ho antsika sfx fianara

Ho antsika rehetra nianatra, na nandalo ka nahita ny soa tao amin'ny SFX Fianara

• Ny vetsovetso tsa afa-tamin'aomby
• Ny hevitra tsy azo tsy amin'olombelona
• Tranon-dandy, ka ao anatiny no manatevina

Akory e?

Fanontaniana diso fantatsika loatra izay. Akory ny hamaliana an'izay?...Akory e!...tsara e!...salama e!...

Fomba atao hisintonana ny sain'ny olona, hahafahanao mifandray aminy. Hanombohana ny fifaneraserana aminy.

Ny vetsovetso tsa afa-tamin'aomby, fa ny vola hamidy ro tsa misy.

Be ny zavatra tiana hatao, efa ela no niheverana ny mba hisian'ny tranonkala mety mba hahamora ny fifandraisana, mba hahafahana mifampizara ny tsiahin'ny tsirairay. Io ilay hoe "vetsovetso tsa afa-tamin'aomby". Fa be ihany koa ny sakana tsy nahavitana azy hatramin'izay: eo ny maha-hevitr'olom-bitsy azy, izay fantatra mialoha fa tsy ho lasa lavitra na oviana na oviana. Ny tsy fahaiza-manao, manginy fotsiny. Ireo no "vola hamidy tsa misy".

Marobe isika no nandalo tao amin'ny SFX Fianarantsoa, tao amin'ny "Kzavie" e! Misy ny efa misotro ronono, misy ny mbola eo am-perin'asa, ao ny mbola mianatra ao. Miparitaka, tsy eto Madagasikara fotsiny fa maneran-tany isika. Ny tekinôlôjia ankehitriny dia tsy mahalavi-tany intsony. Tsy zoviana amintsika izay. Tsy vitsy amintsika ny tena mahafehy azy tanteraka, ao ny tia manandrakandrana ka mba mahita mangirana kely indraindray. Ny tsy mahay sobika mahay fatam-bary, hoy ny ohabolana. Misy ny mahalala sy mahay ny tantara, ao ny mahay manoratra. Tsy ampy anefa izay, fa ny hevitry ny maro no mahataka-davitra. Ny fifanampiana no hahavitan-javatra.

Ny hevitra tsy azo tsy amin'olombelona

Akory ny hatao? ny hazo tokana tsy mba ala, ny hevitra tsy azo tsy amin'olombelona. Hevitra atsipy ny anay, ho antsika izay tao amin'ny SFX Fianara, nianatra tao, nampianatra tao, niasa tao, na mahalala ny momba azy. Tsy hoe "forum" araka ny endriny efa fahitantsika amin'ny aterineto no tiana hatao eto, fa fifampizaràna mba hahalalantsika sy hampahalalantsika ny tantaran'io Kôlejy nahitantsika ny soa io: ny mpanabe, mpampianatra nanamarika antsika tao...tsy ho ferana ny lohahevitra hifampizaràna. Ny resaka pôlitika ihany no mety hanahirana satria samy hanana ny firehany ny tsirairay, ka aleo hajanona ho an'ireo efa matihanina amin'izany io resaka anankiray io.

Tsy ny fikambanan'ny maintimolaly no mamorona ity tranonkala ity, tsy ny Kôlejy Masindahy François Xavier ao Fianara ihany koa. Nefa antenaina fa tsy hahadiso antsika ny mampiasa ny logo-n'i SFX, satria toerana nahitana ny soa io, nanabe, "tao ro nahalava fe" izany hoe nahabe, ka sarotra ny hanadino azy.

