Ho lazan'ny Kôlejy SFX Fianarantsoa

.Fanofanana olom-banona ny Kolejy SFX !

Ry namana rehetra !

Miarahaba antsika ny tenako.

Ity misy zavatra tiako hambara antsika rehetra, fa zavatra kely tsiahiko, ary voatazoko tamin'ny toriteny nataon' i Mopera Alphonse Zafimahakoko, ilay Mopera malagasy, tamin'ny lamesa fanaovam-beloma an'i Mopera Beloha (Père Michel Peltereau-Villeneuve), tany Lille, tamin’ny taona 2012. Ka hoy io Mopera io tamin'ny toriteniny hoe : anisan'ny toerana fanofànana "ELITES" Malagasy io Kolejy SFX io, ao Madagasikara.

Hay izany isika mpianatry ny Kolejy SFX dia anisan'ny "ELITES" Malagasy ! Tsara ho tadidy izany ry namana !

Ka ny tiako holazaina amintsika dia voafintina amin’ireto fanontaniana vitsivitsy ireto hoe : raha tena "ELITES" Malagasy tokoa ary isika mpianatry ny Kolejy SFX, dia :

(1) - inona zany no mahasamihafa antsika izay voaofana tao amin'ny Kolejy SFX, amin'ireo Olom-pirenena Malagasy hafa ?

(2) - koa noho izany dia inona no tokony hataontsika izany, mba hankaherezana ireo zandry Malagasy rehetra izay mbola miofana ao amin'ny Kolejy amin'izao fotoana izao, sy ireo

izay mbola ho avy hiofana ao amin'io Kolejy io amin'ny fotoana manaraka ?

(3) - ary inona koa no tokony hataontsika hanatsaràna ny fiainan'ireo Mpiray tanindrazana rehetra amintsika isam-Paritra, amin'izany maha "ELITES" Malagasy antsika izany ?

Marina fa tsy "forum" ity sehatra ity, fa dia mba "tady atsipy any an-tandroky ny omby, ary teny atsipy an-tsaintsika mahalala" ny ahy.

Koa ity fampahatsiahivana ity izany, dia atolotro etoana mba hisintomana antsika hieritreritra lalina tokoa, fa tokony misy zavatra hataontsika izany amin'izany maha "ELITES" Malagasy antsika izany, mba :

(1) - ho lazan'io Kolejy SFX Fianarantsoa io,

(2) - sy hankaherezana ireo tanora zandry izay miofana sy hiofana ao,

(3) - ary koa eo amin'ny sehatry ny fampandrosoana sy fanatsaràna ny fiainan'ireo Mpiray tanindrazana amintsika ireo isan'andro.

Fa dia anjarantsika tsirairay izany no mahalala izay azontsika atao momba ireo tanjona telo ireo, eo amin'ny fiainana andavanandro. Fa ny tenako izany aloha dia tena vonona ny handray anjara amin'izany ezaka izany, any ivelan'ity Site WEB ity, raha ohatra ka ilaina sy azo atao izany.