̈ܶܐ. ܥܒ݂ܺܝ̣ܕ݂ܺܝ̣ܢ ܫܽܘ̣ܪ̈ܶܐ ܠܢܰܦ݂ܫ̈ܳܬ݂ܰܢ. ܬ݁ܚܶܝܬ݂ ܟ݁ܶܢ̈ܦ݂ܰܝܟ݁ܽܘ̇ܢ ܢ̇ܶܣܬ݁ܰܬ݁ܰܪ ܀

ܕ݁ܥܰܢܺܝ̣ܕ݂̈ܶܐ: ܠܳܐ ܡܳܝܽܘ̇ܬ݂ܳܐ ܕ݂ܰܢܚ̣ܶܬ݂ ܠܰܫܝܽܘ̇ܠ. ܘܰܗܘܳܐ ܒ݂ܩܰܒܪܳܐ ܝܰܘܡ̈ܶܐ ܬ݂ܠܳܬ݂ܳܐ. ܢܰܚ̣ܶܡ ܘܰܐܚܳܐ ܠܥܰܢܺܝ̣ܕ݂̈ܶܐ. ܙܒ݂ܺܝ̣̈ܢܰܝ ܒ݁ܰܕ݂ܡܳܟ݂ ܝܰܩܺܝ̣ܪܳܐ. ܦ݁ܪ̈ܺܝ̣ܩܰܝ ܒ݁ܰܨܠܺܝ̣ܒ݂ܳܟ݂ ܚܰܝܳܐ ܀

ܫܘܒ ܘ ܡܢ: ܐܳܠܶܦ݂ ܐܰܠܦ݂ܺܝ̈ܢ ܘܪܶܒ݁ܽܘ̇ ܪ̈ܶܒ݁ܘܳܢ. ܫܽܘ̣ܒ݂ܚ̈ܶܐ ܫܦ݂ܰܝ̈ܳܐ ܒ݂ܩ̈ܳܠܶܐ ܚܠܰܝ̈ܳܐ. ܡܩܰܪܒ݂ܳܐ ܥܺܕ̱݁ܬ݁ܳܐ ܥܰܡ ܝܰܠܕ݁̈ܶܝܗ̇. ܠܰܐܒ݂ܳܐ ܘܠܰܒ݂ܪܳܐ ܘܪܽܘ̣ܚ ܩܽܘ̣ܕ݂ܫܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ ܀

(ܓ)

ܕ݁ܝܳ݀ܠܕ݁ܰܬ݂ ܐܰܠܳܗܳܐ: ܡܰܘܪܒ݂ܺܝ̣ܢܰܢ ܟ݀݁ܽܠܰܢ. ܠܶܐܡܳܐ ܡܒ݂ܰܪܰܟ݂ܬ݁ܳܐ. ܗܳܝ ܕ݁ܡܶܢ ܥܽܘ̣ܒ݁ܳܗ̇ ܕ݁ܢ̣ܰܚ ܠܰܢ. ܢܽܘ̣ܗܪܳܐ ܠܳܐ ܡܶܬ݁ܕ݁ܰܪܟ݁ܳܢܳܐ. ܘܰܐܢ̣ܗܰܪ ܠܢܰܦ݂ܫ̈ܳܬ݂ܳܐ ܕ݂ܟ݂݀ܽܠܰܢ ܀

ܡܫܰܒ݁ܚܺܝ̣ܢܰܢ ܟ݁݀ܽܠܰܢ. ܠܰܐܒ݂ܳܐ ܡܬ݂ܽܘ̇ܡܳܝܳܐ. ܗܰܘ ܕ݁ܫ̣ܰܕ݁ܰܪ ܠܰܒ݂ܪܶܗ. ܘܰܢܚ̣ܶܬ݂ ܦ݁ܰܪܩ̣ܰܢ ܘܶܐܬ݂ܥ̣ܰܠܺܝ. ܘܰܐܢ̣ܗܰܪ ܠܢܰܦ݂ܫ̈ܳܬ݂ܳܐ ܕ݂ܟ݂݀ܽܠܰܢ܀

ܕ݁ܩܰܕ݁̈ܺܝ̣ܫܶܐ: ܡܩܰܠܣܺܝ̣ܢܰܢ ܟ݀݁ܽܠܰܢ. ܠܰܢܒ݂ܺܝ̈ܶܐ ܘܠܰܫܠܺܝ̣ܚ̈ܶܐ. ܘܣ݀ܳܗܕ݁̈ܶܐ ܕ݂ܰܢ̣ܨܰܚܘ̱ ܘܶܐܬ݂ܟ݁ܰܠܰܠܘ̱. ܒ݁ܰܕ݂ܡܳܐ ܕ݂ܰܐܪܕ݁ܺܝܽܘ ܨܰܘܪ̈ܰܝܗܽܘ̇ܢ. ܨܠܽܘ̇ܬ݂ܗܽܘ̇ܢ ܫܽܘ̣ܪܳܐ ܬ݂ܶܗܘܶܐ ܠܰܢ ܀

ܕ݁ܥܰܢܺܝ̣ܕ݂̈ܶܐ: ܡܶܬ݂ܰܥܗܕ݁ܺܝ̣ܢܰܢ ܟ݀݁ܽܠܰܢ. ܠܥܰܢܺܝ̣ܕ݂̈ܶܐ ܡܗܰܝܡ̈ܢܶܐ. ܕ݁ܶܐܟ݂ܰܠܘ̱ ܦ݁ܰܓ݂ܪܳܟ݂ ܩܰܕ݁ܺܝ̣ܫܳܐ. ܘܶܐܫܬ݁ܺܝܽܘ ܠܰܕ݂ܡܳܟ݂ ܡܚܰܣܝܳܢܳܐ. ܘܰܢ̣ܩܽܘ̣ܡܽܘ̣ܢ ܡܶܢ ܝܰܡܺܝ̣ܢܳܟ݂܀

ܫܘܒ ܘ ܡܢ: ܡܫܰܒ݁ܚܺܝ̣ܢܰܢ ܟ݀݁ܽܠܰܢ. ܠܰܬ݂ܠܺܝ̣ܬ݂ܳܝܽܘ̣ܬ݂ܳܐ. ܐܺܝ̣ܬ݂ܝܳܝܬ݁ܳܐ ܘܰܡܬ݂ܽܘ̇ܡܳܝܬ݁ܳܐ. ܣܓ݂ܺܝ̣ܕ݂ܰܬ݂ ܒ݁ܰܩܢܽܘ̇ܡ̈ܶܐ ܬ݂ܠܳܬ݂ܳܐ. ܚܰܕ݂ ܐܰܠܳܗܳܐ ܫܰܪܺܝ̣ܪܳܐ ܀