Tranon-dandy, ka ao anatiny no manatevina

"Ny kely vatsy ro mitataka aloha", hoy ny fiteny. Ny ahy izany no hataoko be aloha. Nitsingerina androany 27 fevrie 2013 ny nandaozan'i Beloha antsika (P Michel Peltereau-Villeneuve). Ny zandry taty afara tsy nahalala azy intsony, na farafahabeny, nandre ny anarany. Izy sy i P Jean Marie Verley nantsoina koa hoe "Zafisolo" ary i P André Dupont samy efa nodimandry daholo, no toko telo nahamasa-nahandro ka nampijoro an'io Kôlejy Md François Xavier ao Fianarantsoa io. Fahatsiarovana azy (Beloha) amin'ny alalan'ny sary no hanombohantsika azy. Ka izay manan-ko lazaina dia alefaso eto (kilikeo eto), fa heveriko fa ny fiaraha-miasa no hahatsara ny zavatra hatao eto amin'ity tranonkala ity. Tsy hijanona amin'i Beloha ihany ity resaka ity, fa hitarintsika any aoriana. Ka arakaraky ny fahatongavan'ny hevitra sy ny sary no hanaovantsika azy. Ankoatran'izy telo mirahalahy ireo, dia betsaka ny mpanabe nanamarika ny Kôlejy. Raha hiteny isika izao hoe... " i Baba", dia azo antoka fa ho betsaka ny tsiahy hivoitra avy any amintsika zokinjokiny any, ka ny tsiahy tahaka an'izay no antenaina hifampizaràna eto.

Toy ny zavatra vao atomboka rehetra, dia tsy tonga dia ho tonga lafatra izy ity. Ny fototra no anombohana ny taon-trano, tsy maintsy mbola hiparitaka ao, ny vato sy ny biriky ary ny fasika sy ny vy. Koa tsikelikely, dia hataontsika toy ny tranon-dandy izy ity, na dia tranonkala aza, ka avy ao anatiny isika no hanatevina azy.

Koa manasa anao izay tao amin'i Kzavie àry, na ho anao izay tsy voatery ho nandalo tao, nefa manan-kolazaina momba azy, mba hizara eto izay fantatrao. Ka na teny malagasy na teny vahiny no anoratanao, dia ho raisina an-tanan-droa ny hevitrao, satria ny SFX ao Fianara no nahitantsika ny soa, izy no nahabe ka hiezahantsika hofantarina misimisy kokoa, sy hampahafantarintsika.

Calixte Razafimahatratra (SFX 1974 - 1980 --> 1982)

PS: Araka ny voalaza ery ambony, dia fototra ihany ireto takila vitsivitsy ireto, Ny fiaraha-miasantsika no hampitsangana ny trano. Miandry ny lahatsoratra avy aty aminao àry, na fanitsiana ny diso io, na famenoana ny banga, na koa lohahevitra vaovao tianao haroso hifampizaràna. Vao mainka tsara koa raha misy afaka mandika izay voalaza ato ho amin'ny teny vahiny, satria iarahantsika mahalala fa nisy ny vazaha nandalo tao amin'ny SFX, pretra, mpampianatra sy ny hafa koa. Tsy havahina izy ireo fa nahitantsika ny soa.

Soso-kevitra samihafa hifampizarana, hanatsarana.

Maintimolaly anankiray no nahatonga taratasy. Ka mahafaly ny ifampizarana izany eto, satria mampiseho ny fitiavany ny Kôlejy izany ka nahatonga azy nandany andro sy fotoana hizarana izay heveriny fa hanatsarana ity tranonkala ity sy hanatsarana ny Kôlejy SFX ihany koa....jereo eto ny tohiny.

Izahay mpiandraikitra ity tranonkala ity dia efa niresaka taminy naharitra taorian'ny nahazahoanay ny hevitra nalefany. Araka ny efa voalazanay ato ombieny ombieny, dia "ny hevitry ny maro no mahataka-davitra", ary ny tsirairay no entanina haneho ny heviny ka ny zavatra tsara dia holazaina hoe tsara. Izay tsy metimety kosa, na izay hevitra tsy azo; na heverinao hoe diso fotsiny izao, araka ny fahitanao azy; dia holazaina ihany koa; ka hifanakalozan-kevitra.

Araka ny efa voalaza ato amin'ny tranonkala ihany, dia tsara ny mba hamakianao ireto hevitra nahatonga anay namorona ity tranonkala ity:

• Ny vetsovetso tsa afa-tamin'aomby, fa ny vola hamidy ro tsa misy
• Ny hevitra tsy azo tsy amin'olombelona
• Tranon-dandy, ka ao anatiny no manatevina

Ireto fepetra ireto koa, dia iangaviana anao mba hovakianao alohan'ny handraisanao anjara amin'ny fanehoan-kevitra isan-karazany sy ny adihevitra rehetra hatao ato.

Tsy fanao ny mijery arina an-tava. Ny hevitra no andeha hampiadiana, fa izay no fiantombohan'ny fanatsarana sy ny fampandrosoana.

Misokatra àry ny adihevitra, singanina manokana ny voalazan'ny mpanoratra amin'ny hoe: tsetsatsetsa tsy aritra,

" ...ohatra akaiky be : novaina ho lycée d'élite i SFX tamin'ny fin d'année scolaire teo ka maro be no noroahina izay tsy nahazo moyenne mihoatra ny 12/20 , fa kosa tokony nomena sommation : avertissement , préavis maromaro ny Ray aman-dreny hoe dia handroaka anie izahay fa tsy am-bava indray mandeha dia maro no tsy nino ka tsy faly ary nahatonga fahankahalana SFX Ambatomena , sy finoana catholique ..."

Ianareo any an-toerana no mahalala misimisy kokoa ny amin'izay: Raiamandrenin'ny mpianatra, Mpanabe fa indrindra ianareo Raiamandreny mitantana ny Kôlejy dia i Maopera Recteur sy ny mpiara-miasa aminy. Mba tsy ho feon-dakolosy tokana no ho heno fa samy hilaza ny heviny eto izay manan-kolazaina. Tsy ny hanasoketa olona no tanjontsika, na koa handrava izay fandaminana tokony sy tsy maintsy hatao, fa adihevitra hanatsaràna sy hampandrosoana an'io Kôlejy nahitantsika ny soa io.

29/09/2013

Hiandry ny fotoana halalaka ve, sa ny fepetra rehetra ho feno vao hihetsika?

Misantatra ny volana septambra isika izao amin'ity taona 2013 ity. Vita ny vakansy ho an'ny mpianatra, vita ny fanadinana ho an'ny sasany. Ny mpiasa sasany izay afaka naka rivotra miverina mamonjy ny asa aman-draharahany, ny hafa kosa nanohy ny asa fanao an-davanandro. Tsy misy ny fotoana malalaka. Ny vola moa dia tsy resahina intsony, fa tonga amin'ny fitenintsika hoe "ny vola samy manana fa ny isany no tsy mitovy."

Rahoviana?

Fanontaniana no apetraka amintsika iantefan'ity tranonkala ity:

Rahoviana ny vola no ho ampy hanaovana ny tiana hatao rehetra?

Rahoviana ny fotoana no halalaka ka hahafahanao hanampy, hifanampy eto amin'ity tranonkala ity?

Hiandry ny fahaiza-manao ho tonga lafatra ve isika vao hihetsika hanao zavatra?

Tonga ato an-tsaina ny fanoharana ao amin'ny Evanjely, momba ny talenta nankinina tamin'ireo mpanompo telo, ny iray voalohany nanankinana talenta dimy, ny faharoa talenta roa, ny an'ilay fahatelo talenta iray.

Am-pahatsorana no ilazana eto fa talenta iray angamba no mba mety ananan'ny mpandrindra ity tranonkala ity. Mba miezaka ny tena ny mba tsy handevina izany, na dia fantatra mialoha fa kely sy bitika aza. Sao ny talenta kely nankinina tamin'ny tena hoesorin'ny Tompony indray, noho ny hakanosana tsy nahasahiana nampiasa azy.

Trafon-kena ome-mahery izy ity ka am-bava homana, am-po mieritreritra. Raha mba mahatsiaro tena ho nanovo soa tao amin'ny Kôlejy Md François Xavier ao Fianarantsoa ianao, dia mba ampio re, ampiasao ny talenta dimy, talenta roa, na ny talenta iray anananao. Ny fandraisanao anjara mavitrika no tena andrasana eto, fa ny fihetseham-po dia mety ho tsara nefa tsy ampy hanaovan-javatra. Ka dia isaorana anao mialoha izay hizara ny fahaizanao, hampiasa izany ka na dia tsy hety halalaka aza ny fotoana, dia hanao izay ho afaka isika hampisy izany, hahafahana mifanampy.